1 ⲙⲛⲡⲉⲧϭⲟⲟⲙⲉ ·
…
2 ⲉⲓⲥϩⲏⲏⲧⲉ ⲁⲓⲧⲁⲙⲟⲕ ⲱ ⲡⲉϣⲃⲏⲣ · ϫⲉⲡⲇⲓⲁⲃⲟⲗⲟⲥ ⲥⲟⲛϩ ·
…
3 ⲁⲗⲗⲁ ⲛⲇⲁⲓⲙⲱⲛ ϫⲱⲕ ⲉⲃⲟⲗ ⲛⲛϥⲟⲩⲱϣ · ⲕⲁⲧⲁⲡⲉϥⲕⲱϩ ⲙⲛⲡⲉϥⲙⲟⲥⲧⲉ ⲉϩⲟⲩⲛ ⲉⲣⲟⲛ ⁖ ⲁⲗⲗⲁ ⲙⲁⲣⲛϩⲱ ⲉⲣⲟⲛ ⲛϣⲁϫⲉ ⲉⲛⲙⲛⲧⲥⲁⲛⲕⲟⲧⲥ ⲙⲡⲉⲧⲙⲙⲁⲩ ⲛⲧⲛⲕⲧⲟⲛ ⲉϩⲣⲁⲓ ⲉϫⲙⲡⲛⲓⲕⲏⲧⲏⲥ ·
…
4 ⲁⲩⲱ ⲡⲉⲥⲧⲉⲫⲁⲛⲓⲧⲏⲥ ·
…
5 ⲡⲛⲟϭ ⲁⲩⲱ ⲡⲁⲣⲭⲏⲡⲟⲗⲩⲙⲁⲣⲭⲏⲥ ⲥⲧⲣⲁⲧⲏⲅⲟⲥ ⲛⲧϭⲟⲙ ⲛⲙⲡⲏⲩⲉ ·
…
6 ⲡⲁⲓ ⲛⲧⲁϥⲕⲱ ϩⲁⲣⲱⲛ ⲙⲡⲏⲩⲉ ⲛⲧⲉⲧⲣⲁⲡⲉⲍⲁ ⲙⲡⲉϥⲛⲟϭ ⲛϣⲁ ·
…
7 ⲡⲁⲓ ⲉⲧⲡⲟⲣϣ ⲛⲁⲛ ⲉⲃⲟⲗ ⲙⲡϩⲟⲟⲩ ϩⲛⲙⲡⲏⲩⲉ · ⲙⲛⲡ · ⲕⲁⲧⲁⲡⲟⲩϩⲉⲥⲁϩⲛⲉ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲟⲩⲛⲟⲩⲧⲉ ⲅⲁⲣ ⲛⲟⲩⲱⲧ ⲡⲉ · ⲟⲩϫⲟⲉⲓⲥ ⲛⲟⲩⲱⲧ ⲡⲉ · ⲟⲩⲙⲛⲧⲣⲣⲟ ⲛⲟⲩⲱⲧ ⲧⲉ ⲉⲥⲙⲏⲛ ⲉⲃⲟⲗ · ⲉⲥϣⲟⲟⲡ ⲛⲧⲩⲡⲟⲥ ⲛⲧⲉⲧⲣⲓⲁⲥ ⲉⲧⲟⲩⲁⲁⲃ · ⲟⲩⲟⲩⲥⲓⲁ ⲛⲟⲩⲱⲧ ⲧⲉ · ⲙⲛⲡⲉⲓⲱⲧ · ⲙⲛⲡϣⲏⲣⲉ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲛⲁⲧⲡⲱⲣϫ · ⲛⲁⲧϣⲓⲃⲉ · ⲛⲁⲧⲡⲱϣ · ⲛⲁⲧϭⲛⲣⲁⲧⲥ · ⲛⲁⲧϩⲉϩϩⲱⲧⲥ · ⲛⲁⲧⲟⲣⲃⲥ ⲉϩⲟⲩⲛ ·
…
8 ⲁⲗⲗⲁ ⲛ…. ⲉϩⲟⲩⲛ ϩⲁⲧⲉϥⲉⲝⲟⲩⲥⲓⲁ …. ⲛⲛⲧⲉⲧⲛⲙⲡⲏⲩⲉ ⲙⲛⲛⲉⲧϩⲓϫⲙⲡ ⁖ ⲁⲛⲟⲛ ⲇⲉ ⲱ ⲛⲁⲙⲉⲣⲁⲁⲧⲉ ·
…
9 ⲛϩⲟⲥⲟⲛ ⲱ ⲛⲁⲙⲉⲣⲁⲧⲉ ⲁⲛⲉⲓⲙⲉ ϫⲉⲟⲩⲛⲟϭ ⲡⲉ ⲡⲣⲁϣⲉ · ⲙⲡⲉⲓⲛⲟϭ ⲛϣⲁ · ⲉⲧⲡⲱⲣϣ ⲛⲁⲛ ⲉⲃⲟⲗ ⲙⲡϩⲟⲟⲩ ·
…
10 ⲙⲁⲣⲛⲣϣⲁ ϩⲱⲱⲛ ⲙⲡⲉⲧⲉⲣⲉⲡⲛⲟⲩⲧⲉ ⲙⲛⲛⲉϥⲁⲅⲅⲉⲗⲟⲥ · ⲣϣⲁ ⲛⲁϥ · ⲙⲁⲣⲛⲥⲧⲟⲗⲓⲍⲉ ⲙⲙⲟⲓ ϩⲓϩⲟⲩⲛ ·
…
11 ⲁⲩⲱ ϩⲓⲃⲟⲗ · ⲉⲛⲛⲁⲃⲱⲕ ⲉⲡⲉⲓⲛⲟϭ ⲛⲁⲣⲓⲥⲧⲟⲛ ⲙⲡϩⲟⲟⲩ · ⲛϭⲓⲡⲛⲟϭ ⲙⲡⲟⲗⲩⲙⲓⲥⲧⲏⲥ · ⲙⲡⲣⲣⲟ ⲛⲣⲣⲱⲟⲩ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
12 ⲁⲗⲗⲁ ⲡⲉϫⲉⲧⲛ · ϫⲉⲉϣϫⲉ ⲟⲩⲁⲣⲓⲥⲧⲟⲛ ⲡⲉ ⲛⲃⲁⲥⲓⲗⲓⲕⲟⲛ ·
…
13 ⲡⲉⲧⲉϣϣⲉ ⲡⲉ ⲉⲣⲟⲛ ⲉⲕⲁⲧⲉⲭⲉⲓ ϣⲁⲛⲧⲟⲩⲧⲱϩⲙ ⲛϣⲟⲣⲡ ⲛⲛⲉⲧⲟ ⲛⲛⲟϭ ϩⲛⲧⲁⲩⲗⲏ · ⲙⲡⲣⲣⲟ ⲙⲛⲡⲉϥⲁⲣⲭⲓⲥⲧⲣⲁⲧⲏⲅⲟⲥ ⲙⲓⲭⲁⲏⲗ ·
…
14 ⲙⲛⲛⲥⲱⲥ ϩⲱⲱⲛ ⲛⲧⲛⲟⲩⲁϩⲛ ⲛⲥⲱⲟⲩ · ⲕⲁⲗⲱⲥ ⲁⲧⲉⲧⲛϣⲓⲛⲉ ⲱ ⲛⲁⲙⲉⲣⲁⲧⲉ ·
…
15 ϣⲁⲣⲉⲡⲉⲑⲃⲃⲓⲟ ⲅⲁⲣ ϫⲓⲥⲉ ·
…
16 ⲁⲩⲱ ϣⲁϥⲥⲟⲟⲩⲧⲛ ⁖ ⲁⲗⲗⲁ ⲁⲙⲏⲓⲧⲛ ⲟⲩⲉϩⲧⲏⲩⲧⲛ ⲛⲥⲱⲓ ϫⲉⲉⲓⲥ ⲛⲛⲟϭ ⲁⲩⲟⲩⲱ ⲉⲩⲃⲏⲕ ⲉⲡⲁⲣⲓⲥⲧⲟⲛ ⲙⲛⲙⲓⲭⲁⲏⲗ ·
…
17 ⲁⲩⲱ ⲛⲁⲓ ⲁⲩⲛⲟϫⲟⲩ ·
…
18 ⲛⲁⲓ ⲛⲉ ⲛⲛⲟϭ ⲛⲧⲁⲩⲣ ϣⲟⲣⲡ ·
…
19 ⲥⲱⲧⲙ ϩⲛⲟⲩϯϩⲧⲏϥ ·
…
20 ⲁⲇⲁⲙ ⲡⲉ ⲙⲛⲁⲃⲉⲗ ⲙⲛⲥⲏⲑ ⲛⲉϥϣⲏⲣⲉ ·
…
21 ⲉⲛⲱⲭ ⲙⲛⲙⲁⲑⲟⲩⲥⲁⲗⲁ · ⲙⲛⲛⲱϩⲉ · ⲁⲃⲣⲁϩⲁⲙ · ⲙⲛⲓⲥⲁⲁⲕ · ⲙⲛⲓⲁⲕⲱⲃ ·
…
22 ⲙⲛⲓⲱⲥⲏⲫ ⲡⲉϥϣⲏⲣⲉ ⁘ ⲙⲱⲩⲥⲏⲥ ⲡⲉ ⲙⲛⲁⲁⲣⲱⲛ ⲙⲛⲓⲥⲟⲩ ⲛⲛⲁⲩⲏ ⁖ ⲅⲉⲇⲉⲱⲛ ⲡⲉ ⲙⲛⲃⲁⲣⲁⲕ · ⲙⲛⲥⲁⲙⲯⲱⲛ · ⲙⲛⲓⲉⲫⲑⲁⲉ ⁖ ⲇⲁⲩⲉⲓⲇ ⲡⲉ ⲙⲛⲥⲟⲗⲟⲙⲱⲛ ·
…
23 ⲙⲛⲓⲉⲍⲉⲕⲓⲁⲥ ⲡⲣⲣⲟ ⲛⲇⲓⲕⲁⲓⲟⲥ ·
…
24 ⲏⲥⲁⲓⲁⲥ ⲡⲉ ⲙⲛⲓⲉⲣⲉⲙⲓⲁⲥ ⲙⲛⲓⲉⲍⲉⲕⲓⲏⲗ · ⲙⲛⲡϣⲟⲙⲛⲧ ⲛϩⲁⲅⲓⲟⲥ ⲙⲛϩⲏⲗⲓⲁⲥ · ⲙⲛⲇⲁⲛⲓⲏⲗ ·
…
25 ⲛⲉⲓⲛⲟϭ ⲙⲡⲣⲟⲫⲏⲧⲏⲥ ⁖ ⲍⲁⲭⲁⲣⲓⲁⲥ ⲡⲟⲩⲏⲏⲃ ⲡⲉ ⲙⲛⲓⲱϩⲁⲛⲛⲏⲥ ⲡⲉϥϣⲏⲣⲉ ⲙⲛⲡⲙⲛⲧⲥⲛⲟⲟⲩⲥ ⲛⲁⲡⲟⲥⲧⲟⲗⲟⲥ · ⲙⲛⲥⲧⲉⲫⲁⲛⲟⲥ ⲡⲁⲣⲭⲏⲇⲓⲁⲕⲟⲛⲟⲥ · ⲙⲛⲡϩⲗⲗⲟ ⲛϩⲁⲅⲓⲟⲥ ⲁⲩⲱ ⲛⲟⲩⲏⲏⲃ ⲥⲩⲙⲉⲱⲛ · ⲙⲛⲙⲙⲁⲣⲧⲩⲣⲟⲥ
…
26 ⲁⲩⲱ ⲛⲇⲓⲕⲁⲓⲟⲥ ⲧⲏⲣⲟⲩ ⁖
…
27 ⲁϩⲣⲟⲓ ⲉⲓϣⲁϫⲉ ⲉⲛⲁⲡ ⲁⲗⲗⲁ ·
…
28 ϥⲙⲙⲁⲩ ⲛϭⲓⲡϫⲟⲉⲓⲥ ⲙⲡⲉⲟⲟⲩ ⲙⲛⲛⲧⲁⲅⲙⲁ ⲧⲏⲣⲟⲩ ⲛⲙⲡⲏⲩⲉ ⲛⲁⲅⲅⲉⲗⲟⲥ ⲙⲛⲛⲁⲣⲭⲁⲅⲅⲉⲗⲟⲥ ⲛⲉⲭⲉⲓⲣⲟⲩⲃⲉⲓⲛ ⲙⲛⲛⲥⲉⲣⲁⲫⲉⲓⲛ · ⲛⲁⲣⲭⲏ ⲙⲛⲛⲉⲝⲟⲩⲥⲓⲁ ·
…
29 ⲛⲉⲑⲣⲟⲛⲟⲥ ⲙⲛⲙⲙⲛⲧϫⲟⲉⲓⲥ ·
…
30 ⲙⲛⲛϭⲟⲙ ⲥⲉ ⲙⲙⲁⲩ ⲛϭⲓⲛⲁⲓ ⲧⲏⲣⲟⲩ ⲉⲩϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
