1 ⲧⲙⲉϩⲥⲁϣϥ ⲛϭⲟⲙ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
2 ⲥⲱⲧⲙ ⲟⲛ · ⲉⲧⲉⲕⲉⲛⲟϭ ⲛϣⲡⲏⲣⲉ · ⲱ ⲛⲁⲙⲉⲣⲁⲧⲉ · ⲟⲩⲉⲟⲟⲩ ⲙⲡⲛⲟⲩⲧⲉ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
3 ⲁⲥϣⲱⲡⲉ ⲇⲉ ⲛⲧⲉⲣⲟⲩⲥⲙⲓⲛⲉ · ⲙⲡⲧⲟⲡⲟⲥ ⲕⲁⲗⲟⲥ · ϩⲙⲙⲛⲧⲥⲁⲏ ⲛⲓⲙ · ⲁⲩⲥⲙⲓⲛⲉ ⲉⲣⲟϥ · ⲛⲟⲩⲅⲁⲅⲉⲗⲟⲥ ⲛϣⲉ : ⲛϣⲟⲩⲉⲃⲉ ·
…
4 ⲉⲃⲟⲗ ϫⲉⲉⲣⲉϣⲟⲙⲧ ⲛⲛⲟϭ ⲛϣⲟⲩⲉⲃⲉ ⲛⲧⲉⲥⲥϩⲙⲉ ⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϯⲡⲟⲩⲟⲉⲓⲛ ⲛⲁⲥ · ⲛⲧⲁⲡⲉⲥⲙⲁⲕⲁⲣⲓⲟⲥ ⲛϩⲁⲓ ϯⲡⲟⲩⲧⲟϣ · ⲙⲡⲁⲧϥⲙⲟⲩ · ⲉⲥⲙⲛⲧⲟⲩ ⲛⲟⲩⲛⲟϭ ⲛⲕⲓⲛⲃⲏⲗ ·
…
5 ⲗⲟⲓⲡⲟⲛ ⲁⲡⲛⲟⲩⲧⲉ · ⲁⲛⲟⲩⲧⲉ ϭⲓ ⲙⲡⲉϥϣⲓⲛⲉ · ⲕⲁⲧⲁⲡⲧⲟϣ ⲛⲣⲱⲙⲉ ⲛⲓⲙ · ⲁϥⲙⲟⲩ · ⲁϥⲕⲁⲟⲩⲙⲏⲏϣⲉ · ⲛⲕⲧⲏⲥⲓⲥ ⲛⲁⲥ ·
…
6 ⲧⲟⲧⲉ ⲁⲩⲥⲙⲓⲛⲉ ⲛⲧϩⲁⲯⲓⲥ ⲛϣⲟⲩⲉⲃⲉ ⲉⲛⲁⲛⲁⲛⲟⲩϥ ⲉⲙⲁⲧⲉ ·
…
7 ⲁⲩⲱ ⲛⲧⲏⲣⲟⲩⲥⲱⲟⲩϩ · ⲛⲙⲙⲏⲏϣⲉ ⲧⲁⲗⲟⲥ ⲉϩⲣⲁⲓ · ⲛⲕⲟⲩⲓ ⲇⲉ ⲛⲁⲉⲣⲅⲁⲧⲏⲥ · ⲡⲉϫⲁⲩ ⲛⲛⲉⲩⲉⲣⲏⲩ ⲛⲧϩⲉ ⲛⲉⲧⲥⲱⲃⲉ · ϩⲁⲙⲟⲓ ⲉϣⲱⲡⲉ ⲉⲡϩⲏⲧ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲧⲏⲧ ⲛⲙⲙⲁⲛ · ⲉⲕⲱⲧ ⲉⲣⲟϥ ⲛⲟⲩⲙⲁⲣⲧⲩⲣⲓⲟⲛ · ⲛϥⲧⲣⲉⲧⲉϩⲁⲯⲓⲥ ⲛϣⲟⲩⲉⲃⲉ ⲧⲁⲩⲟ · ⲅⲁⲣⲡⲟⲥ ⲉϥⲱⲧⲡ · ⲉϣϫⲉ ⲉϥⲣⲏⲧ ⲛⲧⲛⲟⲩⲱⲙ ⲛϩⲏⲧϥ ·
…
8 ϩⲛⲟⲩϣⲥⲛⲉ ⲇⲉ · ϩⲟⲥⲟⲛ ⲉⲣⲉⲡϣⲁϫⲉ ⲛⲏⲩ ⲉⲃⲟⲗ ϩⲛⲣⲱⲟⲩ · ⲁⲡϣⲉ ⲧⲁⲩⲟ ⲉⲃⲟⲗ ⲛϩⲉⲛⲕⲗⲁⲇⲟⲥ ⲉϥⲱⲧⲡ : ⲛⲇⲏⲅⲉⲓ ⲉⲛⲁⲛⲟⲩϥ ⲉϥⲗⲏⲕ ·
…
9 ⲁⲩⲱ ⲛⲧⲉⲣⲟⲩⲛⲁⲩ ⲛϭⲓⲙⲏⲏϣⲉ · ⲉⲡⲉⲛⲧⲟϥϣⲱⲡⲉ · ⲁⲩⲱϣ ⲉⲃⲟⲗ ϩⲛⲟⲩⲛⲟϭ ⲛⲥⲙⲏ · ⲉⲩϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡⲁⲓ ⲉⲓⲧⲉ ⲉⲓⲣⲉ ⲛⲛⲉϭⲟⲙ · ⲙⲛⲛⲉⲓϣⲡⲏⲣⲉ · ⲉⲛⲁϣⲱⲟⲩ ·
…
10 ⲁⲩⲱ ⲁⲩⲉⲓⲛⲉ ⲉⲃⲟⲗ ϩⲛⲛⲅⲁⲣⲡⲟⲥ · ⲛϩⲟⲓⲛⲉ ⲛⲥⲡⲟⲩⲇⲁⲟⲥ · ⲁⲩⲕⲁⲁⲩ ⲛⲧⲟⲟⲧⲟⲩ ϩⲛ ⲛⲉⲩⲏⲓ : ϩⲱⲥ ⲫⲩⲗⲁⲕⲧⲏⲣⲓⲟⲛ ·
…
11 ⲱ ϫⲉⲟⲩⲏⲣ ⲛⲛⲧⲁⲗϭⲟ ⲛⲧⲁⲩϣⲱⲡⲉ ϩⲛⲛⲅⲁⲣⲡⲟⲥ ⲉⲧⲙⲙⲁⲩ · ⲁⲙⲙⲏⲏϣⲉ ⲟⲩⲱⲙ · ⲁⲩⲥⲉⲓ ⲁⲩⲉⲩⲭⲁⲣⲓⲥⲧⲟⲩ ⲙⲡⲛⲟⲩⲧⲉ · ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
12 ⲁⲩⲥⲱⲧⲙ ⲇⲉ ⲛϭⲓⲟⲩⲟⲛ ⲛⲓⲙ · ⲉⲧϩⲛⲧⲡⲟⲗⲓⲥ ⲙⲛⲡⲉⲥⲕⲱⲧⲉ · ⲉⲓⲧⲉ ⲕⲟⲩⲓ · ⲉⲓⲧⲉ ⲛⲟϭ · ⲁⲩⲉⲓ ⲧⲏⲣⲟⲩ ϩⲓⲟⲩⲥⲟⲡ · ⲉⲛⲁⲩ ⲉⲧⲉⲛⲟϭ ⲛϣⲡⲏⲣⲉ · ⲛϩⲟⲟⲩⲧ ⲙⲛⲛⲉϩⲓⲟⲙⲉ · ⲉⲩⲛⲏⲩ ⲉⲩⲑⲉⲱⲣⲉⲓ · ⲙⲛⲙⲡⲉⲛⲧⲟϥϣⲱⲡⲉ · ⲛⲧⲁⲡⲇⲓⲕⲁⲓⲟⲥ ⲁⲁϥ ·
…
13 ⲛⲉⲩⲛⲟⲩⲇⲁⲓ · ⲇⲉ ⲟⲛ ϩⲛⲧⲡⲟⲗⲓⲥ · ⲉⲩⲙⲟⲩⲧⲉ ⲉⲣⲟϥ · ϫⲉⲅⲁⲓⲡⲓⲟⲥ · ⲉⲩⲁⲅⲣⲓⲟⲥ…ⲡⲉ · ⲉϩⲟⲩⲛ ⲉⲣⲱⲙⲉ ⲛⲓⲙ · ⲛϩⲟⲩⲟ ⲇⲉ ⲉⲛⲉⲭⲣⲓⲥⲧⲓⲁⲛⲟⲥ ·
…
14 ⲁϥⲥⲱⲧⲙ ϩⲱϥ · ⲉⲧⲛⲟϭ ⲛϣⲡⲏⲣⲉ ⲛⲧⲁⲥϣⲱⲡⲉ · ϩⲛⲡⲧⲟⲡⲟⲥ ⲙⲡⲉⲧⲟⲩⲁⲁⲃ · ⲡⲉϫⲁϥ ϫⲉ · ϯⲛⲁⲃⲱⲕ ⲧⲁⲛⲁⲩ · ϫⲉϩⲉⲛⲙⲉ ⲛⲉ ⲛⲓϣⲁϫⲉ · ⲉⲧⲉⲛⲉⲓⲭⲣⲓⲥⲧⲓⲁⲛⲟⲥ ϫⲱ ⲙⲙⲟⲟⲩ · ϫⲉⲛ ⲉⲙⲟⲛ · ϩⲁⲣⲏⲩ ⲉⲩϫⲓϭⲟⲗ ·
…
15 ⲁϥⲟⲩⲉϩ‐ⲥⲁϩⲛⲉ ⲛⲉ ⲛⲧⲉⲛⲟⲩⲛ ⲟⲩϩⲙϩⲁⲗ ⲙⲡϩⲟϥ ⲡⲉ · ⲉⲧⲣⲉϥϩⲱⲕ ⲛⲁϥ · ⲛⲟⲩⲙⲟⲩⲗⲗⲥ ⲛⲥϩⲓⲙⲉ · ⲛⲗⲏⲩⲕⲟⲛ · ⲁϥⲁⲗⲉ ⲉⲣⲟⲥ · ⲡⲉϫⲁϥ ⲙⲡⲉϥϩⲙϩⲁⲗ · ϫⲉⲁⲙⲟⲩ ⲛⲧⲛⲛⲁⲩ ⲉⲡⲥⲱⲃⲉ · ⲉⲧⲉⲛⲉⲭⲣⲓⲥⲧⲓⲁⲛⲟⲥ ⲉⲓⲣⲉ ⲙⲙⲟϥ ·
…
16 ⲗⲟⲓⲡⲟⲛ ⲁⲩⲙⲟⲟϣⲉ · ⲙⲛⲛⲉⲩⲉⲣⲏⲩ · ϣⲁⲛⲧⲟⲩⲉⲓ ⲉⲡⲧⲟⲡⲟⲥ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲃⲟⲕ ⲉϩⲟⲩⲛⲛϭⲓ ⲡⲣⲱⲙⲉ ⲛⲟⲩⲇⲁⲓ · ⲉϥⲧⲁⲗⲏⲩ ⲉⲡⲉϥⲧⲃⲛⲏ ·
…
17 ⲡⲉϫⲉⲟⲩⲁ ⲛⲁϥ · ϩⲛⲛϣⲏⲣⲉ ⲕⲟⲩⲓ ⲛⲭⲣⲓⲥⲧⲓⲁⲛⲟⲥ · ⲉⲧⲡⲟⲛⲅⲟⲙⲉ ⲉⲡⲧⲟⲡⲟⲥ · ϫⲉⲉⲕⲃⲏⲕ ⲉⲧⲟⲡ · ⲱ ⲡⲁⲧⲛⲟⲩⲧⲉ · ⲙⲛⲡⲉⲓⲧⲃⲛⲏ · ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲙⲡⲛⲟⲩⲧⲉ ·
…
18 ⲁⲩⲱ ⲙⲡⲉⲡⲣⲱⲙⲉ ⲛⲓⲟⲩⲇⲁⲓ · ϭⲱϣⲧ ⲛⲥⲟϥ ϩⲱⲗⲟⲥ · ⲁⲗⲗⲁ ⲁϥⲃⲱⲕ · ⲁϥⲁϩⲉⲣⲁⲧϥ · ⲁϥϭⲱϣⲧ ⲉϩⲣⲁⲓ ⲉⲧⲑⲁⲯⲓⲥ · ⲉⲥⲟⲧⲡ ⲛⲅⲁⲣⲡⲟⲥ ϩⲓϭⲱⲃⲉ · ⲉϣϫⲉ ⲉϥⲣⲏⲧ ϩⲓϫⲙⲡⲕⲁϩ ·
…
