1 ⲧⲙⲁⲣⲧⲩⲣⲓⲁ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲡⲉⲥⲧⲣⲁⲧⲏⲗⲁⲧⲏⲥ · ⲛⲧⲟϥϫⲱⲕ ⲉⲃⲟⲗ ⲙⲡⲉϥⲁⲅⲱⲛ · ⲉⲧⲁⲓⲏⲩ ⲛⲥⲟⲩϫⲟⲩⲧⲏ ⲙⲡⲉⲓⲉⲃⲟⲧ ⲁⲑⲱⲣ · ϩⲛⲟⲩⲉⲣⲏⲛⲏ ⲛⲧⲉⲡⲛⲟⲩⲧⲉ · ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ · ⲉⲩⲉϣⲱⲡⲉ ⲛⲙⲙⲁⲛ ϩⲁⲙⲏⲛ ·
…
2 ⲁⲥϣⲱⲡⲉ ⲇⲉ · ϩⲛⲧⲙⲉϩⲙⲛⲧⲥⲛⲟⲟⲩⲥ ⲛⲣⲟⲙⲡⲉ ⲛⲇⲉⲕⲓⲟⲥ ⲡⲣⲣⲟ · ⲟⲩⲁⲗⲗⲏⲣⲓⲁⲛⲟⲥ · ⲙⲛⲙⲁⲝⲓⲙⲓⲁⲛⲟⲥ · ⲉϥⲟ ⲛⲕⲁⲓⲥⲁⲣ · ⲁⲩⲱ ⲛⲁⲩⲧⲱⲕⲣⲁⲧⲱⲣ · ⲁϥⲛⲉϩⲥⲉ ⲛⲟⲩⲇⲓⲱⲕⲙⲟⲥ ⲉ ⲧⲏⲣⲟⲩ · ⲙⲛⲟⲩⲟⲛ ⲛⲓⲙ ⲉⲧϩⲟⲙⲟⲗⲟⲅⲉⲓ ⲙⲡⲉⲭⲣⲓⲥⲧⲟⲥ ·
…
3 ⲁϥⲧⲱϭⲉ ⲉⲃⲟⲗ ⲛⲟⲩⲇⲓⲁⲧⲁⲅⲙⲁ ⲕⲁⲧⲁⲡⲟⲗⲓⲥ · ⲁⲩⲱ ⲕⲁⲧⲁⲭⲱⲣⲁ · ⲁⲩⲱ ⲕⲁⲧⲁⲉⲡⲁⲣⲭⲓⲁ · ⲉⲧⲣⲉⲅⲉⲛⲟⲥ ⲛⲓⲙ ⲛⲣⲱⲙⲉ ϩⲓⲗⲩ..ⲉϥⲉⲑⲩⲥⲓⲁⲍⲉ . ⲛⲛⲟⲩⲧⲉ …. … ⲏ ⲁⲩϣⲱⲡⲉ ϩⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ⲙⲡⲉⲓⲟⲩⲟⲉⲓϣ ⲉⲧⲙⲙⲁⲩ ·
…
4 ⲛⲁⲓ ⲛⲉ ⲉⲧⲥⲏϩ ⲉⲡⲉⲓⲡⲣⲟⲥⲧⲁⲅⲙⲁ · ⲇⲉⲕⲓⲟⲥ ⲟⲩⲁⲗⲉⲣⲓⲁⲛⲟⲥ ⲙⲁⲝⲉⲛⲧⲓⲟⲥ ⲡⲛⲟϭ ⲛⲣⲣⲟ ⲛⲁⲩⲧⲱⲕⲣⲁⲧⲱⲣ · ⲉⲧⲁⲙⲁϩⲧⲉ ⲉϫⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ⲛⲥϩⲁⲓ ⲉⲃⲟⲗ ϩⲛⲧⲟⲓⲕⲟⲩⲙⲉⲛⲏ · ⲙⲛⲛⲉⲭⲱⲣⲁ · ⲙⲛⲛⲉⲡⲁⲣⲭⲓⲁ · ⲉⲧϣⲱⲡⲉ ⲛⲁⲙⲁϩⲧⲉ ….. ⲇⲉ ⲁⲛⲟⲡϥ … ⲛⲁⲅⲕⲁⲓ…ⲟⲛ ϯ….ⲃⲓⲕⲧⲱⲣⲓⲁⲧⲁ..ⲛⲛⲟⲩⲧⲉ ⲉⲧⲧⲁⲓⲏⲟⲩⲟⲩⲟⲛϩⲟⲩ ⲉⲣⲟⲛ · ⲛⲧϩⲉ ⲉⲧⲟⲩⲣⲟⲟⲩϣ ϩⲁⲣⲟⲛ ϩⲓⲧⲛⲧⲉⲩⲡⲣⲟϩⲉⲣⲉⲥⲓⲥ ⲉⲧⲛⲁⲛⲟⲩⲥ · ⲙⲁⲗⲓⲥⲧⲁ ⲧⲛⲟϭ ⲛⲃⲓⲕⲧⲱⲣⲓⲁ ⲙⲡⲉⲓϫⲣⲟ · ⲉⲧⲟⲩϯ ⲙⲙⲟⲥ ⲛⲁⲛ ϩⲙⲡⲡⲟⲗⲉⲙⲟⲥ · ⲉⲩⲛⲟⲩϩⲙ ⲙⲙⲟⲛ ⲛⲧⲟⲟⲧⲟⲩ ⲛⲉⲛϫⲁϫⲉ · ⲉⲧⲧⲱⲟⲩⲛ ⲉϫⲱⲛ ⲕⲁⲧⲁⲕⲁⲓⲣⲟⲥ ⲉⲧⲣⲉⲡⲁⲙⲁϩⲧⲉ ⲛⲛⲉϩⲣⲱⲙⲁⲓⲟⲥ ϫⲓⲉⲉⲟⲟⲩ · ϩⲙⲙⲁ ⲛⲓⲙ · ⲉⲣⲉⲛⲃⲁⲣⲃⲁⲣⲟⲥ ϩⲩⲡⲟⲧⲁⲥⲥⲉ ⲛⲁⲛ ⲁⲛⲟ….
…
5 […]
…
6 ⲛⲁⲡⲁⲓⲇⲉⲩⲉ ⲙⲙⲟⲕ ·
…
7 ⲛⲧⲉⲩⲛⲟⲩ ⲁϥⲉⲓ · ϫⲉⲉϥⲛⲁϥⲟϭϥ ⲉⲃⲟⲗ · ϩⲓϫⲛⲡⲧⲃⲛⲏ · ϫⲉⲉϥⲛⲁϩⲓⲟⲩⲉ ⲉⲡⲣⲱⲙⲉ · ⲛⲁⲣⲕⲁⲧⲏⲥ ⲛϩⲏⲕⲉ ·
…
8 ⲁⲩⲱ ⲛⲧⲉⲩⲛⲟⲩ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲕⲓⲙ ⲙⲙⲟϥ · ⲛϩⲟⲩⲛ ⲛⲧⲕⲁⲓⲥⲉ · ⲁⲧⲙⲟⲩⲗⲉⲥ · ⲉⲧϥⲧⲁⲗⲏⲩ ⲉⲣⲟⲥ · ⲃⲱⲕ ⲥⲁⲡⲁϩⲟⲩ : ⲁⲧⲉϥⲟⲩⲉⲣⲏⲧⲉ ⲛⲟⲩⲱⲧ ⲉϣⲉ ⲉϩⲣⲁⲓ ϩⲛⲧⲥⲗⲗⲉ ⲙⲡⲉⲧⲙⲟⲩⲗⲓⲥ ⲗⲟ ⲉⲥⲡⲏⲧ : ⲛⲙⲙⲁϥ ⲉϥⲁϣⲉ ⲛⲥⲁ……ⲉⲧ …… ⲛⲃⲗⲗⲉ
…
9 ⲁⲧⲙⲟⲩⲗⲉⲥ · ϫⲓ ⲛⲟⲩⲥⲙⲏ ⲛⲣⲱⲙⲉ · ⲁⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ · ϫⲉⲱ ⲣⲱⲙⲉ ⲉⲧⲥⲱⲣⲙ · ⲁⲩⲱ ⲛϩⲗⲗⲏⲛ · ⲛⲁⲓ ⲛⲧⲁⲡⲉⲟⲩⲱϭⲡ ⲙⲡⲉⲩⲛⲟⲩⲧⲉ ⲛⲧⲉⲩϣ. · ⲁⲙⲏⲓⲧⲉⲛ ⲉⲃⲟⲗ · ⲛⲧⲉⲧⲛⲛⲁⲩ ⲉⲡⲙⲁⲣⲧⲩⲣⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲛⲇⲏⲙⲣⲓⲁⲙⲡⲉⲧⲛϣⲏⲣⲉ · ⲛⲧⲉⲧⲛⲡⲓⲥⲧⲉⲩⲉ ⲉⲓⲥ ⲡⲉⲭⲣⲓⲥⲧⲟⲥ · ⲡⲛⲟⲩⲧⲉ ⲛⲧⲡⲉ ⲙⲛⲡⲕⲁϩ ·
…
10 ⲁⲩⲱ ⲟⲛ ⲁⲧⲙⲟⲩⲗⲉⲥ ⲡⲱⲧ ⲛⲙⲙⲁϥ ⲁⲩⲱ ⲙⲡ… ⲉⲥⲕⲱⲧ …..
