1 ⲕⲉⲥⲛⲏⲩ .
…
2 ⲛⲁⲓ ⲛⲧⲁⲡⲕⲁϩ ⲟⲩⲱⲛ ⲉⲣⲱϥ ⲁϥⲟⲙⲕⲟⲩ ⲉⲧⲉⲇⲁⲑⲁⲛ ⲡⲉ . ⲙⲛⲁⲃⲓⲣⲱⲛ . ⲙⲛⲛϣⲏⲣⲉ ⲛⲕⲟⲣⲉ . ⲛⲁⲓ ⲛⲧⲁⲩⲧⲱⲟⲩⲛ ⲉϫⲙⲙⲱⲩⲥⲏⲥ ϩⲛⲧⲉⲣⲏⲙⲟⲥ .
…
3 ⲙⲁⲣⲉⲛⲕⲧⲟⲛ ϭⲉ ⲟⲛ ⲉϩⲣⲁⲓ ⲉϫⲙⲡⲙⲉⲅⲉⲑⲟⲥ . ⲙⲡⲉⲓⲁϩⲟⲣⲁⲧⲟⲛ ⲥⲧⲁⲩⲣⲟⲥ ⲛⲧⲛϣⲁϫⲉ ⲉⲣⲟϥ .
…
4 ⲧⲏⲛⲟⲗⲟⲧⲓⲛ ⲛⲧⲛⲉⲓⲙⲉ ⲉⲛⲉⲡⲣⲟⲫⲏⲧⲉⲓⲁ ⲛⲛⲉⲡⲣⲟⲫⲏⲧⲏⲥ . ⲛⲧⲁⲩϫⲟⲟⲩ ⲉⲣⲟϥ ϫⲓⲛⲧⲁⲣⲭⲏ ϣⲁⲧϩⲁⲏ .
…
5 ⲛⲧⲱⲧⲛ ϩⲱⲧⲧⲏⲩⲧⲛ ⲱ ⲛⲁⲕⲣⲱⲁⲧⲏⲥ . ⲟⲩⲱϣⲥ ⲉⲃⲟⲗ ⲛⲛⲉⲧⲛⲁⲓⲥⲑⲏⲧⲏⲣⲓⲟⲛ ⲛⲧⲉⲧⲛϫⲓⲥⲙⲏ ϩⲛⲟⲩⲉⲍⲉⲭⲓⲁ .
…
6 ⲁⲩⲉⲓⲥ ⲛⲧⲛⲟⲩⲱⲛ ⲙⲡⲛⲟϭ ⲛⲑⲏⲥⲁⲩⲣⲟⲥ ⲉⲧⲟⲩⲁⲁⲃ . ⲛⲧⲛⲉⲓⲛⲉ ⲉⲃⲟⲗ ⲛⲛⲕⲟⲥⲙⲏⲥⲓⲥ ⲙⲡⲛⲉⲩⲙⲁⲧⲓⲕⲟⲛ ⲛⲧⲛⲕⲟⲥⲙⲉⲓ ⲛⲛⲯⲩⲭⲟⲟⲩⲉ ⲛⲛⲙⲁⲓⲗⲟⲅⲟⲥ .
…
7 ⲙⲟⲩⲧⲉ ⲛⲁⲓ ⲉⲡⲙⲁⲓⲛⲟⲩⲧⲉ . ⲁⲩⲱ ⲡⲙⲁⲓⲗⲟⲅⲟⲥ . ⲁⲩⲱ ⲡⲣⲉϥϣⲱⲡ ⲉⲣⲟϥ ⲛⲛⲁⲅⲅⲉⲗⲟⲥ . ⲉⲧⲉⲡⲁⲓ ⲡⲉ ⲁⲃⲣⲁϩⲁⲙ ⲡⲉϣⲃⲏⲣ ⲙⲡⲛⲟⲩⲧⲉ .