19 ⲁⲩⲱ ⲡⲉϫⲁϥ ⲛϭⲓⲡⲣⲱⲙⲉ ⲛⲓⲟⲩⲇⲁⲓ · ϫⲉⲛⲓⲙ ⲡⲉ ⲛⲧⲟϥ ϯ · ⲛⲛⲓϭⲱⲃⲉ ⲉⲛⲁⲗⲗⲟⲧⲣⲓⲟⲛ ⲉⲛⲉⲕⲗⲟⲙ · ⲉⲩϫⲓϭⲟⲗ · ⲉⲡⲉⲧⲟⲩⲁⲁⲃ · ϫⲉⲛⲧⲟϥ ⲡⲉⲛⲧⲁϥⲣⲡⲉⲓ ·
…
20 ⲁϥⲟⲩⲱϣⲃ ⲛϭⲓⲡϣⲏⲣⲉ ϣⲏⲙ · ⲛⲁⲡⲧϩⲁⲣⲧⲟⲥ · ⲡⲉⲛⲧⲟϥϣⲁϫⲉ · ϫⲓⲛⲛϣⲟⲣⲡ ⲉⲧⲃⲉⲡⲧⲃⲛⲏ ⲉⲧⲉϥⲧⲁⲗⲏⲩ · ⲡⲉϫⲁϥ ⲛⲁϥ · ϫⲉⲡⲉⲧⲛⲁⲡⲁⲧⲁⲥⲥⲉⲓ ⲙⲙⲟⲕ · ϩⲓϯⲟⲩⲛⲟⲩ · ⲛⲧⲟϥ ⲡⲉⲧⲟⲩⲱⲛϩ ⲉⲃⲟⲗ · ⲛⲛⲉϣⲡⲏⲣⲉ ⲧⲏⲣⲟⲩ · ⲛⲧⲉⲩⲛⲟⲩ ⲇⲉ ⲁϥⲙⲟⲩϩ ⲛϭⲱⲛⲧ ϩⲛⲛⲛⲟϭ · ⲛⲑⲩⲙⲟⲥ · ⲁϥⲕⲁⲡⲧⲃⲛⲏ ⲉϫⲙⲡϣⲏⲣⲉ ϣⲏⲙ · ϫⲉⲉϥⲛⲁϩⲓⲟⲩⲉ ⲉⲣⲟϥ ·
…
21 ⲁⲩⲱ ⲛⲧⲉⲩⲛⲟⲩ · ⲁⲧⲟⲩⲣⲏⲧ ⲛⲧⲙⲟⲩⲗⲗⲥ · ⲃⲱⲕ ⲉⲡⲉⲥⲏⲧ ϩⲙⲡⲕⲁϩ · ⲛⲧϩⲉ ⲛⲟⲩⲟⲙⲉ · ⲁϥϩⲉ ⲉϫⲙⲡⲉϥϩⲟ · ⲁϥⲡⲗⲩⲅⲏ ⲙⲙⲟϥ · ϩⲛⲛⲉⲛⲛⲱⲛⲉ ⲙⲛⲛⲧⲱⲃⲉ · ⲉⲧⲛⲏϫ ⲉⲃⲟⲗ · ϩⲙⲡⲙⲁ ⲛⲕⲱⲧ ·
…
22 ⲁⲩⲱ ⲛⲧⲉⲩⲛⲟⲩ · ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲉⲓ ϩⲛⲡⲣⲟ · ⲉⲣⲉⲟⲩⲁⲅⲅⲉⲗⲟⲥ ⲙⲟⲟϣⲉ ⲛⲙⲙⲁϥ · ⲉⲣⲉⲡⲉϥⲕⲟⲩⲛⲧⲁⲣⲓⲟⲛ ⲛⲧⲟⲟⲧϥ
…
23 ⲡⲉϫⲁϥ ⲛⲁϥ · ϫⲉⲉⲕⲣⲟⲩ ⲙⲡⲉⲓⲙⲁ · ⲱ ⲡⲓⲣⲱⲙⲉ ⲉⲧⲏⲩ ⲉⲃⲟⲗ · ⲡⲙⲁ ⲛⲭⲗⲓⲃⲁⲍⲉ ⲁⲛ ⲡⲉ ⲡⲉⲓⲙⲁ · ⲁⲕⲕⲟ ⲙⲡⲉⲕϩⲧⲟ ⲉⲓ ⲉϩⲟⲩⲛ · ϩⲉⲛⲛⲁⲗⲗⲟⲧⲣⲓⲟⲥ ⲛⲉ ⲛⲓϭⲱⲃⲉ · ⲙⲛⲛⲓⲅⲁⲣⲡⲟⲥ · ⲁⲩⲱ ⲛⲧⲁⲕⲉⲓ ⲉⲡⲉⲓⲙⲁ · ϫⲉⲉⲕⲉϩⲓⲟⲩⲉ ⲉⲛⲉⲧⲣϩⲱⲃ · ⲉⲡⲁⲧⲟⲡⲟⲥ · ⲙⲡⲉⲕⲣϩⲱⲃ · ⲟⲩⲇⲉ ⲙⲡⲉⲕⲕⲱ ⲛⲉⲧⲣϩⲱⲃ ·
…
24 ⲁⲩⲱ ⲛⲧⲉⲩⲛⲟⲩ ⲁϥϩⲟⲕϥ ⲙⲡⲉϥⲕⲟⲩⲛⲧⲁⲣⲓⲟⲛ · ⲉⲧⲙⲏⲏⲧⲉ ⲛϩⲏⲧϥ · ⲁⲛⲉϥⲙⲁϩⲧ ⲉⲓ ⲉⲃⲟⲗ ⲙⲙⲟϥ · ⲉⲛⲉⲙⲛⲗⲁⲁⲩ ⲛⲁⲩ ⲉⲡⲡⲉⲧⲟⲩⲁⲁⲃ · ⲉⲓⲙⲏⲧⲓ ⲡⲣⲱⲙⲉ ⲛⲟⲩⲇⲁⲓ · ⲛⲧⲁⲡⲉⲧⲟⲩⲁⲁⲃ ⲡⲁⲧⲁⲥⲥⲉⲓ ·
…
25 ⲁⲗⲗⲁ ⲛⲉⲩⲛⲁⲩ ⲉⲡⲣⲱⲙⲉ · ⲉϥⲛⲉϫ ⲉⲃⲟⲗ · ⲉϥⲟ ⲛⲁⲧⲉⲓⲙⲉ · ⲥⲉⲥⲟⲟⲩⲛ ⲁⲛ · ⲙⲡⲉⲛⲧⲟϥϣⲱⲡⲉ ⲙⲙⲟϥ ·
…
26 ⲙⲛⲛⲥⲱⲥ ⲁϥⲱϣ ⲉⲃⲟⲗ · ⲛϭⲓⲡⲣⲱⲙⲉ · ϩⲛⲟⲩⲛⲟϭ ⲛⲥⲙⲏ · ⲉϥϫⲱ ⲙⲙⲟⲥ · ϫⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲃⲟⲓⲏⲑⲉⲓ ⲉⲣⲟⲓ · ϩⲛⲧⲉⲟⲩⲛⲟⲩ ⲛⲁⲛⲁⲅⲅⲉⲕⲏ · ϯⲛⲁⲟⲩⲱϩ ⲁⲛ ⲉⲧⲟⲟⲧ ϣⲁⲉⲛⲉϩ · ⲛⲟⲩⲟⲉⲓϣ ⲉⲓⲥⲕⲟⲧⲉⲓ ⲛⲥⲁⲗⲁⲁⲩ · ⲙⲡⲉⲧⲟⲩⲁⲁⲃ · ⲁⲩⲱ ⲉϣⲱⲡⲉ ⲉⲕϣⲁⲛⲉⲣⲡⲛⲁ ⲛⲙⲙⲁⲓ · ⲛⲅⲕⲟ ⲛⲁⲓ ⲉⲃⲟⲗ ϩⲙⲡⲉⲓϣⲱⲛⲉ · ϯⲛⲁϣⲱⲡⲉ ϩⲱⲱⲧ ⲛⲭⲣⲓⲥⲧⲓⲁⲛⲟⲥ · ⲁⲩⲱ ϯⲥⲙⲓⲛⲉ ⲛⲧⲉⲕⲥⲧⲏⲗⲏ · ϯ……ⲕ ⲧⲉⲛⲟⲩ ϩⲙⲡⲉⲕⲉⲟⲟⲩ · ⲉⲣⲉⲡⲉⲕⲕⲟⲩⲛⲧⲁⲣⲓⲟⲛ ⲧⲟⲕⲥ ⲉⲣⲟⲓ · ⲁⲩⲱ ϯⲛⲁⲥⲙⲓⲛⲉ ⲙⲡⲁⲗⲓⲙⲛ ϩⲱⲱⲧ · ⲉϥⲛⲏϫ ⲉⲃⲟⲗ ϩⲁⲛⲉⲕⲟⲩⲉⲣⲏⲧⲉ · ϩⲛⲟⲩⲛⲟϭ ⲛϣⲓⲡⲉ · ⲙⲛⲟⲩⲙⲛⲧⲁⲧϭⲟⲙ · ⲛⲧⲁⲭⲣⲩⲥⲥⲟⲩ ⲛⲧⲉⲕϩⲓⲕⲱⲛ ϩⲛⲟⲩⲛⲟⲩⲃ · ⲉϥⲥⲟⲧⲡ · ⲙⲛϩⲉⲛⲛⲱⲛⲉ ⲛⲁⲩⲉⲓⲛ ⲛⲕⲱϩⲧ · ⲉⲧⲉⲡⲉⲭⲣⲩⲥⲟⲗⲓⲛⲑⲟⲥ ⲡⲉ · ⲁⲩⲱ ⲡⲗⲓⲙⲛ ⲙⲡⲉⲕⲕⲟⲩⲛⲧⲁⲣⲓⲟⲛ · ϯⲛⲁⲧⲣⲉⲩⲧⲟⲕⲥϥ ⲉⲛⲱⲛⲉ ⲙⲙⲉ · ⲛⲁⲧⲁⲙⲁⲥ · ⲃⲟⲏⲑⲉⲓ ⲉⲣⲟⲓ ⲱ ⲡⲁϫⲟⲉⲓⲥ · ⲙⲉⲣⲕⲟⲩⲣⲓⲟⲥ ·
…
27 ⲛⲁⲓ ϫⲉⲛⲧⲉⲣⲉϥϫⲟⲟⲩ · ⲉϥⲛⲏϫ ⲉⲃⲟⲗ · ⲉϥⲟ ⲙⲡⲏϣ ⲙⲟⲩ :
…
28 ⲙⲛⲛⲥⲁⲛⲁⲓ · ⲁⲡⲁⲅⲅⲉⲗⲟⲥ ⲙⲡϫⲟⲉⲓⲥ · ϣⲁϫⲉ ⲙⲛⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲛⲉϩⲡⲉⲕⲕⲟⲩⲛⲧⲁⲣⲓⲟⲛ ϩⲓⲱⲱϥ · ⲉϣϫⲉ ⲉϥⲛⲁⲡⲓⲥⲧⲉⲩⲉ ⲉⲡⲉⲛⲣⲣⲟ ⲙⲙⲉ · ⲡⲉⲭⲣⲓⲥⲧⲟⲥ · ⲛⲁⲛⲟⲩⲟⲩⲣⲉϥⲣⲛⲟⲃⲉ · ⲛϩⲟⲩⲟ ⲉⲩⲇⲓⲕⲁⲓⲟⲥ · ⲉϥⲛⲁⲣⲛⲟⲃⲉ · ϣⲁⲣⲉⲟⲩⲣⲁϣⲉ ϣⲱⲡⲉ · ϩⲛⲧⲙⲏⲏⲧⲉ ⲛⲛⲁⲅⲅⲉⲗⲟⲥ · ⲉϫⲛⲟⲩⲣⲉϥⲣⲛⲟⲃⲉ · ⲉϥϣⲁⲛⲙⲉⲧⲁⲛⲟⲓⲁ ⲉϫⲛⲛⲉϥⲛⲟⲃⲉ · ⲕⲁⲧⲁⲧϩⲉ ⲛⲧⲁ · ⲡⲥⲱⲧⲏⲣ ⲧⲁⲙⲉ ⲛⲉϥⲙⲁⲑⲏⲧⲏⲥ · ϫⲉⲛϥ ⲙⲙⲁⲩ · ⲙⲁⲣⲉⲡⲕⲛⲁ ⲧⲁϩⲟϥ · ϫⲉⲟⲩⲁⲧ ⲥⲟⲟⲩⲛ ⲡⲉ ·
…
29 ⲁⲩⲱ ⲁⲡⲡⲉⲧⲟⲩⲁⲁⲃ ⲕⲁⲁϥ ⲉⲃⲟⲗ ·
…
30 ⲛⲧⲉⲣⲉⲡⲉϥϩⲏⲧ ϣⲱⲡⲉ ⲙⲙⲟϥ · ⲁϥϫⲓϩⲱⲃ ⲛⲓⲙ · ⲛⲧⲁⲩϣⲱⲡⲉ ⲙⲙⲟϥ · ⲉⲡⲙⲏⲏϣⲉ ⲉⲧⲥⲟⲟⲩϩ ⲉϩⲟⲩⲛ · ⲛⲧⲟⲟⲩ ⲇⲉ ⲁⲩϯⲉⲟⲟⲩ ⲙⲡⲛⲟⲩⲧⲉ · ⲡⲁⲓ ⲉⲧⲓⲣⲉ ⲛⲛⲓϭⲟⲙ · ⲉⲃⲟⲗ ϩⲓⲧⲟⲟⲧ ⲙⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ ·
…
