1 ⲛⲉⲧⲟⲩⲁⲁⲃ ⲉⲧⲉⲛϩⲏⲧⲛ ⲙⲟⲟϣⲉ ⲉⲩⲁϣⲁϩⲟⲙ · ⲉⲩⲥⲉⲓ ⲛϩⲓⲥⲉ ϩⲓⲛⲟϭⲛⲉϭ ⲉⲧⲃⲉⲛⲉϩⲃⲏⲩⲉ ⲛⲗⲟⲓⲙⲟⲥ
…
2 ⲉⲧⲃⲏⲏⲧⲛ ⲥⲉϣⲓⲡⲉ ϩⲏⲧⲟⲩ ⲛⲛⲉⲧⲥⲧⲏⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲉⲧⲉⲛϩⲉⲗⲗⲏⲛ ⲛⲉ · ⲙⲛⲛⲉⲧⲉⲓⲣⲉ ⲧⲏⲣⲟⲩ ⲙⲡⲉⲛⲧⲁⲩϫⲟⲟϥ ⲉⲧⲃⲏⲏⲧϥ · ϫⲉⲥϩⲁⲓ ⲙⲡⲉⲓⲣⲱⲙⲉ ϫⲉⲟⲩⲣⲱⲙⲉ ⲡⲉ ⲉⲁⲩⲥⲧⲟϥ ⲉⲃⲟⲗ · ⲛⲁⲡⲣⲁⲛ ⲙⲛⲡⲉⲟⲟⲩ ⲉⲧⲟϣⲙ ϩⲓϫⲙⲡⲕⲁϩ ⲛⲧϩⲉ ⲉⲧⲥⲏϩ ⲛϣⲏⲣⲉ ⲛⲕⲣⲟⲛⲟⲥ · ⲁⲩⲱ ⲛϩⲙϩⲁⲗ ⲙⲡⲥⲁⲧⲁⲛⲁⲥ · ⲛⲉⲧⲟⲩⲟϭⲟⲩⲉϭ ⲛϩⲉⲛⲙⲟⲕⲙⲉⲕ ⲙⲛϩⲉⲛⲗⲟⲅⲓⲥⲙⲟⲥ ⲛⲇⲁⲓⲙⲟⲛⲓⲟⲛ ⲛⲧϩⲉ ⲛⲛⲛⲟⲩⲛⲉ ⲛϣⲏⲛ ϩⲁⲡⲛⲟϭ ⲛϩⲕⲟ ⲙⲡⲗⲟⲅⲟⲥ ⲛⲛⲉⲅⲣⲁⲫⲏ ⲁⲩⲱ ⲧⲙⲛⲧⲛⲟⲩⲧⲉ ⲙⲡⲉⲓⲡⲁⲛⲧⲟⲕⲣⲁⲧⲱⲣ · ϩⲁⲡⲛⲟϭ ⲛϩⲕⲟ ⲙⲡⲟⲉⲓⲕ ⲛⲧⲁϥⲉⲓ ⲉⲃⲟⲗ ϩⲛⲧⲡⲉ ⲓⲏⲥⲟⲩⲥ ·
…
3 ϫⲉⲉⲩⲛⲁϩⲙⲟⲟⲥ ⲉⲩϣⲁϫⲉ ⲉⲣⲟⲛ ⲉⲩⲥⲱⲃⲉ · ⲉⲩⲉⲗⲉⲕϣⲁ · ⲉⲩⲟⲩⲱϩⲉ ϫⲛⲛⲉⲧⲟⲩⲥⲱⲧⲙ ⲉⲣⲟⲟⲩ · ⲛⲧϩⲉ ⲉⲧⲟⲩⲛⲁϣⲙⲉⲉⲩⲉ ⲙⲙⲟⲥ ⲉⲡⲟⲛⲏⲣⲟⲛ ⲛⲓⲙ ⲉϩⲟⲩⲛ ⲉⲣⲟⲛ ϩⲛⲧⲕⲁⲕⲓⲁ ⲙⲡⲉⲩⲉⲓⲱⲧ ⲡⲇⲓⲁⲃⲟⲗⲟⲥ ·
…
