1 ϩⲓⲡϫⲁⲓⲉ ϩⲙⲡⲏⲓ ⲙⲡⲁⲉⲓⲱⲧ ⲉⲧⲣⲁⲙⲉⲧⲁⲛⲟⲉⲓ ϩⲁⲡⲁϣⲁⲓ ⲛⲛⲁⲙⲛⲧϣⲁϥⲧⲉ ·
. . .
2 ⲁⲩⲱ ⲡⲁⲓ ⲡⲉⲧϩⲙⲡⲁϩⲏⲧ ϫⲉⲕⲁⲛ ⲉϣⲱⲡⲉ ⲛϯⲛⲁⲣⲙⲡϣⲁ ⲁⲛ ⲛⲛⲁⲩ ⲉⲡϫⲟⲉⲓⲥ ⲛϩⲟ ϩⲓϩⲟ ϩⲛⲟⲩⲱⲛϩ ⲉⲃⲟⲗ ϩⲙⲡⲙⲁ ⲉϯⲛⲁⲃⲱⲕ ⲉⲣⲟϥ ϫⲉⲁⲛⲅⲟⲩⲣⲱⲙⲉ ⲛⲣⲉϥⲣⲛⲟⲃⲉ
. . .
3 ⲁⲗⲗⲁ ϯⲛⲁⲁⲅⲱⲛⲓⲍⲉ ⲉⲧⲣⲁⲥⲉⲓ ⲙⲙⲟϥ ϩⲓϫⲙⲡⲕⲁϩ ϩⲛⲟⲩϩⲱⲡ · ⲉⲛϩⲟⲥⲟⲛ ⲉⲛϥⲕⲱⲗⲩⲉ ⲛⲗⲁⲁⲩ ⲁⲛ ⲟⲩⲧⲉ ⲁⲛⲟⲕ ⲟⲩⲧⲉ ⲗⲁⲁⲩ ⲛⲣⲱⲙⲉ ⲉϥⲙⲉⲧⲁⲛⲟⲉⲓ · ⲏ ⲉϥⲛⲁⲙⲉⲧⲁⲛⲟⲉⲓ ⲁⲩⲱ ⲉⲓϣⲁⲛⲃⲱⲕ ϣⲁⲣⲟϥ ϥⲣⲱϣⲉ ϩⲛⲛⲉϥⲙⲛⲧϣⲁⲛϩⲧⲏϥ ⲉⲧⲣⲉϥⲣⲟⲩⲛⲁ ⲙⲛⲧⲁⲙⲛⲧⲉⲃⲓⲏⲛ ·
. . .
4 ⲙⲟⲛⲟⲛ ⲧⲁⲓⲧⲉ ⲧϩⲉ ⲉϣⲁⲓϣⲗⲏⲗ ϩⲙⲡⲁⲏⲓ ⲉⲓⲉⲝⲟⲙⲟⲗⲟⲅⲉⲓ ⲛⲛⲁⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ · ⲉⲓϫⲱ ⲙⲙⲟⲥ ⲉⲓⲣⲓⲙⲉ ϫⲉⲙⲁⲣⲓⲙⲡϣⲁ ⲛⲛⲁⲩ ⲉⲣⲟϥ ϩⲙⲡⲙⲁ ⲉϯⲛⲁⲃⲱⲕ ⲉⲣⲟϥ ⲁⲩⲱ ⲙⲁⲣⲉϥⲕⲟⲗⲁⲍⲉ ⲙⲙⲟⲓ ϩⲛⲟⲩⲕⲱϩⲧ
. . .
5 ⲁⲗⲗⲁ ϯⲡⲓⲥⲧⲉⲩⲉ ⲉⲧⲣⲉϥⲣⲟⲩⲛⲁ ⲛⲙⲙⲁⲓ ϩⲓⲧⲛⲛⲉⲧⲛϣⲗⲏⲗ ⲛⲉⲥⲛⲏⲩ ·
. . .
