1 ⲗⲟⲓⲡⲟⲛ ⲁⲡⲣⲱⲙⲉ ϫⲓ ⲛⲧⲉϥϣⲧⲏⲛ ·
…
2 ⲁϥⲧⲁⲁⲥ ⲁϥϫⲓ ⲙⲡⲉⲥⲟⲩⲟ ·
…
3 ⲁϥⲧⲁⲁϥ ⲙⲡⲁⲙⲣⲏ ·
…
4 ⲁϥⲕⲧⲟϥ ⲉⲡⲉϥⲏⲓ ⲉϥⲣⲁϣⲉ ·
…
5 ⲉⲣⲁⲧⲥ ⲛⲧⲉϥⲥϩⲓⲙⲉ · ⲉϥϫⲱ ⲙⲙⲟⲥ ϫⲉⲉⲓⲥ ⲡⲛⲟⲩⲧⲉ ⲁϥⲥⲟⲟⲩⲧⲛ ⲛⲧⲉⲡⲣⲟⲥⲫⲟⲣⲁ ·
…
6 ⲗⲟⲓⲡⲟⲛ ⲛⲧⲉⲣⲟⲩⲡⲱϩ ⲉϩⲧⲟⲟⲩⲉ ⲛϣⲱⲣⲡ ⲛⲥⲟⲩⲙⲛⲧⲥⲛⲟⲟⲩⲥ ⲛⲁⲑⲱⲣ ·
…
7 ⲁⲥϯⲡⲉⲥⲟⲩⲟⲓ ⲉⲣⲟϥ ⲛϭⲓⲧⲉⲥϩⲓⲙⲉ ⲛϣⲁⲩ ⲉⲥϫⲱ ⲙⲙⲟⲥ ϫⲉⲡⲁⲥⲟⲛ ϫⲓ ⲛⲁⲕ ⲛⲧⲁϣⲧⲏⲛ ⲛⲅⲃⲱⲕ ·
…
8 ⲁⲛⲁⲩ ϫⲉⲕⲛⲁϩⲉ ⲉⲡⲉⲥⲟⲟⲩ ·
…
9 ϫⲉⲕⲁⲥ ⲛⲛⲁⲥⲙⲛⲛⲉϩⲃⲏⲩⲉ ⲛⲧⲥⲩⲛⲁⲝⲓⲥ · ⲙⲛⲛⲉⲥⲛⲏⲩ · ⲉⲧⲛⲏⲩ ⲉϫⲱⲛ · ⲛⲧⲟϥ ⲇⲉ ⲉϥⲟⲩⲱϣⲉ ⲉⲉⲓⲙⲉ ⲉⲧⲉⲥⲡⲣⲟϩⲩⲣⲉⲥⲓⲥ ⲧⲏⲣⲥ ·
…
10 ⲡⲉϫⲁϥ ⲛⲁⲥ ϫⲉⲧⲁⲥⲱⲛⲉ · ⲉⲓϣⲁⲛϥⲓ ⲛⲧⲟⲩϣⲧⲏⲛ · ⲉⲣⲁⲥⲩⲛⲁⲅⲉ ⲛⲁϣ ⲛϩⲉ · ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ ·
…
11 ⲁⲛⲟⲕ ⲅⲁⲣ ⲁⲛⲅⲟⲩϩⲟⲟⲩⲧ · ϣⲁⲓⲃⲱⲕ ⲉⲙⲁ ⲛⲓⲙ ⲛⲧⲉⲓϩⲉ · ⲧⲉⲥϩⲓⲙⲉ ⲇⲉ ⲛⲧⲟⲥ ϣϣⲉⲉⲣⲟⲥ ⲉⲥⲕⲉⲡⲁⲍⲉ ⲙⲙⲟⲥ ϩⲙⲡⲉⲥⲥⲱⲙⲁ ⲙⲁⲗⲓⲥⲧⲁ ⲛϩⲟⲩⲟ ϩⲛⲧⲉⲕⲕⲗⲏⲥⲓⲁ ·
…
12 ⲛⲧⲟⲥ ⲇⲉ ⲁⲥϥⲓϩⲣⲁⲥ ⲉⲃⲟⲗ ϩⲛⲟⲩⲛⲟϭ ⲛⲥⲙⲏ ⲉⲥϫⲱ ⲙⲙⲟⲥ ϫⲉⲟⲩⲟⲉⲓ ⲛⲁⲓ ⲡⲁⲥⲟⲛ · ⲟⲩ ⲡⲉ ⲡⲁⲓ ⲉⲧⲉⲕϫⲱ ⲙⲙⲟϥ ⲙⲡϩⲟⲟⲩ ·
…
13 ⲙⲏ ⲛⲧⲁⲣϣⲙⲙⲟ ⲉⲣⲟⲕ ⲙⲡϩⲟⲟⲩ ·
…
14 ⲙⲏ ⲛⲧⲁⲛⲡⲱ ϣⲁⲛⲣⲥⲛⲁⲩ ·
…
15 ⲙⲏ ⲁⲛⲟⲕ ⲟⲩⲥⲁⲣⲝ ⲛⲟⲩⲱⲧ ⲁⲛ ⲛⲙⲙⲁⲕ ·
…
16 ⲙⲏ ⲙⲛⲧⲁⲓ ⲙⲉⲣⲓⲥ ⲛⲙⲙⲁⲕ ⲁⲛⲟⲕ ϩⲛⲛⲉⲕⲑⲩⲥⲓⲁ ·
…
17 ⲙⲏ ⲉⲕⲛⲁϩⲟⲩⲣⲱⲧ ⲙⲡⲁⲙⲉⲉⲩⲉ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
18 ⲙⲡⲱⲣ ⲡⲁⲥⲟⲛ ⲙⲡⲣⲙⲉⲉⲩⲉ ⲉⲡⲁⲓ ϩⲙⲡⲉⲕϩⲏⲧ · ϫⲉⲁⲓⲕⲱⲧⲁⲡⲣⲟϩⲩⲣⲉⲥⲓⲥ ⲛⲥⲱⲓ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϩⲟⲗⲱⲥ ⲣⲱ ⲁⲡⲁⲡⲟⲥⲧⲟⲗⲟⲥ ϫⲟⲟⲥ ⲉϥⲧⲁⲙⲱ ⲙⲙⲟⲛ ϫⲉⲙⲛϩⲟⲟⲩⲧ ϩⲓⲥϩⲓⲙⲉ ϩⲙⲡⲉⲭⲣⲓⲥⲧⲟⲥ ·
…
19 ⲛⲁⲓ ⲇⲉ ⲉⲥϫⲱ ⲙⲙⲟⲟⲩ ⲉⲥⲣⲓⲙⲉ ·
…
20 ⲁⲧⲉϥⲯⲩⲭⲏ ϣⲧⲟⲣⲧⲣ ⲉϫⲱⲥ ·
…
21 ⲙⲁⲗⲗⲟⲛ ⲇⲉ ⲁϥⲣⲁϣⲉ ⲛϩⲟⲩⲟ ⲉϩⲣⲁⲓ ⲉϫⲛⲧⲉⲥⲛⲟϭ ⲙⲡⲓⲥⲧⲓⲥ ·
…
22 ⲁϥϫⲓ ⲛⲧⲟⲟⲧⲥ ⲛⲧⲉϣⲧⲏⲛ ⲉϥϫⲱ ⲙⲙⲟⲥ ϫⲉϥⲓⲡⲣⲟⲟⲩϣ ·
…
23 ⲛⲧⲉⲡⲣⲟⲥⲫⲟⲣⲁ ⲙⲛⲧⲁⲡⲁⲣⲭⲏ ⲙⲛⲡⲛⲉϩ ⲧⲛⲛⲟⲟⲩⲥⲟⲩ ⲉⲧⲉⲕⲕⲗⲏⲥⲓⲁ ·
…
24 ⲁⲩⲱ ⲕⲱ ⲉϩⲣⲁⲓ ⲛⲧⲉⲧⲣⲁⲡⲓⲍⲁ ⲙⲛⲛⲟⲉⲓⲕ ·
…
25 ϥⲓⲡⲣⲟⲟⲩϣ ⲙⲡⲗⲁⲭⲁⲛⲟⲛ ϣⲁⲛⲧⲉⲓⲕⲧⲟⲓ ϩⲙⲡⲟⲩⲱϣⲉ ⲙⲡⲛⲟⲩⲧⲉ ⲙⲛⲡⲉⲥⲟⲟⲩ ·
…
26 ⲁϥⲉⲓ ⲇⲉ ⲉⲃⲟⲗ ⲉϥⲙⲟⲟϣⲉ ⲉϥⲥⲟⲡⲥⲡ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲉⲧⲣⲉϥⲥⲟⲟⲩⲧⲛ ⲛⲛⲉϥϩⲓⲟⲟⲩⲉ · ⲉϥⲙⲟⲟϣⲉ ⲇⲉ ⲁϥⲉⲓ ⲉϫⲛⲟⲩⲙⲁ ⲛⲉⲥⲟⲟⲩ ·
…
27 ⲡⲉϫⲁϥ ⲛⲁϥ ϫⲉⲭⲁⲓⲣⲉ ⲡⲉϣⲃⲏⲣ · ⲡⲉϫⲉⲡⲣⲱⲙⲉ ⲛⲁϥ ϫⲉⲧⲉⲓⲣⲏⲛⲏ ⲛⲁⲕ ⲡⲣⲱⲙⲉ ⲉⲧⲁⲉⲓⲏⲩ ·
…
28 ⲡⲉϫⲁϥ ⲛⲁϥ ⲛϭⲓⲡⲣⲱⲙⲉ ⲙⲡⲓⲥⲧⲟⲥ ϫⲉⲁⲣⲁ ϣⲁⲓϭⲛⲟⲩⲉⲥⲟⲟⲩ ⲛⲧⲟⲟⲧⲕ ⲙⲡϩⲟⲟⲩ ⲉⲡⲓⲛⲟϭ ⲛⲣⲱⲙⲉ ⲛⲧⲁϥⲉⲓ ϣⲁⲣⲟⲛ ⲡⲉϫⲁϥ ⲛϭⲓⲡϣⲱⲥ ϫⲉⲕⲟⲩⲱϣ ⲉϩⲁⲟⲩⲏⲣ ⲛⲧⲓⲙⲏ ·
…
29 ⲡⲉϫⲉⲡⲣⲱⲙⲉ ⲛⲁϥ ϫⲉⲉⲓⲟⲩⲱϣ ⲉϩⲁⲟⲩⲧⲉⲣⲙⲏⲥⲓⲟⲛ ·
…
30 ⲡⲉϫⲉⲡϣⲱⲥ ⲛⲁϥ ϫⲉⲁⲩⲉⲓⲥ ⲧⲓⲙⲏⲧⲁⲧⲁⲁϥ ⲛⲁⲕ ·
…
31 ⲡⲣⲱⲙⲉ ⲇⲉ ⲁϥⲥⲟⲟⲩⲧⲛ ⲉⲣⲟϥ ⲛⲧⲉϣⲧⲏⲛ ⲛⲧⲉⲥϩⲓⲙⲉ ⲉϥϫⲱ ⲙⲙⲟⲥ ϫⲉϫⲓⲧⲉϣⲧⲏⲛ ⲛⲁⲕ ⲉⲧⲁⲧⲁⲥϩⲓⲙⲉ ⲧⲉ ·
…
32 ⲕⲁⲁⲥ ⲛⲁⲕ ϩⲁϩⲧⲏⲕ ⲛϣⲟⲙⲛⲧ ⲛϩⲟⲟⲩ ·
…
33 ⲁⲩⲱ ⲙⲡϩⲟⲩⲛ ⲛϣⲟⲙⲛⲧ ⲛϩⲟⲟⲩ ·
…
34 ⲉⲓϣⲁⲛⲧⲙ ⲛⲧϥ ⲛⲁⲕ ϯⲁⲡⲟⲧⲁⲥⲥⲉ ⲙⲙⲟⲥ ⲛⲁⲕ ·
…
35 ⲁϥⲟⲩⲱϣⲃ ⲛϭⲓⲡϣⲱⲥ ϫⲉⲁⲩⲱ ⲉⲓⲣⲟⲩ ⲛⲧⲁⲓ ·
…
36 ⲙⲛⲗⲁⲁⲩ ϩⲙⲡⲁⲏⲓ ⲉⲓⲙⲏⲧⲉⲓⲉⲥⲟⲣⲧ · ϩⲓϩⲃⲥⲱ ⲛϯⲛⲁϫⲓⲧⲥ ⲁⲛ ·
…
37 ⲡⲣⲱⲙⲉ ⲇⲉ ⲙⲡⲓⲥⲧⲟⲥ ⲛⲧⲉⲣⲉⲡϣⲱⲥⲧⲥⲧⲟϥ ⲉⲃⲟⲗ ⲙⲛⲧϣⲧⲏⲛ ⲁϥⲕⲟⲧϥ ⲉⲃⲟⲗ ⲉⲧⲉϥϩⲓⲏ ϩⲛⲟⲩⲛⲟϭ ⲛⲙⲕⲁϩ ⲛϩⲏⲧ ⲙⲛϩⲉⲛⲣⲙⲉⲓⲟⲟⲩⲉ ⲉⲩⲟϣⲉⲧⲓ ⲇⲉ ⲉϥⲙⲟⲟϣⲉ ⲉϥⲟⲕⲙ ·
