1 ⲙⲙⲉⲣⲁⲧⲉ ⲧⲁⲓ ⲟⲛ ⲧⲉ ⲧϩⲉ ⲉⲟⲩϩⲁⲡ ⲡⲉ ⲙⲛⲟⲩⲥⲛⲟϥ ⲉϩⲣⲁⲓ ⲉϫⲱϥ ⲉϥϣⲁⲛⲕⲱ ⲛⲁϥ ⲛⲟⲩⲙⲛⲧϣⲃⲏⲣ ⲙⲛⲛⲉⲧⲉⲓⲣⲉ ⲏ ⲛⲉⲧⲛⲁⲉⲓⲣⲉ ⲛϩⲉⲛϩⲃⲏⲩⲉ ⲛⲗⲟⲓⲙⲟⲥ ϩⲣⲁⲓ ⲛϩⲏⲧⲛ .
…
2 ⲁⲗⲗⲁ ⲉⲣⲉⲡⲉⲩϩⲁⲡ ⲙⲛⲡⲉⲩⲥⲛⲟϥ ⲉϩⲣⲁⲓ ⲉϫⲱⲟⲩ ⲉⲧⲃⲉⲡⲧⲱϣ ⲛϩⲏⲧⲙⲡⲁⲓ ⲉⲧⲥⲩⲙⲫⲱⲛⲉⲓ ⲁⲛ ⲛⲙⲙⲁⲩ .
…
3 ⲉⲧⲃⲉⲡⲁⲓ ⲕⲁⲛ ⲉϥϣⲁⲛϥⲓ ⲉⲡⲓϣⲱⲛⲉ ⲏ ⲉϥⲧⲙϥⲓ ⲉⲣⲟϥ ϫⲉⲛⲛⲉⲡⲉϥⲥⲧⲟⲓ ⲣⲱ ⲉⲓ ⲉϩⲣⲁⲓ ⲏ ϣⲱϣ ⲉⲃⲟⲗ ⲁⲗⲗⲁ ⲛϥϭⲱ ⲉϥϩⲟⲃⲥ ⲏ ⲉⲩϩⲱⲃⲥ ⲉϫⲱϥ ϣⲁⲛⲧⲉⲧϩⲁⲏ ⲙⲡⲉϥⲥⲧⲟⲓ ⲉⲧϩⲟⲟⲩ ⲑⲟ ⲉⲧⲉϥϩⲟⲓⲧⲉ ⲁⲩⲱ ⲕⲁⲛ ⲉϥϣⲁⲛⲥⲱⲟⲩϩ ⲉϩⲟⲩⲛ ⲙⲛⲧⲥⲩⲛⲁⲅⲱⲅⲏ ⲧⲏⲣⲥ ϩⲛϩⲱⲃ ⲛⲓⲙ ⲕⲁⲧⲁⲥⲙⲟⲧ ⲛⲓⲙ ϩⲛⲧⲱϣ ⲛⲓⲙ ⲛⲧⲉⲡⲛⲟⲩⲧⲉ ⲉϥⲟ ⲛϫⲁϫⲉ ⲉⲛⲉⲧⲉⲙⲡⲟⲩⲥⲱⲧⲙ ⲏ ⲛⲉⲧⲉⲛⲥⲉⲛⲁⲥⲱⲧⲙ ⲁⲛ ⲛⲥⲁⲛϣⲁϫⲉ ⲙⲛⲛⲧⲱϣ ⲛⲧⲁⲡⲛⲟⲩⲧⲉ ϩⲱⲛ ⲙⲙⲟⲟⲩ ϩⲛⲛⲉϥⲥⲩⲛⲁⲅⲱⲅⲏ ⲉⲧⲙⲧⲣⲉⲣⲱⲙⲉ ⲉⲡⲓϣⲱⲛⲉ ⲉⲧⲙⲙⲁⲩ ϩⲓⲱⲱϥ ϩⲱϩ ⲙⲙⲟϥ ϫⲉⲕⲁⲥ ⲉⲩⲛⲁⲙⲧⲟⲛ ⲏ ϫⲉⲉⲩⲛⲁⲧⲁⲗϭⲟ ⲉⲃⲟⲗ ⲛϩⲏⲧϥ
…
4 ⲉⲁⲩϩⲱϩ ⲇⲉ ⲟⲛ ⲙⲙⲟϥ ⲛϩⲏⲧⲟⲩ ϩⲛϩⲁϩ ⲛⲥⲙⲟⲧ ⲛϩⲱϩ ⲉⲩϣⲟⲃⲉ ⲉⲁⲩϩⲱϩ ⲙⲙⲟⲟⲩ ⲛⲙⲙⲁϥ ϩⲛⲧⲉϥⲉⲛⲉⲣⲅⲉⲓⲁ ⲉⲧϭⲣⲏ ϩⲛⲟⲩϩⲱϩ ϣⲁⲛⲧⲉⲛⲉϥⲡⲗⲏⲅⲏ ⲁϣⲁⲓ
