1 ϫⲟⲉⲓ ⲡⲁⲣⲁⲧⲏⲣⲉⲓ ⲉⲡⲉϥⲟⲩⲟⲛⲧ ⲙⲡⲱⲛⲅ ·
…
2 ϫⲉⲕⲁⲁⲥ ϩⲱⲱⲛ ϩⲛϩⲁⲣⲉϩ ⲛⲓⲙ ·
…
3 ⲉⲛⲛⲁϩⲁⲣⲉϩ ⲉⲡⲉⲛϩⲏⲧ ⲛⲧϩⲉ ⲉⲧⲥⲏϩ ⲉⲃⲟⲗ ϩⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ⲉⲧϥⲱϭⲉ ⲉϩⲟⲩⲛ ⲉⲣⲟϥ
…
4 ⲏ ⲉⲧⲧⲗⲧⲗ ⲛⲁϥ ⲛϩⲉⲛⲣⲡⲙⲉⲉⲩⲉ ⲉⲩⲧⲁⲕⲟ ⲙⲡϩⲏⲧ ⲙⲛⲧⲉⲯⲩⲭⲏ ⲛⲛⲣⲱⲙⲉ ⲉⲧⲛⲁϣⲟⲡⲟⲩ ⲉⲣⲟⲟⲩ
…
5 ⲉⲃⲟⲗ ⲅⲁⲣ ϩⲛⲛⲁⲓ ⲛⲧⲁⲩϫⲟⲟⲥ ϫⲉⲁⲩⲡⲟⲣⲛⲉⲩⲉ ϩⲛⲛⲉⲩⲙⲉⲉⲩⲉ ⲛϩⲏⲧ .
…
6 ⲛⲁⲓ ⲛⲉⲧⲉⲣⲉⲡϩⲉⲟⲩⲏϩ ⲛⲥⲱⲟⲩ ⲛⲧϩⲉ ⲉⲧⲥⲏϩ ·
…
7 ϫⲉϩⲉⲛⲙⲉⲉⲩⲉ ⲉⲩϩⲟⲟⲩ ϩⲁⲧϩⲏ ⲙⲡϩⲉ ·
…
8 ⲉⲃⲟⲗ ϩⲛⲛⲁⲓ ⲛⲧⲁⲩϫⲟⲟⲥ ϫⲉⲟⲩⲡⲛⲉⲩⲙⲁ ⲛϭⲟⲗ
…
9 ⲁϥⲁϩⲉⲣⲁⲧϥ ⲁϥⲧⲗⲧⲗ ⲛⲁⲕ ⲛⲟⲩⲏⲣⲡ ⲙⲛⲟⲩϯϩⲉ ·
…
10 ⲉⲃⲟⲗ ⲅⲁⲣ ϩⲓⲧⲛⲛⲁⲓ ϣⲁⲣⲉⲛⲣⲱⲙⲉ ⲛⲧⲉⲓⲙⲓⲛⲉ ⲉⲓ ⲉⲃⲟⲗ ⲉⲣⲡⲟⲗⲉⲙⲟⲥ ⲟⲩⲃⲉⲛⲉⲩⲉⲣⲏⲩ ϩⲣⲁⲓ ϩⲛⲛⲓϩⲛⲁⲁⲩ ⲙⲙⲓϣⲉ ⲉⲧⲉⲛⲁⲓ ⲛⲉ ·
…
11 ⲛⲕⲱϩ ⲙⲙⲟⲥⲧⲉ · ⲛⲕⲁ ⲧⲁⲗⲁⲗⲉⲓⲁ · ⲛⲥⲱϣ . ⲛⲕⲱⲙϣ ⲙⲛⲛⲉⲧⲉⲓⲛⲉ ⲛⲛⲁⲓ .
…
12 ⲧⲁⲓ ⲧⲉ ⲧϩⲉ ⲉϣⲁⲣⲉⲡⲥⲁⲧⲁⲛⲁⲥ ⲣⲙⲙⲉⲉⲩⲉ ⲛϩⲏⲧⲛ ϩⲁϩ ⲛⲕⲁⲕⲉ ⲉϩⲟⲩⲛ ⲉⲛⲉⲩⲉⲣⲏⲩ .
…
13 ϣⲁⲛⲧⲟⲩⲁⲁⲩ ⲙⲁⲩⲁⲁⲩ ⲛⲉⲛⲟⲭⲟⲥ ⲉⲡϩⲁⲡ ⲙⲡⲛⲟⲩⲧⲉ ·
…
14 ϩⲉⲛⲁⲧⲏⲡⲉ ⲅⲁⲣ ⲛⲉ ⲛⲉⲛⲧⲁϥⲁⲁⲩ ⲛϫⲁϫⲉ ⲉⲧⲇⲓⲕⲁⲓⲟⲥⲩⲛⲏ ⲙⲙⲉ ϩⲛⲛⲓⲥⲙⲟⲧ ϩⲛⲟⲩⲁⲅⲁⲡⲏ ⲉⲥⲟⲩⲟϣⲙ ϩⲓⲕⲱϩ .
