1 ⲁⲩⲱ ⲉⲛⲛⲁⲧⲁⲩⲟ ⲉⲡⲉⲥⲏⲧ ⲙⲡⲙⲁ ⲉⲛⲉϥⲟⲩⲏϩ ⲛϩⲏⲧϥ ⲛⲧⲛϣⲣϣⲱⲣϥ ϣⲁϩⲣⲁⲓ ⲉⲛⲉϥⲥⲛⲧⲉ ⲉⲧⲙⲧⲣⲉⲣⲱⲙⲉ ⲟⲩⲱϩ ⲛϩⲏⲧϥ ϣⲁⲉⲛⲉϩ ⲉϥⲛⲁϯϫⲣⲟⲡ ⲙⲡⲉⲧϩⲓⲧⲟⲩⲱϥ
…
2 ⲛⲉⲧⲛⲁⲡⲱⲧ ⲇⲉ ⲟⲛ ⲛⲟⲩⲟⲉⲓϣ ⲛⲓⲙ ϩⲣⲁⲓ ⲛϩⲏⲧⲛ ⲉϫⲙⲡϩⲗⲗⲟ ⲛⲥⲉⲃⲱⲕ ⲉⲣⲁⲧϥ ⲛϩⲉⲛⲉⲡⲓⲥⲕⲟⲡⲟⲥ ⲁϫⲛⲧⲱϣ ⲉⲧⲣⲉⲩⲧⲁⲗⲉϭⲓϫ ⲉϫⲱⲟⲩ ϩⲛⲟⲩϯⲧⲱⲛ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ ⲉⲃⲟⲗ ϫⲉⲡⲥⲱⲧⲙ ⲥⲟⲧⲡ ⲉϩⲟⲩⲉ ⲉⲧⲣⲉⲛⲉⲧⲙⲙⲁⲩ ⲧⲁⲗⲟ ⲉϩⲣⲁⲓ ⲛϩⲉⲛⲡⲣⲟⲥⲫⲟⲣⲁ ϩⲛⲟⲩⲙⲛⲧⲁⲧⲥⲱⲧⲙ ⲙⲛⲟⲩⲙⲛⲧⲁⲧⲥⲃⲱ
…
3 ⲟⲩⲟⲛ ⲇⲉ ⲛⲓⲙ ⲉⲧⲛⲁⲙⲟⲟϣⲉ ⲕⲁⲧⲁⲛⲕⲁⲛⲱⲛ ⲉⲧⲕⲏ ⲛⲁⲛ ⲉϩⲣⲁⲓ ⲛⲛⲉⲗⲁⲁⲩ ⲛⲣⲱⲙⲉ ⲉϣⲫⲑⲟⲛⲉⲓ ⲉⲣⲟϥ ⲉⲛⲟϫϥ ⲉⲃⲟⲗ ⲉⲓⲧⲉ ⲉϥϩⲓⲡϫⲁⲓⲉ ⲙⲡⲉⲛⲕⲱⲧⲉ ⲉⲓⲧⲉ ⲉϥϩⲛⲧⲥⲩⲛⲁⲅⲱⲅⲏ ⲛⲙⲙⲁⲛ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ
…
4 ⲉϣⲱⲡⲉ ⲇⲉ ⲉϥϣⲁⲛⲉⲓ ⲛϭⲓⲟⲩⲕⲁⲓⲣⲟⲥ ⲛⲧⲉⲡⲛⲟⲃⲉ ϭⲙϭⲟⲙ ⲉϩⲣⲁⲓ ⲉϫⲛⲛⲉⲧⲟⲩⲏϩ ϩⲙⲡⲉⲓⲙⲁ ϩⲙⲡⲕⲁⲓⲣⲟⲥ ⲉⲧⲙⲙⲁⲩ ⲉⲧⲃⲉⲧⲱⲙ ⲛϩⲏⲧ ⲉⲧⲛⲁⲉⲓ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ ⲉⲧⲛⲁⲡⲁⲣⲁⲃⲁ ⲛⲛⲉⲛⲧⲟⲗⲏ ⲉⲧⲕⲏ ⲛⲁⲩ ⲉϩⲣⲁⲓ · ϩⲣⲁⲓ ϩⲓⲡⲉⲓϫⲁⲓⲉ ⲡⲁⲓ ⲧⲉⲛⲟⲩ ⲉⲧⲛⲛϩⲏⲧϥ ·