…
8 ⲙⲁⲣⲉϥⲉⲓ ⲛϥⲧⲁⲙⲟⲛ ⲉⲡⲧⲩⲡⲟⲥ ⲙⲡⲉⲓϣⲏⲛ ϫⲉⲥⲁⲃⲉⲕ ⲉⲣⲉⲡⲉⲓⲟⲉⲓⲗⲉ ⲙⲏⲣ ⲉⲣⲟϥ . ⲧϩⲉⲣⲙⲏⲛⲉⲓⲁ ⲅⲁⲣ ⲛⲥⲁⲃⲉⲕ ⲡⲉ ⲡⲙⲁ ⲛⲙⲧⲟⲛ ⲙⲡⲣⲉϥⲥⲱⲧⲉ . ⲉⲧⲉⲡⲁⲓ ⲡⲉ ⲡϣⲉ ⲙⲡⲉⲥⲧⲁⲩⲣⲟⲥ . ⲛⲧⲁⲡⲉϩⲓⲉⲓⲃ ⲙⲡⲛⲟⲩⲧⲉ ⲁⲗⲉ ⲉϩⲣⲁⲓ ⲉϫⲱϥ ϩⲛⲟⲩⲛⲟϭ ⲙⲙⲛⲧⲗⲁⲙⲡⲣⲟⲥ . ⲉⲧⲣⲉϥϫⲱⲕ ⲉⲃⲟⲗ ⲛⲧⲟⲓⲕⲟⲛⲟⲙⲓⲁ ⲉⲧⲙⲉϩ ⲛⲟⲩϫⲁⲓ .
…
9 ⲉⲁϥⲙⲧⲟⲛ ⲙⲙⲟϥ ⲉϩⲣⲁⲓ ⲉϫⲱϥ ⲛⲧϩⲉ ⲛⲟⲩⲣⲱⲙⲉ . ⲉⲁϥⲉⲓ ⲉϩⲣⲁⲓ ϩⲛⲧⲉϥⲥⲱϣⲉ . ⲉϥⲣϩⲱⲃ ⲛϥⲛⲁϫϥ ϩⲓϫⲙⲡⲉϥⲙⲁ ⲛⲛⲕⲟⲧⲕ ⲛϥⲙⲧⲟⲛ ⲙⲙⲟϥ ϩⲙⲡⲉϥϩⲓⲥⲉ .
…
10 ⲧⲁⲓ ⲧⲉ ⲧϩⲉ ⲛⲧⲁⲡⲥⲱⲧⲏⲣ ⲁⲁⲥ . ⲛⲧⲁϥⲙⲧⲟⲛ . ⲙⲙⲟϥ ϩⲓϫⲙⲡⲉϥⲙⲁⲛⲕⲟⲧⲕ ⲉⲧⲉⲡⲉⲥⲧⲁⲩⲣⲟⲥ ⲙⲙⲉ ⲡⲉ .
…
11 ⲁϥϣⲡϩⲓⲥⲉ ⲛϩⲏⲧϥ ϣⲁⲛⲧⲉϥⲧⲟⲩϫⲟ ⲛⲧⲙⲛⲧⲣⲱⲙⲉ ⲧⲏⲣⲥ .
…
12 ⲛϥⲥⲁϣⲙ ⲁⲛ ⲟⲩⲇⲉ ⲛϥϣⲧⲣⲧⲱⲣ ⲁⲛ . ⲟⲩⲇⲉ ⲛϥϭⲟⲛⲧ ⲁⲛ ⲉⲩϯⲉⲓⲃⲧ ⲛⲁϥ . ⲟⲩⲇⲉ ⲛϥⲁⲕⲁⲛⲁⲕⲧⲉⲓ ⲁⲛ . ⲉⲩϯⲕⲗⲟⲙ ⲛϣⲟⲛⲧⲉ ⲉϫⲱϥ .
…
13 ⲟⲩⲇⲉ ⲛϥⲥⲁϩⲟⲩ ⲁⲛ ⲉⲩϩⲓⲟⲩⲉ ⲉϩⲟⲩⲛ ϩⲙⲡⲉϥϩⲟ . ⲟⲩⲇⲉ ⲛϥⲛⲕⲁⲕⲉⲓ ⲁⲛ ⲉⲩⲧⲥⲁ ⲙⲙⲟϥ ⲛⲟⲩϩⲙϫ ⲉϥⲧⲉϩ ϩⲓⲥⲓϣⲉ .
…
14 ⲛϥⲙⲓϣⲉ ⲅⲁⲣ ⲁⲛ ⲙⲛⲛⲉⲧⲛⲟϭⲛⲉϭ ⲙⲙⲟϥ . ⲟⲩⲇⲉ ⲛϥϭⲟⲛⲧ ⲁⲛ ⲉⲩⲡⲱϣ ⲛⲛⲉϥϩⲟⲓⲧⲉ ⲉϫⲱⲟⲩ ⲉⲩⲛⲉϫⲕⲗⲏⲣⲟⲥ ⲉⲣⲟⲟⲩ .
