1 ⲧⲉ ⲛϩⲁϩ ⲛⲗⲁⲟⲥ ⲛϣⲙⲙⲟ ⲉⲡⲛⲟⲩⲧⲉ ϩⲛϩⲉⲛϫⲱϩⲙ ⲙⲛϩⲉⲛⲥⲱⲱϥ ⲙⲛϩⲉⲛϫⲓⲟⲩⲉ ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ⲧⲁⲓ ⲧⲉ ⲧϩⲉ ϩⲣⲁⲓ ϩⲛⲛⲉⲟⲩⲟⲉⲓϣ ⲛϩⲁⲉ ⲡⲉⲧⲛⲁⲟⲩⲱϣ ⲉⲣⲇⲓⲕⲁⲟⲥ ϩⲣⲁⲓ ϩⲛⲛⲉⲧⲟⲩⲏϩ ϩⲙⲡⲉⲓⲙⲁ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲩⲁⲛⲁⲅⲕⲁⲍⲉ ⲙⲙⲟⲟⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲉⲣⲡⲓⲥⲧⲟⲥ ϩⲛⲧⲙⲏⲧⲉ ⲛϩⲁϩ ⲛⲗⲁⲟⲥ ⲛϣⲙⲙⲟ ⲉⲡⲛⲟⲩⲧⲉ ϩⲛϩⲉⲛⲥⲱⲱϥ ⲙⲛϩⲉⲛⲕⲣⲟϥ ⲙⲛⲁⲛⲟⲙⲓⲁ ⲛⲓⲙ .
…
2 ⲁⲩⲱ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲡϫⲓⲟⲩⲉ ⲙⲛⲡϭⲟⲗ ⲙⲛⲛⲥⲱⲃⲉ ⲙⲛⲡϫⲏⲣ ⲙⲛⲛⲥⲕⲟⲡⲧⲉⲓ ⲙⲙⲟⲟⲩ ⲙⲁⲩⲁⲁⲩ ⲙⲛⲛⲕⲁⲧⲁⲗⲁⲗⲓⲁ ⲙⲛⲛⲕⲣⲙⲣⲙ ⲙⲛⲛⲙⲛⲧⲙⲁⲓⲧⲟ ⲛϩⲟⲩⲟ ⲙⲛⲛⲙⲛⲧⲣⲉϥϫⲓϩⲟ ⲙⲛⲛⲙⲛⲧⲁⲧⲥⲉⲓ ⲙⲛⲛⲙⲛⲧϣⲟⲩϣⲟ ⲙⲛⲛⲙⲛⲧⲣⲉϥϫⲓⲟⲩⲁ ϩⲛϩⲉⲛϣⲁϫⲉ ⲛⲁⲣⲅⲟⲛ ⲙⲛϩⲉⲛⲙⲓϣⲉ ⲙⲛϩⲉⲛϯⲧⲱⲛ ⲙⲛϩⲉⲛⲙⲟⲥⲧⲉ ⲙⲛϩⲉⲛⲕⲱϩ ⲙⲛϩⲉⲛⲙⲛⲧϫⲁϫⲉ ⲙⲛϩⲉⲛϣⲱϫⲉ ⲙⲛⲛⲉⲩⲉⲣⲏⲩ ⲙⲛϩⲉⲛⲙⲛⲧⲥⲟϭ ⲙⲛϩⲉⲛⲙⲛⲧⲁⲧⲥⲃⲱ ⲁⲩⲱ ⲛⲁⲓ ⲙⲛϩⲉⲛⲕⲟⲟⲩⲉ ⲉⲛⲁϣⲱⲟⲩ ⲛⲥⲉⲛⲁⲟⲡⲟⲩ ⲁⲛ ϭⲉ ϫⲉϩⲉⲛⲛⲟⲃⲉ ⲛⲉ ⲛϭⲓⲛⲁⲥⲉⲃⲏⲥ ⲉⲧⲛⲁϣⲱⲡⲉ ϩⲣⲁⲓ ⲛϩⲏⲧⲛ ϩⲛⲡⲕⲁⲓⲣⲟⲥ ⲉⲧⲙⲙⲁⲩ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ .
…
3 ⲁⲩⲱ ⲉⲧⲃⲉ ⲡⲁϣⲁⲓ ⲛⲛⲉⲩⲡⲉⲧϩⲟⲟⲩ ⲛⲥⲉⲛⲁⲉⲓⲙⲉ ⲁⲛ ϫⲉⲛϣⲏⲣⲉ ⲉⲛⲧⲁⲩϫⲱϩⲙ ⲥⲉⲟ ⲛϣⲙⲙⲟ ⲉⲡⲛⲟⲩⲧⲉ ⲕⲁⲧⲁⲛⲉⲅⲣⲁⲫⲏ .
…
4 ⲉⲧⲃⲉⲡⲁⲓ ⲧⲡⲟⲣⲛⲉⲓⲁ ⲙⲡⲉⲩϩⲏⲧ ⲛⲁⲣϩⲟⲩⲟ ⲉⲧⲡⲟⲣⲛⲉⲓⲁ ⲙⲡⲉⲩⲧⲟⲡ ⲁⲩⲱ ⲧⲡⲟⲣⲛⲉⲓⲁ ⲙⲡⲉⲩⲧⲟⲡ ⲛⲁⲣϩⲟⲩⲟ ⲉⲧⲡⲟⲣⲛⲉⲓⲁ ⲙⲡⲉⲩϩⲏⲧ ⲁⲩⲱ ⲡⲉⲓⲥⲛⲁⲩ ⲛⲁⲧⲱⲟⲩⲛ ⲉϩⲣⲁⲓ ⲉϫⲱⲟⲩ ⲉⲩⲙⲟϫϭ ϩⲛϩⲉⲛⲟⲩⲱⲙ ⲙⲛϩⲉⲛⲥⲱ ⲙⲛϩⲉⲛⲙⲏⲏϣⲉ ⲛⲧⲣⲩⲫⲏ ⲙⲁⲗⲓⲥⲧⲁ ⲉⲩⲣϩⲟⲩⲟ ϩⲛⲧⲙⲛⲧⲁⲣⲅⲟⲥ ⲙⲛⲡⲥⲣϥⲉ ⲁⲩⲱ ⲉⲩⲟⲩⲟⲥϥ ϩⲣⲁⲓ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ⲛⲧⲉⲡⲛⲟⲩⲧⲉ .
…
5 ⲁⲩⲱ ⲉⲃⲟⲗ ϫⲉⲙⲡⲟⲩⲙⲟⲩⲟⲩⲧ ⲛⲛⲉⲩⲙⲉⲗⲟⲥ ⲉⲧϩⲓϫⲙⲡⲕⲁϩ ⲧⲡⲟⲣⲛⲉⲓⲁ ⲧⲁⲕⲁⲑⲁⲣⲥⲓⲁ ⲙⲛⲡⲟⲩⲱⲥϥ ⲙⲛⲛⲕⲟⲟⲩⲉ ⲧⲏⲣⲟⲩ ⲡⲥⲁⲧⲁⲛⲁⲥ ⲛⲁⲧⲱⲟⲩⲛ ⲉϩⲣⲁⲓⲉ ⲉϫⲱⲟⲩ ϩⲛⲛⲉϥⲉⲛⲉⲣⲅⲉⲓⲁ ⲧⲏⲣⲟⲩ ⲛϫⲱϩⲙ ⲛⲁⲓ ⲉⲧⲛⲡⲏⲧ ⲛⲥⲱⲟⲩ ⲉⲃⲟⲗϩⲛⲛⲥⲩⲛⲁⲅⲱⲅⲏ ⲧⲏⲣⲟⲩ ⲁⲩⲱ ⲉⲃⲟⲗⲛϩⲏⲧⲟⲩ ⲁⲩⲱ ⲥⲉⲛⲁⲉⲓⲣⲉ ⲛϩⲉⲛⲡⲟⲣⲛⲉⲓⲁ ⲙⲛϩⲉⲛϫⲱϩⲙ ⲙⲛϩⲉⲛⲥⲱⲱϥ ⲙⲛϩⲉⲛⲕⲣⲟϥ ⲉⲛⲁϣⲱⲟⲩ ⲉⲃⲟⲗ ϩⲓⲧⲙⲡⲥⲁⲧⲁⲛⲁⲥ ⲙⲛⲛⲉϥⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲉⲧⲥⲩⲙⲃⲟⲩⲗⲉⲩⲉ ⲛⲙⲙⲁⲓ ⲡⲉⲧϩⲟⲟⲩ ⲉⲧⲛⲁϣⲱⲡⲉ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ .
…
6 ⲁⲩⲱ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲧⲇⲓⲕⲁⲓⲟⲥⲩⲛⲏ ⲙⲛⲧⲙⲉ ⲙⲛⲥⲡⲟⲩⲇⲏ ⲛⲓⲙ ⲛⲁϩⲟⲡⲟⲩ ⲉⲛⲁⲕⲁⲑⲁⲣⲧⲟⲥ ⲉⲧⲙⲙⲁⲩ ⲛⲧⲉⲡϭⲟⲗ ⲙⲛⲧⲁⲙⲉⲗⲉⲓⲁ ⲡⲁⲣⲣⲏⲥⲓⲁⲍⲉ ⲙⲙⲟⲟⲩ ⲉϩⲣⲁⲓ ⲉϫⲱⲟⲩ
…
7 ⲁⲩⲱ ⲛⲉⲩⲛⲁϩⲟⲡⲟⲩ ⲁⲛ ⲛϭⲓⲧⲇⲓⲕⲁⲓⲟⲥⲩⲛⲏ ⲙⲛⲧⲙⲉ ⲙⲛⲥⲡⲟⲩⲇⲏ ⲛⲓⲙ ⲉⲙⲡⲓⲥⲧⲟⲥ ⲉⲧⲛⲁϣⲱⲡⲉ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲏ ⲛⲧⲟϥ ⲧⲉⲛⲟⲩ ⲁⲩⲱ ⲟⲛ ϣⲁⲉⲛⲉϩ ⲛⲛⲉⲥϣⲱⲡⲉ
…
8 ⲟⲩⲇⲉ ⲛⲉⲩⲛⲁⲡⲁⲣⲣⲏⲥⲓⲁⲍⲉ ⲙⲙⲟⲟⲩ ⲁⲛ ⲛϭⲓⲧⲁⲛⲟⲙⲓⲁ ⲙⲛⲡϭⲟⲗ ⲙⲛⲁⲙⲉⲗⲉⲓⲁ ⲛⲓⲙ ⲉϩⲣⲁⲓ ⲉϫⲛⲙⲡⲓⲥⲧⲟⲥ ⲉⲧⲛⲁϣⲱⲡⲉ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲏ ⲛⲧⲟϥ ⲧⲉⲛⲟⲩ ⲁⲩⲱ ϣⲁⲉⲛⲉϩ ⲛⲛⲉⲥϣⲱⲡⲉ .
…
9 ⲉⲧⲃⲉⲡⲁⲓ ⲧⲉⲛⲟⲩ ⲛⲧϩⲉ ⲉⲧⲉⲣⲉⲡⲓⲥⲧⲟⲥ ⲛⲓⲙ ϩⲛⲥⲩⲛⲁⲅⲱⲅⲏ ⲛⲓⲙ ⲉⲧϣⲟⲟⲡ ⲕⲁⲧⲁⲡⲉⲛⲃⲓⲟⲥ ⲏ ⲛⲧⲟϥ ⲟⲩⲟⲛ ⲛⲓⲙ ⲉⲧⲟ ⲛϩⲟⲧⲉ ϩⲏⲧϥ ⲙⲡϫⲟⲉⲓⲥ ϩⲙⲙⲁ ⲛⲓⲙ ⲡⲁⲣⲣⲏⲥⲓⲁⲍⲉ ⲙⲙⲟⲟⲩ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ⲙⲛϩⲱⲃ ⲛⲓⲙ ⲛⲁⲅⲁⲑⲟⲛ ⲉⲩϩⲱⲙ ⲉϩⲣⲁⲓ ⲉϫⲛⲁⲛⲟⲙⲓⲁ ⲛⲓⲙ ⲙⲛⲕⲣⲟϥ ⲛⲓⲙ
…
10 ⲧⲁⲓ ⲟⲛ ⲧⲉ ⲧϩⲉ ⲉⲧⲉⲣⲉⲛⲡⲓⲥⲧⲟⲥ ⲉⲧⲛⲁϣⲱⲡⲉ ϩⲙⲡⲕⲁⲓⲣⲟⲥ ⲉⲧⲙⲙⲁⲩ ⲛⲁⲡⲁⲣⲣⲏⲥⲓⲁⲍⲉ ⲙⲙⲟⲟⲩ ϩⲣⲁⲓ ϩⲛⲧⲇⲓⲕⲁⲓⲟⲥⲩⲛⲏ ⲙⲛϩⲱⲃ ⲛⲓⲙ ⲉⲧⲛⲁⲛⲟⲩϥ ϩⲣⲁⲓ ϩⲙⲡⲉⲓⲙⲁ ⲙⲛⲟⲩⲟⲛ ⲛⲓⲙ ϩⲙⲙⲁ ⲛⲓⲙ ⲁⲩⲱ ⲛⲥⲉϩⲱⲙ ⲉϩⲣⲁⲓ ⲉϫⲙ ⲡⲥⲁⲧⲁⲛⲁⲥ ⲙⲛ ⲛⲉϥⲥⲱⲱϥ ⲛⲓⲙ ⲛⲉϥⲁⲕⲁⲑⲁⲣⲥⲓⲁ ⲧⲏⲣⲟⲩ ⲁⲩⲱ ⲙⲛⲇⲓⲁⲃⲟⲗⲟⲥ ⲟⲩⲧⲉ ⲣⲱⲙⲉ ⲛⲣⲉϥⲣⲛⲟⲃⲉ ⲟⲩⲧⲉ ⲗⲁⲁⲩ ⲉⲛⲉϩ ⲛⲁⲛⲟⲙⲓⲁ ⲛⲁϣϭⲙϭⲟⲙ ⲉⲕⲱⲗⲩⲉ ⲙⲙⲟⲟⲩ ⲛⲟⲩⲟⲉⲓϣ ⲛⲓⲙ ⲉⲩⲱϣ ⲉϩⲣⲁⲓ ⲉⲡϫⲟⲉⲓⲥ ϩⲛⲟⲩⲙⲉ .
