1 ⲡⲁⲉⲓⲱⲧ · ⲉⲧⲟⲩⲁⲁⲃ ⲓⲉⲣⲏⲙⲓⲁⲥ ·
…
2 ϯⲛⲁⲩ ⲉⲣⲟⲕ ⲙⲡϩⲟⲟⲩ ⲙⲛⲡⲉⲕⲛⲟϭ ⲛϩⲏⲃⲥ ⲛⲟⲩⲟⲉⲓⲛ ⲉⲕⲣⲁϣⲉ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
3 ϯⲣⲁϣⲉ ⲧⲱⲛⲟⲩ ⲡⲉϫⲁϥ ⲉⲡⲉⲓⲇⲏ ⲁⲓⲣⲥⲁϣϥⲉ ⲛⲣⲟⲙⲡⲉ ⲉⲓϣⲟⲟⲡ ϩⲛⲧⲁⲓⲭⲙⲁⲗⲱⲥⲓⲁ ·
…
4 ⲙⲛⲡⲁⲗⲁⲟⲥ ⲁⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
5 ⲥⲟⲡⲥⲡ ⲙⲡⲉⲧⲟⲛϩ ϣⲁⲛⲓⲉⲛⲉϩ ⲁϥϯ ⲛⲟⲩⲛⲁ ⲉⲡϩⲏⲧ ⲛⲛⲉⲣⲣⲱⲟⲩ ⲛⲃⲁⲃⲩⲗⲱⲛⲓⲟⲥ ·
…
6 ⲁⲩⲕⲁⲁⲛ ⲉⲃⲟⲗ ⲁⲛⲕⲧⲟⲛ ⲉⲧϩⲓⲉⲣⲟⲩⲥⲁⲗⲏⲙ ·
…
7 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
8 ⲉⲍⲉⲕⲓⲏⲗ ⲡⲉⲡⲣⲟⲫⲏⲧⲏⲥ · ⲁⲙⲟⲩ ⲛⲅⲧⲁⲙⲟⲛ ϫⲉⲉⲧⲃⲉⲟⲩ ⲉⲕϫⲓϥⲟϭⲥ ⲙⲡϩⲟⲟⲩ ϩⲁⲡⲣⲁϣⲉ ·
…
9 ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϩⲛⲟⲩⲡⲁⲣⲣⲏⲥⲓⲁ ⲉⲓⲥⲕⲓⲣⲧⲁ ⲡⲉϫⲁϥ ·
…
10 ⲁⲩⲱ ⲉⲓⲧⲉⲗⲏⲗ ϫⲉⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ·
…
11 ⲁϥⲉⲓⲛⲉ ⲛⲁⲓ ⲛⲟⲩⲕⲉⲫⲁⲗⲓⲥ ⲛϫⲱⲱⲙⲉ ⲁϥⲟⲩⲉϩⲥⲁϩⲛⲉ ⲛⲁⲓ ⲁⲓⲟⲩⲟⲙⲥ ·
…
12 ⲁⲛⲉⲡⲣⲟⲫⲏⲧⲓⲁ ϭⲱⲗⲡ ⲛⲁⲓ ⲉⲃⲟⲗ ·
…
13 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
14 ⲁⲛⲁⲛⲓⲁⲥ ⲁⲍⲁⲣⲓⲁⲥ ⲙⲓⲥⲁⲏⲗ ·
…
15 ⲁⲣⲏⲩ ⲧⲉⲧⲛⲣⲁϣⲉ ⲙⲡϩⲟⲟⲩ ·
…
16 ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
17 ⲥⲉ ⲡⲉϫⲁⲩ ⲛϭⲓⲡϣⲟⲙⲛⲧ ⲛϩⲁⲅⲓⲟⲥ ⲉⲧⲟⲩⲁⲁⲃ ·
…
18 ⲧⲛⲣⲁϣⲉ ⲁⲩⲱ ⲧⲛⲧⲉⲗⲏⲗ · ϫⲉⲡⲧⲉⲧⲛⲣϣⲁ ⲛⲁϥ ⲙⲡϩⲟⲟⲩ ⲛⲧⲟϥ ⲡⲉⲛⲧⲁϥⲉⲓ ⲉⲧⲙⲏⲏⲧⲉ · ⲛⲧⲉϩⲣⲱ ⲛⲥⲁⲧⲉ ⲉⲧⲙⲟⲩϩ ·
…
19 ⲁϥⲟϩⲙⲉⲥ ϩⲁⲣⲟⲛ ·
…
20 ⲁϥⲧⲣⲉⲡⲣⲣⲟ ⲡⲓⲥⲧⲉⲩⲉ · ⲉⲡⲛⲟⲩⲧⲉ ·
…
21 ⲁⲧⲛⲙⲛⲧⲙⲁⲣⲧⲩⲣⲟⲥ ϫⲱⲕ ⲉⲃⲟⲗ ·
…
22 ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ⁖ⲻ ⲇⲁⲛⲓⲏⲗ ⲡⲣⲱⲙⲉ · ⲛϣⲟⲩⲁϣϥ ·
…
23 ⲁⲣⲁ ⲕⲣⲁϣⲉ ϩⲱⲱⲕ ⲙⲡϩⲟⲟⲩ · ϩⲙⲡⲉⲓⲛⲟϭ ⲛ ϣⲁ ·
…
24 ϯⲙⲉⲉⲩⲉ ϫⲉⲕⲣⲁϣⲉ ⲛϩⲟⲩⲟ ⲡⲉϫⲁϥ ⲛϭⲓⲇⲁⲛⲓⲏⲗ ϫⲉⲁⲩⲱ ⲁϣ ⲡⲉ ⲡⲕⲉⲣⲁϣⲉ · ⲉⲧϣⲏϣ ⲙⲛⲡⲁⲣⲁϣⲉ ·
…
25 ⲉⲡⲉⲓⲇⲏ ⲛⲟⲩⲥⲟⲡ ⲛⲟⲩⲱⲧ ⲁⲛ ⲡⲉ ·
…
26 ⲟⲩⲇⲉ ⲛⲥⲛⲁⲩ ⲁⲛ ⲛⲉ ⲛⲧⲁⲓⲛⲁⲩ ⲉⲙⲓⲭⲁⲏⲗ ⲡⲁⲣⲭⲱⲛ ⲙⲙⲉ ·
…
27 ⲁⲩⲱ ⲙⲡⲛⲁⲩ ⲛⲧⲁⲩⲛⲟϫⲧ ⲉⲡϣⲏⲓⲛⲙⲙⲟⲩⲓ ·
…
28 ⲡⲁⲣⲭⲏⲥⲧⲣⲁⲧⲏⲕⲟⲥ ⲙⲓⲭⲁⲏⲗ ⲡⲉⲛⲧⲁϥⲉⲓ ϣⲁⲣⲟⲓ ⲁϥϣⲧⲁⲙ ⲛⲧⲧⲁⲡⲣⲟ ⲛⲙⲙⲟⲩⲓ ·
…
29 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
30 ⲡⲙⲛⲧⲥⲛⲟⲟⲩⲥ ⲛⲁⲡⲟⲥⲧⲟⲗⲟⲥ · ⲁⲣⲁⲧⲉⲧⲛⲣⲁϣⲉ · ϩⲙⲡⲉⲓⲛⲟϭ ⲛϣⲁ ⲙⲡϩⲟⲟⲩ · ⲉⲛⲣⲁϣⲉ ⲡⲉϫⲁⲩ ϫⲉⲙⲛⲛⲥⲁⲡⲉⲓⲛⲟϭ ⲛϩⲏⲃⲉ ⲛⲧⲁϥϣⲱⲡⲉ ⲛⲁⲛ ·
…
31 ⲙⲡⲛⲁⲩ ⲛⲧⲁⲩⲥⲧⲁⲩⲣⲟⲩ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
32 ⲁⲩⲱ ⲉⲛϩⲏⲡ ⲉⲧⲃⲉⲧϩⲟⲧⲉ ⲛⲛⲓⲟⲩⲇⲁⲓ ⲁⲙⲁⲣⲓⲁ ⲧⲡⲁⲣⲑⲉⲛⲟⲥ ⲉⲓ ⲁⲥⲧⲁⲙⲟⲛ ϫⲉⲁⲓⲃⲱⲕ ⲙⲛⲛⲉⲧⲛⲙⲙⲁⲓ ⲉⲛⲁⲩ ⲉⲡⲧⲁⲫⲟⲥ ⲛϣⲱⲣⲡ · ⲛⲧⲕⲩⲣⲓⲁⲕⲏ ·
…
33 ⲁⲛϩⲉ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
34 ⲁϥⲥⲕⲟⲣⲕⲣ ⲙⲡⲱⲛⲉ ⲁϥϩⲙⲟⲟⲥ ⲉϩⲣⲁⲓ ⲉϫⲱϥ ·
…
35 ⲁⲩⲱ ⲁϥϯ ⲛⲁⲛ ⲙⲡϣⲙⲛⲟⲩϥⲉ ϫⲉⲁⲡϫⲟⲉⲓⲥ ⲧⲱⲟⲩⲛ ·
…
36 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ ·
…
37 ⲡⲡⲉⲧⲟⲩⲁⲁⲃ ⲍⲁⲭⲁⲣⲓⲁⲥ ⲡⲟⲩⲏⲏⲃ · ⲙⲛⲓⲱϩⲁⲛⲛⲏⲥ ⲡⲉϥϣⲏⲣⲉ ·
…
38 ⲥⲉⲣⲁϣⲉ ϩⲱⲟⲩ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