…
5 ⲁⲩⲱ ϩⲙⲡⲕⲁⲓⲣⲟⲥ ⲉⲧⲙⲙⲁⲩ ⲡⲉⲧⲛⲁⲟⲩⲱϣ ⲉⲡⲱⲧ ⲛⲁϥ ⲉⲡϫⲁⲓⲉ ϩⲙⲙⲁ ⲛⲓⲙ ⲉⲧⲣⲉϥⲟⲩϫⲁⲓ ϥⲟ ⲛⲉⲗⲉⲩⲑⲉⲣⲟⲥ ⲉⲃⲟⲗ ϩⲛⲛⲉⲓⲥⲁϩⲟⲩ ⲧⲏⲣⲟⲩ ·
…
6 ⲉⲧⲣⲉϥⲟⲩⲱϩ ⲛⲁϥ ϩⲓⲡⲓⲧⲟⲟⲩ ⲡⲁⲓ ⲉⲧⲣⲉϥⲧⲁⲗⲉⲡⲣⲟⲥⲫⲟⲣⲁ ⲇⲉ ⲟⲛ ⲉϩⲣⲁⲓ ϩⲙⲡⲙⲁ ⲉⲧⲉϩⲛⲁϥ ϩⲛⲟⲩϩⲟⲧⲉ ⲛⲧⲉⲡⲛⲟⲩⲧⲉ ⲉϥϯ ⲛϩⲧⲏϥ ⲉⲣⲟϥ ⲉⲧⲙⲧⲁⲗⲉⲑⲩⲥⲓⲁ ⲉϩⲣⲁⲓ ϩⲛϭⲉⲗⲁⲁⲩ ⲙⲙⲁ ⲉⲓⲙⲏⲧⲓ ⲉⲡⲙⲁ ⲛⲧⲁϥⲥⲟⲧⲡϥ ⲛⲁϥ ⲛϭⲓϫⲟⲉⲓⲥ ⲡⲛⲟⲩⲧⲉ ⲕⲁⲧⲁⲛⲉⲅⲣⲁⲫⲏ
…
7 ⲛⲉⲧⲛⲁϯ ⲇⲉ ⲟⲛ ⲙⲡⲉⲩⲟⲩⲟⲓ ⲉϩⲟⲩⲛ ⲉⲣⲟⲛ ⲉⲧⲣⲉⲩⲟⲩⲱϩ ⲛⲙⲙⲁⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲓⲧⲉ ⲛⲉⲧϩⲓⲡϫⲁⲓⲉ ⲙⲡⲉⲛⲕⲱⲧⲉ ⲟⲩⲟⲛ ⲛⲓⲙ ⲉⲧⲟ ⲛⲕⲟⲓⲛⲱⲛⲟⲥ ⲛⲙⲙⲁⲛ ϩⲣⲁⲓ ⲛϩⲏⲧⲛ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ
…
