1 ϫⲡⲓⲟⲛ ⲙⲡⲉϥⲙⲁ .. ⲧⲁⲓ ⲟⲛ ⲧⲉ ⲧϩⲉ ⲉⲧⲉⲟⲩⲁ ⲟ …. ⲥ ⲛϩⲟⲩⲟ ⲡⲉ ⲡⲣⲱⲙⲉ ⲉⲧⲛⲁϫⲟⲟⲥ ⲛϩⲏⲧⲛ ϫⲉⲡⲛⲟⲩⲧⲉ ⲛⲁⲕⲱ ⲉⲃⲟⲗ ⲛⲛⲉⲧⲉⲓⲣⲉ ⲏ ⲛⲉⲧⲛⲁⲉⲓⲣⲉ ⲛⲛⲉⲓϩⲃⲏⲩⲉ ⲉⲧⲙⲙⲁⲩ ⲛⲃⲟⲧⲉ ϩⲣⲁⲓ ϩⲛⲛⲉϥⲥⲩⲛⲁⲅⲱⲅⲏ ⲙⲛⲛⲥⲁⲧⲣⲉⲩⲥⲟⲟⲩⲛ ⲡⲥⲟⲟⲩⲛ ⲧⲏⲣϥ ⲙⲛⲛⲉⲓϣⲁϫⲉ ⲧⲏⲣⲟⲩ .
…
2 ⲥⲙⲟⲧⲛ ⲅⲁⲣ ⲱ ⲛⲣⲱⲙⲉ ⲉⲛⲧⲁⲩⲟⲩⲱϣϥ ⲉⲧⲃⲉⲧⲁⲕⲁⲑⲁⲣⲥⲓⲁ ⲛⲧⲉⲩⲯⲩⲭⲏ ⲉⲧⲣⲉⲡⲉⲧϫⲱ ⲛⲏⲧⲛ ⲛⲛⲁⲓ ⲧⲱⲧ ⲛϩⲏⲧ ⲙⲛⲛⲧⲉⲗⲱⲛⲏⲥ ⲙⲛⲙⲡⲟⲣⲛⲟⲥ ⲙⲛⲛⲉⲧϩⲟⲟⲩ ⲧⲏⲣⲟⲩ ⲉⲩϣⲁⲛⲕⲧⲟⲟⲩ ⲉⲃⲟⲗ ϩⲛⲛⲉⲩϩⲃⲏⲩⲉ ⲛⲁⲇⲓⲕⲟⲛ ⲏ ⲛϫⲱϩⲙ ⲉϩⲟⲩⲟ ⲉⲧⲱⲧ ⲛϩⲏⲧ ⲛⲙⲙⲏⲧⲛ ϫⲉⲉⲧⲉⲧⲛⲕⲱⲧⲉ ⲙⲙⲱⲧⲛ ⲉⲃⲟⲗ ϩⲙⲡⲧⲃⲃⲟ ⲙⲛϩⲉⲛϩⲃⲏⲩⲉ ⲙⲙⲛⲧⲙⲉ ⲉϩⲣⲁⲓ ⲉⲡϫⲱϩⲙ ⲙⲛϩⲉⲛϩⲃⲏⲩⲉ ⲙⲙⲛⲧⲣⲉϥϫⲓϭⲟⲗ .
…
3 ⲙⲏ ϩⲓⲧⲙⲡⲉϩⲟⲩⲟⲛⲟϭⲛⲉϭ ⲁⲛ ⲛⲧⲟϥ ⲉⲧⲃⲉⲛⲉⲛⲧⲁⲩⲉⲓⲣⲉ ⲟⲛ ⲛϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲁⲧϩⲏ ⲙⲡϩⲟⲟⲩ ⲁⲓϫⲱ ⲙⲡⲉⲓϣⲁϫⲉ ϩⲛⲟⲩϩⲟⲟⲩ ⲛⲑⲗⲓⲯⲓⲥ ⲉⲛⲥⲟⲟⲩϩ ϩⲓⲟⲩⲥⲟⲡ ϫⲉⲉⲓⲛⲁⲥⲱⲟⲩϩ ⲉϩⲟⲩⲛ ⲏ ⲉⲓⲛⲁⲧⲁⲗⲉⲡⲣⲟⲥⲫⲟⲣⲁ ⲉϩⲣⲁⲓ ⲙⲛϩⲉⲛⲣⲱⲙⲉ ⲛⲁⲕⲁⲑⲁⲣⲧⲟⲥ ⲉⲩⲉⲓⲣⲉ ⲛϩⲃⲏⲩⲉ ⲛⲗⲟⲓⲙⲟⲥ
…
4 ⲏ ⲉⲣⲉⲡϩⲱⲃ ϩⲟⲣϣ ⲛⲟⲩ ⲉⲡⲉⲧϣⲁϫⲉ ⲛⲙⲙⲉ ⲉⲧⲣⲉϥⲥⲩⲛⲁⲅⲉ ⲙⲛⲛⲧⲉⲗⲱⲛⲏⲥ ⲙⲛⲙⲡⲟⲣⲛⲟⲥ ⲙⲛⲛⲉⲧϩⲟⲟⲩ ⲧⲏⲣⲟⲩ ⲏ ⲉⲧⲁⲗⲉⲡⲣⲟⲥⲫⲟⲣⲁ ⲉϩⲣⲁⲓ ⲛⲙⲙⲁⲩ
…
5 .. ⲧ .. ⲉ ϫⲉⲁⲩⲕⲧⲟⲟⲩ ⲁⲛ ⲉⲃⲟⲗ ϩⲛⲛⲉⲩⲡⲉⲧϩⲟⲟⲩ ⲏ ϫⲉⲙⲡⲟⲩⲕⲧⲟⲟⲩ ⲛⲧⲟϥ ⲉⲃⲟⲗ ⲛϩⲏⲧⲟⲩ ⲁⲗⲗⲁ ϫⲉⲙⲛⲕⲣⲓⲙⲁ ϩⲓϫⲱϥ ⲉϥϣⲁⲛⲥⲱⲟⲩϩ ⲉϩⲟⲩⲛ ⲏ ⲉⲛϥⲧⲁⲗⲉⲡⲣⲟⲥⲫⲟⲣⲁ ⲉϩⲣⲁⲓ ⲛⲙⲙⲁⲩ ⲛⲉⲩϭⲁⲗⲏⲩ ⲅⲁⲣ ⲁⲛ ⲉⲣⲟϥ ϫⲉⲉⲩⲛⲁϫⲛⲟⲩϥ ⲉⲣⲟⲟⲩ .
