1 ⲁⲑⲁⲛⲁⲥⲓⲟⲥ ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲣⲁⲕⲟⲧⲉ ⲉϥϣⲁϫⲉ ⲉⲧⲃⲉⲡⲛⲁ ⲙⲛⲡϩⲁⲡ · — ◈ — ◈ — ◈ — ◈ — ◈
…
2 ⲡⲕⲟⲥⲙⲟⲥ ⲉⲧⲣⲡⲱⲃϣ ⲙⲡⲛⲟⲩⲧⲉ ⲛⲉⲥⲛⲏⲩ · ⲥⲉⲁⲙⲁϩⲧⲉ ⲙⲙⲟϥ ϩⲙⲡϫⲓⲛϭⲟⲛⲥ ⲉⲧϫⲓ ⲉϩⲟⲩⲛ ⲉⲛⲉⲧϩⲓⲧⲟⲩⲱⲟⲩ · ⲙⲛⲧⲙⲛⲧⲁⲡⲁⲛⲑⲣⲟⲡⲟⲥ ⲉⲧϫⲓ ⲉϩⲟⲩⲛ ⲉⲛⲁⲧϭⲟⲙ ·
…
3 ⲛⲧϩⲉ ⲉⲧϥϫⲱ ⲙⲙⲟⲥ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ϫⲉⲕⲁⲧⲁⲧϩⲉ ⲉⲧⲉⲙⲡⲟⲩⲇⲟⲕⲓⲙⲁⲍⲉ ⲙⲡⲛⲟⲩⲧⲉ ⲉⲕⲁⲁϥ ⲛⲁⲩ ϩⲛⲟⲩⲥⲟⲟⲩⲧⲛ · ⲁⲡⲛⲟⲩⲧⲉ ⲧⲁⲁⲩ ⲉϩⲣⲁⲓ ⲉⲩϩⲏⲧ ⲛϫⲟⲟⲩⲧ ⲉⲩⲉⲓⲣⲉ ⲛⲛⲉⲧⲉⲙⲉϣϣⲉ ·
…
4 ⲉⲩϫⲏⲕ ⲉⲃⲟⲗ ⲛϫⲓⲛϭⲟⲛⲥ ⲛⲓⲙ · ϩⲓⲕⲁⲕⲓⲁ · ϩⲓⲡⲟⲛⲏⲣⲓⲁ ϩⲓⲙⲁⲓⲧⲟ ⲛϩⲟⲩⲟ · ⲉⲩⲙⲉϩ ⲛⲗⲁ ϩⲓϩⲱⲧⲃ · ϩⲓϯⲧⲱⲛ ϩⲓⲕⲣⲟϥ ⲛϩⲏⲧ ⲉϥϩⲟⲟⲩ ⲛⲣⲉϥⲕⲁⲥⲕⲥ ⲛⲣⲉϥⲕⲁⲧⲁⲗⲁⲗⲉⲓ · ⲙⲙⲁⲥⲧⲛⲟⲩⲧⲉ ⲛⲣⲉϥϣⲱⲥ · ⲛϫⲁⲥⲓϩⲏⲧ ⲛⲃⲁⲃⲉⲣⲱⲙⲉ ⲛⲣⲉϥⲕⲱⲧⲉ ⲛⲥⲁⲡⲡⲉⲧϩⲟⲟⲩ ·
…
5 ⲛⲥⲉⲥⲱⲧⲙ ⲁⲛ ⲛⲥⲁⲛⲉⲩⲉⲓⲟⲧⲉ · ⲛⲁⲧϩⲏⲧ ⲛⲁⲧⲛⲁϩⲧⲉ ⲛⲟⲩⲁϩⲓⲏⲧ ⲛⲁⲧⲛⲁϩⲧⲉ · ⲛⲟⲩⲁϩⲓⲏⲧ ⲛⲁⲧⲛⲁ ·
…
6 ⲛⲉⲧⲉⲣⲉⲡⲛⲟⲩⲧⲉ ⲕⲧⲟ ⲙⲙⲟⲟⲩ ⲉϩⲟⲩⲛ ⲉⲩⲙⲛⲧⲣⲉϥϣⲙϣⲉⲛⲟⲩⲧⲉ · ϣⲁϥⲧⲥⲁⲃⲟⲟⲩ ⲟⲛ ⲉⲧⲣⲉⲩⲥⲁϩⲱⲟⲩ ⲉⲃⲟⲗ ⲛⲙⲡⲉⲧϩⲟⲟⲩ · ⲁⲩⲱ ⲉⲧⲣⲉⲩϥⲓ ⲡⲣⲟⲟⲩϣ ⲙⲡⲛⲁ ⲉϩⲟⲩⲛ ⲉⲡⲉⲧϩⲓⲧ ϩⲓⲧⲟⲩⲱⲟⲩ ·
…
7 ⲕⲁⲧⲁⲧϩⲉ ⲉⲛⲧⲁⲏⲥⲁⲓⲁⲥ ϯⲥⲃⲱ ⲛⲁⲛ ⲉϥϫⲱ ⲙⲙⲟⲥ ϩⲙⲡⲉⲡⲣⲟⲥⲟⲡⲟⲛ ⲙⲡⲛⲟⲩⲧⲉ ϫⲉⲁⲗⲱⲧⲛ ϩⲛⲛⲉⲧⲛⲡⲟⲛⲏⲣⲓⲁ ϫⲓⲥⲃⲱ ⲉⲣⲡⲉⲧⲛⲁⲛⲟⲩϥ ·
…
8 ⲡⲛⲟⲙⲟⲥ ⲅⲁⲣ ⲟⲩⲛⲧⲁϥ ϩⲉⲛⲟⲩⲉϩⲥⲁϩⲛⲉ ⲙⲙⲁⲩ ⲉⲛⲁϣⲱⲟⲩ · ⲉⲧⲙⲡⲗⲁⲡⲧⲉⲓ ⲙⲡⲉⲧϩⲓⲧⲟⲩⲱⲛ ·
…
9 ⲟⲩⲛⲧⲁϥ ⲇⲉ ⲟⲛ ⲙⲙⲁⲩ ⲛϩⲉⲛⲉⲛⲧⲟⲗⲏ ⲉⲧⲃⲉⲧⲙⲛⲧⲙⲁⲓⲣⲱⲙⲉ · ⲁⲩⲱ ⲉⲛⲁ ⲛⲛⲉⲛⲉⲣⲏⲩ ·
…
10 ⲉϣⲱⲡⲉ ⲅⲁⲣ ⲉⲣϣⲁⲛⲟⲩⲣⲱⲙⲉ ⲕⲱ ⲛⲥⲱϥ ⲛⲟⲩⲁ ϩⲛⲛⲁⲓ · ϥⲣⲱϣⲉ ⲁⲛ ⲛϭⲓⲡⲕⲉⲟⲩⲁ ⲉⲧⲁϩⲉ ⲡⲣⲱⲙⲉ ⲉⲣⲁⲧϥ ·
