1 ⲛⲁⲓ ⲇⲉ ⲛⲧⲉⲣϥϫⲟⲟⲩ ⲛⲁⲩ ⲛϭⲓⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ · ⲉⲩⲛⲏϫ ⲉⲃⲟⲗ ϩⲓϫⲙⲡ . ⲛⲧϩⲉ ⲛⲛⲉⲧⲙⲟⲟⲩⲧ ·
…
2 ⲁϥⲁⲙⲁϩⲧⲉ ⲛⲛⲉⲩϭⲓϫ ·
…
3 ⲁϥⲧⲟⲩⲛⲟⲥⲟⲩ ·
…
4 ⲁϥⲛⲟⲩϫⲉ ⲛⲧϩⲟⲧⲉ ⲛⲥⲁⲃⲟⲗ · ⲙⲙⲟⲟⲩ ·
…
5 ⲁϥϯ ⲛⲁⲩ ⲛⲛⲛⲟⲩⲃ ⲉϥϫⲱ ⲙⲙⲟⲥ · ϫⲉⲛⲛⲉⲩⲱϫⲛ ·
…
6 ⲟⲩⲇⲉ ⲛⲛⲉⲩϣⲱⲱⲧ ·
…
7 ⲟⲩⲇⲉ ⲛⲛⲉⲧⲛⲣϩⲁⲏ ⲛⲗⲁⲁⲩ · ⲛⲁⲅⲁⲑⲟⲛ ·
…
8 ⲟⲩⲇⲉ ⲛⲛⲉⲧⲛⲉⲓ ⲉⲡⲁϩⲟⲩ · ϩⲛⲛⲉⲧⲛⲑⲩⲥⲓⲁ . ⲙⲛⲛⲉⲧⲛⲁⲅⲁⲡⲏ · ϫⲓⲛⲡϩⲟⲟⲩ · ϣⲁⲛⲧⲉⲧⲛϫⲱⲕ ⲉⲃⲟⲗ .
…
9 ⲙⲡϣⲁ ϩⲛⲟⲩⲥⲡⲟⲩⲇⲏ ⲉⲛⲁⲛⲟⲩⲥ ·
…
10 ⲁⲩⲱ ⲛⲧⲉⲧⲛϫⲱⲕ ⲉⲃⲟⲗ · ⲙⲡⲉⲧⲛⲣⲁϣⲉ · ⲛⲧⲉⲧⲛⲕⲱ ⲉⲃⲟⲗ · ⲛⲛⲉⲥⲛⲏⲩ . ⲛⲧⲁⲩⲉⲓ ϣⲁⲣⲱⲧⲛ ϩⲙⲡⲁⲣⲡⲙⲉⲉⲩⲉ · ⲛⲅⲧⲛⲛⲟⲟⲩ ⲧⲁⲥⲟⲩ · ⲙⲡⲉⲥⲟⲟⲩ · ⲙⲛⲡⲧⲉⲃⲧ ·
…
11 ⲁⲩⲱ ⲛⲅⲥⲱⲧⲉ ⲛⲧⲉϣⲧⲏⲛ ·
…
12 ⲁⲩⲱ ⲡϣⲟⲙⲛⲧ ⲛϣⲉ · ⲛϩⲟⲗⲟⲕⲟⲧⲧⲓⲛⲟⲥ · ⲙⲛⲡⲕⲉϣⲟⲙⲛⲧ ⲛⲧⲉⲣⲙⲏⲥⲓⲟⲛ ·
…
13 ⲁⲩⲱ ⲉⲣⲉⲧⲉⲥⲫⲣⲁⲅⲓⲥ · ϩⲓϫⲱⲟⲩ · ⲉⲩⲧⲟⲟⲃⲉ ϩⲙⲡⲣⲁⲛ ⲙⲡⲉⲓⲱⲧ · ⲙⲛⲡϣⲏⲣⲉ . ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲟⲩⲙⲛⲧⲛⲟⲩⲧⲉ ⲛⲟⲩⲱⲧ ⲉⲥϫⲏⲕ ⲉⲃⲟⲗ ·
…
14 ⲛⲁⲓ ⲇⲉ ⲛⲧⲉⲣϥϫⲟⲟⲩ ⲛⲁⲩ ·
…
15 ⲁⲩϯ ⲛⲁⲩ ⲛϯⲣⲏⲣⲏ ·
…
16 ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ · ϩⲛⲟⲩⲉⲟⲟⲩ · ⲙⲛⲛⲉϥⲁⲅⲅⲉⲗⲟⲥ ⲧⲏⲣⲟⲩ ⲛⲙⲙⲁϥ · ⲉⲣⲉⲇⲱⲣⲟⲑⲉⲟⲥ ⲙⲛⲑⲉⲟⲡⲓⲥⲧⲏ · ϭⲱϣⲧ ⲛⲥⲱϥ · ϣⲁⲛⲧⲉϥⲃⲱⲕ ⲉϩⲣⲁⲓ ⲉⲧⲡⲉ · ϩⲛⲟⲩⲉⲓⲣⲏⲛⲏ ϩⲁⲙⲏⲛ ·
…
17 ⲇⲱⲣⲟⲑⲉⲟⲥ ⲇⲉ ⲙⲛⲑⲉⲟⲡⲓⲥⲧⲏ · ⲧⲉϥⲥϩⲓⲙⲉ ·
…
18 ⲁⲩⲉⲓⲣⲉ ⲕⲁⲧⲁⲧϩⲉ ⲛⲧⲁϥϩⲱⲛ ⲉⲧⲟⲟⲧⲟⲩ · ⲛϭⲓⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ .
…
19 ⲁⲩϫⲱⲕ ⲉⲃⲟⲗ ⲙⲡϣⲁ ϩⲛⲟⲩⲥⲡⲟⲩⲇⲏ ⲉⲛⲁⲛⲟⲩⲥ .
…
20 ⲁⲩⲱ ⲙⲡⲟⲩⲕⲁⲧⲟⲟⲧⲟⲩ ⲉⲃⲟⲗ · ⲙⲡⲉⲧⲟⲩⲉⲓⲣⲉ ⲙⲙⲟϥ ϩⲛϩⲉⲛⲑⲩⲥⲓⲁ · ⲙⲛϩⲉⲛⲡⲣⲟⲥⲫⲟⲣⲁ · ϩⲙⲡⲣⲁⲛ · ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ · ϣⲁⲡⲉϩⲟⲟⲩ ⲙⲡⲉⲩϫⲱⲕ ⲉⲃⲟⲗ ·
…
21 ⲁⲩⲱ ⲙⲙⲉⲣⲓⲧⲉ ⲁⲧⲉⲧⲛⲡⲗⲩⲣⲟⲫⲟⲣⲉⲓ ⲛⲟⲩⲕⲟⲩⲓ ⲉϫⲛⲛⲉⲛⲧⲁⲧⲉⲧⲛⲥⲟⲧⲙⲟⲩ ⲧⲏⲣⲟⲩ ⲧⲉⲛⲟⲩ · ⲁⲣⲁ ⲙⲡⲉⲛⲓⲁⲓⲛⲓⲅⲙⲁ ⲣⲱϣⲉ · ⲉⲧⲉⲧⲡⲉⲧⲛϩⲏⲧ .
…
22 ⲁⲣⲁⲧⲉⲧⲛⲁϫⲟⲟⲩ ⲟⲛ ⲉϯ ⲙⲡⲛⲟⲩⲧⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
23 ⲁⲣⲁ ⲁⲧⲉⲧⲛⲑⲁⲣⲉⲓ ⲉϫⲛⲛⲉⲛⲧⲁⲧⲉⲧⲛⲧⲁⲁⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉϥⲛⲁⲧⲁⲁⲩ ⲛⲏⲧⲛ . ⲙⲛⲧⲉⲩⲙⲏⲥⲉ ⁖ⲻ ⲉⲓⲥϩⲏⲏⲧⲉ ⲅⲁⲣ ⲱ ⲛⲁⲙⲉⲣⲁⲧⲉ .
…
24 ⲁⲧⲉⲧⲛⲛⲁⲩ ⲉⲧⲛⲟϭ ⲛⲇⲱⲣⲉⲁ ⲙⲡⲛⲟⲩⲧⲉ · ⲛⲧⲁⲥⲧⲁϩⲉⲡⲉⲓⲣⲱⲙⲉ ⲉⲧⲟⲩⲁⲁⲃ ·
…
25 ⲇⲱⲣⲟⲑⲉⲟⲥ · ⲙⲛⲧⲉϥⲥϩⲓⲙⲉ ⲑⲉⲟⲡⲓⲥⲧⲏ · ϫⲉⲛⲧⲉⲣⲟⲩⲥⲟⲩⲧⲱⲛⲧⲉⲩϩⲏⲧ ⲉϩⲟⲩⲛ ⲉⲡⲛⲟⲩⲧⲉ ·
…
26 ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ .
…
27 ⲁⲡⲛⲟⲩⲧⲉ ϩⲱⲱϥ ⲥⲟⲩⲧⲱⲛ ⲧⲉϥⲁⲅⲁⲡⲏ ·
…
28 ⲉϩⲟⲩⲛ ⲉⲣⲟⲟⲩ ·
…
29 ⲁϥⲧⲛⲛⲟⲟⲩ ⲛⲁⲩ ⲙⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ . ⲙⲓⲭⲁⲏⲗ ·
…
30 ⲁϥⲥⲟⲃⲧⲉ ⲛⲁⲩ ⲛⲟⲩⲛⲟϭ ⲙⲙⲛⲧⲣⲙⲙⲁⲟ .
