1 ⲉⲓⲙⲉ ϩⲣⲁⲓ ⲛϩⲏⲧⲛ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ϥⲓ ⲡⲣⲟⲟⲩϣ ⲛⲛⲉⲩϣⲏⲣⲉ · ⲙⲛⲛⲉⲩϣⲉⲉⲣⲉ · ⲙⲛⲛⲉⲩⲥⲛⲏⲩ · ⲙⲛⲛⲉⲩⲉⲓⲟⲧⲉ · ⲏ ϭⲉ ⲗⲁⲁⲩ ⲛⲕⲁⲧⲁⲥⲁⲣⲝ ⲛⲧⲁⲩ · ⲛϩⲟⲩⲟ ⲉⲛⲟⲣⲫⲁⲛⲟⲥ ⲙⲛⲛϣⲙⲙⲟ ⲉⲧⲛϩⲏⲧⲛ ·
. . .
2 ⲉⲓⲉ ⲡⲉ … ⲉⲛⲛⲁⲓ ……. ϩⲁ …….. ⲛ ……. ⲛⲁ …. ϣⲱⲡⲉ ⲛⲃⲟⲧⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ·
. . .
3 ⲁⲩⲱ ⲉⲩⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲛⲓⲏⲥⲟⲩⲥ ·
. . .
4 ⲡⲁⲓ ⲉⲛⲧⲁϥⲛ..ⲁ ⲡϣⲙⲙⲟ · ⲙⲛⲡⲣⲙⲛϯⲙⲉ · ⲙⲛⲟⲩⲟⲛ ⲛⲓⲙ ϩⲓⲟⲩⲥⲟⲛ ·
. . .
5 ⲉϣⲱⲡⲉ ⲇⲉ ⲉⲩϭⲟⲗ ⲡⲉ ⲡⲉⲓϣⲁϫⲉ ⲉⲛⲥϣⲟⲟⲡ ⲁⲛ ϩⲣⲁⲓ ⲛϩⲏⲧⲛ ϩⲁϩⲧⲏⲛ · ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ⲛϭⲓⲧⲉⲓⲛⲟϭ ⲛⲃⲟⲧⲉ · ⲉⲙⲛⲗⲁⲁⲩ ϩⲣⲁⲓ ⲛϩⲏⲧⲛ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ·
. . .
6 ⲉⲩϥⲓ ⲙⲡⲣⲟⲟⲩϣ ⲛⲛⲉⲩϣⲏⲣⲉ · ⲙⲛⲛⲉⲩϣⲉⲉⲣⲉ ⲙⲛⲛⲉⲩⲥⲛⲏⲩ ⲙⲛⲛⲉⲩⲥⲱⲛⲉ · ⲙⲛⲛⲉⲩⲉⲓⲟⲧⲉ · ⲏ ϭⲉⲗⲁⲁⲩ ⲛⲕⲁⲧⲁⲥⲁⲣⲝ ⲛⲧⲁⲩ · ⲛϩⲟⲩⲟ ⲉⲛⲟⲣⲫⲁⲛⲟⲥ ⲙⲛϩⲉⲛϣⲙⲙⲟ ⲉⲙⲛⲧⲟⲩⲣⲱⲙⲉ ⲙⲙⲁⲩ · ϩⲣⲁⲓ ⲛϩⲏⲧⲛ ·
. . .
7 ⲉⲓⲉ ⲛⲉⲧϫⲱ ⲛⲛⲁⲓ ϩⲁⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ⲙⲁⲣⲟⲩϣⲱⲡⲉ ⲛⲃⲟⲧⲉ ⲙⲡⲉⲙⲧⲟ ⲉⲃⲟⲗ ⲛⲓⲏⲥⲟⲩⲥ · ⲁⲩⲱ ⲉⲩⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ·
. . .
8 ϫⲉⲁⲩⲣⲛⲟⲃⲉ ϩⲛⲟⲩⲛⲟⲃⲉ ⲉϥⲕⲏⲃ ⲉⲣⲟⲟⲩ · ⲉⲩⲥⲁϩⲟⲩ ⲙⲛⲟⲩⲕⲟⲗⲁⲥⲓⲥ ϣⲁⲉⲛⲉϩ
. . .
9 ϫⲉⲁⲩϫⲱ ⲙⲡⲉⲧⲉⲛϥϣⲟⲟⲡ ⲁⲛ ·
. . .
10 ⲉⲧⲃⲉⲡⲁⲓ ⲙⲡⲱⲣ ⲉⲧⲣⲉⲛⲧⲟⲩⲛⲉⲥⲡϭⲱⲛⲧ ⲙⲡⲛⲟⲩⲧⲉ ⲉϩⲣⲁⲓ ⲉϫⲱⲛ ⲉⲧⲃⲉⲛⲉⲓϩⲃⲏⲩⲉ ⲛⲧⲉⲓⲙⲓⲛⲉ ⲉⲧⲣⲉⲧⲛϣⲓⲃⲉ ⲛⲛⲉⲧⲛⲕⲁⲧⲁⲥⲁⲣⲝ ⲛⲧⲉⲧⲏⲩⲧⲛ ⲉⲛⲉⲧⲉⲙⲛⲧⲟⲩⲣⲱⲙⲉ ⲙⲙⲁⲩ ϩⲣⲁⲓ ⲛϩⲏⲧⲛ
. . .
11 ⲏ ⲉⲧⲣⲉⲧⲉⲧⲛϫⲱ ⲙⲡⲉⲧⲉ..ϣⲟⲟⲡ ⲁⲛ ⲉⲧⲉⲧⲛϫⲓϭⲟⲗ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ
. . .
12 ⲉ…… ⲙⲙⲟ….. ⲕⲁⲥⲕ.. ⲥⲁⲟⲩⲥⲁ ⲛϫⲓⲟⲩⲉ ⲉⲛⲉⲧⲛⲉⲣⲏⲩ
. . .
13 ϫⲉⲡⲉⲧⲉⲟⲩⲛⲧϥⲣⲱⲙⲉ ⲙⲙⲁⲩ ϩⲙⲡⲉⲓⲙⲁ ⲛⲧⲟϥ ⲡⲉⲧⲟⲩϥⲓ ⲙⲡⲉϥⲣⲟⲟⲩϣ ·
. . .
14 ⲏ ⲛⲧⲟϥ ⲡⲉⲧⲟⲩⲛⲁϥⲓ ⲡⲉϥⲣⲟⲟⲩϣ ·
. . .