…
15 ϩⲓⲙⲟⲥⲧⲉ ⲧⲁⲓ ⲧⲉ ⲧϩⲉ ⲉⲧⲛⲛⲁϫⲓϣⲓⲡⲉ ϩⲙⲡⲉϩⲟⲟⲩ ⲉⲧⲉⲣⲉⲡⲛⲟⲩⲧⲉ ⲛⲁⲕⲣⲓⲛⲉ ⲛⲙⲡⲉⲧϩⲏⲡ ⲛⲛⲣⲱⲙⲉ ·
…
16 ⲉⲛⲛⲁϩⲉⲡ ⲡⲉⲛⲕⲱϩ ⲙⲛⲡⲉⲛⲙⲟⲥⲧⲉ ⲉϩⲟⲩⲛ ⲉⲛⲉⲛⲉⲣⲏⲩ ⲛⲁϣ ⲛϩⲉ ϩⲙⲡⲉϩⲟⲟⲩ ⲉⲧⲙⲙⲁⲩ .
…
17 ⲛⲓⲙ ⲡⲉⲧⲛⲁϥⲓ ⲟⲩϭⲉⲣⲱⲃ ⲉϩⲣⲁⲓ ⲉⲡⲉⲧϩⲓⲧⲟⲩⲱϥ ·
…
18 ϫⲉⲛⲛⲁϫⲟⲟⲥ ϫⲉⲟⲩⲥⲏϥⲉ ⲙⲛⲟⲩⲙⲉⲣⲉϩ .
…
19 ⲛⲥⲉⲧⲙⲛⲁⲩ ⲉⲣⲟϥ ·
…
20 ⲁⲛⲟⲛ ⲇⲉ ⲛⲓⲙ ⲡⲉⲧⲛⲁⲙⲉⲉⲩⲉ .
…
21 ⲏ ⲛⲓⲙ ⲡⲉⲧⲛⲁⲧⲟϭⲥ ⲉⲣⲟⲛ ϫⲉⲧⲛⲕⲱⲛⲥ ⲛⲛⲉⲛⲉⲣⲏⲩ
…
22 ϩⲛⲛⲁⲓ ⲧⲏⲣⲟⲩ ⲉⲩⲛⲁⲩ ⲉⲧϩⲉ ⲉⲧⲛϣⲁϫⲉ ⲙⲛⲛⲉⲛⲉⲣⲏⲩ ⲙⲙⲟⲥ ·
…
23 ϩⲛϣⲁϫⲉ ⲛⲓⲙ ⲛⲉⲓⲣⲏⲛⲓⲕⲟⲛ ⲉⲣⲉⲙⲙⲛⲧϫⲁϫⲉ ⲇⲉ ϩⲙⲡⲉⲛϩⲏⲧ .
…
24 ⲥⲥⲟⲧⲡ ⲉⲧⲙⲧⲣⲉⲛϣⲓⲛⲉ ⲛⲥⲁⲡⲟⲩϫⲁⲓ ⲛⲛⲉⲛⲉⲣⲏⲩ ⲙⲙⲛⲡⲟⲛⲏⲣⲓⲁ ϩⲙⲡⲉⲛϩⲏⲧ .
…
25 ⲛϩⲟⲩⲟ ⲉⲧⲣⲉⲛϣⲓⲛⲉ ϩⲛⲟⲩϩⲩⲡⲟⲕⲣⲓⲥⲓⲥ , ⲙⲛⲟⲩⲁⲅⲁⲡⲏ ⲉⲙⲙⲛⲧⲛⲟⲩϫ · ⲙⲡⲣϣⲓⲛⲉ ϫⲉⲛⲉϯⲟⲩⲟϫ ,
…
26 ⲏ ϫⲉⲛⲉϯⲡⲣⲟⲕⲟⲡⲧⲉ ϩⲙⲡⲁⲅⲁⲑⲟⲛ .
…
27 ⲙⲡⲣⲣⲁϣⲉ ⲟⲛ ϫⲉⲁⲕⲥⲱⲧⲙ ⲉⲛⲉⲧⲉϩⲛⲁⲕ ⲉⲧⲣⲉⲩϣⲱⲡⲉ ⲙⲙⲟⲓ ·
…
28 ⲙⲡⲣϫⲟⲟⲥ ϫⲉⲉϥⲉⲱⲛϩ ⲛⲟⲩⲛⲟϭ ⲛⲟⲩⲟⲉⲓϣ ⲙⲡⲣⲣⲁϣⲉ ⲟⲛ ϫⲉⲁⲕⲥⲱⲧⲙ ϫⲉⲁϥⲙⲟⲩ ·
…
29 ⲉⲣⲉⲡⲓⲉⲟⲟⲩ ⲛⲣⲱⲙⲉⲛⲁⲣⲟⲩ ⲛⲁⲛ · ⲙⲁⲣⲛϣⲓⲡⲉ ϩⲏⲧⲟⲩ ⲛⲛⲓϣⲁϫⲉ ϫⲉⲡϫⲟⲉⲓⲥ ⲥⲟⲟⲩⲛ ⲛⲙⲙⲟⲕⲙⲉⲕ ⲛⲛⲣⲱⲙⲉ ϫⲉⲥⲉϣⲟⲩⲉⲓⲧ ·
…
30 ⲉⲓⲛⲏⲩ ⲁⲛ ⲉϩⲣⲁⲓ ⲉⲛⲉⲕϭⲓϫ .
…
31 ϫⲉϯⲣϩⲟⲧⲉ .
