1 ⲡⲉⲕⲟⲩⲱϣ ⲛϩⲏⲧ
…
2 ⲁⲛⲟⲕ ϩⲱ ϯⲛⲁⲙⲉⲣⲓⲧⲕ . ⲁⲩⲱ ⲛⲁⲁⲅⲅⲉⲗⲟⲥ ⲛⲁⲇⲓⲁⲕⲱⲛⲉⲓ ⲛⲁⲕ ϩⲙⲡⲇⲓⲡⲛⲟⲛ ⲛⲛⲉⲧⲟⲩⲁⲁⲃ .
…
3 ⲛⲉⲕⲱ ⲛϣⲃⲏⲣ ⲛⲣⲉϥϩⲱⲧⲃ ⲛϣⲟⲣⲡ ⲉⲓⲥϩⲏⲏⲧⲉ ⲁⲓⲁⲁⲕ ⲛϣⲃⲏⲣ ⲉⲣⲟⲓ .
…
4 ⲁⲛⲟⲕ ⲡⲉ ⲡⲱⲛϩ ⲛⲟⲩⲟⲛ ⲛⲓⲙ .
…
5 ⲛⲉⲕⲙⲟⲟϣⲉ ⲅⲁⲣ ϩⲛⲛⲉⲩϣⲟⲟⲩⲉ ⲙⲛⲛϣⲏⲣⲉ ⲙⲡⲕⲁⲕⲉ ⲉⲓⲥϩⲏⲏⲧⲉ ⲁⲓⲧⲣⲉⲕⲙⲟⲟϣⲉ ⲛⲙⲙⲁⲓ .
…
6 ⲁⲛⲟⲕ ⲡⲉ ⲡⲟⲩⲟⲉⲓⲛ ⲙⲡⲕⲟⲥⲙⲟⲥ .
…
7 ⲛⲉⲕϫⲓϣⲟϫⲛⲉ ⲛϣⲟⲣⲡ ⲙⲛⲛⲣⲉϥϩⲱⲧⲃ . ⲁⲓⲁⲁⲕ ⲛϣⲃⲏⲣ ⲉⲣⲟⲓ ⲁⲛⲟⲕ ⲡⲉ ⲡⲣⲉϥⲧⲁⲛϩⲟ ⲛⲁⲓ ⲧⲏⲣⲟⲩ
…
8 ϯⲛⲁⲭⲁⲣⲓⲍⲉ ⲙⲙⲟⲟⲩ ⲛⲁⲕ ϫⲉⲁⲕϩⲟⲙⲟⲗⲟⲅⲉⲓ ⲛⲧⲁⲙⲛⲧⲛⲟⲩⲧⲉ ⲙⲡⲙⲧⲟ ⲉⲃⲟⲗ ⲛⲛⲉⲧⲁⲣⲛⲁ ⲙⲙⲟⲓ
…
9 ⲛⲧⲟⲟⲩ ⲇⲉ ⲁⲩⲛⲁⲩ ⲉⲛⲁϭⲟⲙ ⲧⲏⲣⲟⲩ ⲛⲧⲁⲓⲁⲁⲩ ⲙⲡⲟⲩⲡⲓⲥⲧⲉⲩⲉ ⲉⲣⲟⲓ
…
10 ⲛⲧⲟⲕ ⲇⲉ ⲛⲧⲕⲟⲩⲗⲏⲥⲧⲏⲥ ⲛⲣⲉϥϩⲱⲧⲃ ⲛⲣⲉϥϫⲓⲟⲩⲉ . ⲛⲣⲉϥⲃⲱϭⲉ ⲛⲣⲉϥⲧⲁⲕⲟ . ⲁⲩⲱ ⲁⲕϩⲟⲙⲟⲗⲟⲅⲉⲓ ⲙⲙⲟⲓ ϫⲉⲁⲛⲟⲕ ⲡⲉ ⲡⲛⲟⲩⲧⲉ .
…
11 ⲉⲧⲃⲉⲡⲁⲓ ⲛⲉⲕⲛⲟⲃⲉ ⲉⲧⲛⲁϣⲱⲟⲩ ⲕⲏ ⲛⲁⲕ ⲉⲃⲟⲗ ϫⲉⲁⲕϩⲟⲙⲟⲗⲟⲅⲉⲓ ⲙⲙⲟⲓ .
