1 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛⲁⲩ ·
…
2 ⲛϭⲓⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲉⲩⲛⲏϫ ⲉⲃⲟⲗ ϩⲓϫⲙⲡⲕⲁϩ ⲛⲧϩⲉ ⲛⲛⲉⲧⲙⲟⲟⲩⲧ ·
…
3 ⲁϥⲁⲙⲁϩⲧⲉ ⲛⲛⲉⲩϭⲓϫ ·
…
4 ⲁϥⲧⲟⲩⲛⲟⲥⲟⲩ ·
…
5 ⲁϥⲛⲟⲩϫ ⲛⲧϩⲟⲧⲉ ⲛⲥⲁⲃⲟⲗ ⲙⲙⲟⲟⲩ ·
…
6 ⲁϥϯ ⲛⲁⲩ ⲛⲛⲟⲩⲃ ⲉϥϫⲱ ⲙⲙⲟⲥ · ϫⲉⲛⲛⲉⲩⲱϫⲛ ⲟⲩⲇⲉ ⲛⲛⲉⲩϣⲱⲱⲧ ⲟⲩⲇⲉ ⲛⲛⲉⲧⲛⲣϩⲁⲏ ⲛⲗⲁⲁⲩ ⲛⲁⲅⲁⲑⲱⲛ ·
…
7 ⲟⲩⲇⲉ ⲛⲛⲉⲧⲛⲉⲓ ⲉⲡⲁϩⲟⲩ ϩⲛⲛⲉⲧⲛⲑⲩⲥⲓⲁ · ⲙⲛⲛⲉⲧⲛⲁⲅⲁⲡⲏ ϫⲓⲛⲙⲡϩⲟⲟⲩ ϣⲁⲡⲉⲧⲛϫⲱⲕ ⲉⲃⲟⲗ ·
…
8 ⲧⲱⲟⲩⲛ ϭⲉ ⲧⲉⲛⲟⲩ ⲛⲧⲉⲧⲛϫⲱⲕ ⲉⲃⲟⲗ ⲙⲡϣⲁ ϩⲛⲟⲩⲥⲡⲟⲩⲇⲏ ⲉⲛⲁⲛⲟⲩⲥ ⲁⲩⲱ ⲛⲧⲉⲧⲛϫⲱⲕ ⲉⲃⲟⲗ ⲙⲡⲉⲧⲛⲣⲁϣⲉ · ⲛⲧⲉⲧⲛⲕⲱ ⲉⲃⲟⲗ ⲛⲛⲉⲥⲛⲏⲩ ⲛⲧⲁⲩⲉⲓ ϣⲁⲣⲱⲧⲛ ·
…
9 ϩⲙⲡⲁⲣⲡⲙⲉⲉⲩⲉ ⲛⲅⲧⲛⲛⲟⲟⲩ ⲧⲁⲥⲟⲩ ⲙⲡⲉⲥⲟⲟⲩ · ⲙⲛⲧⲁⲡⲧⲃⲧ ·
…
10 ⲁⲩⲱ ⲛⲅⲥⲱⲧⲉ ⲛⲧⲉϣⲧⲏⲛ ·
…
11 ⲁⲩⲱ ⲡϣⲟⲙⲛⲧ ⲛϣⲉ ⲛϩⲟⲗⲟⲕⲟⲧⲓⲛⲟⲥ · ⲙⲛⲡⲕⲉϣⲟⲙⲛⲧ ⲛⲧⲏⲣⲙⲏⲥⲓⲟⲛ ·
…
12 ⲁⲩⲱ ⲉⲣⲉⲧⲉⲥⲫⲣⲁⲅⲓⲥ ϩⲓϫⲱⲟⲩ ⲉⲩⲧⲟⲟⲃⲉ · ϩⲙⲡⲣⲁⲛ ⲙⲡⲉⲓⲱⲧ ⲙⲛⲡϣⲏⲣⲉ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲟⲩⲙⲛⲧ‐ⲛⲟⲩⲧⲉ ⲛⲟⲩⲱⲧ ⲉⲥϫⲏⲕ ⲉⲃⲟⲗ ·
…
13 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛⲁⲩ ⲁϥϯ ⲛⲁⲩ ⲛⲧⲉⲓⲣⲏⲛⲏ ⲁϥⲃⲱⲕ ⲉϩⲣⲁⲓ ⲙⲡⲏⲩⲉ ϩⲛⲟⲩⲉⲟⲟⲩ ⲙⲛⲛⲉϥⲁⲅⲅⲉⲗⲟⲥ ⲉⲧⲟⲩⲁⲁⲃ · ⲉⲣⲉⲇⲱⲣⲟⲑⲉⲟⲥ · ⲙⲛⲑⲉⲱⲡⲓⲥⲧⲏ ϭⲱϣⲧ ⲛⲥⲱϥ ·
…
14 ϣⲁⲛⲧⲉϥⲃⲱⲕ ⲉϩⲣⲁⲓ ⲉⲧⲡⲉ ϩⲛⲟⲩⲉⲓⲣⲏⲛⲏ ϩⲁⲙⲏⲛ ·
…
15 ⲇⲱⲣⲟⲑⲉⲟⲥ ⲇⲉ ⲙⲛⲑⲉⲱⲡⲓⲥⲧⲏ ·
…
16 ⲁⲩⲉⲓⲣⲉ ⲕⲁⲧⲁⲧϩⲉ ⲛⲧⲁϥϩⲱⲛ ⲉⲧⲟⲟⲧⲟⲩ ⲛϭⲓⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
17 ⲁⲩϫⲱⲕ ⲉⲃⲟⲗ ⲙⲡϣⲁ · ϩⲛⲟⲩⲥⲡⲟⲩⲇⲏ · ⲉⲛⲁⲛⲟⲩⲥ ·
…
18 ⲁⲩⲱ ⲙⲡⲟⲩⲕⲁⲧⲟⲟⲧⲟⲩ ⲉⲃⲟⲗ ⲙⲡⲉⲧⲟⲩⲉⲓⲣⲉ ⲙⲙⲟϥ ϩⲛϩⲉⲛⲑⲩⲥⲓⲁ ⲙⲛϩⲉⲛⲡⲣⲟⲥⲫⲟⲣⲁ · ϩⲙⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
19 ϣⲁⲡⲉϩⲟⲟⲩ ⲙⲡⲉⲩϫⲱⲕ ⲉⲃⲟⲗ ·
…
20 ⲁⲣⲁ ⲛⲁⲙⲉⲣⲁⲧⲉ ·
…
21 ⲁⲧⲉⲧⲛⲡⲗⲏⲣⲟⲫⲟⲣⲉⲓ ⲛⲟⲩⲕⲟⲩⲓ ·
…
22 ⲉϫⲛⲛⲉⲛⲧⲁⲧⲉⲧⲛⲥⲟⲧⲙⲟⲩ ⲧⲏⲣⲟⲩ · ⲁⲣⲁ ⲙⲡⲉⲛⲓⲁⲓⲛⲓⲅⲙⲁ ⲧⲏⲣⲟⲩ ⲣⲱϣⲉ ⲉⲧⲉⲧⲛⲡⲉⲧⲛϩⲏⲧ · ⲁⲣⲁ ⲉⲧⲉⲧⲛⲁϫⲛⲁⲩ ⲟⲛ ⲉⲧⲓ ⲙⲡⲛⲟⲩⲧⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
23 ⲁⲣⲁ ⲁⲧⲉⲧⲛⲑⲁⲣⲉⲓ ⲉϫⲛⲛⲉⲛⲧⲁⲧⲉⲧⲛⲧⲁⲁⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉϥⲛⲁⲧⲁⲁⲩ ⲛⲏⲧⲛ ⲙⲛⲧⲉⲩⲙⲏⲏⲥⲉ ·
…
24 ⲉⲓⲥϩⲏⲏⲧⲉ ⲅⲁⲣ ⲱ ⲛⲁⲙⲉⲣⲁⲧⲉ ·
…
25 ⲁⲧⲉⲧⲛⲛⲁⲩ ⲉⲧⲛⲟϭ ⲛⲇⲱⲣⲉⲁ ⲙⲡⲛⲟⲩⲧⲉ · ⲛⲧⲁⲥⲧⲁϩⲉⲡⲉⲓⲣⲱⲙⲉ ⲉⲧⲟⲩⲁⲁⲃ ⲇⲱⲣⲟⲑⲉⲟⲥ ⲙⲛⲧⲉϥⲥϩⲓⲙⲉ ⲑⲉⲱⲡⲓⲥⲧⲏ ϫⲉⲛⲧⲉⲣⲟⲩⲥⲟⲩⲧⲱⲛ ⲙⲡⲉⲩϩⲏⲧ ⲉϩⲟⲩⲛ ⲉⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
26 ⲁⲡⲛⲟⲩⲧⲉ ϩⲱⲱϥ ⲥⲟⲟⲩⲧⲛ ⲛⲧⲉϥⲁⲅⲁⲡⲏ ⲉϩⲟⲩⲛ ⲉⲣⲟⲟⲩ ·
…
27 ⲁϥⲧⲛⲛⲟⲟⲩ ⲛⲁⲩ · ⲙⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