…
11 ⲁⲗⲗⲁ ⲉⲩⲛⲁϭⲙϭⲟⲙ ⲛⲧⲟϥ ⲉⲙⲁⲧⲉ ⲉϩⲣⲁⲓ ⲉϫⲙⲡⲥⲁⲧⲁⲛⲁⲥ ⲙⲛⲛⲉϥⲕⲉϩⲃⲏⲩⲉ ⲧⲏⲣⲟⲩ ⲉⲧϩⲟⲟⲩ ⲁⲩⲱ ⲛⲥⲉⲟⲩⲱⲛϩ ⲉⲃⲟⲗ ⲛⲇⲓⲕⲁⲓⲟⲥ ⲉⲡⲉϩⲟⲩⲟ ⲛⲛⲉⲩϩⲃⲏⲩⲉ ⲛⲇⲓⲕⲁⲓⲟⲥⲩⲛⲏ ϩⲛⲧⲙⲏⲧⲉ ⲛⲙⲡⲟⲛⲏⲣⲟⲥ ⲉⲧⲛⲁϣⲱⲡⲉ ϩⲙⲡⲕⲁⲓⲣⲟⲥ ⲉⲧⲙⲙⲁⲩ ⲛⲧϩⲉ ⲛⲁⲃⲉⲗ ⲉⲛⲧⲁϥϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ϩⲛⲧⲙⲏⲧⲉ ⲛⲕⲁⲓⲛ ⲡⲁⲥⲉⲃⲏⲥ ⲛⲁⲙⲉ ⲉⲃⲟⲗ ⲟⲩⲧⲉ ⲣⲱⲙⲉ ⲛⲓⲙ
…
12 ⲁⲩⲱ ⲛⲧϩⲉ ⲛⲉⲛⲱⲭ ⲙⲛⲛⲱϩⲉ ⲙⲛⲛⲕⲟⲟⲩⲉ ⲧⲏⲣⲟⲩ ⲉⲛⲧⲁⲩϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ϩⲛⲧⲙⲏⲧⲉ ⲛⲛⲁⲓ ⲧⲏⲣⲟⲩ ⲉⲛⲧⲁⲡⲛⲟⲩⲧⲉ ϥⲟⲧⲟⲩ ⲉⲃⲟⲗ ϩⲓϫⲙⲡⲕⲁϩ ϩⲛⲟⲩⲕⲁⲧⲁⲕⲗⲩⲥⲙⲟⲥ ⲙⲙⲟⲟⲩ ⲉⲛⲁϣⲱϥ
…
13 ⲁⲩⲱ ⲛⲧϩⲉ ⲛⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲉⲛⲧⲁⲩϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ϩⲛⲧⲙⲏⲧⲉ ⲛⲟⲩⲟⲛ ⲛⲓⲙ ⲉⲧⲑⲗⲓⲃⲉ ⲙⲙⲟⲟⲩ
…
14 ⲁⲩⲱ ⲛⲧϩⲉ ⲛⲗⲱⲧ ϩⲛⲧⲙⲏⲧⲉ ⲛⲛⲣⲱⲙⲉ ⲛⲥⲟⲇⲟⲙⲁ ⲙⲛⲅⲟⲙⲟⲣⲣⲁ ⲛⲁⲥⲉⲃⲏⲥ ⲛⲁⲙⲉ ⲁⲩⲱ ⲙⲡⲟⲛⲏⲣⲟⲥ ⲡⲁⲣⲁ ⲣⲱⲙⲉ ⲛⲓⲙ ⲕⲁⲧⲁ ⲛⲉⲅⲣⲁⲫⲏ
…
15 ⲁⲩⲱ ⲛⲧϩⲉ ⲙⲙⲱⲩⲥⲏⲥ ⲙⲛⲁⲁⲣⲱⲛ ⲙⲛ ⲙⲁⲣⲓϩⲁⲙ ⲙⲛⲓⲏⲥⲟⲩⲥ ⲉⲛⲧⲁⲩϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ϩⲛⲧⲙⲏⲧⲉ ⲛⲛⲉⲧⲟ ⲛⲁⲧⲥⲱⲧⲙ ⲙⲛⲛⲉⲧⲕⲣⲙⲣⲙ ⲙⲛⲛⲉⲛⲧⲁⲩⲡⲟⲣⲛⲉⲩⲉ ⲙⲛⲛⲉⲛⲧⲁⲩⲉⲡⲓⲑⲩⲙⲉⲓ ⲉϩⲉⲛⲧⲣⲟⲫⲏ ⲛⲥⲉϩⲁⲧⲏⲩ ⲁⲛ
…
16 ⲁⲩⲱ ⲛⲧϩⲉ ⲛⲛⲉⲕⲣⲓⲧⲏⲥ ⲉⲛⲧⲁⲩϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ⲛⲧⲙⲏⲧⲉ ⲛⲛⲁⲓ ⲧⲏⲣⲟⲩ ⲉⲧⲉϩⲉⲛⲉⲃⲟⲗ ⲛϩⲏⲧⲟⲩ ⲛⲉ ⲛⲁⲓ ⲉⲛⲧⲁⲩⲕⲁⲡⲛⲟⲩⲧⲉ ⲛⲥⲱⲟⲩ ⲁⲩⲟⲩⲁϩⲟⲩ ⲛⲥⲁⲛⲛⲟⲩⲧⲉ ⲛϣⲙⲙⲟ .
…
17 ⲟⲩ ⲙⲟⲛⲟⲛ ⲇⲉ ϫⲉⲁⲩⲣⲁⲛⲁϥ ⲙⲡⲛⲟⲩⲧⲉ ⲛϭⲓⲛⲣⲱⲙⲉ ⲉⲧⲟⲩⲁⲁⲃ ϩⲛⲧⲙⲏⲧⲉ ⲛⲛⲉⲃⲟⲗ ⲙⲙⲟⲟⲩ ⲉⲛⲧⲁⲩϣⲱⲡⲉ ⲛⲁⲥⲉⲃⲏⲥ ⲁⲗⲗⲁ ⲁⲩϣⲱⲡⲉ ⲟⲛ ⲛⲭⲣⲏⲥⲧⲟⲥ ⲁⲩⲱ ⲙⲡⲓⲥⲧⲟⲥ ϩⲛⲟⲩⲙⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛⲧⲙⲏⲧⲉ ⲛⲛϩⲉⲑⲛⲟⲥ ⲉⲧⲉⲛⲥⲉⲥⲟⲟⲩⲛ ⲁⲛ ⲙⲡⲛⲟⲩⲧⲉ .
…
18 ⲛⲉⲡⲣⲟⲫⲏⲧⲏⲥ ⲇⲉ ⲧⲏⲣⲟⲩ ⲙⲛⲛⲁⲡⲟⲥⲧⲟⲗⲟⲥ ⲧⲏⲣⲟⲩ ⲙⲛⲛⲉⲧⲟⲩⲁⲁⲃ ⲧⲏⲣⲟⲩ ⲙⲛⲟⲩⲟⲛ ⲛⲓⲙ ⲉⲧⲟ ⲛϩⲟⲧⲉ ϩⲏⲧϥ ⲙⲡϫⲟⲉⲓⲥ ϫⲓⲛⲛϣⲟⲣⲡ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁⲩϣⲱⲡⲉ ⲛⲇⲓⲕⲁⲓⲟⲥ ϩⲛⲇⲓⲕⲁⲓⲟⲥⲩⲛⲏ ⲛⲓⲙ ϩⲛⲧⲙⲏⲧⲉ ⲛⲛⲉⲧⲟ ⲛⲁⲧⲛⲟⲩⲧⲉ ⲁ ⲁⲩⲱ ⲛϣⲁϥⲧⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ϫⲓⲛⲧⲉϩⲟⲩⲉⲓⲧⲉ ϣⲁϩⲣⲁⲓ ⲉⲧⲉⲛⲟⲩ .
…
19 ⲛⲁⲓ ⲁⲛϫⲟⲟⲩ ⲛⲧⲉⲓϩⲉ ϫⲉⲕⲁⲥ ⲉⲛⲉⲉⲓⲙⲉ ϫⲉⲕⲁⲧⲁⲧϩⲉ ⲉⲧⲉⲙⲡⲉⲡⲇⲓⲁⲃⲟⲗⲟⲥ ⲟⲩⲧⲉ ⲟⲩⲟⲛ ⲛⲓⲙ ⲉⲧⲣⲛⲟⲃⲉ ⲉϣϭⲙϭⲟⲙ ⲉⲕⲱⲗⲩⲉ ⲛⲗⲁⲁⲩ ⲛⲣⲱⲙⲉ ϫⲓⲛⲛϣⲟⲣⲡ ϣⲁϩⲣⲁⲓ ⲉⲧⲉⲛⲟⲩ
…
20 ⲁⲩⲱ ⲟⲛ ⲛⲛⲉⲩⲉϣⲕⲟⲗⲩⲉ ϣⲁⲉⲛⲉϩ ⲉⲃⲟⲗ ϫⲉⲓⲏⲥⲟⲩⲥ ⲛⲧⲟϥ ⲛⲥⲁϥ ⲡⲉ ⲛⲧⲟϥ ⲟⲛ ⲙⲡϩⲟⲟⲩ ⲁⲩⲱ ⲟⲛ ϣⲁⲉⲛⲉϩ
…
21 ⲟⲩⲟⲛ ⲇⲉ ⲛⲓⲙ ⲉⲧⲛⲁⲟⲩⲱϣ ⲉϫⲱⲕ ⲉⲃⲟⲗ ⲛⲇⲓⲕⲁⲓⲟⲥⲩⲛⲏ ⲛⲓⲙ ϣⲁⲩⲟⲩⲁϩⲟⲩ ⲛⲥⲁⲛⲉⲩⲟⲩⲱϣ ⲛϩⲏⲧ ⲉⲧⲛⲁⲛⲟⲩⲟⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲁⲩⲱ ⲟⲩⲟⲛ ⲛⲓⲙ ⲉⲧⲟⲩⲱϣ ⲉϫⲱⲕ ⲉⲃⲟⲗ ⲛⲛⲉⲩϩⲃⲏⲩⲉ ⲙⲡⲟⲛⲏⲣⲟⲛ ⲛⲟⲩⲟⲉⲓϣ ⲛⲓⲙ ⲉϣⲁⲩⲟⲩⲁϩⲟⲩ ⲛⲥⲁⲛⲉⲩⲟⲩⲱϣ ⲛϩⲏⲧ ⲉⲧϩⲟⲟⲩ ⲉⲃⲟⲗ ϩⲓⲧⲙⲡⲥⲁⲧⲁⲛⲁⲥ
…
22 ⲁⲗⲗⲁ ⲛⲧϩⲉ ⲛⲧⲟϥ ⲉⲛⲧⲁⲩϩⲟϫϩϫ ⲛϭⲓⲛⲉⲧⲟⲩⲁⲁⲃ ⲧⲏⲣⲟⲩ ϩⲛⲧⲙⲏⲧⲉ ⲛⲛⲁⲥⲉⲃⲏⲥ ⲉⲛⲧⲁⲩϣⲱⲡⲉ ϫⲓⲛⲛϣⲟⲣⲡ
…
23 ⲧⲁⲓ ⲟⲛ ⲧⲉ ⲧϩⲉ ⲉⲧⲟⲩⲛⲁϩⲟϫϩϫ ⲛϭⲓⲛⲇⲓⲕⲁⲓⲟⲥ ϩⲛⲧⲙⲏⲧⲉ ⲛⲁⲥⲉⲃⲏⲥ ⲛⲓⲙ ϩⲣⲁⲓ ϩⲛⲥⲩⲛⲁⲅⲱⲅⲏ ⲛⲓⲙ ⲉⲛⲧⲁⲩϣⲱⲡⲉ ⲕⲁⲧⲁⲡⲉⲛⲃⲓⲟⲥ ⲁⲩⲱ ϩⲙⲙⲁ ⲛⲓⲙ ⲉⲟⲩⲣⲛⲟⲃⲉ ⲛϩⲏⲧⲟⲩ ϩⲓϫⲙⲡⲕⲁϩ ⲧⲏⲣϥ
…
24 ⲁⲩⲱ ⲧⲁⲓ ⲟⲛ ⲧⲉ ⲧϩⲉ ⲉⲧⲟⲩⲛⲁϩⲟϫϩϫ ⲉⲙⲁⲧⲉ ⲛϭⲓⲙⲡⲓⲥⲧⲟⲥ ⲉⲧⲛⲁϣⲱⲡⲉ ϩⲣⲁⲓ ⲛϩⲏⲧⲛ ϩⲙⲡⲉⲟⲩⲟⲉⲓϣ ⲛϩⲁⲉ .
