1 ….. ⲛⲧⲙⲓⲛⲉ ⲙⲡⲉⲛⲧⲁⲩϫⲟⲟⲥ ⲉⲧⲃⲏⲏⲧϥ ϫⲉⲟⲩⲉⲃⲓⲱ ⲅⲁⲣ ⲡⲉⲧⲧⲗⲧⲗ ⲉⲃⲟⲗ ϩⲛⲛⲉⲥⲡⲟⲧⲟⲩ ⲛⲟⲩⲥϩⲓⲙⲉ ⲙⲡⲟⲣⲛⲏ ⲙⲛⲛⲥⲱⲥ ⲕⲛⲁϭⲛⲧⲥ ⲉⲥⲥⲁϣⲉ ⲉⲩⲥⲓϣⲉ
…
2 ⲙⲏ ⲉⲧⲃⲉⲛⲉⲛⲧⲁⲩϣⲱⲱϭⲉ ⲁⲛ ϩⲙⲡⲓϣⲱⲛⲉ ⲏ ⲛⲧⲁⲡⲓϣⲱⲛⲉ ϣⲟⲟϭⲩ ⲛⲧⲁⲡⲙⲕⲁϩ ⲛϩⲏⲧ ϩⲣⲟϣ ⲉϩⲣⲁⲓ ⲉϫⲛⲛⲉⲡⲣⲟⲫⲏⲧⲏⲥ ϫⲓⲛⲛϣⲟⲣⲡ ⲛⲧϩⲉ ⲛⲟⲩⲱⲛⲉ ⲕⲁⲧⲁⲡⲉⲛⲧⲁⲩϫⲟⲟϥ ϫⲉⲁⲩⲙⲟⲩⲕϩ ⲙⲡⲁⲱⲛϩ ϩⲛⲟⲩϣⲏⲓ ⲁⲩⲧⲁⲗⲟ ⲛⲟⲩⲱⲛⲉ ⲉϫⲱⲓ ⲁϩⲉⲛⲙⲟⲟⲩ ⲡⲱϩⲧ ⲉϫⲛⲧⲁⲁⲡⲉ ⲁⲓϫⲟⲟⲥ ϫⲉⲁϥⲕⲁⲁⲧ ⲛⲥⲱϥ
…
3 ⲙⲡϥⲕⲁⲁϥ ϭⲉ ⲛⲥⲱϥ ⲛⲧϩⲉ ⲉⲧⲟⲩϫⲱ ⲙⲙⲟⲥ ϫⲉⲁⲓⲱϣ ⲉϩⲣⲁⲓ ⲟⲩⲃⲉⲡⲉⲕⲣⲁⲛ ⲡϫⲟⲉⲓⲥ ϩⲛⲟⲩϣⲏⲓ ⲙⲡⲉⲥⲏⲧ ⲁⲕⲥⲱⲧⲙ ⲉⲧⲁⲥⲙⲏ
…
4 ⲙⲡⲣϩⲱⲛ ⲛⲛⲉⲕⲙⲁⲁϫⲉ ⲉⲡⲁⲧⲱⲃϩ ⲁⲕϩⲱⲛ ⲉϩⲟⲩⲛ ⲉⲧⲁⲃⲟⲏⲑⲓⲁ ϩⲙⲡⲉϩⲟⲟⲩ ⲉⲛⲧⲁⲓⲉⲡⲓⲕⲁⲗⲉⲓ ⲙⲙⲟⲕ ⲁⲕϫⲟⲟⲥ ⲛⲁⲓ ϫⲉⲙⲡⲣⲣϩⲟⲧⲉ ⲁⲕϯϩⲁⲡ ⲡϫⲟⲉⲓⲥ ⲉⲛϩⲁⲡ ⲛⲧⲁⲯⲩⲭⲏ ⲁⲕⲥⲱⲧⲉ ⲙⲡⲁⲱⲛϩ
…
5 ⲁⲕⲛⲁⲩ ⲡϫⲟⲉⲓⲥ ⲉⲛⲁϣⲧⲟⲣⲧⲣ ⲁⲕⲛⲁⲩ ⲅⲁⲣ ⲁⲩⲱ ⲙⲡⲓϩⲱⲡ ⲉⲣⲟⲕ ⲁⲕⲕⲣⲓⲛⲉ ⲙⲡⲁϩⲁⲡ
…
6 ⲟⲩⲇⲉ ϩⲱⲱϥ ⲡⲉⲧⲟⲩϫⲱ ⲙⲙⲟϥ ⲉⲧⲃⲉⲛⲉⲧϣⲟⲟϭⲉ ϩⲙⲡⲓϣⲱⲱϭⲉ ⲙⲡⲉⲩⲟⲩⲱϣ ⲁⲛ ⲡⲉ ⲁⲙⲁϩⲧⲉ ⲙⲙⲟⲟⲩ ⲉⲡⲉϥϩⲱϩ ⲏ ⲉⲧⲙϩⲱϩ ⲙⲙⲟϥ ⲛϩⲏⲧⲟⲩ ϣⲁⲛⲧϥϭⲙϭⲟⲙ ϩⲙⲡⲉⲩⲥⲱⲙⲁ .