6 ⲁⲩⲱ ϯⲙⲉⲉⲩⲉ ϫⲉⲛⲉⲧⲁⲅⲱⲛⲓⲍⲉ ⲉⲧⲣⲉⲩⲥⲉⲓ ⲙⲙⲟϥ ϩⲓϫⲙⲡⲕⲁϩ ϩⲛϩⲉⲛϣⲗⲏⲗ ⲙⲛϩⲉⲛⲛⲏⲥⲧⲉⲓⲁ ⲙⲛϩⲉⲛⲟⲩϣⲏ ⲛⲣⲟⲓⲉⲥ ⲙⲛϩⲉⲛⲥⲙⲟⲩ · ⲙⲛϩⲉⲛⲙⲉⲗⲉⲧⲁ ⲉⲛⲁϣⲱⲟⲩ ⲙⲛϩⲉⲛⲙⲛⲧⲣⲉϥϫⲓⲥⲃⲱ · ϩⲣⲁⲓ ϩⲛϩⲩⲡⲟⲧⲁⲅⲏ ⲛⲓⲙ ⲙⲛⲟⲩⲑⲃⲃⲓⲟ ϩⲣⲁⲓ ϩⲛⲙⲛⲧⲥⲧⲙⲏⲧ ⲛⲓⲙ ⲙⲛⲟⲩⲙⲛⲧⲣⲙⲛϩⲏⲧ ⲙⲛⲛⲕⲉϩⲃⲏⲩⲉ ⲧⲏⲣⲟⲩ
. . .
7 ⲛⲧⲟⲟⲩ ⲟⲛ ⲛⲉⲧⲛⲁⲥⲉⲓ ⲙⲙⲟϥ ϩⲙⲡⲙⲁ ⲉⲧⲟⲩⲛⲁⲃⲱⲕ ⲉⲣⲟϥ ⲁⲩⲱ ⲛⲧⲟⲟⲩ ⲛⲉⲧⲛⲁⲛⲁⲩ ⲉⲣⲟϥ ⲛϩⲟ ϩⲓϩⲟ ϩⲙⲡⲙⲁ ⲉⲧⲙⲙⲁⲩ ·
. . .
8 ⲛⲉⲧⲟ ⲇⲉ ⲛⲁⲧⲥⲱⲧⲙ ⲛⲟⲩⲟⲉⲓϣ ⲛⲓⲙ ⲙⲙⲁⲥⲧⲛⲟⲩⲧⲉ ⲛϫⲁⲥⲓϩⲏⲧ ⲛ ⲃⲁⲃⲉⲣⲱⲙⲉ ⲛⲁⲧⲥⲃⲱ ⲛⲛⲁϣⲧϩⲏⲧ ⲛⲛⲁϣⲧⲉⲓⲙⲉ ⲛⲟⲩⲁ ϩⲓϩⲏⲧ ⲛⲁⲧϣⲡϩⲙⲟⲧ ⲉⲩϫⲁϩⲙ ·
. . .
9 ⲁⲩⲱ ⲉⲩⲥⲟⲟϥ ϩⲛⲧⲉⲩⲥⲩⲛⲉⲓⲇⲏⲥⲓⲥ ⲉⲧⲣⲟⲕϩ ⲉⲣⲟⲟⲩ ϩⲙⲡϯⲧⲱⲛ ⲙⲛⲡⲙⲟⲥⲧⲉ ⲙⲛⲧⲙⲛⲧϫⲁϫⲉ ϩⲛϩⲉⲛⲙⲛⲧⲣⲉϥⲕⲱⲙϣ ⲙⲛϩⲉⲛⲙⲛⲧⲣⲉϥϯⲛⲟⲩϭⲥ ⲙⲡϣⲁϫⲉ ⲙⲡⲛⲟⲩⲧⲉ · ⲙⲛϩⲉⲛⲕⲣⲙⲣⲙ ⲙⲛϩⲉⲛⲙⲛⲧⲣⲉϥϭⲛⲁⲣⲓⲕⲉ ⲙⲛϩⲉⲛⲙⲛⲧϣⲟⲩϣⲟ ⲙⲛϩⲉⲛⲡⲟⲣⲛⲉⲓⲁ ⲙⲛϩⲉⲛⲕⲟⲟⲩⲉ ⲧⲏⲣⲟⲩ ⲉⲛⲁϣⲱⲟⲩ ⲙⲛϩⲱⲃ ⲛⲓⲙ ⲉϥϩⲟⲟⲩ
. . .