…
6 ⲁϣ ϩⲱⲱϥ ⲧⲉ ⲧϩⲉ ⲉⲧⲉⲣⲉⲡϩⲱⲃ ⲛⲁϩⲣⲟϣ ⲁⲛ ⲉⲡⲉⲧⲉⲣⲉϩⲉⲛⲣⲱⲙⲉ ϭⲁⲗⲏⲩ ⲉⲣⲟϥ ⲉⲧⲣⲉϥⲥⲩⲛⲁⲅⲉ ⲙⲛϩⲉⲛⲣⲱⲙⲉ ⲛⲁⲕⲁⲑⲁⲣⲧⲟⲥ ⲉⲩⲉⲓⲣⲉ ⲛϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲟⲩ ⲏ ⲉⲧⲣⲉϥⲧⲁⲗⲟ ⲉϩⲣⲁⲓ ⲛⲙⲙⲁⲩ ⲛϩⲉⲛⲡⲣⲟⲥⲫⲟⲣⲁ ⲉⲡⲉⲩⲥⲛⲟϥ ⲙⲛⲡⲉⲩⲕⲣⲓⲙⲁ ⲉϩⲣⲁⲓ ϩⲓϫⲱϥ .
…
7 ⲁⲗⲗⲁ ⲡⲉⲩⲕⲣⲓⲙⲁ ⲙⲛⲡⲉⲩⲥⲛⲟϥ ϩⲣⲁⲓ ϩⲓϫⲛⲧⲥⲟⲟⲩϩⲉ ⲛϫⲱⲟⲩ ϫⲉⲟⲩⲙⲟⲛⲟⲛ ϫⲉⲧⲉⲯⲩⲭⲏ ⲙⲡⲉⲧϩⲱⲛ ⲉⲧⲟⲟⲧⲟⲩ ⲧⲏⲧ ⲁⲛ ⲛϩⲏⲧ ⲙⲛⲛⲉⲧⲉⲓⲣⲉ ⲙⲡⲉⲧϩⲟⲟⲩ ⲉⲧⲙⲙⲁⲩ ϩⲣⲁⲓ ⲛϩⲏⲧⲛ ⲁⲗⲗⲁ ⲥⲕⲏ ⲛⲁϥ ⲟⲛ ⲉϩⲣⲁⲓ ⲉⲃⲟⲗ ϩⲓⲧⲙⲡⲧⲱϣ ⲙⲛⲡϣⲟϫⲛⲉ ⲉⲧⲧⲏϣ ⲉⲃⲟⲗ ϩⲓⲧⲙⲡⲛⲟⲩⲧⲉ ⲛⲧϩⲉ ⲟⲛ ϫⲓⲛⲛϣⲟⲣⲡ ϣⲁϩⲣⲁⲓ ⲉⲧⲉⲛⲟⲩ ⲉⲧⲙⲧⲣⲉϥⲟⲩⲉⲙⲟⲉⲓⲕ ⲏ ⲉⲥⲉⲙⲟⲟⲩ ⲏ ⲉⲥⲱⲟⲩϩ ⲉϩⲟⲩⲛ ⲙⲛⲧⲥⲩⲛⲁⲅⲱⲅⲏ ⲧⲏⲣⲥ ⲉϣⲗⲏⲗ ⲏ ⲉϥⲓⲡⲣⲟⲥⲫⲟⲣⲁ ϣⲁⲛⲧϥϯ ⲙⲡⲉⲩϩⲁⲡ ⲉϫⲛⲧⲉⲩⲁⲡⲉ ⲡⲉⲩⲥⲛⲟϥ ⲉϫⲛⲧⲙⲏⲧⲉ ⲛϫⲱⲟⲩ
…
8 ϫⲉⲡⲁⲗⲓⲛ ⲟⲛ ⲛⲧⲉⲣⲱⲙⲉ ⲧⲟⲗⲙⲁ ⲉⲉⲓⲣⲉ ⲛϩⲉⲛϩⲃⲏⲩⲉ ⲛⲧⲉⲓϩⲉ ⲛⲃⲟⲧⲉ ϩⲣⲁⲓ ϩⲛⲛⲥⲩⲛⲁⲅⲱⲅⲏ ⲙⲡϫⲟⲉⲓⲥ ϩⲛⲧⲙⲏⲧⲉ ⲛⲛⲉⲥⲛⲏⲩ ⲉⲧⲟⲩⲁⲁⲃ ⲉⲧϩⲁⲣⲉϩ ⲉⲣⲟⲟⲩ ⲉⲃⲟⲗ ϩⲛⲧⲱⲗⲙ ⲛⲓⲙ ⲙⲛϩⲱⲃ ⲛⲓⲙ ⲛⲕⲣⲟϥ .
…
9 ⲛⲧϩⲉ ⲁⲛ ⲉϣⲁⲥϣⲱⲡⲉ ϩⲣⲁⲓ ⲛϩⲏⲧⲉ ⲛϩⲁϩ ⲛⲥⲟⲡ ⲧⲥⲩⲛⲁⲅⲱⲅⲏ ϩⲛϩⲉⲛϣⲧⲟⲣⲧⲣ ⲙⲛϩⲉⲛϩⲟⲉⲓⲧⲉ ⲉⲡⲁϩⲟⲩ ⲙⲛϩⲉⲛϩⲃⲏⲩⲉ ⲉⲩⲛⲁϣⲧ ⲧⲉⲧⲛⲁϣⲱⲡⲉ ⲟⲛ ⲙⲡⲉⲓⲥⲟⲡ ⲏ ⲛⲛⲉⲛⲕⲉϩⲟⲟⲩ ⲉⲧⲉⲣⲉⲡⲉⲧϣⲁϫⲉ ⲛⲙⲙⲉ ⲛⲁⲁⲁⲩ ⲉϥⲟⲛϩ ⲁⲗⲗⲁ ⲛⲉⲧⲟⲩⲟⲛϩ ⲉⲣⲟϥ ϫⲉⲁⲩⲣϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲉ ϥⲛⲁⲁⲁⲩ ⲛϣⲙⲙⲟ ⲉⲣⲟ ϩⲛⲟⲩϣⲧⲟⲣⲧⲣ ⲁⲛ ⲉϥⲱϣ ⲉⲃⲟⲗ ⲁⲛ .
