1 ⲡⲡⲉⲧⲟⲩⲁⲁⲃ ⲓⲉⲣⲉⲙⲓⲁⲥ ϯⲛⲁⲩ ⲉⲣⲟⲕ ⲙⲡϩⲟⲟⲩ ⲙⲛⲡⲉⲕⲛⲟϭ ⲛϩⲏⲃⲥ ⲛⲟⲩⲟⲉⲓⲛ ⲉⲕⲣⲁϣⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲥⲉϯⲣⲁϣⲉ ⲧⲱⲛⲟⲩ ·
…
2 ⲡⲉϫⲁϥ ⲉⲡⲉⲓⲇⲏ ⲁⲓⲣⲥⲁϣϥⲉ ⲛⲣⲟⲙⲡⲉ ⲉⲓϣⲟⲟⲡ ϩⲛⲧⲁⲓⲭⲙⲁⲗⲱⲥⲓⲁ · ⲙⲛⲡⲁⲗⲁⲟⲥ ·
…
3 ⲁⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲓⲭⲁⲏⲗ · ⲥⲟⲡⲥⲡ ⲙⲡⲉⲧⲟⲛϩ ϣⲁⲛⲓⲉⲛⲉϩ ·
…
4 ⲁϥϯ ⲛⲟⲩⲛⲁ · ⲉⲡϩⲏⲧ ⲛⲛⲣⲱⲙⲉ · ⲛⲃⲁⲃⲩⲗⲱⲛⲓⲟⲥ ·
…
5 ⲁⲩⲕⲁⲁⲛ ⲉⲃⲟⲗ ·
…
6 ⲁⲓⲕⲧⲟⲓ ⲛⲕⲉⲥⲟⲡ ⲉⲧϩⲓⲉⲣⲟⲩⲥⲁⲗⲏⲙ · ⲙⲛⲡⲁⲗⲁⲟⲥ ·
…
7 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
8 ⲓⲉⲍⲉⲕⲓⲏⲗ ⲡⲡⲣⲟⲫⲏⲧⲏⲥ ⲁⲙⲟⲩ ⲛⲅⲧⲁⲙⲟⲛ ϫⲉⲉⲧⲃⲉⲟⲩ ⲕϫⲓϥⲟϭⲥ ⲙⲡϩⲟⲟⲩ ϩⲁⲡⲣⲁϣⲉ ⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϩⲛⲟⲩⲡⲁⲣϩⲏⲥⲓⲁ ·
…
9 ⲉⲓⲥⲕⲩⲣⲧⲁ ⲡⲉϫⲁϥ ⲁⲩⲱ ⲉⲓⲧⲉⲗⲏⲗ ϫⲉⲙⲓⲭⲁⲏⲗ · ⲡⲛⲟϭ ⲛⲁⲣⲭⲁⲅⲅⲉⲗⲟⲥ ·
…
10 ⲁϥⲉⲓⲛⲉ ⲛⲟⲩⲕⲉⲫⲁⲗⲓⲥ ⲛⲁⲓ ⲛϫⲱⲱⲙⲉ ·
…
11 ⲁϥⲟⲩⲉϩⲥⲁϩⲛⲉ ⲛⲁⲓ ⲁⲓⲟⲩⲟⲙⲥ ·
…
12 ⲁⲛⲉⲡⲣⲟⲫⲓϯⲁ ϭⲱⲗⲡ ⲛⲁⲓ ⲉⲃⲟⲗ ·
…
13 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
14 ⲁⲛⲁⲛⲓⲁⲥ · ⲁⲍⲁⲣⲓⲁⲥ · ⲙⲓⲥⲁⲏⲗ ·
…
15 ⲁⲣⲏⲩⲧⲉⲧⲛⲣⲁϣⲉ ⲙⲡϩⲟⲟⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
16 ⲥⲉ ⲡⲉϫⲁⲩ ⲛϭⲓⲡϣⲟⲙⲛⲧ ⲛϩⲁⲅⲓⲟⲥ · ⲉⲧⲟⲩⲁⲁⲃ ⲧⲛⲣⲁϣⲉ ⲁⲩⲱ ⲧⲛⲧⲉⲗⲏⲗ · ϫⲉⲡⲧⲉⲧⲛⲣϣⲁ ⲛⲁϥ ⲙⲡϩⲟⲟⲩ · ⲛⲧⲟϥ ⲡⲉⲛⲧⲁϥⲉⲓ · ⲉⲧⲙⲏⲏⲧⲉ ⲛⲧⲉϩⲣⲱ ⲛⲥⲁⲧⲉ · ⲉⲧⲙⲟⲩϩ ⲁϥⲟϣⲙⲥ ϩⲁⲣⲟⲛ ·
…
17 ⲁϥⲧⲣⲉⲡⲣⲣⲟ ⲡⲓⲥⲧⲉⲩⲉ ⲉⲡⲛⲟⲩⲧⲉ ·
…
18 ⲁⲧⲛⲙⲛⲧⲙⲁⲣⲧⲩⲣⲟⲥ ϫⲱⲕ ⲉⲃⲟⲗ · ⲉⲡⲉⲓⲇⲏ ⲧⲛⲣⲁϣⲉ ⲙⲡϩⲟⲟⲩ · ϩⲙⲡⲉⲓⲛⲟϭ ⲛϣⲁ ·
…
19 ϯⲙⲉⲉⲩⲉ ϫⲉⲉⲕⲣⲁϣⲉ ⲛϩⲟⲩⲟ ·
…
20 ⲡⲉϫⲁϥ ⲛϭⲓⲇⲁⲛⲓⲏⲗ · ϫⲉⲁⲩⲱ ⲁϣ ⲡⲉ ⲡⲉⲕⲣⲁϣⲉ · ⲉⲡⲉⲓⲇⲏ · ⲛⲟⲩⲥⲟⲡ ⲛⲟⲩⲱⲧ ⲁⲛ ⲡⲉ ·
…
21 ⲟⲩⲇⲉ ⲛⲥⲛⲁⲩ ⲁⲛ ⲛⲉ · ⲛⲧⲁⲓⲛⲁⲩ ⲉⲙⲓⲭⲁⲏⲗ · ⲡⲁⲣⲭⲱⲛ ⲙⲙⲉ ·
…
22 ⲁⲩⲱ ⲙⲡⲛⲁⲩ ⲛⲧⲁⲩⲛⲟϫⲧ ⲉⲡϣⲏⲓⲛⲙⲙⲟⲩⲓ ·
…
23 ⲡⲁⲣⲭⲓⲥⲧⲣⲁⲧⲏⲅⲟⲥ ⲙⲓⲭⲁⲏⲗ · ⲡⲉⲛⲧⲁϥⲉⲓ ϣⲁⲣⲟⲛ ·
…
24 ⲁϥϣⲧⲁⲙ ⲛⲧⲧⲁⲡⲣⲟ · ⲛⲙⲙⲟⲩⲓ ·
…
25 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
26 ⲡⲙⲛⲧⲥⲛⲟⲟⲩⲥ ⲛⲁⲡⲟⲥⲧⲟⲗⲟⲥ ·
…
27 ⲁⲣⲁ ⲧⲉⲧⲛⲣⲁϣⲉ ⲙⲡϩⲟⲟⲩ ϩⲙⲡⲉⲓⲛⲟϭ ⲛϣⲁ ·
…
28 ⲁⲩⲱ ⲧⲉⲧⲛⲣⲁϣⲉ ⲉⲙⲁⲧⲉ · ⲉⲛⲣⲁϣⲉ ⲡⲉϫⲁⲩ ϫⲉⲙⲛⲛⲥⲁⲡⲉⲓⲛⲟϭ ⲛϩⲏⲃⲉ ⲛⲧⲁϥϣⲱⲡⲉ ⲛⲁⲛ ·
…
29 ⲙⲡⲛⲁⲩ ⲛⲧⲁⲩⲥⲧⲁⲩⲣⲟⲩ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
30 ⲁⲩⲱ ⲉⲛϩⲏⲡ ⲉⲧⲃⲉⲧϩⲟⲧⲉ ⲛⲛⲓⲟⲩⲇⲁⲓ ·
…
31 ⲁⲙⲁⲣⲓⲁ ⲧⲡⲁⲣⲑⲉⲛⲟⲥ ⲉⲓ ⲁⲥⲧⲁⲙⲟⲛ ϫⲉⲁⲓⲃⲱⲕ ⲙⲛⲛⲉⲧⲛⲙⲙⲁⲓ ⲉⲛⲁⲩ ⲉⲡⲧⲁⲫⲟⲥ ·
…
32 ⲛϣⲟⲣⲡ ⲛⲧⲕⲩⲣⲓⲁⲕⲏ ⲁⲛϩⲉ ⲉⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ⲙⲓⲭⲁⲏⲗ ·
…
33 ⲁϥⲥⲕⲟⲣⲕⲣ ⲙⲡⲱⲱⲛⲉ ⲁϥϩⲙⲟⲟⲥ ⲉϩⲣⲁⲓ ⲉϫⲱϥ ·
…
34 ⲁⲩⲱ ⲁϥϯ ⲛⲁⲛ ⲙⲡϣⲙⲛⲟⲩϥⲉ ϫⲉⲁⲡϫⲟⲉⲓⲥ ⲧⲱⲟⲩⲛ ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
35 ⲡⲡⲉⲧⲟⲩⲁⲁⲃ ⲍⲁⲭⲁⲣⲓⲁⲥ ⲡⲟⲩⲏⲏⲃ ⲙⲛⲓⲱϩⲁⲛⲛⲏⲥ ·
…
36 ⲡⲉϥϣⲏⲣⲉ ⲣⲁϣⲉ ϩⲱⲟⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
37 ⲥⲉⲧⲛⲣⲁϣⲉ ⲡⲉϫⲁⲩ ⲛϭⲓⲡⲉⲧⲟⲩⲁⲁⲃ ·
…
38 ⲉⲡⲉⲓⲇⲏ ⲛⲧⲁϥⲧⲱϣ ⲙⲡⲁⲣⲭⲁⲅⲅⲉⲗⲟⲥ ⲛⲁϥ ⲛⲁⲣⲭⲓⲥⲧⲣⲁⲧⲏⲅⲟⲥ ·
…
39 ⲁⲛⲟⲕ ϩⲱ ⲉⲓϣⲟⲟⲡ ⲛⲁϥ ⲛⲟⲩⲏⲏⲃ ·
…
