1 ⲟⲩⲗⲟⲅⲟⲥ ⲛⲧⲉⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲁⲡⲁ ⲑⲉⲟⲫⲓⲗⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲉⲁϥⲧⲁⲩⲟϥ ⲉⲧⲃⲉⲧⲙⲉⲧⲁⲛⲁⲓⲁ ⲙⲛⲧⲉⲕⲣⲁⲧⲓⲁ ·
…
2 ⲁⲩⲱ ⲟⲛ ⲉⲧⲙⲧⲣⲉⲡⲣⲱⲙⲉ ⲁⲙⲉⲗⲉⲓ ⲉⲣⲟϥ · ⲉⲙⲉⲧⲁⲛⲟⲉⲓ ⲉⲙⲡⲁⲧⲟⲩⲧⲁϩⲟϥ ⲛϭⲓⲛⲉⲭⲣⲟⲛⲟⲥ ⲛϩⲁⲉ · ◈◈ — ◈◈◈ — ◈◈
…
3 ⲡⲉϫⲁϥ ⲛϭⲓⲡⲉⲡⲣⲟⲫⲏⲧⲏⲥ ϫⲉⲁⲛⲁⲣⲙⲉⲓⲟⲟⲩⲉ ϣⲱⲡⲉ ⲛⲁⲓ ⲛⲟⲉⲓⲕ ⲙⲛⲉϩⲟⲟⲩ ⲙⲛⲧⲉⲩϣⲏ ·
…
4 ⲁⲩⲱ ⲟⲛ ϫⲉⲟⲩϩⲏⲧ ⲉϥⲟⲩⲟϣϥ ⲉϥⲑⲃⲃⲓⲏⲩ ⲡⲛⲟⲩⲧⲉ ⲛⲁⲧⲥⲧⲟϥ ⲉⲃⲟⲗ ⲁⲛ :
…
5 ⲧⲉⲛⲟⲩ ϭⲉ ⲛⲉⲥⲛⲏⲩ ⲙⲁⲣⲛⲑⲙⲕⲟ ⲛⲛⲉⲛⲯⲩⲭⲏ ϩⲛϩⲉⲛⲛⲏⲥⲧⲉⲓⲁ ⲉⲛϯ ⲛⲛⲉⲛⲥⲱⲙⲁ ⲉⲡⲙⲟⲩ ϩⲛϩⲉⲛϩⲓⲥⲉ ⲉⲛⲁϣⲱⲟⲩ · ϣⲁⲛⲧⲛⲣϣⲃⲏⲣ ⲉⲡⲁⲅⲅⲉⲗⲟⲥ ⲛⲧⲙⲉⲧⲁⲛⲟⲓⲁ ϫⲉⲕⲁⲥ ⲉϥⲉⲕⲁⲧⲉϥϩⲓⲏ ϣⲁⲁⲣⲟⲛ ·
…
6 ⲛⲧⲁⲛⲉⲧⲟⲩⲁⲁⲃ ϯ ⲛⲛⲉⲩⲥⲱⲙⲁ ⲉⲡⲙⲟⲩ ϣⲁⲛⲧⲟⲩϫⲣⲟ ⲉⲡⲁⲛⲧⲓⲕⲉⲓⲙⲉⲛⲟⲥ ⲕⲁⲧⲁⲡⲉⲧⲥⲏϩ ϫⲉⲉⲧⲃⲏⲏⲧⲕ ⲥⲉⲙⲟⲩⲟⲩⲧ ⲙⲙⲟⲛ ⲙⲡⲉϩⲟⲟⲩ ⲧⲏⲣϥ ·
…
7 ⲁⲩⲟⲡⲛ ⲛⲧϩⲉ ⲛⲉⲓⲉⲥⲟⲟⲩ ⲉⲕⲟⲟⲛⲥⲟⲩ ·
…
8 ⲁⲩⲱ ⲟⲛ ⲡⲁⲡⲟⲥⲧⲟⲗⲟⲥ ϯⲥⲃⲱ ⲛⲁⲛ ϫⲉⲙⲟⲩⲟⲩⲧⲛ ⲛⲛⲉⲧⲙⲙⲉⲗⲟⲥ ⲉⲧϩⲓϫⲙⲡⲕⲁϩ · ⲧⲡⲟⲣⲛⲉⲓⲁ ⲧⲁⲕⲁⲑⲁⲣⲥⲓⲁ · ⲡⲡⲁⲑⲟⲥ ⲧⲉⲡⲏⲑⲩⲙⲓⲁ ⲉⲧϩⲟⲟⲩ ·
…
9 ϩⲟⲧⲁⲛ ⲇⲉ ⲉⲛϣⲁⲛⲧⲁⲁⲛ ⲉⲧⲙⲟⲕϩⲥ ϩⲛϩⲉⲛⲛⲏⲥⲧⲉⲓⲁ ⲙⲛϩⲉⲛϣⲗⲏⲗ ⲙⲛϩⲉⲛⲟⲩϣⲏ ⲛⲣⲟⲉⲓⲥ · ⲛⲧⲛⲥⲧⲁⲩⲣⲟⲩ ⲙⲡⲉⲛⲥⲱⲙⲁ ⲙⲛⲧⲉⲛⲯⲩⲭⲏ ·
…
10 ⲧⲛⲛⲁⲣ ϣⲁϩⲱⲱⲛ ⲛⲉϣⲉⲃⲟⲗ ⲙⲛⲡⲣⲉϥⲯⲁⲗⲗⲉⲓ ⲇⲁⲩⲉⲓⲇ ϫⲉⲁⲕⲡⲁⲥⲧ ϩⲙⲡⲉⲕϩⲉ ⲉϫⲓⲛϭⲟⲛⲥ ⲛϩⲏⲧ :
…
11 ⲧⲟⲧⲉ ⲡⲁⲅⲅⲉⲗⲟⲥ ⲛⲧⲙⲉⲧⲁⲛⲟⲓⲁ ⲛⲏⲩ ⲛϥⲡⲱⲣϫ ⲛⲛⲉⲛⲧⲏϭ ⲉⲧϩⲟⲟⲩ · ⲉⲛⲧⲁϥϫⲟⲟⲩ ϩⲣⲁⲓ ⲛϩⲏⲧⲛ ⲛϭⲓⲡⲇⲓⲁⲃⲟⲗⲟⲥ ⲛϥⲧⲱϭⲉ ⲉⲡⲉⲩⲙⲁ ⲛⲛⲕⲁⲣⲡⲟⲥ ⲙⲡⲉⲡⲛⲉⲩⲙⲁ ·
…
12 ⲕⲁⲧⲁⲧϩⲉ ⲉⲛⲧⲁϥϫⲟⲟⲥ ⲛϭⲓⲡⲁⲡⲟⲥⲧⲟⲗⲟⲥ ϫⲉⲡⲕⲁⲣⲡⲟⲥ ⲙⲡⲉⲡⲛⲉⲩⲙⲁ ⲡⲉ ⲧⲁⲅⲁⲡⲏ · ⲡⲣⲁϣⲉ ·
…
13 ϯⲉⲓⲣⲏⲛⲏ · ⲧⲙⲛⲧϩⲁⲣϣϩⲏⲧ ·
…
14 ⲡⲧⲃⲃⲟ ⲙⲛⲛⲉⲧⲛⲏⲩ ⲙⲛⲛⲥⲁⲛⲁⲓ :
…
15 ⲧⲟⲧⲉ ⲥⲛⲏⲩ ⲛⲧⲉⲩⲛⲟⲩ ⲛϭⲓⲧⲙⲉⲧⲁⲛⲟⲓⲁ ⲛⲥⲟⲩⲱϩ ϩⲣⲁⲓ ⲛϩⲏⲧⲛ · ⲛⲥⲙⲟⲩϩ ⲛⲛⲉⲛⲙⲉⲗⲟⲥ ⲧⲏⲣⲟⲩ · ⲛⲥⲕⲁⲑⲁⲣⲓⲍⲉ ⲛⲛⲉⲛⲛⲟⲃⲉ ⲧⲏⲣⲟⲩ ·
…
16 ⲛⲥⲣⲱⲕϩ ϩⲣⲁⲓ ⲛϩⲏⲧⲛ ⲙⲙⲛⲧϫⲁⲥⲓϩⲏⲧ ⲛⲓⲙ · ⲙⲛϭⲱⲛⲧ ⲛⲓⲙ · ⲙⲛⲕⲁⲕⲓⲁ ⲛⲓⲙ · ⲙⲛϩⲱⲃ ⲛⲓⲙ ⲉⲧϩⲟⲟⲩ · ⲙⲛⲙⲉⲉⲩⲉ ⲛⲓⲙ ⲙⲡⲟⲛⲏⲣⲟⲛ · ⲛⲥⲁⲛⲁⲅⲕⲁⲍⲉ ⲛⲛⲁⲣⲉⲧⲏ ⲉⲧⲣⲉⲩⲉⲓ ⲛⲥⲉⲟⲩⲱϩ ϩⲛⲧⲉⲛⲯⲩⲭⲏ ·
…
17 ⲛⲥⲧⲱϭⲉ ⲛⲧⲟⲩⲉⲓ ⲧⲟⲩⲉⲓ ⲉⲡⲉⲥⲙⲁ ·
…
18 ⲛⲧⲉⲩⲛⲟⲩ ⲥⲛⲁⲡⲱⲣⲕ ⲙⲡϭⲱⲛⲧ ⲛⲥⲧⲱϭⲉ ⲉⲡⲉϥⲙⲁ ⲛⲧⲙⲛⲧϩⲁⲣϣϩⲏⲧ ·
…
19 ⲥⲛⲁⲡⲱⲣⲕ ⲛⲧⲙⲛⲧϫⲁⲥⲓϩⲏⲧ ⲛⲥⲧⲱϭⲉ ⲙⲡⲉⲑⲃⲃⲓⲟ ⲉⲡⲉϥⲙⲁ ·
…
20 ⲥⲛⲁⲡⲱⲣⲕ ⲛⲧⲙⲛⲧϫⲁϫⲉ ⲛⲥⲧⲱϭⲉ ⲛⲧⲉⲓⲣⲏⲛⲏ ⲉⲡⲉⲥⲙⲁ · ⲥⲛⲁⲡⲱⲧⲛ ⲥⲁⲡⲕⲱϩ ⲙⲛⲡⲙⲟⲥⲧⲉ ⲛⲥⲛⲟϫⲟⲩ ⲉⲃⲟⲗ ⲛϩⲏⲧⲛ · ⲛⲥⲧⲣⲉϯⲣⲏⲛⲏ ⲙⲛⲧⲁⲅⲁⲡⲏ ⲣⲟⲩⲕⲗⲟⲙ ⲉϫⲛⲧⲉⲛⲁⲡⲉ ·
…
21 ⲥⲛⲁϥⲓ ⲉⲃⲟⲗ ⲙⲙⲟⲛ ⲛⲧⲁⲙⲉⲗⲓⲁ ⲙⲛⲧⲙⲛⲧⲣⲉϥϫⲛⲁⲁⲩ · ⲛⲥⲛⲉϩⲥⲉ ⲙⲙⲟⲛ ⲉⲡⲉϣⲗⲏⲗ ⲙⲛϩⲉⲛⲟⲩϣⲏ ⲛⲣⲟⲉⲓⲥ · ⲙⲛϩⲉⲛⲙⲉⲗⲉⲧⲁ ⲙⲛϩⲉⲛⲯⲁⲗⲙⲟⲥ · ⲙⲛϩⲉⲛϩⲱⲇⲏ ⲙⲡⲛⲉⲩⲙⲁⲧⲓⲕⲟⲛ ·
…
22 ⲁⲛⲁⲩ ϭⲉ ⲱ ⲛⲉⲥⲛⲏⲩ ⲉⲧⲙⲉⲧⲁⲛⲟⲓⲁ ϫⲉϣⲁⲥⲧⲣⲉⲟⲩⲏⲣ ⲕⲁⲣⲡⲟⲥ ⲟⲩⲱϩ ϩⲙⲡⲣⲱⲙⲉ ⲉⲧⲛⲁⲙⲉⲧⲁⲛⲟⲉⲓ ·
…
23 ϣⲁⲥⲧⲣⲉⲙⲙⲉⲗⲟⲥ ⲧⲏⲣⲟⲩ ⲛⲉϫ ϯⲟⲩⲱ ⲉⲃⲟⲗ · ⲛⲧϩⲉ ⲛⲟⲩϣⲏⲛ ⲉϥⲣⲟⲟⲩⲧ ϩⲓϫⲛⲟⲩⲙⲟⲟⲩ · ⲱ ⲧⲙⲉⲧⲁⲛⲟⲓⲁ ϩⲉⲛⲛⲟϭ ⲛⲉ ⲛⲟⲩⲥⲟⲗⲥⲗ · ⲟⲩⲣⲁϣⲉ ⲡⲉⲧϣⲟⲟⲡ ϩⲛⲧⲟⲩⲗⲩⲡⲏ ·
…
24 ⲁⲩⲱ ⲟⲩⲉⲩⲫⲣⲟⲥⲩⲛⲏ ⲡⲉⲧϣⲟⲟⲡ ϩⲛⲛⲟⲩⲣⲙⲉⲓⲟⲟⲩⲉ ·
…
25 ⲛⲕⲁⲣⲡⲟⲥ ⲛⲧⲙⲉⲧⲁⲛⲟⲓⲁ ⲉⲩⲙⲏϩ ⲉⲃⲟⲗ ϩⲛⲧϭⲟⲙ ⲙⲡⲉⲡⲛⲉⲩⲙⲁ ·