…
10 ⲁⲩⲱ ⲉϣϫⲉⲟⲩⲛϩⲉⲛⲕⲟⲟⲩⲉ ϩⲣⲁⲓ ⲛϩⲏⲧⲉ ⲉⲩⲉⲓⲣⲉ ⲛϩⲉⲛϩⲃⲏⲩⲉ ⲛⲃⲟⲧⲉ ϩⲛⲟⲩⲕⲣⲟϥ ⲉⲩⲟⲩⲟⲛϩ ⲉⲣⲟⲛ ⲁⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓ ⲥⲉⲧⲟ ⲉⲧⲟⲟⲧϥ ⲛⲧⲟⲣⲅⲏ ⲙⲡⲛⲟⲩⲧⲉ ⲉⲧⲣⲉϥϫⲓⲕⲃⲁ ⲙⲙⲟⲟⲩ ϩⲙⲡⲉϥϭⲱⲛⲧ
…
11 ⲡⲉⲧⲉⲣⲉⲟ ⲅⲁⲣ ⲛⲁⲧⲥⲟⲟⲩⲛ ⲉⲣⲟϥ ϫⲉϥⲉⲓⲣⲉ ⲛϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲉ ⲛⲥⲁϩⲟⲩ ⲛⲧⲟⲟⲩ ⲉⲧⲥⲏϩ ϩⲛⲛⲉⲅⲣⲁⲫⲏ ⲙⲛⲛⲥⲁϩⲟⲩ ⲉⲧϩⲛⲛϫⲱⲱⲙⲉ ⲉⲧⲥⲏϩ ⲛⲁⲛ ⲥⲟⲟⲩⲛ ⲙⲙⲟⲟⲩ ⲉⲁⲁⲩ ⲙⲛⲛⲉⲩϩⲓⲥⲉ ⲧⲏⲣⲟⲩ . ⲛⲥ ⲛⲛⲁⲛⲍⲱⲛⲏ ⲙⲛⲙⲫⲁⲥⲕⲓⲁ ⲛⲧⲁⲡⲁⲓ ⲕⲁⲁⲩ ⲉϩⲣⲁⲓ ⲉⲩⲙⲏⲣ ⲙⲙⲟϥ ϫⲉⲙⲡⲟⲩⲣϣⲁⲩ ⲛⲁϥ ⲏ ϫⲉⲁⲩⲣⲁⲧϣⲁⲩ ⲏ ϫⲉⲙⲛⲧⲟⲩϣⲁⲩ ⲙⲙⲁⲩ ⲛⲧϩⲉ ⲉⲧⲉⲧⲛⲁⲛⲁⲩ ⲉⲩⲙⲉⲣⲟⲥ ⲙⲙⲟⲟⲩ ⲛⲟⲩϩⲉ ⲉⲩⲟⲩⲟⲉⲓϣ ⲕⲉⲙⲉⲣⲟⲥ ⲇⲉ ⲛⲕⲉϩⲉ ⲕⲉⲙⲉⲣⲟⲥ ⲛⲧⲉⲓϩⲉ ⲕⲉⲙⲉⲣⲟⲥ ⲛⲧⲉⲓⲕⲉϩⲉ ϫⲉⲕⲁⲥ ⲉⲧⲉⲧⲛⲛⲁⲉⲓⲙⲉ ⲛⲉⲥⲛⲏⲩ ϫⲉⲛⲧⲁⲡⲁⲓ ⲙⲟⲣϥ ⲁⲛ ⲛⲧⲉⲓⲁϣⲏ ⲙⲙⲟϫϩ ⲏ ⲫⲁⲥⲕⲓⲁ ⲉⲧⲃⲉϭⲉⲗⲁⲁⲩ ⲉⲓⲙⲏⲧⲓ ⲉⲡϩⲱⲃ ⲉⲧϥⲥⲟⲟⲩⲛ ⲛⲧⲟϥ ⲉⲣⲟϥ ϫⲉⲟⲩ ⲡⲉ .
