1 ⲙⲱⲛⲓⲟⲛ ⲟⲩⲱϩ ⲛϩⲏⲧⲟⲩ ⲁⲩⲙⲉϩϩⲉⲛϫⲱⲱⲙⲉ ⲛⲁⲩ ⲛϣⲁϫⲉ ⲛⲃⲟⲧⲉ ϫⲉⲕⲁⲥ ⲉⲣⲉⲡϫⲟⲉⲓⲥ ⲛⲁϥⲟⲧⲟⲩ ⲉⲃⲟⲗ ⲙⲛⲛⲉⲩⲕⲉϣⲱϫⲡ ⲛⲧϩⲉ ⲉⲧⲥⲏϩ ϫⲉⲛϣⲱϫⲡ ⲛⲛⲁⲥⲉⲃⲏⲥ ⲥⲉⲛⲁⲧⲁⲕⲟ .
…
2 ϩⲓⲧⲛⲧⲇⲓⲕⲁⲓⲟⲥⲩⲛⲏ ⲛⲛⲇⲓⲕⲁⲓⲟⲥ ⲧⲏⲣⲟⲩ ⲁⲩⲙⲟⲩⲧⲉ ⲉⲣⲟⲟⲩ ϫⲉⲛⲉϣⲃⲏⲣ ⲙⲡⲛⲟⲩⲧⲉ ⲛⲧϩⲉ ⲛⲁⲃⲣⲁϩⲁⲙ ⲡⲉϣⲃⲏⲣ ⲙⲡⲛⲟⲩⲧⲉ ⲁⲩⲱ ⲛⲧϩⲉ ⲛⲛⲁⲡⲟⲥⲧⲟⲗⲟⲥ ⲛⲧⲁⲡϫⲟⲉⲓⲥ ⲙⲟⲩⲧⲉ ⲉⲣⲟⲟⲩ ϫⲉⲛⲁϣⲃⲉⲉⲣ .
…
3 ϩⲓⲧⲛⲧⲁⲛⲟⲙⲓⲁ ⲇⲉ ϩⲱⲱϥ ⲛⲛϩⲁⲓⲣⲉⲧⲓⲕⲟⲥ ⲁⲡⲥⲁⲧⲁⲛⲁⲥ ⲕⲁⲁⲩ ⲛⲁϥ ⲛϣⲃⲏⲣ ⲛⲧⲟⲟⲩ ⲙⲛⲛⲉⲩⲕⲉⲫⲓⲗⲟⲥⲟⲫⲟⲥ ⲉⲧⲟⲩⲉϩϥⲱ ⲛⲧϩⲉ ⲛⲛⲉϩⲓⲟⲙⲉ .
…
4 ⲡϫⲟⲉⲓⲥ ⲓⲏⲥⲟⲩⲥ ϩⲱⲱϥ ⲉϥⲟⲩⲱϣ ⲕⲁⲧⲁⲡⲉⲧⲥⲏϩ ⲉⲧⲣⲉⲛⲉⲧⲡⲓⲥⲧⲉⲩⲉ ⲉⲣⲟϥ ⲁⲩⲱ ⲉⲧⲙⲉ ⲙⲙⲟϥ ⲉⲧϩⲁⲣⲉϩ ⲉⲛⲉϥϣⲁϫⲉ ϣⲱⲡⲉ ⲛⲙⲙⲁϥ ϩⲛⲧⲉϥⲙⲛⲧⲣⲣⲟ ϫⲉⲉⲩⲉⲛⲁⲩ ⲉⲣⲟϥ ϩⲙⲡⲉϥⲉⲟⲟⲩ ⲁⲩⲱ ⲛⲥⲉⲙⲧⲟⲛ ⲙⲙⲟⲟⲩ ⲛⲙⲙⲁⲩ ϣⲁⲉⲛⲉϩ
…
5 ⲡⲥⲁⲧⲁⲛⲁⲥ ⲇⲉ ϩⲱⲱϥ ⲥⲡⲟⲩⲇⲁⲍⲉ ⲕⲁⲧⲁⲡⲉⲧⲉϩⲛⲁϥ ⲉⲧⲣⲉϥⲛⲁⲩ ⲉⲛϩⲁⲓⲣⲉⲧⲓⲕⲟⲥ ⲧⲏⲣⲟⲩ ⲛⲙⲙⲁϥ ϩⲣⲁⲓ ϩⲛⲧⲉϩⲣⲱ ⲛⲕⲱϩⲧ ⲛⲧⲁⲩⲥⲃⲧⲱⲧⲥ ⲛⲁϥ ⲙⲛⲛⲉϥⲁⲅⲅⲉⲗⲟⲥ ⲛⲧϩⲉ ⲉⲧⲥⲏϩ ϫⲉⲕⲁⲥ ⲉⲩⲉⲛⲁⲩ ⲛϭⲓⲛϩⲁⲓⲣⲉⲧⲓⲕⲟⲥ ⲉⲧⲉϥϣⲟⲩϣⲟⲩ ⲙⲙⲟϥ ⲉϫⲱⲟⲩ ϫⲉⲛⲟⲩⲓ ⲛⲉ ⲉⲡⲉϥⲥⲱϣ ⲡⲉ ⲡⲱⲟⲩ ϩⲣⲁⲓ ϩⲛⲁⲙⲛⲧⲉ ⲛϣⲁⲉⲛⲉϩ .
…
6 ϩⲛⲟⲩⲡⲓⲥⲧⲓⲥ ⲕⲁⲧⲁⲡⲉⲧⲥⲏϩ ⲙⲡⲉⲁⲃⲣⲁϩⲁⲙ ϯⲥⲟ ⲉⲡⲉϥϣⲏⲣⲉ ⲙⲙⲉⲣⲓⲧ ⲉⲧⲃⲉⲡⲉϥⲟⲩⲱϣ ⲉϩⲟⲩⲛ ⲉⲡⲛⲟⲩⲧⲉ ⲁⲗⲗⲁ ⲁϥⲧⲁⲗⲟ ⲉϩⲣⲁⲓ ⲉⲩⲡⲉⲓⲣⲁⲍⲉ ⲙⲙⲟϥ
…
7 ⲛϩⲉⲑⲛⲟⲥ ⲇⲉ ϩⲱⲟⲩ ⲉⲩⲡⲱϩⲧ ⲉⲃⲟⲗ ⲙⲡⲉⲥⲛⲟϥ ⲛⲛⲉⲩϣⲏⲣⲉ ⲙⲛⲛⲉⲩϣⲉⲉⲣⲉ ⲛⲛⲇⲁⲓⲙⲱⲛⲓⲟⲛ ⲛⲧϩⲉ ⲉⲧⲥⲏϩ ϩⲛⲛⲉⲯⲁⲗⲙⲟⲥ .