…
7 ⲡⲉϫⲁⲩ ϫⲉⲕⲛⲁⲧⲱⲱⲃⲉ ⲛⲁⲩ ⲡϫⲟⲉⲓⲥ ⲛⲟⲩⲧⲱⲱⲃⲉ ⲕⲁⲧⲁⲛⲉϩⲃⲏⲩⲉ ⲛⲛⲉⲩϭⲓϫ
…
8 ⲕⲛⲁⲧⲱⲱⲃⲉ ⲛⲁⲩ ⲛⲟⲩϩⲓⲥⲉ ϩⲁⲧϭⲟⲙ ⲙⲡⲉⲩϩⲏⲧ
…
9 ⲛⲧⲟⲕ ⲕⲛⲁⲡⲱⲧ ⲛⲥⲱⲟⲩ ϩⲛⲧⲉⲕⲟⲣⲅⲏ ⲁⲩⲱ ⲛⲅⲟϫⲛⲟⲩ ⲉⲃⲟⲗ ϩⲁⲡⲉⲥⲏⲧ ⲛⲧⲡⲉ ⲡϫⲟⲉⲓⲥ .
…
10 ⲏ ⲉⲣⲉⲛⲉⲡⲣⲟⲫⲏⲧⲏⲥ ϣⲁϫⲉ ⲉⲩⲱⲛⲉ ⲛⲁⲙⲉ ϫⲉⲁⲩⲧⲁⲗⲟϥ ⲉϫⲱⲟⲩ
…
11 ⲏ ⲉⲩϫⲱ ⲙⲡⲁⲓ ⲁⲛ ⲉⲧⲃⲉⲡϣⲱⲛⲉ ⲛⲙⲕⲁϩ ⲛϩⲏⲧ ⲉⲧⲟⲩϣⲟⲟⲡ ⲛϩⲏⲧϥ ⲏ ⲉⲧϥⲛϩⲏⲧⲟⲩ ⲛⲧⲁϥϩⲣⲟϣ ⲉϩⲣⲁⲓ ⲉϫⲱⲟⲩ ⲛⲧϩⲉ ⲛⲟⲩⲱⲛⲉ ⲉⲧⲃⲉⲛⲉⲧⲟⲩⲛⲁⲩ ⲉⲣⲟⲟⲩ ⲉⲁⲩⲉⲓ ⲉϩⲣⲁⲓ ⲉⲡⲓϣⲱⲛⲉ ⲛⲗⲟⲓⲙⲟⲥ .
