1 ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲩⲉⲉⲓ ⲉϩⲣⲁⲓ ⲉϫⲱⲟⲩ ⲉⲃⲟⲗ ϩⲓⲧⲙⲡⲛⲟⲩⲧⲉ ⲛϭⲓⲛⲉⲓⲥⲙⲟⲩ ⲧⲏⲣⲟⲩ ⲟⲛ ⲛⲓⲙ ⲉⲧⲛⲁⲕⲱⲗⲩⲉ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ·
…
2 ⲏ ⲟⲛ ⲧⲉⲛⲟⲩ ⲉⲧⲙⲧⲣⲉⲩⲱϣ ⲛⲛϣⲁϫⲉ ⲧⲏⲣⲟⲩ ⲉⲧⲥⲏϩ ϩⲣⲁⲓ ϩⲙⲡϫⲱⲱⲙⲉ ⲉⲧⲙⲙⲁⲩ ⲏ ⲛⲉⲧⲥⲏϩ ϩⲛⲧⲉⲓⲉⲡⲓⲥⲧⲟⲗⲏ ⲙⲛⲛⲕⲟⲟⲩ ⲛⲧⲁⲛⲥⲁϩⲟⲩ ·
…
3 ⲏ ⲛⲧⲟϥ ⲛⲉⲧⲛⲛⲁⲥⲁϩⲟⲩ ϫⲓⲛⲡⲟⲟⲩ ⲛϩⲟⲟⲩ · ⲁⲩⲱ ⲛⲉⲧⲛⲁⲕⲱⲗⲩⲉ ⲉⲧⲙⲧⲣⲉⲩⲟϣⲟⲩ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ·
…
4 ⲏ ⲟⲛ ⲧⲉⲛⲟⲩ ⲉⲩⲉⲉⲓ ⲉϩⲣⲁⲓ ⲉϫⲱⲟⲩ ⲛϭⲓⲛⲉⲓⲥⲁϩⲟⲩ ⲧⲏⲣⲟⲩ ·
…
5 ⲟⲩⲟⲛ ⲇⲉ ⲛⲓⲙ ⲛⲟⲩⲟⲉⲓϣ ⲛⲓⲙ ⲉⲧⲛⲁⲥⲡⲟⲩⲇⲁⲍⲉ ⲉⲧⲣⲉⲩⲟϣⲟⲩ · ⲏ ⲛⲉⲧⲛⲁⲣϩⲛⲁⲩ ⲉⲥⲱⲧⲙ ⲉⲣⲟⲟⲩ ⲉϩⲁⲣⲉϩ ⲉⲣⲟⲟⲩ ⲉⲁⲁⲩ ⲉⲩⲉⲉⲓ ⲉϩⲣⲁⲓ ⲉϫⲱⲟⲩ ⲛϭⲓⲛⲉⲓⲥⲙⲟⲩ ⲧⲏⲣⲟⲩ ⲉⲧⲃⲉⲡⲁⲓ ⲟⲩ ⲙⲟⲛⲟⲛ ϫⲉϯⲛⲁϩⲱⲛ ⲉⲧⲟⲟⲧⲟⲩ ⲛⲛⲉⲥⲛⲏⲩ ⲉⲧⲟ ⲛⲟⲩϩⲏⲧ ⲛⲟⲩⲱⲧ ⲛⲙⲙⲁⲛ ⲉⲧⲣⲉⲩϥⲓ ⲡⲣⲟⲟⲩϣ ⲛⲛϣⲁϫⲉ ⲧⲏⲣⲟⲩ ⲉⲧⲛⲛⲁⲥⲁϩⲟⲩ ⲉϩⲣⲁⲓ ⲉⲡϫⲱⲱⲙⲉ ⲉⲧⲙⲙⲁⲩ ⲙⲛⲛⲉⲧⲥⲏϩ ϩⲛⲛⲉⲡⲓⲥⲧⲟⲗⲏ ⲧⲏⲣⲟⲩ