15 ⲙⲏ ⲙⲡⲉⲓϫⲟⲟⲥ ⲣⲱ ⲛϩⲁϩ ⲛⲥⲟⲡⲟⲛ ϩⲁϩⲧⲏⲛ ⲉⲛⲥⲟⲟⲩϩ ⲉϩⲟⲩⲛ ϫⲉⲛⲉⲧⲛⲁⲛⲁⲩ ⲉⲩϫⲓ ⲛϭⲟⲛⲥ ⲏ ϭⲉ ⲗⲁⲁⲩ ⲛϩⲱⲃ ⲉϥϩⲟⲟⲩ ⲉⲡⲧⲏⲣϥ
. . .
16 ⲛϥⲧⲙⲧⲁⲙⲟⲓ
. . .
17 ⲡⲉϥⲥⲛⲟϥ ⲉϥⲉϣⲱⲡⲉ ⲉϩⲣⲁⲓ ⲉϫⲱϥ ·
. . .
18 ⲁⲩⲱ ⲛⲧⲱⲧⲛ ϩⲱⲧⲧⲏⲩⲧⲛ ⲁⲓϫⲟⲟⲥ ⲛⲏⲧⲛ ϩⲛⲧⲁⲧⲁⲡⲣⲟ ϩⲙⲡⲧⲣⲁⲉⲓ ϣⲁⲣⲱⲧⲛ ⲛϣⲟⲙⲛⲧ ⲛⲥⲟⲡ ⲉⲧⲃⲉⲙⲡⲉⲓⲣⲁⲥⲙⲟⲥ ⲉⲛⲧⲁϥⲉⲓ ⲉϩⲣⲁⲓ ⲉϫⲱⲛ ⲉⲓϫⲱ ⲙⲙⲟⲥ ⲛⲏⲧⲛ ⲉⲧⲉⲧⲛⲥⲱⲧⲙ ⲧⲏⲣⲧⲛ ·
. . .
19 ϫⲉⲛⲉⲧⲛⲁⲛⲁⲩ ⲉⲩϫⲓ ⲛϭⲟⲛⲥ ⲏ ϭⲉ ⲗⲁⲁⲩ ⲛϩⲱⲃ ⲉϥϩⲟⲟⲩ ⲉⲡⲧⲏⲣϥ ·
. . .
20 ⲁⲩⲱ ⲛϥⲧⲙⲧⲛⲛⲟⲟⲩ ⲛⲁⲓ ·
. . .
21 ⲡⲉϥⲥⲛⲟϥ ⲉϥⲉϣⲱⲡⲉ ⲉϩⲣⲁⲓ ⲉϫⲱϥ ·
. . .
22 ⲁⲩⲱ ⲟⲛ ϩⲛⲧϣⲟⲣⲡ ⲛⲉⲡⲓⲥⲧⲟⲗⲏ ·
. . .
23 ⲁⲓⲥϩⲁⲓ ⲛⲏⲧⲛ ⲉⲓϫⲱ ⲙⲙⲟⲥ ⲛⲧⲉⲓϩⲉ ·
. . .
24 ϫⲉⲛⲉⲧⲛⲁⲛⲁⲩ ⲉⲗⲁⲁⲩ ⲛϩⲱⲃ ⲉϥϩⲟⲟⲩ ϩⲣⲁⲓ ⲛϩⲏⲧⲛ ϩⲁϩⲧⲏⲛ · ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ .
. . .
25 ⲛϥⲧⲙϫⲟⲟⲥ ⲛⲁⲓ
. . .
26 ⲡⲉϥⲥⲛⲟϥ ⲉϥⲉⲉⲓ ⲉϩⲣⲁⲓ ⲉϫⲱϥ ·
. . .
27 ⲁⲩⲱ ϭⲉ ⲁϩⲣⲱⲧⲛ ⲧⲉⲧⲛϣⲁϫⲉ ⲛϫⲓⲟⲩⲉ ⲛⲥⲁⲛⲉⲧⲛⲉⲣⲏⲩ ϩⲛϩⲉⲛⲕⲁⲥⲕⲥ · ⲏ ϩⲛⲟⲩⲱⲛϩ ⲉⲃⲟⲗ ·
. . .
28 ⲉⲧⲉⲧⲛⲛⲟϭⲛⲉϭ ⲛⲛⲉⲧⲛⲉⲣⲏⲩ ⲉⲡϫⲓⲛϫⲏ ·
. . .
29 ⲉϣϫⲉ ⲟⲩⲛϩⲟⲓⲛⲉ ϩⲣⲁⲓ ⲛϩⲏⲧⲧⲏⲩⲧⲛ ⲉϥⲛⲁⲩ ⲉⲗⲁⲁⲩ ⲛϩⲱⲃ ⲉϥϩⲟⲟⲩ ϩⲣⲁⲓ ⲛϩⲏⲧⲛ ⲉⲧⲃⲉⲟⲩ ⲙⲡⲉⲧⲛϫⲟⲟⲥ ⲛⲁⲓ ·
. . .
30 ⲉⲧⲃⲉⲟⲩ ⲉⲧⲉⲧⲛⲉⲓⲛⲉ ⲉϩⲣⲁⲓ ⲉϫⲱⲧⲛ ⲛⲟⲩⲥⲛⲟϥ ⲙⲛⲟⲩϩⲁⲡ ⲛϣⲁⲉⲛⲉϩ ·
. . .
31 ⲁⲩⲱ ⲉϣϫⲉ ⲛⲉⲓϣⲁϫⲉ ⲙⲡⲟⲛⲏⲣⲟⲛ ϣⲟⲟⲡ ⲛⲁⲙⲉ ϩⲣⲁⲓ ⲛϩⲏⲧⲛ ⲡⲁⲓ ⲉⲧⲉⲧⲛϫⲱ ⲙⲙⲟϥ ⲛϫⲓⲟⲩⲉ . ⲏ ϩⲛⲟⲩⲱⲛϩ ⲉⲃⲟⲗ · ϫⲉⲛⲉⲧⲉⲟⲩⲛⲧⲟⲩⲣⲱⲙⲉ ⲙⲙⲁⲩ ϩⲙⲡⲉⲓⲙⲁ ·
. . .
32 ⲛⲧⲟⲟⲩ ⲛⲉⲧⲟⲩⲛⲁϥⲓ ⲡⲉⲩⲣⲟⲟⲩϣ · ⲏ ⲛⲧⲟⲟⲩⲛ ⲉⲧⲟⲩϥⲓ ⲙⲡⲉⲩⲣⲟⲟⲩϣ ·
. . .
33 ⲛϣⲙⲙⲟ ⲇⲉ ⲙⲛⲛⲟⲣⲫⲁⲛⲟⲥ · ⲛⲥⲉϭⲱϣⲧ ⲛⲥⲱⲟⲩ ⲁⲛ ϩⲙⲡⲉⲓⲙⲁ ϫⲉⲙⲛⲧⲟⲩ ⲣⲱ ⲙⲙⲁⲩ ·
. . .