…
8 ϩⲉⲛⲉⲣⲱⲟⲩ ⲛⲁⲡⲓⲥⲧⲟⲥ ⲁⲩⲱ ⲛⲁⲥⲉⲃⲏⲥ ⲛⲧⲁⲩϣⲱⲡⲉ ⲉⲃⲟⲗ ϩⲙⲡⲉⲧⲛⲥⲡⲉⲣⲙⲁ ϫⲓⲛⲛϣⲟⲣⲡ ⲛⲧϩⲉ ⲛⲅⲱⲅ ⲙⲛⲱⲅ ⲙⲛⲛⲉⲧⲉⲓⲛⲉ ⲙⲙⲟⲟⲩ ⲁⲩⲱ ϩⲏⲣⲱⲇⲏⲥ ⲡⲣⲣⲟ ⲡⲁⲓ ⲛⲧⲁⲡϫⲟⲉⲓⲥ ⲟⲡϥ ϩⲱⲥ ⲃⲁϣⲟⲣ ⲛⲧⲉⲧⲛϩⲉ ϩⲱⲧⲧⲏⲩⲧⲛ ϩⲉⲛⲉⲣⲱⲟⲩ ⲙⲡⲓⲥⲧⲟⲥ ϩⲉⲛⲉⲣⲱⲟⲩ ⲛⲇⲓⲕⲁⲓⲟⲥ ⲛⲧⲁⲩϣⲱⲡⲉ ⲉⲃⲟⲗ ϩⲙⲡⲉⲥⲡⲉⲣⲙⲁ ⲛⲛⲉⲭⲣⲓⲥⲧⲓⲁⲛⲟⲥ ϫⲓⲛⲛϣⲟⲣⲡ ϣⲁϩⲣⲁⲓ ⲉⲧⲉⲛⲟⲩ
…
9 ⲛⲧϩⲉ ⲛⲇⲁⲩⲉⲓⲇ ⲙⲛⲥⲁⲗⲟⲙⲱⲛ ⲙⲛⲉⲍⲉⲭⲓⲁⲥ ⲙⲛⲛⲉⲣⲱⲟⲩ ⲧⲏⲣⲟⲩ ⲛⲁⲣⲭⲁⲓⲟⲥ ⲁⲩⲱ ⲛⲇⲓⲕⲁⲓⲟⲥ ⲛⲉⲣⲱⲟⲩ ⲙⲛⲛϩⲏⲅⲉⲙⲱⲛ ⲛⲧⲁⲩϣⲟⲣϣⲣ ⲛⲛⲉⲧⲛⲣⲡⲏⲩⲉ ⲁⲩⲱ ⲁⲩⲧⲁⲟⲩⲟ ⲉϩⲣⲁⲓ ⲛⲛⲉⲧⲛⲉⲓⲇⲱⲗⲟⲛ ϩⲉⲛⲉⲃⲟⲗ ⲛⲉ ϩⲛⲛⲉⲭⲣⲓⲥⲧⲓⲁⲛⲟⲥ .
…
10 ⲧϭⲓⲛⲧⲁϩⲟ ⲉⲣⲁⲧⲟⲩ ⲛⲛⲉⲧⲛⲛⲟⲩⲧⲉ ϫⲓⲛⲛϣⲟⲣⲡ ⲁⲥϣⲱⲡⲉ ⲉⲩϣⲱϥ ⲛⲛⲉⲧⲛⲯⲩⲭⲏ ⲁⲩⲱ ⲧϭⲓⲛⲧⲁⲩⲟ ⲉϩⲣⲁⲓ ⲛⲛⲉⲧⲛⲉⲓⲇⲱⲗⲟⲛ ϩⲛⲛⲉⲓⲟⲩⲟⲉⲓϣ ⲧⲉⲛⲟⲩ ⲁⲥⲣⲧⲏⲩⲧⲛ ⲛⲧⲁⲗⲁⲓⲡⲱⲣⲟⲥ ⲉⲃⲟⲗ ϫⲉ ⲛⲉⲛⲧⲁⲧⲉⲧⲛⲧⲁϩⲟⲟⲩ ⲉⲣⲁⲧⲟⲩ ⲛⲏⲧⲛ ⲛⲛⲟⲩⲧⲉ ⲁⲩⲟⲩⲱϣϥ ⲏ ⲁⲩⲟⲩⲱϭⲡ ϩⲙⲡⲧⲣⲉⲩⲥⲟⲕⲟⲩ ⲉϫⲙⲡⲉⲩϩⲟ ⲉϩⲣⲁⲓ ⲉϫⲙⲡⲕⲁϩ ⲛϭⲓⲛⲉⲭⲣⲓⲥⲧⲓⲁⲛⲟⲥ ⲉⲩⲥⲱⲃⲉ ⲁⲩⲱ ⲉⲩⲛⲟϭⲛⲉϭ ⲛⲧⲉⲧⲛⲙⲛⲧⲁⲧϩⲏⲧ ⲉⲩϫⲓ ⲛϩⲣⲁⲩ ⲉⲩⲉⲓⲛⲉ ⲉϩⲣⲁⲓ ⲛϩⲉⲛⲟⲩⲉⲗⲗⲉ
…
11 ⲛⲧϩⲉ ⲛⲛⲉⲧϫⲱ ϩⲛⲟⲩⲕⲓⲑⲁⲣⲁ ϩⲙⲡⲧⲣⲉⲡⲉⲩϩⲏⲧ ⲟⲩⲛⲟϥ ϩⲣⲁⲓ ⲛϩⲏⲧⲟⲩ ⲉϫⲙⲡⲧⲁⲕⲟ ⲛⲛⲉⲧⲟⲩⲱϣⲧ ⲛⲁⲩ ⲉⲩϫⲱ ..ⲙⲟⲥ ⲛⲧⲉⲓϩⲉ ⲉⲩ….ⲡⲓⲉ ⲛⲏⲧⲛ … …ⲃⲏⲗ ϩⲉ ⲁⲇⲁ….ⲱⲛ ⲟⲩⲱϣϥ …. ⲉⲩⲙⲟⲩⲛⲅ ⲛϭⲓϫ ϣⲱⲡⲉ ⲉϩⲉⲛⲑⲏⲣⲓⲟⲛ ⲙⲛϩⲉⲛⲧⲃⲛⲟⲟⲩⲉ ϥⲓⲧⲟⲩ ⲉⲩⲙⲏⲣ ⲛⲧϩⲉ ⲛⲟⲩⲉⲧⲡⲱ ⲛⲉⲓⲧⲛ
…
12 ⲁⲩⲱ ⲟⲛ ϫⲉⲛⲉⲓⲇⲱⲗⲟⲛ ⲛⲛϩⲉⲑⲛⲟⲥ ϩⲉⲛϩⲁⲧ ⲛⲉ ϩⲓⲛⲟⲩⲃ ϩⲉⲛϩⲃⲏⲩⲉ ⲛⲉ ⲛϭⲓϫ ⲛⲣⲱⲙⲉ ⲉⲩⲉⲣⲧⲉⲩϩⲉ ⲛϭⲓⲛⲉⲧⲧⲁⲙⲓⲟ ⲙⲙⲟⲟⲩ ⲙⲛⲟⲩⲟⲛ ⲛⲓⲙ ⲉⲧⲛⲁϩⲧⲉ ⲉⲣⲟⲟⲩ ⲡⲁⲗⲓⲛ ⲟⲛ ϫⲉⲛⲛⲟⲩⲧⲉ ⲧⲏⲣⲟⲩ ⲛⲛϩⲉⲑⲛⲟⲥ ϩⲉⲛⲉⲓⲇⲱⲗⲟⲛ ⲛⲇⲁⲓⲙⲱⲛⲓⲟⲛ .