…
32 ⲏ ϯϣⲓⲡⲉ ⲉⲧⲣⲉⲕⲉⲓⲙⲉ ϫⲉⲟⲩⲛϩⲉⲛⲡⲟⲛⲏⲣⲟⲛ ϩⲙⲡⲁϩⲏⲧ ⲉϩⲟⲩⲛ ⲉⲣⲟⲕ ⲟⲩⲧⲉ ⲛⲧⲟⲕ ⲉⲕⲛⲏⲩ ⲁⲛ ·
…
33 ⲉϩⲣⲁⲓ ⲉⲛⲁϭⲓϫ ·
…
34 ϫⲉⲕⲣϩⲟⲧⲉ ·
…
35 ⲏ ⲕϣⲓⲡⲉ ⲉⲧⲣⲁⲥⲱⲧⲙ ϫⲉⲕϫⲉ ⲡⲉⲧϩⲟⲟⲩ ⲉⲣⲟⲓ ·
…
36 ⲁⲗⲗⲁ ⲉⲛⲛⲏⲩ ⲉϩⲣⲁⲓ ⲉⲛϭⲓϫ ⲙⲡⲛⲟⲩⲧⲉ ·
…
37 ⲉⲛⲁⲓⲁⲧⲛ ⲁⲛ ϫⲉⲟⲩⲛⲟⲩⲣⲁⲛ ϩⲓϫⲱⲛ .
…
38 ⲉⲛⲙⲉϩ ⲛⲕⲁⲕⲓⲁ ⲉϩⲟⲩⲛ ⲉⲛⲉⲛⲉⲣⲏⲩ ·
…
39 ⲁⲗⲗⲁ ⲉⲛⲁⲓⲁⲧⲛ ⲉⲣϣⲁⲛⲡⲥⲱⲧⲏⲣ ⲓⲏⲥⲟⲩⲥ ⲛⲁϩⲙⲛ ⲉⲙⲡⲉⲧϩⲟⲟⲩ ⲙⲡⲥⲁⲧⲁⲛⲁⲥ ·
…
40 ⲡⲓⲕⲣⲟϥ ⲛϯⲁⲏⲥ ⲉⲧϩⲙⲡϩⲏⲧ ⲙⲡⲣⲱⲙⲉ ⲉϩⲟⲩⲛ ⲉⲡⲉⲧϩⲓⲧⲟⲩⲱϥ ·
…
41 ⲧⲛϩⲙⲟⲟⲥ ϩⲓⲟⲩⲧⲣⲁⲡⲉⲍⲁ ⲛⲟⲩⲱⲧ ·
…
42 ϯⲟⲩⲱⲙ ⲙⲡⲟⲉⲓⲕ ⲛⲙⲙⲁⲕ ·
…
43 ⲧⲟⲟⲧⲕ ϩⲛⲧϫⲏ ⲛⲙⲙⲁⲓ ·
…
44 ⲧⲛⲟⲩⲏϩ ϩⲓⲟⲩⲥⲟⲡ ϩⲛⲛⲧⲟⲡⲟⲥ ⲉⲧⲟⲩⲁⲁⲃ ⲕϩⲓϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲙⲙⲁⲓ ·
…
45 ϯⲁϩⲉⲣⲁⲧ ϩⲓⲧⲟⲩⲛⲧⲉⲧⲣⲁⲡⲉⲍⲁ ⲛⲙⲙⲁⲕ ϯϯ ⲉϩⲣⲁⲓ ⲉⲧⲟⲟⲧⲕ ⲙⲡⲥⲱⲙⲁ ⲙⲡⲉⲭⲣⲓⲥⲧⲟⲥ ·
…
46 ⲕⲥⲱⲧ ⲉⲣⲟⲓ ⲙⲡⲉϥⲥⲛⲟϥ .
…
47 ⲡⲉⲛϩⲏⲧⲙⲉϩ ⲙⲡⲟⲛⲏⲣⲟⲛ ⲉϩⲟⲩⲛ ⲉⲛⲉⲛⲉⲣⲏⲩ .
…
48 ⲛⲧⲛⲣϩⲟⲧⲉ ⲁⲛ ϩⲏⲧⲥ ⲛⲧⲟⲣⲅⲏ ⲙⲛⲡⲥⲁϩⲟⲩ ⲛⲧⲁⲩⲉⲓ ⲉϩⲣⲁⲓ ⲉϫⲛⲛⲉⲧϩⲁⲧⲉ ⲛϩⲏ ⲉⲛⲧⲁⲩϭⲗⲟⲙⲗⲙ ϩⲛⲛⲓⲡⲟⲛⲏⲣⲟⲛ ⲛⲧⲉⲓϩⲉ ·
…
49 ⲙⲏ ⲛⲧⲁⲩⲥϩⲁⲓⲥⲟⲩ ⲉⲡϫⲓⲛϫⲏ .
…
50 ⲙⲏ ⲉⲩⲥⲟⲟⲩⲛ ⲁⲛ ϫⲉⲟⲩⲛϩⲁϩ ⲛⲟⲩⲟⲉⲓϣ ⲛⲓⲙ ⲛⲁⲙⲟⲟϣⲉ ϩⲙⲡⲏⲓ ⲙⲡⲛⲟⲩⲧⲉ ⲙⲡⲉⲩϩⲏⲧ ⲥⲟⲩⲧⲱⲛ ⲁⲛ ⲉϩⲟⲩⲛ ⲉⲛⲉⲩⲉⲣⲏⲩ .