…
12 ⲉⲛⲧⲁⲩϫⲟⲟⲥ ⲇⲉ ⲟⲛ ϫⲉⲁⲩⲧⲁⲗⲟ ⲛⲟⲩⲱⲛⲉ ⲉϫⲱⲓ ⲉⲧⲃⲉⲛⲛⲟϭⲛⲉϭ ⲛⲛⲉⲧⲙⲙⲁⲩ ⲉⲩⲑⲗⲓⲃⲉ ⲛⲧⲉⲩⲯⲩⲭⲏ ϣⲁϩⲣⲁⲓ ⲉⲡⲙⲟⲩ
…
13 ⲁⲩⲙⲟⲟⲩⲧⲟⲩ ⲅⲁⲣ
…
14 ⲛⲁϣ ⲛϩⲉ ⲉⲣⲉⲟⲩⲁ ⲛⲁϣϫⲟⲟⲥ ϫⲉⲛⲥⲉϣⲱⲡⲉ ⲁⲛ ⲛϭⲓⲛⲉⲡⲣⲟⲫⲏⲧⲏⲥ ϩⲙⲡⲙⲕⲁϩ ⲛϩⲏⲧ ⲉⲧϩⲓϫⲱⲟⲩ ⲉⲧⲃⲉⲛⲉⲧϣⲟⲟϭⲉ ⲏ ⲛⲉⲧϣⲱⲱϭⲉ ⲛⲟⲩⲟⲉⲓϣ ⲛⲓⲙ ϩⲙⲡⲓϣⲱⲛⲉ
…
15 ⲉⲡⲉⲓⲇⲏ ⲥⲉⲣϣⲣⲡⲛⲁⲩ ⲛⲧⲟⲟⲩ ⲉⲛⲉⲧϣⲟⲟⲡ ⲙⲛⲛⲉⲧⲛⲁϣⲱⲡⲉ .
…
16 ⲟⲩ ⲙⲟⲛⲟⲛ ϫⲉⲥⲉⲛⲁⲩ ⲙⲡⲟⲩⲉ ⲉⲛⲉⲧⲛⲁϣⲱⲡⲉ ⲛⲛⲣⲱⲙⲉ ϩⲓϫⲙⲡⲕⲁϩ ϩⲁⲧϩⲏ ⲙⲡⲁⲧⲟⲩϣⲱⲡⲉ ⲁⲗⲗⲁ ⲁⲩϣⲣⲡⲛⲁⲩ ⲟⲛ ⲏ ⲉⲓⲙⲉ ⲉⲛⲉⲧⲛⲁϣⲱⲡⲉ ⲛⲛⲣⲉϥⲣⲛⲟⲃⲉ ϩⲙⲡⲉϩⲟⲟⲩ ⲛⲧⲟⲣⲅⲏ ⲙⲛⲛⲉⲧⲛⲁϣⲱⲡⲉ ⲟⲛ ⲛⲛⲇⲓⲕⲁⲓⲟⲥ ⲛⲧϩⲉ ⲉⲧⲉⲣⲉ ⲡⲉⲧϣⲁϫⲉ ⲛϩⲏⲧⲟⲩ ⲉⲧⲉⲡⲛⲟⲩⲧⲉ ⲡⲉ ϫⲱ ⲙⲙⲟⲥ ϫⲉⲛⲉⲧⲟ ⲛϩⲙϩⲁⲗ ⲛⲁⲓ ⲛⲁⲟⲩⲱⲙ ⲛⲛⲉⲧⲟ ⲛϩⲙϩⲁⲗ ⲛⲁⲓ ⲛⲁⲥⲱ ⲛⲉⲧⲟ ⲛϩⲙϩⲁⲗ ⲛⲁⲓ ⲛⲁⲉⲩⲫⲣⲁⲛⲉ ⲛⲉⲧⲟ ⲛϩⲙϩⲁⲗ ⲛⲁⲓ ⲛⲁⲧⲉⲗⲏⲗ ϩⲛⲟⲩⲟⲩⲛⲟϥ
…
17 ⲛⲧⲱⲧⲛ ⲇⲉ ⲧⲉⲧⲛⲁϩⲕⲟ ⲛⲧⲱⲧⲛ ⲇⲉ ⲧⲉⲧⲛⲁⲉⲓⲃⲉ ⲛⲧⲱⲧⲛ ⲇⲉ ⲧⲉⲧⲛⲁϫⲓϣⲓⲡⲉ ⲛⲧⲱⲧⲛ ⲇⲉ ⲧⲉⲧⲛⲁϫⲓϣⲕⲁⲕ ⲉⲃⲟⲗ ⲉⲧⲃⲉⲡⲙⲕⲁϩ ⲙⲡⲉⲧⲛϩⲏⲧ ⲁⲩⲱ ⲧⲉⲧⲛⲁⲱϣ ⲉⲃⲟⲗ ⲉⲧⲃⲉⲡⲟⲩⲱϣ ⲙⲡⲉⲧⲛⲡⲛⲉⲩⲙⲁ .