…
15 ⲕⲟⲩⲱϣ ⲉⲉⲓⲙⲉ ϫⲉⲧⲙⲉ ⲧⲉ ϯϫⲱ ⲙⲙⲟⲥ ⲥⲱⲧⲙ ⲛⲧⲁⲧⲁⲙⲟⲕ .
…
16 ⲙⲡⲛⲁⲩ ⲅⲁⲣ ⲉⲧⲟⲩⲉⲓⲣⲉ ⲛⲛⲁⲓ ⲧⲏⲣⲟⲩ ⲛⲁϥ . ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ϣⲁⲡⲉϥⲉⲓⲱⲧ ⲁϥⲡⲁⲣⲁⲕⲁⲗⲉⲓ ⲙⲙⲟϥ .
…
17 ϫⲉⲡⲁⲉⲓⲱⲧ ⲕⲱ ⲛⲁⲩ ⲉⲃⲟⲗ ϫⲉⲛⲥⲉⲥⲟⲟⲩⲛ ⲁⲛ ⲙⲡⲉⲧⲟⲩⲉⲓⲣⲉ ⲙⲙⲟϥ .
…
18 ϫⲉⲕⲁⲁⲥ ⲉⲕⲉⲉⲓⲙⲉ ϫⲉⲟⲩ ⲡⲉⲧⲉⲣⲉⲡⲉⲓⲱⲧ ⲉⲓⲣⲉ ⲙⲙⲟϥ . ⲉⲁϥⲁⲁϥ ⲙⲡⲛⲁⲩ ⲉⲧⲙⲙⲁⲩ .
…
19 ⲛⲁϣⲉⲛⲉϥⲙⲛⲧϣⲁⲛϩⲧⲏϥ ⲅⲁⲣ ⲙⲙⲟⲛ ϥⲛⲁⲧⲛⲛⲟⲟⲩ ⲉϩⲣⲁⲓ ⲉϫⲱⲟⲩ ⲛⲧⲟⲣⲅⲏ ⲛⲁⲧⲧⲁⲗϭⲟ .
…
20 ϣⲁⲛⲧⲉⲧⲉⲥⲙⲏ ⲙⲡⲉϥⲙⲟⲛⲟⲅⲉⲛⲏⲥ ⲧⲁϩⲟϥ . ⲛϥⲧⲱϩⲙ ⲛⲧⲉϥⲙⲛⲧϣⲁⲛϩⲧⲏϥ . ⲛϥⲕⲧⲉⲧⲉϥⲟⲣⲅⲏ ⲙⲛⲡⲉϥϭⲱⲛⲧ ⲉⲡⲁϩⲟⲩ .
…
21 ⲁⲩⲱ ⲁϥⲧⲛⲛⲟⲟⲩ ⲛⲟⲩⲁⲅⲅⲉⲗⲟⲥ ⲛϫⲱⲱⲣⲉ . ⲁϥⲡⲱϩ ⲙⲡⲕⲁⲧⲁⲡⲉⲧⲁⲥⲙⲁ ⲙⲡⲣⲡⲉ ⲁϥⲣⲥⲛⲁⲩ .
…
22 ⲁⲡⲕⲁϩ ⲕⲓⲙ . ⲁⲙⲡⲉⲧⲣⲁ ⲡⲱϩ . ⲁⲡⲣⲏ ⲣⲕⲁⲕⲉ ⲡⲉⲓⲛⲟϭ ⲛⲣⲉϥⲣⲟⲩⲟⲉⲓⲛ .
…
23 ⲁⲡⲕⲁϩ ⲧⲏⲣϥ ⲣⲕⲁⲕⲉ ϫⲉⲕⲁⲁⲥ ⲉϥⲉⲥⲕⲩⲡⲁⲍⲉ ⲙⲡⲉϥⲥⲱⲙⲁ ⲉⲧⲟⲩⲁⲁⲃ ϩⲓϫⲙⲡⲉⲥⲧⲁⲩⲣⲟⲥ . ⲉⲃⲟⲗ ϫⲉⲁⲩⲕⲁⲁϥ ⲕⲁϩⲏⲩ ⲛⲛⲉϥϩⲟⲓⲧⲉ ⲁⲩⲡⲟϣⲟⲩ ⲉϫⲱⲟⲩ .
…
24 ϭⲱϣⲧ ⲱ ⲛⲁⲙⲉⲣⲁⲧⲉ ⲛⲧⲉⲧⲛⲛⲁⲩ ⲉⲧⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ . ⲡⲉⲧϯϩⲃⲥⲱ ϩⲓⲱⲱϥ ⲙⲡⲥⲱⲛⲧ ⲧⲏⲣϥ .