…
11 ⲟⲩⲇⲉ ⲅⲁⲣ ϥϣⲏⲡ ⲁⲛ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲛϭⲓⲡⲉⲧⲣⲡⲉⲧⲛⲁⲛⲟⲩϥ ⲛⲛⲉⲧϣⲁⲁⲧ ⲉⲃⲟⲗ ϩⲛϩⲉⲛϩⲏⲩ ⲛϭⲓϫⲓⲛϭⲟⲛⲥ · ⲉϣⲱⲡⲉ ⲇⲉ ϥⲛⲁϯ ⲗⲁⲁⲩ ⲁⲛ ⲉⲃⲟⲗ ϩⲛⲛⲉⲧϣⲟⲟⲡ ⲛⲁϥ · ⲉⲧⲃⲉⲛⲉⲧⲣϫⲓⲛϭⲟⲛⲥ ⲙⲉⲛ ⲅⲁⲣ ⲁⲩⲱ ⲉⲩⲉⲡⲓⲭⲓⲣⲉ ⲉⲧⲁⲗⲉⲇⲱⲣⲟⲛ ⲉϩⲣⲁⲓ ⲙⲡⲛⲟⲩⲧⲉ ·
…
12 ϥⲥⲏϩ ⲅⲁⲣ ϫⲉⲟⲩϥⲟⲧⲉ ⲙⲡϫⲟⲉⲓⲥ ⲧⲉ ⲧⲉⲑⲩⲥⲓⲁ ⲛⲛⲁⲥⲉⲃⲏⲥ · ⲉⲧⲃⲉⲡⲉⲧⲟ ϩⲱⲱϥ ⲛϣⲛⲁ ϣⲁϥϫⲟⲟⲥ ⲉⲧⲃⲏⲏⲧϥ ϫⲉⲡⲉⲧϣⲧⲁⲙ ⲛⲛⲉϥⲙⲁⲁϫⲉ ⲉⲧⲙⲥⲱⲧⲙ ⲉⲩϩⲏⲕⲉ ⲛⲧⲟϥ ϩⲱⲱϥ ϥⲛⲁⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲛϥⲧⲙⲥⲱⲧⲙ ⲉⲣⲟϥ ·
…
13 ⲉⲧⲃⲉⲡⲁⲓ ⲙⲡⲁⲣϩⲟⲓⲙⲓⲁ ⲥⲩⲛⲃⲟⲩⲗⲉⲩⲉ ⲛⲁⲛ ϫⲉⲙⲁⲧⲁⲓⲉ ⲡ ⲛⲟⲩⲧⲉ ⲉⲃⲟⲗ ϩⲛⲛⲉⲕϩⲓⲥⲉ ⲙⲙⲉ · ⲁⲩⲱ ⲛⲅϯ ⲛⲁϥ ⲛⲛⲁⲡⲁⲣⲭⲏ ⲉⲃⲟⲗ ϩⲛⲛⲕⲁⲣⲡⲟⲥ ⲛⲧⲉⲕⲇⲓⲕⲁⲓⲟⲥⲩⲛⲏ ·
…
14 ⲉϣϫⲉ ⲕⲛⲁⲛⲇⲱⲣⲟⲛ ⲅⲁⲣ ⲉϩⲟⲩⲛ ⲙⲡⲛⲟⲩⲧⲉ ⲉⲃⲟⲗ ϩⲛⲟⲩϫⲓⲛⲛϭⲟⲛⲥ ⲙⲛⲟⲩⲧⲱⲣⲡ · ϥⲥⲟⲧⲡ ⲛϩⲟⲩⲟ ⲟⲩⲇⲉ ⲉⲧⲙⲧⲣⲉⲕϫⲡⲟ ⲛⲁⲕ ⲛⲧⲉⲓⲕⲧⲏⲥⲓⲥ ⲛⲧⲉⲓⲙⲓⲛⲉ · ⲟⲩⲇⲉ ⲉⲧⲙⲧⲁⲗⲉⲇⲱⲣⲟⲛ ⲉϩⲣⲁⲓ ⲉⲃⲟⲗ ⲛϩⲏⲧⲥ ·
…
15 ⲕⲛⲁⲉⲓⲛⲉ ⲅⲁⲣ ⲉϩⲟⲩⲛ ⲙⲡⲉⲕⲉⲣⲏⲧ ⲛⲟⲩⲇⲱⲣⲟⲛ ⲉϥⲟⲩⲁⲁⲃ · ⲛⲧϩⲉ ⲉⲧⲥⲏϩ ϫⲉⲛⲉⲣⲏⲧ ⲛⲛⲉⲧⲥⲟⲩⲧⲱⲛ ϣⲏⲡ ⲛⲁϩⲣⲁϥ ·
…
16 ⲡⲁⲗⲓⲛ ⲟⲛ ⲉϣϫⲉ ⲉⲕϫⲡⲟ ⲉⲃⲟⲗ ϩⲛϩⲉⲛϩⲓⲥⲉ ⲛⲇⲓⲕⲁⲓⲟⲛ ⲛⲅⲧⲙⲉⲓⲛⲉ ⲉϩⲟⲩⲛ ⲙⲡⲛⲟⲩⲧⲉ ⲛϩⲉⲛⲡⲣⲟⲥⲫⲟⲣⲁ · ⲛⲁⲓ ⲉϣⲁⲣⲉⲛϩⲏⲕⲉ ⲥⲁⲛϣ ⲉⲃⲟⲗ ⲛϩⲏⲧⲟⲩ · ⲥⲉⲛⲁⲟⲡⲟⲩ ⲉⲣⲟⲕ ⲉⲩⲧⲱⲣⲡ · ⲕⲁⲧⲁⲧϩⲉ ⲉⲧϥϫⲱ ⲙⲙⲟⲥ ϩⲓⲧⲙⲡⲉⲡⲣⲟⲫⲏⲧⲏⲥ ⲙⲁⲗⲁⲭⲓⲁⲥ · ϫⲉⲛⲁⲡⲁⲣⲭⲏ ⲁⲩⲱ ⲛⲣⲉⲙⲏⲧ ⲥⲉ ⲁⲣⲱⲧⲛ · ⲁⲩⲱ ⲡⲧⲱⲣⲡ ⲛⲁϣⲱⲡⲉ ϩⲛⲛⲉⲧⲛⲏⲓ :
…