…
6 ⲁⲗⲗⲁ ϯⲛⲁϩⲱⲛ ⲟⲛ ⲉⲧⲟⲟⲧⲟⲩ ⲉⲧⲣⲉⲩϩⲁⲣⲉϩ ⲉⲛⲁϩⲟⲉⲓⲧⲉ ⲉⲛⲧⲁⲓⲡⲁϩⲟⲩ ⲛϩⲁϩ ⲛⲥⲟⲡ ⲉⲁⲓⲁⲩ ⲙⲡⲟϭⲉ ⲥⲛⲧⲉ ⲉⲡϩⲁⲉ ⲉⲓⲙⲟⲕϩ ⲛϩⲏⲧ ⲉⲙⲁⲧⲉ ϣⲁϩⲣⲁⲓ ⲉⲡⲙⲟⲩ ·
…
7 ⲉⲧⲃⲉⲡⲁⲓ ϯⲛⲁϩⲱⲛ ⲉⲧⲟⲟⲧⲟⲩ ⲛⲛⲉⲥⲛⲏⲩ ⲉⲧⲟ ⲛⲟⲩϩⲏⲧ ⲛⲟⲩⲱⲧ ⲛⲙⲙⲁⲛ ⲛⲉⲧϣⲟⲟⲡ ϩⲛⲛⲉϩⲟⲟⲩ ⲙⲡⲁⲙⲟⲩ ⲉⲧⲣⲉⲩⲕⲱ ⲉϩⲣⲁⲓ ⲛⲛⲁϩⲟⲉⲓⲧⲉ ⲉⲧⲡⲏϩ ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲏⲩ ⲙⲛⲛⲥⲱⲛ
…
8 ⲁⲩⲱ ⲟⲩⲟⲛ ⲛⲓⲙ ⲉⲧⲛⲁⲥⲱⲧⲙ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲏ ⲟⲛ ⲧⲉⲛⲟⲩ ⲉⲛϣⲁϫⲉ ⲧⲏⲣⲟⲩ ⲉⲧⲥⲏϩ ϩⲙⲡϫⲱⲱⲙⲉ ⲉⲧⲙⲙⲁⲩ · ⲏ ⲛⲉⲧⲥⲏϩ ϩⲛⲛⲉⲡⲓⲥⲧⲟⲗⲏ ⲉⲛⲧⲁⲛⲥⲁϩⲟⲩ ⲏ ⲛⲉⲧⲛⲛⲁⲥⲁϩⲟⲩ
…
9 ⲁⲩⲱ ⲛⲥⲉϫⲟⲟⲥ ϫⲉⲟⲩ ⲛⲉ ⲛⲉⲓϩⲟⲉⲓⲧⲉ ⲉⲧⲡⲏϩ ⲙⲛⲛⲉⲓϣⲁϫⲉ ⲧⲏⲣⲟⲩ ⲉⲧⲥⲏϩ ⲙⲛⲛⲉⲓⲥⲁϩⲟⲩ ⲧⲏⲣⲟⲩ ·
…
10 ⲁⲩⲱ ⲉⲩⲉⲟⲩⲱϣⲃ ⲛⲥⲉϫⲟⲟⲥ ϫⲉⲉⲧⲃⲉϫⲉⲁⲡⲉⲧϭⲱϣⲧ ⲉϫⲙⲡⲕⲁϩ ⲧⲏⲣϥ ·
…
11 ⲁⲩⲱ ⲡⲉⲧⲡⲁⲣⲁⲅⲉ ϩⲛⲧⲟⲓⲕⲟⲩⲙⲉⲛⲏ ⲧⲏⲣⲥ ⲛϩⲁϩ ⲛⲥⲟⲡ ϩⲛⲟⲩϩⲱⲡ ⲛⲟⲩⲟⲉⲓϣ ⲛⲓⲙ · ⲁⲩⲱ ⲙⲙⲏⲛⲉ ⲙⲙⲏⲛⲉ ⲉⲧⲉⲡⲛⲟⲩⲧⲉ ⲡⲉ