8 ⲛⲥⲉⲧⲙⲁⲡⲟⲧⲁⲥⲥⲉ ⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁⲩ · ⲉⲓⲧⲉ ⲛⲟⲩⲃ · ⲉⲓⲧⲉ ϩⲁⲧ · ⲉⲓⲧⲉ ϩⲟⲙⲛⲧ · ⲉⲓⲧⲉ ϩⲟⲉⲓⲧⲉ ⲉⲓⲧⲉ ⲗⲁⲁⲩ ⲛⲛⲕⲁ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ ϫⲉⲙⲡⲟⲩϥⲓ ⲙⲡⲉⲩⲥⲧⲁⲩⲣⲟⲥ ⲉⲧⲣⲉⲩⲟⲩⲁϩⲟⲩ ⲛⲥⲁⲡϫⲟⲉⲓⲥ
…
9 ⲡⲉⲧⲛⲁⲣϩⲧⲏϥ ⲇⲉ ⲟⲛ ⲉϩⲣⲁⲓ ⲉϫⲛⲗⲁⲁⲩ ⲛϩⲛⲁⲁⲩ ϩⲛⲛⲉⲛⲧⲁⲩⲁⲡⲟⲧⲟⲥⲥⲉ ⲙⲙⲟⲟⲩ ⲉⲧⲣⲉⲩϣⲱⲡⲉ ϩⲁⲧⲙⲣⲣⲉ ⲛⲧⲕⲟⲓⲛⲱⲛⲓⲁ ⲙⲡⲛⲟⲩⲧⲉ ⲙⲛⲧⲇⲓⲁⲕⲟⲛⲓⲁ ⲛⲛϩⲏⲕⲉ ·
…
10 ⲉⲧⲣⲉϥⲕⲧⲟϥ ⲛϥⲁⲣⲛⲁ ⲛϥⲕⲱⲧⲉ ⲛⲥⲁⲧϩⲉ ⲛϫⲓⲧⲟⲩ ⲛⲕⲉⲥⲟⲡ ⲉϥⲉϣⲱⲡⲉ ⲉϥⲥϩⲟⲩⲟⲣⲧ ⲉⲁϥϣⲱⲡⲉ ⲛⲧϩⲉ ⲛⲁⲛⲁⲛⲓⲁⲥ ⲙⲛⲥⲁⲡⲡⲓⲣⲁ ⲧⲉϥⲥϩⲓⲙⲉ ·
…
11 ⲁⲩⲱ ⲛⲧϩⲉ ⲛⲕⲁⲓⲛ ⲙⲛⲛⲕⲟⲟⲩⲉ ⲉⲧⲉⲙⲡⲉⲡϫⲟⲉⲓⲥ ⲧⲱⲧ ⲛϩⲏⲧ ⲛϩⲏⲧⲟⲩ ϫⲓⲛⲛϣⲟⲣⲡ ϣⲁϩⲣⲁⲓ ⲧⲉⲛⲟⲩ
…
12 ⲡⲉⲧⲛⲁϯϩⲛⲁⲁⲩ ⲇⲉ ⲟⲛ ⲉⲃⲟⲗ ⲛϫⲓⲟⲩⲉ ⲉⲡϩⲗⲗⲟ ⲙⲛⲛⲉⲥⲛⲏⲩ ⲉϥⲉϣⲱⲡⲉ ⲉϥⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ
…
13 ⲡⲉⲧⲛⲁϥⲓ ⲇⲉ ⲟⲛ ⲛⲟⲩⲛⲉϩ ⲛϫⲓⲟⲩⲉ ⲏ ⲟⲩϩⲟⲙⲛⲧ ⲏ ⲟⲩϩⲟⲓⲧⲉ ⲏ ϭⲉⲗⲁⲁⲩ ⲛⲛⲕⲁ ⲛϥⲧⲁⲁⲩ ⲛϩⲉⲛⲕⲁⲧⲁⲥⲁⲣⲝ ⲛⲧⲁϥ ϩⲓⲃⲟⲗ ⲏ ⲛϭⲉⲗⲁⲁⲩ ⲛⲣⲱⲙⲉ ϩⲓⲃⲟⲗ ⲉϥⲉϣⲱⲡⲉ ⲉϥⲥϩⲟⲩⲟⲣⲧ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ·