…
25 ⲁⲩⲱ ⲛⲧϩⲉ ⲉⲧⲉⲣⲉ ⲡϣⲁϫⲉ ⲙⲡⲉⲡⲣⲟⲫⲏⲧⲏⲥ ϫⲏⲕ ⲉⲃⲟⲗ ϩⲛⲡⲓⲟⲩⲟⲉⲓϣ ⲧⲉⲛⲟⲩ ⲉϩⲣⲁⲓ ⲉϫⲛⲥⲩⲛⲁⲅⲱⲅⲏ ⲛⲓⲙ ⲉⲧϣⲟⲟⲡ ⲕⲁⲧⲁⲡⲉⲛⲃⲓⲟⲥ ⲉⲧⲃⲉⲛⲉⲧⲣⲛⲟⲃⲉ ϩⲣⲁⲓ ⲛϩⲏⲧⲟⲩ ϫⲉⲛⲁϣ ⲛϩⲉ ⲁⲣⲕⲧⲟ ⲉⲩⲥⲓϣⲉ ⲧⲃⲱ ⲛⲉⲗⲟⲟⲗⲉ ⲉⲛⲧⲁⲥⲣϣⲙⲙⲱ ⲉⲡⲛⲟⲩⲧⲉ ϩⲛⲛⲉⲥϫⲱϩⲙ ⲙⲛⲛⲉⲥⲃⲟⲧⲉ ⲧⲏⲣⲟⲩ
…
26 ⲧⲁⲓ ⲟⲛ ⲧⲉ ⲧϩⲉ ϩⲙⲡⲉⲟⲩⲟⲉⲓϣ ⲛϩⲁⲉ ⲡϣⲁϫⲉ ⲙⲡⲉⲡⲣⲟⲫⲏⲧⲏⲥ ⲛⲁϫⲱⲕ ⲉⲃⲟⲗ ⲉϫⲛⲛⲉⲧⲟⲩⲏϩ ϩⲙⲡⲉⲓⲙⲁ ⲉⲧⲃⲉⲛⲉⲧⲛⲁⲣⲛⲟⲃⲉ ϩⲣⲁⲓ ⲛϩⲏⲧⲟⲩ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲁϥⲙⲟⲩⲧⲉ ⲉⲡⲟⲩⲣⲁⲛ ϫⲉⲧⲃⲱ ⲛϫⲟⲉⲓⲧ ⲉⲛⲉⲥⲱⲥ ⲉⲛⲁⲩ ⲉⲣⲟⲥ ⲉⲧⲟ ⲛϩⲁⲓⲃⲉⲥ ⲙⲡⲉϩⲣⲟⲟⲩ ⲙⲡⲉⲥϫⲱⲗϩ ⲧⲉⲛⲟⲩ ϩⲱⲱϥ ⲁⲩⲕⲱϩⲧ ⲙⲟⲩϩ ⲉϩⲣⲁⲓ ⲉϫⲱⲥ
…
27 ⲟⲩⲛⲟϭ ⲧⲉ ⲧⲉⲑⲗⲓⲯⲓⲥ ⲉⲧϩⲓϫⲱ
…
28 ⲁⲩⲣⲁⲧϣⲁⲩ ⲛϭⲓⲛⲉⲥⲕⲗⲁⲧⲟⲥ ϫⲓⲛⲛϣⲟⲣⲡ ⲅⲁⲣ ϣⲁϩⲣⲁⲓ ⲉⲧⲉⲛⲟⲩ ⲁⲩⲱ ϣⲁⲉⲛⲉϩ .
…
29 ⲟⲩⲟⲛ ⲛⲓⲙ ⲉⲧⲣⲛⲟⲃⲉ ϩⲙⲙⲁ ⲛⲓⲙ ϩⲙⲡⲕⲁϩ ⲧⲏⲣϥ ϣⲁⲩϫⲱⲕ ⲉⲃⲟⲗ ⲉϩⲣⲁⲓ ⲉϫⲱⲟⲩ ⲛϭⲓⲛϣⲁϫⲉ ⲛⲛⲉⲡⲣⲟⲫⲏⲧⲏⲥ ⲉⲩϫⲱ ⲙⲙⲟⲥ ϫⲉϯⲛⲁϫⲱ ⲉⲡⲙⲉⲣⲓⲧ ⲡⲁⲙⲁ ⲛⲉⲗⲟⲟⲗⲉ ⲛⲟⲩϫⲱ ⲙⲙⲉⲣⲓⲧ ⲁⲩⲱ ⲙⲛⲛⲥⲁⲛϣⲁϫⲉ ⲧⲏⲣⲟⲩ ⲉⲛⲧⲁϥϫⲟⲟⲩ ⲉⲧⲛⲏⲩ ⲙⲛⲛⲥⲁⲛⲁⲓ ϣⲁϥϫⲟⲟⲥ ϫⲉⲁⲓϭⲱ ϫⲉⲉϥⲉⲧⲁⲩⲉ ⲉⲗⲟⲟⲗⲉ ⲉⲃⲟⲗ ⲁϥⲧⲁⲩⲉ ϣⲟⲛⲧⲉ .
…
30 ⲡⲕⲉⲥⲉⲉⲡⲉ ⲇⲉ ⲛⲛⲉⲓϣⲁϫⲉ ⲉⲓⲥϩⲏⲏⲛⲉ ⲥⲉϩ ⲛⲛⲉⲭⲁⲣⲧⲏⲥ ⲉⲧⲥⲏϩ ϫⲓⲛⲛϣⲟⲣⲡ .