…
26 ⲡⲣⲱⲙⲉ ⲅⲁⲣ ⲉⲧⲛⲁⲙⲉⲧⲁⲛⲟⲉⲓ ·
…
27 ⲕⲁⲛ ⲉϥⲕⲁⲣⲁⲉⲓⲧ · ⲛⲕⲁⲣⲡⲟⲥ ⲛⲧⲙⲉⲧⲁⲛⲟⲓⲁ ⲟⲩⲟⲛϩ ⲉⲃⲟⲗ ϩⲓⲡⲉϥϩⲟ :
…
28 ⲛⲉⲥⲱ · ⲱ ⲧⲙⲉⲧⲁⲛⲟⲓⲁ ϩⲛⲧⲟⲩⲙⲛⲧⲣⲙⲣⲁϣ ⲉⲧϭⲏⲛ ⲙⲛⲟⲩϣⲁϫⲉ ⲉⲧϩⲟⲣⲕ ·
…
29 ϩⲙⲡⲟⲩⲥⲙⲟⲧ ⲉⲣⲉⲟⲛϫⲡⲓⲏⲧ ϩⲁⲧⲛ ⲟⲩⲟⲛ ⲛⲓⲙ ·
…
30 ⲛⲧⲥⲛⲧⲟ ⲅⲁⲣ ⲡⲉⲛⲧⲁⲣϫⲓⲙⲟⲉⲓⲧ ϩⲏⲧⲟⲩ ⲛⲛⲉⲧⲟⲩⲁⲁⲃ ⲧⲏⲣⲟⲩ ⲉϩⲟⲩⲛ ⲉⲡⲁⲅⲱⲛ ⲛⲛϩⲓⲥⲉ ·
…
31 ⲧⲟⲩⲛⲧⲏⲩⲧⲛ ϭⲉ ⲉϩⲣⲁⲓ ⲱ ⲛⲁⲙⲉⲣⲁⲧⲉ ⲛⲧⲉⲧⲛⲕⲟⲥⲙⲉⲓ ⲛⲧⲙⲉⲧⲁⲛⲟⲓⲁ ϩⲛⲛⲕⲟⲥⲙⲏⲥⲓⲥ ⲛⲛⲉⲧⲛⲛⲏⲥⲧⲉⲓⲁ · ⲛⲧⲉⲧⲛⲧⲱϩⲥ ⲙⲙⲟⲥ ϩⲙⲡⲉⲥϯⲛⲟⲩϥⲉ ⲛⲛⲉⲧⲛϣⲗⲏⲗ ·
…
32 ⲁⲩⲱ ⲛⲧⲉⲧⲛⲥⲧⲉⲫⲁⲛⲟⲩ ⲙⲙⲟⲥ ϩⲙⲡⲉⲑⲃⲃⲓⲟ ⲛⲛⲉⲧⲛⲣⲙⲉⲓⲟⲟⲩⲉ ·
…
33 ϫⲉⲕⲁⲥ ⲉⲣϣⲁⲛⲛⲕⲉⲁⲣⲉⲧⲏ ⲧⲏⲣⲟⲩ ⲛⲁⲩ ⲉⲡⲥⲁ ⲛⲧⲕⲟⲥⲙⲏⲥⲓⲥ ⲉⲛⲧⲁⲧⲉⲧⲛⲕⲟⲥⲙⲉⲓ ⲙⲙⲟⲥ ⲛϩⲏⲧϥ ·
…
34 ⲧⲟⲧⲉ ⲥⲉⲛⲁⲥⲱⲟⲩϩ ϩⲓⲟⲩⲥⲟⲡ ⲛⲥⲉⲉⲓ ⲛⲥⲉⲭⲟⲣⲉⲩⲉ ϩⲛⲛⲉⲧⲛⲯⲩⲭⲏ · ϩⲙⲡⲧⲣⲉⲛⲁⲓ ϭⲉ ⲟⲩⲱϩ ⲛϩⲏⲧⲧⲏⲩⲧⲛ ·
…
35 ⲥⲉⲛⲁⲣⲧⲏⲩⲧⲛ ⲛⲁⲧⲛⲟⲃⲉ · ⲉⲥⲧⲱⲛ ϭⲉ ⲧⲉⲛⲟⲩ ⲧⲁⲙⲉⲗⲉⲓⲁ ⲙⲛⲡⲉϩⲣⲟϣ ⲙⲡⲥⲱⲙⲁ · ⲉⲩⲧⲱⲛ ⲛⲉϣⲧⲟⲣⲧⲣ ⲛⲙⲡⲁⲑⲟⲥ ·
…
36 ⲙⲛⲙⲙⲉⲉⲩⲉ ⲉⲧϫⲁϩⲙ ⲙⲛϩⲱⲃ ⲛⲓⲙ ⲉⲧϩⲟⲟⲩ ·
…
37 ⲉⲩⲧⲱⲛ ⲛⲕⲱϩ ⲙⲛⲙⲙⲟⲥⲧⲉ ⲙⲛⲛϯⲧⲱⲛ · ⲉⲩⲧⲱⲛ ⲛϭⲱⲛⲧ ⲙⲛⲙⲡⲟⲛⲏⲣⲓⲁ · ⲉⲩⲧⲱⲛ ⲙⲙⲛⲧϫⲁⲥⲓϩⲏⲧ · ⲙⲛⲛϭⲓⲛϣⲁϫⲉ ⲉⲧⲛⲁϣⲧ · ⲉⲩⲧⲱⲛ ⲙⲡⲟⲣⲛⲉⲓⲁ ⲙⲛⲛϫⲱϩⲙ ⲙⲛⲙⲙⲛⲧⲛⲟⲉⲓⲕ ·
…
38 ⲉⲩⲧⲱⲛ ⲛⲉⲟⲟⲩ ⲉⲧϣⲟⲩⲉⲓⲧ ⲙⲛⲛϩⲃⲥⲟⲟⲩⲉ ⲉⲧⲡⲣⲉⲓⲱⲟⲩ · ⲉⲩⲧⲱⲛ ⲙⲙⲛⲧϣⲛⲁ ⲙⲛⲛⲟⲩⲱⲙ ⲙⲛⲛⲥⲱ ⲙⲛⲛϯϩⲉ · ⲉⲩⲧⲱⲛ ⲙⲙⲛⲧⲁⲣⲅⲟⲥ ⲙⲛⲛϫⲓϩⲣⲁϥ ϩⲛⲟⲩⲡⲁⲧⲁⲗⲓⲁ ·
…
39 ⲛⲓⲙ ⲡⲉⲧⲉⲛϥⲛⲁⲟⲩⲱϣ ⲁⲛ ⲉⲣϣⲃⲏⲣ ⲉⲧⲙⲉⲧⲁⲛⲟⲓⲁ ⲛϥⲣϣⲙⲙⲟ ⲉⲛⲉⲓⲡⲉⲧϩⲟⲟⲩ ⲧⲏⲣⲟⲩ ·
…
40 ⲛⲁⲓ ⲉⲧⲧⲱⲙ ⲛⲛⲃⲁⲗ ⲙⲡⲉⲛϩⲏⲧ ϫⲉⲉⲛⲉⲩⲛⲁⲩ ⲉⲡⲟⲩⲟⲉⲓⲛ ⲉⲧϩⲁϣⲡⲏⲣⲉ ·
…
41 ⲧⲙⲉⲧⲁⲛⲟⲓⲁ ⲅⲁⲣ ϣⲁⲥⲧⲣⲉⲡⲣⲱⲙⲉ ⲣⲉⲧⲧⲛϩ ⲛⲧϩⲉ ⲛⲟⲩⲁⲓⲧⲟⲥ ·
…
42 ⲁⲩⲱ ϣⲁⲥⲧⲣⲉϥϩⲱⲗ ⲉⲡϫⲓⲥⲉ ϩⲓⲧⲛⲛⲉⲥⲁⲣⲉⲧⲏ ·
…
43 ⲡⲉⲧⲙⲉⲧⲁⲛⲟⲉⲓ ⲅⲁⲣ ⲉⲧⲁⲥⲕⲉⲓ ϩⲛⲟⲩⲙⲛⲧϫⲱⲱⲣⲉ ϩⲛⲟⲩϩⲕⲟ ⲙⲛⲟⲩⲉⲓⲃⲉ ⲉϥϭⲱⲛⲧ ⲙⲙⲁⲧⲉ ⲉⲛⲁⲅⲁⲑⲟⲛ ⲛⲧⲡⲉ ⲛⲁⲓ ⲉⲧⲛⲁⲙⲟⲩⲛ ⲉⲃⲟⲗ ⲛϣⲁⲉⲛⲉϩ ·
…
44 ⲉⲧⲃⲉⲡⲁⲓ ϭⲉ ⲱ ⲛⲁⲙⲉⲣⲁⲧⲉ ⲙⲁⲣⲛⲱϥⲉ ⲙⲡⲉⲛⲥⲱⲙⲁ ϩⲛϩⲉⲛⲛⲏⲥⲧⲉⲓⲁ ⲙⲛϩⲉⲛϣⲗⲏⲗ · ⲙⲛϩⲉⲛⲟⲩϣⲏ ⲛⲣⲟⲉⲓⲥ ·
…
45 ϫⲉⲕⲁⲥ ⲉⲛⲁⲙⲉⲧⲉⲭⲉ ⲉⲛⲉϥⲉⲣⲏⲧ ⲉⲧϩⲛ ⲙⲡⲏⲩⲉ · ⲛⲧϩⲉ ⲉⲛⲧⲁϥϫⲟⲟⲥ ϫⲉⲛⲧⲱⲧⲛ ⲛⲉⲛⲧⲁⲩϩⲩⲡⲟⲙⲓⲛⲉ ⲛⲙⲙⲁⲓ ϩⲛⲛⲁⲡⲉⲓⲣⲁⲥⲙⲟⲥ ·
…
46 ⲁⲛⲟⲕ ϩⲱ ϯⲥⲙⲓⲛⲉ ⲙⲙⲟⲥ ⲛⲙⲙⲏⲧⲛ ·
…
47 ⲛⲧϩⲉ ⲉⲛⲧⲁⲡⲁⲉⲓⲱⲧ ⲥⲙⲓⲛⲉ ⲛⲙⲙⲁⲓ ⲛⲟⲩⲙⲛⲧⲣⲣⲟ · ϫⲉⲧⲉⲧⲛⲁⲟⲩⲱⲙ ⲛⲧⲉⲧⲛⲥⲱ ⲛⲙⲙⲁⲓ ϩⲓϫⲛⲧⲁⲧⲣⲁⲡⲉⲍⲁ ϩⲛⲧⲁⲙⲛⲧⲣⲣⲟ ·
…
48 ⲙⲁⲣⲛⲉⲓⲙⲉ ϭⲉ ⲱ ⲛⲉⲥⲛⲏⲩ ⲉⲡⲧⲁⲉⲓⲟ ⲛⲧⲙⲉⲧⲁⲛⲟⲓⲁ ⲛⲧⲛⲥⲟⲩⲛⲛⲉϩⲙⲟⲧ ⲉⲛⲧⲁⲥⲁⲁⲩ ⲛⲙⲙⲁⲛ ·
…
49 ⲱ ⲧⲙⲉⲧⲁⲛⲟⲓⲁ ⲧⲉⲛⲧⲁⲥϣⲱⲡⲉ ⲛⲧⲣⲟⲫⲏ ⲛⲛⲉⲧϣⲟⲟⲡ ϩⲁⲡⲉϩⲕⲟ ·
…
50 ⲁⲩⲱ ⲁⲥϣⲱⲡⲉ ⲛⲟⲩⲡⲏⲅⲏ ⲙⲙⲟⲟⲩ ⲛⲱⲛϩ ⲛⲛⲉⲧϣⲟⲟⲡ ϩⲛⲟⲩⲉⲓⲃⲉ ·
…
51 ⲱ ⲧⲙⲉⲧⲁⲛⲁⲓⲁ ⲧⲥⲟⲗⲥⲗ ⲛⲛⲉⲧⲟ ⲛⲟⲩϣⲏ ⲛⲣⲟⲉⲓⲥ ⲉⲧⲥⲟⲗⲥⲗ ⲙⲙⲟⲟⲩ ϩⲛⲛⲕⲁⲣⲡⲟⲥ ⲛⲛⲉⲩϩⲓⲥⲉ ·
…
52 ⲱ ⲧⲙⲉⲧⲁⲛⲟⲓⲁ ⲧⲉⲛⲧⲁⲛⲉⲥⲣⲙⲉⲓⲟⲟⲩⲉ ϣⲱⲡⲉ ⲛⲟⲩϩⲏⲇⲟⲛⲏ ⲛⲥϯⲛⲟⲩϥⲉ ⲛⲛⲁⲅⲅⲉⲗⲟⲥ ⲙⲡⲛⲟⲩⲧⲉ ·
…
53 ⲱ ⲧⲙⲉⲧⲁⲛⲟⲓⲁ ⲧⲃⲟⲏⲑⲟⲥ ⲛⲛⲉⲛⲧⲁⲩⲉⲓⲁⲧⲟⲟⲧⲟⲩ ⲛⲥⲱⲟⲩ ·
…
54 ⲙⲁⲣⲛⲛⲁⲩ ⲉⲧⲙⲛⲧϣⲃⲏⲣ ⲉⲛⲧⲁⲥⲁⲁⲥ ⲙⲛⲛⲣⲱⲙⲉ ⲛⲛⲓⲛⲉⲩⲏ ·
…
55 ϩⲙⲡⲧⲣⲉⲥⲧⲱϩⲙ ⲉⲣⲟⲟⲩ ϩⲛⲧⲉⲥⲙⲛⲧⲙⲁⲓⲣⲱⲙⲉ ·
…
56 ⲛⲧϩⲉ ⲛⲧⲁⲩϭⲉⲡⲏ ⲁⲩⲟⲩⲱⲛ ⲛⲁⲥ ϩⲛⲟⲩⲛⲟϭ ⲛⲑⲑⲃⲓⲟ ⲙⲛϩⲉⲛⲣⲙⲉⲓⲟⲟⲩⲉ · ⲙⲛⲟⲩϭⲟⲟⲩⲛⲉ · ⲟⲩⲙⲟⲛⲟⲛ ⲛⲣⲱⲙⲉ ⲙⲙⲁⲧⲉ ·