…
31 ⲛⲁⲧⲱϫⲛ ⁖ⲙⲛⲡⲕⲉⲥⲟⲗⲥⲗ ⲛⲧⲙⲛⲧⲣⲙⲙⲁⲟ ⲛⲙⲡⲏⲩⲉ ·
…
32 ⲁⲛⲟⲛ ⲇⲉ ϩⲱⲱⲛ · ⲱ ⲛⲁⲙⲉⲣⲁⲁⲧⲉ ·
…
33 ⲁⲩⲱ ⲛⲁⲥⲛⲏⲩ · ⲉⲓⲥϩⲏⲏⲧⲉ ⲁⲛⲉⲓⲙⲉ · ϩⲛⲟⲩⲙⲉ · ϫⲉⲛⲕⲁⲛⲓⲙ · ⲉⲛⲛⲁⲧⲁⲁⲩ ⲙⲡⲛⲟⲩⲧⲉ ·
…
34 ⲙⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲧⲛⲛⲁϫⲓⲧⲟⲩ · ⲙⲛⲡⲉⲩⲕⲱⲃ ϩⲙⲡⲉⲓⲕⲟⲥⲙⲟⲥ · ⲙⲡⲁⲧⲛⲡⲱϩ ⲣⲱ ⲉⲛⲁⲙⲡⲏⲩⲉ ·
…
35 ⲧⲉⲛⲟⲩ ϭⲉ ⲱ ⲛⲁⲕⲣⲟⲁⲧⲏⲥ ⲙⲡⲣϫⲛⲁⲁⲩ ⲉϯ ⲕⲁⲧⲁⲧⲉⲛϭⲟⲙ . ⲉⲛⲥⲟⲟⲩⲛ · ϫⲉⲡⲧⲉⲧⲛⲛⲁⲧⲁⲁϥ · ⲙⲡⲁⲣⲭⲁⲅⲅⲉⲗⲟⲥ . ⲙⲓⲭⲁⲏⲗ ·
…
36 ϥⲛⲁⲇⲓⲁⲕⲱⲛⲉⲓ ⲙⲙⲟϥ ⲛⲁⲛ · ϩⲛⲟⲩⲣⲁϣⲉ .
…
37 ⲕⲁⲛ ⲟⲩⲕⲟⲩⲓ ⲡⲉ ·
…
38 ⲕⲁⲛ ⲟⲩⲛⲟϭ ⲡⲉ ϥⲛⲁϫⲓ ⲛⲧⲉⲛⲡⲣⲟϩⲁⲓⲣⲉⲥⲓⲥ · ⲛⲧⲟⲟⲧⲛ ⁖ⲻ
…
39 ⲙⲉⲣⲉⲡⲛⲟⲩⲧⲉ ⲅⲁⲣ ϫⲛⲟⲩⲕ ⲉⲩϩⲱⲃ . ⲡⲁⲣⲁⲧⲉⲕϭⲟⲙ · ⲁⲗⲗⲁ ⲟⲩⲡⲣⲟϩⲁⲓⲣⲉⲥⲓⲥ ⲙⲙⲁⲧⲉ · ⲧⲉ ⲧϥϣⲓⲛⲉ ⲛⲥⲱⲥ ⁖ⲻ
…
40 ⲉϣϫⲉ ⲙⲙⲟⲛ ⲥⲱⲧⲙ ⲙⲡⲉⲟⲩⲟⲉⲓϣ ⲉⲣⲉⲡⲉⲛⲥⲱⲧⲏⲣ · ϩⲙⲡⲕⲟⲥⲙⲟⲥ ⲛⲙⲙⲁⲛ ·
…
41 ⲛⲉⲣⲉⲛⲣⲙⲙⲁⲟ ⲉⲓⲛⲉ ⲙⲙⲟⲟⲩ ⲧⲏⲣⲟⲩ · ⲉⲩⲛⲟⲩϫⲉ ⲙⲙⲟⲟⲩ · ⲉⲡⲕⲁⲍⲟⲫⲓⲗⲁⲕⲓⲟⲛ ·
…
42 ⲁⲩⲱ ⲙⲡⲉⲡⲛⲟⲩⲧⲉ ⲧⲙⲁⲓⲟⲟⲩ · ⲛϩⲟⲩⲟ ⲁⲗⲗⲁ ⲛⲧⲉⲣⲉⲧⲉⲭⲏⲣⲁ ⲛϩⲏⲕⲉ ⲕⲱⲧⲉ ϩⲙⲡⲉⲥⲏⲓ ·
…
43 ⲁⲥϩⲉ ⲉⲗⲉⲡⲧⲱⲛ ⲥⲛⲁⲩ · ⲉⲧⲉⲛⲟⲙⲓⲥⲙⲁ ⲥⲛⲁⲩ ⲛⲉ · ⲛⲧⲁⲥⲛⲧⲟⲩ ϩⲛⲟⲩϭⲉⲡⲏ ·
…
44 ⲁⲥⲛⲟϫⲟⲩ ⲉⲡⲕⲁⲍⲟⲫⲓⲗⲁⲕⲓⲟⲛ ·
…
45 ⲁⲩⲱ ⲁⲡⲛⲟⲩⲧⲉ ϫⲓ ⲛⲧⲉⲥⲡⲣⲟϩⲁⲓⲣⲉⲥⲓⲥ ⲛⲧⲟⲟⲧⲥ ·
…
46 ⲁⲩⲱ ⲁϥⲙⲁⲕⲁⲣⲓⲍⲉ ⲙⲙⲟⲥ · ϫⲉⲡⲉⲛⲧⲁⲥϩⲉ ⲉⲣⲟϥ ⲧⲏⲣϥ ϩⲙⲡⲉⲥⲏⲓ ·
…
47 ⲁⲥⲧⲁⲁϥ ⲙⲡϫⲟⲉⲓⲥ ·
…
48 ⲛⲧⲟⲕ ⲇⲉ ϩⲱⲱⲕ ⲱ ⲡⲁⲙⲉⲣⲓⲧ ·
…
49 ⲁⲣⲓ ⲁⲡⲁ ⲧⲟⲟⲧⲕ ⲉϯ ⲙⲡⲛⲟⲩⲧⲉ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
50 ⲁⲩⲱ ⲡⲛⲟⲩⲧⲉ ϩⲱⲱϥ ⲛⲁϯ ⲛⲁⲕ ⲛⲟⲩⲁϣⲏ ⲛⲁⲅⲁⲑⲟⲛ ·
…
51 ⲁⲩⲱ ⲙⲓⲭⲁⲏⲗ ⲛⲁⲇⲓⲁⲕⲱⲛⲉⲓ ⲙⲙⲟⲟⲩ ⲛⲁⲕ ·
…
52 ⲉⲕϣⲁⲛϯ ⲛⲟⲩⲡⲣⲟⲥⲫⲟⲣⲁ ⲙⲡⲛⲟⲩⲧⲉ · ϩⲙⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
53 ⲡⲛⲟⲩⲧⲉ ⲛⲁⲧⲙⲙⲟⲕ ⲙⲡⲟⲉⲓⲕ ⲙⲡⲱⲛϩ ϩⲛⲙⲡⲏⲩⲉ ⁘ ⲉⲕϣⲁⲛϩⲉⲃⲥ ⲟⲩⲁ ⲉϥⲕⲏⲕⲁϩⲏⲩ . ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
54 ⲡⲛⲟⲩⲧⲉ ϩⲱⲱϥ ·
…
55 ⲛⲁϯ ϩⲓⲱⲱⲕ ⲛⲟⲩϩⲃⲥⲱ ⲛⲟⲩⲟⲉⲓⲛ ϩⲛⲙⲡⲏⲩⲉ .
…
56 ⲉⲕϣⲁⲛϯ ⲛⲟⲩⲁⲡⲟⲧ ⲛⲏⲣⲡ ⲛⲟⲩⲁ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
57 ⲡⲛⲟⲩⲧⲉ ϩⲱⲱϥ ⲛⲁⲧⲥⲟⲕ ·
…
58 ⲉⲃⲟⲗ ϩⲙⲡⲅⲉⲛⲏⲙⲁ · ⲛⲧⲃⲱ · ⲛⲉⲗⲟⲟⲗⲉ ⲙⲙⲉ ·
…
59 ⲁⲩⲱ ⲕⲁⲛ ⲟⲛ ⲙⲛⲧⲁⲁⲕⲏⲣⲡ ⲙⲙⲁⲩ · ⲙⲡⲛⲁⲩ ⲛⲣ ⲡⲁⲓ · ⲧⲥⲉⲟⲩⲁ ⲙⲙⲁⲧⲉ · ϩⲙⲡⲣⲁⲛ ⲙⲙⲓⲭⲁⲏⲗ .