31 ϣⲁⲛⲛⲟϭ ⲛⲣⲱⲙⲉ ⲉⲧⲟⲩⲁⲁⲃ ⲛⲣⲙⲛ ⲛⲙⲙⲁⲛ ⲛⲧⲁϫⲛⲟⲟⲩ ⲉⲧⲃⲉⲡⲉⲓⲛⲟϭ ⲛϣⲁ ⲉⲧⲡⲟⲣϣ ⲛⲁⲛ ⲉⲃⲟⲗ ⲙⲡϩⲟⲟⲩ ⲉϫⲛⲧⲟⲓⲕⲟⲩⲙⲉⲛⲏ ⲧⲏⲣⲥ ·
…
32 ⲉⲓⲙⲉ ϫⲉⲕⲁⲥ ⲉⲓⲛⲁⲣⲁϣⲉ ϩⲱ ⲙⲛⲛⲉⲧⲣⲁϣⲉ ⲕⲁⲧⲁⲡϣⲁϫⲉ ⲙⲡⲁⲩⲗⲟⲥ ⲡⲁⲡⲟⲥⲧⲟⲗⲟⲥ ⁖ ⲡⲗⲏⲛ ϯⲛⲁⲁⲣⲭⲉⲥⲑⲁⲓ ⲛϣⲟⲣⲡ ⲉϫⲙⲡⲉⲓⲱⲧ ⲛⲧⲙⲛⲧⲣⲱⲙⲉ ⲧⲏⲣⲥ ·
…
33 ⲡⲉⲛⲧⲁⲡⲛⲟⲩⲧⲉ ⲧⲁⲙⲓⲟϥ ⲕⲁⲧⲁⲡⲉϥⲉⲓⲛⲉ ⲙⲛⲧⲉϥϩⲓⲕⲱⲛ · ⲡⲉⲛⲉⲓⲱⲧ ⲁⲇⲁⲙ · ⲛⲧⲟϥ ⲅⲁⲣ ⲡⲉ ϯⲛⲁⲩ ⲉⲣⲟϥ · ⲉϥⲟ ⲙⲡⲣⲟⲧⲟⲥ ϩⲙⲡⲉⲓϣⲁ ⲙⲡϩⲟⲟⲩ ϩⲙⲡⲙⲁ ⲛⲛⲟϫϥ ϩⲛⲛⲣⲙⲛ ·
…
34 ⲁⲣⲁ ⲉⲓⲛⲁⲧⲟⲗⲙⲁ ⲛⲧⲁϫⲟⲟⲥ ⲟⲩ ⲛⲁϥ · ϯⲣϩⲟⲧⲉ ⲁⲩⲱ ϯⲥⲧⲱⲧ ·
…
35 ⲉⲓⲥϩⲏⲏⲧⲉ ⲟⲛ ⲧⲉⲛⲟⲩ ϯⲛⲁⲩ ⲉⲛⲉⲧϩⲙⲡⲉⲓⲁⲣⲓⲥⲧⲟⲛ ⲙⲡϩⲟⲟⲩ ⲛⲙⲙⲁϥ ⲧⲏⲣⲟⲩ ⲉⲩϯⲙⲁ ⲙⲙⲟϥ · ⲁⲛⲟⲕ ϯⲛⲁⲟⲡⲧ ⲛⲙⲙⲁⲩ ϩⲱ ·
…
36 ⲕⲁⲛ ⲉϣϫⲉ ⲁⲛⲅⲟⲩⲣⲉϥⲣⲛⲟⲃⲉ ⲟⲛ ϯⲛⲁϯ ⲛⲁϥ ⲙⲡⲣⲁϣⲉ ⲙⲡⲁⲗⲁⲥ ⲛⲧⲉⲓϩⲉ ϫⲉⲭⲁⲓⲣⲉ ⲡⲁⲉⲓⲱⲧ ⲉⲧⲟⲩⲁⲁⲃ ⲕⲩⲣⲓⲟⲥ ⁖ ⲭⲁⲓⲣⲉ ⲡⲉⲓⲱⲧ ⲛⲛⲁⲉⲓⲟⲧⲉ ⲙⲛⲧⲙⲛⲧⲣⲱⲙⲉ ⲧⲏⲣⲥ ⲛⲉⲛⲧⲁⲩϣⲱⲡⲉ ⲙⲛⲛⲉⲧⲛⲁϣⲱⲡⲉ ⲟⲛ ·
…
37 ⲉⲓϣⲁⲛϯ ⲛⲁϥ ⲙⲡⲉⲓϣⲟⲙⲛⲧ ⲛⲣⲁϣⲉ ⲉⲧⲧⲟⲟⲙⲉ ⲉⲡⲉϥⲉⲟⲟⲩ ·
…
38 ⲡⲁⲛⲧⲱⲥ ϥⲛⲁⲱϣ ⲉⲃⲟⲗ ϩⲱⲱϥ ⲛⲧϩⲉ ⲛⲟⲩⲉⲓⲱⲧ ⲙⲡⲉϥϣⲏⲣⲉ ·
…
39 ⲛϥϫⲟⲟⲥ ϫⲉⲡⲁϣⲏⲣⲉ ⲁⲙⲟⲩ ϩⲱⲱⲕ ⲟⲛ ⲛⲅⲣⲁϣⲉ ⲛⲙⲙⲁⲓ ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ · ϩⲙⲡⲧⲣⲁϭⲛⲡⲁⲣϩⲏⲥⲓⲁ · ⲛⲛⲁϩⲣⲁϥ ·
…
40 ϯⲛⲁϫⲛⲟⲩϥ · ϫⲉⲡⲁϫⲟⲉⲓⲥ ⲛⲉⲓⲱⲧ ⲛⲧⲟⲕ ⲁⲛ ⲡⲉⲛⲧⲁⲡⲛⲟⲩⲧⲉ ⲡⲗⲁⲥⲥⲉ ⲙⲙⲟⲕ ϩⲛⲛⲉϥϭⲓϫ ⲙⲙⲓⲛ ⲙⲙⲟϥ ⲁϥⲙⲁϩⲕ ⲙⲡⲉⲟⲟⲩ ⲙⲡⲉϥⲉⲓⲛⲉ ⲙⲛⲧⲉϥϩⲓⲕⲱⲛ ·
…
41 ⲙⲏ ⲛⲧⲟⲕ ⲁⲛ ⲡⲉⲛⲧⲁⲡⲛⲟⲩⲧⲉ ⲛⲛⲉϥⲧⲁⲅⲙⲁ ⲧⲏⲣⲟⲩ ⲉⲧϩⲛⲙⲡⲏⲩⲉ · ϫⲉⲁⲙⲏⲓⲧⲛ ⲛⲧⲉⲧⲛⲟⲩⲱϣⲧ ⲙⲡϩⲱⲃ ⲛⲛⲁϭⲓϫ ⲡⲁⲉⲓⲛⲉ ⲙⲛⲧⲁϩⲓⲕⲱⲛ ⁖ ⲁϥⲟⲩⲱϣⲃ ⲛϭⲓⲁⲇⲁⲙ · ϫⲉⲁϩⲉ · ⲁⲛⲟⲕ ⲡⲁϣⲏⲣⲉ ·
…
42 ⲡⲉⲛⲧⲁⲛⲁⲓ ⲧⲏⲣⲟⲩ ϣⲱⲡⲉ ⲙⲙⲟϥ ϯⲛⲁⲟⲩⲱϣⲃ ⲛⲁϥ ⲟⲛ ·
…
43 ⲧⲁϫⲟⲟⲥ ⲛⲁϥ ϫⲉⲡⲁϫⲟⲉⲓⲥ ⲛⲉⲓⲱⲧ ⲙⲏ ⲙⲡⲉⲛⲁⲓ ⲧⲏⲣⲟⲩ ϣⲱⲡⲉ · ⲛⲧⲉⲛⲁⲅⲅⲉⲗⲟⲥ ⲧⲏⲣⲟⲩ ⲡⲣⲟⲥⲕⲩⲛⲏ ⲛⲁⲕ · ϣⲁⲧⲙⲡⲉⲟⲩⲁ ⲛⲟⲩⲱⲧ · ⲙⲛⲧϥⲧⲁⲝⲓⲥ ·
…
44 ⲁϥⲟⲩⲱϣⲃ ϫⲉⲁϩⲉ ⲁⲡⲁϫⲟⲉⲓⲥ ⲧⲣⲉⲛⲕⲁ ⲛⲓⲙ ϩⲩⲡⲟⲧⲁⲥⲥⲉ ⲛⲁⲓ ϩⲁⲧϩⲏ ⲣⲱ ⲉⲧⲣⲉϥⲕⲁⲁⲧ ϩⲙⲡⲧⲣⲉϥⲕⲁⲁⲧ ϩⲙⲡⲡⲁⲣⲁⲇⲓⲥⲟⲥ ⁖ ϯⲛⲁⲧⲟⲗⲙⲁ ⲛⲧⲁϫⲟⲟⲥ ⲛⲁϥ ϫⲉⲁⲩⲱ ⲁϩⲣⲟⲕ ⲙⲛⲡⲉⲓϣⲁ ⲙⲡϩⲟⲟⲩ · ⲉⲙⲛⲁⲅⲅⲉⲗⲟⲥ ϫⲟⲥⲉ ⲛϩⲟⲩⲟ ⲉⲣⲟⲕ · ⲛⲧⲟⲕ ⲡⲉ ⲡⲉⲓⲛⲉ ⲁⲩⲱ ⲧϩⲉⲓⲕⲱⲛ ⲧⲏⲣⲥ ⲙⲡⲛⲟⲩⲧⲉⲁⲗⲗⲁ
…
45 ⲡⲉϫⲁϥ · ⲛϭⲓⲁⲇⲁⲙ · ϫⲉⲥⲱⲧⲙ ⲉⲣⲟⲓ ⲱ ⲡⲁϣⲏⲣⲉ
…
46 ⲁⲩⲱ ⲁⲛⲟⲕ ϯⲛⲁⲧⲁⲙⲟⲕ ⲉⲡⲧⲁⲉⲓⲟ ⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ·
…
47 ⲉⲡⲉⲓⲇⲏ ϯⲛⲟⲉⲓ ⲛϩⲟⲩⲟ ⲉⲣⲟⲕ ⲁⲩⲱ ϯ ⲙⲙⲁⲩ ⲉⲣⲉⲛⲁⲓ ⲛⲁϣⲱⲡⲉ ⁖ ⲙⲡⲉⲟⲩⲟⲉⲓϣ ⲟⲩⲛ ⲛⲧⲁⲡⲁϫⲟⲉⲓⲥ ⲁⲩⲱ ⲡⲁⲛⲟⲩⲧⲉ ·
…
48 ⲁⲩⲱ ⲡⲁⲇⲏⲙⲓⲟⲩⲣⲅⲟⲥ ⲧⲁⲙⲓⲟⲓ · ⲕⲁⲧⲁⲡⲉϥⲉⲓⲛⲉ ⲙⲛⲧⲉϥϩⲓⲕⲱⲛ ·
…
49 ⲁϥⲕⲟⲥⲙⲉⲓ ⲙⲙⲟⲓ ⲕⲁⲗⲱⲥ ·
…
50 ⲁϥⲛⲓϥⲉ ⲉϩⲟⲩⲛ ϩⲙⲡⲁϩⲟ ⲛⲟⲩⲡⲛⲟⲏ ⲛⲱⲛϩ ·
…
51 ⲁϥⲑⲙⲥⲟⲓ ⲉϫⲛⲟⲩⲑⲣⲟⲛⲟⲥ ⲉϥϩⲁⲉⲟⲟⲩ ⲙⲡⲉϥⲙⲧⲟ ⲉⲃⲟⲗ ·
…
52 ⲁϥⲟⲩⲉϩⲥⲁϩⲛⲉ ⲛⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ϩⲛⲧⲉϥⲉⲝⲟⲩⲥⲓⲁ ⲙⲙⲉ ⲉϥϫⲱ ⲙⲙⲟⲥ ϫⲉⲁⲙⲏⲓⲧⲛ ⲛⲧⲉⲧⲛⲟⲩⲱϣⲧ ⲙⲡϩⲱⲃ ⲛⲛⲁϭⲓϫ ⲡⲁⲉⲓⲛⲉ ⲙⲛⲧⲁϩⲓⲕⲱⲛ ·
…
53 ⲛϥⲙⲙⲁⲩ ⲇⲉ … ⲉⲧⲙⲙⲁⲩ · ⲉϥⲟ ⲙⲡⲣⲟⲧⲟⲡⲗⲁⲥⲙⲁ ·
…