40 ⲁⲩⲱ ⲡⲁϣⲏⲣⲉ ⲓⲱϩⲁⲛⲛⲏⲥ ⲡϣⲏⲣⲉ ⲡⲉ ⲛⲉⲗⲩⲥⲁⲃⲉⲧ · ⲧⲥⲩⲅⲅⲉⲛⲏⲥ ⲙⲙⲁⲣⲓⲁ ·
…
41 ⲧⲙⲁⲁⲩ ⲛⲓⲏⲥⲟⲩⲥ ⲡⲁⲥⲩⲅⲅⲉⲛⲏⲥ ⲕⲁⲧⲁⲥⲁⲣⲝ ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ⁖ⲻ
…
42 ⲥⲧⲉⲫⲁⲛⲟⲥ ⲡⲁⲣⲭⲏⲇⲓⲁⲕⲟⲛⲟⲥ ·
…
43 ⲁⲩⲱ ⲡⲉⲡⲣⲟⲧⲟⲙⲁⲣⲧⲩⲣⲟⲥ ⲁⲣⲁ ⲕⲣⲁϣⲉ ϩⲱⲱⲕ · ⲙⲡϩⲟⲟⲩ ϩⲙⲡϣⲁ ⲙⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ·
…
44 ⲥⲉ ⲡⲉϫⲁϥ ⲟⲩⲛⲟϭ ⲡⲉ ⲡⲁⲣⲁϣⲉ ·
…
45 ⲉⲡⲉⲓⲇⲏ ⲙⲡⲛⲁⲩ ⲛⲧⲁⲩϩⲓⲱⲱⲛⲉ ⲉⲣⲟⲓ ⲁⲓϥⲓ ⲉⲉⲓⲁⲧ ⲉϩⲣⲁⲓ ⲁⲓⲛⲁⲩ ⲉⲙⲡⲏⲩⲉ ⲉⲩⲟⲩⲱⲛ ⲁⲓⲛⲁⲩ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲙⲛⲛⲉϥⲁⲅⲅⲉⲗⲟⲥ ⲧⲏⲣⲟⲩ ⲉⲩⲥⲟⲡⲥⲡ ⲉϫⲱⲓ
…
46 ⲁⲩⲱ ⲁⲓⲛⲁⲩ ⲉⲓⲥ ⲉϥⲁϩⲉⲣⲁⲧϥ ⲛⲥⲁⲟⲩⲛⲁⲙ ⲙⲡⲛⲟⲩⲧⲉⲡⲉⲓⲱⲧ ·
…
47 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·ⲙⲙⲁⲣⲧⲩⲣⲟⲥ
…
48 ⲧⲏⲣⲟⲩ ⲙⲛⲛⲇⲓⲕⲁⲓⲟⲥ ⲁⲣⲁ ⲧⲉⲧⲛⲣⲁϣⲉ ϩⲙⲡϣⲁ ⲙⲙⲓⲭⲁⲏⲗ ⲙⲡϩⲟⲟⲩ ·
…
49 ⲥⲉ ⲡⲉϫⲁⲩ ⲛϭⲓⲛⲉⲧⲟⲩⲁⲁⲃ · ϫⲉⲁⲗⲏⲑⲱⲥ ⲧⲛⲣⲁϣⲉ ⲙⲡϩⲟⲟⲩ ·
…
50 ⲉⲡⲉⲓⲇⲏ ⲑⲗⲓⲯⲓⲥ ⲛⲓⲙ ⲛⲧⲁⲩⲧⲁϩⲟⲛ · ϩⲓⲃⲁⲥⲁⲛⲟⲥ ·
…
51 ⲛⲓⲙ · ⲛⲧⲁⲩⲁⲁⲩ ⲛⲁⲛ ·
…
52 ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲡⲉⲛⲧⲁϥϯϭⲟⲙ ⲛⲁⲛ ·
…
53 ⲁⲛϥⲓ ϩⲁⲣⲟⲟⲩ ϣⲁⲛⲧⲛϫⲱⲕ ⲉⲃⲟⲗ · ⲙⲡⲉⲛⲁⲅⲱⲛ ·
…
54 ⲁⲩⲱ ⲁⲛϫⲓ ⲛϩⲉⲛⲛⲟϭ ⲛⲧⲁⲉⲓⲟ ⲉⲧⲃⲏⲏⲧϥ ·
…
55 ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ⁘
…
56 ⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ⲣⲁϣⲉ ϩⲱⲟⲩ ⲙⲡϩⲟⲟⲩ ⲛⲙⲙⲁⲛ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
57 ⲥⲉ ⲡⲉϫⲁⲩ ⲡⲱⲛ ⲣⲱ ⲡⲉ ⲡⲣⲁϣⲉ ⲧⲏⲣϥ ·
…
58 ⲉⲡⲉⲓⲇⲏ ⲙⲡϩⲟⲟⲩ ⲛⲧⲁⲡⲉⲛⲇⲏⲙⲓⲟⲩⲣⲅⲟⲥ ⲕⲁⲧⲁⲣⲅⲉⲓ ⲙⲡϫⲁⲥⲓϩⲏⲧ ⲁϥⲧⲁϩⲟ ⲛⲁⲛ ⲉⲣⲁⲧϥ ⲙⲡⲉⲧⲑⲃⲃⲓⲏⲩ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
59 ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ⁖ⲻ
…
60 ⲁⲗⲏⲑⲱⲥ ⲱ ⲛⲁⲙⲉⲣⲁⲧⲉ ⲟⲩⲛⲟϭ ⲡⲉ ⲡⲧⲁⲉⲓⲟ ⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ⲉⲧⲡⲟⲣϣ ⲛⲁⲛ ⲉⲃⲟⲗ · ϩⲙⲡ ⲙⲙⲁⲧⲉ ⲁⲛ · ⲁⲗⲗⲁ ϩⲛⲧⲕⲉ ⲡⲉ ⲟⲛ · ⲧⲉⲛⲟⲩ ϭⲉ ⲱ ⲛⲁⲕⲣⲟⲁⲧⲏⲥ ⲙⲙⲁⲓⲥⲃⲱ ·
…
61 ⲙⲁⲣⲉⲛⲥⲡⲟⲩⲇⲁⲍⲉ ϩⲱⲱⲛ ⲉⲧⲣⲉⲩϩⲉ ⲉⲣⲟⲛ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
62 ϫⲉⲕⲁⲥ ⲉⲛⲛⲁⲟⲩⲱⲙ · ϩⲱⲱⲛ · ϩⲛⲧⲁϣⲏ ⲛⲛⲁⲅⲁⲑⲟⲛ ⲉⲧⲕⲏ ⲛⲁⲛ ⲉϩⲣⲁⲓ ϩⲁⲣⲱⲛ · ⲙⲛⲛⲉⲧⲟⲩⲁⲁⲃ ⲧⲏⲣⲟⲩ · ⲛⲧⲁⲛⲧⲁⲩⲉⲛⲉⲩⲣⲁⲛ ·
…
63 ⲙⲉϣⲁⲕ ⲛⲁⲙⲉⲣⲁⲧⲉ · ⲛⲧⲛⲧⲟⲗⲙⲁ · ⲛⲧⲛⲃⲱⲕ ⲉⲡⲁⲣⲓⲥⲧⲱⲛ ⲙⲡⲁⲣⲭⲓⲥⲧⲣⲁⲧⲏⲅⲟⲥ · ⲛⲧⲛⲫⲟⲣⲉⲓ ⲁⲛ ⲕⲁⲗⲱⲥ ·
…
64 ⲁⲗⲗⲁ ⲛⲧⲛⲃⲱⲕ ϩⲛϩⲉⲛϩⲃⲥⲱ ⲉⲩⲗⲁⲁⲙ · ⲉⲣⲉⲡⲉⲛⲕⲉⲥⲱⲙⲁ ⲙⲉϩ ⲛϭⲟϫⲃ · ⲛⲅϩⲉ ⲉⲣⲟⲛ ϩⲛⲟⲩϣⲓⲡⲉ ϩⲛⲧⲙⲏⲏⲧⲉ ⲛⲛⲉⲧⲫⲟⲣⲉⲓ ⲉⲩⲥⲱⲕ ⲉⲣⲟⲟⲩ · ⲛⲛⲉⲩⲥⲧⲟⲗⲏ ·
…
65 ⲁⲩⲱ ⲉⲩⲃⲱⲱⲣⲉⲓ ⲙⲙⲟⲛ ⲉⲃⲟⲗ ϫⲉⲛⲛⲉⲛϩⲱⲛ ⲉϩⲟⲩⲛ ⲉⲣⲟⲟⲩ · ⲛⲥⲉⲧⲱⲗⲙ ⲉⲃⲟⲗ ⲙⲙⲟⲛ ·
…
66 ⲁⲩⲱ ⲙⲛⲛⲥⲁⲧⲉⲓϩⲩⲡⲟⲯⲓⲁ · ⲛⲧⲉⲓⲙⲓⲛⲉ ⲛⲥⲉϩⲓⲧⲟⲟⲧⲟⲩ ⲛⲥⲉⲛⲟϫⲛ ⲉⲃⲟⲗ ·
…
67 ⲡⲁⲛⲧⲱⲥ ⲛⲁⲓ ⲛⲉ ⲛϣⲁϫⲉ ⲛϫⲡⲓⲟ ⲉⲧⲟⲩⲛⲁⲧⲁⲁⲩ ⲛⲁⲛ · ⲛϭⲓⲛⲉⲧⲫⲟⲣⲉⲓ ⲕⲁⲗⲱⲥ · ϫⲉⲱ ⲛⲣⲱⲙⲉ ⲛⲁⲧϩⲏⲧ ⲉⲓⲉ ⲛⲧⲉⲧⲛϣⲓⲡⲉ ⲁⲛ ⲛⲧⲉⲓϩⲉ ·
…
68 ⲁⲩⲱ ⲕⲁⲛ ⲛⲧⲉⲧⲛϣⲓⲡⲉ ⲁⲛ · ⲉⲓⲉ ⲛⲧⲉⲧⲛⲣϩⲟⲧⲉ ⲁⲛ ·
…
69 ϩⲏⲧϥ ⲙⲡⲣⲣⲟ ⲙⲙⲉ ⲡⲉⲭⲣⲓⲥⲧⲟⲥ ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