…
31 ⲛⲧϩⲉ ⲇⲉ ϩⲱⲱϥ ⲛⲟⲩⲣⲣⲟ ⲛⲇⲓⲕⲁⲓⲟⲥ ⲉϥⲧⲏⲧ ⲛϩⲏⲧ ⲙⲛⲛⲉⲧⲉⲛⲟⲩϥ ⲛⲉ ⲉϥϣⲟⲟⲡ ϩⲛⲧⲉⲩⲙⲏⲧⲉ ⲛⲟⲩⲟⲉⲓϣ ⲛⲓⲙ
…
32 ⲁⲩⲱ ϩⲟⲧⲁⲛ ⲉⲩϣⲁⲛⲉⲓ ⲛϭⲓⲛⲉⲩϫⲁϫⲉ ⲉⲙⲓϣⲉ ⲛⲙⲙⲁⲩ ⲙⲛⲛⲉⲧⲏⲡ ⲧⲏⲣⲟⲩ ⲉⲡⲣⲣⲟ ⲁⲩⲱ ⲛⲧⲟⲟⲩ ϣⲁⲩⲧⲱⲟⲩⲛ ⲉϩⲣⲁⲓ ⲉϫⲛⲛⲉⲩϫⲁϫⲉ ⲛⲥⲉⲧⲁϩⲟⲟⲩ ⲁⲩⲱ ⲙⲉⲩⲕⲧⲟⲟⲩ ⲉⲙⲡⲟⲩⲟϫⲛⲟⲩ
…
33 ⲧⲁⲓ ⲟⲛ ⲧⲉ ⲧϩⲉ ⲉⲣϣⲁⲛ ⲟⲩⲟⲛ ⲛⲓⲙ ⲛⲟⲩⲟⲉⲓϣ ⲛⲓⲙ ϩⲁⲣⲉϩ ⲉⲛⲉⲛⲧⲟⲗⲏ ⲙⲡϫⲟⲉⲓⲥ ϩⲣⲁⲓ ϩⲛⲥⲩⲛⲁⲅⲱⲅⲏ ⲛⲓⲙ ϩⲙⲙⲁ ⲛⲓⲙ ϩⲙⲡⲕⲁϩ ⲧⲏⲣϥ ϣⲁⲣⲉⲡⲛⲟⲩⲧⲉ ϣⲱⲡⲉ ⲛⲙⲙⲁⲩ
…
34 ⲁⲩⲱ ϩⲟⲧⲁⲛ ⲉⲣϣⲁⲛⲡⲥⲁⲧⲁⲛⲁⲥ ⲧⲱⲟⲩⲛ ⲉϩⲣⲁⲓ ⲉϫⲱⲟⲩ ⲉⲡⲟⲗⲉⲙⲉⲓ ⲛⲙⲙⲁⲩ ϣⲁⲩⲉⲡⲓⲕⲁⲗⲉⲓ ⲙⲡⲣⲁⲛ ⲙⲡⲣⲣⲟ ⲙⲡⲉⲟⲟⲩ ⲓⲏⲥⲟⲩⲥ ⲡϫⲟⲉⲓⲥ ⲡⲇⲩⲛⲁⲧⲟⲥ ⲉⲧⲧⲁϫⲣⲏⲩ ⲡϫⲟⲉⲓⲥ ⲉⲧⲉⲟⲩⲛϭⲟⲙ ⲙⲙⲟϥ ϩⲙⲡⲡⲟⲗⲉⲙⲟⲥ ⲁⲩⲱ ϣⲁϥⲧⲛⲛⲟⲟⲩ ⲛⲁⲩ ⲛⲟⲩⲃⲟⲏⲑⲉⲓⲁ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉϥⲁⲅⲅⲉⲗⲟⲥ ⲉⲧⲟⲩⲁⲁⲃ ⲁⲩⲱ ϣⲁⲩⲡⲱⲧ ⲛⲥⲁⲛϫⲁϫⲉ ⲛⲇⲁⲓⲙⲱⲛ ⲛϭⲓⲟⲩⲟⲛ ⲛⲓⲙ ⲉⲧⲉⲣⲉⲡϫⲟⲉⲓⲥ ϣⲟⲟⲡ ⲛⲙⲙⲁⲩ ⲁⲩⲱ ⲙⲉⲩⲕⲧⲟⲟⲩ ⲉⲙⲡⲟⲩϥⲱⲧⲉ ⲉⲃⲟⲗ ⲙⲡⲥⲁⲧⲁⲛⲁⲥ ⲙⲛⲛⲉϥⲕⲉϩⲃⲏⲩⲉ ⲧⲏⲣⲟⲩ ⲙⲡⲟⲛⲏⲣⲟⲛ .
…
35 ⲉⲧⲃⲉⲡⲁⲓ ⲛⲧϩⲉ ⲉⲛⲧⲁⲛⲉⲛⲉⲓⲟⲧⲉ ⲧⲏⲣⲟⲩ ⲉⲧⲟⲩⲁⲁⲃ ϫⲓⲛⲁⲃⲉⲗ ⲡⲇⲓⲕⲁⲓⲟⲥ ϣⲁϩⲣⲁⲓ ⲉⲡϩⲟⲟⲩ ⲡⲱⲧ ⲛⲥⲁⲡⲥⲁⲧⲁⲛⲁⲥ ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ⲉⲃⲟⲗ ⲛϩⲏⲧⲟⲩ ⲙⲙⲓⲛⲙⲙⲟⲟⲩ ⲙⲛⲛⲉⲩⲥⲩⲛⲁⲅⲱⲅⲏ ⲙⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲙⲛⲛⲉⲩⲥⲛⲏⲩ ⲙⲛⲛⲉⲩϣⲃⲉⲉⲣ ⲙⲛⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲉⲁⲩϫⲓⲥⲃⲱ ⲁⲩⲱ ⲉⲁⲩⲥⲱⲧⲙ ⲛⲥⲱⲟⲩ ϩⲛϩⲱⲃ ⲛⲓⲙ
…
36 ⲧⲁⲓ ⲟⲛ ⲧⲉ ⲧϩⲉ ⲧⲉⲛⲟⲩ ⲁⲩⲱ ϣⲁⲉⲛⲉϩ ⲟⲩⲟⲛ ⲛⲓⲙ ⲉⲧⲛⲁϩⲁⲣⲉϩ ⲉⲛⲉⲛⲧⲟⲗⲏ ⲙⲡⲛⲟⲩⲧⲉ ⲛⲥⲁⲧⲁⲛⲁⲥ ⲙⲛⲛⲉⲩⲕⲉϩⲃⲏⲩⲉ ⲧⲏⲣⲟⲩ ϣⲁⲩⲡⲱⲧ ⲛⲥⲱⲟⲩ ⲉⲃⲟⲗ ⲛϩⲏⲧⲟⲩ ⲙⲙⲓⲛⲙⲙⲟⲟⲩ ⲛⲧϩⲉ ⲛⲛⲉⲧⲡⲏⲧ ⲛⲥⲁϩⲉⲛⲗⲏⲥⲧⲏⲥ ⲉⲩⲟⲩⲱϣ ⲉⲥⲩⲗⲁ ⲛϩⲉⲛⲏⲓ ⲉⲩⲙⲉϩ ⲛϩⲁⲧ ϩⲓⲛⲟⲩⲃ ⲁⲩⲱ ϣⲁⲩⲡⲱⲧ ⲛⲥⲱⲟⲩ ϩⲣⲁⲓ ϩⲛⲛⲉⲩⲥⲩⲛⲁⲅⲱⲅⲏ ⲛⲧϩⲉ ⲛⲛⲉⲧⲡⲏⲧ ⲛⲥⲁϩⲉⲛⲑⲏⲣⲓⲟⲛ ⲉⲩⲟⲩⲱϣ ⲉⲧⲱⲣⲡ ⲁⲩⲱ ⲉϫⲱⲱⲣⲉ ⲉⲃⲟⲗ ⲛⲛⲉⲥⲟⲟⲩ ⲙⲡⲟϩⲉ
…
37 ⲁⲩⲱ ϣⲁⲩⲡⲱⲧ ⲛⲥⲱⲟⲩ ⲉⲃⲟⲗ ϩⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲙⲛⲛⲉⲩϣⲃⲉⲉⲣ ⲛⲧϩⲉ ⲛⲛⲉⲧⲡⲏⲧ ⲛⲥⲁϩⲉⲛⲃⲁϣⲟⲣ ⲉⲩⲟⲩⲱϣ ⲉⲧⲁⲕⲟ ⲛϩⲉⲛⲙⲁ ⲛⲉⲗⲟⲟⲗⲉ ⲉⲛⲁⲛⲟⲩⲟⲩ ⲉⲙⲁⲧⲉ ⲕⲁⲧⲁⲛⲉⲅⲣⲁⲫⲏ ϫⲉϭⲱⲡⲉ ⲛⲁⲓ ⲛϩⲉⲛⲃⲁϣⲟⲣ ⲕⲟⲩⲓ ⲉⲩⲧⲁⲕⲟ ⲛⲙⲙⲁ ⲛⲉⲗⲟⲟⲗⲉ .