…
51 ⲡⲉⲧⲟⲩⲱϣ ⲉⲥⲟⲩⲛ ⲛⲓⲡⲟⲛⲏⲣⲟⲛ ⲛⲧⲉⲓϩⲉ ⲁⲩⲱ ⲉⲉⲓⲙⲉ ⲉⲡⲉⲩⲧⲱⲱⲃⲉ ⲉⲓⲥϩⲏⲏⲛⲉ ⲥⲉⲥⲏϩ ϩⲛⲛⲉⲯⲁⲗⲙⲟⲥ
…
52 ⲉⲩϫⲱ ⲙⲙⲟⲥ ⲉⲛⲣⲱⲙⲉ ⲛⲧⲁⲩⲧⲁⲁⲩ ϫⲉⲉⲣⲉⲡⲙⲟⲩ ⲉⲓ ⲉϩⲣⲁⲓ ⲉϫⲱⲟⲩ
…
53 ⲙⲁⲣⲟⲩⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲉⲩⲟⲛϩ ⲙⲡⲣⲡⲱⲱⲛⲉ ⲛⲧⲟϥ ⲙⲡⲉⲧⲛϫⲱ ⲙⲙⲟϥ
…
54 ⲁⲗⲗⲟ ⲅⲁⲣ ⲛⲉⲧⲟⲩⲁⲁⲃ ⲉⲧϩⲙⲡⲏⲓ ⲙⲡⲛⲟⲩⲧⲉ ⲉⲧⲙⲟⲕϩ ⲛϩⲏⲧ
…
55 ⲁⲩⲱ ⲉⲧϭⲛⲁⲣⲓⲕⲉ ⲉⲛⲉⲧⲉⲓⲣⲉ ⲛϩⲉⲛⲡⲟⲛⲏⲣⲟⲛ ⲛϩⲏⲧⲟⲩ ϩⲱⲥⲧⲉ ⲉⲧⲣⲉⲩⲟⲡⲟⲩ ⲉϩⲉⲛϫⲁϫⲉ
…
56 ⲁⲗⲗⲟ ⲛⲉⲧⲉⲣⲉⲡⲉⲩϩⲏⲧ ⲙⲉϩ ⲛⲕⲁⲕⲓⲁ ϩⲓⲙⲛⲧϫⲁϫⲉ ⲉϩⲟⲩⲛ ⲉⲛⲉⲩⲉⲣⲏⲩ ⲉⲡϫⲓⲛϫⲏ ·
…
57 ⲛⲧⲁⲩⲥϩⲁⲓ ⲛⲉⲓϣⲁϫⲉ ⲁⲛ ⲙⲙⲁⲧⲉ ⲉⲧⲃⲉ ⲛⲉⲧⲙⲟⲟϣⲉ ϫⲓⲛⲛϣⲟⲣⲡ ϩⲙⲡⲏⲓ ⲙⲡⲛⲟⲩⲧⲉ ⲉⲙⲡⲉⲩϩⲏⲧ ⲥⲟⲩⲧⲱⲛ ⲁⲛ ⲙⲛⲛⲉⲩⲉⲣⲏⲩ .
…
58 ⲏ ⲉⲧⲃⲉ ⲓⲟⲩⲇⲁⲥ ⲙⲁⲩⲁⲁϥ ϫⲉⲡⲉⲧⲟⲩⲱⲙ ⲙⲡⲁⲟⲉⲓⲕ ⲛⲙⲙⲁⲓ ⲁϥϥⲓ ⲙⲡⲉϥϯⲃⲥ ⲉϩⲣⲁⲓ ⲉϫⲱⲓ .
…
59 ⲏ ϫⲉⲛⲉϥⲟⲩⲱⲙ ⲛⲙⲙⲁⲓ ϩⲛϩⲉⲛϭⲓⲛⲟⲩⲱⲙ ·
…
60 ⲙⲛⲛⲕⲟⲟⲩⲉ ⲉⲧⲉⲓⲛⲉ ⲛⲛⲁⲓ ·
…
61 ⲁⲗⲗⲁ ⲛⲧⲁⲩⲥϩⲁⲓⲥⲟⲩ ⲉⲧⲃⲉ ⲛⲉⲧⲛⲁⲙⲟⲟϣⲉ ϩⲛⲟⲩⲕⲣⲟϥ ϩⲛⲙⲙⲁ ⲉⲧⲟⲩⲁⲁⲃ ⲛⲟⲩⲟⲉⲓϣ ⲛⲓⲙ ·
…
62 ⲉⲙⲡⲉⲩϩⲏⲧ ⲥⲟⲩⲧⲱⲛ ⲁⲛ ⲙⲛⲡⲛⲟⲩⲧⲉ ⲁⲩⲱ ⲙⲡⲉⲩϩⲏⲧ ⲥⲟⲩⲧⲱⲛ ⲁⲛ ⲙⲛⲛⲉⲩⲉⲣⲏⲩ .
…
63 ⲉⲣⲉⲓⲟⲩⲇⲁⲥ ϣⲟⲟⲡ ⲧⲱⲛ ⲧⲉⲛⲟⲩ ⲉϥϩⲛⲁⲙⲛⲧⲉ ⲉⲧⲃⲉⲟⲩ .
