1 ϫⲓⲛⲧⲁⲣⲭⲏ ϣⲁϩⲣⲁⲓ ⲉⲡϩⲟⲟⲩ ⸗
…
2 ⲁⲩⲱ ⲟⲩⲙⲟⲉⲓϩⲉ ⲧⲉ ϫⲉⲛⲓⲛⲟϭ ⲙⲙⲟⲟⲩ ⲉⲧⲟϣ ⲉⲧⲛⲏⲩ ⲉⲃⲟⲗ ϩⲛⲣⲱⲕ . ⲉⲛⲅϯⲥⲟ ⲁⲛ ⲉⲛⲁϥⲧⲟⲩ ϩⲛⲧⲉⲕϭⲟⲙ ⲧⲏⲣⲥ ·
…
3 ⲛⲁϣ ⲉⲛⲉⲧϩⲁⲣⲉϩ ⲉⲣⲟⲟⲩ ϩⲙⲙⲁ ⲛⲓⲙ ⲉⲧⲙⲧⲣⲉⲩⲧⲁϩⲟⲟⲩ ·
…
4 ⲁⲩⲱ ⲉϣϫⲉ ⲁϩⲉⲛⲧⲗϯⲗⲉ ⲛϩⲏⲧⲟⲩ ⲧⲁϩⲉ ϩⲁϩ . ⲧⲉ ⲡⲓⲇⲏⲙⲓⲁ ⲙⲡⲉⲭⲣⲓⲥⲧⲟⲥ ⲧⲃⲃⲟ ⲙⲙⲟⲟⲩ ⲉⲃⲟⲗ ⲛϩⲏⲧⲟⲩ ϣⲁⲧⲥⲩⲛⲧⲉⲗⲉⲓⲁ ⸗
…
5 ⲡϩⲟϥ ⲉϣⲁϥϩⲉϥⲧⲙⲟⲟⲩ ⲉⲛⲃⲁⲗ ⲙⲡⲥⲱⲙⲁ · ⲛⲧⲟⲕ ⲇⲉ ⲉⲕⲛⲟⲩϫⲉ ⲉⲛⲃⲁⲗ ⲙⲡϩⲏⲧ ·
…
6 ⲧⲁⲓ ⲧⲉ ⲧϩⲉ ϩⲉⲛⲉⲃⲓⲏⲛ ⲁⲩⲱ ϩⲉⲛⲧⲁⲗⲁⲓⲡⲱⲣⲟⲥ ⲛⲉ ⲛⲉⲛⲧⲁⲕⲁⲁⲩ ⲛⲃⲗⲗⲉ ϣⲁⲃⲟⲗ ⸗ ⲻ
…
7 ⲛⲧϩⲉ ⲅⲁⲣ ⲉⲧⲉⲛⲁϣⲉ ⲧⲉⲕⲙⲛⲧⲧⲩⲣⲁⲛⲛⲟⲥ ⲉϩⲣⲁⲓ ⲉϫⲛⲛⲉⲛⲧⲁⲩϩⲉ ϩⲁⲣⲁⲧⲕ ⲁⲕϩⲱⲙ ⲉϫⲱⲟⲩ · ⲛⲥⲉⲛⲁϣϣⲁϫⲉ ⲁⲛ ⲟⲛ ⲉⲧⲉⲕⲙⲛⲧϭⲱⲃ ⲛⲛⲁϩⲣⲛⲛⲉⲧⲕϩⲉ ϩⲁⲣⲁⲧⲟⲩ ⲉⲩϩⲱⲙ ⲉϫⲱⲕ .
…
8 ⲉⲙⲛⲧⲕⲕⲉϭⲟⲙ ⲏ ⲕⲉϩⲱⲃ ⲉⲁⲁϥⲛⲁⲩ ϩⲛⲛⲉⲕⲙⲛⲧⲁⲥⲉⲃⲏⲥ . ⲛⲥⲁⲧⲣⲉⲕϣⲉⲉⲓ ⲙⲡⲃⲟⲗ ⲛⲛⲉⲩⲥⲱⲙⲁ ϩⲛϩⲉⲛϣⲱⲛⲉ ⲉⲩϣⲟⲃⲉ ϩⲛϩⲁϩ ⲙⲙⲓⲛⲉ ⲛⲧⲕⲁⲥ ⲕⲁⲧⲁⲡⲉⲛⲧⲁⲛϫⲟⲟϥ
…
9 ϫⲉⲉⲛⲉⲛⲧⲁⲕϣⲥⲟⲕⲟⲩ ⲣⲱ ⲉⲛⲧⲟⲩ ⲉϩⲣⲁⲓ ⲉⲛⲉⲕⲃⲟⲧⲉ · ⲛⲉ ⲟⲩ ⲉⲣⲟⲕ ⲡⲉ ⲉⲧⲣⲉⲕϯⲟⲩⲃⲏⲩ ϩⲛϩⲉⲛⲫⲁⲛⲧⲁⲥⲓⲁ ⲉⲩⲟ ⲛϩⲁϩ ⲛⲥⲙⲟⲧ · ϩⲱⲥⲧⲉ ⲉⲧⲙⲧⲣⲉⲕⲕⲁⲁⲩ ⲉⲛⲕⲟⲧⲕ ⲉⲩⲛⲁⲩ ⲉⲣⲟⲕ ⲉⲕϫⲁϩⲙ ⲧⲏⲣⲕ · ⲁⲩⲱ ⲉⲣⲉϫⲱϩⲙ ⲛⲓⲙ ⲙⲡⲉⲕⲕⲱⲧⲉ · ⲉⲕⲡⲱⲱⲛⲉ ⲉϩⲟⲩⲛ ⲉⲛⲉⲕⲃⲟⲧⲉ . ⲁⲩⲱ ⲉⲣⲉⲛⲉⲕⲃⲟⲧ ⲉⲡⲱⲱⲛⲉ ⲉϩⲟⲩⲛ ⲉⲣⲟⲕ . ϩⲱⲥⲧⲉ ⲉⲧⲣⲉⲩⲕⲁⲃⲟⲗ ⲉⲩϩⲟⲣⲡ . ⲏ ⲉⲩϣⲁⲛⲧⲱⲟⲩⲛ ⸗
…
10 ⲡϩⲟϥ ⲅⲁⲣ ⲙⲛⲧⲁϥⲕⲉϭⲟⲙ ⲛⲥⲁⲧⲉϥⲙⲁⲧⲟⲩ .