…
11 ⲱⲟⲩⲏⲣ ⲱ ⲧⲉϣϣⲡⲏⲣⲉ ⲙⲛⲧⲉⲑⲉⲱⲣⲓⲁ ⲛⲧⲁⲥϣⲱⲡⲉ ⲙⲡⲉϩⲟⲟⲩ ⲉⲧⲙⲙⲁⲩ ·
…
12 ⲙⲡⲉⲟⲩⲣⲱⲙⲉ ⲛⲟⲩⲱⲧ ϭⲱϩ ⲛⲧⲡⲟⲗⲓⲥ ⲧⲏⲣⲥ · ⲉⲓⲧⲉ .ⲡ · ⲉⲓⲧⲉ ⲛⲟϭ · . ⲛⲧⲟⲩⲉⲓ ⲉⲣⲁⲧϥ · ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ : ϩⲱⲥⲧⲉ ⲉⲩϩⲣⲁ : ⲛⲥⲱⲟⲩ ϩⲓⲧⲛⲟⲩⲉⲝⲟⲩⲥⲓⲁ ·
…
13 ⲡⲣⲱⲙⲉ ⲇⲉ ϩⲱⲱϥ · ⲙⲛⲧⲉϥⲥϩⲓⲙⲉ · ⲙⲛⲛⲉϥϣⲏⲣⲉ ⲛⲉⲩⲡⲏⲧ : ⲛⲥⲁⲡⲙⲟⲩⲗⲉⲥ · ⲁⲩϣⲧⲟⲣⲧⲣ
…
14 ⲛⲙⲙⲁϥ ·
…
15 ⲁⲥϫⲓ ⲙⲡⲁⲧⲟⲩⲱⲧ ⲛⲛⲟⲩⲃ ⲉⲧⲉⲥϣⲙϣⲉ ⲛⲁϥ · ⲉϥⲟ ⲛⲡⲏϣⲉⲡ ϣⲉ ⲉⲓ ⲉⲃⲟⲗ · ϩⲛⲧⲙⲏⲧⲉ ⲛⲧⲡⲟⲗⲓⲥ · ⲉⲣⲉⲟⲩⲟⲛ ⲛⲓⲙ ⲑⲉⲱⲣⲉ ⲙⲙⲟⲥ · ⲙⲡⲉⲥⲉⲇⲱⲗⲟⲛ ·
…
16 ⲉⲣⲉⲧⲉⲥϣⲉⲉⲣⲉ ϫⲓⲙⲟⲉⲓⲧ ⲛⲁⲥ · ⲛⲧϩⲉ ⲛⲛⲉⲧϣⲓⲧ ⲉⲥⲱϣ ⲉⲃⲟⲗ · ϫⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁⲛⲁⲩ ⲉⲡⲁⲑⲃⲃⲓⲟ · ⲙⲛⲡⲁⲛⲟϭ ϣⲓⲡⲉ · ⲙⲛⲡϣⲓⲡⲉ ⲙⲡⲁⲧⲟⲩⲱⲧ · ⲛⲅⲛⲁ ⲛⲁⲓ ·
…
17 ⲛⲧⲉⲣⲉⲥⲉⲓ ⲇⲉ ⲉⲃⲟⲗ · ⲁⲧⲉⲥϣⲉⲉⲣⲉ ⲧⲁⲙⲟⲥ · ϫⲉ….ⲁⲅⲓⲟⲉ… ⲛⲧⲕⲁⲓⲥⲉ · ⲁⲥⲱϣ ⲉⲃⲟⲗ · ϫⲉⲡⲙⲁⲣⲧⲩⲣⲟⲥ ⲛⲧⲁϥϫⲓ ⲙⲡⲉϭⲗⲟ · ⲙⲡⲣⲣⲟ ⲡⲉⲭⲣⲓⲥⲧⲟⲥ · ⲕⲱ ⲛⲁⲓ ⲉⲃⲟⲗ ⲛⲧⲁⲡⲓⲥⲧⲉⲩ ⲉⲣⲟⲕ · ⲙⲛⲡⲉⲕⲛⲟⲩⲧⲉ · ⲡⲁⲓ ⲉⲧⲉⲉⲙⲡϣⲁ ⲁⲛ · ⲛⲧⲁⲩⲟⲡⲉϥⲣⲁⲛ ⲉⲃⲟⲗ ϩⲛⲣⲟ ⲉⲧϫⲁϩⲙ ·
…
18 ⲛⲧⲉⲩⲛⲟⲩ ⲁⲩⲗⲉⲩⲕⲟ ⲙⲙⲟⲟⲩ · ϣⲟⲩⲟ ⲉⲡⲉⲥⲏⲧ ϩⲛⲛⲉⲥⲃⲁⲗ · ϩⲱⲥ ⲉⲥⲣⲓⲙⲉ · ⲁⲥⲛⲁⲩ ⲉⲃⲟⲗ · ⲛⲧⲉⲩⲛⲟⲩ ⲁⲩⲱ ⲁⲧⲉⲥϩⲟⲣⲁⲥⲓⲥ ⲥⲙⲓⲛⲉ · ⲛⲧϩⲉ ⲛϣⲟⲣⲡ ·
…
19 ⲙⲛⲛⲥⲱⲥ ⲁⲥϭⲱⲡ ⲛⲙⲡⲏϣⲉⲡⲏϣⲉ ⲙⲡⲉⲧⲟⲩⲱⲧ · ⲁⲥⲟⲩⲟϭⲡⲟϥ ⲉϫⲛⲛⲉⲩⲉⲣⲏⲩ · ⲁⲥⲱϣ ⲉⲃⲟⲗ · ϫⲉⲁⲡⲁⲡⲟⲗⲗⲱⲛ · ϫⲓϣⲓⲡⲉ · ⲁⲡⲉⲭⲣⲓⲥⲧⲟⲥ ϫⲓⲧⲁⲉⲓⲟ ⲙⲛⲡⲉϥⲙⲁⲣⲧⲩⲣⲟⲥ ·
…
20 ⲛⲉⲥⲉⲓⲟⲧⲉ ⲇⲉ ⲛⲧⲉⲣⲟⲩⲛⲁⲩ ⲉⲡⲧⲁⲗϭⲟ ⲛⲧⲁϥϣⲱⲡⲉ · ⲛⲧⲉⲩϣⲉ · ⲉⲣⲉⲁⲩⲱϣ ⲉⲃⲟⲗ · ϫⲉⲁⲛⲟⲛ ⲭⲣⲓⲥⲧⲓⲁⲛⲟⲥ ⲉⲓⲛⲏ ⲡⲉ ⲡⲛⲟⲩⲧⲉ ⲛⲧⲡⲉ · ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲟⲟⲩ ⲛⲁϥ · ϣⲁⲛⲉϩⲉⲛⲉϩ ϩⲁⲙⲏⲛ ·
…
21 ⲧⲙⲉϩϣⲟⲙⲛⲧ ⲛϭⲟⲙ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
22 ⲁⲥϣⲱⲡⲉ ⲇⲉ · ⲙⲛⲛⲥⲁⲛⲁⲓ ⲁⲡⲗⲁⲟⲥ ⲛⲛⲉⲭⲣⲓⲥⲧⲓⲁⲛⲟⲥ · ϣⲁϫⲉ ⲙⲛⲛⲉⲩⲉⲣⲏⲩ · ϫⲉⲙⲁⲣⲉⲛϫⲓ ⲙⲡⲥⲱⲙⲁ ⲙⲡⲙⲁⲣⲧⲩⲣⲟⲥ · ⲉϩⲟⲩⲛ ⲉⲧⲉⲡⲟⲗⲓⲥ · ⲁϩⲉⲛⲕⲟⲟⲩⲉ ⲟⲩⲱϣⲃ · ϫⲉⲁⲣⲏⲩ ⲉⲡϩⲏⲧ · ⲙⲡⲇⲓⲕⲁⲓⲟⲥ ⲡⲉⲓⲑⲉ ⲁⲛ ·
…
23 ⲙⲛⲛⲥⲁⲛⲁⲓ · ⲁⲩⲁⲣⲭⲉⲓ ⲙⲙⲓϣⲉ ⲙⲛⲛⲉⲩⲉⲣⲏⲩ · ⲁⲩⲱ ⲛⲧⲉⲩⲛⲟⲩ · ⲁⲇⲓⲕⲁⲓⲟⲥ ⲕⲓⲙ ⲙⲙⲟϥ ⲙⲁⲩⲁⲁϥ · ⲁϥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ·
…
24 ⲁⲩⲱ ⲁⲧⲙⲟⲩⲗⲗⲉⲥ ⲱϣ ⲉⲃⲟⲗ · ϫⲉⲯⲁⲗⲗⲉ ⲉⲡⲙⲁⲣⲧⲩⲣⲟⲥ ·
…
25 ⲁⲩⲱ ⲁⲡⲉⲓⲱⲧ ⲙⲡϣⲏⲣⲉ ϣⲏⲙ · ⲉⲧⲁϣⲉ ⲉⲧⲥⲗⲗⲉ ⲛⲧⲙⲟⲩⲗⲗⲉⲥ · ⲱϣ ⲉⲃⲟⲗ · ⲉϥϫⲱ ⲙⲙⲟⲥ · ϫⲉϯⲥⲟⲡⲥ ⲙⲙⲟⲕ ⲡⲁϫⲟⲉⲓⲥ ⲡⲙⲁⲣⲧⲩⲣⲟⲥ · ⲛⲧϩⲉ ⲛⲧⲁⲕϯ · ⲙⲡⲟⲩⲟⲉⲓⲛ ⲛⲧⲁϣⲉⲉⲣⲉ · ⲙⲁⲣⲉⲡⲉⲕⲛⲁ ⲟⲛ ⲧⲁϩⲉ ⲡⲁⲕⲉϣⲏⲣⲉ ⲙⲙⲟⲛ · ⲁϥϩⲓⲥⲉ ⲉϥⲁϣⲉ ⲉϩⲣⲁⲓ ·
…
26 ⲁⲩⲱ ⲛⲧⲉⲩⲛⲟⲩ ⲁⲡⲙⲁⲣⲧⲩⲣⲟⲥ ⲕⲁⲁϥ ⲉϩⲣⲁⲓ · ⲉϫⲙⲡⲕⲁϩ · ⲁⲩⲱ ⲁϥⲧⲱⲟⲩⲛ ⲁϥⲁϩⲉⲣⲁⲧϥ · ⲛⲁⲧⲗⲁⲁⲩ ⲛⲧⲁⲕⲟ ϩⲙⲡⲉϥⲥⲱⲙⲁ · ⲟⲩⲇⲉ ⲡⲟⲗϩ · ⲟⲩⲇⲉ ⲙⲡϥⲁⲓⲥⲑⲁⲛⲉ ϩⲱⲗⲟⲥ ·
…
27 ⲛⲉⲕⲕⲗⲏⲣⲓⲕⲟⲥ ⲇⲉ · ⲙⲛⲛⲉⲧϩⲗⲟⲡⲟⲛⲟⲥ · ⲛⲉⲩⲯⲁⲗⲗⲉ ϩⲁⲧⲉϥϩⲏ ⲙⲛϩⲉⲛⲕⲁⲛⲧⲩⲗⲏ · ⲉⲩⲙⲟⲩϩ ⲙⲛϩⲉⲛⲥϯⲛⲟⲩϥⲉ ⲉⲩⲥⲟⲧⲡ : ⲙⲛϩⲉⲛⲕⲗⲁⲇⲟⲥ ⲛⲥⲧⲟⲓ · ϣⲁⲛⲧⲟⲩϫⲓⲧϥ · ⲉϩⲟⲩⲛ ⲉⲧⲡⲟⲗⲓⲥ ·
…
28 ⲡⲣⲱⲙⲉ ⲇⲉ · ⲛⲉϥⲟⲩⲱϣ ⲉϫⲓⲧϥ · ⲉϩⲟⲩⲛ ⲉⲡⲉϥⲏⲓ · ⲁⲩⲱ ⲙⲡⲉⲡⲇⲓⲕⲁⲓⲟⲥ ⲡⲉⲓⲑⲉ · ⲉⲃⲟⲗ ϫⲉ · ⲁⲡⲉϥⲥⲱⲙⲁ ϩⲣⲟϣ · ⲛⲧϩⲉ ⲛⲟⲩⲧⲁϩⲧϩ · ⲙⲡⲟⲩⲉϣⲕⲓⲙ ⲙⲙⲟϥ ϩⲟⲗⲟⲥ ·
…
29 ⲁⲡⲙⲏⲏϣⲉ ⲱϣ ⲉⲃⲟⲗ · ϫⲉⲛϥⲡⲉⲓⲑⲉ ⲁⲛ · ⲁⲗⲗⲁ ⲙⲁⲣⲛϫⲓⲧϥ ⲉⲧⲉⲕⲕⲗⲏⲥⲓⲁ · ⲁⲩⲱ ⲁϥⲟⲩⲟϩϥ ⲛⲥⲱⲟⲩ · ⲁⲩϫⲓⲧϥ ⲉⲧⲉⲕⲕⲗⲏⲥⲓⲁ · ⲁⲩⲕⲁⲁϥ ⲙⲙⲁⲩ ϣⲁⲛⲧⲟⲩⲕⲱⲧ ⲉⲣⲟϥ ⲛⲟⲩⲙⲁⲣⲧⲩⲣⲓⲟⲛ · ⲕⲁⲧⲁⲡⲉϥⲙⲡϥⲙⲡϣⲁ · ⲁⲡⲉⲟⲟⲩ ⲛⲁϥ · ϣⲁⲛⲉϩⲉⲛⲉϩ ϩⲁⲙⲏⲛ ·
…
30 ⲧⲙⲉϩϥⲧⲟ ⲉⲛϭⲟⲙ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
31 ⲁⲥϣⲱⲡⲉ ⲇⲉ ⲙⲛⲛⲥⲁⲥⲁϣϥ ⲛϩⲟⲟⲩ · ⲉⲩⲟⲩⲱⲙ ⲉⲩⲥⲱ ⲛⲙⲏⲏϣⲉ ⲧⲏⲣⲟⲩ ⲛⲧⲡⲟⲗⲓⲥ · ⲉⲩⲣϣⲁ ϩⲛⲟⲩⲛⲟϭ ⲛⲣⲁϣⲉ · ⲉⲧⲃⲉⲡⲟⲩⲱⲛϩ ⲉⲃⲟⲗ · ⲙⲡⲥⲱⲙⲁ ⲙⲡⲉⲧⲟⲩⲁⲁⲃ · ⲁⲡⲉⲓⲱⲧ ⲛⲡϣⲉⲉⲣⲉ ϣⲏⲙ · ⲛⲧⲁⲡⲉⲧⲟⲩⲁⲁⲃ ϯⲡⲟⲩⲟⲉⲓⲛ ⲛⲁⲥ · ⲁϥϯⲡⲉϥⲟⲩⲟⲓ ⲉⲡⲉⲡⲓⲥⲕⲟⲡⲟⲥ · ⲁϥⲁⲓⲧⲉⲓ ⲙⲡⲃⲁⲡⲧⲓⲥⲙⲁ ⲉⲧⲟⲩⲁⲁⲃ ·
…
32 ⲁⲩⲱ ⲁϥⲕⲩⲣⲓⲥⲍⲉ ⲛⲁϥ ⲛϩⲉⲛϩⲟⲟⲩ ⲛⲏⲥⲧⲉⲩⲉ · ⲙⲛⲛⲥⲱⲥ ⲁϥⲃⲁⲡⲧⲓⲍⲉ ⲙⲙⲟϥ · ⲙⲛⲡⲉϥⲏⲓ ⲧⲏⲣϥ · ⲉⲡⲣⲁⲛ ⲙⲡⲉⲓⲱⲧ · ⲙⲛⲡϣⲏⲣⲉ · ⲙⲛⲡⲉⲡⲛⲉⲩⲙⲁ · ⲉⲧⲟⲩⲁⲁⲃ ·
…
33 ⲁⲩⲱ ⲁⲩϫⲓⲏⲏⲡⲉ · ⲙⲡⲉϥⲅⲉⲛⲟⲥ ⲛⲧⲁⲩϫⲓ ⲛⲙⲙⲁϥ · ⲉⲃⲟⲗ ϩⲙⲡⲟⲩⲟⲉⲓⲛ · ⲙⲡⲟⲩⲃⲁⲡⲧⲓⲥⲙⲁ · ⲁⲩϩⲉ ⲉⲣⲟⲟⲩ ⲉⲩⲉⲓⲣⲉ ⲛⲧⲁⲓⲟⲩϣⲟⲙⲛⲧ ⲉⲙⲯⲩⲭⲏ · ⲁⲩϫⲓⲃⲁⲡⲧⲓⲥⲙⲁ ·
…
34 ⲙⲛⲛⲥⲁⲛⲁⲓ ⲧⲏⲣⲟⲩ · ⲉⲥⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲟⲩⲱⲛϩ ⲉⲃⲟⲗ · ⲙⲡⲣⲱⲙⲉ ⲛϩⲏⲕⲉ ⲛⲧϩⲉ ⲛϣⲟⲣⲡ · ⲡⲉϫⲁϥ ⲛⲁϥ · ϫⲉⲉⲧⲃⲉⲟⲩ ⲉⲕⲛⲕⲟⲧⲕ · ⲉⲕⲟ ⲛⲁⲣⲅⲟⲥ · ⲙⲡⲉⲕⲧⲱⲟⲩⲛ ⲛⲅⲡⲁⲡⲉⲧⲱⲃⲉ ⲉⲡⲁⲧⲟⲡⲟⲥ ·
…
35 ⲡⲉϫⲉⲡⲣⲱⲙⲉ ⲛⲁϥ · ϫⲉⲡⲁϫⲟⲉⲓⲥ · ⲁⲅⲟⲩϩⲏⲕⲉ · ⲙⲛⲧⲁⲓ ⲣⲱⲙⲉ ⲙⲛⲧⲁⲓⲧⲃⲛⲏ · ⲟⲩⲇⲉ ⲧⲁⲡⲁⲛⲏ ·
…
36 ⲡⲉϫⲉⲡⲡⲉⲧⲟⲩⲁⲁⲃ ⲛⲁϥ · ϫⲉϯⲛⲁϯ ⲛⲁⲕ · ⲛⲧⲉⲕⲣⲭⲣⲉⲓⲁⲁ ⲧⲏⲣⲥ · ⲙⲟⲛⲟⲛ ϣⲱⲡⲉ ⲛⲧⲕ ⲟⲩϩⲏⲕⲉ · ⲉⲕϩⲏⲕ ⲉϩⲟⲩⲛ ⲉⲡⲁⲏⲓ · ⲛⲅⲟ ⲁⲛ · ⲛϩⲏⲧ ⲥⲛⲁⲩ · ⲁⲩⲱ ⲕⲛⲁⲛⲁⲩ ⲉⲛⲁϭⲟⲙ ·
…
37 ⲁⲩⲱ ⲉⲕϣⲁⲛⲧⲱⲟⲩⲛ ⲛϣⲟⲣⲡ · ⲁⲙⲟⲩ ⲉⲡⲉⲏⲃⲧ ϩⲙⲡϣⲟⲣⲡ · ⲛϩⲓⲣ ⲛⲧⲡⲟⲗⲓⲥ · ⲉⲕⲛⲁϩⲉ ⲉⲡⲉϣⲏⲣⲉ ϣⲏⲙ ⲛⲧⲁⲧⲙⲟⲩⲗⲗⲉⲥ ⲡⲁⲣⲁⲉⲓⲕⲉ ⲙⲙⲟϥ · ⲉⲃⲟⲗ ϫⲉⲁϥⲟⲩⲱϣ ϩⲓⲟⲩⲉ ⲉⲣⲟⲕ · ⲉⲧⲃⲉⲡⲁⲥⲱⲙⲁ ·
…
38 ⲁϫⲓⲥ ⲛⲁϥ · ϫⲉⲡⲉⲧⲛⲧⲟⲟⲧⲕ ⲧⲁⲁϥ ⲛⲁⲓ · ϫⲉϯⲣⲭⲣⲉⲓⲁ ⲙⲙⲟϥ ·
…
39 ⲁⲩⲱ ⲁϥⲛⲁϯ ⲛⲁⲕ ⲛϣⲟⲙⲛⲧ ⲛϩⲟⲗⲟⲕⲟϯⲛⲟⲥ · ⲉϥⲟⲩⲉϣⲧⲁⲁⲩ ⲛⲁⲅⲁⲡⲏ ·
…
40 ⲙⲟⲛⲟⲛ ϯⲛⲁⲕⲁⲁⲕ ⲁⲛ ⲉⲣⲭⲣⲉⲓⲁ ⲛⲗⲁⲁⲩ · ⲁⲩⲱ ⲥⲉⲛⲁⲉⲓⲛⲉ ⲛⲁⲕ · ⲛⲅⲧⲙⲉⲓⲙⲉ ϫⲉⲉⲕⲛⲁⲣⲟⲩ ⲛⲁϥ ·
…
41 ⲁⲩⲱ ⲉϥϣⲁⲛϫⲛⲟⲩⲕ · ϫⲉⲧⲁⲕⲉⲓⲙⲉ ⲉⲧⲱⲛ · ϫⲉⲟⲩⲛⲗⲁⲩ ⲛⲧⲟⲟⲧ · ⲁϫⲓⲥ ⲛⲁϥ ϫⲉⲙⲉⲣⲕⲟⲩⲣⲓⲟⲥ ⲡⲉⲛⲧⲁϥⲧⲁⲗϭⲟⲕ ·
…
42 ⲛⲧⲟϥ ⲡⲉ ⲛⲧⲁϥϫⲟⲟⲥ ⲛⲁⲓ · ϫⲉⲁϫⲓⲥ ⲛⲁⲕ ·
…
43 ⲁⲩⲱ ⲟⲛ ⲛϥϫⲟⲟⲥ ⲙⲡⲉϥⲉⲓⲱⲧ · ϫⲉⲉⲕⲥⲟⲟⲩⲛ · ⲙⲡⲛⲁⲩ ⲛⲧⲁⲕⲁⲓⲧⲉⲓ ⲙⲙⲟⲓ · ⲁⲓϭⲉⲡⲏ ⲁⲓⲥⲱⲧⲙ ⲉⲣⲟⲕ · ⲁⲓϯⲡⲟⲩⲟⲉⲓⲛ ⲛⲧⲉⲕϣⲉⲉⲣⲉ · ⲁⲩⲱ ⲟⲛ ⲁⲓⲭⲁⲣⲓⲍⲉ ⲛⲁⲕ ⲙⲡⲉⲕϣⲏⲣⲉ ϥⲟϫ ·
…
44 ⲉϣⲱⲡⲉ ⲟⲩⲛⲗⲁⲁⲩ · ⲙⲛⲧⲥ ⲟⲛ ϣⲟⲟⲡ ⲁⲣⲓ ϣⲁⲩ ⲉϫⲙⲡⲉⲕϣⲃⲏⲣ · ⲙⲙⲁⲣⲧⲩⲣⲟⲥ · ϫⲉⲡⲧⲁⲉⲓⲟ ⲛⲟⲩϣⲃⲏⲣ ⲉϫⲛⲟⲩϣⲃⲏⲣ · ⲉϥϣⲁⲛⲣϩⲟⲩⲟ · ϣⲁϩⲧⲟⲟⲩⲉ ⲡⲉϩⲟⲩⲟ ⲉⲡⲁⲓ · ⲟⲩϩⲣⲟϣ ⲡⲉ ⲙⲛⲛⲥⲁⲥⲁ ⲛⲓⲙ ·
…
45 ⲉϥϣⲁⲛϯⲣϩⲱⲃ ⲛⲁⲕ · ⲁⲣⲓⲣⲉ · ⲉϥⲧⲙⲥⲱⲧⲙ ⲛⲥⲱⲕ ⲟⲩⲱⲙ : ⲛⲁⲕ ϩⲙⲡⲉⲓϣⲟⲙⲛⲧ ϩⲟⲗⲟⲕⲟⲧⲓⲛⲟⲥ · ϣⲁⲛⲉⲓ ⲛⲁⲕ ϩⲙⲡⲟⲩⲱϣⲡⲛⲟⲩⲧⲉ · ⲁⲩⲱ ϯⲛⲏⲩ ⲛⲁⲕ · ⲙⲡⲁⲧⲓⲱⲥⲕ ϣⲱⲡⲉ · ⲛⲁⲓ