…
5 ⲙⲡⲟⲩⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ ⲙⲡⲟⲩϣⲓⲡⲉ ϩⲏⲧϥ ⲛⲣⲱⲙⲉ ⲙⲡⲟⲩϣⲛϩⲧⲏⲩ ϩⲁⲣⲟⲟⲩ ⲙⲁⲩⲁⲁⲩ
…
6 ⲏ ⲛⲉⲩⲙⲉⲉⲩⲉ ⲁⲛ ⲡⲉ ϫⲉⲛⲉⲩⲛⲟⲃⲉ ⲛⲁⲕⲧⲟⲟⲩ ⲉϫⲛⲧⲉⲩⲁⲡⲉ ⲁⲩⲱ ⲛⲉⲩⲙⲛⲧⲁⲥⲉⲃⲏⲥ ⲉϫⲛⲧⲙⲏⲧⲉ ⲛϫⲱⲟⲩ .
…
7 ⲙⲏ ⲉⲛⲉⲩⲥⲟⲟⲩⲛ ⲇⲉ ⲟⲛ ⲁⲛ ⲡⲉ ϫⲉⲡⲛⲟϭⲛⲉϭ ⲙⲛⲧⲗⲩⲡⲏ ⲙⲡⲁⲓ ⲉⲧⲕⲧⲟ ⲙⲡⲉϥϩⲏⲧ ⲉⲩⲙⲛⲧϣⲙⲙⲟ ⲛⲙⲙⲁⲩ ⲏ ⲉⲩⲙⲛⲧϫⲁϫⲉ ⲛⲁⲕⲧⲟⲟⲩ ⲛⲥⲉⲉⲓ ⲉϩⲣⲁⲓ ⲉϫⲱⲟⲩ
…
8 ϫⲉⲙⲡⲟⲩⲡⲓⲥⲧⲉⲩⲉ ⲉⲡⲉⲛⲧⲁϥϫⲟⲟϥ ϩⲉⲛⲕⲉⲉⲡⲓⲥⲧⲟⲗⲏ ⲉⲣⲉⲡϣⲁϫⲉ ⲙⲡⲛⲟⲩⲧⲉ ⲉⲧⲥⲏϩ ϫⲱ ⲙⲙⲟⲥ ⲛⲧⲉⲓϩⲉ ⲛϩⲏⲧⲥ ϫⲉⲛⲓⲙ ⲡⲉⲧⲛⲁⲣⲟⲩⲧⲟⲡⲟⲥ ⲉϥⲟⲩⲁⲁⲃ ⲛϣⲙⲙⲟ ⲉⲡⲛⲟⲩⲧⲉ ϩⲛⲛⲉϥϩⲃⲏⲩⲉ ⲛⲗⲟⲓⲙⲟⲥ ⲛⲧϩⲉ ⲉⲧϥϫⲱ ⲙⲙⲟⲥ ϫⲉⲁⲧⲉⲧⲛⲣⲡⲓⲙⲁ ⲛϣⲙⲙⲟ ⲉⲣⲟⲓ
…
9 ⲛⲧⲉⲧⲙⲡⲛⲟⲩⲧⲉ ⲣⲛⲣⲱⲙⲉ ⲉⲧⲙⲙⲁⲩ ⲛϣⲙⲙⲟ ⲉⲣⲟϥ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲧⲉⲓⲣⲉ ⲏ ⲉⲧⲛⲁⲉⲓⲣⲉ ⲛϩⲉⲛⲃⲟⲧⲉ ⲛⲟⲩⲟⲉⲓϣ ⲛⲓⲙ ϩⲣⲁⲓ ϩⲛⲛⲉϥⲥⲩⲛⲁⲅⲱⲅⲏ .
