1 ⲗⲟⲓⲡⲟⲛ ⲁⲡⲣⲱⲙⲉ ϫⲓ ⲛⲧⲉϥϣⲧⲏⲛ ·
…
2 ⲁϥⲧⲁⲁⲥ ⲁϥϫⲓ ⲙⲡⲉⲥⲟⲩⲟ ·
…
3 ⲁϥⲧⲁⲁϥ ⲙⲡⲁⲙⲣⲏ ·
…
4 ⲁϥⲕⲧⲟϥ ⲉⲡⲉϥⲏⲓ ⲉϥⲣⲁϣⲉ ⲉⲣⲁⲧⲥ ⲛⲧⲉϥⲥϩⲓⲙⲉ · ⲉϥϫⲱ ⲙⲙⲟⲥ · ϫⲉⲉⲓⲥ ⲡⲛⲟⲩⲧⲉ ⲁϥⲥⲟⲟⲩⲧⲛ ⲛⲁⲛ ⲛⲧⲉⲡⲣⲟⲥⲫⲟⲣⲁ · ⲗⲟⲓⲡⲟⲛ ·
…
5 ⲛⲧⲉⲣⲟⲩⲡⲱϩ ⲉϩⲧⲟⲟⲩⲉ ⲛϣⲱⲣⲡ ⲛⲥⲟⲩⲙⲛⲧⲥⲛⲟⲟⲩⲥ · ⲛⲁⲑⲱⲣ ·
…
6 ⲁⲥϯ · ⲡⲉⲥⲟⲩⲟⲓ ⲉⲣⲟϥ · ⲛϭⲓⲧⲉⲥϩⲓⲙⲉ · ⲛϣⲁⲩ ⲉⲥϫⲱ ⲙⲙⲟⲥ · ϫⲉⲡⲁⲥⲟⲛ ·
…
7 ⲙⲁⲧⲁϣⲧⲏⲛ · ⲛⲅⲃⲱⲕ · ⲛⲅⲧⲁⲁⲥ ⲁⲛⲁⲩ ϫⲉⲕⲛⲁϩⲉ ⲉⲡⲉⲥⲟⲟⲩ ·
…
8 ϫⲉⲕⲁⲥ ⲛⲛⲁⲥ ⲙⲛⲛⲉϩⲃⲏⲩⲉ ⲛⲧⲥⲩⲛⲁⲝⲓⲥ ⲙⲛⲛⲉⲥⲛⲏⲩ · ⲉⲧⲛⲏⲩ ⲉϫⲱⲛ · ⲛⲧⲟϥ ⲇⲉ ⲉϥⲟⲩⲱϣ ⲉⲉⲓⲙⲉ ⲉⲧⲉⲥⲡⲣⲟϩⲁⲓⲣⲉⲥⲓⲥ · ⲧⲏⲣⲥ ·
…
9 ⲡⲉϫⲁϥ ⲛⲁⲥ · ϫⲉⲧⲁⲥⲱⲛⲉ ·
…
10 ⲉⲓϣⲁⲛϥⲓ ⲛⲧⲟⲩϣⲧⲏⲛ ·
…
11 ⲉⲣⲛⲁⲥⲩⲛⲁⲅⲉ ⲛⲁϣ ⲛϩⲉ ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ·
…
12 ⲁⲛⲟⲕ ⲡⲉ ⲅⲁⲣ ⲁⲛⲅⲟⲩϩⲟⲟⲩⲧ ϣⲁⲓⲃⲱⲕ ⲉⲙⲁ ⲛⲓⲙ ⲛⲧⲉⲓϩⲉ ⲧⲉⲥϩⲓⲙⲉ ⲇⲉ ⲛⲧⲟⲥ ϣϣⲉ ⲉⲣⲟⲥ ⲉⲥⲕⲉⲡⲁⲍⲉ ⲙⲙⲟⲥ · ϩⲙⲡⲉⲥⲥⲱⲙⲁ · ⲙⲁⲗⲓⲥⲧⲁ ⲛϩⲟⲩⲟ ϩⲛⲧⲉⲕⲕⲗⲏⲥⲓⲁ · ⲛⲧⲟⲥ ⲇⲉ ⲁⲥϥⲓϩⲣⲁⲥ ⲉⲃⲟⲗ ·
…
13 ⲁⲥⲣⲓⲙⲉ ⲉⲥϫⲱ ⲙⲙⲟⲥ ϫⲉⲟⲩⲟⲉⲓ ⲛⲁⲓ ⲡⲁⲥⲟⲛ · ⲟⲩ ⲡⲉ ⲡⲁⲓ ⲉⲧⲉⲕϫⲱ ⲙⲙⲟϥ ⲛⲁⲓ ⲙⲡϩⲟⲟⲩ ·
…
14 ⲙⲏ ⲛⲧⲁⲣϣⲙⲙⲟ ⲉⲣⲟⲕ ⲙⲡϩⲟⲟⲩ ·
…
15 ⲙⲏ ⲛⲧⲁⲛⲡⲱϣ ⲙⲡϩⲟⲟⲩ ⲁⲛⲣⲥⲛⲁⲩ ⲁⲛⲣⲥⲛⲁⲩ ·
…
16 ⲙⲏ ⲛⲁⲛⲟⲕ ⲟⲩⲥⲁⲣⲝ ⲛⲟⲩⲱⲧ ⲁⲛ ⲛⲙⲙⲁⲕ ·
…
17 ⲙⲏ ⲙⲛⲧⲁⲓ ⲙⲉⲣⲓⲥ ⲛⲙⲙⲁⲕ · ⲁⲛⲟⲕ ϩⲛⲛⲉⲑⲩⲥⲓⲁ ·
…
18 ⲙⲏ ⲉⲕⲛⲁϩⲟⲩⲣⲱⲧ ⲙⲡϩⲟⲟⲩ ⲙⲡⲁⲙⲉ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲙⲡⲱⲣ ⲡⲁⲥⲟⲛ ·
…
19 ⲙⲡⲣⲙⲉⲉⲩⲉ ϩⲙⲡⲉⲕϩⲏⲧ ⲉⲡⲁⲓ ϫⲉⲁⲓⲕⲱⲧ ⲁⲡⲣⲟϩⲁⲓⲣⲉⲥⲓⲥ · ⲛⲥⲱⲓ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ · ⲙⲓⲭⲁⲏⲗ · ϩⲱⲗⲟⲥ ⲣⲱ ⲁⲡⲁⲡⲟⲥⲧⲟⲗⲟⲥ ·
…
20 ⲟⲩⲱ ⲉϥⲧⲁⲙⲟ ⲙⲙⲟⲛ ϫⲉⲙⲛϩⲟⲟⲩⲧ ⲙⲛⲥϩⲓⲙⲉ ϩⲙⲡⲉⲭⲣⲓⲥⲧⲟⲥ ·
…
21 ⲛⲁⲓ ⲇⲉ ⲉⲥϫⲱ ⲙⲙⲟⲟⲩ ⲉⲥⲣⲓⲙⲉ ·
…
22 ⲁⲧⲉϥⲯⲩⲭⲏ ϣⲧⲟⲣⲧⲣ ⲉϫⲱⲥ ·
…
23 ⲙⲁⲗⲗⲟⲛ ⲇⲉ ⲁϥⲣⲁϣⲉ ⲛϩⲟⲩⲟ ⲉϩⲣⲁⲓ ⲉϫⲛⲧⲉⲥⲛⲟϭ ⲙⲡⲓⲥⲧⲓⲥ ⲁϥϫⲓ ⲛⲧⲟⲟⲧⲥ ·
…
24 ⲛⲧⲉϣⲧⲏⲛ ⲉϥϫⲱ ⲙⲙⲟⲥ ϫⲉϥⲓ ⲡⲣⲟⲟⲩϣ ⲛⲧⲉⲡⲣⲟⲥⲫⲟⲣⲁ · ⲙⲛⲧⲁⲡⲁⲣⲭⲏ · ⲙⲛⲡⲛⲉϩⲧⲛⲛⲟⲟⲩⲥⲟⲩ ⲉⲧⲉⲕⲕⲗⲏⲥⲓⲁ ·
…
25 ⲁⲩⲱ ⲕⲱ ⲉϩⲣⲁⲓ ⲛⲧⲉⲧⲣⲁⲡⲉⲍⲁ · ⲙⲛⲛⲟⲉⲓⲕ ·
…
26 ϥⲓⲡⲣⲟⲟⲩϣ ⲙⲡⲗⲁⲭⲁⲛⲟⲛ ϣⲁⲛⲧⲁⲕⲧⲟⲓ ϩⲙⲡⲟⲩⲱϣ ⲙⲡⲛⲟⲩⲧⲉ · ⲙⲡⲛⲟⲩⲧⲉ ⲙⲛⲡⲉⲥⲟⲟⲩ ·
…
27 ⲁϥⲉⲓ ⲇⲉ ⲉⲃⲟⲗ · ⲉϥⲙⲟⲟϣⲉ ⲉϥⲥⲟⲡⲥⲡ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
28 ⲉⲧⲣⲉϥⲥⲟⲟⲩⲧⲛ ⲛⲁϥ ⲛⲛⲉϥϩⲓⲟⲟⲩⲉ · ⲉϥⲙⲟⲟϣⲉ ⲇⲉ ⲁϥⲉⲓ ⲉϫⲛⲟⲩⲙⲟⲟⲛⲉ‐ⲥⲟⲟⲩ ⲡⲉϫⲁϥ ⲛⲁϥ · ϫⲉⲭⲁⲓⲣⲉ ⲡⲉϣⲃⲏⲣ · ⲡⲉϫⲉⲡⲣⲱⲙⲉ ⲛⲁϥ · ϫⲉⲧⲉⲓⲣⲏⲛⲏ ⲛⲁⲕ ⲡⲣⲱⲙⲉ ⲉⲧⲧⲁⲓⲏⲩ ·
…
29 ⲡⲉϫⲁϥ ⲛⲁϥ ⲛϭⲓⲡⲣⲱⲙⲉ ⲙⲡⲓⲥⲧⲟⲥ · ϫⲉⲁⲣⲁ ϣⲁⲓϭⲛⲟⲩⲉⲥⲟⲟⲩ ·
…
30 ⲛⲧⲟⲟⲧⲕ ⲙⲡϩⲟⲟⲩ · ⲉⲡⲉⲓⲛⲟϭ ⲛⲣⲱⲙⲉ ⲛⲧⲁϥⲉⲓ ϣⲁⲣⲟⲛ ·
…
31 ⲡⲉϫⲁϥ ⲛϭⲓⲡϣⲱⲥ ϫⲉⲕⲟⲩⲱϣ ϩⲁⲟⲩⲏⲣ ⲛϯⲙⲉ ·
…
32 ⲡⲉϫⲉⲡⲣⲱⲙⲉ ⲛⲁϥ ϫⲉⲉⲓⲟⲩⲱϣ ϩⲁⲟⲩⲧⲉⲣⲙⲏⲥⲓⲟⲛ ·
…
33 ⲡⲉϫⲉⲡⲣⲱⲙⲉ ⲛϣⲱⲥ ⲛⲁϥ · ϫⲉⲁⲩⲉⲓ ⲥⲧϯⲙⲏ ⲛⲧⲁⲧⲁⲁϥ ⲛⲁⲕ ·
…
34 ⲡⲣⲱⲙⲉ ⲇⲉ ⲁϥⲥⲟⲟⲩⲧⲛ ⲉⲣⲟϥ · ⲛⲧⲉϣⲧⲏⲛ · ⲛⲧⲉϥⲥϩⲓⲙⲉ ⲉϥϫⲱ ⲙⲙⲟⲥ · ϫⲉⲙⲱⲧⲉϣⲧⲏⲛ ·
…
35 ⲉⲧⲁⲧⲁⲥϩⲓⲙⲉ ⲧⲉ ⲕⲁⲁⲥ ⲛⲁⲕ ⲛⲧⲟⲟⲧⲕ ⲛϣⲟⲙⲛⲧ ⲛϩⲟⲟⲩ ·
…
36 ⲉⲓϣⲁⲛⲧⲙⲧⲁⲁϥ ⲛⲁⲕ ·
…
37 ϯⲛⲁⲁⲡⲟⲧⲁⲥⲥⲉ ⲙⲙⲟⲥ ⲛⲁⲕ ·
…
38 ⲁϥⲟⲩⲱϣⲃ ⲛϭⲓⲡϣⲱⲥ ϫⲉⲁⲩⲱ ⲉⲓⲣⲟⲩ ⲛⲧⲁⲓ ·
…
39 ⲙⲛⲗⲁⲁⲩ ϩⲙⲡⲁⲏⲓ ⲉⲓⲙⲏⲧⲉⲓⲥⲟⲣⲧ ·
…
40 ϩⲓϩⲃⲥⲱ ⲛϯⲛⲁϫⲓⲧⲥ ⲁⲛ ⁘
…
41 ⲡⲣⲱⲙⲉ ⲙⲡⲓⲥⲧⲟⲥ ⲛⲧⲉⲣⲉⲡϣⲱⲥⲧⲉⲥⲧⲟϥ ⲉⲃⲟⲗ · ⲙⲛⲧⲉϣⲧⲏⲛ ·
…
42 ⲁϥⲕⲟⲧϥ ⲉⲧⲉϥϩⲓⲏ ϩⲛⲟⲩⲛⲟϭ ⲛⲙ ⲛϩⲏⲧ ⲙⲛϩⲉⲛⲣⲙⲉⲓⲟⲟⲩⲉ · ⲉⲩⲟϣ ·