54 ⲉⲧⲉⲥⲁⲧⲁⲛⲁⲏⲗ ⲡⲉ ⲡⲁⲓ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡⲇⲓⲁⲃⲟⲗⲟⲥ · ⲉϥⲟ ⲛⲁⲣⲭⲁⲅⲅⲉⲗⲟⲥ ϩⲱⲱϥ ⁘ ⲗⲟⲓⲡⲟⲛ ⲛⲧⲉⲣⲉⲡⲟⲩⲉϩⲥⲁϩⲛⲉ ⲉⲓ ⲉⲃⲟⲗ ϩⲛⲣⲱϥ ⲙⲡⲛⲟⲩⲧⲉ ⲁϥⲉⲓ ⲛϭⲓⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲟⲩⲁ ⲉⲃⲟⲗ ϩⲙⲡⲥⲁϣϥ ⲛⲁⲣⲭⲁⲅⲅⲉⲗⲟⲥ ⲙⲛⲧϥⲧⲁⲝⲓⲥ ⲁϥⲉⲓ ⲁϥⲟⲩⲱϣⲧ ⲙⲡⲛⲟⲩⲧⲉ ⲛϣⲟⲣⲡ ⲡⲉⲛⲣⲣⲟ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
55 ⲙⲛⲛⲥⲱⲥ ⲁϥⲟⲩⲱϣⲧ ⲛⲁⲓ ⲁⲩⲟⲩⲱϣⲃ ⲉⲩϫⲱ ⲙⲙⲟⲥ ϫⲉⲧⲛⲟⲩⲱϣⲧ ⲛⲁⲕ ⲡⲛⲟⲩⲧⲉ ⲡⲇⲏⲙⲓⲟⲩⲣⲅⲟⲥ ⲙⲡⲧⲏⲣϥ
…
56 ⲁⲩⲱ ⲧⲛⲟⲩⲱϣⲧ ⲙⲡϩⲱⲃ ⲛⲛⲉⲕϭⲓϫ · ⲡⲉⲕⲉⲓⲛⲉ ⲙⲛⲧⲉⲕϩⲓⲕⲱⲛ ⲧⲏⲣⲥ ⁖ ⲙⲛⲛⲥⲱϥ ⲁϥⲉⲓ ϩⲱⲱϥ ⲛϭⲓⲅⲁⲃⲣⲓⲏⲗ · ⲡⲁⲣⲭⲁⲅⲅⲉⲗⲟⲥ ⲙⲛⲧⲉϥⲧⲁⲝⲓⲥ ·
…
57 ⲁⲩⲡⲣⲟⲥⲕⲩⲛⲏ ϩⲱⲟⲩ ⲛⲧϩⲉ ⲙⲙⲓⲭⲁⲏⲗ ·
…
58 ϩⲱⲙⲟⲓⲟⲥ ⲛⲧⲁⲅⲙⲁ ⲧⲏⲣⲟⲩ ⲛⲙⲡⲏⲩⲉ · ⲙⲛⲛⲉⲩⲧⲁⲝⲓⲥ ⲡⲉⲩⲟⲣⲇⲓⲛⲟⲛ ·
…
59 ⲉⲡϩⲁⲉ ⲇⲉ ⲡⲉϫⲁϥ · ⲛϭⲓⲡⲇⲉⲥⲡⲟⲧⲏⲥ · ⲙⲙⲁⲥⲧⲏⲙⲁ ⲉⲧⲉⲡⲉϥⲃⲱⲗ · ⲡⲉ ⲡⲙⲟⲥⲧⲉ · ϫⲉⲁⲙⲟⲩ ϩⲱⲱⲕ ⲛⲅⲟⲩⲱϣⲧ ⲙⲡϩⲱⲃ ⲛⲛⲁϭⲓϫ ·
…
60 ⲛⲧⲁⲓⲧⲁⲙⲓⲟϥ ⲕⲁⲧⲁⲡⲁⲉⲓⲛⲉ ⲙⲛⲧⲁϩⲓⲕⲱⲛ ⲛⲧϩⲉ ⲛⲛⲉⲕϣⲃⲏⲣ · ⲗⲉⲓⲧⲟⲩⲣⲅⲟⲥ ⲧⲏⲣⲟⲩ ·
…
61 ⲁϥⲟⲩⲱϣⲃ ϩⲛⲟⲩ ⲛϣⲟⲧ · ⲛϭⲓⲥⲁⲧⲁⲛⲁⲏⲗ · ϫⲉⲉ… ⲙⲛⲗⲁⲁⲩ · ⲛⲧⲁⲝⲓⲥ ·
…
62 ϩⲁⲣⲁⲧⲕ ⲉϥϫⲟⲥⲉ ⲉⲣⲟⲓ ⲛⲥⲁⲃⲗⲗⲁⲕ ⲙⲙⲁⲧⲉ ·
…
63 ⲁⲩⲱ ⲙⲛⲛⲥⲱⲥ · ⲁⲛⲟⲕ ⲡⲉ ϩⲙⲡⲉⲟⲟⲩ ·
…
64 ⲁⲩⲱ ⲁⲛⲟⲕ ⲟⲩⲡⲣⲟⲧⲟⲡⲗⲁⲥⲙⲁ · ⲉⲓⲉⲉⲓⲛⲁⲉⲓ ⲛⲧⲁⲟⲩⲱϣⲧ ⲛⲟⲩ ·
…
65 ⲛⲛⲉⲥϣⲱⲡⲉ ⲉⲧⲣⲁⲟⲩⲱϣⲧ · ⲙⲡⲁⲓ ·
…
66 ⲁⲗⲗⲁ ⲛⲧⲟϥ ⲡⲉⲧⲛⲁⲟⲩⲱϣⲧ ⲛⲁⲓ ϫⲉⲧⲓⲟ ⲛϣⲟⲣⲡ ⲉⲣⲟϥ ·
…
67 ⲡⲉϫⲁϥ ⲛⲁϥ ⲟⲛ ⲛϭⲓⲡⲛⲁⲏⲧ ⲛⲛⲟⲩⲧⲉ · ϫⲉⲥⲁⲧⲁⲛⲁⲏⲗ ⲥⲱⲧⲙ ⲛⲥⲱⲓ ⲁⲛⲟⲕ ⲡⲉ ⲡⲉⲕϫⲟⲉⲓⲥ · ⲁⲛⲟⲕ ⲡⲉ ⲡⲉⲕⲇⲓⲙⲓⲟⲩⲣⲅⲟⲥ · ⲁⲙⲟⲩ ⲧⲉⲛⲟⲩ · ⲛⲅⲟⲩⲱϣⲧ ⲙⲡϩⲱⲃ ⲛⲛⲁϭⲓϫ ·
…
68 ⲡⲉϫⲁϥ · ⲛϭⲓⲙⲁⲥⲧⲏⲙⲁ · ϫⲉⲛⲛⲉⲥϣⲱⲡⲉ ⲙⲙⲟⲓ ⲟⲩⲇⲉ ⲁⲛⲟⲕ ⲟⲩⲇⲉ ⲧⲁⲗⲉⲅⲉⲱⲛ ⲧⲏⲣⲥ ·
…
69 ⲛⲛⲉⲥϣⲱⲡⲉ ⲉⲧⲣⲉⲛⲟⲩⲱϣⲧ ⲙⲡⲉⲧⲥⲟⲃⲕ ⲉⲣⲟⲛ ·
…
70 ⲕⲁⲓ ⲅⲁⲣ · ⲁⲛⲟⲛ ϩⲉⲛⲡⲛⲉⲩⲙⲁ · ⲡⲁⲓ ⲇⲉ ⲟⲩ ⲡⲉ · ⲛⲧⲛⲛⲁⲟⲩⲱϣⲧ ⲁⲛ ⲛⲁϥ · ⲡⲉϫⲁϥ ⲛⲁϥ ⲟⲛ · ⲛϭⲓⲡⲛⲟⲩⲧⲉ · ⲙⲡⲙⲉϩϣⲟⲙⲛⲧ ⲛⲥⲟⲡ ϫⲉⲡⲁⲡⲣⲟⲧⲟⲡⲗⲁⲥⲙⲁ ·
…
71 ⲙⲏ ⲛⲁⲛⲟⲕ ⲁⲛ ·
…
72 ⲡⲉⲛⲧⲁⲓⲕⲁⲑⲓⲥⲧⲁ ⲙⲙⲟⲕ ⲛⲁⲓ ⲛⲁⲣⲭⲓⲥⲧⲣⲁⲧⲏⲅⲟⲥ ϩⲁⲣⲁⲧ ⲁⲓⲧⲣⲉⲛⲁⲁⲅⲅⲉⲗⲟⲥ ϩⲩⲡⲟⲧⲁⲥⲥⲉ ⲛⲁⲕ ⲉⲡⲁⲓ ⲙⲁ ·
…
73 ⲧⲉⲛⲟⲩ ϫⲉⲕⲛⲁⲥⲧⲁⲥⲓⲁⲍⲉ ⲛⲧⲁⲙⲛⲧⲣⲣⲟ ·
…
74 ⲧⲉⲛⲟⲩ ⲕⲛⲁⲟⲩⲱⲛϩ ⲉⲃⲟⲗ ϩⲛⲟⲩⲙⲛⲧⲁⲧⲥⲱⲧⲙ ⲉⲧⲣⲉⲥϣⲱⲡⲉ ⲉⲥⲙⲏⲛ ⲉⲃⲟⲗ ϣⲁⲉⲛⲉϩ ⁘ ⲧⲉⲛⲟⲩ ⲛⲁⲧⲥⲁⲃⲉ ⲛϩⲙϩⲁⲗ ⲉⲧⲣⲉⲩⲧⲱⲟⲩⲛ ⲉϫⲛⲛⲉⲩϫⲓⲥⲟⲟⲩⲉ ⁖ⲻ
…
75 ⲧⲉⲛⲟⲩ ⲕⲥⲩⲙⲁⲛⲉ ⲛⲟⲩⲙⲛⲧⲁⲧⲥⲱⲧⲙ ⲱ ⲙⲁⲥⲧⲏⲙⲁ · ⲙⲏ ⲛⲧⲕⲡⲁϩⲙϩⲁⲗ ⲁⲛ · ⲙⲏ ⲁⲛⲟⲕ ⲁⲛ ⲡⲉ ⲡⲉⲕϫⲟⲉⲓⲥ ·
…
76 ⲙⲏ ⲙⲛⲧⲁⲓ ⲉⲝⲟⲩⲥⲓⲁ ⲙⲙⲁⲩ ⲉⲛⲟϫⲕ ⲉⲃⲟⲗ ϩⲁⲡⲁⲟⲟ ·
…
77 ⲁⲩⲱ ⲉϥⲓ ⲛⲧⲟⲟⲧⲕ ⲙⲡⲉⲕⲛⲟϭ ⲛⲉⲟⲟⲩ ⁖ⲻ
…
78 ⲡⲁⲓ ⲉⲧⲉ ⲙⲛⲟⲩⲟⲛ ϩⲛⲧⲁⲙⲛⲧⲣⲣⲟ ⲧⲏⲣⲥ ϣⲏϣ ⲛⲙⲙⲁϥ ⲉⲓ ⲙⲏⲧⲉⲓ ⲁⲛⲟⲕ ⲙⲛⲡⲁⲉⲓⲱⲧ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ·
…
79 ⲥⲱⲧⲙ ⲧⲉⲛⲟⲩ ⲛⲥⲱⲓ · ⲁⲙⲟⲩ ⲛⲅⲟⲩⲱϣⲧ ⲙⲡⲁⲡⲗⲁⲥⲙⲁ ·
…
80 ⲡⲉϫⲁϥ ⲛϭⲓⲡⲣⲉϥϣⲟⲩϣⲟⲩ ⲛⲣϥⲫⲑⲟⲛⲉⲓ ⲛⲛⲁϩⲣⲛⲡⲉⲧⲉⲣⲉⲡⲧⲏⲣϥ ϩⲩⲡⲟⲧⲁⲥⲥⲉ ⲛⲁϥ · ϫⲉⲛⲛⲉⲥϣⲱⲡⲉ ⲙⲙⲟⲓ ⲉⲛⲉϩ · ⲉⲧⲣⲁⲟⲩⲱϣⲧ ⲛϫⲟⲉⲓⲥ ⲥⲛⲁⲩ ·
…
81 ⲁⲛⲟⲕ ⲙⲛⲧⲁⲧⲁⲝⲓⲥ ⲧⲏⲣⲥ ⁘ ⲧⲏⲣⲥ ⲙⲁⲗⲓⲥⲧⲁ · ⲙⲛⲡⲉⲧⲟ ⲛⲛⲟϭ ⲉⲣⲟⲓ ·
…
82 ⲉⲓⲙⲏⲧⲓ ⲛⲧⲟⲕ · ϩⲛⲧⲙⲛⲧⲣⲣⲟ ⲧⲏⲣⲥ ⲛⲧⲡⲉ ·
…
83 ⲁⲩⲱ ⲉⲓϣⲁⲛⲣϩⲛⲁⲓ ϯⲛⲁⲣⲱϣⲉ ϩⲱ · ⲙⲛⲧⲁⲧⲁⲝⲓⲥ ⲉⲧⲁⲙⲛⲧⲣⲣⲟ ⲙⲁⲩⲁⲁⲧ ·
…
84 ⲛⲛⲉⲉⲥϣⲱⲡⲉ ⲙⲙⲟⲓ ⲉⲟⲩⲱϣⲧ ⲙⲡⲉⲧⲥⲟⲃⲕ ⲉⲣⲟⲓ ·
…