…
60 ⲁⲩⲱ ⲡⲛⲟⲩⲧⲉ ϩⲱⲱϥ ⲛⲁⲧⲥⲟⲕ ⲉⲃⲟⲗ · ϩⲛⲧⲡⲏⲅⲏ ⲙⲙⲟⲩ ⲛⲱⲛϩ · ⲉⲧⲥⲱⲕ · ⲉⲃⲟⲗ ϩⲁⲡⲉϥⲑⲣⲟⲛⲟⲥ ⲉⲧⲟⲩⲁⲁⲃ ·
…
61 ⲉⲕϣⲁⲛⲃⲱⲕ ⲛⲅϭⲙⲡϣⲓⲛⲉ · ⲛⲟⲩⲁ · ⲉϥϣⲱⲛⲉ ⲙⲙⲁⲧⲉ ·
…
62 ⲙⲡⲉϩⲟⲟⲩ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
63 ⲡⲛⲟⲩⲧⲉ ϩⲱⲱϥ · ⲛⲁⲧⲛⲛⲟⲟⲩ ⲙⲙⲓⲭⲁⲏⲗ . ⲛϥϭⲙⲡⲉⲕϣⲓⲛⲉ ·
…
64 ϩⲙⲡⲉϩⲟⲟⲩ ⲙⲡⲉⲕⲛⲟϭ ⲛϣⲱⲛⲉ · ⲉⲧⲉⲡⲁⲓ ⲡⲉ · ⲡϣⲱⲛⲉ ⲙⲡⲉⲕⲙⲟⲩ ·
…
65 ⲁⲩⲱ ⲉⲕϣⲁⲛⲃⲱⲕ · ϣⲁⲟⲩⲁ · ⲉϥϩⲙⲡⲉϣⲧⲉⲕⲟ ·
…
66 ϩⲙⲡⲉϩⲟⲟⲩ ⲙⲡϣⲁ ⲙⲙⲓⲭⲁⲏⲗ · ⲛⲅⲥⲗⲥⲱⲗϥ ·
…
67 ⲡⲛⲟⲩⲧⲉ ϩⲱⲱϥ · ⲛⲁⲧⲛⲛⲟⲟⲩ ⲛⲁⲕ · ⲙⲙⲓⲭⲁⲏⲗ · ⲛϥⲛⲁϩⲙⲕ ⲉⲃⲟⲗ ϩⲙⲡⲉϣⲧⲉⲕⲟ ⲛⲁⲙⲛⲧⲉ ·
…
68 ⲁⲩⲱ ⲡⲛⲟⲩⲧⲉ ϩⲱⲱϥ ⲛⲁϫⲟⲟⲥ ⲛⲁⲕ · ϫⲉⲓ ϩⲙⲡⲉϣⲧⲉⲕⲟ ⲁⲧⲉⲧⲛⲉⲓ ϣⲁⲣⲟⲓ · ⲉⲕϣⲁⲛⲕⲱⲧ . ⲛⲟⲩⲉⲕⲕⲗⲏⲥⲓⲁ · ϩⲓϫⲙⲡ · ⲉⲡⲣⲁⲛ ⲙⲙⲓⲭⲁⲏⲗ .
…
69 ⲡⲛⲟⲩⲧⲉ ϩⲱⲱϥ ⲛⲁⲕⲱⲧ ⲛⲁⲕ ⲛⲟⲩⲏⲓ · ⲛⲁⲧⲙⲟⲩⲛⲕ ⲛϭⲓϫ · ϩⲣⲁⲓ ϩⲛⲙⲡⲏⲩⲉ ·
…
70 ⲉⲕϣⲁⲛⲛⲁⲩ ⲉⲩⲕⲱⲃ ·
…
71 ⲏ ⲟⲩⲁ ⲉⲣⲉϩⲉⲛⲡⲗⲩⲅⲏ ϩⲙⲡⲉϥⲥⲱⲙⲁ · ⲛⲅⲑⲉⲣⲁⲡⲉⲩⲉ ⲙⲙⲟϥ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ .
…
72 ⲡⲛⲟⲩⲧⲉ ϩⲱⲱϥ · ⲛⲁϣⲛϩⲧⲏϥ ϩⲁⲣⲟⲕ · ⲛϥⲑⲉⲣⲁⲡⲉⲩⲉⲙⲙⲟⲕ ·
…
73 ⲉⲃⲟⲗ ϩⲛⲛⲉⲡⲗⲩⲅⲏ ⲛⲁⲙⲛⲧⲉ · ϫⲉϥⲥⲏϩ . ϫⲉ ⲛⲁⲓⲁⲧⲟⲩ ⲛⲛⲛⲁϩⲏⲧ · ϫⲉⲛⲧⲟⲟⲩ ⲛⲉⲧⲟⲩⲛⲁⲛⲁ ⲛⲁⲩ .
…
74 ⲁⲩⲱ ⲟⲛ · ϫⲉⲛⲁⲧⲁⲣⲟⲩⲛⲁ ⲛⲏⲧⲛ ·
…
75 ⲁⲩⲱ ϫⲉⲡⲛⲁ ϣⲁϥϣⲟⲩϣⲟⲩ ⲙⲙⲟϥ ϩⲓϫⲛⲧⲉⲕⲣⲓⲥⲓⲥ ·
…
76 ⲁⲩⲱ ⲟⲛ ϫⲉϣⲁⲣⲉⲧⲁⲅⲁⲡⲏ ϩⲱⲃⲥ ·
…
77 ⲉⲃⲟⲗ ⲉϫⲛⲟⲩⲙⲏⲏϣⲉ ⲛⲛⲟⲃⲉ ⁖
…
78 ⲱ ⲛⲁⲙⲉⲣⲁⲁⲧⲉ ⲁⲩⲱ ⲛⲁⲥⲛⲏⲩ ·
…
79 ⲙⲁⲣⲛⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ · ⲛⲧⲛⲣⲁⲡⲁ ⲧⲟⲟⲧⲛ ⲉⲙⲉⲣⲉⲧⲁⲅⲁⲡⲏ · ⲙⲡⲉϩⲟⲟⲩ ⲙⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ · ⲉⲛⲥⲟⲟⲩⲛ . ϫⲉⲟⲩϩⲓⲕⲁⲛⲟⲥ ⲡⲉ ·
…
80 ⲁⲩⲱ ϥϩⲏⲛ ⲉϩⲟⲩⲛ ⲉⲡⲛⲟⲩⲧⲉ · ⲛⲛⲁⲩ ⲛⲓⲙ ·
…
81 ⲁⲩⲱ ϥⲛⲁϯ ⲙⲡⲟⲩⲁ ⲡⲟⲩⲁ · ⲕⲁⲧⲁⲛⲉϥϩⲃⲏⲩⲉ ⁘ ⲙⲁⲣⲛⲡⲱⲧ ⲛⲥⲁⲧⲁⲅⲁⲡⲏ · ⲱ ⲛⲁⲙⲉⲣⲁⲧⲉ . ϫⲉⲧⲁⲅⲁⲡⲏ · ⲟⲩ ⲉⲃⲟⲗ ϩⲙⲡⲛⲟⲩⲧⲉ ⲧⲉ ·
…
82 ⲁⲩⲱ ⲡⲛⲟⲩⲧⲉ ⲡⲉ ⲧⲁⲅⲁⲡⲏ · ⲟⲩⲛⲁ ⲅⲁⲣ ⲡⲉⲛⲧⲁⲡⲛⲟⲩⲧⲉ ⲁⲁϥ · ⲙⲛⲡⲉⲛⲉⲓⲱⲧ · ⲛⲁⲇⲁⲙ · ⲙⲛⲉⲩϩⲁ ·
…
83 ⲁϥϫⲓ ⲛⲧⲟⲟⲧⲟⲩ · ⲛⲧⲉⲩⲙⲉⲧⲁⲛⲟⲓⲁ · ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ·
…
84 ⲁϥⲕⲱ ⲛⲁⲩ ⲉⲃⲟⲗ · ⲛⲧⲉⲩⲡⲁⲣⲁⲃⲁⲥⲓⲥ ⁘ ⲧⲁⲅⲁⲡⲏ ⲛⲧⲁϥⲁⲁⲥ . ⲙⲛⲁⲃⲉⲗ · ⲡⲇⲓⲕⲁⲓⲟⲥ ·
…
85 ⲁϥϫⲓ ⲛⲧⲟⲟⲧϥ ⲛⲧⲉϥⲑⲩⲥⲓⲁ . ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲟⲩⲛⲁ ϩⲱⲱϥ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲉⲛⲱⲭ ⲁϥⲡⲟⲟⲛϥ ⲉⲃⲟⲗ · ⲉⲧⲙⲧⲣⲉϥⲛⲁⲩ · ⲉⲡⲙⲟⲩ · ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ . ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ ⲧⲛⲧⲁⲡⲛⲟⲩⲧⲉ ⲁⲁⲥ . ⲙⲛⲛⲱϩⲉ ·
…
86 ⲁϥⲧⲁⲙⲓⲟ ⲛⲁϥ ⲛⲟⲩⲕⲓⲃⲱⲇⲟⲥ ·
…
87 ⲁϥⲟⲩⲟϫϥ ⲙⲛⲡⲉϥⲏⲓ · ⲧⲏⲣϥ ϩⲙⲡⲙⲟⲟⲩ ⲙⲡⲕⲁⲧⲁⲕⲗⲏⲥⲙⲟⲥ .