10 ⲛⲁⲓ ⲙⲛⲛⲉⲓⲕⲟⲟⲩⲉ ⲛⲉⲧⲉⲓⲣⲉ ⲙⲙⲟⲟⲩ ⲛⲥⲉⲛⲁⲣⲙⲡϣⲁ ⲁⲛ ⲉⲛⲉϩ ⲉⲧⲣⲉⲩⲥⲉⲓ ⲙⲡϫⲟⲉⲓⲥ ⲓⲏⲥⲟⲩⲥ ϩⲓϫⲙⲡⲕⲁϩ ϩⲛⲟⲩⲡⲓⲥⲧⲓⲥ
. . .
11 ⲙⲁⲗⲓⲥⲧⲁ ⲇⲉ ϫⲉⲉⲩⲉⲛⲁⲩ ⲉⲣⲟϥ ⲛϩⲟ ϩⲓϩⲟ ϩⲣⲁⲓ ϩⲛⲙⲡⲏⲩⲉ ϩⲙⲡⲙⲁ ⲉⲧⲟⲩⲛⲁⲃⲱⲕ ⲉⲣⲟϥ ⲁⲩⲱ ⲛⲁⲓ ⲛⲁⲙⲉ ⲛⲧⲉⲓⲙⲓⲛⲉ ⲛⲉⲧϥⲛⲁⲣⲟⲕϩⲟⲩ ϩⲛⲟⲩⲕⲱϩⲧ ⲉⲙⲉϥⲱϣⲙ
. . .
12 ⲛⲁⲓ ⲁⲓϫⲟⲟⲩ ⲛⲏⲧⲛ ⲉⲓⲧⲁⲙⲟ ⲙⲙⲱⲧⲛ ϫⲉⲛⲓⲟⲩⲱϣ ⲡⲉ ⲉϭⲱ ϩⲙⲡⲁⲏⲓ ⲉⲓⲙⲉⲧⲁⲛⲟⲉⲓ ⲛⲛⲉϩⲟⲟⲩ ⲧⲏⲣⲟⲩ ⲙⲡⲁⲱⲛϩ
. . .
13 ⲧⲉⲛⲟⲩ ⲇⲉ ϩⲱⲱϥ ϯϫⲱ ⲙⲙⲟⲥ ⲛⲏⲧⲛ ϫⲉϯⲟⲩⲱϣ ⲉⲧⲣⲁϭⲱ ϩⲛⲧⲙⲏⲧⲉ ⲛⲛⲁⲥⲛⲏⲩ ⲛϣⲏⲣⲉ ⲙⲡⲛⲟⲩⲧⲉ · ⲁⲩⲱ ⲛϣⲏⲣⲉ ⲛⲛⲁⲉⲓⲟⲧⲉ ⲉⲧⲣⲉⲛϭⲛϩⲏⲩ ⲉⲛⲉⲛⲉⲣⲏⲩ ϫⲉⲡⲁⲓ ⲡⲉ ⲡⲟⲩⲱϣ ⲙⲡⲛⲟⲩⲧⲉ ⲁⲩⲱ ⲡⲁⲓ ⲡⲉ ⲡⲟⲩⲱϣ ⲛⲛⲁⲉⲓⲟⲧⲉ ⲛϩⲟⲩⲟ ⲉϣⲉ ⲛⲣⲟⲙⲡⲉ ⲉⲓϣⲟⲟⲡ ϩⲓⲡϫⲁⲓⲉ
. . .
14 ⲁⲩⲱ ⲧⲁⲓ ⲧⲉ ⲧϩⲉ ⲉⲧⲉϩⲛⲁⲓ ⲉϥⲓ ⲉϩⲣⲁⲓ ϩⲁϩⲱⲃ ⲛⲓⲙ ⲉⲧⲛⲏⲩ ⲉϩⲣⲁⲓ ⲉϫⲱⲓ ϩⲱⲥ ⲉϣϫⲉ ⲉⲓⲉⲓⲣⲉ ⲁⲛ ⲛⲟⲩϩⲱⲃ
. . .