…
11 ⲙⲛϭⲓϫ ⲙⲙⲟϥ . ⲟⲩⲇⲉ ⲟⲩⲉⲣⲏⲧⲉ . ⲙⲛⲧⲁⲡ ⲟⲩⲧⲉ ⲉⲓⲃ ·
…
12 ⲁⲩⲱ ⲉⲣⲉⲛⲣⲱⲙⲉ ⲣϩⲟⲧⲉ ⲁⲛ ϩⲏⲧⲟⲩ ⲛⲛⲉϥⲛⲁⲁϫⲉ · ⲁⲗⲗⲁ ϩⲏⲧⲥ ⲛⲧⲉϥⲙⲁⲧⲟⲩ .
…
13 ⲙⲙⲟⲛ ⲟⲩϩⲱⲱϥ ⲡⲉ · ϩⲱⲥ ⲉϣϫⲉ ⲟⲩ ⲕⲁⲡⲉⲛⲛⲟⲩϩ ⲡⲉ ⲉϥϣⲟⲓ ⲉϥϭⲟⲛ ⲉⲙⲁⲧⲉ ⲉϥⲙⲟⲧⲛ ⲛⲧⲁⲕⲟϥ · ⲁⲩⲱ ⲡⲉⲧⲛⲁⲣⲃⲟⲗ ⲉⲧⲉϥⲙⲁⲧⲟⲩ ⲛϥⲛⲁⲙⲟⲩ ⲁⲛ ⲉⲧⲃⲏϩⲧϥ ⸗ ⲻ
…
14 ⲛⲧⲟⲕ ϩⲱⲱⲕ ⲛϩⲟⲩⲟ ⲡϫⲁϫⲉ
…
15 ⲙⲙⲧⲁⲕⲕⲉϭⲟⲙ ⲙⲙⲁⲩ ⲛⲥⲁⲧⲙⲁⲧⲟⲩ ⲛⲛⲉⲕⲛⲟⲃⲉ ·
…
16 ⲕϣⲁⲁⲧ ⲅⲁⲣ ⲁⲩⲱ ⲕϣⲏϣ ⲉⲃⲟⲗ ⲡⲁⲣⲁⲡϩⲟϥ · ⲟⲩⲙⲟⲛⲟⲛ ϫⲉⲁⲡⲛⲟⲩⲧⲉ ⲁⲁⲕ ⲛⲉⲃⲓⲏⲛ ϩⲛⲛⲁⲓ . ⲁⲗⲗⲁ ⲡⲉⲕⲕⲉⲥⲙⲟⲧ ⲟⲛ ⲛⲥⲱⲙⲁ ⲁϥⲟⲩⲟϣϥϥ ⲛⲧϩⲉ ⲉⲧⲥⲏϩ · ⲁⲩⲱ ⲛⲧϩⲉ ⲉⲧⲛⲉⲓⲙⲉ ⲉⲣⲟⲕ ϩⲓⲧⲛⲧⲉⲕⲙⲛⲧϭⲱⲃ ⸗
…
17 ⲕⲁⲛ ⲡⲥⲱⲙⲁ ⲣⲱ ⲙⲡϩⲟϥⲟⲩⲟϫ ⲛⲁϥ ϣⲁⲛⲧⲟⲩⲧⲁϩⲟϥ · ⲛⲉⲧⲣϩⲟⲧⲉ ⲅⲁⲣ ϩⲏⲧⲕ ⲙⲛⲛⲉⲕⲫⲁⲛⲧⲁⲥⲓⲁ ⲛⲧⲉⲩϣⲏ . ⲁⲩⲱ ⲟⲛ ϩⲙⲡⲉϩⲟⲟⲩ · ⲛⲁⲓ ⲉⲧⲉⲣⲉⲡⲉⲧϫⲱ ⲛⲛⲁⲓ ⲥⲟⲟⲩⲛ ⲙⲙⲟⲕ ⲛϩⲏⲧⲟⲩ ·
…
18 ⲉⲩⲣϩⲟⲧⲉ ϩⲏⲧϥ ⲛⲟⲩⲕⲱⲱⲥ ·
…
19 ⲁⲩⲱ ⲡⲉⲧⲛⲁⲣⲃⲟⲗ ⲉⲛⲉⲕⲙⲛⲧⲁⲥⲉⲃⲏⲥ . ⲙⲡⲉϥⲣⲟⲟⲩϣ ⲁⲛ ⲡⲉ ϫⲉⲕϣⲟⲟⲡ ⸗ ⲻ
…
20 ⲉϣϫⲉ ⲟⲩⲛⲧⲁⲕ ϩⲉⲛⲥⲏϥⲉ ⲛⲟⲩⲟⲩⲟⲉⲓϣ · ⲁⲗⲗⲁ ⲧⲉⲛⲟⲩ ⲙⲛⲧⲁⲕ . ⲟⲩⲁⲧϭⲟⲙ ⲅⲁⲣ ⲡⲉ ⲉⲧⲣⲉⲧⲉⲅⲣⲁⲫⲏ ϫⲉⲡⲉⲧϣⲟⲟⲡ ⲁⲛ · ϫⲉⲁⲛⲉⲕⲥⲏϥⲉ ⲱϫⲛ ⲉⲡⲧⲏⲣϥ ·
…
21 ⲁⲩⲱ ⲉϣϫⲉ ⲟⲩⲛⲟⲩⲟⲛ ⲟⲛ ϣⲟⲟⲡ ⲛⲁⲕ ⲛⲟⲩ ⲕⲁⲛ ⲛⲉ .