…
18 ⲉϥϣⲁϫⲉ ⲉⲛⲓⲙ ϫⲉⲛⲧⲱⲧⲛ ⲛⲥⲁⲛⲉⲧⲛⲁⲙⲟⲩ ⲉⲩϣⲟⲟϭⲉ ϩⲣⲁⲓ ϩⲙⲡⲓϣⲱⲛⲉ ⲛⲗⲟⲓⲙⲟⲥ ⲉⲧⲙⲙⲁⲩ .
…
19 ⲉⲧⲃⲉⲡⲓϣⲱⲛⲉ ϭⲉ ⲥⲛⲁⲩ ⲡⲁⲛⲕⲟⲗⲁⲥⲓⲥ ⲙⲛⲡⲁⲛⲉⲧⲥⲕⲉⲣⲕⲱⲣ ⲧⲏⲣⲟⲩ ϩⲙⲡϣⲱⲛⲉ ⲉⲧⲙⲙⲁⲩ ⲉⲧϩⲟⲟⲩ ⲉⲧⲉⲣⲉ ⲡϣⲱⲛⲉ ⲛⲛⲕⲟⲗⲁⲥⲓⲥ ⲏ ⲛⲁⲙⲛⲧⲉ ⲛⲁⲁⲙⲁϩⲧⲉ ⲉⲩⲟⲩⲟⲉⲓϣ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲉⲧⲛⲁⲙⲟⲩ ⲉⲩⲙⲏⲛ ⲉⲃⲟⲗ ⲛϩⲏⲧϥ ⲏ ⲉϥⲙⲏⲛ ⲉⲃⲟⲗ ⲛϩⲏⲧⲟⲩ ⲛⲧⲁⲩϫⲟⲟⲥ ⲛϭⲓⲛⲉⲡⲣⲟⲫⲏⲧⲏⲥ ϩⲙⲡϣⲱⲛⲉ ⲙⲡⲉⲩⲙⲕⲁϩ ⲛϩⲏⲧ ϫⲉⲁⲡⲁϩⲏⲧ ⲟⲩⲱϣϥ ϩⲣⲁⲓ ⲛϩⲏⲧ ⲁⲩⲛⲟⲉⲓⲛ ⲛϭⲓⲛⲁⲕⲉⲉⲥ ⲧⲏⲣⲟⲩ ⲁⲓϣⲱⲡⲉ ⲛⲧϩⲉ ⲛⲟⲩⲣⲱⲙⲉ ⲉϥⲟⲩⲟϣϥ ⲁⲩⲱ ⲛⲧϩⲉ ⲛⲟⲩⲣⲱⲙⲉ ⲉϥⲧⲁϩⲉ ϩⲛⲟⲩⲏⲣⲡ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲙⲡⲉⲙⲧⲟ ⲉⲃⲟⲗ ⲛⲧⲙⲛⲧⲛⲟϭ ⲙⲡⲥⲁ ⲙⲡⲉϥⲉⲟⲟⲩ
…
20 ϫⲉⲁⲡⲕⲁϩ ⲙⲟⲩϩ ⲙⲙⲛⲧⲛⲟⲉⲓⲕ ⲁϥⲣϩⲏⲃⲉ ⲛϭⲓⲡⲕⲁϩ ⲙⲡⲉⲙⲧⲟ ⲉⲃⲟⲗ ⲛⲛⲁⲓ .
…
21 ⲛⲧϩⲉ ⲟⲛ ⲉⲧϥϫⲱ ⲙⲙⲟⲥ ϫⲉⲁⲓⲥⲣⲟⲙⲣⲉⲙ ⲉϫⲙⲡⲟⲩⲱϣϥ ⲛⲧϣⲉⲉⲣⲉ ⲙⲡⲁⲗⲁⲟⲥ
…
22 ϩⲛⲟⲩϩⲃⲁ ⲁⲩϭⲙϭⲟⲙ ⲉϫⲱⲓ ⲛϭⲓϩⲉⲛⲛⲁⲁⲕⲉ ⲛⲧϩⲉ ⲛⲧⲉⲧⲛⲁⲙⲓⲥⲉ
…
23 ⲉⲓⲧⲉ ⲟⲛ ϫⲉϩⲏⲧ ϩⲏⲧ ϯⲧⲕⲁⲥ ⲉⲣⲟⲓ .