…
12 ⲁϥϭⲱϣⲧ ϩⲱⲱⲛ ⲉϩⲣⲁⲓ ⲉϫⲱⲛ ⲛⲟⲩⲟⲉⲓϣ ϩⲛⲟⲩϩⲱⲡ ⲁⲩⲱ ⲁϥⲡⲁⲣⲁⲅⲉ ⲛⲛⲉⲛⲥⲩⲛⲁⲅⲱⲅⲏ ⲛϩⲁϩ ⲛⲥⲟⲡ ⲉϥⲟⲩⲟⲛϩ ⲁⲛ ⲉⲗⲁⲁⲩ ⲛⲣⲱⲙⲉ ⲟⲩⲧⲉ ϩⲟⲟⲩⲧ ⲟⲩⲧⲉ ⲥϩⲓⲙⲉ ⲉⲓⲙⲏⲧⲓ ⲛⲉϥⲁⲅⲅⲉⲗⲟⲥ ⲙⲁⲩⲁⲁⲩ ·
…
13 ⲁⲩⲱ ⲉⲩⲉϫⲟⲟⲥ ϫⲉϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲁϥⲛⲟⲩϭⲥ ⲉⲣⲟⲛ ⲉⲙⲁⲧⲉ ⲛϭⲓⲡϫⲟⲉⲓⲥ ϩⲛⲟⲩⲛⲟϭ ⲛⲟⲣⲅⲏ ·
…
14 ⲁⲩⲱ ⲁϥⲕⲧⲉⲡⲉϥϩⲟ ⲉⲃⲟⲗ ⲙⲙⲟⲛ ϩⲛⲟⲩϭⲱⲛⲧ ⲉⲛⲁϣⲱϥ ⲉⲧⲣⲉϥⲉⲓⲛⲉ ⲉϩⲣⲁⲓ ⲉϫⲱⲛ ⲛϩⲉⲛ ⲛⲟϭ ⲛⲥⲁϩⲟⲩ ⲙⲛϩⲉⲛ ⲑⲗⲓⲯⲓⲥ ⲉⲩϩⲟⲟⲩ ⲙⲛϩⲉⲛⲡⲉⲓⲣⲁⲥⲙⲟⲥ ⲉⲩⲛⲁϣⲧ ϫⲉⲁⲛⲣⲛⲟⲃⲉ ⲉⲣⲟϥ ·
…
15 ϩⲙⲡⲧⲣⲉϥⲉⲓ ⲉϩⲣⲁⲓ ⲉϫⲱⲛ ⲛⲧϩⲉ ⲛⲟⲩⲙⲟⲩⲓ ⲉϥⲧⲱⲣⲡ ⲉϥⲗϩⲏⲙ ⲛϭⲓⲡⲥⲁⲧⲁⲛⲁⲥ · ⲁⲩⲱ ⲁϥⲡⲗⲏⲅⲉ ⲛⲛⲉⲧⲟⲓ ⲛⲧⲟⲟⲧⲛ ·
…
16 ⲁⲩⲱ ⲟⲛ ⲉⲩⲉϫⲟⲟⲥ ϫⲉⲛⲧⲉⲣⲛⲙⲉⲧⲁⲛⲟⲉⲓ ϩⲛⲟⲩⲑⲙⲕⲟ ⲉⲛⲁϣⲱϥ ϩⲛⲟⲩϩⲕⲟ ⲙⲛⲟⲩⲉⲓⲃⲉ ⲙⲛⲟⲩⲣⲓⲙⲉ ϩⲛϩⲉⲛⲣⲙⲉⲓⲟⲟⲩⲉ ⲉϫⲛϩⲩⲡⲟⲕⲣⲓⲥⲓⲥ ⲁϥⲕⲧⲟ ⲙⲡⲉϥϩⲟ ⲉⲃⲟⲗ ⲙⲙⲟⲛ ⲛϭⲓⲡⲛⲟⲩⲧⲉ
…