31 ⲙⲛⲛⲥⲁⲛⲁⲓ · ⲇⲉ ⲁⲡⲣⲱⲙⲉ ⲧⲱⲟⲩⲛ · ⲁϥⲃⲱⲕ ⲉⲡⲉϥⲏⲓ · ⲉϥϣⲁϫⲉ ⲉⲧⲉϥⲥϩⲓⲙⲉ · ⲙⲛⲛⲉϥϩⲙϩⲁⲗ · ⲛϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ · ⲁⲩⲱ ϫⲉⲛⲉ ⲙⲛⲧⲁⲁϥ ϣⲏⲣⲉ ⲙⲙⲁⲩ · ϫⲉⲟⲩⲁϭⲣⲏⲛ ⲧⲉ · ⲧⲉϥⲥϩⲓⲙⲉ · ⲙⲡⲉϥⲣⲁⲥⲧⲉ ⲇⲉ ·
…
32 ⲡⲉϫⲁϥ ⲛⲧⲉϥⲥϩⲓⲙⲉ · ϫⲉⲡⲉⲧⲟⲩⲉϣⲡⲛⲟⲩⲧⲉ · ⲙⲁⲣⲉϥⲟⲩⲁϩϥ ⲛⲥⲱⲓ ·
…
33 ⲁⲩⲱ ⲁϥϫⲓ ⲛⲧⲉϥⲥϩⲓⲙⲉ · ⲙⲛⲛⲉϥϩⲙϩⲁⲗ · ⲁϥⲃⲱⲕ ⲉⲣⲁⲧϥ ⲙⲡⲓⲥⲕⲟⲡⲟⲥ · ⲁϥⲃⲁⲡⲧⲓⲍⲉ ⲙⲙⲟⲟⲩ · ⲉⲡⲣⲁⲛ ⲙⲡⲣⲁⲛ ⲙⲡⲉⲓⲱⲧ · ⲙⲛⲡϣⲏⲣⲉ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲃ ·
…
34 ⲁⲩⲱ ⲁϥⲙⲟⲩⲧⲉ ⲉⲡⲉϥⲣⲁⲛ ϫⲉⲍⲁⲭⲁⲣⲓⲁⲥ · ⲁⲩⲱ ⲧⲉϥⲥϩⲓⲙⲉ ϫⲉⲗⲉⲥⲁⲃⲉⲧ ·
…
35 ⲁⲩⲱ ⲛⲧⲉⲣⲉϥⲃⲱⲕ ⲉⲡⲉϥⲓⲏ · ⲁϥⲥⲟⲩⲱⲛⲧⲉϥⲥϩⲓⲙⲉ · ⲁⲥⲱⲱⲛϣⲏⲣⲉ ⲥⲛⲁⲩ · ⲛϩⲟⲟⲩⲧ ⲛⲟⲩⲥⲟⲡ ⲛⲟⲩⲱⲧ ·
…
36 ⲁⲩⲱ ⲛⲧⲉⲣⲉⲯⲓⲥ ⲛⲉⲃⲟⲧ ϫⲱⲕ ⲉⲃⲟⲗ · ⲁⲥϫⲡⲟϣⲏⲣⲉ ⲥⲛⲁⲩ ⲛϩⲁⲧⲣⲉ ·
…
37 ⲁⲥⲙⲟⲩⲧⲉ ⲉⲡϣⲟⲣⲡ ⲙⲙⲓⲥⲉ · ϫⲉⲙⲉⲣⲕⲟⲩⲣⲓⲟⲥ · ⲕⲁⲧⲁⲡⲣⲁⲛ ⲙⲡⲉⲧⲟⲩⲁⲁⲃ · ⲉⲃⲟⲗ ϫⲉⲧⲁⲩⲁⲙⲁⲧⲉ ⲙⲡⲟⲩϫⲁⲓ ⲉⲃⲟⲗ ϩⲓⲧⲟⲟⲧϥ · ⲡⲙⲉϩⲥⲛⲁⲩ ⲁⲩⲙⲟⲩⲧⲉ ⲉⲣⲟϥ · ϫⲉⲓⲱϩⲁⲛⲛⲏⲥ · ⲉⲡⲣⲁⲛ ⲙⲡⲃⲁⲡⲧⲓⲥⲧⲏⲥ ·
…
38 ⲙⲛⲛⲥⲁⲛⲁⲓ ⲧⲏⲣⲟⲩ · ⲁϥⲙⲟⲩⲧⲉ ⲉⲩⲣⲱⲙⲉ ⲛⲧⲩⲭⲛⲉⲓⲧⲏⲥ ⲁϥϯ ⲛⲁϥ ⲙⲙⲏⲧ ⲛⲗⲓⲧⲣⲁ ⲛⲟⲩⲃ · ⲉϥⲥⲟⲧⲡ · ⲙⲛϩⲉⲛⲛⲱⲛⲉ ⲙⲙⲉ ⲉⲩⲧⲁⲓⲏⲩ · ⲁϥⲥⲙⲛⲡⲗⲓⲙⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉⲣⲉⲡϥⲕⲟⲩⲛⲧⲁⲣⲓⲟⲛ ⲛⲧⲟⲟⲧϥ · ⲁϥⲧⲣⲉⲩⲧⲟⲕⲥϥ ⲉⲛⲱⲛⲉ · ⲛⲁⲧⲁⲙⲁⲥ
…
39 ⲁⲩⲱ ⲁϥⲧⲣⲉⲩⲥⲙⲓⲛⲉ ⲙⲡⲉϥⲗⲓⲙⲏⲛ · ϩⲱϥ ⲛⲛⲟⲩⲃ · ϩⲓⲱⲛⲉ ⲙⲙⲉ · ⲉϥϩⲁⲡⲉⲥⲏⲧ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉϥⲡⲁⲧⲁⲥⲥⲉⲓ ⲙⲙⲟϥ ϩⲙⲡⲉϥⲙⲉⲣⲉϩ · ⲉϫⲛϩⲏⲧϥ ·
…
40 ⲁⲩⲱ ϥⲓ ⲛⲧⲉϥϩⲓⲕⲱⲛ · ⲉϩⲟⲩⲛ ⲉⲧⲉⲕⲕⲗⲏⲥⲓⲁ · ⲙⲛⲛⲥⲁⲡϩⲁⲅⲓⲁⲥⲙⲟⲥ · ⲙⲡⲧⲟⲡⲟⲥ ⲁϥⲕⲁⲁⲥ ϩⲓⲧϩⲏ ⲙⲡϩⲓⲣⲁⲧⲓⲟⲛ · ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ·
…
41 ⲁⲩⲱ ⲥⲉϣⲟⲟⲡ ⲧⲉⲛⲟⲩ ⲉⲩⲙⲛⲧⲙⲛⲧⲣⲉ ⲛⲛϭⲟⲙ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϩⲛⲟⲩⲉⲣⲏⲛⲏ ⲛⲧⲉⲡⲛⲟⲩⲧⲉ ϩⲁⲙⲏⲛ ⲻ:::
…
42 ⲧⲙⲉϩϣⲙⲟⲩⲛ ⲛϭⲟⲙ ⲡⲓϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
43 ⲁⲥϣⲱⲡⲉ ⲇⲉ · ⲙⲛⲛⲥⲁⲧⲣⲉⲩϩⲁⲅⲓⲁⲍⲉ · ⲙⲡⲧⲟⲡⲟⲥ ⲙⲡⲉⲧⲟⲩⲁⲁⲃ · ⲁⲩⲱ ⲁⲡⲥⲟⲉⲓⲧ ⲛⲛⲓϭⲟⲙ ⲡⲱϩ · ϣⲁⲙⲁ ⲛⲓⲙ ·
…
44 ⲁⲩⲱ ⲟⲩⲛⲟϭ ⲙⲙⲏⲏϣⲉ · ⲉⲩⲛⲏⲩ ⲉⲡⲉϥⲗⲓⲯⲁⲛⲟⲛ ⲉⲧⲟⲩⲁⲁⲃ · ⲉⲩⲟⲩⲱϣⲧ ⲉϫⲱϥ · ⲁⲩⲱ ⲛⲉⲧϣⲱⲛⲉ ⲉⲩⲁⲙⲁⲧⲉ ⲙⲡⲧⲁⲗϭⲟ · ⲉⲩⲃⲏⲕ ⲉⲛⲉⲩⲏⲓ ·
…
45 ⲛⲇⲓⲙⲱⲛⲓⲟⲛ ⲉϥⲛⲟⲩϫ ⲙⲙⲟⲟⲩ ⲉⲃⲟⲗ · ⲁⲩⲱ ⲛⲉⲩϯϩⲁϩ ⲛⲉⲓⲣⲏⲧ ϩⲓⲡⲣⲟⲥⲫⲟⲣⲁ · ⲉϩⲟⲩⲛ ⲉⲡⲉϥⲧⲟⲡⲟⲥ ·
…
46 ⲛⲉⲩⲛⲟⲩⲁⲣⲭⲱⲛ ⲇⲉ · ϩⲛⲟⲩⲭⲱⲣⲓⲟⲛ ϩⲓⲧⲟⲩⲱϥ · ⲙⲡⲙⲁⲓ ⲟⲩⲙⲁ ⲉⲩⲙⲟⲩⲧⲉ · ⲉⲡⲣⲁⲛ ⲙⲡⲁⲣⲭⲱⲛ ⲉⲧⲙⲙⲁⲩ · ϫⲉⲕⲩⲣⲓⲥ ϩⲉⲣⲙⲁⲡⲟⲗⲗⲱⲛ ·
…
47 ⲉⲟⲩⲛⲧⲁϥ ⲙⲙⲁⲩ ⲛ · ⲟⲩϣⲉⲉⲣⲉ ϣⲏⲙ · ⲙⲙⲟⲛⲟⲅⲉⲛⲏⲥ · ⲙⲡϥϫⲟϣⲏⲣⲉ ⲉⲛⲉϩ · ⲛⲥⲁⲃⲗⲗⲁⲥ ·
…
48 ⲛⲧⲁϥⲕⲁⲁⲥ ⲉϩⲣⲁⲓ · ⲉⲥⲟ ⲛⲕⲟⲩⲓ ⲛⲟⲣⲫⲁⲛⲟⲥ · ⲉϥϭⲱϣⲧ ⲛⲥⲱⲥ · ϩⲱⲥ ⲉϥⲛⲁⲩ ⲉⲡⲛⲟⲩⲧⲉ ·
…
49 ⲁϥⲥⲱⲧⲙ ⲉⲧⲃⲉⲛϭⲟⲙ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲧⲱⲟⲩⲛ · ⲁϥϥⲓ ⲟⲩⲕⲟⲩⲓ ⲛⲉⲩⲗⲟⲅⲓⲁ · ϣⲁⲙⲁⲁⲃ ⲛϩⲟⲗⲟⲕⲟϯⲛⲟⲥ · ⲁϥⲃⲱⲕ ⲉⲡⲧⲟⲡⲟⲥ ⲙⲡⲉⲧⲟⲩⲁⲁⲃ · ⲁϥϣⲗⲏⲗ ⲁϥϯ ⲙⲡⲙⲁⲁⲃ · ⲛϩⲟⲗⲟⲕⲟϯⲛⲟⲥ · ⲙⲡⲟⲓⲕⲟⲛⲟⲙⲟⲥ ⲙⲡⲧⲟⲡⲟⲥ ·
…
50 ⲁⲩⲱ ⲁⲛⲉⲕⲗⲏⲣⲓⲕⲟⲥ · ⲉⲓⲣⲉ ⲛⲟⲩⲛⲟϭ ⲛϣⲟⲡⲥ ⲉⲣⲟϥ · ϫⲉⲛⲉϩⲉⲛⲙⲁⲓⲣⲱⲙⲉ ⲛⲉ · ⲛⲉⲕⲗⲏⲣⲓⲕⲟⲥ ⲉⲧⲙⲙⲁⲩ · ⲗⲟⲓⲡⲟⲛ ⲁⲩⲥⲱ ⲛⲟⲩⲙⲏⲏϣⲉ ⲛⲏⲣⲡ · ⲁⲩⲱ ⲁⲩⲟⲩⲱⲙ : ⲛⲟⲩⲙⲏⲏϣⲉ ⲛϭⲓⲛⲟⲩⲱⲙ · ⲉⲩϯ ⲙⲁ ⲙⲡⲁⲣⲭⲱⲛ · ⲗⲟⲓⲡⲟⲛ ⲁⲩⲥⲩⲛϯⲭⲓⲁ · ⲉⲓ ⲉⲧⲙⲏⲏⲧⲉⲓ ·
…
51 ⲡⲉϫⲉⲡⲁⲣⲭⲱⲛ · ϫⲉⲧⲉⲧⲛⲣⲭⲣⲉⲓⲁ ⲉⲛⲟⲩⲙⲁⲧⲁⲙⲟⲓ · ⲛⲧⲁⲥⲙⲛⲧϥ ⲉⲡⲉⲓⲧⲟⲡⲟⲥ ·
…