…
25 ⲁⲩⲕⲁⲁϥ ⲕⲁϩⲏⲩ ⲛⲛⲉϥϩⲟⲓⲧⲉ ϩⲓϫⲙⲡⲉⲥⲧⲁⲩⲣⲟⲥ ⲁⲗⲗⲁ ⲡⲣⲏ ϩⲱⲃⲥ ⲙⲡⲉϥϫⲟⲉⲓⲥ ϩⲓⲧⲙⲡⲕⲁⲕⲉ ⲛⲧⲁϥϣⲱⲡⲉ . ϫⲉⲛⲛⲉⲩⲛⲟϭ ⲙⲙⲩⲥⲧⲏⲣⲓⲟⲛ ⲛⲧⲁϥϣⲱⲡⲉ ϩⲓϫⲙⲡⲉⲥⲧⲁⲩⲣⲟⲥ ⲉⲃⲟⲗ ϫⲉⲛⲥⲉⲙⲡϣⲁ ⲙⲙⲟϥ ⲁⲛ
…
26 ⲡⲉⲛⲧⲁϥⲙⲡϣⲁ ⲅⲁⲣ ⲁϥⲑⲉⲱⲣⲉⲓ ⲙⲡϫⲱⲕ ⲧⲏⲣϥ ⲛⲧⲉϥⲙⲛⲧⲛⲟⲩⲧⲉ . ⲙⲡⲛⲁⲩ ⲉⲧⲙⲙⲁⲩ .
…
27 ⲛⲓⲙ ϭⲉ ⲡⲉⲛⲧⲁϥⲙⲡϣⲁ ⲙⲡⲉⲓⲛⲟϭ ⲛⲧⲁⲓⲟ . ⲙⲁⲣⲉⲛⲉⲓⲙⲉ ⲉⲣⲟϥ .
…
28 ⲡⲗⲏⲥⲧⲏⲥ ⲡⲉ ⲉϥⲧⲁⲗⲏⲩ ⲉⲡϫⲓⲥⲉ ⲙⲡⲉⲥⲧⲁⲩⲣⲟⲥ ⲁϥⲛⲁⲩ ⲉϩⲱⲃ ⲛⲓⲙ ⲛⲧⲁⲩϣⲱⲡⲉ . ⲁⲩⲱ ⲁϥⲧⲉⲗⲏⲗ ϫⲉⲁϥⲛⲁⲩ ⲉⲣⲟⲟⲩ .
…
29 ⲟⲩ ⲡⲉ ⲛⲧⲁϥⲛⲁⲩ ⲉⲣⲟϥ . ⲉⲓⲙⲏⲧⲓ ⲧⲉⲥⲧⲣⲁⲧⲓⲁ ⲛⲛⲁⲅⲅⲉⲗⲟⲥ ⲉⲩⲕⲱⲧⲉ ⲉⲡⲉⲥⲧⲁⲩⲣⲟⲥ ⲉⲩϩⲩⲙⲛⲉⲩⲉ ⲉⲣⲟϥ .
…
30 ⲡⲉⲓⲱⲧ ϭⲱϣⲧ ⲉⲃⲟⲗ ϩⲛⲧⲡⲉ . ⲉϥⲑⲉⲱⲣⲉⲓ ⲙⲡⲉϥϣⲏⲣⲉ ⲡⲉϥⲙⲟⲛⲟⲅⲉⲛⲏⲥ . ⲁⲩⲱ ⲉϥϯⲉⲟⲟⲩ ⲛⲁϥ
…
31 ⲡⲁⲏⲣ ⲧⲏⲣϥ ⲭⲟⲣⲉⲩⲉ ⲡⲕⲁϩ ⲧⲏⲣϥ ⲉϣⲗⲟⲩⲗⲁⲓ ⲉⲃⲟⲗ ϫⲉⲁⲡⲉϥⲣⲣⲟ ⲡⲱϩⲧ ⲙⲡⲉϥⲥⲛⲟϥ ⲉⲃⲟⲗ ϩⲓϫⲱϥ .
…
32 ⲛϣⲏⲛ ⲧⲏⲣⲟⲩ ⲧⲁⲩⲉϩⲣⲏⲣⲉ ⲉⲃⲟⲗ . ϫⲉⲡϫⲟⲉⲓⲥ ⲁϣⲉ ⲉϫⲙⲡϣⲉ ⲙⲡⲉⲥⲧⲁⲩⲣⲟⲥ .