17 ⲁⲩⲱ ⲁϥⲕⲧⲟ ⲛⲧⲉϥⲟⲣⲅⲏ ⲉⲡⲁϩⲟⲩ ⲉⲧⲙⲧⲣⲉϥⲕⲟⲗⲁⲍⲉ ⲙⲙⲟⲛ ϩⲛϩⲉⲛⲛⲟϭ ⲙⲡⲉⲓⲣⲁⲥⲙⲟⲥ ⲉⲩϩⲟⲟⲩ
…
18 ⲁⲩⲱ ⲡⲥⲁϩⲟⲩ ⲧⲏⲣϥ ⲁϥϥⲓⲧϥ ⲉⲃⲟⲗ ϩⲓϫⲱⲛ ⲁⲩⲱ ⲁϥⲛⲁ ⲛⲁⲛ ϩⲛⲟⲩⲛⲟϭ ⲛⲛⲁ ·
…
19 ⲁⲩⲱ ⲁϥⲥⲙⲟⲩ ⲉⲣⲟⲛ ϩⲛⲟⲩⲛⲟϭ ⲛⲥⲙⲟⲩ ϩⲙⲡⲧⲣⲉϥⲉⲓⲛⲉ ⲛⲧⲉϥϭⲓϫ ⲉϩⲣⲁⲓ ⲉϫⲱⲛ ϩⲛⲟⲩϭⲉⲣⲱⲃ ϩⲛⲟⲩⲙⲛⲧϣⲁⲛϩⲧⲏϥ · ⲉⲁϥⲡⲁⲥⲧⲛⲉⲩⲧⲃⲃⲟ ⲕⲁⲧⲁⲧϩⲉ ⲉⲧⲥⲏϩ
…
20 ϫⲉϯⲛⲁⲉⲓⲛⲉ ⲛⲧⲁϭⲓϫ ⲉϩⲣⲁⲓ ⲉϫⲱ ⲛⲧⲁⲡⲁⲥⲧⲉ ⲉⲩⲧⲃⲃⲟ ·
…
21 ⲁⲩⲱ ⲟⲛ ⲉⲁϥϥⲓ ⲉⲃⲟⲗ ⲛϩⲏⲧⲛ ⲛϩⲉⲛⲣⲱⲙⲉ ⲙⲡⲟⲛⲏⲣⲟⲥ ·
…
22 ⲁⲩⲱ ⲛⲣⲉϥⲣⲛⲟⲃⲉ ⲡⲁⲣⲁⲣⲱⲙⲉ ⲛⲓⲙ ⲕⲁⲧⲁⲧϩⲉ ⲉⲧⲥⲏϩ ϫⲉϯⲛⲁⲧⲁⲕⲟ ⲇⲉ ⲛⲛⲉⲧⲟ ⲛⲁⲧⲥⲱⲧⲙ ·
…
23 ⲁⲩⲱ ϯⲛⲁϥⲓ ⲛⲛⲁⲛⲟⲙⲟⲥ ⲧⲏⲣⲟⲩ ⲛϩⲏⲧⲉ ⲙⲛⲛϫⲁⲥⲓϩⲏⲧ ⲧⲏⲣⲟⲩ · ⲛⲧⲁⲥⲙⲓⲛⲉ ⲛⲉ ⲛⲛⲟⲩⲣⲉϥϯϩⲁⲡ ⲛⲧϩⲉ ⲛϣⲟⲣⲡ ·
…
24 ⲁⲩⲱ ⲛⲟⲩⲣⲉϥϫⲓϣⲟϫⲛⲉ ⲛⲧϩⲉ ⲛⲧⲉϩⲟⲩⲉⲓⲧⲉ · ⲁⲩⲱ ⲉⲩⲉϫⲟⲟⲥ ϫⲉⲧⲁⲓ ⲧⲉ ⲧϩⲉ ⲉⲛⲧⲁϥⲁⲁⲥ ⲛⲁⲛ ⲛϭⲓⲡⲛⲟⲩⲧⲉ ϫⲉⲁⲛⲟⲛ ⲛⲉϥϩⲙϩⲁⲗ ·
…
25 ⲁⲩⲱ ⲉⲁϥⲡⲁⲓⲇⲉⲩⲉ ⲙⲙⲟⲛ ϩⲛⲟⲩⲛⲁ ⲛϭⲓⲡϫⲟⲉⲓⲥ · ⲁⲩⲱ ⲁϥϫⲡⲓⲟⲛ ϩⲛⲟⲩⲙⲛⲧϣⲁⲛϩⲧⲏϥ ϫⲉⲁⲛⲟⲛ ⲛⲉϥϣⲏⲣⲉ · ⲛⲧⲟϥ ⲡⲉ ⲡⲉⲛⲉⲓⲱⲧ ·