4 ⲙⲟⲛⲟⲛ ⲧⲙⲛⲧⲣⲙⲛϩⲏⲧ ⲛⲛⲉⲓϣⲁϫⲉ ⲉⲣⲟⲛ ⲛⲧⲟⲟⲧϥ ⲙⲡϫⲟⲉⲓⲥ · ϫⲉⲉⲣϣⲁⲛⲡⲉϩⲙⲟⲩ ⲃⲁⲁⲃⲉ ⲉⲩⲛⲁⲙⲟⲗϩ ϥⲛⲟⲩ ·
…
5 ⲉⲙⲉϥⲣϣⲁⲩ ⲉⲡⲕⲁϩ ⲟⲩⲇⲉ ⲧⲕⲟⲡⲣⲓⲁ · ⲕⲉ ⲧⲟⲓ ⲅⲉ ϫⲉϩⲛⲁⲁⲩ ⲛⲓⲙ ⲉⲧϩⲟⲟⲩ · ⲏ ⲛⲉ ϣⲁⲩⲧⲁⲕⲟ ⲉϣⲁⲩⲛⲟϫⲟⲩ ⲉⲣⲟⲥ · ⲛⲧϩⲉ ⲟⲛ ⲉⲧⲉⲁⲙⲛⲧⲉ ⲡⲉⲧⲛⲁⲕⲗⲏⲣⲟⲛⲟⲙⲉⲓ ⲛⲛⲉⲧⲛⲁⲙⲟⲩ ϩⲣⲁⲓ ϩⲛⲛⲉⲩⲛⲟⲃⲉ ·
…
6 ⲙⲉϥⲣϣⲁⲩ ⲉⲡⲏⲓ ⲙⲡⲛⲟⲩⲧⲉ · ⲟⲩⲇⲉ ⲡⲕⲉⲕⲟⲥⲙⲟⲥ ·
…
7 ⲙⲉϥⲣϣⲁⲩ ⲉⲧⲣⲉⲡⲇⲓⲁⲃⲟⲗⲟⲥ · ⲣϩⲟⲩⲉⲇⲓⲕⲁⲓⲟⲥ ϩⲓⲱⲱϥ ·
…
8 ⲙⲉϥⲣϣⲁⲩ ⲟⲛ ⲉⲧⲣⲉⲡⲣⲉϥⲣⲛⲟⲃⲉ ⲙⲉⲧⲁⲛⲟⲉⲓ ⲉⲧⲃⲏⲏⲧϥ ·
…
9 ϥⲥⲱⲕ ⲉⲡⲁϩⲟⲩ ⲙⲡⲉⲭⲣⲓⲥⲧⲓⲁⲛⲟⲥ · ⲉⲧⲉⲓⲛⲉ ⲙⲙⲟϥ ϩⲙⲡϭⲱⲱⲙⲉ ⲙⲛⲙⲛⲧⲙⲛⲧϭⲱⲃ ·
…
10 ϥⲟ ⲛⲥⲕⲁⲛⲇⲁⲗⲟⲛ ⲛⲛⲉⲧⲟⲩⲱϣ ⲉⲥⲟⲩⲛⲡⲛⲟⲩⲧⲉ ·
…
11 ⲉϣⲁⲩⲛⲟϫϥ ⲉⲃⲟⲗ ⲉⲧⲱⲛ ·
…
12 ⲏ ⲉⲧⲱⲛ · ⲉϣⲁⲩⲛⲟϫϥ ⲉⲃⲟⲗ ϩⲛⲛⲧⲟⲡⲟⲥ ⲉⲧⲟⲩⲁⲁⲃ · ⲉⲧⲣⲉϥⲕⲧⲟϥ ⲉϩⲣⲁⲓ ⲉⲡⲙⲁ ⲛⲧⲁϥⲉⲓ ⲙⲙⲟϥ · ⲛⲧϩⲉ ⲛⲓⲟⲩⲇⲁⲥ ⲛⲧⲁϥⲕⲧⲟϥ ⲉϩⲣⲁⲓ ⲉⲡⲉϥⲏⲓ ⲙⲙⲓⲛⲟⲩⲙⲙⲟϥ ·
…
13 ⲉϣⲁⲩⲛⲟϫϥ ⲉⲃⲟⲗ ⲉⲡⲕⲁⲕⲉ ⲛⲧⲁⲡⲉⲩⲁⲅⲅⲉⲗⲓⲟⲛ ϫⲟⲟϥ ·
…