…
38 ⲁⲩⲱ ⲉϥⲙⲉⲉⲩⲉ ⲉⲃⲟⲗ ϫⲉⲟⲩ ⲡⲉⲧⲉϥⲛⲁⲁⲁϥ ·
…
39 ⲏ ⲉϥⲛⲁϫⲟⲟⲥ ⲛⲧⲉϥⲥϩⲓⲙⲉ ϫⲉⲟⲩ ⁖ⲻ ⲛⲧⲉⲩⲛⲟⲩ ⲁϥϭⲱϣⲧ ϩⲓϩⲏ ⲙⲙⲟϥ ·
…
40 ⲁϥⲛⲁⲩ ⲉⲡⲁⲣⲭ‐ⲁⲅⲅⲉⲗⲟⲥ ⲙⲓⲭⲁⲏⲗ ⲉϥⲧⲁⲗⲏⲩ ⲉϫⲛⲟⲩϩⲧⲟ ⲛⲟⲩⲟⲃϣ · ⲉϥⲱ ⲙⲡⲉⲥⲙⲟⲧ ⲛⲟⲩⲛⲟϭ ⲉⲛⲁⲣⲭⲱⲛ ⲛⲧⲉⲡⲣⲣⲟ ·
…
41 ⲁϥⲣϩⲟⲧⲉ ⲉⲙⲁⲧⲉ ⲛϭⲓⲡⲣⲱⲙⲉ ⲁϥⲥⲟⲕϥ ⲛⲥⲁⲟⲩⲥⲁ ⲙⲡⲃⲟⲗ ⲛⲧⲉϩⲓⲏ · ϣⲁⲛⲧⲉϥⲡⲁⲣⲁⲅⲉ ·
…
42 ⲁⲩⲱ ⲛⲧⲉⲣⲉⲡⲁⲣⲭⲁⲅⲅⲉⲗⲟⲥ ⲡⲱϩ ϣⲁⲣⲟϥ ⲙⲡⲉⲥⲙⲟⲧ ⲛⲟⲩⲁⲣⲭⲱⲛ ·
…
43 ⲁϥⲥⲉⲕⲡⲉⲭⲁⲗⲓⲛⲟⲥ ⲙⲡⲉϩⲧⲟ ·
…
44 ⲁϥⲁϩⲉⲣⲁⲧϥ ·
…
45 ⲡⲉϫⲁϥ ⲙⲡⲣⲱⲙⲉ ϫⲉⲭⲁⲓⲣⲉ ⲇⲟⲣⲟⲑⲉⲟⲥ ⲉⲕⲛⲁ ⲉⲧⲱⲛ ⲉⲕⲙⲟⲟϣⲉ ⲙⲁⲩⲁⲁⲕ ·
…
46 ⲡⲉϫⲁϥ ⲛⲁϥ ⲛϭⲓⲧⲟⲩⲣⲟⲩⲑⲉⲟⲥ · ϩⲛⲟⲩⲥⲧⲱⲧ ϫⲉⲕⲩⲣⲓⲟⲥ ⲭⲁⲓⲣⲉ ⲡⲁϫⲟⲉⲓⲥ ⲡⲁⲣⲭⲱⲛ · ⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ ·
…
47 ⲡⲉϫⲉⲡⲁⲣⲭⲱⲛ ⲛⲁϥ ⲉⲧⲉⲙⲓⲭⲁⲏⲗ ⲡⲉϫⲉⲁⲣⲁ ⲉⲥⲟⲛϩ ⲛϭⲓⲑⲉⲱⲡⲓⲥⲧⲏ ⲧⲉⲕⲥϩⲓⲙⲉ ⲡⲉϫⲉⲇⲱⲣⲟⲑⲉⲟⲥ ⲛⲁϥ ⲉⲣⲉⲡⲉϥϩⲟ ⲡⲁϩⲧ ⲉⲡⲉⲥⲏⲧ ϩⲁⲡϣⲓⲡⲉ ϫⲉⲥⲉ · ⲥⲟⲛϩ ⲛϭⲓⲧⲉⲕϩⲙϩⲁⲗ ·
…
48 ⲡⲉϫⲉⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ ⲛⲁϥ · ϫⲉⲟⲩ ⲡⲉ ⲡⲁⲓ ⲉⲧⲧⲁⲗⲏⲩ ⲉⲣⲟⲕ ·
…
49 ⲡⲉϫⲉⲇⲱⲣⲟⲑⲉⲟⲥ ⲛⲁϥ · ⲉϥⲇⲓⲁⲧⲣⲉⲡⲉ ϫⲉⲟⲩϣⲧϣⲏⲛ ⲉⲧⲁⲧⲁⲥϩⲓⲙⲉ ⲧⲉ ·
…
50 ⲡⲉϫⲉⲡⲁⲣⲭⲱⲛ ⲛⲁϥ ⲉⲧⲉⲙⲓⲭⲁⲏⲗ ⲡⲉ · ϫⲉⲁⲩⲱ ⲉⲕⲣⲟⲩ ⲛⲧⲁⲓ ⲙⲡⲉⲓⲙⲁ ·
…
51 ⲡⲉϫⲉⲇⲱⲣⲟⲑⲉⲟⲥ ⲛⲁϥ ϫⲉⲉⲣⲉⲟⲩⲛⲟϭ ⲛⲣⲱⲙⲉ ⲛⲏⲩ ⲉϫⲱⲓ ⲙⲡϩⲟⲟⲩ · ⲙⲡⲓϩⲉ ⲉⲧⲁⲭⲣⲉⲓⲁ ⲧⲏⲣⲥ ·
…
52 ⲟⲩⲇⲉ ⲙⲛⲛⲟⲩⲃ ⲛⲧⲟⲟⲧ ⲉⲧⲃⲉⲡⲉⲓⲕⲉⲣⲟⲥ ⲛϩⲓⲥⲉ ⲛⲧⲁⲛⲉⲓ ⲉⲣⲟϥ ·
…
53 ⲁⲓⲛⲧⲥ ⲉⲧⲣⲁⲧⲁⲁⲥ ϩⲁⲟⲩⲉⲥⲟⲟⲩ ⲙⲡⲟⲩϫⲓⲧⲥ ⲛⲧⲟⲟⲧⲛ ϯⲥⲟⲟⲩⲛ ⲁⲛ ϫⲉⲉⲓⲛⲁⲣⲟⲩ ⲡⲉϫⲉⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ · ϫⲉⲉⲓϣⲁⲛϣⲡⲧⲱⲱⲣⲉ ⲙⲡⲉⲥⲟⲟⲩ ⲛⲧⲁϫⲓⲧϥ ⲛⲁⲕ ·
…
54 ⲕⲛⲁⲣⲡϩⲟⲟⲩ ⲉⲣⲟⲓ ⲙⲛⲛⲉⲧⲛⲙⲙⲁⲓ ·
…
55 ⲁϥⲟⲩⲱϣⲃ ⲛϭⲓⲇⲟⲣⲟⲑⲉⲟⲥ ϫⲉⲥⲉ ⲧⲱⲛⲟⲩ ⲡⲁϫⲟⲉⲓⲥ ·
…
56 ⲙⲁⲣⲉⲓⲣⲡⲙⲡϣⲁ ⲛⲅⲉⲓ ⲉϩⲟⲩⲛ ϩⲁⲧⲁⲟⲩⲉϩⲥⲟⲓ ·
…
57 ⲡⲉϫⲉⲙⲓⲭⲁⲏⲗ ⲛⲟⲩⲁ ⲛⲛⲁⲅⲅⲉⲗⲟⲥ ⲉⲧⲙⲟⲟϣⲉ ⲛⲙⲙⲁϥ ·
…
58 ⲙⲡⲉⲥⲙⲟⲧ ⲛⲙⲙⲁⲧⲟⲓ ϫⲉⲙⲟⲟϣⲉ ⲙⲛⲇⲱⲣⲟⲑⲉⲟⲥ · ⲛⲅⲃⲱⲕ ϩⲁϩⲧⲏⲛ ⲡⲉⲓϣⲱⲥ ⲁϫⲓⲥ ⲛⲁϥ · ϫⲉⲡⲉϫⲉⲡⲁⲣⲭⲱⲛ ⲛⲧⲁϥⲡⲁⲣⲁⲅⲉ ⲙⲙⲟⲕ ⲛⲥⲟⲟⲩⲧⲛ · ϫⲉⲧⲛⲛⲟⲟⲩ ⲛⲁⲓ ⲛⲟⲩⲉⲥⲟⲟⲩ ϩⲁⲟⲩⲧⲏⲣⲙⲏⲥⲓⲟⲛ ·
…
59 ⲁⲛⲟⲕ ⲡⲉⲧϣⲡⲧⲱⲣⲉ ⲙⲙⲟϥ ⲛⲧⲁⲧⲛⲛⲟⲟⲩ ⲛⲧⲉϥⲁⲥⲟⲩ ⲛⲁⲕ ϣⲁⲡⲛⲁⲩ · ⲙⲙⲉⲉⲣⲉ ⲙⲡϩⲟⲟⲩ ·
…
60 ⲁϥⲃⲱⲕ ⲇⲉ ⲛϭⲓⲡⲙⲁⲧⲟⲓ · ϣⲁⲡϣⲱⲥ ⲉϥⲙⲟⲟϣⲉ ⲙⲛⲇⲱⲣⲟⲑⲉⲟⲥ · ϩⲙⲡⲣⲁⲛ ⲙⲡⲁⲣⲭⲱⲛ ⲁⲩⲉⲓⲛⲉ ⲙⲡⲉⲥⲟⲟⲩ ·
…
61 ⲡⲉϫⲉⲡⲁⲣⲭⲱⲛ ⲛⲁϥ ϫⲉⲇⲱⲣⲟⲑⲉⲟⲥ ⲉⲓⲥ ⲡⲉⲥⲟⲟⲩ ⲁϥⲥⲟⲟⲩⲧⲛ ·
…
62 ⲉⲧⲉⲭⲣⲉⲓⲁ ⲙⲡⲛⲟϭ ⲛⲣⲱⲙⲉ ⲛⲧⲁⲕⲕⲁⲗⲉⲓ ⲙⲙⲟϥ ·
…
63 ⲁⲛⲁⲩ ϩⲱⲱϥ ϫⲉⲕⲛⲁϩⲉ ⲟⲩϣⲏ ⲙⲛⲧⲃⲧ ⲛⲁⲓ ⲉⲧⲁⲭⲣⲉⲓⲁ ·
…
64 ⲉⲡⲉⲓ ⲛϯⲟⲩⲉⲙ ⲁϥ ⲁⲛ ·
…
65 ⲡⲉϫⲉⲇⲟⲣⲟⲑⲉⲟⲥ ⲛⲁϥ ϫⲉϩⲁⲙⲟⲓ ⲉⲓⲛⲁϩⲉ ⲉⲣⲟϥ ⲡⲁⲉⲓⲱⲧ ·
…
66 ⲁⲩⲱ ϯⲛⲁϫⲓⲧϥ ⲉⲓⲣⲁϣⲉ ·
…
67 ⲡⲉϫⲉⲡⲁⲣⲭⲱⲛ ⲛⲁϥ ϫⲉⲁⲩⲱ ⲕⲛⲁϯⲟⲩ ϩⲁⲣⲟϥ ·
…
68 ⲡⲉϫⲉⲇⲱⲣⲱⲑⲉⲟⲥ ⲛⲁϥ ϫⲉϯⲛⲁⲕⲱ ϩⲁϩⲧⲏϥ ⲛⲧⲉϣⲧⲏⲛ ⲛⲧⲁⲥϩⲓⲙⲉ · ϣⲁⲛⲧⲉⲓⲧⲛⲛⲟⲟⲩ ⲛⲧⲉϥⲁⲥⲟⲩ ⲛⲁϥ ·
…
69 ⲡⲉϫⲉⲡⲁⲣⲭⲱⲛ ⲛⲁϥ ⲉⲧⲉⲙⲓⲭⲁⲏⲗ ⲡⲉ · ϫⲉⲉϣϫⲉ ⲧⲁⲓ ⲧⲉⲑⲉⲕⲁⲧⲉϣⲧⲏⲛ ⲛⲁⲕ ⲁⲛⲟⲕ ⲡⲉⲧⲛⲁⲧⲛⲛⲟⲟⲩ ϩⲙⲡⲁⲣⲁⲛ · ⲛⲧⲁϫⲓ · ⲙⲡⲧⲃⲧ · ϣⲁⲛⲧⲉⲕⲧⲛⲛⲟⲟⲩ · ⲧⲉϥⲁⲥⲟⲩ ·
…
70 ⲡⲁⲣⲭⲱⲛ ⲇⲉ ⲁϥⲙⲟⲩⲧⲉ ⲉⲟⲩⲁ ϩⲛⲙⲙⲁⲧⲟⲓ ⲉⲧⲙⲟⲟϣⲉ ⲛⲙⲙⲁϥ · ϫⲉⲙⲟⲟϣⲉ ⲛⲅⲃⲱⲕ ⲉϫⲙⲡⲉⲓⲣⲣⲟ ⲙⲟⲩⲧⲉ ⲉⲃⲟⲗ ⲉⲛⲉⲓⲟⲩⲱϩⲉ ·