52 ⲛⲉⲕⲗⲏⲣⲓⲕⲟⲥ ⲇⲉ ⲁⲩⲱ ⲡⲟⲓⲕⲟⲛⲟⲙⲟⲥ · ⲡⲉϫⲁⲩ ⲛⲁϥ · ϫⲉⲛⲟⲩⲉϣⲟⲩⲙⲁ ⲛⲙⲕⲟⲧⲕ ⲉⲛⲁⲛⲟⲩϥ · ⲛⲧⲛⲧⲁⲗⲟⲡⲥⲱⲙⲁ ⲙ ⲡⲙⲁⲣⲧⲩⲣⲟⲥ ⲉϫⲱϥ ·
…
53 ⲁⲡⲁⲣⲭⲱⲛ ⲟⲩⲱϣⲃ · ⲉϥϫⲱ ⲙⲙⲟⲥ · ϫⲉⲉⲣϣⲁⲛⲡⲛⲟⲩⲧⲉ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲧⲉⲡⲁⲓ ⲁⲓⲧⲓⲙⲁ ϫⲱⲕ ⲉⲃⲟⲗ · ϯⲛⲁⲥⲙⲓⲛⲉ ⲛⲟⲩⲙⲁ ⲛⲙⲕⲟⲧⲕ · ⲙⲡⲙⲁⲣⲧⲩⲣⲟⲥ · ⲛⲧⲁϣⲉⲧϣⲱⲧϥ ⲛⲏⲓⲗⲓⲫⲁⲛϯⲛⲟⲛ ⲉϥⲧⲁⲓⲏⲩ · ⲛⲧϩⲉ ⲙⲡⲁⲧⲛⲉⲣⲣⲱⲟⲩ · ⲛⲛⲉϩⲣⲱⲙⲁⲓⲟⲥ ·
…
54 ⲙⲛⲛⲥⲁⲛⲁⲓ ⲁϥⲛⲕⲟⲧⲕ ⲛϭⲓⲡⲁⲣⲭⲱⲛ ⲛⲧⲉⲩϣⲏ · ⲁⲩⲱ ⲉⲥⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲟⲩⲱⲛϩ ⲉⲣⲟϥ · ⲙⲡⲉⲥⲙⲟⲧ ⲛⲟⲩⲥⲧⲣⲁⲧⲩⲗⲁⲧⲏⲥ · ⲡⲉϫⲁϥ ⲛⲁϥ · ϫⲉⲉⲕϣⲁⲛⲧⲱⲟⲩⲛ · .ⲣⲧⲁⲗⲉ ⲉⲡⲉⲕⲧⲃⲛⲏ · ⲛⲅⲃⲱⲕ ⲉⲡⲉⲕⲏⲓ · ⲁⲩⲱ ⲙⲡⲣⲕⲁⲧⲉⲭⲉⲓ · ⲉⲥⲙⲓⲛⲉ ⲙⲡⲉⲓϭⲗⲟϭ · ⲛⲧϩⲉ ⲛⲧⲁⲕϫⲟⲟⲥ · ϯⲥⲟⲟⲩⲛ ⲅⲁⲣ ϫⲉⲟⲩⲛ · ⲟⲩⲕⲟⲩⲓ ⲛⲁⲙⲉⲗⲓⲁ ⲛⲁϣⲱⲡⲉ ⲙⲙⲟⲕ · ⲉⲧⲃⲉⲡⲧⲱϣ ⲙⲡⲙⲁ ⲛⲙⲕⲟⲧⲕ · ⲛⲧⲁⲛⲉⲕⲗⲏⲣⲓⲕⲟⲥ ⲧⲁⲙⲟⲕ · ⲉⲧⲃⲏⲏⲧϥ · ϩⲓⲣⲟⲩϩⲉ · ⲁⲗⲗⲁ ϯϥⲓ ⲱⲡ ⲛⲙⲙⲁⲕ ⲁⲛ · ϯⲥⲟⲟⲩⲛ ϫⲉⲙⲛⲛⲥⲁⲛⲁⲩ ⲛⲓⲙ · ⲉⲕⲛⲁϫⲡⲉ ⲉⲓ ⲉⲡⲁⲧⲟⲡⲟⲥ · ⲛⲧⲁⲛⲁ ⲛⲁⲕ ·
…
55 ⲡⲁⲣⲭⲱⲛ ⲇⲉ ⲁϥⲛⲉϩⲥⲉ · ⲉϩⲙⲡϩⲟⲣⲟⲙⲁ ⲉϩⲣⲁⲓ · ⲁϥⲣϣⲡⲏⲣⲉ ⲉⲙⲁⲧⲉ ·
…
56 ϣⲟⲣⲡ ⲇⲉ ⲛⲧⲉⲣⲉϥϣⲱⲡⲉ · ⲁϥⲃⲱⲕ ⲉⲧⲉⲕⲗⲏⲥⲓⲁ · ⲁϥⲟⲩⲱϣⲧ ⲉϫⲙⲡⲥⲱⲙⲁ ⲙⲡⲙⲁⲣⲧⲩⲣⲟⲥ · ⲁϥⲉⲓ ⲉⲃⲟⲗ · ⲁϥⲁⲗⲉ ⲉⲛⲉϥⲧⲃⲛⲟⲟⲩⲉ · ⲁϥⲃⲱⲕ ⲉⲡⲉϥⲏⲓ ·
…
57 ⲛⲧⲉⲣⲉⲟⲩϩⲟⲟⲩ ⲇⲉ ⲟⲩⲉⲓⲛⲉ · ϫⲉⲛⲧⲁⲡⲁⲣⲭⲱⲛ · ⲉⲓ ϩⲙⲡⲙⲁⲣⲧⲏⲣⲓⲟⲛ ⲙⲡⲉⲧⲟⲩⲁⲁⲃ · ⲁⲩⲁⲣⲭⲱⲛ ⲛⲧⲉⲧⲡⲟⲗⲓⲥ · ⲥⲱⲧⲙ ⲉⲧⲃⲉⲧⲉϥϣⲉⲉⲣⲉ ⲙⲡⲁⲣⲑⲉⲛⲟⲥ · ϫⲉⲛⲉⲥϫⲟⲉⲓⲥ ⲉⲙⲁⲧⲉ · ⲁϥⲧⲛⲛⲟⲟⲩ ⲛϩⲉⲛⲣⲱⲙⲉ ⲛⲧⲉⲧⲡⲟⲗⲓⲥ ϣⲁⲣⲟϥ · ⲉϥϫⲱ ⲙⲙⲟⲥ · ϫⲉⲉⲓⲟⲩⲱϣ ϫⲓϩⲱⲓ · ⲛⲧⲉⲕϣⲉⲉⲣⲉ ⲙⲡⲁϣⲏⲣⲉ · ⲁⲩⲱ ϯⲛⲁⲧⲁϣⲟⲧⲉϭⲣⲏⲡⲉ · ϩⲙⲡⲛⲟⲩⲃ ⲙⲛⲡϩⲁⲧ · ⲁⲩⲱ ϩⲉⲛϩⲙϩⲁⲗ ⲛϩⲟⲟⲩⲧ · ⲙⲛϩⲉⲛϩⲙϩⲁⲗ ⲛⲥϩⲓⲙⲉ · ⲁⲩⲱ ϩⲉⲛϭⲁⲙⲟⲩⲗ · ϩⲉⲛⲣⲉϥⲡⲗⲉⲓⲁ ϩⲛⲧϩⲁⲗⲗⲁⲥⲥⲁ · ⲕⲁⲧⲁⲡⲧⲁⲉⲓⲟ ⲛⲧⲉⲕⲙⲛⲧⲛⲟϭ ϩⲓⲟⲩⲥⲟⲡ ·
…
58 ⲧⲟⲧⲉ ⲧⲙⲁⲁⲩ ⲛⲧϣⲉⲉⲣⲉ ϣⲏⲙ ⲧⲉⲥϩⲓⲙⲉ ⲙⲡⲁⲣⲭⲱⲛ · ⲁⲥⲙⲟⲩⲧⲉ ⲉⲣⲟϥ · ⲁⲥⲧⲁⲙⲟϥ ⲁⲡϣⲁϫⲉ ·
…
59 ⲡⲉϫⲉⲡⲁⲣⲭⲱⲛ · ϫⲉⲉϣⲱⲡⲉ ⲙⲓϩⲉ ⲉϣⲏⲣⲉ ϣⲏⲙ · ⲛⲧⲁⲓⲛⲧϥ ⲉϩⲟⲩⲛ ⲉⲡⲁⲏⲓ · ⲛⲧⲁⲓⲥϩⲁⲓ ⲛⲁϥ · ⲛⲧⲁⲡⲣⲟⲥϩⲟⲇⲟⲥ ⲧⲏⲣⲥ · ⲙⲛϭⲟⲙⲙⲟⲓ ⲉⲡⲟⲣϫⲥ ⲉⲣⲟⲓ ⲉⲛⲉϩ · ⲁⲩⲱ ⲡϣⲏⲣⲉ ϣⲏⲙ ϫⲉⲙⲛⲧⲁⲓ ⲛⲥⲁⲃⲗⲗⲁⲥ · ⲉⲓϭⲱϣⲧ ⲛⲥⲟⲥ ⲉⲓϭⲱϣⲧ ⲛⲥⲁⲡⲛⲟⲩⲧⲉ ·
…
60 ⲧⲟⲧⲉ ⲁⲧⲉⲥϩⲓⲙⲉ ⲙⲡⲁⲣⲭⲱⲛ · ϫⲱ ⲛϩⲱⲃ ⲛⲓⲙ · ⲉⲛⲉⲥϩⲓⲙⲉ ⲛⲧⲁⲩⲉⲓ · ⲁⲩⲱ ⲁⲩⲃⲱⲕ ⲉⲩⲗⲩⲡⲉⲓ · ⲁⲩϫⲱ ⲛϩⲱⲃ ⲉⲡϣⲏⲣⲉ ϣⲏⲙ : ⲙⲛⲛⲉϥⲉⲓⲟⲧⲉ · ⲁⲩⲱ ⲁⲩⲙⲡⲕⲁϩ ⲛϩⲏⲧ · ⲁⲩⲱ ⲙⲡⲟⲩϣⲁϫⲉ ·
…
61 ⲣⲟⲩϩⲉ ⲇⲉ ⲛⲧⲉⲣⲉϥϣⲱⲡⲉ · ⲁⲩⲙⲟⲩⲧⲉ ⲉⲡⲉⲩϣⲏⲣⲉ · ⲁⲩϣⲁϫⲉ ⲛⲙⲙⲁϥ · ⲉⲧⲃⲉϩⲁϩ ⲛϣⲏⲣⲉ ϣⲏⲙ · ϩⲛⲧⲡⲟⲗⲓⲥ · ⲁⲩⲱ ⲙⲡⲟⲩⲣⲁⲛⲁϥ ⲡϣⲏⲣⲉ ϣⲏⲙ · ⲁⲗⲗⲁ ⲛⲉϥⲙⲟⲕϩ ⲛϩⲏⲧ ·
…
62 ⲉⲃⲟⲗ ϫⲉⲉϥⲥⲟⲟⲩⲛ ⲛⲧϣⲉⲉⲣⲉ ϣⲏⲙ · ϫⲉⲛⲉⲥϫⲟⲉⲓⲥ ⲉⲙⲁⲧⲉ · ϫⲉⲛϥⲟ ⲛⲕⲟⲩⲓ · ⲉϥϩⲛⲧⲁⲛⲍⲉⲃⲉ · ϩⲁϩⲧⲛ ⲙⲡⲉϥⲥⲁϩ ·
…
63 ϣⲁⲣⲉⲡⲥⲁϩ ⲧⲛⲛⲟⲟⲩ ⲙⲡϣⲏⲣⲉ ϣⲏⲙ · ⲙⲙⲏⲛⲉ · ⲛⲉϥⲁⲡⲁⲅⲅⲉⲗⲉ ⲉⲧϣⲉⲉⲣⲉ ϣⲏⲙ · ⲛⲛⲉⲧⲉⲣⲉⲡⲉϥⲥⲁϩ ⲛⲁⲥϩⲁⲓⲥⲟⲩ ⲛⲁϥ · ⲉⲧϥⲡⲁⲛⲁⲅⲓⲥ ·
…
64 ⲗⲟⲓⲡⲟⲛ ⲁϥⲣⲧⲉⲩϣⲏ ⲧⲏⲣⲥ · ⲉϥⲛⲕⲟⲧⲕ · ⲉϥⲙⲉⲉⲩⲉ ⲉⲃⲟⲗ · ϫⲉⲟⲩ ⲁⲣⲁ ⲡⲉⲧⲉϥⲛⲁⲁⲁϥ · ϣⲁⲛⲧⲉϥⲁⲡⲁⲛⲧⲁ · ⲉⲧⲉⲧϣⲉⲉⲣⲉ ϣⲏⲙ · ⲛϩⲛⲟⲩϣϣⲏⲃ ⲛⲅⲁⲙⲟⲥ · ⲏ ϩⲛⲟⲩⲡⲟⲣⲛⲉⲓⲁ ·
…
65 ⲉⲧⲃⲉⲡⲉϥⲛⲟϭ ⲛⲕⲱϩ · ⲉϩⲟⲩⲛ ⲉⲣⲟⲥ · ϩⲁⲡⲗⲟⲥ ⲁϥϭⲱ ⲉϥⲗⲩⲡⲉⲓ · ⲁⲩⲱ ⲙⲡϥⲧⲁⲙⲉⲗⲁⲁⲩ ⲛⲣⲱⲙⲉ ⲉⲡⲉϥⲗⲩⲡⲉⲓ ·
…
66 ⲁⲩⲱ ⲙⲡϩⲟⲩⲛ ⲛⲟⲩⲉⲃⲟⲧ ⲛϩⲟⲟⲩ · ϫⲓⲛⲛⲧⲁⲛⲁⲓ ϣⲱⲡⲉ · ⲁⲧⲙⲁⲁⲩ ⲙⲡϣⲏⲣⲉ ϣⲏⲙ ⲙⲟⲩ · ⲁⲩⲱ ⲉⲃⲟⲗ ⲛⲧⲗⲩⲡⲉⲓ ⲛⲧⲉϥⲙⲁⲁⲩ · ⲙⲡⲉⲡⲉϥⲉⲓⲱⲧ · ϣⲓⲛⲉ ⲛⲥⲁⲗⲁⲁⲩ ⲛⲥϩⲓⲙⲉ ⲛⲁϥ ⲛⲕⲉⲥⲟⲡ ·
…