34 ⲁⲩⲱ ϭⲉ ⲉϣϫⲉ ⲧⲉⲓⲛⲟϭ ⲛⲃⲟⲧⲉϣⲟⲟⲡ ϩⲣⲁⲓ ⲛϩⲏⲧⲛ · ⲉⲓⲉ ⲉⲧⲃⲉⲟⲩ ⲙⲡⲉⲧⲛⲧⲁⲙⲟⲓ ϫⲉⲉⲓⲉⲉⲓⲙⲉ ·
. . .
35 ⲉⲧⲃⲉⲟⲩ ⲉⲧⲉⲧⲛⲉⲓⲛⲉ ⲉϩⲣⲁⲓ ⲉϫⲱⲧⲛ ⲛⲟⲩⲥⲛⲟϥ ⲙⲛⲟⲩϩⲁⲡ ϣⲁⲉⲛⲉϩ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲙⲡⲁⲛⲧⲟⲕⲣⲁⲧⲱⲣ ·
. . .
36 ⲉϣϫⲉ ϩⲉⲛϭⲟⲗ ⲇⲉ ⲛⲉ ⲛϣⲁϫⲉ ⲉⲧⲉⲧⲛϫⲱ ⲙⲙⲟⲟⲩ
. . .
37 ⲛϫⲓⲟⲩⲉ ϫⲉⲛⲉⲧⲉⲟⲩⲛⲧⲟⲩⲣⲱⲙⲉ ⲙⲙⲁⲩ ϩⲣⲁⲓ ⲛϩⲏⲧⲛ ⲛⲧⲟⲟⲩ ⲛⲉⲧⲟⲩⲛⲁϥⲓ ⲡⲉⲩⲣⲟⲟⲩϣ · ⲏ ⲛⲧⲟⲟⲩ ⲛⲉⲧⲟⲩϥⲓ ⲙⲡⲉⲩⲣⲟⲟⲩϣ ·
. . .
38 ⲉⲓⲉ ⲉⲧⲃⲉⲟⲩ ⲉⲧⲉⲧⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲧⲉⲧⲛϫⲱ ⲙⲡⲉⲧⲉⲛϥϣⲟⲟⲡ ⲁⲛ ·
. . .
39 ⲉⲧⲉⲧⲛⲥⲱⲟⲩϩ ⲛⲏⲧⲛ ⲉϩⲟⲩⲛ ⲛⲟⲩϩⲁⲡ ϣⲁⲉⲛⲉϩ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲉⲧⲛⲁⲕⲣⲓⲛⲉ ⲙⲡⲧⲏⲣϥ ·
. . .
40 ⲉϣϫⲉ ⲁⲛⲟⲕ ⲣⲱ ⲡⲉ . ⲏ ⲉϣϫⲉ ⲡϩⲗⲗⲟ ⲡⲉ ⲉⲛⲉⲓⲣⲉ ⲛⲧⲉⲓⲛⲟϭ ⲛⲃⲟⲧⲉ ϩⲣⲁⲓ ϩⲛⲛⲥⲩⲛⲁⲅⲱⲅⲏ ⲙⲡϫⲟⲉⲓⲥ ⲉⲧⲉⲧⲛⲕⲁⲧⲁⲗⲁⲗⲉⲓ ⲛⲥⲱⲛ ⲛϫⲓⲟⲩⲉ ϫⲉⲛⲥⲉϭⲱϣⲧ ⲁⲛ ⲛⲥⲁⲗⲁⲁⲩ ⲉⲓⲙⲏⲧⲓ ⲉⲛⲉⲧⲉⲟⲩⲛⲧⲟⲩⲣⲱⲙⲉ ⲙⲙⲁⲩ · ⲏ ϫⲉⲟⲩⲧⲉ ⲣⲱ ⲛⲥⲉϭⲱϣⲧ ⲁⲛ ⲛⲥⲁⲗⲁⲁⲩ ϩⲛⲟⲩⲥⲟⲟⲩⲧⲛ . ⲉⲓⲉ ⲛⲧⲉⲧⲛϩⲉⲛⲣⲉϥⲕⲁⲧⲁⲫⲣⲟⲛⲉⲓ ⲛϩⲟⲩⲟ ⲉⲣⲟⲛ ·
. . .
41 ϫⲉⲥⲟⲡ ⲙⲉⲛ ⲧⲉⲧⲛⲙⲁⲕⲁⲣⲓⲍⲉ ⲙⲙⲟⲛ · ⲥⲟⲡ ⲇⲉ ⲟⲛ ⲧⲉⲧⲛⲥⲱϣϥ ⲙⲙⲟⲛ ⲉⲙⲁⲧⲉ ⲛϫⲓⲟⲩⲉ ⲛⲥⲁⲟⲩⲥⲁ ⲙⲁⲩⲁⲧⲧⲏⲩⲧⲛ ·
. . .
42 ⲁⲩⲱ ⲙⲡⲉⲛⲉⲛⲧⲁⲛⲃⲟⲟⲣⲟⲩ ϩⲛⲟⲩⲑⲙⲕⲟ ϩⲣⲁⲓ ⲛϩⲏⲧⲛ ϫⲟⲟⲥ ⲛⲁⲛ ϫⲉⲉⲛⲧⲁⲛϫⲓⲧⲟⲩ ⲛϭⲟⲛⲥ ϩⲛⲟⲩ · ⲏ ϫⲉⲉⲛⲧⲁⲛⲕⲁⲧⲁⲫⲣⲟⲛⲉⲓ ⲙⲙⲟⲟⲩ ϩⲛⲟⲩ · ϫⲉⲕⲁⲥ ϩⲱⲱⲛ ⲉⲛⲛⲁⲣϩⲙϩⲁⲗ ⲙⲡⲉⲛⲛⲟⲃⲉ · ϫⲉⲁⲛⲟⲛ ϩⲉⲛⲧⲁⲗⲁⲓⲡⲱⲣⲟⲥ ⲛⲉⲃⲓⲏⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ · ϫⲉⲙⲡⲁⲓ ϩⲙⲡⲉⲛϩⲏⲧ ⲁⲛ ϩⲟⲗⲱⲥ ϩⲟⲗⲱⲥ ·
. . .
43 ⲉϣϫⲉ ⲉⲛⲟ ⲛϫⲟⲉⲓⲥ ⲉⲩϣⲏⲣⲉ ϣⲏⲙ ⲏ ⲉⲩϣⲉⲉⲣⲉ ϣⲏⲙ ϩⲛⲟⲩϩⲧⲟⲣ ϩⲣⲁⲓ ⲛϩⲏⲧⲛ · ⲙⲁⲗⲓⲥⲧⲁ ⲇⲉ ⲟⲩⲛⲟϭ ⲛⲣⲱⲙⲉ ⲙⲛⲟⲩⲛⲟϭ ⲛⲥϩⲓⲙⲉ ·
. . .