15 ⲡϩⲗⲗⲟ ⲙⲛⲛϩⲗⲗⲟⲓ ⲧⲏⲣⲟⲩ ⲛⲉⲧϩⲟⲥⲉ ϩⲛϩⲱⲃ ⲛⲓⲙ ⲁⲩⲱ ⲧⲛϣⲡϩⲙⲟⲧ ⲛⲧⲟⲟⲧⲟⲩ ⲛⲛⲉⲥⲛⲏⲩ ⲉⲧϣⲡϩⲓⲥⲉ ⲛⲙⲙⲁⲛ ⲛⲁⲓ ⲉⲧⲥⲱⲧⲙ ⲛⲥⲁⲡⲉⲛϣⲁϫⲉ ϩⲛϩⲱⲃ ⲛⲓⲙ ⲉⲧⲉⲟⲩⲛϭⲟⲙ ⲙⲙⲟⲟⲩ ⲉⲣⲟⲟⲩ ⲉⲁⲁⲩ · ⲁⲩⲱ ⲛⲉⲧϯⲙⲧⲟⲛ ⲛϩⲏⲧ ⲛⲁⲛ ϩⲣⲁⲓ ϩⲛϩⲩⲡⲟⲧⲁⲅⲏ ⲛⲓⲙ ⲉⲩⲣϩⲱⲃ ⲉⲡⲉⲩⲟⲩϫⲁⲓ ϩⲛⲟⲩϩⲟⲧⲉ ⲙⲛⲟⲩⲥⲧⲱⲧ
. . .
16 ⲧⲛⲥⲟⲟⲩⲛ ⲙⲙⲟⲟⲩ ⲧⲏⲣⲟⲩ ϫⲉⲛⲓⲙ ⲛⲉ ϫⲓⲛⲡⲉⲩⲕⲟⲩⲓ ϣⲁⲡⲉⲩⲛⲟϭ
…
17 ⲉⲧⲃⲉⲡⲁⲓ ⲡⲛⲟⲩⲧⲉ ⲉϥⲉⲥⲙⲟⲩ ⲉⲣⲟⲟⲩ ·
…
18 ⲁⲩⲱ ⲉϥⲉϩⲁⲣⲉϩ ⲉⲣⲟⲟⲩ ⲉϩⲱⲃ ⲛⲓⲙ ⲉϥϩⲟⲟⲩ ⲁⲩⲱ ⲉϥⲉϯⲙⲧⲟⲛ ⲛⲁⲩ ϩⲛⲙⲧⲟⲛ ⲛⲓⲙ ϩⲣⲁⲓ ϩⲛⲙⲡⲏⲩⲉ ϩⲙⲡⲙⲁ ⲉⲧⲟⲩⲛⲁⲃⲱⲕ ⲙⲙⲁⲩ
. . .
19 ⲛⲉⲧⲟ ⲇⲉ ⲛⲁⲧⲥⲱⲧⲙ ϩⲛϩⲱⲃ ⲛⲓⲙ ⲉⲧϯⲛⲟⲩϭⲥ ⲙⲡϣⲁϫⲉ ⲙⲡϫⲟⲉⲓⲥ ϩⲛⲧⲟⲩⲙⲛⲧⲁⲧⲥⲱⲧⲙ ⲙⲛⲧⲉⲩⲙⲛⲧⲣⲉϥⲕⲁϩⲧⲏ ⲉⲣⲟⲟⲩ ⲙⲁⲩⲁⲁⲩ ⲧⲛⲥⲟⲟⲩⲛ ⲙⲙⲟⲟⲩ ϫⲉⲛⲓⲙ ⲛⲉ ·
. . .
20 ⲉⲧⲃⲉⲡⲁⲓ ⲡϫⲟⲉⲓⲥ ⲉϥⲉⲕⲱ ⲛⲁⲩ ⲉⲃⲟⲗ ϫⲉⲛⲉⲛⲥⲛⲏⲩ ⲛⲉ ⲁⲩⲱ ⲛⲉⲛϣⲃⲏⲣ ⲙⲉⲗⲟⲥ ⲛⲉ ⲁⲩⲱ ϫⲉⲥⲉϩⲟⲥⲉ ϩⲱⲟⲩ ϩⲛⲧⲉⲩⲙⲛⲧⲁⲧⲥⲟⲟⲩⲛ ⲁⲩⲱ ϫⲉⲁⲛⲟⲛ ϩⲱⲱⲛ ⲧⲛⲙⲟⲕϩ ⲛϩⲏⲧ ⲉⲧⲃⲏⲏⲧⲟⲩ ⲉⲧⲃⲉϫⲉⲙⲡⲟⲩⲣϩⲙϩⲁⲗ ⲛⲁⲛ ⲟⲛ ⲕⲁⲧⲁⲡⲉⲛⲙⲧⲟⲛ ⲛⲥⲁⲣⲕⲓⲕⲟⲛ ·
. . .