…
64 ⲉⲧⲃⲉⲡϫⲓⲟⲩⲉ ⲙⲛⲧⲙⲛⲧⲡⲣⲟⲇⲟⲧⲏⲥ ⲧⲉϥϭⲓϫ ϩⲛⲧϫⲏ ⲙⲛⲡⲛⲟⲩⲧⲉ ϥⲥⲃⲧⲱⲧ ⲉⲡⲁⲣⲁⲇⲓⲇⲟⲩ ⲙⲙⲟϥ
…
65 ⲙⲁⲣⲛⲣϩⲟⲧⲉ ⲇⲉ ϩⲏⲧⲥ ⲛⲧⲅⲉϩⲉⲛⲛⲁ
…
66 · ⲁⲩⲱ ⲛⲧⲛϣⲓⲡⲉ ϩⲏⲧⲛ ⲙⲙⲓⲛⲙⲙⲟⲛ ⲁⲛⲟⲛ ⲛⲉⲛⲧⲁⲩϫⲓ ⲙⲡⲣⲁⲛ ⲉⲙⲙⲛⲧⲛⲟϭ ⲉⲙⲡⲛⲟⲩⲧⲉ ⲛⲧⲛϩⲁⲣⲉϩ ⲉⲣⲟⲛ ⲉⲛⲟⲩⲁⲁⲃ ·
…
67 ⲉⲃⲟⲗ ϩⲛⲛⲉⲡⲣⲁⲝⲓⲥ ⲛⲓⲟⲩⲇⲁⲥ ϩⲙⲡⲏⲓ ⲙⲡⲛⲟⲩⲧⲉ ·
…
68 ⲛⲧⲁϥⲣ ⲛⲓϩⲟⲩⲟ ⲡⲟⲛⲏⲣⲟⲛ ⲅⲁⲣ ⲛϭⲓⲡⲉⲧⲙⲙⲁⲩ ϫⲉⲙⲛⲛⲥⲁⲧⲣⲉϥϫⲓ ⲡⲟⲉⲓⲕ ⲛⲧⲁⲡⲥⲁⲧⲁⲛⲁⲥⲃⲱⲕ ⲉϩⲟⲩⲛ ⲉⲣⲟϥ ·
…
69 ⲇⲓⲕⲁⲓⲱⲥ ⲁ ϯⲛⲟϭ ⲛⲟⲣⲅⲏ ⲉⲓ ⲉϩⲣⲁⲓ ⲉϫⲱϥ ⲕⲁⲧⲁⲧⲡⲟⲛⲏⲣⲓⲁ ⲛⲛⲉϥϩⲃⲏⲩⲉ ⲉⲃⲟⲗ ϫⲉⲁⲛⲧⲓⲧⲣⲉϥⲧⲃⲃⲟ ⲉⲃⲟⲗ ϩⲙⲡⲥⲁⲧⲁⲛⲁⲥ
…
70 ϩⲙⲡⲧⲣⲉϥϫⲓ ⲉⲃⲟⲗ ϩⲙⲡⲟⲉⲓⲕ ⲛⲧⲁϥⲡⲟϣϥ ⲁϥⲧⲁⲁϥ ⲛⲁϥ ⲛϭⲓⲡϫⲟⲉⲓⲥ ⲁϥⲃⲱⲕ ϩⲱⲱϥ ⲛϩⲟⲩⲟ ⲉϩⲟⲩⲛ ⲉⲣⲟϥ ·
…
71 ⲧⲁⲓ ⲧⲉ ϭⲉ ⲧⲁⲭⲩ ⲛⲧⲁϥⲟⲩⲱⲧⲃ ⲉⲃⲟⲗ ϩⲓⲕⲉⲥⲁ · ⲁⲛⲧⲓⲣⲁⲡⲟⲥⲧⲟⲗⲟⲥ · ⲁϥⲣⲇⲓⲁⲃⲟⲗⲟⲥ ·
…
72 ⲧⲉⲧⲛⲛⲁⲩ ϫⲉⲡⲉⲧⲛⲁⲕⲁⲙⲁ ⲙⲡⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲛϩⲏⲧϥ ⲙⲛⲛⲥⲁⲧⲉⲭⲁⲣⲓⲥ .
…
73 ⲙⲛⲛⲥⲁⲡⲣⲁⲛ · ⲙⲛⲛⲥⲁⲡⲉⲥⲭⲏⲙⲁ ⲛⲧⲁϥⲧⲁⲁϥ ϩⲓⲱⲱϥ ·
…
74 ϥⲛⲁⲉⲓ ⲉⲧⲟⲟⲧⲟⲩ ⲛϩⲉⲛⲡⲟⲛⲏⲣⲟⲛ ⲉⲛⲁϣⲱⲟⲩ ·
…
75 ⲏ ⲛⲧⲁⲛⲉⲓ ⲁⲛ ⲉⲃⲟⲗ ϩⲙⲡⲏⲓ ⲛⲧⲉⲛⲙⲛⲧⲕⲟⲥⲙⲓⲕⲟⲛ ⲉⲧⲃⲉⲧⲙⲣⲛⲟⲃⲉ ·
…
76 ⲁⲩⲱ ⲉⲃⲟⲗ ⲧⲱⲛ ⲉⲣⲉⲛⲓϩⲃⲏⲩⲉ ⲛⲕⲁⲕⲉ ϩⲓϭⲟⲥⲙ · ϩⲓϣⲟⲛⲧⲉ ϩⲓⲁⲣⲟⲟⲩⲉ ⲛⲁϭⲗⲟⲙⲗⲙ ⲉϩⲟⲩⲛ ⲉⲣⲟⲛ .