28 ⲁϥⲥⲟⲟⲩⲧⲛ ⲛⲁⲩ ⲛⲟⲩⲛⲟϭ ⲙⲙⲛⲧⲣⲙⲙⲁⲟ ⲛⲁⲧⲱϫⲛ ·
…
29 ⲙⲛⲡⲕⲉⲥⲟⲗⲥⲗ ⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
30 ⲁⲛⲟⲛ ⲇⲉ ϩⲱⲱⲛ ⲱ ⲛⲁⲙⲉⲣⲁⲧⲉ ·
…
31 ⲁⲩⲱ ⲛⲁⲥⲛⲏⲩ ⲉⲓⲥϩⲏⲏⲧⲉ ⲁⲛⲉⲓⲙⲉ ϩⲛⲟⲩⲙⲉ ϫⲉⲛⲕⲁ ⲛⲓⲙ ·
…
32 ⲉⲧⲛⲛⲁⲧⲁⲁⲩ ⲙⲡⲛⲟⲩⲧⲉ ϩⲙⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲧⲛⲛⲁϫⲓⲧⲟⲩ ⲙⲛⲡⲉⲩⲕⲱⲃ ϩⲙⲡⲉⲓⲕⲟⲥⲙⲟⲥ ⲙⲡⲁⲧⲛⲡⲱϩ ⲣⲱ ⲉⲛⲁⲙⲡⲏⲩⲉ · ⲧⲉⲛⲟⲩ ϭⲉ ⲱ ⲛⲁⲕⲣⲱⲁⲧⲏⲥ ·
…
33 ⲙⲡⲣⲧⲣⲉⲛϫⲛⲁⲩ · ⲉϯ ⲕⲁⲧⲁⲧⲉⲛϭⲟⲙ · ⲉⲛⲥⲟⲟⲩⲛ ϫⲉⲡⲧⲉⲧⲛⲛⲁⲧⲁⲁϥ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ϥⲛⲁⲇⲓⲁⲕⲟⲛⲉⲓ ⲙⲙⲟⲟⲩ ⲛⲁⲛ ϩⲛⲟⲩⲣⲁϣⲉ ·
…
34 ⲕⲁⲛ ⲟⲩⲕⲟⲩⲓ ⲡⲉ ·
…
35 ⲕⲁⲛ ⲟⲩⲛⲟϭ ⲡⲉ · ϥⲛⲁϫⲓ ⲛⲧⲛⲡⲣⲟϩⲩⲣⲉⲥⲓⲥ ⲛⲧⲟⲟⲧⲛ ·
…
36 ⲙⲉⲣⲉⲡⲛⲟⲩⲧⲉ ⲅⲁⲣ ϫⲓⲛⲟⲩⲛ ⲉⲩϩⲱⲃ · ⲡⲁⲣⲁⲧⲉⲛϭⲟⲙ ·
…
37 ⲁⲗⲗⲁ ⲟⲩⲡⲣⲟϩⲩⲣⲉⲥⲓⲥ ⲙⲙⲁⲧⲉ ⲧⲉ ⲧⲉϥϣⲓⲛⲉ ⲛⲥⲱⲥ ·
…
38 ⲉϣϫⲉⲙⲙⲟⲛ ⲥⲱⲧⲙ ⲙⲡⲉⲟⲩⲟⲉⲓϣ ⲉⲣⲉⲡⲉⲛⲥⲱⲧⲏⲣ ϩⲙⲡⲕⲟⲥⲙⲟⲥ ⲛⲙⲙⲁⲛ ·
…
39 ⲛⲉⲧⲉⲣⲉⲛⲣⲙⲙⲁⲟ ⲉⲓⲣⲉ ⲙⲙⲟⲟⲩ ⲧⲏⲣⲟⲩ ⲉⲩⲛⲟⲩϫ ⲙⲙⲟⲟⲩ · ⲉⲡⲕⲁⲍⲟⲫⲩⲗⲁⲕⲓⲟⲛ ·
…
40 ⲁⲩⲱ ⲙⲡⲉⲡⲛⲟⲩⲧⲉ ⲧⲙⲁⲓⲟⲟⲩ ⲛϩⲟⲩⲟ ·
…
41 ⲁⲗⲗⲁ ⲛⲧⲉⲣⲉⲧⲉⲭⲏⲣⲁ ⲛϩⲏⲕⲉ ⲕⲱⲧⲉ ϩⲙⲡⲉⲥⲏⲓ ⲁⲥϩⲉ ϩⲙⲡⲉⲥⲏⲓ ⲉⲗⲉⲡⲧⲏⲛ ⲥⲛⲁⲩ · ⲉⲧⲉⲛⲟⲙⲓⲥⲙⲁ ⲥⲛⲁⲩ ⲛⲉ · ⲛⲧⲁⲥⲛⲧⲟⲩ ϩⲛⲟⲩϭⲉⲡⲏ ⲁⲥⲛⲟϫⲟⲩ ⲉⲡⲕⲁⲍⲟⲫⲩⲗⲁⲕⲓⲟⲛ ·
…
42 ⲁⲩⲱ ⲁⲡⲛⲟⲩⲧⲉ ϫⲓⲛⲧⲉⲥⲡⲣⲟϩⲩⲣⲉⲥⲓⲥ ⲛⲧⲟⲟⲧⲥ ·
…
43 ⲁⲩⲱ ⲁϥⲙⲁⲕⲁⲣⲓⲍⲉ ⲙⲙⲟⲥ · ϫⲉⲡⲉⲛⲧⲁⲥϩⲉ ⲉⲣⲟϥ ⲧⲏⲣϥ ϩⲙⲡⲉⲥⲏⲓ ⲁⲥⲧⲁⲁϥ ⲙⲡϫⲟⲉⲓⲥ
…
44 ⲛⲧⲟⲕ ⲇⲉ ϩⲱⲱⲕ ⲱ ⲡⲁⲙⲉⲣⲓⲧ ·
…
45 ⲁⲣⲓ ⲁⲡⲁ ⲧⲟⲟⲧⲕ ⲉϯ ⲙⲡⲛⲟⲩⲧⲉ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
46 ⲁⲩⲱ ⲡⲛⲟⲩⲧⲉ ϩⲱϥ ⲛⲁϯ ⲛⲁⲕ ⲛⲟⲩⲁϣⲏ ⲛⲁⲅⲁⲑⲟⲛ
…
47 ⲁⲩⲱ ⲙⲓⲭⲁⲏⲗ ⲛⲁⲇⲓⲁⲕⲟⲛⲉⲓ ⲙⲙⲟⲟⲩ ⲛⲁⲕ ·
…
48 ⲉⲕϣⲁⲛϯ ⲛⲟⲩⲡⲣⲟⲥⲫⲟⲣⲁ ⲙⲡⲛⲟⲩⲧⲉ ϩⲙⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
49 ⲡⲛⲟⲩⲧⲉ ϩⲱⲱϥ ⲛⲁⲧⲙⲙⲟⲕ ⲙⲡⲟⲉⲓⲕ ⲙⲡⲱⲛϩ ϩⲛⲙⲡⲏⲩⲉ ·
…
50 ⲉⲕϣⲁⲛϩⲉⲃⲥ ⲟⲩⲁ ⲉϥⲕⲏⲕⲁϩⲏⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
51 ⲡⲛⲟⲩⲧⲉ ϩⲱⲱϥ ⲛⲁϯ ⲛⲁⲕ ⲛⲟⲩϩⲃⲥⲱ ⲛⲟⲩⲟⲉⲓⲛ ϩⲛⲙⲡⲏⲩⲉ ·
…
52 ⲉⲕϣⲁⲛϯⲛⲟⲩⲁⲡⲟⲧ ⲛⲏⲣⲡ ⲛⲟⲩⲁ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
53 ⲡⲛⲟⲩⲧⲉ ϩⲱⲱϥ ⲛⲁⲧⲥⲟⲕ ⲉⲃⲟⲕ ϩⲙⲡⲅⲉⲛⲏⲙⲁ ⲛⲧⲃⲱ ⲛⲉⲗⲟⲟⲗⲉ ⲙⲙⲉ ·
…
54 ⲁⲩⲱ ⲕⲁⲛ ⲟⲛ ⲙⲛⲧⲁⲕ ⲏⲣⲡ ⲙⲙⲁⲩ ⲙⲡⲛⲁⲩ ⲛⲣⲡⲁⲓ ·
…
55 ⲧⲥⲉⲟⲩⲁ ⲙⲙⲟⲟⲩ ⲙⲙⲁⲧⲉ ϩⲙⲡⲣⲁⲛ ⲙⲙⲓⲭⲁⲏⲗ ⲡⲛⲟⲩⲧⲉ ϩⲱⲱϥ ⲛⲁⲧⲥⲟⲕ ⲉⲃⲟⲗ ϩⲛⲧⲡⲏⲅⲏ ⲙⲙⲟⲩ ⲛⲱⲛϩ ⲉⲧⲥⲱⲕ ⲉⲃⲟⲗ ϩⲁⲡⲉϥⲑⲣⲟⲛⲟⲥ ⲉⲧⲟⲩⲁⲁⲃ ⁖ⲻ
…
56 ⲉⲕϣⲁⲛⲃⲱⲕ ⲉϭⲙⲡϣⲓⲛⲉ ⲛⲟⲩⲁ ⲉϥϣⲱⲛⲉ ⲙⲙⲁⲧⲉ ·
…
57 ⲙⲡⲉϩⲟⲟⲩ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