…
43 ⲉϯ ⲇⲉ ⲉϥⲙⲟⲟϣⲉ ⲉϥⲟⲕⲙ ·
…
44 ⲁⲩⲱ ⲉϥⲙⲉⲉⲩⲉ ⲉⲃⲟⲗ · ϫⲉⲟⲩ ⲡⲉⲧϥⲛⲁⲁϥ ·
…
45 ⲏ ⲉϥⲛⲁϫⲟⲟⲥ ϫⲉⲟⲩ · ⲛⲧⲉϥⲥϩⲓⲙⲉ ·
…
46 ⲛⲧⲉⲩⲛⲟⲩ ⲁϥϭⲱϣⲧ ϩⲓϩⲏ ⲙⲙⲟϥ ⲁϥⲛⲁⲩ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲉϥⲧⲁⲗⲏⲩ ⲉϫⲛⲟⲩϩⲧⲟ ·
…
47 ⲛⲟⲩⲟⲃϣ ⲉϥⲟ ⲙⲡⲉⲥⲙⲟⲧ ⲛⲟⲩⲛⲟϭ ⲛⲁⲣⲭⲱⲛ ⲛⲧⲉⲡⲣⲣⲟ ·
…
48 ⲁϥⲣϩⲟⲧⲉ ⲉⲙⲁⲧⲉ ⲛϭⲓⲡⲣⲱⲙⲉ ·
…
49 ⲁϥⲥⲟⲕϥ ⲛⲥⲁⲟⲩⲥⲁ ⲙⲡⲃⲟⲗ · ⲛⲧⲉϩⲓⲏ · ϣⲁⲛⲧϥⲡⲁⲣⲁⲅⲉ ·
…
50 ⲁⲩⲱ ⲛⲧⲉⲣⲉⲡⲁⲣⲭⲁⲅⲅⲉⲗⲟⲥ ⲡⲱϩ ⲉⲣⲟϥ ⲙⲡⲉⲥⲙⲟⲧ ⲛⲟⲩⲁⲣⲭⲱⲛ ·
…
51 ⲁϥⲥⲉⲕⲡⲉⲭⲁⲗⲓⲛⲟⲥ ⲙⲡⲉϥϩⲧⲟ ⲁϥⲁϩⲉⲣⲁⲧϥ ⲡⲉϫⲁϥ ⲙⲡⲣⲱⲙⲉ · ϫⲉⲭⲁⲓⲣⲉ ·
…
52 ⲇⲱⲣⲟⲑⲉⲟⲥ · ⲉⲕⲛⲁ ⲉⲧⲱⲛ · ⲉⲕⲙⲟⲟϣⲉ ⲙⲁⲩⲁⲁⲕ ·
…
53 ⲡⲉϫⲁϥ ⲛⲁϥ ⲛϭⲓⲇⲟⲣⲟⲑⲉⲟⲥ ϩⲛⲟⲩⲥⲧⲱⲧ ϫⲉⲕⲩⲣⲓⲟⲥ ⲭⲁⲓⲣⲉ · ⲡⲁϫⲟⲉⲓⲥ ⲡⲁⲣⲭⲱⲛ · ⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ ·
…
54 ⲡⲉϫⲉⲡⲁⲣⲭⲱⲛ ⲛⲁϥ ⲉⲧⲉⲙⲓⲭⲁⲏⲗ ⲡⲉ · ϫⲉⲁⲣⲁ ⲉⲥⲟⲛϩ ⲛϭⲓⲑⲉⲟⲡⲓⲥⲧⲏ ⲧⲉⲕⲥϩⲓⲙⲉ ·
…
55 ⲡⲉϫⲉⲇⲱⲣⲟⲑⲉⲟⲥ ⲛⲁϥ ⲉⲣⲉⲡⲉϥϩⲟ ⲡⲁϩⲧ ⲉⲡⲉⲥⲏⲧ ϩⲁⲡϣⲓⲡⲉ · ϫⲉⲥⲉ ⲥⲟⲛϩ ⲛϭⲓⲧⲉⲕϩⲙϩⲁⲗ ·
…
56 ⲡⲉϫⲉⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ ⲛⲁϥ · ϫⲉⲟⲩ ⲡⲉ ⲡⲁⲓ ⲉⲧⲧⲁⲗⲏⲩ ⲉⲣⲟⲕ ·
…
57 ⲡⲉϫⲉⲇⲱⲣⲟⲑⲉⲟⲥ ⲛⲁϥ · ⲉϥⲇⲓⲁⲧⲣⲉⲡⲉⲓ ϫⲉⲟⲩϣⲧⲏⲛ · ⲉⲧⲁⲧⲁⲥϩⲓⲙⲉ ⲧⲉ · ⲡⲉϫⲉⲡⲁⲣⲭⲱⲛ ⲛⲁϥ · ⲉⲧⲉⲙⲓⲭⲁⲏⲗ ⲡⲉ · ϫⲉⲁⲩⲱ ⲉⲕⲣⲟⲩ ⲛⲧⲁⲓ ⲙⲡⲉⲓⲙⲁ ·
…
58 ⲡⲉϫⲉⲇⲱⲣⲟⲑⲉⲟⲥ ⲛⲁϥ · ϫⲉⲉⲣⲉⲟⲩⲛⲟϭ ⲛⲣⲱⲙⲉ ⲛⲏⲩ ⲉϫⲱⲓ ⲙⲡϩⲟⲟⲩ ⲙⲡⲓϩⲉ ⲉⲧⲁⲭⲣⲉⲓⲁ ⲧⲏⲣⲥ ·
…
59 ⲟⲩⲇⲉ ⲙⲛⲛⲟⲩⲃ ⲛⲧⲟⲟⲧ ·
…
60 ⲉⲧⲃⲉⲡⲉⲓⲕⲁⲓⲣⲟⲥ ⲛϩⲓⲥⲉ ⲛⲧⲁⲛⲁⲓ ⲉⲣⲟϥ ·
…
61 ⲁⲓⲛⲧⲥ ⲉⲧⲣⲁⲧⲁⲁⲥ ϩⲁⲟⲩⲉⲥⲟⲟⲩ ·
…
62 ⲙⲡⲟⲩϫⲓⲧⲥ ⲛⲧⲟⲟⲧ · ⲛϯⲥⲟⲟⲩⲛ ⲁⲛ ϫⲉⲉⲓⲛⲁⲣⲟⲩ ·
…
63 ⲡⲉϫⲉⲡⲁⲣⲭⲱⲛ · ⲉⲧⲉⲙⲓⲭⲁⲏⲗ ⲡⲉ · ϫⲉⲉⲓϣⲡⲧⲱⲣⲉ ⲙⲡⲉⲥⲟⲟⲩ ⲛⲧⲁϫⲓⲧϥ ⲛⲁⲕ ⲕⲛⲁⲣ ⲡϩⲟⲟⲩ ⲉⲣⲟⲓ ⲙⲛⲛⲉⲧⲛⲙⲙⲁⲓ ·
…
64 ⲁϥⲟⲩⲱϣⲃ ⲛϭⲓⲇⲱⲣⲟⲑⲉⲟⲥ · ϫⲉⲥⲉ ⲧⲱⲛⲟⲩ ⲡⲁϫⲟⲉⲓⲥ ·
…
65 ⲙⲁⲣⲉⲓⲣⲡⲙⲡϣⲁ · ⲛⲅⲉⲓ ⲉϩⲟⲩⲛ ϩⲁⲧⲁⲟⲩⲉϩⲥⲟⲓ ·
…
66 ⲡⲉϫⲉⲙⲓⲭⲁⲏⲗ · ⲛⲟⲩⲁ ⲛⲛⲁⲅⲅⲉⲗⲟⲥ · ⲉⲧⲙⲟⲟϣⲉ ⲛⲙⲙⲁϥ ·
…
67 ⲙⲡⲉⲥⲙⲟⲧ ⲛⲙⲙⲁⲧⲟⲓ ϫⲉⲙⲟⲟϣⲉ ⲙⲛⲇⲱⲣⲟⲑⲉⲟⲥ · ⲛⲅⲃⲱⲕ ϩⲁϩⲧⲙⲡⲓϣⲱⲥ ·
…
68 ⲁϫⲓⲥ ⲛⲁϥ ϫⲉⲡⲉϫⲉⲡⲁⲣⲭⲱⲛ ⲛⲧⲁϥⲡⲁⲣⲁⲅⲉ ⲙⲙⲟⲕ ⲛⲥⲟⲟⲩⲧⲛ ϫⲉⲧⲛⲛⲟⲟⲩ ⲉⲥⲟⲟⲩ ⲛⲁⲓ ϩⲁⲟⲩⲧⲉⲣⲙⲏⲥⲓⲟⲛ ·
…
69 ⲁⲛⲟⲕ ⲡⲉⲧϣⲡⲧⲱⲱⲣⲉ ⲙⲙⲟϥ · ⲛⲧⲁⲧⲛⲛⲟⲟⲩ ⲧⲉϥⲁⲥⲟⲩ ⲛⲁⲕ · ϣⲁⲡⲛⲁⲩ ⲙⲙⲉⲉⲣⲉ ⲙⲡϩⲟⲟⲩ ·
…
70 ⲁϥⲃⲱⲕ ⲇⲉ ⲛϭⲓⲡⲙⲁⲧⲟⲓ ϣⲁⲡϣⲱⲥ · ⲉϥⲙⲟⲟϣⲉ ⲙⲛⲇⲱⲣⲟⲑⲉⲟⲥ · ϩⲙⲡⲣⲁⲛ ⲙⲡⲁⲣⲭⲱⲛ ·
…
71 ⲁⲩⲉⲓⲛⲉ ⲙⲡⲉⲥⲟⲟⲩ ·
…
72 ⲡⲉϫⲉⲡⲁⲣⲭⲱⲛ ⲛⲁϥ · ϫⲉⲇⲱⲣⲟⲑⲉⲟⲥ ⲉⲓⲥ ⲡⲉⲥⲟⲟⲩ ⲁϥⲥⲟⲃⲧⲉ ⲧⲉⲭⲣⲉⲓⲁ ⲙⲡⲛⲟϭ ⲛⲣⲱⲙⲉ ⲛⲧⲁⲕⲕⲁⲗⲉⲓ ⲙⲙⲟϥ ·
…
73 ⲁⲛⲁⲩ ϩⲱⲱϥ ϫⲉⲕⲛⲁϩⲉ ⲟⲩϣⲏ ⲙⲛⲧⲃⲧ ⲛⲁⲓ ⲉⲧⲁⲭⲣⲉⲓⲁ ·
…
74 ⲉⲡⲓⲛϯⲟⲩⲉⲙ ⲉⲥⲟⲟⲩ ⲁⲛ ·
…
75 ⲡⲉϫⲉⲇⲱⲣⲟⲑⲉⲟⲥ ⲛⲁϥ ϫⲉϩⲁⲙⲟⲓ ⲉⲓⲛⲁϩⲉ ·
…
76 ⲉⲣⲟϥ ⲡⲁⲉⲓⲱⲧ ⲁⲩⲱ ϯⲛⲁϫⲓⲧϥ ⲉⲓⲣⲁϣⲉ ·
…
77 ⲡⲉϫⲉⲡⲁⲣⲭⲱⲛ ϫⲉⲁⲩⲱ ⲉⲕⲛⲁϯⲟⲩ ϩⲁⲣⲟϥ ·
…
78 ⲡⲉϫⲉⲇⲱⲣⲟⲑⲉⲟⲥ ϫⲉϯⲛⲁⲕⲱ ϩⲁϩⲧⲏϥ ⲛⲧⲉϣⲧⲏⲛ · ⲛⲧⲁⲥϩⲓⲙⲉ ϣⲁⲛⲧⲓⲧⲛⲛⲟⲟⲩ ⲧⲉϥⲁⲥⲟⲩ ⲛⲁϥ ·
…
79 ⲡⲉϫⲉⲡⲁⲣⲭⲱⲛ ⲛⲁϥ · ⲉⲧⲉⲙⲓⲭⲁⲏⲗ ⲡⲉ · ϫⲉⲉϣϫⲉ ⲧⲁⲓ ⲧⲉ ⲧϩⲉ ⲕⲁⲧⲉⲭⲧⲏⲛ ⲛⲁⲕ ⲁⲛⲟⲕ ⲡⲉⲧⲛⲁⲧⲛⲛⲟⲟⲩ ϩⲁⲡⲁⲣⲁⲛ · ⲛⲧⲁϫⲓ ⲙⲡⲧⲃⲧ ϣⲁⲛⲧⲉⲕⲧⲛⲛⲟⲟⲩ ⲧⲉϥⲁⲥⲟⲩ ·
…
80 ⲡⲁⲣⲭⲱⲛ ⲇⲉ ⲁϥⲙⲟⲩⲧⲉ ⲉⲟⲩⲁ ϩⲛⲙⲙⲁⲧⲟⲓ ⲉⲧⲙⲟⲟϣⲉ ⲛⲙⲙⲁϥ · ϫⲉⲙⲟⲟϣⲉ ⲛⲅⲃⲱⲕ ⲉⲡϫⲙⲡⲓⲉⲣⲟ · ⲙⲟⲩⲧⲉ ⲉⲃⲟⲗ ⲉⲛⲉⲓⲟⲩⲱϩⲉ ·
…
81 ⲁϫⲓⲥ ⲛⲁⲩ ϫⲉⲡⲉϫⲉⲡⲁⲣⲭⲱⲛ ⲛⲧⲁϥⲉⲓ ⲉϥⲡⲁⲣⲁⲅⲉ ⲙⲙⲱⲧⲛ ⲁϥϣⲁϫⲉ ⲛⲙⲙⲏⲧⲛ ⲙⲡϩⲟⲟⲩ · ϫⲉⲧⲛⲛⲟⲟⲩⲟⲩⲧⲃⲧ ⲛⲁⲓ ⲉⲛⲁⲛⲟⲩϥ · ϩⲁⲟⲩⲧⲉⲣⲙⲓⲥⲓⲟⲛ ·