…
22 ⲁⲗⲗⲁ ⲛⲁⲛⲉⲛⲧⲁⲩⲣⲁⲧϩⲏⲧ ⲛⲉⲉⲁⲩⲧⲁⲁⲩ ⲛⲁⲕ ⲉⲣⲟⲟⲩ ⲙⲁⲩⲁⲁⲩ . ⲉⲃⲟⲗ ϫⲉⲛⲣⲱⲙⲉ ⲛⲉⲧϯϭⲟⲙ ⲛⲁⲕ ⲉⲧⲣⲉⲕϭⲙϭⲟⲙ ⲉϩⲟⲩⲛ ⲉⲣⲟⲟⲩ ⸗
…
23 ϯⲛⲁⲧⲁⲙⲉ ⲟⲩⲟⲛ ⲛⲓⲙ ⲉⲡⲉⲧϣⲟⲟⲡ ⲙⲙⲟⲕ · ⲁⲩⲱ ⲡⲉⲛⲧⲁⲩⲁⲁϥ ⲛⲁⲕ .
…
24 ⲛⲧϩⲉ ⲅⲁⲣ ⲛⲟⲩⲙⲁⲧⲟⲓ ⲉⲁⲡⲣⲣⲟ ϣⲱⲱⲧ ⲛⲛⲉϥϭⲓϫ ⲙⲛⲛⲉϥⲟⲩⲉⲣⲏⲧⲉ . ⲁⲩⲱ ⲁϥϥⲓ ⲛⲧⲟⲟⲧϥ ⲛⲧⲉϥⲥⲏϥⲉ ⲙⲛⲛⲉϥϩⲟⲡⲗⲟⲛ . ⲁⲩⲱ ⲛⲉϥϩⲛⲁⲁⲩ ⲧⲏⲣⲟⲩ ⲙⲙⲓϣⲉ . ⲁϥⲁⲁϥ ⲛϣⲙⲙⲟ ⲉⲡⲉϥⲙⲁ ⲁⲩⲱ ⲉⲧⲉϥⲡⲟⲗⲓⲥ · ⲉⲃⲟⲗ ϫⲉⲁϥϯⲟⲩⲃⲏϥ . ⲁⲩⲱ ⲉⲧⲃⲉⲧⲉϥⲙⲛⲧϩⲁⲣϣ ϩⲏⲧ
…
25 ⲁϥⲕⲁⲁϥ ⲉϥⲟⲛϩ ϣⲁⲡⲉϩⲟⲟⲩ ⲉⲧϥⲟⲩⲱϣ ⲉϥⲓⲛⲧⲉϥ ⲯⲩⲭⲏ ⲛϩⲏⲧϥ .
…
26 ⲧⲁⲓⲧⲉ ⲧϩⲉ ⲛⲧⲁⲩⲁⲁⲥ ⲛⲁⲕ .
…
27 ⲧⲁⲓ ⲧⲉ ⲧϩⲉ ⲛⲧⲁⲩϣⲁϣⲕ ⲉⲃⲟⲗ ⲁⲩⲛⲟϫⲕ ⲉⲃⲟⲗ ϩⲛⲧⲡⲉ · ⲁⲩⲱ ⲉⲃⲟⲗ ϩⲛⲧⲉⲥⲧⲣⲁⲧⲓⲁ ⲧⲏⲣⲥ ⲛⲛⲁⲅⲅⲉⲗⲟⲥ . ϫⲉⲁⲕⲧⲟⲗⲙⲁ ⲛⲥⲟϭ ⲁⲩⲱ ⲡⲃⲗⲗⲉ ⲉⲛⲅⲉⲓⲙⲉ ⲁⲛ ϫⲉⲛⲉⲡⲟⲙⲉ ⲡⲉⲧⲛⲁϯⲟⲩⲃⲉ ⲛⲉⲛⲧⲁϥⲡⲗⲁⲥⲥⲉ ⲙⲙⲟϥ ⲛⲟⲩϩⲛⲟⲉϥⲥⲏϣ . ⲁⲩⲱ ⲛⲟⲩϩⲛⲟ ⲁⲛ ⲉϥⲧⲁⲉⲓⲏⲩ ϫⲓⲛⲙⲡⲓⲛⲁⲩ .