58 ⲡⲛⲟⲩⲧⲉ ϩⲱⲱϥ ⲛⲁⲧⲛⲛⲟⲟⲩ ⲙⲙⲓⲭⲁⲏⲗ · ⲛϥϭⲙⲡⲉⲕϣⲓⲛⲉ ϩⲙⲡⲉϩⲟⲟⲩ ⲙⲡⲛⲟϭ ⲛϣⲱⲛⲉ · ⲉⲧⲉⲡϣⲱⲛⲉ ⲡⲉ ⲙⲡⲉⲕⲙⲟⲩ ·
…
59 ⲁⲩⲱ ⲉⲕϣⲁⲛⲃⲱⲕ ϣⲁⲟⲩⲁ ⲉϥϩⲙⲡⲉϣⲧⲉⲕⲟ ϩⲙⲡⲉϩⲟⲟⲩ ⲙⲡϣⲁ ⲙⲙⲓⲭⲁⲏⲗ ⲛⲅⲥⲗⲥⲱⲗϥ ·
…
60 ⲡⲛⲟⲩⲧⲉ ϩⲱⲱϥ ⲛⲁⲧⲛⲛⲟⲟⲩ ⲛⲁⲕ ⲙⲙⲓⲭⲁⲏⲗ · ⲛϥⲛⲁϩⲙⲉⲕ ⲉⲃⲟⲗ ϩⲙⲡⲉϣⲧⲉⲕⲟ ⲛⲁⲙⲛⲧⲉ ·
…
61 ⲁⲩⲱ ⲡⲛⲟⲩⲧⲉ ϩⲱⲱϥ ⲛⲁϫⲟⲟⲥ ⲛⲁⲕ ϫⲉⲛⲉⲓϩⲙⲡⲉϣⲧⲉⲕⲟ ⲁⲧⲉⲧⲛⲉⲓ ϣⲁⲣⲟⲓ ·
…
62 ⲉⲕϣⲁⲛⲕⲱⲧ ⲛⲟⲩⲉⲕⲕⲗⲏⲥⲓⲁ · ϩⲓϫⲙⲡⲕⲁϩ ⲉⲡⲣⲁⲛ ⲙⲙⲓⲭⲁⲏⲗ ·
…
63 ⲡⲛⲟⲩⲧⲉ ϩⲱⲱϥ ⲛⲁⲕⲱⲧ ⲛⲁⲕ ⲛⲟⲩⲏⲓ ⲛⲁⲧⲙⲟⲩⲛⲕ ⲛϭⲓϫ ϩⲛⲙⲡⲏⲩⲉ ·
…
64 ⲉⲕϣⲁⲛⲛⲁⲩ ⲉⲩϭⲱⲃ ⲏ ⲟⲩⲁ ⲉⲣⲉϩⲉⲛⲡⲗⲩⲅⲏ ϩⲙⲡⲉϥⲥⲱⲙⲁ · ⲛⲅⲑⲩⲣⲁⲡⲉⲩⲉ ⲙⲙⲟϥ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
65 ⲡⲛⲟⲩⲧⲉ ϩⲱⲱϥ ⲛⲁϣⲛϩⲧⲏϥ ϩⲁⲣⲟⲕ ⲛϥⲑⲩⲣⲁⲡⲉⲩⲉ ⲙⲙⲟⲕ ⲉⲃⲟⲗ ϩⲛⲛⲉⲡⲗⲩⲅⲉ ⲛⲁⲙⲛⲧⲉ · ϫⲉϥⲥⲏϩ ϫⲉⲛⲁⲓⲁⲧⲟⲩ ⲛⲛⲛⲁϩⲏⲧ · ϫⲉⲛⲧⲟⲟⲩ ⲛⲉⲧⲟⲩⲛⲁⲛⲁⲩ
…
66 ⲁⲩⲱ ⲟⲛ ϫⲉⲛⲁⲧⲁⲣⲟⲩⲛⲁ ⲛⲏⲧⲛ ·
…
67 ⲁⲩⲱ ϫⲉⲡⲛⲁ ϣⲁϥϣⲟⲩϣⲟⲩ ⲙⲙⲟϥ ϩⲓϫⲛⲧⲉⲕⲣⲓⲥⲓⲥ ·
…
68 ⲁⲩⲱ ⲟⲛ ϫⲉϣⲁⲣⲉⲧⲁⲅⲁⲡⲏ ϩⲱⲃⲥ ⲉⲃⲟⲗ ⲉϫⲛⲟⲩⲙⲏⲏϣⲉ ⲛⲛⲟⲃⲉ ·
…
69 ⲙⲁⲣⲛⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ
…
70 ⲱ ⲛⲁⲙⲉⲣⲁⲧⲉ ·
…
71 ⲁⲩⲱ ⲛⲁⲥⲛⲏⲩ ⲛⲧⲛⲣⲁⲡⲁ ⲧⲟⲟⲧⲛ ⲉⲙⲉⲣⲉⲧⲁⲅⲁⲡⲏ ⲙⲡⲉϩⲟⲟⲩ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲉⲛⲥⲟⲟⲩϩ ⲉϩⲟⲩⲛ ⲉⲛⲥⲟⲟⲩⲛ ϫⲉⲟⲩϩⲓⲕⲁⲛⲟⲥ ⲡⲉ ·
…
72 ⲁⲩⲱ ⲉϥϩⲏⲛ ⲉϩⲟⲩⲛ ⲉⲡⲛⲟⲩⲧⲉ ⲛⲛⲁⲩ ⲛⲓⲙ ·
…
73 ⲁⲩⲱ ϥⲛⲁϯ ⲙⲡⲟⲩⲁ ⲡⲟⲩⲁ ⲕⲁⲧⲁⲡⲉϥϩⲱⲃ ·
…
74 ⲙⲁⲣⲛⲡⲱⲧ ⲛⲥⲁⲧⲁⲅⲁⲡⲏ ⲱ ⲛⲁⲙⲉⲣⲁⲧⲉ · ϫⲉⲧⲁⲅⲁⲡⲏ ⲟⲩ ⲉⲃⲟⲗ ϩⲙⲡⲛⲟⲩⲧⲉ ·
…
75 ⲁⲩⲱ ⲡⲛⲟⲩⲧⲉ ⲡⲉ ⲧⲁⲅⲁⲡⲏ · ⲟⲩⲛⲁ ⲅⲁⲣ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲡⲉⲛⲉⲓⲱⲧ ⲁⲇⲁⲙ · ⲙⲛⲉⲩϩⲁ ·
…
76 ⲁϥϫⲓ ⲛⲧⲟⲟⲧⲟⲩ ⲛⲧⲉⲩⲙⲉⲧⲁⲛⲟⲓⲁ · ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ·
…
77 ⲁϥⲕⲱ ⲛⲁⲩ ⲉⲃⲟⲗ ⲛⲧⲉⲩⲡⲁⲣⲁⲃⲁⲥⲓⲥ ·
…
78 ⲧⲁⲅⲁⲡⲏ ϩⲱⲱⲥ ⲛⲧⲁϥⲁⲁⲥ ⲙⲛⲁⲃⲉⲗ ⲡⲇⲓⲕⲁⲓⲟⲥ ⲁϥϫⲓ ⲛⲧⲟⲟⲧϥ ⲛⲛⲉϥⲑⲩⲥⲓⲁ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲟⲩⲛⲁ ϩⲱⲱϥ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲉⲛⲱⲭ ⲁϥⲡⲟⲟⲛⲉϥ ⲉⲃⲟⲗ ·
…
79 ⲉⲧⲙⲧⲣⲉϥⲛⲁⲩ ⲉⲡⲙⲟⲩ ·
…
80 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ · ⲧⲉⲛⲧⲁⲡⲛⲟⲩⲧⲉ ⲁⲁⲥ ⲙⲛⲛⲱϩⲉ ⲁϥⲧⲁⲙⲓⲟ ⲛⲁϥ ⲛⲟⲩⲕⲓⲃⲱⲧⲱⲥ ⲁϥⲧⲟⲩϫⲟϥ ⲙⲛⲡⲉϥⲏⲓ ⲧⲏⲣϥ ·
…
81 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ ⲛⲁⲅⲅⲉⲗⲓⲕⲟⲛ ·
…
82 ⲟⲩⲛ ⲁⲡⲉⲛⲧⲁⲡⲛⲟⲩⲧⲉ ⲁⲁϥ · ⲙⲛⲡⲉⲛⲉⲓⲱⲧ ⲁⲃⲣⲁϩⲁⲙ ·
…
83 ⲁϥⲥⲙⲛⲇⲓⲁⲑⲏⲕⲏ ⲛⲙⲙⲁϥ ·
…
84 ⲁϥⲭⲁⲣⲓⲍⲉ ⲛⲁϥ ⲛⲓⲉⲥⲁⲕ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ ϩⲱⲱⲥ ⲧⲉⲛⲧⲁⲡⲛⲟⲩⲧⲉ ⲁⲁⲥ ⲙⲛⲓⲉⲥⲁⲕ ·