…
57 ⲁⲗⲗⲁ ⲛⲕⲉⲧⲃⲛⲟⲟⲩⲉ ⲟⲛ ⲉⲩϭⲟⲟⲗⲉ ⲛⲛϭⲟⲟⲩⲛⲉ ·
…
58 ⲛⲧⲉⲣⲉⲡⲛⲟⲩⲧⲉ ⲇⲉ ⲡⲡⲁⲛⲧⲟⲕⲣⲁⲧⲱⲣ ⲡⲁⲅⲁⲑⲟⲥ ⲛϣⲁⲛϩⲧⲏϥ ⲙⲙⲁⲓⲣⲱⲙⲉ ⲛⲁⲩ ⲉⲛⲉⲓⲛⲟϭ ⲛⲕⲁⲣⲡⲟⲥ ⲛⲧⲉⲓⲙⲓⲛⲉ ϩⲛⲛϭⲓϫ ⲛⲧⲙⲉⲧⲁⲛⲟⲓⲁ ⲉⲥⲡⲁϩⲧ ⲙⲡⲉⲙⲧⲟ ⲉⲃⲟⲗ ⲙⲡⲉⲑⲣⲟⲛⲟⲥ ⲙⲡⲛⲁϩⲏⲧ · ⲟⲩⲙⲟⲛⲟⲛ ϫⲉⲁϥⲕⲧⲟ ⲉⲡⲁϩⲟⲩ ⲛⲧⲉϥⲁⲡⲟⲫⲁⲥⲓⲥ ·
…
59 ⲁⲗⲗⲁ ⲁϥⲣⲡϣⲁϫⲉ ⲟⲛ ⲙⲡⲉⲡⲣⲟⲫⲏⲧⲏⲥ ⲓⲱⲛⲁⲥ ⲛϭⲟⲗ ⲙⲡϥⲧⲁⲕⲉⲧⲡⲟⲗⲓⲥ ·
…
60 ⲧⲉⲛⲟⲩ ϭⲉ ⲱ ⲛⲁⲙⲉⲣⲁⲧⲉ ⲙⲡⲣⲕⲁⲧⲙⲉⲧⲁⲛⲟⲓⲁ ⲛⲥⲁⲧⲏⲩⲧⲛ · ⲉⲧⲉⲧⲛⲁϩⲉ ⲅⲁⲣ ⲉⲛⲓⲙ ⲉϥⲛⲁⲕⲟⲥⲙⲉⲓ ⲙⲙⲱⲧⲛ ϩⲛⲛⲉⲧⲛϩⲓⲥⲉ ⲛⲧϩⲉ ⲛⲧⲙⲉⲧⲁⲛⲟⲓⲁ ·
…
61 ⲁⲗⲗⲁ ⲙⲁⲣⲛϯ ⲛⲁⲥ ⲛϩⲉⲛⲧⲁⲉⲓⲟ ⲉⲡⲙⲁ ⲛⲛⲁⲅⲁⲑⲟⲛ ⲉⲛⲧⲁⲥⲛⲧⲟⲩ ⲛⲁⲛ ⲉⲃⲟⲗ ϩⲙⲡϫⲓⲥⲉ ·
…
62 ⲁϣ ⲛⲉ ⲛⲁⲅⲁⲑⲟⲛ ⲛⲧⲁⲥⲛⲧⲟⲩ ⲛⲁⲛ ⲉⲃⲟⲗ ϩⲙⲡϫⲓⲥⲉ ·
…
63 ⲁϣ ⲟⲛ ⲛⲉ ⲛⲁⲅⲁⲑⲟⲛ ⲉⲛⲁⲧⲁⲁⲩ ⲛⲁⲥ · ⲟⲩⲛⲏⲥⲧⲉⲓⲁ ⲟⲩϣⲗⲏⲗ ⲉϥⲟⲩⲁⲁⲃ · ⲉⲣⲉⲛⲉⲛϭⲓϫ ⲡⲟⲣϣ ⲉⲃⲟⲗ · ⲉⲣⲉⲛⲉⲛϩⲏⲧ ϩⲙⲡϫⲓⲥⲉ ·
…
64 ϯ ⲛⲁⲥ ⲛⲟⲩⲑⲃⲃⲓⲟ ⲙⲛϩⲉⲛⲁϣⲁϩⲟⲙ ⲛⲁⲓ ⲉϣⲁⲣⲉⲛⲁⲅⲅⲉⲗⲟⲥ ⲣϣⲃⲏⲣ ⲉⲡⲣⲱⲙⲉ ⲉⲧⲃⲏⲏⲧⲟⲩ ·
…
65 ϯ ⲛⲁⲥ ⲛϩⲉⲛⲣⲙⲉⲓⲟⲟⲩⲉ ·
…
66 ⲛⲁⲓ ⲉϣⲁⲩⲱϣⲙ ⲛⲛⲁⲡⲉⲓⲗⲏ ⲛⲧⲅⲉϩⲉⲛⲛⲁ ·
…
67 ϯ ⲛⲁⲥ ⲛⲟⲩⲡⲓⲥⲧⲓⲥ ⲙⲛⲟⲩϩⲉⲗⲡⲓⲥ · ⲛⲁⲓ ⲉϣⲁⲩⲧⲣⲉⲡⲣⲱⲙⲉ ϩⲱⲛ ⲉϩⲟⲩⲛ ⲉⲡⲛⲟⲩⲧⲉ ·
…
68 ϯ ⲛⲁⲥ ⲛⲟⲩⲙⲛⲧϣⲁⲛϩⲧⲏϥ ⲙⲛⲟⲩⲁⲅⲁⲡⲏ ⲉϩⲟⲩⲛ ⲉⲛⲉⲛⲉⲣⲏⲩ ·
…
69 ⲁⲩⲱ ⲟⲩⲛⲁ ⲛⲁⲓ ⲉⲧⲉϣⲁⲩϩⲱⲃⲥ ⲉⲃⲟⲗ ⲉϫⲛⲟⲩⲙⲏⲏϣⲉ ⲛⲛⲟⲃⲉ ·
…
70 ⲁⲩⲱ ⲟⲛ ϣⲁⲩϣⲟⲩ ⲙⲙⲟⲟⲩ ⲉϫⲛⲧⲉⲕⲣⲓⲥⲓⲥ ·
…
71 ⲙⲛⲛⲥⲁⲛⲉⲓⲁⲅⲁⲑⲟⲛ ϭⲉ ⲧⲏⲣⲟⲩ ⲛⲧⲉⲓϭⲟⲧ ⲙⲡⲣⲧⲣⲉⲩⲁⲡⲁⲧⲁ ⲛⲟⲩⲁ ⲙⲙⲟⲛ ⲛϥⲕⲧⲟϥ ⲉⲡⲗⲱⲙⲥ ⲙⲡⲛⲟⲃⲉ ⲛⲕⲉⲥⲟⲡ ·
…
72 ⲙⲛⲛⲥⲁⲧⲙⲉⲧⲁⲛⲟⲓⲁ · ⲛⲧϩⲉ ⲙⲡⲉⲩϩⲟⲣ ⲉϣⲁϥⲕⲟⲧϥ ⲉⲡⲉϥⲕⲁⲃⲟⲗ ⲛⲥⲉⲙⲉⲥⲧⲱϥ ·
…
73 ⲁⲗⲗⲁ ϯⲡⲁⲣⲁⲕⲁⲗⲉⲓ ⲙⲙⲱⲧⲛ ⲛⲁⲙⲉⲣⲁⲧⲉ ·
…
74 ϫⲉⲕⲁⲥ ⲉⲧⲉⲧⲛⲁϩⲁⲣⲉϩ ⲙⲙⲁⲧⲉ ⲛⲧⲉⲧⲛ ⲧⲙⲕⲁⲗⲁⲁⲩ ⲉⲧⲉⲣⲡⲗⲁⲁⲩ ϩⲛⲛⲉⲧⲛⲁϩⲱⲣ ·
…
75 ⲥⲉϫⲓϣⲟϫⲛⲉ ⲅⲁⲣ ⲉⲣⲟⲛ ⲛⲛⲁⲩ ⲛⲓⲙ ⲛϭⲓⲛⲉⲛϫⲁϫⲉ ·
…
76 ⲁⲩⲱ ϣⲁⲣⲉⲛⲥⲟⲟⲛⲉ ⲉⲡⲓⲃⲟⲩⲗⲉⲩⲉ ⲛⲛⲁⲩ ⲛⲓⲙ · ⲉⲡⲙⲁ ⲉⲧⲉⲣⲉⲡⲉⲭⲣⲏⲙⲁ ⲛϩⲏⲧϥ ·
…
77 ⲉⲛϩⲟⲥⲟⲛ ⲇⲉ ⲱ ⲛⲁⲙⲉⲣⲁⲧⲉ ⲉⲣⲉⲡⲁⲣⲁⲕⲗⲏⲧⲟⲥ ⲙⲛⲡⲛⲉⲩⲙⲁ ϭⲱϣⲧ ⲉϫⲱⲛ ϩⲛⲟⲩⲙⲛⲧϣⲁⲛϩⲧⲏϥ ·
…
78 ⲙⲁⲣⲛϯ ⲛⲛⲉⲛⲣⲙⲉⲓⲟⲟⲩⲉ ⲙⲡⲛⲟⲩⲧⲉ ⲙⲙⲏⲛⲉ ·
…
79 ϫⲉⲕⲁⲥ ⲉⲩⲛⲁϣⲱⲡⲉ ⲛⲁⲛ ⲙⲡⲣⲉⲥⲃⲉⲩⲧⲏⲥ ϩⲁⲧⲉⲛϩⲏ ⲉⲙⲡⲁⲧⲛⲉⲓ ⲉⲃⲟⲗ ϩⲛⲥⲱⲙⲁ ·
…
80 ⲙⲁⲣⲛⲙⲉⲧⲁⲛⲟⲉⲓ ϩⲟⲥⲟⲛ ⲧⲛⲕⲏ ⲉⲃⲟⲗ ·
…
81 ⲁⲩⲱ ⲉⲣⲉⲛⲉⲧⲟⲩⲁⲁⲃ ⲟ ⲛϣⲃⲏⲣⲣϩⲱⲃ ⲛⲙⲙⲁⲛ ϩⲙⲡⲥⲟⲡⲥ ·
…
82 ⲙⲡⲣⲧⲣⲉⲩⲟⲧⲡⲛ ⲉϩⲟⲩⲛ · ⲛⲧⲛϣⲓⲛⲉ ⲛⲥⲁⲧⲙⲉⲧⲁⲛⲟⲓⲁ · ⲛⲧⲛⲧⲙϩⲉ ⲉⲣⲟⲥ ·
…
83 ⲙⲡⲣⲧⲣⲉⲛϩⲉ ⲉϩⲣⲁⲓ ⲉⲡϩⲓⲥⲉ ⲛϥⲧⲙⲥⲱⲧⲙ ⲉⲣⲟⲛ ϩⲙⲡⲙⲁ ⲉⲧⲙⲙⲁⲩ ·
…
84 ⲙⲡⲣⲧⲣⲉⲛⲉⲓⲉⲧⲟⲟⲧⲟⲩ ⲛϩⲉⲛⲁⲧⲛⲁ ⲛⲧⲛϩⲓⲥⲉ ⲉⲛϫⲓϣⲕⲁⲕ ⲉⲃⲟⲗ ·
…
85 ⲥⲉⲧⲙⲥⲱⲧⲙ ⲉⲣⲟⲛ ·
…
86 ⲙⲡⲣⲧⲣⲉⲩⲛⲟϫⲛ ⲉⲧⲅⲉϩⲉⲛⲛⲁ ⲛⲧⲛϣⲓⲛⲉ ⲛⲥⲁⲧⲙⲉⲧⲁⲛⲟⲓⲁ · ⲙⲛⲙⲉⲧⲁⲛⲟⲓⲁ ϩⲙⲡⲙⲁ ⲉⲧⲙⲙⲁⲩ ·
…
87 ⲥⲉⲛⲁⲟⲩⲱϣⲃ ⲛⲥⲉϫⲟⲟⲥ ⲛⲁⲛ ⲛϭⲓⲛⲁⲅⲅⲉⲗⲟⲥ ⲛⲣⲉϥⲧⲓⲙⲱⲣⲓ ϩⲛⲟⲩϭⲱⲛⲧ ⲙⲛⲟⲩⲁⲡⲉⲓⲗⲏ ϫⲉⲉⲧⲃⲉⲟⲩ ⲧⲉⲧⲛⲱϣ ⲉⲃⲟⲗ ⲉⲡϫⲓⲛϫⲏ ·
…
88 ⲡⲙⲁ ⲁⲛ ⲡⲉ ⲡⲁⲓ ⲛⲱϣ ⲉⲃⲟⲗ ·
…
89 ⲁⲩϫⲟⲟⲩ ⲉⲣⲱⲧⲛ ⲙⲡⲉⲧⲛⲁⲁⲩ ·
…
90 ⲁⲩⲟϣⲟⲩ ⲉⲣⲱⲧⲛ ⲙⲡⲉⲧⲛⲥⲱⲧⲙ ⲉⲣⲟⲟⲩ ·
…
91 ⲁⲛⲉⲧⲟⲩⲁⲁⲃ ⲉⲛⲕⲁϭⲉⲓ ⲉⲩⲥⲙⲙⲉ ⲉϩⲣⲁⲓ ⲙⲡⲛⲟⲩⲧⲉ ϩⲁⲣⲟⲛ ⲉⲩϫⲱ ⲙⲙⲟⲥ ϫⲉⲁⲛϩⲓⲥⲉ ⲉⲛϫⲓϣⲕⲁⲕ ⲉⲃⲟⲗ ⲧⲉⲛϣⲟⲩⲱⲃⲉ ⲧⲉⲛⲧⲁⲥϩⲱⲱⲗⲉ ·