17 ϣϣⲉ ⲅⲁⲣ ⲉⲣⲟⲛ ⲧⲉⲛⲟⲩ ⲉⲧⲣⲉⲛⲕⲉⲣⲁ ⲙⲡⲛⲁ ⲙⲛⲡϩⲁⲡ : ⲉⲧⲣⲉⲛϫⲡⲟ ⲙⲉⲛ ⲙⲡϩⲁⲡ ⲉⲧⲣⲉⲛϫⲟ ⲇⲉ ⲉⲃⲟⲗ ϩⲙⲡⲛⲁ ⲕⲁⲧⲁⲡⲉⲧⲥⲏϩ · ϫⲉϩⲁⲣⲉϩ ⲉⲡⲛⲁ ⲙⲛⲡϩⲁⲡ · ⲁⲩⲱ ⲛⲅϩⲛⲧⲕ ⲉϩⲟⲩⲛ ⲉⲡⲉⲕⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ·
…
18 ⲉⲣⲉⲡⲛⲟⲩⲧⲉ ⲅⲁⲣ ⲙⲉ ⲙⲡⲛⲁ ⲙⲛⲡϩⲁⲡ · ⲉⲧⲣⲉϥⲑⲛⲟϥ ⲉϩⲟⲩⲛ ⲉⲡϫⲟⲉⲓⲥ ⲛϭⲓⲡⲉⲧϥⲓ ⲙⲡⲣⲟⲟⲩϣ ⲙⲡⲛⲁ ·
…
19 ⲗⲟⲓⲡⲟⲛ ϩⲙⲡⲉⲓⲙⲁ · ⲧⲉⲛⲟⲩ ⲙⲁⲣⲉⲡⲟⲩⲁ ⲡⲟⲩⲁ ⲉⲝⲉⲧⲁⲍⲉ ⲙⲙⲟϥ ·
…
20 ⲙⲁⲣⲉϥϯϩⲧⲏϥ ⲉⲛⲉⲧϥϫⲡⲟ ⲙⲙⲟⲟⲩ ⲛϭⲓⲡⲣⲙⲙⲁⲟ : ⲛⲁⲓ ⲉⲧϥⲙⲉⲉⲩⲉ ⲉⲛⲇⲱⲣⲟⲛ ⲙⲡⲛⲟⲩⲧⲉ ⲉⲃⲟⲗ ⲛϩⲏⲧⲟⲩ · ϫⲉⲙⲏⲧⲓ ⲁϥϫⲓ ⲡϩⲏⲕⲉ ⲛϭⲟⲛⲥ · ⲙⲏⲧⲓ ⲁϥⲥⲓⲁⲍⲉ ⲙⲡϭⲱⲃ ⲉⲣⲟϥ · ⲙⲏⲧⲓ ⲁϥⲡⲗⲉⲟⲛⲉⲕⲧⲉ ⲙⲡⲉⲧϩⲁⲣⲁⲧϥ · ⲉϥⲭⲣⲱ ⲛⲟⲩⲉⲝⲟⲩⲥⲓⲁ · ⲉⲡⲙⲁ ⲛⲟⲩⲇⲓⲕⲁⲓⲟⲥⲩⲛⲏ ·
…
21 ⲥⲉⲟⲩⲉϩⲥⲁϩⲛⲉ ⲅⲁⲣ ⲛⲁⲛ ⲉⲧⲣⲉⲛϩⲁⲣⲉϩ ⲉⲡⲇⲓⲕⲁⲓⲟⲛ · ⲁⲩⲱ ⲡϣⲱϣ ⲉϩⲟⲩⲛ ⲉⲛⲉⲛⲕⲉϩⲙϩⲁⲗ ·
…
22 ⲉⲃⲟⲗ ⲅⲁⲣ ϫⲉⲕⲁⲙⲁϩⲧⲉ ⲙⲡⲣⲣϫⲓⲛϭⲟⲛⲥ · ⲟⲩⲇⲉ ⲉⲃⲟⲗ ϫⲉⲟⲩⲛϭⲟⲙ ⲙⲙⲟⲕ ⲙⲡⲣⲡⲗⲉⲟⲛⲉⲕⲧⲉ · ⲁⲗⲗⲁ ⲉⲃⲟⲗ ϫⲉⲥⲉϣⲟⲟⲡ ⲛⲁⲕ ⲛϭⲓⲛⲉϩⲃⲏⲩⲉ ⲛⲧⲉⲝⲟⲩⲥⲓⲁ ⲟⲩⲱⲛϩ ⲉⲃⲟⲗ ⲛⲛⲉϩⲃⲏⲩⲉ ⲛⲧⲇⲓⲕⲁⲓⲟⲥⲩⲛⲏ ·
…
23 ⲟⲩ ⲅⲁⲣ ⲡⲉⲧⲉⲙⲛϣϭⲟⲙ ⲙⲙⲟⲕ ⲉⲁⲁϥ ·
…
24 ⲉⲕⲛⲁϯ ⲛⲧⲁⲡⲟⲇⲓⲝⲓⲥ ⲛⲧⲙⲛⲧⲥⲧⲙⲏⲧ ⲙⲛⲧϩⲟⲧⲉ ⲉⲧϣⲟⲟⲡ ⲛⲁⲕ ⲉϩⲟⲩⲛ ⲉⲡⲛⲟⲩⲧⲉ · ⲁⲗⲗⲁ ϩⲙⲡⲉⲧⲉⲩⲛϣϭⲟⲙ ⲙⲙⲟⲕ ⲉⲡⲁⲣⲁⲃⲁ ⲛϩⲏⲧϥ ⲛⲅⲧⲙⲡⲁⲣⲁⲃⲁ ·
…
25 ⲉϣϫⲉ ⲕⲛⲁϥⲓ ⲇⲉ ⲛⲛⲉϩⲛⲁⲁⲩ ⲛⲛϩⲏⲕⲉ ⲛⲅⲧⲁⲁⲩ ⲛϩⲉⲛⲕⲉϩⲏⲕⲉ · ⲕⲥⲟⲧⲡ ⲛϩⲟⲩⲟ ⲙⲡⲉⲕϩⲁⲣⲡⲁⲍⲉ ⲟⲩⲇⲉ ⲙⲡⲉⲕϯ ·
…
26 ⲉⲧⲃⲉⲟⲩ ⲉⲕⲧⲱⲗⲙ ⲛⲧⲉⲕⲙⲛⲧⲣⲙⲙⲁⲟ ⲉⲕⲉⲓⲛⲉ ⲉϫⲱⲥ ⲛⲛⲉϩⲃⲏⲩⲉ ⲉⲧⲉϩⲉⲛⲇⲓⲕⲁⲓⲟⲛ ⲁⲛ ⲛⲉ :
…
27 ⲉⲧⲃⲉⲟⲩ ⲉⲕⲉⲓⲣⲉ ⲛⲧⲉⲕⲡⲣⲟⲥⲫⲟⲣⲁ ⲛⲃⲟⲧⲉ · ⲉⲕⲉⲡⲓⲭⲓⲣⲉ ⲉⲧⲁⲗⲟ ⲉϩⲣⲁⲓ ϩⲛⲟⲩϫⲓⲛϭⲟⲛⲥ · ϩⲙⲡⲉⲧⲕⲙⲉⲉⲩⲉ ⲉⲛⲁ ⲛⲕⲉϩⲏⲕⲉ ⲛϩⲏⲧϥ ·
…
28 ⲛⲁ ⲙⲡⲏ ⲉⲧⲙⲙⲁⲩ ⲉⲧⲕϫⲓ ⲙⲙⲟϥ ⲛϭⲟⲛⲥ ·
…
