1 ⲡⲉⲥⲧⲁⲩⲣⲟⲥ ⲡⲉ ⲧⲗⲩⲭⲛⲉⲓⲁ ⲛⲛⲟⲩⲃ . ⲉⲣⲉⲡϩⲏⲃⲥ ⲉⲧⲟⲩⲁⲁⲃ ϩⲓϫⲱⲥ ⲉⲥⲗⲁⲙⲡⲉⲩⲉ .
…
2 ⲡⲉⲥⲧⲁⲩⲣⲟⲥ ⲡⲉ ⲡⲉⲓⲱⲧ ⲛⲛⲟⲣⲫⲁⲛⲟⲥ ⲉϥⲣⲟⲉⲓⲥ ⲉⲣⲟⲟⲩ .
…
3 ⲡⲉⲥⲧⲁⲩⲣⲟⲥ ⲡⲉ ⲡⲉⲕⲣⲓⲧⲏⲥ ⲛⲛⲉⲭⲏⲣⲁ ⲉϥⲃⲱⲧⲉ ⲉⲃⲟⲗ ⲛⲛⲉⲣⲙⲉⲓⲟⲟⲩⲉ ⲉⲧϩⲛⲛⲉⲩⲃⲁⲗ .
…
4 ⲡⲉⲥⲧⲁⲩⲣⲟⲥ ⲡⲉ ⲡⲥⲟⲗⲥⲗ ⲛⲛⲣⲙⲛϭⲟⲓⲗⲉ .
…
5 ⲡⲉⲥⲧⲁⲩⲣⲟⲥ ⲡⲉ ⲡⲉϣⲃⲏⲣ ⲛⲛⲉⲧϣⲟⲟⲡ ϩⲙⲡϫⲁⲓⲉ .
…
6 ⲡⲉⲥⲧⲁⲩⲣⲟⲥ ⲡⲉ ⲧⲕⲟⲥⲙⲏⲥⲓⲥ ⲛⲛⲉⲑⲩⲥⲓⲁⲥⲧⲏⲣⲓⲟⲛ ⲉⲧⲟⲩⲁⲁⲃ . ⲡⲉⲥⲧⲁⲩⲣⲟⲥ ⲡⲉ ⲡⲉϩⲗⲟϭ ⲛⲛⲉⲛⲧⲁⲩⲥⲓϣⲉ .
…
7 ⲡⲉⲥⲧⲁⲩⲣⲟⲥ ⲡⲉ ⲧⲃⲟⲏⲑⲉⲓ ⲉⲡⲣⲱⲙⲉ ⲙⲡⲛⲁⲩ ⲛⲧⲉϥⲁⲛⲁⲅⲕⲏ ⲉϥⲛⲏⲩ ⲉⲃⲟⲗ ϩⲛⲥⲱⲙⲁ .
…
8 ⲡⲉⲥⲧⲁⲩⲣⲟⲥ ⲡⲉ ⲡⲇⲓⲟⲓⲕⲏⲧⲏⲥ ⲛⲛⲛⲁϩⲏⲧ . ⲡⲉⲥⲧⲁⲩⲣⲟⲥ ⲡⲉ ⲡⲟⲓⲕⲟⲛⲟⲙⲟⲥ ⲛⲛⲉⲛⲧⲁⲩⲛⲉϫⲡⲉⲩⲣⲟⲟⲩϣ ⲉⲣⲟϥ .
…
9 ⲡⲉⲥⲧⲁⲩⲣⲟⲥ ⲡⲉ ⲧⲉϩⲁⲅⲛⲉⲓⲁ ⲛⲛⲉⲛⲡⲁⲣⲑⲉⲛⲟⲥ . ⲡⲉⲥⲧⲁⲩⲣⲟⲥ ⲡⲉ ⲡⲥⲟⲃⲧ ⲉⲧⲧⲁϫⲣⲏⲩ .
…
10 ⲡⲉⲥⲧⲁⲩⲣⲟⲥ ⲡⲉ ⲡⲥⲁⲉⲓⲛ ⲉⲧⲑⲉⲣⲁⲡⲉⲩⲉ ⲛϣⲓⲛⲉ ⲛⲓⲙ . ⲁⲙⲏⲓⲧⲛ ⲛⲉⲫⲩⲗⲏ ⲧⲏⲣⲟⲩ ⲙⲡⲕⲁϩ ⲣⲁϣⲉ ⲛⲧⲉⲧⲛⲧⲉⲗⲏⲗ ϫⲉⲁⲡϫⲟⲉⲓⲥ ⲣⲣⲣⲟ ⲉⲃⲟⲗ ϩⲙⲡϣⲉ ⲙⲡⲉⲥⲧⲁⲩⲣⲟⲥ .
…
11 ⲛⲉⲧⲕⲓⲙ ⲧⲏⲣⲟⲩ ϩⲛⲛⲉⲙⲟⲟⲩ ⲛⲉⲓⲟⲟⲩⲉ . ⲟⲩⲛⲟϥ ⲙⲙⲱⲧⲛ ϫⲉⲁⲩⲥⲛⲟϥ ⲙⲛⲟⲩⲙⲟⲟⲩ ϣⲟⲩⲟ ⲉⲃⲟⲗ ⲙⲙⲟϥ .