…
12 ⲉϣϫⲉⲙⲫⲁⲥⲕⲓⲁ ⲏ ⲛⲁⲛⲍⲱⲛⲏ ⲛⲧⲁⲩϣⲱⲗ ⲉⲃⲟⲗ ⲉⲧⲙⲣϣⲁⲩ ⲛⲁⲓ ⲏ ⲉⲙⲟⲣⲧ ⲙⲙⲟⲟⲩ ϩⲙⲡϣⲱⲛⲉ ⲉⲧϣⲟⲟⲡ ϩⲙⲡⲁⲥⲱⲙⲁ ⲏ ⲡⲥⲱⲙⲁ ⲥⲉⲟϣ ⲛⲛⲁϩⲣⲙⲡⲉⲧⲥⲟⲟⲩⲛ ⲉⲧⲉⲩⲏⲡⲉ ⲛⲁⲛⲍⲱⲛⲏ ⲏ ⲟⲛ ⲙⲫⲁⲥⲕⲓⲁ ⲉⲧⲉⲧⲛⲁⲛⲁⲩ ⲉⲣⲟⲟⲩ ⲉⲩⲥⲏⲩ ⲉⲙⲛⲧⲟⲩϣⲁⲩ ⲙⲙⲁⲩ ⲥⲉⲟϣ ⲉⲛⲉⲛⲧⲁⲩⲣⲁⲧϣⲁⲩ ⲁⲗⲗⲁ ⲉⲩⲛⲁϣⲱⲡⲉ ⲉⲩⲥⲟⲃⲕ ⲛⲛⲁϩⲣⲏⲧⲛ ϫⲉⲙⲛϣϭⲟⲙ ⲛⲉⲓⲙⲉ ϩⲓⲧⲙⲡⲉⲩⲉⲓⲛⲉ ⲛⲧⲁϥⲥⲱϣ ϫⲉⲁϣ ⲡⲉ ⲁϣ ⲏ ⲡⲁⲓ ⲙⲛⲡⲁⲓ ϫⲉⲉⲣⲉⲟⲩⲁ ⲛⲁⲟⲡⲟⲩ ⲏ ⲛϥϫⲱ ⲛⲧⲉⲩⲏⲡⲉ
…
13 ⲁⲩⲱ ⲥⲉⲛⲁϣⲱⲡⲉ ϩⲙⲡⲙⲁ ⲛⲧⲁⲡⲉϯⲥⲟⲟⲩⲛ ⲁⲛ ⲁⲛⲟⲕ ϫⲉⲛⲓⲙ ⲡⲉ ϩⲟⲡⲟⲩ ⲙⲙⲁⲩ ϩⲁⲡⲉⲥⲏⲧ ⲙⲡⲕⲁϩ ϩⲙⲡⲙⲁ ⲉⲛⲧⲁⲡⲛⲟⲩⲛ ⲏ ⲛⲛⲟⲩⲛ ⲟⲩⲱⲛ ⲛϩⲏⲧϥ ⲉⲩⲙⲉϩ ⲛⲛⲕⲁ ⲛⲓⲙ ⲉⲙⲛⲧϥϣⲁⲩ ϣⲁⲡⲉⲟⲩⲟⲉⲓϣ ⲉⲧⲉⲧⲛⲁⲛⲁⲩ ⲉⲣⲟⲟⲩ ϩⲛⲛⲉⲧⲛⲃⲁⲗ
…
14 ϩⲱⲃ ⲅⲁⲣ ⲛⲓⲙ ⲉⲛⲧⲁⲡⲁⲓ ⲉⲧϣⲁϫⲉ ⲛⲙⲙⲉ ⲧⲥⲩⲛⲁⲅⲱⲅⲏ ⲁⲁⲩ ϩⲁⲧϩⲏ ⲙⲡϩⲟⲟⲩ ⲛⲧⲁϥⲁⲁⲩ ⲧⲏⲣⲟⲩ ⲉϥⲟⲩⲱϣ ⲉϥⲓ ⲙⲙⲁⲩ ⲙⲡⲥⲱϣ ⲉⲃⲟⲗ ϩⲓϫⲛⲛⲉⲧⲉⲓⲣⲉ ⲛⲛⲉⲓϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲛ ⲉϥⲕⲧⲟ ⲙⲙⲟϥ ⲉϩⲣⲁⲓ ⲉϫⲱϥ ϫⲉⲉϥⲙⲉ ⲙⲡⲉⲧϩⲓⲧⲟⲩⲱϥ ⲛⲧⲉϥϩⲉ
…
15 ⲧⲉⲛⲟⲩ ⲇⲉ ϩⲱⲱϥ ⲉϥϥⲓ ⲙⲙⲟϥ ⲉⲃⲟⲗ ϩⲓϫⲱϥ ⲉϥⲕⲧⲟ ⲙⲙⲟϥ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲉⲧⲉⲓⲣⲉ ⲏ ⲉⲧⲛⲁⲉⲓⲣⲉ ⲛϩⲉⲛⲃⲟⲧⲉ ϩⲛⲟⲩⲕⲣⲟϥ ⲏ ⲛϩⲱⲡ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ
…
16 ⲁⲩⲱ ⲡⲉⲩⲥⲱϣ ⲉϩⲣⲁⲓ ⲉϫⲱⲟⲩ ϥϩⲓϫⲱⲟⲩ ⲅⲁⲣ ⲁⲩⲱ ϥⲟⲩⲟⲛϩ ⲉⲃⲟⲗ ϩⲓϫⲱⲟⲩ ⲁⲩⲱ ⲥⲉⲟⲩⲟⲛϩ ⲉⲃⲟⲗ ϫⲉϥϩⲓϫⲱⲟⲩ .
…
17 ⲁⲩⲱ ⲧⲁⲉⲓⲟⲟⲩ ⲟⲛ ⲛⲛⲁϩⲣⲙⲡⲁⲓ ⲧⲉⲛⲟⲩ ⲉⲧⲙⲟⲕϩ ⲛϩⲏⲧ ⲡⲉ ϯ ⲛⲁⲩ ⲛⲟⲩⲧⲣⲟⲡ ⲛⲟⲩⲱⲧ ⲙⲁⲗⲓⲥⲧⲁ ⲟⲩϣⲥ ⲛϭⲉⲣⲱⲃ ϩⲛⲧⲉϥϭⲓϫ ϫⲓⲛⲙⲡⲟⲟⲩ ⲉϩⲣⲁⲓ ⲉⲩⲥⲱϣ ⲛⲁϥ ϩⲱⲱϥ ⲡⲉ .
…
18 ⲡⲉⲓϣⲁϫⲉ ⲉⲡⲁⲛⲉⲥⲛⲏⲩ ⲁⲛ ⲡⲉ ⲛϣⲟⲩⲟⲩⲁϣⲟⲩ ⲏ ⲛϣⲏⲣⲉ ⲛϣⲟⲩⲙⲉⲣⲓⲧⲟⲩ ⲉⲧⲃⲉⲡⲉⲩⲧⲃⲃⲟ ⲙⲛⲧⲉⲩⲁⲅⲁⲡⲏ ⲉϩⲟⲩⲛ ⲉⲡⲛⲟⲩⲧⲉ ⲁⲗⲗⲁ ⲡⲁⲛⲉⲧⲉⲙⲛⲧⲉⲡⲓⲧⲟⲡⲟⲥ ⲉⲧⲟⲩⲁⲁⲃ ϩⲏⲩ ⲉⲣⲟⲉⲣⲟ ⲡⲉ ⲁⲩⲱ ⲙⲛⲧⲟⲩϩⲏⲩ ⲛϩⲏⲧϥ ϫⲉⲥⲉⲧⲁⲕⲟ ⲛⲧⲉⲩϩⲉⲗⲡⲓⲥ ⲕⲁⲧⲁⲡⲉⲛⲧⲁⲛϣⲣⲡϫⲟⲟϥ .
…
19 ⲙⲏ ⲛⲉⲩⲙⲟⲩⲧⲉ ⲁⲛ ⲉⲣⲟⲟⲩ ⲛⲉⲓⲧⲟⲡⲟⲥ ⲏ ⲥⲩⲛⲁⲅⲱⲅⲏ ⲛⲓⲙ ⲉⲧⲥⲟⲟⲩϩ ⲉϩⲟⲩⲛ ⲉⲣⲟⲟⲩ ⲉⲧⲃⲉⲡⲣⲁⲛ ⲙⲡⲛⲟⲩⲧⲉ ϫⲉⲙⲙⲁ ⲉⲧⲟⲩⲁⲁⲃ .
…
20 ⲉⲓⲉ ⲛⲉⲧⲛⲁϫⲁϩⲙⲟⲩ ϭⲉ ϩⲛϩⲉⲛϩⲃⲏⲩⲉ ⲉϩⲉⲛϣⲗⲟϥ ⲛⲉ ⲉⲧⲁⲟⲩⲟⲟⲩ ⲉⲩⲛⲁϣⲱⲡⲉ ⲉⲩⲥϩⲟⲩⲟⲣⲧ ⲛⲟⲩⲏⲣ .
…
21 ⲏ ⲙⲡⲉⲓϣⲁϫⲉ ⲣⲱϣⲉ ⲁⲛ ⲉⲣⲛⲧⲁⲗⲁⲓⲡⲱⲣⲟⲥ ⲉⲧⲙⲙⲁⲩ ⲛⲉⲃⲓⲏⲛ ϩⲙⲡⲧⲣⲉϥϣⲁⲁⲧⲟⲩ ⲉⲃⲟⲗ ⲙⲡⲱⲛϩ ⲛⲟⲩⲥⲟⲡ ⲛⲟⲩⲱⲧ ϫⲉⲡϣⲏⲣⲉ ⲛⲧⲁⲩϫⲱϩⲙ ⲛⲛⲟⲩϥ ⲁⲛ ⲛⲉ
…
22 ⲏ ⲟⲩⲛϭⲉⲟⲣⲅⲏ ⲟⲛ ⲉⲣⲉⲡⲛⲟⲩⲧⲉ ⲛⲁⲛⲧⲥ ⲉϫⲙⲡⲉⲧⲛⲁⲧⲁⲕⲟ ⲙⲡⲉϥⲣⲡⲉ ⲛϩⲟⲩⲟ ⲉⲧⲁⲓ ϫⲉⲡⲉⲧⲛⲁⲧⲁⲕⲟ ⲙⲡⲣⲡⲉ ⲙⲡⲛⲟⲩⲧⲉ . ⲡⲁⲓ ⲡⲛⲟⲩⲧⲉ ⲛⲁⲧⲁⲕⲟϥ .
…
23 ⲡⲉⲧⲙⲟⲧⲛ ⲛ … ⲧⲉ ⲉϩⲣⲁⲓ ⲉ .. ⲛⲛⲉⲧⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ϩⲣⲁⲓ ϩⲛⲛⲉⲓⲥⲩⲛⲁⲅⲱⲅⲏ ⲉϥⲛⲁϣⲧⲙⲁⲉⲓⲟⲟⲩ ϩⲛⲟⲩ ⲏ ⲉϥⲛⲁϣⲥⲙⲟⲩ ⲉⲣⲟⲟⲩ ϩⲛⲟⲩ ⲉϩⲟⲩⲟ ⲉⲡⲉⲛⲧⲁⲛⲉⲧⲟⲩⲁⲁⲃ ϫⲟⲟϥ ϫⲉⲛⲁⲓⲁⲧⲟⲩ ⲛⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉⲧⲙⲟⲟϣⲉ ϩⲛⲛⲉϥϩⲓⲟⲟⲩⲉ .
…
24 ⲕⲛⲁⲟⲩⲱⲙ ⲛⲛⲕⲁⲣⲡⲟⲥ ⲛⲛⲉⲕϩⲓⲥⲉ .
…
25 ⲡⲉⲧⲙⲟⲕϩ ⲇⲉ ⲟⲛ ⲛϩⲏⲧ ⲉϩⲣⲁⲓ ⲉϫⲛⲛⲉⲧⲉⲓⲣⲉ ⲛϩⲉⲛϩⲃⲏⲩⲉ ⲛⲃⲟⲧⲉ ϩⲣⲁⲓ ϩⲛⲛⲉⲓⲥⲩⲛⲁⲅⲱⲅⲏ ⲛⲟⲩⲟⲉⲓϣ ⲛⲓⲙ ⲉϥⲛⲁⲧϭⲁⲉⲓⲟⲟⲩ ϩⲛⲟⲩ ⲛϩⲟⲩⲟ ⲉⲡⲉⲛⲧⲁⲛⲉⲧⲟⲩⲁⲁⲃ ϫⲟⲟϥ ϩⲛⲟⲩϭⲱⲛⲧ ϫⲉⲡⲉⲧⲉⲛϥⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ϥⲛⲁϣⲱⲡⲉ ϩⲛϩⲉⲛⲙⲁ ⲙⲡϣⲁⲉⲛⲉϩ ϭⲓⲛⲉ ⲁⲛ ⲙⲡⲉϥϣⲓⲛⲉ .