…
71 ⲁϫⲓⲥ ⲛⲁⲩ ϫⲉⲡⲉϫⲉⲡⲁⲣⲭⲱⲛ · ⲛⲧⲁϥⲉⲓ ⲉϥⲡⲁⲣⲁⲅⲉ ⲙⲙⲱⲧⲛ ·
…
72 ⲁϥϣⲁϫⲉ ⲛⲙⲙⲏⲧⲛ ⲙⲡϩⲟⲟⲩ · ϫⲉⲧⲛⲛⲟⲟⲩ ⲟⲩⲧⲃⲧ ⲛⲁⲓ ⲉⲛⲁⲛⲟⲩϥ ϩⲁⲟⲩⲧⲏⲣⲙⲏⲥⲓⲟⲛ ·
…
73 ⲁⲩⲱ ϯⲛⲁⲧⲛⲛⲟⲟⲩ ⲛⲧⲉϥⲧⲓⲙⲏϥ ⲛⲁⲕ ⲛⲧⲟⲟⲧϥ ⲛⲇⲟⲣⲟⲑⲉⲟⲥ ⲡⲟⲩⲟⲓ · ϣⲁⲡⲛⲁⲩ ⲙⲙⲉⲉⲣⲉ ⲙⲡϩⲟⲟⲩ ·
…
74 ⲁϥⲃⲱⲕ ⲛϭⲓⲡⲙⲁⲧⲟⲓ ϣⲁⲛⲟⲩⲱϩⲉ ⲁϥϣⲁϫⲉ ⲛⲙⲙⲁⲩ ϩⲙⲡⲣⲁⲛ ⲙⲡⲁⲣⲭⲱⲛ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲁⲩ ·
…
75 ⲁⲩⲱ ⲁⲛⲟⲩⲱϩⲉ ϯ ⲛⲁϥ ⲛⲟⲩⲛⲟϭ ⲛⲧⲃⲧ ⲉϥⲟⲛϩ · ⲉϥⲣⲟⲟⲩⲧ ⲁϥⲉⲓⲛⲉ ⲙⲙⲟϥ ϣⲁⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ ϩⲛⲟⲩϭⲉⲡⲏ ·
…
76 ⲡⲉϫⲉⲡⲁⲣⲭⲱⲛ ⲛⲁϥ ⲉⲧⲉⲙⲓⲭⲁⲏⲗ ⲡⲉ · ϫⲉⲇⲱⲣⲟⲑⲉⲟⲥ ⲉⲕⲟⲩⲉϣ ⲟⲩ ⲟⲛ ·
…
77 ⲙⲡⲉⲡϩⲱⲃ ⲣϣⲁⲩ · ⲙⲏ ⲙⲡⲉⲧⲉⲭⲣⲉⲓⲁ ⲣϣⲁⲩ · ⲁⲣⲁ ⲁⲡϩⲱⲃ ⲙⲡⲁⲣⲓⲥⲧⲱⲛ ⲥⲟⲟⲩⲧⲛ ·
…
78 ⲁϥⲟⲩⲱϣⲃ ⲛϭⲓⲇⲱⲣⲟⲑⲉⲟⲥ ϫⲉⲁϩⲉ ⲡⲁϫⲟⲉⲓⲥ ·
…
79 ⲁⲕⲉⲓⲣⲉ ⲛⲙⲙⲁⲓ ⲛⲟⲩⲛⲟϭ ⲙⲡⲉⲧⲛⲁⲛⲟⲩϥ ·
…
80 ⲁⲩⲱ ⲁⲡⲉϩⲟⲟⲩ ϩⲱⲱⲛ ⲉϩⲟⲩⲛ ⲁⲩⲱ ⲁⲡⲉⲛϩⲱⲃ ⲣϣⲁⲩ ⲕⲁⲗⲱⲥ · ⲟⲩⲛⲟϭ ⲅⲁⲣ ⲛϩⲙⲟⲧ ⲁⲕⲁⲁϥ ⲙⲛⲡⲉⲕϩⲙϩⲁⲗ ·
…
81 ⲡⲉϫⲉⲡⲁⲣⲭⲱⲛ ϫⲉⲙⲁⲣⲟⲛ ϩⲛⲟⲩϭⲉⲡⲏ ·
…
82 ⲁⲩϥⲓ ⲇⲉ ⲙⲡⲉⲥⲟⲟⲩ ⲙⲛⲡⲧⲃⲧ ·
…
83 ⲁⲩⲃⲱⲕ ⲉϥⲙⲟⲟϣⲉ ⲇⲉ ⲛⲉϥⲙⲟⲕⲙⲉⲕ ⲙⲙⲟϥ ⲛϭⲓⲇⲱⲣⲟⲑⲉⲟⲥ ·
…
84 ⲉⲧⲃⲉⲧⲁⲥⲟⲩ ⲙⲡⲉⲥⲟⲟⲩ ⲙⲛⲡⲧⲃⲧ ·
…
85 ⲁⲩⲱ ϫⲉϥⲛⲁϩⲉ ⲉⲧⲉⲭⲣⲉⲓⲁ ⲙⲡⲁⲣⲭⲱⲛ ⲧⲱⲛ · ϩⲃⲥⲱ ϩⲓⲏⲣⲡ · ϩⲓⲟⲉⲓⲕ ⲕⲁⲧⲁⲣⲟϥ ·
…
86 ϩⲁⲡⲗⲱⲥ ⲛⲉϥⲙⲉⲉⲩⲉ ⲉⲃⲟⲗ ⲉⲛⲁⲓ ·
…
87 ⲛⲉϥⲥⲟⲡⲥⲡ ⲙⲡⲛⲟⲩⲧⲉ ϩⲙⲡⲉϥϩⲏⲧ ⲧⲏⲣϥ ⲉϥϫⲱ ⲙⲙⲟⲥ ϫⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲡⲁⲡⲣⲟⲥⲧⲁⲧⲏⲥ ⲁϩⲉⲣⲁⲧⲕ ⲙⲛⲛⲉⲕϩⲙϩⲁⲗ ⲙⲡϩⲟⲟⲩ ⲉⲕⲥⲟⲟⲩⲛ ⲅⲁⲣ ⲡⲁϫⲟⲉⲓⲥ ϫⲉⲉⲉⲓⲣⲉ ⲛⲛⲁⲓ ⲧⲏⲣⲟⲩ ϩⲙⲡⲉⲕⲣⲁⲛ ⲙⲛⲡⲁⲡⲉⲕϫⲟⲉⲓⲥ ·
…
88 ⲉϥⲙⲉⲉⲩⲉ ⲇⲉ ⲉⲛⲁⲓ ⲛⲉⲣⲉⲡⲁⲣⲭⲁⲅⲅⲉⲗⲟⲥ ⲥⲟⲟⲩⲛ ⲛⲛⲉϥⲙⲉⲉⲩⲉ ⲉϥϩⲟⲣϣ ⲛϩⲏⲧ ·
…
89 ⲙⲛⲛⲥⲁⲛⲁⲓ ⲁϥⲧⲱϩⲙ ⲉϩⲟⲩⲛ ϩⲙⲡⲣⲟ ⲙⲡⲏⲓ ⲛⲇⲱⲣⲟⲑⲉⲟⲥ ·
…
90 ⲁⲙⲓⲭⲁⲏⲗ ⲧⲱϩⲙ ⲉⲧϩⲏ ⲛϣⲟⲣⲡ ·
…
91 ⲁⲥⲉⲓ ⲛⲁϥ ⲉⲃⲟⲗ ⲛϭⲓⲧⲉⲥϩⲓⲙⲉ ⲙⲙⲁⲓⲛⲟⲩⲧⲉ ·
…
92 ⲡⲉϫⲉⲙⲓⲭⲁⲏⲗ ⲛⲁⲥ ϫⲉⲭⲁⲓⲣⲉ ⲑⲉⲱⲡⲓⲥⲧⲏ · ⲉⲧⲉⲡⲉⲥⲟⲩⲱϩⲙ ⲡⲉ ⲧⲉⲧⲡⲓⲥⲧⲉⲩⲉ ⲉⲡⲛⲟⲩⲧⲉ · ⲉⲣⲉⲣⲟⲩ ⲛⲛⲉϩⲟⲟⲩ ·
…
93 ⲁⲥⲟⲩⲱϣⲃ ⲉⲥϫⲱ ⲙⲙⲟⲥ ϫⲉⲕⲩⲣⲓⲟⲥ ⲭⲁⲓⲣⲉ ⲡⲁϫⲟⲉⲓⲥ ⲡⲁⲣⲭⲱⲛ ⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ ·
…
94 ⲁⲙⲟⲩ ⲉϩⲟⲩⲛ ⲡⲁϫⲟⲉⲓⲥ ⲙⲡⲣⲁϩⲉ ⲉⲣⲁⲧⲕ ϩⲓⲡⲥⲁ ⲛⲃⲟⲗ · ⲉⲥϫⲱ ⲇⲉ ⲛⲛⲁⲓ ⲉⲓⲥ ⲇⲱⲣⲟⲑⲉⲟⲥ ⲁϥⲉⲓⲛⲉ ⲙⲡⲉⲥⲟⲟⲩ ·
…
95 ⲙⲛⲡⲛⲟϭ ⲛⲧⲃⲧ ⲁϥⲕⲁⲁⲩ ϩⲓⲧϩⲏ ⲙⲙⲟⲥ ·
…
96 ⲡⲉϫⲁⲥ ⲛⲁϥ ϫⲉⲛⲧⲁⲕϩⲉ ⲉⲛⲁⲓ ⲧⲱⲛ ⲡⲁϫⲟⲉⲓⲥ ⲛⲥⲟⲛ · ϫⲉϯⲛⲁⲩ ⲉⲧⲁϣⲧⲏⲛ ⲛⲧⲁⲕⲕⲧⲟⲥ ⲛⲕⲉⲥⲟⲡ ·
…
97 ⲡⲉϫⲉⲇⲱⲣⲟⲑⲉⲟⲥ ϫⲉⲡⲁⲣⲭⲱⲛ ⲡⲉⲛⲧⲁϥϣⲡⲇⲱⲣⲉ ·
…
98 ⲁϥⲧⲁⲁⲩ ⲛⲁⲓ ·
…
99 ⲡⲉϫⲉⲑⲉⲱⲡⲓⲥⲧⲏ ϫⲉⲕⲁⲗⲱⲥ ⲁⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
100 ⲉⲓⲛⲉ ⲛⲁⲛ ⲙⲡⲉⲛϫⲟⲉⲓⲥ ⲡⲁⲣⲭⲱⲛ ⲁⲩⲱ ⲧⲛⲣⲁϣⲉ ⲛⲙⲙⲁϥ
…
101 ⲁⲩⲱ ⲧⲛⲛⲁϯⲧⲁⲥⲟⲩ ⲛⲛⲉⲛⲧⲁϥϫⲓⲧⲟⲩ ⲛⲁⲛ · ⲡⲁⲣⲭⲱⲛ ⲇⲉ ⲉⲧⲉⲙⲓⲭⲁⲏⲗ ⲡⲉ ·
…
102 ⲡⲉϫⲁϥ ⲛⲁⲩ ϫⲉⲉⲓⲛⲁⲃⲱⲕ ⲉⲧⲥⲩⲛⲁⲝⲓⲥ ϫⲉⲡϣⲁ ⲡⲉ ·
…
103 ⲉⲡⲉⲓⲇⲏ ⲁⲡⲛⲁⲩ ϣⲱⲡⲉ ϭⲱ ⲛⲁⲕ ⲛⲧⲟⲕ ⲙⲛⲧⲉⲕⲥϩⲓⲙⲉ ·
…
104 ⲕⲱⲛⲥ ⲙⲡⲉⲥⲟⲟⲩ ⲁⲣⲓⲡⲥⲟⲃⲧⲉ ⲙⲡⲙⲁ ⲡⲱⲣϣ ⲕⲁⲗⲱⲥ ·
…
105 ⲁⲛⲁⲩ ⲉⲡⲧⲃⲧ ⲙⲡⲣϫⲱϩ ⲉⲣⲟϥ ⲟⲩⲇⲉ ⲙⲡⲣⲁⲟⲩⲱⲛ ⲛϩⲏⲧϥ ϣⲁⲛⲧⲉⲓ ⲉϩⲟⲩⲛ ⲛⲧⲁⲉⲡⲓⲧⲁⲥⲥⲉ ⲙⲙⲟϥ ⲕⲁⲧⲁⲣⲟⲓ ·
…