85 ⲁⲩⲱ ⲛⲧⲉⲩⲛⲟⲩ ⲁϥϭⲱⲛⲧ ⲛϭⲓⲡⲛⲟⲩⲧⲉ ⲁϥⲟⲩⲉϩⲥⲁϩⲛⲉ ⲛⲟⲩⲛⲟϭ ⲛⲭⲉⲓⲣⲟⲩⲃⲉⲓⲛ ⲁϥⲣⲁϩⲧϥ ⲁϥⲁⲁϥ ⲛϭⲱⲃ ⁘ ⲁϥⲕⲉⲗⲉⲩⲉ ⲛϭⲓⲙⲓⲭⲁⲏⲗ ⲉⲃⲟϣϥ ⲙⲡⲉϥϩⲱⲕ ⲙⲛⲧⲉϥϭⲣⲏⲡⲉ ⲙⲛⲡⲉϥϩⲣⲁⲃⲇⲟⲥ ⲉⲧⲟ ⲛⲟⲩⲟⲉⲓⲛ ⲙⲛⲡⲉϥⲙⲟϫⲕϥ ⲛⲥⲁⲡⲡⲓⲣⲟⲛ ·
…
86 ⲁϥϥⲓ ⲙⲙⲁⲩ ϩⲓϫⲱϥ ⲙⲡⲉϥⲉⲟⲟⲩ ⲧⲏⲣϥ ·
…
87 ⲁϥϯ ⲛⲁϥ ⲛⲟⲩϩⲣⲁⲃⲇⲟⲥ ⲛⲕⲁⲕⲉ ⲙⲛⲛⲉⲧ ⲛⲙⲙⲁϥ ⲧⲏⲣⲟⲩ ⲁϥⲛⲟϫⲟⲩ ⲉⲃⲟⲗ ϩⲛⲧⲉϥⲙⲛⲧⲣⲣⲟ ·
…
88 ⲁⲩⲱ ⲁⲙⲓⲭⲁⲏⲗ · ⲉⲓⲣⲉ ⲛϩⲱⲃ ⲛⲓⲙ · ⲛⲧⲁⲩⲟⲩⲉϩⲥⲁϩⲛⲉ ⲙⲙⲟⲟⲩ ⲛⲁϥ ⲁϥⲁⲙⲁϩⲧⲉ ⲙⲙⲟϥ ⲁϥⲟⲩⲱϣϥ ⲛⲧⲉϥϭⲟⲙ ·
…
89 ⲁϥⲛⲟϫϥ ⲉⲃⲟⲗ ϩⲛⲧⲡⲉ ⲙⲛⲛⲉⲧ ⲛⲙⲙⲁϥ ⲧⲏⲣⲟⲩ ·
…
90 ⲁⲡⲛⲟⲩⲧⲉ ⲡⲁⲅⲁⲑⲟⲥ ·
…
91 ⲙⲟⲩⲧⲉ ⲉⲙⲓⲭⲁⲏⲗ ϩⲙⲡⲧⲣϥ ⲛⲁⲩ ⲉⲡⲉϥⲟⲩⲣⲟⲧ ⲉϩⲟⲩⲛ ⲉⲡⲉϥⲡⲗⲁⲥⲙⲁ ·
…
92 ⲁⲩⲱ ⲧϥⲙⲛⲧⲣⲙⲣⲁϣ ·
…
93 ⲡⲉϫⲉⲡϫⲟⲉⲓⲥ ⲛⲁϥ · ϩⲛⲧⲙⲏⲏⲧⲉ ⲛⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ϫⲉⲙⲓⲭⲁⲏⲗ ⲡⲉ ⲧϭⲟⲙⲏⲗ · ϩⲱⲱϥ ⲡⲉ ⲡⲛⲟⲩⲧⲉ ⁖ ⲁⲙⲟⲩ ·
…
94 ⲡⲉϫⲁϥ ⲡⲁⲓ ⲡⲉⲥⲧⲣⲁϯⲅⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲁⲙⲟⲩ ⲡⲉⲛⲧⲁϥⲙⲓϣⲉ ⲁϥϫⲣⲟ ⁖ⲻ ⲁⲙⲟⲩ ϣⲁⲣⲟⲓ ⲱ ⲙⲓⲭⲁⲏⲗ ⲡⲣⲉϥ‐ⲇⲓⲁⲕⲱⲛⲉⲓ ⲉⲡⲟⲩⲉϩⲥⲁϩⲛⲉ ⲙⲡⲉϥⲣⲣⲟ ·
…
95 ⲉⲓⲥϩⲏⲏⲧⲉ ⲅⲁⲣ ⲁⲉⲓⲙⲉ ⲉⲡⲉⲕⲟⲩⲱϣ ⲉϩⲟⲩⲛ ⲉⲣⲟⲓ · ⲙⲛⲡⲁⲡⲗⲁⲥⲙⲁ ⲧⲏⲣϥ ·
…
96 ⲁⲛⲟⲕ ϩⲱⲱⲧ ⲟⲛ ϯⲛⲁⲥⲟⲟⲩⲧⲛ ⲙⲡⲁⲟⲩⲱϣ ⲉϩⲟⲩⲛ ⲉⲣⲟⲕ ·
…
97 ⲁⲩⲱ ⲁⲩⲟⲩⲱⲛ ⲛⲧⲉⲕⲧⲁⲡⲣⲟ ⲱ ⲙⲓⲭⲁⲏⲗ · ⲛⲅϫⲓ ⲛⲁⲕ ⲛⲛⲁⲙⲛⲧϣⲁⲛϩⲧⲏϥ · ⲧⲏⲣⲟⲩ ϩⲣⲁⲓ ⲛϩⲏⲧⲕ ·
…
98 ϫⲉⲕⲁⲥ ⲉⲕⲛⲁϭⲱ ⲉⲕⲥⲟⲡⲥⲡ ⲙⲙⲟⲓ ⲛⲛⲁⲩ ⲛⲛⲓⲙ · ⲉϫⲙⲡⲁⲉⲓⲛⲉ ⲙⲛⲧⲁϩⲓⲕⲱⲛ · ⲁⲛⲟⲕ ϩⲱ ⲛⲧⲁⲛⲁⲛⲁⲩ ·
…
99 ϯⲥⲟⲟⲩⲛ ⲅⲁⲣ ϫⲉⲙⲁⲥⲧⲏⲙⲁ · ⲛⲁϯ ⲧⲱⲛ ⲙⲛⲡⲁⲡⲗⲁⲥⲙⲁ · ⲉϥⲟⲩⲱϣ ⲉⲛⲟϫⲟⲩ ⲛⲥⲁⲃⲟⲗ ⲙⲙⲟⲓ ⲛⲧϩⲉ ⲛⲧⲁⲓⲛⲟϫϥ ⲛⲥⲁⲃⲟⲗ ⲛⲧⲁⲙⲛⲧⲣⲣⲟ ·
…
100 ⲁⲗⲗⲁ ⲉⲓⲥϩⲏⲏⲧⲉ ⲁⲓⲧⲁⲛϩⲟⲩⲧⲕ ⲉⲡⲁⲡⲗⲁⲥⲙⲁ ϫⲉⲕⲁⲥ ⲉⲕⲉⲧⲟⲩϫⲟⲟⲩ ⲉⲛⲉϥⲡⲁϣ ·
…
101 ⲁⲩⲱ ⲛⲅⲡⲁⲣⲁⲕⲁⲗⲉⲓ ⲙⲙⲟⲓ ϩⲁⲣⲟⲟⲩ · ⲉⲩϣⲁⲛϣⲱϥⲧ ϫⲉⲁⲛⲅⲟⲩϣⲁⲛϩⲧⲏϥ ⲁⲛⲟⲕ · ⲉⲓⲥϩⲏⲏⲧⲉ ⲱ ⲙⲓⲭⲁⲏⲗ ·
…
102 ϯⲧⲁϩⲟ ⲙⲙⲟⲕ ⲉⲣⲁⲧⲕ ⲙⲡϩⲟⲟⲩ ⲛⲁⲣⲭⲏⲥⲧⲣⲁϯⲅⲟⲥ ⲛⲛⲧⲁⲅⲙⲁ ⲧⲏⲣⲟⲩ ⲛⲙⲡⲏⲩⲉ ·
…
103 ⲁⲩⲱ ⲛⲥⲁⲃⲗⲗⲁⲓ · ⲙⲛⲡⲁⲉⲓⲱⲧ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲙⲛⲡⲉⲧⲟ ⲛⲛⲟϭ ϩⲛⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ⲛⲧⲉⲕϩⲉ ⲱ ⲡⲁⲣⲭⲓⲥⲧⲣⲁⲧⲏⲅⲟⲥ ⲙⲓⲭⲁⲏⲗ ·
…
104 ⲁⲙⲟⲩ ⲛⲅⲁϩⲉⲣⲁⲧⲕ ⲛⲥⲁⲟⲩⲛⲁⲙ ⲙⲙⲟⲓ ⲛⲅϣⲱⲡⲉ ⲉⲕⲧⲏⲕ ⲉⲡⲁⲑⲣⲟⲛⲟⲥ ·
…
105 ⲛⲟⲩⲟⲉⲓϣ ⲛⲓⲙ ⲉⲕⲟⲩⲉϩⲥⲁϩⲛⲉ ⲛⲛϭⲟⲙ ⲧⲏⲣⲟⲩ ⲛⲙⲡⲏⲩⲉ ⲉⲩⲥⲱⲧⲙ ⲛⲥⲱⲕ ϩⲛϩⲱⲃ ⲛⲓⲙ ·
…
106 ⲱ ⲙⲓⲭⲁⲏⲗ ⲛⲧⲟⲕ ⲡⲉⲧⲛⲁⲧⲥⲁⲃⲟ ⲛⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ·
…
107 ⲉϣⲙϣⲉ ⲛⲁⲕ ϩⲛⲟⲩⲥⲟⲟⲩⲧⲛ ⁘ ⲙⲓⲭⲁⲏⲗ ⲡϣⲟⲩϣⲟⲩ ⲁⲩⲱ ⲡⲥⲟⲟⲩⲧⲛ ⲛⲧⲁⲙⲛⲧⲣⲣⲟ ·
…
108 ⲁⲙⲟⲩ ⲥⲟⲟⲩⲧⲛ ⲛⲧⲉⲕⲁⲡⲉ ⲧⲁⲓ ⲛⲧⲁⲕⲁⲁⲥ ⲉⲡⲉⲥⲏⲧ ⲁⲕⲟⲩⲱϣⲧ ⲙⲡⲁⲡⲗⲁⲥⲙⲁ ·
…
109 ⲛϩⲏⲧⲥ ⲧⲁϯ ⲉϫⲱⲥ ⲙⲡⲓⲛⲟϭ ⲛⲕⲗⲟⲙ ·
…
110 ⲡⲁⲓ ⲛⲧⲁⲓϥⲓⲧϥ ϩⲓϫⲛⲧⲁⲡⲉ ⲙⲡϫⲁϫⲉ ⁖ ⲥⲟⲟⲩⲧⲛ ⲉⲃⲟⲗ ⲛⲧⲉⲕϭⲓϫ ⲛⲅϫⲓ ⲛⲁⲕ ⲙⲡⲉϩⲣⲁⲃⲇⲟⲥ ⲛⲅϣⲱⲡⲉ ⲛⲅϣⲱⲡⲉ ⲛⲁⲣⲭⲓⲥⲧⲣⲁⲧⲏⲅⲟⲥ ⲉⲡⲙⲁ ⲙⲡⲕⲁⲧⲏⲅⲟⲣⲟⲥ ⲙⲡϣⲓⲡⲉ ·
…
111 ⲱ ⲙⲓⲭⲁⲏⲗ ⲥⲟⲟⲩⲧⲛ ⲥⲃⲟⲗ ⲛⲧⲉⲕϭⲓϫ ⲛϩⲃⲟⲩⲣ ⲛⲅϫⲓ ⲛⲁⲕ ⲙⲡⲉⲓⲛⲟϭ ⲛϩⲟⲡⲗⲟⲛ · ⲛⲅⲥⲃⲧⲱⲧⲕ ⲉⲙⲓϣⲉ ⲙⲛⲛϫⲁϫⲉ ⲡⲉⲕⲣⲣⲟ ⁘ ⲱ ⲙⲓⲭⲁⲏⲗ ϫⲓ ⲛⲁⲕ ⲙⲡⲙⲟϫⲕϥ ⲛⲥⲁⲡⲡⲓⲣⲟⲛ ⲉϫⲛⲧⲉⲕϯⲡⲉ ·
…
112 ϫⲉⲕⲁⲥ ⲉⲣⲉⲛⲉⲧϯⲟⲩⲃⲉ ⲡⲉⲕϫⲟⲉⲓⲥ ⲛⲁⲛⲁⲩ ⲉⲣⲟⲕ ⲛⲥⲉϭⲱⲧⲡ ϩⲛⲟⲩϭⲉⲡⲏ ·