…
85 ⲁϥϣⲱⲡ ⲉⲣⲟϥ ⲛⲧⲉϥⲑⲩⲥⲓⲁ ·
…
86 ⲁⲩⲱ ⲁϥϫⲓ ⲉⲛⲟⲩⲉⲥⲟⲟⲩ ⲉⲡⲉϥⲙⲁ · ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ·
…
87 ⲟⲩⲛ ⲁⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲓⲁⲕⲱⲃ ·
…
88 ⲁϥϯ ⲛⲁϥ ⲛⲟⲩⲭⲁⲣⲓⲥ ⲛⲛⲁϩⲣⲛⲏⲥⲁⲩ ⲡⲉϥⲥⲟⲛ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ ⲧⲉⲛⲧⲁϥⲁⲁⲥ ⲙⲛⲓⲱⲥⲏⲫ ·
…
89 ⲁϥⲛⲁϩⲙⲉϥ ⲛϭⲓϫ ⲛⲛⲉϥⲥⲛⲏⲩ ·
…
90 ⲁⲩⲱ ⲉⲧⲟⲟⲧⲥ ⲛⲧⲣⲙⲛⲕⲏⲙⲉ ·
…
91 ϩⲓⲧⲛⲛⲧⲱⲃϩ ⲙⲙⲓⲭⲁⲏⲗ ⲙⲛⲛⲉϥⲥⲟⲡⲥⲡ · ⲟⲩⲛⲁ ⲉⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲙⲱⲩⲥⲏⲥ ⲡⲉⲡⲣⲟⲫⲏⲧⲏⲥ ·
…
92 ⲁϥⲛⲁϩⲙⲉϥ ⲉⲧⲙⲛϩⲙϩⲁⲗ ⲛⲫⲁⲣⲁⲱ ·
…
93 ⲁⲩⲱ ⲁϥⲙⲁϩϥ ⲛⲭⲁⲣⲓⲥ ⲡⲁⲣⲁⲣⲱⲙⲉ ⲛⲓⲙ ·
…
94 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ϩⲱⲱⲥ ⲧⲉ ⲛⲧⲁϥⲁⲁⲥ ⲙⲛⲓⲩ ⲛⲛⲁⲩⲏ ·
…
95 ⲁϥⲧⲣⲉⲡⲣⲏ ⲁϩⲉⲣⲁⲧϥ ⲉⲣⲟϥ · ϩⲛⲅⲁⲃⲁⲱⲛ ⲁϥⲡⲁⲧⲁⲥⲥⲉⲓ ⲛⲛⲉϥϫⲁϫⲉ ⲧⲏⲣⲟⲩ ·
…
96 ϩⲓⲧⲛⲛⲧⲱⲃϩ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ ⲧⲏⲣⲥ : ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲙⲱⲩⲥⲏⲥ ⲁϥϯ ⲛⲁϥ ⲙⲡⲉϥⲛⲟⲙⲟⲥ ·
…
97 ⲁϥⲧⲁⲁϥ ⲛⲛϣⲏⲣⲉ ⲙⲡⲓⲥⲣⲁⲏⲗ ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲇⲁⲩⲉⲓⲇ ⲡⲣⲣⲟ ⲁϥⲥⲟⲡⲧϥ ⲛⲧⲙⲏⲧⲉ ⲛⲛⲉϥⲥⲛⲏⲩ ⲁϥⲧⲁϩⲟϥ ⲉⲣⲁⲧϥ ⲛⲣⲣⲟ ⲉϫⲙⲡⲓⲥⲣⲁⲏⲗ ·
…
98 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ · ⲟⲩⲁⲅⲁⲡⲏ ⲟⲛ ⲧⲉⲛⲧⲁϥⲁⲁⲥ ⲙⲛⲥⲱⲗⲟⲙⲱⲛ ⲡⲉϥϣⲏⲣⲉ ·
…
99 ⲁϥⲟⲩⲉϩⲥⲁϩⲛⲉ ⲛⲁϥ ⲉⲕⲱⲧ ⲙⲡⲏⲓ ⲙⲡϫⲟⲉⲓⲥ ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ : ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲉⲍⲉⲕⲓⲁⲥ ⲡⲣⲣⲟ ⲛⲇⲓⲕⲁⲓⲟⲥ ·
…
100 ⲁϥⲟⲩⲉϩⲕⲉⲙⲛⲧⲏ ⲛⲣⲟⲙⲡⲉ ⲉϫⲛⲛⲣ ⲙⲡϩⲟⲟⲩ ⲙⲡⲉϥⲱⲛϩ ·
…
101 ϩⲓⲧⲛⲛⲥⲟⲡⲥⲡ ⲙⲡⲛⲟϭ ⲛⲁⲣⲭⲱⲛ : ⲟⲩⲁⲅⲁⲡⲏ ϩⲱⲱⲥ ⲧⲉⲛⲧⲁⲡⲛⲟⲩⲧⲉ ⲁⲁⲥ ⲙⲛⲡⲅⲉⲛⲟⲥ ⲛⲁⲇⲁⲙ ·
…
102 ⲁϥⲕⲁⲧⲁⲝⲓⲟⲩ ⲙⲙⲟϥ ⲁϥⲕⲁⲗⲉⲓ ⲙⲙⲟⲛ ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ·
…
103 ϩⲙⲡⲧⲣⲉϥϫⲓⲥⲁⲣⲝ ϩⲙⲙⲁⲣⲓⲁ ⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ ·
…
104 ⲁϥⲧⲁⲁϥ ϩⲁⲣⲟⲛ ⲧⲏⲣⲛ · ϣⲁⲛⲧⲉϥⲥⲟⲧⲛ ⲛⲧⲟⲟⲧϥ ⲛⲁⲙⲛⲧⲉ · ⲛϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ ·
…
105 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ ⲙⲛⲧⲉϥⲧⲁⲝⲓⲥ ⲧⲏⲣⲥ · ⲟⲩⲛⲁ ⲟⲛ ⲡⲉⲛⲧⲁⲡⲛⲟⲩⲧⲉ ⲁⲁϥ ⲙⲛⲛⲉⲛⲉⲓⲟⲧⲉ ⲛⲁⲡⲟⲥⲧⲟⲗⲟⲥ ⲁϥⲥⲟⲧⲡⲟⲩ ⲟⲩⲇⲉ ⲡⲕⲟⲥⲙⲟⲥ ⲧⲏⲣϥ ·
…
106 ⲁⲩⲱ ϩⲓⲧⲛⲡⲉⲩⲧⲁϣⲉⲟⲉⲓϣ ⲛⲧⲁⲛⲉⲓ ⲧⲏⲣⲛ ⲉϩⲟⲩⲛ ⲉⲡⲥⲟⲟⲩⲛ ⲙⲙⲉ ·
…