…
38 ⲁⲩⲱ ⲛⲧⲉⲓϩⲉ ⲟⲛ ϣⲁⲩⲡⲱⲧ ⲛⲥⲱⲟⲩ ⲉⲃⲟⲗ ϩⲛⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲉⲧϫⲓ ⲛⲧⲉⲩⲥⲃⲱ ⲁⲩⲱ ⲉⲧϩⲁⲣⲉϩ ⲉⲛⲉⲩϣⲁϫⲉ .
…
39 ⲁⲩⲱ ⲉⲣϣⲁⲛⲟⲩⲟⲛ ⲛⲓⲙ ⲛⲟⲩⲟⲉⲓϣ ⲛⲓⲙ ⲣⲧⲙⲉ ϩⲙⲡⲉⲧⲟⲩⲉⲓⲣⲉ ⲙⲙⲟϥ ϩⲛϩⲱⲃ ⲛⲓⲙ ⲛⲁⲅⲁⲑⲟⲛ ⲁⲩⲱ ⲛⲥⲉⲧⲙⲣϩⲏⲧ ⲥⲛⲁⲩ ϩⲛⲧⲉⲥⲃⲱ ⲛⲛⲉⲧϯⲥⲃⲱ ⲛⲁⲩ ⲉⲃⲟⲗ ϩⲛⲛⲉⲅⲣⲁⲫⲏ ϩⲛⲧϩⲟⲧⲉ ⲙⲡϫⲟⲉⲓⲥ ⲥⲉⲛⲁⲡⲱⲧ ⲛⲥⲁⲡⲥⲁⲧⲁⲛⲁⲥ ⲙⲛϩⲱⲃ ⲛⲓⲙ ⲉϥϩⲟⲟⲩ ⲛⲥⲉⲛⲉϥⲧⲟⲩ ⲉⲃⲟⲗ ϩⲣⲁⲓ ϩⲛⲧϭⲟⲙ ⲙⲡⲉⲡⲛⲉⲩⲙⲁ ⲙⲡⲛⲟⲩⲧⲉ ⲛⲧϩⲉ ⲛϩⲉⲛϭⲗⲙ ⲉⲣⲉⲟⲩⲧⲏⲩ ⲉϥⲛⲁϣⲧ ϥⲓ ⲙⲙⲟⲟⲩ ⲉⲡⲟⲩⲉ ⲁⲩⲱ ⲉⲧⲉⲙⲛⲣⲱⲙⲉ ⲉⲛⲉϩ ⲛⲁⲣϩⲟⲧⲉ ϩⲏⲧⲟⲩ ⲛϩⲉⲛϫⲏ ⲙⲛϩⲉⲛϣⲟⲉⲓϣ ⲉⲣⲉⲡⲧⲏⲩ ⲑⲗⲟ ⲙⲙⲟⲟⲩ ⲉⲃⲟⲗ ϩⲓϫⲙⲡϩⲟ ⲙⲡⲕⲁϩ ⲧⲏⲣϥ ⲕⲁⲧⲁⲛⲉⲅⲣⲁⲫⲏ
…
40 ⲧⲁⲓ ⲟⲛ ⲧⲉ ⲧϩⲉ ⲛⲟⲩⲟⲉⲓϣ ⲛⲓⲙ ⲁⲩⲱ ϣⲁⲉⲛⲉϩ ⲛⲧⲛⲛⲁⲣϩⲟⲧⲉ ⲁⲛ ⲉⲛⲉϩ ϩⲏⲧⲟⲩ ⲛϩⲉⲛⲧⲃⲁ ⲛⲇⲁⲓⲙⲱⲛ ⲉⲩϯ ⲟⲩⲃⲏⲛ ⲙⲡⲉⲛⲕⲱⲧⲉ ⲕⲁⲧⲁⲧϩⲉ ⲉⲧⲥⲏϩ ⲁⲗⲗⲁ ⲛⲧϩⲉ ⲛⲧⲟϥ ⲉⲛⲧⲁϥϭⲙϭⲟⲙ ⲛϭⲓⲡⲥⲁⲧⲁⲛⲁⲥ ϫⲓⲛⲧⲉϩⲟⲩⲉⲓⲧⲉ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲉⲧⲃⲉⲛⲉⲩϩⲃⲏⲩⲉ ⲉⲧϩⲟⲟⲩ
…
41 ⲧⲁⲓ ⲟⲛ ⲧⲉ ⲧϩⲉ ⲉⲧⲉ ϣⲁϥϭⲙϭⲟⲙ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲉⲧϫⲱ ⲙⲡϭⲟⲗ ⲁⲩⲱ ⲉⲧⲟ ⲛⲁⲧⲥⲱⲧⲙ ⲛⲥⲁⲛⲉⲧϯⲥⲃⲱ ⲛⲁⲩ ⲉⲃⲟⲗ ϩⲛⲛⲉⲅⲣⲁⲫⲏ ϩⲛⲧϩⲟⲧⲉ ⲙⲡϫⲟⲉⲓⲥ .
…
42 ⲉⲧⲃⲉⲡⲁⲓ ⲉϣϫⲉ ϣⲁⲣⲉⲣⲱⲙⲉ ⲣⲛⲟⲃⲉ ⲉⲩⲥⲟⲡⲥ ⲙⲙⲟⲟⲩ ⲉⲃⲟⲗ ϩⲓⲧⲛϩⲉⲛⲕⲟⲟⲩⲉ ⲉⲧⲙⲣⲛⲟⲃⲉ ⲉⲓⲉ ⲉⲩⲛⲁϫⲱⲕ ⲉⲃⲟⲗ ⲛⲟⲩⲏⲣ ⲛⲁⲛⲟⲙⲓⲁ ⲛϭⲓϩⲉⲛⲣⲱⲙⲉ ⲙⲙⲁⲓⲡⲉⲧϩⲟⲟⲩ ϩⲟⲧⲁⲛ ⲉⲩϣⲁⲛⲃⲱⲕ ⲉⲃⲟⲗ ϩⲓⲧⲟⲟⲧⲟⲩ ⲛϭⲓⲛⲉⲧϩⲱⲛ ⲉⲧⲟⲟⲧⲟⲩ ⲉⲧⲙⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
…
43 ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁϥϫⲟⲟⲥ ⲛϭⲓⲙⲱⲩⲥⲏⲥ ⲉϥⲙⲟⲕϩ ⲛϩⲏⲧ ϫⲉⲉⲧⲓ ⲉⲓϣⲟⲟⲡ ⲛⲙⲙⲏⲧⲛ ⲛⲧⲉⲧⲛϯⲛⲟⲩϭⲥ ⲙⲡⲛⲟⲩⲧⲉ ⲛⲁϣ ⲛⲧⲟϥ ⲛϩⲉ ⲙⲛⲛⲥⲁⲡⲁⲙⲟⲩ ⲛⲧⲉⲧⲛⲁϯⲛⲟⲩϭⲥ ⲛⲁϥ ⲁⲛ ⲛⲧⲟϥ .