…
13 ⲛⲁⲓ ⲇⲉ ⲙⲛϩⲉⲛⲕⲟⲟⲩⲉ ⲉⲛⲁϣⲱⲟⲩ ϣⲁⲩϫⲟⲟⲩ ⲉⲩⲯⲁⲗⲗⲉⲓ ⲉⲡⲛⲟⲩⲧⲉ ⲉⲧⲥⲙⲁⲙⲁⲁⲧ ⲉⲩⲣⲁϣⲉ ⲉϫⲙⲡⲥⲟⲗⲥⲗ ⲛⲧⲉⲩⲙⲁⲁⲩ ⲧⲉⲕⲕⲗⲏⲥⲓⲁ ⲉⲧⲟⲩⲁⲁⲃ ⲉⲩⲛⲁⲩ ⲉⲣⲟⲥ ⲉⲥⲙⲉϩ ⲙⲙⲏⲏϣⲉ ⲛⲗⲁⲟⲥ ⲛⲛⲉⲧⲡⲓⲥⲧⲉⲩⲉ ⲉⲡⲛⲟⲩⲧⲉ ⲙⲛⲡⲉϥⲭⲣⲓⲥⲧⲟⲥ ⲓⲏⲥⲟⲩⲥ ⲉⲩⲡⲱϩⲧ ⲙⲙⲟⲟⲩ ⲉⲩⲟⲩⲱϣⲧ ⲙⲡϫⲟⲉⲓⲥ ⲕⲁⲧⲁⲡⲉⲧⲥⲏϩ ϫⲉⲁⲙⲏⲓⲧⲛ ⲛⲧⲛⲟⲩⲱϣⲧ ⲛⲧⲛⲛⲁϩⲧ ⲛⲁϥ ⲛⲧⲛⲣⲓⲙⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲟⲛ ϫⲉⲛⲧⲟϥ ⲡⲉ ⲡⲉⲛⲛⲟⲩⲧⲉ ⲁⲛⲟⲛ ⲡⲉϥⲗⲁⲟⲥ
…
14 ⲉⲩⲥⲱⲃⲉ ⲇⲉ ϩⲱⲱϥ ⲉϫⲛⲛⲉⲧⲛⲣⲡⲏⲩⲉ ⲛⲧⲁⲩⲣϫⲁⲓⲉ ⲙⲛⲛⲉⲧⲛⲕⲉⲙⲁ ⲧⲏⲣⲟⲩ ⲉⲧⲉⲧⲛⲧⲁⲗⲉⲑⲩⲥⲓⲁ ⲉϩⲣⲁⲓ ⲛϩⲏⲧⲟⲩ ⲛⲙⲡⲉⲧϣⲟⲩⲉⲓⲧ .
…
15 ⲧⲁⲡⲟⲇⲏⲙⲓⲁ ⲙⲡⲉⲛⲛⲟⲩⲧⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲁⲥϣⲱⲡⲉ ⲉⲩϣⲱϥ ⲛⲛⲉⲧⲛⲣⲡⲏⲩⲉ ⲁⲥϣⲱⲡⲉ ⲉⲩϭⲱⲣϭ ⲛⲧⲕⲁⲑⲟⲗⲓⲕⲏ ⲉⲕⲕⲗⲏⲥⲓⲁ
…
16 ⲁⲥϣⲱⲡⲉ ⲙⲉⲛ ⲛⲏⲧⲛ ⲉⲩϫⲱⲱⲣⲉ ⲉⲃⲟⲗ ⲁⲥϣⲱⲡⲉ …. ⲩⲥⲱⲟⲩϩ ⲉϩⲟⲩⲛ ⲙⲡⲉϥⲗⲁⲟⲥ ⲉⲧⲟⲩⲁⲁⲃ .
…
17 ϩⲟⲙⲟⲓⲱⲥ ⲟⲛ ⲡⲉⲥⲧⲁⲩⲣⲟⲥ ⲙⲡⲛⲟⲩⲧⲉ ⲛⲛⲉⲭⲣⲓⲥⲧⲓⲁⲛⲟⲥ ⲓⲏⲥⲟⲩⲥ ⲁϥϣⲱⲡⲉ ⲛⲁⲩ ⲛⲟⲩⲱⲛϩ ϣⲁⲉⲛⲉϩ ⲁⲩⲱ ⲁϥϣⲱⲡⲉ ⲉⲩⲧⲁⲕⲟ ⲛⲛⲉⲧⲛϣⲙϣⲉ ⲛⲁⲩ .