…
28 ⲟⲩⲧⲉ ⲟⲛ ϩⲁⲧϩⲏ ⲙⲡⲁⲧⲕ ϩⲉⲉⲃⲟⲗ ⲙⲡⲕⲁϩ ⲉⲣⲁⲧⲕ ϩⲙⲙⲉ ⲉⲛⲉϩ ·
…
29 ⲙⲡⲉⲧⲁⲉⲓⲟ ⲟⲛ ϣⲱⲡⲉ ⲛⲁⲕ ⲉⲛⲉϩ ·
…
30 ⲕⲥϩⲟⲩⲟⲣⲧ ⲅⲁⲣ ⲛⲛⲁϩⲣⲙⲡⲛⲟⲩⲧⲉ ϫⲓⲛⲉϥⲧⲁⲙⲓⲟ ⲙⲙⲟⲕ ·
…
31 ϥⲥⲟⲟⲩⲛ ⲅⲁⲣ ⲉⲛⲁⲧⲉⲕⲁⲣⲭⲏ . ⲙⲛⲛⲁⲧⲉⲕ ϩⲁⲏ ϫⲉϩⲉⲛⲡⲟⲛⲏⲣⲟⲛ ⲧⲏⲣⲟⲩ ⲛⲉ ϩⲓⲕⲁⲕⲓⲁ ϩⲓⲫⲑⲟⲛⲏⲣⲓⲁ ·
…
32 ⲡⲇⲣⲁⲡⲉⲧⲏⲥ ⲛⲁⲙⲉ ⲛϩⲙϩⲁⲗ ⲛⲁⲧϣⲁⲩ · ⲛⲧⲁϥⲡⲱⲧ ⲉⲃⲟⲗ ⲙⲡⲉϥϫⲟⲉⲓⲥ . ⲉⲛⲅⲛⲁϣⲡⲱⲧ ⲁⲛ ⲁⲩⲱ ⲉⲛⲅⲛⲁϣϩⲱⲡ ⲁⲛ ⲉⲣⲟϥ ⸗
…
33 ϯⲥⲟⲟⲩⲛ ⲛⲟⲩϩⲱⲃ ⲉⲛϥϩⲏⲡ ⲁⲛ ⲉⲛⲥⲁⲃⲉ ⲟⲩ .
…
34 ϫⲉⲡⲉⲭⲣⲓⲥⲧⲟⲥ ⲙⲉⲛ ⲛⲧⲁϥⲁⲛⲉⲭⲉ ⲁⲩⲱ ⲛⲧⲁϥϥⲓ ϩⲁⲛⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ ⲉⲃⲟⲗ ϩⲓⲧⲟⲟⲧⲕ ϩⲙⲡⲉⲕϣⲟϫⲛⲉ ⲙⲡⲟⲛⲏⲣⲟⲛ
…
35 ⲛⲧⲟⲕ ⲇⲉ ⲉⲧⲃⲉⲧⲉⲕⲙⲛⲧϭⲱⲃ ⲛⲅϭⲛ ⲉⲕⲛⲁⲣ ⲟⲩ ⲁⲛ ⲛⲛⲁϩⲣⲛⲛⲉⲧⲁⲝⲓⲟⲩ ⲉⲧⲣⲉⲓⲏⲥⲟⲩⲥ ⲧⲁⲕⲟⲕ ⲙⲡⲕⲱⲧⲉ ⲙⲡⲉϥⲗⲁⲟⲥ ⲁⲩⲱ ⲛϥϥⲟⲧⲕ ⲉⲃⲟⲗ ⸗
…
36 ⲉⲃⲟⲗ ⲇⲉ ϫⲉⲛⲧⲕ ⲟⲩ ⲧⲓⲙⲓⲛⲉ ⲫⲁⲛⲉⲣⲟⲛ
…
37 ⲟⲩⲕ ⲉⲧⲓ ⲙⲛϩⲱⲕ . ⲟⲩⲧⲉ ⲥⲏϥⲉ ϩⲓⲕⲉⲗⲉⲃⲓⲛ . ⲙⲛⲙⲟϫϩ ⲛⲡⲡⲉⲓⲣⲟⲛ . ⲙⲛⲡⲟⲇⲏⲣⲏ . ⲟⲩⲧⲉ ⲃⲁⲇⲇⲉⲓⲛ · ⲙⲛⲉⲓⲛⲉ ⲛⲉⲃⲣⲏϭⲉ · ⲙⲛϩⲛⲟ . ⲟⲩⲧⲉ ⲙⲛϩⲱⲕ ϣⲟⲟⲡ ⲛⲁⲕ ϫⲓⲛⲡⲉⲓⲛⲁⲩ . ⲛⲧϩⲉ ⲛⲛⲁϩⲣⲁⲫⲁⲏⲗ ⲙⲛⲅⲁⲃⲣⲓⲏⲗ ⲁⲩⲱ ⲛⲁⲡⲛⲟϭ ⲛⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲙⲛⲛⲁⲛⲁⲅⲅⲉⲗⲟⲥ ⲧⲏⲣⲟⲩ ⸗