…
92 ⲛⲧⲉⲩⲛⲟⲩ ⲉⲧⲙⲙⲁⲩ ϣⲁⲣⲉⲛⲁⲅⲅⲉⲗⲟⲥ ⲛⲧⲟⲣⲅⲏ ⲉⲧϩⲓϫⲛⲛⲕⲟⲗⲁⲥⲓⲥ ϣⲁⲩⲥⲱⲛϩ ⲛⲛⲉⲯⲩⲭⲏ ⲛⲛⲣⲉϥⲣⲛⲟⲃⲉ ⲛⲥⲉⲛⲟϫⲟⲩ ⲉⲛⲧⲁⲣⲧⲁⲣⲟⲥ ⲛⲁⲙⲛⲧⲉ · ⲛⲥⲉⲧⲁϣⲟ ⲛⲛⲉⲩⲃⲁⲥⲁⲛⲟⲥ ⲉⲡⲉϩⲟⲩⲟ ·
…
93 ⲁⲩⲱ ⲉⲛϣⲁⲛϩⲓⲥⲉ ⲉⲛⲣⲓⲙⲉ ⲛⲓⲙ ⲡⲉⲧⲛⲁⲥⲱⲧⲙ ⲉⲣⲟⲛ ·
…
94 ⲏ ⲛⲓⲙ ⲡⲉⲧⲛⲁϣⲁⲛⲁϩⲧⲏϥ ϩⲁⲣⲟⲛ ⲙⲡⲙⲁ ⲉⲧⲙⲙⲁⲩ ·
…
95 ⲏ ⲛⲓⲙ ⲡⲉⲧⲛⲁϫⲓ ⲛⲛⲉⲛⲣⲙⲉⲓⲟⲟⲩⲉ ⲛⲧⲟⲟⲧⲛ ⲛϥϫⲓⲧⲟⲩ ⲉⲛⲧⲟⲡⲟⲥ ⲛⲧⲙⲛⲧϣⲁⲛϩⲧⲏϥ ·
…
96 ⲏ ⲛⲓⲙ ϩⲛⲛⲉⲧⲟⲩⲁⲁⲃ ⲡⲉⲧⲛⲁⲡⲁϩⲧϥ ⲙⲡⲛⲟⲩⲧⲉ ⲉϫⲛⲧⲉⲛⲑⲗⲓⲯⲓⲥ ⲙⲛⲧⲉⲛⲁⲛⲁⲅⲕⲏ ⲉⲧⲛⲛϩⲏⲧⲥ ·
…
97 ⲉϣⲱⲡⲉ ⲉⲛϣⲁⲛⲙⲟⲩ ⲉⲙⲡⲛⲙⲉⲧⲁⲛⲟⲉⲓ ⲉϫⲛⲛⲉⲛⲛⲟⲃⲉ ·
…
98 ⲛⲉⲧⲉⲙⲡⲛⲣϩⲱⲃ ⲇⲉ ⲉⲣⲟⲟⲩ ⲙⲡⲉⲓⲙⲁ ⲉⲛϣⲟⲟⲡ ϩⲙⲡⲥⲱⲙⲁ · ⲉⲛⲁϩⲉ ⲉⲣⲟⲟⲩ ⲧⲱⲛ ⲉⲧⲣⲉⲩⲃⲟⲏⲑⲉⲓ ⲉⲣⲟⲛ ϩⲙⲡⲙⲁ ⲉⲧⲙⲙⲁⲩ ·
…
99 ⲙⲛϩⲁⲧ ⲟⲩⲇⲉ ⲙⲛⲛⲟⲩⲃ ⲙⲛⲙⲁ ⲛⲉⲗⲟⲟⲗⲉ
…
100 ⲟⲩⲇⲉ ϭⲉ ⲕⲧⲏⲥⲓⲥ ⲛⲁϣⲃⲟⲏⲑⲉⲓ ⲉⲣⲟⲛ ⲙⲡⲙⲁ ⲉⲧⲙⲙⲁⲩ ·
…
101 ⲟⲩⲇⲉ ⲙⲛⲟⲩⲉⲓⲱⲧ ⲛⲁϣⲓⲛⲉ ⲛⲥⲁϣⲏⲣⲉ ⲙⲡⲙⲁ ⲉⲧⲙⲙⲁⲩ ·
…
102 ⲟⲩⲇⲉ ⲙⲛⲙⲁⲁⲩ ⲛⲁϣⲓⲛⲉ ⲛⲥⲁϣⲉⲉⲣⲉ ⲟⲩⲇⲉ ⲙⲛϣⲏⲣⲉ ⲛⲁϣⲃⲟⲏⲑⲉⲓ ⲉⲛⲉϥⲉⲓⲟⲧⲉ ·
…
103 ⲟⲩⲇⲉ ⲙⲛⲟⲩⲥⲟⲛ ⲛⲁϣⲃⲟⲏⲑⲉⲓ ⲉⲡⲉϥⲥⲟⲛ ·
…
104 ⲙⲛⲗⲁⲁⲩ ϩⲛⲛⲁⲓ ⲛⲁϣⲱⲡⲉ ⲛⲥⲱⲧⲉ ⲛⲧⲉⲛⲯⲩⲭⲏ ⲛⲉⲃⲓⲏⲛ ·
…
105 ⲁⲗⲗⲁ ⲉⲣⲉⲡⲟⲩⲁ ⲡⲟⲩⲁ ⲛⲁϥⲓ ϩⲁⲧⲉϥⲉⲧⲡⲱ · ϩⲛⲛⲕⲟⲗⲁⲥⲓⲥ ⲉⲧϥ ⲛϩⲏⲧⲟⲩ ·
…
106 ⲁⲩⲱ ⲟⲛ ⲁϥⲟⲩⲱ ⲉϥϫⲱ ⲙⲙⲟⲥ ⲛϭⲓⲡⲥⲱⲧⲏⲣ ϫⲉⲡⲉⲧⲙⲉⲛⲉⲓⲱⲧ ϩⲓⲙⲁⲁⲩ ⲛϩⲟⲩⲉ ⲉⲣⲟⲓ · ϥⲙⲡϣⲁ ⲙⲙⲟⲓ ⲁⲛ ·
…
107 ⲁⲩⲱ ⲡⲉⲧⲛⲁⲕⲁϣⲏⲣⲉ ⲁⲛ ⲛⲥⲱϥ ϩⲓϣⲉⲉⲣⲉ ⲛϥϥⲓ ⲙⲡⲉϥⲥⲧⲁⲩⲣⲟⲥ ⲛϥⲟⲩⲁϩϥ ⲛⲥⲱⲓ ϥⲙⲡϣⲁ ⲙⲙⲟⲓ ⲁⲛ ·
…
108 ⲁⲩⲱ ϥⲛⲁⲕⲗⲏⲣⲟⲛⲟⲙⲉⲓ ⲁⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ :
…
109 ⲱ ϫⲉⲟⲩϩⲟⲧⲉ ⲛⲁϣ ⲛϭⲟⲧ ⲡⲉ ϩⲉ ⲉϩⲣⲁⲓ ⲉⲛϭⲓϫ ⲙⲡⲛⲟⲩⲧⲉ ⲉⲧⲟⲛϩ · ⲙⲡⲛⲁⲩ ⲙⲡⲉⲛϭⲙⲡϣⲓⲛⲉ ·
…
110 ϥϩⲉⲣⲙⲏⲛⲉⲩⲉ ⲛⲁⲛ ⲙⲡϣⲁϫⲉ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ⲉϥϫⲱ ⲙⲙⲟⲥ ϫⲉⲡⲧⲁⲗⲁⲓⲡⲱⲣⲟⲥ ⲁⲛⲟⲕ ⲡⲣⲱⲙⲉ ⲛⲓⲙ ⲡⲉⲧⲛⲁϣⲛⲁϩⲙⲉⲧ ⲉⲃⲟⲗ ϩⲙⲡⲥⲱⲙⲁ ⲙⲡⲓⲙⲟⲩ ·
…
111 ⲱ ⲧⲉⲓⲛⲟϭ ⲛϩⲟⲧⲉ ⲙⲛⲧⲉⲓⲛⲟϭ ⲛⲑⲗⲓⲯⲓⲥ ⲉⲧⲛⲁϣⲱⲡⲉ ⲙⲯⲩⲭⲏ ⲛⲓⲙ ⲙⲡⲛⲁⲩ ⲉⲧⲟⲩⲛⲁⲉⲓⲛⲉ ⲙⲙⲟⲟⲩ ⲉϩⲣⲁⲓ ϩⲛⲛⲉⲛⲙⲉⲗⲟⲥ ·
…
112 ⲙⲡⲛⲁⲩ ⲉⲣⲉⲡⲛⲟϭ ⲛϩⲗⲟⲥⲧⲛ ⲛⲕⲁⲕⲉ ⲛⲁϩⲱⲃⲥ ⲉⲃⲟⲗ ⲉϫⲱⲛ · ⲉϥⲟ ⲛⲕⲁⲕⲉ ϩⲓⲣⲛⲛⲉⲛⲃⲁⲗ · ⲉϥⲡⲟⲣϣ ⲉⲃⲟⲗ ⲉϫⲙⲡⲟⲩⲟⲉⲓⲛ ⲧⲏⲣϥ ·
…
113 ⲙⲡⲉⲛϩⲏⲧ ⲡⲉϣⲧⲟⲣⲧⲣ ⲙⲙⲁⲧⲉ ⲛⲛⲉⲛⲧⲁⲩⲉⲓ ⲛⲥⲱⲛ ⲙⲛⲧϩⲟⲧⲉ ⲛⲧⲉⲩⲙⲟⲣⲫⲏ ·
…
114 ⲥⲉⲣⲱϣⲉ ⲉⲣⲟⲛ · ⲙⲛⲡⲉⲕⲣⲟⲙⲣⲙ ⲛⲧⲉⲩϩⲓⲕⲱⲛ ·
…
115 ⲁⲩⲱ ⲡⲉϩⲣⲟϫⲣⲉϫ ⲛⲛⲉⲩⲟⲃϩⲉ · ⲙⲛⲡϭⲱⲛⲧ ⲛⲛⲉⲩⲃⲁⲗ · ⲙⲛⲡⲛⲟⲉⲓⲛ ⲛⲛⲉⲩⲙⲉⲗⲟⲥ ·
…
116 ⲙⲛⲧϭⲓⲛⲙⲟⲟϣⲉ ⲛⲛⲉⲩⲟⲩⲉⲣⲏⲧⲉ · ⲙⲛⲡϩⲙϩⲙ ⲛⲛⲉⲩⲥⲡⲟⲧⲟⲩ ·
…
117 ⲙⲛⲧϩⲉ ⲧⲏⲣⲥ ⲉⲧⲟⲩⲟ ⲛⲟⲩⲁϩⲓⲏⲧ ⲉϩⲟⲩⲛ ⲉⲣⲟⲛ · ⲉϩⲛⲁⲩ ⲉⲟⲙⲕⲛ ·
…
118 ⲉⲛϣⲁⲛⲛⲁⲩ ⲉⲛⲁⲓ ⲧⲏⲣⲟⲩ ⲙⲡⲉⲛⲙⲧⲟ ⲉⲃⲟⲗ · ⲟⲩ ⲡⲉⲧⲛⲛⲁϫⲟⲟϥ ⲏ ⲟⲩ ⲡⲉⲧⲛⲛⲁⲧⲁⲩⲟϥ ·
…
119 ⲏ ⲉⲣⲉⲧⲉⲛⲧⲁⲡⲣⲟ ⲛⲁϣⲁϫⲉ ⲛⲁϣ ⲛϩⲉ · ⲉⲛⲁϣⲡⲱⲧ ⲉⲧⲱⲛ ·
…
120 ⲏ ⲉⲛⲁϩⲟⲡⲛ ⲛⲁϣ ⲙⲙⲁ · ⲙⲛⲧϩⲉ ⲅⲁⲣ ⲛⲣⲃⲟⲗ ⲉⲛⲉⲩϭⲓϫ ·
…
121 ⲟⲩⲇⲉ ⲙⲛⲧϩⲉ ⲙⲡⲱⲧ ⲥⲁⲗⲁⲁⲩ · ⲛⲥⲁⲛⲁϩⲣⲙⲡϩⲟ ⲙⲡⲛⲟⲩⲧⲉ ·
…
122 ϥⲥⲏϩ ⲅⲁⲣ ϫⲉⲉⲓⲛⲁⲡⲱⲧ ⲉⲧⲱⲛ ⲥⲁⲃⲟⲗ ⲙⲡⲉⲕϩⲟ ·
…
123 ⲏ ⲉⲓⲛⲁⲡⲱⲧ ⲉⲧⲱⲛ ⲥⲁⲃⲟⲗ ⲙⲡⲉⲕⲡⲛⲉⲩⲙⲁ ·
…
124 ⲙⲁⲣⲛⲉⲓⲙⲉ ϭⲉ ⲟⲩⲛ ϫⲉⲁϣ ⲛⲉ ⲛⲡⲁϩⲣⲉ ⲉⲧⲛⲁⲑⲉⲣⲁⲡⲉⲩⲉ ⲙⲡⲉⲓⲛⲟϭ ⲛϣⲱⲛⲉ ·