…
33 ⲡϣⲉ ⲛⲧⲁⲫⲑⲁⲣⲥⲓⲁ .
…
34 ⲡϣⲉ ⲛⲕⲁⲛⲟⲃⲉ ⲉⲃⲟⲗ .
…
35 ⲡϣⲉ ⲛⲣⲉϥⲧⲁⲗϭⲟ .
…
36 ⲡϣⲉ ⲛⲣⲉϥϯⲱⲛϩ .
…
37 ⲡϣⲉ ⲛⲣⲉϥϯⲕⲁⲣⲡⲟⲥ .
…
38 ⲡϣⲉ ⲙⲡⲉⲙⲧⲟⲛ .
…
39 ⲡϣⲉ ⲙⲡⲟⲩⲛⲟϥ .
…
40 ⲡϣⲉ ⲙⲡⲣⲁϣⲉ .
…
41 ⲡϣⲉ ⲙⲡⲟⲩϫⲁⲓ .
…
42 ⲡϣⲉ ⲙⲡⲉⲥⲙⲟⲩ .
…
43 ⲡϣⲉ ⲙⲡⲱⲛϩ .
…
44 ⲡϣⲉ ⲛⲧⲉⲭⲁⲣⲓⲥ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ .
…
45 ⲡⲉⲛⲧⲁⲩⲁϣⲧϥ ϩⲓϫⲙⲡϣⲉ ⲙⲡⲉⲥⲧⲁⲩⲣⲟⲥ .
…
46 ⲁⲓⲛⲁⲩ ⲉⲡⲥⲱⲛⲧ ⲧⲏⲣϥ ⲉϥⲧⲁϩⲏⲩ ⲉⲣⲁⲧϥ ⲁⲩⲱ ⲉϥⲥⲙⲟⲛⲧ ϩⲙⲡⲉⲡⲣⲟⲥⲱⲡⲟⲛ ⲙⲡⲉⲥⲧⲁⲩⲣⲟⲥ .
…
47 ⲡⲉⲧⲉϣⲁϥⲣⲡⲣⲱⲙⲉ ⲛⲃⲣⲣⲉ ⲛⲕⲉⲥⲟⲡ . ⲙⲛⲛⲥⲁⲛⲥⲉⲣⲁⲥ . ϣⲁⲩϯⲙⲁⲉⲓⲛ ⲉⲣⲟϥ ϩⲓⲧⲙⲡⲃⲁⲡⲧⲓⲥⲙⲁ ⲉⲧⲟⲩⲁⲁⲃ . ⲉϣⲁⲩⲁⲁϥ ϩⲙⲡⲛⲉϩ ⲙⲛⲧⲉⲥⲫⲣⲁⲅⲓⲥ ⲙⲡⲉⲭⲣⲓⲥⲧⲟⲥ .
…
48 ⲡⲉⲥⲧⲁⲩⲣⲟⲥ ⲡⲉ ϣⲁϥⲕⲁⲑⲁⲣⲓⲍⲉ ⲙⲡⲣⲱⲙⲉ ⲛϥⲡⲱⲧ ⲛⲥⲁⲛⲉⲛⲉⲣⲅⲉⲓⲁ ⲛϥⲛⲁϫⲟⲩ ⲉⲃⲟⲗ ⲛϩⲏⲧϥ .
…
49 ⲡⲉⲥⲧⲁⲩⲣⲟⲥ ⲡⲉ ⲡⲙⲩⲥⲧⲏⲣⲓⲟⲛ ⲉⲧⲟⲩⲁⲁⲃ
…
50 ϩⲟⲧⲁⲛ ⲅⲁⲣ ⲉⲩϣⲁⲛⲥⲫⲣⲁⲅⲓⲍⲉ ⲙⲡⲟⲉⲓⲕ ⲙⲛⲡⲡⲟⲧⲏⲣⲓⲟⲛ ϩⲓϫⲛⲧⲉⲧⲣⲁⲡⲉⲍⲁ ⲉⲧⲟⲩⲁⲁⲃ . ⲁⲩⲱ ⲛⲥⲉⲉⲡⲓⲧⲉⲗⲉⲓ ⲉϫⲱⲟⲩ ⲟⲩⲕ ⲉⲧⲓ ⲛⲟⲩⲟⲉⲓⲕ ⲁⲛ ⲡⲉ . ⲙⲛⲟⲩⲏⲣⲡ ⲛⲕⲉⲥⲟⲡ . ⲁⲗⲗⲁ ⲟⲩⲥⲱⲙⲁ ⲡⲉ ⲙⲛⲟⲩⲥⲛⲟϥ ⲉϥⲟⲩⲁⲁⲃ .