70 ⲛⲧⲉⲧⲛⲥⲟⲟⲩⲛ ⲁⲛ · ϫⲉⲧⲁⲛⲓⲙ ⲧⲉ ϯⲁⲩⲗⲏ ·
…
71 ⲁⲩⲱ ϫⲉⲡⲁⲛⲓⲙ ⲡⲉ ⲡⲉⲓⲁⲣⲓⲥⲧⲟⲛ ·
…
72 ⲉϣϫⲉ ⲙⲙⲟⲛ ⲛⲁⲡⲣⲣⲟ ⲛⲉ · ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
73 ⲡⲉⲥⲧⲣⲁⲧⲏⲅⲟⲥ ⲉⲧϭⲱⲧⲡ ⲛⲙⲡⲟⲗⲉⲙⲟⲥ ϩⲓⲧϩⲏ ⲙⲡⲉϥϫⲟⲉⲓⲥ ⲉϥϯ ⲛⲛⲉⲓⲧⲁⲉⲓⲟ ⲧⲏⲣⲟⲩ ⲛⲁϥ ·
…
74 ⲉⲧⲃⲉⲧⲉϥⲙⲛⲧϫⲱⲱⲣⲉ ⁖ ⲁⲗⲏⲑⲱⲥ ϯⲑⲁⲩⲙⲁⲍⲉ ⲙⲙⲱⲧⲛ ϫⲉⲉⲧⲉⲧⲛⲑⲁⲣⲉⲓ ⲛⲟⲩ ·
…
75 ⲁⲧⲉⲧⲛⲉⲓ ⲉϩⲟⲩⲛ ϣⲁⲧⲁⲩⲗⲏ · ⲉⲧϩⲓϩⲟⲩⲛ ⲕⲁⲓ ⲙⲁⲗⲓⲥⲧⲁ ⲉⲣⲉⲛⲉⲧⲛⲕⲉⲙⲉⲗⲟⲥ ϭⲟⲗⲡ ⲉⲃⲟⲗ ·
…
76 ⲙⲏ ⲙⲡⲉⲧⲉⲧⲛⲥⲱⲧⲙ ⲉⲣⲟϥ ⲉϥϫⲱ ⲙⲙⲟⲥ ϫⲉⲙⲡⲣⲉⲓ ⲉϩⲟⲩⲛ ·
…
77 ⲉⲡⲁⲙⲁ ⲛϣⲉⲗⲉⲉⲧ ⲉⲙⲛϩⲃⲥⲱ ⲙⲙⲁ ⲛϣⲉⲗⲉⲉⲧ ⲧⲱ ϩⲓⲱⲱⲕ ·
…
78 ⲛⲙⲡⲉⲧⲉⲧⲛⲥⲱⲧⲙ ⲉⲣⲟϥ ⲉⲧⲃⲉⲡⲣⲱⲙⲉ ⲛⲧⲁϥⲧⲟⲗⲙⲁ ⲁϥⲃⲱⲕ ⲉϩⲟⲩⲛ ϩⲛⲟⲩϩⲃⲥⲱ ⲉⲥⲗⲁⲁⲙ · ⲛⲧϩⲉ ⲛⲧⲱⲧⲛ ·
…
79 ⲁⲧⲉⲧⲛⲉⲓⲙⲉ ϫⲉⲛⲧⲁⲟⲩϣⲱⲡⲉ ⲙⲙⲟϥ · ⲉϥⲥⲏϩ ϫⲉⲁϥⲧⲣⲉⲩⲙⲟⲣϥ ⲉⲛⲉϥϭⲓϫ · ⲙⲛⲛⲉϥⲟⲩⲣⲏⲏⲧⲉ ·
…
80 ⲁϥⲛⲟϫϥ ⲉⲡⲕⲁⲕⲉ ⲉⲧϩⲓⲃⲟⲗ ⲉϥⲛⲁϣⲱⲡⲉ ⲙⲙⲁⲩ ⲛϭⲓⲡⲣⲓⲙⲉ
…
81 ⲁⲩⲱ ⲡϭⲁϩϭⲉϩ ⲛⲛⲟⲃϩⲉ ·
…
82 ⲧⲉⲛⲟⲩ ϭⲉ ⲱ ⲛⲉⲥⲛⲏⲩ ⲧⲱⲟⲩⲛ ⲁⲛⲁⲭⲱⲣⲉⲓ ⲛⲏⲧⲛ ⲉⲧⲁⲩⲗⲏ ⲉⲧϩⲓⲃⲟⲗ · ⲉⲡⲟⲩⲉ · ⲙⲡⲣⲟ ⲛⲟⲩⲕⲟⲩⲓ ϫⲉⲕⲁⲥ · ⲉⲉⲣϣⲁⲛⲡⲉⲛϫⲟⲉⲓⲥ ⲡⲣⲣⲟ ⲉⲓ ⲉϩⲟⲩⲛ · ⲙⲛⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
83 ⲛⲧⲛⲥⲡⲥⲱⲡϥ ⲁⲣⲏⲩ ⲛϥⲣⲡⲛⲉⲩⲙⲁ ⲛⲙⲙⲁⲛ ⲛⲟⲩⲕⲟⲩⲓ ⲡⲣⲟⲥⲧϩⲉ ⲙⲡⲉⲕⲥⲉⲉⲡⲉ ⲉⲧϣⲉⲧⲙⲛⲧⲛⲁ · ⲉⲣⲙⲡⲣⲟ ⲛⲧⲁⲩⲗⲏ · ⲟⲩⲛⲁϩⲏⲧ ⲅⲁⲣ ⲡⲉ ⲡⲁⲣⲭⲁⲅⲅⲉⲗⲟⲥ ⲉⲧⲉⲧⲛϣⲁⲛⲣ ϣⲁ ⲛⲁϥ ⲛϥⲛⲁⲕⲁⲧⲏⲩⲧⲛ ⲁⲛ · ⲉϫⲛⲗⲁⲁⲩ · ⲁⲗⲗⲁ ⲧⲟⲩϫⲉⲧⲏⲩⲧⲛ ⲛⲥⲁⲃⲟⲗ ·
…
84 ⲙⲡⲣⲕⲁⲁⲩ ⲉϩⲉ ⲉⲣⲟⲛ · ϩⲙⲡⲉⲓⲕⲟⲩϫⲃ ϩⲛⲧⲙⲏⲏⲧⲉ ·
…
85 ⲙⲡⲉⲓϣⲁⲙⲡⲟⲟⲩ · ϫⲉⲛⲛⲉⲛⲃⲱⲕ ϩⲙⲡϩⲓⲥⲉ ⲛⲛⲕⲟⲟⲩⲉ ·
…
86 ⲉⲓⲥϩⲏⲏⲧⲉ ⲁⲓⲧⲁⲙⲱⲧⲛ ⲁⲧⲉⲧⲛⲥⲱⲧⲙ ⲱ ⲛⲁⲙⲉⲣⲁⲧⲉ ⲉⲛⲉϫⲡⲓⲟ ⲛⲧⲁⲛⲁⲓ ϥⲓ ϩⲁⲣⲟⲟⲩ ·
…
87 ⲕⲁⲓ ⲙⲁⲗⲓⲥⲧⲁ ⲛⲣⲱⲙⲉ ..ⲧ….ⲏ ·
…
88 ⲛⲁⲓ ⲉⲧϣⲁϫⲉ ⲛⲙⲙⲁⲩ ⲁⲩⲱ ⲡⲛⲟⲩⲧⲉ ⲁⲛ ⲡⲉ ·
…
89 ⲁⲗⲗⲁ ⲙⲉϣⲁⲕ ⲛⲧⲉⲟⲩⲁ ϫⲟⲟⲥ ⲛⲁⲓ ϫⲉⲁϣ ⲛⲉ ⲛⲉⲓϩⲟⲓⲧⲉ ⲉⲧⲗⲁⲁⲙ ·
…
90 ⲏ ⲛⲉⲓⲕⲟⲩϫⲃ ⲛⲧⲉⲡⲥⲱⲙⲁ ·
…
91 ⲙⲏ ⲟⲩⲛ ϫⲓϩⲟ ϩⲁϩⲧⲙⲡⲛⲟⲩⲧⲉ ·
…
92 ⲏ ⲉⲣⲉⲡⲛⲟⲩⲧⲉ ⲟⲩⲉϣ ⲛⲣⲙⲙⲁⲟ · ⲡⲁⲣⲁ ⲛϩⲏⲕⲉ · ⲙⲏϯⲟⲩⲉϣⲫⲟⲣⲉⲓ ⲁⲛ ⲁⲛⲟⲕ · ⲙⲏ ⲟⲩⲛⲣⲱⲙⲉ ⲟⲩⲉϣ ϫⲓⲥⲱϣ ·
…
93 ⲙⲙⲟⲛ ⲛⲧⲉⲓϩⲉ ⲁⲛ ⲧⲉ ⲱ ⲛⲁⲙⲉⲣⲁⲧⲉ ·
…
94 ⲛⲛⲉⲥϣⲱⲡⲉ ⲉⲧⲣⲉⲛϫⲟⲟⲥ ϫⲉϣⲁⲣⲉⲡⲛⲟⲩⲧⲉ ϫⲓϩⲟ ·
…
95 ⲏ ϫⲉⲉϥⲟⲩⲉϣⲡⲣⲙⲙⲁⲟ ⲡⲁⲣⲁⲡϩⲏⲕⲉ ·
…
96 ⲁⲗⲗⲁ ⲥⲱⲧⲙ ⲛⲧⲁⲧⲁⲙⲱⲧⲛ ⲉⲡⲉⲫⲟⲣⲓⲥⲙⲁ · ⲉⲧⲛⲁⲛⲟⲩϥ · ⲙⲛⲡⲉⲧⲗⲁⲁⲙ ·
…
97 ⲉⲕϣⲁⲛⲉⲓ ⲉⲃⲱⲕ ⲉⲡⲁⲣⲓⲥⲧⲟⲛ ⲙⲙⲓⲭⲁⲏⲗ ·
…
98 ⲧⲱϩⲥ ⲛⲧⲉⲕⲁⲡⲉ ⲛⲅⲉⲓⲱ ⲙⲡⲉⲕϩⲟ · ⲛⲅⲛⲟⲩϫⲉ ⲛⲥⲁⲃⲟⲗ ⲙⲙⲟⲕ ⲛⲧϩⲩⲡⲟⲕⲣⲓⲥⲓⲥ ⲕⲛⲁⲣϣⲁⲩ ⲕⲁⲗⲱⲥ ·
…
99 ⲉⲩϣⲁⲛⲕⲁⲗⲉⲓ ⲙⲙⲟⲕ ⲉⲡⲁⲣⲓⲥⲧⲟⲛ ⲙⲙⲓⲭⲁⲏⲗ ·
…
100 ⲕⲁⲑⲁⲣⲓⲍⲉ ⲙⲡⲉⲕϩⲏⲧ ⲛⲥⲁⲃⲟⲗ ⲙⲙⲟⲕ ⲛⲕⲁⲕⲓⲁ ⲛⲓⲙ · ⲛⲅⲛⲟⲩϫⲉ ⲛⲥⲁⲃⲟⲗ ⲙⲙⲟⲕ ⲛⲧⲕⲁⲧⲁⲗⲁⲗⲓⲁ ·
…
101 ⲁⲩⲱ ⲧⲉⲕϩⲃⲥⲱ ⲛⲁϣⲱⲡⲉ ⲉⲥⲡⲣⲓⲱⲟⲩ ⲁⲩⲱ ⲛⲅⲣⲁϣⲉ ⲁⲩⲱ ⲛⲅⲣϣⲁⲩ ⲕⲁⲗⲱⲥ ·
…
102 ⲉⲕϣⲁⲛⲃⲱⲕ ⲉⲧⲉⲕⲕⲗⲏⲥⲓⲁ ⲙⲡⲛⲟⲩⲧⲉ ⲉⲧⲉⲡⲁⲓ ⲡⲉ ⲡⲏⲓ ⲙⲙⲓⲭⲁⲏⲗ ·
…
103 ⲕⲁⲁⲕ ⲕⲁϩⲏⲩ ⲛⲧⲡⲟⲣⲛⲉⲓⲁ ⲙⲛⲡⲁⲑⲟⲥ ⲛⲓⲙ ⲛϫⲱϩⲙ ·
…
104 ϯ ϩⲓⲱⲱⲕ ⲛⲧⲉⲓⲣⲏⲛⲏ · ⲙⲛⲡⲧⲃⲃⲟ · ⲙⲛⲧⲇⲓⲕⲁⲓⲟⲥⲩⲛⲏ ·
…
105 ⲁⲩⲱ ⲕⲛⲁⲃⲱⲕ ⲉϩⲟⲩⲛ ⲉⲧⲁⲩⲗⲏ ϩⲛⲟⲩⲣⲁϣⲉ · ⲛⲅⲣϣⲁ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
106 ⲉⲩϣⲁⲛⲕⲁⲗⲉⲓ ⲙⲙⲟⲕ ⲉⲧϣⲉⲗⲉⲉⲧ ⲙⲡⲣⲣⲟ · ⲙⲛⲡⲉϥⲛⲟϭ ⲛⲥⲧⲣⲁⲧⲏⲗⲁⲧⲏⲥ · ⲙⲁⲣⲉⲛⲉⲕⲙⲛⲧⲛⲁ · ⲙⲛⲛⲉⲕⲁⲅⲁⲡⲏ ·