…
14 ⲡⲉⲧⲛⲁϯϩⲛⲁⲁⲩ ⲟⲛ ⲛϫⲓⲟⲩⲉ ⲙⲡⲉⲧϩⲓⲧⲟⲩⲱϥ ϩⲛⲟⲩⲕⲣⲟϥ ϩⲣⲁⲓ ⲛϩⲏⲧⲛ ϩⲁϩⲧⲏⲛ ⲏ ϩⲁϩⲧⲛⲧⲏⲩⲧⲛ ⲛⲧⲱⲧⲛ ⲉⲓⲧⲉ ϩⲛⲁⲁⲩ ⲛⲟⲩⲱⲙ · ⲉⲓⲧⲉ ϩⲃⲥⲱ · ⲉⲓⲧⲉ ϩⲟⲩⲥ · ⲉⲓⲧⲉ ⲙⲟⲩⲥ ⲉⲓⲧⲉ ϭⲉⲗⲁⲁⲩ ⲛϩⲛⲁⲁⲩ ⲉⲡⲧⲏⲣϥ ⲛϫⲓⲟⲩⲉ
…
15 ⲙⲡⲟⲩⲧⲁⲙⲉⲡϩⲗⲗⲟ ⲛϣⲟⲣⲡ ϩⲁϩⲧⲏⲛ ⲏ ⲙⲡⲟⲩⲧⲁⲙⲉⲧϩⲗⲗⲱ ⲛϣⲟⲣⲡ ϩⲁⲧⲛⲧⲏⲩⲧⲛ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ ϫⲉⲁⲩⲡⲁⲣⲁⲃⲁ ⲛⲛⲉⲛⲧⲟⲗⲏ ⲛⲧⲁⲛⲉⲛⲉⲓⲟⲧⲉ ϩⲱⲛ ⲙⲙⲟⲟⲩ ⲉⲧⲟⲟⲧⲛ
…
16 ⲉⲧⲙⲧⲣⲉⲗⲁⲁⲩ ⲛⲣⲱⲙⲉ ϯ ⲗⲁⲁⲩ ⲛⲛⲕⲁ ⲙⲡⲉⲧϩⲓⲧⲟⲩⲱϥ ⲛϫⲓⲟⲩⲉ ϩⲛⲟⲩⲕⲣⲟϥ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ · ⲁϫⲛⲧⲣⲉⲩⲧⲟϣϥ ⲉⲃⲟⲗ ϩⲓⲧⲙⲡϩⲗⲗⲟ ϩⲁϩⲧⲏⲛ ⲏ ⲉⲃⲟⲗ ϩⲓⲧⲛⲧϩⲗⲗⲱ ⲉⲧⲧⲏϣ ⲛⲏⲧⲛ ϩⲱⲧⲧⲏⲩⲧⲛ ϩⲁϩⲧⲛⲧⲏⲩⲧⲛ ·
…
17 ⲡⲉⲧⲛⲁϣⲟⲃϥ ⲇⲉ ⲟⲛ ⲏ ⲛⲉⲧⲛⲁϣⲃⲣⲱⲙⲉ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲁϫⲛⲧⲣⲉⲩⲧⲟϣϥ ⲉϥⲉϣⲱⲡⲉ ⲉϥⲥϩⲟⲩⲟⲣⲧ ϫⲉⲁⲩⲡⲁⲣⲁⲃⲁ ⲛⲛⲉⲛⲧⲟⲗⲏ ⲛⲧⲁⲛⲉⲛⲉⲓⲟⲧⲉ ϩⲱⲛ ⲙⲙⲟⲟⲩ ⲉⲧⲟⲟⲧⲛ