44 ϩⲱⲥ ⲉϣϫⲉ ⲉⲛⲭⲣⲱ ⲛⲁⲩ ϩⲛⲟⲩⲉⲝⲟⲩⲥⲓⲁ ⲛⲛⲉⲡⲛⲟⲩⲧⲉ ϫⲟⲟϥ ·
. . .
45 ⲁⲗⲗⲁ ⲡⲁⲓ ⲙⲙⲁⲧⲉ ⲡⲉⲧⲕⲟⲗⲁⲍⲉ ⲙⲙⲟⲛ ϩⲙⲡⲉⲛϩⲏⲧ ⲉⲧⲣⲉⲛⲣϩⲙϩⲁⲗ ⲛⲛⲉⲛⲉⲣⲏⲩ · ⲕⲁⲧⲁⲧⲉⲛⲧⲟⲗⲏ ⲙⲡⲁⲡⲟⲥⲧⲟⲗⲟⲥ · ϫⲉϩⲛⲧⲁⲅⲁⲡⲏ ⲙⲡⲉⲛⲛⲁ ⲁⲣⲓϩⲙϩⲁⲗ ⲛⲛⲉⲧⲛⲉⲣⲏⲩ ·
. . .
46 ⲁⲩⲱ ⲧⲁⲓ ⲧⲉ ⲧϩⲉ ⲉⲧⲉϩⲛⲁⲛ ⲁⲛ ⲉⲑⲙⲕⲉⲗⲁⲁⲩ · ⲏ ⲉⲗⲩⲡⲉⲓ ⲛⲗⲁⲁⲩ ϩⲁϩⲧⲏⲛ · ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ·
. . .
47 ⲉⲓⲙⲏⲧⲓ ⲛⲉⲧⲛⲁϯϭⲱⲛⲧ ⲙⲡⲛⲟⲩⲧⲉ ϩⲛⲧⲉⲩⲙⲛⲧⲁⲧⲥⲱⲧⲙ ⲙⲛⲧⲉⲩⲙⲛⲧⲁⲧⲥⲃⲱ ⲉⲧⲣⲉⲩϯⲧⲱⲛ ⲉϩⲟⲩⲛ ⲉϩⲣⲁϥ ⲙⲡⲛⲟⲙⲟⲥ ⲙⲡϫⲟⲉⲓⲥ ⲙⲛⲛⲉϥⲉⲛⲧⲟⲗⲏ ⲉⲧⲣⲉⲩϫⲱⲕ ⲉⲃⲟⲗ ⲛⲛⲉⲩⲟⲩⲱϣ ⲛϩⲏⲧ ⲉⲧϩⲟⲟⲩ · ϩⲛϩⲉⲛϩⲃⲏⲩⲉ ⲙⲡⲟⲛⲏⲣⲟⲛ ·
. . .
48 ⲛⲁⲓ ⲛⲧⲉⲓⲙⲓⲛⲉ · ⲛⲥⲉⲛⲁϫⲓⲧⲱⲧ ⲛϩⲏⲧ ⲁⲛ ⲉⲩⲛϩⲉⲛⲕⲟⲟⲩⲉ ⲗⲩⲡⲉⲓ ϩⲛϩⲉⲛⲁϣⲁϩⲟⲙ · ⲉⲧⲃⲏⲏⲧⲟⲩ ·
. . .
49 ⲟⲩⲇⲉ ⲛⲥⲉⲛⲁⲛⲁⲩ ⲁⲛ ⲉⲣⲁϣⲉ ⲛⲧⲉⲡⲛⲟⲩⲧⲉ · ⲉⲩⲛϩⲉⲛⲕⲟⲟⲩⲉ ⲙⲟⲕϩ ⲛϩⲏⲧ ϩⲛⲟⲩⲑⲙⲕⲟ ⲉⲛⲁϣⲱϥ ⲉⲧⲃⲏⲏⲧⲟⲩ ·
. . .
50 ⲁⲩⲱ ⲕⲁⲧⲁⲧϩⲉ ⲉⲧⲉⲙⲛϭⲟⲙ ⲉⲧⲣⲉⲟⲩⲣⲱⲙⲉ ⲛⲇⲓⲕⲁⲓⲟⲥ ⲉϥϩⲁⲣⲉϩ ⲉⲡⲛⲟⲙⲟⲥ ⲙⲡϫⲟⲉⲓⲥ ϫⲓⲧⲱⲧ ⲛϩⲏⲧ ⲉⲃⲟⲗ ϩⲓⲧⲟⲟⲧⲟⲩ ⲛϩⲉⲛⲣⲱⲙⲉ ⲛⲣⲉϥⲣⲛⲟⲃⲉ ⲉⲩⲡⲁⲣⲁⲃⲁ ⲙⲡⲛⲟⲙⲟⲥ ⲙⲡϫⲟⲉⲓⲥ ·
. . .
51 ⲟⲩⲧⲉ ⲛⲧⲟⲟⲩ ϩⲱⲟⲩ ⲟⲛ ⲛⲉⲧⲡⲁⲣⲁⲃⲁ ⲙⲛϭⲟⲙ ⲉⲧⲣⲉⲩϫⲓⲧⲱⲧ ⲛϩⲏⲧ ⲉⲃⲟⲗ ϩⲓⲧⲟⲟⲧϥ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ⲉϥϩⲁⲣⲉϩ ϩⲉⲛⲛⲟⲙⲟⲥ ·
. . .
52 ⲧⲁⲓ ⲟⲛ ⲧⲉ ⲧϩⲉ ⲁⲛⲟⲛ ⲧⲏⲣⲛ ⲙⲛϭⲟⲙ ⲉⲛⲉϩ ⲉⲧⲣⲉⲡⲛⲟⲩⲧⲉ ⲙⲛⲡⲉϥⲭⲣⲓⲥⲧⲟⲥ ⲓⲏⲥⲟⲩⲥ · ⲙⲛⲛⲉϥⲁⲅⲅⲉⲗⲟⲥ ⲙⲛⲛⲉϥⲡⲉⲧⲟⲩⲁⲁⲃ ⲧⲏⲣⲟⲩ ⲧⲱⲧ ⲛϩⲏⲧ ⲉϩⲣⲁⲓ ⲉϫⲱⲛ ⲉⲛϣⲁⲛⲡⲁⲣⲁⲃⲁ ⲛⲛϣⲁϫⲉ ⲛⲛⲉⲅⲣⲁⲫⲏ · ⲙⲛⲛⲉϥⲉⲛⲧⲟⲗⲏ ⲧⲏⲣⲟⲩ ·
. . .