…
82 ⲁⲩⲱ ϯⲛⲁⲧⲛⲛⲟⲟⲩⲧⲉϥϯⲙⲏ · ⲛⲏⲧⲛ ·
…
83 ⲛⲧⲟⲟⲧϥ ⲛⲇⲱⲣⲟⲑⲉⲟⲥ ⲡⲟⲩⲟⲓ ϣⲁⲡⲛⲁⲩ ⲙⲙⲉⲉⲣⲉ ⲙⲡϩⲟⲟⲩ ·
…
84 ⲁϥⲃⲱⲕ ⲛϭⲓⲡⲙⲁⲧⲟⲓ · ϣⲁⲛⲟⲩⲱϩⲉ ·
…
85 ⲁϥϣⲁϫⲉ ⲛⲙⲙⲁⲩ ϩⲙⲡⲣⲁⲛ ⲙⲡⲁⲣⲭⲱⲛ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲁⲩ ·
…
86 ⲁⲩⲱ ⲁⲛⲟⲩⲱϩⲉ ϯ ⲛⲁϥ ⲛⲟⲩⲛⲟϭ ⲛⲧⲃⲧ ⲉϥⲟⲛϩ · ⲉϥⲣⲟⲟⲩⲧ ·
…
87 ⲁϥⲉⲓⲛⲉ ⲙⲙⲟϥ ϣⲁⲡⲁⲣⲭⲱⲛ · ⲉⲧⲉⲙⲓⲭⲁⲏⲗ ⲡⲉ ϩⲛⲟⲩϭⲉⲡⲏ ·
…
88 ⲡⲉϫⲉⲡⲁⲣⲭⲱⲛ ⲛⲁϥ · ⲉⲧⲉⲙⲓⲭⲁⲏⲗ ⲡⲉ · ϫⲉⲇⲱⲣⲟⲑⲉⲟⲥ ⲉⲕⲟⲩⲉϣ ⲟⲩ ⲟⲛ ·
…
89 ⲙⲏ ⲙⲡⲉⲡϩⲱⲃ ⲣϣⲁⲩ ·
…
90 ⲙⲏ ⲙⲡⲉⲧⲉⲭⲣⲉⲓⲁ ⲣϣⲁⲩ ⲁⲣⲁ ⲁⲡϩⲱⲃ ⲙⲡⲁⲣⲓⲥⲧⲟⲛ ⲥⲟⲃⲧⲉ ⁘ ⲁϥⲟⲩⲱϣⲃ ⲛϭⲓⲇⲱⲣⲟⲑⲉⲟⲥ · ϫⲉⲁϩⲉ ⲡⲁϫⲟⲉⲓⲥ ⲁⲕⲉⲓⲣⲉ ⲛⲙⲙⲁⲓ ⲛⲟⲩⲛⲟϭ ⲙⲡⲉⲧⲛⲁⲛⲟⲩϥ ·
…
91 ⲁⲩⲱ ⲁⲡⲉϩⲟⲟⲩ ϩⲱⲱⲛ ⲉϩⲟⲩⲛ ·
…
92 ⲁⲩⲱ ⲁⲡⲉⲛϩⲱⲃ ⲣϣⲁⲩ ⲕⲁⲗⲱⲥ · ⲟⲩⲛⲟϭ ⲅⲁⲣ ⲛϩⲙⲟⲧ ⲁⲕⲁⲁϥ ⲙⲛⲡⲉⲕϩⲙϩⲁⲗ ·
…
93 ⲡⲉϫⲉⲡⲁⲣⲭⲱⲛ ϫⲉⲙⲁⲣⲟⲛ ϩⲛⲟⲩϭⲉⲡⲏ ·
…
94 ⲁⲩϥⲓ ⲇⲉ ⲙⲡⲉⲥⲟⲟⲩ · ⲙⲛⲡⲧⲉⲃⲧ ·
…
95 ⲁⲩⲃⲱⲕ ·
…
96 ⲛⲉϥⲙⲟⲟϣⲉ ⲇⲉ ⲉϥⲙⲟⲕⲙⲕ ⲙⲙⲟϥ ⲛϭⲓⲇⲱⲣⲟⲑⲉⲟⲥ ⲉⲧⲃⲉⲧⲁⲥⲟⲩ ⲙⲡⲉⲥⲟⲟⲩ · ⲙⲛⲡⲧⲉⲃⲧ ·
…
97 ⲁⲩⲱ ϫⲉⲉϥⲛⲁϩⲉⲧⲱⲛ ⲉⲧⲉⲭⲣⲉⲓⲁ · ⲙⲡⲁⲣⲭⲱⲛ · ⲛϩⲃⲥⲱ ϩⲓⲏⲣⲡ ·
…
98 ⲏ ⲉϥⲛⲁϭⲛⲟⲉⲓⲕ ⲧⲱⲛ ⲕⲁⲧⲁⲣⲟϥ ·
…
99 ϩⲁⲡⲗⲱⲥ ⲛⲉⲣⲉϩⲁϩ ⲙⲙⲉⲉⲩⲉ ⲕⲱⲧⲉ ⲉⲣⲟϥ · ⲉϥⲥⲟⲡⲥⲡ ⲙⲡⲛⲟⲩⲧⲉ ·
…
100 ϩⲙⲡⲉϥϩⲏⲧ ⲧⲏⲣϥ ⲉϥϫⲱ ⲙⲙⲟⲥ · ϫⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲡⲁⲡⲣⲟⲥⲧⲁⲧⲏⲥ ·
…
101 ⲁϩⲉⲣⲁⲧⲕ ⲙⲛⲡⲉⲕϩⲙϩⲁⲗ ⲙⲡϩⲟⲟⲩ · ϫⲉⲉⲓⲣⲉ ⲛⲛⲁⲓ ⲧⲏⲣⲟⲩ ϩⲙⲡⲉⲕⲣⲁⲛ ⲙⲡϩⲟⲟⲩ ⲙⲛⲡⲁϫⲟⲉⲓⲥ · ⲉϥⲙⲉⲉⲩⲉ ⲇⲉ ⲉⲛⲁⲓ ⲛⲉⲣⲉⲡⲁⲣⲭⲁⲅⲅⲉⲗⲟⲥ ·
…
102 ⲥⲟⲟⲩⲛ ⲛⲛϥⲙⲟⲕⲙⲕ · ⲉϥϩⲟⲣϣ ⲛϩⲏⲧ ·
…
103 ⲙⲛⲛⲥⲁⲛⲁⲓ ⲁⲩⲧⲱϩⲙ ⲉⲡⲣⲟ ⲙⲡⲏⲓ ⲛⲇⲱⲣⲟⲑⲉⲟⲥ ·
…
104 ⲁⲙⲓⲭⲁⲏⲗ ⲧⲱϩⲙ ⲉⲧϩⲏ ⲛϣⲟⲣⲡ ·
…
105 ⲁϥⲛⲁⲩ ⲉⲣⲟϥ ⲉϥⲥⲧⲉⲫⲁⲛⲟⲩ ·
…
106 ⲁϥⲙⲟⲟϣⲉ ⲇⲉ ⲉϩⲟⲩⲛ ·
…
107 ⲁⲥⲉⲓ ⲇⲉ ⲛⲁϥ ⲉⲃⲟⲗ ⲛϭⲓⲧⲉⲥϩⲓⲙⲉ ⲙⲙⲁⲓⲛⲟⲩⲧⲉ ·
…
108 ⲡⲉϫⲁⲥ ϫⲉⲕⲁⲗⲱⲥ ⲉⲗⲑⲏⲥ · ⲡⲁϫⲟⲉⲓⲥ ⲡⲁⲣⲭⲱⲛ ·
…
109 ⲡⲉϫⲉⲡⲁⲣⲭⲱⲛ ⲛⲁⲥ ϫⲉⲭⲁⲓⲣⲉ ⲑⲉⲟⲡⲓⲥⲧⲏ ⲉⲧⲉⲡⲉⲥⲃⲱⲗ ·
…
110 ⲡⲉⲧⲉⲧⲡⲓⲥⲧⲉⲩⲉ ⲉⲡⲛⲟⲩⲧⲉ · ⲉⲣⲣⲟⲩ ⲛⲛⲉⲓϩⲟⲟⲩ ·
…
111 ⲁⲥⲟⲩⲱϣⲃ ⲉⲥϫⲱ ⲙⲙⲟⲥ · ϫⲉⲕⲁⲗⲱⲥ ⲁⲕⲉⲓ ⲡⲁϫⲟⲉⲓⲥ ·
…
112 ⲧⲛϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲉⲕⲛⲁ · ⲁⲙⲟⲩ ⲉϩⲟⲩⲛ ⲡⲁⲣⲭⲱⲛ ·
…
113 ⲙⲡⲣⲁϩⲉⲣⲁⲧⲕ ϩⲓⲡⲥⲁ ⲛⲃⲟⲗ · ⲉⲥϫⲱ ⲇⲉ ⲛⲛⲁⲓ ⲉⲓⲥⲇⲱⲣⲟⲑⲉⲟⲥ ⲁϥⲉⲓⲛⲉ ⲙⲡⲉⲥⲟⲟⲩ · ⲙⲛⲡⲛⲟϭ ⲛⲧⲉⲃⲧ · ⲙⲛⲧⲉϣⲧⲏⲛ ·
…
114 ⲁϥⲕⲁⲁⲩ ϩⲓⲧϩⲏ ⲙⲙⲟⲥ ·
…
115 ⲡⲉϫⲁⲥ ⲛⲁϥ · ϫⲉⲛⲧⲁⲕϫⲓ ⲛⲛⲁⲓ ⲧⲱⲛ ⲡⲁⲥⲟⲛ · ϫⲉϯⲛⲁⲩ ⲉⲧⲉϣⲧⲏⲛ ⲛⲧⲁⲕⲕⲧⲟⲥ ⲛⲧⲉⲥϩⲉ ·
…
116 ⲡⲉϫⲉⲇⲱⲣⲟⲑⲉⲟⲥ ⲛⲁⲥ · ϫⲉⲡⲁⲣⲭⲱⲛ ⲁϥϣⲡⲧⲱⲱⲣⲉⲓ ⲁⲩⲧⲁⲁⲩ ⲛⲁⲓ ·
…
117 ⲡⲉϫⲉⲑⲉⲟⲡⲓⲥⲧⲏ · ϫⲉⲕⲁⲗⲱⲥ · ⲡⲁⲥⲟⲛ ·
…
118 ⲁⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲛⲡⲁⲣⲭⲱⲛ ⲛⲁⲛ ⲙⲡϩⲟⲟⲩ · ⲙⲛⲛⲉⲧ ⲛⲙⲙⲁϥ ⲧⲏⲣⲟⲩ ·
…
119 ⲡⲁⲣⲭⲱⲛ ⲇⲉ ⲉⲧⲉⲙⲓⲭⲁⲏⲗ ⲡⲉ ·
…
120 ⲡⲉϫⲁϥ ⲛⲁⲩ ϫⲉⲛⲛⲁⲃⲱⲕ ⲉⲧⲥⲩⲛⲁⲝⲓⲥ · ϫⲉⲡϣⲁ ⲡⲉ ·
…
121 ⲁⲩⲱ ⲁⲡⲛⲁⲩ ϣⲱⲡⲉ · ϭⲱ ⲛⲏⲧⲛ ϩⲱⲱⲧⲏⲩⲧⲛ · ⲛⲧⲟⲕ ⲙⲛⲧⲉⲕⲥϩⲓⲙⲉ · ⲉⲕⲉⲛⲥⲁⲡⲉⲥⲟⲟⲩ · ⲁⲣⲓⲡⲥⲟⲃⲧⲉ ⲙⲡⲙⲁ ⲕⲁⲗⲱⲥ ·
…
122 ⲁⲩⲱ ⲁⲛⲁⲩ ⲉⲡⲉⲓⲧⲉⲃⲧ ·
…
123 ⲙⲡⲣϫⲱϩ ⲉⲣⲟϥ ϣⲁⲛⲧⲉⲓⲉⲓ · ⲛⲧⲁⲉⲡⲓⲧⲁⲥⲥⲉ ⲙⲙⲟϥ ⲕⲁⲧⲁⲡⲁϩⲏⲧ ·
…
124 ⲛⲧⲟⲟⲩ ⲇⲉ ⲡⲉϫⲁⲩ ϫⲉⲛⲧϩⲉ ⲛⲧⲁⲡⲉⲛϫⲟⲉⲓⲥ ⲡⲁⲣⲭⲱⲛ ⲕⲉⲗⲉⲩⲉ ⲙⲁⲣⲉⲥϣⲱⲡⲉ ·
…
125 ⲁϥⲉⲓ ⲇⲉ ⲉⲃⲟⲗ ϩⲓⲧⲟⲟⲧⲟⲩ · ⲛⲥⲉⲥⲟⲟⲩⲛ ⲁⲛ ϫⲉⲛⲓⲙ ⲡⲉ ·