39 ⲥⲉ ⲡⲉϫⲁⲩ ⲧⲛⲣⲁϣⲉ ⲛϭⲓⲛⲉⲧⲟⲩⲁⲁⲃ ·
…
40 ⲉⲡⲉⲓⲇⲏ ⲛⲧⲁϥⲧⲱϣ ⲙⲡⲁⲣⲭⲁⲅⲅⲉⲗⲟⲥ ⲛⲁϥ ⲛⲁⲣⲭⲏⲥⲧⲣⲁⲧⲏⲕⲟⲥ ·
…
41 ⲁⲛⲟⲕ ϩⲱ ⲉⲓϣⲟⲟⲡ ⲛⲁϥ ⲛⲟⲩⲏⲏⲃ ⲁⲩⲱ ⲡⲁϣⲏⲣⲉ ⲓⲱϩⲁⲛⲛⲏⲥ ⲡϣⲏⲣⲉ ⲡⲉ ⲛⲉⲗⲉⲥⲁⲃⲉⲧ ⲧⲥⲩⲅⲅⲉⲛⲏⲥ ⲧⲉ ⲙⲙⲁⲣⲓⲁ ⲧⲙⲁⲁⲩ ⲛⲓⲏⲥⲟⲩⲥ ⲡⲁⲥⲩⲅⲅⲉⲛⲏⲥ · ⲕⲁⲧⲁⲥⲁⲣⲝ ·
…
42 ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ·
…
43 ⲥⲧⲉⲫⲁⲛⲟⲥ ⲡⲁⲣⲭⲏⲇⲓⲁⲕⲟⲛⲟⲥ ·
…
44 ⲁⲩⲱ ⲡⲁⲣⲭⲏⲙⲁⲣⲧⲩⲣⲟⲥ · ⲁⲣⲁ ⲕⲣⲁϣⲉ ϩⲱⲱⲕ ⲙⲡϩⲟⲟⲩ · ϩⲙⲡϣⲁ ⲙⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ·
…
45 ⲥⲉⲡⲉϫⲁϥ ⲟⲩⲛⲟϭ ⲡⲉ ⲡⲁⲣⲁϣⲉ ·
…
46 ⲉⲡⲉⲓⲇⲏ ⲙⲡⲛⲁⲩ ⲛⲧⲁⲩϩⲓⲱⲛⲉ ⲉⲣⲟⲓ ·
…
47 ⲁⲓϥⲓⲁⲁⲧ ⲉϩⲣⲁⲓ ⲁⲓⲛⲁⲩ ⲙⲡⲏⲩⲉ ⲁⲩⲟⲩⲱⲛ ⲁⲓⲛⲁⲩ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲙⲛⲛⲉϥⲁⲅⲅⲉⲗⲟⲥ ⲧⲏⲣⲟⲩ ⲉⲩⲥⲟⲡⲥⲡ ⲉϫⲱⲓ ·
…
48 ⲁⲩⲱ ⲁⲓⲛⲁⲩ ⲉⲓⲥ ⲉϥⲁϩⲉⲣⲁⲧϥ ⲛⲥⲁⲟⲩⲛⲁⲙ ⲙⲡⲉⲓⲱⲧ ·
…
49 ⲉⲧⲃⲉⲡⲁⲓ ϯⲣⲁϣⲉ ⲙⲡϩⲟⲟⲩ
…
50 ⲙⲙⲁⲣⲧⲩⲣⲟⲥ ⲧⲏⲣⲟⲩ ⲙⲛⲛⲇⲓⲕⲁⲓⲟⲥ ·
…
51 ⲁⲣⲁ ⲉⲧⲉⲧⲛⲣⲁϣⲉ ϩⲙⲡϣⲁ ⲙⲙⲓⲭⲁⲏⲗ ⲙⲡϩⲟⲟⲩ ·
…
52 ⲥⲉ ⲡⲉϫⲁⲩ ⲛϭⲓⲛⲉⲧⲟⲩⲁⲁⲃ ϫⲉⲁⲗⲏⲑⲱⲥ ⲧⲛⲣⲁϣⲉ ⲙⲡϩⲟⲟⲩ ·
…
53 ⲉⲡⲉⲓⲇⲏ ⲑⲗⲓⲯⲓⲥ ⲛⲓⲙ ⲛⲧⲁⲩⲧⲁϩⲟⲛ · ϩⲓⲃⲁⲥⲁⲛⲟⲥ ⲛⲓⲙ ⲛⲧⲁⲩⲧⲁⲁⲩ ⲛⲁⲛ ·
…
54 ⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲡⲉⲛⲧⲁϥϯϭⲟⲙ ⲛⲁⲛ ⲁⲛϥⲓ ϩⲁⲣⲟⲟⲩ · ϣⲁⲛⲧⲛϫⲱⲕ ⲉⲃⲟⲗ ⲙⲡⲉⲛⲁⲅⲱⲛ ⲁⲩⲱ ⲁⲛϫⲓ ⲛϩⲉⲛⲧⲁⲉⲓⲟ ·
…
55 ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ ·
…
56 ⲛⲧⲁⲝⲓⲥ ⲧⲏⲣⲟⲩ ⲛⲙⲡⲏⲩⲉ ⲣⲁϣⲉ ϩⲱⲟⲩ ⲙⲡϩⲟⲟⲩ ⲛⲙⲙⲁⲛ ϩⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲥⲉ ⲡⲉϫⲁⲩ ⲡⲱⲛ ⲣⲱ ⲡⲉ ⲡⲣⲁϣⲉ ⲧⲏⲣϥ ⲙⲡⲛⲁⲩ ⲛⲧⲁⲡⲛⲇⲓⲙⲓⲟⲩⲣⲅⲟⲥ ⲕⲁⲧⲁⲣⲅⲉⲓ ⲙⲡϫⲁⲥⲓϩⲏⲧ ⲁϥⲧⲁϩⲟ ⲛⲁⲛ ⲉⲣⲁⲧϥ ⲙⲡⲉⲧⲑⲃⲃⲓⲏⲩ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲉⲧⲃⲉⲡⲁⲓ ⲧⲛⲣⲁϣⲉ ⲙⲡϩⲟⲟⲩ
…
57 ⲁⲗⲏⲑⲱⲥ ⲱ ⲛⲁⲙⲉⲣⲁⲧⲉ ⲟⲩⲛⲟϭ ⲡⲉ ⲡⲧⲁⲉⲓⲟ ⲙⲡⲉⲓϣⲁⲙⲡⲟⲟⲩ ⲉⲧⲡⲟⲣϣ ⲛⲁⲛ ⲉⲃⲟⲗ ϩⲙⲡⲕⲁϩ ⲙⲙⲁⲧⲉ ⲁⲛ ⲁⲗⲗⲁ ϩⲛⲧⲕⲉ ⲡⲉ ⲟⲛ · ⲧⲉⲛⲟⲩ ϭⲉ ⲱ ⲛⲁⲕⲣⲟⲁⲧⲏⲥ ⲙⲙⲁⲓⲥⲃⲱ ·
…
58 ⲙⲁⲣⲛⲥⲡⲟⲩⲇⲁⲥⲉ ϩⲱⲱⲛ ⲉⲧⲣⲉⲩϩⲉ ⲉⲣⲟⲛ ϩⲙⲡϣⲁ ⲙⲙⲓⲭⲁⲏⲗ ϫⲉⲕⲁⲥ ⲛⲛⲁⲟⲩⲱⲙ ϩⲱⲱⲛ · ϩⲛⲧⲁϣⲏⲛ ⲛⲁⲅⲁⲑⲱⲛ ⲉⲧⲕⲏ ⲛⲁⲛ ⲉϩⲣⲁⲓ · ϩⲁⲣⲱⲛ · ⲙⲛⲛⲉⲧⲟⲩⲁⲁⲃ ⲧⲏⲣⲟⲩ · ⲛⲧⲁⲛⲧⲁⲩⲉ ⲛⲉⲩⲣⲁⲛ ·
…
59 ⲙⲉϣⲁⲕ ⲛⲁⲙⲉⲣⲁⲧⲉ ⲛⲧⲛⲧⲟⲗⲙⲁ ⲛⲧⲛⲃⲱⲕ ⲉⲡⲁⲣⲓⲥⲧⲱⲛ ⲙⲡⲁⲣⲭⲏⲥⲧⲣⲁⲧⲏⲕⲟⲥ ⲛⲧⲛⲫⲱⲣⲉⲓ ⲁⲛ ⲕⲁⲗⲱⲥ ·
…
60 ⲁⲗⲗⲁ ⲛⲧⲛⲃⲱⲕ ϩⲛ ϩⲉⲛϩⲃⲥⲱ ⲉⲩⲗⲁⲁⲙ · ⲉⲣⲉⲡⲉⲛⲕⲉⲥⲱⲙⲁ ⲙⲉϩ ⲛϭⲱϫⲃ ⲛⲅϩⲉ ⲉⲣⲟⲛ ϩⲛⲟⲩϣⲓⲡⲉ ⲛⲧⲙⲏⲧⲉ ⲛⲛⲉⲧⲫⲱⲣⲉⲓ · ⲉⲩⲥⲱⲕ ⲉⲣⲟⲟⲩ · ⲛⲛⲉⲩⲥⲧⲟⲗⲏ ·
…
61 ⲁⲩⲱ ⲉⲩⲃⲱⲱⲣⲉ ⲙⲙⲟⲛ · ϫⲉⲛⲛⲉⲛϩⲱⲱⲛ ⲉϩⲟⲩⲛ ⲉⲣⲟⲟⲩ ⲛⲥⲉⲧⲱⲗⲙ ⲉⲃⲟⲗ ⲙⲙⲟⲛ ·
…
62 ⲁⲩⲱ ⲙⲛⲛⲥⲁⲧⲉⲓϩⲩⲡⲟⲯⲓⲁ ⲛⲧⲉⲓⲙⲓⲛⲉ ⲛⲥⲉⲛⲟϫⲛ ⲉⲃⲟⲗ ⲡⲁⲛⲧⲱⲥ ⲅⲁⲣ ⲛⲁⲓ ⲛⲉ ⲛϣⲁϫⲉ ⲉⲧⲟⲩⲛⲁϫⲟⲟⲩ ⲛⲁⲛ ⲛϭⲓⲛⲉⲧⲫⲱⲣⲉⲓ ⲕⲁⲗⲱⲥ · ϫⲉⲱ ⲛⲣⲱⲙⲉ ⲛⲁⲧⲑⲏⲧ · ⲉⲓⲉ ⲛⲧⲉⲧⲛϣⲓⲡⲉ ⲁⲛ ⲛⲧⲉⲓϩⲉ ·
…
63 ⲁⲩⲱ ⲕⲁⲛ ⲛⲧⲉⲧⲛϣⲓⲡⲉ ⲁⲛ ⲉⲓⲉ ⲛⲧⲉⲧⲛⲣϩⲟⲧⲉ ⲁⲛ ϩⲏⲧϥ ⲙⲡⲣⲣⲟ ⲙⲙⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ⲛⲧⲉⲧⲛⲥⲟⲟⲩⲛ ⲁⲛ ϫⲉⲧⲁⲛⲓⲙ ⲧⲉ ⲧⲉⲓⲁⲩⲗⲏ ·
…