…
77 ⲏ ⲉⲛⲛⲁϫⲱⲗϫ ⲛϩⲏⲧⲟⲩ ⲙⲛⲛⲉⲛⲙⲛⲧⲁⲧϩⲏⲧ . ⲙⲛⲛⲉⲛⲙⲛⲧⲁⲙⲉⲗⲏⲥ ⲛⲉⲛⲧⲁⲩⲧⲣⲉⲛⲉⲧⲥⲁϣⲉ ϩⲗⲟϭ ⲛⲁⲛ ·
…
78 ⲉⲓϣⲁϫⲉ ⲉⲛϫⲱϩⲙ ⲙⲛⲛⲥⲱⲱϥ ⲙⲛⲛⲡⲟⲣⲛⲉⲓⲁ ⲙⲙⲓⲛⲉ ⲙⲓⲛⲉ ⲛⲁⲓ ⲉⲧⲟⲩⲏⲩ ⲉⲃⲟⲗ ⲉⲙⲁⲧⲉ ⲛⲛⲕⲁⲛⲱⲛ ⲙⲡⲅⲁⲙⲟⲥ ⲉⲧⲧⲁⲓⲏⲩ ·
…
79 ⲁⲩⲱ ⲉⲧⲟ ⲛϣⲙⲙⲟ ⲉⲡⲙⲁ ⲛⲛⲕⲟⲧⲕ ⲉⲧⲧⲃⲃⲏⲩ . ⲙⲛⲛⲕⲱϩ ·
…
80 ⲙⲛⲙⲙⲟⲥⲧⲉ ⲙⲛⲛⲕⲁⲧⲁⲗⲁⲗⲓⲁ ⲙⲛⲙⲙⲛⲧⲙⲁⲓⲧⲟ ⲛϩⲟⲩⲟ ⲙⲛⲙⲙⲛⲧⲣⲉϥϫⲓϩⲟ ϩⲙⲡϩⲁⲡ ⲙⲛⲛⲕⲟⲟⲩⲉ ⲧⲏⲣⲟⲩ
…
81 ⲛⲧⲁⲛⲙⲉϩ ⲛⲧⲟⲡⲟⲥ ⲙⲡⲛⲟⲩⲧⲉ ⲛϩⲏⲧⲟⲩ ⲉϩⲉⲛⲡⲁϣ ⲛⲁⲛ ·
…
82 ⲙⲛϩⲉⲛⲁⲗⲟⲟⲩⲉ ⲁⲩⲱ ⲉϩⲉⲛⲱⲛⲉ . ⲙⲛϩⲉⲛϩⲓⲉⲓⲧ ⲉⲧⲣⲉⲛϫⲱⲗϫ ⲛϩⲏⲧⲟⲩ ·
…
83 ⲉⲧⲣⲉⲛϫⲓϫⲣⲟⲡ ⲇⲉ ⲟⲛ ⲛϩⲏⲧⲟⲩ ⲁⲩⲱ ⲉⲧⲣⲉⲛϩⲉ ⲉϩⲣⲁⲓ ⲉⲣⲟⲟⲩ .
…
84 ⲛⲓⲙ ⲡⲉ ⲡⲕⲉⲟⲩⲁ ⲉⲧⲏⲡ ⲉⲡⲱⲣϫ ⲙⲡⲉⲧⲟⲩⲁⲁⲃ ⲉⲃⲟⲗ ⲙⲡⲉⲧϫⲁϩⲙ ·
…
85 ⲁⲩⲱ ⲡⲉⲧϩⲟⲟⲩ ⲉⲃⲟⲗ ⲙⲡⲡⲉⲧⲛⲁⲛⲟⲩϥ ⲛⲧϩⲉ ⲙⲡⲉⲧϩⲙⲡⲏⲓ ⲙⲡⲛⲟⲩⲧⲉ ·
…
86 ⲉⲡⲉⲓⲇⲏ ⲛⲧϩⲉ ⲉⲧⲉⲣⲉⲛⲣⲉϥⲉⲡⲓⲑⲩⲙⲉⲓ ⲉⲡⲁⲅⲁⲑⲟⲛ ⲛⲁⲛⲁⲩ ⲉⲣⲟⲛ ⲙⲙⲟⲥ · ⲉⲩⲛⲁⲁⲁⲥ ·
…
87 ⲁⲩⲱ ⲛⲧϩⲉ ⲉⲧⲉⲣⲉⲛⲣⲉϥⲣⲡⲉⲧϩⲟⲟⲩ ⲛⲁⲛⲁⲩ ⲉⲣⲟⲛ ⲙⲙⲟⲥ ⲉⲩⲛⲁⲁⲁⲥ · ⲁⲩⲱ ⲛⲥⲉⲣϩⲟⲩⲟ ·
…
88 ⲡⲁⲕⲁⲑⲁⲣⲧⲟⲥ ⲁⲛ ⲙⲙⲁⲧⲉ ⲡⲉ ⲟⲩⲣⲱⲙⲉ ⲉϥϫⲁϩⲙ · ⲉⲩⲡⲱⲣϫ ⲙⲙⲟϥ ⲉⲃⲟⲗ ⲙⲡⲣⲱⲙⲉ ⲉⲧⲟⲩⲁⲁⲃ ·
…
89 ⲟⲩⲧⲉ ⲟⲩϩⲛⲟ ⲁⲛ ⲙⲙⲁⲧⲉ ⲉϥⲛⲁⲣϣⲁⲩ ⲁⲛ ⲉⲁⲁϥ ⲛⲑⲩⲥⲓⲁ ⲙⲡϫⲟⲉⲓⲥ ⲡⲉ ⲡⲉⲧϫⲁϩⲙ ⲉⲩⲡⲱⲣϫ ⲙⲙⲟϥ ⲉⲃⲟⲗ ⲙⲡⲉⲧⲧⲃⲃⲏⲩ ⲕⲁⲧⲁⲛⲉⲛⲧⲟⲗⲏ ·
…
90 ⲁⲗⲗⲁ ⲡⲟⲛⲏⲣⲟⲛ ⲛⲓⲙ ϫⲓⲛⲛϩⲁⲡ ⲉⲧϭⲟⲟⲙⲉ · ϣⲁϩⲣⲁⲓ ⲉⲧϩⲩⲡⲟⲕⲣⲓⲥⲓⲥ · ϩⲉⲛⲁⲕⲁⲑⲁⲣⲧⲟⲛ ⲛⲉ ·
…
91 ⲁⲩⲱ ⲡⲉⲧⲛⲁϫⲱϩ ⲉⲣⲟⲟⲩ · ⲉⲧⲉⲡⲁⲓ ⲡⲉ ⲛϥⲁⲁⲩ .