…
113 ⲁⲩⲟⲩⲱⲛ ⲛⲧⲉⲕⲧⲁⲡⲣⲟ · ⲱ ⲡⲁⲗⲩⲧⲟⲩⲣⲅⲟⲥ ϫⲓⲛⲁⲕⲛⲟⲩϭⲟⲙ ϫⲉⲕⲁⲥ ⲉⲣⲉⲡⲉⲕϣⲁϫⲉ ⲛⲁⲣⲧϩⲉ ⲙⲡⲉϩⲣⲟⲟⲩ ⲛⲟⲩⲙⲏⲏϣⲉ ⲉϥϣⲁϫⲉ · ⲁⲙⲟⲩ ⲫⲟⲣⲉⲓ ⲙⲡⲁⲉⲟⲟⲩ ⲱ ⲙⲓⲭⲁⲏⲗ ·
…
114 ϫⲉⲕⲁⲥ ⲉⲕⲉⲧⲁⲙⲉⲟⲩⲟⲛ ⲛⲓⲙ ⲉϯⲉⲟⲟⲩ ⲛⲁⲓ ·
…
115 ⲉⲓⲥϩⲏⲏⲧⲉ ⲁⲓⲉⲓⲙⲉ ⲉⲡⲉⲕⲟⲩⲱϣ ⲧⲏⲣϥ ⲱ ⲙⲓⲭⲁⲏⲗ ⲉϩⲟⲩⲛ ⲉⲡⲁⲡⲗⲁⲥⲙⲁ ·
…
116 ⲁⲙⲟⲩ ⲧⲉⲛⲟⲩ ⲛⲅⲇⲓⲁⲕⲱⲛⲉⲓ ⲛⲁⲓ ⲉⲡⲃⲓⲟⲥ ⲧⲏⲣϥ ⲛⲧⲁϩⲓⲕⲱⲛ ⁖ⲻ
…
117 ⲉⲓⲥ ⲁⲇⲁⲙ ⲧⲉⲛⲟⲩ ⲕⲛⲁⲛⲁⲩ ⲉⲣⲟϥ ⲙⲙⲁⲩ · ⲙⲁⲩⲁⲁϥ · ⲉⲙⲛⲕⲉⲟⲩⲁ ⲕⲁⲧⲁⲣⲟϥ · ⲁⲗⲗⲁ ⲉⲓⲥ ⲟⲩⲙⲁⲉⲓⲛ ·
…
118 ⲁⲓⲕⲁⲁϥ ϩⲙⲡⲉϥⲥⲡⲓⲣ ⲉϥⲛⲁϣⲱⲡⲉ ⲉϥⲉⲓⲛⲉ ⲙⲙⲟϥ ⁖ⲻ
…
119 ⲉⲡⲉⲓⲇⲏ ⲁⲓϫⲟⲟⲥ ⲱ ⲙⲓⲭⲁⲏⲗ ϫⲉⲛⲁⲛⲟⲩ ⲡⲣⲱⲙⲉ ⲁⲛ ⲉⲧⲣⲉϥϭⲱ ⲙⲁⲩⲁⲁϥ ·
…
120 ⲁⲗⲗⲁ ⲙⲁⲣⲛⲧⲁⲙⲓⲟ ⲛⲁϥ ⲛⲟⲩⲃⲟⲏⲑⲟⲥ ⲕⲁⲧⲁⲣⲟϥ ⁖ ⲱ ⲙⲓⲭⲁⲏⲗ ⲡⲃⲟⲏⲑⲟⲥ ⲉⲥⲟ ⲛⲟⲩⲁ ⲛⲟⲩⲱⲧ ⲛⲙⲙⲁϥ ·
…
121 ϫⲓⲛⲡⲛⲁⲩ ⲛⲧⲁⲓⲡⲗⲁⲥⲥⲉ ⲙⲙⲟϥ ·
…
122 ⲁⲗⲗⲁ ⲙⲡⲁⲧϥⲉⲓ ⲛⲉ ⲙⲙⲟⲥ ⲉⲣⲁⲧϥ ⁖ⲻ
…
123 ⲱ ⲙⲓⲭⲁⲏⲗ ⲉⲛⲉ ⲛⲧⲁⲓⲧⲁⲙⲓⲟ ⲛⲁⲇⲁⲙ ⲉⲧⲣⲉϥϭⲱ ⲙⲁⲩⲁⲁϥ ⲉⲓⲉ ⲟⲩⲧⲉ ⲧⲉⲭⲣⲉⲓⲁ ⲉⲧⲣⲁⲧⲱϭⲉ ⲙⲡⲡⲁⲣⲁⲇⲓⲥⲟⲥ ⁖ ⲱ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲡⲁⲡⲉⲓⲕⲟⲥⲙⲟⲥ ⲧⲏⲣϥ ⲛⲥⲁⲡⲉⲥⲏⲧ ⲙⲡⲁⲑⲣⲟⲛⲟⲥ ·
…
124 ϯⲛⲁⲧⲣⲉϥϭⲱⲣϭ ⲉⲃⲟⲗ ϩⲙⲡⲉⲓⲛⲉ ⲛⲁⲇⲁⲙ · ⲉⲧⲉⲧⲁⲓ ⲧⲉ ⲧⲁϩⲓⲕⲱⲛ ⁖ ⲧⲉⲛⲟⲩ ⲇⲉ ⲱ ⲙⲓⲭⲁⲏⲗ ⲉⲓⲥϩⲏⲏⲧⲉ ⲁⲓⲧⲟϣⲕ ⲛⲟⲓⲕⲟⲛⲟⲙⲟⲥ ⲉⲧⲁⲙⲛⲧⲣⲣⲟ ·
…
125 ϫⲉⲕⲁⲥ ⲉⲕⲛⲁϣⲱⲡⲉ ⲉⲕⲇⲓⲁⲕⲱⲛⲉⲓ ϩⲛⲟⲩⲙⲛⲧϣⲁⲛϩⲧⲏϥ ·
…
126 ⲉϩⲟⲩⲛ ⲉⲡⲁⲡⲗⲁⲥⲙⲁ ⁖ⲻ ⲱ ⲙⲓⲭⲁⲏⲗ ⲉⲣⲉⲡⲅⲉⲛⲟⲥ ⲧⲏⲣϥ ⲛⲁⲇⲁⲙ ·
…
127 ⲛⲁⲥⲟⲩ ⲛⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲕ ⁘ ⲱ ⲙⲓⲭⲁⲏⲗ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲧⲁⲙⲛⲧⲣⲣⲟ · ⲙⲓⲭⲁⲏⲗ
…
128 ⲛⲧⲟⲕ ⲡⲉ ⲡⲁⲣⲭⲱⲛ · ⲛⲛⲁⲧⲡⲉ ⲙⲛⲛⲁⲡ ·
…
129 ⲙⲓⲭⲁⲏⲗ ⲡⲉ ⲡⲉⲥϯⲛⲟⲩϥⲉ ⲙⲡⲛⲁⲩ ⲛⲧⲉⲑⲩⲥⲓⲁ ⲉⲧⲟⲩⲁⲁⲃ ⁖ ⲙⲓⲭⲁⲏⲗ ⲛⲧⲟⲕ ⲡⲉⲧⲛⲁⲡⲣⲟⲥⲉⲛⲉⲕⲉⲓ ⲛⲧⲉⲡⲣⲟⲥⲫⲟⲣⲁ · ϩⲁⲡⲅⲉⲛⲟⲥ ⲧⲏⲣϥ ⲛⲛϣⲏⲣⲉ ⲛⲁⲇⲁⲙ ·
…
130 ⲟⲩⲛϩⲉⲛⲛⲟϭ ⲛϩⲱⲃ ⲛⲁϣⲱⲡⲉ ⲉⲃⲟⲗ ϩⲛⲛϣⲏⲣⲉ ⲛⲁⲇⲁⲙ · ⲛⲧⲟⲕ ⲱ ⲙⲓⲭⲁⲏⲗ ⲡⲉⲧⲛⲁⲥⲟⲡⲥⲡ ⲉϫⲱⲟⲩ ⲛⲧⲁⲕⲱ ⲛⲁⲩ ⲉⲃⲟⲗ ·
…
131 ⲛϣⲏⲣⲉ ⲙⲡⲅⲉⲛⲟⲥ ⲛⲁⲇⲁⲙ · ⲛⲁϫⲓⲟⲩⲁ ⲉⲣⲟⲓ ϩⲓⲧⲛⲡⲉⲧⲡⲗⲁⲛⲁ ⲙⲙⲟⲟⲩ ·
…
132 ⲁⲗⲗⲁ ϯⲛⲁⲕⲱ ⲛⲁⲩ ⲉⲃⲟⲗ ϩⲓⲧⲙⲡⲉⲕⲥⲟⲡⲥⲡ ⲱ ⲙⲓⲭⲁⲏⲗ ⁖ⲻ
…
133 ⲛⲁⲓ ⲇⲉ ⲧⲏⲣⲟⲩ ⲛⲧⲉⲣⲉⲡϫⲟⲉⲓⲥ ϫⲟⲟⲩ · ⲙⲙⲓⲭⲁⲏⲗ ·
…
134 ⲁϥⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ ·
…
135 ⲁϥϯ ⲉϫⲱϥ ⲙⲡⲉⲥⲧⲉⲫⲁⲛⲟⲥ ⲁϥⲁⲁϥ ⲛⲁⲣⲭⲁⲅⲅⲉⲗⲟⲥ ⲁϥⲕⲱ ϩⲓϫⲱϥ ⲛϣⲟⲙⲧⲉ ⲛⲥⲫⲣⲁⲅⲓⲥ ⲙⲡⲧⲩⲡⲟⲥ ⲛⲧⲉⲧⲣⲓⲁⲥ ⲉⲧⲟⲩⲁⲁⲃ ·
…
136 ⲉⲣⲉⲡⲉⲓⲛⲉ ⲛⲧⲉϥϩⲓⲕⲱⲛ ϩⲓϫⲛⲛⲉⲥⲫⲣⲁⲅⲓⲥ ϫⲉⲕⲁⲥ ⲉⲣⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲛⲁϭⲱ ⲉϥⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ⲉϫⲛⲧⲉϥϩⲓⲕⲱⲛ ⲉⲧⲉⲁⲛⲟⲕ ⲡⲉ ·
…
137 ⲉⲧⲃⲉⲡⲁⲓ ⲣⲱ ⲛⲧⲁⲓⲉⲓ ⲉⲡⲁⲣⲓⲥⲧⲟⲛ · ⲙⲙⲓⲭⲁⲏⲗ ⲁⲛⲟⲕ ⲡⲉⲧⲛⲉⲓⲱⲧ ⲁⲇⲁⲙ ·
…
138 ⲁⲃⲉⲗ ⲡⲇⲓⲕⲁⲓⲟⲥ ⲡϣⲏⲣⲉ ⲕⲟⲩⲓ ⲛⲁⲧⲛⲟⲃⲉ ⁖ ϯⲥⲟⲡⲥⲡ ⲙⲙⲟⲕ ϩⲱⲱⲕ ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ⲉⲧⲉⲡϣⲁⲡⲉ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
139 ⲙⲓⲭⲁⲏⲗ ⁖ ⲉⲓⲣⲁϣⲉ ⲡⲉϫⲁϥ ⲛϭⲓⲁⲃⲉⲗ · ϫⲉⲡⲧⲉⲧⲛⲣϣⲁⲛⲁϥ ⲙⲡϩⲟⲟⲩ ⲛⲧⲟϥ ⲡⲉⲧⲥⲟⲡⲥⲡ ϩⲁⲡⲁⲉⲓⲱⲧ ⲙⲛⲧⲁⲙⲁⲁⲩ