14 ⲕⲁⲛ ⲙⲡⲟⲩⲛⲟϫⲛ ⲉⲃⲟⲗ ⲧⲉⲛⲟⲩ ϩⲛⲛⲧⲟⲡⲟⲥ ⲙⲡⲛⲟⲩⲧⲉ ⲉⲧⲃⲉⲛⲉⲛⲡⲟⲛⲏⲣⲟⲛ ⲉⲧⲉⲛⲉⲓⲣⲉ ⲙⲙⲟⲟⲩ ·
…
15 ⲛⲓⲙ ⲟⲛ ⲡⲉⲧⲛⲁⲕⲁⲁⲛ ⲛϩⲏⲧⲟⲩ · ⲙⲡⲥⲟⲡ ⲉⲧⲣⲉⲡⲙⲟⲩ ⲛⲁⲁⲁⲛ ⲛϣⲙⲙⲟ ⲉⲣⲟⲟⲩ ·
…
16 ⲙⲁⲣⲉⲛⲣϩⲟⲧⲉ ϫⲉⲛⲛⲉⲡⲛⲟⲩⲧⲉ ϩⲉⲡⲡⲉϥϩⲟ ⲉⲣⲟⲛ ϩⲙⲡⲉⲓⲙⲁ ⲛϭⲟⲓⲗⲉ ⲛⲧϩⲉ ⲛⲧⲁϥϫⲟⲟⲥ ⲛⲛⲁⲓ ⲙⲡⲉⲓⲟⲩⲟⲉⲓϣ · ϫⲉⲉⲧⲃⲉ ⲛⲛⲟⲃⲉ ⲛⲧⲁⲩⲁⲁⲩ ⲉⲣⲟⲓ ⲁⲓϩⲉⲡⲡⲁϩⲟ ⲉⲣⲟⲟⲩ ·
…
17 ⲁⲓⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ⲛⲛⲉⲧⲑⲗⲓⲃⲉ ⲙⲙⲟⲟⲩ ·
…
18 ⲁⲩⲱ ⲁⲩϩⲉ ⲧⲏⲣⲟⲩ ϩⲛⲧⲥⲏⲃⲉ · ⲕⲁⲧⲁⲛⲉⲩⲁⲕⲁⲑⲁⲣⲥⲓⲁ · ⲁⲩⲱ ⲕⲁⲧⲁⲛⲉϩⲃⲏⲩⲉ ⲛⲧⲁⲩⲁⲁⲩ ·
…
19 ⲁⲓⲧⲱⲱⲃⲉ ⲛⲁⲩ · ⲁⲓϩⲉⲡⲡⲁϩⲟ ⲉⲣⲟⲟⲩ ·
…
20 ϩⲉⲛⲣⲱⲙⲉ ⲉϣⲁⲩϥⲓⲧⲟⲩ ϩⲓⲧⲙⲡⲉⲡⲛⲉⲩⲙⲁ ⲙⲡϫⲟⲉⲓⲥ ⲛⲥⲉϫⲓⲧⲟⲩ ⲉϩⲟⲩⲛ ⲉⲧⲁⲩⲗⲏ · ⲏ ⲛⲁⲩⲗⲏ · ⲛⲥⲉⲧⲁϩⲟⲟⲩ ⲉⲣⲁⲧⲟⲩ · ⲛϩⲏⲧⲟⲩ ⲉⲧⲣⲉⲩⲛⲁⲩ ⲉⲡⲉⲟⲟⲩ ⲙⲡⲛⲟⲩⲧⲉ · ϩⲙⲡⲉϥⲏⲓ · ⲙⲛϩⲉⲛⲣⲱⲙⲉ ⲉⲧⲉⲣⲉⲛⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲧⲣⲉⲩϩⲓϭⲗⲁ · ϩⲛⲧⲁⲡⲁⲧⲏ ⲛϩⲉⲛⲡⲁⲑⲟⲥ ⲉⲩⲥⲏϣ · ϩⲛⲛⲁⲩⲗⲏ ⲙⲡⲉϥⲙⲁ ⲉⲧⲟⲩⲁⲁⲃ ·