…
126 ⲁⲗⲗⲁ ⲛⲉⲩⲙⲉⲉⲩⲉ ϫⲉⲟⲩⲁⲣⲭⲱⲛ ⲛⲧⲉⲡ ⲡⲉ ·
…
127 ⲗⲟⲓⲡⲟⲛ ·
…
128 ⲡⲉϫⲉⲇⲱⲣⲟⲑⲉⲟⲥ ⲛⲑⲉⲟⲡⲓⲥⲧⲏ ϫⲉⲧⲁⲥⲱⲛⲉ · ⲉⲛⲛⲁⲣⲟⲩ ·
…
129 ⲏ ⲛⲁⲡⲱⲣϣ · ϩⲁⲡⲁⲣⲭⲱⲛ ⲛⲁϣ ⲛϩⲉ ·
…
130 ⲏ ⲉⲛⲛⲁϭⲛⲟⲉⲓⲕ ⲛⲧⲱⲛ ·
…
131 ⲏ ⲏⲣⲡ ⲕⲁⲧⲁⲣⲟϥ ·
…
132 ϩⲁⲙⲟⲓ ⲛⲟⲩ ⲛⲧϩⲉ ⲙⲡⲁϩⲟⲩ · ⲉⲣⲉⲧⲉⲛϩⲏ ⲧⲏϣ ·
…
133 ⲡⲉϫⲉⲑⲉⲟⲡⲓⲥⲧⲏ · ϫⲉⲡⲁⲥⲟⲛ · ⲙⲡⲛⲟⲩⲧⲉ ⲛⲁⲕⲁⲁⲛ ⲁⲛ ⲛⲥⲱϥ ·
…
134 ⲧⲱⲟⲩⲛ ⲧⲉⲱⲥ ⲙⲁⲣⲉⲟⲩⲣⲱⲙⲉ ⲕⲉⲛⲥⲡⲉⲥⲟⲟⲩ ·
…
135 ⲁⲩⲱ ⲧⲛⲛⲁⲣⲡϩⲱⲃ · ⲙⲡⲁⲓ ϩⲱⲱⲛ · ⲙⲡⲥⲛⲁⲩ ·
…
136 ⲁⲩⲉⲓⲣⲉ ⲇⲉ ϩⲓⲛⲁⲓ ⲡⲉϫⲁⲥ ⲛⲁϥ · ϫⲉⲙⲁⲣⲛⲃⲱⲕ ⲛⲧⲛⲛⲡⲕⲟⲩⲓ ⲛⲏⲣⲡ ⲉⲃⲟⲗ · ⲛⲧⲛⲛⲁⲩ ϫⲉϥⲛⲁⲣϣⲁⲩ · ⲙⲡⲁⲣⲭⲱⲛ ϫⲓⲛⲙⲙⲟⲛ ·
…
137 ⲛⲧⲉⲣⲟⲩⲃⲱⲕ ⲇⲉ ⲁⲩⲟⲩⲱⲛ ⲙⲡⲣⲟ ·
…
138 ⲁⲩϩⲉ ⲉⲡⲉϩⲟ · ⲉϥⲙⲉϩ ⲛⲏⲣⲡ ϣⲁⲛⲧⲉϥⲡⲱϩ ⲉⲡⲣⲟ ·
…
139 ⲁⲩⲱ ⲁϥϣⲧⲟⲣⲧⲣ ⲛϭⲓⲇⲱⲣⲟⲑⲉⲟⲥ ·
…
140 ⲡⲉϫⲁϥ ⲛⲧⲉϥⲥϩⲓⲙⲉ · ϫⲉⲁⲗⲁⲁⲩ ⲛⲣⲱⲙⲉ ⲉⲛⲏⲣⲡ ⲉϩⲟⲩⲛ ·
…
141 ϫⲓⲛⲧⲁⲓⲃⲱⲕ ⲉⲃⲟⲗ ⲙⲡϩⲟⲟⲩ ·
…
142 ⲡⲉϫⲁⲥ ⲛⲁϥ ⲛϭⲓⲧⲉϥⲥϩⲓⲙⲉ · ϫⲉϥⲟⲛϩ ⲛϭⲓⲡϫⲟⲉⲓⲥ · ϫⲉⲙⲡⲛⲁⲩ ⲛⲧⲁⲉⲓⲛⲉ ⲉⲃⲟⲗ · ⲛⲧⲁⲡⲁⲣⲭⲏ ⲙⲡϩⲟⲟⲩ ·
…
143 ⲙⲛⲗⲁⲁⲩ ⲛϩⲟⲩⲛ ⲛⲥⲁⲟⲩϣⲁϣⲟⲩ ⲛⲏⲣⲡ ⲛⲟⲩⲱⲧ · ⲉϥⲟⲩⲟⲗⲥ ⲉϩⲟⲩⲛ ·
…
144 ⲡⲉϫⲁϥ ⲛⲁⲥ · ϫⲉϩⲣⲟϣ ⲛϩⲏⲧ ·
…
145 ⲧⲁⲥⲱⲛⲉ ϣⲁⲛⲧⲛⲛⲁⲩ ⲉⲧϩⲁⲏ ⲙⲡϩⲱⲃ · ⲙⲛⲛⲥⲱⲥ · ⲡⲉϫⲁϥ ⲛⲁⲥ · ϫⲉⲙⲁⲣⲛⲃⲱⲕ ⲛⲧⲛⲉⲓⲛⲉ ·
…
146 ⲙⲡⲕⲟⲩⲓ ⲛⲛⲉϩ ⲉⲃⲟⲗ ⲉⲧⲃⲉⲛϭⲓⲛⲟⲩⲱⲙ ⲙⲛⲧⲉⲭⲣⲉⲓⲁ ⲛⲛⲉⲥⲛⲏⲩ ·
…
147 ⲁⲩⲱ ⲁⲩⲃⲱⲕ ⲉϩⲟⲩⲛ ⲙⲡⲉⲥⲛⲁⲩ ⲉⲡⲕⲩⲗⲗⲁⲣⲓⲕⲟⲛ ·
…
148 ⲁⲩϩⲉ ⲉⲥⲁϣϥ ⲛⲁⲛⲅⲏⲛ ⲉⲩⲙⲉϩ ⲛⲛⲉϩ ⲉⲩⲙⲉϩ ⲉϩⲣⲁⲓ ⲉⲣⲱⲟⲩ ·
…
149 ⲁⲩⲱ ϩⲉⲛⲗⲁⲕⲱⲛ ⲉⲩⲙⲉϩ · ⲛⲧⲁⲡⲁⲛⲏ ⲙⲛϩⲉⲛⲁϣⲏ ⲛⲕⲟⲩⲗⲁⲑ ⲉⲩⲙⲉϩ ⲟⲛ ⲙⲙⲓⲛⲉ ⲛⲧⲁⲡⲁⲛⲏ · ϩⲓⲁⲅⲁⲑⲟⲛ ⲛⲓⲙ · ⲡⲣⲟⲥⲧⲉⲭⲣⲉⲓⲁ ⲙⲡⲏⲓ ·
…
150 ⲛⲧⲟⲟⲩ ⲇⲉ ⲁⲩⲛⲟϭ ⲛϩⲟⲧⲉ ϩⲉ ⲉϩⲣⲁⲓ ⲉϫⲱⲟⲩ ·
…
151 ⲙⲛⲛⲥⲱⲥ ⲟⲛ ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲙⲛⲡⲉⲩⲕⲟⲓⲧⲟⲛ ·
…
152 ⲁⲩϩⲉ ⲉⲛⲉⲩⲧⲏⲏⲃⲉ ⲉⲩⲙⲉϩ ⲛϩⲟⲉⲓⲧⲉ ⲙⲙⲓⲛⲉ ⲛⲓⲙ · ⲉⲧⲧⲁⲓⲏⲩ ⲉⲩⲉⲓⲛⲉ ⲛⲛⲁⲧⲉⲩⲙⲛⲧⲣⲙⲙⲁⲟ ·
…
153 ⲛϣⲟⲣⲡ ⁘ ⲥⲭⲉⲇⲟⲛ ⲛⲥⲉϫⲟⲟⲥ · ϫⲉⲛⲧⲟⲟⲩ ⲛⲉ ϩⲛⲟⲩⲙⲉ ·
…
154 ⲙⲛⲛⲥⲁⲛⲁⲓ ⲁⲩⲃⲱⲕ ⲉⲡⲉⲩⲙⲁ · ⲛϯⲟⲉⲓⲕ ·
…
155 ⲁⲩϩⲉ ⲉⲣⲟϥ ⲉϥⲙⲉϩ ⲛⲟⲉⲓⲕ ⲉϥⲥⲟⲧⲡ · ⲉϥⲟⲩⲟⲃϣ ⲛⲧϩⲉ ⲛⲟⲩⲭⲓⲟⲛ ·
…
156 ⲁⲩⲱ ⲛⲧⲉⲩⲛⲟⲩ ⲁⲩⲁⲓⲥⲑⲁⲛⲉ ⲙⲡⲉϩⲙⲟⲧ ⲙⲡⲛⲟⲩⲧⲉ ⲛⲧⲁϥϣⲱⲡⲉ ⲙⲙⲟⲟⲩ ·
…
157 ⲁⲩϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ⲙⲓⲭⲁⲏⲗ ·
…
158 ⲉⲓⲧⲁ ⲡⲉϫⲉⲇⲱⲣⲟⲑⲉⲟⲥ · ⲛⲑⲉⲟⲡⲓⲥⲧⲏ · ϫⲉⲉⲓⲥ ⲡⲛⲟⲩⲧⲉ ·
…
159 ⲁϥⲥⲃⲧⲱⲧ ⲛϩⲛϩⲱⲃ ⲛⲓⲙ ·
…
160 ⲙⲁⲣⲛⲡⲱⲣϣ ϩⲁⲡⲁⲣⲭⲱⲛ ϫⲉⲁⲡⲛⲁⲩ ϣⲱⲡⲉ ⲉⲧⲣⲉⲛⲃⲱⲕ ⲉⲧⲥⲩⲛⲁⲝⲓⲥ ·
…
161 ⲁⲩⲉⲓⲣⲉ ⲇⲉ ⲛϩⲱⲃ ⲛⲓⲙ ·
…
162 ⲁⲩⲡⲱⲣϣ ⲙⲡⲉⲩⲛⲟϭ ⲛⲁⲕⲟⲩⲃⲓⲧⲱⲛ ϩⲛⲟⲩⲧⲓⲙⲏ · ⲡⲣⲟⲥⲡⲧⲁⲉⲓⲟ ⲙⲡⲁⲣⲭⲱⲛ ·
…
163 ⲁⲩⲱ ⲁⲩⲕⲱ ⲉϩⲣⲁⲓ ⲛⲛⲉⲧⲣⲁⲡⲉⲍⲁ ⲛⲛⲉⲥⲛⲏⲩ ⲕⲁⲧⲁⲡⲉⲩⲉⲑⲟⲥ ·
…
164 ⲁⲩⲗⲉⲩⲕⲟⲫⲟⲣⲉⲓ ⲙⲙⲟⲟⲩ ϩⲱⲟⲩ ⲕⲁⲗⲱⲥ ·
…
165 ⲁⲩⲃⲱⲕ ⲉⲧⲥⲩⲛⲁⲝⲓⲥ ϩⲙⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϩⲛⲟⲩⲛⲟϭ ⲛⲥⲡⲟⲩⲇⲏ ⲙⲛⲟⲩⲣⲁϣⲉ ·
…
166 ⲁⲩⲱ ⲛⲧⲉⲣⲟⲩⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ·
…
167 ⲁⲩⲡⲁϩⲧⲟⲩ ϩⲓⲟⲩⲥⲟⲡ ϩⲓⲧϩⲏ ⲙⲡϩⲓⲉⲣⲁϯⲟⲛ ·
…
168 ⲉϫⲙⲡⲉⲩϩⲟ · ⲉⲩⲥⲟⲡⲥⲡ ⲙⲡⲛⲟⲩⲧⲉ ϩⲛϩⲉⲛⲛⲟϭ ⲛϣⲡϩⲙⲟⲧ ·
…
169 ⲁⲩⲱ ⲉⲩⲉⲩⲭⲁⲣⲓⲥⲧⲉⲓ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϩⲛⲟⲩⲛⲟϭ ⲛⲥⲡⲟⲩⲇⲏ · ⲉⲩϫⲱ ⲙⲙⲟⲥ ϫⲉⲧⲛⲉⲩⲭⲁⲣⲓⲥⲧⲉⲓ ⲛⲁⲕ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