…
26 ⲟⲩⲣⲱⲙⲉ ⲉⲩⲥⲱⲧⲙ ⲉⲣⲟϥ ⲛϩⲁϩ ⲛⲥⲟⲡ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉⲧⲟⲩⲏϩ ϩⲣⲁⲓ ⲛϩⲏⲧⲉ ⲧⲥⲩⲛⲁⲅⲱⲅⲏ ⲉϥⲛⲁⲣⲁⲛⲁϣ ϫⲉϯⲟⲩⲱϣ ⲉⲧⲣⲁⲙⲟⲩ ⲏ ⲉⲧⲣⲉⲡⲛⲟⲩⲧⲉ ϭⲙⲡⲁϣⲓⲛⲉ ⲡⲁⲣⲁⲧⲁⲥⲱⲧⲙ ϫⲉⲟⲩⲁ ⲣϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲉ ϥⲟⲩⲟⲛϩ ⲉⲃⲟⲗ ⲁⲛ ϫⲉϥⲟⲩⲁⲁⲃ ⲉⲃⲟⲗ ϩⲙⲡⲓⲕⲣⲓⲙⲁ ⲙⲛⲡⲉⲥⲛⲟϥ ⲛⲛⲉⲧⲑⲙⲕⲟ ⲙⲙⲟϥ ϫⲉⲙⲡⲟⲩϣⲓⲡⲉ ⲉⲣⲛⲉϩⲃⲏⲩⲉ ⲙⲙⲛⲧⲁⲥⲉⲃⲏⲥ ⲉⲧⲙⲙⲁⲩ ⲛⲃⲟⲧⲉ ϩⲣⲁⲓ ⲛϩⲏⲧⲉ .
…
27 ⲱ ⲉⲣⲉⲡⲓⲙⲁ ⲛⲁⲣⲟⲩ
…
28 ⲉⲣⲉⲡⲓⲙⲁ ⲛⲁⲃⲱⲕ ⲉⲧⲱⲛ .
…
29 ϩⲁⲧϩⲏ ⲙⲡϩⲟⲟⲩ ⲡⲉⲧⲥⲟⲟⲩⲛ ⲏ ⲛⲉⲧⲥⲟⲟⲩⲛ ⲉⲡϣⲓ ⲏ ⲛⲉⲛⲧⲁⲩϫⲓϣⲓ ⲉⲙⲡⲉⲧϩⲟⲟⲩ ⲉⲛⲧⲁⲩⲁⲁⲩ ϩⲣⲁⲓ ⲛϩⲏⲧⲉ ⲥ .. ⲛⲁϫⲟⲟⲥ … ⲁⲩⲟⲩⲱ ⲉⲩϫⲱ ⲙⲙⲟⲥ ϫⲉⲁⲩⲡⲱϩ ϣⲁⲙⲙⲉⲣⲟⲥ ⲛⲛⲉⲛⲧⲁⲩⲁⲁⲩ ⲏ ⲁⲩⲟⲩⲟⲧⲃⲟⲩ ⲣⲱ ⲉϩⲣⲁⲓ ⲛⲧϩⲉ ⲛⲟⲩⲗⲟⲓϩⲉ ⲉϥⲟϣ ⲁⲩⲱ ⲛⲧⲟⲟⲩ ⲉⲁⲩⲥⲱϩⲡ ⲛϩⲏⲧϥ ⲛⲧϩⲉ ⲛϩⲉⲛⲧⲃⲛⲟⲟⲩⲉ ⲉⲁⲡⲛⲟⲩⲧⲉ ϭⲉⲛⲛ ⲉϩⲣⲁⲓ ⲛϩⲏⲧϥ ϩⲛⲧⲉϥⲙⲛⲧⲛⲁⲏⲧ
…
30 ⲧⲉⲛⲟⲩ ⲇⲉ ϩⲱⲱϥ ϩⲙⲡⲉⲓⲟⲩⲟⲉⲓϣ ⲡⲁⲓ ⲛⲉⲧϯϣⲓ ⲉⲣⲟϥ ⲏ ⲛⲉⲧϫⲓ ⲙⲡⲉϥϣⲓ ⲥⲉⲛⲁϫⲟⲟⲥ ⲏ ⲉⲩϫⲱ ⲙⲙⲟⲥ ϫⲉⲉϥⲡⲱϩ ϣⲁⲛⲕⲗⲗⲉ … ⲁⲩⲱ ⲉϥⲡⲏϩ ⲣⲱ ⲁⲛ ϣⲁ .. ⲉⲁⲧ ⲁⲩⲱ ⲛⲉⲛⲧⲁⲩϩⲉ ⲛϩⲏⲧϥ ⲏ ⲉϩⲣⲁⲓ ⲉⲣⲟϥ ⲛⲧⲁⲩⲥⲱϩⲡ ϣⲁⲛⲉⲩⲙⲏⲣⲟⲥ .
…
31 ⲟⲩⲇⲉ ⲛϥϣⲟⲟⲡ ⲣⲱ ⲁⲛ ⲛⲧⲉⲓϩⲉ ϩⲣⲁⲓ ⲛϩⲏⲧⲉ ⲧⲉⲛⲟⲩ .
…
32 ⲛⲛⲉⲥϣⲱⲡⲉ .
…
33 ⲟⲩⲧⲉ ⲛⲉϥⲟϣ ⲁⲛ
…
34 ⲁⲗⲗⲁ ⲉⲛⲧⲁⲛⲉⲛⲧⲁⲩϩⲉ ⲉϩⲣⲁⲓ ⲉⲣⲟϥ ⲥⲗϥⲧⲉ ⲛϩⲏⲧϥ ⲛⲧϩⲉ ⲛϩⲉⲛⲣⲓⲣ ϣⲁⲛⲧⲉϥⲡⲱϩ ⲁⲛ ϣⲁⲛⲉⲩⲙⲏⲣⲟⲥ ⲏ ϣⲁⲛⲧⲟⲩⲥⲱϩⲡ ⲁⲛ ϣⲁⲛⲉⲩⲙⲏⲣⲟⲥ ⲁⲗⲗⲁ ϣⲁⲛⲧⲟⲩⲱⲛϩ ⲉⲃⲟⲗ ⲉⲩⲗⲟⲟⲙⲉ ⲁⲩⲱ ⲉⲩⲗⲁⲗⲱ ⲛϩⲏⲧϥ ϫⲓⲛⲛⲉⲓⲃ ⲛⲣⲁⲧⲟⲩ ϣⲁⲡϥⲱ ⲛⲧⲉⲩⲁⲡⲉ .