…
125 ⲏ ⲟⲩ ⲡⲉⲧⲛⲁϩⲱⲃⲥ ⲉⲃⲟⲗ ⲉϫⲛⲧⲉⲓⲛⲟϭ ⲙⲡⲗⲏⲅⲏ ⲛⲧⲉⲓⲙⲓⲛⲉ ·
…
126 ⲙⲛϩⲁⲧ ⲟⲩⲇⲉ ⲙⲛⲛⲟⲩⲃ · ⲙⲛⲭⲣⲏⲙⲁ ⲙⲛⲙⲛⲧⲣⲙⲙⲁⲟ ·
…
127 ⲙⲛⲗⲁⲁⲩ ⲅⲁⲣ ϩⲛⲛⲁⲓ ⲛⲁϣⲣⲡⲁϩⲣⲉ ⲉⲣⲟⲛ ·
…
128 ⲟⲩⲇⲉ ⲡⲕⲟⲥⲙⲟⲥ ⲧⲏⲣϥ ⲙⲛⲛⲉⲧⲛϩⲏⲧϥ ⲛⲁϣⲃⲟⲏⲑⲉⲓ ⲉⲣⲟⲛ ⲁⲛ ·
…
129 ⲧⲛⲛⲁϩⲉ ⲅⲁⲣ ⲁⲛ ⲉⲡⲁϩⲣⲉ ⲉⲑⲉⲣⲁⲡⲉⲩⲉ ⲙⲙⲟⲛ ⲉⲓⲙⲏⲧⲓ ⲉⲡⲉϣⲗⲏⲗ ⲙⲛⲧⲛⲏⲥⲧⲉⲓⲁ ⲙⲛⲡⲧⲃⲃⲟ ·
…
130 ⲛⲁⲓ ⲅⲁⲣ ⲛⲧⲉⲓⲙⲓⲛⲉ ⲛⲉⲧⲉⲩⲛϣϭⲟⲙ ⲙⲙⲟⲟⲩ ⲉϩⲱⲃⲥ ⲉⲃⲟⲗ ⲉϫⲱⲛ ⲙⲡⲛⲁⲩ ⲛⲧⲉⲛⲁⲛⲁⲅⲕⲏ ·
…
131 ⲙⲁⲣⲛⲣⲡⲙⲉⲉⲩⲉ ⲙⲡϫⲟⲉⲓⲥ ⲙⲡⲧⲏⲣϥ ⲓⲏⲥⲟⲩⲥ ⲡϣⲏⲣⲉ ⲙⲡⲛⲟⲩⲧⲉ ⲉⲧⲟⲛϩ ·
…
132 ⲡⲉⲛⲧⲁϥⲡⲗⲁⲥⲥⲉ ⲛⲛⲓϥⲉ ⲛⲓⲙ ·
…
133 ⲁⲩⲱ ⲙⲡⲏⲩⲉ ⲙⲛⲡⲕⲁϩ · ⲧϩⲁⲗⲁⲥⲥⲁ ⲙⲛⲛⲓⲉⲣⲱⲟⲩ ·
…
134 ⲡϫⲟⲉⲓⲥ ⲛⲛⲉⲧϩⲛⲙⲡⲏⲩⲉ ⲙⲛⲛⲉⲧϩⲓϫⲙⲡⲕⲁϩ ⲡⲉⲧⲉⲧⲱϥ ⲧⲉ ⲧⲉⲝⲟⲩⲥⲓⲁ ⲙⲁⲩⲁⲁϥ · ⲉϥϣⲟⲟⲡ ϩⲙⲡⲉⲓⲱⲧ · ⲉⲣⲉⲡⲉⲓⲱⲧ ϣⲟⲟⲡ ⲛϩⲏⲧϥ ·
…
135 ⲉϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲡⲁⲉⲓⲱⲧ ⲙⲁⲧⲟⲩϫⲟⲓ ⲉⲃⲟⲗ ϩⲛⲧⲉⲓⲟⲩⲛⲟⲩ ·
…
136 ⲁⲩⲱ ⲟⲛ ϫⲉⲡⲁⲉⲓⲱⲧ ⲉϣϫⲉ ⲟⲩⲛϣϫⲟⲙ ⲙⲁⲣⲉⲡⲉⲓⲁⲡⲟⲧ ⲥⲁⲁⲧ ·
…
137 ⲡⲗⲏⲛ ⲙⲁⲣⲉⲡⲉⲕⲟⲩⲱϣ ϣⲱⲡⲉ ⲡⲱⲓ ⲁⲛ ·
…
138 ⲉⲛⲉϥϣⲗⲏⲗ ⲇⲉ ϣⲁⲁϣⲟⲙⲛⲧ ⲛⲥⲟⲡ ⲉϥϫⲱ ⲙⲙⲟⲥ ϫⲉⲉϣϫⲉ ⲡⲉⲕⲟⲩⲱϣ ⲡⲉ ⲡⲁⲓ ⲙⲁⲣⲉϥϣⲱⲡⲉ ·
…
139 ϭⲱϣⲧ ⲛⲧⲉⲧⲛⲛⲁⲩ ⲉⲡⲉⲓϣⲁϫⲉ ⲛϩⲟⲧⲉ ⲛⲧⲁⲡϫⲟⲉⲓⲥ ⲙⲡⲧⲏⲣϥ ϫⲟⲟϥ ⲉⲛⲉϥⲣϩⲟⲧⲉ ⲁⲛ ϩⲏⲧϥ ⲙⲡⲙⲟⲩ · ⲛⲧⲟϥ ⲅⲁⲣ ⲡⲉⲧⲟ ⲛⲉⲝⲟⲩⲥⲓⲁ ⲙⲡⲙⲟⲩ ·
…
140 ⲁⲩⲱ ⲛⲧⲟϥ ⲡⲉⲧⲟ ⲛϫⲟⲉⲓⲥ ⲉⲣⲟϥ ·
…
141 ⲁⲗⲗⲁ ⲉⲃⲟⲗ ϫⲉⲟⲩⲛⲟⲩⲧⲉ ⲉϥϣⲟⲟⲡ ϩⲛⲟⲩⲉⲟⲟⲩ ⲉϥϫⲟⲥⲉ · ⲉⲁϥϣⲱⲡⲉ ϩⲛⲟⲩⲥⲙⲟⲧ ⲛⲑⲃⲃⲓⲟ ⲛⲣⲱⲙⲉ · ⲉⲧⲣⲉϥϫⲓϯⲡⲉ ⲙⲡⲙⲟⲩ ϩⲁⲡⲧⲏⲣϥ ·
…
142 ⲛⲉⲥⲡⲣⲉⲡⲉⲓ ⲅⲁⲣ ⲛⲁϥ ⲡⲉ ·
…
143 ⲁⲩⲱ ⲥⲉⲛⲁⲡⲁⲣⲁⲇⲓⲇⲟⲩ ⲙⲙⲟϥ ⲉⲛϭⲓϫ ⲛⲛⲣⲉϥⲣⲛⲟⲃⲉ ·
…
144 ⲉⲧⲃⲉⲡⲁⲓ ⲁϥⲧⲁⲙⲉⲟⲩⲟⲛ ⲛⲓⲙ ϫⲉⲟⲩⲛⲟϭ ⲧⲉ ⲧⲁⲛⲁⲅⲕⲏ ⲙⲡⲙⲟⲩ ⲉⲧⲛⲁⲉⲓ ⲉϩⲣⲁⲓ ⲉϫⲙⲯⲩⲭⲏ ⲛⲓⲙ ⲛⲣⲱⲙⲉ ⲙⲡⲛⲁⲩ ⲙⲡⲉⲩϭⲙⲡϣⲓⲛⲉ ·
…
145 ⲡⲉϩⲟⲟⲩ ⲅⲁⲣ ⲉⲧⲙⲙⲁⲩ ⲟⲩϩⲟⲟⲩ ⲡⲉ ⲛⲑⲗⲓⲯⲓⲥ ϩⲓⲁⲛⲁⲅⲕⲏ ϩⲓⲁϣⲁϩⲟⲙ ϣⲁⲛⲧⲛⲡⲁⲣⲁⲅⲉ ⲙⲡⲉⲓⲛⲟϭ ⲛⲕⲓⲛⲇⲩⲛⲟⲥ ⲉⲧⲙⲉϩ ⲛϩⲟⲧⲉ ·
…
146 ⲉⲛⲉⲛⲧⲁⲛⲕⲁⲙⲉⲧⲁⲛⲟⲓⲁ ⲅⲁⲣ ⲛⲁⲛ ⲡⲉ ⲛϣⲃⲏⲣⲣϩⲱⲃ ϣⲁⲃⲟⲗ ⲛⲉⲛⲁϩⲉ ⲉⲣⲟⲥ ⲡⲉ ⲛⲧⲉⲩⲛⲟⲩ ⲛⲧⲛϫⲟⲟⲩⲥ ⲉⲣⲁⲧϥ ⲙⲡⲛⲟⲩⲧⲉ ⲡⲉⲓⲱⲧ ⲛⲧⲙⲛⲧⲁⲅⲁⲑⲟⲥ ⲛϥⲛⲁϩⲙⲛ ϩⲛⲛⲉⲓⲁⲛⲁⲅⲕⲏ ⲧⲏⲣⲟⲩ ⲙⲛⲛⲉⲓⲑⲗⲓⲯⲓⲥ ⲉⲧϩⲓϫⲱⲛ ·
…
147 ⲛⲥϥⲓⲧⲛ ⲛⲧⲟⲟⲧⲟⲩ ⲛⲉⲓⲁⲅⲅⲉⲗⲟⲥ ⲛⲟⲩⲁϩⲓⲏⲧ ⲛⲁⲧⲛⲁ ·
…
148 ⲉⲛⲉⲛⲧⲁⲛⲕⲁⲡⲉⲑⲃⲃⲓⲟ ⲛⲁⲛ ⲡⲉ ⲛϣⲃⲣⲣϩⲱⲃ ·
…
149 ⲉⲛⲉϥⲛⲁⲗⲟ ⲁⲛ ⲡⲉ ⲉϥⲡⲁϩⲧ ⲙⲡⲛⲟⲩⲧⲉ ϣⲁⲛⲧϥⲧⲛⲛⲟⲟⲩ ⲛϥϫⲓⲧⲛ ϩⲛⲟⲩⲣⲁϣⲉ ⲉⲡⲧⲟⲡ ⲛⲛⲉⲧⲟⲩⲁⲁⲃ ·
…
150 ϩⲙⲡⲕⲁϩ ⲛⲛⲉⲧⲟⲛϩ · ⲉⲛⲉⲛⲧⲁⲛⲕⲁⲧⲁⲅⲁⲡⲏ ⲛⲁⲛ ⲡⲉ ⲛϣⲃⲣⲣϩⲱⲃ ·
…
151 ⲛⲉⲩⲛⲁⲗⲟ ⲁⲛ ⲡⲉ ⲉⲩⲡⲁⲣⲁⲕⲁⲗⲉⲓ ⲙⲡⲛⲁϩⲏⲧ ⲡⲉⲓⲱⲧ ⲛⲧⲙⲛⲧϣⲁⲛϩⲧⲏϥ ϣⲁⲛⲧϥ ϫⲟⲟⲩ ⲛⲥⲱⲛ ⲛⲥⲉϫⲓⲧⲛ ϩⲛⲟⲩⲣⲁϣⲉ ⲉϩⲟⲩⲛ ⲉⲛⲧⲟⲡⲟⲥ ⲉⲧⲧⲁⲓⲏⲩ ⲛⲧⲉϩⲓⲉⲣⲟⲩⲥⲁⲗⲏⲙ ⲛⲧⲡⲉ · ⲛⲥⲉⲧⲁⲁⲛ ⲛⲇⲱⲣⲟⲛ ⲙⲡⲙⲉⲣⲓⲧ ·
…
152 ⲉϣⲱⲡⲉ ⲇⲉ ⲙⲛⲧⲁⲛ ⲗⲁⲁⲩ ϩⲛⲛⲁⲓ ⲉⲩϣⲟⲟⲡ ⲛⲁⲛ ⲛϣⲃⲣⲣϩⲱⲃ ·
…
153 ⲉⲓⲙⲉ ϫⲉⲉⲛϣⲁⲛϩⲓⲥⲉ ⲉⲛⲱϣ ⲉⲃⲟⲗ ϩⲛⲛⲕⲟⲗⲁⲥⲓⲥ ⲉⲛⲣⲓⲙⲉ ϩⲛⲟⲩⲙⲛⲧⲉⲃⲓⲏⲛ ⲧⲙ ⲧⲉ ⲗⲁⲁⲩ ⲛⲛⲁ ϣⲱⲡⲉ ⲛⲁⲛ ·
…
154 ⲁⲗⲗⲁ ⲉⲣⲉⲛⲁⲅⲅⲉⲗⲟⲥ ⲛⲣⲉϥⲧⲓⲙⲱⲣⲓ ⲛⲁϭⲱⲛⲧ ⲉⲣⲟⲛ ⲡⲉ ⲛⲥⲉⲛⲉϭⲛⲟⲩϭⲛ ϩⲛⲟⲩⲙⲛⲧⲁⲧⲛⲁ ⲛⲥⲉⲧⲓⲙⲱⲣⲉⲓ ⲙⲙⲟⲛ ⲉⲡⲉϩⲟⲩⲟ ·