64 ⲁⲩⲱ ϫⲉⲡⲁⲛⲓⲙ ⲡⲉ ⲡⲉⲓⲁⲣⲓⲥⲧⲟⲛ ·
…
65 ⲉϣϫⲉ ⲙⲙⲟⲛ ⲛⲁⲡⲣⲣⲟ ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲡⲁⲣⲭⲏⲥⲧⲣⲁⲧⲏⲕⲟⲥ ⲉⲧϭⲱⲧⲡ ⲛⲙⲡⲟⲗⲉⲙⲟⲥ ϩⲓⲧϩⲏ ⲙⲡⲉϥϫⲟⲉⲓⲥ ⲉϥϯ ⲛⲛⲉⲓⲧⲁⲉⲓⲟ ⲧⲏⲣⲟⲩ ⲛⲁϥ · ⲉⲧⲃⲉⲧⲉϥⲙⲛⲧϫⲱⲱⲣⲉ ·
…
66 ⲁⲗⲏⲑⲱⲥ ϯⲑⲁⲩⲙⲁⲍⲉ ⲙⲙⲱⲧⲛ ϫⲉⲉⲧⲉⲧⲛⲑⲁⲣⲉ ⲉⲟⲩ ⲁⲧⲉⲧⲛⲉⲓ ⲉϩⲟⲩⲛ ϣⲁⲧⲁⲩⲗⲏ ⲉⲧⲟⲩⲟⲓ ϩⲟⲩⲛ ·
…
67 ⲕⲁⲓ ⲙⲁⲗⲓⲥⲧⲁ ⲉⲣⲉⲛⲉⲧⲛⲕⲉⲙⲉⲗⲟⲥ ϭⲟⲗⲡ ⲉⲃⲟⲗ ·
…
68 ⲙⲏ ⲙⲡⲉⲧⲉⲧⲛⲥⲱⲧⲙ ⲉⲣⲟϥ ⲉϥϫⲱ ⲙⲙⲟⲥ ϫⲉⲙⲡⲉⲣⲉⲓ ⲉϩⲟⲩⲛ ·
…
69 ⲉⲡⲁⲙⲁ ⲛϣⲉⲗⲉⲉⲧ ⲉⲙⲛϩⲃⲥⲱ ⲙⲙⲁ ⲛϣⲉⲗⲉⲉⲧ ⲧⲟ ϩⲓⲱⲱⲕ ·
…
70 ⲏ ⲙⲡⲉⲧⲉⲧⲛⲥⲱⲧⲙ ⲉⲣⲟϥ ⲉⲧⲃⲉⲡⲣⲱⲙⲉ ⲛⲧⲁϥⲧⲟⲗⲙⲁ ·
…
71 ⲁϥⲃⲱⲕ ⲉϩⲟⲩⲛ ϩⲛⲟⲩϩⲃⲥⲱ ⲉⲥⲗⲁⲁⲙ ⲛⲧϩⲉ ⲛⲧⲱⲧⲛ ·
…
72 ⲁⲧⲉⲧⲛⲉⲓⲙⲉ ϫⲉⲛⲧⲁⲱϣⲱⲡⲉ ⲙⲙⲟϥ ·
…
73 ϥⲥⲏϩ ϫⲉⲁϥⲧⲣⲉⲩⲙⲟⲣϥ ⲉⲛⲉϥϭⲓϫ ⲙⲛⲛⲉϥⲟⲩⲣⲏⲏⲧⲉ ⲁϥⲛⲟϫϥ ⲉⲡⲕⲁⲕⲉ ⲉⲧϩⲓⲃⲟⲗ ϥⲛⲁϣⲱⲡⲉ ⲙⲙⲁⲩ ⲛϭⲓⲡⲣⲓⲙⲉ
…
74 ⲁⲩⲱ ⲡϫⲁϩϫϩ ϩⲛⲛⲟⲃϩⲉ ·
…
75 ⲧⲉⲛⲟⲩ ϭⲉ ⲱ ⲛⲉⲥⲛⲏⲩ ⲁⲛⲁⲭⲱⲣⲉⲓ ⲛⲏⲧⲛ ⲉⲧⲁⲩⲗⲏ ⲉⲧϩⲓⲃⲟⲗ · ⲉⲡⲟⲩⲉ ⲙⲡⲣⲟ ⲛⲟⲩⲕⲟⲩⲓ ·
…
76 ϫⲉⲕⲁⲥ ⲉⲣⲉⲡⲉⲛϫⲟⲉⲓⲥ ⲡⲣⲣⲟ ⲉⲓ ⲉϩⲟⲩⲛ ⲙⲛⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲛⲧⲉⲧⲛⲥⲡⲥⲱⲡϥ ⲁⲣⲏⲩ ⲛϥⲣⲡⲛⲉⲩⲙⲁ ⲛⲙⲙⲏⲧⲛ ⲛⲟⲩⲕⲟⲩⲓ ·
…
77 ⲡⲣⲟⲥⲡⲕⲥⲉⲉⲡⲉ ⲛⲛⲉⲧϣⲉⲧⲙⲛⲧⲛⲁ · ϩⲓⲣⲙⲡⲣⲟ ⲛⲧⲁⲩⲗⲏ · ⲟⲩⲛⲁϩⲏⲧ ⲅⲁⲣ ⲡⲉ ⲡⲁⲣⲭⲁⲅⲅⲉⲗⲟⲥ ⲉⲧⲉⲧⲛⲣ ϣⲁ ⲛⲁϥ ·
…
78 ⲛϥⲛⲁⲕⲁⲧⲏⲩⲧⲛ ⲁⲛ ⲉϫⲛⲗⲁⲁⲩ · ⲁⲗⲗⲁ ⲧⲟⲩϫⲉⲧⲏⲩⲧⲛ ·
…
79 ⲙⲡⲣⲕⲁⲁⲩ ⲉϩⲉ ⲉⲣⲱⲧⲛ ϩⲙⲡⲉⲓϭⲱϫⲃ · ϩⲛⲧⲙⲏⲏⲧⲉ ·
…
80 ⲙⲡⲉⲓϣⲁⲙⲡⲟⲟⲩ · ϫⲉⲛⲛⲉⲛⲃⲱⲕ ϩⲙⲡϩⲓⲥⲉ ⲛⲛⲕⲟⲟⲩⲉ ·
…
81 ⲉⲓⲥϩⲏⲏⲧⲉ ⲁⲓⲧⲁⲙⲱⲧⲛⲁⲧⲉⲧⲛⲥⲱⲧⲙ ⲱ ⲛⲁⲙⲉⲣⲁⲧⲉ ⲉⲛⲉϫⲡⲓⲟ ⲛⲧⲁⲛⲁⲓϣⲱⲡⲉ ⲉⲩϥⲓ ϩⲁⲣⲟⲟⲩ ·
…
82 ⲕⲁⲓ ⲙⲁⲗⲓⲥⲧⲁ ϩⲉⲛⲣⲱⲙⲉ ⲛⲉ ⲛⲁⲓ ⲛⲧⲉⲩϩⲉ ⲉⲧϣⲁϫⲉ ⲛⲙⲙⲁⲩ ·
…
83 ⲁⲩⲱ ⲙⲡⲛⲟⲩⲧⲉ ⲁⲛ ⲡⲉ ⁖ⲻ ⲁⲗⲗⲁ ⲙⲉϣⲁⲕ ⲛⲧⲉⲟⲩⲁ ϫⲟⲟⲥ ⲛⲁⲓ · ϫⲉⲟⲩ ⲛⲉ ⲛⲉⲓϩⲟⲓⲧⲉ ⲉⲧⲗⲁⲁⲙ ⲏ ⲟⲩ ⲛⲉ ⲛⲉⲓϭⲟⲣϫⲉ ⲛⲧⲉⲡⲥⲱⲙⲁ ·
…
84 ⲙⲏ ⲟⲩⲛϫⲓϩⲟ ϩⲁϩⲧⲏⲛ ⲡⲛⲟⲩⲧⲉ ⲏ ⲉⲣⲉⲡⲛⲟⲩⲧⲉ ⲟⲩⲉϣⲡⲣⲙⲙⲁⲟ ⲡⲁⲣⲁⲡϩⲏⲕⲉ ⲙⲏⲧⲉⲓ ⲟⲩⲉϣⲫⲱⲣⲉⲓ ⲁⲛ ⲁⲛⲟⲕ ·
…
85 ⲙⲏ ⲟⲩⲛⲣⲱⲙⲉ ⲟⲩⲉϣϫⲓⲥⲱϣ ·
…
86 ⲙⲙⲟⲛ ⲛⲧⲉⲓϩⲉ ⲁⲛ ⲧⲉ ⲱ ⲡⲁⲙⲉⲣⲓⲧ ·
…
87 ⲛⲛⲉⲥϣⲱⲡⲉ ⲉⲧⲣⲉⲛϫⲟⲟⲥ · ϫⲉϣⲁⲣⲉⲡⲛⲟⲩⲧⲉ ϫⲓϩⲟ · ⲛⲟⲩⲉϣ ⲡⲣⲙⲙⲁⲟ ⲡⲁⲣⲁⲡϩⲏⲕⲉ ·
…
88 ⲁⲗⲗⲁ ⲥⲱⲧⲙ ⲛⲧⲁⲧⲁⲙⲱⲧⲛ ⲉⲡⲉⲫⲟⲣⲓⲥⲙⲁ ⲉⲧⲛⲁⲛⲟⲩϥ ⲙⲛⲡⲉⲧⲗⲁⲁⲙ ⲉⲕϣⲁⲛⲉⲓ ⲉⲡⲁⲣⲓⲥⲧⲱⲛ ⲙⲙⲓⲭⲁⲏⲗ ⲧⲱϩⲥ ⲛⲧⲉⲕⲁⲡⲉ ⲛⲅⲉⲓⲟ ⲙⲡⲉⲕϩⲟ ⲛⲅⲛⲟⲩϫ ⲛⲥⲁⲃⲟⲗ ⲙⲙⲟⲕ ⲛⲧϩⲩⲡⲟⲕⲣⲓⲥⲓⲥ ·
…
89 ⲁⲩⲱ ⲕⲛⲁⲣϣⲁⲩ ⲕⲁⲗⲱⲥ ·
…
90 ⲉⲩϣⲁⲛⲛⲕⲁⲗⲉ ⲙⲙⲟⲕ ⲉⲡⲁⲣⲓⲥⲧⲟⲛ ⲙⲙⲓⲭⲁⲏⲗ ⲕⲁⲑⲁⲣⲓⲍⲉ ⲙⲡⲉⲕϩⲏⲧ ⲉⲃⲟⲗ ϩⲛⲕⲁⲕⲓⲁ ⲛⲓⲙ ⲙⲛⲕⲁⲧⲁⲗⲁⲗⲁⲓⲁ ⲛⲓⲙ ⲁⲩⲱ ⲧⲉⲕϩⲃⲥⲱⲛⲁϣⲱⲡⲉⲥⲡⲣⲓⲱⲟⲩ ·
…
91 ⲁⲩⲱ ⲛⲅⲣϣⲁ ⲕⲁⲗⲱⲥ ·
…
92 ⲉⲕϣⲁⲛⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲙⲡⲛⲟⲩⲧⲉ ⲉⲧⲉⲡⲏⲓⲡⲉ ⲙⲙⲓⲭⲁⲏⲗ ·
…
93 ⲕⲁⲁⲕ ⲕⲁϩⲏⲩ ⲛⲧⲡⲟⲣⲛⲉⲓⲁ · ⲙⲛⲡⲁⲑⲟⲥ ⲛⲓⲙ · ⲙⲛϫⲱϩⲙ ⲛⲓⲙ ·
…
94 ϯ ϩⲓⲱⲱⲕ ⲛⲧⲉⲓⲣⲏⲛⲏ ⲙⲛⲡⲧⲃⲃⲟ ⲙⲛⲧⲇⲓⲕⲁⲓⲱⲥⲩⲛⲏ ·
…
95 ⲁⲩⲱ ⲕⲛⲁⲃⲱⲕ ⲉϩⲟⲩⲛ ⲉⲧⲁⲩⲗⲏ ϩⲛⲟⲩⲣⲁϣⲉ · ⲛⲅⲣϣⲁ ⲙⲛⲡⲁⲣⲭⲁⲅⲅⲉⲗⲟⲥ · ⲉⲧⲟⲩⲁⲁⲃ ⲙⲓⲭⲁⲏⲗ ⲉⲩϣⲁⲛⲛⲕⲁⲗⲉⲓ ⲙⲙⲟⲕ ⲉⲧϣⲉⲗⲉⲉⲧ ⲙⲡⲣⲣⲟ ⲙⲛⲡⲉϥⲛⲟϭ ⲛⲥⲧⲣⲁⲧⲏⲗⲁⲧⲏⲥ ·
…
96 ⲙⲁⲣⲉⲛⲉⲕⲙⲛⲧⲛⲁ ⲙⲛⲛⲉⲕⲁⲅⲁⲡⲏ ⲟⲩⲱⲛ ⲛⲁⲕ ⲙⲡⲣⲟ ⲙⲡⲛⲩⲙⲫⲱⲛ ·