107 ϩⲓⲧⲛⲛⲥⲟⲡⲥⲡ ⲙⲙⲓⲭⲁⲏⲗ · ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
108 ⲧⲉⲛⲟⲩ ϭⲉ ⲱ ⲛⲁⲙⲉⲣⲁⲧⲉ ⲉⲓⲥϩⲏⲏⲧⲉ ⲁⲛⲉⲓⲙⲉ ϫⲉⲉⲣⲉⲡⲟⲩⲱϣⲉ ⲙⲡⲛⲟⲩⲧⲉ ϣⲱⲡⲉ ϩⲛⲧⲁⲅⲁⲡⲏ ⲙⲛⲡⲛⲉⲩⲙⲁ ·
…
109 ⲁⲩⲱ ϫⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲡⲉⲧⲟ ⲛⲁⲛ ⲙⲡⲣⲟⲥⲧⲁⲧⲏⲥ ·
…
110 ⲁⲩⲱ ⲙⲡⲣⲉⲥⲃⲉⲩⲧⲏⲥ ⲛⲛⲁϩⲣⲙⲡⲛⲟⲩⲧⲉ ·
…
111 ⲙⲁⲣⲛⲡⲱⲧ ⲛⲥⲁⲡⲛⲁ ⲙⲛⲧⲁⲅⲁⲡⲏ · ϫⲉⲉϥⲥⲏϩ ϫⲉⲡⲛⲁ ϣⲁϥϫⲓⲥⲉ ·
…
112 ⲁⲩⲱ ⲧⲁⲅⲁⲡⲏ ϣⲁⲥⲥⲟⲟⲩⲧⲛ ·
…
113 ϣⲁⲣⲉⲡⲛⲁⲏⲧ ⲟⲛ ϫⲟⲟⲥ ϫⲉⲛⲁⲧⲁⲣⲟⲩⲛⲁ ⲛⲏⲧⲛ ϯ ⲧⲁⲣⲟⲩϯ ⲛⲏⲧⲛ ·
…
114 ϩⲙⲡϣⲓ ⲅⲁⲣ ⲉⲧⲉⲧⲛⲛⲁϣⲓ ⲙⲙⲟϥ · ⲉⲩⲛⲁϣⲓ ⲛⲏⲧⲛ ⲙⲙⲟϥ ·
…
115 ⲙⲁⲣⲛϣⲓ ⲛⲟⲩϣⲓ ⲉⲛⲁⲛⲟⲩϥ ⲙⲡϩⲟⲟⲩ · ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
116 ϫⲉⲕⲁⲥ ϩⲱⲱϥ ⲉϥⲉϣⲓ ⲛⲁⲛ · ϩⲛⲟⲩϣⲓ ⲉⲛⲁⲛⲟⲩϥ ·
…
117 ⲛⲛⲟϭ ⲉϥⲛⲉϩⲛⲟⲩϩ ⲉϥⲡⲏⲛ ⲉⲃⲟⲗ ϩⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
118 ⲙⲁⲣⲛⲣϣⲁ ⲟⲛ ⲙⲡϩⲟⲟⲩ ϩⲛⲟⲩϣⲁⲙⲡⲛⲉⲩⲙⲁⲧⲓⲕⲟⲛ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
119 ϫⲉⲕⲁⲥ ⲉϥⲉⲣϣⲁⲛⲙⲙⲁⲛ ⲙⲛⲡⲉⲛϫⲟⲉⲓⲥ ϩⲙⲡϣⲁ ⲉⲧⲙⲏⲛ ⲉⲃⲟⲗ ϩⲛⲙⲡⲏⲩⲉ ·
…
120 ⲙⲁⲣⲛⲕⲱ ϭⲉ ⲛⲥⲱⲛ ⲛⲛⲉϩⲃⲏⲩⲉ ⲙⲡⲕⲁⲕⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
121 ϫⲉⲕⲁⲥ ϩⲱⲱϥ ⲉϥⲉⲧⲃⲃⲟⲛ · ⲛϥϯ ϩⲓⲱⲱⲛ · ⲛⲛϩⲟⲡⲗⲟⲛ ⲙⲡⲟⲩⲟⲉⲓⲛ ·
…
122 ⲙⲁⲣⲛϯⲉⲟⲟⲩ ⲙⲡⲛⲟⲩⲧⲉ ⲙⲡϩⲟⲟⲩ · ϩⲙⲡϣⲁ ⲙⲡⲉϥⲛⲟϭ ⲛⲁⲣⲭⲱⲛ ·
…
123 ϫⲉⲕⲁⲥ ⲉϥⲉϯⲉⲟⲟⲩ ⲛⲁⲛ ϩⲙⲡⲉϥⲛⲟϭ ⲛⲉⲟⲟⲩ ⲉⲧϫⲏⲕ ⲉⲃⲟⲗ ·
…
124 ⲙⲁⲣⲛϯⲡⲉⲛⲟⲩⲟⲓ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ϩⲙⲡⲉϥⲛⲟϭ ⲛϣⲁ ⲙⲡϩⲟⲟⲩ ·
…
125 ⲉⲣⲉⲛⲉⲛⲥⲱⲙⲁ ϫⲟⲕⲙ ϩⲛⲟⲩⲙⲟⲟⲩ ⲉϥⲟⲩⲁⲁⲃ · ⲉⲛⲫⲱⲣⲉ ⲛⲟⲩϩⲃⲥⲱ ⲛⲉⲥⲟⲟⲩ · ⲉⲣⲉⲛⲉⲛϭⲓϫ ⲙⲉϩ ⲛⲕⲗⲁⲇⲟⲥ ⲛⲥϯⲛⲟⲩϥⲉ · ⲉⲛⲥⲟⲡⲥⲡ ⲙⲙⲟϥ ·
…
126 ⲉⲛϫⲱ ⲙⲙⲟⲥ · ϫⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲡⲁⲣⲭⲏⲥⲧⲣⲁⲧⲏⲕⲟⲥ ⲛⲧϭⲟⲙ ⲛⲙⲡⲏⲩⲉ ·
…
127 ⲥⲟⲡⲥⲡ ⲙⲡⲛⲟⲩⲧⲉ ⲉϩⲣⲁⲓ ⲉϫⲱⲛ ⲛϥⲕⲱ ⲛⲁⲛⲉⲃⲟⲗ ⲛⲛⲉⲛⲛⲟⲃⲉ ·
…
128 ⲡⲁⲣⲭⲁⲅⲅⲉⲗⲟⲥ ⲥⲟⲡⲥⲡ ⲙⲡⲛⲟⲩⲧⲉ ϩⲁⲣⲟⲛ ⲛϥⲧⲱϣ ⲛⲁⲛ ⲛⲧⲉⲛⲧⲣⲟⲫⲏ · ⲙⲛⲧⲉⲛϩⲃⲥⲱ · ⲕⲁⲧⲁⲡⲉϥⲟⲩⲱϣⲉ ·
…
129 ⲙⲓⲭⲁⲏⲗ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲥⲟⲡⲥⲡ ⲙⲡⲛⲟⲩⲧⲉ ϩⲁⲣⲟⲛ · ⲛϥⲭⲁⲣⲓⲍⲉ ⲛⲁⲛ ⲛⲟⲩⲉⲣⲏⲛⲏ ⲉϩⲟⲩⲛ ⲉⲛⲉⲛⲉⲣⲏⲩ · ϫⲉⲛⲧⲟⲕ ⲉⲧⲟ ⲛⲉⲓⲣⲏⲛⲏ ·
…
130 ⲕⲥⲟⲟⲩⲛ ⲡⲉⲛⲡⲣⲟⲥⲧⲁⲧⲏⲥ ϫⲉⲁⲛⲟⲛ ⲟⲩⲕⲁϩ ⲙⲛⲟⲩⲕⲣⲙⲉⲥ ·
…
131 ⲁⲩⲱ ⲧⲉⲛⲫⲩⲥⲓⲥ ⲟⲩⲣⲉϥⲥⲗⲁⲁⲧⲉ ⲧⲉ · ⲁⲗⲗⲁ ⲡⲛⲟⲩⲧⲉ ⲟⲩⲛⲁϩⲏⲧ ⲡⲉ ⲛⲣⲉϥⲕⲱ ⲉⲃⲟⲗ · ⲡⲱⲛ ⲡⲉ ⲣⲛⲟⲃⲉ · ⲡⲱⲕ ϩⲱⲱⲕ ⲡⲉ ⲥⲟⲡⲥⲡ ⲉϫⲱⲛ · ⲛⲛⲁϩⲣⲙⲡⲛⲟⲩⲧⲉ ⲛϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ · ⲡⲱⲛ ⲡⲉⲥⲟⲡⲥⲡ ⲙⲡⲛⲟⲩⲧⲉ ·