53 ⲟⲩⲇⲉ ⲁⲛⲟⲛ ϩⲱⲱⲛ ⲟⲛ ⲉⲛϣⲁⲛⲟⲩⲱϣ ⲉϫⲛⲛⲉⲛⲛⲟⲃⲉ ⲛⲟⲩⲟⲉⲓϣ ⲛⲓⲙ · ⲙⲛϭⲟⲙ ⲉⲧⲣⲉⲛϫⲓⲧⲱⲧ ⲛϩⲏⲧ ⲉⲛⲉϩ ⲉⲃⲟⲗ ϩⲓⲧⲙⲡⲛⲟⲩⲧⲉ ·
. . .
54 ⲉⲣⲉⲡⲛⲟⲩⲧⲉⲙⲛⲡⲉϥⲭⲣⲓⲥⲧⲟⲥ ⲓⲏⲥⲟⲩⲥ · ⲙⲛⲛⲉϥⲁⲅⲅⲉⲗⲟⲥ ⲙⲛⲛⲉⲧⲉⲛⲟⲩϥ ⲧⲏⲣⲟⲩ ⲛⲉ ⲙⲟⲕϩ ⲛϩⲏⲧ ⲉϩⲣⲁⲓ ⲉϫⲱⲛ ·
. . .
55 ⲉϣϫⲉ ⲟⲩⲛϩⲟⲓⲛⲉ ⲇⲉ ϩⲣⲁⲓ ⲛϩⲏⲧⲛ ⲉⲩⲣⲁϣⲉ ⲛⲛⲟⲩϫ ⲉⲩⲛ ϩⲣⲁⲓ ϩⲛⲛⲉⲩⲙⲛⲧϣⲁϥⲧⲉ · ⲉⲣⲉⲡϫⲟⲉⲓⲥ ⲓⲏⲥⲟⲩⲥ ⲙⲛⲛⲉϥⲁⲅⲅⲉⲗⲟⲥ ⲙⲟⲕϩ ⲛϩⲏⲧ ⲉϩⲣⲁⲓ ⲉϫⲱⲟⲩ ⲉⲩϣⲟⲟⲡ ϩⲛⲛⲉⲩⲡⲁⲣⲁⲃⲁⲥⲓⲥ ·
. . .
56 ⲉⲓⲉ ⲛⲁⲓ ⲛⲁⲙⲉ ⲛⲉ ⲛⲣⲉϥⲣⲛⲟⲃⲉ ⲉⲧⲣⲟⲟⲩⲧ ⲉⲩϭⲟⲟⲗⲉ ⲙⲡⲉⲩϫⲓⲛϭⲟⲛⲥ ⲙⲛⲧⲉⲩⲙⲛⲧϣⲁϥⲧⲉ ·
. . .
57 ⲉⲧⲃⲉⲡⲁⲓ̈ ⲙⲡⲱⲣ ⲉⲧⲣⲉⲩⲁⲡⲁⲧⲁ ⲛϩⲟⲓⲛⲉ ϩⲣⲁⲓ ⲛϩⲏⲧⲛ ⲉⲧⲣⲉⲩⲣⲁϣⲉ ϩⲛⲟⲩⲙⲛⲧⲛⲟⲩϫ ϩⲣⲁⲓ ϩⲛⲛⲉⲩⲙⲛⲧϣⲁϥⲧⲉ · ⲉⲩⲥⲱⲧⲙ ⲉϩⲉⲛϣⲁϫⲉ ⲉⲩⲥⲏϩ ϩⲛϩⲉⲛⲙⲁ ⲉⲩⲏⲡ ⲉϩⲟⲩⲛⲁⲛ ⲉⲛⲉⲅⲣⲁⲫⲏ ⲛⲕⲁⲑⲟⲗⲓⲕⲟⲛ ⲛⲧⲕⲁⲑⲟⲗⲓⲕⲏ ⲉⲕⲕⲗⲏⲥⲓⲁ ·
. . .
58 ⲁⲗⲗⲁ ⲉⲩϣⲟⲟⲡ ⲉⲧⲣⲉⲩⲟϣⲟⲩ ⲛⲧⲉⲓϩⲉ ⲛϩⲉⲛⲟⲩⲟⲉⲓϣ ⲉⲧⲣⲉⲩⲇⲟⲕⲓⲙⲁⲍⲉ ⲛⲛⲉⲧⲣⲛⲟϥⲣⲉ ⲛϩⲏⲧⲟⲩ ⲛⲥⲉⲁⲁⲩ ·
. . .
59 ⲛⲕⲟⲟⲩⲉ ⲇⲉ ⲉⲧⲉⲛⲥⲉⲣⲛⲟϥⲣⲉ ⲁⲛ ⲛⲥⲉⲗⲟ ϩⲁⲣⲟⲟⲩ ⲛⲧϩⲉ ⲉⲧⲟⲩⲟ ⲙⲙⲟⲥ ·
. . .
60 ⲉⲧⲃⲉⲡⲁⲓ ⲙⲡⲱⲣ ⲉⲧⲣⲉⲩⲁⲡⲁⲧⲁ ⲛϩⲟⲓⲛⲉ ϩⲣⲁⲓ ⲛϩⲏⲧⲛ ⲉⲧⲣⲉⲩⲣⲁϣⲉ ϩⲛⲟⲩⲙⲛⲧⲛⲟⲩϫ ϩⲣⲁⲓ ϩⲛⲛⲉⲩⲛⲟⲃⲉ · ⲉⲩⲥⲱⲧⲙ ⲉϩⲉⲛϣⲁϫⲉ ⲉⲩⲥⲏϩ ϩⲛϩⲉⲛⲙⲁ ⲉⲩϫⲱ ⲙⲙⲟⲥ ·
. . .
61 ϫⲉⲧⲗⲩⲡⲏ ⲙⲡⲣⲧⲣⲉⲥϭⲙⲙⲁ ϩⲣⲁⲓ ⲛϩⲏⲧⲧⲏⲩⲧⲛ ⲉⲧⲣⲉⲧⲛⲗⲩⲡⲉⲓ ⲉⲡⲧⲏⲣϥ ·
. . .
62 ⲉⲧⲃⲉⲡⲁⲓ ⲛⲥⲉⲣⲟⲛ ⲁⲛ ⲉⲧⲣⲉⲛⲟϣⲟⲩ ϩⲛⲟⲩϩⲧⲟⲣ ⲉⲓⲙⲏⲧⲓ ⲧⲉⲛⲡⲣⲟϩⲁⲓⲣⲉⲥⲓⲥ ⲙⲁⲩⲁⲁⲛ ⲉⲧⲣⲉⲛⲟϣⲟⲩ ·
. . .
63 ⲁⲩⲱ ⲛⲧⲛⲥⲱⲧⲙ ⲉⲣⲟⲟⲩ ⲛϩⲉⲛⲥⲟⲡⲥⲟⲡ ·
. . .
64 ⲁⲗⲗⲁ ⲥⲉⲣⲟⲛ ⲛⲧⲟϥ ⲛϩⲟⲩⲟ ϩⲛⲟⲩϩⲧⲟⲣ ⲉⲛⲁϣⲱϥ ⲉⲙⲁⲧⲉ ⲉⲙⲁⲧⲉ ⲉⲧⲣⲉⲛⲱϣ ⲙⲛⲛⲟⲙⲟⲥ ⲧⲏⲣⲟⲩ ⲙⲛⲛⲉⲡⲣⲟⲫⲏⲧⲏⲥ · ⲙⲛⲛⲁⲡⲟⲥⲧⲟⲗⲟⲥ · ⲙⲛⲛⲉⲅⲣⲁⲫⲏ ⲛⲛⲉⲧⲟⲩⲁⲁⲃ ⲧⲏⲣⲟⲩ ·
. . .
65 ⲁⲩⲱ ⲥⲉⲣⲟⲛ ⲉⲧⲣⲉⲛⲙⲉⲗⲉⲧⲁ ⲙⲙⲟⲟⲩ ⲙⲡⲉϩⲟⲟⲩ ⲙⲛⲧⲉⲩϣⲏ ⲛⲟⲩⲟⲉⲓϣ ⲛⲓⲙ · ⲁⲩⲱ ⲛⲛⲁⲩ ⲛⲓⲙ ⲁⲩⲱ ⲙⲙⲏⲛⲉ ⲙⲙⲏⲛⲉ ·
. . .
66 ⲉⲃⲟⲗ ϫⲉⲡϫⲱⲕ ⲧⲏⲣϥ ⲛⲧⲙⲛⲧⲛⲟⲩⲧⲉ ϩⲣⲁⲓ ⲛϩⲏⲧⲟⲩ ⲉϥϫⲏⲕ ⲉⲃⲟⲗ ·
…
67 ⲉⲧⲃⲉⲡⲁⲓ ϣϣⲉ ⲉⲣⲟⲛ ⲉⲧⲣⲉⲛⲱϣ · ⲁⲩⲱ ⲉⲧⲣⲉⲛⲙⲉⲗⲉⲧⲁ ⲛⲛⲁⲩ ⲛⲓⲙ ⲁⲩⲱ ⲛⲟⲩⲟⲉⲓϣ ⲛⲓⲙ ⲛⲛϣⲁϫⲉ ⲛⲛⲉⲅⲣⲁⲫⲏ ⲛⲕⲁⲑⲟⲗⲓⲕⲟⲛ ⲛⲧⲕⲁⲑⲟⲗⲓⲕⲏ ⲉⲕⲕⲗⲏⲥⲓⲁ ·
. . .
68 ϫⲉⲕⲁⲥ ⲉⲛⲉⲉⲓⲙⲉ ⲛⲧϩⲉ ⲉⲛⲧⲁⲛⲃⲁⲗ ⲛⲛⲉⲡⲣⲟⲫⲏⲧⲏⲥ ⲙⲛⲛⲁⲡⲟⲥⲧⲟⲗⲟⲥ ⲱϫⲛ ϩⲛϩⲉⲛⲣⲙⲉⲓⲟⲟⲩⲉ · ⲁⲩⲱ ⲛⲧⲛⲁⲓⲥⲑⲁⲛⲉ ⲛⲧⲛⲙⲉⲧⲁⲛⲟⲉⲓ ⲉϩⲣⲁⲓ ⲉϫⲛⲛⲉⲛⲛⲟⲃⲉ ·
. . .
69 ⲛϫⲱⲱⲙⲉ ⲇⲉ ⲛⲧⲟϥ ⲉⲧⲟ ⲛϩⲟⲩⲟ · ⲛⲁⲓ ⲉⲧⲏⲡ ⲁⲛ ⲉϩⲟⲩⲛ ⲉⲛⲉⲅⲣⲁⲫⲏ ⲉⲧⲣⲉⲛϫⲓⲧⲟⲩ ⲁⲛ ⲛⲁⲡⲟⲥⲧⲏⲑⲟⲩⲥ ⲉⲧⲣⲉⲛⲙⲉⲗⲉⲧⲁ ⲙⲙⲟⲟⲩ ⲛⲛⲁⲩ ⲛⲓⲙ · ⲁⲗⲗⲁ ⲉⲧⲣⲉⲛⲟϣⲟⲩ ⲛϩⲉⲛⲥⲟⲡⲥⲟⲡ ⲉϣⲱⲡⲉ ⲉϩⲛⲁⲛ ·
. . .
70 ⲁⲗⲗⲁ ⲙⲟⲛⲟⲛ ⲉⲛⲱϣϫⲱⲱⲙⲉ ⲁⲛ ⲛⲁⲡⲟⲕⲣⲩⲫⲟⲛ ⲉⲡⲧⲏⲣϥ · ⲕⲁⲧⲁⲧϩⲉ ⲉⲛⲧⲁⲩϩⲱⲛ ⲉⲧⲟⲟⲧⲛ ⲛϭⲓⲛⲉⲛⲧⲁⲩⲇⲟⲕⲓⲙⲁⲍⲉ ⲛⲛⲉⲧⲣⲛⲟϥⲣⲉ ·
. . .
71 ⲉⲧⲃⲉⲡⲁⲓ ⲟⲩ ⲙⲟⲛⲟⲛ ϫⲉϣϣⲉ ⲁⲛ ⲉⲱϣ ⲉⲡⲧⲏⲣϥ ⲛϩⲉⲛϫⲱⲱⲙⲉ ⲉⲩϩⲏⲡ ·
. . .
72 ⲁⲗⲗⲁ ⲟⲩ ⲇⲉ ⲟⲛ ϩⲉⲛϫⲱⲱⲙⲉ ⲉⲁϩⲉⲛⲕⲟⲟⲩⲉⲥⲁϩⲟⲩ ϩⲱⲥ ⲕⲁⲑⲏⲅⲏⲥⲓⲥ ·
. . .
73 ⲁⲩⲱ ⲉⲩⲛ ϩⲣⲁⲓ ⲛϩⲏⲧⲟⲩ ⲛϭⲓϩⲉⲛϣⲁϫⲉ ⲉⲁⲩϥⲓⲧⲟⲩ ϩⲣⲁⲓ ϩⲛϩⲉⲛϫⲱⲱⲙⲉ ⲉⲩϩⲏⲡ ⲉⲁⲩⲥⲁϩⲟⲩ ⲉϩⲣⲁⲓ ⲉϩⲉⲛⲉⲡⲓⲥⲧⲟⲗⲏ ⲛϫⲱⲱⲙⲉ ϩⲱⲥ ⲕⲁⲑⲏⲅⲉⲓ
. . .
74 ⲁⲩⲱ ⲛⲉⲓⲕⲟⲟⲩⲉ ⲟⲛ ⲛϣϣⲉ ⲁⲛ ⲉⲧⲣⲉⲩⲟϣⲟⲩ ⲉⲡⲧⲏⲣϥ ⲛϭⲓⲛⲉⲛⲧⲁⲩⲡⲁⲓⲇⲉⲩⲉ ϩⲣⲁⲓ ϩⲛⲛⲉⲅⲣⲁⲫⲏ ⲉⲧⲟⲩⲁⲁⲃ ·
. . .
75 ⲉⲧⲃⲉⲡⲁⲓ ⲥⲉⲣⲱϣⲉ ⲉⲣⲟⲛ ⲛϭⲓⲛⲉⲅⲣⲁⲫⲏ ⲛⲕⲁⲑⲟⲗⲓⲕⲟⲛ . ⲉⲧⲣⲉⲛⲱϣ ϩⲣⲁⲓ ⲛϩⲏⲧⲟⲩ · ⲉⲧⲣⲉⲛⲉⲓⲙⲉ ⲉⲛⲉⲧⲣⲛⲟϥⲣⲉ ·
. . .
76 ⲁⲩⲱ ⲥⲉⲣⲱϣⲉ ⲉⲣⲟⲛ ⲟⲛ ⲛϭⲓⲛϫⲱⲱⲙⲉ ⲙⲡⲉⲛⲉⲓⲱⲧ ⲁⲑⲁⲛⲁⲥⲓⲟⲥ ⲛⲁⲣⲭⲓⲉⲡⲓⲥⲕⲟⲡⲟⲥ ⲉⲧⲟⲩⲁⲁⲃ . ⲉⲧⲣⲉⲛⲱϣ ϩⲣⲁⲓ ⲛϩⲏⲧⲟⲩ ⲛⲛⲁⲩ ⲛⲓⲙ ·
. . .
77 ⲁⲩⲱ ⲥⲉⲣⲱϣⲉ ⲟⲛ ⲉⲣⲟⲛ ⲉⲧⲣⲉⲛⲱϣ ϩⲣⲁⲓ ⲛϩⲏⲧⲟⲩ ⲛϭⲓⲛϫⲱⲱⲙⲉ ⲛⲛⲕⲟⲟⲩⲉ ⲧⲏⲣⲟⲩ ⲉⲧⲉⲓⲛⲉ ⲙⲡⲉⲛⲉⲓⲱⲧ ⲁⲑⲁⲛⲁⲥⲓⲟⲥ ⲡⲣⲱⲙⲉ ⲙⲡⲛⲟⲩⲧⲉ ⲛⲁⲓ ⲛⲧⲁⲩⲇⲟⲕⲓⲙⲁⲍⲉ ⲛϣⲟⲣⲡ ⲛⲛⲉⲩϣⲁϫⲉ ⲧⲏⲣⲟⲩ ⲉⲛⲧⲁⲩⲥϩⲁⲓ ⲥⲟⲩⲛ ⲁⲛ ϩⲛⲟⲩⲙⲛⲧⲙⲉ ϩⲙⲡⲟⲩⲟⲉⲓⲛ ⲛⲛⲉⲅⲣⲁⲫⲏ ⲉⲧⲣⲉⲛⲟⲩϫⲁⲓ ϩⲣⲁⲓ ϩⲛⲧⲉⲩⲥⲃⲱ ⲉⲧⲟⲩⲟϫ
. . .
78 ⲡⲗⲏⲛ ϯⲥⲟⲟⲩⲛ ϩⲱⲱⲧ ϫⲉϣϣⲉ ⲉⲣⲁϣⲉ ϩⲙⲡϫⲟⲉⲓⲥ ⲛⲟⲩⲟⲉⲓϣ ⲛⲓⲙ ⲕⲁⲧⲁⲧϩⲉ ⲉⲧⲥⲏϩ ·
. . .
79 ϯⲥⲟⲟⲩⲛ ⲇⲉ ⲟⲛ ϫⲉⲧⲗⲩⲡⲏ ⲕⲁⲧⲁⲡⲕⲟⲥⲙⲟⲥ ⲉⲥⲣϩⲱⲃ ⲉⲡⲙⲟⲩ ⲕⲁⲧⲁⲛⲉⲅⲣⲁⲫⲏ ·
. . .
80 ⲁⲗⲗⲁ ⲙⲡⲱⲣ ⲉⲧⲣⲉⲩⲁⲡⲁⲧⲁ ⲙⲙⲟⲛ ϩⲛⲟⲩⲕⲣⲟϥ ⲛϭⲓϫⲁϫⲉ ⲛⲇⲁⲓⲙⲱⲛ ⲉⲧϩⲟⲟⲩ
. . .
81 ⲛⲧⲛⲣⲁϣⲉ ϩⲛⲟⲩⲙⲛⲧⲛⲟⲩϫ ⲉ …. ⲛⲉⲛ ⲁ …. ⲁⲧⲙⲣⲟ . ⲧⲉ ⲡⲛⲟⲩⲧⲉ ϭⲱⲛⲧ ⲉⲣⲟⲛ
. . .
82 ⲛϥⲡⲱϩⲧ ⲛⲧⲉϥⲟⲣⲅⲏ ⲉϩⲣⲁⲓ . ⲉϫⲱⲛ ϫⲉⲁⲛⲣⲁϣⲉ ⲉϥⲙⲟⲕϩ ⲛϩⲏⲧ ·
. . .
83 ⲉⲧⲃⲉⲡⲁⲓ ⲙⲁⲣⲛⲙⲉⲧⲁⲛⲟⲉⲓ ·
. . .
84 ⲁⲩⲱ ⲛⲧⲛⲣⲓⲙⲉ ⲉϩⲣⲁⲓ ⲉϫⲛⲛⲉⲛⲙⲛⲧϣⲁϥⲧⲉ ϩⲛϩⲉⲛⲗⲩⲡⲏ · ⲙⲛϩⲉⲛⲁϣⲁϩⲟⲙ · ⲙⲛϩⲉⲛⲙⲕⲁϩ ⲛϩⲏⲧ ⲉⲛⲁϣⲱⲟⲩ · ⲉⲛⲥⲟⲟⲩⲛ
. . .
85 ϫⲉⲧⲗⲩⲡⲏ ⲅⲁⲣ ⲕⲁⲧⲁⲡⲛⲟⲩⲧⲉ ⲉⲥⲣϩⲱⲃ ⲛⲁⲛ ⲉⲩⲙⲉⲧⲁⲛⲟⲓⲁ ⲛⲁⲧⲣϩⲧⲏⲥ ⲉⲩⲟⲩϫⲁⲓ ⲛⲧⲉⲛⲯⲩⲭⲏ ⲙⲛⲛⲉⲛⲥⲱⲙⲁ ·
. . .
86 ⲙⲙⲟⲛ ⲉϥⲥⲏϩ ⲧⲱⲛ ϩⲛⲛⲉⲅⲣⲁⲫⲏ ⲛⲛⲉⲡⲣⲟⲫⲏⲧⲏⲥ ⲙⲛⲛⲁⲡⲟⲥⲧⲟⲗⲟⲥ ⲉⲩϫⲱ ⲙⲙⲟⲥ
. . .
87 ϫⲉⲧⲗⲩⲡⲏ ⲙⲡⲣⲧⲣⲉⲥϭⲙⲙⲁ ϩⲣⲁⲓ ⲛϩⲏⲧⲧⲏⲩⲧⲛ . ⲟⲩⲇⲉ ⲙⲡⲣⲗⲩⲡⲉⲓ ⲉⲡⲧⲏⲣϥ ·
. . .
88 ⲛⲁϣ ϭⲉ ⲛϩⲉ ⲉⲩⲛⲁϫⲟⲟⲥ ⲛϭⲓⲛⲉⲛⲉⲓⲟⲧⲉ ⲉⲧⲟⲩⲁⲁⲃ ϫⲉⲙⲡⲣⲗⲩⲡⲉⲓ ·
. . .
89 ⲛⲧⲟⲟⲩ ϩⲱⲟⲩ ⲉⲁⲩⲕⲉⲣⲁ ⲙⲡⲉⲧⲟⲩⲛⲁⲥⲟⲟϥ ϩⲓⲣⲙⲉⲓⲏ ⲕⲁⲧⲁⲛⲉⲅⲣⲁⲫⲏ ⲕⲁⲧⲁⲧϩⲉ ⲟⲛ ⲉⲧⲉϣⲁⲩϫⲟⲟⲥ
. . .
90 ϫⲉⲁⲛⲉⲛⲃⲁⲗ ⲧⲁⲩⲟ ⲉϩⲣⲁⲓ ⲛϩⲉⲛⲟⲑⲉ ⲙⲙⲟⲟⲩ ·
. . .
91 ⲉⲓⲧⲁ ⲟⲛ ϫⲉⲁⲛⲁⲃⲁⲗϣⲧⲟⲣⲧⲣ ⲉⲃⲟⲗ ⲙⲡⲣⲓⲙⲉ ·
. . .
92 ⲁⲩⲱ ⲟⲛ ϫⲉⲁⲛⲁⲁϩⲉⲱϫⲛ ϩⲛⲟⲩⲙⲕⲁϩ ⲛϩⲏⲧ ·
. . .
93 ⲁⲩⲱ ⲛⲁⲣⲙⲡⲟⲟⲩⲉ ϩⲛϩⲉⲛⲁϣⲁϩⲟⲙ ·
. . .
94 ⲁⲩⲱ ⲟⲛ ϫⲉⲛⲉⲓ ⲙⲟⲟϣⲉ ⲛⲧϩⲉ .. ⲉⲧⲣϩⲏⲃⲉ ⲁⲩⲱ ⲛⲉⲧⲟⲕⲙ ⲁⲩⲱ ⲡⲉϫⲁϥ
. . .
95 ϫⲉⲛⲧⲉⲓϩⲉ ⲇⲉ ⲛⲉⲓⲑⲃⲃⲓⲟ ⲙⲙⲟⲓ ⲛⲉ · ⲁⲩⲱ ⲟⲛ ϩⲛϩⲁϩ ⲙⲙⲁ ϩⲛⲛⲉⲅⲣⲁⲫⲏ ⲉⲩⲧⲁⲙⲟ ⲙⲙⲟⲛ ⲛⲧⲉⲓϩⲉ .
. . .
96 ϫⲉⲧⲁⲓ ⲧⲉ ⲧϩⲉ ⲉⲛⲧⲁⲩⲗⲩⲡⲉⲓ ·
. . .
97 ⲁⲩⲱ ⲉⲁⲩⲣϩⲏⲃⲉ ⲉⲙⲁⲧⲉ ⲉⲙⲁⲧⲉ ϫⲓⲛⲙ ……. ⲛⲉⲛ …. ⲉ ⲙⲛⲁⲣⲭⲁⲓⲟⲥ ·
. . .
98 ⲙⲁⲗⲓⲥⲧⲁ ⲇⲉ ⲉⲣⲉⲛϣⲁϫⲉ ⲉⲧⲥⲏϩ ϩⲛⲛⲉⲩⲁⲅⲅⲉⲗⲓⲟⲛ ⲧⲁⲙⲟ ⲙⲙⲟⲛ ·
. . .
99 ϫⲉⲛⲧⲟϥ ϩⲱⲱϥ ⲟⲛ ⲛϩⲟⲩⲟ ⲡⲉⲛϫⲟⲉⲓⲥ ⲓⲏⲥⲟⲩⲥ · ⲉⲁϥⲁⲣⲭⲉⲓ ⲛⲗⲩⲡⲉⲓ ⲁⲩⲱ ⲛⲧⲱⲕⲙ ⲛϩⲏⲧ ϩⲛⲟⲩⲛⲟϭⲛⲉϭ ⲉⲛⲁϣⲱϥ ·
. . .
100 ⲁⲩⲱ ⲧⲁⲓ ⲧⲉ ⲧϩⲉ ⲉⲛⲧⲁϥϫⲟⲟⲥ
. . .
101 ϫⲉⲧⲁⲯⲩⲭⲏ ⲗⲩⲡⲉⲓ ϣⲁϩⲣⲁⲓ ⲉⲡⲙⲟⲩ ·
. . .
102 ⲉⲃⲟⲗ ⲁⲛ ϫⲉⲛⲧⲁϥⲙⲟⲩⲟⲩⲧ ⲛⲟⲩⲣⲱⲙⲉ ⲛⲧϩⲉ ⲉⲛⲧⲁⲛⲧⲁⲕⲟ ⲙⲡⲉⲣⲡⲉ ⲙⲡⲛⲟⲩⲧⲉ ·
. . .
103 ⲟⲩⲇⲉ ⲉⲃⲟⲗ ⲁⲛ ϫⲉ
. . .