…
44 ⲉⲧⲃⲉⲡⲁⲓ ⲛⲟⲩϣⲡⲏⲣⲉ ⲁⲛ ⲧⲉ ϫⲉⲁϩⲟⲓⲛⲉ ⲛϩⲏⲧⲛ ⲣⲛⲟⲃⲉ ⲉⲩⲥⲟⲡⲥ ⲙⲙⲟⲛ ⲛϭⲓⲛⲉⲛⲉⲓⲟⲧⲉ ⲉⲧⲟⲩⲁⲁⲃ ⲉⲛⲧⲁⲩⲛⲕⲟⲧⲕ ⲟⲩⲧⲉ ⲛⲟⲩϣⲡⲏⲣⲉ ⲁⲛ ⲧⲉ ϫⲉⲁⲩⲣⲛⲟⲃⲉ ⲙⲛⲛⲥⲁⲧⲣⲉⲩⲃⲱⲕ ⲉⲃⲟⲗ ϩⲓⲧⲟⲟⲧⲛ ⲛϭⲓⲛⲉⲛⲉⲓⲟⲧⲉ ⲉⲧⲟⲩⲁⲁⲃ ⲛⲧⲁⲩⲛⲕⲟⲧⲕ
…
45 ⲛⲟⲩϣⲡⲏⲣⲉ ⲁⲛ ⲧⲉ ⲉⲩϣⲁⲛⲣⲛⲟⲃⲉ ⲉⲩⲥⲟⲡⲥ ⲙⲙⲟⲛ ⲛϭⲓⲛⲉⲛⲉⲓⲟⲧⲉ ⲉⲧϣⲟⲟⲡ ⲛⲙⲙⲁⲛ ⲧⲉⲛⲟⲩ ⲉⲩⲣⲓⲙⲉ ⲉϩⲟⲩⲛ ⲉⲣⲟⲛ ⲁⲩⲱ ⲉⲩⲡⲁⲣⲁⲕⲁⲗⲉⲓ ⲙⲙⲟⲛ ⲉⲩϩⲱⲛ ⲉⲧⲟⲟⲧⲛ ϩⲛⲟⲩϭⲟⲙ ⲉϩⲁⲣⲉϩ ⲉⲛⲉⲛⲧⲟⲗⲏ ⲁⲩⲱ ⲉⲩⲧⲁⲣⲕⲟ ⲙⲙⲟⲛ ⲙⲡϫⲟⲉⲓⲥ ⲓⲏⲥⲟⲩⲥ ⲉⲧⲙⲧⲣⲉⲛⲣⲕⲣⲟϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ
…
46 ⲟⲩⲧⲉ ⲛⲟⲩϣⲡⲏⲣⲉ ⲇⲉ ⲁⲛ ⲟⲛ ⲧⲉ ⲉⲛϣⲁⲛⲣⲛⲟⲃⲉ ϩⲟⲧⲁⲛ ⲉⲩϣⲁⲛⲃⲱⲕ ⲉⲃⲟⲗ ϩⲓⲧⲟⲟⲧⲛ ⲛϭⲓⲛⲉⲛⲉⲓⲟⲧⲉ ⲉⲧϣⲟⲟⲡ ⲛⲙⲙⲁⲛ ⲧⲉⲛⲟⲩ ⲉⲧⲙⲟⲕϩ ⲛϩⲏⲧ ⲉⲧⲃⲏⲏⲧⲛ ⲙⲡⲉϩⲟⲟⲩ ⲙⲛⲧⲉⲩϣⲏ .
…
47 ⲙⲏ ⲁ ϭⲉⲗⲁⲁⲩ ⲙⲡⲣⲟⲫⲏⲧⲏⲥ ⲧⲱⲟⲩⲛ ⲛⲉⲛⲉϩ ϩⲙⲡⲓⲥⲣⲁⲏⲗ ⲛⲧϩⲉ ⲙⲙⲱⲩⲥⲏⲥ
…
48 ⲁⲩⲱ ⲁⲩⲣⲛⲟⲃⲉ ⲛϭⲓϩⲉⲛⲙⲏⲏϣⲉ ⲉⲛⲁϣⲱⲟⲩ ⲙⲛⲛⲥⲁⲧⲣⲉϥⲃⲱⲕ ⲉⲃⲟⲗ ϩⲓⲧⲟⲟⲧⲟⲩ ⲁⲩⲱ ⲙⲛⲛⲥⲁⲧⲣⲉϥϩⲱⲛ ⲉⲧⲟⲟⲧⲟⲩ ϩⲛⲛⲉϥϣⲁϫⲉ ⲧⲏⲣⲟⲩ ⲙⲛⲛⲥⲁⲧⲣⲉⲩⲛⲁⲩ ⲉϩⲉⲛϣⲡⲏⲣⲉ ⲉⲛⲁϣⲱⲟⲩ .
…
49 ⲙⲏ ⲟⲩⲛ ⲡⲉⲧⲥⲟⲧⲡ ⲉⲛⲉⲡⲣⲟⲫⲏⲧⲏⲥ ⲧⲏⲣⲟⲩ ⲁⲩⲱ ⲁⲩⲣⲛⲟⲃⲉ ⲛϭⲓϩⲉⲛⲙⲏⲏϣⲉ ⲉⲛⲁϣⲱⲟⲩ ⲙⲛⲛⲥⲁⲧⲣⲉⲩϩⲱⲛ ⲉⲧⲟⲟⲧⲟⲩ ϩⲛⲛⲉⲩϣⲁϫⲉ ⲧⲏⲣⲟⲩ ⲁⲩⲱ ⲙⲛⲛⲥⲁⲧⲣⲉⲩⲛⲁⲩ ⲉϩⲉⲛϣⲡⲏⲣⲉ ⲉⲛⲁϣⲱⲟⲩ .
…
50 ⲙⲏ ⲟⲩⲛ ⲡⲉⲧⲟ ⲛⲛⲟϭ ⲉⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲁⲩⲱ ⲁⲩⲣⲛⲟⲃⲉ ⲛϭⲓϩⲉⲛⲙⲏⲏϣⲉ ⲉⲛⲁϣⲱⲟⲩ ⲙⲛⲛⲥⲁⲧⲣⲉϥϩⲱⲛ ⲉⲧⲟⲟⲧⲟⲩ ϩⲛⲛⲉϥϣⲁϫⲉ ⲧⲏⲣⲟⲩ ⲁⲩⲱ ⲙⲛⲛⲥⲁⲧⲣⲉⲩⲛⲁⲩ ⲉϩⲉⲛⲙⲁⲉⲓⲛ ⲙⲛϩⲉⲛϣⲡⲏⲣⲉ ⲉⲛⲁϣⲱⲟⲩ ⲉⲙⲛⲧⲟⲩ ⲏⲡⲉ .
…
51 ⲙⲏ ⲟⲩⲛ ϭⲉϫⲱⲱⲣⲉ ϩⲛⲧⲉⲩϭⲟⲙ ⲛⲧϩⲉ ⲛⲛⲉⲛⲉⲓⲟⲧⲉ ⲛⲁⲡⲟⲥⲧⲟⲗⲟⲥ ⲁⲩⲱ ⲁⲩⲣⲛⲟⲃⲉ ⲛϭⲓϩⲉⲛⲙⲏⲏϣⲉ ⲉⲛⲁϣⲱⲟⲩ ⲙⲛⲛⲥⲁⲧⲣⲉⲩϩⲱⲛ ⲉⲧⲟⲟⲧⲟⲩ ϩⲛⲛⲉⲩϣⲁϫⲉ ⲧⲏⲣⲟⲩ ⲙⲛⲛⲥⲁⲧⲣⲉⲩⲛⲁⲩ ⲉϩⲉⲛⲙⲁⲉⲓⲛ ⲙⲛϩⲉⲛϣⲡⲏⲣⲉ ⲉⲛⲁϣⲱⲟⲩ . ⲉϣϫⲉ ⲁ ⲛⲁⲓ ϭⲉ ⲧⲏⲣⲟⲩ ⲣⲛⲟⲃⲉ ⲉⲩϣⲟⲟⲡ ⲛⲙⲙⲁⲩ ⲛϭⲓⲛⲉⲓⲡⲉⲧⲟⲩⲁⲁⲃ ⲧⲏⲣⲟⲩ ⲡⲟⲩⲁ ⲡⲟⲩⲁ ϩⲙⲡⲉϥⲕⲁⲓⲣⲟⲥ
…
52 ⲁⲩⲱ ⲛⲧⲟϥ ϩⲱⲱϥ ⲟⲛ ⲡϫⲟⲉⲓⲥ ⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲉϥϣⲟⲟⲡ ⲛⲙⲙⲁⲩ ϩⲓϫⲙⲡⲕⲁϩ
…