…
132 ⲡⲱⲕ ϩⲱⲱⲕ ⲱ ⲙⲓⲭⲁⲏⲗ ⲡⲉ ⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ϩⲁⲣⲟⲛ ⲛϥⲕⲱ ⲛⲁⲛ ⲉⲃⲟⲗ · ⲱ ⲙⲓⲭⲁⲏⲗ ⲡⲉⲛⲁⲣⲭⲱⲛ ⲡⲱⲛ ⲡⲉ ϣⲱϥⲧ ·
…
133 ⲡⲱⲕ ϩⲱⲱⲕ ⲟⲛ ⲡⲉ ⲇⲓⲟⲣⲑⲟⲩ ⲙⲙⲟⲛ ⲛⲛⲁϩⲣⲙⲡⲛⲟⲩⲧⲉ ⲡⲉⲛⲣⲣⲟ ·
…
134 ⲧⲛⲥⲟⲟⲩⲛ ⲙⲡⲁⲓ ϩⲛⲟⲩⲙⲉ
…
135 ⲱ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ϫⲉⲛⲧⲟⲕ ⲡⲉ ⲡⲁⲛⲁϩⲱⲣ ⲛⲧⲙⲛⲧϣⲛϩⲧⲏϥ ⲙⲡⲛⲟⲩⲧⲉ ·
…
136 ⲉⲕⲉϣⲱⲡⲉⲧⲉⲛⲟⲩ ⲉⲕⲡⲣⲉⲥⲃⲉⲩⲉ ϩⲁⲣⲟⲛ ⲧⲏⲣⲛ ·
…
137 ⲛⲛⲁϩⲣⲙⲡⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲛⲟⲩⲧⲉ ⲛⲥⲟⲡⲥⲡ ⲛⲓⲙ ·
…
138 ⲡⲉⲧⲥⲙⲁⲙⲁⲁⲧ ϣⲁⲉⲛⲉϩ ⲛϥⲕⲱ ⲛⲁⲛ ⲉⲃⲟⲗ ⲛⲛⲉⲛⲛⲟⲃⲉ ⲛⲧⲁⲛⲁⲁⲩ · ⲛϥⲧⲓⲑⲉ ⲛⲁⲛ ⲛⲧⲛⲕⲱ ⲛⲥⲱⲛ ⲛⲛⲁⲛⲡⲁϩⲟⲩ ⲛⲧⲛⲡⲟⲣϫⲛ ⲉⲛⲁ ⲛⲧϩⲏ ·
…
139 ⲛⲅⲡⲣⲟⲥⲉⲛⲉⲅⲕⲏ ⲙⲙⲟⲛ ⲉⲛⲟⲩⲁⲁⲃ ·
…
140 ⲉⲛⲱ ⲛⲁⲧⲧⲱⲗⲙ ⲙⲡⲉϥⲙⲧⲟ ⲉⲃⲟⲗ ϩⲛⲟⲩⲁⲅⲁⲡⲏ · ϫⲉⲛⲧⲟⲕ ⲱ ⲡⲛⲟϭ ⲛⲁⲣⲭⲏⲥⲧⲣⲁⲧⲏⲕⲟⲥ ⲙⲓⲭⲁⲏⲗ · ⲡⲉ ⲡⲛϥⲁⲓ‐ⲣⲟⲟⲩϣ ·
…
141 ϫⲉⲕⲁⲥ ϩⲱⲱⲛ ⲛⲛⲁϣⲱⲡⲉ · ϩⲛⲛⲉⲕⲙⲁ ⲛⲙⲧⲟⲛ · ϩⲛⲙⲡⲏⲩⲉ ·
…
142 ⲁⲗⲏⲑⲱⲥ ⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ · ⲱ ⲡⲛⲟϭ ⲛⲁⲣⲭⲏⲥⲧⲣⲁⲧⲏⲕⲟⲥ ⲙⲓⲭⲁⲏⲗ ·
…
143 ⲕⲁⲗⲱⲥ ⲁⲕⲉⲓ ⲛⲁⲛ ⲉⲕⲛⲏⲩ ⲙⲛⲡⲉⲕϫⲟⲉⲓⲥ ⲡⲉⲛⲣⲣⲟ ·
…
144 ⲕⲁⲗⲱⲥ ⲁⲥⲉⲓ ⲛϭⲓⲧⲉⲕⲧⲁⲝⲓⲥ ⲧⲏⲣⲥ ⲛⲁⲅⲅⲉⲗⲓⲕⲟⲛ ϩⲙⲡⲉⲓⲛⲟϭ ⲛϣⲁ ⲉⲧⲡⲟⲣϣ ⲛⲁⲛ ⲉⲃⲟⲗ ⲙⲡϩⲟⲟⲩ ·
…
145 ⲁⲕⲣⲟⲩⲛⲟϭ ⲛⲁⲣⲓⲥⲧⲟⲛ ⲉⲣⲟⲛ ⲙⲡϩⲟⲟⲩ ⲱ ⲙⲓⲭⲁⲏⲗ ·
…
146 ⲁⲩⲱ ⲡⲁⲣⲓⲥⲧⲱⲛ ⲛⲧⲁⲕ ⲁⲁϥ ⲉⲣⲟⲛ ⲛⲟⲩⲁⲣⲓⲥⲧⲱⲛ ⲁⲛ ⲡⲉ ⲛϩⲏⲕⲉ ·
…
147 ⲁⲗⲗⲁ ⲟⲩⲁⲣⲓⲥⲧⲱⲛ ⲡⲉ ⲛⲣⲙⲙⲁⲟ · ⲛϩⲉⲛⲁⲣⲭⲱⲛ ⲁⲛ ⲛⲧⲉⲓⲙⲓⲛⲉ ⲛⲉⲧⲛⲏϫ ϩⲙⲡⲉⲓⲁⲣⲓⲥⲧⲱⲛ ·
…
148 ⲁⲗⲗⲁ ⲡϫⲟⲉⲓⲥ ⲡⲛⲛⲁⲧⲡⲉ ⲙⲛⲛⲁⲡⲕⲁϩ · ⲛϩⲉⲛⲣⲱⲙⲉ ⲁⲛ ⲛⲧⲉⲓϩⲉ ϩⲁⲡⲗⲱⲥ ⲛⲉⲧⲇⲓⲁⲕⲟⲛⲉⲓ ⲉⲣⲟⲛ ·
…
149 ⲁⲗⲗⲁ ϩⲉⲛⲁⲅⲅⲉⲗⲟⲥ ⲛⲉ ⲉⲩϣⲙϣⲉ ϩⲁⲣⲁⲧⲕ ⲛⲟⲩⲧⲣⲁⲡⲓⲍⲁ ⲁⲛ ⲧⲉ ⲛⲥⲁⲣⲕⲓⲕⲟⲛ ·
…
150 ⲁⲗⲗⲁ ⲟⲩⲡⲛⲉⲩⲙⲁⲧⲓⲕⲟⲛ ⲧⲉ ⲉⲥⲙⲉϩ ⲛⲱⲛϩ ϣⲁⲉⲛⲉϩ ·
…
151 ⲛⲟⲩⲣⲱⲙⲉ ⲁⲛ ⲡⲉⲧⲣϣⲁ ⲛⲙⲙⲁⲛ ⲙⲡϩⲟⲟⲩ ·
…
152 ⲁⲗⲗⲁ ⲡⲛⲟⲩⲧⲉ ϩⲛⲟⲩⲙⲉ ⲡⲉ · ⲉϥⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ ⲉⲧⲟⲩⲁⲁⲃ ⲉϥϫⲱ ⲙⲙⲟⲥ ⲛⲁⲛ ϫⲉⲕⲁⲗⲱⲥ ⲁⲧⲉⲧⲛⲉⲓ ϣⲁⲣⲟⲛ ⲙⲡϩⲟⲟⲩ ·
…
153 ⲧⲉⲓⲣⲏⲛⲏ ⲛⲏⲧⲛ ⲛⲁⲥⲛⲏⲩ ⲁⲩⲱ ϯⲣⲁϣⲉ ⲛⲙⲙⲏⲧⲛ ⲧⲏⲣⲧⲛ ·
…
154 ϥⲥⲏϩ ⲅⲁⲣ ϫⲉⲡⲙⲁ ⲉⲧⲉⲣⲉⲥⲛⲁⲩ ⲏ ϣⲟⲙⲛⲧ ·
…
155 ⲥⲟⲟⲩϩ ⲛϩⲏⲧϥ ϩⲙⲡⲁⲣⲁⲛ ϯϣⲟⲟⲡ ⲛⲙⲙⲁⲩ ϩⲛⲧⲉⲩⲙⲏⲏⲧⲉ ·
…
156 ⲗⲟⲓⲡⲟⲛ ⲉϣϫⲉ ⲁϥϫⲟⲟⲥ ⲛⲧⲉⲓϩⲉ ⲉⲧⲃⲉⲥⲛⲁⲩ ⲏ ϣⲟⲙⲛⲧ · ⲙⲙⲁⲧⲉ ·
…
157 ⲉⲓⲉ ⲟⲩⲏⲣ ⲧⲉⲛⲟⲩ ⲡⲉ ⲡⲣⲁϣⲉ ⲙⲡϫⲟⲉⲓⲥ ⲡⲉⲛⲣⲣⲟ ⲙⲛⲛⲉϥⲁⲅⲅⲉⲗⲟⲥ ⲉⲧⲟⲩⲁⲁⲃ · ⲉⲩϣⲟⲟⲡ ϩⲛⲧⲉⲛⲙⲏⲧⲉ ⲙⲡϩⲟⲟⲩ · ⲉⲩⲣϣⲁ ⲛⲙⲙⲁⲛ ·
…
158 ϩⲙⲡⲉⲓⲛⲟϭ ⲛⲁⲣⲓⲥⲧⲟⲛ ·
…
159 ⲙⲛⲡⲉⲓⲥⲱⲟⲩϩ ⲉϩⲟⲩⲛ ⲛϩⲟⲟⲩⲧ ϩⲓⲥϩⲓⲙⲉ ·
…