…
88 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ ⲛⲁⲅⲅⲉⲗⲓⲕⲟⲛ ·
…
89 ⲟⲩⲛⲁⲡⲉⲛⲧⲁⲡⲛⲟⲩⲧⲉ ⲁⲁϥ · ⲙⲛⲡⲉⲛⲉⲓⲱⲧ . ⲁⲃⲣⲁϩⲁⲙ ·
…
90 ⲁϥⲥⲙⲛⲇⲓⲁⲑⲏⲕⲏ ⲛⲙⲙⲁϥ ·
…
91 ⲁϥⲭⲁⲣⲓⲍⲉ ⲛⲁϥ · ⲛⲓⲥⲁⲁⲕ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ ⁘
…
92 ⲁⲩⲱ ⲁⲅⲁⲡⲏ ϩⲱⲱⲥ ⲧⲛⲧⲁⲡⲛⲟⲩⲧⲉ ⲁⲁⲥⲙⲛⲓⲥⲁⲁⲕ ⲁϥϣⲱⲡ ⲉⲣⲟϥ · ⲛⲧⲉϥⲑⲩⲥⲓⲁ ·
…
93 ⲁⲩⲱ ⲁϥϫⲓ ⲛⲟⲩⲉⲥⲟⲟⲩ ⲉⲡⲉϥⲙⲁ ·
…
94 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⁘ ⲟⲩⲛⲁⲡⲉⲛⲧⲁⲡⲛⲟⲩⲧⲉ · ⲁⲁϥ ⲙⲛⲓⲁⲕⲱⲃ ·
…
95 ⲁϥϯ ⲛⲁϥ ⲛⲟⲩⲭⲁⲣⲓⲥ · ⲛⲛⲁϩⲣⲛⲏⲥⲁⲩ · ⲡⲉϥⲥⲟⲛ ·
…
96 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ ⁘ ⲟⲩⲁⲅⲁⲡⲏ ϩⲱⲱⲥ ·
…
97 ⲧⲛⲧⲁϥⲁⲁϥ · ⲙⲛⲓⲱⲥⲏⲫ ·
…
98 ⲁϥⲛⲁϩⲙϥ · ⲉⲛϭⲓϫ · ⲛⲛⲉϥⲥⲛⲏⲩ ⲁⲩⲱ ⲉⲧⲟⲟⲧⲥ ⲛⲧⲣⲙⲛⲕⲏⲙⲉ ·
…
99 ϩⲓⲧⲛⲛⲧⲱⲃϩ ⲙⲙⲓⲭⲁⲏⲗ · ⲙⲛⲛϥⲥⲟⲡⲥⲡ ·
…
100 ⲟⲩⲛⲁⲡⲉⲛⲧⲁⲡⲛⲟⲩⲧⲉ ⲁⲁϥ · ⲙⲛⲙⲱⲩⲥⲏⲥ · ⲡⲉⲡⲣⲟⲫⲏⲧⲏⲥ ·
…
101 ⲁϥⲛⲁϩⲙϥ · ⲉⲧⲙⲛⲧϩⲙϩⲁⲗ · ⲙⲫⲁⲣⲁⲱ ·
…
102 ⲁⲩⲱ ⲁϥⲙⲁϩϥ ⲛⲭⲁⲣⲓⲥ · ⲡⲁⲣⲁⲣⲱⲙⲉ ⲛⲓⲙ · ϩⲓⲧⲛⲛⲥⲟⲡⲥⲡ · ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ϩⲱⲱⲥ ⲧⲉⲛⲧⲁⲡⲛⲟⲩⲧⲉ ⲁⲁⲥ · ⲙⲛⲓⲥⲟⲩ ⲛⲛⲁⲩⲏ ·
…
103 ⲁϥⲧⲣⲉⲡⲣⲏ ⲁϩⲉⲣⲁⲧϥ ⲉⲣⲟϥ · ϩⲛⲅⲁⲃⲁⲱⲛ ·
…
104 ⲁϥⲡⲁⲧⲁⲥⲥⲉⲓ ⲛⲛϥϫⲁϫⲉ ⲧⲏⲣⲟⲩ ·
…
105 ϩⲓⲧⲛⲛⲧⲱⲃϩ ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ ⲧⲏⲣⲥ · ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲙⲱⲩⲥⲏⲥ ·
…
106 ⲁϥϯ ⲛⲁϥ ⲙⲡⲉϥⲛⲟⲙⲟⲥ ·
…
107 ⲁϥⲧⲁⲁϥ ⲛⲛϣⲏⲣⲉ ⲙⲡⲓⲥⲣⲁⲏⲗ · ⲟⲩⲛⲁ · ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ · ⲙⲛⲇⲁⲩⲉⲓⲇ ⲡⲣⲣⲟ ·
…
108 ⲁϥⲥⲟⲧⲡϥ ⲛⲧⲙⲏⲧⲉ ⲛⲛⲉϥⲥⲛⲏⲩ ·
…
109 ⲁϥⲧⲁϩⲟϥ ⲉⲣⲁⲧϥ ⲛⲣⲣⲟ ⲉϫⲙⲡⲓⲥⲣⲁⲏⲗ · ϩⲓⲧⲛⲛⲥⲟⲡⲥⲡ · ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ ⲧⲉⲛⲧⲁϥⲁⲁⲥ · ⲙⲛⲥⲟⲗⲱⲙⲱⲛ · ⲡⲉϥϣⲏⲣⲉ ·
…
110 ⲁϥⲟⲩⲉϩⲥⲁϩⲛⲉ ⲛⲁϥ ⲉⲕⲱⲧ ⲙⲡⲏⲓ ⲙⲡϫⲟⲉⲓⲥ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ · ⲁⲁϥ ⲙⲛⲉⲍⲉⲕⲓⲁⲥ ⲡⲣⲣⲟ ⲛⲇⲓⲕⲁⲓⲟⲥ ·
…
111 ⲁϥⲟⲩⲉϩⲕⲉⲙⲛⲧⲏ · ⲛⲣⲟⲙⲡⲉ ·
…
112 ⲉϫⲛⲛⲣⲙⲡⲟⲟⲩⲉ · ⲙⲡⲉϥⲱⲛϩ · ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ·
…
113 ⲡⲛⲟϭ ⲛⲁⲣⲭⲱⲛ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ϩⲱⲱⲥ · ⲧⲛⲧⲁⲡⲛⲟⲩⲧⲉ ⲁⲁⲥ · ⲙⲛⲡⲅⲉⲛⲟⲥ ⲛⲁⲇⲁⲙ ·
…
114 ⲁϥⲕⲁⲧⲁⲝⲓⲟⲩ · ⲙⲙⲟϥ ·
…
115 ⲁϥⲕⲁⲗⲉⲓ ⲙⲙⲟⲛ · ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ · ϩⲙⲡⲣⲉϥϫⲓ ⲥⲁⲣⲝ · ϩⲙⲙⲁⲣⲓⲁ ⲧⲡⲁⲣⲑⲉⲛⲟⲥ · ⲉⲧⲟⲩⲁⲁⲃ ·
…
116 ⲁϥⲧⲁⲁϥ ϩⲁⲣⲟⲛ ⲧⲏⲣⲛ ϣⲁⲛⲧⲉϥⲥⲟⲧⲛ ⲛⲧⲟⲟⲧϥ ⲛⲁⲙⲛⲧⲉ · ⲛϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ ·
…
117 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲙⲛⲧⲉϥⲧⲁⲝⲓⲥ ⲧⲏⲣⲥ · ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲛⲉⲛⲉⲓⲟⲧⲉ · ⲛⲁⲡⲟⲥⲧⲟⲗⲟⲥ ·
…
118 ⲁϥⲥⲟⲧⲡⲟⲩ ⲉⲃⲟⲗ · ⲟⲩⲧⲉ ⲡⲕⲟⲥⲙⲟⲥ ⲧⲏⲣϥ ·
…
119 ⲁⲩⲱ ϩⲓⲧⲛⲡⲉⲩⲧⲁϣⲉⲟⲉⲓϣ · ⲛⲧⲁⲛⲉⲓ ⲧⲏⲣⲛ ⲉϩⲟⲩⲛ ⲉⲡⲥⲟⲟⲩⲛ ⲙⲙⲉ ·
…