…
21 ⲟⲩ ⲡⲉ ⲡⲉⲛϣⲁϫⲉ
…
22 ⲏ ⲉⲛⲛⲁϫⲟⲟⲥ ϫⲉⲟⲩ ⲛⲛⲁϩⲣⲛⲛⲉⲧⲙⲙⲁⲩ ⲉⲓϣⲁϫⲉ ⲉⲛⲉⲧⲟⲩⲁⲁⲃ ⲧⲏⲣⲟⲩ ·
…
23 ⲏ ⲛⲛⲁϫⲓϣⲓⲡⲉ ⲉⲛⲟⲩⲏⲣ ϩⲙⲡⲉϩⲟⲟⲩ ⲛⲧⲉⲩⲡⲁⲣⲣⲟⲩⲥⲓⲁ · ⲉⲧⲉⲩⲛⲧⲁⲩⲥ ⲧⲉⲛⲟⲩ ϩⲛⲙⲡⲏⲩⲉ ⲙⲛⲛⲁⲅⲅⲉⲗⲟⲥ · ⲉⲃⲟⲗ ⲟⲛ ϫⲉⲁⲩⲡⲁⲣⲩⲥⲓⲁⲍⲉ ⲙⲙⲟⲟⲩ ⲉⲩϣⲟⲟⲡ ϩⲓϫⲙⲡⲕⲁϩ ·
…
24 ⲥⲱⲧⲙ ⲁⲩⲱ ⲙⲁⲣⲉⲛⲣϩⲟⲧⲉ ϩⲏⲧϥ ⲙⲡⲉⲧⲙⲟⲩϩ ⲛⲧⲡⲉ · ⲁⲩⲱ ⲉⲧⲙⲟⲩϩ ⲙⲡⲕⲁϩ ⲁⲩⲱ ⲉⲧⲉⲣϩⲟⲩⲉⲙⲟⲩϩ ⲙⲡⲉϥⲏⲓ · ⲧⲁⲣⲉⲛⲉⲓⲙⲉ ⲁⲛⲟⲛ ⲛⲉⲧⲉⲣⲉⲡⲉⲩϩⲏⲧ ⲧⲏⲙ ⲉⲣⲟⲟⲩ · ϫⲉⲡⲣⲟⲟⲩϣ ⲁⲛ ⲛⲛⲉⲧⲛⲁⲩ ⲉⲛⲉⲓⲛⲟϭ ⲙⲙⲟⲉⲓϩⲉ ⲛⲧⲉⲡⲛⲟⲩⲧⲉ ·
…
25 ⲡⲉⲙⲉⲉⲩⲉ ⲉⲃⲟⲗ ⲉⲛⲉϩⲃⲏⲩⲉ
…
26 ⲙⲉⲩϣⲟⲩⲉⲓⲧ ⲛⲧⲛϩⲉ · ⲉⲩⲛⲁⲑⲉⲱⲣⲉⲓ ⲁⲛ ⲛⲛⲁⲧⲡⲉ ϩⲛϩⲱⲃ ⲛⲓⲙ · ⲛⲥⲉⲉⲓⲣⲉ ⲟⲛ ⲛⲛⲁⲡⲕⲁϩ ⲛⲧⲛϩⲉ · ⲉⲩⲛⲁⲣϣⲃⲏⲣ ⲁⲛ ⲉϩⲉⲛⲁⲅⲅⲉⲗⲟⲥ ⲉⲩⲙⲟⲩⲧⲉ ⲉⲣⲟⲟⲩ ⲉⲉⲃⲟⲗ ϩⲓⲧⲟⲟⲧⲟⲩ ϫⲉⲛⲣⲱⲙⲉ ⲛϣⲟⲩⲁϣⲟⲩ · ⲁⲩⲱ ⲛⲥⲉⲣϣⲃⲣ ⲉϩⲉⲛⲣⲱⲙⲉ ⲉⲩⲣⲑⲩⲥⲓⲁ ⲛⲛⲇⲁⲓⲙⲱⲛ · ⲛⲧϩⲉ ⲉⲧⲉⲣⲉϩⲟⲓⲛⲉ ⲛϩⲏⲧⲛ ϩⲙⲟⲟⲥ ⲉⲩⲥⲱⲃⲉ ⲛⲙⲙⲁⲩ · ⲉⲩⲥⲕⲟⲡⲧⲉⲓ · ⲉⲩϫⲓϩⲣⲁⲩ ·