106 ⲛⲧⲟⲟⲩ ⲇⲉ ⲡⲉϫⲁⲩ ϫⲉⲛⲉⲛⲧⲁⲡⲉⲛϫⲟⲉⲓⲥ ⲡⲁⲣⲭⲱⲛ ⲕⲉⲗⲉⲩⲉ ⲙⲙⲟⲟⲩ ⲛⲁⲛ ⲧⲛⲛⲁⲁⲁⲩ ·
…
107 ⲁϥⲉⲓ ⲇⲉ ⲉⲃⲟⲗ ϩⲓⲧⲟⲟⲧⲟⲩ ⲛⲥⲉⲥⲟⲟⲩⲛ ⲁⲛ ⲡⲉϫⲉⲙⲓⲭⲁⲏⲗ ⲡⲉ ⲛⲉⲩⲙⲉⲉⲩⲉ ⲡⲉ ϫⲉⲟⲩⲁⲣⲭⲱⲛ ⲡⲉ ⲛⲧⲉⲡⲕⲁϩ ⁖ⲻ
…
108 ⲗⲟⲓⲡⲟⲛ ⲡⲉϫⲉⲇⲱⲣⲟⲑⲉⲟⲥ ⲛⲑⲉⲱⲡⲓⲥⲧⲏ ϫⲉⲛⲛⲁⲣⲟⲩ ⲏ ⲛⲛⲁⲡⲱⲣϣ ⲛⲁϣ ⲛϩⲉ ϩⲁⲡⲁⲣⲭⲱⲛ ·
…
109 ⲏ ⲛⲛⲁϭⲛⲟⲉⲓⲕ ⲧⲱⲛ ⲛⲧⲛⲕⲱ ϩⲁⲣⲱϥ ⲕⲁⲧⲁⲣⲟϥ · ϩⲁⲙⲟⲓ · ⲛⲉⲛⲉϩⲟⲟⲩ · ⲙⲡⲁϩⲟⲩ ⲛⲉⲉⲣⲉⲧⲉϩⲓⲏ ⲧⲏϣ ⲡⲉ ·
…
110 ⲡⲉϫⲉⲑⲉⲱⲡⲓⲥⲧⲏ ϫⲉⲡⲁⲥⲟⲛ ⲡⲛⲟⲩⲧⲉ ⲛⲁⲕⲁⲁⲛ ⲛⲥⲱϥ ⲁⲛ ·
…
111 ⲧⲱⲟⲩⲛ ⲧⲉⲱⲥⲙⲁⲣⲉⲟⲩⲣⲱⲙⲉ ⲕⲉⲛⲥⲡⲉⲥⲟⲟⲩ ·
…
112 ⲁⲩⲱ ⲧⲛⲛⲁⲣⲡϩⲱⲃ ⲙⲡⲏⲓ ⲙⲡⲉⲥⲛⲁⲩ ·
…
113 ⲁⲩⲉⲓⲣⲉ ⲇⲉ ϩⲓⲛⲁⲓ ⲡⲉϫⲁⲥ ⲛⲁϥ ϫⲉⲙⲁⲣⲛⲃⲱⲕ ⲛⲧⲛⲉⲓⲛⲉ ⲉⲃⲟⲗ ⲙⲡⲕⲟⲩⲓ ⲛⲏⲣⲡ ⲛⲧⲛⲛⲁⲩ ϫⲉⲉϥⲣϣⲁⲩ ⲙⲡⲁⲣⲭⲱⲛ ·
…
114 ⲛⲧⲉⲣⲟⲩⲃⲱⲕ ⲇⲉ ⲁⲩⲟⲩⲱⲛ ⲙⲡⲣⲟ ·
…
115 ⲁⲩϩⲉ ⲉⲡⲁϩⲟ ⲉϥⲙⲉϩ ⲛⲏⲣⲡ · ϣⲁⲛⲧⲉϥⲡⲱϩ ⲉⲡⲣⲟ ·
…
116 ⲁϥϣⲧⲟⲣⲧⲣ ⲛϭⲓⲇⲱⲣⲟⲑⲉⲟⲥ ·
…
117 ⲡⲉϫⲁϥ ⲛⲑⲉⲱⲡⲓⲥⲧⲏ ϫⲉⲧⲁⲥⲱⲛⲉ ⲙⲏ ⲁⲗⲁⲁⲩ ⲛⲣⲱⲙⲉ ⲛⲏⲣⲡ ⲉϩⲟⲩⲛ ϫⲓⲛⲧⲁⲉⲓ ⲉⲃⲟⲗ ϩⲓⲧⲟⲟⲧ ⲙⲡϩⲟⲟⲩ ·
…
118 ⲡⲉϫⲁⲥ ⲛⲁϥ ϫⲉϥⲟⲛϩ ⲛϭⲓⲡϫⲟⲉⲓⲥ ⲡⲁⲥⲟⲛ ϫⲉϫⲓⲛⲙⲡⲛⲁⲩ ⲛⲧⲁⲛⲉⲛⲧⲁⲡⲁⲣⲭⲏ ⲉⲃⲟⲗ ⲙⲡϩⲟⲟⲩ · ⲙⲛⲗⲁⲁⲩ ⲛⲏⲣⲡ ·
…
119 ⲛϩⲟⲩⲛ ⲛⲥⲁⲟⲩϣⲁϣⲟⲩ ⲛⲟⲩⲱⲧ ⲉϥⲟⲩⲟⲗⲥ ·
…
120 ⲡⲉϫⲁϥ ⲛⲁⲥ ϫⲉϩⲣⲟϣ ⲛϩⲏⲧ ⲧⲁⲥⲱⲛⲉ · ϣⲁⲛⲧⲛⲛⲁⲩ ⲉⲧϩⲁⲏ ⲙⲡϩⲱⲃ ⲙⲛⲛⲥⲱⲥ ⲡⲉϫⲁϥ ⲛⲁⲥ ϫⲉⲙⲁⲣⲛⲃⲱⲕ ⲛⲧⲛⲉⲓⲛⲉ ⲙⲡⲕⲟⲩⲓ ⲛⲛⲉϩ ⲉⲃⲟⲗ ·
…
121 ⲉⲧⲃⲉⲧϭⲓⲛⲟⲩⲱⲙ ⲙⲛⲧⲉⲭⲣⲉⲓⲁ ⲛⲛϩⲏⲕⲉ ·
…
122 ⲁⲩⲃⲱⲕ ⲇⲉ ⲟⲛ ⲉϩⲟⲩⲛ ⲙⲡⲉⲥⲛⲁⲩ ⲉⲡⲕⲉⲗⲗⲁⲣⲓⲕⲟⲛ ·
…
123 ⲁⲩϩⲉ ⲉⲥⲁϣϥⲉ ⲛⲁⲅⲅⲉⲛ · ⲉⲩⲙⲉϩ ⲛⲛⲉϩ ⲉϩⲣⲁⲓ ⲉⲣⲱⲟⲩ ·
…
124 ⲁⲩⲱ ϩⲉⲛⲕⲉⲁϣⲏ ⲛⲕⲟⲗⲟⲑⲟⲛ ⲉⲩⲙⲉϩ ⲙⲙⲓⲛⲉ ⲛⲓⲙ ⲛⲁⲅⲁⲑⲟⲛ ⲡⲣⲟⲥⲧⲉⲭⲣⲉⲓⲁ ⲙⲡⲏⲓ ·
…
125 ⲛⲧⲟⲟⲩ ⲇⲉ ⲁⲩⲛⲟϭ ⲛϩⲟⲧⲉ ϩⲉ ⲉϩⲣⲁⲓ ⲉϫⲱⲟⲩ ·
…
126 ⲙⲛⲛⲥⲱⲥ ⲁⲩⲃⲱⲕ ⲉⲡⲉⲩⲕⲟⲓⲧⲱⲛ ·
…
127 ⲁⲩϩⲉ ⲉⲛⲉⲩⲧⲏⲏⲃⲉ ⲉⲩⲙⲉϩ ⲛϩⲟⲉⲓⲧⲉ · ⲉⲩⲉⲓⲛⲉ ⲛⲛⲁⲧⲉⲩⲙⲛⲧⲣⲙⲙⲁⲟ ⲛϣⲟⲣⲡ ⲥⲭⲉⲇⲱⲛ ⲉϫⲟⲟⲥ · ϫⲉⲛⲧⲟⲟⲩ ⲛⲉ ϩⲛⲟⲩⲙⲉ · ⲙⲛⲛⲥⲁⲛⲁⲓ ·
…
128 ⲁⲩⲃⲱⲕ ⲉⲡⲉⲩⲙⲁ ⲛⲕⲁⲟⲉⲓⲕ ⲁⲩϩⲉ ⲉⲣⲟϥ ⲉϥⲙⲉϩ ⲛⲟⲉⲓⲕ ⲉϥⲥⲟⲧⲡ ⲉϥⲟⲩⲟⲃϣ ⲛⲧϩⲉ ⲛⲟⲩⲭⲓⲱⲛ ·
…
129 ⲁⲩⲱ ⲛⲧⲉⲩⲛⲟⲩ ⲁⲩⲁⲓⲥⲑⲁⲛⲉ ⲉⲡⲉϩⲙⲟⲧ ⲛⲧⲁϥⲧⲁϩⲟⲟⲩ ·
…
130 ⲁⲩϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
131 ⲉⲓⲧⲁ ⲡⲉϫⲉⲇⲱⲣⲟⲑⲉⲟⲥ ⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ϫⲉⲧⲁⲥⲱⲛⲉ ·
…
132 ⲉⲓⲥ ⲡⲛⲟⲩⲧⲉ ⲁϥⲥⲃⲧⲱⲧ ⲛϩⲛϩⲱⲃ ⲛⲓⲙ · ⲙⲁⲣⲛⲡⲱⲣϣ ϩⲁⲡⲁⲣⲭⲱⲛ ·
…
133 ⲉⲡⲉⲓⲇⲏ ⲁⲡⲛⲁⲩ ϣⲱⲡⲉ ⲛⲧⲛⲃⲱⲕ ⲉⲧⲥⲩⲛⲁⲝⲓⲥ ·
…
134 ⲁⲩⲉⲓⲣⲉ ⲇⲉ ϩⲓⲛⲁⲓ ·
…
135 ⲁⲩⲡⲱⲣϣ ⲙⲡⲁⲕⲟⲩⲃⲁⲧⲱⲛ ϩⲛⲟⲩⲧⲓⲙⲏ ⲡⲣⲟⲥ ⲡⲧⲁⲉⲓⲟ ⲙⲡⲁⲣⲭⲱⲛ ·
…
136 ⲁⲩⲕⲱ ⲉϩⲣⲁⲓ ⲛⲛⲉⲧⲣⲁⲡⲓⲍⲁ ⲛⲛⲉⲥⲛⲏⲩ ⲕⲁⲧⲁⲡⲉⲩⲉⲑⲟⲥ ·
…
137 ⲁⲩⲗⲉⲩⲕⲱⲫⲱⲣⲉⲓ ⲙⲙⲟⲟⲩ ⲕⲁⲗⲱⲥ · ϩⲛϩⲉⲛϩⲃⲥⲱ ⲉⲩⲡⲣⲓⲱⲟⲩ ·
…
138 ⲁⲩⲃⲱⲕ ⲉⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ϩⲛⲟⲩⲛⲟϭ ⲛⲣⲁϣⲉ ·
…
139 ⲁⲩⲱ ⲛⲧⲉⲣⲟⲩⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁⲩⲡⲁϩⲧⲟⲩ ⲙⲡⲉⲥⲛⲁⲩ ⲉϫⲙⲡⲉⲩϩⲟ · ϩⲓⲧϩⲏ ⲙⲡϩⲓⲉⲣⲁϯⲟⲛ ·
…
140 ⲁⲩⲱ ⲛⲉⲩⲥⲟⲡⲥⲡ ⲙⲡⲛⲟⲩⲧⲉ ϩⲛⲟⲩⲛⲟϭ ⲛϣⲡϩⲙⲟⲧ · ϫⲉⲧⲛⲉⲩⲭⲁⲣⲓⲥⲧⲉⲓ ⲛⲁⲕ ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
141 ⲁⲩⲱ ⲧⲛϯⲉⲟⲟⲩ ⲙⲡⲉⲕⲉⲓⲱⲧ ⲛⲁⲅⲁⲑⲟⲥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ·