120 ϩⲓⲧⲛⲛⲥⲟⲡⲥⲡ · ⲙⲙⲓⲭⲁⲏⲗ ·
…
121 ⲡⲛⲟϭ ⲛⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ·
…
122 ⲧⲉⲛⲟⲩ ϭⲉ ⲱ ⲛⲁⲙⲉⲣⲁⲧⲉ ·
…
123 ⲉⲓⲥϩⲏⲏⲧⲉ ⲁⲛⲉⲓⲙⲉ · ϫⲉⲉⲣⲉⲡⲟⲩⲱϣ ⲙⲡⲛⲟⲩⲧⲉ ϣⲟⲟⲡ ϩⲛⲧⲁⲅⲁⲡⲏ ⲙⲛⲡⲛⲉⲩⲙⲁ ·
…
124 ⲁⲩⲱ ϫⲉⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ ·
…
125 ⲡⲉⲧⲟ ⲛⲁⲛ ⲙⲡⲣⲟⲥⲧⲁⲧⲏⲥ ·
…
126 ⲁⲩⲱ ⲡⲣⲉⲥⲃⲉⲩⲧⲏⲥ · ⲛⲛⲁϩⲣⲙⲡⲛⲟⲩⲧⲉ ·
…
127 ⲙⲁⲣⲛⲡⲱⲧ ⲛⲥⲁⲡⲛⲁ · ⲙⲛⲧⲁⲅⲁⲡⲏ · ϫⲉϥⲥⲏϩ ϫⲉⲡⲛⲁ ϣⲁϥϣⲟⲩ ⲙⲙⲟϥ · ϩⲓϫⲛⲧⲉⲕⲣⲓⲥⲓⲥ ·
…
128 ⲁⲩⲱ ϫⲉⲡⲛⲁ ϣⲁϥϫⲓⲥⲉ ·
…
129 ⲁⲩⲱ ⲧⲁⲅⲁⲡⲏ · ϣⲁⲥⲥⲟⲟⲩⲧⲛ · ϣⲁⲣⲉⲡⲛⲁⲏⲧ ⲟⲛ ϫⲟⲟⲥ · ϫⲉⲛⲁⲧⲁⲣⲟⲩⲛⲁ ⲛⲏⲧⲛ ·
…
130 ϯⲧⲁⲣⲟⲩ ϯ ⲛⲏⲧⲛ ·
…
131 ϩⲙⲡϣⲓ ⲅⲁⲣ ⲉⲧⲉⲧⲛⲛⲁϣⲓ ⲙⲙⲟϥ · ⲉⲩⲛⲁϣⲓ ⲛⲏⲧⲛ ⲙⲙⲟϥ ·
…
132 ⲙⲁⲣⲛϣⲓ ⲛⲟⲩϣⲓ ⲉⲛⲁⲛⲟⲩϥ · ⲙⲡϩⲟⲟⲩ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ ·
…
133 ϫⲉⲕⲁⲥ ϩⲱⲱϥ · ⲉϥⲉϣⲓ ⲛⲁⲛ · ⲛⲟⲩϣⲓ ⲉⲛⲁⲛⲟⲩϥ ·
…
134 ⲁⲩⲱ ⲛⲛⲟϭ · ϩⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
135 ⲙⲁⲣⲛⲣϣⲁ ⲟⲛ ⲙⲡϩⲟⲟⲩ ϩⲛⲟⲩϣⲁ ⲙⲡⲛⲉⲩⲙⲁⲧⲓⲕⲟⲛ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ ·
…
136 ϫⲉⲕⲁⲥ ⲉϥⲉⲣϣⲁ · ⲛⲙⲙⲁⲛ ⲙⲛⲡⲉⲛϫⲟⲉⲓⲥ · ϩⲙⲡϣⲁ ⲉⲧⲙⲏⲛ · ⲉⲃⲟⲗ ϩⲛⲙⲡⲏⲩⲉ ·
…
137 ⲙⲁⲣⲛⲕⲱ ϭⲉ · ⲛⲥⲱⲛ ⲛⲛⲉϩⲃⲏⲩⲉ ⲙⲡⲕⲁⲕⲉ · ⲙⲡϩⲟⲟⲩ · ϩⲙⲡϣⲁ · ⲙⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ · ϫⲉⲕⲁⲥ ·
…
138 ϩⲱⲱϥ ⲉϥⲉϯ ϩⲓⲱⲱⲛ ⲛⲛϩⲟⲡⲗⲟⲛ ⲙⲡⲟⲩⲟⲉⲓⲛⲓ ⁖ⲻ
…
139 ⲙⲁⲣⲛϯⲉⲟⲟⲩ ⲙⲡⲛⲟⲩⲧⲉ · ⲙⲡϩⲟⲟⲩ ϩⲙⲡϣⲁ ⲙⲡⲉϥⲛⲟϭ · ⲛⲁⲣⲭⲱⲛ ·
…
140 ϫⲉⲕⲁⲥ ⲉϥⲉϯⲉⲟⲟⲩ ⲛⲁⲛ · ϩⲙⲡⲉϥⲛⲟϭ ⲛⲉⲟⲟⲩ · ⲉⲧϫⲏⲕ ⲉⲃⲟⲗ ·
…
141 ⲙⲁⲣⲛϯⲡⲉⲛⲟⲩⲟⲓ ⲉⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ⲙⲓⲭⲁⲏⲗ · ϩⲙⲡⲉϥⲛⲟϭ ⲛϣⲁ ⲙⲡϩⲟⲟⲩ · ⲉⲣⲉⲛⲉⲛⲥⲱⲙⲁ ϫⲁϩⲙ ϩⲛⲟⲩⲙⲟⲟⲩ · ⲉϥⲟⲩⲁⲁⲃ · ⲉⲛⲫⲟⲣⲉⲓ ⲛⲟⲩϩⲃⲥⲱ · ⲛⲉⲥⲟⲟⲩ · ⲉⲣⲉⲛⲉⲛϭⲓϫ ·
…
142 ⲙⲉϩ ⲛⲕⲗⲁⲇⲟⲥ · ⲛⲥϯⲛⲟⲩϥⲉ ⲉⲛⲥⲟⲡⲥⲡ ⲙⲙⲟϥ ⲉⲛϫⲱ ⲙⲙⲟⲥ · ϫⲉⲡⲁⲣⲭⲁⲅⲅⲉⲗⲟⲥ ·
…
143 ⲁⲩⲱ ⲡⲁⲣⲭⲏⲥⲧⲣⲁϯⲅⲟⲥ · ⲛⲧϭⲟⲙ ⲛⲙⲡⲏⲩⲉ · ⲙⲓⲭⲁⲏⲗ ·
…
144 ⲥⲟⲡⲥⲡ ⲙⲡⲛⲟⲩⲧⲉ ⲉϩⲣⲁⲓ ⲉϫⲱϥ · ⲛϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ ·
…
145 ⲡⲁⲣⲭⲁⲅⲅⲉⲗⲟⲥ ⲥⲟⲡⲥⲡ · ⲙⲡⲛⲟⲩⲧⲉ ·
…
146 ϩⲁⲣⲟⲛ ⲛϥⲧⲱϣ ⲛⲁⲛ ⲛⲧⲉⲛⲧⲣⲟⲫⲏ · ⲙⲛⲧⲛϩⲃⲥⲱ ⲕⲁⲧⲁⲡⲉϥⲟⲩⲱϣ · ⲙⲓⲭⲁⲏⲗ ⲡⲛⲟϭ ⲛⲁⲣⲭⲁⲅⲅⲉⲗⲟⲥ · ⲥⲟⲡⲥⲡ ⲙⲡⲛⲟⲩⲧⲉ ϩⲁⲣⲟⲛ · ⲛϥⲭⲁⲣⲓⲍⲉ ⲛⲁⲛ · ⲛⲟⲩⲉⲓⲣⲏⲛⲏ ·
…
147 ⲉϩⲟⲩⲛ ⲉⲛⲉⲛⲉⲣⲏⲩ · ϫⲉⲛⲧⲟⲕ ⲉⲧⲟ ⲛⲉⲓⲣⲏⲛⲏ ·
…
148 ⲕⲥⲟⲟⲩⲛ ⲡⲉⲛⲡⲣⲟⲥⲧⲁⲧⲏⲥ · ϫⲉⲁⲛⲟⲛ ⲟⲩ ⲙⲛⲟⲩⲕⲉⲣⲙⲥ ·
…
149 ⲁⲩⲱ ⲧⲛⲫⲩⲥⲓⲛ ⲟⲩⲣⲉϥⲥⲗⲁⲁⲧⲉ ⲧⲉ ·
…
150 ⲁⲗⲗⲁ ⲡⲛⲟⲩⲧⲉ ⲟⲩⲛⲁϩⲏⲧ ⲡⲉ · ⲛⲣⲉϥⲕⲱ ⲉⲃⲟⲗ · ⲡⲱⲛ ⲡⲉ ⲣⲛⲟⲃⲉ · ⲡⲱⲕ ϩⲱⲱⲕ ⲡⲉ ⲥⲟⲡⲥⲡ ⲉϫⲱⲛ · ⲛⲛⲁϩⲣⲙⲡⲛⲟⲩⲧⲉ · ⲛϥⲕⲱ ⲛⲁⲛ ⲉⲃⲟⲗ · ⲛⲛⲉⲛⲛⲟⲃⲉ · ⲡⲱⲛ ⲡⲉⲥⲟⲡⲥⲡ ⲙⲡⲛⲟⲩⲧⲉ · ⲡⲱⲕ ϩⲱⲱⲕ ⲱ ⲙⲓⲭⲁⲏⲗ ⲡⲉ · ⲡⲁⲣⲁⲕⲁⲗⲉⲓ · ⲙⲡⲛⲟⲩⲧⲉ ϩⲁⲣⲟⲛ · ⲛϥⲕⲱ ⲛⲁⲛ ⲉⲃⲟⲗ · ⲱ ⲙⲓⲭⲁⲏⲗ ⲡⲉⲛⲁⲣⲭⲱⲛ · ⲡⲱⲛ ⲡⲉ ϣⲱϥⲧ ·
…
151 ⲡⲱⲕ ϩⲱⲱⲕ ⲟⲛ ⲡⲉⲇⲓⲟⲣⲑⲟⲩ · ⲙⲙⲟⲛ · ⲛⲛⲁϩⲣⲙⲡⲛⲟⲩⲧⲉ ⲡⲉⲛⲣⲣⲟ ·
…
152 ⲧⲛⲥⲟⲟⲩⲛ ⲙⲡⲁⲓ ϩⲛⲟⲩⲙⲉ ·
…
153 ⲱ ⲡⲁⲣⲭⲁⲅⲅⲉⲗⲟⲥ ·
…