…
107 ⲟⲩⲱⲛ ⲛⲁⲕ ⲙⲡⲣⲟ ⲙⲡⲛⲩⲙⲫⲱⲛ ·
…
108 ⲁⲩⲱ ⲛⲉⲧⲉⲕⲛⲁⲧⲁⲁⲩ ⲕⲛⲁϩⲉ ⲉⲣⲟⲟⲩ ⲙⲙⲏⲧ ⲛⲕⲱⲃ · ϩⲓϫⲛⲧⲉⲕⲧⲣⲁⲡⲉⲍⲁ ϩⲁⲣⲱⲕ ·
…
109 ⲉⲕϣⲁⲛⲟⲩⲱϣ ⲉϯⲉⲟⲟⲩ ⲙⲡⲁⲣⲭⲓⲥⲧⲣⲁⲧⲏⲅⲟⲥ ⲙⲡⲣⲣⲟ ⲙⲓⲭⲁⲏⲗ ·
…
110 ⲙⲁⲣⲉⲛⲉⲭⲏⲣⲁ ⲉⲓ ⲉⲃⲟⲗ ϩⲏⲧⲕ ⲙⲛⲛⲟⲣⲫⲁⲛⲟⲥ · ⲉⲣⲉⲛⲉⲩϩⲟ ⲣⲟⲟⲩⲧ ⲉⲣⲉⲛⲉⲩⲥⲱⲙⲁ · ⲣⲟⲟⲩⲧ · ⲉⲩϩⲟⲃⲥ ⲛⲟⲩϩⲃⲥⲱ ⲕⲁⲧⲁⲧⲉⲕϭⲟⲙ ·
…
111 ⲁⲩⲱ ϯϫⲱ ⲙⲙⲟⲥ ·
…
112 ⲛⲁⲕ ϫⲉⲡⲉⲕⲇⲱⲣⲟⲛ ⲛⲁϣⲱⲡⲉ ⲛⲟⲩⲛⲟϭ ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
113 ⲉⲕϣⲁⲛⲟⲩⲱϣ ⲉⲃⲱⲕ ⲉⲡⲁⲣⲓⲥⲧⲟⲛ · ⲙⲙⲓⲭⲁⲏⲗ · ⲉⲕⲣⲟⲟⲩⲧ · ⲉⲓⲉ ϣⲡϩⲉⲛϣⲙⲙⲟ ⲉⲣⲟⲕ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲛⲅⲣ ⲛⲁⲛ ⲙⲙⲁⲩ ·
…
114 ⲁⲩⲱ ⲙⲓⲭⲁⲏⲗ ⲛⲁⲉⲓ ⲉⲃⲟⲗ ϩⲛⲟⲩⲣⲁϣⲉ ⲛϥϫⲓⲧⲕ ⲉϩⲟⲩⲛ ⲉⲧⲁⲩⲗⲏ · ⲙⲡⲉϥⲣⲣⲟ · ϩⲛⲟⲩⲉⲓⲣⲏⲛⲏ ⁘ ⲉⲣϣⲁⲛⲟⲩⲣⲱⲙⲉ ⲥⲡⲥⲱⲡⲕ ⲉϥⲁⲓⲧⲉⲓ ⲙⲙⲟⲕ ϩⲙⲡⲣⲁⲛ ⲙⲙⲓⲭⲁⲏⲗ · ⲛⲟⲩⲗⲁⲁⲩ ·
…
115 ⲙⲡⲣϫⲛⲁⲁⲩ ⲉϯⲛⲁϥ ·
…
116 ϯϫⲱ ⲙⲙⲟⲥ · ⲛⲁⲕ ⲡⲁⲙⲉⲣⲓⲧ ϫⲉⲡⲉⲧⲕⲛⲁⲧⲁⲁϥ · ⲙⲡⲣⲱⲙⲉ ·
…
117 ⲙⲓⲭⲁⲏⲗ ⲡⲉⲧⲛⲁϫⲓⲧⲉϥ ϩⲛⲛⲉϥϭⲓϫ ⲛⲉϥⲡⲣⲟⲥⲉⲛⲉⲅⲕⲏ ⲙⲙⲟⲟⲩ · ⲙⲡⲛⲟⲩⲧⲉ ϩⲁⲣⲟⲕ ·
…
118 ⲁⲩⲱ ⲉϥⲛⲁⲧⲟⲟⲃⲟⲩⲛⲁⲕ ⲙⲛⲡⲉⲩⲕⲱⲃ ϩⲓϫⲙⲡ ϩⲛϩⲱⲃ ⲛⲓⲙ ·
…
119 ⲁⲩⲱ ⲡⲛⲟⲩⲧⲉ ⲣⲁⲛⲁ ⲛⲁⲕ ϩⲛⲧⲉϥⲙⲛⲧⲣⲣⲟ · ϫⲉϥⲥⲏϩ ϫⲉⲡⲛⲁ ϣⲁϥϣⲟⲩϣⲟⲩ ⲙⲙⲟϥ ϩⲓϫⲛⲧⲉⲕⲣⲓⲥⲓⲥ ·
…
120 ⲁⲩⲱ ⲟⲛϫⲉⲛⲁⲧⲁⲣⲟⲩⲛⲁ ⲛⲏⲧⲛ ·
…
121 ⲉⲕϣⲁⲛⲙⲟⲩⲛ ⲉⲃⲟⲗ ⲉⲕⲣϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲛⲟⲩⲥⲟⲡⲕⲁⲧⲁ ⲉⲃⲟⲧ ⲉⲧⲉⲥⲟⲩⲙⲛⲧⲥⲛⲟⲟⲩⲥ ⲡⲉ ⲡⲉϩⲟⲟⲩ ⲙⲡⲉϥⲧⲁϩⲟ ⲉⲣⲁⲧϥ ·
…
122 ⲁⲩⲱ ⲉⲕⲉⲓⲣⲉ ⲙⲡⲙⲉⲉⲩⲉ · ⲛⲧϥ‐ⲡⲣⲟⲥⲫⲟⲣⲁ · ⲙⲛⲟⲩⲁⲅⲁⲡⲏ · ⲙⲛⲟⲩⲇⲓⲁⲕⲟⲛⲓⲁ · ⲡⲣⲟⲥⲧⲉⲕϭⲟⲙ ⁖ⲻ
…
123 ϥⲛⲁϭⲱ ϩⲱⲱϥ ⲛϭⲓⲡⲁⲣⲭⲁⲅⲅⲉⲗⲟⲥ ⲉϥⲥⲟⲡⲥⲡ ⲙⲡⲛⲟⲩⲧⲉ ⲛⲟⲩⲟⲉⲓϣ ⲛⲓⲙ · ⲛϥⲭⲁⲣⲓⲍⲉ ⲛⲁⲕ ⲛⲧⲉⲭⲣⲉⲓⲁ ⲧⲏⲣⲥ ⲡⲣⲟⲥⲧϩⲉ ⲉⲧⲉⲕⲙⲉⲉⲩⲉ ⲉⲣⲟⲥ ·
…
124 ⲁⲗⲗⲁ ⲁⲣⲏⲩ ⲟⲩⲛⲟⲩⲁ ⲛⲁϫⲟⲟⲥ ·
…
125 ⲛⲁⲓ ϫⲉⲉϣⲱⲡⲉ ϩⲱⲗⲟⲥ ϣⲁⲓϯⲁⲅⲁⲡⲏ · ϩⲓⲡⲣⲟⲥⲫⲟⲣⲁ · ⲉⲓⲉ ϯⲛⲁⲧⲁⲁⲩ · ⲙⲡⲛⲟⲩⲧⲉ ·
…
126 ⲙⲏ ⲟⲩⲛⲟⲩⲧⲉ ⲡⲉ ⲙⲓⲭⲁⲏⲗ ϫⲉⲉⲓⲉⲧⲁⲗⲉⲑⲩⲥⲓⲁ ⲛⲁϥ ⲉϩⲣⲁⲓ ·
…
127 ⲙⲛⲛⲟⲩⲧⲉ ϣⲟⲟⲡ ⲛⲥⲁⲡⲛⲟⲩⲧⲉⲛ ⲧⲡⲉ ⲡⲉⲓⲱⲧ ⁘ ⲙⲛⲡϣⲏⲣⲉ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ·
…
128 ⲁⲛⲟⲕ ⲇⲉ ϩⲱⲱⲧ ϯⲛⲁⲟⲩⲱϣⲃ ⲛⲁⲕ ϫⲉⲕⲁⲗⲱⲥ · ⲡⲓⲥⲧⲟⲥ ⲛⲁⲙⲉ ·
…
129 ⲡⲉⲧⲉⲣⲉⲧⲉϥⲡⲓⲥⲧⲓⲥ ⲥⲟⲩⲧⲱⲛ ⲉϩⲟⲩⲛ ⲉⲡⲉϥϫⲟⲉⲓⲥ · ⲁⲗⲗⲁ ⲥⲱⲧⲙ ⲛⲧⲁⲧⲁⲙⲟⲕ ·
…
130 ⲙⲏⲟⲩⲣⲣⲟ ⲛⲟⲩⲱⲧ ⲡⲉⲧⲁⲙⲁϩⲧⲉ ⲉϫⲛⲧⲉⲭⲱⲣⲁ · ⲉⲣⲉⲟⲩⲁϣⲏ ⲛⲧⲁⲝⲓⲥ ϩⲁⲣⲁⲧϥ ·
…
131 ⲁⲩⲱ ⲉⲃⲟⲗ ϩⲛⲛⲉⲓⲧⲁⲝⲓⲥ ⲕⲛⲁϩⲉ ⲉⲟⲩⲉⲓ ⲉⲥϫⲟⲥⲉ ⲡⲁⲣⲁⲕⲉⲟⲩⲁ ⲉⲓⲉ · ⲉⲣⲉⲡⲣⲣⲟ ϫⲟⲥⲉ ⲉⲣⲟⲟⲩ ⲧⲏⲣⲟⲩ ·
…
132 ⲉⲥϣⲁⲛϣⲱⲡⲉ ⲇⲉ ⲛⲧⲉⲟⲩⲣⲱⲙⲉ ⲕⲱ ⲛⲁϥ ⲛⲟⲩⲙⲛⲧϣⲃⲏⲣ · ⲙⲛⲟⲩⲁ ϩⲛⲛⲉⲓⲧⲁⲝⲓⲥ · ⲛⲃⲁⲥⲓⲗⲓⲕⲟⲛ · ⲛϥϯ ⲛⲁϥ ⲛϩⲉⲛⲧⲁⲉⲓⲟ · ⲙⲛϩⲉⲛⲭⲣⲏⲙⲁ ·
…
133 ⲙⲏ ⲉⲩϯ ⲙⲙⲟⲟⲩ ⲛⲁϥ ϩⲁⲧⲉϥⲧⲁⲝⲓⲥ · ⲉⲧϥⲛϩⲏⲧⲥ ⲙⲙⲟⲛ ⲁⲗⲗⲁ ⲛⲧⲁⲩⲧⲁⲁⲩ ·
…
134 ⲛⲁϥ ⲉⲩⲥⲟⲟⲩⲛ · ϫⲉⲟⲩⲛⲟϭ ⲧⲉ ⲧⲉϥⲧⲁⲝⲓⲥ ·
…
135 ⲁⲩⲱ ϥϩⲏⲛ ⲉϩⲟⲩⲛ ⲉⲡⲣⲣⲟ ⲛⲛⲁⲩ ⲛⲓⲙ ·
…
136 ⲁⲩⲱ ⲟⲩⲛϭⲟⲙ ⲙⲙⲟϥ ⲉⲧⲟⲩϫⲟϥ ⲛϩⲱⲃ ⲛⲓⲙ ⲙⲛⲕⲓⲛⲇⲩⲛⲟⲥ ⲛⲓⲙ ⲉϥⲣⲡⲕⲉⲥⲩⲛϩⲓⲥⲧⲁ ⲙⲙⲟϥ · ⲙⲡⲣⲣⲟ ϩⲱⲥⲣⲱⲙⲉ ⲛϣⲁⲩ ·
…
137 ϩⲱⲥⲧⲉ ⲛⲧⲉϩⲉⲛⲕⲟⲟⲩⲉ ϫⲓϩⲙⲟⲧ ⲉⲃⲟⲗ · ⲧⲁⲓ ⲧⲉ ⲧϩⲉ ϩⲱⲱϥ ⲛⲣⲱⲙⲉ ⲛⲓⲙ ⲉⲧϯⲁⲅⲁⲡⲏ ·
…
138 ϩⲓⲡⲣⲟⲥⲫⲟⲣⲁ ⲙⲡⲛⲟⲩⲧⲉ ⲙⲡⲉϩⲟⲟⲩ ⲙⲙⲓⲭⲁⲏⲗ ϣⲁⲣⲉⲡⲁⲣⲭⲁⲅⲅⲉⲗⲟⲥ ·