…
38 ⲛⲉⲧϣⲟⲟⲡ ⲛⲁⲕ ⲁⲩⲱ ⲉⲧⲕⲣϩⲟⲩⲟ ⲛϩⲏⲧⲟⲩ . ϯⲛⲁⲟⲩⲟⲛϩ ⲟⲩ ⲉⲃⲟⲗ ⲉⲟⲩⲟⲛ ⲛⲓⲙ ·
…
39 ⲉ ⲡⲙⲁ ⲛⲟⲩϩⲱⲕ ⲛⲁⲅⲅⲉⲗⲟⲥ ⲁⲩⲱ ⲟⲩⲍⲱⲛⲏ . ⲟⲩϩⲱⲕ ⲛⲇⲓⲁⲃⲟⲗⲟⲥ ⲡⲉⲛⲧⲁⲕⲧⲁⲁϥ ϩⲓⲱⲱⲕ . ⲁⲩⲱ ⲟⲩⲙⲟϫϩ ⲛϭⲟⲗ ⲡⲉⲛⲧⲁⲕⲙⲟⲣⲕ ⲙⲙⲟϥ ⸗
…
40 ⲉⲡⲙⲁ ⲛⲟⲩⲉⲓⲛⲉ ⲛⲉⲃⲣⲏϭⲉ ⲁⲩⲱ ⲟⲩϩⲃⲥⲱ ⲉⲥⲣⲟⲩⲟⲉⲓⲛ . ⲟⲩⲉⲓⲛⲉ ⲛⲕⲁⲕⲉ ⲡⲉⲧϣⲟⲟⲡ ⲙⲙⲟⲕ · ⲁⲩⲱ ⲟⲩϩⲟⲓⲧⲉ ⲛⲕⲣⲙⲧⲥ ϩⲓϩⲧⲟⲙⲧⲙ ϩⲓϭⲟⲥⲙ ⲧⲉⲧϩⲓϫⲱⲕ ⲡⲕⲁⲕⲉ ⲧⲏⲣϥ ⸗
…
41 ⲉⲡⲙⲁ ⲛⲟⲩⲥⲏϥⲉ ⲛⲁⲅⲅⲉⲗⲟⲥ ⲁⲩⲱ ⲟⲩϭⲟⲙ ⲙⲡⲛⲉⲩⲙⲁ ⲉϥⲟⲩⲁⲁⲃ · ⲟⲩ ⲙⲛⲧⲁⲧϭⲟⲙ ⲧⲉⲧϣⲟⲟⲡ ⲛⲁⲕ · ⲁⲩⲱ ⲡⲟⲩⲱϣϥ ⲙⲛⲡϫⲱϩⲙ ⲧⲏⲣϥ · ⲁⲩⲱ ⲛⲉⲕϩⲃⲏⲩⲉ ⲧⲏⲣⲟⲩ ⲉⲩϣⲟⲟⲡ ⲛⲁⲕ ⲉⲃⲟⲗ ϩⲛⲛϫⲓⲛϭⲟⲛⲥ ⲙⲛⲙⲙⲛⲧⲛⲟⲉⲓⲕ · ⲙⲛⲛⲥⲱⲱϥ ⲁⲩⲱ ⲛⲕⲱϩ . ⲙⲛⲛⲉⲕ ⲕⲉⲙⲛⲧⲁⲥⲉⲃⲏⲥ ⲉⲧⲛⲣⲭⲣⲉⲓⲁ ⲁⲛ ⲛϫⲟⲟⲩ ⲟⲩⲁ ⲟⲩⲁ ·
…
42 ⲁⲛⲥⲟⲩⲱⲛⲟⲩ ⲅⲁⲣ ⲧⲏⲣⲟⲩ ⲁⲩⲱ ⲁⲛⲉⲓⲙⲉ ϫⲉⲛⲧⲟⲕ ⲁⲩⲱ ⲛⲉⲕⲛⲟⲃⲉ ⲟⲩϩⲩⲗⲏⲧⲉ ⲛϭⲗⲙ ⲉⲥⲕⲏ ϩⲓϫⲛⲛⲉⲥⲉⲣⲏⲩ ⲉⲡⲉⲧⲛⲁⲛⲉϫⲟⲩⲕⲱϩⲧ ⲉϫⲱⲥ ⲁⲩⲱ ⲛϥϫⲉⲣⲱϥ ⲛϩⲏⲧⲥ
…
43 ⲥⲛⲁⲣⲕⲣⲙⲉⲥ ⲛⲛⲁϩⲣⲁϥ · ⲡⲉⲧⲛⲁⲁⲙⲉⲗⲉⲓ ⲇⲉ ⲉϣⲁⲥⲣⲥⲟⲧⲉ ϩⲓⲥⲏϥⲉ ϩⲓⲥⲕⲉⲩⲟⲥ ⲛⲓⲙ ⲙⲡⲟⲗⲉⲙⲓⲕⲟⲛ ⲛⲛⲁϩⲣⲁϥ ⸗
…
44 ϩⲉⲑⲛⲟⲥ ⲅⲁⲣ ⲛⲓⲙ ⲛⲁⲧⲛⲟⲩⲧⲉ ⲛⲧⲁⲕⲣⲁϩⲧⲟⲩ ϩⲛⲛⲉⲕⲁⲛⲟⲙⲓⲁ ⲧⲏⲣⲟⲩ · ⲁⲩⲱ ϩⲛⲟⲩⲙⲉⲣⲉϩ ⲁⲛ ⲏ ⲕⲉⲥⲟⲧⲃⲉϥ ·
…