…
142 ⲁⲩⲱ ⲧⲛϣⲡϩⲙⲟⲧ ⲛⲧⲟⲟⲧϥ ⲙⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ϫⲉⲙⲡⲉⲕϩⲟⲩⲣⲱⲛ ⲙⲡⲉⲕⲛⲁ ·
…
143 ⲟⲩⲇⲉ ⲙⲡⲉⲕⲟⲃϣⲕ ⲉⲛⲉⲛϭⲗⲓⲗ ·
…
144 ⲁⲗⲗⲁ ⲁⲕⲧⲛⲛⲟⲟⲩ ⲛⲁⲛ ⲛⲛⲉⲕⲙⲛⲧϣⲛϩⲧⲏϥ ϩⲛⲟⲩϭⲉⲡⲏ ·
…
145 ⲉⲓⲧⲁ ⲙⲛⲛⲥⲁⲛⲁⲓ ⲁⲩⲥⲩⲛⲁⲅⲉ ⲁⲩϫⲓ ⲛⲧⲉⲓⲣⲏⲛⲏ ·
…
146 ⲁⲩⲃⲱⲕ ⲁⲩⲟⲩⲱⲛ ⲙⲡⲣⲟ ⲙⲡⲉⲩⲏⲓ ϩⲓⲧϩⲏ ⲛⲛⲉⲧⲛⲏⲩ ·
…
148 ⲁⲩⲱ ⲁⲩⲡⲣⲟⲥⲇⲱⲕⲉⲓ ϩⲁⲧϩⲏ ⲙⲡⲗⲁⲟⲥ ⲙⲛⲡⲁⲣⲭⲱⲛ ϩⲛⲟⲩⲛⲟϭ ⲛⲥⲡⲟⲩⲇⲏ ·
…
149 ⲗⲟⲓⲡⲟⲛ ⲁⲩⲥⲱⲕ ⲣⲱⲙⲉ ⲉϩⲟⲩⲛ ϩⲓⲥϩⲓⲙⲉ ϩⲓϣⲏⲣⲉ ϣⲏⲙ ·
…
150 ϩⲱⲥ ⲇⲉ ⲛⲧⲉⲧⲁⲩⲗⲏ ⲙⲡⲏⲓ ⲙⲟⲩϩ · ⲛⲧⲟϥ ⲇⲉ ϩⲱⲱϥ ⲇⲱⲣⲟⲑⲉⲟⲥ · ⲙⲛⲑⲉⲱⲡⲓⲥⲧⲏ ⲛⲉⲩⲙⲏⲣ ⲡⲉ ⲉⲩⲁϩⲉⲣⲁⲧⲟⲩ · ⲉⲩⲇⲓⲁⲕⲟⲛⲉⲓ ⲛⲁⲩ ϩⲛⲭⲣⲉⲓⲁ ⲛⲓⲙ ·
…
151 ⲉⲩϯ ⲛⲁⲩ ⲉⲛⲟⲩⲏⲣⲡ ⲉⲛⲁϣⲱϥ · ⲉⲣⲉⲛⲁⲓ ⲇⲉ ϣⲱⲡⲉ ⲛⲧⲉⲓϩⲉ ·
…
152 ⲉⲓⲥ ⲡⲁⲣⲭⲱⲛ ⲁϥⲉⲓ ⲙⲛⲧⲉϥⲧⲁⲝⲓⲥ ⲧⲏⲣⲥ ⲁⲩⲧⲱϩⲙ ⲉϩⲟⲩⲛ ⲉⲡⲣⲟ ⲙⲡⲏⲓ ·
…
153 ⲇⲱⲣⲟⲑⲉⲟⲥ ⲇⲉ ⲙⲛⲧⲉϥⲥϩⲓⲙⲉ ⲁⲩϭⲉⲡⲏ ⲁⲩⲟⲩⲱⲛ ⲙⲡⲣⲟ ·
…
154 ⲁⲩⲉⲓ ⲉⲃⲟⲗ ϩⲏⲧϥ ϩⲛⲟⲩⲣⲁϣⲉ ·
…
155 ⲁⲩⲡⲣⲟⲥⲕⲩⲛⲉⲓ ⲛⲁϥ ⲉⲩϫⲱ ⲙⲙⲟⲥ ϫⲉⲕⲁⲗⲱⲥ ⲁⲕⲉⲓ ϣⲁⲣⲟⲛ ⲙⲡϩⲟⲟⲩ ·
…
156 ⲙⲛⲧⲉⲕⲧⲁⲝⲓⲥ ⲧⲏⲣⲥ ⲡⲉⲛϫⲟⲉⲓⲥ ⲡⲁⲣⲭⲱⲛ ·
…
157 ⲁⲗⲏⲑⲱⲥ ⲧⲛⲣⲁϣⲉ ⲛⲙⲙⲁⲕ ⲧⲏⲣⲛ ϫⲉⲁⲛⲙⲡϣⲁ · ⲉⲧⲣⲉⲕⲉⲓ ⲛⲁⲛ ϩⲛⲟⲩϩⲟⲟⲩ ⲉϥⲧⲁⲉⲓⲏⲩ ·
…
158 ⲁⲩⲱ ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲣⲁϣⲉ ⲛⲙⲙⲁⲕ · ⲁⲙⲟⲩ ⲉϩⲟⲩⲛ ⲡⲣⲱⲙⲉ ⲉⲧⲥⲙⲁⲙⲁⲁⲧ ⲡϫⲟⲉⲓⲥ ⲛⲙⲙⲁⲕ ·
…
159 ⲡⲁⲣⲭⲱⲛ ⲇⲉ ⲉⲧⲉⲙⲓⲭⲁⲏⲗ ⲡⲉ ⲛⲧⲉⲣⲉϥⲃⲱⲕ ⲉϩⲟⲩⲛ ⲉⲧⲁⲩⲗⲏ ·
…
160 ⲁϥϩⲉ ⲉⲣⲟⲥ ⲉⲥⲙⲉϩ ⲛⲣⲱⲙⲉ ⲛⲕⲟⲩⲓ ϩⲓⲛⲟϭ ·
…
161 ⲁϥⲣⲧϩⲉ ⲛⲛⲉⲧⲱ ⲛϣⲡⲏⲣⲉ ·
…
162 ⲡⲉϫⲁϥ ⲛⲇⲱⲣⲟⲑⲉⲟⲥ ⲙⲛⲧⲉϥⲥϩⲓⲙⲉ · ϫⲉⲟⲩ ⲉⲣⲱⲧⲛ ⲧⲉϯⲁϣⲏ ⲛⲣⲱⲙⲉ ⲉϯⲛⲁⲩ ⲉⲣⲟⲟⲩ ⲛⲧⲉⲓϩⲉ ·
…
163 ⲁⲣⲏⲩ ⲉⲧⲉⲧⲛⲟⲩⲉϣ ϩⲓⲥⲉ ⲉⲣⲱⲧⲛ ⲉⲧⲃⲏⲏⲧ · ϫⲉⲛⲧⲁⲉⲓ ϣⲁⲣⲱⲧⲛ ⲙⲡϩⲟⲟⲩ ·
…
164 ⲙⲏ ⲛⲧⲉⲧⲛⲛⲁⲩ ⲁⲛ ⲉⲡϩⲟϫϩϫ · ⲉⲧϣⲟⲟⲡ ⲧⲉⲛⲟⲩ ⲙⲟⲅⲓⲥ ⲛⲧⲉⲧⲛⲣ ⲛⲁⲓ ⲛⲛⲉϩⲟⲟⲩ ⲙⲡϩⲉⲛⲟⲩϥⲉ ·
…
165 ⲁⲩⲟⲩⲱϣⲃ ⲡⲉϫⲁⲩ ϫⲉⲕⲱ ⲛⲁⲛ ⲉⲃⲟⲗ ⲡⲉⲛϫⲟⲉⲓⲥ ⲡⲁⲣⲭⲱⲛ ⲙⲡⲉⲛⲟⲩⲉϩⲗⲁⲁⲩ ⲛϩⲓⲥⲉ ⲉⲣⲟⲛ ⲉⲧⲃⲏⲏⲧⲕ ·
…
166 ⲁⲗⲗⲁ ⲡⲉϩⲙⲟⲧ ⲙⲡⲛⲟⲩⲧⲉ ϣⲏⲡ · ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϫⲉⲙⲛⲗⲁⲁⲩ ⲛϣⲙⲙⲟ ϩⲛⲛⲁⲓ ⲧⲏⲣⲟⲩ ⲉⲧⲉⲕⲛⲁⲩ ⲉⲣⲟⲟⲩ ⲙⲡϩⲟⲟⲩ · ⲁⲗⲗⲁ ⲛⲁⲡⲉⲛⲅⲉⲛⲟⲥ ⲛⲉ ·
…
167 ⲁⲩⲱ ⲥⲉⲏⲡ ⲉⲣⲟⲛ ϩⲁⲛⲉⲛⲉⲓⲟⲧⲉ ·
…
168 ⲛⲁⲓ ⲇⲉ ⲉϥϫⲱ ⲙⲙⲟⲟⲩ ·
…
169 ⲛⲉⲣⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲣⲁϣⲉ ⲉϫⲛⲧⲉⲩⲡⲣⲟϩⲁⲓⲣⲉⲥⲓⲥ ⲉⲧϫⲏⲕ ⲉⲃⲟⲗ ·
…
170 ⲡⲉϫⲁϥ ⲛⲁⲩ ϫⲉⲙⲁⲣⲟⲛ ϫⲉⲁⲡⲛⲁⲩ ϣⲱⲡⲉ ⲉⲧⲣⲁϫⲓⲛⲧⲁⲭⲣⲉⲓⲁ ⲙⲛⲛⲉⲧⲛⲙⲙⲁⲓ ·
…
171 ⲁⲩⲃⲱⲕ ⲇⲉ ⲉⲡⲙⲁ ⲛⲧⲁⲩⲥⲃⲧⲱⲧϥ ⲛⲁϥ ·
…
172 ⲛⲧⲉⲣⲟⲩⲃⲱⲕ ⲇⲉ ⲉϩⲟⲩⲛ ⲉⲡⲙⲁ ⲛⲥⲱ ·
…
173 ⲁϥϩⲙⲟⲟⲥ ϩⲓϫⲛⲟⲩⲑⲣⲟⲛⲟⲥ ·
…
174 ⲁϥⲕⲉⲗⲉⲩⲉ ϫⲉⲁⲛⲓⲛⲉ ⲛⲁⲓ ⲙⲡⲧⲃⲧ · ⲛⲧⲁⲉⲡⲓⲧⲁⲥⲥⲉ ⲙⲙⲟϥ ⲕⲁⲧⲁⲣⲟⲓ ·
…
175 ⲁⲩϭⲉⲡⲉ ⲁⲩⲉⲓⲛⲉ ⲙⲙⲟϥ ⲛⲁϥ ·
…
176 ⲡⲉϫⲁϥ ⲛⲁϥ ϫⲉⲇⲱⲣⲟⲑⲉⲟⲥ ⲡⲁⲥⲱⲧⲡ ⲁⲩⲟⲩⲱⲛ ⲛϩⲏⲧϥ ·
…
177 ⲁϥⲉⲓⲣⲉ ϩⲓⲛⲁⲓ ·
…
178 ⲡⲉϫⲉⲡⲁⲣⲭⲱⲛ ⲛⲁϥ ϫⲉⲁⲛⲓⲛⲉ ⲉⲃⲟⲗ ⲛⲧⲉϥⲕⲟⲓⲗⲓⲁ ·
…
179 ⲛⲧⲉⲣⲉϥⲛⲧⲥ ⲇⲉ ⲉⲃⲟⲗ ⲛⲉⲟⲩⲛⲟϭ ⲉⲙⲁⲧⲉ ·
…
180 ⲡⲉϫⲉⲡⲁⲣⲭⲱⲛ ⲛⲁϥ ϫⲉⲁⲩⲟⲩⲱⲛ ⲙⲙⲟⲥ ·
…
181 ⲛⲧⲉⲣⲟⲩ ⲁⲛⲟⲩⲱⲛ ⲇⲉ ⲙⲙⲟⲥ ·
…
182 ⲁⲩϩⲉ ⲉⲩⲛⲟϭ ⲙⲡⲁⲛⲛⲓⲛ ⲛϩⲟⲩⲛ ⲛϩⲏⲧϥ ⲉⲥⲧⲟⲟⲃⲉ ⲛⲟⲩⲥⲫⲣⲁⲅⲓⲥ ·
…