154 ⲙⲓⲭⲁⲏⲗ · ϫⲉⲛⲧⲟⲕ ⲡⲉⲛⲁϩⲱⲣ · ⲛⲧⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ · ⲉⲕⲉⲡⲣⲉⲥⲃⲉⲩⲉ ϩⲁⲣⲟⲛ · ⲧⲉⲛⲟⲩ ⲧⲏⲣⲛ ⲛⲛⲁϩⲣⲙⲡⲛⲟⲩⲧⲉ · ⲡⲉⲭⲣⲓⲥⲧⲟⲥ · ⲡⲛⲟⲩⲧⲉ ⲛⲥⲟⲡⲥⲡ ⲛⲓⲙ ·
…
155 ⲡⲉⲧⲥⲙⲁⲙⲁⲁⲧ ϣⲁⲉⲛⲉϩ · ⲛϥⲕⲱ ⲛⲁⲛ ⲉⲃⲟⲗ · ⲛⲛⲉⲛⲛⲟⲃⲉ ⲧⲏⲣⲟⲩ · ⲛⲧⲁⲛⲁⲁⲩ · ⲛϥϯⲧϩⲉ ⲛⲁⲛ ϩⲱⲱⲛ · ⲛⲧⲛⲕⲱⲛⲥⲱⲛ ⲛⲛⲁⲡⲁϩⲟⲩ · ⲛⲧⲛⲡⲟⲣϫⲛ · ⲉⲛⲁⲧϩⲏ ·
…
156 ⲛⲅⲡⲣⲟⲥⲉⲛⲉⲅⲕⲉⲓ ⲙⲙⲟⲛ · ⲛⲁϥ ⲛⲟⲩⲁⲁⲃ · ⲉⲛⲟ ⲛⲁⲧⲧⲱⲗⲙ · ⲙⲡⲉϥⲙⲧⲟ ⲉⲃⲟⲗ · ϩⲛⲟⲩⲁⲅⲁⲡⲏ · ϫⲉⲛⲧⲟⲕ · ⲱ ⲡⲛⲟϭ · ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲡⲉ ⲡⲛϥⲁⲓ‐ⲣⲟⲟⲩϣ ·
…
157 ϫⲉⲕⲁⲥ ϩⲱⲱⲛ ⲉⲛⲛⲁϣⲱⲡⲉ · ϩⲛⲛⲉⲕⲙⲁ ⲛⲙⲧⲟⲛ · ϩⲛⲙⲡⲏⲩⲉ ·
…
158 ⲁⲗⲏⲑⲱⲥ ⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ · ⲱ ⲡⲛⲟϭ ⲛⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ ·
…
159 ⲕⲁⲗⲱⲥ ⲁⲕⲉⲓ ⲛⲁⲛ · ⲉⲕⲛⲏⲩ · ⲙⲛⲡⲉⲛϫⲟⲉⲓⲥ ⲡⲉⲛⲣⲣⲟ ·
…
160 ⲕⲁⲗⲱⲥ ⲁⲥⲉⲓ ⲛϭⲓⲧⲉⲕⲧⲁⲝⲓⲥ · ⲧⲏⲣⲥ ⲛⲁⲅⲅⲉⲗⲓⲕⲟⲛ ·
…
161 ϩⲙⲡⲉⲓⲛⲟϭ ⲛϣⲁⲉⲧⲡⲟⲣϣ · ⲛⲁⲛ ⲉⲃⲟⲗ ⲙⲡϩⲟⲟⲩ ·
…
162 ⲁⲕⲣⲟⲩⲛⲟϭ ⲛⲁⲣⲓⲥⲧⲟⲛ ⲉⲣⲟⲛ ⲙⲡϩⲟⲟⲩ · ⲱ ⲙⲓⲭⲁⲏⲗ ·
…
163 ⲁⲩⲱ ⲡⲁⲣⲓⲥⲧⲟⲛ ⲛⲧⲁⲕⲁⲁϥ · ⲉⲣⲟⲛ · ⲛⲟⲩⲁⲣⲓⲥⲧⲟⲛ ⲁⲛ ⲡⲉ · ⲛϩⲏⲕⲉ ·
…
165 ⲁⲗⲗⲁ ⲟⲩⲁⲣⲓⲥⲧⲟⲛ ⲡⲉ ⲛⲣⲙⲙⲁⲟ · ⲛⲣⲣⲟ ⲡⲉ · ⲛϩⲉⲛⲁⲣⲭⲱⲛ ⲁⲛ ⲛⲉ ⲛⲧⲉⲓⲙⲓⲛⲉ ⲉⲧⲛⲏϫ · ϩⲙⲡⲉⲓⲁⲣⲓⲥⲧⲱⲛ ·
…
166 ⲁⲗⲗⲁ ⲡϫⲟⲉⲓⲥ ⲡⲉ ⲛⲛⲁⲧⲡⲉ · ⲙⲛⲛⲁⲡ · ⲛϩⲉⲛⲣⲱⲙⲉ ⲁⲛ · ⲛⲧⲉⲓϩⲉ ·
…
167 ϩⲁⲡⲗⲱⲥ · ⲛⲉⲧⲇⲓⲁⲕⲱⲛⲉⲓ ⲉⲣⲟⲛ · ⲁⲗⲗⲁ ϩⲉⲛⲁⲅⲅⲉⲗⲟⲥ ·
…
168 ⲛⲉⲉⲩϣⲙϣⲉ · ϩⲁⲣⲁⲧⲕ · ⲛⲟⲩⲧⲣⲁⲡⲉⲍⲁ · ⲛⲥⲁⲣⲕⲓⲕⲟⲛ · ⲁⲛ ⲧⲉ ·
…
169 ⲁⲗⲗⲁ ⲟⲩⲡⲛⲉⲩⲙⲁϯⲕⲟⲛ ⲧⲉ · ⲉⲥⲙⲉϩ ⲛⲱⲛϩ ϣⲁⲉⲛⲉϩ · ⲛⲟⲩⲣⲱⲙⲉ ⲁⲛ ·
…
170 ⲡⲉⲧⲣϣⲁ ⲛⲙⲙⲁⲛ ⲙⲡϩⲟⲟⲩ · ϩⲙⲡϣⲁ ⲙⲙⲓⲭⲁⲏⲗ ·
…
171 ⲁⲗⲗⲁ ⲡⲛⲟⲩⲧⲉ ⲡⲉ ϩⲛⲟⲩⲙⲉ · ⲉϥⲥⲟⲟⲩⲧⲛ ⲉⲃⲟⲗ · ⲛⲧⲉϥϭⲓϫ · ⲉⲧⲟⲩⲁⲁⲃ · ⲉϥϫⲱ ⲙⲙⲟⲥ · ⲛⲁⲛ · ϫⲉⲕⲁⲗⲱⲥ ·
…
172 ⲁⲧⲉⲧⲛⲉⲓ ϣⲁⲣⲟⲛ ⲙⲡϩⲟⲟⲩ · ⲧ ⲛⲏⲧⲛ ⲛⲁⲥⲛⲏⲩ ·
…
173 ⲁⲩⲱ ϯⲣⲁϣⲉ ⲛⲙⲙⲏⲧⲛ ⲧⲏⲣⲧⲛ ·
…
174 ϥⲥⲏϩ ⲅⲁⲣ · ϫⲉⲡⲙⲁ ⲉⲧⲉⲣⲉⲥⲛⲁⲩ ·
…
175 ⲏ ϣⲟⲙⲛⲧ ·
…
176 ⲥⲟⲟⲩϩ ⲛϩⲏⲧϥ ϩⲙⲡⲁⲣⲁⲛ ·
…
177 ϯϣⲟⲟⲡ ⲛⲙⲙⲁⲩ ϩⲛⲧⲉⲩⲙⲏⲏⲧⲉ ·
…
178 ⲗⲟⲓⲡⲟⲛ ⲉϣϫⲉ ⲁϥϫⲟⲟⲥ ⲛⲧⲉⲓϩⲉ ·
…
179 ⲉⲧⲃⲉⲥⲛⲁⲩ ⲏ ϣⲟⲙⲛⲧ · ⲙⲙⲁⲧⲉ · ⲉⲓⲉ ⲟⲩⲏⲣ · ⲧⲉⲛⲟⲩ · ⲡⲉ ⲡⲣⲁϣⲉ ⲙⲡϫⲟⲉⲓⲥ ⲡⲉⲛⲣⲣⲟ · ⲙⲛⲛⲉϥⲁⲅⲅⲉⲗⲟⲥ ⲉⲧⲟⲩⲁⲁⲃ · ⲉⲩϣⲟⲟⲡ ϩⲛⲧⲉⲛⲙⲏⲏⲧⲉ ⲙⲡϩⲟⲟⲩ · ⲉⲩⲣϣⲁ · ⲛⲙⲙⲁⲛ ·
…
180 ϩⲙⲡⲉⲛⲛⲟϭ ⲛⲁⲣⲓⲥⲧⲟⲛ ⲙⲛⲡⲉⲓⲥⲱⲟⲩϩ ⲉϩⲟⲩⲛ · ⲛϩⲟⲟⲩⲧ · ϩⲓⲥϩⲓⲙⲉ ϩⲓϣⲏⲣⲉ ⲕⲟⲩⲓ · ϩⲓⲛⲟϭ ⲛⲣⲱⲙⲉ · ϩⲓⲡⲟⲓⲥⲧⲟⲥ · ⲉⲩϣⲟⲟⲡ ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ · ⲉⲧⲉⲡϣⲁ ⲡⲉ · ⲙⲙⲓⲭⲁⲏⲗ ·
…
181 ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲉϥϯⲉⲟⲟⲩ ·
…
182 ⲙⲉⲛ ⲛⲟⲩⲟⲛ ⲛⲓⲙ · ⲉⲧⲣϣⲁ ⲛⲁϥ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ ·
…
183 ⲡⲛⲟϭ ⲛⲥⲧⲣⲁⲧⲏⲗⲁⲧⲏⲥ · ⲉⲧⲟⲩⲁⲁⲃ ·
…
184 ⲁⲗⲏⲑⲱⲥ ⲱ ⲛⲁⲙⲉⲣⲁⲧⲉ ·
…
185 ⲁⲓϩⲓⲧⲟⲟⲧ · ⲉⲩⲛⲟϭ ⲛⲕⲉⲫⲁⲗⲁⲓⲟⲛ ⲡⲁⲣⲁⲧⲁϭⲟⲙ ·
…
186 ⲁⲩⲱ ⲁⲓϯ ⲙⲡⲁⲟⲩⲟⲓ ⲉⲃⲟⲗ · ⲉⲩⲛⲟϭ ⲙⲡⲉⲗⲁⲅⲟⲥ · ⲉϥⲟⲩⲏⲩ · ⲙⲛϭⲟⲙ ⲉϯⲁⲡⲉⲣⲁ ⲙⲙⲟϥ ·
…