170 ⲁⲩⲱ ⲧⲛϯⲉⲟⲟⲩ ⲙⲡⲉⲕⲉⲓⲱⲧ ⲛⲁⲅⲁⲑⲟⲥ ·
…
171 ⲁⲩⲱ ⲧⲛϣⲡϩⲙⲟⲧ ⲛⲧⲟⲟⲧϥ ⲙⲡⲉⲕⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉⲙⲡⲉⲕϩⲟⲩⲣⲱⲛ · ⲙⲡⲉⲕⲛⲁ ·
…
172 ⲟⲩⲇⲉ ⲙⲡⲉⲕⲟⲃϣⲕ ⲉⲡⲉⲛⲥⲟⲡⲥⲡ ·
…
173 ⲁⲗⲗⲁ ⲁⲕⲧⲛⲛⲟⲟⲩ ⲛⲁⲛ · ⲛⲛⲉⲕⲙⲛⲧϣⲁⲛϩⲏⲧ ϩⲛⲟⲩϭⲉⲡⲏ ·
…
174 ⲉⲓⲧⲁ ⲙⲛⲛⲥⲁⲛⲁⲓ ⲁⲩⲥⲩⲛⲁⲅⲉ ·
…
175 ⲁⲩϫⲓ ⲛⲧⲉⲓⲣⲏⲛⲏ ·
…
176 ⲁⲩϭⲉⲡⲏ ·
…
178 ⲁⲩⲃⲱⲕ ⲁⲩⲟⲩⲱⲛ · ⲙⲡⲉⲩⲏⲓ ϩⲁϫⲱⲟⲩ ⲛⲛⲉⲥⲛⲏⲩ ⲉⲩⲡⲣⲟⲥⲕⲁⲣⲧⲏⲣⲉⲓ ϩⲁϫⲱϥ · ⲙⲡⲁⲣⲭⲱⲛ ϩⲛⲟⲩⲛⲟϭ ⲛⲥⲡⲟⲩⲇⲏ ·
…
179 ⲗⲟⲓⲡⲟⲛ ⲁⲩⲥⲉⲕⲣⲱⲙⲉ ⲛⲓⲙ ⲉϩⲟⲩⲛ · ⲛϩⲟⲟⲩⲧ ϩⲓⲥϩⲓⲙⲉ · ϩⲓϣⲏⲣⲉ ϣⲏⲙ ·
…
180 ϩⲱⲥⲧⲉ ⲛⲧⲉⲧⲁⲩⲗⲏ ⲧⲏⲣⲥ ⲙⲟⲩϩ · ⲛⲧⲟϥ ⲇⲉ ⲇⲱⲣⲟⲑⲉⲟⲥ · ⲙⲛⲑⲉⲟⲡⲓⲥⲧⲏ ⲧⲉϥⲥϩⲓⲙⲉ ·
…
181 ⲛⲉⲩⲙⲏⲣ ⲡⲉ ⲉⲩⲁϩⲉⲣⲁⲧⲟⲩ ⲉⲩⲇⲓⲁⲕⲟⲛⲉⲓ ⲉⲛⲉⲥⲛⲏⲩ ϩⲛⲭⲣⲉⲓⲁ ⲛⲓⲙ · ⲉⲩⲇⲓⲁⲕⲱⲛⲉⲓ ⲛⲁⲩ ⲛⲟⲩⲏⲣⲡ ⲉⲛⲁϣⲱϥ · ⲉⲣⲉⲛⲁⲓ ⲇⲉ ϣⲟⲟⲡ ⲛⲧⲉⲓϩⲉ ·
…
182 ⲉⲓⲥ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲉⲧⲉⲡⲁⲣⲭⲱⲛ ⲡⲉ · ⲙⲛⲧⲉϥⲧⲁⲝⲓⲥ ⲧⲏⲣⲥ ·
…
183 ⲁⲩⲧⲱϩⲙ ⲉⲡⲣⲟ ⲙⲡⲏⲓ ·
…
184 ⲁⲇⲱⲣⲟⲑⲉⲟⲥ ⲙⲛⲧⲉϥⲥϩⲓⲙⲉ ⲁⲩϭⲉⲡⲏ ·
…
185 ⲁⲩⲉⲓ ⲉⲃⲟⲗ ϩⲏⲧϥ ⲉⲩⲣⲁϣⲉ ·
…
186 ⲁⲩⲡⲣⲟⲥⲕⲩⲛⲏ ⲛⲁϥ ⲉⲩϫⲱ ⲙⲙⲟⲥ · ϫⲉⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ · ⲙⲛⲧⲉⲕⲧⲁⲝⲓⲥ ⲧⲏⲣⲥ ⲡⲉⲛϫⲟⲉⲓⲥ ⲡⲁⲣⲭⲱⲛ ·
…
187 ⲁⲗⲏⲑⲱⲥ ⲧⲛⲣⲁϣⲉ ⲧⲱⲛ ⲟⲩ · ϫⲉⲁⲛⲙⲡϣⲁ ·
…
188 ⲁⲕⲉⲓ ⲛⲁⲛ ϩⲛⲟⲩϩⲟⲟⲩ ⲉϥⲧⲁⲓⲏⲩ · ⲛϩⲟⲩⲟ ·
…
189 ⲁⲩⲱ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲣⲁϣⲉ ⲛⲙⲙⲁⲕ · ⲁⲙⲟⲩ ⲉϩⲟⲩⲛ ⲡⲣⲱⲙⲉ ⲉⲧⲥⲙⲁⲙⲁⲁⲧ · ⲡϫⲟⲉⲓⲥ ⲛⲙⲙⲁⲕ ⁖ⲻ
…
190 ⲡⲁⲣⲭⲁⲅⲅⲉⲗⲟⲥ ⲇⲉ ⲉⲧⲉⲡⲁⲣⲭⲱⲛ ⲡⲉ ·
…
191 ⲁϥⲃⲱⲕ ⲉϩⲟⲩⲛ ⲉⲧⲁⲩⲗⲏ ⲙⲡⲏⲓ ·
…
192 ⲁϥϩⲉ ⲉⲣⲟⲥ ⲉⲥⲙⲉϩ ⲛϩⲟⲟⲩⲧ ϩⲓⲥϩⲓⲙⲉ · ϩⲓϣⲏⲣⲉ ⲕⲟⲩⲓ ⲙⲛⲛⲛⲟϭ ·
…
193 ⲁϥⲣⲧϩⲉ ⲛⲛⲉϥⲟ ⲛϣⲡⲏⲣⲉ ·
…
194 ⲡⲉϫⲁϥ ⲛⲇⲱⲣⲟⲑⲉⲟⲥ · ⲙⲛⲑⲉⲟⲡⲓⲥⲧⲏ · ⲧⲉϥⲥϩⲓⲙⲉ · ϫⲉⲛⲉⲛⲛⲏⲩ · ⲟⲩ ⲉⲣⲱⲧⲛ ⲛⲉ ⲛⲉⲓ ⲁϣ ⲏ ⲛⲣⲱⲙⲉ · ⲉϯⲛⲁⲩ ⲉⲣⲟⲟⲩ ⲛⲧⲉⲓϩⲉ ⲧⲏⲣⲥ ·
…
195 ⲁⲣⲏⲩ ⲛⲧⲁⲧⲛⲟⲩⲉϩ ϩⲓⲥⲉ ⲉⲣⲱⲧⲛ ⲉⲧⲃⲏⲏⲧ · ϫⲉⲁⲓⲉⲓ ϣⲁⲣⲱⲧⲛ ⲙⲡϩⲟⲟⲩ ·
…
196 ⲙⲏ ⲉⲧⲉⲧⲛⲛⲁⲩ ⲁⲛ ⲉⲡϩⲟϫϩϫ ⲉⲧϣⲟⲟⲡ · ⲧⲉⲛⲟⲩ ⲙⲟⲅⲓⲥ ⲛⲧⲉⲧⲛⲣ ⲡⲁⲓ ϩⲛⲛⲉⲓϩⲟⲟⲩ ⲉⲧⲉⲣⲉⲡϩⲉ‐ⲛⲟⲩϥⲉ ϣⲟⲟⲡ ·
…
197 ⲁⲩⲟⲩⲱϣⲃ ⲡⲉϫⲁⲩ ϫⲉⲡⲉⲛϫⲟⲉⲓⲥ · ⲡⲁⲣⲭⲱⲛ · ⲕⲱ ⲛⲁⲛ ⲉⲃⲟⲗ ·
…
198 ⲙⲡⲉⲛⲟⲩⲉϩⲗⲁⲁⲩ ⲛⲃⲁⲣⲟⲥⲉⲣⲟⲛ · ⲉⲧⲃⲏⲏⲧⲕ ·
…
199 ⲁⲗⲗⲁ ⲡⲉϩⲙⲟⲧ ⲙⲡⲛⲟⲩⲧⲉ ϣⲏⲡ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉⲙⲛⲗⲁⲁⲩ ⲛϣⲙⲙⲟ ϩⲛⲛⲁⲓ ⲧⲏⲣⲟⲩ ⲉⲧⲉⲕⲛⲁⲩ ⲉⲣⲟⲟⲩ ⲙⲡϩⲟⲟⲩ · ⲁⲗⲗⲁ ⲛⲁⲡⲉⲛⲅⲉⲛⲟⲥ ⲛⲉ ·
…
200 ⲁⲩⲱ ⲥⲉⲏⲡ ⲉⲣⲟⲛ ⲧⲏⲣⲟⲩ ϩⲁⲛⲉⲛⲉⲓⲟⲧⲉ ·
…
201 ⲛⲁⲓ ⲇⲉ ⲉⲩϫⲱ ⲙⲙⲟⲟⲩ ⲛⲉⲣⲉⲡⲁⲣⲭⲁⲅⲅⲉⲗⲟⲥ ·
…
202 ⲙⲓⲭⲁⲏⲗ ⲣⲁϣⲉ ⲉϩⲣⲁⲓ ⲉϫⲛⲧⲉⲩⲡⲣⲟϩⲁⲓⲣⲉⲥⲓⲥ ⲧⲉ ϫⲏⲕ ⲉⲃⲟⲗ ·
…
203 ⲡⲉϫⲁϥ ⲛⲁⲩ ϫⲉⲙⲁⲣⲟⲛ · ϫⲉⲁⲡⲛⲁⲩ ϣⲱⲡⲉ ⲛⲧⲁϫⲓ ⲛⲧⲁⲭⲣⲉⲓⲁ · ⲙⲛⲛⲉⲧⲛⲙⲙⲁⲓ ·
…
204 ⲁⲩⲃⲱⲕ ⲇⲉ ⲉⲡⲙⲁ ⲛⲧⲁⲩⲥⲃⲧⲱⲧϥ ⲛⲁϥ ·
…
205 ⲛⲧⲉⲣⲟⲩⲃⲱⲕ ⲇⲉ ⲉⲡⲙⲁ ⲛⲥⲱ ·
…
206 ⲁϥϩⲙⲟⲟⲥ ⲉϫⲛⲟⲩⲑⲣⲟⲛⲟⲥ · ⲛϭⲓⲡⲁⲣⲭⲱⲛ ·
…
207 ⲁϥⲕⲉⲗⲉⲩⲉ ϫⲉⲁⲛⲓⲛⲉ ⲙⲡⲧⲉⲃⲧ ⲛⲁⲓ ⲛⲧⲁⲉⲡⲓⲧⲁⲥⲥⲉ ⲙⲙⲟϥ ⲕⲁⲧⲁⲣⲟⲓ ·
…
208 ⲁⲩϭⲉⲡⲏ ⲁⲩⲉⲓⲛⲉ ⲙⲙⲟϥ ⲛⲁϥ ·
…
209 ⲡⲉϫⲁϥ ⲛⲁϥ ϫⲉⲇⲱⲣⲟⲑⲉⲟⲥ ·
…
210 ⲁⲩⲟⲩⲱⲛ ⲛϩⲏⲧϥ ·
…
211 ⲁⲩⲉⲓⲣⲉ ⲇⲉ ϩⲓⲛⲁⲓ · ⲡⲉϫⲉⲡⲁⲣⲭⲱⲛ ⲛⲁϥ · ϫⲉⲁⲛⲓⲛⲉ ⲉⲃⲟⲗ ⲛⲧⲉϥⲕⲟⲓⲗⲓⲁ ·
…
212 ⲛⲧⲉⲣϥⲛⲧⲥ ⲇⲉ ⲉⲃⲟⲗ ·
…
213 ⲛⲉ ⲟⲩⲛⲟϭ ⲇⲉ ⲉⲙⲁⲧⲉ ⲧⲉ ·
…