…
46 ⲇⲉ ⲛⲧⲉⲣⲉϥϫⲟⲟⲩ ⲛⲁϥ · ⲁϥⲉⲓ ⲉⲃⲟⲗ ϩⲓⲧⲟⲟⲧϥ ϩⲛⲟⲩⲉⲣⲏⲛⲏ ⲻ·
…
47 ϣⲟⲣⲡ ⲇⲉ · ⲉⲛⲧⲉⲣⲉϥϣⲱⲡⲉ · ⲁⲡⲣⲱⲙⲉ ⲧⲱⲟⲩⲛ · ⲁϥⲙⲟⲟϣⲉ ϩⲙⲡϣⲟⲣⲡ ⲛϩⲓⲣ · ⲁϥⲉⲓ ⲉϫⲙⲡϣⲏⲣⲉ ϣⲏⲙ · ⲁϥϫⲓ ⲙⲡϣⲟⲙⲧ ⲛϩⲟⲗⲟⲕϯⲛⲟⲥ · ⲁⲩⲱ ϣⲁϫⲉ ⲛⲓⲙ ⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲟⲟⲩ ⲛⲁϥ ϩⲙⲡϩⲟⲣⲟⲙⲁ · ⲁϥϫⲟⲟⲩ ⲛⲁϥ · ⲁϥⲃⲱⲕ ⲛϭⲓⲡϣⲏⲣⲉ ϣⲏⲙ · ⲁϥϫⲟⲟⲩ ⲙⲡⲉϥⲉⲓⲱⲧ · ϩⲛⲟⲩϩⲟⲧⲉ ·
…
48 ⲡⲉϥⲉⲓⲱⲧ ⲇⲉ ⲛⲧⲉⲣⲉϥⲥⲱⲧⲙ ⲉⲛⲁⲓ · ⲁϥϯⲉⲟⲟⲩ ⲙⲡⲛⲟⲩⲧⲉ ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
49 ⲛⲧⲟϥ ⲇⲉ · ⲙⲡⲉϥⲁⲙⲉⲗⲉⲓ ⲉⲡⲧⲏⲣϥ · ⲁⲗⲗⲁ ⲁϥϩⲱⲕ ⲛⲛⲉϥϭⲁⲙⲟⲩⲗ · ⲙⲛⲟⲩⲙⲏⲏϣⲉ ⲛϫⲁⲓⲃⲉⲕⲉ · ⲙⲛⲟⲩⲛⲟϭ ⲛⲁⲛϩⲟⲗⲟⲙⲁ · ⲁϥⲥⲱⲟⲩϩ ⲉϩⲟⲩⲛ · ⲛⲟⲩⲁϣⲏ ⲛϩⲩⲗⲏ · ⲁϥⲧⲁⲁⲩ ⲉⲧⲟⲟⲧϥ ⲙⲡⲣⲱⲙⲉ ⲛϩⲏⲕⲉ · ⲉⲩⲧⲣⲉϥⲡⲁⲡⲉ ⲧⲱⲃⲉ ·
…
50 ⲁⲩⲱ ⲁϥϯ ⲛⲁϥ ⲙⲡϩⲏⲩⲃⲉ · ⲉⲧⲣⲉϥⲥⲕⲁⲓ ⲙⲡⲕⲁϩ · ⲁⲩⲱ ⲧⲉϥⲉⲣⲭⲣⲓⲁⲁ ⲧⲏⲣⲥ ·
…
51 ⲁⲥϣⲱⲡⲉ ⲇⲉ · ⲛⲟⲩϩⲟⲟⲩ ⲁⲛⲧⲃⲛⲟⲟⲩⲉ · ⲉⲩⲥⲕⲁⲓ · ⲁⲡⲟⲩⲁ ϫⲱϩ ⲛⲟⲩⲥϣⲛⲉ ⲛⲥⲁⲡⲟⲩⲁ ⲙⲙⲁⲥⲉ · ⲁϥⲡⲉϩⲏⲧϥ ϩⲛⲛⲉϥⲧⲁⲡ ·
…
52 ⲡⲣⲱⲙⲉ ⲇⲉ ⲛϩⲏⲕⲉ ⲛⲧⲉⲣⲉϥⲛⲁⲩ ⲉⲡⲉⲛⲧⲁϥϣⲱⲡⲉ · ⲁϥⲗⲩⲡⲉⲓ ⲉⲙⲁⲧⲉ · ⲡⲉϫⲁϥ · ϫⲉⲟⲩⲟⲉⲓ ⲛⲁⲓ ⲙⲡⲉⲓⲥⲁϫⲉ · ⲡⲣⲱⲙⲉ ⲉⲛⲁⲣⲭⲱⲛ ⲁϥϩⲱⲧⲃ ⲙⲡⲉϥⲧⲃⲛⲏ · ϩⲁⲙⲟⲓ ⲙⲡⲓϫⲱ ⲉⲡⲉⲓϣⲏⲣⲉ ϣⲏⲙ ⲙⲡⲉⲓϩⲟⲣⲟⲙⲁ · ϫⲉⲉϥⲉϫⲟⲟⲥ ⲙⲡⲉϥⲉⲓⲱⲧ · ϫⲉϥⲉⲧⲁⲛϩⲟⲩⲧ ⲉⲡⲓϩⲱⲃ · ⲛⲧⲉⲡⲉⲓⲛⲟϭ ⲉⲛⲟⲥⲉ ⲧⲁϩⲟⲓ ·
…
53 ⲛⲁⲓ ϫⲉⲉϥϫⲱ ⲙⲙⲟⲟⲩ · ⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥϫⲓⲡⲓⲛⲉ ⲛⲟⲩⲁⲣⲭⲱⲛ ⲛⲧⲉⲧⲡⲟⲗⲓⲥ · ⲁϥⲉⲓ ⲉⲡⲁⲣⲁⲅⲉ · ⲁϥⲛⲁⲩ ⲉⲡⲣⲱⲙⲉ · ⲁϥⲙⲟⲟϣⲉ ⲉⲣⲟϥ · ⲁϥⲣⲡⲉⲥⲙⲟⲧ ⲛⲛⲉⲧⲟ ⲛϣⲡⲏⲣⲉ · ⲡⲉϫⲁϥ ⲛⲁϥ · ϫⲉⲱ ⲡⲣⲱⲙⲉ ⲉⲧⲃⲉⲟⲩ · ⲁⲕⲕⲱ ⲛⲉⲧⲃⲛⲟⲟⲩⲉ ⲉⲛⲉⲩⲉⲣⲏⲩ · ϣⲁⲛⲧⲉⲟⲩⲁ ⲡⲗⲩⲅⲏ ⲛⲟⲩⲁ ·
…
54 ⲡⲉϥϫⲟⲉⲓⲥ ⲅⲁⲣ ⲛⲁϣⲓⲧⲕ ⲙⲙⲟϥ ·
…
55 ⲁⲩⲱ ⲁϥⲗⲩⲡⲉⲓ ⲛϭⲓⲡⲣⲱⲙⲉ ⲛⲁⲉⲣⲅⲁⲧⲏⲥ ⲉⲙⲁⲧⲉ · ⲁⲩⲱ ⲟⲛⲉϥϯⲉⲟⲟⲩ · ⲙⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
56 ⲁⲩⲥⲱⲧⲙ ⲇⲉ ⲛϭⲓⲣⲱⲙⲉ ⲉⲧⲉⲡⲱⲟⲩ ⲡⲉ ⲡⲧⲃⲛⲏ · ⲁⲩⲉⲓ ⲛⲁⲩ ⲉⲡⲉ ⲛⲧⲟϥ ϣⲱⲡⲉ · ⲁⲩⲱ ⲁⲩⲙⲡⲕⲁϩ ⲛϩⲏⲧ ⲉⲙⲁⲧⲉ · ϫⲉⲛⲉⲓⲥⲱϥ ϩⲙⲡⲉϥⲥⲁ ⲙⲛⲧⲉϥⲙⲛⲧϫⲱⲱⲣⲉ ·
…
57 ⲁⲩⲱ ⲛⲉⲣⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲙⲡⲟⲩⲉ · ⲉϥϩⲙⲟⲟⲥ ⲙⲛⲗⲁⲁⲩ ⲛⲁⲩ ⲉⲣⲟϥ · ⲉⲙⲏⲧⲉⲓ ⲡⲣⲱⲙⲉ ⲛϩⲏⲕⲉ ·
…
58 ⲁⲩⲥⲱⲟⲩϩ ⲇⲉ ⲛⲟⲩⲙⲏⲏϣⲉ ⲛⲣⲱⲙⲉ · ⲉⲡⲧⲃⲛⲏ · ⲁⲩϫⲓ ⲉϩⲟⲩⲛ ⲉⲧⲡⲟⲗⲓⲥ ⲉⲩⲙⲁ ⲙⲁⲩⲁⲁϥ · ⲁⲩϯⲧⲣⲟⲫⲏ ⲛⲁϥ · ⲉⲧⲣⲉϥⲟⲩⲱⲙ · ⲛⲧⲟϥ ⲇⲉ ⲙⲡϥϫⲓϯⲡⲓ ⲛⲧⲣⲟⲫⲏ ⲉⲡⲧⲏⲣϥ ·
…
59 ⲁⲩⲱ ⲛⲉⲣⲉⲡⲉϥϫⲟⲉⲓⲥ ⲗⲩⲡⲉⲓ ⲙⲙⲟϥ ⲉⲙⲁⲧⲉ · ϫⲉⲟⲩϫⲱⲱⲣⲉ ⲡⲉ ⲕⲁⲗⲟⲥ · ϩⲙⲡⲉϥⲥⲱⲙⲁ ·
…
60 ⲛⲧⲉⲣⲛⲣⲱⲙⲉ ⲇⲉ ⲃⲱⲕ ⲉⲛⲉⲩⲏⲓ · ⲁⲡϩⲏⲕⲉ ⲛⲣⲱⲙⲉ ϭⲱϩⲡⲁϩⲟⲩ ⲙⲡⲧⲃⲛⲏ · ⲙⲁⲩⲁⲁϥ · ⲉϥⲗⲩⲡⲉⲓ ⲉⲙⲁⲧⲉ · ⲁⲩⲱ ⲛⲉϥⲙⲉⲉⲩⲉ ⲉⲃⲟⲗ · ⲉⲧⲉϥⲙⲛⲧϩⲏⲕⲉ ·
…
61 ϩⲛⲟⲩⲥϣⲛⲉⲇⲉ ⲉⲥⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲉⲓ ⲉϩⲟⲩⲛ · ⲉϥⲥⲱⲃⲉ ϩⲛⲟⲩⲥⲱⲃⲉ ⲉϥⲟⲩⲁⲁⲃ · ⲁϥⲁϩⲉⲣⲁⲧϥ · ϩⲁϩⲧⲛ ⲙⲡⲧⲃⲛⲏ · ⲙⲡⲣⲱⲙⲉ ⲛϩⲏⲕⲉ · ⲉⲃⲟⲗ ϫⲉ · ϣⲁϥⲟⲩⲱⲛϩ ⲉⲣⲟϥ ⲛϩⲟ ϩⲓϩⲟ ·