…
24 ⲟⲩⲙⲟⲛⲟⲛ ϫⲉⲛⲉⲡⲣⲟⲫⲏⲧⲏⲥ ⲁⲩⲱ ⲛⲇⲓⲕⲁⲓⲟⲥ ⲧⲏⲣⲟⲩ ϣⲱⲛⲉ ϩⲙⲡⲙⲕⲁϩ ⲛϩⲏⲧ ϩⲓⲗⲩⲡⲏ ϩⲓⲛⲟϭⲛⲉϭ ⲏ ϫⲉⲥⲉϩⲛⲟⲩϣⲱⲛⲉ ⲛⲙⲕⲁϩ ⲛϩⲏⲧ ⲉⲧⲃⲉⲛⲉⲧϣⲱⲛⲉ ϩⲙⲡϣⲱⲛⲉ ⲧⲏⲣϥ ⲛⲧⲁⲛⲟⲙⲓⲁ ⲁⲗⲗⲁ ⲡⲥⲱⲧⲏⲣ ⲟⲛ ⲡϫⲟⲉⲓⲥ ⲙⲡⲧⲏⲣϥ ϩⲙⲡⲧⲣⲉϥⲣⲣⲱⲙⲉ ⲉⲧⲃⲉⲡⲟⲩϫⲁⲓ ⲛⲛⲣⲱⲙⲉ ⲛⲧⲁϥϣⲱⲛⲉ ⲛⲧⲟϥ ⲟⲛ ⲕⲁⲧⲁⲧϩⲉ ⲛⲧⲁⲛⲇⲓⲕⲁⲓⲟⲥ ⲧⲏⲣⲟⲩ ϣⲱⲛⲉ ϩⲛⲟⲩⲙⲕⲁϩ ⲛϩⲏⲧ ⲉⲧⲃⲉⲛⲉⲛⲛⲟⲃⲉ ϩⲓⲧⲙⲡϣⲱⲛⲉ ⲉⲛⲧⲁⲛⲉⲓ ⲉϩⲣⲁⲓ ⲉⲣⲟϥ ⲧⲏⲣⲛ
…
25 ⲁⲗⲗⲁ ⲛⲉⲛϣⲱⲛⲉ ⲧⲏⲣⲟⲩ ⲏ ⲛⲉⲛⲡⲉⲧϩⲟⲟⲩ ⲉⲛⲧⲧⲁⲩⲉⲩⲉⲓ ⲉϩⲣⲁⲓ ⲉϫⲱ ⲛⲧⲁϥⲥⲟⲕⲟⲩ ⲉϫⲱϥ ⲙⲙⲓⲛ ⲙⲙⲟϥ ⲛⲧϩⲉ ⲉⲧⲉⲣⲉⲧⲉⲅⲣⲁⲫⲏ ⲣⲙⲛⲧⲣⲉ ϫⲉⲛⲧⲟϥ ⲡⲉ ⲛⲧⲁϥϥⲓ ϩⲁⲛⲉⲛⲛⲟⲃⲉ ⲙⲛⲛⲉⲛⲗⲟϫⲗⲉϫ ⲧⲏⲣⲟⲩ ϫⲉⲕⲁⲥ ⲛⲉⲧⲛⲁⲣⲣⲙϩⲉ ⲉⲃⲟⲗ ϩⲙⲡϣⲱⲛⲉ ⲛⲁⲛⲟⲙⲓⲁ ⲛⲓⲙ ⲛⲧⲉⲧⲙ ⲡⲛⲟⲃⲉ ⲣϫⲟⲉⲓⲥ ⲉⲣⲟⲟⲩ ϫⲓⲛⲡⲓⲛⲁⲩ ⲁⲩⲱ ⲛⲉⲧⲉⲙⲡⲟⲩⲣⲣⲙϩⲉ ⲉⲃⲟⲗ ϩⲙⲡϣⲱⲛⲉ ⲙⲡⲛⲟⲃⲉ ⲉϥⲛⲁⲕⲧⲟ ⲛⲛⲉⲩⲛⲟⲃⲉ ⲛⲧⲁϥⲥⲟⲕⲟⲩ ⲉϫⲱϥ ⲏ ⲛⲧⲁϥϥⲓ ϩⲁⲣⲟⲟⲩ ⲉϩⲣⲁⲓ ⲉϫⲱⲟⲩ ⲛⲕⲉⲥⲟⲡ ϫⲉⲙⲡⲟⲩⲣⲡⲙⲉⲉⲩⲉ ⲛⲧϩⲉ ⲛⲧⲁⲩⲕⲱ ⲛⲟⲩⲕⲗⲟⲙ ⲛϣⲟⲛⲧⲉ ⲉϫⲛⲧⲉϥⲁⲡⲉ ⲟⲩⲇⲉ ⲙⲡⲟⲩⲣⲡⲙⲉⲉⲩⲉ ϫⲉⲁⲛⲉⲡⲣⲟⲫⲏⲧⲏⲥ ⲁⲩⲱ ⲛⲁⲡⲟⲥⲧⲟⲗⲟⲥ ⲙⲛⲛⲇⲓⲕⲁⲓⲟⲥ ⲧⲏⲣⲟⲩ ϫⲓ ⲛϩⲉⲛⲛⲟϭⲛⲉϭ ⲏ ⲁⲩⲉⲓ ⲉϩⲣⲁⲓ ⲉϩⲉⲛⲛⲟϭⲛⲉϭ ⲉⲧⲃⲉⲛⲉⲛⲛⲟⲃⲉ .
…
26 ⲉϣϫⲉ ⲡⲉⲧⲟⲩⲱϣ ⲉⲧⲟⲩϫⲉϩⲉⲛⲣⲱⲙⲉ ⲉⲃⲟⲗ ϩⲛⲟⲩⲑⲗⲓⲯⲓⲥ ⲉⲛⲁϣⲱⲥ ⲁⲩⲱ ⲉⲛⲁϩⲙⲟⲩ ⲉⲡⲉⲙⲕⲁϩ ⲛϩⲏⲧ ⲉⲧⲟϣ ⲛⲥⲉϩⲟⲡⲟⲩ ϩⲱⲱϥ ⲉⲣⲟϥ ⲛϭⲓⲛⲉⲧⲙⲙⲁⲩ ϩⲛⲧⲉϥⲑⲗⲓⲯⲓⲥ ⲙⲛⲡⲉϥⲙⲕⲁϩ ⲛϩⲏⲧ ⲛⲧⲟⲟⲩ ⲉⲧⲥⲟⲟⲩⲛ ⲥⲉⲣⲱϣⲉ .
…
27 ⲱ ⲛⲧⲟⲕ ⲙⲁⲩⲁⲁⲕ ⲡⲛⲟⲩⲧⲉ ⲉⲧⲉϩⲉⲛⲙⲉ ⲁⲩⲱ ϩⲉⲛϩⲁⲡ ⲙⲙⲉ ⲛⲉ ⲛⲉϥϩⲃⲏⲩⲉ ⲧⲏⲣⲟⲩ ⲡⲉⲧⲥⲟⲟⲩⲛ ⲉⲧⲁⲛⲁⲅⲕⲏ ⲙⲡⲓϣⲱⲛⲉ ⲉⲛⲧⲁϥⲣⲡⲉⲓⲣⲁⲥⲙⲟⲥ ⲉⲧⲁⲙⲛⲧⲉⲃⲓⲏⲛ
…
28 ⲁⲓⲉⲓⲙⲉ ⲅⲁⲣ ⲛⲁⲛⲟⲃⲉ ϩⲓⲧⲛⲧⲉⲕⲥⲃⲱ ⲏ ϩⲙⲡⲧⲣⲉⲕϯⲥⲃⲱ ⲛⲁⲓ
…
29 ⲡⲁϩⲏⲧ ⲙⲛϩⲏⲧ ⲙⲉϩ ⲛⲕⲱϩⲧ ⲏ ⲁⲩⲙⲟⲩϩ ⲛⲕⲱϩⲧ ϩⲓⲧⲛⲧϩⲙⲙⲉ ⲉⲧϯ ⲉϩⲟⲩⲛ ⲉⲣⲟⲟⲩ ⲉⲃⲟⲗ ϩⲓⲧⲙⲡⲉϩⲙⲟⲙ ⲙⲡⲓϣⲱⲛⲉ ⲉⲧⲙⲙⲁⲩ ⲉⲧϩⲟⲟⲩ ⲉⲧϫⲉⲣⲟ ϩⲙⲡⲁⲥⲡⲓⲣ ⲥⲛⲁⲩ ⲡⲁⲓ ⲙⲛⲡⲁⲓ ⲙⲛⲧⲁⲕⲉϫⲓⲥⲉ ⲁⲩⲱ ⲟⲛ ⲛⲁⲟⲩⲉⲣⲏⲧⲉ .