…
12 ϯⲛⲁⲧⲣⲉⲕϣⲱⲡⲉ ⲙⲡⲟⲗⲓⲧⲏⲥ ⲙⲡⲡⲁⲣⲁⲇⲓⲥⲟⲥ .
…
13 ϯⲛⲁⲧⲣⲉⲡⲉⲕⲥⲱⲙⲁ ϣⲱⲡⲉ ⲉϥϫⲏⲕ ϣⲁⲛϯⲧⲟⲩⲛⲟⲥⲕ .
…
14 ⲡⲁⲓ ⲇⲉ ⲛⲧⲁϥⲁⲣⲛⲁ ⲙⲙⲟⲓ ⲛⲁⲛⲁⲩ ⲉⲣⲟⲕ ⲉⲕϭⲟⲟⲗⲉ ⲛⲟⲩⲉⲟⲟⲩ .
…
15 ⲛⲧⲟϥ ⲇⲉ ⲉϥϭⲟⲟⲗⲉ ⲛⲟⲩϣⲱϣ . ⲙⲛⲟⲩϩⲓⲥⲉ . ϥⲛⲁⲛⲁⲩ ⲉⲣⲟⲕ ⲉⲕϭⲟⲟⲗⲉ ⲙⲡⲟⲩⲟⲉⲓⲛ .
…
16 ⲛⲧⲟϥ ⲇⲉ ⲉϥⲁⲡⲟⲗⲁⲩⲉ ⲙⲙⲟϥ ϩⲙⲡⲕⲁⲕⲉ ϥⲛⲁⲛⲁⲩ ⲉⲣⲟⲕ ⲉⲕϭⲟⲟⲗⲉ ⲙⲡⲣⲁϣⲉ ⲙⲛⲡⲟⲩⲛⲟϥ ⲛⲧⲟϥ ⲇⲉ ⲉϥⲁⲡⲟⲗⲁⲩⲉ ⲙⲙⲟϥ ϩⲛⲧⲗⲩⲡⲏ ⲙⲛⲡⲁϣⲁϩⲟⲙ .
…
17 ϥⲛⲁⲛⲁⲩ ⲉⲣⲟⲕ ϩⲙⲡⲟⲩⲱϣⲥ ⲉⲃⲟⲗ ⲙⲛⲧⲉⲩⲫⲣⲟⲥⲩⲛⲏ . ⲛⲧⲟϥ ϩⲱⲱϥ ⲉϥϩⲙⲡϩⲁϫϩⲉϫ ⲙⲛⲡⲥⲁϩⲟⲩ .
…
18 ϥⲛⲁⲛⲁⲩ ⲉⲣⲟⲕ ⲉⲣⲉⲛⲁⲅⲅⲉⲗⲟⲥ ⲥⲟⲗⲥⲗ ⲙⲙⲟⲕ ⲛⲧⲟϥ ϩⲱⲱϥ ⲉϥϣⲟⲟⲡ ϩⲙⲡⲧⲁⲣⲧⲁⲣⲟⲥ .
…
19 ⲟⲩ ⲙⲟⲛⲟⲛ ϫⲉⲙⲡⲉϥϩⲟⲙⲟⲗⲟⲅⲉⲓ ⲙⲙⲟⲓ . ⲁⲗⲗⲁ ⲁϥⲁⲣⲛⲁ ⲙⲙⲟⲓ ⲙⲛⲧⲁⲙⲛⲧⲛⲟⲩⲧⲉ .
…
20 ⲁϥϭⲱ ⲉϥⲛⲟϭⲛⲉϭ ⲁⲩⲱ ⲉϥⲥⲱϣ ⲙⲙⲟⲓ . ⲉⲧⲃⲉⲡⲁⲓ ⲉⲣⲉⲡⲟⲩⲁ ⲡⲟⲩⲁ ϫⲓ ⲕⲁⲧⲁⲛⲉϥϩⲃⲏⲩⲉ .