…
27 ⲟⲩⲡⲛⲉⲩⲙⲁ ϭⲉ ⲧⲉⲛⲟⲩ ⲡⲉϫⲁϥ ⲛϭⲓⲡⲛⲟⲩϫ ⲧⲉ ⲛⲡⲣⲟⲫⲏⲧⲏⲥ ⲓⲉⲍⲉⲕⲓⲏⲗ · ⲟⲩⲁ ⲉⲃⲟⲗ ϩⲛⲛⲉⲛⲧⲁⲩⲛⲁⲩ ⲛϩⲁϩ ⲛⲥⲟⲡ ⲙⲡⲙⲩⲥⲧⲏⲣⲉⲓⲟⲛ ⲙⲡⲉⲟⲟⲩ ⲙⲡⲉⲧϫⲟⲥⲉ · ⲁⲩⲱ ⲉⲧⲥⲙⲁⲙⲁⲁⲧ ·
…
28 ⲁϥϥⲓⲧⲧ ⲁϥϫⲓⲧ ⲉϩⲟⲩⲛ ⲉⲧⲁⲩⲗⲏ ⲉⲧϩⲓϩⲟⲩⲛ ·
…
29 ⲁⲩⲱ ⲉⲓⲥⲡⲉⲟⲟⲩ ⲙⲡϫⲟⲉⲓⲥ ⲁϥⲙⲉϩⲡⲏⲓ ·
…
30 ⲁⲩⲱ ⲁⲓⲥⲱⲧⲙ ⲉⲡⲉⲧϣⲁϫⲉ ⲛⲙⲙⲁⲓ ⲉⲃⲟⲗ ϩⲙⲡⲏⲓ ·
…
31 ⲁⲩⲱ ⲛⲉⲣⲉⲟⲩⲣⲱⲙⲉ ⲁϩⲉⲣⲁⲧϥ ϩⲓⲧⲟⲩⲱⲓ ·
…
32 ⲡⲉϫⲁϥ ⲛⲁⲓ ϫⲉⲡϣⲏⲣⲉ ⲙⲡⲣⲱⲙⲉ · ⲁⲕⲛⲁⲩ ⲉⲡⲙⲁ ⲙⲡⲁⲑⲣⲟⲛⲟⲥ ⲉϣⲁⲓϩⲙⲟⲟⲥ ⲛϩⲏⲧϥ · ⲁⲩⲱ ⲡⲧⲟⲡⲟⲥ ⲉϣⲁⲓⲟⲩⲉϩⲣⲁⲧ ϩⲓϫⲱϥ · ⲡⲙⲁ ⲉϯⲛⲁⲟⲩⲱϩ ⲛϩⲏⲧϥ ϣⲁⲉⲛⲉϩ ϩⲛⲧⲙⲏⲧⲉ ⲛⲛϣⲏⲣⲉ ⲙⲡⲓⲥⲣⲁⲏⲗ
…
33 ⲁⲩⲱ ⲙⲁⲣⲉ‹………› ⲙⲛⲛⲉⲩⲉⲣⲱⲟⲩ ϩⲛⲧⲉⲩⲡⲟⲣⲛⲉⲓⲁ ⲁⲩⲱ ϩⲛⲙⲙⲛⲧϣⲁϥⲧⲉ ⲛⲛⲉⲩⲣⲱⲟⲩ ϩⲙⲡⲉⲩⲙⲟⲩ ϩⲙⲡⲧⲣⲉⲩϯⲙⲡⲁⲙⲁ ⲛϩⲙⲟⲟⲥ · ϩⲁϩⲧⲏ ⲙⲡⲁⲙⲁ ⲛϩⲙⲟⲟⲥ · ⲁⲩⲱ ⲡⲉⲩⲙⲁ ⲛϣⲱⲡⲉ ϩⲁϩⲧⲏ ⲙⲡⲁⲙⲁ ⲛϣⲱⲡⲉ · ⲉⲣⲉⲧϫⲟ ⲁϩⲉⲣⲁⲧⲥ ⲟⲩⲧⲱⲓ ⲟⲩⲧⲱⲟⲩ ·
…