…
139 ϫⲓ ⲛⲧⲟⲟⲧⲟⲩ · ⲛⲛⲉⲩⲑⲩⲥⲓⲁ · ⲙⲛⲛⲉⲩⲁⲅⲁⲡⲏ ⲛϥⲧⲁⲁⲩ ⲙⲡⲛⲟⲩⲧⲉ ⲛⲧϩⲉ ⲛⲟⲩⲛⲟϭ ⲛⲥϯⲛⲟⲩϥⲉ ⲛϥϫⲓⲕⲉⲗⲉⲩⲥⲓⲥ ⲛⲧⲟⲟⲧϥ ⲙⲡⲛⲟⲩⲧⲉ ϩⲁⲣⲟⲟⲩ · ⲛϥⲥⲟⲃⲧⲉ ⲛⲁⲩ ⲛⲟⲩⲁϣⲏ ⲛⲁⲅⲁⲑⲟⲛ ·
…
140 ⲁⲩⲱ ⲛϥϫⲓⲧⲟⲩ ⲛϩⲙⲟⲧ ⲛⲛⲁϩⲣⲛⲡⲛⲟⲩⲧⲉ ⲛⲥⲉⲣⲃⲟⲗ ⲛⲕⲟⲗⲁⲥⲓⲥ ϣⲁⲉⲛⲉϩ ·
…
141 ⲡⲗⲏⲛ ⲉϣϫⲉ ⲧⲉⲧⲛⲟⲩⲱϣ ⲉⲉⲓⲙⲉ ϫⲉⲛⲉⲧⲉϣⲁⲣⲉ ⲛⲣⲱⲙⲉ ⲧⲁⲁⲩ ⲛⲁⲅⲁⲡⲏ ϩⲓⲡⲣⲟⲥⲫⲟⲣⲁ ⲙⲡⲛⲟⲩⲧⲉ ⲙⲡⲉϩⲟⲟⲩ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲉϣⲁϥⲇⲓⲁⲕⲱⲛⲉⲓ ⲙⲙⲟⲟⲩ ⲛⲁⲩ ϫⲓⲛⲉⲩ ϩⲛⲡⲕⲟⲥⲙⲟⲥ ·
…
142 ⲥⲱⲧⲙ ϭⲉ ⲉⲡⲉⲓⲛⲟϭ ⲛⲕⲉⲫⲁⲗⲓⲟⲛ ⲛϣⲟⲩⲣϣⲡⲏⲣⲉ ⲙⲙⲟϥ ⲉⲩⲉⲟⲟⲩ ⲙⲡⲛⲟⲩⲧⲉ ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
143 ⲛⲉⲩⲟⲩⲛⲟⲩⲣⲱⲙⲉ ⲇⲉ ⲛⲇⲓⲕⲁⲓⲟⲥ · ⲙⲙⲁⲓⲛⲟⲩⲧⲉ ·
…
144 ⲁⲩⲱ ⲙⲙⲁⲓⲁⲅⲁⲡⲏ ·
…
145 ϣⲟⲟⲡ ϩⲛϩⲉⲛⲥⲩⲛⲫⲟⲣⲓⲁ ⲉⲟⲩⲛⲧⲁⲁϥ ⲙⲙⲁⲩ ⲛⲟⲩⲥϩⲓⲙⲉ ⲛϩⲁⲕ ⲁⲩⲱ ⲛⲥⲉⲙⲛⲏ ⁖
…
146 ⲁⲩⲱ ⲧⲁⲓ ϩⲱⲱⲥ ⲟⲛⲉⲛⲉⲥϫⲏⲕ ⲉⲃⲟⲗ ϩⲙⲡⲛⲁ ⲙⲛⲧⲁⲅⲁⲡⲏ ⲕⲁⲧⲁⲧϩⲉ ⲙⲡⲉⲥⲕⲉϩⲁⲓ ·
…
147 ⲛⲁⲓ ⲇⲉ ⲛⲉⲟⲩⲛⲧⲁⲩ ⲙⲙⲁⲩ ⲛⲟⲩⲛⲟϭ ⲙⲡⲣⲟⲥⲧⲁⲥⲓⲁ ·
…
148 ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
149 ⲡⲣⲁⲛ ⲇⲉ ⲙⲡⲣⲱⲙⲉ ⲉⲧⲙⲙⲁⲩ ⲡⲉ ⲇⲟⲣⲟⲑⲉⲟⲥ ·
…
150 ⲁⲩⲱ ⲡⲣⲁⲛ ⲛⲧⲉϥⲥϩⲓⲙⲉ ⲡⲉ ⲑⲉⲟⲡⲓⲥⲧⲏ ·
…
151 ϫⲓⲛⲡⲉⲟⲩⲟⲉⲓϣ ⲛⲧⲁⲩϩⲟⲧⲣⲟⲩ ⲙⲛⲛⲉⲩⲉⲣⲏⲩ · ⲉⲩⲟ ⲛⲕⲟⲩⲓ ⲙⲡⲉⲥⲛⲁⲩ ·
…
152 ⲛⲉⲩⲛⲧⲏⲩ ⲙⲙⲁⲩ ⲛⲟⲩⲟⲩⲥⲓⲁ · ⲉⲥⲧⲏϣⲕⲁⲗⲱⲥ · ⲛⲧⲁⲥϣⲱϫⲡ ⲛⲁⲩ ϩⲁⲛⲉⲩⲉⲓⲟⲧⲉ · ⲙⲛϩⲉⲛⲉⲥⲟⲟⲩ · ⲙⲛϩⲉⲛⲉϩⲁⲟⲩ · ⲙⲛⲡⲕⲉⲥⲉⲉⲡⲉ ⲛⲭⲣⲉⲓⲁ · ⲛⲧⲉⲡⲉⲓⲕⲟⲥⲙⲟⲥ ·
…
153 ⲛⲉⲓⲣⲱⲙⲉ ⲇⲉ ⲛⲇⲓⲕⲁⲓⲟⲥ ·
…
154 ⲛⲉⲩⲟⲩⲛⲧⲁⲩ ⲙⲙⲁⲩ ⲛⲟⲩⲥⲩⲛⲏⲑⲓⲁ · ⲉⲛⲁⲛⲟⲩⲥ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲕⲁⲧⲁⲥⲟⲩⲙⲛⲧⲥⲛⲟⲟⲩⲥ ·
…
155 ⲉⲩϣⲁⲛⲡⲟⲟϩ ⲇⲉ ⲉⲥⲟⲩⲙⲛⲧⲥⲛⲟⲟⲩⲥ · ⲕⲁⲧⲁⲉⲃⲟⲧ · ϣⲟⲩⲧⲁⲥⲥⲉ ⲛⲧⲉⲡⲣⲟⲥⲫⲟⲣⲁ ·
…
156 ϩⲉⲛⲥⲟⲩⲙⲛⲧⲟⲩⲉ ⲉϩⲧⲟⲟⲩⲉ ⲛⲥⲟⲩⲙⲛⲧⲥⲛⲟⲟⲩⲥ ·
…
157 ⲛϣⲱⲣⲡ ⲙⲉⲛ ϣⲁⲩⲧⲛⲛⲟⲟⲩ ⲛⲧⲁⲡⲁⲣⲭⲏ · ⲙⲛⲧⲉⲡⲣⲟⲥⲫⲟⲣⲁ · ⲉⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
158 ϩⲛⲟⲩⲟⲩⲣⲟⲧ ⁖ ⲙⲛⲛⲥⲱⲥ ϣⲁⲩⲕⲱⲛⲥ ⲛⲟⲩⲉⲥⲟⲟⲩ ⲛⲥⲉⲥⲙⲓⲛⲉ ⲛⲭⲁⲗⲕⲓⲟⲛ ⲛⲁϥ ϩⲓⲗⲁⲭⲁⲛⲟⲛ · ⲛⲥⲉⲧⲱⲕ ⲛϩⲉⲛⲟⲉⲓⲕ ⲉⲡϩⲱⲃ · ⲛⲧⲉⲭⲣⲉⲓⲁ ·
…
159 ⲉⲩϣⲁⲛⲟⲩⲱ ⲇⲉ ⲉⲩϫⲓ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ · ϣⲁⲩⲧⲉϩⲙⲟⲩⲟⲛ ⲛⲓⲙ · ⲉⲧϣⲁⲁⲧ ⲉⲧⲟⲩⲛⲁϩⲉ ⲉⲣⲟⲟⲩ ⲛⲥⲉⲛⲧⲟⲩ ⲉϩⲟⲩⲛ ⲉⲡⲉⲩⲏⲓ ·
…
160 ⲙⲛⲛⲃⲗⲗⲉ ⲙⲛⲛϭⲁⲗⲉ ⲙⲛⲛⲉⲭⲏⲣⲁ · ⲙⲛⲛⲟⲣⲫⲁⲛⲟⲥ · ⲙⲛⲛϣⲙⲙⲟ ·
…
161 ⲙⲛⲛⲉⲧⲟⲩⲛⲁϩⲉ ⲉⲣⲟⲟⲩ ⲛⲥⲉⲛⲧⲟⲩ ⲉϩⲟⲩⲛ ⲉⲡⲉⲩⲏⲓ · ⲛⲥⲉⲁϩⲉⲣⲁⲧⲟⲩ ⲉⲣⲟⲟⲩ ⲙⲡⲉⲥⲛⲁⲩ ⲛⲥⲉⲇⲓⲁⲕⲱⲛⲉⲓ ⲛⲁⲩϣⲁⲛⲧⲟⲩⲱ ⲉⲩⲟⲩⲱⲙ ·
…
162 ⲁⲩⲱ ⲛⲥⲉϯ ⲛⲁⲩ ⲛⲟⲩⲏⲣⲡ ⲉⲛⲁϣⲱϥ ·
…
163 ⲉⲩϣⲁⲛⲛⲁⲩ ⲇⲉ ⲉⲉⲓ ⲉⲃⲟⲗ · ϣⲁⲩⲧⲱϩⲥ ⲛⲧⲉⲩⲁⲡⲉ · ⲛⲟⲩⲛⲉϩ ⲛⲥⲉⲑⲡⲟⲟⲩ ⲉⲃⲟⲗ ·
…
164 ϩⲛⲟⲩⲣⲁϣⲉ ⲉⲩϫⲱ ⲙⲙⲟⲥ ϫⲉⲃⲱⲕ ϩⲛⲟⲩⲉⲓⲣⲏⲛⲏ ⲛⲉⲥⲛⲏⲩ ⲙⲙⲉⲣⲓⲧ ·
…
165 ⲁⲛⲙⲡϣⲁ ⲅⲁⲣ ⲛⲟⲩⲛⲟϭ ⲛϩⲙⲟⲧ ·
…
166 ⲁⲧⲉⲧⲛ ⲉⲓ ϣⲁⲣⲟⲛ ⲙⲡϩⲟⲟⲩ ·
…
167 ⲛⲁⲓ ⲇⲉ ⲛⲉⲩⲉⲓⲣⲉ ⲙⲙⲟⲟⲩ ⲕⲁⲧⲁⲥⲟⲩⲙⲛⲧⲥⲛⲟⲟⲩⲥ ·
…
168 ϩⲱⲥⲧⲉ ⲛⲧⲉⲧⲉⲩⲥϯⲛⲟⲩϥⲉ ⲙⲛⲧⲉⲩⲁⲅⲁⲡⲏ ⲃⲱⲕ ϣⲁⲡⲛⲟⲩⲧⲉ ·
…
169 ϩⲣⲁⲓ ϩⲛⲙⲡⲏⲩⲉ ⲉⲣⲉⲣⲱⲙⲉ ⲛⲓⲙ ϯⲉⲟⲟⲩ ⲙⲡⲉⲟⲩⲟⲉⲓϣ ⲧⲏⲣϥ ⲉⲧⲃⲉⲧⲉⲩⲙⲛⲧⲥⲱⲧⲡ ·
…