…
62 ⲡⲉϫⲁϥ ⲛⲁϥ ⲉϥⲥⲱⲃⲉ ϫⲉⲙⲡⲉⲕⲱⲥⲕ ⲉϯⲟⲩⲱ : ⲱ ⲡⲥⲟⲛ ·
…
63 ⲡⲉϫⲉⲡⲣⲱⲙⲉ ⲛⲁϥ · ϫⲉⲁⲙⲟⲩ ⲛⲅⲛⲁⲩ ⲉⲡⲉⲛⲧϩⲟϥϣⲱⲡⲉ ·
…
64 ⲙⲛⲛⲥⲁⲛⲁⲓ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲕⲓⲙ ⲉⲡⲙⲁⲥⲉ · ⲛⲧⲉϥⲟⲩⲉⲣⲏⲧⲉ · ⲡⲉϫⲁϥ ⲛⲁϥ ϫⲉϩⲙⲡⲣⲁⲛ ⲛⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲁϫⲟⲉⲓⲥ · ⲧⲱⲟⲩⲛ ⲛⲅⲣⲡⲕϩⲱⲃ ⲁϫⲛϣⲱⲛⲉ ·
…
65 ⲁⲩⲱ ⲁϥⲟⲛⲕϥ ⲉϩⲣⲁⲓ · ϩⲛⲟⲩⲛⲟϭ ⲛⲟⲙⲧⲉ · ϩⲱⲥ ⲉϣϫⲉ ⲙⲡⲟⲩⲡⲗⲩⲅⲏ ⲙⲙⲟϥ ⲉⲡⲧⲏⲣϥ · ⲁⲩⲱ ⲁϥⲟⲩⲱⲙ ϩⲙⲡⲉⲓⲭⲟⲣⲧⲟⲥ ·
…
66 ⲛⲧⲉⲩⲛⲟⲩ ⲡϩⲁⲅⲓⲟⲥ ⲇⲉ · ⲙⲉⲣⲕⲟⲩⲣⲓⲟⲥ · ⲁϥⲉⲡⲓⲧⲓⲙⲁ ⲙⲙⲁⲥⲥⲉ ⲉⲧϯⲟⲩⲃⲉ : ⲉϥϫⲱ ⲙⲙⲟⲥ ⲛⲁϥ · ϫⲉⲉⲣⲉⲛⲉⲕⲧⲁⲡ ⲛⲁⲧⲟⲧ ⲉⲃⲟⲗ · ⲙⲛⲧⲉⲕⲁⲡⲉ · ⲛⲛⲕϭⲙϭⲟⲙ ⲉϫⲱ ⲙⲙⲟⲥ · ⲛⲕⲉⲥⲟⲡ · ⲛⲗⲁⲁⲩ ⲛⲣⲱⲙⲉ · ⲟⲩⲇⲉ ⲧⲃⲛⲏ ϣⲁⲉⲛⲉϩ · ⲛⲟⲩⲟⲉⲓϣ ⲁⲗⲗⲁ ⲉⲕⲉϣⲱⲡⲉ ⲉⲕⲟ ⲛϩⲩⲙⲉⲣⲟⲥ ϣⲁⲉⲛⲉϩ ·
…
67 ⲁⲩⲱ ⲛⲧⲉⲩⲛⲟⲩ ⲁⲛⲉϥⲧⲁⲡⲛⲟⲩϩⲉ ⲉⲃⲟⲗ · ⲁⲩϩⲉ ⲁⲩⲧⲱⲧ ⲉⲃⲟⲗ ⲙⲛⲧⲉϥⲁⲡⲉ · ⲁⲩⲱ ⲁϥϣⲱⲡⲉ ϩⲛⲟⲩⲙⲛⲧϩⲩⲙⲉⲣⲟⲥ ·
…
68 ⲡⲣⲱⲙⲉ ⲇⲉ ⲛϩⲏⲕⲉ ⲁϥⲡⲁϩⲧϥ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉϥϫⲱ ⲙⲙⲟⲥ ⲛⲁϥ · ϫⲉⲡⲉⲕϩⲙⲟⲧ ϣⲏⲙ ⲡⲁϫⲟⲉⲓⲥ · ⲡⲙⲁⲣⲧⲩⲣⲟⲥ ⲙⲡⲉⲭⲣⲓⲥⲧⲟⲥ ⲉⲓⲥ · ⲡⲉⲛⲧⲟⲕ ⲣⲙⲁⲣⲧⲩⲣⲟⲥ ⲉϫⲙⲡⲉϥⲣⲁⲛ ⲉⲧⲟⲩⲁⲁⲃ ·
…
69 ⲁⲩⲱ ⲛⲧⲉⲩⲛⲟⲩ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲟⲡϥ ⲉⲣⲟϥ
…
70 ⲡⲣⲱⲙⲉ ⲇⲉ ⲁϥⲉⲓ ⲉⲃⲟⲗ · ⲉϥⲣⲁϣⲉ ⲉϥⲱϣ ⲉⲃⲟⲗ · ⲉϥϫⲱ ⲙⲙⲟⲥ · ϫⲉⲁⲡϩⲁⲅⲓⲟⲥⲙⲉⲣⲕⲟⲩⲣⲓⲟⲥ ⲟⲩⲱⲛϩ ⲉⲣⲟⲓ · ⲁϥⲧⲁⲗϭⲟ ⲡⲙⲁⲥⲉ · ⲁϥⲉⲡⲓⲧⲓ ⲙⲙⲁⲥⲉ ⲉⲧϯⲟⲩⲃⲉ · ⲁϥⲣⲥⲁⲃⲉ ·
…
71 ⲁⲩⲉⲓ ⲛϭⲓⲟⲩⲙⲏⲏϣⲉ · ⲉⲛⲁⲩ ⲉⲡⲉⲛⲧⲟϥϣⲱⲡⲉ · ⲁⲩⲱϣ ⲉⲃⲟⲗ ⲧⲏⲣⲟⲩ · ϫⲉⲟⲩⲁ ⲡⲉ ⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲡⲉⲟⲟⲩ ⲛⲁϥ ϣⲁⲉⲛⲉϩ ⲉⲛⲉϩ ϩⲁⲙⲏⲛ ⲻ::ⲻ
…
72 ⲧⲙⲉϩϯ ⲉⲛϭⲟⲙ ⲙⲡⲓϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
73 ⲁⲥϣⲱⲡⲉ ϫⲉⲙⲛⲛⲥⲁⲛⲁⲓ · ⲁⲩⲁⲣⲭⲉⲓ ⲛⲣϩⲱⲃ ⲉⲡⲁⲡⲉ ⲧⲱⲃⲉ · ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉⲥⲟⲩⲁⲣⲭⲱⲛ ⲛϩⲗⲗⲏⲛ ⲁϥⲉⲓ ϩⲱϥ ϩⲓⲧⲟⲩⲱϥ · ⲛⲛⲁⲣⲕⲁⲧⲏⲥ ⲉⲧⲡⲁⲡⲉⲉⲧⲱⲃⲉ · ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲉⲣⲓⲟⲥ ·
…
74 ⲁϥⲥⲙⲓⲛⲉ ϩⲱϥ · ⲙⲡⲉϥⲙⲁ ⲙⲡⲁⲡⲉⲧⲱⲃⲉ ϩⲁϩⲧⲏⲩ ⲧⲁⲭⲉ · ⲉϥⲟⲩⲱϣ ϩⲱϥ ⲉⲕⲱⲧ ⲛⲟⲩⲁⲩⲗⲏ ϩⲙⲡⲉϥⲏⲓ · ⲁϥⲉⲓ ⲇⲉ ⲛⲟⲩϩⲟⲟⲩ ⲁϥϩⲙⲟⲟⲥ ϩⲁϩⲧⲏ ⲛⲛⲁⲣⲅⲁⲧⲏⲥ · ⲉⲧⲣϩⲱⲃ · ⲁϥⲧⲱⲟⲩⲛ ⲁϥⲙⲟⲩϣⲧ ⲛⲛⲧⲱⲃⲉ · ϣⲁⲛⲧⲉϥⲉⲓ ⲉϫⲛⲛⲧⲱⲃⲉ ⲙⲡⲉⲧⲟⲩⲁⲁⲃ · ⲁⲩⲱ ⲁϥⲉⲡⲓⲑⲉⲙⲉⲓ ⲛⲧⲱⲃⲉ ⲙⲡⲉⲧⲟⲩⲁⲁⲃ ⲛϩⲟⲩⲟ ⲉⲛⲟⲩϥ ⲧⲏⲣⲟⲩ ·
…
75 ⲡⲉϫⲁϥ ϫⲉⲟⲛⲧⲱⲥ · ϯⲛⲁϥⲓ ϣⲉ ⲛⲥⲟⲧⲉ ⲛⲧⲱⲃⲉ · ϩⲛⲛⲓⲧⲱⲃⲉ ⲛⲛⲉⲭⲣⲓⲥⲧⲓⲁⲛⲟⲥ ⲛⲧⲁϫⲟⲟⲥ ⲛⲛⲁⲣⲅⲁⲧⲏⲥ ϫⲉⲛⲧⲁⲩⲥⲙⲛⲧⲟⲩ ⲛⲁⲓ
…
76 ⲁⲩⲱ ⲉⲩϣⲁⲛϫⲟⲟⲥ ϫⲉⲧⲛⲛⲁⲕⲁⲁⲕ ⲁⲛ · ⲉϥⲉⲧⲟⲩ · ϯⲛⲁϩⲓⲟⲩⲉ ⲉⲣⲟⲟⲩ · ⲛⲧⲁϥⲓⲧⲟⲩ ⲉϩⲛⲁⲩⲁⲛ · ⲛⲧⲁⲛⲁⲩ ϫⲉⲉⲣⲉⲡⲉⲓⲟⲩⲁ · ϫⲉⲙⲉⲣⲕⲟⲩⲣⲓⲟⲥ · ⲛⲁⲣⲟⲩ ⲛⲁⲓ ·
…
77 ⲁⲩⲱ ⲁϥⲃⲱⲕ ⲉⲡⲉϥⲏⲓ ⲙⲡⲉϩⲟⲟⲩ ⲉⲧⲙⲙⲁⲩ ·
…
78 ⲙⲛⲛⲥⲁϩⲉⲛⲕⲟⲩⲓ · ⲇⲉ ⲟⲛ ⲛϩⲟⲟⲩ · ⲁϥⲃⲱⲕ ⲁϥⲛⲁⲩ ⲛⲧⲱⲃⲉ · ⲙⲡⲉⲧⲟⲩⲁⲁⲃ · ⲁϥⲱϣⲁϩⲟⲙ ⲉⲙⲁⲧⲉ · ⲉⲃⲟⲗ ϫⲉⲛⲕⲟⲩⲓ ⲙⲛⲛⲛⲟϭ ⲛⲧⲡⲟⲗⲓⲥ · ⲉⲩⲧⲛⲛⲟⲟⲩ ⲛⲟⲩⲁⲣⲅⲁⲧⲏⲥ · ⲉⲡⲟⲩⲁ ⲙⲙⲏⲛⲉ · ⲉⲩⲉⲣϩⲱⲃ ϫⲉⲉⲩⲉⲡⲉⲓⲑⲉⲙⲉⲓ ⲛⲕⲱⲧ ϫⲉⲉⲣⲟϥ ⲛⲟⲩⲙⲁⲣⲧⲏⲣⲓⲟⲛ ·