45 ⲛⲣⲙⲛⲛⲟⲩⲧⲉ ⲇⲉ ⲛⲁⲙⲉ ⲉⲩⲣⲱϩⲧ ⲛⲧⲟⲟⲩ ⲙⲙⲟⲕ ϩⲙⲡⲉⲩⲧⲃⲃⲟ ⲁⲩⲱ ϩⲛⲧⲉⲩⲇⲓⲕⲁⲓⲟⲥⲩⲛⲏ ⲙⲙⲓⲛⲉ ⲛⲓⲙ ⲛϩⲱⲃ ⲛⲁⲅⲁⲑⲟⲛ ϩⲛⲙⲛⲧⲉⲩⲥⲉⲃⲏⲥ ⲛⲓⲙ ⸗
…
46 ⲕⲟⲩⲟⲛϩ ⲉⲃⲟⲗ ⲟⲩⲛ ⲁⲗⲏⲑⲱⲥ ϫⲉⲧⲉⲕϭⲟⲙ ⲁⲛ ⲧⲉ ⲉⲛⲉϩ ·
…
47 ⲟⲩⲧⲉ ⲛⲧⲟⲕ ⲟⲩⲧⲉ ⲛⲉⲕⲇⲁⲓⲙⲱⲛ ⲉⲧⲣⲉⲟⲩⲣⲱⲙⲉ ⲣⲛⲟⲃⲉ ⲭⲱⲣⲓⲥ ⲧⲣⲉⲡⲉϥⲟⲩⲱϣ ⲣϣⲟⲣⲡ ⲉⲡⲉⲕⲙⲉⲉⲩⲉ · ⲁⲩⲱ ⲧⲉϥⲉⲡⲓⲑⲩⲙⲓⲁ ϩⲁⲧϩⲏ ⲙⲡⲉⲕϣⲟϫⲛⲉ . ⲏ ⲉⲥⲟⲩⲏϩ ⲛⲥⲱϥ ⸗
…
48 ⲉⲧⲃⲉⲙⲡⲉⲓⲣⲁⲥⲙⲟⲥ ⲇⲉ ⲉⲧⲕⲃⲗⲁⲡⲧⲉⲓ ⲛϩⲏⲧⲟⲩ ⲛⲛⲥⲱⲙⲁ ⲛⲛⲉⲧϯⲟⲩⲃⲉ ⲛⲉⲕⲗⲟⲅⲓⲥⲙⲟⲥ ⲛⲃⲟⲧⲉ . ⲙⲡⲱⲕ ⲁⲛ ⲡⲉ ⲡϩⲱⲃ ·
…
49 ⲁⲗⲗⲁ ⲡⲁⲧⲁⲛⲟⲭⲏ ⲙⲡⲛⲟⲩⲧⲉ ⲡⲉ ·
…
50 ⲁⲩⲱ ⲣⲱ ϫⲉϭⲟⲙ ⲛⲓⲙ ⲛⲣⲉϥⲣϩⲱⲃⲉ ⲡⲡⲟⲛⲏⲣⲟⲛ ⲟⲩϭⲟⲙ ⲁⲛ ⲧⲉ · ⲛⲧϩⲉ ⲛⲧⲉⲧⲛϩⲏⲧⲕ ⲁⲩⲱ ⲉⲧϩⲛⲛⲉⲕⲣⲱⲙⲉ .
…
51 ⲛⲉⲕⲣⲱⲙⲉ ⲇⲉ ⲏ ⲛⲉⲛⲧⲁⲩⲣ ⲛⲉⲕⲣⲱⲙⲉ ⲛⲉ ⲛⲁⲓ ⲧⲏⲣⲟⲩ ⲛⲧⲁⲡⲉⲩⲁⲅⲅⲉⲗⲓⲟⲛ ⲟⲡⲟⲩ ⲉⲡⲧⲱϩ ⲉⲧⲟⲩⲛⲁⲣⲟⲕϩϥ ϩⲛⲟⲩⲕⲱϩⲧ ⲉⲙⲉϥⲱϣⲙ ⸗
…
52 ⲁⲛⲁⲩϫⲉ ⲉⲛⲉⲓⲥⲱϣ ⲛⲧⲉⲓϩⲉ ⲛⲟⲩⲁⲅⲅⲉⲗⲟⲥ ⲛⲧⲉⲡⲛⲟⲩⲧⲉ ⲙⲏ ⲅⲉⲛⲟⲓⲧⲟ ·
…
53 ϥⲥⲙⲁⲙⲁⲁⲧ ⲛⲧⲟϥⲛ ϩⲟⲩⲟ ·
…
54 ⲛⲉϥⲛⲁⲣⲟⲕϩⲧ ⲡⲉ ϩⲙⲡⲉϥϣⲁϩ ⲛⲕⲱϩⲧ · ⲉⲃⲟⲗ ϫⲉ ⲟⲩⲛϭⲟⲙ ⲙⲙⲟϥ ·
…
55 ⲛⲧⲟⲕ ⲇⲉ ⲕⲣⲟⲛⲟⲥ ϯⲥⲱϣ ⲙⲙⲟⲕ ·
…
56 ⲁⲩⲱ ϯϫⲱ ⲛⲛⲁⲓ ⲉϩⲟⲩⲛ ⲉⲣⲟⲕ ⲙⲛⲛⲉⲧⲣϩⲟⲩⲟ ⲉⲛⲁⲓ ϩⲙⲡⲉϩⲟⲟⲩ . ⲙⲁⲗⲗⲟⲛ ⲇⲉ ϩⲛⲧⲉⲟⲩϣⲏ ⲁⲩⲱ ⲙⲙⲏⲛⲉ ⲙⲙⲏⲛⲉ .