21 ⲧⲛϣⲡϩⲙⲟⲧ ⲛⲧⲟⲟⲧⲟⲩ ⲛⲛⲉⲧⲥⲟⲟⲩⲧⲛ ⲉⲣⲟⲛ ⲛⲧϭⲟⲡⲉ ⲙⲙⲟⲟⲩ ϩⲓⲣⲟⲩϩⲉ · ⲏ ⲛⲧⲟϥ ϭⲉ ⲗⲁⲁⲩ ⲛϩⲛⲁⲁⲩ ϩⲛⲧⲉⲩⲁⲅⲁⲡⲏ
. . .
22 ⲁⲩⲱ ⲉⲡϫⲟⲉⲓⲥ ⲡⲉⲧⲛⲁⲧⲱⲱⲃⲉ ⲛⲁⲩ ⲕⲁⲧⲁⲛⲉⲩϩⲃⲏⲩⲉ ⲉⲧⲛⲁⲛⲟⲩⲟⲩ ·
…
23 ⲟⲩⲧⲉ ⲟⲛ ⲛⲉⲛⲗⲩⲡⲉⲓ ⲁⲛ ϫⲉⲁⲩϫⲱ ⲛⲟⲩϣⲁϫⲉ ⲉϩⲟⲩⲛ ⲉϩⲣⲁⲛ ⲛϭⲓⲛⲉⲧⲙⲙⲁⲩ ⲡⲉⲛⲙⲡϣⲁ ⲅⲁⲣ ⲡⲉ ·
. . .
24 ⲉⲧⲃⲉⲡⲁⲓ ⲛⲧϩⲉ ⲉⲧⲟⲩⲟ ⲙⲙⲟⲥ ⲛⲥⲉϫⲓ ⲉⲣⲟⲛ ⲁⲛ ϫⲉⲥⲉϫⲱ ⲛϩⲉⲛϣⲁϫⲉ ⲉϩⲟⲩⲛ ⲉϩⲣⲁⲛ ⲏ ⲛⲥⲁⲟⲩⲥⲁ ⲙⲁⲩⲁⲁⲩ ⲉⲩⲕⲣⲙⲣⲙ ⲏ ⲉⲩϭⲛⲁⲣⲓⲕⲉ ⲉⲡϫⲓⲛϫⲏ ·
. . .
25 ϩⲁⲙⲟⲓ ⲟⲛ ⲉⲣⲉⲡϫⲟⲉⲓⲥ ⲛⲁⲧⲁⲁⲥ ⲛⲁⲛ ⲉⲧⲣⲉⲛⲕⲱⲧⲉ ⲛⲧⲉⲛⲟⲩⲟϭⲉ ⲉⲡⲉⲧⲛⲁⲣⲁϩⲧⲛ ⲉⲣⲟⲥ ⲁⲩⲱ ⲉⲥϣⲁⲛϣⲱⲡⲉ ⲉⲧⲣⲉⲩⲙⲟⲟⲩⲧⲛ ϩⲱⲱⲛ ⲉⲧⲃⲉⲡⲣⲁⲛ ⲙⲡⲉⲛⲛⲟⲩⲧⲉ ⲉⲧⲣⲉⲛϫⲟⲟⲥ ⲉϩⲛⲁⲛ ϫⲉⲡϫⲟⲉⲓⲥ ⲙⲡⲣⲱⲡ ⲉⲣⲟⲟⲩ ⲙⲡⲉⲓⲛⲟⲃⲉ
. . .