214 ⲡⲉϫⲉⲡⲁⲣⲭⲱⲛ ⲛⲁϥ · ϫⲉⲁⲩⲟⲩⲱⲛ ⲙⲙⲟⲥ ·
…
215 ⲁϥⲟⲩⲱⲛ ⲇⲉ ⲙⲙⲟⲥ ⲛϭⲓⲇⲱⲣⲟⲑⲉⲟⲥ ⲁϥϩⲉ · ⲉⲩⲛⲟϭ ⲙⲡⲁⲛⲛⲓⲛ · ⲛϩⲏⲧⲥ ⲛϩⲟⲩⲛ ⲙⲙⲟⲥ · ⲉⲥⲧⲟⲟⲃⲉ ⲛⲟⲩⲥⲫⲣⲁⲅⲓⲥ ·
…
216 ⲇⲱⲣⲟⲑⲉⲟⲥ ·
…
217 ⲇⲉ ⲁϥⲑⲁⲩⲙⲁⲍⲉ ⲉϫⲙⲡϩⲱⲃ · ⲉϥϫⲱ ⲙⲙⲟⲥ · ϫⲉⲟⲩ ⲡⲉ ⲡⲉⲓⲡⲁⲣⲭⲱⲛ · ⲛⲧⲁⲓϩⲉ ⲉⲣⲟϥ ⲛϩⲟⲩⲛ ⲛⲧⲉⲓⲕⲟⲓⲗⲓⲁ ·
…
218 ⲡⲉϫⲉⲡⲁⲣⲭⲱⲛⲛⲁϥ · ϫⲉϣⲁⲥϣⲱⲡⲉ ⲛⲧⲉⲛⲛⲟϭ ⲛⲧⲉⲃⲧⲱⲙⲕ ⲛϩⲱⲃ ⲛⲓⲙ · ⲉⲧⲟⲩⲛⲁϩⲉ ⲉⲣⲟⲟⲩ ·
…
219 ⲁⲟⲩⲱⲛ ⲙⲙⲟⲥ ⲧⲉⲱⲱⲥ ⲛⲧⲛⲛⲁⲩ ϫⲉⲉⲣⲉⲟⲩ ⲛϩⲟⲩⲛ ⲙⲙⲟⲥ ·
…
220 ⲇⲱⲣⲟⲑⲉⲟⲥ ⲇⲉ ⲡⲉϫⲁϥ ⲛⲁϥ ϫⲉⲡⲁϫⲟⲉⲓⲥ · ⲉⲓⲛⲁⲟⲩⲱⲛ ⲙⲙⲟⲥ ⲛⲁϣ ⲛϩⲉ ·
…
221 ⲉⲓⲥϩⲏⲏⲧⲉ ⲉⲥⲧⲟⲟⲃⲉ ·
…
222 ⲁϥⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ ⲛϭⲓⲙⲓⲭⲁⲏⲗ · ⲉⲧⲉⲡⲁⲣⲭⲱⲛ ⲡⲉ ·
…
223 ⲁϥϫⲓ ⲛⲧⲡⲁⲛⲛⲓⲛ ·
…
224 ⲁϥⲟⲩⲱⲛ ⲙⲙⲟⲥ ·
…
225 ⲁϥϩⲉ ⲉⲣⲟⲥ ⲉⲥⲙⲉϩ ⲛⲛⲟⲩⲃ · ⲉϥⲥⲟⲧⲡ ⲁⲩⲟⲩⲱⲡ ⲇⲉ ⲛⲛⲛⲟⲩⲃ ·
…
226 ⲁⲩϩⲉ ⲉⲣⲟⲟⲩ ⲉⲩⲉⲓⲣⲉ ⲛϣⲟⲙⲛⲧ ⲛϣⲉ ⲛϩⲟⲗⲟⲕⲟⲧⲧⲓⲛⲟⲥ ⲛⲁⲡⲉ ·
…
227 ⲙⲛⲛⲥⲱⲥ ⲛⲥⲁⲡⲉⲥⲏⲧ ⲙⲙⲟⲟⲩ · ⲧⲏⲣⲟⲩ ⲁϥϩⲉ ⲉⲕⲉϣⲟⲙⲛⲧ ⲛⲧⲉⲣⲙⲏⲥⲓⲟⲛ ⲟⲩⲁ ⲟⲩⲁ ·
…
228 ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ⲉⲧⲡⲉ ⲉϥϫⲱ ⲙⲙⲟⲥ · ϫⲉⲛⲧⲟⲕ ⲟⲩⲇⲓⲕⲁⲓⲟⲥ ⲡϫⲟⲉⲓⲥ ·
…
229 ⲁⲩⲱ ⲛⲉⲕϩⲁⲡ ⲥⲟⲩⲧⲱⲛ · ϫⲉⲙⲛϣⲓ ϣⲟⲟⲡ ⲛⲛⲉⲧⲙⲉ ⲙⲙⲟⲕ ·
…
230 ⲡⲁⲣⲭⲱⲛ ⲇⲉ ⲉⲧⲉⲙⲓⲭⲁⲏⲗ ⲡⲉ ·
…
231 ⲁϥⲙⲟⲩⲧⲉ ⲇⲉ ⲇⲱⲣⲟⲑⲉⲟⲥ ⲙⲛⲑⲉⲟⲡⲓⲥⲧⲏ ⲧⲉϥⲥϩⲓⲙⲉ ·
…
232 ⲡⲉϫⲁϥ ⲛⲁⲩ ϫⲉϩⲱⲛ ⲉϩⲟⲩⲛ ⲉⲣⲟⲓ ⲛⲉⲥⲛⲏⲩ · ⲟⲛⲧⲱⲥ ⲉϣϫⲉ ⲛⲧⲱⲧⲛ ϩⲉⲛⲣⲙⲣⲁϣ ⲟⲛ ·
…
233 ⲁⲩⲱ ⲁⲧⲛϫⲟ ⲛϩⲉⲛⲁϣ ⲏ ⲛⲁⲛϩⲟⲗⲟⲙⲁ ⲉⲃⲟⲗ ⲉⲧⲃⲏⲏⲧ · ⲛⲧⲁⲓⲉⲓ ϣⲁⲣⲱⲧⲛ ·
…
234 ⲁⲗⲗⲁ ⲉⲓⲥ ⲡⲛⲟⲩⲧⲉ ⲁϥⲥⲉⲃⲧⲉⲧⲏⲩⲧⲛ ⲁⲩⲱ ⲁⲓⲥⲟⲩⲛⲛⲉⲓⲛⲟⲩⲃ · ⲙⲛⲧⲉⲥⲫⲣⲁⲅⲓⲥ ·
…
235 ⲁⲓϩⲉ ⲉⲣⲟⲟⲩ ⲉⲛⲁⲡⲁϫⲟⲉⲓⲥ ⲡⲣⲣⲟ ⲛⲉ ·
…
236 ⲧⲉⲛⲟⲩ ϭⲉ ⲉⲡⲙⲁ ⲛⲧⲙⲛⲧⲙⲁⲓ ⲣⲱⲙⲉ ⲛⲧⲁⲧⲉⲧⲛⲁⲁⲥ ⲛⲙⲙⲁⲓ ⲙⲡϩⲟⲟⲩ · ⲙⲛⲛⲁⲣⲱⲙⲉ ·
…
237 ⲉⲓⲥϩⲏⲏⲧⲉ ϯⲛⲁⲭⲁⲣⲓⲍⲉ ⲛⲏⲧⲛ ⲛϣⲟⲙⲛⲧ ⲛϣⲉ ⲛϩⲟⲗⲟⲕⲟⲧⲧⲓⲛⲟⲥ ·
…
238 ⲁⲩⲱ ⲡⲕⲉϣⲟⲙⲛⲧ ⲛⲧⲉⲣⲙⲏⲥⲓⲟⲛ · ϥⲓⲧⲟⲩ ⲛⲏⲧⲛ · ⲛⲧⲉⲧⲛϯ ⲟⲩⲁ ⲙⲡϣⲱⲥ ·
…
239 ⲟⲩⲁ ⲛⲛⲟⲩⲱϩⲉ · ⲉⲡⲙⲁ ⲛⲛⲧⲉⲃⲧ · ϫⲉⲁⲛⲟⲕ ⲁⲓϣⲡⲧⲱⲣⲉ ⲙⲙⲟⲟⲩ ⲛⲏⲧⲛ ·
…
240 ⲁⲩⲱ ⲉⲓⲥⲡⲛⲁⲩ ⲙⲙⲉⲉⲣⲉ ⲁϥϣⲱⲡⲉ · ⲕⲁⲧⲁⲧⲉⲡⲣⲟⲑⲉⲥⲙⲓⲁ ·
…
241 ⲡⲕⲉⲟⲩⲁ ⲇⲉ ϩⲱⲱϥ · ⲛⲅϥⲓⲧϥ ⲛⲅⲧⲁⲁϥ ⲙⲡⲣⲱⲙⲉ ..ⲕⲧⲁⲧⲉⲕϣⲧⲏⲛ ⲛⲧⲁⲕⲧⲁⲁⲥ ⲁⲕϫⲓ ⲙⲡⲉⲥⲟⲩⲟ · ⲛⲧⲉⲡⲣⲟⲥⲫⲟⲣⲁ ·
…
242 ⲇⲱⲣⲟⲑⲉⲟⲥ ⲇⲉ ⲙⲛⲑⲉⲟⲡⲓⲥⲧⲏ ·
…
243 ⲁⲩⲡⲁϩⲧⲟⲩ ⲙⲡⲁⲣⲭⲱⲛ · ⲉⲩϫⲱ ⲙⲙⲟⲥ · ϫⲉⲟⲩ ⲡⲉ ⲡⲁⲓ ⲡⲉⲛϫⲟⲉⲓⲥ ·
…
244 ⲡⲁⲣⲭⲱⲛ ⲉⲕϫⲱ ⲙⲙⲟⲥ ⲛⲁⲛ ·
…
245 ⲁⲛⲟⲛ ⲛⲉⲕϩⲙϩⲁⲗ ·
…
246 ⲙⲏ ⲛⲧⲁⲕⲉⲓ ϣⲁⲣⲟⲛ · ϫⲉⲉⲛⲉϫⲓ ⲗⲁⲁⲩ ⲛⲧⲟⲟⲧⲕ ·
…
247 ⲙⲏ ⲛⲟⲩⲭⲣⲉⲱⲥ · ⲉⲣⲟⲛ ⲁⲛ ⲡⲉ · ⲉϣⲱⲡ ⲉⲣⲟⲛ ⲛⲛⲟϭ ⲛⲓⲙ · ⲛⲧⲉⲧⲧⲁⲝⲓⲥ ⲙⲡⲉⲛⲣⲣⲟ ·
…
248 ⲙⲏ ⲛⲅⲟ ⲁⲛ ⲛϫⲟⲉⲓⲥ ⲉⲡⲉⲛⲥⲱⲙⲁ ·
…
249 ⲉⲓⲣⲉ ⲛⲁⲕ ⲛⲧϩⲉ ⲉⲧⲕⲟⲩⲁϣⲥ ·
…
250 ⲁⲩⲱ ⲭⲱⲣⲓⲥⲛⲁⲓ ⲟⲛ ⲛⲛⲁϫⲓⲗⲁⲁⲩ ϩⲁⲧⲇⲱⲣⲉⲁ · ⲙⲡⲛⲟⲩⲧⲉ ·
…
251 ⲕⲥⲟⲟⲩⲛ ϩⲱⲱⲕ ⲱ ⲡⲉⲛϫⲟⲉⲓⲥ · ϫⲉⲁϣ ⲛϩⲟⲟⲩ ⲡⲉⲡⲟⲟⲩ ·
…
252 ⲁⲩⲱ ⲡⲓⲕⲟⲩⲓ ⲛⲟⲉⲓⲕ ⲉⲛⲟⲩⲱⲙ ⲙⲙⲟϥ · ⲙⲡϩⲟⲟⲩ ⲙⲛⲛⲉⲛⲥⲩⲅⲛⲅⲉⲛⲏⲥ · ⲙⲡⲱⲛ ⲁⲛ ⲡⲉ ·
…
253 ⲁⲗⲗⲁ ⲡⲁⲡⲛⲟⲩⲧⲉ ⲡⲉ · ⲙⲛⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ · ⲡⲁⲓ ⲉⲧⲛⲣϣⲁ ⲛⲁϥ ⲙⲡϩⲟⲟⲩ · ⲁⲗⲗⲁ ⲉϣϫⲉ ⲡⲉⲕⲟⲩⲱϣ ⲡⲉ · ⲱ ⲡⲉⲛϫⲟⲉⲓⲥ ·
…
254 ⲧⲛⲛⲁϫⲓⲛⲧⲉⲣⲙⲏⲥⲓⲟⲛ ⲙⲙⲁⲧⲉ · ⲛⲧⲛⲧⲁⲁⲩ ⲉⲡⲙⲁ ⲙⲡⲉⲥⲟⲟⲩ · ⲙⲛⲡⲧⲉⲃⲧ ·
…
255 ⲁⲩⲱ ⲛⲧⲛⲥⲱⲧⲉ ⲛⲧⲉϣⲧⲏⲛ · ⲛⲧⲉⲡⲣⲟⲥⲫⲟⲣⲁ · ⲡⲣⲟⲥⲧⲉⲕⲕⲉⲗⲉⲩⲥⲓⲥ ·
…