183 ⲇⲱⲣⲟⲑⲉⲟⲥ ⲇⲉ ⲁϥⲑⲁⲩⲙⲁⲍⲉ ⲡⲉϫⲁϥ ϫⲉⲟⲩ ⲡⲉ ⲡⲁⲓ ⲡⲁϫⲟⲉⲓⲥ ⲡⲁⲣⲭⲱⲛ ⲛⲧⲁⲓϩⲉ ⲉⲣⲟϥ ⲛⲧⲉϩⲉ ·
…
184 ⲡⲉϫⲉⲡⲁⲣⲭⲱⲛ ϫⲉϣⲁⲥϣⲱⲡⲉ ⲛⲧⲉⲛⲛⲟϭ ⲛⲧⲃⲧⲱⲙⲕ ⲛⲛⲉⲧⲟⲩⲛⲁϩⲉ ⲉⲣⲟⲟⲩ ·
…
185 ⲁⲛⲟⲩⲱⲛ ⲙⲙⲟⲥ ⲛⲧⲛⲛⲁⲩ ϫⲉⲉⲣⲉⲟⲩ ⲛϩⲏⲧⲥ ·
…
186 ⲇⲱⲣⲟⲑⲉⲟⲥ ⲇⲉ ⲡⲉϫⲁϥ ϫⲉⲉⲓⲛⲁⲟⲩⲱⲛ ⲙⲙⲟⲥ ⲛⲁϣ ⲛϩⲉ ·
…
187 ⲉⲓⲥϩⲏⲏⲧⲉ ⲉⲥⲧⲟⲟⲃⲉ ·
…
188 ⲁϥⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ ⲛϭⲓⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ ·
…
189 ⲁϥⲟⲩⲱⲛ ⲙⲙⲟⲥ ⲁϥϩⲉ ⲉⲣⲟⲥ ⲉⲥⲙⲉϩ ⲛⲛⲟⲩⲃ ⲉϥⲥⲟⲧⲡ ·
…
190 ⲁϥⲱⲡ ⲇⲉ ⲛⲛⲛⲟⲩⲃ ⲁϥϩⲉ ⲉⲣⲟⲟⲩ ⲉⲩⲉⲓⲣⲉ ⲛϣⲟⲙⲛⲧ ⲛϣⲉ ⲛϩⲟⲗⲟⲕⲟⲧⲓⲛⲟⲥ ⲛⲁⲡⲉ ·
…
191 ⲁⲩⲱ ⲛⲥⲁⲡⲉⲥⲏⲧ ⲙⲙⲟⲟⲩ ⲧⲏⲣⲟⲩ ·
…
192 ⲁϥϩⲉ ⲉⲕⲉϣⲟⲙⲛⲧ ⲛⲧⲏⲣⲙⲏⲥⲓⲟⲛ ⲛⲛⲟⲩⲃ ·
…
193 ⲟⲩⲁ ⲟⲩⲁ ·
…
194 ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ⲉⲧⲡⲉ · ⲉϥϫⲱ ⲙⲙⲟⲥ ϫⲉⲛⲧⲕⲟⲩⲇⲓⲕⲁⲓⲟⲥ ⲡϫⲟⲉⲓⲥ ⲁⲩⲱ ⲉⲣⲉⲛⲉⲕϩⲁⲡ ⲥⲟⲩⲧⲱⲛ ⲁⲩⲱ ⲙⲛϣⲓ ϣⲟⲟⲡ ⲛⲛⲉⲧⲙⲉ ⲙⲙⲟⲕ ·
…
195 ⲡⲁⲣⲭⲱⲛ ⲇⲉ ⲉⲧⲉⲙⲓⲭⲁⲏⲗ ⲡⲉ ·
…
196 ⲁϥⲙⲟⲩⲧⲉ ⲉⲇⲱⲣⲟⲑⲉⲟⲥ ⲙⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ·
…
197 ⲡⲉϫⲁϥ ⲛⲁⲩ ϫⲉⲛⲁⲥⲛⲏⲩ ϩⲱⲱⲛ ⲉϩⲟⲩⲛ ⲉⲣⲟⲓ ·
…
198 ⲟⲛⲧⲱⲥ ϫⲉⲛⲧⲱⲧⲛ ϩⲉⲛⲣⲙⲣⲁϣ ⲁⲩⲱ ⲁⲧⲉⲧⲛϫⲉⲟⲩⲙⲏⲏϣⲉ ⲛⲁⲛϩⲟⲗⲟⲙⲁ ⲉⲃⲟⲗ ⲉⲧⲃⲏⲏⲧ · ϫⲉⲛⲧⲁⲉⲓ ϣⲁⲣⲱⲧⲛ ⲙⲡϩⲟⲟⲩ ·
…
199 ⲁⲗⲗⲁ ⲉⲓⲥ ⲡⲛⲟⲩⲧⲉ ⲁϥⲥⲃⲧⲉ ⲧⲏⲩⲧⲛ ·
…
200 ⲁⲩⲱ ⲁⲓⲥⲟⲩⲛⲛⲉⲓⲛⲟⲩⲃ ⲙⲛⲧⲉⲥⲫⲣⲁⲅⲓⲥ ·
…
201 ⲁⲓϩⲉ ⲉⲣⲟⲟⲩ ⲛⲁⲡⲁϫⲟⲉⲓⲥ ⲡⲣⲣⲟ ⲛⲉ ·
…
202 ⲧⲉⲛⲟⲩ ⲇⲉ ⲉⲡⲙⲁ ⲛⲧⲙⲛⲧⲙⲁⲓⲣⲱⲙⲉ · ⲛⲧⲁⲧⲉⲧⲛⲁⲁⲥ ⲛⲙⲙⲁⲓ ⲙⲡϩⲟⲟⲩ ⲙⲛⲛⲁⲣⲱⲙⲉ ·
…
203 ⲉⲓⲥϩⲏⲏⲧⲉ ⲁⲓⲭⲁⲣⲓⲍⲉ ⲛⲏⲧⲛ ⲙⲡϣⲟⲙⲛⲧ ⲛϣⲉ ⲛϩⲟⲗⲟⲕⲟⲧⲧⲓⲛⲟⲥ ·
…
204 ⲁⲩⲱ ⲡⲕⲉϣⲟⲙⲛⲧ ⲛⲧⲏⲣⲙⲏⲥⲓⲟⲛ ·
…
205 ϥⲓⲧⲟⲩ ⲛⲏⲧⲛ ⲛⲧⲉⲧⲛϯ ⲟⲩⲁ ⲙⲡϣⲱⲥ ⲉⲡⲙⲁ ⲙⲡⲉⲥⲟⲟⲩ ·
…
206 ⲁⲩⲱ ⲟⲩⲁ ⲙⲡⲟⲩⲱϩⲉ ⲉⲡⲙⲁ ⲙⲡⲧⲃⲧ · ϫⲉⲁⲛⲟⲕ ⲁⲓϣⲡⲧⲱⲱⲣⲉ ⲙⲙⲟⲟⲩ ·
…
207 ⲁⲩⲱ ⲉⲓⲥ ⲡⲛⲁⲩ ⲙⲙⲉⲉⲣⲉ ⲁϥϣⲱⲡⲉ ⲕⲁⲧⲁⲧⲉⲡⲣⲟⲑⲉⲥⲙⲓⲁ ⲁⲩⲱ ⲡⲕⲉⲟⲩⲁ ⲛⲧⲉⲧⲛⲥⲉⲧⲧⲉϣⲧⲏⲛ · ⲛⲧⲁⲕⲕⲁⲁⲥ ⲁⲕϫⲓ ⲙⲡⲉⲥⲟⲩⲟ ⲛⲧⲉⲡⲣⲟⲥⲫⲟⲣⲁ ·
…
208 ⲇⲱⲣⲟⲑⲉⲟⲥ ⲇⲉ ⲙⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ·
…
209 ⲁⲩⲡⲁϩⲧⲟⲩ ⲙⲡⲁⲣⲭⲱⲛ ⲉⲩϫⲱ ⲙⲙⲟⲥ ϫⲉⲟⲩ ⲡⲉ ⲡⲁⲓ ⲡⲉⲛϫⲟⲉⲓⲥ ⲡⲁⲣⲭⲱⲛ ⲉⲧⲉⲕϫⲱ ⲙⲙⲟϥ ⲛⲁⲛ ·
…
210 ⲙⲏ ⲛⲧⲁⲕⲉⲓ ϣⲁⲛⲉⲕϩⲙϩⲁⲗ · ϫⲉⲛⲉϫⲓⲟⲩⲗⲁⲁⲩ ⲛⲧⲟⲟⲧⲕ ·
…
211 ⲙⲏ ⲟⲩⲭⲣⲉⲱⲥ ⲁⲛ ⲡⲉ ⲉⲣⲱⲙⲉ ⲛⲓⲙ ⲉϣⲟⲟⲡ ⲉⲣⲟⲟⲩ ⲛⲛⲧⲁⲝⲓⲥ ⲙⲡⲣⲣⲟ ·
…
212 ⲙⲏ ⲛⲉⲕⲱ ⲁⲛ ⲛϫⲟⲉⲓⲥ ⲉⲛⲛⲕⲉⲥⲱⲙⲁ · ⲉⲧⲣⲉⲕⲉⲓⲣⲉ ⲛⲁⲛ ⲛⲧϩⲉ ⲉⲧⲉⲕⲟⲩⲁϣⲥ ·
…
213 ⲁⲩⲱ ⲭⲱⲣⲓⲥ ⲛⲁⲓ ⲟⲛ ⲛⲛⲁϫⲓⲟⲩⲗⲁⲁⲩ ϩⲁⲧⲱⲣⲉⲁ ⲙⲡⲛⲟⲩⲧⲉ ·
…
214 ⲁⲩⲱ ⲕⲥⲟⲟⲩⲛ ϩⲱⲱⲕ ϫⲉⲁϣ ⲛϩⲟⲟⲩ ⲡⲉⲡⲟⲟⲩ ·
…
215 ⲁⲩⲱ ⲡⲉ ⲕⲟⲩⲓ ⲛⲟⲉⲓⲕ ⲉⲧⲛⲟⲩⲱⲙ ⲙⲙⲟϥ ⲙⲡϩⲟⲟⲩ ⲙⲛⲛⲉⲥⲛⲏⲩ ⲙⲡⲱⲛ ⲁⲛ ⲡⲉ ·
…
216 ⲁⲗⲗⲁ ⲡⲁⲡⲛⲟⲩⲧⲉ ⲡⲉ ⲙⲛⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲡⲁⲓ ⲉⲧⲛⲣϣⲁ ⲛⲁϥ ⲙⲡϩⲟⲟⲩ ·
…
217 ⲁⲗⲗⲁ ⲉϣϫⲉ ⲡⲉⲕⲟⲩⲱϣⲉ ⲡⲉ ⲡⲁⲓ ⲱ ⲡⲉⲛϫⲟⲉⲓⲥ · ⲉⲓⲉⲧⲛⲛⲁϫⲓⲡⲉⲓϣⲟⲙⲛⲧ ⲛⲧⲏⲣⲙⲏⲥⲓⲟⲛ ·
…
218 ⲙⲙⲁⲧⲉ ⲛⲧⲛⲧⲁⲁⲩ ⲉⲡⲙⲁ ⲉⲧⲁⲣⲟⲛ · ⲡⲣⲟⲥⲧⲉⲕⲕⲉⲗⲉⲩⲥⲓⲥ ·
…
219 ⲡⲉϫⲉⲡⲁⲣⲭⲱⲛ ⲛⲁⲩ ϫⲉϩⲛⲟⲩⲙⲉ ⲛⲧⲉⲡⲛⲟⲩⲧⲉ ·
…
220 ⲙⲛⲡⲟⲩϫⲁⲓ ⲙⲡⲁϫⲟⲉⲓⲥ ⲡⲣⲣⲟ · ϫⲉⲧⲉⲧⲛⲛⲁϫⲓⲧⲟⲩ ⲧⲏⲣⲟⲩ ⲙⲛⲡⲉⲩⲕⲱⲃ ·
…