67 ⲡϣⲏⲣⲉ ⲇⲉ ϣⲏⲙ · ⲙⲡⲉⲡⲙⲉⲉⲩⲉ ⲗⲟ ⲉϥⲉⲛⲱⲭⲗⲉ ⲛⲁϥ · ⲉⲧⲃⲉⲧϣⲉⲉⲣⲉ ϣⲏⲙ · ⲁϥϯ ⲉⲡⲁϩⲟⲩ ⲙⲙⲏⲛⲉ · ϣⲁⲛⲧⲉϥϩⲱⲛ ⲉϩⲟⲩⲛ ⲉⲡⲙⲟⲩ ·
…
68 ⲁⲩⲱ ϩⲁϩ ⲙⲙⲁⲅⲟⲥ ⲁϥⲃⲱⲕ ⲉⲣⲁⲧⲟⲩ · ⲉϥⲟⲩⲱϣ ⲥⲱⲕ ⲙⲡⲛⲟⲩⲥ ⲛⲛⲉⲥⲉⲓⲟⲧⲉ · ⲛⲥⲉϯ ⲛⲧϣⲉⲉⲣⲉ ϣⲏⲙ ⲛⲁϥ ⲙⲁⲁⲩ · ⲁⲩⲱ ⲙⲡⲉϥⲁⲙⲁⲧⲉ ⲙⲡⲁⲓ ·
…
69 ⲁⲗⲗⲁ ⲁϥϩⲉ ⲉⲩⲛⲟϭ ⲙⲙⲁⲅⲟⲥ · ⲡϩⲁⲏ ⲡⲉϫⲁϥ · ϫⲉϯⲛⲁⲧⲣⲉⲕⲛⲁⲩ ⲉⲣⲟⲥ · ⲛⲅϣⲁϫⲉ ⲛⲙⲙⲁⲥ · ⲛⲟⲩⲙⲏⲏϣⲉ ⲛⲥⲟⲡ · ⲛⲧⲁⲡⲣⲟ ϩⲓⲧⲁⲡⲣⲟ · ⲡϣⲏⲣⲉ ⲇⲉ ϣⲏⲙ ϩⲓⲧⲛⲡϥⲛⲟϭ ⲛϫⲱϥ ⲛϩⲏⲧ ⲉϩⲟⲩⲛ ⲉ ϫⲱϫ ·
…
70 ⲁⲩⲱ ⲟⲛ ϩⲉⲛⲡⲉⲩⲕⲓⲟⲛ ⲁⲩⲥⲙⲛⲧⲟⲩ ⲙⲡⲟϭⲉ · ⲁⲩϣⲉⲧϣⲱⲧⲟⲩ ⲙⲡⲉⲧⲁⲗⲟⲛ ϩⲓⲗⲉⲫⲁⲛϯⲛⲟⲛ ·
…
71 ⲁⲩⲱ ⲧⲁⲙⲓⲟ ⲙⲡⲙⲁ ⲛⲙⲕⲁⲧⲕ ⲁⲩⲱϥⲧ ⲉϩⲟⲩⲛ ⲉⲣⲟϥ ⲛⲧϩⲓⲕⲱⲛ ⲙⲡⲙⲁⲣⲧⲩⲣⲟⲥ ϩⲛϩⲉⲛⲛⲱⲛⲉ ⲛⲁⲩⲁⲛ ⲉⲛⲓϭⲉ · ⲙⲛϣⲟⲙⲧ ⲛⲥⲧⲁⲩⲣⲟⲥ ⲛⲛⲟⲩⲃ · ⲙⲛϣⲟⲙⲧ ⲛⲥⲫⲣⲁⲅⲓⲥ ⲛϩⲁⲧ ·
…
72 ⲗⲟⲓⲡⲟⲛ ⲁⲩϫⲟⲕϥ ⲉⲃⲟⲗ ⲕⲁⲗⲟⲥ · ϩⲛⲟⲩⲛⲟϭ ⲛⲓⲡⲓⲕⲏⲥ · ⲁϥⲧⲁⲗⲟⲡⲉⲕϭⲗⲟϭ · ⲉϫⲛⲛⲉϥⲧⲃⲛⲟⲟⲩⲉ ⲛⲧⲉⲩϣⲏ · ⲙⲛⲧⲉϥⲥϩⲓⲙⲉ ⲙⲛⲧⲉϥϣⲉⲉⲣⲉ ⲉⲧϣⲱⲛⲉ · ⲙⲛⲛⲉϥϩⲙϩⲁⲗ ϣⲁⲛⲧⲟⲩⲉⲓ ⲉⲡⲧⲟⲡⲟⲥ ⲙⲡⲉⲧⲟⲩⲁⲁⲃ · ϩⲛϣⲟⲛⲧ ⲉⲛϩⲟⲟⲩ · ⲉⲡϣⲁ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉⲧⲉⲥⲟⲩϫⲟⲩⲧⲏ ⲛⲁⲑⲱⲣ ⲡⲉ ·
…
73 ⲛⲧⲉⲣⲟⲩⲛⲁⲩ ⲇⲉ · ⲉⲡⲉⲕϭⲗⲟϭ · ⲛϭⲓⲛⲉⲕⲗⲏⲣⲓⲕⲟⲥ · ⲁⲩⲑⲁⲃⲙⲁⲍⲉ ⲉⲙⲁⲧⲉ · ⲁⲩⲯⲁⲗⲗⲉ ϩⲓⲧϩⲏ ⲙⲙⲟϥ · ⲁⲩϫⲓⲧϥ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ·
…
74 ⲁⲩⲱ ⲁⲡⲁⲣⲭⲱⲛ · ⲙⲛⲧⲉϥⲥϩⲓⲙⲉ · ⲙⲛⲧⲉϥϣⲉⲉⲣⲉ · ⲁⲩⲃⲱⲕ ⲉϩⲟⲩⲛ ⲉⲡⲙⲁⲣⲧⲏⲣⲓⲟⲛ · ⲁⲩⲟⲩⲱϣⲧ ⲉϫⲙⲡⲥⲱⲙⲁ · ⲙⲡⲉⲧⲟⲩⲁⲁⲃ · ϩⲛⲟⲩⲛⲟϭ ⲛⲣⲁϣⲉ ·
…
75 ⲁⲩⲱ ⲡⲟⲓⲕⲟⲛⲟⲙⲟⲥ ⲁϥϫⲓⲧⲟⲩ ⲉⲩⲙⲁ ⲙⲁⲩⲁⲁⲩ · ⲁⲩⲁⲛⲁⲡⲉⲩⲉ….ⲡϩⲓⲥⲉ ⲛⲛⲉϩⲓⲟⲟⲩⲉ ·
…
76 ⲁⲩⲱ ⲉⲣⲉⲧⲉⲩϣⲉⲉⲣⲉ ϣⲟⲟⲡ ϩⲁⲃⲁⲥⲁⲛⲟⲥ · ⲉⲃⲟⲗ ϫⲉϥⲙⲟⲥⲧⲉ ⲛⲧⲉⲕⲕⲗⲏⲥⲓⲁ ⲡⲉ ⲡϣⲱⲛⲉ ⲉⲧⲙⲙⲁⲩ · ϫⲉⲟⲩϩⲓⲥⲱⲛ ⲛⲇⲁⲓⲙⲱⲛⲓⲟⲛ ⲡⲉ · ϩⲛⲧⲡⲏϣⲉ ⲛⲧⲟⲩϣⲏ ⲇⲉ ·
…
77 ⲉⲥⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥϩⲟⲕϥ ⲛⲧϩⲉ ⲛⲟⲩⲥⲧⲣⲁⲧⲏⲗⲁⲧⲏⲥ · ⲁϥⲃⲱⲕ ⲉⲧⲡⲟⲗⲓⲥ ⲙⲡⲁⲣⲭⲱⲛ · ⲁϥⲃⲱⲕ ⲉϩⲟⲩⲛ ⲉⲡⲏⲓ ⲙⲡϩⲉⲣϣⲓⲣⲉ · ⲛⲧⲟϥⲉⲓⲛⲉ ⲙⲡϣⲱⲛⲉ ⲉⲧϩⲟⲥⲉ · ⲉϫⲛⲧϣⲉⲉⲣⲉ ϣⲏⲙ ·
…
78 ⲁϥⲟⲩⲱⲛϩ ⲉⲣⲟϥ ϩⲛⲟⲩⲛⲟϭ ⲙⲫⲟⲃⲟⲥ · ⲉⲣⲉⲧⲉϥⲥⲏϥⲉ ⲧⲱⲕⲙ ⲛⲧⲟⲟⲧϥ · ⲁϥϩⲓⲟⲩⲉ ⲉϫⲱϥ · … ⲛⲧⲥⲏϥⲉ · ⲛϣⲟⲙⲛⲧ ⲛⲥⲟⲡ · ⲉϥϭⲱⲛⲧ ·
…
79 ⲁⲩⲱ ⲁϥⲟⲛⲕϥ ⲉϩⲣⲁⲓ ϩⲁⲡϩⲓⲛⲏⲃ · ⲁϥⲛⲁⲩ ⲉⲡⲉⲧⲟⲩⲁⲁⲃ · ⲉϥⲁϩⲉⲣⲁⲧϥ ϩⲓϫⲟϥ · ⲛϩⲟ ϩⲓϩⲟ · ⲁϥⲟⲛⲕϥ ϩⲓϫⲙⲡⲉϥⲙⲁ ⲛⲙⲕⲟⲧⲕ · ϫⲉⲉϥⲛⲁⲧⲱⲟⲩⲛ ⲛϥⲡⲱⲧ ·
…
80 ⲁϥϩⲉ ⲛⲧⲉⲩⲛⲟⲩ ⲉϫⲙⲡⲉϥϩⲟ ϩⲁⲛⲟⲩⲣⲏⲧⲉ ⲙⲡⲉⲧⲟⲩⲁⲃ · ⲁⲩⲱ ⲁϥϭⲱ ⲉϥⲙⲁⲥⲧⲓⲅⲟⲩ ⲙⲙⲟϥ ⲛⲟⲩⲛⲟϭ ⲛⲛⲁⲩ ϩⲛⲟⲩⲁⲡⲉⲓⲗⲏ ·
…
81 ⲁⲩⲱ ⲉϥϯⲡⲓ : ⲉⲛⲟⲩⲣⲏⲧⲉ ⲙⲡⲉⲧⲟⲩⲁⲁⲃ · ⲉϥϫⲱ ⲙⲙⲟⲥ · ϫⲉⲟⲩⲟⲉⲓ ⲛⲁⲓ ⲁⲛⲟⲕ ⲡⲉ ⲣⲉϥⲣⲛⲟⲃⲉ · ⲁⲩⲱ ⲉϥⲣⲓⲙⲉ · ϫⲉⲟⲩ ⲡⲉⲡⲛⲟⲃⲉ ⲛⲧⲟϥ ⲛⲧⲁⲓⲁⲁϥ ⲱ ⲡⲁϫⲟⲉⲓⲥ ·
…
82 ⲡⲉϫⲉⲡⲉⲧⲟⲩⲁⲃ ⲛⲁϥ · ϫⲉⲙⲉⲕⲥⲱⲧⲙ ⲉⲡⲉⲧⲥⲏϩ · ϫⲉⲛⲉⲕⲥⲁϩⲟⲩ ⲙⲡⲁⲣⲭⲱⲛ ⲙⲡⲉⲕⲗⲁⲟⲥ ⲟⲩⲇⲉ ⲛⲛⲉⲕⲛⲧⲟⲟⲧⲕ ⲉϫⲙⲡⲉⲭⲣⲓⲥⲧⲟⲥ ⲙⲡϫⲟⲉⲓⲥ ·
…
83 ⲡⲉϫⲁϥ ϫⲉⲉϥⲥⲏϩ ⲡⲁϫⲟⲉⲓⲥ · ⲁⲗⲗⲁ ⲙⲁⲧⲁⲙⲟⲓ ⲉⲡⲉⲕⲣⲁⲛ · ⲁⲩⲱ ⲛⲅⲧⲁⲙⲟⲓ ⲉⲡⲁⲛⲟⲃⲉ · ϫⲉⲉⲓⲙⲉⲧⲁⲛⲟⲓⲁ ϩⲁⲡⲁⲛⲟⲃⲉ · ϯⲥⲟⲟⲩⲛ ⲅⲁⲣ · ϫⲉⲟⲩⲛⲙⲉⲧⲁⲛⲟⲓⲁ ϣⲟⲟⲡ ·
…
84 ⲡⲉϫⲉⲡⲉⲧⲟⲩⲁⲁⲃ ⲛⲁϥ · ϫⲉⲁⲛⲟⲕ ⲡⲉ ⲙⲉⲣⲕⲟⲩⲣⲓⲟⲥ ⲡⲉⲧⲉⲓⲣⲉⲛⲓϭⲟⲙ ϩⲛⲧⲉⲓⲡⲟⲗⲓⲥ ⲕⲁⲓⲥⲁⲣⲓⲁ · ⲛⲧⲁⲓⲉⲓ ⲉⲡⲁⲧⲁⲥⲥⲉⲓ ⲙⲙⲟⲕ ⲙⲛⲡⲉⲕⲉⲙⲁⲅⲟⲥ · ⲡⲁⲓ ⲛⲧⲟϥ ϯ ⲙⲡⲉⲓⲛⲟϭ ⲛⲧⲕⲁⲥ ⲉϩⲟⲩⲛ ⲉⲡⲟⲩⲁ ϣⲉⲉⲣⲉ ⲛϩⲣⲙⲁⲡⲟⲗⲗⲱⲛ ⲛϯⲡⲟⲗⲓⲥ ϩⲛⲟⲩϫⲓⲛϭⲟⲛⲥ · ⲁⲗⲗⲁ ⲛϩⲟⲥⲟⲛ ⲁⲓϭⲓⲛⲉ ⲛⲧⲙⲉⲧⲁⲛⲟⲓⲁ ⲛϩⲏⲧⲕ · ϯⲛⲁⲡⲁⲧⲁⲥⲥⲉⲓ ⲙⲙⲟⲕ ⲁⲛ · ⲙⲡⲓⲥⲟⲡ · ⲁⲗⲗⲁ ⲉⲕϣⲁⲛⲧⲱⲟⲩⲛ ⲛϣⲟⲣⲡ ⲙⲡⲣⲁⲙⲉⲗⲉ · ⲁⲗⲗⲁ ⲃⲱⲕ ⲉⲣⲁⲧϥ ⲙⲡⲣⲱⲙⲉ ⲙⲙⲁⲅⲟⲥ · ⲡⲉⲓ ⲛⲧⲟϥ ⲉⲓⲣⲉ ⲙⲡⲛⲟⲃⲉ · ⲛⲧⲉⲧⲛⲉⲓ ⲉⲡⲁⲧⲟⲡⲟⲥ · ⲁⲩⲱ ⲡⲕⲣⲁϣⲉ ⲛⲁϫⲱⲕ ⲉⲃⲟⲗ ϩⲛϩⲱⲃ ⲛⲓⲙ ·