29 ⲭⲣⲱ ⲛⲧⲙⲛⲧⲙⲁⲓⲣⲱⲙⲉ ⲉϩⲟⲩⲛ ⲉⲡⲏ ⲁⲩⲱ ⲛⲅⲭⲁⲣⲓⲍⲉ ⲙⲡⲁⲓ ·
…
30 ⲕⲛⲁϫⲱⲕ ⲉⲃⲟⲗ ⲡⲉ ⲛⲟⲩⲛⲁ ⲙⲛⲟⲩϩⲁⲡ ·
…
31 ⲙⲁⲣⲉⲡⲛⲟⲩⲧⲉ ⲅⲁⲣ ⲕⲟⲓⲛⲱⲛⲉⲓ ⲙⲛⲡⲗⲉⲟⲛⲉⲝⲓⲁ · ⲟⲩⲇⲉ ⲡⲛⲟⲩⲧⲉ ⲡⲕⲟⲓⲛⲱⲛⲟⲥ ⲁⲛ ⲡⲉ ⲛⲛⲥⲟⲟⲛⲉ ⲛⲛⲣⲉϥⲧⲱⲣⲡ · ⲟⲩⲇⲉ ϩⲱⲥ ⲉⲙⲛϣϭⲟⲙ ⲙⲙⲟϥ ⲁⲛ ⲉⲥⲁⲛϣ ⲛⲛϩⲏⲕⲉ ⲉⲁϥⲕⲁⲁⲩ ⲛⲁⲛ · ⲁⲗⲗⲁ ⲉϥϣⲓⲛⲉ ⲛⲥⲁⲟⲩⲙⲛⲧⲣⲉϥϯⲕⲁⲣⲡⲟⲥ ⲛⲇⲓⲕⲁⲓⲟⲛ · ⲁⲩⲱ ⲙⲙⲁⲓⲣⲱⲙⲉ ⲉⲃⲟⲗ ϩⲓⲧⲟⲟⲧⲛ ⲉⲧⲉⲛⲛⲟⲃⲣⲉ · ⲁⲩⲱ ⲉⲩⲡⲉⲧⲛⲁⲛⲟⲩϥ ⲛⲁⲛ ·
…
32 ⲙⲁⲣⲉⲡⲛⲁ ϣⲱⲡⲉ ⲉⲃⲟⲗ ϩⲛϫⲓⲛϭⲟⲛⲥ · ⲟⲩⲇⲉ ⲙⲁⲣⲉⲥⲙⲟⲩ ϣⲱⲡⲉ ⲉⲃⲟⲗ ϩⲛⲥⲁϩⲟⲩ · ⲟⲩⲇⲉ ⲙⲁⲣⲉⲙⲛⲧⲣⲉϥⲣⲡⲉⲧⲛⲁⲛⲟⲩϥ ϣⲱⲡⲉ ⲉⲃⲟⲗ ϩⲛϩⲉⲛⲣⲙⲉⲓⲟⲟⲩⲉ ·
…
33 ⲡⲛⲟⲩⲧⲉ ⲅⲁⲣ ϫⲱ ⲙⲙⲟⲥ ⲉⲣⲉⲛⲣⲙⲉⲓⲟⲟⲩⲉ ⲕⲓⲙ ⲉⲣⲟϥ ⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ϫⲉⲛⲁⲓ ⲛⲉ ϯⲙⲟⲥⲧⲉ ⲙⲙⲟⲟⲩ ⲉⲧⲉⲧⲛⲉⲓⲣⲉ ⲙⲙⲟⲟⲩ ⲡⲉ ⲛⲉ · ⲧⲉⲧⲛϩⲱⲃⲥ ⲙⲡⲁⲑⲩⲥⲓⲁⲥⲧⲏⲣⲓⲟⲛ · ⲛϩⲉⲛⲣⲙⲉⲓⲟⲟⲩⲉ ⲙⲛⲟⲩⲣⲓⲙⲉ · ⲙⲛⲟⲩⲁϣⲁϩⲟⲙ ⲉⲃⲟⲗ ϩⲛϩⲉⲛϩⲓⲥⲉ ·
…
34 ϩⲉⲛⲙⲛⲧϣⲟⲩϣⲉ ⲛⲉ ⲛⲉⲓϩⲃⲏⲩⲉ ⲛⲧⲉⲓⲙⲓⲛⲉ ·
…
35 ϩⲉⲛⲕⲉⲛⲟⲇⲟⲝⲓⲁ ⲛⲉ ·
…
36 ⲁⲩⲱ ⲉⲩϣⲟⲟⲡ ⲉⲧⲃⲉⲡⲧⲁⲉⲓⲟ ⲛⲛⲣⲱⲙⲉ ·
…
37 ⲉⲩϣⲟⲟⲡ ⲁⲛ ⲉⲧⲃⲉⲡⲧⲁⲉⲓⲟ ⲡⲉ ⲉⲃⲟⲗ ϩⲓⲧⲙⲡⲛⲟⲩⲧⲉ ·
…
38 ⲉⲧⲃⲉⲡⲁⲓ ⲕⲁⲗⲱⲥ ⲁϥϫⲟⲟⲥ ⲛϭⲉⲡϫⲟⲉⲓⲥ ϫⲉⲙⲡⲣⲉⲓⲣⲉ ϫⲉⲕⲁⲥ ⲉⲣⲉⲛⲣⲱⲙⲉ ⲛⲁⲩ ⲉⲣⲱⲧⲛ ·
…
39 ⲉϣⲱⲡⲉ ⲇⲉ ⲉⲕⲛⲁⲉⲓⲣⲉ ⲛⲧⲉⲕⲙⲛⲧⲛⲁ ϩⲱⲥ ⲉⲡⲛⲟⲩⲧⲉ ⲡⲉⲧⲉⲓⲙⲉ ⲉⲣⲟⲥ ⲕⲛⲁϩⲁⲣⲉϩ ⲉⲣⲟⲕ ⲉⲧⲙⲁⲁⲥ ⲉⲃⲟⲗ ϩⲛⲟⲩⲙⲛⲧⲙⲁⲓⲧⲟ ⲛϩⲟⲩⲟ · ⲉⲕⲥⲟⲟⲩⲛ ϫⲉⲕⲉⲩⲫⲣⲁⲛⲉ ⲁⲛ ⲙⲡⲛⲟⲩⲧⲉ · ⲛⲧⲉⲓϩⲉ · ⲡⲁⲓ ⲉⲧϭⲱϣⲧ ⲉϫⲱⲛ
…
40 ⲙⲁⲣⲛⲉⲓⲣⲉ ⲛⲟⲩⲙⲛⲧⲛⲁ ⲛⲧⲉⲓϩⲉ ϫⲉⲕⲁⲥ ⲉⲛⲛⲁϫⲓ ⲉⲃⲟⲗ ϩⲓⲧⲙⲡⲛⲟⲩⲧⲉ ⲙⲡⲉⲥⲧⲟⲩⲉⲓⲟ ·
…
41 ⲉϣⲁⲣⲉ ⲡⲛⲟⲩⲧⲉ ⲇⲉ ϯ ⲛⲛⲁⲓ ⲉⲧⲙⲙⲁⲩ ⲉⲧϥⲧⲁⲓⲟ ⲙⲙⲟⲟⲩ ⲛⲛⲉϥⲁⲅⲁⲑⲟⲛ ·