…
18 ⲛⲉⲭⲣⲓⲥⲧⲓⲁⲛⲟⲥ ⲛϣⲏⲣⲉ ⲙⲡⲣⲣⲟ ⲡⲉⲭⲣⲓⲥⲧⲟⲥ ⲡϫⲟⲉⲓⲥ ⲓⲏⲥⲟⲩⲥ ⲉⲩϩⲙⲡⲟⲩⲟⲉⲓⲛ ⲙⲡⲱⲛϩ ⲛⲧϩⲉ ⲉⲧⲥⲏϩ ⲛϩⲁⲓⲣⲉϯⲕⲟⲥ ⲇⲉ ϩⲱⲟⲩ ⲙⲛⲛϩⲉⲑⲛⲟⲥ ⲛⲓⲙ ⲛⲁⲥⲉⲃⲏⲥ ⲉⲩϩⲙⲡ… ⲕⲉ ⲛⲧϩⲉ ⲛⲟⲩⲣⲱⲙⲉ ⲉⲁϥⲃ… ⲉϩⲟⲩⲛ ϩⲛⲟⲩⲙⲁ ..ⲕⲁⲕⲉ ⲁⲩϭⲟⲥⲙ ϩ..ⲃⲥ ⲉϫⲱϥ ⲉⲙⲉⲩⲛⲁⲩ ⲉⲣⲟϥ ϩⲛⲛⲉⲧϭⲱϣⲧ ⲛⲥⲱϥ .
…
19 ⲧⲁⲓ ⲧⲉ ⲧϩⲉ ⲛⲛⲁⲣⲭⲏⲅⲟⲥ ⲛⲛϩⲉⲑⲛⲟⲥ ⲉⲧⲟ ⲛⲁⲧⲛⲁϩⲧⲉ ϫⲓⲛⲛϣⲟⲣⲡ ⲉⲁⲩⲥⲱϩⲡ ⲉϩⲟⲩⲛ ϩⲙⲡⲧⲟⲡⲟⲥ ⲛⲕⲁⲕⲉ ⲉⲧⲉⲡⲥⲁⲧⲁⲛⲁⲥ ⲡⲉ ⲁⲩⲱ ⲁⲩⲥⲱⲣⲙ ϩⲛⲛⲉϥⲕⲗϫⲉ ⲙⲛⲛⲉϥϩⲓⲣ ⲙⲛⲛⲉϥⲧⲁⲙⲉⲓⲟⲛ ⲁⲩⲱ ⲉⲁⲡϭⲟⲥⲙ ⲛⲁⲛⲟⲙⲓⲁ ⲛⲓⲙ ⲡⲱⲣϣ ⲉⲃⲟⲗ ⲉϫⲱⲟⲩ ϩⲙⲡⲧⲣⲉϥⲟⲩⲱⲛϩ ⲉⲃⲟⲗ ⲛϩⲏⲧⲟⲩ ⲛϥⲙⲁϩⲟⲩ ⲛⲕⲁⲕⲉ ⲛⲧϩⲉ ⲛϩⲉⲛⲏⲓ ⲉⲩⲕⲏⲧ ϩⲁⲡⲉⲥⲏⲧ ⲙⲡⲕⲁϩ ⲙⲙⲛⲟⲩⲉⲓⲣϩⲉ ϣⲏⲙ ⲛⲟⲩⲟⲉⲓⲛ ⲛϩⲏⲧⲟⲩ ϫⲉⲁⲡⲛⲟⲩⲧⲉ ⲕⲁⲁⲩ ⲛⲥⲱϥ
…
20 ⲡⲟⲩⲟⲉⲓⲛ ⲙⲙⲉ ⲓⲏⲥⲟⲩⲥ ⲡⲁⲓ ⲉⲧⲣⲟⲩⲟⲉⲓⲛ ⲉⲛⲉϥϣⲏⲣⲉ ⲛⲭⲣⲓⲥϯⲓⲁⲛⲟⲥ ⲉⲧⲉⲟⲩⲛⲧⲁⲩ ⲙⲙⲁⲩ ⲙⲡⲟⲩⲟⲉⲓⲛ ⲉⲩⲡⲓⲥⲧⲉⲩⲉ ⲉⲡⲟⲩⲟⲉⲓⲛ ⲁⲩⲱ ⲉⲩⲙⲟⲟϣⲉ ϩⲙⲡⲟⲩⲟⲉⲓⲛ ⲛⲟⲩⲟⲉⲓϣ ⲛⲓⲙ ⲙⲡⲉⲡⲕⲁⲕⲉ ⲧⲁϩⲟⲟⲩ ⲛⲧϩⲉ ⲉⲧⲥⲏϩ
…
21 ⲛⲧϩⲉ ⲇⲉ ⲛⲟⲩⲣⲱⲙⲉ ⲉⲁϥⲡⲱⲧ ⲉⲃⲟⲗ ϩⲛⲟⲩⲙⲁ ⲛϫⲁⲓⲉ ⲛⲕⲁⲕⲉ ⲉϩⲟⲩⲛ ⲉⲩⲧⲟⲡⲟⲥ ⲛⲟⲩⲟⲉⲓⲛ ⲉⲩⲕⲱⲧⲉ ⲉⲣⲟϥ ⲛϭⲓⲟⲩⲁϣⲏ ⲙⲡⲟⲗⲓⲥ
…
22 ⲧⲁⲓ ⲧⲉ ⲧϩⲉ ⲛϩⲟⲩⲟ ⲛⲛⲉⲛⲉⲓⲟⲧⲉ ⲛⲁⲣⲭⲁⲓⲟⲥ ⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ ⲙⲛⲛⲉⲛⲧⲁⲩϣⲱⲡⲉ ϩⲁⲧⲉⲩϩⲏ ⲙⲛⲛⲉⲛⲧⲁⲩϣⲱⲡⲉ ⲙⲛⲛⲥⲱⲟⲩ ⲉⲁⲩⲡⲱⲧ ⲧⲏⲣⲟⲩ ⲉⲃⲟⲗ ϩⲛⲧⲉⲡⲗⲁⲛⲏ ⲉⲧϩⲙⲡⲕⲟⲥⲙⲟⲥ ⲉϩⲟⲩⲛ ⲉⲡⲥⲟⲟⲩⲛ ⲙⲙⲉ
…
23 ⲁⲩϣⲱⲡⲉ ϩⲁⲧϩⲁⲓⲃⲉⲥ ⲙⲡϫⲟⲉⲓⲥ ⲡⲛⲟⲩⲧⲉ ⲛⲧⲡⲉ ⲁⲩⲱ ⲕⲁⲧⲁⲡⲉⲧⲥⲏϩ ⲛⲧϩⲉ ⲉⲧⲉⲣⲉⲡⲟⲩⲟⲉⲓⲛ ⲣⲟⲩⲟⲉⲓⲛ ϩⲙⲡⲕⲁⲕⲉ ⲁⲩⲱ ⲙⲡⲉⲡⲕⲁⲕⲉ ⲧⲁϩⲟϥ
…
24 ⲧⲁⲓ ⲧⲉ ⲧϩⲉ ⲙⲡⲉⲩⲥⲡⲉⲣⲙⲁ ⲧⲏⲣϥ ϫⲓⲛⲛϣⲟⲣⲡ ϣⲁϩⲣⲁⲓ ⲉⲧⲉⲛⲟⲩ ⲉⲩⲣⲟⲩⲟⲉⲓⲛ ϩⲛⲛⲉϩⲃⲏⲩⲉ ⲉⲧⲛⲁⲛⲟⲩⲟⲩ ⲙⲡⲉⲡⲕⲁⲕⲉ ⲙⲡⲅⲉⲛⲟⲥ ⲧⲏⲣϥ ⲛⲛϩⲁⲓⲣⲉⲧⲓⲕⲟⲥ ⲉϣϭⲙϭⲟⲙ ⲉⲣⲟⲟⲩ .