…
18 ⲡⲉⲧⲛⲁⲛⲥⲟⲩⲣⲉ ⲇⲉ ⲟⲛ ⲉⲃⲟⲗ ϩⲛⲣⲁⲧϥ ⲛⲣⲱⲙⲉ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲭⲱⲣⲓⲥ ⲁⲛⲁⲅⲕⲏ ⲁϫⲛⲧⲣⲉⲩⲧⲟϣϥ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ ϫⲉⲁⲩⲥⲱϣ ⲛⲛⲉⲛⲧⲟⲗⲏ ⲛⲧⲁⲛⲉⲛⲉⲓⲟⲧⲉ ϩⲱⲛ ⲙⲙⲟⲩ ⲉⲧⲟⲟⲧⲛ
…
19 ⲧⲁⲛⲁⲅⲕⲏ ⲇⲉ ⲧⲉ ⲉϣⲱⲡⲉ ⲉⲛϩⲓⲡϣⲙⲙⲟ ⲏ ⲉⲛⲙⲟⲟϣⲉ ϩⲛⲟⲩϩⲓⲏ · ⲉⲛⲟⲩⲏⲩ ⲉⲃⲟⲗ ⲛⲧⲥⲩⲛⲁⲅⲱⲅⲏ ⲏ ⲛⲧⲟϥ
…
20 ⲉⲛϩⲛⲧⲥⲩⲛⲁⲅⲱⲅⲏ ⲁⲩⲱ ⲛⲧⲉⲟⲩⲥⲟⲩⲣⲉ ⲧⲟⲣⲧⲣ ⲛⲧⲟⲩⲉⲣⲏⲧⲉ ⲛⲟⲩⲁ ⲏ ⲧⲉϥϭⲓϫ ⲁⲩⲱ ⲉⲧⲃⲉⲧⲁⲛⲁⲅⲕⲏ ⲛⲧⲃⲁⲥⲁⲛⲟⲥ ⲉⲣⲉⲡⲉⲧϩⲏⲛ ⲉⲣⲟϥ ⲛⲁⲛⲧⲥ ⲛⲁϥ ⲉϩⲣⲁⲓ ϩⲛⲟⲩϩⲟⲧⲉ ⲛⲧⲉⲡⲛⲟⲩⲧⲉ
…
21 ⲁⲩⲱ ⲧⲁⲓ ⲧⲉ ⲧϩⲉ ⲉⲧⲛⲁϣⲱⲡⲉ ⲙⲡⲉⲧϣⲟⲟⲡ ϩⲓⲡϣⲙⲙⲟ ⲙⲛⲡⲉⲧⲙⲟⲟϣⲉ ϩⲓⲧⲉϩⲓⲏ ⲙⲛⲡⲉⲧϩⲓⲧⲟⲩⲱϥ ⲏ ϭⲉⲗⲁⲁⲩ ⲛⲥⲟⲛ ⲉⲧⲣⲉⲡⲉⲧϩⲏⲛ ⲉⲣⲟϥ ⲛⲧⲥ ⲛⲁϥ ⲉϩⲣⲁⲓ ϩⲛⲟⲩϩⲟⲧⲉ ⲙⲛⲟⲩⲥⲧⲱⲧ ⲉⲛⲁϣⲱϥ
…