…
26 ⲁⲩⲱ ⲛⲉⲧϥⲓ ⲏ ⲛⲉⲧⲛⲁϥⲓ ⲙⲡⲣⲟⲟⲩϣ ⲧⲉⲛⲟⲩ ⲏ ⲛⲧⲟϥ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛⲛϣⲁϫⲉ ⲧⲏⲣⲟⲩ ⲉⲧⲥⲏϩ ϩⲙⲡⲉⲓϫⲱⲱⲙⲉ ⲉⲩⲉⲟⲩⲱϣⲃ ⲛⲥⲉϫⲟⲟⲥ
…
27 ϫⲉϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲟⲟⲥ ϫⲉϩⲉⲛⲉⲡⲣⲁ ⲛⲉ ⲛⲉⲓϣⲁϫⲉ ⲏ ⲛⲥⲁϩⲟⲩ · ⲏ ⲛⲥⲙⲟⲩ · ⲉⲧⲉⲣⲉⲡⲁⲓϫⲱ ⲙⲙⲟⲟⲩ
…
28 ⲁⲩⲱ ϫⲉⲛⲥⲉⲛⲁⲉⲓ ⲁⲛ ⲉϩⲣⲁⲓ ⲉϫⲛⲗⲁⲁⲩ ⲕⲁⲧⲁⲧϩⲉ ⲛⲧⲟϥ ⲉⲧϥϫⲱ ⲙⲙⲟⲥ · ⲉⲩⲉⲉⲓ ⲉϩⲣⲁⲓ ⲉϫⲱⲟⲩ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲏ ⲛⲧⲟϥ ⲧⲉⲛⲟⲩ ⲛϭⲓⲛⲉⲓⲥⲁϩⲟⲩ ⲧⲏⲣⲟⲩ ·
…
29 ⲁⲩⲱ ⲉⲩⲉϫⲟⲟⲥ ϫⲉⲛⲉⲧⲟ ⲇⲉ ⲛⲁⲧⲛⲁϩⲧⲉ ϫⲉⲁⲡϫⲟⲉⲓⲥ ⲉⲓⲣⲉ ⲛⲛⲁⲓ ⲧⲏⲣⲟⲩ ⲛⲙⲙⲁⲛ ⲉⲩⲙⲟⲟⲩⲧ ·
…
30 ⲁⲩⲱ ⲉⲩⲟ ⲛϣⲙⲙⲟ ⲉⲡⲉⲛⲧⲁϥⲧⲁⲙⲓⲟⲟⲩ ·
…
31 ⲕⲁⲧⲁⲧϩⲉ ⲉⲧⲥⲏϩ ϫⲉⲡⲛⲟⲩⲧⲉ ⲡⲁⲛⲉⲧⲙⲟⲟⲩⲧ ⲁⲛ ⲡⲉ ⲁⲗⲗⲁ ⲡⲁⲛⲉⲧⲟⲛϩ ⲡⲉ ·
…
32 ⲟⲩ ϩⲱⲱϥ ⲡⲉ ϫⲉⲡⲛⲟⲩⲧⲉ ⲡⲁⲛⲉⲧⲙⲟⲟⲩⲧ ⲁⲛ ⲡⲉ ⲁⲗⲗⲁ ⲡⲁⲛⲉⲧⲟⲛϩ ⲡⲉ ·
…