26 ⲁⲗⲗⲁ ⲉⲛⲙⲟⲕϩ ⲛϩⲏⲧ ⲁⲩⲱ ⲉⲛⲗⲩⲡⲉⲓ ⲙⲡⲉϩⲟⲟⲩ ⲙⲛⲧⲟⲩϣⲏ · ⲉⲧⲃⲉⲛⲉⲧⲟ ⲛⲁⲧⲥⲱⲧⲙ ⲛⲥⲁⲡⲉⲩⲁⲅⲅⲉⲗⲓⲟⲛ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲁⲓ ⲉⲧϫⲱ ⲙⲙⲟⲥ ϫⲉⲉⲓⲙⲏⲧⲓ ⲛⲧⲉⲧⲛⲕⲉⲧⲧⲏⲩⲧⲛ ⲛⲧⲉⲧⲛⲣⲧϩⲉ ⲛⲛⲉⲓϣⲏⲣⲉ ϣⲏⲙ ⲛⲛⲉⲧⲛⲃⲱⲕ ⲉϩⲟⲩⲛ ⲉⲧⲙⲛⲧⲣⲣⲟ ⲛⲙⲡⲏⲩⲉ
. . .
27 ⲁⲛⲁⲩ ⲧⲉⲛⲟⲩ ϫⲉⲁⲥⲟⲩⲱⲛϩ ⲉⲃⲟⲗ ⲛⲟⲩⲏⲣ ⲛϭⲓⲧⲙⲛⲧⲁⲧⲥⲃⲱ ⲛⲛⲉⲧⲟ ⲛⲥⲁⲃⲉ ⲛⲁⲩ ⲟⲩⲁⲁⲩ ϩⲣⲁⲓ ⲛϩⲏⲧⲛ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓ
. . .
28 ⲛⲁⲓ ⲇⲉ ⲛⲉⲥⲛⲏⲩ ⲉⲓϫⲱ ⲙⲙⲟⲟⲩ ϫⲉⲕⲁⲥ ⲛⲛⲉⲗⲁⲁⲩ ⲉⲅⲕⲁⲕⲉⲓ ϩⲣⲁⲓ ⲛϩⲏⲧⲛ ϩⲁⲧⲏⲛ ⲏ ϩⲁⲧⲛⲧⲏⲩⲧⲛ ⲛⲧⲱⲧⲛ ⲉⲩϥⲓ ϩⲁⲛⲉⲧϩⲓⲧⲟⲩⲱⲟⲩ
. . .
29 ⲡϫⲟⲉⲓⲥ ⲅⲁⲣ ⲡⲉⲧⲛⲁϯ ⲛⲏⲧⲛ ⲙⲡⲉⲧⲛⲃⲉⲕⲉ · ⲉⲧⲃⲉⲡⲁⲓ ⲙⲡⲣⲙⲕⲁϩ ⲛϩⲏⲧ ⲉⲩϣⲁⲛⲕⲱⲙϣ ⲛⲥⲱⲧⲛ ⲏ ⲉⲩϣⲁⲛⲛⲟϭⲛⲉϭⲧⲏⲩⲧⲛ ⲛⲥⲉϫⲱ ⲛϩⲉⲛϣⲁϫⲉ ⲙⲡⲟⲛⲏⲣⲟⲛ ⲉϩⲟⲩⲛ ⲉϩⲣⲏⲧⲛ
. . .
30 ⲛⲟⲩϣⲡⲏⲣⲉ ⲁⲛ ⲧⲉ ⲉⲩϣⲁⲛϯⲁⲁⲥ ⲉϩⲟⲩⲛ ⲉϩⲣⲏⲧⲛ ⲏ ⲉⲩϣⲁⲛⲛⲉϫⲡⲁϭⲥⲉ ⲉϩⲟⲩⲛ ϩⲙⲡⲉⲧⲛϩⲟ ⲏ ⲉⲩϣⲁⲛϯⲕⲗⲯ ⲉϩⲣⲁⲓ ⲉϫⲛⲧⲉⲧⲛⲁⲡⲉ ⲛϭⲓⲛⲉⲧⲙⲙⲁⲩ ⲛⲧϩⲉ ⲙⲡⲁⲅⲅⲉⲗⲟⲥ ⲙⲡⲥⲁⲧⲁⲛⲁⲥ ⲕⲁⲧⲁⲧϩⲉ ⲉⲧⲥⲏϩ ϫⲉⲧⲛϩⲕⲁⲓⲉⲧ ⲧⲛⲟⲃⲉ ⲧⲛⲕⲏⲕⲁϩⲏⲩ ⲥⲉϯⲕⲗⲯ ⲉϫⲱⲛ ⲧⲛϣⲧⲣⲧⲱⲣ ⲧⲛϩⲟⲥⲉ · ⲉⲩⲡⲏⲧ ⲛⲥⲱⲛ ⲧⲛⲁⲛⲉⲭⲉ ⲙⲙⲟⲟⲩ · ⲉⲩϫⲓⲟⲩⲁ ⲉⲣⲟⲛ ⲧⲛⲡⲁⲣⲁⲕⲁⲗⲉⲓ ⲙⲙⲟⲟⲩ ·
. . .