256 ⲡⲉϫⲉⲡⲁⲣⲭⲱⲛ ⲛⲁⲩ · ϫⲉϩⲛⲟⲩⲙⲉ · ⲛⲧⲉⲡⲛⲟⲩⲧⲉ ⲙⲛⲡⲟⲩϫⲁⲓ ⲙⲡⲁϫⲟⲉⲓⲥ ⲡⲣⲣⲟ · ϫⲉⲧⲉⲧⲛⲛⲁϫⲓⲧⲟⲩ ⲧⲏⲣⲟⲩ ⲁϫⲛⲕⲱ ⲉⲡⲁϩⲟⲩ ·
…
257 ⲁⲩⲱ ⲙⲏⲡⲱⲥ · ⲛⲧⲁⲧⲛⲣϩⲟⲧⲉ · ϫⲉⲛⲛⲉⲡⲣⲣⲟ ·
…
258 ⲥⲱⲧⲙ · ⲛϥⲁⲡⲩⲗⲏ ⲉⲣⲱⲧⲛ ·
…
259 ⲁⲛⲟⲕ ⲡⲉⲧⲛⲁⲡⲟⲗⲟⲅⲓⲍⲉ ϩⲁⲣⲱⲧⲛ ⲙⲡⲁϫⲟⲉⲓⲥ ⲡⲣⲣⲟ ·
…
260 ⲧⲁⲣⲉϥϯ ⲛⲏⲧⲛ ⲛϩⲉⲛⲕⲉⲛⲟϭ ⲛⲧⲁⲉⲓⲟ ·
…
261 ⲁⲩⲱ ⲉϣϫⲉ ⲧⲉⲧⲛⲟⲩⲱϣ · ⲉⲧⲉⲧⲡⲉⲧⲛϩⲏⲧ · ⲛⲁⲓ ⲙⲙⲁⲧⲉ ⲁⲛ ⲛⲉⲧⲛⲧⲁϩⲟ ⲙⲙⲟⲟⲩ ⲉϫⲓⲧⲟⲩ ⲛⲧⲟⲟⲧ · ⲁⲗⲗⲁ ⲧⲙⲏⲥⲉ ⲧⲉ ⲧⲁⲓ · ⲁⲗⲗⲁ ϩⲟⲧⲁⲛ ⲉⲓϣⲁⲛⲕⲧⲟⲓ ⲉⲧⲁⲡⲟⲗⲓⲥ · ϩⲙⲡⲟⲩⲱϣ ⲙⲡⲛⲟⲩⲧⲉ ·
…
262 ϯⲛⲁⲧⲛⲛⲟⲟⲩ · ⲛⲥⲁⲧⲏⲩⲧⲛ · ⲛⲧⲁⲡⲗⲩⲣⲟⲩ ⲙⲙⲱⲧⲛ ·
…
263 ⲙⲡⲕⲉⲫⲁⲗⲓⲟⲛ · ⲙⲛⲡⲛⲟϭ ⲛⲧⲁⲉⲓⲟ ⲉⲧⲓⲟⲩⲱϣ ⲉⲧⲁⲁϥ ⲛⲏⲧⲛ ⁘
…
264 ⲇⲱⲣⲟⲑⲉⲟⲥ ·
…
265 ⲇⲉ ⲙⲛⲧⲉϥⲥϩⲓⲙⲉ · ⲑⲉⲟⲡⲓⲥⲧⲏ ·
…
266 ⲁⲩⲁⲇⲟⲛⲉⲓ ⲉⲩⲥⲱⲧⲙ ⲉⲛⲉⲓϣⲁϫⲉ ·
…
267 ⲁⲩⲱ ·
…
268 ⲡⲉϫⲁⲩ ⲙⲡⲁⲣⲭⲱⲛ · ϫⲉⲧⲛⲥⲟⲡⲥⲡ ⲙⲙⲟⲕ ⲡⲉⲛϫⲟⲉⲓⲥ ⲙⲡⲣⲣϩⲁⲗ ⲙⲙⲟⲛ ·
…
269 ⲁⲛⲟⲛ ⲛⲅϩⲙϩⲁⲗ · ϩⲛⲛⲉⲓϣⲁϫⲉ ·
…
270 ⲁⲛⲟⲛ ⲅⲁⲣ ⲡⲉⲛϫⲟⲉⲓⲥ ·
…
271 ⲁⲛⲟⲛ ⲛⲉⲕϩⲙϩⲁⲗ ·
…
272 ⲁⲩⲱ ⲕⲧⲟ ⲉⲣⲟⲛ · ⲛϩⲉⲛϣⲁϫⲉ ⲉⲩⲛⲧⲡⲉ ⲛⲛⲉⲛⲙⲉⲧⲣⲟⲛ ·
…
273 ⲁⲩⲱ ⲉⲣⲉⲛⲉⲕϩⲙϩⲁⲗ ⲛⲁϭⲛⲭⲣⲏⲙⲁ ⲧⲱⲛ · ⲉϯ ⲟⲛ ϫⲉⲛⲛⲁϫⲓⲙⲏⲥⲉ ·
…
274 ⲏ ⲁϣⲡⲏ ⲡⲉϩⲟⲟⲩ ⲛⲧⲁⲛⲉⲛϫⲓⲥⲟⲟⲩⲉ ⲉⲓ ⲉⲣⲁⲧⲟⲩ ·
…
275 ⲁⲛⲇⲓⲁⲕⲱⲛⲉⲓ ⲛⲁⲩ · ϩⲛⲟⲩⲙⲉ ⲛⲧⲉⲡⲛⲟⲩⲧⲉ ⲙⲡⲉⲛⲛⲁⲩ ⲅⲁⲣ ⲉⲣⲟⲕ ⲉⲛⲉϩ · ⲉⲁⲕⲉⲓ ⲉϩⲟⲩⲛ ⲉⲡⲉⲛⲏⲓ · ⲛⲧⲛⲥⲟⲟⲩⲛ ⲁⲛ · ⲙⲙⲟⲕ ϩⲙⲡϩⲟ · ⲉⲓⲙⲏⲧⲓ ⲡϩⲟⲟⲩ ⲙⲙⲁⲧⲉ ·
…
276 ⲁⲩⲱ ⲛⲁϣ ⲛϩⲉ ⲱ ⲡⲉⲛϫⲟⲉⲓⲥ ⲕϫⲱ ⲙⲙⲟⲥ ⲛⲁⲛ · ϫⲉⲁⲕϫⲓⲗⲁⲁⲩ ⲛⲧⲟⲟⲧⲛ ·
…
277 ⲁϥⲟⲩⲱϣⲃ ⲛϭⲓⲡⲁⲣⲭⲱⲛ · ⲁⲛⲟⲕ ⲡⲉⲧⲛⲁⲧⲁⲙⲱⲧⲛ · ϫⲉⲛⲧⲁⲉⲓ ⲉϩⲟⲩⲛ ⲉⲡⲉⲧⲛⲏⲓ · ⲛⲁϣ ⲛⲟⲩⲟⲉⲓϣ ·
…
278 ϫⲓⲛⲡⲉϩⲟⲟⲩ ⲅⲁⲣ ⲛⲧⲁⲛⲉⲧⲛⲉⲓⲟⲧⲉ · ⲙⲟⲩ ·
…
279 ⲁⲧⲉⲧⲛⲣⲁⲧⲧⲉⲧⲛⲟⲩⲥⲓⲁ ·
…
280 ϯⲛⲏⲩ ⲉϩⲟⲩⲛ ⲉⲡⲉⲧⲛⲏⲓ ⲛⲟⲩⲥⲟⲡ · ⲕⲁⲧⲁⲉⲃⲟⲧ ·
…
281 ⲁⲩⲱ ⲙⲛⲛⲥⲁⲧⲣⲁⲉⲓ ⲟⲛ ⲧⲉⲧⲛⲧⲛⲛⲟⲟⲩ ⲛϩⲉⲛ ⲕⲉⲛⲟϭ ⲛⲧⲁⲉⲓⲟ · ⲉⲧⲁⲡⲟⲗⲓⲥ · ⲉⲣⲁⲧϥⲙⲡⲁϫⲟⲉⲓⲥ ⲡⲣⲣⲟ ·
…
282 ⲁⲩⲱ ϥⲥϩⲁⲓ ⲛⲛⲉⲧⲛⲣⲁⲛ ⲉϫⲱⲟⲩ ⲧⲏⲣⲟⲩ ·
…
283 ϫⲉⲕⲁⲥ ⲉⲧⲉⲧⲛϣⲁⲛⲉⲓ ⲉⲧⲡⲟⲗⲓⲥ · ⲙⲡⲣⲣⲟ · ⲛϥⲧⲟⲟⲃⲟⲩ ⲛⲏⲧⲛ ⲙⲛⲡⲉⲩϭⲱⲃ ·
…
284 ⲁϥⲟⲩⲱϣⲃ ⲛϭⲓⲇⲱⲣⲟⲑⲉⲟⲥ ⲙⲛⲑⲉⲟⲡⲓⲥⲧⲏ · ⲉⲩϫⲱ ⲙⲙⲟⲥ · ϫⲉⲧⲛⲡⲁⲣⲁⲕⲁⲗⲉⲓ ⲙⲙⲟⲕ · ⲡⲉⲛϫⲟⲉⲓⲥ ·
…
285 ⲁⲣⲓⲣⲉ ⲛⲙⲙⲁⲛ ⲙⲡⲉⲓⲛⲟϭ ⲛⲁⲅⲁⲑⲟⲛ · ⲛⲅϫⲱ ⲉⲣⲟⲛ · ⲙⲡⲉⲕⲣⲁⲛ ·
…
286 ⲙⲉϣⲁⲕ ⲧⲛⲛⲁⲁⲓⲥⲑⲁⲛⲉ ⲉⲡϩⲱⲃ · ⲉⲡⲉⲓⲇⲏ ⲁⲛⲃⲱⲗ ⲉⲃⲟⲗ · ⲉϫⲛⲛⲉⲕϣⲁϫⲉ · ⲉⲧⲉⲕϫⲱ ⲙⲙⲟⲟⲩ ⲛⲁⲛ ·
…
287 ⲁϥⲟⲩⲱϣⲃ ⲛϭⲓⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ · ϫⲉϯⲛⲁϫⲱ ⲛⲏⲧⲛ ⲙⲡⲁⲣⲁⲛ ⲙⲛⲡⲁⲡⲁϫⲟⲉⲓⲥ ⲡⲣⲣⲟ ⲙⲛⲡⲣⲙ ⲧⲁⲡⲟⲗⲓⲥ · ⲧϩⲓⲉⲣⲟⲩⲥⲁⲗⲏⲙ ·
…
288 ⲁⲩⲱ ⲉϣϫⲉ ⲧⲉⲧⲛⲟⲩⲱϣ ⲉⲉⲓⲙⲉ ⲉⲣⲟⲟⲩ ⲥⲱⲧⲙ ⲛⲧⲁⲧⲁⲙⲱⲧⲛ ⁖ⲻ ⲁⲛⲟⲕ ⲡⲉ ⲙⲓⲭⲁⲏⲗ · ⲡⲁⲣⲭⲱⲛ · ⲛⲛⲁⲧⲡⲉ ⲙⲛⲛⲁⲡ · ⲁⲛⲟⲕ ⲡⲉ ⲙⲓⲭⲁⲏⲗ ·
…
289 ⲡⲁⲣⲭⲓⲥⲧⲣⲁⲧⲏⲅⲟⲥ · ⲛⲧϭⲟⲙ ⲛⲙⲡⲏⲩⲉ · ⲁⲛⲟⲕ ⲡⲉ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ · ⲛⲛⲓⲁⲓⲱⲛ ⲙⲡⲟⲩⲟⲉⲓⲛ · ⲁⲛⲟⲕ ⲡⲉ ⲙⲓⲭⲁⲏⲗ ·
…
290 ⲡⲇⲩⲛⲁⲧⲟⲥ ⲉⲧϭⲱⲧⲡ · ⲛⲙⲡⲟⲗⲉⲙⲟⲥ · ϩⲓⲧϩⲏ ⲙⲡⲉϥⲣⲣⲟ · ⲁⲛⲟⲕ ⲡⲉ ⲙⲓⲭⲁⲏⲗ ·
…
291 ⲡⲥⲟⲗⲥⲗ ⲁⲩⲱ ⲡϣⲟⲩϣⲟⲩ · ⲛⲛⲁⲙⲡⲏⲩⲉ · ⲙⲛⲛⲁⲡ · ⲁⲛⲟⲕ ⲡⲉ ⲙⲓⲭⲁⲏⲗ ·
…
292 ⲡⲁϩⲟ ⲉⲧⲉⲣⲉ ⲙⲙⲛⲧϣⲁⲛϩⲧⲏϥ · ⲙⲡⲛⲟⲩⲧⲉ ⲛϩⲏⲧϥ · ⲁⲛⲟⲕ ⲡⲉ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ · ⲛⲛⲓⲁⲓⲱⲛ ⲙⲡⲟⲩⲟⲉⲓⲛ ·
…
293 ⲁⲩⲱ ⲡⲟⲓⲕⲟⲛⲟⲙⲟⲥ ⲛⲧⲙⲛⲧⲣⲣⲟ ⲛⲙⲡⲏⲩⲉ · ⲁⲛⲟⲕ ⲡⲉ ⲙⲓⲭⲁⲏⲗ ·
…