33 ⲟⲩⲕ ⲟⲩⲛ ⲛⲉⲛⲧⲁⲩⲙⲟⲩ ⲧⲏⲣⲟⲩ ⲥⲉⲟ ⲛϣⲙⲙⲟ ⲉⲡⲛⲟⲩⲧⲉ · ⲏ ⲛⲉⲧⲟⲛϩ ⲥⲉⲏⲡ ⲧⲏⲣⲟⲩ ⲉⲡⲛⲟⲩⲧⲉ ·
…
34 ⲉϣϫⲉ ⲡⲛⲟⲩⲧⲉ ⲡⲁⲛⲉⲧⲟⲛϩ ⲙⲁⲩⲁⲁⲩ ⲡⲉ ⲡⲁⲛⲉⲧⲙⲟⲟⲩⲧ ⲁⲛ ⲛⲧⲟⲟⲩ ⲡⲉ · ⲉⲓⲉ ⲛⲁϣ ⲛϩⲉ ⲁϥϫⲟⲟⲥ ⲛϭⲓⲡⲁⲡⲟⲥⲧⲟⲗⲟⲥ
…
35 ϫⲉⲙⲛⲗⲁⲁⲩ ⲙⲙⲟⲛ ⲛⲁⲱⲛϩ ⲛⲁϥ · ⲁⲩⲱ ⲙⲛⲗⲁⲁⲩ ⲙⲙⲟⲛ ⲛⲁⲙⲟⲩ ⲛⲁϥ ·
…
36 ⲉϣⲱⲡⲉ ⲅⲁⲣ ⲉⲛϣⲁⲛⲱⲛϩ ⲛⲛⲁⲱⲛϩ ⲙⲡϫⲟⲉⲓⲥ · ⲉϣⲱⲡⲉ ⲟⲛ ⲉⲛϣⲁⲛⲙⲟⲩ ⲉⲛⲛⲁⲙⲟⲩ ⲙⲡϫⲟⲉⲓⲥ ·
…
37 ⲉϣⲱⲡⲉ ϭⲉ ⲉⲛϣⲁⲛⲱⲛϩ ⲉϣⲱⲡⲉ ⲉⲛϣⲁⲛⲙⲟⲩ ⲁⲛⲟⲛ ⲛⲁⲡϫⲟⲉⲓⲥ ·
…
38 ⲉⲧⲃⲉⲡⲁⲓ ⲅⲁⲣ ⲁⲡⲉⲭⲣⲓⲥⲧⲟⲥ ⲙⲟⲩ ⲁϥⲱⲛϩ ϫⲉⲉϥⲉⲣϫⲟⲉⲓⲥ ⲉⲡⲉⲧⲙⲟⲟⲩⲧ ⲙⲛⲛⲉⲧⲟⲛϩ ·
…
39 ⲉⲧⲃⲉⲡⲁⲓ ϩⲙⲡⲧⲣⲉϥϫⲟⲟⲥ ϫⲉⲡⲛⲟⲩⲧⲉ ⲡⲁⲛⲉⲧⲙⲟⲟⲩⲧ ⲁⲛ ⲡⲉ ⲁⲗⲗⲁ ⲡⲁⲛⲉⲧⲟⲛϩ ⲡⲉ · ⲉϥϫⲱ ⲙⲙⲟⲥ ϫⲉⲡⲛⲟⲩⲧⲉ ⲡⲁⲛⲉⲧⲙⲟⲟⲩⲧ ⲁⲛ ⲡⲉ ϩⲛⲧⲡⲟⲣⲛⲓⲁ · ⲙⲛⲡⲥⲱⲱϥ · ⲙⲛⲡϫⲓⲟⲩⲉ · ⲙⲛⲡϭⲟⲗ · ⲙⲛⲡⲁⲛⲁϣ ⲛⲛⲟⲩϫ · ⲙⲛⲡⲙⲓϣⲉ · ⲙⲛⲡϯⲧⲱⲛ ⲙⲛⲡⲕⲱϩ · ⲙⲛⲡⲙⲟⲥⲧⲉ · ⲙⲛⲧⲙⲛⲧϫⲁϫⲉ ⲙⲛⲧⲙⲛⲧⲁⲡⲓⲥⲧⲟⲥ · ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ·