…
97 ⲁⲩⲱ ⲛⲉⲧⲉⲕⲛⲁⲧⲁⲁⲩ ⲕⲛⲁϩⲉ ⲉⲣⲟⲟⲩ ⲙⲙⲏⲧ ⲛⲕⲱⲃ ϩⲓϫⲛⲧⲉⲕⲧⲣⲁⲡⲓⲍⲁ ϩⲁⲣⲱⲕ ·
…
98 ⲉⲕϣⲁⲛⲟⲩⲱϣⲉ ⲉϯⲉⲟⲟⲩ ⲙⲡⲁⲣⲭⲏⲥⲧⲣⲁⲧⲏⲕⲟⲥ ⲙⲡⲣⲣⲟ ⲙⲓⲭⲁⲏⲗ ·
…
99 ⲙⲁⲣⲉⲛⲉⲭⲏⲣⲁⲉⲓ ⲉⲃⲟⲗ ϩⲏⲧⲕ ⲙⲛⲛⲟⲣⲫⲁⲛⲟⲥ · ⲉⲣⲉⲛⲉⲩϩⲟⲣⲟⲟⲩⲧ · ⲉⲣⲉⲛⲉⲩⲥⲱⲙⲁ ϩⲟⲃⲥ · ⲛⲟⲩϩⲃⲥⲱ ⲕⲁⲧⲁⲧⲉⲕϭⲟⲙ ·
…
100 ⲁⲩⲱ ϯϫⲱ ⲙⲙⲟⲥ ⲛⲁⲕ ϫⲉⲡⲉⲕⲇⲱⲣⲟⲛ ⲛⲁϣⲱⲡⲉ ⲛⲟⲩⲛⲟϭ ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲉⲕϣⲁⲛⲟⲩⲱϣⲉ ⲉⲃⲱⲕ ⲉⲡⲁⲣⲓⲥⲧⲟⲛ ⲙⲙⲓⲭⲁⲏⲗ ⲉⲕⲣⲟⲟⲩⲧ · ⲉⲓⲉϣⲡϩⲉⲛϣⲙⲙⲟ ⲉⲣⲟⲕ ·
…
101 ϩⲙⲡϣⲁ ⲙⲙⲓⲭⲁⲏⲗ ⲛⲅⲣⲡⲛⲉⲩⲙⲁ ⲛⲙⲙⲁⲩ ·
…
102 ⲁⲩⲱ ⲙⲓⲭⲁⲏⲗ ⲛⲁⲉⲓ ⲉⲃⲟⲗ ϩⲛⲟⲩⲣⲁϣⲉ · ⲛϥϫⲓⲧⲕ ⲉϩⲟⲩⲛ ⲉⲧⲁⲩⲗⲏ ⲙⲡⲉϥⲣⲣⲟ ϩⲛⲟⲩⲉⲓⲣⲏⲛⲏ ·
…
103 ⲉⲣϣⲁⲛⲟⲩⲣⲱⲙⲉ ⲥⲡⲥⲱⲡⲕ ⲉϥⲁⲓⲧⲉ ⲙⲙⲟⲕ ⲛⲟⲩⲗⲁⲁⲩ ϩⲙⲡⲣⲁⲛ ⲙⲙⲓⲭⲁⲏⲗ ⲙⲡⲣϫⲛⲁⲩ ⲉⲧⲓ ⲛⲁϥ ·
…
104 ϯϫⲱ ⲙⲙⲟⲥ ⲛⲁⲕ ⲡⲁⲙⲉⲣⲓⲧ ϫⲉⲡⲉⲧⲉⲕⲛⲁⲧⲁⲁϥ ⲙⲡⲣⲱⲙⲉ ·
…
105 ⲙⲓⲭⲁⲏⲗ ⲡⲉⲧⲛⲁϫⲓⲧϥ ϩⲛⲛⲉϥϭⲓϫ ⲛϥⲡⲣⲟⲥⲉⲛⲉⲅⲕⲉ ⲙⲡϩⲟⲟⲩ ⲙⲡⲛⲟⲩⲧⲉ ϩⲁⲣⲟⲕ
…
106 ⲁⲩⲱ ϥⲛⲁⲧⲟⲟⲃⲟⲩ ⲛⲁⲕ ⲙⲛⲡⲉⲩⲕⲱⲃ ϩⲓϫⲙⲡⲕⲁϩ
…
107 ⲁⲩⲱ ⲡⲛⲟⲩⲧⲉ ⲣⲁⲛⲁ ⲛⲁⲕ ϩⲛⲧⲉϥⲙⲛⲧⲣⲣⲟ · ϫⲉϥⲥⲏϩ ϫⲉⲡⲛⲁϣⲁϥϣⲟⲩ ⲙⲙⲟϥ ϩⲓϫⲛⲧⲉⲕⲣⲓⲥⲓⲥ ·
…
108 ⲁⲩⲱ ϫⲉⲛⲁⲧⲁⲣⲟⲩ ⲛⲁ ⲛⲏⲧⲛ ⁖ⲻ
…
109 ⲉⲕϣⲁⲛⲙⲟⲩⲛ ⲉⲃⲟⲗ ⲉⲕⲣϣⲁ ⲙⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲛⲟⲩⲥⲟⲡ ⲕⲁⲧⲁⲉⲃⲟⲧ ⲉⲧⲉⲥⲟⲩⲙⲛⲧⲥⲛⲟⲟⲩⲥ ⲡⲉ ·
…
110 ⲡⲉϩⲟⲟⲩ ⲙⲡⲉϥⲧⲁϩⲟ ⲉⲣⲁⲧϥ ⲛⲅⲕⲱ ⲉⲕⲉⲓⲣⲉ ⲙⲡⲣⲟⲟⲩϣ ⲛⲧⲉϥⲡⲣⲟⲥⲫⲟⲣⲁ ⲙⲛⲟⲩⲇⲓⲁⲕⲟⲛⲓⲁ ⲡⲣⲟⲥ ⲧⲉⲕϭⲟⲙ ⁖ⲻ ϥⲛⲁϭⲱ ·
…
111 ϩⲱⲱϥ ⲛϭⲓⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ⲉϥⲥⲟⲡⲥⲡ ⲙⲡⲛⲟⲩⲧⲉ ϩⲁⲣⲟⲕ ⲛⲟⲩⲟⲉⲓϣ ⲛⲓⲙ ⲛϥⲭⲁⲣⲓⲍⲉ ⲛⲁⲕ ⲛⲧⲉⲕⲭⲣⲉⲓⲁ ⲧⲏⲣⲥ ⲡⲁⲣⲁⲧϩⲉ ⲉⲧⲉⲕⲙⲉⲉⲩⲉ ⲉⲣⲟⲥ
…
112 ⲁⲗⲗⲁ ϩⲁⲣⲏⲩ ⲱ ⲡⲁⲙⲉⲣⲓⲧ ⲕⲛⲁϫⲟⲟⲥ ⲛⲁⲓ ϫⲉⲉϣⲱⲡⲉ ϣⲁⲓϯⲁⲅⲁⲡⲏ ϩⲓⲡⲣⲟⲥⲫⲟⲣⲁ ⲉⲓⲛⲁⲧⲁⲁⲩ ⲙⲡⲛⲟⲩⲧⲉ ·
…
113 ⲙⲏ ⲟⲩⲛⲟⲩⲧⲉ ⲡⲉ ⲙⲓⲭⲁⲏⲗ ϫⲉⲉⲓⲉⲧⲁⲗⲉⲧⲁⲑⲩⲥⲓⲁ ⲉϩⲣⲁⲓ ⲛⲁϥ ⲙⲛⲛⲟⲩⲧⲉ ϣⲟⲟⲡ ⲛⲥⲁⲡⲛⲟⲩⲧⲉ ⲛⲧⲡⲉ ⲡⲉⲓⲱⲧ ⲙⲛⲡϣⲏⲣⲉ ⲙⲛⲡⲛⲉⲩⲙⲁ ⲉⲧⲟⲩⲁⲁⲃ ·
…
114 ⲁⲛⲟⲕ ⲇⲉ ϩⲱⲱⲧ ϯⲛⲁⲟⲩⲱϣⲃ ⲛⲁⲕ ϫⲉⲕⲁⲗⲱⲥ ⲡⲡⲓⲥⲧⲟⲥ ϩⲛⲟⲩⲙⲉ ⲡⲉⲧⲉⲣⲉⲧⲉϥⲡⲓⲥⲧⲓⲥ ⲥⲟⲩⲧⲱⲛ ⲉϩⲟⲩⲛ ⲉⲡⲉϥϫⲟⲉⲓⲥ ⁖ⲻ
…
115 ⲁⲗⲗⲁ ⲥⲱⲧⲙ ⲛⲧⲁⲧⲁⲙⲟⲕ ⲣⲱⲙⲉ ⲛⲓⲙ ·
…
116 ⲙⲏ ⲟⲩⲣⲣⲟ ⲁⲛ ⲛⲟⲩⲱⲧ ⲡⲉⲧⲁⲙⲁϩⲧⲉ ⲉϫⲛⲛⲉⲭⲱⲣⲁ ⲉⲣⲉⲟⲩⲁϣⲏ ⲛⲧⲁⲝⲓⲥ ϩⲁⲣⲁⲧϥ ·
…
117 ⲁⲩⲱ ⲉⲃⲟⲗ ϩⲛⲛⲉⲓⲧⲁⲝⲓⲥ ⲕⲛⲁϩⲉ ⲉⲟⲩⲉⲓ ⲉⲥϫⲟⲥⲉ ⲉⲕⲉⲟⲩⲉⲓ ⲉⲣⲉⲡⲣⲣⲟ ϫⲟⲥⲉ ⲉⲣⲟⲟⲩ ⲧⲏⲣⲟⲩ ·
…
118 ⲉⲥϣⲁⲛϣⲱⲡⲉ ⲇⲉ ⲛⲧⲉⲟⲩⲣⲱⲙⲉ ⲕⲱ ⲛⲁϥ ⲛⲟⲩⲙⲛⲧϣⲃⲏⲣ ·
…
119 ⲙⲛⲟⲩⲁ ϩⲛⲛⲉⲓⲧⲁⲝⲓⲥ ⲛⲃⲁⲥⲓⲗⲓⲕⲟⲛ · ⲛϥϯ ⲛⲁϥ ⲛϩⲉⲛⲧⲁⲉⲓⲟ ⲙⲛϩⲉⲛⲭⲣⲏⲙⲁ ·
…
120 ⲙⲏ ⲉⲩϯ ⲙⲙⲟⲟⲩ ⲛⲁϥ ϩⲛⲧⲉϥⲧⲁⲝⲓⲥ ⲉⲧⲉϥⲛϩⲏⲧⲥ ·
…
121 ⲙⲙⲟⲛ ⲁⲗⲗⲁ ⲛⲧⲁⲩⲧⲁⲁⲩ ⲛⲁϥ ⲉⲩⲥⲟⲟⲩⲛ ϫⲉⲟⲩⲛⲟϭ ⲧⲉ ⲧⲉϥⲧⲁⲝⲓⲥ ·
…
122 ⲁⲩⲱ ϥϩⲏⲛ ⲉϩⲟⲩⲛ ⲉⲡⲣⲣⲟ ⲛⲛⲁⲩ ⲛⲓⲙ ·
…
123 ⲁⲩⲱ ⲟⲩⲛϭⲟⲙ ⲙⲙⲟϥ ⲉⲧⲟⲩϫⲟϥ ϩⲛϩⲱⲃ ⲛⲓⲙ ⲛⲕⲩⲛⲇⲩⲛⲟⲥ ⲉϥⲣⲡⲕⲉⲥⲩⲛϩⲓⲥⲧⲁ ⲙⲙⲟϥ ⲙⲡⲣⲣⲟ ·
…
124 ϩⲱⲥ ⲣⲱⲙⲉ ⲛϣⲁⲩ ·
…
125 ϩⲱⲥ ⲇⲉ ⲛⲧⲉϩⲉⲛⲕⲟⲟⲩⲉ ϫⲓϩⲙⲟⲧ ⲉⲃⲟⲗ ϩⲓⲧⲟⲟⲧϥ ⁖ⲻ ⲧⲁⲓ ϩⲱⲱϥ ⲧⲉ ⲧϩⲉ ⲛⲣⲱⲙⲉ ⲛⲓⲙ ⲉⲧϯⲁⲅⲁⲡⲏ ϩⲓⲡⲣⲟⲥⲫⲟⲣⲁ ⲙⲡⲛⲟⲩⲧⲉ ⲙⲡⲉϩⲟⲟⲩ ⲙⲙⲓⲭⲁⲏⲗ ϣⲁⲣⲉⲡⲁⲣⲭⲁⲅⲅⲉⲗⲟⲥ ϫⲓ ⲛⲧⲟⲟⲧⲟⲩ ⲛⲛⲉⲩⲑⲩⲥⲓⲁ ·
…
126 ⲙⲛⲛⲉⲩⲁⲅⲁⲡⲏ ⲛϥⲧⲁⲁⲩ ⲙⲡⲛⲟⲩⲧⲉ ⲛⲧϩⲉ ⲛⲟⲩⲛⲟϭ ⲛⲥⲧⲉⲛⲟⲩϥⲉ ⲛϥϫⲓⲕⲉⲗⲉⲩⲥⲓⲥ ⲛⲧⲟⲟⲧϥ ⲙⲡⲛⲟⲩⲧⲉ ϩⲁⲣⲟⲟⲩ · ⲛϥⲥⲟⲃⲧⲉ ⲛⲁⲩ ⲛⲟⲩⲁϣⲏ ⲛⲁⲅⲁⲑⲟⲛ
…
127 ⲁⲩⲱ ⲛϥϫⲓⲧⲟⲩ ⲛϩⲙⲟⲧ ⲛⲛⲁϩⲣⲙⲡⲛⲟⲩⲧⲉ ⲛⲥⲉⲣⲃⲟⲗ ⲛⲕⲟⲗⲁⲥⲓⲥ ϣⲁⲉⲛⲉϩ ·
…
128 ⲡⲗⲏⲛ ⲉϣϫⲉ ⲧⲉⲧⲛⲟⲩⲱϣⲉ ⲉⲉⲓⲙⲉ ϫⲉⲛⲉⲧⲉϣⲁⲣⲉⲛⲣⲱⲙⲉ ⲛⲁⲧⲁⲁⲩ ⲛⲁⲅⲁⲡⲏ ·
…
129 ϩⲓⲡⲣⲟⲥⲫⲟⲣⲁ ⲙⲡⲛⲟⲩⲧⲉ ⲙⲡⲉϩⲟⲟⲩ ·
…
130 ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ϣⲁϥⲇⲓⲁⲕⲟⲛⲉⲓ ⲙⲙⲟⲟ ⲛⲁⲩ ϫⲓⲛⲉⲩϩⲙⲡⲕⲟⲥⲙⲟⲥ ·
…
131 ⲥⲱⲧⲙ ⲉⲡⲉⲓⲛⲟϭ ⲛⲕⲉⲫⲁⲗⲓⲟⲛ ⲛϣⲟⲩⲣϣⲡⲏⲣⲉ ⲙⲙⲟϥ ⲉⲩⲉⲟⲟⲩ ⲙⲡⲛⲟⲩⲧⲉ ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
132 ⲛⲉⲩⲛⲟⲩⲣⲱⲙⲉ ⲇⲉ ⲛⲇⲓⲕⲁⲓⲟⲥ · ⲙⲙⲁⲓⲛⲟⲩⲧⲉ ⲁⲩⲱ ⲙⲙⲁⲓⲁⲅⲁⲡⲏ ⲉϥϣⲟⲟⲡ ϩⲛⲛⲛⲥⲩⲛϩⲟⲣⲓⲁ ⲉⲟⲩⲛⲧⲁϥ ⲙⲙⲁⲩ ⲛⲟⲩⲥϩⲓⲙⲉ ⲛϩⲁⲕ ·
…
133 ⲁⲩⲱ ⲛⲥⲙⲛⲏ ·
…
134 ⲁⲩⲱ ⲧⲁⲓ ϩⲱⲱⲥ ⲉⲛⲉⲥϫⲏⲕ ⲉⲃⲟⲗ · ϩⲙⲡⲛⲁ ⲙⲛⲧⲁⲅⲁⲡⲏ · ⲕⲁⲧⲁⲧϩⲉ ⲟⲛ ⲙⲡⲉⲥϩⲁⲓ ·
…
135 ⲛⲁⲓ ⲇⲉ ⲛⲉⲟⲩⲛⲧⲁⲩ ⲙⲙⲁⲩ ⲛⲟⲩⲛⲟϭ ⲙⲡⲣⲟⲥⲧⲁⲥⲓⲁ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ ·
…
136 ⲡⲣⲁⲛ ⲇⲉ ⲙⲡⲣⲱⲙⲉ ⲉⲧⲙⲙⲁⲩ ⲡⲉ ⲇⲱⲣⲱⲑⲉⲟⲥ ⲁⲩⲱ ⲡⲣⲁⲛ ⲛⲧⲉϥⲥϩⲓⲙⲉ ⲡⲉ ⲑⲉⲱⲡⲓⲥⲧⲏ ·
…
137 ϫⲓⲛⲙⲡⲉⲟⲩⲟⲉⲓϣ ⲛⲧⲁⲩϩⲟⲧⲣⲟⲩ ⲙⲛⲛⲉⲩⲉⲣⲏⲩ ⲉⲩⲟ ⲛⲕⲟⲩⲓ ⲙⲡⲉⲥⲛⲁⲩ ·
…
138 ⲛⲉⲟⲩⲛⲧⲁⲩ ⲙⲙⲁⲩ ⲛⲟⲩⲟⲩⲥⲓⲁ ⲉⲥⲧⲏϣ ⲕⲁⲗⲱⲥ ⲛⲧⲁⲥϣⲱϫⲡ ⲛⲁⲩ ϩⲁⲛⲉⲩⲉⲓⲟⲧⲉ ·
…
139 ⲛⲉⲩϣⲱⲡ ⲛⲁⲩ ⲛϭⲓϩⲉⲛⲧⲃⲛⲟⲟⲩⲉ ⲉⲛⲁϣⲱⲟⲩ ⲙⲛⲟⲩⲁϣⲏ ⲛⲭⲣⲏⲙⲁ · ⲕⲁⲧⲁⲧⲉⲭⲣⲉⲓⲁ ⲙⲡⲉⲓⲕⲟⲥⲙⲟⲥ ·
…
140 ⲛⲉⲓⲣⲱⲙⲉ ⲇⲉ ⲉⲧⲟⲩⲁⲁⲃ ⲉⲧⲉⲇⲱⲣⲟⲑⲉⲟⲥ ⲡⲉ ⲙⲛⲑⲉⲱⲡⲓⲥⲧⲏ ⲧⲉϥⲥϩⲓⲙⲉ ⲛⲉⲩⲛⲧⲁⲁⲩ ⲙⲙⲁⲩ ⲛⲟⲩⲥⲩⲛⲏⲑⲓⲁ ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲉⲩϣⲁⲛⲡⲱϩ ⲉⲥⲟⲩⲙⲛⲧⲥⲛⲟⲟⲩⲥ ⲕⲁⲧⲁⲉⲃⲟⲧ · ϣⲁⲩⲧⲁⲥⲥⲉ ⲛⲧⲉⲡⲣⲟⲥⲫⲟⲣⲁ · ϩⲛⲥⲟⲩⲙⲛⲧⲟⲩⲉ · ⲉϩⲧⲟⲟⲩⲉ ⲛⲥⲟⲩⲙⲛⲧ‐ⲥⲛⲟⲟⲩⲥ · ⲛϣⲱⲣⲡ ⲙⲛϣⲁⲩⲧⲛⲛⲟⲟⲩ ⲛⲧⲁⲡⲁⲣⲭⲏ ⲙⲛⲧⲉⲡⲣⲟⲥⲫⲟⲣⲁ · ⲉⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ · ϩⲛⲟⲩⲟⲩⲣⲟⲧ ·
…
141 ⲙⲛⲛⲥⲱⲥ ϣⲁⲩⲕⲱⲛⲥ ⲛⲟⲩⲉⲥⲟⲟⲩ · ⲛⲥⲉⲥⲙⲓⲛⲉ ⲛϩⲉⲛⲭⲁⲗⲕⲓⲟⲛ ⲛⲁⲁⲁϥ ·
…
142 ϩⲓⲗⲁⲭⲁⲛⲟⲛ ⲛⲥⲉⲧⲱⲕ ⲛϩⲉⲛⲟⲉⲓⲕ ⲉⲡϩⲱⲃ ⲛⲧⲉⲭⲣⲉⲓⲁ ·
…
143 ⲉⲩϣⲁⲛϫⲓ ⲇⲉ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ · ϣⲁⲩⲧⲉϩⲙⲟⲩⲟⲛ ⲛⲓⲙ ⲉⲧϣⲁⲁⲧ ⲉⲧⲟⲩⲛⲁϩⲉ ⲉⲣⲟⲟⲩ · ⲙⲛⲛⲃⲗⲗⲉ · ⲙⲛⲛϭⲁⲗⲉ ·
…
144 ⲙⲛⲛⲉⲭⲏⲣⲁ ⲙⲛⲛⲟⲣⲫⲁⲛⲟⲥ ⲙⲛⲛϣⲙⲙⲟ ·
…
145 ⲙⲛⲛⲉⲧⲟⲩⲛⲁϩⲉ ⲉⲣⲟⲟⲩ ⲛⲥⲉⲛⲧⲟⲩ ⲉϩⲟⲩⲛ ⲉⲛⲉⲩⲏⲓ ⲛⲥⲉⲁϩⲉⲣⲁⲧⲟⲩ ⲉⲣⲟⲟⲩ ⲙⲡⲉⲥⲛⲁⲩ ⲛⲥⲉⲇⲓⲁⲕⲟⲛⲉⲓ ⲛⲁⲩ ϣⲁⲛⲧⲟⲩ ⲱ ⲉⲩⲟⲩⲱⲙ ·
…
146 ⲁⲩⲱ ⲛⲥⲉϯ ⲛⲁⲩ ⲛⲟⲩⲏⲣⲡ ⲉⲛⲁϣⲱϥ
…
147 ⲉⲩϣⲁⲛⲛⲁⲩ ⲇⲉ ⲉⲉⲓ ⲉⲃⲟⲗ ϣⲁⲩⲧⲱϩⲥ ⲛⲧⲉⲩⲁⲡⲉ ⲛⲟⲩⲛⲉϩ ⲛⲥⲉⲑⲡⲟⲟⲩ ⲉⲃⲟⲗ ϩⲛⲟⲩⲣⲁϣⲉ ⲉⲩϫⲱ ⲙⲙⲟⲥ ϫⲉⲃⲱⲕ ϩⲛⲟⲩⲉⲓⲣⲏⲛⲏ ⲛⲉⲥⲛⲏⲩ ⲙⲙⲉⲣⲓⲧ ·
…
148 ⲁⲛⲣⲡⲙⲡϣⲁ ⲅⲁⲣ ⲛⲟⲩⲛⲟϭ ⲛϩⲙⲟⲧ ·
…
149 ⲁⲧⲉⲧⲛⲉⲓ ϣⲁⲣⲟⲛ ⲙⲡϩⲟⲟⲩ ·
…
150 ⲛⲁⲓ ⲇⲉ ⲛⲉⲩⲉⲓⲣⲉ ⲙⲙⲟⲟⲩ ⲕⲁⲧⲁⲥⲟⲩⲙⲛⲧⲥⲛⲟⲟⲩⲥ ϩⲱⲥ ⲇⲉ ⲛⲧⲉⲡⲉⲩⲥⲧⲉⲛⲟⲩϥⲉ ⲙⲛⲧⲉⲩⲁⲅⲁⲡⲏ ⲃⲱⲕ ϣⲁⲡⲛⲟⲩⲧⲉ ⲉϩⲣⲁⲓ ⲙⲡⲏⲩⲉ · ⲉⲣⲉⲟⲩⲟⲛ ⲛⲓⲙ ϯⲉⲟⲟⲩ ⲛⲁⲩ ⲙⲡⲉⲩⲟⲩⲟⲉⲓϣ ⲧⲏⲣϥ ⲉⲧⲃⲉⲧⲉⲩⲙⲛⲧⲥⲱⲧⲡ ·
…
151 ⲁⲩⲱ ⲛⲉⲩϩⲱⲡ ⲛⲧⲉⲩⲁⲣⲉⲧⲏ · ϩⲓⲟⲩⲥⲟⲡ ⲛⲉⲩϣⲓⲛⲉ ⲁⲛ ⲛⲥⲁⲗⲁⲁⲩ ⲛⲉⲟⲟⲩ · ⲉⲡⲁⲣⲱⲙⲉ ⲡⲉ ·
…
152 ⲁⲗⲗⲁ ⲛⲉⲣⲉⲧⲉⲩϩⲉⲗⲡⲓⲥ ⲧⲏⲣⲥ ϣⲟⲟⲡ ϩⲙⲡⲛⲟⲩⲧⲉ ·
…
153 ⲙⲛⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ
…
154 ⲁⲥϣⲱⲡⲉ ⲇⲉ ⲙⲛⲛⲥⲁⲟⲩⲛⲟϭ ⲛⲟⲩⲟⲉⲓϣ ⲉⲩⲙⲏⲛ ⲉⲃⲟⲗ · ⲛⲧⲉⲓϩⲉ ⲁⲡⲛⲟⲩⲧⲉ ⲕⲉⲗⲉⲩⲉ ·
…
155 ⲁⲧⲁⲛⲁⲃⲁⲥⲓⲥ ϣⲱⲡⲉ · ⲉⲧⲙⲧⲣⲉⲡⲙⲟⲟⲩ ⲉⲓ ⲉϫⲙⲡⲕⲁϩ ⲉⲩⲡⲁⲓⲇⲉⲩⲥⲓⲥ ⲛⲛϣⲏⲣⲉ ⲛⲛⲣⲱⲙⲉ ⲉⲧⲃⲉⲛⲉⲩⲛⲟⲃⲉ ·
…
156 ⲗⲟⲓⲡⲟⲛ ⲁϥⲁⲙⲁϩⲧⲉ ⲙⲙⲟϥ ⲛϣⲟⲙⲧⲉ ⲛⲣⲟⲙⲡⲉ ⲛⲥⲁⲛⲉⲩⲉⲣⲏⲩ ·
…
157 ϩⲱⲥ ⲇⲉ ⲛⲧⲉⲡⲕⲁϩ ⲛⲕⲏⲙⲉ ϣⲱⲡⲉ ϩⲛⲟⲩⲛⲟϭ ⲛϣⲧⲟⲣⲧⲣ ·
…
158 ⲙⲛⲛⲉⲧϩⲓϫⲱϥ ⲛⲥⲉⲣⲡⲱⲃϣ ⲙⲡⲥⲉⲓ ϩⲛⲕⲏⲙⲉ · ⲕⲁⲧⲁⲡⲉⲧⲥⲏϩ ·
…
159 ⲗⲟⲓⲡⲟⲛ ⲁⲩⲙⲟⲩ ⲛϭⲓϩⲁϩ ⲛⲣⲱⲙⲉ ϩⲓⲧⲃⲛⲏ ·
…
160 ⲉⲃⲟⲗ ϫⲉⲙⲡⲉⲙⲟⲟⲩ ⲉⲓⲛⲁⲩ ⲉϫⲙⲡⲕⲁϩ ⲛϣⲟⲙⲧⲉ ⲛⲣⲟⲙⲡⲉ ⲛⲥⲁⲛⲉⲩⲉⲣⲏⲩ · ⲡⲉⲣⲱⲙⲉ ⲇⲉ ⲉⲧⲟⲩⲁⲁⲃ · ⲙⲛⲧⲉϥⲥϩⲓⲙⲉ ⲙⲡⲟⲩⲕⲁⲧⲟⲟⲧⲟⲩ ⲉⲃⲟⲗ ϩⲙⲡⲉⲧⲟⲩⲉⲓⲣⲉ ⲙⲙⲟϥ ⲕⲁⲧⲁⲉⲃⲟⲧ · ⲉⲩⲥⲟⲡⲥⲡ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ · ϫⲉⲙⲡⲣⲱϫⲛ ⲛⲧⲉⲕⲁⲅⲁⲡⲏ ⲙⲛⲧⲉⲕⲡⲣⲟⲥⲫⲟⲣⲁ ϩⲛⲛⲉⲛϭⲓϫ ⲁⲛⲟⲛ ⲛⲉⲕϩⲙϩⲁⲗ · ⲉⲩϣⲟⲟⲡ ⲛⲧⲉⲓϩⲉ ·
…
161 ⲁⲩⲁⲣⲭⲉⲓ ⲛϣⲱⲱⲧ ϩⲱⲟⲩ ⲁⲩⲱ ⲁⲩⲙⲟⲩ ⲛϭⲓϩⲁϩ ϩⲛⲛⲉⲩⲧⲃⲛⲟⲟⲩⲉ · ϩⲁⲡⲗⲱⲥ ·
…
162 ⲁⲩϫⲉⲕⲣⲟⲙⲡⲉ ⲥⲛⲧⲉ ⲉⲃⲟⲗ ·
…
163 ⲁⲩⲁⲣⲭⲉⲓ ⲉⲧⲙⲉϩϣⲟⲙⲛⲧⲉ ·
…
164 ⲁⲛⲕⲁ ⲛⲓⲙ ⲉⲧⲛⲧⲁⲩⲱϫⲛ ⲛⲧⲟⲟⲧⲟⲩ ·
…
165 ⲁⲩⲱ ⲁⲛⲉⲩⲉⲥⲟⲟⲩ ⲧⲏⲣⲟⲩ ⲙⲟⲩ ⲡⲁⲣⲁⲟⲩⲁ ⲛⲟⲩⲱⲧ ·
…
166 ⲡⲣⲱⲙⲉ ⲇⲉ ⲛⲥⲙⲛⲟⲥ ⲁⲩⲱ ⲙⲡⲓⲥⲧⲟⲥ ·
…
167 ⲡⲉϫⲁϥ ⲛⲧⲉϥⲥϩⲓⲙⲉ ϫⲉⲧⲁⲥⲱⲛⲉ ⲧⲱⲟⲩⲛ ⲉⲓⲥϩⲏⲏⲧⲉ ⲥⲟⲩⲙⲛⲧⲥⲛⲟⲟⲩⲥ ⲙⲡⲁⲟⲡⲉ ⲣⲁⲥⲧⲉ ·
…
168 ⲙⲁⲣⲛϥⲓⲡⲣⲟⲟⲩϣ ⲛⲧⲉⲡⲣⲟⲥⲫⲟⲣⲁ ⲛⲧⲛⲕⲱⲛⲥ ⲙⲡⲉⲓⲉⲥⲟⲟⲩ ⲛⲧⲛⲣⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
169 ⲁⲩⲱ ⲉⲛϣⲁⲛⲙⲟⲩ ⲁⲛⲟⲛ ⲛⲁⲡⲛⲟⲩⲧⲉ · ⲉⲛϣⲁⲛⲱⲛϩ ⲁⲛⲟⲛ ⲛⲁⲡⲛⲟⲩⲧⲉ ·
…
170 ⲛⲧⲟⲥ ⲇⲉ ⲡⲉϫⲁⲥ ⲛⲁϥ ϫⲉϥⲟⲛϩ ⲛϭⲓⲡϫⲟⲉⲓⲥ ⲡⲁⲥⲟⲛ · ϫⲉⲡⲉⲓⲣⲟⲟⲩϣ ⲡⲁⲓ ⲉⲛⲱⲭⲗⲉⲓ ⲛⲁⲓ ⲉⲓⲥ ⲕⲉϩⲱⲃ ⲥⲛⲁⲩ ·
…
171 ⲁⲗⲗⲁ ⲙⲡⲓϭⲛⲑⲉ ⲛϫⲛⲟⲩⲕ ⲁⲛⲁⲩ ⲉⲡⲉⲛⲧⲁϥϣⲱⲡⲉ ⲙⲙⲟⲛ ·
…
172 ⲁⲓⲣⲁϣⲉ ⲧⲱⲛⲟⲩ ⲙⲡϩⲟⲟⲩ ϫⲉⲙⲡⲉⲕⲣⲡⲱⲃϣ ⲛⲧⲉⲑⲩⲥⲓⲁ ⲙⲡⲛⲟⲩⲧⲉ ·
…
173 ⲁⲣⲓⲣⲉⲡⲁⲥⲟⲛ ⲕⲁⲧⲁⲧϩⲉ ⲛⲧⲁⲕϫⲟⲟⲥ ·
…
174 ⲁϥⲧⲱⲟⲩⲛ ⲇⲉ ⲛϣⲱⲣⲡ ⲛⲥⲟⲩⲙⲛⲧⲥⲛⲟⲟⲩⲥ ⲙⲡⲁⲟⲡⲉ ·
…
175 ⲁⲩϫⲱⲕ ⲉⲃⲟⲗ ⲙⲡⲉⲩϣⲙϣⲉⲧⲏⲣϥ ⲙⲡⲟⲩⲉⲓ ⲉⲡⲁϩⲟⲩ ⲛⲗⲁⲁⲩ ⲡⲁⲣⲁⲡⲉⲟⲩⲟⲉⲓϣ ⲙⲡϩⲉⲛⲟⲩϥⲉ ·
…
176 ⲁⲩⲱ ⲙⲡⲉⲗⲁⲁⲩ ϣⲱϫⲡ ⲛⲁⲩ ⲉⲡⲁϩⲟⲩ ⲛⲥⲁϩⲉⲛⲕⲟⲩⲓ ⲉⲛⲟⲉⲓⲕ ·
…
177 ⲙⲛⲟⲩⲕⲟⲩⲓ ⲛⲏⲣⲡ ⲙⲙⲁⲧⲉ ϣⲁϩⲣⲁⲓ ⲉⲛⲉⲩⲕⲉϩⲃⲥⲱ ⲧⲏⲣⲟⲩ · ϣⲁⲛⲉⲧⲟⲩⲥⲩⲛⲁⲅⲉ ⲛϩⲏⲧⲟⲩ ·
…
178 ⲁⲩⲱ ϩⲛⲛⲁⲓ ⲛⲉⲩϣⲡϩⲙⲟⲧⲛⲧ ⲙⲡⲛⲟⲩⲧⲉ ⲙⲛⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ
…
179 ⲁⲩⲱ ⲉⲩϣⲗⲏⲗ ⲉⲩⲥⲙⲟⲩ ⲉⲡⲛⲟⲩⲧⲉ ·
…
180 ⲙⲡⲉϩⲟⲟⲩ ⲙⲛⲧⲉⲩϣⲏ ϩⲛϩⲉⲛⲣⲙⲉⲓⲟⲟⲩ · ⲉⲩϫⲱ ⲙⲙⲟⲥ ϫⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲉϩⲣⲁⲓ ⲉϫⲱⲛ ·
…
181 ⲛϥⲟⲩⲱⲛ ⲛⲁⲛ ⲛⲧⲉϥϭⲓϫ ⲛⲥⲙⲟⲩ ϫⲉⲕⲁⲥ ⲛⲛⲉⲥⲱϫⲛ ⲛⲧⲱⲧⲛ ⲛϭⲓⲧϩⲉⲗⲡⲓⲥ ⲛⲧⲉϥⲁⲅⲁⲡⲏ · ⲙⲛⲧⲉϥⲑⲩⲥⲓⲁ ⲧⲁⲓ ⲉⲧⲛϯ ⲙⲙⲟⲥ ϩⲙⲡⲉϥⲣⲁⲛ · ⲱ ⲙⲓⲭⲁⲏⲗ ⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲟⲕ ⲡⲉⲧⲥⲟⲟⲩⲛ ⲙⲡⲉⲛϩⲏⲧ ⲙⲛⲧⲛⲡⲣⲟϩⲩⲣⲉⲥⲓⲥ ⲉϩⲟⲩⲛ ⲉⲣⲟⲕ ·
…
182 ⲁⲩⲱ ϫⲉⲙⲛⲧⲛⲗⲁⲁⲩ ⲙⲡⲣⲟⲥⲧⲁⲥⲓⲁ ⲙⲙⲁⲩ ⲛⲥⲁⲃⲗⲗⲁⲕ · ⲉⲕⲟ ⲛⲁⲛ ⲙⲡⲣⲟⲥⲧⲁⲧⲏⲥ ϫⲓⲛⲧⲛⲙⲛⲧⲕⲟⲩⲓ ϣⲁⲧⲉⲛⲟⲩ · ⲉⲕⲡⲣⲉⲥⲃⲉⲩⲉ ϩⲁⲣⲟⲛ ⲛⲛⲁϩⲣⲙⲡⲛⲟⲩⲧⲉ ⲡⲉⲛⲣⲣⲟ ⲧⲉⲛⲟⲩ ⲇⲉ ⲧⲛⲡⲁⲣⲁⲕⲁⲗⲉⲓ ⲙⲙⲟⲕ ⲡⲉⲛϥⲁⲓⲣⲟⲟⲩϣ ⲉⲧⲛⲁⲛⲟⲩϥ ⲙⲓⲭⲁⲏⲗ ·
…
183 ⲉϣⲱⲡⲉ ϩⲟⲗⲱⲥ ⲡⲉⲓⲛⲟϭ ⲛⲙⲕⲁϩ ⲛϩⲏⲧ ϭⲉⲉⲧ ⲉⲣⲟⲛ ϩⲛⲧⲉⲛϩⲁⲏ ·
…
184 ⲙⲛⲛⲥⲁⲛⲉⲥⲩⲛⲑⲩⲕⲏ · ⲛⲧⲁⲛⲥⲙⲛⲧⲟⲩ ⲛⲙⲙⲁⲕ ⲙⲛⲡⲛⲟⲩⲧⲉ ·
…
185 ⲉⲧⲙⲟⲩⲱⲥϥ ⲛⲧⲉⲕⲑⲩⲥⲓⲁ ⲙⲛⲧⲉⲕⲁⲅⲁⲡⲏ ⲉⲓⲉ ⲙⲁⲣⲉⲧⲉⲕⲙⲛⲧⲁⲅⲁⲑⲟⲥ ⲉϩⲟⲩⲛ ⲉⲧϩⲓⲕⲱⲛ ⲧⲏⲣⲥ ⲙⲡⲛⲟⲩⲧⲉ ·
…
186 ⲉⲉⲓⲣⲉ ⲛⲙⲙⲁⲛ ⲙⲡⲉⲓⲛⲟϭ ⲛⲁⲅⲁⲑⲟⲛ · ⲛⲅⲡⲁⲣⲁⲕⲁⲗⲉⲓ ⲙⲡⲛⲟⲩⲧⲉ ⲡⲣⲣⲟ ⲛⲛⲉⲣⲣⲱⲟⲩ ⲉⲧⲃⲏⲏⲧⲛ ⲛϥⲣⲡⲛⲉⲩⲙⲁ ⲛⲙⲙⲁⲛ ⲛϥⲡⲟⲟⲛⲉⲛ ⲉⲃⲟⲗ ϩⲙⲡⲉⲓⲃⲓⲟⲥ · ⲕⲁⲧⲁⲧϩⲉ ϩⲱⲱⲛ ⲛⲛⲉⲛⲉⲓⲟⲧⲉ ⲧⲏⲣⲟⲩ ·
…
187 ⲉⲓⲥϩⲏⲏⲧⲉ ⲅⲁⲣ ⲱ ⲡⲉⲛⲡⲣⲟⲥⲧⲁⲧⲏⲥ ⲕⲛⲁⲩ ⲉⲡⲉⲛⲑⲃⲃⲓⲱ ⲛⲧⲁϥϣⲱⲡⲉ ⲙⲙⲟⲛ ⲛⲧϣⲃⲃⲓⲱ ⲛⲛⲉⲛⲛⲟⲃⲉ ·
…
188 ⲁⲩⲱ ⲛⲁⲛⲟⲩⲥ ⲛⲁⲛ ⲉⲧⲣⲉⲛⲙⲟⲩ ⲛϩⲟⲩⲟ ⲉⲣⲟⲥ ⲉⲧⲣⲉⲛⲱⲛϩ ϩⲛⲟⲩϭⲣⲱⲱϩ ⲛⲧⲛⲣⲡⲱⲃϣ ⲛⲧⲉⲕⲑⲩⲥⲓⲁ ⲙⲛⲧⲉⲕⲡⲣⲟⲥⲫⲟⲣⲁ · ϫⲉϣⲁⲣⲉⲧⲙⲛⲧϩⲏⲕⲉ ⲅⲁⲣ ⲣϩⲁϩ ⲛϩⲟⲟⲩⲉ ϥϩⲟⲟⲩ
…
189 ⲁⲩⲱ ϣⲁⲥⲧⲣⲉⲛⲉⲧⲛϩⲏⲧⲥ ⲁⲣⲛⲁ ⲙⲡⲣⲁⲛ ⲙⲡⲉⲛⲧⲁϥⲧⲁⲙⲓⲟⲟⲩ · ⲁϫⲛϩⲟⲧⲉ ·
…
190 ⲧⲉⲛⲟⲩ ⲟⲛ ⲧⲛⲡⲁϩⲧ ⲙⲡⲉⲕⲙⲧⲟ ⲉⲃⲟⲗ · ⲱ ⲡⲁⲣⲭⲏⲥⲧⲣⲁⲧⲏⲕⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ⲙⲡⲣⲟⲃϣⲕ ⲉⲣⲟⲛ ⲁⲛⲟⲛ ⲛⲉⲕϩⲙϩⲁⲗ ·
…
191 ⲧⲛⲥⲟⲟⲩⲛ ⲅⲁⲣ · ϫⲉⲕϩⲏⲛ ⲉϩⲟⲩⲛ ⲉⲡⲣⲣⲟ ⲛⲛⲁⲩ ⲛⲓⲙ ·
…
192 ⲁⲩⲱ ⲕⲟⲩⲏⲩ · ⲁⲛ ⲉⲃⲟⲗ ⲛⲛⲉⲧⲉⲡⲓⲕⲁⲗⲓ ⲙⲙⲟⲕ ·
…
193 ⲁⲗⲗⲁ ⲕϩⲏⲛ ⲉϩⲟⲩⲛ ⲉⲣⲟⲟⲩ ⲕⲁⲧⲁⲡⲉⲧⲥⲏϩ · ϫⲉϣⲁⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ⲁⲩⲱ ϣⲁϥⲛⲁϩⲙⲟⲩ ·
…
194 ϣⲁϥϫⲟⲟⲥ ⲟⲛ ϩⲛⲕⲉⲙⲁ ϫⲉϣⲁϥⲛⲁⲉ ⲁⲩⲱ ϣⲁϥϯ ⲙⲡⲉϩⲟⲟⲩ ⲧⲏⲣϥ ·
…
195 ⲉⲓⲥϩⲏⲏⲧⲉ ⲟⲛ ⲱ ⲡⲉⲛⲡⲣⲉⲥⲃⲉⲩⲧⲏⲥ ⲙⲓⲭⲁⲏⲗ · ⲕⲛⲁⲩ ⲉⲡⲉⲛϣⲱⲱⲧ ⲧⲏⲣϥ ⲉⲧ ϩⲓϫⲱⲛ ·
…
196 ⲁⲩⲱ ⲙⲛⲧⲁⲛ ⲗⲁⲁⲩ ⲛϣⲁϫⲉ ⲉϫⲱ ⲉⲓ ⲙⲏⲧⲉⲓ ⲉⲡⲁⲓ ⲙⲙⲁⲧⲉ ϫⲉⲁⲛⲣϩⲏⲕⲉ ⲉⲙⲁⲧⲉ ⲃⲟⲏⲑⲉⲓ ⲉⲣⲟⲛ ⲡⲛⲟⲩⲧⲉ ⲡⲉⲛⲥⲱⲧⲏⲣ · ⲛⲅⲥⲁⲁⲧⲛ ⲉⲧⲃⲉⲡⲉⲟⲟⲩ ⲙⲡⲉⲕⲣⲁⲛ
…
197 ⲁⲩⲱ ⲧⲛⲛⲁϫⲱ ⲟⲛ ⲙⲡⲉⲓⲕⲉⲟⲩⲁ · ϩⲛⲟⲩϣⲡϩⲙⲟⲧ · ϫⲉⲡϫⲟⲉⲓⲥ ⲡⲉⲛⲧⲁϥⲧⲁⲁⲩ ⲛⲧⲟϥ ⲟⲛ ⲡⲉⲛⲧⲁϥϥⲓⲧⲟⲩ ·
…
198 ⲧϩⲉ ⲉⲧⲣⲁ ⲛⲁϥ ⲧⲉⲛⲧⲁⲥϣⲱⲡⲉ · ⲉⲣⲉⲡⲣⲁⲛ ⲙⲡϫⲟⲉⲓⲥ ϣⲱⲡⲉ ϥⲥⲙⲁⲙⲁⲁⲧ ϣⲁⲉⲛⲉϩ ϩⲁⲙⲏⲛ ·
…
199 ⲛⲁⲓ ⲇⲉ ⲉⲣⲉⲛⲉⲧⲟⲩⲁⲁⲃ ϫⲱ ⲙⲙⲟⲟⲩ · ⲉⲩⲙⲏⲛ ⲉⲃⲟⲗ ϩⲛⲟⲩⲥⲟⲡⲥⲡ · ⲙⲡⲛⲟⲩⲧⲉ ⲙⲛⲡⲉϥⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…
200 ϫⲓⲛⲥⲟⲩⲙⲛⲧⲥⲛⲟⲟⲩⲥ ⲙⲡⲁⲟⲡⲉ · ϣⲁⲡⲛⲁⲩ ⲛϫⲡⲯⲓⲧⲉ · ⲛⲥⲟⲩⲙⲛⲧⲥⲛⲟⲟⲩⲥ ⲛⲁⲑⲱⲣ · ⲉⲧⲉⲡⲁⲓ ⲡⲉ ⲡⲛⲟϭ ⲛϣⲁ ⲉⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ
…
201 ϩⲧⲟⲟⲩⲉ ⲇⲉ ⲛⲧⲉⲣⲉϥϣⲱⲡⲉ ⲛⲉ ⲁⲡⲛⲁⲩ ⲅⲁⲣ ϣⲱⲡⲉ ⲉⲧⲣⲉⲩⲧⲁⲥⲥⲉ ⲛⲧⲉⲡⲣⲟⲥⲫⲟⲣⲁ ϫⲓⲛⲣⲟⲩϩⲉ ⲛⲥⲟⲩ ⲙⲛⲧⲟⲩⲉ ·
…
202 ⲧⲁⲣⲟⲩⲥⲙⲛⲧⲥ ⲛⲁⲩ ⲛϣⲱⲣⲡ ⲙⲡϣⲁ ⲕⲁⲧⲁⲡⲉⲩⲉⲑⲟⲥ ·
…
203 ⲁϥϯⲡⲉϥⲟⲩⲟⲓ ⲛϭⲓⲡⲣⲱⲙⲉ ⲉⲧⲟⲩⲁⲁⲃ ⲁⲩⲱ ⲙⲡⲓⲥⲧⲟⲥ ⲛⲁⲙⲉ ⲉⲧⲉϥⲥϩⲓⲙⲉ :
…
204 ⲡⲉϫⲁϥ ⲛⲁⲥ ϩⲛⲟⲩⲑⲃⲃⲓⲱ ⲙⲛⲟⲩⲱⲗⲥ ⲛϩⲏⲧ ϫⲉⲧⲁⲥⲱⲛⲉ ·
…
205 ⲉⲣϩⲙⲟⲟⲥ ⲉⲣⲣⲟⲩ ⲙⲏ ϯⲥⲟⲟⲩⲛ ⲁⲛ ϫⲉⲁϣ ⲛϣⲁⲣⲁⲥⲧⲉ ·
…
206 ⲙⲏ ⲧⲁⲥⲱⲛⲉ ⲁⲣⲣⲡⲱⲃϣ ⲛⲧⲟⲩⲥⲩⲛⲏⲑⲓⲁ ⲉⲧⲛⲁⲛⲟⲩⲥ ·
…
207 ⲙⲏ ⲁⲡⲉⲣⲡⲙⲉⲉⲩⲉ ⲙⲡⲁⲣⲭⲁⲅⲅⲉⲗⲟⲥ ⲗⲟ ϩⲙⲡⲟⲩϩⲏⲧ ⲙⲡϩⲟⲟⲩ ·
…
208 ⲙⲡⲱⲣⲧⲁⲥⲱⲛⲉ ⲙⲡⲣⲉⲓⲁⲧⲟⲟⲧⲉ ⲛⲥⲁⲧⲉⲛϩⲉⲗⲡⲓⲥ · ⲟⲩⲛϣϭⲟⲙ ⲙⲡⲛⲟⲩⲧⲉ ⲉϩⲱⲃ ⲛⲓⲙ ·
…
209 ⲥⲱⲧⲙ ϩⲱⲱϥ ⲛϣⲁϫⲉ ⲛⲥⲟⲗⲥⲗ ⲛⲧⲉⲙⲁⲕⲁⲣⲓⲁ ⲛⲥϩⲓⲙⲉ ⲉⲧⲥⲧⲁⲩⲟ ⲙⲙⲟⲟⲩ ⲉⲡⲉⲥϩⲁⲓ ϩⲛⲟⲩⲉⲡⲓⲥⲧⲏⲙⲓⲁ ·
…
210 ⲡⲉϫⲁⲥ ⲛⲁϥ ϫⲉⲕⲁⲗⲱⲥ ⲏⲗⲑⲉⲥ ⲡⲁϫⲟⲉⲓⲥ ⲛⲥⲟⲛ ·
…
211 ⲕⲁⲗⲱⲥ ⲁⲕⲉⲓ ⲛⲁⲓ ⲉϩⲟⲩⲛ ⲡⲁϫⲟⲉⲓⲥ ⲛⲥⲟⲛ ·
…
212 ⲕⲁⲗⲱⲥ ⲁⲕⲉⲓ ⲛⲁⲓ ⲉϩⲟⲩⲛ ⲧⲉⲛⲟⲩ ⲙⲛⲡⲥⲟⲗⲥⲗ ⲛⲧⲉⲛⲙⲛⲧⲣⲙⲙⲁⲟ · ⲉⲧⲉⲡⲣⲁϣⲉ ⲡⲉ ⲛⲧⲉⲛⲯⲩⲭⲏ ϩⲓⲟⲩⲥⲟⲡ ·
…
213 ⲁⲗⲏⲑⲱⲥ ⲱ ⲡⲁⲥⲟⲛ ϫⲓⲛⲙⲡⲛⲁⲩ ⲛϫⲡⲟⲩⲉⲓ ⲙⲡϩⲟⲟⲩ ϣⲁⲛⲧⲉⲕⲉⲓ ⲛⲁⲓ ⲉϩⲟⲩⲛ ⲧⲉⲛⲟⲩ ·
…
214 ⲙⲡⲉⲟⲩⲡⲩⲅⲉ ⲛⲣⲙⲉⲓⲏ ⲗⲟ ϩⲓϫⲛⲛⲁⲃⲁⲗ · ⲉⲩⲥⲱⲕ · ⲉⲣⲉⲟⲩⲕⲱϩⲧ ⲟⲩⲱⲙ ⲛⲥⲁⲡⲁⲥⲁ ⲛϩⲟⲩⲛ ⲉⲧⲃⲉⲡⲉⲣⲡⲙⲉⲉⲩⲉ ⲙⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲡⲉⲛⲡⲣⲟⲥⲧⲁⲧⲏⲥ ⲁⲩⲱ ⲡⲉⲛⲡⲣⲉⲥⲃⲉⲩⲧⲏⲥ ⲙⲓⲭⲁⲏⲗ ·
…
215 ⲧⲉⲛⲟⲩ ⲇⲉ ⲱ ⲡⲁⲥⲟⲛ ⲁⲙⲟⲩ ⲁⲛⲁⲩ ϫⲉⲟⲩ ⲡⲉⲧⲛⲛⲁⲁⲁϥ ϫⲉⲛⲛⲉⲧⲛⲑⲩⲥⲓⲁ ϫⲉⲛⲁ ⲛⲧⲟⲟⲧⲛ ⲛⲧⲛϯⲟⲥⲉ ⲙⲡⲕⲉⲧ · ⲉⲧⲉⲟⲩⲛⲧⲁⲛϥ ·
…
216 ⲉⲡⲉⲓⲇⲏ ⲁⲓⲥⲱⲧⲙ ⲉⲡⲥⲁϩ ⲡⲁⲩⲗⲟⲥ ⲡⲁⲡⲟⲥⲧⲟⲗⲟⲥ ⲉϥϫⲱ ⲙⲙⲟⲥ ϫⲉⲡⲉⲛⲧⲁϥⲁⲣⲭⲉⲓ ⲉⲩϩⲱⲃⲉ ⲛⲁⲛⲟⲩϥ ·
…
217 ⲙⲁⲣⲉϥϫⲟⲕϥ ⲉⲃⲟⲗ ϣⲁⲡⲉϩⲟⲟⲩ ⲛⲧⲡⲁⲣⲣⲟⲩⲥⲓⲁ ⲙⲡⲉⲛϫⲟⲉⲓⲥ ⲓⲏⲥⲟⲩⲥ · ⲡⲉⲭⲣⲓⲥⲧⲟⲥ ·
…
218 ⲉⲓⲥϩⲏⲏⲧⲉ ⲁⲛⲁⲣⲭⲉⲓ ⲙⲁⲣⲛϫⲱⲕ ⲉⲃⲟⲗ ⲙⲡⲉⲛⲁⲓⲧⲏⲙⲁ ·
…
219 ⲡⲉϫⲁϥ ⲛⲁⲥ ⲛϭⲓⲡⲉⲥϩⲁⲓ ϫⲉⲟⲩ ⲡⲉⲧϣⲱϫⲡ ⲛⲁⲛ ⲧⲁⲥⲱⲛⲉ ·
…
220 ϫⲉⲕⲁⲥ ⲛⲛⲁⲉⲓⲙⲉ ϫⲉϥⲛⲁⲣⲱϣⲉ ⲉⲧⲉⲛⲭⲣⲉⲓⲁ ϫⲓⲛⲙⲙⲟⲛ ·
…
221 ⲡⲉϫⲁⲥ ⲛⲁϥ ϫⲉⲡⲁⲥⲟⲛ ·
…
222 ⲟⲩⲛϩⲉⲛⲕⲟⲩⲓ ⲛⲕⲗⲁⲥⲙⲁ ⲛⲟⲉⲓⲕ ϣⲱϫⲏ ⲛⲁⲛ ⲛⲁⲡϣⲓ ⲛⲕⲱ ϩⲁⲣⲱⲟⲩ ⲛⲛⲉⲥⲛⲏⲩ ⲛⲥⲉⲟⲩⲱⲙ ·
…
223 ⲁⲩⲱ ⲟⲩⲕⲟⲩⲓ ⲛⲛⲉϩ ϩⲙⲡⲗⲁⲕⲱⲛ ϣⲁϥⲣⲱϣⲉ ⲉⲣⲟⲛ · ϩⲛⲧⲥⲩⲛⲁⲝⲓⲥ ⲙⲛⲧⲁⲡⲉ ⲛⲛⲣⲱⲙⲉ · ⲁⲗⲗⲁ ⲙⲛⲟⲉⲓⲕ ϣⲟⲟⲡ ·
…
224 ⲟⲩⲇⲉ ⲥⲟⲩⲟ ·
…
225 ⲡⲉϫⲁϥ ϩⲱⲱϥ ⲛϭⲓⲡⲉⲥϩⲁⲓ ϫⲉϩⲛⲟⲩⲙⲉ ⲧⲁⲥⲱⲛⲉ ·
…
226 ⲉϣϫⲉ ⲛⲁⲓϣⲟⲟⲡ · ⲉⲓⲉ ⲙⲛⲟⲩⲉⲥⲟⲟⲩ ϣⲟⲟⲡ ⲛⲁⲛ · ⲛⲧⲛⲕⲟⲛⲥϥ ·
…
227 ⲁⲗⲗⲁ ⲡⲟⲩⲱϣ ⲉⲙⲡϫⲟⲉⲓⲥ ⲙⲁⲣⲉϥϣⲱⲡⲉ ·
…
228 ⲙⲉⲣⲉⲡⲛⲟⲩⲧⲉ ⲅⲁⲣ ϫⲛⲟⲛ ⲉⲗⲁⲁⲩ · ⲡⲁⲣⲁⲧⲉⲛϭⲟⲙ ·
…
229 ⲁⲩⲱ ⲛⲁⲛⲟⲩⲥ ⲉⲧⲣⲉⲛϯ ⲛⲟⲩⲕⲟⲩⲓ ⲛϩⲟⲩⲟ ⲉⲣⲟⲥ ·
…
230 ⲉⲧⲙⲧⲣⲉⲛϯ ⲛⲟⲩⲕⲟⲩⲓ ⲛϩⲟⲩⲟ ⲉⲣⲟⲥ ⲉⲧⲙⲧⲣⲉⲛϯ ⲉⲡⲧⲏⲣϥ ·
…
231 ⲡⲗⲏⲛ ⲡⲉⲛⲧⲁϥⲉⲓ ⲉⲡⲁϩⲏⲧ ϯⲛⲁⲁϥ ·
…
232 ⲁⲩⲱ ϯⲛⲁϫⲟⲟϥ ⲉⲣⲟ · ⲉⲓⲥⲟⲩϣⲧⲏⲛ ⲛⲥⲩⲛⲁⲅⲉ ·
…
233 ⲁⲥϣⲱϫⲡ ⲛⲁⲛ ⲉⲡⲟⲩⲁ ·
…
234 ϯⲛⲁⲧⲱⲟⲩⲛ ⲧⲁϥⲓⲧⲱⲓ ⲛϣⲟⲣⲡ ⲧⲁⲧⲁⲁⲥ ϩⲁⲡⲉⲥⲟⲩⲟ ⲛⲧⲉⲡⲣⲟⲥⲫⲟⲣⲁ ·
…
235 ⲁⲩⲱ ⲙⲟⲅⲓⲥ ⲛⲧⲉⲧⲉⲥⲧⲓⲙⲏ ⲣⲱϣⲉ ⲉⲡⲗⲁⲟⲥ ·
…
236 ⲉⲃⲟⲗ ϫⲉⲡⲉⲥⲟⲩⲟϫⲁϥ ⲧⲱⲛⲟⲩ ·
…
237 ⲉⲛϣⲁⲛⲡⲱϩ ⲉⲧⲱ · ⲛⲧⲁⲃⲱⲕ ⲧⲁⲛⲁⲩ ϫⲉⲡⲛⲟⲩⲧⲉ ⲛⲁⲧⲱϣ ⲛⲁⲛ ·
…
238 ⲛⲟⲩⲉⲥⲟⲟⲩ ⲧⲁⲧⲁⲁⲥ ϩⲁⲣⲟϥ · ⲛⲧⲛⲕⲟⲛⲥϥ ⲉⲡϣⲁ ·
…
239 ⲁⲩⲱ ⲉⲛϣⲁⲛⲣⲡϣⲁ ⲙⲡⲁⲣⲭⲁⲅⲅⲉⲗⲟⲥ ⲛⲣⲁⲥⲧⲉ ⲕⲁⲗⲱⲥ · ϫⲉⲡⲁⲓ ⲡⲉ ⲡⲉϥⲛⲟϭ ⲛϣⲁ ·
…
240 ⲉⲛϣⲁⲛϭⲓⲛⲉ ⲟⲛ ⲧⲛⲛⲁⲟⲩⲱⲙ · ⲛⲧⲙϭⲓⲛⲉ ⲟⲛ ⲡⲧⲱϣ ⲙⲡϫⲟⲉⲓⲥ ⲡⲉ ·
…
241 ⲡⲉϫⲁⲥ ⲛϭⲓⲧⲉⲥϩⲓⲙⲉ ⲛⲥⲁⲃⲏ ·
…
242 ⲁⲩⲱ ⲛⲣⲉϥϯⲥⲃⲱ · ϫⲉⲡⲁϫⲟⲉⲓⲥ ⲛⲥⲟⲛⲟⲩ ⲙⲟⲛⲟⲛ ϫⲉⲧⲁϣⲧⲏⲛ ⲙⲛⲧⲱⲕ ⲙⲙⲁⲧⲉ ·
…
243 ⲁⲗⲗⲁ ϯⲛⲁϯ ⲛⲧⲁⲯⲩⲭⲏ ϩⲁⲧⲉⲑⲩⲥⲓⲁ ⲙⲡⲁϫⲟⲉⲓⲥ ⲡⲁⲣⲭⲁⲅⲅⲉⲗⲟⲥ ·
…
244 ⲡⲉϫⲁϥ ⲛⲁⲥ ⲛϭⲓⲡⲉⲥϩⲁⲓ ϫⲉⲕⲁⲗⲱⲥ ⲧⲁⲥⲱⲛⲉ ⲟⲩⲡⲣⲟϩⲩⲣⲉⲥⲓⲥ ⲉⲛⲁⲛⲟⲩⲥ ⲧⲛⲧⲁⲣⲟⲩⲟⲛϩⲥ ⲉⲃⲟⲗ ·
…
245 ⲉϩⲟⲩⲛ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲓⲭⲁⲏⲗ ·
…