…
10 ⲙⲡⲱⲧⲛ ⲁⲛ ⲡⲉ ⲡⲓϩⲙⲟⲧ ⲛⲧⲱⲧⲛ ⲛⲣⲱⲙⲉ ⲛⲕⲣⲟϥ ϫⲉⲙⲡⲉⲡⲛⲟⲩⲧⲉ ⲥⲁϩⲱϥ ⲉⲃⲟⲗ ⲛⲛⲉϥⲙⲁ ⲉⲧⲟⲩⲁⲁⲃ ⲉⲧⲃⲉⲛⲉⲧⲛϩⲃⲏⲩⲉ ⲛⲃⲟⲧⲉ ⲁⲗⲗⲁ ⲡⲁⲛⲉϥⲙⲛⲧϣⲁⲛϩⲧⲏϥ ⲡⲉ ⲁⲩⲱ ⲡⲁⲛⲉⲥⲛⲏⲩ ⲙⲡⲓⲥⲧⲟⲥ ⲡⲉ ⲉⲧⲟⲩⲏϩ ϩⲣⲁⲓ ⲛϩⲏⲧⲛ .
…
11 ⲉϣϫⲉϣⲁⲣⲉⲣⲱⲙⲉ ⲣⲙⲁ ⲛϣⲙⲙⲟ ⲉⲡⲛⲟⲩⲧⲉ ϩⲛⲛⲉⲩⲙⲛⲧⲁⲥⲉⲃⲏⲥ ϣⲁⲣⲉⲣⲱⲙⲉ ⲟⲛ ⲣⲙⲁ ⲛⲧⲣⲉⲡⲛⲟⲩⲧⲉϩⲱⲛ ⲉϩⲟⲩⲛ ⲉⲣⲟⲟⲩ ϩⲛⲛⲉⲩϩⲃⲏⲩⲉ ⲛⲇⲓⲕⲁⲓⲟⲥⲩⲛⲏ ⲁⲩⲱ ⲛⲧⲉⲡⲛⲟⲩⲧⲉ ⲑⲛⲟⲟⲩ ⲉϩⲟⲩⲛ ⲉⲣⲟϥ .
…
12 ⲥⲧⲟ ⲅⲁⲣ ⲉⲧⲣⲉⲡⲁⲓ ⲉⲧⲉⲣⲉⲥⲟⲟⲩⲛ ⲙⲙⲟϥ ⲁⲛ ϫⲉⲛⲓⲙ ⲡⲉ ϥⲓ ⲛϩⲉⲛⲡⲉⲧϩⲏⲡ ⲛⲧⲁϥ ⲏ ⲛⲧⲉⲉⲓⲙⲉ ⲉⲣⲟⲟⲩ ⲁⲛ ⲛϥⲧⲁϩⲟⲩ ⲙⲛⲛⲉⲧⲟⲩⲟⲛϩ ⲉⲃⲟⲗ ⲁⲛ ⲛⲁⲓ ⲛⲧϩⲉ ⲟⲩⲥⲛⲟϥ ⲉⲁⲩⲡⲁϩⲧϥ ⲉϫⲛⲟⲩⲥⲛⲟϥ ⲁⲩⲱ ⲉⲁⲩϥⲓⲧϥ ⲙⲛⲛⲥⲁⲧⲣⲉⲩⲧⲱϩ ⲙⲛⲛⲉⲩⲉⲣⲏⲩ ⲉⲁⲩϭⲉϣϭⲱϣϥ ⲉⲃⲟⲗ ϩⲙⲡϫⲓⲥⲉ ⲉⲡⲉⲥⲏⲧ ⲉϫⲛⲧⲁⲡⲉ ⲛⲛⲁⲓ ⲁⲩⲱ ⲉϫⲛⲧⲙⲏⲧⲉ ⲛⲧⲥⲟⲟⲩϩⲥ ⲛⲛⲓⲕⲟⲟⲩⲉ ⲉⲧⲉⲓⲣⲉ ⲏ ⲉⲧⲛⲁⲉⲓⲣⲉ ⲛϩⲉⲛϩⲃⲏⲩⲉ ⲛⲃⲟⲧⲉ ϩⲣⲁⲓ ϩⲛⲛⲉϥⲥⲩⲛⲁⲅⲱⲅⲏ ⲛⲟⲩⲟⲉⲓϣ ⲛⲓⲙ ϩⲙⲡⲧⲣⲉⲛϣⲁϫⲉ ⲛⲧⲁⲡϫⲟⲉⲓⲥ ϫⲟⲟⲩ ⲛⲛⲉϥⲙⲁⲑⲏⲧⲏⲥ ϫⲉⲁⲩϫⲱⲕ ⲉⲃⲟⲗ ⲉϩⲣⲁⲓ ⲉϫⲛⲛⲁⲕⲁⲑⲁⲣⲧⲟⲥ ⲛϩⲟⲟⲩⲧ ⲙⲛⲛⲁⲕⲁⲑⲁⲣⲧⲟⲥ ⲛⲥϩⲓⲙⲉ ⲉⲧϣⲟⲟⲡ ⲏ ⲉⲧⲛⲁϣⲱⲡⲉ ϩⲣⲁⲓ ⲛϩⲏⲧⲛ ϫⲉⲛⲉϩ ⲡϣⲟⲉⲓϣ ⲛⲛⲉⲧⲛⲟⲩⲉⲣⲏⲧⲉ ⲛⲁⲩ ⲉⲩⲙⲛⲧⲙⲛⲧⲣⲉ ⲛⲁⲩ
…
13 ⲁⲩⲱ ϫⲉⲛϣⲏⲣⲉ ⲛⲉ ⲛⲧⲙⲛⲧϫⲁϫⲉ ⲁⲩⲱ ⲛϣⲏⲣⲉ ⲁⲛ ⲛⲉ ⲛⲧⲉⲓⲣⲏⲛⲏ
…
14 ϫⲉⲧⲉⲓⲣⲏⲛⲏ ⲙⲛⲛⲉⲛⲧⲁⲩⲁⲁⲩ ⲛϫⲟⲉⲓⲥ ⲉⲧⲉⲓⲣⲏⲛⲏ ⲥⲉⲥⲟⲟⲩⲛ ϫⲉⲛⲓⲙ ⲛⲉⲧⲙⲡϣⲁ ⲛⲧⲣⲉⲧⲉⲩⲉⲓⲣⲏⲛⲏ ⲙⲧⲟⲛ ⲙⲙⲟⲥ … ⲣⲁⲓ ⲉϫⲱⲟⲩ .. ⲛⲓⲙ ⲛⲉ ⲛⲁⲧⲙⲡϣⲁ ⲉⲧⲙⲧⲣⲉⲥⲙⲧⲟⲛ ⲙⲙⲟⲥ ⲉϩⲣⲁⲓ ⲉϫⲱⲟⲩ ⲁⲗⲗⲁ ⲉⲧⲣⲉⲥⲕⲧⲟⲥ ⲉⲣⲟⲥ ⲙⲙⲓⲛ ⲙⲙⲟⲥ ⲧⲉⲓⲣⲏⲛⲏ ⲏ ⲉⲙⲙⲁ ⲉⲧⲥⲥⲟⲟⲩⲛ ⲉⲧⲉϣⲁⲥⲕⲁⲁⲩ ⲙⲙⲁ ⲛⲙⲧⲟⲛ ⲙⲙⲟⲥ ⲉϩⲣⲁⲓ ⲉϫⲱⲟⲩ ⲉⲥϫⲱⲕ ⲉⲃⲟⲗ ⲏ ⲉⲉⲓⲣⲉ ⲙⲡⲙⲁ ⲛⲙⲙⲁⲑⲏⲧⲏⲥ ⲙⲡϫⲟⲉⲓⲥ ⲛⲟⲩⲟⲉⲓϣ ⲛⲓⲙ ϣⲁϩⲣⲁⲓ ⲉⲧⲥⲩⲛⲧⲉⲗⲉⲓⲁ ⲙⲡⲁⲓⲱⲛ ⲛⲧϩⲉ ⲉⲛⲧⲁϥϩⲱⲛ ⲙⲙⲟⲥ ⲉⲧⲟⲟⲧⲟⲩ ϫⲉⲛϣⲏⲣⲉ ⲛⲧⲉⲓⲣⲏⲛⲏ ⲙⲁⲣⲉⲧⲉⲧⲛⲉⲓⲣⲏⲛⲏ ⲙⲧⲟⲛ ⲙⲙⲟⲥ ⲉϩⲣⲁⲓ ⲉϫⲱⲟⲩ ⲛϣⲏⲣⲉ ⲛⲧⲙⲛⲧϫⲁϫⲉ ⲙⲁⲣⲉⲧⲉⲧⲛⲉⲓⲣⲏⲛⲏ ⲕⲟⲧⲥ ⲉⲃⲟⲗ ⲙⲙⲟⲟⲩ ⲛⲥⲕⲟⲧⲥ ⲉⲣⲱⲧⲛ .