…
40 ⲁⲩⲱ ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ ϩⲛⲛⲉϥϣⲁϫⲉ ⲛϭⲓⲡϫⲟⲉⲓⲥ ⲓⲏⲥⲟⲩⲥ ϫⲉⲡⲛⲟⲩⲧⲉ ⲡⲁⲛⲉⲧⲙⲟⲟⲩⲧ ⲁⲛ ⲡⲉ · ⲁⲗⲗⲁ ⲡⲁⲛⲉⲧⲟⲛϩ ⲡⲉ ϩⲙⲡⲧⲃⲃⲟ · ⲙⲛⲧⲙⲛⲧⲡⲁⲣⲑⲉⲛⲟⲥ · ⲙⲛⲧⲙⲛⲧϣⲁⲩ · ⲙⲛⲧⲇⲓⲕⲁⲓⲟⲥⲩⲛⲏ · ⲙⲛⲧⲙⲉ · ⲙⲛϩⲱⲃ ⲛⲓⲙ ⲛⲁⲅⲁⲑⲟⲛ ·
…
41 ⲁⲩⲱ ⲛⲉⲧⲛⲁⲁϩⲉⲣⲁⲧⲟⲩ ⲉϫⲛⲛϣⲁϫⲉ ⲙⲡⲉⲓϫⲱⲱⲙⲉ · ⲉⲧⲣⲉⲩϥⲓ ⲙⲡⲉⲩⲣⲟⲟⲩϣ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ·
…
42 ⲏ ⲛⲧⲟϥ ⲧⲉⲛⲟⲩ · ⲉⲩⲉⲟⲩⲱϣⲃ ⲛⲥⲉϫⲟⲟⲥ ϫⲉⲡⲛⲟⲩⲧⲉ ⲡⲛⲟⲩⲧⲉ ⲟⲩⲟⲛ ⲛⲓⲙ ⲉⲧⲛⲁϩⲱⲡ ⲛⲛϣⲁϫⲉ ⲙⲡⲉⲓϫⲱⲱⲙⲉ ·
…
43 ⲏ ⲛⲥⲉⲥⲕⲁⲛⲇⲁⲗⲓⲍⲉ ⲛⲟⲩⲁ ⲉⲃⲟⲗ ϩⲛⲛⲉⲓϣⲁϫⲉ ⲧⲏⲣⲟⲩ ·
…
44 ⲉⲣⲉⲡϫⲟⲉⲓⲥ ⲉⲓⲛⲉ ⲉϩⲣⲁⲓ ⲉϫⲱⲟⲩ ⲙⲡⲥⲁϩⲟⲩ ⲧⲏⲣϥ ⲉⲧⲥⲏϩ ϩⲛⲛⲉⲅⲣⲁⲫⲏ ⲧⲏⲣⲟⲩ · ⲁⲩⲱ ⲉⲧⲥⲏϩ ϩⲙⲡⲉⲓ ϫⲱⲱⲙⲉ ⲉⲩϣⲟⲟⲡ ϩⲓϫⲙⲡⲕⲁϩ ·
…
45 ⲁⲩⲱ ⲉⲣⲉⲡϫⲟⲉⲓⲥ ⲙⲟⲩⲣ ⲛⲧⲟⲣⲅⲏ ⲙⲡⲉϥϭⲱⲛⲧ ⲉϩⲟⲩⲛ ⲉⲣⲟⲟⲩ ϩⲙⲡⲉϩⲟⲟⲩ ⲛⲧⲟⲣⲅⲏ ⲛϥⲛⲟϫⲟⲩ ⲉϩⲣⲁⲓ ⲉⲧⲉϩⲣⲱ ⲛⲕⲱϩⲧ ⲉⲧⲙⲟⲩϩ ϩⲛⲟⲩⲛⲟϭ ⲛⲥⲁⲧⲉ
…
46 ⲕⲁⲧⲁⲛⲉⲅⲣⲁⲫⲏ ϩⲉⲛⲣⲱⲙⲉ ⲉⲩⲛⲕⲟⲧⲕ ⲁⲛ ⲥⲉⲛⲁⲥⲱⲧⲙ ϩⲛⲟⲩϭⲉⲡⲏ ⲉⲛⲉⲧⲙⲟⲩⲧⲉ ⲉⲣⲟⲟⲩ ·
…
47 ⲁⲩⲱ ⲛⲉⲧⲛⲕⲟⲧⲕ ⲟⲛ ⲉⲕϣⲁⲛⲟⲩⲁϩⲙⲉⲕ ⲉⲣⲟⲟⲩ ⲉⲕⲱϣ ⲉⲃⲟⲗ ⲥⲉⲛⲁⲧⲱⲟⲩⲛ ϩⲁⲡϩⲓⲛⲏⲃ ·
…
48 ϩⲉⲛⲣⲉϥⲙⲟⲟⲩⲧ ⲇⲉ ⲛⲧⲟⲟⲩ ⲉⲩϩⲏⲡ ϩⲁⲡⲉⲥⲏⲧ ⲙⲡⲕⲁϩ ⲏ ⲉⲩⲛⲏϫ ⲉⲃⲟⲗ ϩⲛⲛⲉⲙϩⲁⲁⲩ ⲛⲥⲉⲛⲁⲥⲱⲧⲙ ⲁⲛ ⲉⲩϣⲁⲛⲙⲟⲩⲧⲉ ⲉⲣⲟⲟⲩ ϩⲛⲟⲩϭⲟⲙ ϩⲛϩⲉⲛⲙⲏⲏϣⲉ ⲛϣⲁϫⲉ ·
…
49 ⲁⲗⲗⲁ ⲛⲁⲙⲉ ⲙⲟⲅⲓⲥ ⲛⲥⲉⲁⲓⲥⲑⲁⲛⲉ ϩⲛⲧϩⲁⲏ ⲛⲥⲁⲗⲡⲓⲅⲝ ϩⲙⲡⲉϩⲟⲟⲩ ⲉⲧⲟⲩⲛⲁⲥⲁⲗⲡⲓⲍⲉ ⲛⲧⲉⲛⲉⲧⲙⲟⲟⲩⲧ ⲧⲱⲟⲩⲛ ⲉⲩⲟ ⲛⲁⲧⲧⲁⲕⲟ ·
…
50 ⲛⲧⲉⲓϩⲉ ⲟⲛ ⲧⲉϩⲉ ⲛⲣⲱⲙⲉ ⲉⲩⲛⲏⲫⲉ ϩⲛⲧⲉⲥⲡⲟⲩⲇⲏ ⲉⲃⲟⲗ ϩⲓⲧⲛⲧⲁⲓⲥⲑⲏⲥⲓⲥ ·
…
51 ⲙⲛⲧⲙⲛⲧⲙⲁⲓⲛⲟⲩⲧⲉ ⲥⲉⲛⲁⲥⲱⲧⲙ ϩⲛⲟⲩϭⲉⲡⲏ ⲉⲛϣⲁϫⲉ ⲉⲧⲟⲩⲁⲁⲃ ⲛⲧⲉⲡⲉⲛϫⲟⲉⲓⲥ ⲓⲏⲥⲟⲩⲥ ⲉⲃⲟⲗ ϩⲓⲧⲛⲛⲉⲧϯⲥⲃⲱ ⲛⲁⲩ ϩⲛⲧϩⲟⲧⲉ ⲙⲡϫⲟⲉⲓⲥ · ⲁⲩⲱ ⲛⲉⲧⲟⲩⲁⲙⲁϩⲧⲉ ⲙⲙⲟⲟⲩ ⲛⲟⲩⲕⲟⲩⲓ ϩⲓⲧⲛⲧⲃϣⲉ ⲙⲛⲡⲧⲱⲙ ⲛϩⲏⲧ ·
…
52 ⲛⲉⲓⲕⲟⲟⲩⲉ ⲟⲛ ⲉⲩϣⲁⲛϯⲥⲃⲱ ⲛⲁⲩ ⲛⲟⲩⲥⲟⲡ ⲁⲩⲱ ⲥⲛⲁⲩ ⲉⲃⲟⲗ ϩⲛⲛⲉⲅⲣⲁⲫⲏ ϩⲓⲧⲛⲛⲉⲧⲣϩⲙⲙⲉ ⲙⲙⲟⲟⲩ ⲥⲉⲛⲁⲥⲁϩⲱⲟⲩ ⲉⲃⲟⲗ
…