294 ⲡⲉⲧϫⲓ ⲛⲛⲑⲩⲥⲓⲁ · ⲙⲛⲛⲥⲟⲡⲥⲡ ⲛⲛⲣⲱⲙⲉ · ⲉⲓⲡⲣⲟⲥⲉⲛⲉⲅⲕⲉⲓ ⲙⲙⲟⲟⲩ · ⲙⲡⲛⲟⲩⲧⲉ ·
…
295 ⲡⲣⲣⲟ ⲙⲙⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲉⲛⲥⲱⲧⲏⲣ · ⲁⲛⲟⲕ ⲡⲉ ⲙⲓⲭⲁⲏⲗ ·
…
296 ⲡⲉⲧⲙⲟⲟϣⲉ ⲙⲛⲣⲱⲙⲉ ⲛⲓⲙ · ⲉⲣⲉⲧⲉⲩϩⲉⲗⲡⲓⲥ ϩⲙⲡⲛⲟⲩⲧⲉ · ⲁⲛⲟⲕ ⲡⲉⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ ·
…
297 ⲡⲉⲧⲇⲓⲁⲕⲱⲛⲉⲓ ⲉⲧⲙⲛⲧⲣⲱⲙⲉ ⲧⲏⲣⲥ · ϩⲛⲟⲩⲟⲩⲣⲟⲧ ·
…
298 ⲁⲩⲱ ⲉⲧⲇⲓⲁⲕⲱⲛⲉⲓ ⲉⲣⲱⲧⲛ ϫⲓⲛⲧⲉⲧⲛⲙⲛⲧⲕⲟⲩⲓ ϣⲁⲧⲉⲛⲟⲩ · ⲱ ⲇⲱⲣⲟⲑⲉⲟⲥ ⲙⲛⲑⲉⲱⲡⲓⲥⲧⲏ ·
…
299 ⲁⲩⲱ ⲟⲛ ϯⲛⲁⲗⲟ ⲁⲛ · ⲉⲇⲓⲁⲕⲱⲛⲉⲓ ⲉⲣⲱⲧⲛ · ϣⲁⲛⲧϯⲡⲣⲟⲥⲉⲛⲉⲅⲕⲉⲓ ⲙⲙⲱⲧⲛ ⲙⲡⲣⲣⲟ ⲛⲛⲁⲧⲡⲉ · ⲙⲛⲛⲁⲡ ·
…
300 ⲉⲡⲉⲓⲇⲏ ⲁⲧⲉⲧⲛⲇⲓⲁⲕⲱⲛⲉⲓ ⲛⲁⲛ ϩⲱ ⲙⲛⲡⲁϫⲟⲉⲓⲥ · ϩⲛⲟⲩⲛⲟϭ ⲛϭⲟⲙ ·
…
301 ϯⲛⲁⲟⲃϣⲧ ⲁⲛ ⲉⲛⲉⲧⲛⲑⲩⲥⲓⲁ · ⲙⲛⲛⲉⲧⲛⲁⲅⲁⲡⲏ ·
…
302 ⲛⲁⲓ ⲉⲧⲉⲧⲛϯ ⲙⲙⲟⲟⲩ ⲙⲡⲛⲟⲩⲧⲉ · ϩⲙⲡⲁⲣⲁⲛ ·
…
303 ⲙⲏ ⲛⲉⲓⲁϩⲉⲣⲁⲁⲧ ⲛⲥⲁϥ ⲉⲓⲥⲱⲧⲙ ⲉⲣⲱⲧⲛ ϩⲛⲛⲉⲧⲉⲧⲛϫⲱ ⲙⲙⲟⲟⲩ · ⲙⲛⲛⲉⲧⲛⲣⲏⲩ ϩⲓⲟⲩⲥⲟⲡ · ⲉⲧⲃⲏⲏⲧ ·
…
304 ⲉⲧⲃⲉⲡⲧⲱϣ ⲛⲧⲉⲡⲣⲟⲥⲫⲟⲣⲁ · ⲙⲛⲧⲁⲅⲁⲡⲏ · ⲉⲧⲉⲧⲛϯ ⲙⲙⲟϥ ϩⲙⲡⲁⲣⲁⲛ ϩⲙⲡⲁϣⲁ ·
…
305 ⲙⲏ ϯⲟⲩⲏⲩ · ⲙⲙⲱⲧⲛ ⲙⲡⲛⲁⲩ · ⲛⲧⲁⲧⲉⲧⲛⲣⲓⲙⲉ · ⲉⲧⲉⲧⲛⲥⲟⲡⲥⲡ ⲙⲙⲟⲓ · ϫⲉⲡⲁⲣⲁⲕⲁⲗⲉⲓ ·
…
306 ⲁⲩⲱ ⲛⲅⲥⲟⲡⲥⲡ ⲙⲡⲛⲟⲩⲧⲉ ⲉϫⲱⲛ · ⲛϥⲡⲟⲟⲛⲉⲛ ⲉⲃⲟⲗ ⲙⲡⲁⲧⲥⲟⲩⲱϫⲛ ⲛϭⲓⲧⲉⲑⲩⲥⲓⲁ ⲙⲛⲧⲁⲅⲁⲡⲏ · ⲙⲡⲁⲣⲭⲁⲅⲅⲉⲗⲟⲥ ·
…
307 ⲙⲏ ⲛϯⲛⲁⲩ ⲉⲣⲱⲧⲛ ⲁⲛ ⲙⲡⲛⲁⲩ ⲛⲧⲁⲧⲉⲧⲛϯ ⲉⲃⲟⲗ · ⲛⲛⲉⲧⲛϩⲃⲥⲱ · ⲛⲥⲩⲛⲁⲅⲉ.
…
308 ⲁⲧⲉⲧⲛⲧⲁⲁⲥ ⲉⲃⲟⲗ ϩⲁⲧⲉⲡⲣⲟⲥⲫⲟⲣⲁ · ⲙⲡⲁϣⲁ ·
…
309 ϯϫⲱ ⲙⲙⲟⲥ ⲛⲏⲧⲛ · ϫⲉϯ ⲛⲙⲙⲏⲧⲛ ϩⲛⲛⲁⲓ ⲧⲏⲣⲟⲩ .
…
310 ⲁⲩⲱ ⲛⲉⲛⲧⲁⲧⲉⲧⲛⲧⲁⲁⲩ ·
…
311 ϫⲓⲛⲧⲉⲧⲛⲙⲛⲧⲕⲟⲩⲓ ϩⲙⲡⲁⲣⲁⲛ · ⲛϯⲟⲃϣ ⲁⲛ ⲉⲣⲟⲟⲩ ⲧⲏⲣⲟⲩ ·
…
312 ⲁⲗⲗⲁ ⲁⲓⲡⲣⲟⲥⲉⲛⲉⲅⲛⲉⲓ ⲙⲙⲟⲟⲩ ⲧⲏⲣⲟⲩ · ⲙⲡⲛⲟⲩⲧⲉ ϩⲁⲣⲱⲧⲛ ϩⲛⲟⲩⲙⲉ ⲁⲓϫⲓ ⲛⲛⲉⲧⲛⲑⲩⲥⲓⲁ · ⲛⲧⲟⲟⲧⲏⲩⲧⲛ ϩⲛⲟⲩⲙⲉ . ⲙⲛⲛⲉⲧⲛⲇⲱⲣⲟⲛ · ⲛⲧϩⲉ ⲛⲛⲁⲁⲃⲉⲗ · ϫⲉⲁⲧⲉⲧⲛⲧⲁⲁⲩϩⲛⲟⲩⲥⲟⲟⲩⲧⲛ · ⲱ ⲇⲱⲣⲟⲑⲉⲟⲥ ⲙⲛⲑⲉⲟⲡⲓⲥⲧⲏ · ⲛⲁⲓⲁⲧⲧⲏⲩⲧⲛ ·
…
313 ⲁⲩⲱ ⲡⲉⲧⲛⲁⲛⲟⲩϥ ϥⲛⲁϣⲱⲡⲉ ⲙⲙⲱⲧⲛ ⲕⲁⲧⲁⲧϩⲉ ⲉⲧⲥⲏϩ ·
…
314 ⲁⲩⲱ ⲕⲁⲧⲁⲧϩⲉ · ⲙⲡⲉⲧⲛⲣⲁⲛ · ⲧⲁⲓ ⲧⲉ ⲧϩⲉ ⲙⲡⲧⲉⲧⲛⲕⲉⲥⲙⲟⲩ ·
…
315 ⲇⲱⲣⲟⲑⲉⲟⲥ ⲇⲉ ⲡⲉⲡⲇⲱⲣⲟⲛ ⲙⲡⲛⲟⲩⲧⲉ · ⲑⲉⲟⲡⲓⲥⲧⲏ ϩⲱⲱⲥ · ⲧⲉⲧⲉⲧⲡⲓⲥⲧⲉⲩⲉ · ⲉⲡⲛⲟⲩⲧⲉ · ⲁⲛⲟⲕ ⲡⲉ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ · ⲡⲉⲛⲧⲁⲧⲉⲧⲛⲕⲁⲁϥ · ⲛⲏⲧⲛ ⲙⲡⲣⲟⲥⲧⲁⲧⲏⲥ ⲛⲛⲁϩⲣⲙⲡⲛⲟⲩⲧⲉ ⁖ⲻ ⲁⲛⲟⲕ ⲡⲉ ⲙⲓⲭⲁⲏⲗ ·
…
316 ⲡⲉⲛⲧⲁϥϫⲓ ⲛⲛⲉⲧⲛϣⲗⲏⲗ · ⲙⲛⲛⲉⲧⲛⲑⲩⲥⲓⲁ · ⲙⲛⲛⲉⲧⲛⲣⲉⲙⲏⲧ ·
…
317 ⲉϩⲣⲁⲓ ϣⲁⲡⲛⲟⲩⲧⲉ · ⲛⲧϩⲉ ⲛⲕⲟⲣⲛⲏⲗⲓⲟⲥ ⲙⲡⲉⲟⲩⲟⲉⲓϣ ·
…
318 ⲁⲩⲱ ⲟⲛ ⲕⲉⲕⲟⲣⲛⲏⲗⲓⲟⲥ · ⲁⲛⲟⲕ ⲁⲓⲃⲱⲕ ϣⲁⲣⲟϥ ·
…
319 ⲁⲓⲧⲥⲁⲃⲟϥ ⲉⲧⲉϩⲓⲏ · ⲙⲡⲟⲩϫⲁⲓ ⲉⲧⲉⲡⲃⲁⲡⲧⲓⲥⲙⲁ ⲡⲉⲛⲧⲁϥⲫⲟⲣⲉⲓ ⲙⲙⲟϥ ϩⲓⲧⲛⲡⲉⲧⲣⲟⲥ ·
…
320 ⲙⲡⲣⲣϩⲟⲧⲉ · ϯⲟⲩⲏⲩ ⲙⲙⲱⲧⲛ ⲁⲛ · ⲕⲁⲧⲁⲧϩⲉ ϩⲱⲧⲧⲏⲩⲧⲛ · ⲛⲧⲁⲧⲉⲧⲛϩⲱⲛ ⲉⲣⲟⲓ ⲙⲛⲡⲁϫⲟⲉⲓⲥ ⁖ⲻ
…
321 ⲉⲡⲉⲓⲇⲏ ϥⲥⲏϩ ϫⲉϩⲱⲛ ⲉϩⲟⲩⲛ ⲉⲡⲛⲟⲩⲧⲉ · ⲧⲁⲣⲉϥϩⲱⲛ ⲉϩⲟⲩⲛ · ⲉⲣⲱⲧⲛ ⁖ⲻ ⲧⲉⲛⲟⲩ ⲱ ⲇⲱⲣⲟⲑⲉⲟⲥ ⲙⲛⲑⲉⲟⲡⲓⲥⲧⲏ ϫⲓ ⲛⲏⲧⲛ ⲛⲟⲩϭⲟⲙ ·
…
322 ⲧⲱⲟⲩⲛ ⲁϩⲉⲣⲁⲧⲧⲏⲩⲧⲛ ·
…
323 ϫⲓ ⲛⲛⲓⲇⲱⲣⲟⲛ ⲛⲏⲧⲛ ϩⲛⲛⲁϭⲓϫ .
…
324 ⲉⲡⲉⲓⲇⲏ ⲁⲓⲟⲩⲱ · ⲉⲓϫⲱ ⲙⲙⲟⲥ · ⲛⲏⲧⲛ ϫⲉϩⲉⲛⲙⲏⲏⲥⲉ ⲛⲉ ⲛⲁⲓ ·
…
325 ⲁⲩⲱ ⲉⲧⲉϣⲁⲛⲧⲡⲱⲛⲉ ⲉⲃⲟⲗ · ϩⲙⲡⲉⲓⲃⲓⲟⲥ .
…
326 ϯⲛⲁϯ ⲛⲏⲧⲛ ⲙⲡⲕⲉⲫⲁⲗⲓⲟⲛ ϩⲛⲧϩⲓⲉⲣⲟⲩⲥⲁⲗⲏⲙ · ⲛⲧⲡⲉ ·
…
327 ⲧⲡⲟⲗⲓⲥ ⲛⲛⲉⲧⲟⲩⲁⲁⲃ ⲧⲏⲣⲟⲩ ·
…
328 ⲁⲓⲟⲩⲱ ⲅⲁⲣ ⲉⲓϫⲓ ⲛⲧⲏⲩⲧⲛ ⲛϩⲙⲟⲧ · ⲛⲧⲟⲟⲧϥ ⲙⲡⲛⲟⲩⲧⲉ · ⲉⲡⲙⲁ ⲛⲛⲉⲧⲛⲑⲩⲥⲓⲁ · ⲙⲛⲛⲉⲧⲛⲡⲣⲟⲥⲫⲟⲣⲁ · ⲙⲛⲛⲉⲧⲛⲁⲅⲁⲑⲟⲛ ·
…