…
51 ⲡⲉⲥⲧⲁⲩⲣⲟⲥ ⲡⲉ ⲥⲟⲗⲥⲗ ⲛⲛⲉⲧϩⲛϩⲉⲛⲗⲩⲡⲏ ⲉⲧⲃⲉⲛⲉⲩⲛⲟⲃⲉ .
…
52 ⲡⲉⲥⲧⲁⲩⲣⲟⲥ ⲡⲉ ⲧⲉϩⲓⲏ ⲉⲧⲥⲟⲩⲧⲱⲛ . ϩⲟⲧⲁⲛ ⲉⲩϣⲁⲛⲣϣⲙⲙⲟ ⲙⲉⲩⲥⲱⲣⲙ ⲛϭⲓⲛⲉⲧⲙⲟⲟϣⲉ ⲛϩⲏⲧϥ .
…
53 ⲡⲉⲥⲧⲁⲩⲣⲟⲥ ⲡⲉ ⲡⲡⲩⲣⲅⲟⲥ ⲉϥϫⲟⲥⲉ ⲉϣⲁϥϣⲱⲡ ⲉⲣⲟϥ ⲛⲛⲉⲧⲡⲏⲧ ⲉⲣⲁⲧϥ .
…
54 ⲡⲉⲥⲧⲁⲩⲣⲟⲥ ⲡⲉ ⲧⲉϭⲗⲟⲟϭⲉ ⲛⲣⲉϥϫⲓⲣⲱⲙⲉ ⲉϩⲣⲁⲓ ⲉⲧⲡⲉ .
…
55 ⲡⲉⲥⲧⲁⲩⲣⲟⲥ ⲡⲉ ⲧϩⲃⲥⲱ ⲉϣⲁⲣⲉⲛⲉⲭⲣⲓⲥⲧⲓⲁⲛⲟⲥ ⲫⲱⲣⲉⲓ ⲙⲙⲟⲥ .
…
56 ⲡⲉⲥⲧⲁⲩⲣⲟⲥ ⲡⲉ ⲡⲃⲟⲏⲑⲟⲥ ⲛⲛⲉⲉⲃⲓⲏⲛ . ⲁⲩⲱ ⲉⲧⲃⲟⲏⲑⲉⲓⲁ ⲉⲛⲉⲧϩⲏϣ .
…
57 ⲡⲉⲥⲧⲁⲩⲣⲟⲥ ⲡⲉ ⲛⲧⲁϥϣⲟⲣϣⲣ ⲙⲡⲣⲡⲉ ⲛⲛⲓⲟⲩⲇⲁⲓ . ⲁϥⲧⲣⲉⲩⲟⲩⲱⲛ ⲛⲧⲉⲕⲕⲗⲏⲥⲓⲁ . ⲁϥⲥⲧⲉⲫⲁⲛⲟⲩ ⲙⲙⲟⲥ .
…
58 ⲡⲉⲥⲧⲁⲩⲣⲟⲥ ⲁϥϣⲟⲣϣⲣ ⲛⲛⲇⲁⲓⲙⲟⲛⲓⲟⲛ ⲁϥⲛⲁϫⲟⲩ ⲉⲃⲟⲗ ϩⲛⲟⲩϩⲟⲧⲉ .
…
59 ⲡⲉⲥⲧⲁⲩⲣⲟⲥ ⲡⲉ ⲡⲉⲥⲙⲓⲛⲉ ⲛⲛⲉⲉϫⲏⲩ ⲉⲧⲣϩⲱⲧ ϩⲛⲟⲩⲙⲛⲧⲥⲁⲓⲉ .
…
60 ⲡⲉⲥⲧⲁⲩⲣⲟⲥ ⲡⲉ ⲡⲉⲥⲙⲓⲛⲉ ⲛⲛⲉⲟⲩⲏⲏⲃ ⲉⲧϩⲙⲡⲏⲓ ⲙⲡⲛⲟⲩⲧⲉ ϩⲛⲟⲩⲙⲛⲧⲥⲁⲃⲉ .
…
61 ⲡⲉⲥⲧⲁⲩⲣⲟⲥ ⲡⲉ ⲡⲉⲕⲣⲓⲧⲏⲥ ⲛⲛⲁⲧⲡⲱⲱⲛⲉ ⲛⲛⲁⲡⲟⲥⲧⲟⲗⲟⲥ .
…