…
25 ⲛⲧⲱⲧⲛ ⲡⲉⲧⲉⲣⲉⲡϣⲁϫⲉ ⲉⲧⲥⲏϩ ϫⲱ ⲙⲙⲟⲥ ⲉⲣⲱⲧⲛ ⲱ ⲛϩⲁⲓⲣⲉϯⲕⲟⲥ ϫⲉⲛⲟⲃϩⲉ ⲛⲛⲣⲉϥⲣⲛⲟⲃⲉ ⲁⲕⲟⲩⲟϣϥⲟⲩ ⲁⲩⲱ ϫⲉⲡⲉⲧⲛⲗⲁⲥ ⲙⲛⲡⲉⲧⲛϩⲏⲧ ϣⲟⲩⲉⲓⲧ ⲁⲧⲉⲧⲛϩⲉ ⲉⲃⲟⲗ ϩⲛⲛⲉⲧⲛϣⲟϫⲛⲉ ⲕⲁⲧⲁⲡⲁϣⲁⲓ ⲛⲛⲉⲧⲛⲙⲛⲧϣⲁϥⲧⲉ
…
26 ⲁⲡϫⲟⲉⲓⲥ ϥⲉⲧⲧⲏⲩⲧⲛ ⲉⲃⲟⲗ ϫⲉⲁⲧⲉⲧⲛϯⲛⲟⲩϭⲥ ⲛⲁϥ ⲁⲡⲉⲧⲛⲣⲡⲙⲉⲉⲩⲉ ⲧⲁⲕⲟ ϩⲛⲟⲩⲟⲩⲱⲛϩ ⲉⲃⲟⲗ ⲁⲧⲉⲧⲛⲧⲱⲗⲥ ϩⲙⲡⲧⲁⲕⲟ ⲛⲧⲁⲧⲉⲧⲛⲁⲁϥ ⲁⲧⲉⲧⲛⲣⲁⲥ ⲁⲩⲱ ⲛϣⲏⲣⲉ ⲛϣⲙⲙⲟ ⲛⲇⲁⲓⲙⲱⲛⲓⲟⲛ ⲁⲧⲉⲧⲛⲣϭⲁⲗⲉ ⲉⲃⲟⲗ ϩⲛⲛⲉⲧⲛϩⲓⲟⲟⲩⲉ
…
27 ⲡϫⲟⲉⲓⲥ ⲛⲁϣⲣϣⲣⲧⲏⲩⲧⲛ ⲛϥⲧⲙⲕⲉⲧⲧⲏⲩⲧⲛ ⲉⲃⲟⲗ ϫⲉ ⲛϣⲁϫⲉ ⲛⲣⲱⲧⲛ ⲟⲩⲁⲛⲟⲙⲓⲁ ⲧⲉ ⲙⲛⲟⲩⲕⲣⲟϥ ⲙⲡⲉⲧⲛⲟⲩⲱϣ ⲉⲥⲟⲩⲛⲡⲡⲉⲧⲛⲁⲛⲟⲩϥ ⲉⲁⲁϥ ⲉⲁⲧⲉⲧⲛⲙⲉⲉⲩⲉ ⲉⲩⲁⲛⲟⲙⲓⲁ ϩⲓϫⲙⲡⲉⲧⲛϭⲗⲟϭ ⲉⲁⲧⲉⲧⲛⲛⲁϩⲉⲣⲁⲧⲧⲏⲩⲧⲛ ϩⲛϩⲓⲏ ⲛⲓⲙ ⲉⲧϩⲟⲟⲩ ⲁⲩⲱ ⲧⲕⲁⲕⲓⲁ ⲙⲡⲉⲧⲛⲙⲉⲥⲧⲱⲥ
…
28 ⲁⲡⲉⲧⲛϩⲏⲧ ⲥⲱⲟⲩϩ ⲛⲏⲧⲛ ⲉϩⲟⲩⲛ ⲛⲟⲩⲁⲛⲟⲙⲓⲁ ⲁⲧⲉⲧⲛϩⲉ ⲉⲃⲟⲗ ⲛⲛⲁϩⲣⲙⲡϩⲟ ⲙⲡⲛⲟⲩⲧⲉ ⲙⲛⲡⲉϥⲭⲣⲓⲥⲧⲟⲥ ⲓⲏⲥⲟⲩⲥ
…
29 ⲁϩⲉⲛϫⲃⲃⲉⲥ ϩⲉ ⲉϩⲣⲁⲓ ⲉϫⲱⲧⲛ ⲁⲃⲟⲗ ϩⲓⲧⲟⲟⲧϥ ⲁϥⲧⲁⲩⲉⲧⲏⲩⲧⲛ ⲉϩⲣⲁⲓ ϩⲛⲟⲩⲕⲱϩⲧ ϫⲉⲛⲧⲉⲧⲛ ⲟⲩⲗⲁⲟⲥ ⲛⲁⲧϩⲏⲧ ⲉⲁⲧⲉⲧⲛϯ ⲛⲟⲩϭⲥ ⲙⲡⲉϥⲣⲁⲛ ⲁⲧⲉⲧⲛⲙⲛⲧϫⲁⲥⲓϩⲏⲧ ⲃⲱⲕ ⲉϩⲣⲁⲓ ϣⲁⲣⲟϥ ⲛⲟⲩⲟⲉⲓϣ ⲛⲓⲙ
…
30 ⲁⲧⲉⲧⲛϫⲓⲥⲉ ⲙⲡⲉⲧⲛⲧⲁⲡ ⲉϩⲣⲁⲓ ⲉⲧⲡⲉ ⲁⲧⲉⲧⲛϣⲁϫⲉ ⲉⲡⲛⲟⲩⲧⲉ ϩⲛⲟⲩϫⲓⲛϭⲟⲛⲥ ⲉⲧⲃⲉⲡⲁⲓ ⲁϭⲛⲁⲧⲁⲥⲥⲉ ⲙⲙⲱⲧⲛ ϩⲱⲥ ϫⲁϫⲉ ⲉⲁϥϯⲧⲏⲩⲧⲛ ⲉⲩⲛⲟϭⲛⲉϭ ϣⲁⲉⲛⲉϩ .