34 ⲁⲩⲱ ⲁⲩϫⲱϩⲙ ⲙⲡⲁⲣⲁⲛ ⲉⲧⲟⲩⲁⲁⲃ ϩⲛⲛⲉⲩⲃⲟⲧⲉ ⲛⲧⲁⲩⲧⲁⲙⲓⲟⲟⲩ ·
…
35 ⲁⲩⲱ ⲁⲓⲟϫⲛⲟⲩ ϩⲙⲡⲁϭⲱⲛⲧ ·
…
36 ⲧⲉⲛⲟⲩ ϭⲉ ⲧⲉⲩⲡⲟⲣⲛⲉⲓⲁ ⲙⲁⲣⲉⲥⲟⲩⲉ ⲉⲃⲟⲗ ⲙⲙⲟⲓ · ⲁⲩⲱ ⲙⲙⲛⲧϣⲁϥⲧⲉ ⲛⲛⲉⲩⲉⲣⲱⲟⲩ · ϫⲉⲉⲓⲉⲟⲩⲱϩ ϩⲛⲧⲉⲩⲙⲏⲧⲉ ϣⲁⲉⲛⲉϩ ·
…
37 ⲏ ⲙⲁⲣⲉⲛϣⲓⲡⲉ ϩⲏⲧⲟⲩ ⲛⲛⲣⲱⲙⲉ ⲛⲧⲉⲧⲙⲡⲉϩⲙⲟⲩ ⲇⲉ ⲃⲁⲁⲃⲉ ϫⲉⲉⲩⲉⲛⲟϫϥ ⲉⲃⲟⲗ ⲛⲥⲉϩⲟⲙϥ ϩⲓⲧⲛⲛⲣⲱⲙⲉ ⲛⲧϩⲉ ⲛⲧⲁϥϫⲟⲟⲥ · ⲉⲧⲉⲡⲁⲓ ⲡⲉ ⲛⲥⲉⲛⲉϭⲛⲟⲩϭⲛ · ⲛⲥⲉⲥⲟϣⲛ · ⲛⲥⲉⲧϭⲁⲉⲓⲟⲛ ·
…
38 ϫⲉⲉⲛⲉⲛⲁⲓ ⲛⲉ ⲛⲣⲱⲙⲉ ⲉⲧⲟⲩⲙⲉⲉⲩⲉ ⲉⲣⲟⲟⲩ ϫⲉⲉⲩⲟⲩⲏϩ ⲙⲛⲛⲁⲅⲅⲉⲗⲟⲥ ·
…
39 ⲏ ⲙⲁⲣⲉⲛϣⲓⲡⲉ ϩⲏⲧⲟⲩ ⲛⲛⲉⲧⲟⲩⲁⲁⲃ · ϩⲱⲥ ⲉϣϫⲉⲉⲩϩⲁⲧⲏⲛ ⲧⲉⲛⲟⲩ · ⲙⲏⲡⲟⲧⲉ ⲛⲧⲛⲧⲙⲣⲉⲃⲟⲗ ⲉⲡⲉϫⲡⲓⲟ ⲛⲧⲙⲛⲧⲁⲧϩⲏⲧ ⲉⲃⲟⲗ ϩⲓⲧⲟⲟⲧⲟⲩ ϩⲙⲡⲉϩⲟⲟⲩ ⲉⲧⲉⲛⲛⲁⲛⲁⲩ ⲉⲣⲟⲟⲩ ⲛϩⲟ ϩⲓϩⲟ · ⲉⲩϫⲱ ⲛⲁⲛ ⲛⲛⲉⲓϣⲁϫⲉ ·
…
40 ϫⲉⲛⲁⲓ ⲛⲉ ⲡⲉϩⲙⲟⲩ ⲙⲡⲕⲁϩ ⲛⲧⲁⲩⲉⲓ ⲙⲛⲛⲥⲱⲛ ·
…
41 ⲁⲩⲱ ϫⲉⲛⲁⲓ ⲛⲉ ⲡⲟⲩⲟⲉⲓⲛ ⲙⲡⲕⲟⲥⲙⲟⲥ ·
…
42 ⲁⲩⲱ ϫⲉⲛϣⲁϫⲉ ⲙⲛⲧⲙⲛⲧⲣⲙϩⲉ ·
…
43 ⲙⲉϣⲁⲕ ⲧⲉⲛⲟⲩ ⲛⲅϭⲛⲟⲩⲁ ⲉϥϩⲁⲣⲉϩ ⲉⲣⲟϥ ⲉⲃⲟⲗ ϩⲛⲛⲉⲓϣⲟⲉⲓϣ ⲙⲡⲟⲛⲏⲣⲟⲛ ·