…
79 ⲗⲟⲓⲡⲟⲛ ⲟⲛ ⲁⲡⲣⲱⲙⲉ ⲛϩⲉⲑⲛⲓⲕⲟⲥ · ⲕⲱϩ ϩⲛⲟⲩⲛⲟϭ ⲛⲕⲱϩ · ⲛⲧⲉⲡⲇⲓⲁⲃⲟⲗⲟⲥ · ⲉⲛⲧⲱⲃⲉ ⲙⲡⲉⲧⲟⲩⲁⲁⲃ ·
…
80 ⲙⲛⲛⲥⲁⲛⲁⲓ · ⲁϥⲙⲟⲩⲧⲉ ⲉⲡⲣⲱⲙⲉ ⲛϩⲏⲕⲉ · ⲡⲉⲓⲉⲧⲉⲣⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲟⲩⲱⲛϩ ⲉⲣⲟϥ · ⲡⲉϫⲁϥ ⲛⲁϥ · ϫⲉⲁⲙⲟⲩ ⲛⲅⲧⲁⲙⲟⲓ ⲉⲡⲧⲟϣ · ⲛⲛⲁⲧⲱⲃⲉ ⲙⲛⲛⲟⲩⲕ · ⲉⲡⲉⲓⲇⲏ · ϯⲟⲩⲱϣⲕⲱⲧ ⲙⲡⲁⲏⲓ ·
…
81 ⲡⲉϫⲉⲡⲣⲱⲙⲉ ⲛⲁϥ · ϫⲉⲛⲉⲕⲣⲱⲙⲉ ⲥⲟⲟⲩⲛ : ⲛⲧⲏⲡⲉ ⲛⲛⲉⲕⲧⲱⲃⲉ ·
…
82 ⲡⲉϫⲁϥ ϫⲉⲙⲉⲓϫⲓⲗⲁⲁⲩ ⲛⲣⲱⲙⲉ · ⲛⲥⲁⲃⲗⲗⲁⲕ · ⲛⲙⲙⲁⲓ · ⲁⲗⲗⲁ ⲕⲁⲧⲁⲡⲁⲙⲉⲉⲩⲉ ⲛϩⲏⲧ · ⲛⲟⲩⲓ ⲧⲉ ⲛⲁⲓ ϣⲁⲙⲁ ·
…
83 ⲡⲣⲱⲙⲉ ⲇⲉ ⲁϥⲣϩⲃⲁ · ⲡⲉϫⲁϥ ⲛⲁϥ · ϫⲉⲱ ⲡⲣⲱⲙⲉ · ⲙⲡⲣϯⲟⲥⲉ : ⲛⲧⲉⲕⲯⲩⲭⲏ ⲙⲡⲣϫⲱϩ ⲉⲛⲧⲱⲃⲉ · ⲙⲡⲉⲓⲡⲉⲧⲟⲩⲁⲁⲃ · ⲛⲧⲉⲟⲩϫⲣⲟⲡ ⲧⲁϩⲱⲕ · ⲡⲗⲏⲛ ⲉⲕϣⲁⲛϥⲓⲧⲟⲩ · ϯⲛⲁⲉⲓⲙⲉ ⲉⲧⲕϭⲟⲙ ⲙⲛⲧⲉⲕⲙⲛⲧϫⲱⲱⲣⲉ · ⲁⲩⲱ ⲁⲡϩⲗⲗⲏⲛ · ϯ ⲛⲟⲩϣⲥⲛⲛⲁⲥ · ⲙⲡⲣⲱⲙⲉ ⲛϩⲏⲕⲉ ·
…
84 ⲡⲉϫⲁϥ ⲛⲁϥ · ϫⲉⲙⲡϩⲟⲥⲟⲡ ⲁⲕϫⲟⲟⲥ · ϫⲉⲡⲉⲧⲙⲙⲁⲩ ⲛⲁⲡⲗⲩⲅⲏ ⲙⲙⲟⲕ · ϯⲛⲁϥⲓ ϩⲟⲩⲟ · ⲉⲛⲁⲓ ⲛⲧⲁⲓⲉⲓⲙⲉ · ⲉⲧⲉⲕϭⲟⲙ · ⲙⲛⲡⲉⲧⲙⲙⲁⲩ · ϫⲉⲉϥⲛⲁⲣ ⲟⲩ ⲛⲁⲓ ⲡⲉϫⲉⲡⲣⲱⲙⲉ ⲛⲁϥ · ϫⲉⲛⲧϩⲉ ⲉⲧⲉϩⲛⲁⲕ ⲁⲣⲓⲥ · ⲉⲥⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲁⲩ ⲉⲣⲟⲕ ⲙⲟⲛⲟⲛ ⲛⲅⲛⲁϫⲣⲟ ⲉⲣⲟϥⲁⲛ ·
…
85 ⲡⲣⲱⲙⲉ ⲇⲉ ⲁϥⲧⲛⲛⲟⲟⲩ ⲛⲧⲉⲩⲛⲟⲩ · ϩⲛⲛⲟϭ ⲙⲙⲛⲧϫⲁⲥⲓϩⲏⲧ · ⲟⲩϩⲙϩⲁⲗ ⲡⲱϥ · ⲁϥⲃⲱⲕ ⲁϥⲉⲓⲛⲉ · ⲛϩⲉⲛϭⲁⲙⲟⲩⲗ · ⲁϥⲙⲟⲟϣⲉ ϩⲓⲧϩⲏ ⲙⲙⲟⲟⲩ · ϩⲛⲟⲩⲛⲟϭ ⲙⲛⲧϫⲁⲥⲓϩⲏⲧ ·
…
86 ⲁϥⲁⲣⲛⲧⲁⲗⲟ ⲛϭⲁⲙⲟⲩⲗ ϩⲛⲛⲛⲧⲱⲃⲉ ⲙⲡⲉⲧⲟⲩⲁⲁⲃ · ⲁⲩⲱ ⲁϥⲁϩⲉⲣⲁⲧϥ · ϩⲓⲧϩⲏ ⲛⲟⲩⲛⲟϭ ⲛϭⲁⲙⲟⲩⲗ ϩⲟⲟⲩⲧ · ⲡⲱϥ ⲡⲉ · ⲁϥⲟⲩⲉϩⲥⲁϩⲛⲉ ⲛⲉϥϩⲙϩⲁⲗ · ϩⲛⲟⲩⲛⲟϭ ⲙⲛⲧϫⲁⲥⲓϩⲏⲧ · ⲉⲧⲣⲉⲩⲧⲁⲗⲟⲧⲱⲃⲉ ⲛϭⲁⲙⲟⲩⲗ · ⲡⲉϫⲁϥ ϫⲉⲙⲁⲣⲉⲓⲛⲁⲩ ⲧⲉⲛⲟⲩ · ⲉⲧϭⲟⲙ ⲙⲡⲁⲓ · ϫⲉⲙⲉⲣⲕⲟⲩⲣⲓⲟⲥ ·
…
87 ⲁⲩⲱ ⲛⲧⲉⲩⲛⲟⲩ ⲙⲡⲁⲧⲓⲡϣⲁϫⲉ ⲗⲟ ϩⲛⲧⲉϥⲧⲁⲡⲣⲟ · ⲁϭⲁⲙⲟⲩⲗ ⲉⲧⲉϥⲁϩⲉⲣⲁⲧϥ · ϩⲓⲧϩⲏ ⲙⲙⲟϥ · ⲟⲩⲱⲛ ⲛⲧⲉϥⲧⲁⲡⲣⲟ · ⲁϥⲁⲙⲁϩⲧⲉ ⲙⲡⲁⲣⲭⲱⲛ ⲛϩⲗⲗⲏⲛ · ⲁϥⲛⲟϫϥ ⲉϩⲟⲩⲛ ϩⲁϩⲧⲏϥ · ⲁϥⲛⲕⲟⲧⲕ ⲉϫⲟϥ ·
…
88 ⲁⲩⲱ ⲛⲧⲉⲩⲛⲟⲩ ⲉⲥⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲉⲓ ⲉϥⲧⲁⲗⲏⲩ · ⲉⲡⲉϥϩⲧⲟ ⲙⲡⲛⲉⲩⲙⲁ · ⲁϥⲁϩⲉⲣⲁⲧϥ ϩⲁϩⲧⲙ ⲙⲡϭⲁⲙⲟⲩⲗ · ⲉⲧⲁⲙⲁϩⲧⲉ ⲉϫⲙⲡⲣⲱⲙⲉ · ⲁϥⲣⲁⲧϥ ⲙⲡⲉϥⲕⲟⲩⲛⲧⲁⲣⲓⲟⲛ · ⲉⲧⲉϥⲟⲩⲉⲣⲏⲧⲉ ⲛϩⲃⲟⲩⲣ ⲁⲩⲱ ⲛ
…
89 ⲧⲉⲛⲟⲩ ⲉϥⲁⲡⲉⲓⲗⲏ ⲉⲣⲟⲓ · ϫⲉⲛⲧⲟⲕ ⲡⲉⲧⲛⲁϯⲡϣⲱⲗϩ · ⲉⲡⲁⲙⲁⲣⲧⲏⲣⲓⲟⲛ · ⲉⲕⲁϣⲉ ⲛⲥⲁⲧⲉⲕⲟⲩⲉⲣⲏⲧⲉ ⲛⲟⲩⲱⲧ ·
…
90 ⲁⲩⲱ ⲁⲡⲙⲏⲏϣⲉ · ⲟⲩⲁϩϥ ⲛⲥⲱϥ ϩⲛⲟⲩϩⲟⲧⲉ · ⲙⲛⲟⲩⲥⲧⲱⲧ · ϣⲁⲛⲧⲉϥⲱⲃⲣⲉⲓ ⲉϩⲟⲩⲛ · ⲛⲧⲥⲛⲧⲉ ⲙⲡⲧⲟⲡⲟⲥ · ⲉϥⲁϣⲉ ⲉϩⲣⲁⲓ ⲛⲥⲁϫⲱϥ ·
…
91 ⲁⲩⲱ ⲁϥⲱϣ ⲉⲃⲟⲗ · ⲛϭⲓⲡⲣⲱⲙⲉ · ⲉϥϫⲱ ⲙⲙⲟⲥ · ϫⲉⲡⲁϫⲟⲉⲓⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲕⲟ ⲛⲁⲓ ⲉⲃⲟⲗ · ⲉⲧⲃⲉⲧⲁⲙⲛⲧⲁⲧⲥⲟⲟⲩⲛ · ⲁⲩⲱ ⲛⲁⲧⲱⲃⲏ ⲧⲏⲣⲟⲩ
…
92 ϯⲛⲁⲧⲁⲁⲩ ⲛⲁⲕ · ⲉⲧⲕⲟⲇⲟⲙⲏ ⲙⲡⲉⲕⲧⲟⲡⲟⲥ · ⲁⲩⲱ : ϣⲉ ⲛⲓⲙ ⲉⲛⲁⲛⲟⲩϥ ϯⲛⲁⲧⲁⲩⲟ ⲛⲁⲕ ⲙⲛⲧϩⲩⲗⲏ ⲧⲏⲣⲥ ⲛⲧⲁⲓⲥⲟⲟⲩϩ ⲉⲡⲁⲏⲓ ·
…