…
21 ⲁⲓⲟⲩⲱ ⲅⲁⲣ ⲉⲓϫⲱ ⲙⲙⲟⲥ ⲛⲁⲩ ϩⲛⲧⲙⲏⲧⲉ ⲛⲟⲩⲟⲛ ⲛⲓⲙ ϫⲉⲡⲉⲧⲛⲁϩⲟⲙⲟⲗⲟⲅⲉⲓ ⲙⲙⲟⲓ ⲙⲡⲙⲧⲟ ⲉⲃⲟⲗ ⲛⲛⲣⲱⲙⲉ ϯⲛⲁϩⲟⲙⲟⲗⲟⲅⲉⲓ ⲙⲙⲟϥ ⲙⲡⲙⲧⲟ ⲉⲃⲟⲗ ⲙⲡⲁⲉⲓⲱⲧ ⲉⲧϩⲛⲙⲡⲏⲩⲉ .
…
22 ⲧⲉⲧⲛⲛⲁⲩ ϭⲉ ⲱ ⲛⲉⲥⲛⲏⲩ ϫⲉⲟⲩϩⲓⲥⲉ ⲛⲁϣ ⲛϩⲉ ⲡⲉⲧⲛⲁⲧⲁϩⲉ ⲡⲣⲱⲙⲉ ⲉⲧⲛⲁⲁⲣⲛⲁ ⲙⲡⲉϥϫⲟⲉⲓⲥ .
…
23 ⲉⲧⲃⲉⲡⲁⲓ ⲙⲁⲣⲉⲛⲣⲟⲉⲓⲥ ⲉⲣⲟⲛ ϫⲉⲛⲛⲉⲩⲣϩⲁⲗ ⲙⲙⲟⲛ ⲛⲥⲉⲁⲁⲛ ⲛϣⲙⲙⲟ ⲉⲡⲉⲛⲧⲁϥⲧⲁⲙⲓⲟⲛ . ⲉⲧⲃⲉⲛⲉⲛⲕⲁ ⲙⲡⲉⲓⲁⲓⲱⲛ .
…
24 ⲟⲩⲛϩⲟⲓⲛⲉ ϣⲟⲟⲡ ⲧⲉⲛⲟⲩ ⲉⲩⲁⲣⲛⲁ ⲙⲡⲛⲟⲩⲧⲉ ⲉⲧⲃⲉ ϩⲉⲛⲭⲣⲏⲙⲁ .
…
25 ϣⲁⲣⲉⲧⲙⲛⲧⲙⲁⲓⲭⲣⲏⲙⲁ ⲅⲁⲣ . ⲧⲱⲙ ⲛⲛⲃⲁⲗ ⲙⲡⲉⲛⲧⲁϥⲙⲉⲣⲓⲧⲥ .
…
26 ⲛⲧⲟϥ ϩⲱⲱϥ ⲟⲛ ϣⲁϥϫⲓ ⲛⲧⲙⲉⲣⲓⲥ ⲛⲓⲟⲩⲇⲁⲥ . ⲕⲁⲓ ⲅⲁⲣ ⲛⲧⲟϥ ϩⲱⲱϥ ⲁϥϯ ⲙⲡⲉϥϫⲟⲉⲓⲥ ⲉⲃⲟⲗ . ϩⲁⲙⲁⲁⲃⲉ ⲛⲥⲁⲧⲉⲉⲣⲉ ⲛϩⲁⲧ .
…
27 ⲟⲩⲁⲅⲁⲑⲟⲛ ϭⲉ ⲛⲁⲛ ⲡⲉ . ⲉⲛϣⲁⲛⲛⲉϫⲡⲉⲛⲣⲟⲟⲩϣ ⲙⲡϫⲟⲉⲓⲥ . ⲛⲧⲟϥ ⲅⲁⲣ ⲡⲉⲧⲛⲁϥⲓⲣⲟⲟⲩϣ ϩⲁⲣⲟⲛ . ⲕⲁⲧⲁⲡϣⲁϫⲉ ⲙⲡⲉⲛⲉⲓⲱⲧ ⲡⲉⲧⲣⲟⲥ .