…
42 ⲙⲉϥⲧⲁⲓⲉⲗⲁⲁⲩ ⲇⲉ ⲙⲡⲗⲉⲟⲛⲉⲕⲧⲏⲥ ·
…
43 ⲥⲧⲟ ⲛⲁⲕ ⲁⲛ ⲉⲧⲁⲗⲉⲇⲱⲣⲟⲛ ⲉϩⲣⲁⲓ ⲙⲡⲛⲟⲩⲧⲉ · ⲉⲕϣⲁⲛⲗⲩⲡⲉⲓ ⲙⲡⲉⲕⲥⲟⲛ ·
…
44 ⲡⲉϫⲁϥ ϫⲉⲉⲕϣⲁⲛⲉⲓ ⲉⲧⲁⲗⲉⲇⲱⲣⲟⲛ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛⲅⲣⲡⲙⲉⲉⲩⲉ ⲙⲡⲙⲁ ⲉⲧⲙⲙⲁⲩ ϫⲉⲟⲩⲛⲧⲉⲡⲉⲕⲥⲟⲛ ⲟⲩϩⲱⲃ ⲉⲣⲟⲕ ·
…
45 ⲃⲱⲕ ⲛϣⲟⲣⲡ ⲛⲅϩⲱⲧⲡ ⲙⲛⲡⲉⲕⲥⲟⲛ ⲧⲟⲧⲉ ⲛⲕⲉⲓ ⲛⲅⲧⲁⲗⲟ ⲉϩⲣⲁⲓ ⲙⲡⲉⲕⲇⲱⲣⲟⲛ ·
…
46 ⲁⲣⲓⲡⲙⲉⲉⲩⲉ ⲟⲩⲛ ⲛⲍⲁⲭⲁⲓⲟⲥ ⲡⲧⲉⲗⲱⲛⲏⲥ ⲡⲁⲓ ⲉⲛⲧⲁϥⲧⲟϣϥ ⲉϯ ⲙⲡⲉⲛⲧⲁϥϩⲟⲩⲗⲁ ⲉⲣⲟϥ ⲛϥⲧⲟⲩ ⲕⲱⲃ ·
…
47 ⲛⲧⲉⲓϩⲉ ⲁϥⲡⲱϣ ⲉϫⲛⲛϩⲏⲕⲉ ⲛⲛⲉϥϩⲩⲡⲁⲣⲭⲟⲛⲧⲁ ·
…
48 ⲛⲉϥⲥⲟⲟⲩⲛ ⲅⲁⲣ ϫⲉϥⲟⲩⲱϣ ⲉϣⲱⲡ ⲉⲣⲟϥ ⲙⲡⲉⲭⲣⲓⲥⲧⲟⲥ · ⲁⲩⲱ ⲙⲁⲣⲉⲡⲉⲭⲣⲓⲥⲧⲟⲥ ϣⲱⲡ ⲉⲣⲟϥ ⲛⲕⲉϩⲉ ⲛⲛⲉⲧϯ ⲁⲛ ⲉⲧⲣⲟⲟⲩⲧ ⲉϩⲟⲩⲛ ⲉⲛϩⲏⲕⲉ · ⲉⲓⲙⲏⲧⲓ ⲛⲥⲉⲃⲱⲗ ⲉⲃⲟⲗ ⲛⲧⲙⲛⲧⲙⲁⲓⲧⲟ ⲛϩⲟⲩⲟ · ⲛⲉⲛⲧⲁⲩϫⲓⲧⲟⲩ ⲛϭⲟⲛⲥ ·
…
49 ⲁⲩⲱ ⲛⲧⲉⲓϩⲉ ⲁⲡϫⲟⲉⲓⲥ ϣⲱⲡ ⲉⲣⲟϥ · ⲙⲡⲥⲟⲟⲩⲧⲛ ⲛⲍⲁⲭⲁⲓⲟⲥ ·
…
50 ⲁⲩⲱ ⲁϥϫⲟⲟⲥ ϫⲉⲁⲩⲟⲩϫⲁⲓ ϣⲱⲡⲉ ϩⲙⲡⲉⲓⲏⲓ ⲙⲡϩⲟⲟⲩ ·
…
51 ⲁⲩⲱ ⲛⲁⲓ ⲁⲛϫⲟⲟⲩ ⲛⲁϩⲣⲛⲛⲉⲧⲣⲙⲛⲧⲛⲁ · ⲉⲩϥⲓ ⲇⲉ ⲁⲛ ⲙⲡⲣⲟⲟⲩϣ ⲛⲟⲩϣⲱϣ ⲙⲛⲟⲩⲇⲓⲕⲁⲓⲟⲛ :
…
52 ⲧⲛⲛⲁ ⲧⲛⲛⲁϣⲁϫⲉ ⲇⲉ ⲟⲛ ⲛⲛⲁϩⲣⲙⲡⲉⲧⲣⲟⲉⲓⲥ ⲙⲉⲛ ⲉⲣⲟϥ ⲉⲣϫⲓⲛϭⲟⲛⲥ · ⲉϥⲁⲙⲉⲗⲉⲓ ⲇⲉ ⲉⲛⲁ · ϫⲉⲟⲩϣⲏⲛ ⲛⲁⲧⲕⲁⲣⲡⲟⲥ ϣⲁⲩϣⲁⲁⲧϥ ⲛⲥⲉⲛⲟϫϥ ⲉⲡⲕⲱϩⲧ ·
…
53 ⲁⲩⲱ ⲙⲁⲣⲉⲡⲉⲓϣⲏⲛ ⲛⲧⲉⲓⲙⲓⲛⲉ ⲣⲁⲛⲁϥ ⲉⲛⲉϩ ⲙⲡⲟⲩⲟⲉⲓⲉ ⲉⲧⲏⲡ ⲉⲧⲡⲉ · ⲡⲁⲓ ⲉⲧϫⲱ ⲙⲙⲟⲥ ϫⲉⲁⲓⲉⲓ ⲉⲓϣⲓⲛⲉ ⲛⲥⲁⲕⲁⲣⲡⲟⲥ ⲛⲧⲉⲓⲃⲱ ⲛⲕⲛⲧⲉ · ⲁⲩⲱ ⲙⲡⲉⲓϩⲉ ⲉⲟⲩⲟⲛ ·
…
54 ⲁϥⲟⲩⲉϩⲥⲁϩⲛⲉ ⲉϣⲁⲁⲧⲥ ϫⲉⲕⲁⲥ ⲛⲛⲉⲥⲟⲩⲱⲥϥ ⲙⲡⲕⲉⲕⲁϩ ·
…
55 ϣⲁⲩϭⲛⲁⲣⲓⲕⲉ ⲇⲉ ⲟⲛ ⲉⲡⲉⲧⲉⲙⲡϥϯⲧⲉⲟⲩⲱ ⲛⲛϩⲏⲕⲉ ⲛⲁⲩ · ⲁⲩⲱ ϣⲁⲣⲉⲟⲩⲁⲡⲉⲓⲗⲏ ϣⲱⲡⲉ ⲉⲧⲃⲉⲡⲁⲓ ⲛϯⲙⲓⲛⲉ ·