…
57 ⲙⲡⲕϭⲛ ⲉⲕⲛⲁⲣⲟⲩ ⲛⲁⲓ ⸗
…
58 ⲉⲛⲉⲟⲩⲛϭⲟⲙ ⲅⲁⲣ ⲙⲙⲟⲕ . ⲁⲩⲱ ⲉⲛⲉⲧⲃⲟⲏⲑⲉⲓⲁ ⲁⲛ ⲧⲉ ⲙⲡⲉⲭⲣⲓⲥⲧⲟⲥ ⲛⲉⲕⲛⲁϭⲱ ⲁⲛ ⲡⲉ · ⲛ ⲟⲩϫⲣⲟ ⲛⲁⲕ ⲁⲛ ⲡⲉ ϫⲉⲁⲕⲙⲉϩⲡⲥⲱⲙⲁ ⲛⲧⲕⲁⲥ ⲙⲡⲟⲛⲏⲣⲟⲛ
…
59 ⲉϣϫⲉ ⲧⲁⲓ ⲧⲉ ⲧⲉⲕϭⲟⲙ . ⲛⲓⲙ ⲛⲛⲉⲧⲕϭⲣⲟⲉⲓⲧ ⲉⲣⲟⲟⲩ ⲛⲥⲁⲛⲉⲛⲧⲁⲕⲣⲁϩⲧⲟⲩ ⲉϩⲣⲁⲓ ⲉⲙⲡⲁⲣⲁⲫⲩⲥⲓⲥ ⲙⲙⲓⲛⲉ ⲛⲓⲙ ⲙⲛⲛⲥⲁ ⲡⲥⲟⲟⲩⲛ . ⲁⲩⲱ ϩⲛⲧⲙⲛⲧⲁⲧⲥⲟⲟⲩⲛ ⲁⲛ ⸗
…
60 ⲟⲩⲟⲛ ⲅⲁⲣ ⲛⲓⲙ ⲉⲧⲉⲙⲡⲁⲧⲟⲩⲥⲟⲩⲱⲛⲅ ⲙⲛⲛⲉⲕⲙⲁⲅⲓⲁ · ⲟⲩⲛⲧⲁⲩⲟⲩⲥⲩⲛⲭⲱⲣⲏⲥⲓⲥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ·
…
61 ⲏ ⲉⲕⲟⲛⲕⲣⲓⲧⲏⲥ ⲡⲥⲁϩ ⲛ ⲙⲙⲛⲧⲥⲁ ⲛⲕⲟⲧⲥ · ⲥⲟⲡⲙⲉⲛⲉⲕⲡⲓⲑⲉ ⲛⲛⲉⲧⲕⲉⲓⲛⲉ ⲙⲙⲟⲟⲩ ⲉϩⲣⲁⲓ ⲉ ⲡⲛⲟⲃⲉ ϫⲉⲡⲛⲟⲩⲧⲉ ⲛⲁϥⲓⲱⲡ ⲛⲙⲙⲁⲩ ⲁⲛ · ⲥⲟⲡ ⲉⲕϣⲧⲟⲣⲧⲣ ⲙⲛϩⲏⲧ ⲛⲛⲉⲧⲟⲩⲱϣ ⲉ ⲉⲓ ⲉⲃⲟⲗ ϩⲛⲛⲉⲕⲡⲟⲛⲏⲣⲟⲛ ϫⲉⲡⲛⲟⲩⲧⲉ ⲛⲁⲕ ⲱ ⲛⲁⲩ ⲉⲃⲟⲗ ⲁⲛ ·
…
62 ϩⲱⲥ ⲉϣϫⲉ ⲛⲧⲁⲕⲥⲟⲩⲛ ⲡⲙⲉⲉⲩⲉ ⲙⲡⲉⲧϫⲟⲥⲉ . ⲁⲩⲱ ⲙⲙⲛⲧϣⲁ ⲛϩⲧⲏϥ ⲛⲛϣⲁϫⲉ ⲛϯⲫⲱⲛⲏ .
…
63 ϫⲉⲙⲁⲣⲉⲡⲁⲥⲉⲃⲏⲥ ⲕⲱ ⲛⲥⲱϥ ⲛⲛⲉϥϩⲓⲟⲟⲩⲉ . ⲁⲩⲱ ⲡⲣⲱⲙⲉ ⲛⲁⲛⲟⲙⲟⲥ ⲛⲛⲉϥϣⲟϫⲛⲉ .
…
64 ⲙⲁⲣⲉϥⲕⲟⲧϥ ⲉⲡϫⲟⲉⲓⲥ ⲁⲩⲱ ϥⲛⲁⲛⲁ ⲛⲁϥ · ϫⲉϥⲛⲁⲧⲁϣⲉⲕⲱ ⲉⲃⲟⲗ ⲉⲙⲁⲧⲉ ⲛⲛⲉⲧⲛⲛⲟⲃⲉ ·
…
65 ⲛⲉⲣⲉⲛⲁϣⲟϫⲛⲉ ⲅⲁⲣ ⲟ ⲁⲛ ⲛⲧϩⲉ ⲛⲛⲉⲧⲛϣⲟϫⲛⲉ · ⲁⲩⲱ ⲛⲉⲣⲉⲛⲁϩⲓⲟⲟⲩⲉ ⲟ ⲁⲛ ⲛⲧϩⲉ ⲛⲛⲉⲧⲛϩⲓⲟⲟⲩⲉ .