…
31 ⲁⲟⲩⲧⲏⲩ ⲉⲧⲉⲡϭⲱⲛⲧ ⲙⲡϫⲟⲉⲓⲥ ⲡⲉ ⲛⲓϥⲉ ⲉⲣⲱⲧⲛ ⲁⲧⲉⲧⲛϣⲟⲟⲩⲉ ⲁⲩⲱ ⲧϩⲁⲧⲏⲩ ⲉⲧⲉⲧⲉϥⲟⲣⲅⲏ ⲧⲉ ⲉⲛⲁϥⲓⲧⲏⲩⲧⲛ ⲛⲧϩⲉ ⲛϩⲉⲛϭⲗⲙ ⲉⲧⲓ ⲅⲁⲣ ⲕⲉⲕⲟⲩⲓ ⲡⲉ ⲛⲧⲉⲧⲛⲧⲙϣⲱⲡⲉ ⲉⲡⲧⲏⲣϥ .
…
32 ⲧⲉⲧⲛⲟ ⲅⲁⲣ ⲛⲁⲧⲥⲟⲟⲩⲛ ϫⲉⲁⲧⲉⲧⲛϫⲓϣⲓⲡⲉ ⲉⲙⲁⲧⲉ ⲁⲧⲉⲧⲛⲱϫⲛ ϣⲏⲙ ϣⲏⲙ ⲙⲛⲡⲉⲧⲛⲥⲡⲉⲣⲙⲁ ⲧⲏⲣϥ .
…
33 ⲉⲃⲟⲗ ⲧⲱⲛ ⲁⲧⲉⲧⲛⲧⲁⲕⲟ ⲛⲧϩⲉ ⲛⲟⲩϣⲉ ⲉϥⲟⲩⲟϣϥ ⲱ ⲛⲣⲉϥⲣⲛⲟⲃⲉ ⲉⲧⲣⲁϣⲉ ⲉϫⲙⲡⲉⲧϣⲟⲩⲉⲓⲧ ⲏ ⲛⲁϣ ⲛϩⲉ ⲉⲧⲉⲧⲛⲱϫⲛ ⲛϫⲁϫⲉ ⲙⲡϫⲟⲉⲓⲥ .
…
34 ⲙⲏ ⲉⲃⲟⲗ ⲁⲛ ϫⲉⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲉⲧϩⲛⲛⲉⲡⲣⲟⲫⲏⲧⲏⲥ ϯⲟⲩⲃⲉⲧⲏⲩⲧⲛ ϫⲉⲉⲓⲥ ⲛⲉⲕϫⲓϫⲉⲩⲉ ⲥⲉⲛⲁⲧⲁⲕⲟ ⲛⲥⲉϫⲱⲱⲣⲉ ⲉⲃⲟⲗ ⲛϭⲓⲟⲩⲟⲛ ⲛⲓⲙ ⲉⲧⲣϩⲱⲃ ⲉⲧⲁⲛⲟⲙⲓⲁ
…
35 ⲁⲩⲱ ⲟⲛ ϫⲉⲉⲣⲉⲛⲣⲉϥⲣⲛⲟⲃⲉ ⲱϫⲛ ϩⲓϫⲙⲡⲕⲁϩ ⲏ ϫⲉⲙⲡⲁⲣⲁⲛⲟⲙⲟⲥ ⲥⲉⲛⲁϥⲟⲧⲟⲩ ⲉⲃⲟⲗ ⲛⲉⲧⲛⲁⲛⲟⲩⲟⲩ ⲛⲁⲟⲩⲱϩ ϩⲓϫⲙⲡⲕⲁϩ ⲁⲩⲱ ⲛⲉⲧⲟⲩⲁⲁⲃ ⲛⲁϣⲱϫⲡ ϩⲓϫⲱϥ ⲉⲣⲉⲡⲣⲱⲙⲉ ⲙⲡⲁⲣⲁⲛⲟⲙⲟⲥ ⲛⲁⲟⲩⲱⲛϩ ⲉⲃⲟⲗ ⲛⲟⲩⲏⲣ ϫⲉⲟⲩⲙⲁⲥⲧⲡⲉⲧⲛⲁⲛⲟⲩϥ ⲡⲉ ⲉⲛϣⲁⲛⲧⲙⲙⲉⲧⲁⲛⲟⲉⲓ ⲙⲛⲛⲥⲁⲧⲣⲉⲛⲥⲱⲧⲙ ⲉⲛⲉⲓϣⲁϫⲉ ⲧⲏⲣⲟⲩ ⲛⲁⲓ ⲉⲧⲟ ⲙⲙⲛⲧⲣⲉ ⲉⲣⲟⲛ ⲙⲛⲛⲁⲛⲉⲅⲣⲁⲫⲏ .