31 ⲁⲗⲗⲁ ⲧⲉϣⲡⲏⲣⲉ ⲇⲉ ⲛⲧⲟϥ ⲧⲉ ⲉⲧⲙⲧⲣⲉⲩϫⲓϫⲣⲟⲡ ⲉⲃⲟⲗ ϩⲓⲧⲛⲧⲏⲩⲧⲛ ϩⲛⲗⲁⲁⲩ ⲛϩⲱⲃ ⲉϥϩⲟⲟⲩ ⲕⲁⲧⲁⲧϩⲉ ⲉⲧⲥⲏϩ ·
…
32 ⲛⲛⲉⲛϯϣⲓⲡⲉ ⲛⲏⲧⲛ ⲁⲛ ⲉⲛϫⲱ ⲛⲏⲧⲛ ⲛⲛⲁⲓ ·
. . .
33 ⲁⲗⲗⲁ ⲉⲛϯⲥⲃⲱ ⲛⲏⲧⲛ ϩⲱⲥ ⲥⲟⲛ ⲙⲙⲉⲣⲓⲧ ϫⲉⲕⲁⲥ ⲛⲛⲉⲩⲧϭⲁⲓⲟⲛ ⲙⲛⲡⲕⲟⲥⲙⲟⲥ ⲁⲩⲱ ϫⲉⲕⲁⲥ ⲉⲛⲉⲣⲃⲟⲗ ⲉⲡϣⲁϫⲉ ⲙⲡⲉⲛⲡⲣⲟⲫⲏⲧⲏⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲉⲓⲛⲉ ⲉϫⲙⲡⲉⲓⲗⲁⲟⲥ ⲛϩⲉⲛⲡⲉⲧϩⲟⲟⲩ ⲁⲩⲱ ⲉϫⲙⲡⲕⲁⲣⲡⲟⲥ ⲛⲧⲉⲩⲙⲛⲧⲁⲧⲥⲱⲧⲙ ϫⲉⲙⲡⲟⲩϯϩⲧⲏⲩ ⲉⲡⲁϣⲁϫⲉ ⲁⲩⲕⲱ ⲛⲥⲱⲟⲩ ⲙⲡⲁⲛⲟⲙⲟⲥ
…
34 ⲉⲧⲃⲉⲡⲁⲓ ϯⲥⲟⲡⲥ ⲙⲙⲱⲧⲛ ⲛⲉⲥⲛⲏⲩ ⲉⲧⲣⲉⲧⲉⲧⲛⲥⲁϩⲉⲧⲏⲩⲧⲛ ⲉⲃⲟⲗ ⲙⲙⲓϣⲉ ⲛⲓⲙ ϩⲓϯⲧⲱⲛ ⲛⲓⲙ · ⲙⲛϩⲱⲃ ⲛⲓⲙ ⲉϥϩⲟⲟⲩ ⲙⲛⲉⲡⲓⲑⲩⲙⲓⲁ ⲛⲓⲙ ⲛⲥⲁⲣⲕⲓⲕⲟⲛ · ⲛⲁⲓ ⲉⲧϯ ⲟⲩⲃⲉⲛⲉⲧⲛⲯⲩⲭⲏ ⲉⲧⲣⲉⲛⲥⲃⲃⲉ ⲛⲧⲙⲛⲧⲁⲧⲥⲃⲃⲉ ⲙⲡⲉⲛϩⲏⲧ ⲉⲧⲛⲁϣⲧ ϫⲉⲕⲁⲥ ⲉⲣⲉⲡϫⲟⲉⲓⲥ ⲁⲩⲝⲁⲛⲉ ⲙⲙⲱⲧⲛ ϩⲛϩⲱⲃ ⲛⲓⲙ ⲛⲁⲅⲁⲑⲟⲛ ⲉⲧⲣⲉⲧⲛⲉⲓⲣⲉ ⲙⲡⲉϥⲟⲩⲱϣ ⲛⲁϥ ⲉϥⲉⲓⲣⲉ ⲙⲡⲉⲧⲣⲁⲛⲁϥ ⲛϩⲏⲧⲛ ⲙⲡⲉϥⲙⲧⲟ ⲉⲃⲟⲗ
. . .