…
56 ⲡⲉϫⲁϥ ϫⲉⲡⲉⲧⲱⲃϣ ⲙⲙⲟϥ ⲉⲧⲙϯ ϯⲧⲉⲟⲩⲱ ⲙⲡϩⲏⲕⲉ ⲛⲛⲁⲏⲧ ⲡⲁⲓ ϥⲛⲁⲱϣ ⲉϩⲣⲁⲓ ⲉⲡⲛⲟⲩⲧⲉ ⲛϥⲧⲙⲥⲱⲧⲙ ⲉⲣⲟϥ ·
…
57 ⲡⲉϫⲁϥ ⲛϭⲓⲡⲛⲟⲩⲧⲉ ϫⲉⲁⲛⲅ ⲟⲩⲛⲁϩⲏⲧ ⲅⲁⲣ ·
…
58 ⲟⲩϩⲟⲧⲉ ⲅⲁⲣ ⲁⲩⲱ ⲟⲩϩⲱⲃ ⲡⲉ ⲡⲁⲣⲁⲡⲛⲟⲙⲟⲥ ⲡⲉ ⲉⲧⲣⲉⲕⲕⲟⲧⲕ ⲉⲥⲣⲓⲧ ⲙⲡⲉⲕⲱϩⲥ · ⲁⲩⲱ ⲡⲉⲕⲙⲁ ⲛⲉⲗⲟⲟⲗⲉ ⲉⲧⲣⲉⲕⲕⲟⲧⲕ ⲉϫⲟⲟⲗⲉϥ ⲛⲕⲉⲥⲟⲡ · ⲁⲩⲱ ⲡⲉⲕⲙⲁ ⲛϫⲟⲉⲓⲧ ⲉⲥⲣⲁⲧϥ ⲛⲕⲉⲥⲟⲡ · ⲉⲃⲟⲗ ϫⲉϣϣⲉ ⲉⲕⲁⲛⲁⲓ ⲛⲛϩⲏⲕⲉ ·
…
59 ⲉϣϫⲉ ⲁⲩⲟⲩⲉϩⲥⲁϩⲛⲉ ⲇⲉ ⲛⲛⲁⲓ · ⲛⲛⲉⲧϩⲙⲡⲛⲟⲙⲟⲥ · ⲟⲩ ⲡⲉⲧⲛⲛⲁϫⲟⲟϥ ⲉⲧⲃⲉⲛⲉⲧϩⲙⲡⲉⲭⲣⲓⲥⲧⲟⲥ ·
…
60 ⲛⲁⲓ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ⲛⲁⲩ ϫⲉⲉⲥⲧⲙⲣϩⲟⲩⲟ ⲛϭⲓⲧⲉⲧⲛⲇⲓⲕⲁⲓⲟⲥⲩⲛⲏ ⲛϩⲟⲩⲉ ⲉⲧⲁⲛⲉⲅⲣⲁⲙⲙⲁⲧⲉⲩⲥ ⲙⲛⲛⲉⲫⲁⲣⲓⲥⲥⲁⲓⲟⲥ · ⲛⲧⲉⲧⲛⲃⲱⲕ ⲉϩⲟⲩⲛ ⲉⲧⲙⲛⲧⲣⲣⲟ ⲛⲙⲡⲏⲩⲉ ·
…
61 ⲉⲧⲃⲉⲡⲁⲓ ⲟⲩ ⲙⲟⲛⲟⲛ ⲉⲃⲟⲗ ϩⲛⲛⲥⲱϣⲉ ⲙⲛⲛⲉⲧⲛⲏⲩ ⲛⲁⲛ ⲉϩⲟⲩⲛ ⲉⲃⲟⲗ · ⲁⲗⲗⲁ ⲉⲃⲟⲗ ϩⲙⲡⲕⲉϩⲱⲃ ⲛⲛⲉⲛϭⲓϫ ·
…
62 ϥϯⲥⲃⲱ ⲛⲁⲛ ⲛϭⲓⲡⲁⲡⲟⲥⲧⲟⲗⲟⲥ ⲉⲧⲣⲉⲛϯ ⲛⲛⲉⲧⲉⲙⲛⲧⲁⲩ ·
…
63 ⲡⲉϫⲁϥ ϫⲉⲉⲧⲉⲧⲛϭⲓϫ ⲉⲛⲁⲅⲁⲑⲟⲛ ϫⲉⲕⲁⲥ ⲉⲧⲉⲧⲛⲁϩⲉ ⲉⲧϩⲉ ⲉϯⲙⲡⲉⲧϣⲁⲁⲧ ·
…
64 ⲡⲉⲧⲟⲩⲱϣ ⲇⲉ ⲉⲟⲩⲁϩϥ ⲛⲥⲁⲡⲥⲱⲧⲏⲣ · ⲁⲡϫⲟⲉⲓⲥ ⲧⲟⲩⲛⲉⲓⲁⲧϥ ⲉⲃⲟⲗ · ⲉⲧⲣⲉϥϯ ⲉⲃⲟⲗ ϩⲛⲧⲉϥⲕⲉⲟⲩⲥⲓⲁ ⲧⲏⲣⲥ ⲉⲩⲡⲉⲧⲛⲁⲛⲟⲩϥ ⲛⲛϩⲏⲕⲉ · ⲁⲩⲱ ⲛⲧⲉⲓϩⲉ ⲛϥⲟⲩⲁϩϥ ⲛⲥⲱϥ ·
…
65 ⲛⲉⲛⲧⲁⲩⲟⲩⲁϩⲟⲩ ⲇⲉ ⲛⲥⲱϥ ⲙⲛⲛⲧⲉⲗⲓⲟⲥ ⲉⲁⲩϫⲱⲕ ⲉⲃⲟⲗ ⲙⲡⲟⲩⲣⲟⲧ ⲉⲧⲛⲁϣⲱϥ · ⲁⲩⲱ ⲛⲧⲉⲗⲓⲟⲥ ⲛⲙⲙⲛⲧⲛⲁ ·
…
66 ϥⲟⲩⲉϩⲥⲁϩⲛⲉ ⲛⲁⲩ ϫⲉⲕⲁⲥ ⲉⲩⲉϫⲱⲕ ⲉⲃⲟⲗ ⲛⲧⲗⲓⲧⲟⲩⲣⲅⲓⲁ ⲧⲉⲉⲃⲟⲗ ϩⲓⲧⲛⲛⲉⲭⲣⲏⲙⲁ ⲉⲩⲉⲡⲱⲱⲛⲉ ⲉϩⲟⲩⲛ ⲉⲧⲗⲓⲧⲟⲩⲣⲅⲓⲁ ⲧⲉⲉⲃⲟⲗ ϩⲙⲡⲗⲟⲅⲟⲥ ⲙⲛⲡⲉⲡⲛⲉⲩⲙⲁ
…