…
12 ⲛϩⲁⲗⲁⲧⲉ ⲧⲏⲣⲟⲩ ⲛⲧⲡⲉ . ⲡⲱⲣϣⲛⲉⲧⲛⲧⲛϩ ⲉⲃⲟⲗ ϩⲛⲟⲩⲟⲩⲣⲟⲧ ϫⲉⲁϥⲡⲱⲣϣ ⲛⲛⲉⲧⲛϭⲓϫ ⲉⲃⲟⲗ ϩⲓϫⲙⲡⲉⲥⲧⲁⲩⲣⲟⲥ .
…
13 ⲛⲉⲑⲏⲣⲓⲟⲛ ⲉⲧϩⲛⲧⲉⲣⲏⲙⲟⲥ ⲣⲁϣⲉ ⲛⲧⲉⲧⲛⲟⲩⲛⲟϥ ϫⲉⲁⲡⲣⲉϥⲧⲁϣⲉⲟⲉⲓϣ ϣⲱⲡⲉ ⲛⲏⲧⲛ ⲛϣⲙⲛⲟⲩⲃⲉ .
…
14 ⲁⲧⲉⲧⲛⲛⲁⲩ ϫⲉⲟⲩ ⲁϣ ⲛϭⲟⲧ ⲡⲉ ⲡⲙⲉⲅⲉⲑⲟⲥ ⲙⲡⲉⲥⲧⲁⲩⲣⲟⲥ ⲙⲛⲧⲉϥⲛⲟϭ ⲛⲃⲟⲏⲑⲉⲓⲁ ⲉϫⲙⲡⲥⲱⲛⲧ ⲧⲏⲣϥ .
…
15 ⲙⲡⲛⲁⲩ ⲅⲁⲣ ⲉⲧⲉⲣⲉⲡⲣⲱⲙⲉ ⲛⲁⲡⲱⲣϣⲛⲉϥϭⲓϫ ⲉⲃⲟⲗ ⲙⲡⲧⲩⲡⲟⲥ ⲙⲡⲉⲥⲧⲁⲩⲣⲟⲥ ⲛϥϣⲗⲏⲗ ϩⲛⲟⲩⲡⲓⲥⲧⲓⲥ . ϣⲁⲣⲉⲡⲉϥⲁⲅⲅⲉⲗⲟⲥ ⲥⲟⲡⲥ ⲙⲡⲛⲟⲩⲧⲉ ϣⲁⲛⲧⲉϥϯ ⲛⲁϥ ⲙⲡⲉϥⲁⲓⲧⲏⲙⲁ .
…
16 ⲍⲁⲭⲁⲣⲓⲁⲥ ⲁϥϣⲗⲏⲗ ⲁⲅⲁⲃⲣⲓⲏⲗ ⲉⲓ ϣⲁⲣⲟϥ ⲁϥϯ ⲛⲁϥ ⲙⲡⲉϥⲁⲓⲧⲏⲙⲁ ⲉⲧⲉⲓⲱϩⲁⲛⲛⲏⲥ ⲡⲉ .
…
17 ⲡⲉⲧⲣⲟⲥ ⲁϥϣⲗⲏⲗ ⲁⲡⲁⲅⲅⲉⲗⲟⲥ ⲉⲓ ϣⲁⲣⲟϥ ⲁϥⲧⲣⲉⲛϩⲁⲗⲏⲥⲓⲥ ⲛⲃⲉⲛⲓⲡⲉ ⲃⲱⲗ ⲉⲃⲟⲗ ⲙⲛⲧⲡⲩⲗⲏ ⲛⲃⲉⲛⲓⲡⲉ . ϩⲟⲙⲟⲓⲱⲥ ⲟⲛ ⲁϥϣⲗⲏⲗ ⲁϥⲧⲟⲩⲛⲉⲥⲧⲁⲃⲓⲑⲁ .
…
18 ⲕⲟⲣⲛⲏⲗⲓⲟⲥ ⲁϥϣⲗⲏⲗ ⲁⲡⲁⲅⲅⲉⲗⲟⲥ ⲉⲓ ϣⲁⲣⲟϥ . ⲡⲁⲩⲗⲟⲥ ⲙⲛⲥⲓⲗⲁⲥ ⲁⲩϣⲗⲏⲗ ⲁⲡⲁⲅⲅⲉⲗⲟⲥ ⲉⲓ ϣⲁⲣⲟⲟⲩ ⲁⲩⲕⲓⲙ ⲛϭⲓⲥⲛⲧⲉ ⲙⲡⲉϣⲧⲉⲕⲟ
…
19 ⲙⲱⲩⲥⲏⲥ ⲁϥϣⲗⲏⲗ ⲁϥϭⲱⲧⲡ ⲙⲡⲁⲙⲁⲗⲉⲕ ⲧⲱⲃⲓⲁⲥ ⲁϥϣⲗⲏⲗ ⲁϩⲣⲁⲫⲁⲏⲗ ⲉⲓ ϣⲁⲣⲟϥ ⲁϥⲧⲁⲗϭⲟϥ .