…
155 ⲉⲡⲉⲓⲇⲏ ⲙⲛⲧⲁⲩ ⲙⲙⲁⲩ ⲛⲧⲙⲛⲧⲛⲁⲏⲧ ⲉⲧⲣⲉⲩϣⲁⲛⲁϩⲧⲏⲩ ϩⲁⲛⲉⲯⲩⲭⲟⲟⲩⲉ · ⲁⲗⲗⲁ ϩⲉⲛⲟⲩⲁϩⲓⲏⲧ ⲛⲉ ⲛⲁⲧⲛⲁ ·
…
156 ⲡⲉⲩϩⲱⲃ ϩⲱⲟⲩ ⲡⲉ ⲡⲁⲓ ⲉⲧⲣⲉⲩⲃⲁⲥⲁⲛⲓⲍⲉ ⲛⲛⲉⲯⲩⲭⲏ ⲛⲛⲣⲉϥⲣⲛⲟⲃⲉ ·
…
157 ⲱ ⲟⲩϩⲟⲧⲉ ⲡⲉ ϩⲉ ⲉϩⲣⲁⲓ ⲉⲛⲧⲟⲡⲟⲥ ⲛⲁⲧϭⲙⲡⲉⲩϣⲓⲛⲉ ⲕⲁⲧⲁⲡⲉⲧⲥⲏϩ · ϫⲉⲉⲣⲉⲡⲉⲧⲉⲛϥⲣϩⲟⲧⲉ ⲁⲛ ⲛⲁϣⲱⲡⲉ ϩⲛϩⲉⲛⲙⲁ ⲉⲙⲡϣⲁ ⲉⲛⲉϩ ϭⲓⲛⲉ ⲁⲛ ⲙⲡⲉⲩϣⲓⲛⲉ ·
…
158 ⲱ ⲟⲩⲙⲛⲧⲉⲃⲓⲏⲛ ⲛⲁϣ ⲛϭⲟⲧ ⲧⲉⲧⲛⲁⲧⲁϩⲉ ⲛⲁⲓ ⲉⲛⲧⲁⲩⲧⲁⲗⲉⲡⲣⲁⲛ ⲉⲧⲟⲩⲁⲁⲃ ⲉϩⲣⲁⲓ ⲉϫⲱⲟⲩ ϫⲉⲟⲩⲏⲏⲃ ϩⲓⲙⲟⲛⲁⲭⲟⲥ · ⲉⲩⲕⲁⲧⲁⲫⲣⲟⲛⲉⲓ ⲛⲛⲉⲛⲧⲟⲗⲏ ⲙⲡⲛⲟⲩⲧⲉ ·
…
159 ⲛⲣⲉϥⲣⲛⲟⲃⲉ ⲉⲧϩⲛⲛⲕⲟⲗⲁⲥⲓⲥ ⲛⲁⲛⲉϭⲛⲟⲩϭⲟⲩ ⲛⲥⲉϫⲟⲟⲥ ⲛⲁⲩ ϫⲉⲉⲥⲧⲱ ⲁⲛⲟⲛ ϫⲉⲁⲛⲣⲛⲟⲃⲉ · ϫⲉⲉⲛϩⲙⲡⲣⲟⲟⲩϣ ⲛⲛⲉϩⲃⲏⲩⲉ ⲙⲡⲃⲓⲟⲥ ·
…
160 ⲁⲛⲡⲗⲁⲛⲁ ϩⲙⲡⲥⲱⲣⲙ ⲛⲧϩⲩⲗⲏ ·
…
161 ⲛⲧⲱⲧⲛ ϩⲱⲧⲧⲏⲩⲧⲛ ⲉⲧⲉⲧⲛⲣⲟⲩ ⲙⲡⲉⲓⲙⲁ ϩⲛⲛⲉⲓⲕⲟⲗⲁⲥⲓⲥ ⲛⲁⲧⲱϫⲛ ·
…
162 ⲙⲏ ⲛⲧⲱⲧⲛ ⲁⲛ ⲛⲉⲧⲫⲟⲣⲉⲓ ⲙⲡⲉⲥⲭⲏⲙⲁ ⲛⲧⲙⲛⲧⲉⲩⲥⲉⲃⲏⲥ ϩⲙⲡⲕⲟⲥⲙⲟⲥ ·
…
163 ⲱ ⲟⲩⲛⲟϭ ⲡⲉ ⲡϣⲓⲡⲉ ⲉⲧⲙⲙⲁⲩ · ⲉⲙⲛϩⲁⲏ ⲟⲩⲏϩ ⲛⲥⲱϥ ·
…
164 ⲁⲗⲗⲁ ⲉϥⲙⲏⲛ ⲉⲃⲟⲗ ⲛϣⲁⲉⲛⲉϩ ·
…
165 ⲛⲛⲉⲥϣⲱⲡⲉ ⲇⲉ ⲱ ⲛⲁⲙⲉⲣⲁⲧⲉ ⲉⲧⲣⲉⲡⲛⲟⲩⲧⲉ ⲕⲁⲧⲉⲓⲛⲟϭ ⲙⲙⲛⲧⲧⲁⲗⲁⲓⲡⲱⲣⲟⲥ ⲉⲧⲁϩⲟⲛ ·
…
166 ⲁⲗⲗⲁ ⲙⲁⲣⲛⲁⲅⲱⲛⲓⲍⲉ ⲛⲧⲟϥ ϩⲛⲧⲉⲛϭⲟⲙ ⲧⲏⲣⲥ ⲉⲧⲣⲉⲛϫⲡⲟ ⲛⲁⲛ ⲙⲡⲛⲟϭ ⲛⲉⲟⲟⲩ ⲙⲡⲙⲁ ⲉⲧⲙⲙⲁⲩ ⲡⲁⲓ ⲉⲣⲉⲛⲉⲧⲟⲩⲁⲁⲃ ⲧⲏⲣⲟⲩ ⲫⲟⲣⲉⲓ ⲙⲙⲟϥ ·
…
167 ϣⲗⲏⲗ ⲱ ⲛⲁⲙⲉⲣⲁⲧⲉ ⲉⲧⲣⲉⲛϫⲓⲧϥ ⲉⲃⲟⲗ ϫⲉⲟⲩⲉⲟⲟⲩ ⲡⲉ · ⲉϥⲙⲏⲛ ⲉⲃⲟⲗ ⲛϣⲁⲉⲛⲉϩ ·
…
168 ⲙⲁⲣⲛⲙⲉⲧⲁⲛⲟⲉⲓ ⲟⲩⲛ ⲱ ⲛⲁⲙⲉⲣⲁⲧⲉ ·
…
169 ⲁⲩⲱ ⲛⲁⲥⲛⲏⲩ ⲛⲧⲛϭⲱ ⲉⲛⲣⲓⲙⲉ ⲛⲛⲁⲩ ⲛⲓⲙ ·
…
170 ⲙⲡⲉⲙⲧⲟ ⲉⲃⲟⲗ ⲙⲡⲥⲱⲧⲏⲣ ϣⲁⲛⲧⲉⲧⲉϥⲥⲙⲏ ⲧⲁϩⲟⲛ ϩⲛⲟⲩⲣⲁϣⲉ · ϫⲉⲛⲉⲧⲛⲛⲟⲃⲉ ⲕⲏ ⲛⲏⲧⲛ ⲉⲃⲟⲗ ·
…
171 ⲡⲣⲓⲙⲉ ⲅⲁⲣ ⲛⲧⲙⲉⲧⲁⲛⲟⲓⲁ ϣⲁϥϯⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ ⲉⲧⲣⲉϥϭⲱϣⲧ ⲉϫⲱⲕ · ⲛϥⲛⲁ ⲛⲁⲕ ·
…
172 ⲡⲣⲓⲙⲉ ⲛⲧⲙⲉⲧⲁⲛⲟⲓⲁ ⲡⲉ ϣⲁϥⲧⲣⲉⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲡⲱⲧ ⲉϩⲟⲩⲛ ⲉⲡⲣⲱⲙⲉ ⲛϥⲟⲩⲱϩ ⲛϩⲏⲧϥ ·
…
173 ϩⲓⲧⲙⲡⲣⲓⲙⲉ ⲛⲧⲙⲉⲧⲁⲛⲟⲓⲁ ϣⲁⲣⲉⲡⲛⲟⲩⲧⲉ ⲧⲣⲉⲕⲣⲃⲣⲣⲉ ⲛⲕⲉⲥⲟⲡ · ⲛϥⲕⲧⲟ ⲛⲁⲕ ⲙⲡⲕⲁⲣⲡⲟⲥ ⲛⲛⲉⲕϩⲓⲥⲉ ⲉϥⲟⲩⲟϫ ·
…
174 ⲙⲁⲣⲉⲣⲓⲙⲉ ⲅⲁⲣ ϣⲱⲡⲉ ⲭⲱⲣⲓⲥ ⲕⲱⲗϫ ⲛϩⲏⲧ ·
…
175 ⲙⲁⲣⲉⲕⲱⲗϫ ⲇⲉ ⲛϩⲏⲧ ϣⲱⲡⲉ ⲛⲛⲉⲧⲉⲓⲣⲉ ⲙⲡⲉⲩⲃⲓⲟⲥ ϩⲛⲟⲩⲥⲡⲁⲧⲁⲗⲓⲁ ⲙⲛⲟⲩϫⲓϩⲣⲁϥ ·
…
176 ⲟⲩⲇⲉ ⲙⲁⲣⲉⲙⲉⲧⲁⲛⲟⲓⲁ ⲟⲩⲱϩ ϩⲙⲡⲣⲱⲙⲉ ⲉⲧⲥⲁⲛⲁϣⲧ ϩⲛⲧⲁⲡⲁⲧⲏ ·
…
177 ⲁⲗⲗⲁ ϩⲓⲧⲙⲡϩⲓⲥⲉ ⲛⲧⲛⲏⲥⲧⲉⲓⲁ ⲙⲛⲡⲉⲑⲕⲟ ⲛⲧⲥⲁⲣⲝ ·
…
178 ϣⲁⲣⲉⲡⲉⲕϩⲏⲧ ⲑⲃⲃⲓⲟ ⲛⲅϣⲓⲛⲉ ⲛⲥⲁⲧⲙⲉⲧⲁⲛⲟⲓⲁ · ⲛⲅⲁϣⲁϩⲟⲙ ⲉϫⲛⲛⲉⲕⲛⲟⲃⲉ ·
…
179 ⲧⲉⲛⲟⲩ ϭⲉ ⲱ ⲛⲁⲙⲉⲣⲁⲧⲉ ⲙⲁⲣⲛϥⲓ ⲡⲣⲟⲟⲩϣ ϩⲁⲡⲉⲛⲱⲛϩ ⲛⲛⲁⲩ ⲛⲓⲙ ϩⲱⲥ ⲉⲩⲥⲟⲡⲥ ⲙⲙⲟⲛ ⲉⲃⲟⲗ ϩⲓⲧⲙⲡϫⲟⲉⲓⲥ ⲉⲣⲡⲓⲥⲧⲟⲥ ·
…
180 ϭⲱϣⲧ ⲉⲡⲉⲛϫⲟⲉⲓⲥ ⲁⲩⲱ ⲡⲉⲛⲥⲱⲧⲏⲣ ⲓⲏⲥⲟⲩⲥ ϫⲉⲁϥϣⲡⲟⲩⲏⲣ ϩⲓⲥⲉ ϩⲁⲣⲟⲛ ·
…
181 ⲟⲩ ⲅⲁⲣ ⲡⲉ ⲡⲡⲉⲧϩⲟⲟⲩ ⲉⲛⲧⲁϥⲁⲁϥ ·
…
182 ⲏ ⲛⲓⲙ ϩⲙⲡⲥⲱⲛⲧ ⲧⲏⲣϥ ⲡⲉⲧⲛⲁϫⲡⲓⲟϥ ⲉⲧⲃⲉⲛⲟⲃⲉ ·
…
183 ⲁⲗⲗⲁ ⲛⲧⲁϥϣⲉⲡⲛⲁⲓ ⲧⲏⲣⲟⲩ ⲉⲧⲃⲏⲏⲧⲛ ⲁⲛⲟⲛ ⲛⲣⲉϥⲣⲛⲟⲃⲉ ϫⲉϫⲉⲕⲁⲥ ⲉϥⲉⲭⲁⲣⲓⲍⲉ ⲛⲁⲛ ⲙⲡⲉⲓⲛⲟϭ ⲛⲟⲩϭⲁⲓ ⲛⲧⲉⲧⲙⲉⲧⲁⲛⲟⲓⲁ ·
…
184 ⲙⲁⲣⲉⲛⲃⲁⲗ ⲙⲡⲉⲧⲛϩⲏⲧ ⲉⲓⲱⲣϩ ⲛⲛⲉⲓϥⲧ ⲉⲧⲟϥⲧ ⲉⲛⲉϥϭⲓϫ ⲉⲧⲟⲩⲁⲁⲃ · ⲉϥⲁϣⲉ ⲉⲡϣⲉ ⲙⲡⲉⲥⲧⲁⲩⲣⲟⲥ ϩⲁⲛⲉⲛⲛⲟⲃⲉ ·
…