170 ⲁⲩⲱ ⲛⲉⲩϩⲱⲡ ⲛⲛⲉⲩⲁⲣⲉⲧⲏ · ϩⲓⲟⲩⲥⲟⲡ · ⲛⲥⲉϣⲓⲛⲉ ⲁⲛ ⲛⲥⲁⲗⲁⲁⲩ ⲛⲉⲟⲟⲩ ⲉⲡⲁⲣⲱⲙⲉ ⲡⲉ ⲁⲗⲗⲁ ⲉⲣⲉⲧⲉⲩϩⲉⲗⲡⲓⲥ ⲧⲏⲣⲥ ϣⲟⲟⲡ ϩⲙⲡⲛⲟⲩⲧⲉ · ⲙⲛⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
171 ⲁⲥϣⲱⲡⲉ ⲇⲉ ⲙⲛⲛⲥⲁⲟⲩⲛⲟϭ ⲛⲟⲩⲟⲉⲓϣ ⲉⲩⲙⲏⲛ ⲉⲃⲟⲗ · ⲛⲧⲉⲓϩⲉ ·
…
172 ⲁⲡⲛⲟⲩⲧⲉ ⲕⲉⲗⲉⲩⲉ ·
…
173 ⲁⲧⲁⲛⲁⲃⲁⲥⲓⲥ ϣⲱⲡⲉ · ⲉⲧⲙⲧⲣⲉⲡⲙⲟⲟⲩ ⲉⲓⲉϫⲙⲡ ⲉⲩⲡⲁⲓⲇⲉⲩⲥⲓⲥ ⲛⲛϣⲏⲣⲉ ⲛⲛⲣⲱⲙⲉ ⲉⲧⲃⲉⲛⲉⲩⲛⲟⲃⲉ ·
…
174 ⲗⲟⲓⲡⲟⲛ ⲁϥⲁⲙⲁϩⲧⲉ ⲙⲙⲟϥ · ⲛϣⲟⲙⲧⲉ ⲛⲣⲟⲙⲡⲉ ⲛⲥⲁⲛⲉⲩⲉⲣⲏⲩ ·
…
175 ϩⲱⲥⲧⲉ ⲛⲧⲉⲡ ⲛⲕⲏⲙⲉ ϣⲱⲡⲉ ϩⲛⲟⲩⲛⲟϭ ⲛϣⲧⲟⲣⲧⲣ · ⲙⲛⲛⲉⲧϩⲓϫⲱϥ · ⲛⲥⲉⲣⲡⲱⲃϣ ⲙⲡⲥⲓ ϩⲛⲕⲏⲙⲉ · ⲕⲁⲧⲁⲡⲉⲧⲥⲏϩ ·
…
176 ⲗⲟⲓⲡⲟⲛ ⲁⲩⲙⲟⲩ ⲛϭⲓϩⲁϩ ⲛⲣⲱⲙⲉ ϩⲓⲧⲃⲛⲏ ·
…
177 ⲉⲃⲟⲗ ϫⲉⲙⲡⲉⲙⲟⲟⲩ ⲉⲓⲛⲁⲩ ⲉϫⲙⲡ ⲛϣⲟⲙⲧⲉ ⲛⲣⲟⲙⲡⲉ ⲛⲥⲁⲛⲉⲩⲉⲣⲏⲩ ·
…
178 ⲡⲉⲓⲣⲱⲙⲉ ⲇⲉ ⲉⲧⲟⲩⲁⲁⲃ ·
…
179 ⲙⲛⲧⲉϥⲥϩⲓⲙⲉ ⲙⲡⲟⲩⲕⲁⲧⲟⲟⲧⲟⲩ ⲉⲃⲟⲗ ϩⲙⲡⲉⲧⲟⲩⲉⲓⲣⲉ ⲙⲙⲟϥ ⲕⲁⲧⲁⲉⲃⲟⲧ · ⲉⲩⲥⲟⲡⲥⲡ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉⲙⲡⲣⲱϫⲛ ⲛⲧⲉⲕⲁⲅⲁⲡⲏ · ⲙⲛⲧⲉⲕⲡⲣⲟⲥⲫⲟⲣⲁ · ϩⲛⲛⲉⲛϭⲓϫ ⲛⲛⲉⲕϩⲙϩⲁⲗ ·
…
180 ⲉⲩϣⲟⲟⲡ ⲇⲉ ⲛⲧⲉⲓϩⲉ ⲁⲩⲁⲣⲭⲉⲓ ⲛϣⲱⲱⲧ ϩⲱⲟⲩ ⲁⲩⲱ ⲁⲩⲙⲟⲩ ⲛϭⲓϩⲁϩ ϩⲛⲛⲉⲩⲧⲃⲛⲟⲟⲩⲉ ·
…
181 ϩⲁⲡⲗⲱⲥ ⲁⲩϫⲉⲕⲣⲟⲙⲡⲉ ⲥⲛⲧⲉ ⲉⲃⲟⲗ ·
…
182 ⲁⲩⲁⲣⲭⲉⲓ ⲉⲧⲙⲉϩϣⲟⲙⲧⲉ ·
…
183 ⲁⲛⲕⲁ ⲛⲓⲙ · ⲉⲧⲛⲧⲁⲩⲟ · ⲱϫⲛ ⲛⲧⲟⲟⲧⲟⲩ ·
…
184 ⲁⲩⲱ ⲁⲛⲉⲩⲉⲥⲟⲟⲩ ⲧⲏⲣⲟⲩ ⲙⲟⲩ · ⲡⲁⲣⲁⲟⲩⲁ ⲛⲟⲩⲱⲧ · ⲡⲣⲱⲙⲉ ⲇⲉ ⲛⲥⲉⲙⲛⲟⲥ · ⲁⲩⲱ ⲙⲡⲓⲥⲧⲟⲥ ·
…
185 ⲡⲉϫⲁϥ ⲛⲧⲉϥⲥϩⲓⲙⲉ ϫⲉⲧⲁⲥⲱⲛⲉ ·
…
186 ⲧⲱⲟⲩⲛ ⲉⲓⲥϩⲏⲏⲧⲉ ⲥⲟⲩⲙⲛⲧⲥⲛⲟⲟⲩⲥ ⲙⲡⲁⲟⲡⲉ ⲣⲁⲥⲧⲉ ·
…
187 ⲙⲁⲣⲛϥⲓⲡⲣⲟⲟⲩϣ ⲛⲧⲉⲡⲣⲟⲥⲫⲟⲣⲁ · ⲛⲧⲛⲕⲱⲛⲥ ⲙⲡⲓⲉⲥⲟⲟⲩ ⲛⲧⲛⲣⲡϣⲁ · ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
188 ⲁⲩⲱ ⲛϣⲁⲛⲧⲙⲟⲩ ⲁⲛⲟⲛ ⲛⲁⲡⲛⲟⲩⲧⲉ · ⲉⲛϣⲁⲛⲱⲛϩ ⲁⲛⲟⲛ ⲛⲁⲡⲛⲟⲩⲧⲉ ·
…
189 ⲛⲧⲟⲥ ⲇⲉ ⲡⲉϫⲁⲥ ⲛⲁϥ · ϫⲉϥⲟⲛϩ ⲛϭⲓⲡϫⲟⲉⲓⲥ ⲡⲁⲥⲟⲛ · ϫⲉⲡⲉⲓⲣⲟⲟⲩϣ ⲡⲁⲓ ⲉⲛⲱⲭⲗⲉⲓ ⲛⲁⲓ ⲉⲓⲥ ⲕⲉϩⲟⲟⲩ ⲥⲛⲁⲩ · ⲁⲗⲗⲁ ⲙⲡⲓϭⲛ ⲧϩⲉ ⲛϫⲛⲟⲩⲕ ·
…
190 ⲁⲛⲁⲩ ⲉⲡⲉⲛⲧⲁϥϣⲱⲡⲉ ⲙⲙⲟⲛ ·
…
191 ⲁⲓⲣⲁϣⲉ ⲧⲱⲛⲟⲩ ⲙⲡϩⲟⲟⲩ · ϫⲉⲙⲡⲉⲕⲣⲡⲱⲃϣ ⲛⲧⲉⲑⲩⲥⲓⲁ ⲙⲡⲛⲟⲩⲧⲉ ·
…
192 ⲁⲣⲓⲣⲉⲡⲁⲥⲟⲛ ⲕⲁⲧⲁⲧϩⲉ ⲛⲧⲁⲕϫⲟⲟⲥ ·
…
193 ⲁϥⲧⲱⲟⲩⲛ ⲇⲉ ⲛϣⲱⲣⲡ ⲛⲥⲟⲩⲙⲛⲧⲥⲛⲟⲟⲩⲥ · ⲙⲡⲁⲟⲡⲉ ·
…
194 ⲁⲩϫⲱⲕ ⲉⲃⲟⲗ ·
…
195 ⲙⲡⲉⲩϣⲙϣⲉ ⲧⲏⲣϥ ⲙⲡⲟⲩⲉⲓ ⲉⲡⲁϩⲟⲩ ⲛⲗⲁⲁⲩ ⲡⲁⲣⲁⲡⲉⲟⲩⲟⲉⲓϣ ⲙⲡϩⲉⲛⲟⲩϥⲉ ·
…
196 ⲁⲩⲱ ⲙⲡⲉⲗⲁⲁⲩ ϣⲱϫⲡ ⲛⲁⲩ ⲉⲡⲁϩⲟⲩ ·
…
197 ⲛⲥⲁⲛⲕⲟⲩⲓ ⲛⲟⲉⲓⲕ · ⲙⲛⲟⲩⲕⲟⲩⲓ ⲛⲏⲣⲡ ⲙⲙⲁⲧⲉ ·
…
198 ϣⲁϩⲣⲁⲓ ⲉⲛⲉⲩⲕⲉϩⲃⲥⲱ ⲧⲏⲣⲟⲩ ϣⲁⲛⲉⲧⲟⲩⲥⲩⲛⲁⲅⲉ ⲛϩⲏⲧⲟⲩ ·
…
199 ⲁⲩⲱ ϩⲛⲛⲁⲓ ⲛⲉⲩϣⲡϩⲙⲟⲧ ⲛⲧⲟⲟⲧϥ ⲙⲡϫⲟⲉⲓⲥ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
200 ⲁⲩⲱ ⲉⲩϣⲗⲏⲗ ⲉⲩⲥⲙⲟⲩ ⲉⲡⲛⲟⲩⲧⲉ · ⲙⲡⲉϩⲟⲟⲩ ⲙⲛⲧⲉⲩϣⲏ · ϩⲛϩⲉⲛⲣⲙⲓⲟⲟⲩⲉ · ⲉⲩϫⲱ ⲙⲙⲟⲥ · ϫⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲉϫⲱⲛ ·
…
201 ⲛϥⲟⲩⲱⲛ ⲛⲁⲛ ⲛⲧⲉϥϭⲓϫ ⲛⲥⲙⲟⲩ ϫⲉⲕⲁⲥ ⲛⲛⲉⲥⲱϫⲛ ⲛⲧⲟⲟⲧⲛ ⲛϭⲓⲧϩⲉⲗⲡⲓⲥ ⲛⲧⲉϥⲁⲅⲁⲡⲏ ⲙⲛⲧⲉϥⲑⲩⲥⲓⲁ · ⲧⲁⲓ ⲉⲧⲛϯ ⲙⲙⲟⲥ ϩⲙⲡⲉϥⲣⲁⲛ · ⲱ ⲙⲓⲭⲁⲏⲗ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲟⲕ ⲡⲉⲧⲥⲟⲟⲩⲛ ⲙⲡⲉⲛϩⲏⲧ ⲙⲛⲧⲉⲛⲡⲣⲟϩⲁⲓⲣⲉⲥⲓⲥ ⲉϩⲟⲩⲛ ⲉⲣⲟⲕ ·
…
202 ⲁⲩⲱ ϫⲉⲙⲛⲧⲁⲛ ⲗⲁⲁⲩ ⲙⲡⲣⲟⲥⲧⲁⲥⲓⲁ ·
…
203 ⲙⲙⲁⲕ ⲛⲥⲁⲃⲗⲗⲁⲕ · ⲉⲕⲟ ⲛⲁⲛ ⲙⲡⲣⲟⲥⲧⲁⲧⲏⲥ ϫⲓⲛⲧⲛⲙⲛⲧⲕⲟⲩⲓ ϣⲁⲧⲉⲛⲟⲩ · ⲉⲕⲡⲣⲉⲥⲃⲉⲩⲉ ϩⲁⲣⲟⲛ ⲛⲛⲁϩⲣⲙⲡⲛⲟⲩⲧⲉ ⲡⲉⲛⲣⲣⲟ ·