…
30 ⲉⲧⲃⲉⲡⲁⲓ ⲙⲛϣϭⲟⲙ ⲙⲙⲟⲓ ⲉⲧⲣⲁϭⲱ ⲙⲡⲓϫⲉⲡⲓⲕⲉϣⲁϫⲉ ⲛⲥⲓϣⲉ ⲏ ⲙⲡⲁⲣⲁⲡϣⲓ ⲉⲧⲉⲡⲁⲓ ⲡⲉ ϫⲉⲟⲩⲙⲟⲛⲟⲛ ϫⲉⲉⲓⲛⲁⲣ ⲡⲓⲡⲁⲥⲭⲁ ⲛⲙⲙⲏⲧⲛ ⲏ ϩⲁϩⲧⲏⲧⲛ ⲛⲧϩⲉ ⲛⲟⲩϣⲙⲙⲟ ⲁⲗⲗⲁ ⲉⲓⲛⲁⲣⲛⲕⲉϩⲟⲟⲩ ⲧⲏⲣⲟⲩ ⲙⲡⲁⲱⲛϩ ⲉⲓϥⲓ ⲙⲡⲣⲟⲟⲩϣ ⲙⲡⲁⲱⲛϩ ⲛⲧϩⲉ ⲛⲟⲩϣⲙⲙⲟ ⲕⲁⲧⲁⲡⲉⲛⲧⲁⲓⲟⲩⲱ ⲉⲓϫⲱ ⲙⲙⲟϥ ϩⲛϩⲉⲛⲕⲉⲉⲡⲓⲥⲧⲟⲗⲏ ⲉⲩⲥⲏϩ ⲛⲏⲧⲛ ⲧⲏⲣⲟⲩ ⲉⲧⲃⲉⲛⲉⲧⲉⲓⲣⲉ ⲏ ⲛⲉⲛⲧⲁⲩⲉⲓⲣⲉ ⲟⲛ ⲧⲉⲛⲟⲩ ⲛⲛⲉⲓϩⲃⲏⲩⲉ ⲛⲗⲟⲓⲙⲟⲥ ⲁⲩⲱ ⲛⲃⲟⲧⲉ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲁⲩⲱ ⲉⲧⲃⲉⲧⲏⲩⲧⲛ ⲛⲧⲱⲧⲛ ⲁⲛ ⲛⲉⲥⲛⲏⲩ ⲉⲧⲟⲩⲁⲁⲃ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓ .
…
31 ⲛⲧϩⲉ ⲅⲁⲣ ⲉⲧⲉⲟⲩϩⲁⲡ ⲡⲉ ⲙⲛⲟⲩⲥⲛⲟϥ ⲙⲛⲛⲕⲉⲙⲛⲧϩⲏⲕⲉ ⲛϩⲟⲩⲟ ⲉϩⲣⲁⲓ ⲉϫⲙⲡⲉⲧϣⲁϫⲉ ⲛⲙⲙⲏⲧⲛ ⲉϥϣⲁⲛⲁⲁϥ ⲛϣⲙⲙⲟ ⲉⲣⲱⲧⲛ ⲛⲧⲱⲧⲛ
…