…
15 ⲏ ⲧⲉⲓⲣⲏⲛⲏ ⲧⲕⲟⲓⲛⲱⲛⲟⲥ ⲁⲛ ⲧⲉ ⲛⲛⲇⲓⲕⲁⲓⲟⲥ
…
16 ⲁⲩⲱ ⲡⲉⲡⲛⲉⲩⲙⲁ ⲛⲛⲇⲓⲕⲁⲓⲟⲥ ⲙⲡⲕⲟⲓⲛⲱⲛⲟⲥ ⲁⲛ ⲡⲉ ⲛⲧⲉⲓⲣⲏⲛⲏ
…
17 ⲁⲩⲱ ⲛⲉⲧⲉⲣⲉⲧⲉⲓⲣⲏⲛⲏ ⲛⲁϣⲱⲡⲉ ⲛⲙⲙⲁⲩ ⲥⲉⲛⲁϣⲱⲡⲉ ⲛϣⲏⲣⲉ ⲛⲧⲉⲓⲣⲏⲛⲏ ⲁⲩⲱ ⲛϣⲉⲉⲣⲉ ⲙⲡⲉⲥⲙⲟⲩ
…
18 ⲁⲩⲱ ⲛⲉⲧⲉⲣⲉⲧⲉⲓⲣⲏⲛⲏ ⲛⲁⲣϫⲁϫⲉ ⲉⲣⲟⲟⲩ ⲥⲉⲛⲁϣⲱⲡⲉ ⲛϣⲏⲣⲉ ⲛⲧⲙⲛⲧϫⲁϫⲉ ⲁⲩⲱ ⲛϣⲏⲣⲉ ⲙⲡⲥⲁϩⲟⲩ .
…
19 ⲱ ⲟⲩⲟⲉⲓ ⲛⲏⲧⲛ ⲛⲉⲛⲧⲁⲩⲧⲁⲕⲟ ⲛⲧⲉⲩⲙⲛⲧⲡⲁⲣⲑⲉⲛⲟⲥ ⲙⲛⲧⲉⲩⲙⲛⲧϣⲁⲩ ϩⲣⲁⲓ ⲛϩⲏⲧⲛ ⲁⲩⲱ ⲁⲩⲥⲱⲱϥ ⲛⲧⲉⲩϩⲩⲡⲟⲙⲟⲛⲏ ⲏ ⲛⲉϩⲃⲏⲩⲉ ⲛⲧⲉⲩϩⲩⲡⲟⲙⲟⲛⲏ
…
20 ⲛⲉⲧⲛϩⲟⲧⲃⲥ ϩⲉⲛϩⲟⲧⲃⲉⲥ ⲛⲣⲱⲙⲉ ⲁⲛ ⲛⲉ ⲁⲗⲗⲁ ϩⲉⲛϩⲟⲧⲃⲉⲥ ⲛⲉ ⲉⲃⲟⲗ ϩⲓⲧⲛⲧⲏⲩⲧⲛ ⲙⲙⲓⲛ ⲙⲙⲱⲧⲛ .
…
21 ⲡⲓⲣⲓⲣϩⲟⲟⲩⲧ ⲉⲧⲙⲙⲁⲩ ⲙⲛⲡⲓⲁϩⲟⲟⲩ[ⲧ] .. ⲛⲧⲁⲩϫⲟ … ⲉⲧⲃⲏⲏⲧ … ϩⲛⲧⲉⲅⲣⲁϥⲏ ⲛⲉⲛⲧⲁⲩⲧⲁⲕⲟ ⲛⲧⲉⲧⲛⲯⲩⲭⲏ ⲁⲩⲱ ⲁⲩⲙⲁⲛⲟⲩⲥ ϩⲛⲛⲉⲩⲛⲁⲁϫⲉ ⲙⲛⲛⲉⲩϣⲱⲗ .