…
35 ⲉⲛⲉϥⲣϩⲟⲩⲟ ⲣⲱ ⲡⲉ ϩⲙⲡⲉⲓⲥⲏⲩ ⲧⲉⲛⲟⲩ ⲛϭⲓⲡⲗⲟⲓϩⲉ ⲉⲧⲙⲙⲁⲩ ⲏ ⲛⲉϥⲡⲏϩ ⲟⲛ ϣⲁⲙⲙⲏⲣⲟⲥ ⲕⲁⲧⲁⲛⲉϥϣⲓ ⲛϣⲟⲣⲡ ⲛⲉⲩⲛⲁϫⲟⲟⲥ ⲡⲉ ⲛϭⲓⲛⲉⲧⲛⲁⲩ ⲉⲛⲉⲧϩⲏⲩ ⲛϩⲏⲧϥ ϫⲉⲡⲁⲛⲧⲱⲥ ⲙⲡⲟⲩⲉϣϭⲙϭⲟⲙ ⲉⲧⲱⲟⲩⲛ ⲏ ⲉⲉⲓ ⲉⲃⲟⲗ ⲏ ϩⲏⲧϥ ϫⲉϥⲟϣ .
…
36 ⲁⲩⲱ ⲡⲉⲧⲛⲁϫⲟⲟⲥ ϫⲉⲙⲡϥⲥⲃⲟⲕ ⲉⲙⲁⲧⲉ ⲉⲙⲁⲧⲉ ⲉϥⲟ ⲛⲧϩⲉ ⲙⲡⲉⲧⲡⲱϩⲧⲥⲛⲟϥ ⲉⲃⲟⲗ ϫⲉⲁϥⲥⲱϣϥ ⲛⲧⲉⲭⲁⲣⲓⲥ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲛⲧⲁϥⲁⲁⲥ ⲛⲙⲙⲁⲛ .
…
37 ϩⲣⲁⲓ ⲇⲉ ϩⲱⲱϥ ϩⲙⲡⲕⲁⲓⲣⲟⲥ ⲛϩⲁⲉ ⲛⲉⲩⲛⲁϫⲟⲟⲥ ⲁⲛ ϫⲉⲁⲡⲗⲟⲓϩⲉ ⲉⲧⲙⲙⲁⲩ ⲡⲱϩ ϣⲁⲛⲕⲗⲗⲉ ⲏ ϣⲁⲙⲡⲁⲧ ⲏ ϣⲁⲙⲙⲏⲣⲟⲥ ⲁⲗⲗⲁ ϣⲁⲙⲙⲁⲕϩ ⲛⲛⲉⲧⲛⲁⲉⲓⲣⲉ ⲛϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲉ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ .
…
38 ⲡⲉⲓⲕⲉϣⲁϫⲉ ⲇⲉ ⲟⲛ ϫⲉϣⲓ ⲏ ϫⲉϫⲓϣⲓ ⲟⲩⲙⲟⲛⲟⲛ ϫⲉϥⲥⲏϩ ϩⲛⲧⲁⲣⲭⲏ ⲙⲡϣⲟⲣⲡ ⲛⲭⲁⲣⲧⲏⲥ ⲉⲧⲕⲏ ⲉϩⲣⲁⲓ ϫⲓⲛⲛϣⲟⲣⲡ ⲉⲩϯϣⲓ ⲏ ⲉⲩϫⲓϣⲓ ⲙⲡⲉⲧϣⲟⲟⲡ ⲏ ⲙⲡⲉⲛⲧⲁϥϣⲱⲡⲉ ϩⲣⲁⲓ ⲛϩⲏⲧⲉ ⲏ ⲙⲙⲟ ⲧⲥⲩⲛⲁⲅⲱⲅⲏ ⲁⲗⲗⲁ ⲉϥⲙⲙⲁⲩ ⲟⲛ ϫⲉⲁⲩϫⲓⲏⲡⲉ ⲙⲡⲉⲧⲉⲙⲡⲉⲥⲟⲩⲱⲛϥ ϫⲉⲟⲩ ⲡⲉ ⲁⲩⲱ ϫⲉⲁⲩϫⲓ ⲛⲧⲏⲡⲉ ⲙⲡⲉⲛⲧⲁϥⲧⲛⲛⲟⲩⲥⲉ ⲛϭⲓⲛⲉⲛⲧⲁⲩⲉⲓ ⲉⲉⲓⲙⲉ ⲏ ⲉⲛⲁⲩ ⲉⲛⲉⲛⲧⲁⲩϣⲱⲡⲉ ⲙⲙⲟ ϩⲣⲁⲓ ϩⲛⲙⲙⲁ ⲉⲧϣⲟⲕϩ ⲁⲩⲱ ⲉⲧϩⲏⲡ ⲉⲧⲙⲉϩ ⲛⲕⲁⲕⲉ ⲏ ⲉⲧⲟ ⲛⲕⲁⲕⲉ ϩⲣⲁⲓ ⲛϩⲏⲧⲉ .