…
28 ⲙⲁⲣⲉⲛⲕⲧⲟⲛ ϭⲉ ⲉϫⲙⲡⲉⲡⲣⲟⲕⲉⲓⲙⲉⲛⲟⲛ ⲉⲧⲃⲉⲡⲉⲥⲧⲁⲩⲣⲟⲥ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ . ⲙⲛⲡⲗⲏⲥⲧⲏⲥ . ⲟⲩϣⲉ ⲅⲁⲣ ⲛⲣⲉϥϯⲱⲛϩ ⲡⲉ ⲡϣⲉ ⲙⲡⲉⲥⲧⲁⲩⲣⲟⲥ .
…
29 ⲉⲣⲉⲛⲁⲅⲅⲉⲗⲟⲥ ⲃⲏⲕ ⲉϩⲣⲁⲓ ϣⲁⲡⲉⲓⲱⲧ ⲁⲩⲱ ⲉⲩⲛⲏⲩ ⲉⲡⲉⲥⲏⲧ ϣⲁⲡϣⲏⲣⲉ ϩⲓϫⲙⲡⲉⲥⲧⲁⲩⲣⲟⲥ . ⲉⲩϭⲱϣⲧ ⲉⲃⲟⲗ ϩⲓⲧϩⲏ ⲙⲡⲉϥⲟⲩⲱϣ .
…
30 ⲁⲛⲁⲩ ⲉⲧⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ ⲙⲛⲧⲉϥⲁⲛⲟⲭⲏ ⲉϥϭⲱϣⲧ ⲉⲃⲟⲗ ϩⲙⲡϫⲓⲥⲉ . ⲉϥⲛⲁⲩ ⲉⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ ⲉϥⲟⲃⲧ ⲉϩⲟⲩⲛ ⲉⲡⲉⲥⲧⲁⲩⲣⲟⲥ . ⲉϥϩⲟⲣϣ ⲛϩⲏⲧ ϩⲛⲧⲉϥⲙⲛⲧⲭⲣⲏⲥⲧⲟⲥ .
…
31 ⲛⲧⲟϥ ⲇⲉ ϩⲱⲱϥ ⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ . ⲉⲩϯⲉⲓⲃⲧ ⲉⲛⲉϥϭⲓϫ . ⲁⲩⲱ ⲉⲩϯⲁⲁⲥ ⲉϩⲟⲩⲛ ϩⲙⲡⲉϥϩⲟ . ⲉⲩϯⲕⲗⲯ ϩⲓϫⲛⲧⲉϥⲁⲡⲉ . ⲉⲩⲧⲥⲟ ⲙⲙⲟϥ ⲛⲟⲩϩⲙϫ . ⲙⲛⲟⲩⲥⲓϣⲉ . ⲉⲩⲡⲱϣ ⲛⲛⲉϥϩⲟⲓⲧⲉ ⲉϫⲱⲟⲩ . ⲉⲩⲛⲏϫ ⲕⲗⲏⲣⲟⲥ ⲉⲣⲟⲟⲩ ⲁⲩⲱ ⲉⲩϩⲓⲟⲩⲉ ϩⲓϫⲛⲧⲉϥⲁⲡⲉ ⲛⲟⲩⲕⲁϣ
…
32 ϩⲛⲛⲁⲓ ⲧⲏⲣⲟⲩ ⲙⲡⲉϥϭⲱⲛⲧ . ⲟⲩⲇⲉ ⲙⲡⲉϥⲕⲱ ⲛⲟⲩⲕⲣⲟϥ ϩⲙⲡⲉϥϩⲏⲧ ⲉϩⲟⲩⲛ ⲉⲣⲟⲟⲩ .
…
33 ⲕⲟⲩⲱϣ ⲉⲉⲓⲙⲉ ⲥⲱⲧⲙ ⲧⲁⲧⲁⲙⲟⲕ .
…
34 ⲥⲱⲧⲙ ⲉⲣⲟϥ ⲉϥⲱϣ ⲉⲃⲟⲗ ϫⲉⲡⲁⲉⲓⲱⲧ ⲕⲱ ⲛⲁⲩ ⲉⲃⲟⲗ ϫⲉⲛⲥⲉⲥⲟⲟⲩⲛ ⲁⲛ ⲙⲡⲉⲧⲟⲩⲉⲓⲣⲉ ⲙⲙⲟϥ
…
35 ⲁⲕⲛⲁⲩ ϭⲉ ⲉⲧⲛⲟϭ ⲛⲙⲛⲧϣⲁⲛϩⲧⲏϥ ⲙⲡⲉⲓⲱⲧ . ⲙⲛⲡⲉϥϣⲏⲣⲉ ⲉϩⲟⲩⲛ ⲉⲣⲟⲛ
…
36 ⲁϥⲁⲗⲉ ⲉϫⲙⲡⲉⲥⲧⲁⲩⲣⲟⲥ ϣⲁⲛⲧⲉϥⲥⲱⲧⲉ ⲙⲡⲥⲱⲛⲧ ⲧⲏⲣϥ ⲙⲡⲛⲁⲩ ⲉϥⲁϣⲉ ⲉⲡⲉⲥⲧⲁⲩⲣⲟⲥ .