…
140 ⲁϥⲕⲱ ⲛⲁⲩ ⲉⲃⲟⲗ ⲛⲧⲉⲩⲡⲁⲣⲁⲃⲁⲥⲓⲥ ·
…
141 ⲁⲩⲱ ⲛⲧⲟϥ ⲡⲉⲛⲧⲁϥϫⲓ ⲛⲛⲁⲇⲱⲣⲟⲛ ⲉϩⲣⲁⲓ ϣⲁⲡⲛⲟⲩⲧⲉ ϣⲁⲛⲧϥϫⲓ ⲛⲧⲁⲑⲩⲥⲓⲁ ⲛⲧⲟⲟⲧ ·
…
142 ⲙⲡⲉϥϯ ϩⲧⲏϥ ⲉ…ⲉ ⲛⲧ… ϩⲛⲟⲩⲥⲟⲟⲩⲧⲛ ·
…
143 ⲉⲧⲃⲉⲡⲁⲓ ⲁⲓⲣⲁϣⲉ ⲙⲡϩⲟⲟⲩ ⁖
…
144 ⲥⲉⲧⲉ ϯⲛⲁⲩ ⲉⲣⲟⲕ ϩⲱⲱⲕ ⲙⲡϩⲟⲟⲩ ⲉⲕⲧⲉⲗⲏⲗ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲉⲓⲧⲉⲗⲏⲗ ⲡⲉϫⲁϥ ⲛϭⲓⲥⲏⲑ ⲉⲡⲉⲓⲇⲏ ⲛⲧⲉⲣⲉⲕⲁⲉⲓⲛ ⲙⲟⲩⲟⲩⲧ ⲛⲁⲃⲉⲗ ⲡⲁⲥⲟⲛ ·
…
145 ⲁⲡⲛⲟⲩⲧⲉ ⲭⲁⲣⲓⲍⲉ ⲙⲙⲟⲓ ⲛⲛⲁⲉⲓⲟⲧⲉ ·
…
146 ⲁⲩⲱ ⲙⲡⲉⲧⲁⲙⲁⲁⲩ ϭⲛⲉⲣⲱⲧⲉ ⲉⲧⲥⲙⲕⲟ ⲙⲙⲟⲓ ·
…
147 ⲉⲃⲟⲗ ϫⲉⲁⲥⲟⲩⲱϫⲛ ϩⲓⲧⲛⲧⲗⲩⲡⲏ ⲛⲁⲃⲉⲗⲡⲁⲥⲟⲛ ·
…
148 ⲁⲗⲗⲁ ⲁⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϯϩⲣⲉ ⲛⲓⲙ ⲛⲁⲓ ⲙⲡⲛⲉⲩⲙⲁⲧⲓⲕⲟⲛ ⲉⲃⲟⲗ ϩⲛⲙⲡⲏⲩⲉ ·
…
149 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
150 ⲉⲛⲱⲭ ⲡⲇⲓⲕⲁⲓⲟⲥ ·
…
151 ⲡⲉⲛⲧⲁⲡⲛⲟⲩⲧⲉ ⲡⲟⲟⲛϥ ⲉⲃⲟⲗ ·
…
152 ⲁϩⲣⲟⲕ ϩⲱⲱⲕ ϩⲙⲡⲉⲓⲛⲟϭ ⲛϣⲁ ⲛⲣⲁϣⲉ ⲙⲡϩⲟⲟⲩ ⲉⲧⲉⲡϣⲁ ⲡⲉ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
153 ⲙⲓⲭⲁⲏⲗ · ⲉⲓⲣⲁϣⲉ ⲡⲉϫⲁϥ ⲛϭⲓⲡⲇⲓⲕⲁⲓⲟⲥ ·
…
154 ⲉⲡⲉⲓⲇⲏ ⲁⲛⲟⲕ ⲉⲧⲥϩⲁⲓ ⲛⲛⲛⲟⲃⲉ ⲙⲛⲛⲁⲛⲟⲙⲓⲁ · ⲙⲛⲛⲁⲅⲁⲑⲟⲛ ·
…
155 ⲙⲡⲕⲟⲥⲙⲟⲥ ⲧⲏⲣϥ ϩⲛⲛⲁϭⲓϫ ·
…
156 ⲙⲙⲓⲛ ⲙⲙⲟⲓ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲡⲉⲧϫⲓ ⲙⲙⲟⲟⲩ ⲉϩⲟⲩⲛ ϣⲁⲡⲛⲟⲩⲧⲉ · ⲉϥϯ ⲛⲁⲩ ⲛⲛⲁⲅⲁⲑⲟⲛ ⲛⲛⲟⲃⲉ ϩⲱⲱϥ · ⲉϥⲥⲟⲡⲥⲡ ⲙⲙⲟϥ ⲉⲧⲃⲏⲏⲧⲟⲩ ⲛϥⲕⲱ ⲉⲃⲟⲗ ⲛⲛⲁⲡⲁⲅⲉⲛⲟⲥ ·
…
157 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖ⲻ
…
158 ⲙⲁⲑⲟⲩⲥⲁⲗⲁ ⲡϩⲗⲗⲟ ⲛⲇⲓⲕⲁⲓⲟⲥ ·
…
159 ⲡⲉⲛⲧⲁϥⲁⲓⲁⲓ ⲕⲁⲗⲱⲥ ϩⲛⲛϥϩⲟⲟⲩ ·
…
160 ⲁⲣⲁⲟⲩ ϩⲱⲱϥ ⲡⲉ ⲡⲉⲕⲣⲁϣⲉ ⲙⲡϩⲟⲟⲩ · ϫⲉϯⲛⲁⲩ ⲉⲣⲟⲕ ⲁⲕⲟⲩⲃⲁϣ ·
…
161 ⲧⲱⲛⲟⲩ ϩⲛⲧⲙⲏⲏⲧⲉ ⲙⲡⲉⲓⲁⲣⲓⲥⲧⲟⲛ ⲙⲡϩⲟⲟⲩ ⁖ⲻ
…
162 ⲡⲉϫⲁϥ ⲛϭⲓⲙⲁⲑⲟⲩⲥⲁⲗⲁ · ϫⲉⲁⲩⲱ ⲉⲧⲃⲉⲟⲩ ϯⲛⲁⲣⲁϣⲉ ⲁⲛ · ⲁⲛⲟⲕ ⲡⲉ ⲡⲙⲉϩϣⲙⲟⲩⲛ ϫⲓⲛⲁⲇⲁⲙ ·
…
163 ⲁⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ϫⲓ ⲙⲡⲁⲧⲧⲱⲃϩ ⲉϩⲣⲁⲓ ϣⲁⲡⲛⲟⲩⲧⲉ ·
…
164 ⲁϥⲭⲁⲣⲓⲍⲉ ⲛⲁⲓ ⲙⲡⲉⲓⲛⲟϭ ⲛⲁϩⲉ ·
…
165 ϩⲱⲥⲧⲉ ⲛⲧⲉⲡⲁⲁϩⲉ ⲙⲛⲛⲁⲣⲙⲡⲟⲟⲩⲉ · ⲟⲩⲱⲧⲃ ⲉⲡⲉⲛⲉⲓⲱⲧ ⲁⲇⲁⲙ · ⲙⲙⲁⲁⲃⲯⲓⲧⲉ ⲛⲣⲟⲙⲡⲉ ·
…
166 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
167 ⲛⲱϩⲉ ⲡⲇⲓⲕⲁⲓⲟⲥ ·
…
168 ϯⲛⲁⲩ ⲉⲣⲟⲕ ⲉⲕⲣⲁϣⲉ ⲙⲡϩⲟⲟⲩ ·
…
169 ⲥⲱⲧⲙ ⲡⲉϫⲁϥ ⲛϭⲓⲛⲱϩⲉ · ⲛⲁϣ ⲛϩⲉ ⲛϯⲛⲁⲣⲁϣⲉ ⲁⲛ ·
…
170 ⲁⲩⲱ ⲛⲧⲁⲧⲉⲗⲏⲗ ·
…
171 ⲉⲡⲉⲓⲇⲏ ⲁⲡⲛⲟⲩⲧⲉ ϭⲱⲛⲧ ϥ ⲉⲧⲡⲕⲟⲥⲙⲟⲥ ⲉⲃⲟⲗ ·
…
172 ⲁϥⲧⲁⲁⲧ ⲉϩⲟⲩⲛ ⲉⲧⲕⲓⲃⲱⲇⲟⲥ · ⲙⲛⲧⲁⲥϩⲓⲙⲉ ⲙⲛⲛⲁϣⲏⲣⲉ · ⲙⲛⲛⲉⲧⲕⲓⲙ ⲧⲏⲣⲟⲩ ϩⲓϫⲙⲡ ·
…
173 ⲁϥϣⲧⲁⲙ ⲉⲣⲱⲛ ⲙⲡⲣⲟ ⲛⲧⲕⲟⲓⲃⲱⲇⲟⲥ ·
…
174 ⲁⲛⲕⲁⲧⲁϩⲣⲁⲕⲧⲏⲥ ⲛⲧⲡⲉ ⲟⲩⲱⲛ ⲙⲛⲛⲁⲡ ·
…
175 ⲁⲩⲕⲱⲧⲉ ⲉⲣⲟⲛ ⲛϩⲙⲉ ⲛϩⲟⲟⲩ · ⲙⲛϩⲙⲉ ⲛⲟⲩϣⲏ ·
…
176 ⲙⲡⲉⲛⲛⲁⲩ ⲉⲣⲏ ⲟⲩⲇⲉ ⲟⲟϩ ·
…
177 ⲟⲩⲇⲉ ⲥⲓⲟⲩ · ⲁⲗⲗⲁ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲣϩⲙⲙⲉ ⲙⲙⲟⲛ · ⲙⲛⲧⲕⲟⲓⲃⲱⲇⲟⲥ ·
…
178 ⲁϥϭⲱ ⲉϥⲥⲟⲡⲥⲡ ⲙⲡⲛⲟⲩⲧⲉ ϣⲁⲛⲧⲉⲡⲙⲟⲟⲩ ⲥⲃⲟⲕ ⲛϥϭⲱϣⲧ ⲉⲃⲟⲗ ⲛϭⲓⲡⲡⲉⲧϣⲟⲩⲟⲟⲩ ⲛⲧⲁⲟⲩϫⲁⲓ ⲙⲛⲛⲉⲧ ⲛⲙⲙⲁⲓ ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