…
204 ⲧⲉⲛⲟⲩ ⲇⲉ ⲧⲛⲡⲁⲣⲁⲕⲁⲗⲉⲓ ⲙⲙⲟⲕ ⲡⲉⲛϥⲁⲓⲣⲟⲟⲩϣ ⲉⲧⲛⲁⲛⲟⲩϥ ⲙⲓⲭⲁⲏⲗ · ⲉϣⲱⲡⲉ ϩⲱⲗⲟⲥ · ⲡⲉⲓⲛⲟϭ ⲛⲙ ⲛϩⲏⲧ · ϭⲉⲉⲧ ⲉⲣⲟⲛ · ϩⲛⲧⲛϩⲁⲏ ⲙⲛⲛⲉⲓⲥⲩⲛⲑⲩⲕⲏ · ⲛⲧⲁⲛⲥⲙⲛⲧⲟⲩ ⲛⲙⲙⲁⲕ · ⲙⲛⲡⲛⲟⲩⲧⲉ ⲉⲧⲙⲟⲩⲱⲥϥ · ⲛⲧⲉⲕⲑⲩⲥⲓⲁ · ⲙⲛⲧⲉⲕⲁⲅⲁⲡⲏ ·
…
205 ⲉⲓⲉ ⲙⲁⲣⲉⲧⲉⲕⲙⲛⲧⲁⲅⲁⲑⲟⲥ ⲉⲓ ⲉϩⲟⲩⲛ · ⲉⲧϩⲓⲕⲱⲛ ⲧⲏⲣⲥ ⲙⲡⲛⲟⲩⲧⲉ ·
…
206 ⲉⲓⲣⲉ ⲛⲙⲙⲁⲛ ⲙⲡⲉⲓⲛⲟϭ ⲛⲁⲅⲁⲑⲟⲛ ·
…
207 ⲛⲅⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲡⲣⲣⲟ ⲛⲛⲣⲣⲱⲟⲩ · ⲉⲧⲃⲏⲏⲧⲛ · ⲛϥⲣⲡⲛⲉⲩⲙⲁ · ⲛⲙⲙⲁⲛ · ⲛϥⲡⲟⲟⲛⲉⲛ ⲉⲃⲟⲗ ϩⲙⲡⲉⲓⲃⲓⲟⲥ ⲕⲁⲧⲁⲧϩⲉ ϩⲱⲟⲩ ⲛⲛⲉⲛⲉⲓⲟⲧⲉ ⲧⲏⲣⲟⲩ ·
…
208 ⲉⲓⲥϩⲏⲏⲧⲉ ⲅⲁⲣ ⲱ ⲡⲉⲛⲡⲣⲟⲥⲧⲁⲧⲏⲥ · ⲕⲛⲁⲩ ⲉⲡⲉⲛⲑⲃⲃⲓⲟ ⲛⲧⲁϥϣⲱⲡⲉ ⲙⲙⲟⲛ ·
…
209 ⲁⲗⲗⲁ ⲛⲧⲁⲛⲁⲓ ⲧⲏⲣⲟⲩ ϣⲱⲡⲉ ⲙⲙⲟⲛ · ⲛⲧϣⲃⲃⲓⲱ ⲛⲛⲉⲛⲛⲟⲃⲉ ·
…
210 ⲁⲩⲱ ⲛⲁⲛⲟⲩⲥ ⲛⲧⲛⲙⲟⲩ ⲛϩⲟⲩⲟ ⲉⲣⲟⲥ ⲛⲧⲛⲣ‐ⲡⲱⲃϣ ⲛⲧⲉⲕⲑⲩⲥⲓⲁ · ⲙⲛⲧⲉⲕⲡⲣⲟⲥⲫⲟⲣⲁ · ϫⲉϣⲁⲣⲉⲧⲙⲛⲧϩⲏⲕⲉ ⲅⲁⲣ ⲣϩⲁϩ ⲛϩⲱⲃ ⲉϥϩⲟⲟⲩ ·
…
211 ⲁⲩⲱ ϣⲁⲥⲧⲣⲉⲛⲉⲧ ⲛϩⲏⲧⲥ ·
…
212 ⲁⲣⲛⲁ ⲙⲡⲣⲁⲛ ⲙⲡⲉⲛⲧⲁϥⲧⲁⲙⲓⲟⲟⲩ ⲉϫⲛϩⲟⲧⲉ ⁖ ⲧⲉⲛⲟⲩ ⲟⲛ ⲧⲛⲡⲁϩⲧ ⲙⲡⲉⲕⲙⲧⲟ ⲉⲃⲟⲗ · ⲱ ⲡⲁⲣⲭⲓⲥⲧⲣⲁⲧⲏⲅⲟⲥ · ⲉⲧⲟⲩⲁⲁⲃ ⲙⲓⲭⲁⲏⲗ ·
…
213 ⲙⲡⲣⲟⲃϣⲕ ⲉⲣⲟⲛ ·
…
214 ⲁⲛⲟⲛ ⲛⲉⲕϩⲙϩⲁⲗ ·
…
215 ⲧⲛⲥⲟⲟⲩⲛ ⲅⲁⲣ ϫⲉⲕϩⲏⲛ ⲉϩⲟⲩⲛ ⲉⲡⲣⲣⲟ ⲛⲛⲁⲩ ⲛⲓⲙ ·
…
216 ⲁⲩⲱ ⲕⲟⲩⲏⲩ ⲉⲃⲟⲗ · ⲁⲛ · ⲛⲛⲉⲧⲉⲡⲓⲕⲁⲗⲓ ⲙⲙⲟⲕ ·
…
217 ⲁⲗⲗⲁ ⲕϩⲏⲛ ⲉϩⲟⲩⲛ ⲉⲣⲟⲟⲩ ⲕⲁⲧⲁⲡⲉⲧⲥⲏϩ · ϫⲉϣⲁⲣⲉⲡⲁⲅⲅⲉⲗⲟⲥ ·
…
218 ⲙⲡϫⲟⲉⲓⲥ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ·
…
219 ⲁⲩⲱ ϣⲁϥⲛⲁϩⲙⲟⲩ · ϣⲁϥϫⲟⲟⲥ ⲟⲛ ϩⲛⲕⲉⲙⲁ · ϫⲉϣⲁϥⲛⲁ ·
…
220 ⲁⲩⲱ ⲛϥϯ ⲙⲡⲉϩⲟⲟⲩ ⲧⲏⲣϥ ·
…
221 ⲉⲓⲥϩⲏⲏⲧⲉ ⲟⲩⲛ ⲱ ⲡⲉⲡⲣⲉⲥⲃⲉⲩⲧⲏⲥ ⲙⲓⲭⲁⲏⲗ · ⲕⲛⲁⲩ ⲉⲡⲉⲛϣⲱⲱⲧ ⲧⲏⲣϥ ϩⲓϫⲱⲛ ·
…
222 ⲁⲩⲱ ⲙⲛⲧⲁⲛ ⲗⲁⲁⲩ ⲛϣⲁϫⲉ ·
…
223 ⲙⲙⲁⲩ ⲉⲧⲣⲉⲛϫⲟⲟϥ ⲉⲓ ⲙⲏⲧⲉⲓ ⲉⲡⲁⲓ ⲙⲙⲁⲧⲉ · ϫⲉⲁⲛⲣϩⲏⲕⲉ ⲉⲙⲁⲧⲉ ·
…
224 ⲃⲟⲏⲑⲉⲓ ⲉⲣⲟⲛ ·
…
225 ⲡⲛⲟⲩⲧⲉ ⲡⲉⲛⲥⲱⲧⲏⲣ ⲛⲅⲥⲁⲁⲧⲛ ⲉⲧⲃⲉⲡⲉⲟⲟⲩ ⲙⲡⲉⲕⲣⲁⲛ ·
…
226 ⲁⲩⲱ ⲟⲛ ⲧⲛϫⲱ ⲙⲡⲉⲓⲕⲉⲟⲩⲁ · ϩⲛⲟⲩϣⲡϩⲙⲟⲧ ϫⲉⲡϫⲟⲉⲓⲥ ⲡⲉⲛⲧⲁϥⲧⲁⲁⲩ ⲡϫⲟⲉⲓⲥ ⲡⲉⲛⲧⲁϥϥⲓⲧⲟⲩ ·
…
227 ⲧϩⲉ ⲉⲧⲉⲣⲁ ⲛⲁϥ ⲙⲡϫⲟⲉⲓⲥ ⲧⲛⲧⲁⲥϣⲱⲡⲉ · ⲉⲣⲉⲡⲣⲁⲛ ⲙⲡϫⲟⲉⲓⲥ ϣⲱⲡⲉ ⲉϥⲥⲙⲁⲙⲁⲁⲧ ϣⲁⲉⲛⲉϩ ϩⲁⲙⲏⲛ ·
…
228 ⲛⲁⲓ ⲇⲉ ⲉⲣⲉⲛⲉⲧⲟⲩⲁⲁⲃ ·
…
229 ϫⲱ ⲙⲙⲟⲟⲩ ⲉⲩⲙⲏⲛ ⲉⲃⲟⲗ · ϩⲛⲟⲩⲥⲟⲡⲥⲡ ⲙⲡⲛⲟⲩⲧⲉ ·
…
230 ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϫⲓⲛⲥⲟⲩⲙⲛⲧⲥⲛⲟⲟⲩⲥ ⲙⲡⲁⲟⲡⲉ ϣⲁⲡⲛⲁⲩ ⲛϫⲡⲯⲓⲧⲉ ⲛⲥⲟⲩⲙⲛⲧⲥⲛⲟⲟⲩⲥ ⲛⲁⲑⲱⲣ · ⲉⲧⲉⲡⲁⲓ ⲡⲉ ⲡⲛⲟϭ ⲛϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
231 ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲛⲉ ⲁⲡⲛⲁⲩ ⲅⲁⲣ ϣⲱⲡⲉ ⲉⲧⲣⲉⲩⲧⲁⲥⲥⲉ ⲛⲧⲉⲡⲣⲟⲥⲫⲟⲣⲁ ·
…
232 ϫⲓⲛⲣⲟⲩϩⲉ ⲛⲥⲟⲩⲙⲛⲧⲟⲩⲉ ·
…
233 ⲧⲁⲣⲟⲩⲥⲙⲛⲧⲥ ⲛⲁⲩ ⲛϣⲱⲣⲡ ⲙⲡϣⲁ ⲕⲁⲧⲁⲡⲉⲩⲉⲑⲟⲥ ·
…
234 ⲁϥϯⲡⲉϥⲟⲩⲟⲓ ⲛϭⲓⲡⲣⲱⲙⲉ ⲉⲧⲟⲩⲁⲁⲃ ·
…
235 ⲁⲩⲱ ⲙⲡⲓⲥⲧⲟⲥ · ⲛⲁⲙⲉ · ⲉⲧⲉϥⲥϩⲓⲙⲉ ·
…
236 ⲡⲉϫⲁϥ ⲛⲁⲥ ϩⲛⲟⲩⲑⲃⲃⲓⲟ · ⲙⲛⲟⲩⲱⲗⲥ ⲛϩⲏⲧ · ϫⲉⲧⲁⲥⲱⲛⲉ ·
…
237 ⲉⲣϩⲙⲟⲟⲥ ⲉⲣⲣⲟⲩ ⲙⲏ ϯⲥⲟⲟⲩⲛ ϫⲉⲁϣ ⲛϣⲁ ⲡⲉⲣⲁⲥⲧⲉ ·
…
238 ⲙⲏ ⲧⲁⲥⲱⲛⲉ ⲁⲣⲣⲡⲱⲃϣ ⲛⲧⲉⲛⲥⲩⲛⲏⲑⲉⲓⲁ ⲉⲛⲁⲛⲟⲩⲥ ·
…
239 ⲁⲡⲣⲡⲙⲉⲉⲩⲉ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲗⲟ ϩⲙⲡⲟⲩϩⲏⲧ ⲙⲡϩⲟⲟⲩ ·