…
85 ⲡⲉϫⲉⲡⲣⲱⲙⲉ ⲛⲁϥ · ϫⲉϯⲛⲏⲩ ⲁⲛⲟⲕ ⲉⲓⲣⲁϣⲉ · ⲁⲗⲗⲁ ⲡⲁⲛⲧⲟⲥ ⲉⲧⲙⲡⲣⲱⲙⲉ ⲉⲧⲙⲙⲁⲩ ⲉⲓ ·
…
86 ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲟⲩⲱϣⲃ ⲡⲉϫⲁϥ ⲛⲁϥ · ϫⲉⲧⲟⲩϫⲟⲕ ⲛⲧⲉⲕ….ⲧⲣⲉⲡⲉⲧⲙⲙⲁⲩ ⲉⲓ ⲉϥⲥⲕⲉⲙⲁϯⲍⲉ ·
…
87 ⲧⲟⲧⲉ ⲁⲡⲉⲧⲟⲩⲁⲁⲃ ϩⲟⲡϥ ⲉⲣⲟϥ ·
…
88 ϣⲟⲣⲡ ⲇⲉ ⲛⲧⲉⲣϥϣⲱⲡⲉ · ⲁϥϯⲡⲉϥⲟⲩⲟⲓ ⲉⲡⲁⲉⲓⲱⲧ · ⲡⲉϫⲁϥ ⲛⲁϥ · ϫⲉⲡⲁⲉⲓⲱⲧ · ⲃⲟⲏⲑⲉⲓ ⲉⲣⲟⲓ · ϫⲉϯⲉⲡⲓⲑⲩⲙⲉⲓ ⲛⲃⲱⲕ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲧⲁϣⲗⲏⲗ ·
…
89 ⲁⲩⲱ ⲛⲓⲣⲉ ⲡϥⲉⲓⲱⲧ ⲑⲁⲗⲡⲉⲓ ⲙⲙⲟϥ ⲉⲙⲁⲧⲉ · ϫⲉⲙⲛⲧⲁⲁϥ ⲛⲥⲁⲃⲗⲗⲁϥ · ⲡⲉϫⲁϥ ϫⲉⲃⲱⲕ ⲡⲁϣⲏⲣⲉ ⲁⲗⲗⲁ ⲙⲡⲉⲕⲱⲥⲕ ⲉⲓ : ⲛⲅⲕⲱ ⲛⲁⲥⲥⲡⲗⲁⲅⲭⲛⲟⲛ ⲉⲩϫⲏϥ ⲙⲙⲟⲕ · ⲱ ⲡⲟⲩⲟⲉⲓⲛ ⲛⲛⲁⲃⲁⲗ · ⲁⲩⲱ ⲁϥϯ ⲛⲟⲩⲙⲏⲏϣⲉ ⲛⲁⲛϩⲟⲗⲟⲙⲁ · ⲁⲩⲱ ϣⲟⲙⲛⲧ ⲛϩⲙϩⲁⲗ ⲛϩⲟⲟⲩⲧ · ⲉⲧⲣⲉⲩⲙⲟⲟϣⲉ ⲛⲙⲙⲁϥ ·
…
90 ⲗⲟⲓⲡⲟⲛ ⲁϥϫⲱⲣⲙ ϩⲓϯϩⲓⲏ ϩⲛⲟⲩⲛⲟϭ ⲛϫⲱⲗⲕ ⲉⲃⲟⲗ · ⲉⲓ ⲉⲧⲡⲟⲗⲓⲥ ⲉⲧⲉⲣⲉⲡⲣⲱⲙⲉ ⲙⲙⲁⲅⲟⲥ ⲛϩⲏⲧⲥ ·
…
91 ⲡⲉϫⲁϥ ⲛⲁϥ · ϫⲉⲧⲱⲟⲩⲛ ⲙⲁⲣⲟⲛ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲧⲛϣⲗⲏⲗ ⲁⲩⲱ ϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲙⲟϥ ⲁϥϫⲟⲟⲩ ⲙⲙⲁⲅⲟⲥ ·
…
92 ⲁⲩⲱ ⲛⲧⲉⲣⲉⲡⲙⲁⲅⲟⲥ ⲥⲱⲧⲙ ⲉⲥⲡⲣⲱⲙⲉ ⲙⲛⲧⲉϥϣⲉⲉⲣⲉ ϩⲓⲡⲙⲁⲣⲧⲩⲣⲓⲟⲛ ⲙⲡⲉⲧⲟⲩⲁⲁⲃ · ⲁϥⲣϩⲟⲧⲉ · ⲡⲉϫⲉⲙⲁⲅⲟⲥ ϫⲉⲉϣⲁⲛϣⲱⲡⲉ ⲉⲧⲣⲁⲙⲟⲩⲧⲉ ⲧⲉⲛⲟⲩ ϯⲛⲏⲩ ⲁⲛ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲛⲉϥⲟⲩⲟⲛϩⲧ ⲉⲃⲟⲗ ⲛⲧⲉⲡⲉⲓⲱⲧ ⲛⲧϣⲉⲉⲣⲉ ϣⲏⲙ ϩⲱⲧⲃ ⲙⲙⲟⲓ · ⲉⲧⲃⲉⲧⲉϥϣⲉⲉⲣⲉ ·
…
93 ⲛⲧⲉⲩⲛⲟⲩ ⲁⲡϣⲏⲣⲉ ϣⲏⲙ ϫⲱⲣⲙ ϩⲛⲟⲩⲛⲟϭ ⲛϭⲟⲙ ϣⲁⲛⲧϥⲉⲓ ⲉⲡⲙⲁⲣⲧⲩⲣⲓⲟⲛ ⲙⲡⲉⲧⲟⲩⲁⲁⲃ · ϩⲛⲟⲩⲛⲟϭ ⲛϩⲟⲧⲉ · ⲁϥⲟⲩⲱϣⲧ ⲉϫⲙⲡⲥⲱⲙⲁ ⲙⲡⲉⲧⲟⲩⲁⲁⲃ · ⲁϥⲛⲁⲩ ⲉⲧϣⲉⲉⲣⲉ ϣⲏⲙ ⲉⲥⲡⲁϩⲧ ϩⲱⲥ ⲉϫⲙⲡⲥⲱⲙⲁ ⲙⲡⲉⲧⲟⲩⲁⲁⲃ · ⲙⲛⲡⲉⲥⲉⲓⲱⲧ ⲙⲛⲧⲉⲥⲙⲁⲁⲩ ⲉⲩⲡⲁⲣⲁⲕⲁⲗⲉⲓ ⲙⲙⲟϥ ⲉⲩⲃⲟⲏⲑⲉⲓ ⲛⲁⲥ ·
…
94 ⲁⲩⲱ ⲛⲉⲣⲉⲡⲉⲧⲟⲩⲁⲁⲃ ⲕⲱ ⲙⲙⲟⲥ ⲉⲩⲅⲓⲣⲟⲥ ⲉⲛⲁⲛⲟⲩϥ · ⲁⲡϣⲏⲣⲉ ϣⲏⲙ ⲙⲟⲩⲧⲉ ⲉⲡⲟⲓⲕⲟⲛⲟⲙⲟⲥ · ⲁϥϯ ⲛⲁϥ ⲙⲙⲏⲧ ⲛϩⲟⲗⲟⲕⲟϯⲛⲟⲥ ·
…
95 ⲁⲩⲱ ⲁⲡⲁⲣⲭⲱⲛ ⲉⲧⲉⲡⲉⲓⲱⲧ ⲛⲧϣⲉⲉⲣⲉ ϣⲏⲙ ⲡⲉ · ⲁϥϭⲱϣⲧ ….ⲁϥⲛⲁⲩ ⲉⲡϣⲏⲣⲉ ϣⲏⲙ · ⲁϥⲥⲟⲩⲱⲛϥ · ⲁϥⲙⲟⲟϣⲉ ⲉϩⲟⲩⲛ ⲉⲣⲟϥ · ⲛϥⲥⲟⲟⲩⲛ ⲁⲛ ⲗⲁⲩ ⲛϩⲱⲃ · ⲁϥⲁⲥⲡⲁⲍⲉ ⲙⲙⲟϥ · ⲁⲩⲱ ⲁϥϣⲓⲛⲉ ⲛⲥⲁⲡⲟⲩϫⲁⲓ ⲙⲡⲉϥⲏⲓ ⲉⲃⲟⲗ ϩⲓⲧⲟⲟⲧϥ ·
…
96 ⲛⲧⲉⲣⲟⲩϣⲗⲏⲗ ⲇⲉ ⲙⲡⲉⲥⲛⲁⲩ · ⲁϥⲡⲣⲟⲧⲣⲉⲡⲉ ⲙⲡϣⲏⲣⲉ ϣⲏⲙ · ⲁϥϫⲓⲧϥ ⲉⲡⲙⲁ ⲉⲧϥⲟⲩⲏϩ ⲛϩⲏⲧϥ ⲛⲧⲡⲉ · ⲁⲩⲟⲩⲱⲙ ⲁⲩⲥⲱ ⲙⲛⲛⲉⲩⲉⲣⲏⲩ · ⲁϥⲛⲁⲩ ⲉⲧϣⲉⲉⲣⲉ ϣⲏⲙ ⲁϥⲣⲁϣⲉ ⲉⲙⲁⲧⲉ ·
…
97 ⲁⲩⲱ ⲛⲉϥⲗⲩⲡⲉⲓ ⲉⲧⲃⲏⲏⲧⲥ · ϫⲉⲛⲉⲥⲃⲁⲥⲁⲛⲓⲍⲉ ⲁⲩⲱ ⲛⲉϥϣⲓⲡⲉ ϩⲏⲧⲥ ⲛⲛⲉⲥⲉⲓⲟⲧⲉ ϫⲉⲛⲧ…. ⲙⲡⲉⲥϣⲱⲛⲉ · ⲁⲩⲱ ⲟⲛ ⲉϥⲣϩⲟⲧⲉ ϫⲉⲛⲉⲡⲙⲁⲣⲧⲩⲣⲟⲥ ⲟⲩⲟⲛϩϥ ⲉⲃⲟⲗ · ϩⲁⲡⲗⲟⲥ ⲛⲓⲣⲉϩⲁϩ ⲛⲣⲟⲟⲩϣ ϩⲙⲡⲓϩⲏⲧ ⲙⲡϣⲏⲣⲉ ϣⲏⲙ ·
…
98 ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ · ⲁϥⲟⲩⲟⲛϩϥ ⲉⲃⲟⲗ ⲉⲡⲉⲓⲱⲧ ⲛⲧϣⲉⲉⲣⲉ ϣⲏⲙ · ⲁϥⲧⲱⲟⲩⲛ ⲙⲙⲟϥ ⲉϥⲛⲕⲟⲧⲕ · ⲁϥϫⲓⲧϥ ⲙⲡⲃⲟⲗ ⲙⲡⲙⲁ ⲛϥⲛⲕⲟⲧⲕ ⲛϩⲏⲧϥ · ⲁϥϫⲓⲛⲟⲩϥ ϫⲉϯⲧⲉⲕϣⲉⲉⲣⲉ ⲙⲡⲉϩⲣϣⲓⲣⲉ ⲉⲧϩⲁϩⲧⲏⲕ · ⲉϣⲱⲡⲉ ⲉⲕⲟⲩⲱϣ ⲧⲣⲁⲧⲁⲗϭⲟⲥ ⲛⲁⲕ · ⲁⲩⲱ ⲙⲉⲣϣⲓⲛⲉ ⲛⲥⲁⲡⲉⲧϩⲟⲟⲩ ⲉϩⲟⲩⲛ ⲉⲣⲟϥ ϫⲉⲛⲉⲕⲉϫⲣⲟⲡⲧⲁϩⲟⲥ ⲛϩⲟⲩⲟ ⲉⲡⲁⲓ ·
…
99 ⲁⲩⲱ ⲁϥⲧⲁⲙⲟϥ ϫⲉⲕⲉϣⲟⲙⲛⲧ ⲛⲉ · ϣⲁⲛⲧⲉⲡⲉϥⲉⲓⲱⲧ ⲙⲧⲟⲛ ⲙⲙⲟϥ · ϫⲉⲁϥϫⲱⲕ ⲉⲃⲟⲗ ⲛϭⲓⲡⲉϥⲁϩⲉ · ⲁⲩⲱ ⲙⲡⲉⲕⲁⲙⲉⲗⲉⲓ ⲉϫⲓ ⲛⲁϥ ⲛⲧⲉⲕϣⲉⲉⲣⲉ · ⲙⲛⲛⲥⲁⲡⲙⲟⲩ ⲙⲡⲉϥⲉⲓⲱⲧ · ⲁⲩⲱ ⲁϥⲧⲁⲙⲟϥ ⲉⲧϩⲉ ⲛⲧⲟϥⲙⲁⲅⲉⲩⲉ ⲛⲧⲉϥϣⲉⲉⲣⲉ · ϣⲁⲛⲧⲉⲥϣⲱⲛⲉ ⲉⲧⲃⲉⲡⲉϥⲟⲩⲱϣ ⲉⲃⲟⲗ ⲉϩⲟⲩⲛ ⲉⲣⲟⲥ · ⲁⲩⲱ ⲁϥⲧⲁⲙⲟϥ ⲟⲛ ⲉⲧⲧϩⲉ ⲛⲧⲟϥ ⲟⲩⲟⲛϩϥ ⲉⲃⲟⲗ ⲉⲡϣⲓⲣⲉ ⲛⲧϩⲉ ⲛⲧⲟϥ ⲁⲡⲉⲓⲗⲉ ⲉⲣⲟϥ ⲉⲧⲛⲧⲟⲟⲧϥ · ⲁⲩⲱ ⲉⲧⲃⲉϩⲱⲃ ⲛⲓⲙ ⲛⲧⲁⲩϣⲱⲡⲉ ⲙⲡϣⲏⲣⲉ ϣⲏⲙ · ϣⲁⲛⲧⲉϥⲉⲓ ⲉⲡⲙⲁⲣⲧⲩⲣⲓⲟⲛ ·