185 ⲙⲛⲡⲉϥⲥⲡⲓⲣ ⲉⲛⲧⲁⲩⲕⲟⲟⲛⲥϥ ⲛⲟⲩⲗⲟⲛⲭⲏ ⲉϥϣⲟⲩⲟ ⲉⲃⲟⲗ ⲛⲟⲩⲥⲛⲟϥ ⲙⲛⲟⲩⲙⲟⲟⲩ · ⲙⲛⲡⲕⲁϣⲉ ⲛⲧⲁⲩⲣⲱϩⲧ ⲙⲙⲟϥ ⲉϫⲛⲧⲉϥⲁⲡⲉ ·
…
186 ⲙⲛⲡϩⲩⲡⲏⲣⲉⲧⲏⲥ ⲛⲁⲧϣⲓⲡⲉ ⲉⲛⲧⲁϥϩⲓⲟⲩⲉ ⲉϩⲟⲩⲛ ϩⲙⲡⲉϥϩⲟ ·
…
187 ⲛⲉϥⲕⲁⲣⲁⲉⲓⲧ ⲡⲉ ·
…
188 ⲁⲩⲱ ⲉⲛⲉϥⲟⲃⲉ ϩⲓⲡⲉⲥⲧⲁⲩⲣⲟⲥ · ⲉⲙⲡⲟⲩϣⲁⲛⲁϩⲧⲏⲩ ϩⲁⲣⲟϥ ·
…
189 ⲁⲗⲗⲁ ⲛⲧⲁⲩⲣⲡⲕⲉⲥⲟϥ ⲛⲟⲩϩⲙϫ ⲙⲛⲟⲩⲥⲓϣⲉ ϩⲙⲡⲉϥⲉⲓⲃⲉ ·
…
190 ϩⲙⲡⲧⲣⲉϥϫⲉⲕⲛⲁⲓ ⲧⲏⲣⲟⲩ ⲉⲃⲟⲗ ⲉϥϥⲓ ⲉⲣⲟϥ ϩⲛⲟⲩⲙⲛⲧϩⲁⲣϣϩⲏⲧ ·
…
191 ⲙⲛⲟⲩⲙⲛⲧⲙⲁⲓⲣⲱⲙⲉ ⲉϥⲟⲩⲱϣ ⲉⲧⲣⲉⲛϣⲱⲡⲉ ⲛⲁϥ ⲛⲕⲟⲓⲛⲱⲛⲟⲥ · ϩⲛⲛⲉϥϩⲓⲥⲉ ϫⲉⲕⲁⲥ ⲉⲛⲁⲕⲗⲏⲣⲟⲛⲟⲙⲉⲓ ⲛⲙⲙⲁϥ ⲉⲧⲉϥⲙⲛⲧⲣⲣⲟ ⲉⲧϩⲛⲙⲡⲏⲩⲉ :
…
192 ⲡⲉϫⲁϥ ϫⲉⲡⲉⲧⲙⲉ ⲙⲙⲟⲓ ⲙⲁⲣⲉϥⲁⲡⲁⲣⲛⲁ ⲙⲙⲟϥ ⲛϥϥⲓ ⲙⲡⲉϥⲥⲧⲁⲩⲣⲟⲥ ⲛϥⲟⲩⲁϩϥ ⲛⲥⲱⲓ ·
…
193 ϥⲥⲟⲟⲩⲛ ϩⲱⲱϥ ⲟⲛ ⲛϭⲓⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ⲡⲁⲩⲗⲟⲥ ⲙⲡⲧⲁⲉⲓⲟ ⲙⲡⲉⲥⲧⲁⲩⲣⲟⲥ ·
…
194 ⲉⲧⲃⲉⲡⲁⲓ ϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉⲛⲉ ϣⲱⲡⲉ ⲁⲛⲟⲕ ⲉⲧⲣⲁϣⲟⲩ ⲙⲙⲟⲓ ⲉⲓⲙⲏⲧⲓ ϩⲙⲡⲉⲥⲥⲧⲁⲩⲣⲟⲥ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ : ⲡⲁⲓ ⲛⲧⲉⲩⲥⲧⲁⲩⲣⲟⲩ ⲛⲁⲓ ⲙⲡⲕⲟⲥⲙⲟⲥ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁⲛⲟⲕ ϩⲱⲱⲧ ⲟⲛ ⲙⲡⲕⲟⲥⲙⲟⲥ ·
…
195 ⲁⲩⲱ ⲟⲛ ϥϫⲱ ⲙⲙⲟⲥ ϫⲉⲁⲩⲥⲧⲁⲩⲣⲟⲩ ⲙⲙⲟⲓ ⲙⲛⲡⲉⲭⲣⲓⲥⲧⲟⲥ :
…
196 ⲁⲛⲟⲕ ⲇⲉ ϯⲟⲛϩ ⲁⲛ ⲡⲉⲭⲣⲓⲥⲧⲟⲥ ⲇⲉ ⲟⲛϩ ⲛϩⲏⲧ ·
…
197 ⲁⲩⲱ ⲟⲛ ϫⲉⲁϫⲛϩⲓⲥⲉ ⲟⲩⲁⲧϭⲟⲙ ⲡⲉ ⲣⲁⲛⲁϥ ⲙⲡⲛⲟⲩⲧⲉ ·
…
198 ⲁⲩⲱ ⲟⲛ ϫⲉⲉϣϫⲉ ⲧⲉⲧⲛϣⲡϩⲓⲥⲉ ⲛⲙⲙⲁϥ ⲉⲓⲉ ⲧⲛⲛⲁⲣⲣⲣⲟ ⲛⲙⲙⲁϥ ·
…
199 ⲉⲧⲃⲉⲡⲁⲓ ϭⲉ ⲱ ⲛⲁⲙⲉⲣⲁⲧⲉ ⲙⲁⲣⲛⲛⲏⲫⲉ ⲛⲧⲛⲣⲟⲉⲓⲥ ϫⲉⲡⲉⲛⲁⲛⲧⲓⲇⲓⲕⲟⲥ ⲡⲇⲓⲁⲃⲟⲗⲟⲥ ⲙⲟⲟϣⲉ ⲉⲃⲏⲑⲗⲉⲉⲙ ⲛⲧϩⲉ ⲛⲓⲙⲟⲩⲓ · ⲉϥϣⲓⲛⲉ ⲛⲥⲁⲟⲩⲱⲙⲕ ⲛⲛⲉⲛⲯⲩⲭⲏ ·
…
200 ⲉϥⲟⲩⲱϣ ⲉⲁⲁⲛ ⲛϣⲙⲙⲟ ⲉⲛⲉⲓⲛⲟϭ ⲛⲁⲅⲁⲑⲟⲛ ·
…
201 ⲛⲁⲓⲁⲧⲟⲩ ϭⲉ ⲛⲉⲧⲛⲁⲁϩⲉⲣⲁⲧⲟⲩ ⲉⲣⲟϥ ⲉⲩϫⲟⲟⲣ · ϩⲛⲧⲡⲓⲥⲧⲓⲥ · ϫⲉⲛⲧⲟⲟⲩ ⲛⲉⲧⲛⲁϫⲓⲉⲟⲟⲩ ⲙⲛⲓⲏⲥⲟⲩⲥ ·
…
202 ⲕⲁⲧⲁⲧϩⲉ ⲉⲛⲧ ⲁϥϫⲟⲟⲥ ϫⲉⲛⲧⲱⲧⲛ ⲛⲉⲛⲧⲁⲩϩⲩⲡⲟⲙⲓⲛⲉ ⲛⲙⲙⲁⲓ ϩⲛⲛⲁⲡⲉⲓⲣⲁⲥⲙⲟⲥ ·
…
203 ⲁⲛⲟⲕ ϩⲱ ϯⲥⲙⲓⲛⲉ ⲙⲙⲟⲥ ⲛⲙⲙⲏⲧⲛ ⲕⲁⲧⲁⲧϩⲉ ⲛⲧⲁⲡⲁⲉⲓⲱⲧ ⲥⲙⲓⲛⲉ ⲛⲙⲙⲁⲓ ⲛⲟⲩⲙⲛⲧⲣⲣⲟ ϫⲉⲧⲉⲧⲛⲛⲁⲟⲩⲱⲙ ⲧⲉⲧⲛⲥⲱ ⲛⲙⲙⲁⲓ ϩⲓϫⲛⲧⲁⲧⲣⲁⲡⲉⲍⲁ ϩⲛⲧⲁⲙⲛⲧⲣⲣⲟ ·
…
204 ⲱ ⲛⲁⲓⲁⲧϥ ⲙⲡⲉⲛⲧⲁϥϣⲡϩⲓⲥⲉ ϩⲛϩⲉⲛⲛⲏⲥⲧⲉⲓⲁ ⲙⲛϩⲉⲛϣⲗⲏⲗ ⲙⲛϩⲉⲛⲟⲩϣⲏ ⲛⲣⲟⲉⲓⲥ ⲙⲛϩⲉⲛⲁϣⲁϩⲟⲙ · ϫⲉϥⲛⲁⲛⲟϫϥ ⲛϥⲟⲩⲱⲙ ⲛϥⲥⲱ ϩⲙⲡⲇⲉⲓⲡⲛⲟⲛ ⲛⲛⲉⲧⲟⲩⲁⲁⲃ ⲛⲟⲩⲡⲁⲣϩⲏⲥⲓⲁ ·
…
205 ⲛⲁⲓⲁⲧϥ ⲙⲡⲉⲛⲧⲁϥϣⲱⲡⲉ ⲛⲛⲁⲏⲧ · ⲉϥⲙⲉ ⲙⲡⲉⲧϩⲓⲧⲟⲩⲱϥ ϩⲛⲟⲩⲁⲅⲁⲡⲏ ⲛⲧⲉⲡⲛⲟⲩⲧⲉ · ϫⲉϥⲛⲁϣⲱⲡⲉ ⲉⲩⲥⲟⲗⲥⲗ ⲙⲙⲟϥ ϩⲛⲕⲟⲩⲛϥ ⲛⲁⲃⲣⲁϩⲁⲙ ϩⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
206 ⲛⲁⲓⲁⲧϥ ⲙⲡⲉⲛⲧⲁϥⲥⲉⲓ ⲛⲣⲓⲙⲉ ⲉϫⲛⲛⲉϥⲛⲟⲃⲉ ⲉⲛⲧⲁϥⲁⲁⲩ ϫⲉϥⲛⲁⲣⲃⲟⲗ ⲉⲡⲙⲁ ⲙⲡⲣⲓⲙⲉ ⲙⲛⲡϭϩϭϩ ⲛⲛⲟⲃϩⲉ ·
…
207 ⲛⲁⲓⲁⲧϥ ⲙⲡⲉⲛⲧⲁϥⲣϩⲏⲃⲉ ⲉϫⲛⲛⲉϥⲛⲟⲃⲉ ϫⲉⲉϥⲛⲁⲉⲩⲫⲣⲁⲛⲉ ⲙⲡⲛⲟⲩⲧⲉ ⲙⲛⲛⲉϥⲁⲅⲅⲉⲗⲟⲥ ϩⲙⲡⲁⲓⲱⲛ ⲙⲡⲟⲩⲟⲉⲓⲛ ·
…
208 ⲛⲁⲓⲁⲧϥ ⲙⲡⲉⲛⲧⲁϥϯ ⲙⲡⲉϥⲟⲉⲓⲕ ⲙⲡⲉⲧϩⲕⲁⲉⲓⲧ ϫⲉϥⲛⲁⲥⲉⲓ ⲙⲡⲟⲉⲓⲕ ⲙⲡⲱⲛϩ ϩⲛⲙⲡⲏⲩⲉ ·
…
209 ⲛⲁⲓⲁⲧϥ ⲙⲡⲉⲛⲧⲁϥϩⲱⲃⲥ ⲙⲡⲉⲧⲕⲏ ϩⲁϩⲏⲩ ϫⲉⲥⲉⲛⲁϩⲱⲃⲥ ⲉⲃⲟⲗ ⲉϫⲛⲛⲉϥⲛⲟⲃⲉ ⲙⲡⲉϩⲟⲟⲩ ⲙⲡϩⲁⲡ ·
…