…
92 ⲉϥϣⲁⲛⲧⲙⲥⲁϩⲱϥ ⲉⲃⲟⲗ ⲙⲙⲟⲟⲩ · ϥⲛⲁϣⲱⲡⲉ ⲛⲁⲕⲁⲑⲁⲣⲧⲟⲥ ⲛⲛⲁϩⲣⲙⲡⲛⲟⲩⲧⲉ
…
93 ⲛⲧϩⲉ ⲉⲧⲉϩⲉⲛⲁⲕⲁⲑⲁⲣⲥⲓⲁ ⲛⲉ ⲛⲟⲃⲉ ⲛⲓⲙ ⲛⲛⲁϩⲣⲛⲛⲣⲙⲛⲛⲟⲩⲧⲉ
…
94 ⲛⲁⲙⲉ ⲧⲁⲓ ⲧⲉ ⲧϩⲉ ⲉⲧⲟⲩϫⲱ ⲙⲙⲟⲥ ⲉϩⲉⲛⲇⲓⲕⲁⲥⲧⲏⲥ ⲛ ⲥⲉⲥⲟⲩⲧⲱⲛ ⲁⲛ
…
95 ϫⲉⲁⲕⲁⲑⲁⲣⲧⲟⲥ ⲉⲧⲃⲉⲛⲉⲩϩⲃⲏⲩⲉ ⲛⲁⲕⲁⲑⲁⲣⲧⲟⲛ ·
…
96 ⲁⲩⲱ ⲛⲉⲧⲥⲟⲩⲧⲱⲛ ϫⲉⲕⲁⲑⲁⲣⲟⲥ ⲉⲧⲃⲉⲛⲉⲩϩⲃⲏⲩⲉ ⲛⲇⲓⲕⲁⲓⲟⲛ · ⲁⲩⲱ ⲛⲉⲩϩⲁⲡ ⲙⲙⲉ ·
…
97 ⲛⲧⲉⲓ ϩⲉ ⲟⲛ ⲡⲉ ⲟⲩⲣⲱⲙⲉ ⲉϥⲧϭⲁⲉⲓⲟ ⲛⲟⲩⲣⲱⲙⲉ ⲛⲁⲅⲁⲑⲟⲥ · ⲉϥϯⲉⲟⲟⲩ ⲛⲟⲩⲣⲱⲙⲉ ⲙⲡⲟⲛⲏⲣⲟⲥ ·
…
98 ⲁⲩⲱ ⲉϥⲥⲱϣ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ⲙⲡⲉⲙⲧⲟ ⲉⲃⲟⲗ ⲛⲟⲩⲁⲥⲉⲃⲏⲥ ·
…
99 ⲟⲩϩⲏⲧ ⲛⲁⲕⲁⲑⲁⲣⲧⲟⲥ ⲡⲉⲧⲛϩⲏⲧϥ ·
…
100 ⲙⲁⲗⲓⲥⲧⲁ ⲉϥⲟ ⲛⲧϩⲉ ⲙⲡⲉⲧⲛⲁⲧⲱⲙ ⲉⲣⲛⲟⲩⲡⲩⲅⲏ ⲙⲙⲟⲟⲩ ·
…
101 ⲛⲓⲙ ⲡⲉⲧⲛⲁϫⲟⲟⲥ ϫⲉⲧⲉⲓ ϩⲉ ⲁⲛ ⲧⲉ · ⲛⲥⲁⲡⲉⲧⲉⲣⲉⲧⲃⲟⲧⲉ ⲙⲡⲛⲟⲩⲧⲉ ⲛϩⲏⲧϥ ⲧⲙⲛⲧϫⲁⲥⲓϩⲏⲧ .