…
100 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥϩⲟⲡϥ ⲉⲣⲟϥ · ⲡⲁⲣⲭⲱⲛ ⲇⲉ ⲁϥⲛⲉϩⲥⲉ ⲉϩⲣⲁⲓ ϩⲙⲡϩⲟⲣⲟⲙⲁ · ⲁϥϣⲱⲗⲙ ⲉⲩⲛⲟϭ ⲛⲥϯⲛⲟⲩϥⲉ · ⲉϥⲥⲟⲧⲡ ·
…
101 ⲡⲉϫⲁϥ ϫⲉⲁⲗⲏⲑⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲛⲧⲟϥⲉⲓ · ⲁϥⲟⲩⲟⲛϩⲛϥ ⲉⲣⲟⲓ ·
…
102 ⲁⲩⲱ ⲁϥϭⲱ ⲉϥⲙⲉⲉⲩⲉ ⲉⲃⲟⲗ · ⲉⲡⲉⲛⲧⲁⲡϩⲣϣⲓⲣⲉ ⲉⲁⲁϥ ⲛⲧⲉϥϣⲉⲉⲣⲉ · ⲉⲧⲃⲉⲡⲉϥⲟⲩⲱϣ ⲉϩⲟⲩⲛ ⲉⲣⲟⲥ · ⲁϥϭⲱ ⲉϥⲙⲟⲕⲙⲉⲕ ⲙⲙⲟϥ ϫⲉⲁⲣⲁ ⲡⲟⲩⲱϣ ⲙⲡⲉⲧⲟⲩⲁⲁⲃ ⲡⲉ ⲉⲧⲣⲁϭⲟⲗⲡⲡⲙⲩⲥⲧⲏⲣⲓⲟⲛ ⲉⲃⲟⲗ ϫⲓⲛⲙⲙⲟⲛ ⲉⲓⲛⲁⲕⲁⲁϥ ⲉϥϩⲏⲡ ·
…
103 ϩⲟⲥⲟⲛ ⲉϥⲙⲉⲉⲩⲉ ⲉⲛⲁⲓ ⲁⲩⲥⲁⲗⲡⲓⲍⲉ · ⲉⲧⲣⲉⲟⲩⲟⲛ ⲛⲓⲙ ⲉⲧⲛⲕⲟⲧⲕ ⲧⲱⲟⲩⲛ · ⲛⲥⲉⲉⲓ ⲉⲧⲉⲕⲕⲗⲏⲥⲓⲁ · ⲛⲥⲉϩⲩⲙⲛⲉⲩⲉ ⲙⲛⲛⲉⲛⲑⲗⲟⲡⲟⲛⲟⲥ ϫⲉⲛⲉ ⲡⲛⲟϭ ⲛϣⲁ ⲙⲡⲉⲙⲡⲉⲧⲟⲩⲁⲁⲃ · ⲉⲧⲉⲥⲟⲩϫⲟⲩⲧⲏ ⲛⲁⲑⲱⲣ ⲡⲉ · ⲁⲩⲧⲱⲟⲩⲛ ⲛϭⲓⲙⲙⲏⲏϣⲉ · ⲉⲩⲗⲉⲕⲟⲩⲫⲟⲣⲉⲓ ϩⲛⲟⲩⲣⲁϣⲉ · ⲁⲩⲉⲓ ⲉⲧⲉⲕⲕⲗⲏⲥⲓⲁ ·
…
104 ⲁⲩϭⲱ ⲉⲩϩⲩⲙⲛⲉⲩⲉ ϣⲁⲛⲧⲉⲡⲟⲩⲟⲉⲓⲛ ⲥⲟⲣ ·
…
105 ⲁϥⲧⲱⲟⲩⲛ ϩⲱⲱϥ ⲛϭⲓⲡⲣⲱⲙⲉ · ⲁϥⲙⲟⲩⲧⲉ ⲉⲧⲉϥⲥϩⲓⲙⲉ ⲙⲛⲧⲉϥϣⲉⲉⲣⲉ · ⲁⲩⲉⲓ ⲉⲡⲧⲟⲡⲟⲥ · ⲉⲣⲉⲛⲉⲩϩⲩⲙϩⲁⲗ ⲟⲩⲏϩ ⲛⲥⲱⲟⲩ · ⲁⲩⲱ ⲡϩⲣϣⲓⲣⲉ ϩⲱⲱϥ ⲟⲛ ⲙⲛⲛⲉϥϩⲙϩⲁⲗ · ⲁⲩⲃⲱⲕ ⲁⲩⲟⲩⲱϣⲧ ⲉϫⲙⲡⲥⲱⲙⲁ ⲙⲡⲉⲧⲟⲩⲁⲁⲃ ·
…
106 ⲉⲩⲣⲁϣⲉ ⲁⲩⲱ ⲁⲡϩⲣϣⲓⲣⲉ ⲙⲟⲩϣⲧ ⲙⲡⲙⲁ ⲛⲙⲕⲟⲧⲕ · ⲉϥⲣϣⲡⲏⲣⲉ ⲙⲡⲉϥⲥⲁ · ⲁⲩⲱ ⲁϥϭⲓⲛⲉ ⲙⲡⲣⲱⲙⲉ ⲙⲙⲁⲅⲟⲥ · ⲉϥⲥⲟⲛϩ ⲉϩⲟⲩⲛ ⲉⲡⲉⲕϭⲗⲟϭ ⲙⲡⲙⲁⲣⲧⲩⲣⲟⲥ · ⲛⲧϩⲉ ⲛⲟⲩϩⲟⲣ ⲉϥⲕⲟ : ⲛⲣⲟϥ ·
…
107 ⲁⲩⲱ ⲛⲧⲉⲣⲉϥⲛⲁⲩ ⲡϩⲣϣⲓⲣⲉ · ⲁϥⲱϣ ⲉⲃⲟⲗ ϫⲉⲟⲩⲟⲉⲓ ⲛⲁⲓ ⲱ ⲡⲁϫⲟⲉⲓⲥ ⲛⲥⲟⲛ · ⲁⲙⲟⲩ ⲛⲅⲛⲁⲩ ⲉⲡⲁⲛⲟϭ ⲛⲑⲃⲃⲓⲟ ·
…
108 ⲡⲉϫⲉⲡϩⲣϣⲓⲣⲉ ⲛⲁϥ ϫⲉⲛⲧⲟⲕ ⲉⲓ ⲉⲧⲱⲛ ⲙⲡⲉⲓϩⲉ ⲙⲁ ·
…
109 ⲡⲉϫⲉⲡⲙⲁⲅⲟⲥ ⲛⲁϥ · ϫⲉⲱ ⲡⲁⲥⲟⲛ · ⲁⲥϣⲱⲡⲉ ⲛⲧⲉⲣⲉⲕⲃⲱⲕ ⲉⲃⲟⲗ ϩⲓⲧⲟⲟⲧ · ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲉⲓ ϣⲁⲣⲟⲓ · ⲁϥϯ ⲛⲟⲩⲭⲁⲙⲟⲥ ⲉⲉⲣⲟⲓ · ⲁϥⲉⲓⲛⲉ ⲙⲙⲟⲓ ⲁϥⲥⲟⲛϩ ⲙⲙⲟⲓ ⲉϩⲟⲩⲛ · ⲉⲡⲉⲓⲙⲁ ⲛⲙⲕⲟⲧⲕ · ⲉⲩϣⲓⲡⲉ ⲛⲁⲓ ·
…
110 ⲛⲧⲉⲩⲛⲟⲩ ⲁϥⲱϣ ⲉⲃⲟⲗ · ϫⲉⲃⲟⲏⲑⲉⲓ ⲉⲣⲟⲓ · ⲡⲁⲥⲟⲛ ⲙⲙⲉⲣⲓⲧ · ϫⲉⲛϩⲟⲥⲟⲛ ⲉⲓϣⲁϫⲉ ⲛⲙⲙⲁⲕ · ⲁⲡⲉⲧⲟⲩⲁⲁⲃ ϯ ⲛⲟⲩϣⲥⲛⲁⲁⲥ ⲉϩⲟⲩⲛ ϩⲛⲡⲁϩⲟ · ⲁⲓⲁⲥⲭⲩⲙⲟⲛⲉⲓ ⲉⲙⲁⲧⲉ ·
…
111 ⲡⲉϫⲁϥ ⲛⲁϥϫⲉⲟⲩⲙⲩⲥⲧⲏⲣⲓⲟⲛ ⲙⲡⲟⲩⲧⲁⲙⲟⲕ ⲉⲧⲃⲏⲏⲧϥ · ϫⲉⲟⲩⲟⲛϩϥ ⲉⲃⲟⲗ · ⲉⲧⲃⲉⲟⲩ ⲉⲕⲛⲁϣⲓⲛⲉ ⲛⲥⲟϥ ⲉⲟⲩⲟⲛϩϥⲉⲃⲟⲗ ·
…
112 ⲁⲩⲱ ⲛⲧⲉⲩⲛⲟⲩ · ⲉⲓⲥ ⲟⲩⲇⲁⲓⲙⲱⲛⲓⲟⲛ ⲁϥϥⲟϭⲉⲉϫⲙ ⲡⲣⲱⲙⲉ ⲙⲙⲁⲅⲟⲥ · ⲁϥⲃⲱⲗϥ ⲉⲃⲟⲗ · ⲁϥϩⲓⲧⲉ ⲙⲙⲟϥ ϩⲓϫⲙⲡⲕⲁϩ · ⲉϥⲱϣ ⲉⲃⲟⲗ · ϫⲉⲕⲁⲁⲧ ⲧⲁⲡⲁⲓⲇⲉⲩⲉ ⲙⲙⲟϥ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲧⲟⲩⲉϩⲥⲁϩⲛⲉ ⲛⲁⲓ · ϫⲉϩⲉⲛⲛⲟϭ ⲛⲉ ⲛⲉⲃⲗⲁⲥⲫⲩⲙⲓⲁ ⲛⲧⲟϥ ⲁⲁⲩ ⲉⲡⲛⲟⲩⲧⲉ ⲛⲧⲁϥⲧⲁⲙⲓⲟϥ ·
…
113 ⲁⲩⲱ ⲉⲥⲟⲩⲥϩⲓⲙⲉ ⲟⲛ ⲁⲩⲇⲓⲙⲱⲛⲓⲟⲛ ϩⲓⲧⲉ ϩⲁⲧⲙⲡⲥⲱⲙⲁ ⲙⲙⲡⲉⲧⲟⲩⲁⲃ ·
…
114 ⲁⲩⲱ ⲛⲧⲉⲣⲟⲩⲕⲁⲧⲥⲩⲛⲁⲝⲓⲥ ⲉⲃⲟⲗ · ⲁⲡⲙⲏⲏϣⲉ ⲧⲏⲣϥ ⲥⲱ ⲟⲩϩⲉ ⲛⲁⲩ ⲉⲧϩⲉ ⲛⲧⲁⲡⲉⲧⲟⲩⲁⲁⲃ ϩⲉⲃⲣⲓⲍⲉ ⲛⲛⲇⲓⲙⲱⲛⲓⲟⲛ ·
…
115 ⲁⲩⲱ ⲁⲡⲁⲣⲭⲱⲛ ⲉⲓ ϩⲱⲱϥ ⲟⲛ ⲁϥϩⲙⲟⲟⲥ ·
…
116 ⲁⲧⲉⲥϩⲓⲙⲉ ⲉⲧⲟ ⲛⲇⲓⲙⲱⲛⲓⲟⲛ ⲱϣ ⲉⲃⲟⲗ · ϫⲉⲱ ϩⲉⲣⲙⲁⲡⲟⲗⲗⲟⲛ · ⲙⲛ▨….ⲕⲁⲁⲩ ⲙⲡⲉⲧϩⲟⲟⲩ ⲙⲡⲉⲓⲣⲱⲙⲉ ⲙⲙⲁⲅⲟⲥ · ϫⲉⲛⲧⲟϥ ⲣϩⲓⲕⲉⲧⲉⲕϣⲉⲉⲣⲉ · ⲁⲩⲱ ⲟⲛ ϯⲧⲉⲕϣⲉⲉⲣⲉ ⲙⲡϩⲉⲣϣⲓⲣⲉ · ⲕⲁⲧⲁⲧϩⲉ ⲛⲧⲁⲩⲧⲁⲙⲟⲕ ϩⲙⲡϩⲟⲣⲟⲙⲁ · ϫⲉⲛⲛⲧⲉⲛⲟⲩⲉⲓⲏⲥⲟⲩⲥ ⲧⲉⲕⲁⲥⲁⲙⲁⲧⲉ ⲙⲡⲧⲁⲗϭⲟ · ⲁⲩⲱ ⲙⲡⲣⲁⲙⲉⲗⲉⲓ ⲉϫⲓϩⲟ ⲛⲛⲧⲉⲕϣⲉⲉⲣⲉ ⲙⲡϣⲏⲣⲉ ϣⲏⲙ · ϫⲉⲕⲟⲩϣⲟⲙⲛⲧ ⲛⲉⲃⲟⲧ ⲉⲧⲉⲟⲩⲛⲧⲁϥⲥⲟⲩ ⲙⲡⲉⲓⲱⲧ ⲙⲡϣⲏⲣⲉ ϣⲏⲙ · ⲁⲩⲱ ⲙⲛⲛⲥⲁⲛⲁⲓ ⲡⲉⲕϩⲏⲧ ⲛⲁⲙⲧⲟⲛ ·
…