187 ⲉⲃⲟⲗ ϫⲉⲁⲓϫⲟⲟⲥ · ϩⲛⲧⲁⲣⲭⲏ ⲙⲡⲉⲓⲉⲅⲕⲱⲙⲓⲟⲛ · ϫⲉⲟⲩⲕⲟⲩⲓ · ⲡⲉ ⲡⲁⲥⲕⲁⲫⲟⲥ ·
…
188 ⲁⲩⲱ ⲡⲁⲩⲉⲓⲛ ⲥⲟⲃⲕ ·
…
189 ⲁⲩⲱ ϫⲉϯⲛⲟⲉⲓ ⲁⲛ ⲛⲛⲏⲏⲃⲉ ·
…
190 ⲁⲩⲱ ⲟⲛ ϫⲉⲡⲡⲉⲗⲁⲅⲟⲥ · ⲛⲁϣⲧ ⲉⲙⲁⲧⲉ · ⲉⲧⲉⲡⲁⲓ ⲡⲉ ⲡⲉⲅⲕⲱⲙⲓⲟⲛ · ⲙⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ ·
…
191 ϯⲡⲁⲣⲁⲕⲁⲗⲉⲓ ⲙⲙⲱⲧⲛ ⲛⲁⲥⲛⲏⲩ ·
…
192 ϯⲧⲟⲟⲧ ⲧⲏⲩⲧⲛ ⲛⲙⲙⲁⲓ ·
…
193 ϫⲉⲕⲁⲥ ⲉⲓⲉⲛⲟⲩϩⲙ ⲉⲃⲟⲗ ϩⲛⲧⲙⲏⲏⲧⲉ ⲙⲡⲡⲉⲗⲁⲅⲟⲥ ⲛⲁⲧⲁⲣⲏϫϥ · ⲛⲧⲁⲉⲓ ⲟⲛ ϣⲁⲣⲱⲧⲛ · ⲉⲡⲉⲕⲣⲟ · ϩⲛⲟⲩⲥⲟⲟⲩⲧⲛ ·
…
194 ⲉⲡⲉⲓⲇⲏ ⲁⲓϩⲓⲧⲟⲟⲧ · ⲉϣⲁϫⲉ · ⲛⲙⲙⲏⲧⲛ ⲉⲛⲉⲅⲕⲱⲙⲓⲟⲛ · ⲙⲛⲛⲧⲁⲉⲓⲟ · ⲉⲧⲡⲣⲉⲡⲉⲓ ·
…
195 ⲙⲡⲉⲧⲛⲣϣⲁ ⲛⲁϥ ⲙⲡϩⲟⲟⲩ · ⲡⲛⲟϭ ⲛⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ ·
…
196 ⲁⲗⲗⲁ ⲟⲩⲥⲁⲣⲝ ⲡⲉ ⲡⲁⲗⲁⲥ ·
…
197 ⲁⲩⲱ ⲟⲩⲥⲱⲙⲁ ⲛ ⲡⲉ ⲡⲁⲥⲱⲙⲁ · ⲙⲡⲓⲉϣϭⲙϭⲟⲙ · ⲉⲡⲱϩ ⲉⲡϣⲓ · ⲙⲡⲉϥⲉⲟⲟⲩ ·
…
198 ⲙⲛⲡϫⲱⲕ ⲙⲡⲉϥⲁⲝⲓⲱⲙⲁ ⲉⲧⲟⲩⲁⲁⲃ ·
…
199 ⲱ ⲡⲁϫⲟⲉⲓⲥ ⲙⲛⲛⲥⲁⲡⲛⲟⲩⲧⲉ ⲉⲃⲟⲗ · ⲱ ⲙⲓⲭⲁⲏⲗ · ⲡⲧⲉⲗⲏⲗ · ⲙⲡⲁϩⲏⲧ · ⲱ ⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ·
…
200 ⲡⲥⲟⲗⲥⲗ ⲙⲡⲁϩⲏⲧ ⲱ ⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ · ⲡⲥⲟⲗⲥⲗ ⲙⲡⲁⲗⲁⲥ · ⲱ ⲙⲓⲭⲁⲏⲗ ⲡϣⲁϫⲉ · ⲛⲧⲁⲧⲁⲡⲣⲟ ·
…
201 ⲁⲩⲱ ⲡⲥⲟⲗⲥⲗ ⲙⲡⲁϩⲏⲧ · ⲙⲛⲡⲁϣⲗⲏⲗ · ⲛⲛⲁϩⲣⲛⲡⲛⲟⲩⲧⲉ · ⲁϣ ⲛϣⲟⲩⲱⲃⲉ ·
…
202 ⲏ ⲛϩⲏⲧ · ⲛⲣⲉϥⲛⲟⲓ ·
…
203 ⲡⲉⲧⲛⲁϣⲉⲓⲙⲉ ·
…
204 ⲏ ⲛϥⲉⲓⲱⲣϩ ⲙⲡϫⲱⲕ ·
…
205 ⲙⲡⲕⲁⲝⲓⲱⲙⲁ · ⲙⲛⲡⲉⲟⲟⲩ · ⲛⲧⲁⲡⲛⲟⲩⲧⲉ ⲥⲧⲟⲗⲓⲍⲉ ⲙⲙⲟⲕ · ⲛϩⲏⲧϥ ·
…
206 ⲛⲁⲓ ⲧⲏⲣⲟⲩ · ⲛⲧⲁⲓϫⲟⲟⲩ ⲱ ⲡⲁⲣⲭⲱⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
207 ⲙⲛⲛⲉⲧⲟⲩⲟⲧⲃ ⲉⲛⲁⲓ · ⲥⲉⲡⲣⲉⲡⲉⲓ ⲙⲡⲉⲕⲛⲟϭ ⲛⲉⲟⲟⲩ · ⲁⲗⲗⲁ ⲕⲱ ⲛⲁⲓ ⲉⲃⲟⲗ · ⲱ ⲡⲁⲣⲭⲁⲅⲅⲉⲗⲟⲥ · ⲉⲃⲟⲗ ϫⲉⲁⲛⲅⲟⲩⲣⲱⲙⲉ ⲛⲣⲉϥⲣⲛⲟⲃⲉ ·
…
208 ⲁⲩⲱ ϯϭⲟϫⲃ ⲉⲙⲁⲧⲉ · ϩⲛⲛⲁⲡⲣⲁⲝⲓⲥ ·
…
209 ϯⲡⲁⲣⲁⲕⲁⲗⲉⲓ ⲙⲙⲟⲕ · ⲱ ⲡⲁⲣⲉϥϯⲧⲟⲟⲧ · ⲙⲓⲭⲁⲏⲗ · ϫⲓ ⲛⲧⲟⲟⲧ · ϩⲱⲱⲧ ⲙⲡⲁⲧⲧⲱⲃϩ · ⲙⲛⲡⲁⲥⲟⲡⲥⲡ · ⲉⲧⲉⲡⲁⲕⲟⲩⲓ ⲛⲇⲱⲣⲟⲛ ⲡⲉ · ⲉⲧϭⲟϫⲃ · ⲡⲁⲓ ⲛⲧⲁϥⲣ ⲁⲧⲟⲟⲧ · ⲉⲧⲁⲁϥ ⲛⲁⲕ ϩⲙⲡⲉⲕϣⲁ ·
…
210 ⲙⲡⲣϭⲛⲁⲣⲓⲕⲉ ⲉⲡⲉⲕϩⲙϩⲁⲗ · ϫⲉⲡⲁⲇⲱⲣⲟⲛ ⲥⲟⲃⲕ ·
…
211 ⲁⲗⲗⲁ ϣⲱⲡⲉ ⲉⲣⲟⲕ ⲛⲧⲁⲡⲣⲟϩⲁⲓⲣⲉⲥⲓⲥ · ⲛⲧϩⲉ ⲙⲡⲗⲉⲡⲧⲟⲛ ⲥⲛⲁⲩ ⲉⲙⲁⲧⲉ ·
…
212 ⲧⲥⲟⲟⲩⲛ ⲅⲁⲣ · ϫⲉⲛⲧⲟⲕ ⲟⲩⲛⲁϩⲏⲧ ·
…
213 ⲁⲩⲱ ⲛϣⲁⲛϩⲧⲏϥ ·
…
214 ⲉⲧⲃⲉⲡⲁⲓ ⲣⲱ ϯ ⲙⲡⲁⲟⲩⲟⲓ ⲉⲣⲟⲕ · ⲉⲓⲥⲟⲟⲩⲛ · ϫⲉⲙⲛⲧⲁⲓ ⲙⲙⲁⲩ · ⲛⲕⲉⲗⲁⲁⲩ ⲙⲡⲣⲟⲥⲧⲁⲥⲓⲁ · ⲛⲛⲁϩⲣⲛⲡⲛⲟⲩⲧⲉ ⲛⲥⲁⲃⲗⲗⲁⲕ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
215 ⲉⲕϣⲁⲛⲣⲡⲛⲉⲩⲙⲁ · ⲛⲙⲙⲁⲓ ⲛⲅϫⲓ ⲛⲧⲟⲟⲧ · ⲙⲡⲁⲧⲧⲱⲃϩ · ⲙⲛⲡⲁⲕⲟⲩⲓ ⲛⲧⲁⲉⲓⲟ ·
…
216 ⲕⲁⲛ ⲉϣϫⲉ ϥϭⲟϫⲃ ⲟⲛ ·
…
217 ϯⲛⲁⲣⲁⲡⲁⲧⲟⲟⲧ ⲟⲛ · ⲉϯ ⲛⲁⲕ ⲙⲡⲧⲁⲉⲓⲟ · ⲙⲡⲁⲗⲁⲥ · ⲙⲛⲡⲁϩⲏⲧ · ⲛⲥⲏⲩ ⲛⲓⲙ · ⲛⲛⲉϩⲟⲟⲩ ⲧⲏⲣⲟⲩ · ⲙⲡⲁⲱⲛϩ ·
…
218 ⲁⲩⲱ ϯⲑⲁⲣⲉⲓ ⲙⲡⲁⲓ ϩⲛⲟⲩⲙⲉ · ϫⲉⲉⲓϣⲁⲛⲕⲱ ⲛⲁⲓ ⲙⲙⲁⲧⲉ · ϩⲙⲡⲁϩⲏⲧ ·
…
219 ⲙⲡⲉⲣⲡⲙⲉⲉⲩⲉ ⲙⲡⲉⲕⲣⲁⲛ · ⲛⲁⲣⲭⲁⲅⲅⲉⲗⲓⲕⲟⲛ ⲛⲛⲁⲩ ⲛⲓⲙ ·
…
220 ϯⲛⲁϣⲱⲡⲉ ⲁⲛ ⲉϫⲛⲃⲉⲉⲕⲉ ·
…