…
66 ⲁⲗⲗⲁ ⲛⲧϩⲉ ⲉⲧⲉⲣⲉⲧⲡⲉ ⲟⲩⲏⲩ ⲉⲃⲟⲗ ⲙⲡⲕⲁϩ . ⲧⲁⲓ ⲧⲉ ⲧϩⲉ ⲉⲧⲉⲣⲉⲧⲁϩⲓⲏ ⲟⲩⲏⲩ ⲉⲃⲟⲗ ⲛⲧⲉⲧⲛϩⲓⲏ . ⲁⲩⲱ ⲛⲉⲧⲛⲙⲉⲉⲩⲉ ⲙⲡⲁⲙⲉⲉⲩⲉ ⸗
…
67 ⲙⲛⲧⲉⲕϭⲟⲙ ⲙⲙⲁⲩ ⲡⲇⲁⲓⲙⲟⲛⲓⲟⲛ ⲛⲥⲁⲧⲁⲕⲟ ·
…
68 ⲟⲩⲙⲛⲧⲣⲉϥϫⲓ ⲟⲩⲁ ⲡⲉϫⲟⲟⲥ ϫⲉ ⲟⲩⲛϭⲟⲙ ⲙⲙⲟⲕ ⲉⲧⲁⲛⲟ · ⲏ ⲉⲣⲟⲩϩⲱⲃ ⲉⲛⲁⲛⲟⲩϥ . ⲛⲧϩⲉ ⲉⲧⲉⲣⲉⲛϩⲉⲗⲗⲏⲛ ⲙⲉⲉⲩⲉ ⲉⲡⲁⲓ . ϣⲁⲛⲧⲕⲧⲁⲁⲩ ⲉⲧⲟⲟⲧϥ ⲙⲡϣⲁⲁⲣ ⲛⲧⲟⲣⲅⲏ ⲙⲡⲛⲟⲩⲧⲉ ⸗ ⲻ
…
69 ⲉϣⲁⲣⲉⲛⲉⲧⲉ ⲧⲉⲩⲥⲩⲛⲏⲑⲓⲁ ⲡⲉ ⲙⲓϣⲉ ⲛⲙⲙⲁⲕ ϫⲟⲟⲥ ⲛⲧⲉⲓϩⲉ ⲉⲧⲃⲉ ϫⲉ ⲕϯϩⲓⲥⲉ ⲛⲛⲉⲩⲥⲱⲙⲁ ϩⲛϩⲉⲛⲧⲕⲁⲥ ·
…
70 ϫⲉⲥⲁϩⲱⲕ ⲉⲃⲟⲗ ⲛⲛⲥⲱⲙⲁ ⲙⲡⲉⲭⲣⲓⲥⲧⲟⲥ ⲁⲩⲱ ⲛⲉϥⲙⲉⲗⲟⲥ ϫⲉⲉⲩⲛⲁϩⲩⲡⲟⲧⲁⲥⲥⲉ ⲛⲁϥ ⲁⲩⲱ ⲛⲥⲉϣⲙϣⲉ ⲛⲁϥ · ⲁⲩⲱ ⲛⲥⲉϣⲡϩⲙⲟⲧ ⲛⲧⲟⲟⲧϥ ⲉⲩϩⲛ ⲛⲕⲉϣⲱⲛⲉ .
…
71 ⲉⲡⲟⲩⲱⲛϩ ⲉⲃⲟⲗ ϫⲉⲙⲛⲧⲁⲕϩⲏⲩ . ⲏ ⲕⲛⲁϭⲛϩⲏⲩ ⲁⲛ ϩⲛⲣⲱⲙⲉ ⲉϥⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⸗
…
72 ⲛⲧⲁⲡⲇⲓⲕⲁⲓⲟⲥ ⲓⲱⲃ ⲣⲣⲙⲙⲁⲟ ⲁⲛ ϩⲙⲛⲛⲟⲩⲧⲉ ⲉⲧⲃⲉⲛⲉϥⲙⲛⲧⲛⲁ ⲙⲁⲩⲁⲁⲩ · ⲁⲗⲗⲁ ⲉⲧⲃⲉⲛⲕⲉϣⲱⲛⲉ ·
…
73 ⲗⲁⲍⲁⲣⲟⲥ ⲟⲩ ⲙⲟⲛⲟⲛ ϫⲉⲛⲉⲙⲛⲧⲁϥⲉϯ · ⲁⲗⲗⲁ ⲛⲉϥⲣⲡⲕⲉⲉⲡⲉⲓⲑⲩⲙⲉⲓ ⲉⲥⲉⲓ ϩⲛⲛⲉϣⲁⲩϩⲉ ⲉⲃⲟⲗ ϩⲛⲧⲉⲧⲣⲁⲡⲉⲍⲁ ⲙⲡⲓⲣⲙⲙⲁⲟ ⲉⲧⲙⲙⲁⲩ ·
…
74 ⲁⲩⲱ ⲛⲧⲛⲛⲁⲩ ⲁⲛ ⲉⲕⲉϩⲱⲃ ⲉⲁⲩⲧⲉⲕϥⲉ ⲡⲧⲟⲡ ⲙⲡⲛⲟϭ ⲙⲡⲁⲧⲣⲓⲁⲣⲭⲏⲥ ⲉⲧⲃⲏⲏⲧϥ ⲛⲥⲁϥⲓ ϩⲁϩⲉⲛϣⲱⲛⲉ ⸗ ⲻ
…
75 ⲻⲻⲻ ⲻⲻⲻ ⲻⲻⲻ ⲻⲻⲻ ⲥⲓⲛⲟⲩⲑⲓⲟⲩ · ⲉⲡⲓⲥⲧⲟⲗⲏ ⸗ ⲻ
…