…
22 ⲁ ⲛⲓⲥⲩⲛⲁⲅⲱⲅⲏ ⲙⲟⲩϩ ⲛⲛⲉϩⲡⲉ ϩⲓⲣⲓⲙⲉ ϩⲓⲁϣⲕⲁⲕ ⲉⲃⲟⲗ ϫⲉⲱ ⲱ ϣⲁⲛⲧⲉⲟⲩ ϣⲱⲡⲉ ⲉⲩⲉⲓⲣⲉ ⲛⲛⲉⲓⲃⲟⲧⲉ ϩⲛⲙⲙⲁ ⲉⲧⲟⲩⲁⲁⲃ ⲙⲡⲛⲟⲩⲧⲉ
…
23 ⲁⲩⲱ ϫⲉⲙⲡⲣⲣ ⲛⲓϩⲃⲏⲩⲉ ⲛⲗⲟⲓⲙⲟⲥ
…
24 ϩⲟⲗⲱⲥ ⲉⲡⲧⲏⲣϥ ⲁⲩⲱ ϭⲉ ⲙⲡⲉⲧⲛⲥⲱⲧⲙ ϣⲁⲛⲧⲉⲡⲉⲧⲛϩⲏⲧ ⲙⲟⲩ …. ⲡⲧⲣⲉⲁⲙⲛ .. ⲉ ⲏ ⲡⲉⲓϣⲱⲛⲉ …. ϩⲟⲟⲩ ….. ⲛⲁⲙⲏ ….. ϣⲟⲟϭⲉϥ ϩ … ⲛⲉϥⲉⲓⲃ ϩⲙⲡϩⲱϩ ⲉⲧϩⲟⲗϭ ⲡⲣⲟⲥⲧⲉⲩⲛⲟⲩ
…
25 ϫⲉⲙⲡⲉⲧⲛϭⲱⲣⲃ ⲙⲡⲉϥⲉⲓⲃ ⲏ ⲛⲉϥⲉⲓⲃ ⲛⲧⲱⲧⲛ ⲙⲡⲁⲣⲑⲉⲛⲟⲥ ⲛⲛⲟⲩϫ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ϩⲣⲁⲓ ⲛϩⲏⲧⲛ ⲛⲁⲓ ⲉⲧⲛⲁⲉⲓⲣⲉ ⲛϩⲉⲛⲃⲟⲧⲉ ϩⲣⲁⲓ ϩⲛⲛⲓⲥⲩⲛⲁⲅⲱⲅⲏ ⲛⲟⲩⲟⲉⲓϣ ⲛⲓⲙ .
…
26 ⲟⲩ ⲡⲉⲧⲉⲧⲛⲛⲁϫⲟⲟϥ ⲛⲛⲁϩⲣⲛⲛⲉⲛⲧⲁⲩⲉⲙⲕⲡⲙⲟⲩ ⲁⲩϫⲣⲟ ⲉⲡⲙⲟⲩ ϩⲙⲡⲧⲣⲉⲩⲡⲁⲧⲁⲥⲥⲉⲓ ⲙⲙⲟϥ ϩⲛⲧⲉⲩⲙⲛⲧⲡⲁⲣⲑⲉⲛⲟⲥ ⲏ ⲧⲉⲩⲙⲛⲧϣⲁⲩ ⲁⲩⲱ ⲛⲥⲉⲧⲁⲕⲟ ⲙⲡⲉϥⲉⲓⲃ ⲏ ⲛⲧⲉⲡⲉϥⲉⲓⲃ ⲧⲁⲕⲟ ⲛⲛⲁϩⲣⲁⲩ ϩⲛⲧⲉⲩⲇⲓⲕⲁⲓⲟⲥⲩⲛⲏ ⲙⲙⲛⲧⲙⲉ ⲉⲁⲡⲙⲟⲩ ⲉⲙⲕⲧⲏⲩⲧⲛ ⲛⲧⲱⲧⲛ ϩⲙⲡⲧⲣⲉϥϫⲣⲟ ⲉⲣⲱⲧⲛ ϫⲛⲛⲉϥϫⲱϩⲙ ⲙⲛⲛⲉϥⲥⲱⲱϥ ⲙⲛⲛⲉϥϫⲓⲟⲩⲉ ⲙⲛⲛⲉϥⲕⲉϩⲃⲏⲩⲉ ⲛⲗⲟⲓⲙⲟⲥ . ⲏ ⲡⲉⲧⲛⲁⲣⲡⲙⲉⲉⲩⲉ ⲛⲛⲉϩⲃⲏⲩⲉ ⲉⲧϩⲟⲟⲩ ⲛⲧⲁⲧⲉⲧⲛⲁⲁⲩ ϥⲛⲁⲛⲉϫⲡⲁϭⲥⲉ ⲉⲃⲟⲗ ⲁⲛ ⲛϥⲣⲧϩⲉ ⲛⲛⲉⲧⲕⲁⲃⲟⲗ .