…
102 ⲛⲧϩⲉ ⲉⲧⲥⲏϩ ϩⲙⲡⲉⲩⲁⲅⲅⲉⲗⲓⲟⲛ ·
…
103 ⲏ ⲉⲛⲛⲁⲙⲉⲉⲩⲉ ⲉⲛⲉⲓⲙⲛⲧϫⲁⲥⲓϩⲏⲧ ⲁⲛⲟⲕ ⲙⲉⲛ ϫⲉⲛⲉ ⲛⲧⲟⲕ ⲡⲉⲧⲛⲁⲕⲁⲑⲏⲅⲉⲓ ⲙⲙⲟⲓ ·
…
104 ⲛⲧⲟⲕ ⲇⲉ ϫⲉⲛⲉⲡⲁⲓ ⲡⲉⲧⲛⲁϯⲥⲃⲱ ⲛⲁⲓ ·
…
105 ⲁⲩⲱ ⲛⲧⲁⲛⲣϩⲏⲃⲉ ⲇⲉ ⲁⲛ ⲉϫⲛⲛⲉⲛⲛⲟⲃⲉ ϫⲉⲛⲛⲉⲡⲛⲟⲩⲧⲉ ⲛⲟϫⲛ ⲉⲃⲟⲗ ⲙⲙⲟϥ ϩⲙⲡⲉϩⲟⲟⲩ ⲛⲧⲉⲛⲁⲛⲁⲅⲕⲏ ·
…
106 ⲏ ϩⲉⲛⲣⲱⲙⲉ ⲁⲛ ⲛⲉ ⲛⲁⲓ ⲛⲧⲟⲟⲩ ⲉⲧϥⲛⲁϫⲟⲟⲥ ⲛⲁⲩ ⲙⲡⲛⲁⲩ ⲉⲧⲙⲙⲁⲩ ϫⲉⲥⲁϩⲉⲧⲏⲩⲧⲛ ⲉⲃⲟⲗ ⲙⲙⲟⲓ .
…
107 ⲏ ϫⲉⲛϯⲥⲟⲟⲩⲛ ⲙⲙⲱⲧⲛ ⲁⲛ · ϫⲉⲛⲧⲉⲧⲛⲛⲓⲙ · ⲉⲛⲛⲁϫⲟⲟⲥ ϫⲉⲟⲩ ⲙⲡⲛⲁⲩ ⲉⲧⲙⲙⲁⲩ ·
…
108 ⲉⲛⲛⲁϫⲟⲟⲥ ϫⲉϩⲙⲡⲉⲕⲣⲁⲛ ⲁⲛϫⲓ ⲛϩⲉⲛⲁⲣⲭⲏ · ⲏ ϩⲉⲛⲙⲛⲧⲛⲟϭ .
…
109 ϩⲙⲡⲉⲕⲣⲁⲛ ⲁⲛϭⲟⲟⲗⲛ ⲛϩⲉⲛⲥⲭⲏⲙⲁ · ϩⲙⲡⲉⲕⲣⲁⲛ ⲁⲛϣⲱⲡⲉ ϩⲛⲛⲉⲕⲧⲟⲡⲟⲥ ⲉⲧⲟⲩⲁⲁⲃ ·
…
110 ϩⲙⲡⲉⲕⲣⲁⲛ ⲉⲛⲱϣ ⲛⲛⲉⲅⲣⲁⲫⲏ · ⲛⲁⲓ ϩⲱⲟⲩ ⲛⲁϫⲟⲟⲥ · ϫⲉϩⲣⲁⲓ ϩⲙⲡⲉⲕⲣⲁⲛ .
…
111 ⲁⲛⲡⲣⲟⲫⲏⲧⲉⲩⲉ · ⲁⲩⲱ ϩⲙⲡⲉⲕⲣⲁⲛ ⲁⲛⲛⲉϫ ⲇⲁⲓⲙⲟⲛⲓⲟⲛ ⲉⲃⲟⲗ · ⲁⲩⲱ ϩⲣⲁⲓ ϩⲙⲡⲉⲕⲣⲁⲛ ⲁⲛⲣϩⲁϩ ⲛϭⲟⲙ ·
…
112 ⲁⲗⲗⲁ ⲛⲥⲉⲛⲁϯϩⲏⲩ ⲁⲛ ⲉⲗⲁⲁⲩ ·
…
113 ⲉⲧⲃⲉⲟⲩ . ⲁⲣⲁ ⲛⲧⲁⲩⲟⲃϣⲟⲩ ⲉⲛⲉϩⲃⲏⲩⲉ ·
…
114 ⲉϣϫⲉ ϥⲛⲁϫⲟⲟⲥ ⲛⲛⲁⲓ ϫⲉⲥⲁϩⲉⲧⲏⲩⲧⲛ ⲉⲃⲟⲗ ⲙⲙⲟⲓ ⲛⲉⲧⲥϩⲟⲩⲟⲣⲧ ⲉⲧⲥⲁⲧⲉ ⲛϣⲁⲉⲛⲉϩ ·
…
115 ⲉⲧⲃⲉϫⲉⲙⲡⲟⲩⲉⲓⲣⲉ ⲛⲛⲉⲛⲧⲁϥϫⲟⲟⲩ ·
…
116 ⲉⲓⲉ ⲟⲩⲟⲓ ⲛⲁⲛ ⲛⲟⲩⲏⲣ ϫⲉⲧⲛⲧⲁⲕⲟ ⲛϩⲉⲛϩⲃⲏⲩⲉ ⲛⲁⲛⲁⲅⲕⲁⲓⲟⲛ · ⲉⲧⲉⲛϩⲁⲡ ⲛⲉ ⲙⲡⲛⲟⲩⲧⲉ · ⲁⲩⲱ ⲡⲇⲓⲕⲁⲓⲟⲛ .
…