…
44 ϩⲁⲙⲟⲓ ⲉⲧⲉⲧⲛⲛⲁϭⲱ ϩⲁϩⲧⲏ ⲛⲛⲕⲉϩⲟⲟⲩ · ⲁⲩⲱ ⲛⲉ ⲛⲛⲁϯϩⲏⲩ ϩⲓⲱⲱⲧⲧⲏⲩⲧⲛ ⲛϩⲉⲛⲕⲉⲁⲅⲁⲑⲟⲛ ⲉⲛⲁϣⲱⲟⲩ · ⲉⲙⲁⲧⲉ ⲉⲙⲁⲧⲉ ·
…
45 ⲉⲛⲛⲁⲥⲉⲓ ⲇⲉ ⲙⲙⲟⲟⲩ ϩⲙⲡⲙⲁ ⲉⲧⲉⲛⲛⲁⲡⲱⲣϫ ⲉⲛⲉⲛⲉⲣⲏⲩ ⲁⲛ ⲙⲙⲁⲩ ⲉⲛⲉϩ · ϩⲙⲡⲧⲣⲉϥⲁⲁⲛ ⲉⲛⲙⲡϣⲁ ⲛϭⲓⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
46 ⲡⲉⲧⲉⲛⲟⲩϥ ⲛⲉ ⲡⲉⲧⲛⲁⲛⲟⲩϥ ⲛⲓⲙ · ⲙⲛⲙⲛⲧⲛⲁⲏⲧ ⲛⲓⲙ ·
…
47 ⲁⲩⲱ ⲉⲣⲉⲙⲙⲛⲧϣⲛϩⲧⲏϥ ⲙⲛⲛⲕⲱ ⲉⲃⲟⲗ ϣⲟⲟⲡ ⲛⲁϥ ·
…
48 ⲁⲩⲱ ⲉⲣⲉⲡⲉϥⲟⲩⲱϣ ϣⲟⲟⲡ ϩⲙⲡⲛⲁ · ⲁⲩⲱ ⲉϥⲱⲃϣ ⲙⲙⲟϥ ⲙⲙⲛⲧϣⲁϥⲧⲉ ·
…
49 ⲁⲩⲱ ⲉϥϩⲱⲃⲥ ⲉⲃⲟⲗ ⲉϫⲛⲛⲛⲟⲃⲉ ⲛⲛⲉⲧⲛⲁⲙⲉⲧⲁⲛⲟⲉⲓ ⲧⲏⲣⲟⲩ ·
…
50 ⲁⲩⲱ ⲛⲉⲛⲁⲛⲟⲙⲓⲁ ⲧⲏⲣⲟⲩ ϥⲛⲁⲛⲟϫⲟⲩ ⲉϩⲣⲁⲓ ⲉⲡϣⲓⲕ ⲛⲑⲁⲗⲁⲥⲥⲁ · ⲉⲧⲙⲧⲣⲉⲩⲟⲩⲱⲛϩ ⲉⲃⲟⲗ ϩⲟⲗⲱⲥ · ⲁⲩⲱ ⲉⲧⲙⲧⲣⲉⲩⲟⲩⲱⲛϩ ⲉⲃⲟⲗ · ⲁⲩⲱ ⲉⲧⲙⲧⲣⲉⲩⲧⲁϩⲟⲟⲩ ⲉⲣⲁⲧⲟⲩ ⲉⲣⲟⲛ · ⲁⲩⲱ ⲉⲧⲙⲧⲣⲉⲩϫⲓϩⲁⲡ ⲛⲙⲙⲁⲛ · ⲉⲧⲃⲏⲏⲧⲟⲩ · ⲛⲧϩⲉ ⲛⲧⲁⲧⲉϥⲥⲙⲏ ⲙⲙⲁⲓⲣⲱⲙⲉ ϫⲟⲟⲥ · ϫⲉϯⲛⲁⲃⲱⲧⲉ ⲉⲃⲟⲗ ⲛⲛⲉⲕⲛⲟⲃⲉ ⲛⲛⲁⲣⲡⲉⲩⲙⲉⲉⲩⲉ ·