…
20 ⲉⲧⲃⲉⲡⲁⲓ ⲙⲁⲣⲉⲛϣⲗⲏⲗ ⲛⲟⲩⲟⲉⲓϣ ⲛⲓⲙ ⲁϫⲛⲱϫⲛ . ⲡⲉϫⲁϥ ⲛϭⲓⲡⲁⲡⲟⲥⲧⲟⲗⲟⲥ ϫⲉϣⲗⲏⲗ ⲁϫⲛⲱϫⲛ .
…
21 ⲛⲁⲓ ⲇⲉ ⲉⲧⲟ ⲛⲇⲁⲓⲙⲱⲛ ⲡⲉϣⲗⲏⲗ ⲡⲉ ϣⲁϥⲑⲉⲣⲁⲡⲉⲩⲉ ⲙⲙⲟⲩ ⲉⲧⲃⲉⲡⲁⲓ ⲉⲓⲥ ⲙⲛⲧⲏ ⲛϩⲟⲟⲩ ⲧⲛⲛⲏⲥⲧⲉⲩⲉ ⲁⲩⲱ ⲧⲛϣⲗⲏⲗ ϩⲙⲡⲙⲁ ⲉⲧⲟⲩⲁⲁⲃ .
…
22 ⲛⲧⲟⲕ ⲉⲕϩⲙⲙⲙⲁ ⲛⲓⲙ ⲙⲁⲣⲉⲡⲉϣⲗⲏⲗ ϣⲱⲡⲉ ⲛⲁⲕ ⲛϣⲃⲏⲣ . ϣⲗⲏⲗ ⲉⲕⲛⲁⲛⲕⲟⲧⲕ ⲧⲁⲣⲉⲕϣⲱⲡⲉ ⲉⲕⲟⲩⲟϫ ⲉⲡⲉⲓⲣⲁⲥⲙⲟⲥ .
…
23 ⲉⲕϩⲙⲡⲇⲓⲕⲁⲥⲧⲏⲣⲓⲟⲛ ϣⲗⲏⲗ . ⲁⲩⲱ ⲡⲛⲟⲩⲧⲉ ⲛⲁⲙⲓϣⲉ ⲉϩⲣⲁⲓ ⲉϫⲱⲕ . ⲉⲕⲧⲁⲗⲏⲩ ⲉⲛⲉⲙⲟⲩ ⲛⲓⲟⲟⲩⲉ ϣⲗⲏⲗ ⲁⲩⲱ ⲕⲛⲁⲛⲟⲩϩⲙ ⲉⲱⲙⲥ .
…
24 ⲉⲩϣⲁⲛⲧⲁϩⲙⲉⲕ ⲉⲩⲇⲓⲡⲛⲟⲛ ϣⲗⲏⲗ ⲙⲡⲁⲧⲉⲕⲟⲩⲱⲙ ⲧⲁⲣⲉⲡⲛⲟⲩⲧⲉ ⲥⲙⲟⲩ ⲉⲡⲉⲕⲟⲉⲓⲕ ⲙⲛⲛⲉⲧⲉⲕⲛⲁⲥⲟⲟⲩⲧⲛ ⲉⲣⲟⲟⲩ ⲧⲏⲣⲟⲩ .
…
25 ⲉⲓⲧⲉ ⲧⲉⲧⲛⲟⲩⲱⲙ ⲉⲓⲧⲉ ⲉⲧⲉⲧⲛⲥⲱ . ⲉⲓⲧⲉ ⲉⲧⲉⲧⲛⲉⲓⲣⲉ ⲛⲕⲉϩⲱⲃ . ⲁⲣⲓϩⲱⲃ ⲛⲓⲙ ⲉⲧⲉⲧⲛϯⲉⲟⲟⲩ ⲙⲡⲛⲟⲩⲧⲉ .
…
26 ⲉϫⲛⲛⲁⲓ ⲇⲉ ⲧⲏⲣⲟⲩ . ⲙⲁⲣⲉⲛϯⲉⲟⲟⲩ ⲙⲡⲉϥⲣⲁⲛ ⲉⲧⲟⲩⲁⲁⲃ . ϩⲙⲡⲉⲧⲛⲁⲛⲟⲩϥ ⲛⲓⲙ ⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ .
…
27 ⲡⲁⲓ ⲉⲧⲉⲣⲉⲡⲉⲟⲟⲩ ⲡⲣⲉⲡⲉⲓ ⲛⲁϥ . ⲙⲛⲡⲧⲁⲓⲟ ⲙⲛⲡⲉⲥⲙⲟⲩ ϣⲁⲛⲅⲉⲛⲉⲁ ⲧⲏⲣⲟⲩ ⲁⲩⲱ ϣⲁⲛⲁⲓⲱⲛ ⲧⲏⲣⲟⲩ ⲛⲁⲓⲱⲛ ϩⲁⲙⲏⲛ
…