67 ⲡⲕⲉⲥⲉⲉⲡⲉ ϥⲟⲩⲉϩⲥⲁϩⲛⲉ ⲛⲁⲩ ⲉⲧⲣⲉⲩⲉⲓⲣⲉ ⲛϩⲉⲛⲙⲛⲧⲣⲉϥϯ ⲙⲛϩⲉⲛⲕⲟⲓⲛⲱⲛⲓⲁ ⲉⲩⲙⲏⲛ ⲉⲃⲟⲗ ϩⲛⲛⲉⲧⲉⲩⲛⲧⲁⲩⲥⲟⲩ · ϫⲉⲕⲁⲥ ϩⲓⲧⲛⲛⲁⲓ ⲉⲩⲉϩⲉ ⲉⲣⲟⲟⲩ ⲉⲩⲧⲟⲛⲧⲛ ⲙⲙⲟⲟⲩ ⲉⲧⲙⲛⲧⲙⲁⲓⲣⲱⲙⲉ ⲙⲡⲛⲟⲩⲧⲉ ⲉⲩⲛⲁ · ⲁⲩⲱ ⲉⲩϯ · ⲁⲩⲱ ⲉⲩⲭⲁⲣⲓⲍⲉ ·
…
68 ⲡⲉϫⲁϥ ⲅⲁⲣ ϫⲉϯ ⲧⲁⲣⲟⲩϯ ⲛⲏⲧⲛ · ϣⲱⲡⲉ ⲛⲭⲣⲏⲥⲧⲟⲥ ⲧⲁⲣⲟⲩⲣⲭⲣⲏⲥⲧⲟⲥ ⲉⲣⲱⲧⲛ ·
…
69 ϩⲓⲧⲛⲛⲁⲓ ⲇⲉ ⲟⲛ ⲛⲧⲁϥⲉⲣⲏⲧ ⲛⲁⲩ ⲛⲧⲕⲟⲓⲛⲱⲛⲓⲁ ⲉⲧϣⲟⲟⲡ ϣⲁⲣⲟϥ ·
…
70 ⲛⲁⲓ ⲅⲁⲣ ⲛⲉⲧⲁϩⲉⲣⲁⲧⲟⲩ ⲛⲥⲁⲟⲩⲛⲁⲙ ⲙⲡϫⲟⲉⲓⲥ · ⲛⲁⲓ ⲉⲛⲧϥϫⲟⲟⲥ ⲛⲁⲩ ⲉϥϣⲁⲛⲉⲓ ⲛϭⲓⲡⲣⲣⲟ ϫⲉⲁⲙⲏⲉⲓⲛ ⲛⲉⲧⲥⲙⲁⲁⲧ ⲛⲧⲉⲡⲁⲉⲓⲱⲧ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛⲧⲙⲛⲧⲣⲣⲟ ⲉⲛⲧⲁⲩⲥⲃⲧⲱⲧⲥ ⲛⲏⲧⲛ ϫⲓⲛⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ ·
…
71 ⲁⲓϩⲕⲟ ⲅⲁⲣ ⲁⲧⲉⲧⲛⲧⲙⲟⲓ ·
…
72 ⲁⲓⲉⲓⲃⲉ ⲁⲧⲉⲧⲛⲧⲥⲟⲓ ·
…
73 ⲉⲛⲉⲓⲟ ⲛϣⲙⲙⲟ · ⲁⲧⲉⲧⲛϣⲟⲡⲧ · ⲉⲣⲱⲧⲛ ·
…
74 ⲉⲓⲕⲏⲕⲁϩⲏⲩ ⲁⲧⲉⲧⲛϯ ϩⲓⲱⲱⲧ ·
…
75 ⲉⲓϣⲱⲛⲉ ⲛⲉ ⲡⲉ ⲁⲧⲉⲧⲛϭⲙⲡⲁϣⲓⲛⲉ ·
…
76 ⲛⲉⲓϩⲙⲡⲉϣⲧⲉⲕⲟ · ⲁⲧⲉⲧⲛⲉⲓ ϣⲁⲣⲟⲓ :
…
77 ⲛⲧⲉⲣⲟⲩⲣϣⲡⲏⲣⲉ ⲇⲉ ⲛϭⲓⲛⲇⲓⲕⲁⲓⲟⲥ · ⲁⲩⲱ ⲁⲩϫⲟⲟⲥ ϫⲉⲡϫⲟⲉⲓⲥ ⲛⲧⲁⲛⲣⲛⲁⲓ ⲛⲁⲕ ⲛⲁϣ ⲛⲟⲩⲟⲉⲓϣ ·
…
78 ϥⲛⲁϫⲟⲟⲥ ⲛⲁⲩ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲉⲡϩⲟⲥⲟⲛ ⲁⲧⲉⲧⲛⲁⲁⲥ ⲛⲟⲩⲁ ⲛⲉⲓⲕⲟⲩⲓ ⲉⲧⲥⲟⲃⲕ · ⲁⲛⲟⲕ ⲡⲉⲛⲧⲁⲧⲉⲧⲛⲁⲁⲥ ⲛⲁⲓ ·
…
79 ⲡⲟⲩⲣⲟⲧ ⲅⲁⲣ ⲉϩⲟⲩⲛ ⲉⲛⲉⲧⲟⲩⲁⲁⲃ ⲟⲩⲙⲛⲧⲉⲩⲥⲉⲃⲏⲥ ⲧⲉ ⲉϩⲟⲩⲛ ⲉⲡⲉⲭⲣⲓⲥⲧⲟⲥ ·
…
80 ⲁⲩⲱ ⲡⲉⲓⲣⲟⲟⲩⲧ ⲉϩⲟⲩⲛ ⲉⲛⲁⲡⲉⲭⲣⲓⲥⲧⲟⲥ · ϣⲁⲩϩⲉ ⲉⲣⲟϥ ⲛϩⲩⲡⲉⲣⲉⲧⲏⲥ ⲙⲡⲉⲭⲣⲓⲥⲧⲟⲥ ·
…
81 ⲟⲩ ⲙⲟⲛⲟⲛ ϫⲉⲟⲩⲛⲧϥ ⲟⲩⲛⲟϭ ⲙⲙⲁⲩ · ⲁⲗⲗⲁ ⲉϣϫⲉ ⲟⲩⲕⲟⲩⲓ ⲟⲛ ⲡⲉ ⲡⲉⲧⲉⲩⲛⲧⲁϥϥ · ⲡⲁⲓ ⲛϥⲧⲁⲗⲟϥ ⲉϩⲣⲁⲓ ·
…