221 ⲙⲏⲡⲱⲥ ⲛⲧⲁⲧⲉⲧⲛⲣϩⲟⲧⲉ ϫⲉⲛⲛⲉⲡⲣⲣⲟ ⲥⲱⲧⲙ ⲛϥⲁⲡⲉⲗⲉ ⲉⲣⲱⲧⲛ ⲁⲛⲟⲕ ⲡⲉⲧⲛⲁⲁⲡⲟⲗⲟⲅⲓⲍⲉ ϩⲁⲣⲱⲧⲛ ⲙⲡⲁϫⲟⲉⲓⲥ ⲡⲣⲣⲟ · ϫⲉⲧⲉⲧⲛⲛⲁϫⲓⲧⲟⲩ ⲧⲏⲣⲟⲩ · ⲛⲧⲁⲧⲣⲉϥϯ ⲛⲏⲧⲛ ⲛⲕⲉⲛⲟϭ ⲛⲧⲁⲉⲓⲟ ·
…
222 ⲁⲩⲱ ⲉϣϫⲉ ⲧⲉⲧⲛⲟⲩⲉϣ ⲡⲉⲧⲛϩⲏⲧ ⲙⲟⲧⲛⲉ · ⲛⲛⲁⲓ ⲁⲛ ⲙⲙⲁⲧⲉ ⲛⲉⲧⲉⲧⲛⲧⲁϩⲟ · ⲙⲙⲟⲟⲩ ⲛⲧⲟⲟⲧ ·
…
223 ⲁⲗⲗⲁ ⲧⲙⲏⲏⲥⲉ ⲧⲉ ⲧⲁⲓ ·
…
224 ϩⲟⲧⲁⲛ ⲇⲉ ⲉⲓϣⲁⲛⲕⲧⲟⲓ ⲉⲧⲁⲡⲟⲗⲓⲥ ϩⲙⲡⲟⲩⲱϣⲉ ⲙⲡⲛⲟⲩⲧⲉ ϯⲛⲁⲧⲛⲛⲟⲟⲩ ⲛⲏⲧⲛ ·
…
225 ⲙⲡⲕⲉⲫⲁⲗⲓⲟⲛ · ⲛⲧⲁⲧⲛⲛⲟⲟⲩ ⲛⲥⲱⲧⲛ ⲛⲧⲁⲡⲗⲏⲣⲟⲩ ⲙⲙⲱⲧⲛ ⲛⲧⲁϯ ⲛⲏⲧⲛ ⲛϩⲉⲛⲕⲉⲧⲁⲉⲓⲟ ·
…
226 ⲇⲱⲣⲟⲑⲉⲟⲥ ⲇⲉ ⲙⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ·
…
227 ⲁⲩⲁⲇⲱⲛⲉⲓ · ⲉⲩⲥⲱⲧⲙ ⲉⲛⲁⲓ ·
…
228 ⲡⲉϫⲁⲩ ⲙⲡⲁⲣⲭⲱⲛ ϫⲉⲧⲛⲥⲟⲡⲥⲡ ⲙⲙⲟⲕ ⲙⲡⲣⲣϩⲁⲗ ⲙⲙⲟⲛ ⲟⲩⲇⲉ ⲙⲡⲣϩⲓⲗⲁ ⲉⲣⲟⲛ ϩⲛⲛⲉⲕϣⲁϫⲉ ·
…
229 ⲁⲛⲟⲛ ⲛⲉⲕϩⲙϩⲁⲗ ·
…
230 ⲉⲡⲉⲓⲇⲏ ⲉⲩⲛⲧⲡⲉ ⲙⲡⲉⲛⲙⲏⲧⲣⲟⲛ
…
231 ⲁⲩⲱ ⲉⲣⲉⲛⲉⲕϩⲙϩⲁⲗ ⲛⲁϭⲛⲭⲣⲏⲙⲁ ⲧⲱⲛ ϩⲁϩⲧⲏⲕ · ϫⲉⲛⲁϫⲓⲙⲏⲥⲉ ·
…
232 ⲏ ⲁϣ ⲡⲉ ⲡⲉϩⲟⲟⲩ ⲛⲧⲁⲕⲉⲓ ϣⲁⲣⲟⲛ ·
…
233 ⲉⲓⲙⲏⲧⲓ ⲉⲡϩⲟⲟⲩ ⲙⲙⲁⲧⲉ · ϫⲉⲛⲛⲁϯⲟⲩⲗⲁⲁⲩ ⲛⲁⲕ ·
…
234 ϩⲛⲟⲩⲙⲉ ⲅⲁⲣ ⲛⲧⲉⲡϫⲟⲉⲓⲥ ⲙⲡⲉⲛⲛⲁⲩ ⲅⲁⲣ ⲉⲣⲟⲕ ⲉⲛⲉϩ ·
…
235 ⲁⲕⲉⲓ ⲉϩⲟⲩⲛ ⲉⲡⲉⲛⲏⲓ ·
…
236 ⲟⲩⲇⲉ ⲛⲧⲛⲥⲟⲟⲩⲛ ⲙⲙⲟⲕ ⲁⲛ ϩⲙⲡϩⲟ · ⲉⲓⲙⲏⲧⲓ ⲉⲡϩⲟⲟⲩ ⲙⲙⲁⲧⲉ ·
…
237 ⲁⲩⲱ ⲛⲁϣ ⲛϩⲉ ⲱ ⲡⲉⲛϫⲟⲉⲓⲥ · ⲉⲕϫⲱ ⲙⲙⲟⲥ ϫⲉⲁⲕϫⲓⲟⲩⲗⲁⲁⲩ ⲛⲧⲟⲟⲧⲛ ·
…
238 ⲁϥⲟⲩⲱϣⲃ ⲛϭⲓⲡⲁⲣⲭⲱⲛ ⲉϥϫⲱ ⲙⲙⲟⲥ ϫⲉⲥⲱⲧⲙ ⲛⲧⲁⲧⲁⲙⲱⲧⲛ ·
…
239 ϫⲉⲛⲧⲁⲓⲉⲓ ⲉϩⲟⲩⲛ ⲉⲡⲉⲧⲛⲏⲓ ⲛⲁϣ ⲛⲟⲩⲟⲉⲓϣ ·
…
240 ϫⲓⲛⲙⲡⲉⲟⲩⲟⲉⲓϣ ⲅⲁⲣ ⲛⲧⲁⲛⲉⲧⲛⲉⲓⲟⲧⲉ ⲙⲧⲟⲛ ⲙⲙⲟⲟⲩ · ⲉⲁⲧⲉⲧⲛⲣⲁⲡⲉ ⲉⲧⲉⲩⲟⲩⲥⲓⲁ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ·
…
241 ϯⲛⲏⲩ ⲉϩⲟⲩⲛ ⲉⲡⲉⲧⲛⲏⲓ ⲛⲟⲩⲥⲟⲡ ⲕⲁⲧⲁⲉⲃⲟⲧ ·
…
242 ⲁⲩⲱ ⲙⲛⲛⲥⲁⲧⲣⲁⲉⲓ ⲟⲛ ⲧⲉⲧⲛⲛⲟⲟⲩ ⲛϩⲉⲛ ⲕⲉⲛⲟϭ ⲛⲧⲁⲉⲓⲟ ⲉⲧⲁⲡⲟⲗⲓⲥ ⲉⲣⲁⲧϥ ⲙⲡⲁϫⲟⲉⲓⲥ ⲡⲣⲣⲟ
…
243 ⲁⲩⲱ ϥⲥϩⲁⲓ ⲙⲙⲟⲟⲩ ⲛⲥⲱⲧⲛ ⲧⲏⲣⲟⲩ ·
…
244 ⲉⲧⲉⲧⲛϣⲁⲛⲉⲓ ⲉⲧⲡⲟⲗⲓⲥ · ⲛⲧⲙⲛⲧⲣⲣⲟ · ⲛϥⲧⲟⲟⲃⲟⲩ ⲛⲏⲧⲛ ⲙⲛⲡⲉⲩⲕⲱⲃ ·
…
245 ⲁϥⲟⲩⲱϣⲃ ⲛϭⲓⲇⲱⲣⲟⲑⲉⲟⲥ ⲙⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ⲉⲩϫⲱ ⲙⲙⲟⲥ ϫⲉⲧⲛⲡⲁⲣⲁⲕⲁⲗⲉⲓ ⲙⲙⲟⲕ ⲡⲉⲛϫⲟⲉⲓⲥ ⲁⲣⲓ ⲉⲓⲣⲉ ⲛⲁⲛ ⲙⲡⲉⲓⲛⲟϭ ⲛⲁⲅⲁⲑⲟⲛ ·
…
246 ⲛⲅϫⲱ ⲉⲣⲟⲛ ⲙⲡⲉⲕⲣⲁⲛ ⲙⲙⲁⲧⲉ ⲛⲧⲛⲁⲓⲥⲑⲁⲛⲉ ⲉⲡϩⲱⲃ ⲉⲡⲉⲓⲇⲏ ⲁⲛⲃⲱⲗ ⲉⲃⲟⲗ ⲉϫⲛⲛⲉⲕϣⲁϫⲉ · ⲉⲧⲉⲕⲧⲁⲩⲟ ⲙⲙⲟⲟⲩ ⲉⲣⲟⲛ ·
…
247 ⲁϥⲟⲩⲱϣⲃ ⲛϭⲓⲡⲁⲣⲭⲱⲛ ⲉⲧⲉⲙⲓⲭⲁⲏⲗ ⲡⲉ ⲉϥϫⲱ ⲙⲙⲟⲥ ϫⲉϯⲛⲁϫⲱ ⲉⲣⲱⲧⲛ ⲙⲡⲁⲣⲁⲛ ⲙⲛⲡⲣⲁⲛ ⲙⲡⲁϫⲟⲉⲓⲥ ⲡⲣⲣⲟ ⲙⲛⲡⲣⲁⲛ ⲛⲧⲁⲡⲟⲗⲓⲥ ·
…
248 ⲁⲩⲱ ⲉϣϫⲉ ⲉⲧⲉⲧⲛⲟⲩⲱϣⲉ ⲉⲉⲓⲙⲉ ⲥⲱⲧⲙ ⲛⲧⲁⲧⲁⲙⲱⲧⲛ ·
…
249 ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲱⲛ ⲛⲛⲁⲧⲡⲉ ⲙⲛⲛⲁⲡⲕⲁϩ ·
…
250 ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲏⲥⲧⲣⲁⲧⲏⲕⲟⲥ ⲛⲧϭⲟⲙ ⲛⲙⲡⲏⲩⲉ ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲛⲛⲁⲓⲱⲛ ⲙⲡⲟⲩⲟⲉⲓⲛ ·
…
251 ⲁⲛⲟⲕ ⲡⲉ ⲙⲓⲭⲁⲏⲗ ⲡⲇⲩⲛⲁⲧⲟⲥ ⲉⲧϭⲱⲧⲡ ⲙⲡⲟⲗⲉⲙⲟⲥ ϩⲓⲧϩⲏ ⲙⲡⲉϥⲣⲣⲟ ⲁⲛⲟⲕ ⲡⲉ ⲙⲓⲭⲁⲏⲗ ⲡⲥⲟⲗⲥⲗ
…
252 ⲁⲩⲱ ⲡϣⲟⲩϣⲟⲩ ⲛⲙⲡⲏⲩⲉ ⲙⲛⲡⲕⲁϩ ·
…
253 ⲁⲛⲟⲕ ⲡⲉ ⲙⲓⲭⲁⲏⲗ ⲡⲁϩⲟ ⲉⲧⲉⲣⲉⲙⲙⲛⲧϣⲛϩⲧⲏϥ ⲙⲡⲛⲟⲩⲧⲉ ⲛϩⲏⲧϥ ·
…
254 ⲁⲛⲟⲕ ⲡⲉ ⲙⲓⲭⲁⲏⲗ ⲡⲟⲓⲕⲟⲛⲟⲙⲟⲥ ⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
255 ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲧⲁϩⲉ ⲉⲣⲁⲧϥ ⲛⲥⲁⲟⲩⲛⲁⲙ ·