210 ⲛⲁⲓⲁⲧϥ ⲙⲡⲉⲧⲛⲁ ⲛⲛϩⲏⲕⲉ ϫⲉⲛⲧⲟϥ ⲡⲉⲧⲟⲩⲛⲁⲛⲁ ⲛⲁϥ ·
…
211 ⲁⲩⲱ ϥⲛⲁⲣⲙⲡϣⲁ ⲛⲥⲱⲧⲙ ⲉⲧⲉⲓⲥⲙⲏ ⲛⲣⲁϣⲉ ϩⲓⲟⲩⲟⲩⲛⲟϥ ϫⲉⲁⲙⲏⲉⲓⲛ ⲛⲉⲧⲥⲙⲁⲙⲁⲁⲧ ⲛⲧⲉⲡⲁⲉⲓⲱⲧ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛⲧⲙⲛⲧⲣⲣⲟ ⲉⲛⲧⲁⲩⲥⲃⲧⲱⲧⲥ ⲛⲏⲧⲛ ϫⲓⲛⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ ·
…
212 ⲁⲩⲱ ⲟⲛ ϥϫⲱ ⲙⲙⲟⲥ ϫⲉⲡⲉⲧⲛⲁⲧⲥⲉⲟⲩⲁ ⲛⲛⲉⲓⲕⲟⲩⲓ ⲛⲟⲩϫⲱ ⲙⲙⲟⲩ ⲛⲱⲣϣ ⲙⲙⲁⲧⲉ ϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲛⲛⲉϥⲥⲱⲣⲙ ⲛϭⲓⲡⲉϥⲃⲉⲕⲉ ·
…
213 ⲛⲁⲓⲁⲧϥ ⲙⲡⲉⲛⲧⲁϥⲕⲱ ⲉⲃⲟⲗ ⲙⲡⲉⲧϩⲓⲧⲟⲩⲱϥ ϩⲙⲡⲧⲣⲉϥⲣⲛⲟⲃⲉ ⲉⲣⲟϥ · ϫⲉⲥⲉⲛⲁⲡⲱϩ ⲙⲡⲉⲭⲓⲣⲟⲅⲣⲁⲫⲟⲛ ⲉⲧⲉⲣⲟϥ ·
…
214 ⲁⲩⲱ ⲟⲛ ⲉⲧⲁⲣⲟϥ ⲛⲟⲩⲟⲛ ⲛⲓⲙ ·
…
215 ⲛⲁⲓⲁⲧⲟⲩ ⲛⲛⲉⲧⲛⲁⲣⲁⲙⲁⲣ ⲉⲧⲉⲕⲕⲗⲏⲥⲓⲁ ⲉϩⲧⲟⲟⲩⲉ ⲛⲣⲟⲩϩⲉ · ⲙⲙⲏⲛⲉ ·
…
216 ⲛϩⲟⲩⲟ ⲇⲉ ⲙⲡⲛⲁⲩ ⲛϫⲓ ⲉⲃⲟⲗ ϩⲛⲙⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ ·
…
217 ⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ : ϫⲉϥⲛⲁϣⲱⲡⲉ ⲉϥⲧⲏϩ ⲙⲛⲛⲁⲅⲅⲉⲗⲟⲥ ϩⲣⲁⲓ ϩⲛⲙⲡⲏⲩⲉ ⲉϥⲛⲁⲩ ⲉⲣⲟⲟⲩ ⲛϩⲟ ϩⲓϩⲟ ·
…
218 ⲉϥⲟⲩⲱϣⲃ ⲛⲙⲙⲁⲩ ⲛⲧⲁⲡⲣⲟ ϩⲓⲧⲁⲡⲣⲟ ϩⲛⲧⲉⲩⲁⲥⲡⲉ ϫⲉⲁⲗⲏⲗⲟⲩⲉⲓⲁ ·
…
219 ⲉⲧⲃⲉⲡⲁⲓ ϭⲉ ⲱ ⲛⲁⲙⲉⲣⲁⲧⲉ ⲙⲡⲣⲧⲣⲉⲛϯϩⲓⲛⲏⲃ ⲛⲛⲉⲛⲃⲁⲗ ⲟⲩⲇⲉ ϩⲣⲉⲕⲣⲓⲕⲉ ⲛⲛⲉⲛⲃⲟⲩϩⲉ · ⲙⲡⲉϩⲟⲟⲩ ⲙⲛⲧⲉⲩϣⲏ ·
…
220 ϫⲉⲕⲁⲥ ⲉⲕⲉⲣⲃⲟⲗ ⲉⲡⲉⲧϩⲟⲟⲩ ⲛⲓⲙ :
…
221 ϥϭⲟⲣϭ ⲅⲁⲣ ⲉⲣⲟⲛ ⲛϭⲓⲡϫⲁϫⲉ ·
…
222 ⲁⲩⲱ ϥⲛⲁⲉⲓ ⲛⲁⲛ ϩⲛⲟⲩⲙⲏⲏϣⲉ ⲛⲕⲟⲧⲥ · ⲉϥⲧⲙⲉⲓ ϩⲛⲟⲩⲁⲙⲉⲗⲓⲁ ϥⲛⲁⲉⲓ ϩⲛⲟⲩⲟⲃϣⲥ ·
…
223 ⲉϥⲧⲙⲉⲓ ϩⲛⲟⲩⲙⲛⲧϫⲁⲥⲓϩⲏⲧ ·
…
224 ϥⲛⲁⲉⲓ ϩⲛⲟⲩϭⲱⲛⲧ · ⲉϥⲧⲙⲉⲓ ϩⲛⲟⲩⲉⲟⲟⲩ ⲉϥϣⲟⲩⲉⲓⲧ ϥⲛⲁⲉⲓ ϩⲛⲟⲩⲡⲟⲣⲛⲉⲓⲁ · ⲉϥⲧⲙⲉⲓ ϩⲛⲟⲩⲕⲱϩ ϥⲛⲁⲉⲓ ϩⲛⲟⲩⲙⲟⲥⲧⲉ ·
…
225 ϥⲧⲙⲉⲓ ϩⲛⲟⲩⲡⲟⲛⲏⲣⲓⲁ ⲉϥⲛⲁⲉⲓ ϩⲛⲟⲩⲕⲣⲙ · ⲉϥⲧⲙⲉⲓ ϩⲛⲟⲩϫⲓⲟⲩⲉ ϥⲛⲁⲉⲓ ϩⲛⲟⲩⲁⲛⲁϣ ⲛⲛⲟⲩϫ ⲙⲛϩⲉⲛϭⲟⲗ · ⲉϥⲧⲙⲉⲓ ϩⲛϩⲉⲛⲡⲁⲑⲟⲥ ·
…
226 ϥⲛⲁⲉⲓ ϩⲛϩⲉⲛⲙⲉⲉⲩⲉ ⲉⲩϩⲟⲟⲩ ·
…
227 ϩⲁⲡⲁⲝ ϩⲁⲡⲗⲱⲥ ϥⲛⲁⲕⲁⲧⲟⲟⲧϥ ⲉⲃⲟⲗ ⲁⲛ ⲛϭⲓⲡⲥⲁ ·
…
228 ϥⲛⲁⲕⲟⲧⲥ ⲛⲥⲁⲥⲱⲣⲙ ϩⲏⲧ · ⲉϥⲛⲁⲕⲟⲧⲥ ⲉϩⲟⲩⲛ ⲉⲧⲙⲛⲧⲣϥϭⲱⲱⲙⲉ ϥϫⲟ ⲛⲧⲁⲙⲉⲗⲓⲁ ⲉϩⲣⲁⲓ ⲛϩⲏⲧⲥ · ϫⲉϩⲓⲧⲛⲧⲁⲙⲉⲗⲓⲁ ⲅⲁⲣ ⲉⲣⲉⲁⲙⲛⲧⲉ ϭⲱⲣϭ ·
…
229 ⲙⲁⲣⲛⲣⲡⲙⲉⲉⲩⲉ ⲟⲩⲛ ⲛⲛⲉⲓⲡⲟⲗⲉⲙⲟⲥ ⲛⲧⲉⲓϭⲟⲧ ⲉⲧⲉⲣⲉⲡϫⲁϫⲉ ⲥⲱⲣ ⲙⲙⲟⲟⲩ ⲉⲃⲟⲗ ⲉⲣⲟⲛ ·
…
230 ⲛⲧⲛϩⲟⲕ ⲛϩⲱⲱⲛ ϩⲛⲛϩⲟⲡⲗⲟⲛ ⲛⲧⲇⲓⲕⲁⲓⲟⲥⲩⲛⲏ · ⲉⲧⲉⲛⲁⲓ ⲛⲉ ⲟⲩϣⲗⲏⲗ · ⲟⲩⲛⲏⲥⲧⲉⲓⲁ · ⲟⲩⲧⲃⲃⲟ · ⲟⲩⲉⲓⲣⲏⲛⲏ · ⲟⲩⲁⲅⲁⲡⲏ · ⲟⲩⲑⲃⲃⲓⲟ · ⲟⲩⲙⲛⲧⲛⲁ · ⲟⲩⲙⲛⲧⲙⲁⲓⲛⲉⲛⲉⲣⲏⲩ · ⲟⲩϭⲓⲛϣⲁϫⲉ ⲉⲥϩⲟⲗϭ ⲙⲛⲣⲱⲙⲉ ⲛⲓⲙ ϩⲛϩⲟⲧⲉ ⲙⲡⲛⲟⲩⲧⲉ ·
…
231 ⲛⲁⲓ ⲅⲁⲣ ⲛⲉⲧϯ ⲟⲩⲃⲉⲧⲉϥⲙⲛⲧⲥⲁⲕⲟⲧⲥ ⲛⲕⲣⲟϥ ·
…
232 ⲛϩⲟⲩⲟ ⲇⲉ ⲧⲛⲣϩⲟⲧⲉ ϩⲁⲧϩⲏ .. ⲡⲙⲁ ⲛϯϩⲁⲡ ⲙⲡⲛⲟⲩⲧⲉ ⲉⲧϩⲁϩⲟⲧⲉ ⲛⲧⲛⲕⲱ ⲛⲥⲱⲛ ⲛⲛⲉϩⲃⲏⲩⲉ ⲙⲡⲕⲁⲕⲉ ⲛⲧⲛϯ ϩⲓⲱⲱⲛ ⲛⲛϩⲟⲡⲗⲟⲛ ⲙⲡⲟⲩⲟⲉⲓⲛ ·
…
233 ϫⲉⲕⲁⲥ ⲉⲛⲕⲗⲏⲣⲟⲛⲟⲙⲉⲓ ⲙⲡⲙⲁ ⲛϣⲱⲡⲉ ⲛⲛⲉⲧⲟⲩⲁⲁⲃ ⲉⲧϩⲛ ⲙⲡⲏⲩⲉ ⲙⲛⲛϣⲏⲣⲉ ⲙⲡⲟⲩⲟⲉⲓⲛ ·
…
234 ϩⲓⲧⲙⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲡⲉⲟⲟⲩ ⲙⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϣⲁⲉⲛⲉⲓ ⲉⲛⲉϩ ϩⲁⲙⲏⲛ · ◈ — ◈ — ◈ — ◈ — ◈
…
235 ⲁⲡⲁ ⲑⲉⲟⲫⲓⲗⲟⲥ ⲁⲣⲭⲏⲉⲡⲓⲥⲕⲟⲡⲟⲩ ·
…