82 ⲁⲩⲱ ⲉϥϣⲁⲛⲧⲥⲟ ⲛⲟⲩⲙⲁⲑⲏⲧⲏⲥ ⲛⲟⲩϫⲱ ⲙⲙⲟⲟⲩ ⲛⲱⲣϣ ⲙⲙⲁⲧⲉ ⲉⲡⲣⲁⲛ ⲛⲟⲩⲙⲁⲑⲏⲧⲏⲥ ϩⲁⲙⲏⲛ ϯϫⲱ ⲙⲙⲟⲥ ⲛⲏⲧⲛ ϫⲉⲛⲛⲉϥⲥⲱⲣⲙ ⲛϭⲓⲡⲉϥⲃⲉⲕⲉ ·
…
83 ϥϯ ⲛⲁⲕ ⲱ ⲡⲣⲙⲙⲁⲟ ⲛⲟⲩⲡⲣⲟⲫⲁⲥⲓⲥ ⲙⲙⲛⲧⲣⲙϩⲉ ⲙⲙⲉ ·
…
84 ⲉⲃⲟⲗ ⲅⲁⲣ ϩⲓⲧⲛⲛⲁⲓ ⲉⲩⲛⲁϩⲉ ⲉⲣⲟⲕ ⲛϣⲃⲣⲣϩⲱⲃ ⲙⲡⲛⲟⲩⲧⲉ ⲉⲕⲥⲁⲛϣ ⲛⲙⲙⲁⲧⲟⲓ ⲙⲡⲉⲭⲣⲓⲥⲧⲟⲥ : ⲁⲩⲱ ⲉⲕⲥⲁⲛϣ ⲙⲙⲟⲟⲩ ⲉϩⲛⲁⲕ ⲉⲩⲁⲛⲁⲅⲕⲁⲍⲉ ⲙⲙⲟⲕ ⲁⲛ ·
…
85 ⲡⲣⲣⲟ ⲇⲉ ⲛⲧⲡⲉ ⲙⲉϥⲁⲛⲁⲅⲕⲁⲍⲉ ⲟⲩⲇⲉ ⲙⲉϥϣⲉⲧⲧⲉⲗⲟⲥ · ⲁⲗⲗⲁ ϣⲁϥϣⲱⲡ ⲉⲣⲟϥ ⲛⲛⲣⲉϥϯ ⲉⲧⲣⲟⲟⲩⲧ ϫⲉⲕⲁⲥ ⲉⲩϯ ⲉⲩⲉϫⲓ · ⲁⲩⲱ ⲉⲩⲧⲓⲙⲁ ϫⲉⲕⲁⲥ ⲉⲩⲉⲧⲓⲙⲁ ⲙⲙⲟⲟⲩ ·
…
86 ⲁⲩⲱ ⲉⲩⲕⲟⲓⲛⲱⲛⲉⲓ ⲙⲛⲛϩⲏⲕⲉ ϩⲛⲛⲉ ⲡⲣⲟⲥⲟⲩⲟⲉⲓϣ ϫⲉⲉⲩⲉⲧⲁϩⲙⲟⲩ ⲉϩⲟⲩⲛ ⲉⲧⲕⲟⲓⲛⲱⲛⲓⲁ ⲛⲛϣⲁⲉⲛⲉϩ ·
…
87 ⲛⲁⲓ ⲙⲁⲣⲛⲣⲡⲉⲩⲙⲉⲉⲩⲉ ⲛϣⲁⲉⲛⲉϩ · ⲛⲟⲩⲟⲉⲓϣ ⲛⲓⲙ ·
…
88 ⲁⲩⲱ ⲙⲁⲣⲟⲩϣⲱⲡⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲃⲁⲗ · ⲛⲥⲉϣⲱⲡⲉ ϩⲛⲧⲉⲛⲯⲩⲭⲏ ϫⲉⲕⲁⲥ ⲉⲛϣⲁⲛϩⲉ ⲉⲡⲉⲟⲩⲟⲉⲓϣ · ⲛⲛⲉⲛⲕⲁⲁϥ ⲛⲥⲱⲛ · ⲟⲩⲇⲉ ⲛⲧⲛⲧⲙⲟⲃϣ ⲛⲡⲉⲧϣⲟⲟⲡ ·
…
89 ⲧⲉⲛⲟⲩ ⲛⲧⲛϭⲱϣⲧ ⲉⲃⲟⲗ ϩⲏⲧϥ ⲙⲡⲉⲧⲛⲏⲩ ⲙⲏⲡⲟⲧⲉ ϩⲙⲡⲧⲣⲉⲛϭⲱϣⲧ ⲉⲃⲟⲗ · ⲁⲩⲱ ⲉⲛⲛⲟⲩϫⲉ ⲙⲡϩⲱⲃ ⲉⲡⲁϩⲟⲩ · ⲛⲥⲧⲁϩⲟⲛ ⲛϭⲓⲧⲉⲛϩⲁⲏ ·
…
90 ⲉⲣⲉⲡϫⲟⲉⲓⲥ ⲇⲉ ⲧⲁⲁⲥ ⲛⲁⲛ ⲉⲧⲣⲉⲩϩⲉ ⲉⲣⲟⲛ ⲉⲛⲣⲟⲉⲓⲥ · ⲁⲩⲱ ⲉⲛϯⲕⲁⲣⲡⲟⲥ ⲉⲛⲉⲓⲣⲉ ⲙⲡⲙⲉⲉⲩⲉ ⲛⲛⲉϥⲉⲛⲧⲟⲗⲏ · ⲉⲛⲥⲃⲧⲱⲧ ⲉⲧⲉϥⲁⲛⲁⲡⲁⲩⲥⲓⲥ ⲉⲧϩⲁⲉⲟⲟⲩ · ⲁⲩⲱ ⲉⲙⲛⲗⲁⲁⲩ ϯϫⲣⲟⲡ ⲛⲁⲛ :
…
91 ϩⲓⲧⲛⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲡⲉⲟⲟⲩ ⲙⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ϣⲁⲛⲁⲓⲱⲛ ⲧⲏⲣⲟⲩ ⲛⲁⲓⲱⲛ ϩⲁⲙⲏⲛ · — ◈ — ◈ — ◈ — ◈ — ◈
…
92 ⲁⲑⲁⲛⲁⲥⲓⲟⲥ ⲁⲣⲭⲏⲉⲡⲓⲥⲕⲟⲡⲟⲩ · — ◈ — ◈ — ◈ — ◈ — ◈
…