221 ⲁⲩⲱ ⲉϫⲛⲕⲁⲣⲡⲟⲥ ⲛⲛⲁϩⲣⲙⲡⲛⲟⲩⲧⲉ · ⲉⲣⲉⲡⲉⲣⲡⲙⲉⲉⲩⲉ · ⲙⲛⲙⲡⲕⲣⲁⲛ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϩⲟⲗϭ ⲛⲧⲁⲧⲁⲡⲣⲟ · ⲛⲧϩⲉ ⲛⲟⲩⲉⲃⲓⲱ · ⲉϥϩⲛⲣⲱⲓ · ⲉⲣⲉⲡⲣ ⲡⲙⲉⲉⲩⲉ ⲙⲡⲉⲕⲣⲁⲛ · ⲉⲧⲟⲩⲁⲁⲃ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲟⲩ ⲛⲁⲓ ⲛⲥⲧⲟⲗⲏ · ϩⲛⲧⲁϭⲓⲛϩⲉ · ⲙⲛⲧⲁϭⲓⲛⲧⲱⲟⲩⲛ · ⲱ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲛⲧⲁⲡⲅⲉⲛⲟⲥ · ⲛⲁⲇⲁⲙ ϭⲛⲡⲁⲣϩⲏⲥⲓⲁ ⲛⲛⲁϩⲣⲙⲡⲛⲟⲩⲧⲉ · ⲉⲧⲃⲏⲏⲧⲕ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲉⲣⲉⲡⲉⲥϯⲛⲟⲩϥⲉ · ⲛⲛⲉⲛϣⲗⲏⲗ ⲃⲏⲕ ⲉϩⲣⲁⲓ ϣⲁⲡⲛⲟⲩⲧⲉ · ⲉⲧⲃⲏⲏⲧⲕ · ⲱ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲟⲕ ⲡⲉⲧϥⲓ ⲉϩⲣⲁⲓ ϣⲁⲡⲛⲟⲩⲧⲉ · ϣⲁⲛⲧϥϣⲛϩⲧⲏϥ ϩⲁⲣⲟⲛ ·
…
222 ⲉⲥⲉϣⲱⲡⲉ ⲟⲛ ⲙⲡϩⲟⲟⲩ · ϩⲙⲡⲉⲕⲛⲟϭ ⲛϣⲁ · ⲉⲧⲣⲉⲕⲡⲣⲉⲥⲃⲉⲩⲉ ϩⲁⲣⲟⲛ · ⲛⲛⲁϩⲣⲙⲡⲛⲟⲩⲧⲉ ·
…
223 ⲡⲉⲓⲱⲧⲛϥϣⲱⲡ ⲉⲣⲟϥ · ⲛⲧⲉⲛⲡⲣⲟϩⲁⲓⲣⲉⲥⲓⲥ ⲉⲧⲛⲉⲓⲛⲉ · ⲙⲙⲟⲥ ⲛⲁϥ ·
…
224 ϩⲙⲡⲕⲣⲡⲙⲉⲉⲩⲉ ⲉⲧⲟⲩⲁⲁⲃ · ⲱ ⲡⲛⲟϭ ⲙⲡⲣⲟⲥⲧⲁⲧⲏⲥ · ⲙⲓⲭⲁⲏⲗ · ⲥⲟⲡⲥⲡ ⲉϫⲱⲛ · ⲛⲛⲁϩⲣⲙⲡⲛⲟⲩⲧⲉ ⲉⲧⲣⲉⲛⲙⲟⲟϣⲉ · ϩⲙⲡⲉⲧⲉⲣⲁⲛⲁϥ ⲛⲟⲩⲟⲉⲓϣ ⲛⲓⲙ ·
…
225 ⲛϥⲧⲟⲩϫⲟⲛ ⲉⲃⲟⲗ ϩⲛⲛϭⲟⲣϭⲥ ⲙⲡⲇⲓⲁⲃⲟⲗⲟⲥ · ⲛϥⲧⲁϩⲉⲛ ⲛⲁϥ ⲉⲣⲁⲧϥ · ⲛⲟⲩⲙⲛⲧⲣⲣⲟ · ⲙⲛⲟⲩⲙⲛⲧⲟⲩⲏⲏⲃ · ⲟⲩϩⲉⲑⲛⲟⲥ ⲉϥⲟⲩⲁⲁⲃ · ⲟⲩⲗⲁⲟⲥ ⲉⲡⲱⲛϩ ·
…
226 ϩⲓⲧⲛⲛⲧⲱⲃϩ ⲉⲧϥⲉⲓⲣⲉ ⲙⲙⲟⲟⲩ · ϩⲁⲣⲟⲛ · ⲛϭⲓⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ · ⲡⲁⲓ ⲉⲧⲛⲣϣⲁ ⲛⲁϥ ⲙⲡϩⲟⲟⲩ · ⲙⲛⲛⲉⲡⲣⲉⲥⲃⲉⲓⲁ · ⲉⲧⲉⲥⲉⲓⲣⲉ ⲙⲙⲟⲟⲩ ϩⲁⲣⲟⲛ · ⲛϭⲓⲧⲉⲛϫⲟⲉⲓⲥ ·
…
227 ⲧⲏⲣⲛ ⲧⲉ ⲑⲉⲟⲧⲟⲕⲟⲥ ⲉⲧⲟⲩⲁⲁⲃ ⲑⲁⲅⲓⲁ ⲙⲁⲣⲓⲁ ·
…
228 ⲧⲣⲉϥϫⲡⲉ ⲡⲛⲟⲩⲧⲉ · ϩⲛⲟⲩⲙⲉ · ⲙⲛⲛⲧⲱⲃϩ ⲛⲡϥⲕⲉϣⲃⲏⲣ · ⲁⲣⲭⲁⲅⲅⲉⲗⲟⲥ ⲅⲁⲃⲣⲓⲏⲗ ·
…
229 ⲡϥⲁⲓϣⲙⲛⲟⲩϥⲉ · ⲛⲛⲓⲁⲓⲱⲛ ⲙⲡⲟⲩⲟⲉⲓⲛ · ϩⲓⲧⲛⲧⲉⲭⲁⲣⲓⲥ ⲙⲛⲧⲙⲛⲧⲙⲁⲓⲣⲱⲙⲉ · ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲁⲓ ⲉⲃⲟⲗ ϩⲓⲧⲟⲟⲧϥ ·
…
230 ⲡⲉⲟⲟⲩ ⲛⲁϥ · ⲙⲛⲡⲉϥⲉⲓⲱⲧ ⲛⲁⲅⲁⲑⲟⲥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲛⲣⲉϥⲧⲁⲛϩⲟ ·
…
231 ⲁⲩⲱ ⲛϩⲟⲙⲟⲟⲩⲥⲓⲟⲛ · ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ · ϣⲁⲉⲛⲉϩ · ϥⲑ ·
…
232 ✠ ϩⲓⲧⲛ ⲇⲉ ⲥⲡⲟⲇⲏ · ⲙⲛⲧⲙⲛⲧϥⲁⲓⲣⲟⲟⲩϣ · ⲙⲡⲉⲛⲙⲁⲓⲛⲟⲩⲧⲉ ⲛⲥⲟⲛ · ⲉⲧⲧⲁⲓⲏⲩ · ⲥⲓⲣⲏ ⲡϣⲏⲣⲉ · ⲙⲡⲙⲁⲕⲁⲣⲓⲥ ⲡϩⲏⲩ · ⲡⲁⲓ ⲉⲧϣⲟⲟⲡ · ϩⲛⲧⲡⲉⲇⲓⲁⲥⲧⲁⲣⲏⲥ · ⲛⲧⲡⲟⲗⲓⲥ ⲥⲛⲏ · ϩⲙⲡϯⲙⲏ · ⲉⲧⲟⲩⲙⲟⲩⲧⲉ ⲉⲣⲟϥ · ϫⲉⲡⲕⲟⲩⲣⲟⲥⲏ ·
…
233 ⲁϥⲥⲙⲛ ⲙⲡⲉⲓϫⲱⲱⲙⲉ ⲟⲛ ⲛϥϩⲓⲥⲉ ⲙⲙⲓⲛ ⲙⲙⲟϥ ·
…
234 ⲁϥⲇⲱⲣⲓⲍⲉ ⲙⲙⲟϥ ⲉϩⲟⲩⲛ · ⲉⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
235 ϩⲙⲡⲧⲟϣ ⲛⲧⲃⲱ · ϩⲁⲡⲟⲩϫⲁⲓ ⲛⲧⲉϥⲯⲩⲭⲏ · ϫⲉⲕⲁⲥ · ⲉⲣⲉⲡⲛⲟⲩⲧⲉ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲛⲁⲥⲙⲟⲩ ⲉⲣⲟϥ · ⲙⲛⲧⲉϥⲥϩⲓⲙⲉ · ⲙⲛⲛⲉϥϣⲏⲣⲉ · ⲙⲛⲛⲉϥⲧⲃⲛⲟⲟⲩⲉ ·
…
236 ⲙⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ·
…
237 ⲉϥϣⲁⲛⲉⲓ ⲇⲉ ⲟⲛ ⲉⲃⲟⲗ ϩⲛⲥⲱⲙⲁ ·
…
238 ⲉϥⲉⲣⲙϣⲁ ⲛⲥⲱⲧⲙ ⲉⲧⲉⲥⲙⲏ ⲉⲥⲙⲉϩ ⲛⲣⲁϣⲉ ϫⲉⲁⲙⲏⲓⲧⲛ ⲛⲉⲧⲥⲙⲁⲙⲁⲁⲧ ⲛⲧⲉⲡⲁⲉⲓⲱⲧ · ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛϯⲙⲛⲧⲣⲣⲟ ⲛⲧⲁⲩⲥⲃⲧⲱⲧⲥ ⲛⲏⲧⲛ ϫⲓⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ ·
…
239 ϩⲁⲙⲏⲛ ·
…
240 ⲉⲥⲉϣⲱⲡⲉ
…