35 ⲡⲁⲓ ⲅⲁⲣ ⲡⲉ ⲛⲟⲩⲱϣ ⲙⲡⲛⲟⲩⲧⲉ ⲡⲉⲧⲛⲧⲃⲃⲟ · ⲉⲧⲣⲉⲛϣⲱⲡⲉ ⲉⲛⲟⲩⲁⲁⲃ ⲛⲁϥ · ⲁⲩⲱ ⲛⲧⲛⲙⲉⲣⲉⲛⲉⲛⲉⲣⲏⲩ ⲕⲁⲧⲁⲧϩⲉ ⲛⲧⲁϥϩⲱⲛ ⲉⲧⲟⲟⲧⲛ ⲕⲁⲧⲁⲛⲉⲅⲣⲁⲫⲏ
. . .
36 ⲁϣ ⲡⲉ ⲡⲥⲃⲃⲉ ⲙⲡϩⲏⲧ ⲏ ⲟⲩ ⲧⲉ ⲧⲙⲛⲧⲁⲧⲥⲃⲃⲉ ·
. . .
37 ⲛⲉⲧϣⲟⲟⲡ ⲛⲟⲩⲟⲉⲓϣ ⲛⲓⲙ ϩⲛϩⲉⲛⲙⲛⲧⲛⲁϣⲧϩⲏⲧ ⲙⲛϩⲉⲛⲙⲛⲧⲛⲁϣⲧⲙⲁⲕϩ · ⲙⲛϩⲉⲛⲙⲛⲧⲛⲁϣⲧⲉⲓⲙⲉ ⲙⲛϩⲉⲛⲙⲛⲧⲁⲧⲥⲃⲱ · ⲙⲛϩⲉⲛⲙⲛⲧⲁⲧⲥⲱⲧⲙ ⲙⲛϩⲉⲛⲙⲛⲧⲟⲩⲁϩⲓϩⲏⲧ ⲙⲛϩⲉⲛⲙⲓϣⲉ ⲙⲛϩⲉⲛϯⲧⲱⲛ ⲙⲛϩⲉⲛⲕⲱϩ ⲙⲛϩⲉⲛⲙⲟⲥⲧⲉ ⲙⲛϩⲉⲛϫⲱϩⲙ ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ ⲛⲧⲟⲟⲩ ⲛⲉⲧⲟ ⲛⲁⲧⲥⲃⲃⲉ ϩⲙⲡⲉⲩϩⲏⲧ ⲙⲛⲛⲉⲩⲕⲉⲙⲁⲁϫⲉ ⲕⲁⲧⲁⲛⲉⲅⲣⲁⲫⲏ
. . .
38 ⲛⲉⲧϣⲟⲟⲡ ⲇⲉ ⲛⲟⲩⲟⲉⲓϣ ⲛⲓⲙ ϩⲛⲟⲩⲑⲃⲃⲓⲟ ⲙⲛⲟⲩⲙⲛⲧⲣⲙⲣⲁϣ · ⲙⲛⲟⲩⲙⲛⲧϩⲁⲣϣϩⲏⲧ ⲙⲛⲟⲩⲁⲅⲁⲡⲏ ⲙⲛⲟⲩⲙⲛⲧⲣⲉϥϫⲓⲥⲃⲱ ϩⲣⲁⲓ ϩⲛϩⲩⲡⲟⲧⲁⲅⲏ ⲛⲓⲙ · ϩⲓⲙⲛⲧⲥⲧⲙⲏⲧ ⲛⲓⲙ ϩⲓⲙⲛⲧϣⲁⲩ ⲛⲓⲙ ·
. . .