…
27 ⲉⲧⲉⲧⲛⲛⲁⲛⲉϭⲛⲉϭⲡⲙⲟⲩ ⲛⲁϣ ⲛϩⲉ ϫⲉⲡⲙⲟⲩ ⲉϥⲧⲱⲛ ⲡⲉⲕϫⲣⲟ ⲁⲙⲛⲧⲉ ⲉϥⲧⲱⲛ ⲡⲉⲕⲉⲓⲃ ⲉⲁϥⲧⲁⲕⲟ ⲛⲧⲉⲧⲛϩⲉⲗⲡⲓⲥ ⲏ ⲁⲧⲉⲧⲛⲧⲁⲕⲟⲥ ⲉⲃⲟⲗ ϩⲓⲧⲟⲟⲧϥ ϩⲛⲛⲉⲧⲛϩⲃⲏⲩⲉ ⲉⲧϩⲟⲟⲩ . ⲉⲧⲉⲧⲛⲟ ⲙⲙⲛⲧⲣⲉ ⲉⲣⲱⲧⲛ ⲙⲙⲟⲟⲩ ⲙⲁⲩⲁⲧⲧⲏⲩⲧⲛ ϫⲉⲁϣ ⲛⲉ ⲏ ϩⲉⲛⲟⲩ ⲛⲉ ⲛⲧⲁⲧⲉⲧⲛⲁⲁⲩ ⲙⲙⲛⲥⲁⲛⲓϩⲱⲛ ⲧⲏⲣⲟⲩ ⲉⲃⲟⲗ ϩⲓⲧⲙⲡⲛⲟⲩⲧⲉ
…
28 ⲧⲉⲧⲛϣⲟⲩϣⲟⲩ ⲙⲙⲱ̣ … ⲛⲧⲟϥ ϩ ….. ϫⲉⲉⲧ ……. ⲉⲧⲧⲉⲧⲛ …. ⲙⲙⲟϥ ⲛ … ⲧⲛⲥⲱ … ⲉⲣⲟϥ ϫⲉⲡⲙⲟⲩ ⲉϥⲧⲱⲛ ⲡⲉⲕϫⲣⲟ ⲁⲣⲏⲩ ⲛⲧⲟϥ ⲉϥⲧⲱⲛ ⲡⲉⲧⲛϫⲣⲟ ⲏ ⲁⲙⲛⲧⲉ ⲉϥⲧⲱⲛ ⲡⲉⲕⲉⲓⲃ . ϩⲱⲥ ⲁϩⲉ ⲛⲁⲙⲉ ⲁⲣⲏⲩ ⲛⲧⲟϥ ⲉⲥⲧⲱⲛ ⲧⲉⲧⲛϭⲟⲙ
…
29 ⲉⲛⲧⲁϥⲃⲟⲗⲥ ⲉⲃⲟⲗ
…
30 ⲏ ⲛⲧⲁⲥⲃⲱⲗ ⲉⲃⲟⲗ ϩⲓⲧⲙⲧⲙⲁⲧⲟⲩ ⲙⲡⲉϥⲉⲓⲃ ⲉⲛⲧⲁⲥⲡⲱⲣϣ .
…