179 ⲁⲃⲣⲁϩⲁⲙ ⲡⲡⲁⲧⲣⲓⲁⲣⲭⲏⲥ · ⲁⲣⲁ ⲁⲕⲣⲁϣⲉ ϩⲱⲱⲕ ⲙⲡϩⲟⲟⲩ ·
…
180 ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
181 ⲥⲉ ⲡⲉϫⲁϥ ϯⲣⲁϣⲉ ⲙⲡϩⲟⲟⲩ ⲉⲡⲉⲓⲇⲏ · ⲁⲛⲟⲕ ⲡⲉ ⲡϣⲟⲣⲡ ⲛⲣⲱⲙⲉ · ⲛⲧⲁⲙⲓⲭⲁⲏⲗ ϭⲟⲓⲗⲉ ⲉⲣⲟϥ · ⲙⲛⲡⲁϫⲟⲉⲓⲥ · ⲙⲛⲛϥⲕⲉϣⲃⲏⲣ ⲁⲣⲭⲁⲅⲅⲉⲗⲟⲥ ⲅⲁⲃⲣⲓⲏⲗ ·
…
182 ⲁⲩⲱ ⲁⲙⲓⲭⲁⲏⲗ · ⲥⲟⲡⲥⲡ ⲙⲡⲛⲟⲩⲧⲉ ⲉϫⲱⲓ ⲁϥϯ ⲛⲁⲓ ⲛⲓⲥⲁⲁⲕ ⲡⲁϣⲏⲣⲉ ·
…
183 ⲁⲩⲱ ⲉϣⲱⲡⲉ ⲣⲱ ϯ ⲙⲡϣⲁ ·
…
184 ⲁⲓⲟⲩⲱⲙ ⲛⲙⲙⲁϥ ⲛϩⲟⲩⲛ ϩⲁⲡϣⲏⲛ ⲙⲙⲁⲃⲣⲏ ·
…
185 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖ⲻ
…
186 ⲓⲥⲁⲁⲕ ⲡⲇⲓⲕⲁⲓⲟⲥ ⲡϣⲏⲣⲉ ⲙⲡⲉⲣⲏⲧ ⲉⲧⲟⲩⲁⲁⲃ ·
…
187 ⲁⲩⲱ ⲧⲉⲑⲩⲥⲓⲁ ⲉⲧⲟⲩⲁⲁⲃ ⲉⲧϣⲏⲡ ⲙⲡⲛⲟⲩⲧⲉ ⲉⲧⲟⲛϩ ·
…
188 ⲁϩⲣⲟⲕ ϩⲱⲱⲕ ⲉⲕⲥⲧⲟⲗⲓⲍⲉ · ⲛϯϩⲉ ⲧⲏⲣⲥ ·
…
189 ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲉⲓⲥⲧⲟⲗⲓⲍⲉ ·
…
190 ⲡⲉϫⲁϥ ϫⲉⲁⲛⲅⲟⲩϣⲏⲣⲉ ⲛⲟⲩⲱⲧ ⲙⲡⲁⲉⲓⲱⲧ ⲙⲛⲧⲁⲙⲁⲁⲩ
…
191 ⲁⲩⲱ ⲟⲩⲁϭⲣⲏⲛ ⲧⲉ ⲧⲁⲙⲁⲁⲩ · ⲉⲙⲛⲧⲁⲩ ϣⲏⲣⲉ ⲛⲥⲁⲃⲗⲗⲁⲓ ⲟⲩⲇⲉ ⲛⲥⲉⲛⲁϫⲡⲟ ⲁⲛ · ⲙⲛⲛⲥⲱⲓ ·
…
192 ⲁⲡⲁⲉⲓⲱⲧ ⲙⲟⲣⲧ ⲉⲛⲁϭⲓϫ · ⲙⲛⲛⲁⲟⲩⲉⲣⲏⲧⲉ ·
…
193 ⲁϥⲧⲁⲗⲟⲓ ⲉϫⲛⲟⲩⲱⲛⲉ ϩⲓϫⲛⲟⲩⲧⲟⲟⲩ ⲛϫⲁⲓⲉ ·
…
194 ⲁⲓⲛⲁⲩ ϩⲛⲛⲁⲃⲁⲗ ⲉⲧϭⲟⲣⲧⲉ ϩⲛⲧϭⲓϫ ⲙⲡⲁⲉⲓⲱⲧ · ϫⲉⲉϥⲛⲁⲕⲱ ⲛⲥⲙⲙⲟⲓ ·
…
195 ⲁϥⲉⲓ ⲛⲧⲉⲩⲛⲟⲩ ⲛϭⲓⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
196 ⲁϥⲁⲙⲁϩⲧⲉ ⲛⲧϭⲟⲣⲧⲉ ϩⲛⲧϭⲓϫ ⲙⲡⲁⲉⲓⲱⲧ ⲁϥϯ ⲛⲟⲩⲉⲥⲟⲟⲩ ⲉⲡⲁⲙⲁ · ⲉⲡⲧⲁⲗⲟ ⲉϩⲣⲁⲓ ·
…
197 ⲁⲧⲁⲑⲩⲥⲓⲁ ϣⲱⲡⲉ ⲉⲥϫⲏⲕ ⲉⲃⲟⲗ ·
…
198 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖ⲻ
…
199 ⲡⲡⲁⲧⲣⲓⲁⲣⲭⲏⲥ ⲓⲁⲕⲱⲃ ·
…
200 ⲡⲉⲛⲧⲁϥϭⲙϭⲟⲙ ⲙⲛⲡⲛⲟⲩⲧⲉ ·
…
201 ⲁⲩⲱ ⲛⲇⲩⲛⲁⲧⲟⲥ · ⲙⲛⲛⲣⲱⲙⲉ ·
…
202 ⲁⲣⲁⲕⲣⲁϣⲉ ⲙⲡϩⲟⲟⲩ ϩⲱⲱⲕ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
203 ⲥⲉ ⲡⲉϫⲁϥ ϯⲣⲁϣⲉ ⲙⲡϩⲟⲟⲩ ⲉⲡⲉϩⲟⲩⲟ ⲉⲡⲉⲓⲇⲏ ·
…
204 ⲛⲧⲉⲣⲉⲏⲥⲁⲩ ⲡⲁⲥⲟⲛ · ⲇⲓⲱⲕⲉⲓ ⲛⲥⲱⲓ ⲉⲙⲟⲟⲩⲧ ·
…
205 ⲁⲓⲃⲱⲕ ⲉⲧⲙⲉⲥⲟⲡⲟⲇⲁⲙⲓⲁ ⲛⲧⲥⲩⲣⲓⲁ ⲉⲣⲁⲧϥ ⲛⲗⲁⲃⲁⲛ ·
…
206 ⲙⲓⲭⲁⲏⲗ ⲡⲉⲛⲧⲁϥⲉⲓ ϣⲁⲣⲟⲓ ·
…
207 ⲁϥⲡⲱⲣϫ ⲛⲁⲓ ⲉⲃⲟⲗ ⲁϥⲥⲙⲟⲩ ⲉⲣⲟⲓ ⲙⲛⲛⲁϣⲏⲣⲉ ·
…
208 ⲙⲛⲛⲁϩⲓⲟⲟⲙⲉ ⲉⲧⲃⲉⲡⲁⲓ ⲛⲧⲁⲡⲓⲥⲣⲁⲏⲗ ϫⲓⲣⲁⲛ ⲉⲃⲟⲗ ⲛϩⲏⲧ ·
…
209 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
210 ⲱ ⲓⲱⲥⲏⲫ ⲡⲇⲓⲕⲁⲓⲟⲥ · ⲛⲥⲁⲃⲉ ⲡⲉⲛⲧⲁⲩⲕⲱϩ ⲉⲣⲟϥ ⲉⲕⲣⲟⲩ ·
…
211 ϩⲱⲱⲕ ⲙⲡⲉⲓⲙⲁ ⲙⲡϩⲟⲟⲩ · ⲉⲕⲣⲁϣⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
212 ⲁⲗⲗⲁ ⲡⲉϫⲁϥ ⲛϭⲓⲓⲱⲥⲏⲫ ⲡⲇⲓⲕⲁⲓⲟⲥ · ϫⲉⲁⲗⲏⲑⲱⲥ ϯⲙⲡϣⲁ ⲛⲣⲁϣⲉ ⲙⲡϩⲟⲟⲩ · ϫⲉⲛⲧⲉⲣⲉⲛⲁⲥⲛⲏⲩ ⲕⲱϩ ⲉⲣⲟⲓ ⲁⲩⲧⲁⲁⲧ ⲉⲃⲟⲗ · ⲉⲩ ⲛϣⲙⲙⲟ ·
…
213 ⲁⲓϣⲱⲡⲉ ⲛⲉⲃⲓⲏⲛ · ⲛⲧⲁⲗⲁⲓⲡⲟⲣⲟⲥ · ⲛⲁⲧⲣⲱⲙⲉ ϩⲛⲟⲩⲛⲟϭ ⲛⲑⲗⲓⲯⲓⲥ ·
…
214 ⲁⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲉⲓϣⲁⲣⲟⲓ ⲁϥⲛⲁϩⲙⲧ ⲁϥⲁⲁⲧ ⲛⲣⲣⲟ ·
…
215 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
216 ⲙⲱⲩⲥⲏⲥ ⲙⲛⲁⲁⲣⲱⲛ · ⲙⲛⲓⲏⲥⲟⲩ ⲛⲛⲁⲩⲏ ·
…
217 ⲁϩⲣⲱⲧⲛ ⲛϩⲱⲧⲧⲏⲩⲧⲛ ϩⲙⲡⲉⲓⲛⲟϭ ⲛⲣⲁϣⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
218 ⲡⲉϫⲁⲩ ⲛϭⲓⲛⲉⲧⲟⲩⲁⲁⲃ · ϫⲉⲡⲱⲛⲣⲱ ⲡⲉ ⲡϣⲁ ⲁⲩⲱ ⲧⲛⲣⲁϣⲉ · ϫⲉⲙⲓⲭⲁⲏⲗ ⲡⲉⲛⲧⲁϥⲙⲟⲟϣⲉ ⲛⲙⲙⲁⲛ · ⲙⲛⲡⲉϥⲗⲁⲟⲥ ·