…
39 ⲉϣϫⲉⲟⲩⲛⲟⲩⲁ ⲇⲉ ϣⲓⲛⲉ ϫⲉⲟⲩ ⲛⲉ ⲛⲉⲓϣⲓ ⲏ ϫⲉϫⲓϣⲓ ⲏ ⲛⲓⲙ ⲛⲉ ⲛⲉⲛⲧⲁⲩϫⲓϣⲓ ⲏ ϫⲉⲉⲛⲧⲁⲩϣⲓ ⲟⲩ ⲙⲁⲣⲉϥⲧⲁⲙⲟⲛ ⲏ ⲙⲁⲣⲉϥϫⲟⲟⲥ ⲛⲁⲓ ϫⲓ ϩⲓⲧⲛⲟⲩ ⲟⲩ ϣⲓ ⲙⲡⲏⲓ ⲙⲡϫⲟⲉⲓⲥ ⲉⲧϩⲛⲧϩⲓⲉⲣⲟⲩⲥⲁⲗⲏⲙ ϩⲛⲟⲩⲕⲁϣ . ⲁⲩⲱ ⲛⲓⲙ ⲡⲉⲛⲧⲁϥϣⲓⲧϥ ⲁⲩⲱ ϫⲉⲉⲧⲃⲉⲟⲩ ⲁⲩϣⲓⲧϥ ⲏ ⲁⲩϯⲧⲱϣ ⲉⲣⲟϥ ϫⲉϩⲛⲟⲩⲙⲕⲁϩ ⲛϩⲏⲧ ϭⲉ
…
40 ϫⲛⲙⲙⲟⲛ ⲉⲧⲃⲉⲟⲩ ⲧⲱⲧ ⲛϩⲏⲧ ⲛϩⲟⲩⲟ ⲁⲩⲱ ⲟⲛ ϩⲓⲧⲛⲟⲩ ⲁϥϫⲟⲟⲥ ⲛϭⲓⲍⲁⲭⲁⲣⲓⲁⲥ ⲡⲉⲡⲣⲟⲫⲏⲧⲏⲥ ϫⲉϯⲛⲁϫⲓⲛⲁⲓ ⲛϭⲉⲣⲱⲃ ⲥⲛⲁⲩ ⲟⲩⲁ ⲉⲓⲙⲟⲩⲧⲉ ⲉⲣⲟϥ ϫⲉⲡⲥⲁ ⲁⲩⲱ ⲡⲙⲉϩⲥⲛⲁⲩ ⲉⲓⲙⲟⲩⲧⲉ ⲉⲣⲟϥ ϫⲉⲡⲉⲥⲕⲛⲟⲩϩ ⲁⲩⲱ ϫⲉϩⲛⲟⲩⲛⲁ ϭⲉ ⲙⲛⲟⲩⲙⲛⲧϣⲁⲛϩⲧⲏϥ ϫⲛⲙⲙⲟⲛ ϩⲛⲟⲩϭⲱⲛⲧ ⲛⲧⲟϥ ⲛϩⲟⲩⲟ ⲙⲛⲟⲩⲟⲣⲅⲏ ⲁϥϫⲟⲟⲥ ⲙⲛⲛⲥⲱⲥ ϫⲉϯⲛⲁϫⲓ ⲙⲡⲁϭⲉⲣⲱⲃ ⲉⲧⲛⲉⲥⲱϥ ⲛⲧⲁⲛⲟϫϥ ⲉⲃⲟⲗ ⲉϫⲱⲱⲣⲉ ⲉⲃⲟⲗ ⲛⲧⲇⲓⲁⲑⲏⲕⲏ ⲧⲉⲛⲧⲁⲓⲥⲙⲛⲧⲥ ⲙⲛⲛⲗⲁⲟⲥ ⲧⲏⲣⲟⲩ
…
41 ⲁⲩⲱ ⲥⲉⲛⲁϫⲱⲱⲣⲉ ⲉⲃⲟⲗ ϩⲛⲛⲉϩⲟⲟⲩ ⲉⲧⲙⲙⲁⲩ ⲛⲥⲉⲉⲓⲛⲉ ⲛϭⲓⲛⲉⲭⲁⲛⲁⲛⲁⲓⲟⲥ ⲉⲛⲉⲥⲟⲟⲩ ⲉⲧϯ ⲛϩⲧⲏⲩ ⲉⲣⲟⲓ ⲉⲃⲟⲗ ϫⲉⲟⲩϣⲁϫⲉ ⲛⲧⲉⲡϫⲟⲉⲓⲥ ⲡⲉ . ⲉⲓⲧⲁ ⲟⲛ ϫⲉⲁⲓⲛⲟⲩϫⲉ ⲉⲃⲟⲗ ⲙⲡⲙⲉϩⲥⲛⲁⲩ ⲛϭⲉⲣⲱⲃ ⲡⲉⲥⲭⲏⲛⲓⲥⲙⲁ ⲉϫⲱⲱⲣⲉ ⲉⲃⲟⲗ ⲛⲧⲇⲓⲁⲑⲏⲕⲏ ⲉⲧϩⲛⲧⲙⲏⲧⲉ ⲛⲓⲟⲩⲇⲁ ⲁⲩⲱ ϩⲛⲧⲙⲏⲧⲉ ⲛⲧϩⲓⲉⲣⲟⲩⲥⲁⲗⲏⲙ
…
42 ⲁⲩⲱ ⲟⲛ ϫⲉⲉⲛⲉϩⲛⲟⲩⲥⲟⲗⲥⲗ ⲉϫⲛⲙⲙⲟⲛ ϩⲛⲟⲩϫⲡⲓⲟ ⲛⲧⲟϥ ⲛϩⲟⲩⲟ . ⲁϥϫⲟⲟⲥ ⲟⲛ ⲛϭⲓⲙⲓⲭⲁⲓⲁⲥ ⲡⲉⲡⲣⲟⲫⲏⲧⲏⲥ ϫⲉⲧⲙⲉⲣⲓⲥ ⲙⲡⲁⲗⲁⲟⲥ ⲁⲩϣⲓⲧⲥ ϩⲛⲟⲩⲛⲟⲩϩ ⲛϣⲓ ⲉⲓⲱϩⲉ
…
43 ⲁⲩⲱ ϫⲉⲉⲛⲉϩⲉⲛⲉⲃⲟⲗ ϩⲙⲡⲛⲟⲩⲧⲉ ⲛⲉ ⲛⲉⲛⲧⲁⲩϣⲓ ⲛⲧⲙⲉⲣⲓⲥ ⲉⲧⲙⲙⲁⲩ ⲛⲧϩⲉ ⲙⲡⲉⲛⲧⲁϥϣⲓ ⲙⲡⲏⲓ ⲙⲡϫⲟⲉⲓⲥ ϩⲛⲧϩⲓⲉⲣⲟⲩⲥⲁⲗⲏⲙ ⲁⲩⲱ ⲛⲧϩⲉ ⲙⲡⲧⲱϣ ⲙⲡϭⲉⲣⲱⲃ ⲥⲛⲁⲩ ⲡⲥⲁ ⲙⲛⲡⲉⲥⲕⲛⲟⲩϩ ⲛⲧⲁⲛϣⲣⲡϫⲟⲟⲩ ϫⲓⲛⲙⲙⲟⲛ ϩⲉⲛⲉⲃⲟⲗ .
…