…
256 ⲙⲡⲉⲓⲱⲧ ⲛⲛⲁⲩ ⲛⲓⲙ ⲁⲛⲟⲕ ⲡⲉ ⲙⲓⲭⲁⲏⲗ ⲡⲉⲧϫⲓ ⲛⲛⲥⲟⲡⲥⲡ ⲙⲛⲛⲉⲑⲩⲥⲓⲁ ⲉⲧⲟⲩⲡⲣⲟⲥⲉⲛⲉⲅⲕⲏ ⲙⲙⲟⲟⲩ ⲙⲡⲛⲟⲩⲧⲉ ⲡⲉⲛⲣⲣⲟ · ⲁⲛⲟⲕ ⲡⲉ ⲙⲓⲭⲁⲏⲗ ·
…
257 ⲡⲉⲧⲙⲟⲟϣⲉ ⲙⲛⲣⲱⲙⲉ ⲛⲓⲙ ⲉⲣⲉⲧⲉϥϩⲉⲗⲡⲓⲥ ϩⲓⲡⲛⲟⲩⲧⲉ ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲧⲇⲓⲁⲕⲟⲛⲉⲓ ⲉⲧⲙⲛⲧ‐ⲣⲱⲙⲉ ⲧⲏⲣⲥ ϩⲛⲟⲩⲟⲩⲣⲟⲧ ·
…
258 ⲁⲩⲱ ⲁⲛⲟⲕ ⲡⲉⲧⲇⲓⲁⲕⲟⲛⲉⲓ ⲉⲣⲱⲧⲛ ϫⲓⲛⲧⲉⲧⲛⲙⲛⲧⲕⲟⲩⲓ ϣⲁⲧⲉⲛⲟⲩ ⲱ ⲇⲱⲣⲟⲑⲉⲟⲥ · ⲙⲛⲑⲉⲱⲡⲓⲥⲧⲏ ·
…
259 ⲁⲩⲱ ⲛϯⲛⲁⲗⲟ ⲁⲛ ⲉⲓⲇⲓⲁⲕⲟⲛⲉⲓ ⲉⲣⲱⲧⲛ · ϣⲁⲛⲧⲡⲣⲟⲥⲉⲛⲉⲅⲕⲏ ⲙⲙⲱⲧⲛ ⲙⲡⲣⲣⲟ ·
…
260 ⲛⲛⲁⲧⲡⲉ ⲙⲛⲛⲁⲡⲕⲁϩ ⲉⲡⲉⲓⲇⲏ ⲁⲧⲉⲧⲛⲇⲓⲁⲕⲟⲛⲉⲓ ⲛⲁⲓϩⲱⲧ ·
…
261 ⲙⲛⲡⲁϫⲟⲉⲓⲥ ϩⲛⲟⲩⲛⲟϭ ⲛϭⲟⲙ ⲙⲏ ⲉⲓⲟⲃϣⲉⲛⲉⲧⲛⲑⲩⲥⲓⲁ ⲙⲛⲛⲉⲧⲛⲁⲅⲁⲡⲏ · ⲉⲧⲉⲧⲛⲉⲓⲛⲉ ⲙⲙⲟⲟⲩ ⲙⲡⲛⲟⲩⲧⲉ ϩⲙⲡⲁⲣⲁⲛ ·
…
262 ⲙⲏ ⲛⲉⲓⲁϩⲉⲣⲁⲧ ⲁⲛ ⲛⲥⲁϥ ⲉⲓⲥⲱⲧⲙ ⲉⲣⲱⲧⲛ · ϩⲛⲛⲉⲧⲉⲧⲛϫⲱ ⲙⲙⲟⲟⲩ ⲙⲛⲛⲉⲧⲛⲉⲣⲏⲩ ·
…
263 ⲉⲧⲃⲉⲧⲉⲡⲣⲟⲥⲫⲟⲣⲁ ⲙⲡϣⲁ ·
…
264 ⲙⲏ ⲉⲓⲟⲩⲉ ⲙⲙⲱⲧⲛ ⲙⲡⲛⲁⲩ · ⲉⲧⲉⲧⲛⲣⲓⲙⲉ
…
265 ⲁⲩⲱ ⲉⲧⲉⲧⲛⲥⲟⲡⲥⲡ ⲙⲙⲟⲓ · ϫⲉⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲛϥⲡⲟⲟⲛⲉⲛ ⲉⲃⲟⲗ ·
…
266 ⲙⲡⲁⲧⲥⲱϫⲛ ϩⲙⲡⲉⲛⲏⲓ ⲛϭⲓⲧⲉⲑⲩⲥⲓⲁ · ⲙⲛⲧⲁⲅⲁⲡⲏ ⲙⲡⲁⲣⲭⲁⲅⲅⲉⲗⲟⲥ ·
…
267 ⲙⲏ ⲛⲧⲓⲛⲁⲩ ⲉⲣⲱⲧⲛ ⲁⲛ ⲙⲡⲛⲁⲩ ⲛⲧⲁⲧⲉⲧⲛⲧⲓⲛⲉⲧⲛϩⲃⲥⲱ ⲛⲥⲩⲛⲁⲅⲉ ⲉⲃⲟⲗ ⲁⲧⲉⲧⲛⲧⲁⲁⲥ ϩⲁⲧⲉⲡⲣⲟⲥⲫⲟⲣⲁ ϩⲙⲡⲁϣⲁ ·
…
268 ϯϫⲱ ⲙⲙⲟⲥ ⲛⲏⲧⲛ · ϫⲉϯ ⲛⲙⲙⲏⲧⲛ ϩⲛⲛⲁⲓ ⲧⲏⲣⲟⲩ ·
…
269 ⲁⲩⲱ ⲛⲉⲛⲧⲁⲧⲉⲧⲛⲧⲁⲁⲩ ϫⲓⲛⲧⲉⲧⲛⲙⲛⲧⲕⲟⲩⲓ · ϩⲙⲡⲁⲣⲁⲛ ⲛⲧⲓⲟⲃϣ ⲁⲛ ⲉⲣⲟⲟⲩ ⲧⲏⲣⲟⲩ ·
…
270 ⲁⲗⲗⲁ ⲁⲓⲡⲣⲟⲥⲉⲛⲉⲅⲕⲏ ⲙⲙⲟⲟⲩ ⲧⲏⲣⲟⲩ ⲙⲡⲛⲟⲩⲧⲉ ϩⲁⲣⲱⲧⲛ ϩⲛⲟⲩⲙⲉ ·
…
271 ⲁⲓϫⲓ ⲛⲛⲉⲑⲩⲥⲓⲁ ⲛⲧⲟⲟⲧⲧⲏⲩⲧⲛ · ⲙⲛⲛⲉⲇⲱⲣⲟⲛ ⲛⲧϩⲉ ⲛⲛⲁⲁⲃⲉⲗ ·
…
272 ⲙⲛⲛⲱϩⲉ ⲙⲛⲧⲉⲑⲩⲥⲓⲁ ⲛⲁⲃⲣⲁϩⲁⲙ · ϫⲉⲁⲧⲉⲧⲛⲧⲁⲁⲩ ϩⲛⲟⲩⲥⲟⲟⲩⲧⲛ · ⲱ ⲇⲱⲣⲟⲑⲉⲟⲥ ⲙⲛⲑⲉⲱⲡⲓⲥⲧⲏ ·
…
273 ⲛⲁⲓⲁⲧⲧⲏⲩⲧⲛ ⲁⲩⲱ ⲡⲡⲉⲧⲛⲁⲛⲟⲩϥ ⲛⲁϣⲱⲡⲉ ⲙⲙⲱⲧⲛ ϫⲉⲕⲁⲧⲁⲧϩⲉ ⲙⲡⲉⲧⲛⲣⲁⲛ · ⲧⲁⲓ ⲧⲉ ⲧϩⲉ ⲙⲡⲧⲉⲧⲛⲕⲉⲥⲙⲟⲩ ·
…
274 ⲇⲱⲣⲟⲑⲉⲟⲥ ⲡⲉ ⲡⲇⲱⲣⲟⲛ ⲙⲡⲛⲟⲩⲧⲉ ·
…
275 ⲑⲉⲱⲡⲓⲥⲧⲏ ϩⲱⲱⲥ ⲧⲉⲧⲉⲧⲡⲓⲥⲧⲉⲩⲉ ⲉⲡⲛⲟⲩⲧⲉ ·
…
276 ⲁⲛⲟⲕ ⲡⲉ ⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲡⲉⲛⲧⲁⲧⲉⲧⲛⲕⲁⲁϥ ⲛⲏⲧⲛ ⲙⲡⲣⲟⲥⲧⲁⲧⲏⲥ ⲛⲛⲁϩⲣⲛⲡⲛⲟⲩⲧⲉ ·
…
277 ⲁⲛⲟⲕ ⲡⲉ ⲙⲓⲭⲁⲏⲗ ⲡⲉⲛⲧⲁϥϫⲓ ⲛⲛⲉⲧⲛϣⲗⲏⲗ ⲙⲛⲛⲉⲧⲛⲑⲩⲥⲓⲁ · ⲙⲛⲛⲉⲧⲛⲣⲉⲙⲏⲧ ⲉϩⲣⲁⲓ ϣⲁⲡⲛⲟⲩⲧⲉ ⲛⲧϩⲉ ⲛⲕⲟⲣⲛⲏⲗⲓⲟⲥ ·
…
278 ⲁⲓⲃⲱⲕ ϣⲁⲣⲟϥ ⲁⲓⲧⲥⲁⲃⲟϥ ⲉⲧⲉϩⲓⲏ ⲙⲡⲟⲩϫⲁⲓ ·
…
279 ⲉⲧⲃⲉϫⲉⲡⲃⲁⲡⲧⲓⲥⲙⲁ ⲡⲉⲛⲧⲁϥⲫⲱⲣⲉⲓ ⲙⲙⲟϥ ϩⲓⲧⲛⲡⲉⲧⲣⲟⲥ ·
…
280 ⲙⲡⲣⲣϩⲟⲧⲉ ϯⲟⲩⲏⲩ ⲙⲙⲱⲧⲛ ⲁⲛ ·
…
281 ⲕⲁⲧⲁⲧϩⲉ ϩⲱⲧⲧⲏⲩⲧⲛ ⲛⲧⲁⲧⲉⲧⲛϩⲱⲛ ⲉⲣⲟⲓ ⲙⲛⲡⲁϫⲟⲉⲓⲥ ·
…
282 ⲉⲡⲉⲓⲇⲏ ⲉϥⲥⲏϩ ϫⲉϩⲱⲛ ⲉϩⲟⲩⲛ ⲉⲡⲛⲟⲩⲧⲉ ⲧⲁⲣⲉϥϩⲱⲛ ⲉϩⲟⲩⲛ ⲉⲣⲱⲧⲛ ⲧⲉⲛⲟⲩ ϭⲉ ⲇⲱⲣⲟⲑⲉⲟⲥ · ⲙⲛⲑⲉⲱⲡⲓⲥⲧⲏ ·
…
283 ϫⲓ ⲛⲏⲧⲛ ⲉⲛⲟⲩϭⲟⲙ ·
…
284 ⲧⲱⲟⲩⲛ ⲁϩⲉ ⲉⲣⲁⲧⲧⲏⲩⲧⲛ ϫⲓ ⲛⲏⲧⲛ ⲛⲛⲉⲓⲇⲱⲣⲟⲛ ϩⲛⲛⲁϭⲓϫ ⲉⲡⲉⲓⲇⲏ ⲁⲓⲟⲩⲱ ⲉⲓϫⲱ ⲙⲙⲟⲥ ⲛⲏⲧⲛ ϫⲉϩⲉⲛⲙⲏⲥⲉ ⲛⲉ ⲛⲁⲓ ·
…
285 ⲁⲩⲱ ⲉⲧⲉⲧⲛϣⲁⲛⲡⲱⲱⲛⲉ ⲉⲃⲟⲗ · ϩⲙⲡⲉⲓⲃⲓⲟⲥ ·
…
286 ϯⲛⲁϯ ⲛⲏⲧⲛⲙⲡⲕⲉⲫⲁⲗⲓⲟⲛ · ϩⲛⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ · ⲧⲡⲟⲗⲓⲥ ⲛⲛⲉⲧⲟⲩⲁⲁⲃ ⲧⲏⲣⲟⲩ ·
…
287 ⲁⲓⲟⲩⲱ ⲅⲁⲣ ⲉⲓϫⲓ ⲙⲙⲱⲧⲛ ⲛϩⲙⲟⲧ ⲛⲧⲟⲟⲧϥ ⲙⲡⲛⲟⲩⲧⲉ ⲉⲡⲙⲁ ⲛⲛⲉⲧⲛⲑⲩⲥⲓⲁ ⲙⲛⲛⲉⲧⲛⲡⲣⲟⲥⲫⲟⲣⲁ · ⲙⲛⲛⲉⲧⲛⲁⲅⲁⲑⲟⲛ ·
…