22 ⲡⲉⲧⲛⲁⲕⲱ ⲛϩⲉⲛⲙⲉⲉⲩⲉ ⲛϫⲱϩⲙ ϩⲙⲡⲉϥϩⲏⲧ · ⲏ ⲡⲉⲧⲛⲁⲁⲛⲉⲭⲉ ⲛⲟⲩⲉⲡⲓⲑⲩⲙⲓⲁ ⲛⲥⲱⲱϥ ϩⲣⲁⲓ ϩⲙⲡⲉϥⲡⲛⲉⲩⲙⲁ ⲉⲩϣⲱⲃ ⲙⲙⲟϥ ⲏ ⲛⲧⲟϥ ⲉϥϣⲱⲃ ⲙⲡⲉⲧϩⲓⲧⲟⲩⲱϥ ⲏ ⲉⲩⲛⲥⲟⲩⲣⲉ ⲉⲃⲟⲗ ϩⲛⲧⲉϥⲟⲩⲉⲣⲏⲧⲉ ⲏ ⲛⲧⲟϥ ⲉϥⲛⲥⲟⲩⲣⲉ ⲉⲃⲟⲗ ϩⲛⲛⲟⲩⲉⲣⲏⲧⲉ ⲙⲡⲉⲧϩⲓⲧⲟⲩⲱϥ ⲉϥⲉϣⲱⲡⲉ ⲉϥⲥϩⲟⲩⲟⲣⲧ ⲉϣⲱⲡⲉ ⲟⲩϩⲟⲟⲩⲧ ⲡⲉ ⲉϣⲱⲡⲉ ⲟⲩⲥϩⲓⲙⲉ ⲧⲉ
…
23 ⲛⲉⲧⲛⲁⲛⲕⲟⲧⲕ ⲇⲉ ⲟⲛ ϩⲓⲟⲩⲧⲁⲙ ⲉⲩⲣⲥⲛⲁⲩ ⲏ ⲛⲉⲧⲛⲁⲛⲕⲟⲧⲕ ⲉⲩϩⲏⲛ ⲉϩⲟⲩⲛ ϩⲟⲗⲱⲥ ⲉⲧⲣⲉⲩϫⲱϩ ⲏ ⲉⲧⲣⲉⲩϫⲱⲣⲡ ⲉⲛⲉⲩⲉⲣⲏⲩ ϩⲟⲗⲱⲥ ϩⲛⲟⲩⲡⲁⲑⲟⲥ ⲛⲉⲡⲓⲑⲩⲙⲓⲁ ⲉⲩⲉϣⲱⲡⲉ ⲉⲩⲥϩⲟⲟⲩⲟⲣⲧ ⲉϣⲱⲡⲉ ⲟⲩϩⲟⲟⲩⲧ ⲡⲉ ⲉϣⲱⲡⲉ ⲟⲩⲥϩⲓⲙⲉ ⲧⲉ ·
…
24 ⲛⲉⲧⲛⲁⲁⲛⲉⲭⲉ ⲇⲉ ⲟⲛ ⲉⲩϩⲙⲟⲟⲥ ⲉϩⲣⲁⲓ ⲉⲩϩⲏⲛ ⲉϩⲟⲩⲛ ⲉⲡⲉⲧϩⲓⲧⲟⲩⲱⲟⲩ ⲉⲟⲩⲛⲟⲩⲉⲡⲓⲑⲩⲙⲓⲁ ⲛⲥⲱⲱϥ ϩⲙⲡⲉⲩϩⲏⲧ ⲉⲩⲉϣⲱⲡⲉ ⲉⲩⲥϩⲟⲩⲟⲣⲧ ⲉϣⲱⲡⲉ ⲟⲩϩⲟⲟⲩⲧ ⲡⲉ ⲉϣⲱⲡⲉ ⲟⲩⲥϩⲓⲙⲉ ⲧⲉ
…
25 ⲛⲉⲧⲛⲁⲧⲱⲟⲩⲛ ⲇⲉ ⲟⲛ ϩⲛⲛⲉⲩⲙⲁ ⲛⲛⲕⲟⲧⲕ ⲛⲥⲉⲧϩⲛⲟⲟⲩ ⲉϩⲟⲩⲛ ⲉⲙⲙⲁ ⲛⲛⲕⲟⲧⲕ ⲛⲛⲉⲧϩⲓⲧⲟⲩⲱⲟⲩ ⲉⲧⲣⲉⲩϭⲟⲙϭⲙ ϩⲛⲟⲩⲡⲁⲑⲟⲥ ⲛⲉⲡⲓⲑⲩⲙⲓⲁ ⲉⲛⲉⲧϩⲓⲧⲟⲩⲱⲟⲩ ⲉⲩⲛⲕⲧⲟⲕ ⲉⲛⲥⲉⲥⲟⲟⲩⲛ ⲁⲛ ⲏ ⲛⲧⲟϥ ⲉⲩⲥⲟⲟⲩⲛ ⲉⲩⲁⲛⲉⲭⲉ ⲛⲛⲉⲩⲉⲣⲏⲩ ⲉⲩϣⲁϫⲉ ϩⲛⲟⲩ
…