93 ⲁⲩⲱ ϯⲛⲁϣⲱⲡⲉ ⲛⲭⲣⲓⲥⲧⲓⲁⲛⲟⲥ · ⲙⲛⲡⲁⲏⲓ ⲧⲏⲣϥ · ⲛⲧⲁⲕⲟ ⲉⲃⲟⲗ ⲛⲛⲁϩⲙϩⲁⲗ · ⲉⲩⲟ ⲛⲣⲙϩⲉ · ⲛⲧⲁϣⲱⲡⲉ ⲛⲙⲛⲟⲩⲧ ⲉⲡⲉⲕⲧⲟⲡⲟⲥ · ϣⲁⲡⲉⲓϩⲟⲟⲩ ⲙⲡⲁⲙⲟⲩ ·
…
94 ⲛⲁⲓ ⲇⲉ ⲛⲧⲉⲣⲉϥϫⲱⲟⲩ : ⲁϭⲁⲙⲟⲩⲗ ⲕⲁⲁϥ ⲉⲡⲉⲥⲏⲧ · ⲉϫⲙⲡⲕⲁϩ · ⲁⲩⲱ ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲱϩ ⲉⲛⲉϥⲥⲁϣ · ⲁϥⲧⲁⲗϭⲟϥ · ⲁϥⲕⲁⲁϥ ⲉⲃⲟⲗ · ⲙⲛⲗⲁⲁⲩ ⲙⲡⲱⲗϩ · ϩⲙⲡⲉϥⲥⲱⲙⲁ ⲉⲡⲧⲏⲣϥ ·
…
95 ⲁⲩⲱ ⲁⲩⲟⲩⲛⲟϭ ⲛϩⲟⲧⲉ · ⲧⲁϩⲉⲟⲩⲟⲛ ⲛⲓⲙ · ⲉⲧⲁϩⲉⲣⲁⲧⲟⲩ · ⲉⲩⲛⲁⲩ ⲉⲧϩⲉ ⲛⲧⲁϭⲁⲙⲟⲩⲗ ⲡⲗⲩⲅⲏ ⲙⲙⲟϥ ·
…
96 ⲁⲩⲱ ⲁⲡⲣⲱⲙⲉ ϩⲟⲙⲟⲗⲟⲅⲉ ⲛⲁⲩ · ϫⲉⲁⲓⲛⲁⲩ ⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲉϥⲗⲟⲅⲭⲓⲍⲉ ⲙⲙⲟⲓ · ⲗⲟⲓⲡⲟⲛ ⲁϥⲙⲟⲩϣⲧ ⲙⲡⲥⲱⲙⲁ · ⲙⲡⲣⲱⲙⲉ ⲙⲡⲟⲩϩⲉ ⲉⲗⲁⲁⲩ · ⲙⲡⲱⲗϩ ⲛϩⲏⲧϥ ⲉⲡⲧⲏⲣϥ ·
…
97 ⲁⲩϫⲓⲛⲟⲩϥ · ϫⲉⲉϥⲧⲱⲛ ⲙⲡⲱⲗϩ ⲉⲧϩⲙⲡⲉⲕⲥⲱⲙⲁ · ⲕⲉⲙⲁⲗⲓⲥⲧⲁ ⲉⲕⲱϣ · ⲉⲃⲟⲗ ϫⲉ · ⲉⲓⲥⲡⲇⲓⲕⲁⲓⲟⲥ ⲗⲟⲅⲕⲓⲍⲉ ⲙⲙⲟⲓ · ⲉⲧⲁⲟⲩⲣⲏⲧⲉ ϩⲙⲡⲉϥⲕⲟⲩⲛⲧⲁⲣⲓⲟⲛ ·
…
98 ⲡⲉϫⲉⲡⲣⲱⲙⲉ ⲛⲁⲩ · ϫⲉϫⲓⲛⲛⲧⲉⲩⲛⲟⲩ · ⲛⲧⲁϭⲁⲙⲟⲩⲗ ⲕⲁⲁⲧ ⲉⲃⲟⲗ · ⲉⲁϥϫⲱϩ ⲉⲉⲡⲁⲥⲱⲙⲁ ⲧⲏⲣϥ · ⲁⲓⲟⲩϫⲁⲓ ·
…
99 ⲁⲩⲱ ⲛⲧⲉⲩⲛⲟⲩ ⲁⲡⲣⲱⲙⲉ ⲃⲱⲕ ⲉⲣⲁⲧϥ · ⲙⲡⲉⲡⲓⲥⲕⲟⲡⲟⲥ · ⲁϥⲃⲁⲡⲧⲓⲍⲉ ⲙⲙⲟϥ ⲙⲛⲡⲉϥⲓⲏ ⲧⲏⲣϥ · ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ · ⲁϥⲕⲁⲁⲩ ⲉⲃⲟⲗ ⲉⲩⲱⲣϥ ·
…
100 ⲁⲩⲱ ⲁϥϯ ⲧϩⲩⲗⲏ ⲧⲏⲣⲥ · ⲛⲧⲁϥⲥⲟⲟⲩϩⲥ ⲉϩⲟⲩⲛ · ⲉⲡⲕⲱⲧ ⲙⲡⲉϥⲏⲓ · ⲙⲛⲛϣⲉ · ⲙⲛⲛⲛⲱⲛⲉ · ⲁⲩⲱ ⲛⲉϥⲧⲱⲃⲉ ⲧⲏⲣⲟⲩ ·
…
101 ⲁⲩⲱ ⲁϥⲧⲁⲩⲟ ⲉϩⲟⲩⲛ · ⲉⲡⲧⲟⲡⲟⲥ · ⲙⲛⲟⲩⲛⲟⲩⲃ ⲉϥⲥⲱⲧⲡ · ⲙⲛⲟⲩⲛⲟϭ ⲛⲁⲛϩⲟⲗⲱⲙⲁ ·
…
102 ⲁⲩⲱ ⲛⲉϥⲣ · ϩⲛⲛⲉϥϭⲓϫ · ⲙⲛⲛⲉϥⲣⲱⲙⲉ ⲧⲏⲣⲟⲩ · ⲁⲩⲱ ⲛⲉϥⲧⲃⲛⲟⲟⲩⲉ · ⲉⲩⲣϩⲱⲃ ⲧⲏⲣⲟⲩ · ⲛϫⲓϫⲏ
…
103 ⲁⲩⲱ ⲛϥϫⲱ ⲙⲙⲟⲥ · ⲛⲛⲉⲧⲣϩⲱⲃ · ϫⲉⲙⲟⲟϣⲉ ⲛⲧⲉⲧⲛⲕⲱⲧ · ⲙⲡⲏⲓ ⲙⲡⲉⲓⲇⲩⲛⲁⲇⲟⲥ ·
…
104 ⲁⲩⲱ ⲁϥⲙⲟⲩ ⲕⲁⲧⲁⲡⲧⲟϣ ⲛⲣⲱⲙⲉ ⲛⲓⲙ · ⲙⲡⲁⲧⲟⲩϫⲉⲕⲡⲙⲁⲣⲧⲏⲣⲓⲟⲛ ⲉⲃⲟⲗ ·
…
105 ⲟⲩⲉⲟⲟⲩ ⲙⲡⲛⲟⲩⲧⲉ · ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
106 ⲧⲙⲉϩⲥⲟ ⲉⲛϭⲟⲙ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ
…
107 ⲁⲥϣⲱⲡⲉ ⲇⲉ ⲛⲧⲉⲣⲟⲩⲁⲣⲭⲉⲓ ⲛⲕⲱⲧ ⲙⲡⲙⲁⲣⲧⲏⲣⲓⲟⲛ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϩⲛⲟⲩⲛⲟϭ ⲉⲛⲉ‐ⲡⲓⲕⲏⲥ · ϫⲉⲛⲁϣⲉ · ⲛϩⲩⲗⲏ ⲙⲛⲛⲣⲱⲙⲉ · ⲉⲧⲣϩⲱⲃ · ⲉⲡⲧⲟⲡⲟⲥ ⲙⲡⲉⲧⲟⲩⲁⲁⲃ ·
…
108 ⲙⲛⲛⲥⲁⲛⲁⲓ · ⲁⲩⲟⲩⲣⲱⲙⲉⲛⲧⲉ ⲧⲡⲟⲗⲓⲥ · ⲉⲓ ⲉϥⲡⲁⲣⲁⲅⲉ · ⲁϥⲛⲁⲩ ⲉⲧϩⲩⲗⲏ ⲙⲡⲧⲟⲡⲟⲥ ⲙⲡⲙⲁⲣⲧⲏⲣⲓⲟⲛ · ⲁϥⲣϣⲡⲏⲣⲉ · ⲁϥⲉⲡⲓⲑⲩⲙⲉⲓ ⲉⲩϣⲉ · ⲉϥⲛⲏϫ ⲉⲃⲟⲗ ·
…
109 ⲡⲉϫⲁϥ · ϫⲉϯⲣⲭⲣⲉⲓⲁ ⲙⲡⲉⲓⲏⲥⲟⲩⲥϩⲁⲏ ⲛϣⲉ · ⲁⲩⲱ ϯⲛⲁϥⲓⲧϥ ·
…
110 ⲁϥϯⲡⲉϥⲟⲩⲟⲓ ⲉⲡϣⲉ · ⲁϥⲧⲁⲗⲟϥ ⲉϫⲱϥ · ⲁϥⲙⲟⲟϣⲉ ⲛⲙⲙⲁϥ · ϣⲁⲛⲧⲉϥⲉⲓ ⲉⲧⲡⲟⲗⲓⲥ · ⲛⲟⲩⲕⲟⲩⲓ ·
…
111 ⲗⲟⲓⲡⲟⲛ ⲁϥⲥⲱⲣⲙ · ⲙⲡϥⲉⲓⲙⲉ · ϫⲉⲉϥⲙⲟⲟϣⲉ ⲉⲧⲱⲛ · ⲉⲃⲟⲗ ϫⲉⲁⲡⲉⲧⲟⲩⲁⲁⲃ ⲥⲱⲣⲙⲡϥⲛⲟⲩⲥ · ϣⲁⲛⲧⲉϥⲉⲓ ⲛϥⲁϩⲉⲣⲁⲧϥ · ϩⲓⲣⲙⲡⲣⲟ · ⲙⲡⲣⲱⲙⲉ ⲛϩⲏⲕⲉ · ⲡⲉⲓⲡⲓⲧⲣⲟⲡⲟⲥ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
112 ⲡⲁⲓ ⲉⲧⲉϥⲟⲩⲱⲛϩ ⲉⲣⲟϥ · ⲛⲉϥⲥⲟⲟⲩⲛ ⲁⲛ · ϫⲉⲉϥⲃⲏⲕ ⲧⲱⲛ ·
…