160 ϩⲓϣⲏⲣⲉ ⲕⲟⲩⲓ ϩⲓⲛⲟϭ ⲛⲣⲱⲙⲉ ⲙⲡⲓⲥⲧⲟⲥ ⲉⲩϣⲟⲟⲡ ϩⲙⲡⲉⲓⲛⲟϭ ⲛϣⲁ ⲙⲡⲟⲟ · ⲉⲧⲉⲡϣⲁ ⲡⲉ ⲙⲙⲓⲭⲁⲏⲗ ·
…
161 ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲉϥϯⲉⲟⲟⲩ ⲙⲉⲛ ⲛⲟⲩⲟⲛ ⲛⲓⲙ ⲉⲧⲣϣⲁ ⲛⲁϥ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
162 ⲡⲛⲟϭ ⲛⲥⲧⲣⲁⲧⲏⲅⲟⲥ ⲉⲧⲟⲩⲁⲁⲃ ·
…
163 ⲁⲗⲏⲑⲱⲥ ⲱ ⲛⲁⲙⲉⲣⲁⲧⲉ ⲁⲓϩⲓⲧⲟⲟⲧ ⲉⲩⲛⲟϭ ⲛⲕⲉⲫⲁⲗⲓⲟⲛ ⲡⲁⲣⲁⲧⲁϭⲟⲙ
…
164 ⲁⲩⲱ ⲁⲓⲧⲉⲓ ⲙⲡⲁⲟⲩⲟⲓ ⲉⲩⲛⲟϭ ⲙⲡⲉⲗⲁⲅⲟⲥ ⲉϥⲟⲩⲏⲩ ·
…
165 ⲉⲙⲁⲧⲉ · ⲉⲙⲛϭⲟⲙ ⲙⲙⲟⲓ ⲉϯⲁⲡⲉⲣⲁ ⲙⲙⲟϥ ⲉⲃⲟⲗ ϫⲉⲁⲓϫⲟⲟⲥ ϩⲛⲧⲁⲣⲭⲏ ⲙⲡⲉⲓⲉⲅⲕⲱⲙⲓⲟⲛ ϫⲉⲟⲩⲕⲟⲩⲓ ⲡⲉ ⲡⲁⲥⲕⲁⲫⲟⲥ ·
…
166 ⲁⲩⲱ ⲡⲁⲩⲉⲓⲛ ⲥⲟⲃⲕ ⲁⲩⲱ ϫⲉϯⲛⲟⲉⲓ ⲁⲛ ⲛⲛⲏⲏⲃⲉ ·
…
167 ⲁⲩⲱ ⲟⲛ ϫⲉⲡⲡⲉⲗⲁⲅⲟⲥ ⲛⲁϣⲧ ⲉⲙⲁⲧⲉ ⲉⲧⲉⲡⲁⲓ ⲡⲉ ⲡⲉⲓⲉⲅⲕⲱⲙⲓⲟⲛ ⲙⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
168 ⲧⲡⲁⲣⲁⲕⲁⲗⲉⲓ ⲙⲙⲱⲧⲛ ⲱ ⲛⲉⲥⲛⲏⲩ ·
…
169 ϯⲧⲟⲟⲧ ⲧⲏⲩⲧⲛ ⲛⲙⲙⲁⲓ ϫⲉⲕⲁⲥ ⲉⲓⲉⲛⲟⲩϩⲙ ⲉⲃⲟⲗ ϩⲛⲧⲙⲏⲏⲧⲉ ⲙⲡⲡⲉⲗⲁⲅⲟⲥ ⲛⲁⲧⲁⲣⲏϫϥ · ⲛⲧⲁⲉⲓ ⲟⲛ ϣⲁⲣⲱⲧⲛ ⲉⲡⲉⲕⲣⲟ ϩⲛⲟⲩⲥⲟⲟⲩⲧⲛ ·
…
170 ⲉⲡⲉⲓⲇⲏ ⲁⲓϩⲓⲧⲟⲟⲧ ⲉϣⲁϫⲉ ⲛⲙⲙⲏⲧⲛ ϩⲙⲡⲉⲓⲉⲅⲕⲱⲙⲓⲟⲛ · ⲙⲛⲛⲧⲁⲉⲓⲟ ⲉⲧⲡⲣⲉⲡⲉ ⲙⲡⲉⲧⲛⲣϣⲁ ⲛⲁϥ ⲙⲡϩⲟⲟⲩ · ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲁⲗⲗⲁ ⲟⲩⲗⲁⲥ ⲛⲥⲁⲣⲝ ⲡⲉ ⲡⲁⲗⲁⲥ ·
…
171 ⲁⲩⲱ ⲟⲩⲥⲱⲙⲁ ⲛⲕⲁϩ ⲡⲉ ⲡⲁⲥⲱⲙⲁ ·
…
172 ⲙⲡⲉⲓⲉϣϭⲙϭⲟⲙ ⲉⲡⲱϩ ⲙⲡϣⲓ ⲙⲡⲉϥⲉⲟⲟⲩ · ⲙⲛⲡϫⲱⲕ ⲙⲡⲉϥⲁⲝⲓⲱⲙⲁ ⲉⲧⲟⲩⲁⲁⲃ · ⲱ ⲡⲁϫⲟⲉⲓⲥ ⲙⲛⲛⲥⲁⲡⲛⲟⲩⲧⲉ ⲉⲃⲟⲗ · ⲱ ⲙⲓⲭⲁⲏⲗ ⲡⲧⲉⲗⲏⲗ ⲙⲡⲁϩⲏⲧ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲡⲥⲟⲗⲥⲗ ⲙⲡⲁϩⲏⲧ · ⲱ ⲡⲁⲣⲭⲏⲥⲧⲣⲁⲧⲏⲕⲟⲥ · ⲉⲧⲟⲩⲁⲁⲃ ⲡⲥⲟⲗⲥⲗ ⲙⲡⲁⲗⲁⲥ · ⲱ ⲙⲓⲭⲁⲏⲗ ⲡϣⲁϫⲉ ⲛⲧⲁⲧⲁⲡⲣⲟ ·
…
173 ⲁⲩⲱ ⲡⲥⲟⲟⲩⲧⲛ ⲙⲡⲁϩⲏⲧ ⲙⲛⲡⲁϣⲗⲏⲗ ⲛⲛⲁϩⲣⲛⲡⲛⲟⲩⲧⲉ · ⲁϣ ⲛϣⲟⲩⲱⲃⲉ ·
…
174 ⲏ ⲁϣ ⲛϩⲏⲧ ⲛⲣⲉϥⲛⲟⲓⲉ ·
…
175 ⲡⲉⲧⲛⲁϣⲉⲓⲙⲉ ·
…
176 ⲏ ⲛϥⲉⲓⲱⲣϩ ⲙⲡϫⲱⲕ ⲙⲡⲉⲕⲁⲝⲓⲱⲙⲁ · ⲙⲛⲡⲉⲟⲟⲩ ⲛⲧⲁⲡⲛⲟⲩⲧⲉ ⲥⲧⲟⲗⲓⲍⲉ ⲙⲙⲟⲕ ⲛϩⲏⲧϥ ·
…
177 ⲛⲁⲓ ⲧⲏⲣⲟⲩ ⲛⲧⲁⲓϫⲟⲟⲩ ⲱ ⲡⲁⲣⲭⲱⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ · ⲙⲛⲛⲉⲧⲟⲩⲟⲧⲃⲉ ⲉⲛⲁⲓ ⲥⲉⲡⲣⲉⲡⲉ ⲙⲡⲉⲕⲛⲟϭ ⲛⲉⲟⲟⲩ ·
…
178 ⲁⲗⲗⲁ ⲕⲱ ⲛⲁⲓ ⲉⲃⲟⲗ ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
179 ⲉⲃⲟⲗ ϫⲉⲁⲛⲅⲟⲩⲣⲱⲙⲉ ⲛⲣⲉϥⲣⲛⲟⲃⲉ ·
…
180 ⲁⲩⲱ ⲛϯϭⲟϫⲃ ⲁⲛ ⲙⲙⲁⲧⲉ ϩⲛⲛⲁⲡⲣⲁⲝⲓⲥ ·
…
181 ϯⲡⲁⲣⲁⲕⲁⲗⲉⲓ ⲙⲙⲟⲕ ⲱ ⲡⲁⲣⲉϥϯⲧⲟⲟⲧ ⲙⲓⲭⲁⲏⲗ ·
…
182 ϫⲓ ⲛⲧⲟⲟⲧ ϩⲱⲧ ⲙⲡⲁⲧⲧⲱⲃϩ · ⲉⲧⲉⲡⲁⲕⲟⲩⲓ ⲛⲇⲱⲣⲟⲛ ⲡⲉ ⲉⲧϭⲟϫⲃ ⲡⲁⲓ ⲛⲧⲁϥⲣ ⲁⲧⲟⲟⲧ ⲉⲧⲁⲁϥ ⲛⲁⲕ ϩⲙⲡⲉⲕϣⲁ ⲙⲡϩⲟⲟⲩ ·
…
183 ⲙⲡⲣϭⲛⲁⲣⲓⲕⲉ ⲉⲡⲉⲕϩⲙϩⲁⲗ ϫⲉⲡⲁⲇⲱⲣⲟⲛ ⲥⲟⲃⲕ ·
…
184 ⲁⲗⲗⲁ ϣⲱⲡ ⲉⲣⲟⲕ ⲛⲧⲁⲡⲣⲟϩⲉⲣⲉⲥⲓⲥ ⲛⲧϩⲉ ⲙⲡⲗⲉⲡⲧⲱⲛ ⲥⲛⲁⲩ ⲛⲧⲉⲭⲏⲣⲁ ·
…
185 ϯⲥⲟⲟⲩⲛ ⲅⲁⲣ ϫⲉⲛⲧⲕⲟⲩⲛⲁⲏⲧ ⲁⲩⲱ ⲛϣⲛϩⲧⲏϥ ·
…