117 ⲧⲉϥⲥϩⲓⲙⲉ ⲇⲉ ⲁⲡⲉⲥϩⲏⲧ ⲥⲱⲣⲙ ⲉⲃⲟⲗ · ⲉⲧⲃⲉⲛⲉⲧⲉⲥⲥⲱⲧⲙ ⲉⲣⲟⲟⲩ ⲁⲩⲱ ⲉⲓⲥ ⲛⲧⲉⲩⲛⲟⲩ ..ⲙⲁⲩ ⲁⲧⲉⲥϣⲉⲉⲣⲉ ⲗⲟ ⲉⲃⲟⲗ ϩⲛⲧⲃⲁⲥⲁⲛⲟⲥ ϩⲱⲥ ⲙⲡⲉⲥϣⲟⲛⲉ ⲉⲡⲧⲏⲣϥ ·
…
118 ⲁⲩⲱ ⲡⲉϫⲁⲥ ⲙⲡⲙⲁⲅⲟⲥ ⲛϭⲓⲧⲉⲥϩⲓⲙⲉ · ⲉⲧⲣⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϣⲁϫⲉ ⲛϩⲏⲧⲥ · ϫⲉϫⲓⲛⲛⲧⲉⲩⲛⲟⲩ ⲛⲛⲉⲕⲟⲩⲱϩ · ⲙⲛⲛⲣⲱⲙⲉ · ⲁⲗⲗⲁ ⲉⲕⲉⲡⲱⲧ : ⲛⲧⲟⲩⲉⲓⲏ ⲉⲕⲉϣⲱⲡⲉ ⲉⲕⲁⲁⲥⲕⲉⲓ ⲙⲁⲩⲁⲁⲕ · ϩⲛⲧⲩⲣⲏⲙⲟⲥ ϣⲁⲡⲉϩⲟⲟⲩ ⲙⲡⲉⲕⲙⲟⲩ ·
…
119 ⲁⲩⲱ ⲁϥⲉⲡⲓⲧⲓⲙⲁ ⲙⲡⲉⲡⲛⲉⲩⲙⲁ ⲉⲧⲛϩⲏⲧϥ ⲁϥⲛⲟϫϥ ⲉⲃⲟⲗ · ⲁⲧⲉϥϩⲟⲣⲁⲥⲓⲥ ⲥⲙⲓⲛⲉ ⲕⲁⲗⲱⲥ · ⲁⲩⲱ ⲁϥⲃⲱⲕ ⲉⲧⲉⲣⲏⲙⲟⲥ · ⲁϥⲁⲛⲁⲭⲱⲣⲉⲓ ϣⲁⲡⲉϩⲟⲟⲩ ⲙⲡⲉϥⲙⲟⲩ ·
…
120 ⲛⲧⲉⲣⲉⲡⲉϩⲟⲟⲩ ⲙⲡϣⲁ ⲟⲩⲉⲓⲛⲉ ⲁϩⲉⲣⲙⲁⲡⲟⲗⲗⲱⲛ ⲁϥⲁⲗⲉ ⲛⲉϥⲧⲃⲛⲟⲟⲩⲉ · ⲙⲛⲧⲉϥⲥϩⲓⲙⲉ · ⲙⲛⲧⲉϥϣⲉⲉⲣⲉ · ⲙⲛⲛⲉϥϩⲙϩⲁⲗ · ⲁⲩⲱ ⲡϩⲣϣⲓⲣⲉ ⲙⲛⲛⲉϥϩⲙϩⲁⲗ · ⲁⲩⲉⲓ ⲉⲧⲉⲩⲡⲟⲗⲓⲥ ·
…
121 ⲁⲩⲱ ⲁⲡⲁⲣⲭⲱⲛ ⲡⲁⲣⲁⲅⲅⲉⲗⲉⲓ ⲛⲧⲉϥⲥϩⲓⲙⲉ · ⲛϩⲱⲃ ⲛⲓⲙ ⲛⲧⲁⲡⲉⲧⲟⲩⲁⲁⲃ ϫⲟⲟⲩ ⲛⲁϥ · ϩⲙⲡϩⲟⲣⲟⲙⲁ ·
…
122 ⲛⲧⲉⲣⲉⲧⲉϥⲥϩⲓⲙⲉ ⲉⲓⲙⲉ ϫⲉⲕⲁⲧⲁⲧϩⲉ ⲛⲧⲁⲡⲁⲣⲭⲱⲛ ϫⲱ ⲉⲣⲟⲥ ⲙⲡϩⲟⲣⲟⲙⲁ · ϯ ⲟⲛ ⲧⲉ ⲧϩⲉ ⲛⲧⲁⲡⲡⲉⲧⲟⲩⲁⲁⲃ ϫⲟⲟⲥ · ϩⲛⲧⲁⲡⲣⲟ ⲛⲧⲉⲥϩⲓⲙⲉ · ⲉⲧⲟ ⲛⲇⲁⲓⲙⲟⲛⲓⲟⲛ ·
…
123 ⲛⲧⲉⲣⲉⲡⲗⲁⲟⲥ ⲇⲉ ⲥⲱⲧⲙ ⲁⲩⲟⲩⲛⲟϭ ⲛⲧⲱⲧ ⲛϩⲏⲧ ϣⲱⲡⲉ ϩⲛⲧⲉⲩⲙⲏⲏⲧⲉ ⲁⲩⲧⲛⲛⲟⲟⲩ ⲁⲩ…. ⲁⲩⲱ ⲙⲁⲩⲥⲱ ⲛⲙⲛⲁϥ
…
124 ⲁⲩⲧⲁⲙⲟϥ ϫⲉϥⲓⲡⲕⲣⲟⲟⲩϣ ⲛⲧⲛⲉⲓⲣⲉ ⲛⲧϣⲉⲗⲉⲉⲧ ⲕⲁⲧⲁⲧϩⲉ ⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲥ ⲛⲁⲛ ·
…
125 ⲁⲩⲱ ⲛⲧⲉⲣⲉϥⲥⲱⲧⲙ ⲉⲛⲁⲓ · ⲛϭⲓⲡϩⲉⲣϣⲓⲣⲉ ⲁϥⲣⲁϣⲉ ⲉⲙⲁⲧⲉ · ⲁⲩⲱ ⲛⲧⲉⲣⲉⲡⲇⲉⲓⲡⲛⲟⲛ ϫⲱⲕ ⲉⲃⲟⲗ ⲁⲡϩⲣϣⲓⲣⲉ ⲃⲱⲕ ⲉⲡⲉϥⲏⲓ · ⲁϥϫⲱ ⲛϩⲟⲃ ⲛⲓⲙ ⲉⲡⲉϥⲉⲓⲱⲧ · ⲁⲩⲱ ⲁⲡⲉϥⲉⲓⲱⲧ ⲣⲁϣⲉ ⲉⲡⲉϩⲟⲩⲟ ·
…
126 ϣⲟⲣⲡ ⲇⲉ ⲛⲧⲉⲣⲉϥϣⲱⲡⲉ · ⲁⲡⲉⲓⲱⲧ ⲙⲡϩⲣϣⲓⲣⲉ ⲥⲱⲟⲩϩ · ⲛⲛⲟϭ ⲧⲏⲣⲟⲩ ⲛⲧⲡⲟⲗⲓⲥ ⲙⲡⲗⲟⲩⲥⲓⲟⲥ · ⲁⲩⲉⲓ ⲉⲣⲙⲡⲏⲓ ⲛⲡⲕⲩⲣⲓⲥ ϩⲉⲣⲙⲁⲡⲟⲗⲗⲟⲛ · ⲁⲩⲱ ⲁⲩϣⲁϫⲉ ⲛⲙⲙⲁϥ ⲉⲧⲃⲉⲧⲉϥϣⲉⲉⲣⲉ ·
…
127 ⲁⲩⲱ ⲁⲩⲧⲱⲧⲉ ⲛⲉⲩⲉⲣⲏⲩ ⲁⲩⲱ ⲁⲩϯ ⲛⲁⲥ ⲛⲟⲩⲙⲏⲏϣⲉ ⲛⲟⲩⲃ ϩⲓϩⲁⲧ · ⲁⲩⲱ ⲟⲩⲁϣⲓ ⲛⲕⲟⲥⲙⲏⲥⲓⲥ · ⲁⲩⲱ ϩⲉⲛϩⲙϩⲁⲗ ⲛϩⲟⲟⲩⲧ · ⲙⲛϩⲉⲛϩⲙϩⲁⲗ ⲛⲥϩⲓⲙⲉ · ⲙⲛϩⲉⲛ : ⲟⲩⲁⲗ ⲛⲣⲉϥⲡⲗⲉⲁ : ϩⲛⲑⲁⲗⲗⲁⲥⲥⲁ
…
128 ⲁⲩⲱ ⲁⲩⲉⲓⲛⲉ ⲛϩⲉⲛⲇⲩⲙⲱⲧⲏⲥ · ⲙⲛϩⲉⲛⲃⲟⲩⲛⲁⲧⲱⲣ · ⲙⲛϩⲉⲛⲛⲟⲣⲕⲟⲛⲓⲥⲧⲏⲥ · ⲁⲩⲱ ⲛϩⲉⲛⲙⲓⲙⲁⲣⲓⲟⲛ · ⲙⲛϩⲉⲛϣⲟⲉⲓϫ · ⲙⲛϩⲉⲛⲕⲓⲛⲏⲕⲟⲛ · ⲁⲩⲉⲓⲣⲉ ⲛⲧϣⲉⲗⲉⲧ ϩⲛⲟⲩⲛⲟϭ ⲙⲙⲛⲧⲗⲁⲙⲡⲣⲟⲥ ·
…
129 ⲁⲩⲱ ⲙⲛⲛⲥⲁⲕⲉϩⲉⲃⲇⲟⲙⲁⲥ · ⲁⲩⲧⲱϩⲙ ⲛⲟⲩⲙⲏⲏϣⲉ : ⲙⲡⲗⲟⲩⲥⲓⲟⲥ · ⲙⲛⲟⲩⲙⲏⲏϣⲉ ⲛⲁⲣⲭⲱⲛ · ⲁⲩⲉⲓⲣⲉ ⲛⲧϣⲉⲗⲉⲉⲧ ϩⲛⲟⲩⲛⲟϭ ⲙⲙⲛⲧⲉⲡⲓⲅⲏⲥ · ⲁⲩⲱ ⲁⲩⲣⲁϣⲉ ⲉⲙⲁⲧⲉ ·
…
130 ⲁⲩⲱ ⲙⲡϩⲟⲩⲛ ⲛϣⲟⲙⲧ ⲛⲉⲃⲟⲧ · ⲙⲛⲛⲥⲁⲧϣⲉⲗⲉⲉⲧ · ⲁϥⲙⲟⲩ ⲛϭⲓⲡⲉⲓⲱⲧ ⲙⲡϣⲏⲣⲉ ϣⲏⲙ · ϩⲛⲟⲩⲙⲛⲧϩⲗⲗⲟ ⲉⲥⲕⲟⲩⲱ ·
…
131 ⲁⲩⲱ ⲛⲧⲉⲣⲉⲛⲉⲓϩⲟⲟⲩ ⲙⲡⲉϥϩⲏⲃⲉ ϫⲱⲕ ⲉⲃⲟⲗ · ⲁⲡϩⲣϣⲓⲣⲉ ϫⲓ ⲙⲡⲉϥⲛⲟⲩⲃ · ⲙⲛⲡⲉϥϩⲏⲧ · ⲙⲛⲡⲉϥⲁⲡⲟⲥⲕⲉⲩⲉ ⲧⲏⲣⲥ · ⲁⲩⲱ ⲛⲉϥϩⲙϩⲁⲗ · ⲁϥⲛⲧⲟⲩ ⲉⲡⲏⲓ ⲙⲡⲉϥϣⲟⲙ · ⲁⲩϭⲱ ⲙⲛⲛⲉⲩⲉⲣⲏⲩ ϣⲁⲡⲉϩⲟⲟⲩ ⲙⲡⲉⲩⲙⲟⲩ ·
…
132 ⲁⲩⲱ ⲉⲩⲛⲏⲩ ⲕⲁⲧⲁⲣⲟⲙⲡⲉ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϩⲙⲡⲉϥϣⲁ ⲉⲧⲟⲩⲁⲁⲃ · ⲉⲩϣⲗⲏⲗ ⲉⲩⲉⲩⲭⲁⲣⲓⲥⲧⲟⲩ ⲙⲡⲛⲟⲩⲧⲉ ⲡⲁⲛⲉⲛⲟϭ ⲛϭⲟⲙ ·
…
133 ⲁⲧⲉⲧⲛⲛⲁⲩ ⲁⲩⲱ ⲛⲁⲙⲉⲣⲁⲧⲉ · ⲉⲛⲉⲓⲛⲟϭ ⲛϩⲙⲟⲧ ⲉⲧⲉⲣⲉⲡⲛⲟⲩⲧⲉ ⲉⲓⲣⲉ ⲙⲙⲟⲟⲩ · ⲙⲛⲛⲉϥⲥⲟⲧⲡ ⲕⲁⲧⲁⲅⲉⲣⲟⲥ · ϯⲟⲩⲱϣ ⲙⲛⲱ ⲡⲗⲁⲟⲥ ⲙⲙⲁⲓⲛⲟⲩⲧⲉ ⲉϫⲓ ϩⲉⲛⲕⲟⲩⲓ ⲉⲣⲱⲧⲛ ·
…
134 ⲁⲗⲗⲁ ϯⲥⲟⲟⲩⲛ ϫⲉⲙⲛϭⲟⲙ : ⲛⲗⲁⲁⲩ ⲉϭⲙⲡϫⲱⲕ ⲛⲛϭⲟⲙ ⲛⲛⲉⲧⲟⲩⲁⲁⲃ : ⲙⲁⲗⲓⲥⲧⲁ ⲡⲙⲁⲣⲧⲩⲣⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
135 ⲁⲩⲱ ⲟⲛ ϫⲉⲛⲁⲛⲟⲩⲡϣⲓ ϩⲛϩⲱⲃ ⲛⲓⲙ · ⲱ ⲛⲁⲓⲧⲟⲩ ⲛⲛⲟⲩⲟⲛ ⲛⲓⲙ ⲉⲧⲱϣ
…