113 ⲁⲩⲱ ⲉⲥⲡⲉⲧⲟⲩⲁⲁⲃ · ⲁϥϣⲁϫⲉ ⲙⲛⲡⲉⲡⲓⲧⲣⲟⲡⲟⲥ · ⲉϥϫⲱ ⲙⲙⲟⲥ ⲛⲁϥ · ϫⲉⲉⲕϩⲙⲟⲟⲥ ⲉⲕⲣⲟⲩ · ⲉⲥϩⲏⲏⲧⲉ ⲁⲩϫⲓⲟⲩ ⲉⲛϣⲉ ⲙⲡⲁⲧⲟⲡⲟⲥ · ⲁⲗⲗⲁ ⲧⲱⲟⲩⲛ ⲛⲅⲃⲱⲕ ⲉⲣⲙⲡⲣⲟ ⲙⲡⲉⲕⲏⲓ · ⲉⲕⲛⲁϭⲓⲛⲉ ⲙⲡⲉⲣⲱⲙⲉ · ⲉⲣⲉⲡⲉⲓϣⲉ ⲧⲁⲗⲏⲩ ⲉⲣⲟϥ · ⲉϥⲥⲱⲣⲙ ⲉϥⲥⲟⲟⲩⲛ ⲁⲛ · ϫⲉⲉϥⲃⲏⲕ ⲉⲧⲱⲛ · ϫⲉⲁⲛⲟⲕ ⲡⲉ ⲛⲧⲁⲓⲥⲱⲣⲙ ⲙⲙⲟϥ · ⲙⲡⲓⲕⲁⲁϥ ⲉⲓⲙⲉ · ϫⲉⲉϥⲃⲏⲕⲧⲱⲛ ϣⲁⲛⲧⲉϥⲉⲓ ⲉⲡⲉⲓⲙⲁ · ⲛⲅⲛⲁⲩ ⲉⲣⲟϥ · ⲉⲣⲉⲡϣⲉ ⲛⲧⲁϥⲓⲧϥ · ⲛϫⲓⲟⲩⲉ · ⲧⲁⲗⲏⲩ ⲉⲣⲟϥ ·
…
114 ⲛⲧⲉⲣϥⲛⲁⲩ ⲇⲉ · ⲉⲡⲏⲓ ⲁϥⲟⲩⲱⲛ ⲛⲁϥ · ⲁϥⲥⲟⲩⲱⲛϥ · ϫⲉⲡⲟⲓⲕⲟⲛⲟⲙⲟⲥ ⲡⲉ · ⲙⲡⲙⲁⲣⲧⲏⲣⲓⲟⲛ ⲡⲉ · ⲁⲡⲉϥⲛⲟⲩⲥ ⲉⲓ ⲉⲣⲟϥ ·
…
115 ⲛⲧⲉⲩⲛⲟⲩ ⲁϥⲱϣ ⲉⲃⲟⲗ · ϫⲉⲟⲩⲁ ⲡⲉ ⲡⲛⲟⲩⲧⲉ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲁ ⲛⲁⲓ ⲙⲡⲉⲣϭⲱⲛⲧ ⲉⲣⲟⲓ · ⲛⲅⲉⲓ ⲛⲟⲩⲡⲉⲧϩⲟⲟⲩ ⲉϫⲟⲓ · ϫⲉⲁⲓⲣ‐ⲛⲟⲃⲉ ⲉⲣⲟⲕ · ⲁⲓϫⲓⲟⲩⲉ ⲉⲛⲉⲕϣⲉ ·
…
116 ⲉⲓⲥ ⲡⲉⲧⲟⲩⲁⲃⲟⲛ ⲁϥϫⲟⲟⲥ ⲙⲡⲉϥⲉⲡⲓⲧⲣⲟⲡⲟⲥ · ϫⲉϫⲟⲟⲥ ⲛⲡⲣⲱⲙⲉ ⲛⲧⲉⲓϩⲉ · ϫⲉⲉⲧⲃⲉⲟⲩ · ⲙⲉⲕⲉⲓⲛⲅⲣⲟⲩϩⲟⲟⲩ ⲛⲣϩⲟⲟⲩ ⲉⲡⲁⲧⲟⲡⲟⲥ · ⲧⲕⲉϣⲉ ⲛⲧⲁϥⲧⲁⲁϥ ⲉϩⲟⲩⲛ · ⲉⲡⲁⲧⲟⲡⲟⲥ ⲛⲥⲱⲧⲉ · ϩⲁⲡⲟⲩϫⲁⲓ · ⲛⲛⲉⲩⲯⲩⲭⲏ · ⲁⲕⲃⲱⲕ ⲁⲕϥⲓⲧϥ ⲛϫⲓⲟⲩⲉ · ⲁⲗⲗⲁ ⲉⲧⲃⲉⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ : ⲉⲥϩⲏⲏⲧⲉ ⲁⲓⲕⲁⲁⲕ ⲉⲃⲟⲗ · ϥⲓ ⲙⲡϣⲉ ⲛⲅⲕⲁⲁϥ ϩⲙⲡⲉϥⲙⲁ ⲛⲧⲉϥϩⲉ · ⲛⲅⲃⲱⲕ ⲉⲡⲉⲕⲏⲓ · ⲉϥϣⲁⲛⲧⲱⲛ ϩⲧⲟⲟⲩⲉ ⲙⲁⲣϥ ⲧⲁϣⲉⲟⲉⲓϣ ⲙⲡⲛⲧⲟϥⲁⲁϥ ϫⲉⲕⲁⲥ ⲉⲣⲉⲡⲉⲕⲟⲩⲥⲉⲉⲡⲉ ⲉⲣϩⲟⲧⲉ ⲛⲥⲉⲧⲙϫⲓⲟⲩⲉ · ⲉⲧⲧϩⲩⲗⲏ ⲙⲡⲁⲧⲟⲡⲟⲥ · ⲛⲕⲉⲥⲟⲡ · ⲛⲧⲁⲉⲓⲛⲉ ⲉϫⲱⲟⲩ ⲛⲟⲩⲡⲉⲧϩⲟⲟⲩ ·
…
117 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ · ⲁϥϩⲟⲡϥ ⲉⲣⲟϥ ·
…
118 ⲡⲣⲱⲙⲉ ⲇⲉ ⲛϩⲏⲕⲉ · ⲁϥⲧⲱⲟⲩⲛ ⲁϥⲉⲓ ⲉⲃⲟⲗ · ⲁϥϩⲉ ⲉⲡⲣⲱⲙⲉ · ⲉⲣⲉⲡϣⲉ ⲧⲁⲗⲏⲩ ⲉⲣⲟϥ · ⲉϥⲁϩⲉⲣⲁⲧϥ · ϩⲓⲣⲙⲡⲣⲟ ⲙⲡⲉϥⲏⲓ · ⲉϥⲥⲟⲟⲩⲛ ⲁⲛ · ϫⲉⲉϥⲛⲁⲉⲓ ⲧⲱⲛ ·
…
119 ⲁⲩⲱ ⲛⲉϥϫⲱ ⲙⲙⲟⲥ · ϫⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϣⲛϩⲧⲏⲕ ϩⲁⲣⲟⲓ · ⲛⲅⲛⲁ ⲛⲁⲓ · ϫⲉⲁⲓⲣⲛⲟⲃⲉ · ⲱ ⲡⲁϫⲟⲉⲓⲥ ·
…
120 ⲡⲣⲱⲙⲉ ⲇⲉ ⲛϩⲏⲕⲉ · ⲁϥϣⲁϫⲉ ⲛⲙⲙⲁϥ · ϫⲉⲱ ⲡⲁⲙⲉⲣⲓⲧ ⲛⲥⲟⲛ · ⲉⲕⲛⲏⲩ ⲧⲱⲛ · ⲉⲣⲉⲡⲉϣⲉ ⲧⲁⲗⲏⲩ ⲉⲣⲟⲕ ϯϫⲱ ⲙⲙⲟⲥ ⲛⲁⲕ · ϫⲉⲡⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉ · ⲡⲉⲓϣⲉ · ⲗⲟⲓⲡⲟⲛ · ϫⲓⲡⲉⲛⲧϩⲟϥϣⲱⲡⲉ ⲙⲙⲟⲕ · ⲧⲏⲣϥ ⲉⲣⲟⲓ ·
…
121 ⲡⲣⲱⲙⲉ ⲇⲉ ⲁϥⲧⲁⲙⲟϥ · ⲉⲧⲃⲉⲧϩⲉ ⲛⲧⲁϥϥⲓ ⲡϣⲉ · ⲙⲙⲟⲥ ⲙⲛⲧϩⲉ ⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲥⲱⲣⲙ ⲙⲡⲉϥⲛⲟⲩⲥ · ϣⲁⲛⲧϥⲉⲓ · ⲉⲣⲙⲡⲣⲟ ⲙⲡⲏⲓ · ⲙⲡⲣⲱⲙⲉ ⲛϩⲏⲕⲉ · ⲉϥⲟ ⲛⲁⲧⲥⲟⲟⲩⲛ ·
…
122 ⲡⲣⲱⲙⲉ ⲇⲉ · ⲉⲧⲉⲣⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲡⲁⲣⲁⲅⲓⲗⲉ · ⲉⲡⲣⲱⲙⲉ ⲛⲧⲁϥϥⲓ ⲡϣⲉ · ⲛϣⲁ ϫⲉⲛⲓⲙ · ⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲟⲟⲩ ⲛⲁϥ ·
…
123 ⲁⲩⲱ ⲛⲧⲉⲣⲉⲡⲣⲱⲙⲉ · ⲥⲱⲧⲙ ⲉⲛⲁⲓ · ⲁϥⲣϣⲡⲏⲣⲉ ⲁⲩⲱ ⲡⲉϫⲁϥ · ϫⲉⲟⲩⲙⲟⲛⲟⲛ ϫⲉⲟⲩ..ϩⲟⲟⲩ ⲛⲟⲩⲱⲧ ⲙⲙⲁⲧⲉ · ⲁⲗⲗⲁ ⲉⲣϣⲁⲛⲡⲛⲟⲩⲧⲉ · ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲭⲁⲣⲓⲍⲉ ⲛⲁⲓ · ⲙⲡⲟⲩϫⲁⲓ · ϯⲛⲁⲗⲟ ⲁⲛ · ⲉⲓⲣϩⲱⲃ ⲉⲡⲉϥⲧⲟⲡⲟⲥ · ϣⲁⲛⲧⲟⲩϫⲟⲕϥ ⲉⲃⲟⲗ · ⲁⲩⲱ ