1 ⲉⲧⲃⲉⲡⲁⲓ ⲙⲛⲟⲩⲥⲓⲁ ϭⲉ ⲛⲁϣⲱϫⲡ ϩⲁⲛⲉϥⲛⲟⲃⲉ ϫⲉⲛⲛⲉϥⲙⲉⲧⲁⲛⲟⲉⲓ
…
2 ⲁϣ ⲧⲉ ⲧⲙⲉⲧⲁⲛⲟⲓⲁ ⲛⲥⲁⲧⲣⲉⲛⲥⲁϩⲱⲛ ⲉⲃⲟⲗ ⲛⲕⲣⲟϥ ⲛⲓⲙ ϩⲓⲙⲛⲧⲁⲧⲥⲱⲧⲙ ⲛⲓⲙ ⲧⲛⲟⲩⲛⲉ ⲛϩⲱⲃ ⲛⲓⲙ ⲉϥϩⲟⲟⲩ ·
…
3 ⲛⲁⲓ ⲇⲉ ⲙⲛⲛⲉⲧⲧⲛⲧⲱⲛ ⲉⲣⲟⲟⲩ ⲧⲏⲣⲟⲩ · ⲛⲉⲧⲱϣ ⲙⲙⲟⲟⲩ ⲙⲛⲛⲉⲧⲥⲱⲧⲙ ⲉⲣⲟⲟⲩ · ⲏ ⲛⲉⲧϯⲥⲃⲱ ⲛϩⲉⲛⲕⲟⲟⲩⲉ ⲛϩⲏⲧⲟⲩ ·
…
4 ⲁⲩⲱ ⲛⲧⲟⲟⲩ ⲉⲩⲡⲁⲣⲁⲃⲁ ⲙⲙⲟⲟⲩ ⲧⲏⲣⲟⲩ · ⲛⲁⲓ
…
5 ⲛⲧⲉⲓⲙⲓⲛⲉ ⲉϣⲱⲡⲉ ⲉⲩϩⲟⲟⲩⲧ ⲛⲉ ·
…
6 ⲉϣⲱⲡⲉ ⲉⲩⲥϩⲓⲙⲉ ⲧⲉ ⲉⲩⲃⲱϣ ⲙⲙⲟⲟⲩ ⲙⲁⲩⲁⲁⲩ ·
…
7 ⲁⲩⲱ ⲉⲩⲥⲁϩⲟⲩ ⲛⲧⲉⲩⲯⲩⲭⲏ ⲙⲙⲓⲛⲙⲙⲟⲟⲩ ·
…
8 ⲉⲧⲃⲉⲡⲁⲓ ⲥⲉⲥϩⲟⲩⲟⲣⲧ ⲛϭⲓⲟⲩⲟⲛ ⲛⲓⲙ ⲉⲧⲱϣ ϩⲣⲁⲓ ϩⲛⲛⲉⲅⲣⲁⲫⲏ ⲧⲏⲣⲟⲩ ⲙⲡϫⲟⲉⲓⲥ ·
…
9 ⲉⲩⲉⲓⲣⲉ ⲛϩⲉⲛⲡⲟⲣⲛⲉⲓⲁ ⲙⲛϩⲉⲛϫⲱϩⲙ ⲙⲛϩⲉⲛⲥⲱⲱϥ ⲙⲛϩⲉⲛϫⲓⲟⲩⲉ ⲙⲛϩⲉⲛϭⲟⲗ ⲙⲛϩⲉⲛⲁⲛⲁϣ ⲛⲛⲟⲩϫ ·
…
10 ⲁⲩⲱ ⲙⲛⲟⲩⲙⲉⲧⲁⲛⲟⲉⲓ ⲉϩⲣⲁⲓ ⲉϫⲛⲧⲁⲕⲁⲑⲁⲣⲥⲓⲁ ⲙⲛⲡⲥⲱⲱϥ ⲉⲛⲧⲁⲩⲁⲁϥ ·
…
11 ⲛϩⲟⲩⲟ ⲇⲉ ⲉⲡⲉϩⲟⲩⲟ ⲥⲉⲥϩⲟⲩⲟⲣⲧ ⲛϭⲓⲟⲩⲟⲛ ⲛⲓⲙ ⲉⲧⲛⲁⲥⲟⲟⲩⲧⲛ ⲧⲟⲟⲧⲟⲩ ⲉⲃⲟⲗ ⲉⲛⲉⲩⲁⲅⲅⲉⲗⲓⲟⲛ ⲉⲧⲟⲩⲁⲁⲃ ⲛⲧⲉⲡⲉⲛϫⲟⲉⲓⲥ ⲓⲏⲥⲟⲩⲥ
…
12 ⲛⲥⲉⲟⲩⲱⲛ ⲉⲣⲟⲟⲩ ϩⲣⲁⲓ ϩⲛⲛⲉⲩϭⲓϫ ⲉⲧⲙⲉϩ ⲛⲥⲱⲱϥ ⲛⲓⲙ ϩⲓⲁⲕⲁⲑⲁⲣⲥⲓⲁ ⲛⲓⲙ ·
…
13 ⲉⲧⲣⲉⲩⲱϣ ϩⲣⲁⲓ ⲛϩⲏⲧⲟⲩ ⲉⲩϣⲟⲟⲡ ϩⲛϩⲉⲛⲕⲣⲟϥ ⲉⲩⲟϣ · ⲙⲛϩⲉⲛⲕⲱϩ · ⲙⲛϩⲉⲛⲙⲟⲥⲧⲉ · ⲙⲛϩⲉⲛⲙⲛⲧⲃⲁⲃⲉⲣⲱⲙⲉ · ⲙⲛϩⲱⲃ ⲛⲓⲙ ⲉϥϩⲟⲟⲩ ⲉⲡⲉϩⲟⲩⲟ ⲙⲛϩⲉⲛⲛⲟⲃⲉ ⲉⲛⲁϣⲱⲟⲩ
…
14 ⲉⲩϫⲓ ⲉϩⲟⲩⲛ ⲉⲡⲙⲟⲩ ⲕⲁⲧⲁⲧϩⲉ ⲉⲧⲥⲏϩ
…
15 ϫⲉⲟⲩⲛⲛⲟⲃⲉ ⲉϥϫⲓ ⲉϩⲟⲩⲛ ⲉⲡⲙⲟⲩ ·
…
16 ⲁⲩⲱ ⲙⲙⲛⲧϩⲉ ⲛⲥⲟⲡⲥ ⲙⲡⲛⲟⲩⲧⲉ ⲉϩⲣⲁⲓ ⲉϫⲛⲛⲉⲧⲉⲓⲣⲉ ⲙⲙⲟⲟⲩ ⲉⲧⲣⲉϥⲕⲁⲁⲩ ⲛⲁⲩ
…
17 ⲉⲃⲟⲗ ⲉⲃⲟⲗ ϫⲉⲛⲟⲩⲥⲟⲛ ⲁⲛ ⲡⲉ ⲟⲩⲇⲉ ⲛⲥⲛⲁⲩ ⲁⲛ
…
18 ⲛⲉⲛⲧⲁⲩⲉⲓⲣⲉ ⲙⲡϩⲱⲃ ⲉⲧϩⲟⲟⲩ ⲉⲡⲉϩⲟⲩⲟ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ·
…
19 ⲉⲧⲃⲉⲡⲁⲓ ϯϫⲱ ⲙⲙⲟⲥ ⲛⲏⲧⲛ ⲛⲉⲥⲛⲏⲩ
…
20 ϫⲉⲟⲩⲟⲛ ⲛⲓⲙ ⲉⲧⲱϣ ϩⲣⲁⲓ ϩⲛⲛϫⲱⲱⲙⲉ ⲙⲡϫⲟⲉⲓⲥ
…
21 ⲁⲩⲱ ⲉⲧⲙⲉⲗⲉⲧⲁ ϩⲣⲁⲓ ϩⲛⲛϣⲁϫⲉ ⲛⲛⲉⲅⲣⲁⲫⲏ ⲙⲡⲛⲟⲩⲧⲉ
…
22 ⲉⲛⲥⲉⲧⲁⲗϭⲟ ⲙⲙⲟⲟⲩ ⲁⲛ ϩⲛⲛⲉⲩϩⲃⲏⲩⲉ ⲙⲙⲓⲛⲙⲙⲟⲟⲩ ·
…
23 ⲛⲉⲥⲛⲏⲩ ⲛⲉ ⲙⲡⲁⲓ ⲉⲧⲧⲁⲕⲟ ⲙⲙⲟϥ ⲟⲩⲁⲁϥ ⲕⲁⲧⲁⲧϩⲉ ⲉⲧⲥⲏϩ ·
…
24 ⲉϣⲁⲣⲉⲡⲣⲱⲙⲉ ⲧⲁⲕⲟϥ ϩⲛⲟⲩ
…
25 ⲉⲓⲙⲏⲧⲓ ⲛϥϫⲓ ⲛⲧⲃⲟⲧⲉ ⲉϩⲟⲩⲛ ⲉⲡⲉϥⲏⲓ ·
…
26 ϫⲉⲕⲁⲥ ⲉϥⲉϣⲱⲡⲉ ⲛⲃⲟⲧⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ϩⲛⲟⲩⲛⲟϭ ⲛⲧⲁⲕⲟ ·
…
27 ⲁϣ ⲡⲉ ⲡⲉⲛⲏⲓ ⲉⲓⲙⲏⲧⲓ ⲉⲧⲉⲛⲥⲩⲛⲁⲅⲱⲅⲏ ·
…
28 ⲁⲩⲱ ⲁⲛⲟⲛ ⲙⲙⲓⲛⲙⲙⲟⲛ · ⲟⲩⲧⲉ ⲧⲃⲟⲧⲉ ⲉⲧⲛⲛⲁϫⲓⲧⲥ ⲉϩⲟⲩⲛ ⲉⲡⲉⲛⲏⲓ · ⲉⲓⲙⲏⲧⲓ ⲉⲧⲡⲟⲣⲛⲓⲁ · ⲙⲛⲡⲥⲱⲱϥ · ⲙⲛⲡϫⲓⲟⲩⲉ ⲙⲛⲡϭⲟⲗ · ⲙⲛϩⲱⲃ ⲛⲓⲙ ⲉϥϩⲟⲟⲩ ·
…
29 ⲛⲓⲙ ⲡⲉ ⲡⲥⲟⲛ ⲙⲡⲉⲧⲧⲁⲕⲟ ⲙⲙⲟϥ ⲟⲩⲁⲁϥ ·
…
30 ⲉⲓⲙⲏⲧⲓ ⲉⲡⲉⲧⲉⲓⲣⲉ ⲛⲛⲁⲓ ⲙⲛϩⲉⲛⲕⲟⲟⲩⲉ ⲛⲁϣⲱⲟⲩ ·
…
31 ⲙⲛⲡⲉⲛⲧⲁϥⲕⲱ ⲛⲁϥ ⲛϣⲓ ⲥⲛⲁⲩ · ⲙⲛⲟⲩⲙⲁϣⲉ ⲛⲕⲣⲟϥ ·
…
32 ⲛⲓⲙ ⲡⲉⲧⲧⲁⲕⲟ ⲙⲙⲟϥ ⲟⲩⲁⲁϥ ⲉⲓⲙⲏⲧⲓ ⲡⲇⲁⲓⲙⲱⲛ ⲉⲧϩⲟⲟⲩ ⲡⲥⲁⲧⲁⲛⲁⲥ ⲡϣⲏⲣⲉ ⲙⲡⲧⲁⲕⲟ ·
…
33 ⲡϫⲁϫⲉ ⲛⲟⲩⲟⲛ ⲛⲓⲙ ⲉⲧⲙⲉ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡϣⲏⲣⲉ ⲙⲡⲛⲟⲩⲧⲉ ·
…
34 ϯϫⲱ ⲙⲙⲟⲥ ⲛⲏⲧⲛ ϫⲉⲛⲧϩⲉ ⲉⲧⲉⲟⲩⲃⲟⲧⲉ ⲙⲡϫⲟⲉⲓⲥ ⲡⲉ ϣⲓ ⲥⲛⲁⲩ
…
35 ⲁⲩⲱ ⲉⲛⲛⲁⲛⲉⲟⲩⲙⲁϣⲉ ⲁⲛ ⲛⲕⲣⲟϥ ⲙⲡⲉϥⲙⲧⲟ ⲉⲃⲟⲗ ·
…
36 ⲧⲁⲓ ⲟⲛ ⲧⲉ ⲧϩⲉ ⲟⲩⲃⲟⲧⲉ ⲙⲡⲛⲟⲩⲧⲉ ⲡⲉ ⲡⲉⲧⲟ ⲛϩⲏⲧ ⲥⲛⲁⲩ ϩⲛⲧⲉϥϩⲩⲡⲟⲙⲟⲛⲏ ·
…
37 ⲁⲩⲱ ⲛⲁⲛⲉⲟⲩⲣⲱⲙⲉ ⲁⲛ ⲛⲕⲣⲟϥ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ·
…
38 ⲁⲩⲱ ⲙⲛⲡⲉⲧⲥϩⲟⲩⲟⲣⲧ ⲉⲡⲉⲧⲥⲟⲡⲥ ⲙⲡⲛⲟⲩⲧⲉ
…
39 ⲉϥⲟ ⲛⲁⲧⲥⲱⲧⲙ ⲛⲥⲁⲡⲉϥⲛⲟⲙⲟⲥ ·
…
40 ⲉⲧⲃⲉⲡⲁⲓ ⲉⲩϣⲁⲛⲡⲣϣ ⲛⲉⲩϭⲓϫ ⲉϩⲣⲁⲓ ⲉⲣⲟϥ ϥⲛⲁⲕⲧⲉⲡⲉϥϩⲟ ⲉⲃⲟⲗ ⲙⲙⲟⲟⲩ ·
…
41 ⲁⲩⲱ ⲉⲩϣⲁⲛⲧⲁϣⲉ ⲛⲉⲩⲥⲟⲡⲥ ⲛϥⲛⲁⲥⲱⲧⲙ ⲁⲛ ⲉⲣⲟⲟⲩ ⲕⲁⲧⲁⲛⲉⲅⲣⲁⲫⲏ ·
…
42 ⲁⲛⲁⲩ ⲇⲉ ϫⲉⲉϣⲱⲡⲉ ⲁⲛⲟⲛ ⲛⲉⲧⲟⲩⲣⲛⲟⲃⲉ ⲉⲣⲟⲛ ·
…
43 ⲉⲩϣⲗⲏⲗ ⲇⲉ ⲟⲛ ⲉⲣⲟⲛ ⲛⲧϩⲉ ⲙⲡⲛⲟⲩⲧⲉ ·
…
44 ϫⲉⲉⲛⲉⲧⲛⲛⲁⲁⲡⲉⲭⲉ ⲛⲛⲉⲧⲥⲟⲡⲥ ⲙⲙⲟⲛ ⲉⲩⲛⲉϫⲕⲁϩ ⲉϩⲟⲩⲛ ϩⲙⲡⲉⲛϩⲟ ·
…
45 ⲙⲏ ϩⲛⲟⲩϭⲱⲛⲧ ⲛⲧⲛⲛⲁϭⲱⲛⲧ ⲁⲛ ·
…
46 ⲁⲩⲱ ⲛⲁϣ ⲛϩⲉ ⲉⲛϥⲛⲁϭⲱⲛⲧ ⲁⲛ ⲉⲣⲟⲛ ⲛϭⲓⲡⲛⲟⲩⲧⲉ ⲉⲛϣⲗⲏⲗ ⲉⲣⲟϥ ·
…
47 ⲁⲩⲱ ⲟⲛ ⲉⲛⲛⲟϭⲛⲉϭ ⲙⲙⲟϥ ϩⲣⲁⲓ ϩⲛⲛⲉⲛϩⲃⲏⲩⲉ ⲧⲏⲣⲟⲩ ⲉⲧϩⲟⲟⲩ ·
…
48 ⲧⲛⲛⲁϫⲟⲟⲥ ⲇⲉ ϫⲉⲁϩⲁϩ ⲛⲛⲉⲧⲟⲩⲁⲁⲃ ⲁⲡⲉⲭⲉⲛⲛⲉⲧⲥⲱϣ ⲙⲙⲟⲟⲩ ⲉⲩⲛⲉϫⲕⲁϩ ⲉϩⲟⲩⲛ ⲉϩⲣⲁⲩ
…
49 ⲁⲩⲱ ⲉⲁⲩⲙⲉⲩⲧϩⲁϩ ⲛϩⲏⲧⲟⲩ ⲉⲩⲥⲙⲟⲩ ⲉⲣⲟⲟⲩ ⲉⲩⲱϣ ⲉϩⲣⲁⲓ ⲉⲡⲛⲟⲩⲧⲉ .
…
50 ⲉⲧⲙⲧⲣⲉϥⲱⲡ ⲉⲣⲟⲟⲩ ⲙⲛⲛⲟⲃⲉ ⲉⲛⲧⲁⲩⲁⲁⲩ ⲛⲁⲩ ·
…
51 ⲁⲗⲗⲁ ⲁⲛⲁⲩ ϩⲱⲱϥ
…
52 ϫⲉⲁⲡⲛⲟⲩⲧⲉ ϫⲟⲟⲥ ⲉⲧⲣⲉⲩϫⲓⲕⲃⲁ ⲙⲙⲟⲟⲩ ⲛⲟⲩⲏⲣ
…
53 ⲁⲩⲱ ϫⲉⲉⲩⲉⲉⲓ ⲉϫⲱⲟⲩ ⲛⲟⲩⲏⲣ ⲛϭⲓⲛⲉⲥⲛⲟⲟϥ ⲛⲛⲉⲛⲧⲁⲩⲙⲟⲟⲩⲧⲟⲩ ·
…
54 ⲛⲧϩⲉ ⲉⲛⲧⲁⲥⲟⲗⲟⲙⲱⲛ ⲛⲇⲓⲕⲁⲓⲟⲥ ϫⲓⲕⲃⲁ ⲙⲡⲁⲓ ⲉⲧⲙⲙⲁⲩ
…
55 ⲉⲛⲧⲁϥⲛⲉϫⲕⲁϩ ⲉϩⲟⲩⲛ ϩⲙⲡϩⲟ ⲙⲡⲉϥⲉⲓⲱⲧ ·
…
56 ⲁⲩⲱ ⲛⲧϩⲉ ⲉⲛⲧⲁϥϫⲟⲟⲥ ⲛϭⲓⲡⲉⲛϫⲟⲉⲓⲥ ⲓⲏⲥⲟⲩⲥ ⲉⲧⲣⲉⲥⲛⲟϥ ⲛⲓⲙ ⲛⲇⲓⲕⲁⲓⲟⲥ ⲉⲁⲩⲡⲁϩⲧϥ ⲉⲃⲟⲗ ϩⲓϫⲛⲛⲕⲁϩ ·
…
57 ϫⲓⲙⲡⲉⲥⲛⲟϥ ⲛⲁⲃⲉⲗ ⲛⲇⲓⲕⲁⲓⲟⲥ ϣⲁϩⲣⲁⲓ ⲉⲡⲉⲥⲛⲟϥ ⲛⲍⲁⲭⲁⲣⲓⲁⲥ ⲡϣⲏⲣⲉ ⲛⲃⲁⲣⲁⲭⲓⲁⲥ ⲉⲓⲉϩⲣⲁⲓ ⲉϫⲛⲛⲣⲉϥϩⲱⲧⲃ ⲉⲧⲙⲙⲁⲩ ·
…
58 ⲉⲧⲃⲉⲡⲁⲓ ϯϫⲱ ⲙⲙⲟⲥ ⲛⲏⲧⲛ ϫⲉⲕⲁⲧⲁⲧϩⲉ ⲉⲛⲧⲁⲩϩⲣⲟϣ ⲛϩⲏⲧ ⲛϭⲓⲛⲉⲧⲟⲩⲁⲁⲃ ⲧⲏⲣⲟⲩ ⲉϩⲣⲁⲓ ⲉϫⲛⲛⲉⲧⲡⲏⲧ ⲛⲥⲱⲟⲩ
…
59 ⲉⲩⲁⲡⲉⲭⲉ ⲙⲙⲟⲟⲩ
…
60 ⲉⲩⲕⲱ ⲙⲡⲙⲁ ⲛⲧⲟⲣⲅⲏ ϩⲙⲡⲉϩⲟⲟⲩ ⲛⲧⲟⲣⲅⲏ ⲕⲁⲧⲁⲧϩⲉ ⲉⲧⲥⲏϩ ·
…
61 ⲁⲩⲱ ⲕⲁⲧⲁⲧϩⲉ ⲉⲛⲧⲁⲡⲁⲓ ⲉⲧⲙⲙⲁⲩ ⲛⲉϫⲕⲁϩ ⲉϩⲟⲩⲛ ϩⲙⲡϩⲟ ⲙⲡⲉⲛⲉⲓⲱⲧ ⲇⲁⲩⲉⲓⲇ ·
…
62 ⲉⲁϥϩⲣⲟϣ ⲛϩⲏⲧ ⲉϩⲣⲁⲓ ⲉϫⲱϥ
…
63 ϣⲁⲡⲉϩⲟⲟⲩ ⲉⲛⲧⲁϥⲧⲁⲁϥ ⲉⲧⲟⲟⲧϥ ⲙⲡⲉϥϣⲏⲣⲉ
…
64 ⲉⲧⲣⲉϥϫⲓⲕⲃⲁ ⲙⲙⲟϥ ϩⲛⲟⲩϩⲁⲡ ⲙⲙⲉ ϫⲉⲙⲡⲉϥⲙⲉⲧⲁⲛⲟⲉⲓ ·
…
65 ⲧⲁⲓ ⲟⲛ ⲧⲉ ⲧϩⲉ ⲉⲧϥϩⲟⲣϣ ⲛϩⲏⲧ ⲛϭⲓⲡⲛⲟⲩⲧⲉ ⲉϩⲣⲁⲓ ⲉϫⲛⲛⲉⲧⲣⲛⲟⲃⲉ ·
…
66 ⲏ ⲛⲉⲧⲛⲁⲣⲛⲟⲃⲉ ⲙⲡⲉϥⲙⲧⲟ ⲉⲃⲟⲗ ϣⲁϩⲣⲁⲓ ⲉⲧⲥⲩⲛⲧⲉⲗⲉⲓⲁ ⲙⲛⲁⲓⲱⲛ ·
…
67 ⲁⲩⲱ ϩⲙⲡⲉϩⲟⲟⲩ ⲉⲧϥⲛⲁϫⲓⲕⲃⲁ ⲙⲙⲟⲛ ϩⲛϩⲉⲛⲛⲟϭ ⲛⲧⲓⲙⲱⲣⲓⲁ ϩⲣⲁⲓ ϩⲛⲧⲉϩⲣⲱ ⲛⲕⲱϩⲧ ⲉⲧⲙⲟⲩϩ ⲉⲃⲟⲗ ϩⲓⲧⲟⲟⲧϥ ⲙⲡⲉϥϣⲏⲣⲉ ⲉⲧⲟⲩⲁⲁⲃ ⲓⲏⲥⲟⲩⲥ ·
…
68 ⲡⲁⲓ ⲉⲛⲧⲁⲡⲉϥⲉⲓⲱⲧ ϯ ⲛⲁϥ ⲛⲧⲉⲝⲟⲩⲥⲓⲁ ⲉⲧⲣⲉϥⲉⲓⲣⲉ ⲛⲧⲉⲕⲣⲓⲥⲓⲥ ·
…
69 ⲕⲁⲧⲁⲧϩⲉ ⲉⲧⲥⲏϩ ϫⲉⲡⲉⲓⲱⲧ ⲛⲁⲕⲣⲓⲛⲉ ⲁⲛ ⲛⲗⲁⲁⲩ
…
70 ⲁⲗⲗⲁ ⲧⲉⲕⲣⲓⲥⲓⲥ ⲧⲏⲣⲥ ⲁϥⲧⲁⲁⲥ ⲙⲡϣⲏⲣⲉ
…
71 ⲙⲡⲱⲣ ⲧⲉⲛⲟⲩ ⲛⲉⲥⲛⲏⲩ ⲉⲧⲣⲉⲛⲉⲛϩⲏⲧ ϫⲓϥⲟϭⲥ ⲉⲣⲟⲛ ϩⲛⲧⲙⲛⲧⲁⲧϩⲏⲧ ⲛⲧϩⲉ ⲛϩⲉⲛϣⲏⲣⲉ ϣⲏⲙ ⲛⲁⲧⲥⲱⲧⲙ ⲉⲣⲉⲡϭⲉⲣⲱⲃ ⲙⲛⲧⲉⲥⲃⲱ ⲟⲩⲏⲩ ⲙⲙⲟⲟⲩ ⲕⲁⲧⲁⲧϩⲉ ⲉⲧⲥⲏϩ ·
…
72 ⲁⲗⲗⲁ ⲛⲧϩⲉ ⲉⲧⲉϣⲁⲣⲉⲟⲩⲉⲓⲱⲧ ⲡⲁⲓⲇⲉⲩⲉ ⲙⲡⲉϥϣⲏⲣⲉ ϩⲛⲟⲩϭⲉⲣⲱⲃ ·
…
73 ⲉϥⲟⲩⲱϣ ⲉⲧⲟⲩϫⲉ ⲧⲉϥⲯⲩⲭⲏ ⲉⲃⲟⲗ ϩⲙⲡⲙⲟⲩ ϫⲉϥⲙⲉ ⲙⲙⲟϥ ⲉⲙⲁⲧⲉ ·
…
74 ⲧⲁⲓ ⲟⲛ ⲧⲉ ⲧϩⲉ ⲙⲁⲣⲛⲡⲁⲓⲇⲉⲩⲉ ⲙⲙⲟⲛ ϩⲛⲧϩⲟⲧⲉ ⲛⲧϭⲓⲛⲁϩⲉⲣⲁⲧⲛ ⲉⲡⲃⲏⲙⲁ ⲙⲡϫⲟⲉⲓⲥ ·
…
75 ⲁⲩⲱ ⲙⲁⲣⲛϯⲥⲃⲱ ⲛⲁⲛ ⲉⲙⲁⲧⲉ ϩⲙⲡⲣⲡⲙⲉⲉⲩⲉ ⲛⲛⲕⲟⲗⲁⲥⲓⲥ ·
…
76 ⲉⲛⲟ ⲁⲛ ⲛⲁⲧⲥⲟⲟⲩⲛ ϫⲉⲙⲛϭⲟⲙ ⲙⲙⲟⲛ ⲉϥⲓⲉϩⲣⲁⲓ ϩⲁⲧⲉϩⲣⲱ ⲛⲕⲱϩⲧ ⲉⲧⲙⲟⲩϩ · ⲙⲛⲟⲩϩⲕⲟ · ⲙⲛⲟⲩⲉⲓⲃⲉ · ⲙⲛϩⲉⲛⲕⲉⲑⲗⲓⲯⲓⲥ ⲉⲛⲁϣⲱⲟⲩ ·
…
77 ⲁⲛⲁⲩ ϫⲉⲟⲩⲟⲛ ⲛⲓⲙ ⲉⲧϫⲓⲥⲃⲱ ⲉϩⲉⲛⲧⲉⲭⲛⲏ
…
78 ⲉⲩϣⲁⲛⲧⲙⲡⲁⲓⲇⲉⲩⲉ ⲙⲙⲟⲟⲩ ⲙⲉⲩϫⲱⲕ ⲉⲃⲟⲗ ⲛⲛⲉⲩϩⲃⲏⲩⲉ ϩⲛⲟⲩⲥⲟⲟⲩⲧⲛ
…
79 ⲉⲓⲧⲉ ⲛⲉⲧϩⲛϩⲉⲛⲁⲛⲍⲏⲃⲉ . ⲉⲓⲧⲉ ⲛϩⲁⲙϣⲉ ⲉⲓⲧⲉ ⲛϩⲁⲙⲕⲗⲗⲉ · ⲉⲓⲧⲉ ⲛⲕⲉⲧⲉⲭⲛⲏ ⲧⲏⲣⲟⲩ ·
…
80 ⲉⲧⲃⲉⲡⲁⲓ ϣⲟⲣⲡ ⲙⲉⲛ ϥⲥⲙⲁⲙⲁⲁⲧ ⲛϭⲓⲡϫⲟⲉⲓⲥ ϫⲉϥϯⲥⲃⲱ ⲛⲁⲛ ϩⲛϩⲉⲛϩⲓⲥⲉ ⲙⲛϩⲉⲛⲙⲁⲥⲧⲏⲝ ⲕⲁⲧⲁⲧϩⲉ ⲉⲧⲥⲏϩ
…
81 ⲉϥⲟⲩⲱϣ ⲉⲧⲣⲉⲛⲥⲟⲩⲱⲛϥ ϩⲛⲟⲩⲥⲟⲟⲩⲧⲛ ⲕⲁⲧⲁⲧϩⲉ ⲉⲧⲥⲏϩ
…
82 ϫⲉⲡⲉⲧⲉⲣⲉⲡϫⲟⲉⲓⲥ ⲅⲁⲣ ⲙⲉ ⲙⲙⲟϥ ϣⲁϥⲡⲁⲓⲇⲉⲩⲉ ⲙⲙⲟϥ
…
83 ϣⲁϥⲙⲁⲥⲧⲓⲅⲟⲩ ⲇⲉ ⲛϣⲏⲣⲉ ⲛⲓⲙ ⲉⲧϥⲛⲁϣⲟⲡⲟⲩ ⲉⲣⲟϥ ·
…
84 ⲁⲛⲟⲛ ⲇⲉ ϩⲱⲱⲛ · ⲙⲁⲣⲛϯⲥⲃⲱ ⲛⲁⲛ ⲙⲁⲩⲁⲁⲛ ϩⲛⲧϩⲟⲧⲉ ⲙⲡϫⲟⲉⲓⲥ
…
85 ϫⲉⲕⲁⲥ ⲉⲛⲉ ⲥⲃⲟ ⲉⲙⲉⲣⲉⲛⲉⲛⲉⲣⲏⲩ ·
…
86 ⲁⲩⲱ ⲛⲧⲛⲙⲟⲟϣⲉ ϩⲛⲟⲩⲉⲓⲣⲏⲛⲏ ϩⲓⲟⲩⲥⲟⲛ ·
…
87 ⲙⲛⲛⲥⲁⲡⲁⲓ ⲙⲁⲣⲛⲡⲁⲓⲇⲉⲩⲉ ⲛⲛϣⲏⲣⲉ ϣⲏⲙ ⲙⲛⲛϣⲉⲉⲣⲉ ϣⲏⲙ ⲉⲧⲛϩⲏⲧⲛ ϩⲛⲟⲩϭⲉⲣⲱⲃ ·
…
88 ϫⲉⲕⲁⲥ ⲉⲩⲉⲥⲃⲟ ⲉⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ
…
89 ⲛⲥⲉϩⲁⲣⲉϩ ⲉⲛⲉϥⲉⲛⲧⲟⲗⲏ ⲉⲧⲣⲉⲩϫⲓⲥⲙⲟⲩ ⲉⲙⲁⲧⲉ ϩⲱⲥ ⲣⲱⲙⲉ ⲛⲥⲁⲃⲉ ⲕⲁⲧⲁⲛⲉⲅⲣⲁⲫⲏ ·
…
90 ϩⲉⲛⲥⲩⲛⲁⲅⲱⲅⲏ ⲅⲁⲣ ⲉⲩⲁⲡⲉⲭⲉ ⲛϩⲉⲛϣⲏⲣⲉ ϣⲏⲙ ⲉⲩⲥⲙⲁⲧⲁⲁⲁ ϩⲣⲁⲓ ⲛϩⲏⲧⲟⲩ ⲉⲩⲥⲟⲃⲧⲉ ⲛⲁⲩ ⲙⲁⲩⲁⲁⲩ ⲛⲟⲩⲟⲣⲅⲏ ⲙⲛⲟⲩϭⲱⲛⲧ ⲉⲃⲟⲗ ϩⲓⲧⲙⲡⲛⲟⲩⲧⲉ ·
…
91 ⲛϭⲓⲛⲉⲧⲟⲩϭⲁⲗⲱⲟⲩ ⲉⲣⲟⲟⲩ ϫⲉⲙⲡⲟⲩϯⲥⲃⲱ ⲛⲁⲩ ⲉϩⲁⲣⲉϩ ⲉⲣⲟⲟⲩ ⲉⲃⲟⲗ ϩⲛⲁⲅⲁⲑⲁⲣⲥⲓ ⲛⲓⲙ ⲙⲛϩⲱⲃ ⲛⲓⲙ ⲉϥϩⲟⲟⲩ ·
…
92 ⲉⲧⲃⲉⲡⲁⲓ ⲛϣⲉⲉⲣⲉ ϣⲏⲙ ⲉⲧⲛϩⲏⲧⲧⲏⲩⲧⲛ ϯⲥⲃⲱ ⲛⲁⲩ ·
…
93 ⲉⲧⲣⲉⲩϩⲁⲣⲉϩ ⲉⲛⲉⲩⲥⲱⲙⲁ ⲉⲃⲟⲗ ϩⲛⲧⲱⲗⲙ ⲛⲓⲙ ·
…
94 ⲁⲩⲱ ⲉⲧⲣⲉⲩⲣϫⲟⲉⲓⲥ ⲉⲛⲉⲩⲗⲁⲥ ⲉⲧⲙⲧⲣⲉⲩⲙⲟⲟϣⲉ ϩⲛϩⲉⲛϫⲏⲣ . ⲙⲛϩⲉⲛⲥⲱⲃⲉ . ⲙⲛϩⲉⲛⲃⲱⲗ ⲉⲃⲟⲗ · ⲙⲛϩⲉⲛⲙⲛⲧϩⲁϩ ⲛϣⲁϫⲉ · ϩⲛϩⲉⲛⲙⲛⲧⲁⲣⲅⲟⲥ
…
95 ϩⲉⲛⲛⲟϭ ⲛⲥϩⲓⲙⲉ ϩⲁⲧⲛⲧⲏⲩⲧⲛ · ⲏ ϩⲉⲛϣⲉⲉⲣⲉ ϣⲏⲙ ⲉⲁⲩⲣⲛⲟϭ
…
96 ⲉⲩⲟ ⲛⲁⲧⲥⲱⲧⲙ ⲛⲥⲁⲛⲉⲧϯⲥⲃⲱ ⲛⲁⲩ ⲕⲁⲧⲁⲧⲉⲛⲧⲟⲗⲏ
…
97 ⲉⲩⲟⲩⲱϩⲙ ⲉϩⲟⲩⲛ ⲉϩⲣⲛⲛⲉⲩⲉⲓⲟⲧⲉ ϩⲁⲧⲛⲧⲏⲩⲧⲛ ⲧⲛⲛⲟⲟⲩ ⲛⲁⲛ ⲉⲧⲃⲏⲏⲧⲟⲩ
…
98 ⲁⲩⲱ ⲁⲛⲟⲕ ⲡⲉⲧⲛⲁⲣⲱϣⲉ ⲉⲣⲟⲟⲩ ⲉⲧⲣⲁϯⲧⲱⲛ ⲟⲩⲃⲉ ⲧⲙⲛⲧⲁⲧⲥⲱⲧⲙ ⲙⲛⲧⲙⲛⲧϫⲁⲥⲓϩⲏⲧ
…
99 ⲉⲧϥϫⲟ ⲙⲙⲟⲥ ϩⲣⲁⲓ ⲛϩⲏⲧⲟⲩ ⲛϭⲓⲡⲥⲁⲧⲁⲛⲁⲥ ⲕⲁⲧⲁⲧϩⲉ ⲉⲧⲥⲏϩ
…
100 ϫⲉⲉⲛⲥⲃⲧⲱⲧ ⲉϫⲓ ⲙ ⲛⲉⲕⲃⲁ ⲙⲙⲛⲧⲁⲧⲥⲱⲧⲙ ⲛⲓⲙ ·
…
101 ⲁⲩⲱ ϫⲓⲥⲉ ⲛⲓⲙ ⲉⲧⲧⲱⲟⲩⲛ ⲉϩⲣⲁⲓ ⲉϫⲙⲡⲥⲟⲟⲩⲛ ⲙⲡⲛⲟⲩⲧⲉ ·
…
102 ⲁⲩⲱ ⲉϣⲱⲡⲉ ⲉⲧⲉⲧⲛⲧⲙⲧⲛⲛⲟⲟⲩ ⲛⲁⲛ ⲉⲧⲃⲏⲏⲧⲟⲩ
…
103 ⲉⲓⲙⲉ ϫⲉⲉⲧⲉⲧⲛⲣⲛⲟⲃⲉ ⲉⲡⲉⲛⲧⲁϥ ⲧⲁⲙⲓⲱⲧⲛ
…
104 ⲟⲩⲛⲟⲩⲙⲛⲧⲛⲟⲩⲧⲉ ϣⲟⲟⲡ ⲛⲛⲁϩⲣⲛⲛⲣⲱⲙⲉ ⲉⲟⲩⲙⲛⲧⲁⲧⲛⲟⲩⲧⲉ ⲧⲉ ⲛⲛⲁϩⲣⲙⲡⲛⲟⲩⲧⲉ ⲉⲧⲉⲧⲁⲓ ⲧⲉ ·
…
105 ϩⲉⲛⲣⲱⲙⲉ ⲉⲩϩⲱⲃⲥ ⲉⲃⲟⲗ ⲉϫⲛⲛⲛⲟⲃⲉ ⲛⲛⲉⲩⲉⲣⲏⲩ ·
…
106 ⲉⲙⲛⲟⲩⲁϯⲥⲃⲱ ⲛⲟⲩⲁ ⲙⲙⲟⲟⲩ ·
…
107 ⲁⲩⲱ ⲙⲙⲛⲟⲩⲁ ⲛϩⲏⲧⲟⲩ ϫⲡⲓⲟ ⲙⲛⲉⲧϩⲓⲧⲟⲩⲱϥ ·
…
108 ϫⲉⲕⲁⲥ ϩⲱⲱϥ ⲉⲛⲛⲉϥϫⲡⲓⲟϥ ⲉⲩϫⲱ ⲙⲙⲟⲥ ϫⲉⲟⲩⲙⲛⲧⲛⲟⲩⲧⲉ ⲧⲉ · ⲉⲩⲙⲛⲧⲁⲧⲛⲟⲩⲧⲉ ⲧⲉ ·
…
109 ϫⲉⲥⲉⲁⲛⲉⲭⲉ ⲙⲡⲉⲧⲡⲁⲣⲁⲃⲁ ϩⲣⲁⲓ ϩⲛⲛⲉϥϩⲃⲏⲩⲉ ⲧⲏⲣⲟⲩ ⲉⲧϩⲟⲟⲩ ·
…
110 ⲉⲧⲃⲉ ϫⲉⲁϥⲑⲃⲃⲓⲟϥ ⲛⲁⲩ ⲉⲧⲣⲉⲩⲕⲁⲁϥ ϩⲙⲡⲟⲩⲱϣ ⲛⲧⲉⲛⲉϥϩⲏⲧ ⲉⲧϩⲟⲟⲩ ·
…
111 ⲉⲩϫⲱ ⲙⲙⲟⲥ ϫⲉⲟⲩϩⲁⲣϣϩⲏⲧ ⲡⲉ ⲡⲛⲟⲩⲧⲉ ·
…
112 ⲁⲩⲱ ⲙⲉϥϭⲱⲛⲧ ⲉⲛⲉⲧⲣⲛⲟⲃⲉ ·
…
113 ⲉⲩⲥⲱⲕ ⲉϩⲣⲁⲓ ⲉϫⲱⲟⲩ ⲛⲙⲙⲁⲩ ⲛⲟⲩⲧⲁⲕⲟ ϩⲓⲟⲩⲥⲟⲛ ⲛⲧϩⲉ ⲛⲡⲁⲓ ⲉⲛⲧⲁⲡⲛⲟⲩⲧⲉ ⲉⲓⲛⲉ ⲉϩⲣⲁⲓ ⲉϫⲱⲟⲩ ⲛⲟⲩⲕⲁⲧⲁⲕⲗⲩⲥⲙⲟⲥ ⲙⲙⲟⲟⲩ ⲉⲛⲁϣⲱϥ ·
…
114 ⲉⲧⲃⲉ ϫⲉⲁϥϭⲱⲛⲧ ⲉⲣⲟⲟⲩ ⲉⲙⲁⲧⲉ ϩⲛⲟⲩⲛⲟϭ ⲛⲟⲣⲅⲏ ·
…
115 ⲁⲩⲱ ⲛⲧϩⲉ ⲛⲛⲕⲟⲟⲩⲉ ⲧⲏⲣⲟⲩ ⲉⲛⲧⲁϥϥⲟⲧⲟⲩ ⲉⲃⲟⲗ ⲛⲛⲁϩⲣⲁϥ ϫⲓⲛⲛϣⲟⲣⲡ ϣⲁϩⲣⲁⲓ ⲉⲡⲟⲟⲩ ⲉⲧⲃⲉ ϫⲉⲁⲩⲣⲛⲟⲃⲉ ⲉⲣⲟϥ ·
…
116 ⲁⲩⲱ ⲛⲧϩⲉ ⲛⲛⲁⲓ ⲧⲏⲣⲟⲩ ⲉⲧϥⲛⲁⲥϩⲟⲩⲱⲣⲟⲩ ϩⲛⲟⲩϭⲱⲛⲧ ⲉⲛⲁϣⲱϥ ⲉϩⲣⲁⲓ ⲉⲧⲉϩⲣⲱ ⲛⲕⲱϩⲧ ⲉⲧⲙⲟⲩϩ ϩⲣⲁⲓ ϩⲛⲧⲥⲩⲛⲧⲉⲗⲉⲓⲁ · ⲙⲡⲁⲓⲱⲛ ·
…
117 ⲉⲧⲃⲉ ϫⲉⲙⲡⲟⲩϩⲁⲣⲉϩ ⲉⲛⲉϥⲉⲛⲧⲟⲗⲏ ·
…
118 ⲛⲟⲩⲁⲇⲓⲕⲟⲥ ⲅⲁⲣ ⲁⲛ ⲡⲉ ⲡⲛⲟⲩⲧⲉ ⲉⲧⲉⲓⲛⲉ · ⲏ ⲉⲧⲛⲁⲉⲓⲛⲉ ⲛⲧⲉϥⲟⲣⲅⲏ ϩⲛⲟⲩϭⲱⲛⲧ ⲙⲛⲟⲩⲥⲁϩⲟⲩ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲛⲟⲩⲟⲉⲓϣ ⲛⲓⲙ ⲉⲧⲣⲛⲟⲃⲉ · ⲏ ⲉⲧⲛⲁⲣⲛⲟⲃⲉ ⲉⲣⲟϥ
…
119 ⲛⲛⲉⲥϣⲱⲡⲉ
…
120 ⲁⲗⲗⲁ ⲙⲉⲛⲙⲡϣⲁ ⲡⲉⲧⲛϫⲓ ⲙⲙⲟϥ · ⲉⲧⲃⲉⲛⲉⲛϩⲃⲏⲩⲉ ⲉⲧϩⲟⲟⲩ ·
…
121 ⲉⲧⲃⲉⲡⲁⲓ ⲕⲁⲧⲁⲛⲉⲅⲣⲁⲫⲏ ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲛⲕⲟⲧⲕ ⲙⲛⲧⲃⲛⲏ ⲛⲓⲙ ·
…
122 ⲏ ϭⲉ ⲗⲁⲁⲩ ⲛⲍⲱⲟⲛ ⲉⲡⲧⲏⲣϥ ·
…
123 ϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲱϩ ⲉⲧϭⲓϫ ⲙⲡⲉⲧϩⲓⲧⲟⲩⲱϥ ·
…
124 ⲏ ⲧⲉϥⲟⲩⲉⲣⲏⲧⲉ · ⲏ ϭⲉ ⲗⲁⲁⲩ ⲙⲙⲉⲗⲟⲥ ⲛⲧⲁϥ ϩⲛⲟⲩⲡⲁⲑⲟⲥ ⲛⲉⲡⲓⲑⲩⲙⲓⲁ ·
…
125 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲉⲓⲱⲣϩ ⲉϩⲟⲩⲛ ⲉϩⲣⲁⲓ ⲡϩⲟ ⲙⲡⲉⲧϩⲓⲧⲟⲩⲱϥ ϩⲛⲟⲩⲉⲡⲓⲑⲩⲙⲓⲁ ·
…
126 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲡⲟⲣϣϥ ⲉⲃⲟⲗ ⲉϫⲛϩⲏⲧϥ ⲉϩⲣⲁⲓ ⲉϫⲙⲡⲕⲁϩ ·
…
127 ⲉⲧⲣⲉϥⲉⲓⲣⲉ ⲛϩⲉⲛⲥⲙⲟⲧ ⲉⲩϩⲟⲟⲩ ϩⲛϩⲉⲛⲙⲉⲉⲩⲉ ⲙⲡⲟⲣⲛⲓⲁ ⲉⲩⲕⲟⲗⲁⲍⲉ ⲙⲙⲟϥ ϩⲓⲧⲛⲧϩⲏⲇⲟⲛⲏ ⲛⲧⲉⲡⲓⲑⲩⲙⲓⲁ ⲉⲧⲥⲟⲟϥ ·
…
128 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲡⲱⲧ ⲉϩⲟⲩⲛ ⲉⲡⲉⲧϩⲓⲧⲟⲩⲱϥ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ⲉⲧⲣⲉϥⲕⲧⲉ ⲛⲉϥⲁⲗⲟⲙ ⲉⲃⲟⲗ ⲉⲣⲟϥ
…
129 ⲛϥϯⲡⲓ ϩⲱⲱϥ ϩⲛⲟⲩⲡⲁⲑⲟⲥ ⲛⲉⲡⲓⲑⲩⲙⲓⲁ ·
…
130 ⲁⲩⲱ ϩⲛⲟⲩⲥⲱⲃⲉ ⲙⲡⲟⲩⲃⲱⲗ ⲉⲃⲟⲗ ϩⲛϩⲉⲛⲙⲛⲧⲁⲣⲅⲟⲥ ·
…
131 ϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲓϩⲣⲁϥ ϩⲛⲧⲙⲏⲧⲉ ⲛϩⲉⲛϣⲏⲣⲉ ϣⲏⲙ ϩⲁⲧⲏⲛ
…
132 ⲁⲩⲱ ⲥⲥϩⲟⲩⲟⲣⲧ ⲛϭⲓⲧⲉⲧⲛⲁϫⲓϩⲣⲁⲥ ϩⲛⲧⲙⲏⲧⲉ ⲛϩⲉⲛϣⲉⲉⲣⲉ ϣⲏⲙ ϩⲁⲧⲛⲧⲏⲩⲧⲛ
…
133 ϫⲉⲁⲩϯⲛⲟⲩϭⲥ ⲙⲡϣⲁϫⲉ ⲙⲡⲛⲟⲩⲧⲉ ⲕⲁⲧⲁ [..]
…
134 ⲁⲣⲁ ⲗⲟⲑ […] ⲛⲧⲁⲡⲉⲛ [….] ⲉϩⲱⲛ ⲙⲙⲟⲟⲩ ⲉⲧⲟⲟⲧⲛ ⲉⲧⲛϫⲓϩⲣⲁⲛ ϩⲛⲧⲙⲏⲧⲉ ⲛϩⲉⲛϣⲏⲣⲉ ϣⲏⲙ · ⲁⲩⲱ ϩⲛⲧⲙⲏⲧⲉ ⲛϣⲉⲉⲣⲉ ϣⲏⲙ ·
…
135 ⲟⲩⲇⲉ ⲣⲱ ⲁⲛⲟⲛ ⲧⲏⲣⲛ ⲕⲁⲧⲁⲡϣⲁϫⲉ ⲙⲛⲁⲡⲟⲥⲧⲟⲗⲟⲥ ⲉⲧⲙⲧⲣⲉⲩϩⲉ ⲉⲗⲁⲁⲩ ⲛϣⲗⲟϥ ϩⲣⲁⲓ ⲛϩⲏⲧⲛ ⲛϣϫⲥⲟϭ · ⲏ ⲗⲗⲏⲃ · ⲛⲁⲓ ⲉⲧⲉⲛⲉϣϣⲉ ·
…
136 ϥⲥϩⲟⲩⲟⲣⲧ ⲛϭⲓⲡⲉⲧⲉⲟⲩⲛⲟⲩⲉⲡⲓⲑⲩⲙⲓⲁ ⲛϫⲱϩⲙ ϩⲙⲡⲉϥϩⲏⲧ ·
…
137 ⲉϥϫⲱⲧⲙ ⲙⲡⲉⲧϩⲓⲧⲟⲩⲱϥ ·
…
138 ⲏ ⲉϥⲧⲱϩⲥ ⲙⲙⲟϥ ϩⲛⲟⲩⲛⲉϩ ⲉϥϣⲱⲛⲉ ·
…
139 ϥⲥϩⲟⲩⲟⲣⲧ ⲛϭⲓⲟⲩϣⲏⲣⲉ ϣⲏⲙ ⲏ ⲟⲩϣⲉⲉⲣⲉ ϣⲏⲙ · ⲏ ⲟⲩⲛⲟϭ ⲛⲣⲱⲙⲉ · ⲏ ⲟⲩⲛⲟϭ ⲛⲥϩⲓⲙⲉ · ⲉⲟⲩⲛⲟⲩⲉⲡⲓⲑⲩⲙⲓⲁ ⲛϫⲱϩⲙ ϩⲙⲡⲉϥϩⲏⲧ
…
140 ⲉⲣⲉⲡⲉⲧϩⲓⲧⲟⲩⲱⲟⲩ ⲧⲱϩⲥ ⲙⲙⲟⲟⲩ ⲡⲉⲩϫⲱⲕⲙ ⲙⲙⲟⲟⲩ ϩⲛⲛⲉⲩϣⲱⲛⲉ ·
…
141 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲧⲉϩⲥ ⲡⲉⲧϩⲓⲧⲟⲩⲱϥ ·
…
142 ⲏ ⲛϥϫⲟⲕⲙⲉϥ ⲉϥϣⲱⲛⲉ ϩⲣⲁⲓ ⲛϩⲏⲧⲛ ⲁϫⲙⲡϩⲗⲗⲟ ·
…
143 ⲥⲥϩⲟⲩⲟⲣⲧ ⲛϭⲓⲧⲉⲧⲛⲁⲧⲉϩⲥ ⲧⲉⲧϩⲓⲧⲟⲩⲱⲥ ·
…
144 ⲏ ⲛⲥϫⲟⲕⲙ ⲉⲥ ⲉⲥϣⲱⲛⲉ ϩⲣⲁⲓ ⲛϩⲏⲧⲧⲏⲩⲧⲛ ϩⲱⲧⲧⲏⲩⲧⲛ ⲁϫⲛⲧϩⲗⲗⲱ ⲉⲧⲧⲏϣ ⲛⲏⲧⲛ ·
…
145 ϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲉⲕⲙ ⲡⲉⲧϩⲓⲧⲟⲩⲱϥ ·
…
146 ⲏ ⲛϥⲧⲁϩⲥ ⲉϥϣⲱⲛⲉ ϩⲣⲁⲓ ⲛϩⲏⲧⲛ ϩⲁⲧⲏⲛ ⲏ ϩⲁⲧⲛⲧⲏⲩⲧⲛ .
…
147 ϩⲟⲩⲛ ⲛⲣⲙ [..] ϭⲉ ⲗⲁⲁⲩ ⲙⲙⲁⲩ ⲙⲁⲩⲁⲁⲩ ⲉⲙⲛⲕⲉⲟⲩⲁ ⲛⲛⲁⲩ ⲛⲙⲙⲁⲩ ⲏ ⲕⲉⲥⲛⲁⲩ ·
…
148 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲕⲱ ⲛⲟⲩⲥϩⲓⲙⲉ ⲉⲧⲣⲉⲥⲛⲕⲟⲧⲕ ⲙⲡⲙⲁ ⲙⲡⲣⲟ ·
…
149 ⲏ ⲙⲡⲕⲱⲧⲉ ⲛⲧⲥⲩⲛⲁⲅⲱⲅⲏ ϩⲁϩⲧⲏⲛ ⲁϫⲙⲡϩⲗⲗⲟ · ⲏ ⲉⲧⲣⲉⲟⲩⲟⲛ ⲣⲱ ⲛⲕⲟⲧⲕ ⲙⲙⲁⲩ ϩⲟⲗⲱⲥ ·
…
150 ϥⲥϩⲟⲩⲟⲣⲧ ⲛϭⲓⲡⲉⲧⲛⲁⲕⲱ ⲛⲟⲩϩⲟⲟⲩⲧ ⲉⲧⲣⲉϥⲛⲕⲟⲧⲕ ⲙⲡϩⲟⲩⲛ ⲙⲡⲣⲟ ⲛⲃⲟⲗ ⲛⲧⲉⲧⲛⲥⲩⲛⲁⲅⲱⲅⲏ ϩⲁⲧⲛⲧⲏⲩⲧⲛ ·
…
151 ⲉⲓⲙⲏⲧⲓ ⲉⲛϩⲗⲗⲟ ⲉⲧⲧⲏϣ ⲛϩⲏⲧⲛ ⲙⲡⲟⲩ[..]ⲙⲉ ⲛϩⲗⲗⲟ ⲛϣⲟⲣⲡ ϩⲁϩⲧⲏⲛ ·
…
152 ϫⲉⲕⲁⲥ ⲛⲧⲟϥ ⲥⲱⲱϥ ⲉϥ[……….]
…
153 ϥⲥϩⲟⲩⲟⲣⲧ ⲛϭⲓⲟⲩ [..] ⲟⲩ […] […] ϩⲣⲁⲓ [……..] ⲉϥ [……….] ⲙⲛ [……….] ⲛⲣⲟ [………] ⲥⲩⲛ [………] ϩⲁⲧⲛ […] ⲧ [..] [..] ⲉⲧⲣⲉϥ […….] ⲙⲛ [……….] ⲛⲉⲧⲣ [……..] ⲙⲉϣⲁ [……..] ⲛⲁϥ ·
…
154 […..] ⲛⲏⲩ ϣⲁ [….] ϩⲁⲧⲛ [……..] ⲉⲣⲱ ⲧⲏ · […] ⲛⲉⲧⲛ [……..] ⲧⲛ ϩⲓⲃⲱ [….] ⲧⲁⲥⲁ ⲣ · [….] ⲧⲏⲩⲧⲛ [….] ⲗⲟ ⲉⲧⲃ […..] ⲧⲛⲉⲧ [……..] ⲧⲛ ·
…
155 ⲁ […] ϣⲁⲛⲧⲉ [….] ⲁⲩⲉⲧ [……..] ϩⲏⲩ [……..] ⲉⲧⲉ [……..]
…