…
37 ⲁϥⲧⲃⲃⲟ ⲙⲡⲥⲱⲛⲧ ⲧⲏⲣϥ ⲛⲁⲧⲡⲉ ⲙⲛⲛⲁⲡⲕⲁϩ .
…
38 ⲁϥⲧⲃⲃⲟ ⲙⲡⲁⲏⲣ ⲧⲏⲣϥ ϩⲙⲡⲉϥⲥⲱⲙⲁ ⲛⲛⲟⲩⲧⲉ . ⲁϥⲕⲁⲑⲁⲣⲓⲍⲉ ⲙⲙⲟϥ .
…
39 ϩⲟⲙⲟⲓⲱⲥ . ⲁⲡⲉϥⲥⲛⲟϥ ⲉⲧⲟⲩⲁⲁⲃ ⲛⲧⲁⲩⲡⲁϩⲧϥ ⲉⲃⲟⲗ .
…
40 ⲁϥⲧⲣⲉⲡⲕⲁϩ ⲧⲃⲃⲟ ⲉⲃⲟⲗ ϩⲙⲡϫⲱϩⲙ ⲉⲧϩⲓϫⲱϥ .
…
41 ⲁⲓⲧⲓ ⲟⲛ ⲁϥⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲁϥϣⲱⲗ ⲙⲙⲟϥ .
…
42 ⲁϥⲃⲱⲗ ⲉⲃⲟⲗ ⲛⲛⲉⲯⲩⲭⲏ ⲉⲧⲟⲧⲡ ⲉϩⲟⲩⲛ ⲉⲛⲧⲁⲙⲓⲉⲓⲟⲛ ⲛⲕⲁⲕⲉ ⲁϥⲁⲁⲩ ⲛⲣⲙϩⲉ .
…
43 ⲛⲧⲟϥ ⲅⲁⲣ ⲁϥⲉⲣⲏⲧ ⲛⲁⲛ ϩⲛⲧⲉϥⲧⲁⲡⲣⲟ ⲙⲙⲉ . ⲧⲁⲓ ⲉⲧⲙⲡⲉϭⲟⲗ ⲉⲓ ⲉⲃⲟⲗ ⲛϩⲏⲧⲥ ⲉⲛⲉϩ
…
44 ϫⲉϩⲟⲧⲁⲛ ⲉⲩϣⲁⲛϫⲁⲥⲧ ⲉⲃⲟⲗ ϩⲓϫⲙⲡⲕⲁϩ ϯⲛⲁⲥⲉⲕⲟⲩⲟⲛ ⲛⲓⲙ ϣⲁⲣⲟⲓ ϩⲛⲧⲙⲣⲣⲉ ⲛⲧⲁⲁⲅⲁⲡⲏ . ⲁϣ ϭⲉ ⲧⲉ ⲧⲛⲟϭ ⲛⲁⲅⲁⲡⲏ .
…
45 ⲛⲧϩⲉ ⲛⲧⲁⲓ ⲛⲧⲉⲣⲉϥⲁⲗⲉ ⲉϫⲛⲟⲩϣⲉ ⲛⲥⲧⲁⲩⲣⲟⲥ . ⲛϥⲥⲟⲛϩϥ ⲙⲁⲩⲁⲁϥ .
…
46 ⲉⲛⲉⲙⲡⲉϥⲟⲩⲱϣ ⲅⲁⲣ ⲁⲛ ⲡⲉ . ⲛⲓⲙ ⲡⲉⲧⲛⲁϣⲁⲙⲁϩⲧⲉ ⲙⲙⲟϥ .