…
51 ⲉⲛⲉⲡⲉⲓϩⲱⲃ ⲅⲁⲣ ϣⲟⲟⲡ ⲁⲛ ⲡⲁⲓ ⲛⲧⲁϥϫⲟⲟϥ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ϫⲉⲉϣϫⲉϯⲛϩⲁⲧⲛⲧⲏⲩⲧⲛ ⲇⲉ ⲁⲛ ϩⲙⲡⲥⲱⲙⲁ · ⲁⲗⲗⲁ ϯⲛⲙⲙⲏⲧⲛ ϩⲙⲡⲉⲡⲛⲉⲩⲙⲁ · ⲛⲉⲣⲉϣⲃⲣ ⲛⲓⲙ · ⲁⲩⲱ ⲙⲁⲓⲣⲱⲙⲉ ⲛⲓⲙ ⲛⲁϩⲟϫϩⲉϫ ⲉⲙⲁⲧⲉ ϫⲉⲛⲥⲉⲛⲁⲩ ⲁⲛ ⲉⲛⲉⲩⲙⲉⲣⲁⲧⲉ ϣⲁⲛⲧⲟⲩϭⲛⲛⲉⲩⲉⲣⲏⲩ ϩⲙⲡⲥⲱⲙⲁ ·
…
52 ⲧⲁⲓ ⲧⲉ ⲧϩⲉ ⲙⲉⲣⲉⲛⲉⲥⲛⲏⲩ ϩⲛⲟⲩⲙⲉ ⲡⲱⲣϫ ⲉⲛⲉⲩⲉⲣⲏⲩ ⲉⲛⲉϩ ϩⲙⲡϩⲏⲧ ·
…
53 ⲁⲩⲱ ⲛⲧϩⲉ ⲉⲧⲉⲣⲉ ⲓⲏⲥⲟⲩⲥ ϣⲟⲟⲡ ϩⲁϩⲧⲏ ⲙⲙⲁⲓⲛⲟⲩⲧⲉ ⲛⲓⲙ ⲛⲥⲉⲛⲁⲩ ⲉⲣⲟϥ ⲁⲛ ϣⲁⲡⲉϩⲟⲟⲩ ⲉⲧⲉϥⲛⲁⲁⲁⲩ ⲛⲙⲡϣⲁ ⲛⲛⲁⲩ ⲉⲣⲟϥ ⲛϩⲟ ϩⲓϩⲟ · ⲧⲁⲓ ⲧⲉ ⲧϩⲉ ⲙⲙⲁⲓⲣⲱⲙⲉ ⲛⲓⲙ · ⲁⲩⲱ ⲙⲁⲓⲥⲟⲛ ⲛⲓⲙ · ⲉⲩϩⲁⲧⲏ ⲛⲛⲉⲩⲉⲣⲏⲩ ϩⲙⲡⲉⲡⲛⲉⲩⲙⲁ · ϣⲁⲡⲕⲉⲣⲟⲥ ⲛⲛⲁⲁⲡⲁⲛⲧⲁ ⲉⲛⲉⲛⲉⲣⲏⲩ ϩⲙⲡϩⲟ ·
…
54 ⲟⲩⲛⲣⲱⲙⲉ ⲅⲁⲣ ⲉⲩⲟⲩⲏϩ ⲙⲛⲛⲉⲩⲉⲣⲏⲩ ϩⲙⲡⲥⲱⲙⲁ ⲛⲥⲉϩⲁⲧⲏ ⲛ ⲛⲉⲩⲉⲣⲏⲩ ⲇⲉ ⲁⲛ ϩⲙⲡϩⲏⲧ · ⲛⲧϩⲉ ⲉⲧⲉⲣⲉⲡⲡⲟⲛⲏⲣⲟⲛ ϣⲟⲟⲡ ϩⲛϩⲁϩ ⲙⲙⲁ ·
…
55 ⲁϣ ⲧⲉ ⲧⲉ ⲧⲁⲅⲁⲡⲏ ⲛⲛⲁⲓ
…