186 ⲉⲧⲃⲉⲡⲁⲓ ⲣⲱ ⲁⲓϯ ⲙⲡⲁⲟⲩⲟⲓ ⲉⲣⲟⲕ ⲉⲓⲥⲟⲟⲩⲛ · ϫⲉⲙⲛⲧⲁⲓ ⲙⲙⲁⲩ ⲛⲕⲉⲗⲁⲁⲩ ⲙⲡⲣⲟⲥⲧⲁⲥⲓⲁ ⲛⲛⲁϩⲣⲙⲡⲛⲟⲩⲧⲉ ·
…
187 ⲛⲥⲁⲃⲗⲗⲁⲕ ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲉⲕϣⲁⲛⲣⲡⲛⲉⲩⲙⲁ ⲛⲙⲙⲁⲓ · ⲛⲅϫⲓⲛⲧⲟⲟⲧ ⲙⲡⲁⲧⲧⲱⲃϩ ⲙⲛⲡⲁⲕⲟⲩⲓ ⲛⲧⲁⲉⲓⲟ ·
…
188 ⲕⲁⲛ ⲉϣϫⲉ ⲉϥϭⲟϫⲃ ⲟⲛ ϯⲛⲁⲣⲁⲡⲁⲧⲟⲟⲧ ⲟⲛ ⲉϯⲛⲁⲕ ⲛⲥⲁⲧϩⲏ · ⲙⲡⲧⲁⲉⲓⲟ ⲙⲡⲁⲗⲁⲥ ·
…
189 ⲙⲛⲡⲁϩⲏⲧ ⲛⲥⲏⲩ ⲛⲓⲙ ⲛⲛⲉϩⲟⲟⲩ ⲧⲏⲣⲟⲩ ⲙⲡⲁⲱⲛϩ ·
…
190 ⲁⲩⲱ ϯⲑⲁⲣⲉⲓ ⲙⲡⲁⲓ ϩⲛⲟⲩⲙⲉ · ϫⲉⲉⲓϣⲁⲛⲕⲱ ⲛⲁⲓ ⲙⲙⲁⲧⲉ ϩⲙⲡⲁϩⲏⲧ ·
…
191 ⲙⲡⲣⲡⲙⲉⲉⲩⲉ ⲙⲡⲉⲕⲣⲁⲛ ⲛⲁⲣⲭⲁⲅⲅⲉⲗⲓⲕⲟⲛ · ⲛⲛⲁⲩ ⲛⲓⲙ ·
…
192 ϯⲛⲁϣⲱⲡⲉ ⲁⲛ ⲉϫⲛⲃⲉⲉⲕⲉ ⲁⲩⲱ ⲉϫⲛⲕⲁⲣⲡⲟⲥ · ⲛⲛⲁϩⲣⲙⲡⲛⲟⲩⲧⲉ · ⲉⲣⲉⲡⲉⲣⲡⲙⲉⲉⲩⲉ ⲙⲡⲉⲕⲣⲁⲛ ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϩⲟⲗϭ ϩⲛⲧⲁⲧⲁⲡⲣⲟ · ⲛⲧϩⲉ ⲛⲟⲩⲉⲃⲓⲱ ⲉϥϩⲛⲣⲱⲓ ·
…
193 ⲉⲣⲉⲡⲉⲕⲣⲁⲛ ⲉⲧⲟⲩⲁⲁⲃ ⲱ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲟ ⲛⲁⲓ ⲛⲥⲧⲟⲗⲏ · ϩⲛⲧⲁϭⲓⲛϩⲉ · ⲙⲛϭⲓⲛⲧⲱⲟⲩⲛ ·
…
194 ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲛⲧⲁⲡⲅⲉⲛⲟⲥ ⲛⲁⲇⲁⲙ ϭⲛⲡⲁⲣⲣⲏⲥⲓⲁ ⲛⲛⲁϩⲣⲙⲡⲛⲟⲩⲧⲉ ⲉⲧⲃⲏⲏⲧⲕ · ⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ·
…
195 ⲱ ⲙⲓⲭⲁⲏⲗ ⲉⲣⲉⲛⲉⲛⲥⲧⲉⲛⲟⲩϥⲉ ⲙⲛⲛⲉⲛϣⲗⲏⲗ ⲃⲏⲕ ⲉϩⲣⲁⲓ ϣⲁⲡⲛⲟⲩⲧⲉ ⲉⲧⲃⲏⲏⲧⲕ · ⲱ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲟⲕ ⲡⲉⲧϥⲓ ⲉϩⲣⲁⲓ ϣⲁⲡⲛⲟⲩⲧⲉ ϣⲁⲛⲧⲉϥϣⲛϩⲧⲏϥ ϩⲁⲣⲟⲛ ·
…
196 ⲉⲥⲉϣⲱⲡⲉ ⲟⲛ ⲙⲡϩⲟⲟⲩ ϩⲙⲡⲉⲕⲛⲟϭ ⲛϣⲁ ·
…
197 ⲉⲧⲣⲉⲕⲡⲣⲉⲥⲃⲉⲩⲉ ϩⲁⲣⲟⲛ ⲛⲛⲁϩⲣⲛⲡⲛⲟⲩⲧⲉ ⲡⲉⲓⲱⲧ ⲛϥϣⲱⲡ ⲉⲣⲟϥ ⲛⲧⲛⲡⲣⲟϩⲉⲣⲁⲓⲥⲓⲥ · ⲉⲧⲛⲉⲓⲛⲉ ⲙⲙⲟⲥ ⲛⲁⲕ ϩⲙⲡⲉⲕⲣⲡⲙⲉⲉⲩⲉ ⲉⲧⲟⲩⲁⲁⲃ ·
…
198 ⲱ ⲡⲛⲟϭ ⲙⲡⲣⲟⲥⲧⲁⲧⲏⲥ ⲙⲓⲭⲁⲏⲗ ⲥⲟⲡⲥⲡ ⲉϫⲱⲛ ⲛⲛⲁϩⲣⲛⲡⲛⲟⲩⲧⲉ ·
…
199 ⲛϥϯⲧϩⲉ ⲛⲁⲛ ⲉⲧⲣⲉⲛⲙⲟⲟϣⲉ ϩⲙⲡⲉⲧⲣⲁⲛⲁϥ ⲧⲏⲣⲛ ⲛϥⲧⲟⲩϫⲟⲛ ⲉⲃⲟⲗ ϩⲛⲛϭⲟⲣϭⲥ ⲙⲡⲇⲓⲁⲃⲟⲗⲟⲥ · ⲛϥⲧⲁϩⲟⲛ ⲛⲁϥ ⲉⲣⲁⲧϥ ·
…
200 ⲛⲟⲩⲙⲛⲧⲣⲣⲟ ⲙⲛⲟⲩⲙⲛⲧⲟⲩⲏⲏⲃ ⲟⲩϩⲉⲑⲛⲟⲥ ⲉϥⲟⲩⲁⲁⲃ · ⲟⲩⲗⲁⲟⲥ ⲉⲡⲱⲛϩ ·
…
201 ϩⲓⲧⲛⲛⲧⲱⲃϩ ⲉⲧⲉϥⲉⲓⲣⲉⲙ ⲙⲙⲟⲟⲩ ϩⲁⲣⲟⲛ ⲛϭⲓⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲡⲁⲓ ⲉⲧⲛⲣϣⲁ ⲛⲁϥ ⲙⲡϩⲟⲟⲩ ·
…
202 ⲙⲛⲛⲉⲡⲣⲉⲥⲃⲉⲓⲁ ⲛⲧⲛϫⲟⲉⲓⲥ ⲧⲏⲣⲛ ⲧⲉ ⲑⲉⲱⲇⲱⲕⲟⲥ ⲉⲧⲟⲩⲁⲁⲃ ⲙⲁⲣⲓⲁ ·
…
203 ⲙⲛⲛⲧⲱⲃϩ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲅⲁⲃⲣⲓⲏⲗ ⲡϥⲁⲓϣⲙⲛⲟⲩϥⲉ ⲛⲛⲁⲓⲱⲛ ⲙⲡⲟⲩⲟⲉⲓⲛ ϩⲓⲧⲛⲧⲉⲭⲁⲣⲓⲥ ⲙⲛⲧⲙⲛⲧⲙⲁⲓⲣⲱⲙⲉ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲟⲟⲩ ⲛⲁϥ ⲙⲛⲡⲉϥⲉⲓⲱⲧ ⲛⲁⲅⲁⲑⲟⲥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲛⲣⲉϥⲧⲁⲛϩⲟ ⲁⲩⲱ ⲛϩⲟⲙⲟⲟⲩⲥⲓⲟⲛ ⲧⲉⲛⲟⲩ ·
…
204 ⲁⲩⲱ ⲛⲟⲩⲟⲉⲓϣ ⲛⲓⲙ ϣⲁⲉⲛⲉϩ ⲛⲉⲛⲉϩ ϩⲁⲙⲏⲛ ·
…