…
47 ⲛⲓⲙ ⲅⲁⲣ ⲡⲉⲧⲛⲁϣⲁⲙⲁϩⲧⲉ ⲙⲡⲛⲟⲩⲧⲉ ⲉⲧⲟⲛϩ .
…
48 ⲙⲡⲛⲁⲩ ⲅⲁⲣ ⲛⲧⲁⲩϭⲟⲡϥ ⲛϭⲓⲛⲁⲧⲛⲟⲩⲧⲉ ⲛⲓⲟⲩⲇⲁⲓ ⲁϥϫⲛⲟⲩⲟⲩ ϩⲛⲟⲩⲛⲟϭ ⲙⲙⲛⲧϣⲁⲛϩⲧⲏϥ .
…
49 ϫⲉⲉⲧⲉⲧⲛϣⲓⲛⲉ ⲛⲥⲁⲛⲓⲙ ⲙⲛⲛⲉⲓⲥⲏϥⲉ ⲙⲛⲛⲓϭⲉⲣⲱⲃ .
…
50 ⲁⲩⲟⲩⲱϣⲃ ϩⲛⲧⲉⲩⲙⲛⲧⲁⲧⲥⲟⲟⲩⲛ ⲙⲛⲧⲉⲩⲙⲛⲧϫⲁⲥⲓϩⲏⲧ . ⲙⲛⲧⲉⲩⲙⲛⲧⲁⲩⲑⲁⲇⲏⲥ ⲉⲩϫⲱ ⲙⲙⲟⲥ .
…
51 ϫⲉⲉⲛϣⲓⲛⲉ ⲛⲥⲁⲓⲏⲥⲟⲩⲥ ⲡⲛⲁⲍⲱⲣⲁⲓⲟⲥ .
…
52 ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉⲁⲛⲟⲕ ⲡⲉ .
…
53 ⲁⲛⲁⲕⲧⲓⲛ ⲙⲡⲟⲩⲟⲉⲓⲛ ⲛⲧⲉϥⲙⲛⲧⲛⲟⲩⲧⲉ ⲣⲱϩⲧ ⲉϩⲟⲩⲛ ϩⲙⲡⲉⲩϩⲟ . ⲁⲩϩⲉ ⲉⲡⲉⲥⲏⲧ .
…
54 ϩⲟⲙⲟⲓⲱⲥ ⲟⲛ ⲁϥⲧⲟⲩⲛⲟⲥⲟⲩ ϩⲛⲧⲉϥⲛⲟϭ ⲙⲙⲛⲧϣⲁⲛϩⲧⲏϥ . ϫⲉⲁⲣⲏⲩ ⲥⲉⲛⲁⲙⲉⲧⲁⲛⲟⲉⲓ .
…
55 ⲁⲩⲁⲙⲁϩⲧⲉ ⲛⲛⲉϥⲙⲁⲑⲏⲧⲏⲥ ϩⲛⲟⲩⲙⲛⲧⲁⲧⲥⲟⲟⲩⲛ .
…
56 ⲛⲁⲓ ϭⲉ ⲧⲏⲣⲟⲩ ⲉϥⲉⲓⲣⲉ ⲙⲙⲟⲟⲩ ⲛϭⲓⲡⲛⲟⲩⲧⲉ . ⲉϥⲟⲩⲱϣ ⲉⲧⲣⲉⲣⲱⲙⲉ ⲛⲓⲙ ⲟⲩϫⲁⲓ .
…
57 ⲙⲙⲟⲛ ⲙⲡⲛⲁⲩ ⲉⲧⲙⲙⲁⲩ . ϥⲛⲁⲧⲣⲉⲡⲕⲁϩ ⲟⲩⲱⲛ ⲉⲣⲱϥ ⲛϥⲟⲙⲕⲟⲩ ⲉⲡⲉⲥⲏⲧ . ⲉⲡⲉⲭⲁⲟⲥ . ⲛϥⲧⲣⲉⲩⲃⲱⲕ ⲉⲡⲉⲥⲏⲧ ⲉⲡⲙⲁ ⲙⲡⲉⲩⲥⲟⲛ ⲛⲓⲛⲉⲩⲏ .
…
58 ⲏ ⲛⲉⲩ
…