…
36 ϩⲣⲁⲓ ϩⲛⲛⲉⲕⲣⲓⲛⲟⲛ ⲛⲛⲉⲧⲣⲱⲧ ⲉϩⲣⲁⲓ ϩⲛⲧⲥⲱϣⲉ ⲙⲛϩⲉⲛⲕⲉϩⲛⲁⲁⲩ ⲛⲉⲗⲁⲭⲓⲥⲧⲟⲛ ϣⲁⲣⲉⲡⲥⲟⲣⲧ ⲡⲱⲱⲛⲉ ⲉⲩⲏⲡⲉ ⲛⲥⲙⲟⲧ ⲛⲁⲩⲁⲁⲛ ⲁⲩⲁⲁⲛ ϩⲓⲧⲛⲛⲉⲧⲣϩⲱⲃ ⲉⲣⲟϥ
…
37 ⲡⲁⲥⲉⲃⲏⲥ ⲇⲉ ⲛⲧⲟϥ ⲙⲏⲛ ⲉⲃⲟⲗ ϩⲛⲧⲉϥⲕⲁⲕⲓⲁ ⲛⲧϩⲉ ⲉⲧⲥⲏϩ ⲙⲡϥⲡⲱⲱⲛⲉ ϩⲓⲧⲛⲛϣⲁϫⲉ ⲧⲏⲣⲟⲩ ⲙⲡⲛⲟⲩⲧⲉ ⲉϩⲟⲩⲛ ⲉⲧⲁⲅⲁⲡⲏ ⲙⲛⲧⲙⲉ ⲙⲛⲡⲉⲧⲛⲁⲛⲟⲩϥ ⲛⲓⲙ .
…
38 ⲁⲡⲛⲟⲩⲧⲉ ⲙⲉⲛ ϣⲁϫⲉ ⲛϩⲁϩ ⲛⲥⲟⲡ ϩⲛϩⲁϩ ⲛⲥⲙⲟⲧ ⲙⲛⲛⲉϥⲡⲉⲧⲟⲩⲁⲁⲃ ⲉϥⲥⲩⲙⲃⲟⲩⲗⲉⲩⲉ ⲛⲁⲩ ⲉⲛⲉϥⲟⲩⲱϣ ⲧⲏⲣⲟⲩ ⲁⲗⲗⲁ ⲟⲩⲥⲟⲡ ⲛⲟⲩⲱⲧ ⲡⲉ ⲛⲧⲁϥϩⲱⲛ ⲉⲧⲟⲟⲧϥ ⲛⲛⲱϩⲉ ⲉⲧⲣⲉϥⲧⲁⲙⲓⲟ ⲛⲧⲕⲓⲃⲱⲧⲟⲥ
…
39 ⲁⲩⲱ ⲁϥϫⲱⲕ ⲉⲃⲟⲗ ⲙⲡⲉϥϩⲱⲃ ⲁϥⲟⲩϫⲁⲓ ⲉⲧⲟⲣⲅⲏ ⲛⲧⲁⲥⲉⲓ ⲉϩⲣⲁⲓ ⲉϫⲙⲡⲕⲁϩ ⲛⲧⲟϥ ⲙⲛⲡⲉϥⲏⲓ ⲧⲏⲣϥ ⲙⲛϩⲉⲛⲕⲉϩⲁⲗⲁⲧⲉ ⲙⲛϩⲉⲛⲕⲉⲑⲏⲣⲓⲟⲛ ⲙⲛϩⲉⲛⲧⲃⲛⲟⲟⲩⲉ ⲉⲛⲁϣⲱⲟⲩ .
…
40 ⲙⲡⲛⲥⲱⲧⲙ ⲇⲉ ⲁⲛⲟⲛ ⲛⲉⲧⲣⲡⲉⲧϩⲟⲟⲩ ⲙⲛⲛⲥⲁⲛⲉⲓϣⲁϫⲉ ⲧⲏⲣⲟⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲉⲧⲣⲉⲛⲉⲓⲣⲉ ⲛⲟⲩⲇⲓⲕⲁⲓⲟⲥⲩⲛⲏ ⲉⲛⲛⲁⲟⲩϫⲁⲓ ⲛϩⲏⲧⲥ .
…
41 ⲟⲩⲥⲟⲡ ⲇⲉ ⲛⲟⲩⲱⲧ ⲡⲉⲛⲧⲁⲡⲛⲟⲩⲧⲉ ϫⲟⲟⲥ ⲛⲁⲃⲣⲁϩⲁⲙ ⲉⲧⲣⲉϥⲧⲁⲗⲟ ⲉϩⲣⲁⲓ ⲙⲡⲉϥⲙⲉⲣⲓⲧ ⲛϣⲏⲣⲉ ⲁⲩⲱ ⲁϥⲉⲓⲣⲉ ⲧⲁⲭⲏ ⲕⲁⲧⲁⲡⲟⲩⲱϣ ⲙⲡϫⲟⲉⲓⲥ ⲉⲃⲟⲗ ϫⲉϥⲙⲉ ⲙⲙⲟϥ ⲉϩⲟⲩⲉ ⲡⲉϥϣⲏⲣⲉ
…
42 ⲙⲡⲛⲥⲱⲧⲙ ⲇⲉ ⲁⲛⲟⲛ ⲛⲥⲱϥ ϣⲁϩⲟⲩⲛ ⲉⲧⲉⲛⲟⲩ ϩⲛⲛⲉϥϣⲁϫⲉ ⲧⲏⲣⲟⲩ ⲉⲧⲣⲉⲛⲡⲁⲣϩⲓⲥⲧⲁ ⲛⲛⲉⲛⲥⲱⲙⲁ ⲛⲁϥ ⲛⲑⲩⲥⲓⲁ ϩⲛⲧⲃⲃⲟ ⲛⲓⲙ ⲙⲛⲙⲛⲧⲙⲉ ⲛⲓⲙ .
…
43 ⲟⲩⲇⲉ ⲙⲡⲉⲛⲁⲅⲅⲉⲗⲟⲥ ⲣ ϩⲁϩ ⲛϣⲁϫⲉ ⲙⲛⲗⲱⲧ ⲉⲧⲣⲉϥⲡⲱⲧ ⲛⲁϥ ⲉⲃⲟⲗ ϩⲛⲛⲉⲓⲡⲟⲗⲓⲥ ⲉⲧⲙⲙⲁⲩ ⲛⲧⲁⲡϫⲟⲉⲓⲥ ⲣⲟⲕϩⲟⲩ ϩⲛⲟⲩⲕⲱϩⲧ ⲉⲃⲟⲗ ϩⲛⲧⲡⲉ ϩⲓⲧⲙⲡⲛⲟⲩⲧⲉ
…
44 ⲁⲗⲗⲁ ⲁϥⲣⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲁϥ ϩⲛⲟⲩϭⲉⲡⲏ
…
45 ⲙⲡⲛⲥⲱⲧⲙ ⲇⲉ ⲁⲛⲟⲛ ⲛⲥⲁⲡⲛⲟⲩⲧⲉ ϩⲛⲛⲉϥϣⲁϫⲉ ⲧⲏⲣⲟⲩ ⲉⲧⲣⲉⲛⲡⲱⲧ ⲉⲃⲟⲗ ϩⲛⲡⲉⲧϩⲟⲟⲩ ⲛⲓⲙ ⲉϩⲟⲩⲛ ⲉϩⲱⲃ ⲛⲓⲙ ⲛⲁⲅⲁⲑⲟⲛ ⲁⲩⲱ ⲙⲙⲉ .