…
240 ⲙⲡⲱⲣⲧⲁⲥⲱⲛⲉ ⲙⲡⲣⲉⲓⲁⲧⲟⲟⲧⲉ · ⲛⲥⲁⲧⲉⲛϩⲉⲗⲡⲓⲥ · ⲟⲩⲛϣ‐ϭⲟⲙ ⲙⲡⲛⲟⲩⲧⲉ ⲉϩⲱⲃ ⲛⲓⲙ ·
…
241 ⲥⲱⲧⲙ ϩⲱⲱϥ ⲛϣⲁϫⲉ ⲛⲥⲟⲗⲥⲗ ⲛⲧⲉⲓⲙⲁⲕⲁⲣⲓⲁ ⲛⲥϩⲓⲙⲉ ⲉⲧⲥⲧⲁⲩⲟ ⲙⲙⲟⲟⲩ ⲉⲡⲉⲥϩⲁⲓ ϩⲛⲟⲩⲉⲡⲓⲥⲧⲏⲙⲏⲓ ⲡⲉϫⲁⲥ ⲛⲁϥ ϫⲉⲕⲁⲗⲱⲥ ⲉⲗⲑⲏⲥ ⲡⲁϫⲟⲉⲓⲥ ⲛⲥⲟⲛ · ⲕⲁⲗⲱⲥ ⲁⲕⲉⲓ ⲛⲁⲓ ⲉϩⲟⲩⲛ · ⲧⲉⲛⲟⲩ · ⲙⲛⲡⲥⲟⲗⲥⲗ ⲛⲧⲉⲛⲙⲛⲧⲣⲙⲙⲁⲟ · ⲉⲧⲉⲡⲣⲁϣⲉ ⲡⲉ ⲛⲧⲉⲛⲯⲩⲭⲏ ϩⲓⲟⲩⲥⲟⲡ · ⲁⲗⲏⲑⲱⲥ ⲱ ⲡⲁⲥⲟⲛ ·
…
242 ϫⲓⲛⲙⲡⲛⲁⲩ ⲛϫⲡⲟⲩⲉⲓⲉ ⲙⲡϩⲟⲟⲩ ϣⲁⲛⲧⲉⲕⲉⲓ ⲛⲁⲓ ⲉϩⲟⲩⲛ ⲧⲉⲛⲟⲩ ·
…
243 ⲙⲡⲉⲟⲩⲡⲩⲅⲏ ⲛⲣⲙⲉⲓⲏ · ⲗⲟ ϩⲓϫⲛⲛⲁⲃⲁⲗ · ⲉⲩⲥⲱⲕ ⲉⲣⲉⲟⲩⲕⲱϩⲧ ⲟⲩⲱⲙ ·
…
244 ⲛⲥⲁⲡⲁⲥⲁ ⲛϩⲟⲩⲛ ⲉⲧⲃⲉⲡⲣⲙⲉⲉⲩⲉ ⲙⲡϣⲁ ⲙⲡⲉⲛⲡⲣⲟⲥⲧⲁⲧⲏⲥ ·
…
245 ⲁⲩⲱ ⲡⲉⲛⲡⲣⲉⲥⲃⲉⲩⲧⲏⲥ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲧⲉⲛⲟⲩ ϭⲉ ⲱ ⲡⲁⲥⲟⲛ · ⲁⲛⲁⲩ ϫⲉⲟⲩ ⲡⲉⲧⲛⲛⲁⲁⲁϥ · ϫⲉⲛⲛⲉⲧⲛⲑⲩⲥⲓⲁ · ϫⲉⲛⲁ · ⲛⲧⲟⲟⲧⲛ · ⲛⲧⲛϯⲟⲥⲉ ⲙⲡⲕⲉⲧ ⲉⲧⲉⲟⲩⲛⲧⲁⲧϥ ·
…
246 ⲉⲡⲉⲓⲇⲏ ⲁⲓⲥⲱⲧⲙ ⲉⲡⲉⲛⲥⲁϩ ·
…
247 ⲡⲁⲩⲗⲟⲥ ⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ · ϫⲉⲡⲉⲛⲧⲁϥⲁⲣⲭⲉⲓ ⲉⲩϩⲱⲃ ⲉⲛⲁⲛⲟⲩϥ ⲙⲁⲣⲉϥϫⲟⲕϥ ⲉⲃⲟⲗ ϣⲁⲡⲉϩⲟⲟⲩ ⲛⲧⲡⲁⲣⲟⲩⲥⲓⲁ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
248 ⲉⲓⲥϩⲏⲏⲧⲉ ⲅⲁⲣ ⲙⲁⲣⲛϫⲱⲕ ⲉⲃⲟⲗ ⲙⲡⲉⲛⲁⲓⲧⲏⲙⲁ ·
…
249 ⲡⲉϫⲁϥ ⲛⲁⲥ ⲛϭⲓⲡⲉⲥϩⲁⲓ · ϫⲉⲟⲩ ⲡⲉⲧϣⲟⲟⲡ ⲛⲁⲛ ⲧⲁⲥⲱⲛⲉ ·
…
250 ϫⲉⲕⲁⲥ ⲉⲛⲛⲁⲉⲓⲙⲉ ϫⲉϥⲛⲁⲣⲱϣⲉ ⲉⲧⲉⲛⲭⲣⲉⲓⲁ · ϫⲓⲛⲙⲙⲟⲛ ·
…
251 ⲡⲉϫⲁⲥ ⲛⲁϥ ϫⲉⲡⲁⲥⲟⲛ · ⲟⲩⲛϩⲉⲛⲕⲟⲩⲓ ⲛⲕⲗⲁⲥⲙⲁ ϣⲟⲟϫⲡ ⲛⲁⲛ · ⲛⲁⲡϣⲓ ⲛⲕⲱ ϩⲁⲣⲱⲟⲩ · ⲛⲛⲉⲥⲛⲏⲩ ⲛⲥⲉⲟⲩⲱⲙ ·
…
252 ⲁⲩⲱ ⲟⲩⲕⲟⲩⲓ ⲛⲛⲉϩ · ϩⲙⲡⲗⲁⲕⲱⲛ ϣⲁϥⲣⲱϣⲉ ⲉⲣⲟⲛ ⲟⲛ · ⲉⲧⲥⲩⲛⲁⲝⲓⲥ ⲙⲛⲧⲁⲡⲉ ⲛⲛⲣⲱⲙⲉ · ⲁⲗⲗⲁ ⲙⲛⲟⲉⲓⲕ ϣⲟⲟⲡ ⲟⲩⲇⲉ ⲥⲟⲩⲟ ·
…
253 ⲡⲉϫⲁϥ ϩⲱⲱϥ ⲛϭⲓⲡⲉⲥϩⲁⲓ ϫⲉϩⲛⲟⲩⲙⲉ ⲧⲁⲥⲱⲛⲉ ·
…
254 ⲉϣϫⲉ ⲛⲁⲓ ϣⲟⲟⲡ ⲁⲛ ⲉⲓⲉ ⲙⲛⲟⲩⲉⲥⲟⲟⲩ ⲉⲛⲧⲁⲛ ⲉⲕⲟⲛⲥϥ ·
…
255 ⲁⲗⲗⲁ ⲡⲟⲩⲱϣ ⲙⲡϫⲟⲉⲓⲥ ⲙⲁⲣϥϣⲱⲡⲉ ·
…
256 ⲙⲉⲣⲉⲡⲛⲟⲩⲧⲉ ⲅⲁⲣ ϫⲛⲟⲛ ⲉⲗⲁⲁⲩ ⲡⲁⲣⲁⲧⲉⲛϭⲟⲙ ·
…
257 ⲁⲩⲱ ⲛⲁⲛⲟⲩⲥ ⲉⲧⲣⲉⲛϯⲛⲟⲩⲕⲟⲩⲓ ⲛϩⲟⲩⲟ ⲉⲣⲟⲥ · ⲉⲛⲧⲛⲧⲙϯϩⲱⲗⲟⲥ ⲉⲡⲧⲏⲣϥ ·
…
258 ⲡⲗⲏⲛ ⲡⲉⲛⲧⲁϥⲉⲓ ⲉⲡⲁϩⲏⲧ ϯⲛⲁⲁϥ ·
…
259 ⲁⲩⲱ ϯⲛⲁϫⲟⲟϥ ⲉⲣⲟ ·
…
260 ⲉⲓⲥⲟⲩϣⲧⲏⲛ · ⲛⲥⲩⲛⲁⲅⲉ ⲁⲥϣⲱϫⲡ ⲛⲁⲛ ⲉⲡⲟⲩⲟⲩⲁ ·
…
261 ϯⲛⲁⲧⲱⲟⲩⲛ ⲛⲧⲁϥⲓⲧⲱⲓ ⲛϣⲟⲣⲡ · ⲛⲧⲁⲧⲁⲁⲥ ϩⲁⲡⲉⲛⲥⲟⲩⲟ ⲛⲧⲉⲡⲣⲟⲥⲫⲟⲣⲁ ·
…
262 ⲁⲩⲱ ⲙⲟⲅⲓⲥ ⲛⲧⲉⲥϯⲙⲏⲣⲱϣⲉ ⲉⲡⲗⲁⲟⲥ ·
…
263 ⲉⲃⲟⲗ ϫⲉⲡⲉⲥⲟⲩⲟϫ ⲁϥⲧⲱⲛⲟⲩ · ⲉⲛϣⲁⲛⲡⲱϩ ϩⲱⲱϥ · ⲉⲧⲱ ·
…
264 ϯⲛⲁⲃⲱⲕ ⲛⲧⲁⲛⲁⲩ ϫⲉⲡⲛⲟⲩⲧⲉ ⲛⲁⲧⲱϣ ⲛⲁⲛ ⲛⲟⲩⲉⲥⲟⲟⲩ · ⲛⲧⲁⲧⲁⲁⲥ ϩⲁⲣⲟϥ · ⲛⲧⲛⲕⲟⲛⲥϥ ⲉⲡϣⲁ ·
…
265 ⲁⲩⲱ ⲉⲛϣⲁⲛⲣⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲛⲣⲁⲥⲧⲉ ⲕⲁⲗⲱⲥ · ϫⲉⲡⲁⲓ ⲡⲉ ⲡⲉϥⲛⲟϭ ⲛϣⲁ ·
…
266 ⲉⲛϣⲁⲛϭⲓⲛⲉ ⲟⲛ ⲧⲛⲛⲁⲟⲩⲉⲙ · ⲛⲧⲛⲧⲙϭⲓⲛⲉ ⲡⲧⲱϣ ⲙⲡϫⲟⲉⲓⲥ ⲡⲉ ·
…
267 ⲡⲉϫⲁⲥ ⲛϭⲓⲧⲉⲥϩⲓⲙⲉ · ⲛⲥⲁⲃⲏ ·
…
268 ⲁⲩⲱ ⲛⲣⲉϥϯⲥⲃⲱ · ϫⲉⲡⲁϫⲟⲉⲓⲥ ⲛⲥⲟⲛ · ⲟⲩⲙⲟⲛⲟⲛ ϫⲉⲧⲁϣⲧⲏⲛ · ⲙⲛⲧⲱⲕ ⲙⲙⲁⲧⲉ ·
…
269 ⲁⲗⲗⲁ ϯⲛⲁϯ ⲛⲧⲁⲯⲩⲭⲏ ϩⲁⲧⲉⲑⲩⲥⲓⲁ · ⲙⲡⲁϫⲟⲉⲓⲥ ⲡⲁⲣⲭⲁⲅⲅⲉⲗⲟⲥ ·
…
270 ⲡⲉϫⲁϥ ⲛⲁⲥ ⲛϭⲓⲡⲉⲥϩⲁⲓ · ϫⲉⲕⲁⲗⲱⲥ ⲧⲁⲥⲱⲛⲉ · ⲟⲩⲡⲣⲟϩⲁⲓⲣⲉⲥⲓⲥ · ⲉⲛⲁⲛⲟⲩⲥ ·
…
271 ⲧⲛⲧⲁⲣⲟⲩⲟⲛϩⲥ ⲉⲃⲟⲗ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…