…
219 ⲁⲩⲱ ⲁϥϭⲱⲧⲡ ⲛⲛⲉⲛϫⲁϫⲉ ⲁϥϫⲓ ⲙⲟⲉⲓⲧ ϩⲏⲧⲛ ⲉϩⲟⲩⲛ ⲉⲡ ⲙⲡⲉⲣⲏⲧ ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ·
…
220 ⲅⲉⲇⲉⲱⲛ ϯⲛⲁⲩ ⲉⲣⲟⲕ ⲉⲕⲣⲁϣⲉ ⲙⲡϩⲟⲟⲩ ϩⲱⲱⲕ ϩⲙⲡⲁⲣⲓⲥⲧⲟⲛ · ⲙⲙⲓⲭⲁⲏⲗ ·
…
221 ϯⲣⲁϣⲉ ϩⲱⲱⲧ ⲡⲉϫⲁϥ ⲙⲡϩⲟⲟⲩ · ⲉⲡⲉⲓⲇⲏ ⲙⲓⲭⲁⲏⲗ · ⲡⲉⲛⲧⲁϥⲉⲓ ϣⲁⲣⲟⲓ ·
…
222 ⲁϥⲙⲁϩⲧ ϩⲛⲧⲉϥϭⲟⲙ ·
…
223 ⲁϥⲃⲱⲕ ⲁϥⲡⲁⲧⲁⲥⲥⲉⲓ ⲙⲙⲁϯϩⲁⲙ ·
…
224 ⲁϥⲟⲩϫⲁⲓ ⲛϭⲓⲡⲁⲗⲁⲟⲥ ·
…
225 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖ⲻ
…
226 ⲱ ⲙⲁⲛⲱⲉ ⲙⲛⲁⲛⲛⲁ ⲧⲉϥⲥϩⲓⲙⲉ · ⲟⲩⲏⲣ ⲡⲉⲡⲉⲧⲛⲣⲁϣⲉ ⲙⲡϩⲟⲟⲩ ·
…
227 ⲡⲉϫⲁⲩ ⲛϭⲓⲛⲉⲕⲣⲓⲧⲏⲥ ϫⲉⲉⲡⲉⲓⲇⲏ ·
…
228 ⲁⲛⲟⲛ ϩⲉⲛⲁϭⲣⲏⲛ ϫⲓⲛⲧⲛⲙⲛⲧⲕⲟⲩⲓ ⲙⲡⲉϣⲏⲣⲉ ϣⲱⲡⲉ ⲛⲁⲛ ·
…
229 ⲁⲛϭⲱ ⲛϣⲗⲏⲗ ⲛⲧⲁⲗⲉⲡⲣⲟⲥⲫⲟⲣⲁ ⲉϩⲣⲁⲓ · ⲙⲡⲛⲟⲩⲧⲉ · ⲉⲩⲣⲡⲙⲉⲉⲩⲉ ⲛⲁⲛ ·
…
230 ⲁⲡⲛⲟⲩⲧⲉ ϯ ⲛⲁⲛ ⲛⲥⲁⲙⲯⲱⲛ ⲡⲇⲩⲛⲁⲧⲟⲥ ⲁⲩⲱ ⲡⲛⲕⲉϣⲏⲣⲉ ϩⲱⲱϥ ⲣⲁϣⲉ ⲛⲙⲙⲁⲛ ⲙⲡϩⲟⲟⲩ ·
…
231 ⲇⲁⲩⲉⲓⲇ ⲡⲉⲓⲱⲧ ⲙⲡⲉⲭⲣⲓⲥⲧⲟⲥ · ⲕⲁⲧⲁⲥⲁⲣⲝ ⲁⲩⲱ ⲡⲣⲣⲟ ⲛⲇⲓⲕⲁⲓⲟⲥ ·
…
232 ϯⲛⲁⲩ ⲉⲣⲟⲕ ⲙⲡϩⲟⲟⲩ ⲉⲕϭⲛϭⲛ ϩⲛⲧⲉⲕⲕⲓⲑⲁⲣⲁ ·
…
233 ⲙⲡⲛⲉⲩⲙⲁⲧⲓⲕⲟⲛ ⲙⲙⲏⲧ ⲛⲕⲁⲡ ϩⲙⲡⲁⲣⲓⲥⲧⲟⲛ ⲛⲧⲁⲙⲓⲭⲁⲏⲗ ⲕⲁⲗⲉⲓ ⲙⲙⲟⲓ ⲉⲣⲟϥ ⲙⲡϩⲟⲟⲩ ·
…
234 ⲥⲉ ⲡⲉϫⲁϥ ϯⲣⲁϣⲉ ⲁⲩⲱ ϯⲥⲧⲟⲗⲓⲍⲉ ⁖ ⲉⲡⲉⲓⲇⲏ ⲉⲣⲉⲛⲉϩⲣⲏⲧⲟⲛ · ⲛⲛϣⲁϫⲉ ⲧⲏⲣⲟⲩ ·
…
235 ⲙⲡϫⲟⲉⲓⲥ ⲙⲛⲛⲉϥⲗⲟⲅⲟⲥ ϩⲓϫⲛⲛⲉⲡⲗⲁⲝ ⲙⲡⲁϩⲏⲧ ·
…
236 ⲁⲩⲱ ⲡⲉⲧⲧⲟⲟⲙⲉ ϩⲱⲱϥ ⲉⲡⲉⲓϣⲁⲡⲉ ⲡⲁⲓ · ϫⲉϣⲁⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ·
…
237 ⲁⲩⲱ ϣⲁϥⲛⲁϩⲙⲟⲩ ·
…
238 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
239 ⲥⲟⲗⲟⲙⲱⲛ ⲡⲥⲟⲫⲟⲥ ·
…
240 ⲉⲓⲉ ⲛⲅⲣⲁϣⲉ ⲁⲛ ⲛⲧⲟⲕ ⲙⲡϩⲟⲟⲩ ϩⲙⲡⲣⲁϣⲉ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
241 ⲥⲉ ⲡⲉϫⲁϥ ⲛϭⲓⲥⲟⲗⲟⲙⲱⲛ · ¹ ϯⲣⲁϣⲉ ⲙⲡϩⲟⲟⲩ · ⲉⲡⲉⲓⲇⲏ ⲙⲓⲭⲁⲏⲗ · ⲡⲁⲣⲭⲁⲅⲅⲉⲗⲟⲥ ·
…
242 ⲡⲉⲛⲧⲁϥⲁⲁ ϩⲉⲣⲁⲧϥ ⲛⲙⲙⲁⲓ ϫⲓⲛⲧⲁⲙⲛⲧⲕⲟⲩⲓ ·
…
243 ⲁϥⲧⲣⲉⲟⲩⲉⲓⲣⲏⲛⲏ ϣⲱⲡⲉ ϩⲛⲛⲁϩⲟⲟⲩ ·
…
244 ⲁϥϥⲓ ⲙⲡⲁⲧⲧⲱⲃϩ ⲉϩⲣⲁⲓ ϣⲁⲡⲛⲟⲩⲧⲉ ·
…
245 ⲁⲓⲕⲱⲧ ⲙⲡⲉϥⲏⲓ ⁖ⲻ
…
246 ⲉⲍⲉⲕⲓⲁⲥ ⲡⲣⲣⲟ ⲛⲇⲓⲕⲁⲓⲟⲥ ·
…
247 ⲕⲣⲁϣⲉ ϩⲱⲱⲕ ⲙⲡϩⲟⲟⲩ ϩⲙⲡϣⲁ ⲙⲡⲁⲣⲭⲏⲥⲧⲣⲁϯⲅⲟⲥⲙⲓⲭⲁⲏⲗ ·
…
248 ⲥⲉ ⲡⲉϫⲁϥ ϯⲣⲁϣⲉ ·
…
249 ⲉⲡⲉⲓⲇⲏ ⲙⲡⲛⲁⲩ ⲛⲧⲁⲛ ⲁⲥⲥⲩⲣⲓⲟⲥ ⲕⲱⲧⲉ ⲉⲣⲟⲓ · ⲙⲛⲡⲁⲗⲁⲟⲥ ·
…
250 ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲡⲉⲛⲧⲁϥⲃⲱⲕ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ·
…
251 ⲛⲧⲉⲩϣⲉ ⲉⲩⲉⲓⲣⲉ ⲙⲙⲛⲧϣⲙⲏⲛ ⲛⲧⲃⲁ ⲟⲩϭⲁⲥ ⲛⲣⲱⲙⲉ ·
…
252 ⲁⲓⲟⲩϫⲁⲓ ⲙⲛⲡⲁⲗⲁⲟⲥ ·
…
253 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ⁖
…
254 ⲱ ⲏⲥⲁⲓⲁⲥ ⲡⲛⲟϭ ⲙⲡⲣⲟⲫⲏⲧⲏⲥ · ⲟⲩϩⲱⲱⲕ ⲡⲉⲡⲉⲕⲣⲁϣⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲡⲁⲓ ⲡⲉ ⲡⲣⲁϣⲉ ·
…
255 ⲡⲉϫⲁϥ ϫⲉⲛⲛⲟϭⲛⲉϭ ⲧⲏⲣⲟⲩ ⲙⲛⲛⲉⲓⲥⲱϣ ⲛⲧⲁⲩⲧⲁⲁⲩ ⲛⲁⲓ ϩⲓⲧⲛⲙⲁⲛⲁⲥⲥⲏ ·
…
256 ⲙⲛⲛⲉⲧⲛⲙⲙⲁϥ ⲙⲓⲭⲁⲏⲗ ⲡⲉⲛⲧⲁϥⲁϩⲉⲣⲁⲧϥ ⲛⲙⲙⲁⲓ ·
…
257 ⲁⲩⲱ ⲛⲧⲟϥ ⲡⲉⲛⲧⲁϥϯϭⲟⲙ ⲛⲁⲓ ϣⲁⲛⲧⲟⲩⲁⲥⲧ ϩⲛⲧⲁⲙⲏⲧⲉ ϩⲛⲟⲩⲗⲉⲛⲑⲏⲛ ⲛϣⲉ ·
…
258 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩⲡⲁⲉⲓⲱⲧ ⲉⲧⲟⲩⲁⲁⲃ ⁖
…