53 ⲁⲩⲱ ⲁⲩⲣⲛⲟⲃⲉ ⲛϭⲓⲛⲁⲓ ⲧⲏⲣⲟⲩ ⲛⲧⲁⲩϩⲉ ⲉⲃⲟⲗ ϩⲛⲧϩⲉⲗⲡⲓⲥ ⲙⲡⲱⲛϩ ⲛϣⲁⲉⲛⲉϩ ⲟⲩ ⲙⲟⲛⲟⲛ ϫⲉⲁⲩⲣⲛⲟⲃⲉ ⲛϭⲓϩⲉⲛⲗⲁⲟⲥ ⲉⲛⲁϣⲱⲟⲩ ⲉⲩϣⲟⲟⲡ ⲛⲙⲙⲁⲩ ⲛϭⲓⲛⲉⲓⲡⲉⲧⲟⲩⲁⲁⲃ ⲧⲏⲣⲟⲩ ⲁⲗⲗⲁ ⲁⲩⲣⲛⲟⲃⲉ ⲟⲛ ⲛϭⲓϩⲉⲛⲗⲁⲟⲥ ⲉⲛⲁϣⲱⲟⲩ ⲉⲙⲛⲧⲟⲩ ⲏⲡⲉ ⲙⲛⲛⲥⲁⲧⲣⲉⲩⲃⲱⲕ ⲉⲃⲟⲗ ϩⲓⲧⲟⲟⲧⲟⲩ ⲛϭⲓⲛⲉⲓⲡⲉⲧⲟⲩⲁⲁⲃ ⲧⲏⲣⲟⲩ ϩⲙⲡⲉϩⲟⲟⲩ ⲙⲡⲉⲩϭⲙⲡϣⲓⲛⲉ
…
54 ⲛⲧϩⲉ ϩⲱⲱⲛ ⲟⲛ ⲧⲉⲛⲟⲩ ⲉⲧⲛⲣⲛⲟⲃⲉ ⲏ ⲟⲛ ⲉⲁⲛⲣⲛⲟⲃⲉ ⲙⲛⲛⲥⲁⲧⲣⲉⲛⲥⲱⲧⲙ ⲉⲛϣⲁϫⲉ ⲛⲛⲉⲓⲡⲉⲧⲟⲩⲁⲁⲃ ⲧⲏⲣⲟⲩ ⲙⲛⲛⲁⲛⲁⲡⲟⲥⲧⲟⲗⲟⲥ ⲙⲛⲛⲁⲛⲉⲡⲣⲟⲫⲏⲧⲏⲥ ⲙⲛⲛⲁⲡⲉⲛϫⲟⲉⲓⲥ ⲓⲏⲥⲟⲩⲥ ⲙⲛⲛⲁⲛⲉⲛⲉⲓⲟⲧⲉ ⲧⲏⲣⲟⲩ ϫⲓⲛ ⲛϣⲟⲣⲡ ⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲙⲛⲛϣⲁϫⲉ ⲧⲏⲣⲟⲩ ⲛⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ
…
55 ⲁⲩⲱ ⲉϣϫⲉ ⲙⲛⲛⲥⲁⲛⲁⲓ ⲧⲏⲣⲟⲩ ⲁⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲙⲡⲏⲓ ⲛⲛⲉⲛⲉⲓⲟⲧⲉ ⲙⲙⲁⲧⲉ ⲁⲛ ϩⲛⲧⲉⲛⲙⲛⲧⲕⲟⲩⲓ ⲙⲛⲧⲉⲛⲙⲛⲧⲁⲧⲥⲟⲟⲩⲛ ⲁⲗⲗⲁ ⲙⲛⲛⲥⲁⲧⲣⲉⲛϫⲓ ⲟⲛ ⲉⲃⲟⲗ ϩⲙⲡⲥⲟⲟⲩⲛ ⲛⲧⲙⲉ
…
56 ⲁⲩⲱ ⲉϣϫⲉ ⲛⲉⲧⲟⲩⲱϣ ⲉϫⲱⲕ ⲉⲃⲟⲗ ⲛⲛⲉⲩⲉⲡⲓⲑⲩⲙⲓⲁ ⲛⲟⲩⲟⲉⲓϣ ⲛⲓⲙ ϣⲁⲩⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲛⲟⲩⲙⲛⲧⲁⲧϩⲟⲧⲉ ⲛⲧϩⲉ ⲛⲛⲁⲅⲅⲉⲗⲟⲥ ⲛⲧⲁⲩⲕⲱ ⲛⲥⲱⲟⲩ ⲛⲧⲉⲩⲁⲣⲭⲏ ⲉⲁⲩⲡⲟⲣⲛⲉⲩⲉ ⲙⲛⲛϣⲉⲉⲣⲉ ⲛⲛⲣⲱⲙⲉ ⲛⲁⲣⲭⲁⲓⲟⲥ ⲁⲩⲱ ⲛⲧϩⲉ ⲛⲛⲕⲟⲟⲩⲉ ⲧⲏⲣⲟⲩ ⲉⲛⲧⲁⲩⲣⲛⲟⲃⲉ ϫⲓⲛⲧⲉϩⲟⲩⲉⲓⲧⲉ ϣⲁϩⲣⲁⲓ ⲉⲧⲉⲛⲟⲩ
…
57 ⲁⲩⲱ ⲛⲓⲙ ϭⲉ ⲡⲉ ϣⲉⲛⲟⲩⲧⲉ ⲏ ⲟⲩ ⲛⲉ ⲛⲉϥϣⲁϫⲉ ⲧⲏⲣⲟⲩ ϫⲉⲉϥⲉϣϭⲙϭⲟⲙ ⲉⲕⲱⲗⲩⲉ ⲏ ⲉⲁⲙⲁϩⲧⲉ ⲛϩⲉⲛⲣⲱⲙⲉ ⲙⲙⲁⲓⲡⲉⲧϩⲟⲟⲩ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲩⲟⲩⲱϣ ⲉϫⲱⲕ ⲉⲃⲟⲗ ⲛⲛⲉⲩⲛⲟⲃⲉ ⲛⲟⲩⲟⲉⲓϣ ⲛⲓⲙ ϩⲛϩⲉⲛⲕⲣⲟϥ ⲙⲛϩⲉⲛϫⲓⲟⲩⲉ ⲙⲛϩⲉⲛⲁⲛⲁϣ ⲉⲡϫⲓⲛϫⲏ ⲙⲛϩⲉⲛⲙⲓϣⲉ ⲙⲛϩⲉⲛⲙⲛⲧⲣⲉϥϫⲓϭⲟⲗ ⲉⲛⲉⲩⲉⲣⲏⲩ ⲛⲧϩⲉ ⲙⲡⲁⲓ ⲛⲧⲁϥϫⲓϭⲟⲗ ⲉⲛⲉϥⲥⲛⲏⲩ ⲉϥϫⲱ ⲙⲙⲟⲥ ϫⲉⲁⲩⲣⲛⲟⲃⲉ ⲉϥⲟ ⲛⲁⲧⲥⲟⲟⲩⲛ ϫⲉⲁⲩⲣⲛⲟⲃⲉ ⲏ ϫⲉⲙⲡⲟⲩⲉⲓⲣⲉ
…
58 ⲁⲗⲗⲁ ⲛⲧⲟϥ ⲛⲁⲙⲉ ⲡⲉ ⲛⲧⲁϥⲣⲛⲟⲃⲉ ⲛϩⲁϩ ⲛⲥⲙⲟⲧ ϣⲟⲣⲡ ⲙⲉⲛ ϫⲉⲁϥⲥⲱⲱϥ ⲙⲡⲉⲣⲡⲉ ⲙⲡⲛⲟⲩⲧⲉ ϩⲛⲧⲉϥⲙⲛⲧϣⲏⲣⲉ ϣⲏⲙ
…
59 ⲁⲩⲱ ⲛⲧⲉⲣⲉϥϩⲟⲙⲟⲗⲟⲅⲉⲓ ⲛⲧⲉϥⲡⲟⲣⲛⲉⲓⲁ ϩⲙ ⲡⲕⲁⲓⲣⲟⲥ ⲉⲛⲉⲣⲉ ⲧϩⲟⲧⲉ ⲙⲡϫⲟⲉⲓⲥ ϩⲉⲧⲁⲍⲉ ⲙⲙⲟϥ ⲉⲃⲟⲗ ϩⲓⲧⲟⲟⲧϥ ⲙⲡⲉⲧϫⲛⲟⲩ ⲙⲙⲟϥ ⲉϥⲟⲩⲱϣ ⲉⲃⲟⲏⲑⲉⲓ ⲉⲣⲟϥ ⲉϫⲓⲧϥ ⲛⲧⲟⲟⲧϥ ⲙⲡⲥⲁⲧⲁⲛⲁⲥ ⲁⲩⲱ ⲉⲧⲟⲕⲙⲉϥ ⲉⲃⲟⲗ ϩⲛⲣⲱⲥ ⲛⲧⲁⲛⲟⲙⲓⲁ ⲁⲩⲱ ⲉⲛⲁϩⲙⲉϥ ⲉⲧⲟⲣⲅⲏ ⲙⲡⲛⲟⲩⲧⲉ
…
60 ⲡⲁⲗⲓⲛ ⲇⲉ ⲟⲛ ⲁϥⲕⲧⲟϥ ⲙⲛⲛⲥⲁϩⲉⲛⲣⲟⲙⲡⲉ ⲁϥⲁⲣⲛⲁ ⲛⲧⲙⲉ ⲙⲡⲉⲗⲁⲁⲩ ϫⲛⲟⲩϥ .
…