…
46 ⲟⲩϣⲁϫⲉ ⲇⲉ ⲟⲛ ⲛⲟⲩⲱⲧ ⲡⲉⲛⲧⲁⲡⲛⲟⲩⲧⲉ ϫⲟⲟϥ ⲛⲛⲉϥⲙⲁⲑⲏⲧⲏⲥ ϫⲉⲟⲩⲉϩⲧⲏⲩⲧⲛ ⲛⲥⲱⲓ ⲧⲁⲣⲧⲏⲩⲧⲛ ⲛⲟⲩⲱϩⲉ ⲛⲣⲱⲙⲉ ⲁⲩⲕⲱ ⲧⲁⲭⲏ ⲛⲛⲉⲩϣⲛⲏⲩ ⲙⲛⲛⲉⲩⲉϫⲏⲩ ⲙⲛⲡⲉⲩⲉⲓⲱⲧ ⲙⲛⲛϫⲁⲓⲃⲉⲕⲉ ⲁⲩⲟⲩⲁϩⲟⲩ ⲛⲥⲱϥ
…
47 ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁⲩϫⲓ ⲛⲛⲉⲓⲛⲟϭ ⲛⲧⲁⲉⲓⲟ ⲙⲛⲛⲉⲓⲛⲟϭ ⲛⲉⲟⲟⲩ ⲉⲃⲟⲗ ϩⲓⲧⲟⲟⲧϥ ϩⲛϩⲉⲛϩⲃⲏⲩⲉ ⲛϣⲡⲏⲣⲉ
…
48 ⲁⲛⲟⲛ ⲇⲉ ⲙⲡⲉⲛⲥⲱⲧⲙ ⲛⲥⲱϥ ϩⲛⲛⲉϥϣⲁϫⲉ ⲧⲏⲣⲟⲩ ⲉⲧⲣⲉⲛⲕⲱ ⲛⲥⲱⲛ ⲛⲛⲉⲛⲉⲡⲉⲓⲑⲩⲙⲓⲁ ⲙⲛⲛⲉⲛⲟⲃⲉ ⲧⲏⲣⲟⲩ ϫⲉⲉⲛⲉⲣⲙⲡϣⲁ ⲙⲡⲉϥⲛⲁ ⲙⲛⲡⲉϥⲥⲙⲟⲩ .
…
49 ⲛⲓⲙ ⲡⲉⲧⲓⲛⲁⲣⲙⲛⲧⲣⲉ ⲛⲁϥ ⲛϥⲥⲱⲧⲙ ϫⲉⲛⲉⲧⲟⲩⲁⲁⲃ ⲁⲩⲱ ⲛⲇⲓⲕⲁⲓⲟⲥ ϫⲓⲛⲛⲉⲛⲉⲓⲟⲧⲉ ⲛⲁⲣⲭⲁⲓⲟⲥ ⲙⲛⲛⲉⲡⲣⲟⲫⲏⲧⲏⲥ ϣⲁϩⲣⲁⲓ ⲉⲛⲉⲛⲉⲓⲟⲧⲉ ⲛⲁⲡⲟⲥⲧⲟⲗⲟⲥ ⲙⲡⲟⲩⲣⲁⲧⲥⲱⲧⲙ ⲛⲥⲁⲡⲛⲟⲩⲧⲉ ⲉⲉⲓⲣⲉ ⲛⲛⲉϥⲟⲩⲱϣ ⲧⲏⲣⲟⲩ ⲁⲗⲗⲁ ⲛⲧⲁⲩⲡⲣⲟⲧⲣⲉⲡⲉ ⲛⲧⲟϥ ⲛϩⲉⲛⲕⲟⲟⲩⲉ ⲉⲩⲧⲥⲁⲃⲟ ⲙⲙⲟⲟⲩ ⲉⲛⲉϥϩⲓⲟⲟⲩⲉ ⲛⲧϩⲉ ⲉⲧⲥⲏϩ ϫⲉϯⲛⲁⲧⲥⲁⲃⲉ ⲛⲉⲓⲁⲛⲟⲙⲟⲥ ⲉⲛⲉⲕϩⲓⲟⲟⲩⲉ ⲁⲩⲱ ⲛⲁⲥⲉⲃⲏⲥ ⲛⲁⲕⲟⲧⲟⲩ ⲉⲣⲟⲕ .
…
50 ⲙⲡⲛⲁⲓⲥⲑⲁⲛⲉ ⲁⲛ ⲟⲛ ⲉⲧⲣⲉⲛⲉⲓⲣⲉ ⲙⲡⲉϥⲟⲩⲱϣ ϩⲁⲡⲉⲛϩⲧⲟⲣ ⲙⲁⲩⲁⲁⲛ ϩⲱⲥ ϣⲏⲣⲉ ⲉⲩⲛⲁⲕⲗⲏⲣⲟⲛⲟⲙⲉⲓ ⲛⲧⲙⲛⲧⲣⲣⲟ ⲙⲡⲉⲩⲉⲓⲱⲧ ⲉⲧϩⲛⲙⲡⲏⲩⲉ ⲟⲩⲇⲉ ⲟⲛ ⲙⲡⲛⲥⲱⲧⲙ ⲛⲥⲁⲛⲉϥϣⲁϫⲉ ⲙⲛⲛⲉϥⲥⲃⲟⲟⲩ ⲛⲉⲃⲟⲗ ϩⲛⲛⲉⲅⲣⲁⲫⲏ ⲛⲁⲓ ⲉⲧϯϩⲧⲟⲣ ⲉⲣⲟⲛ ⲉⲧⲣⲉⲛϩⲩⲡⲟⲧⲁⲥⲥⲉ .
…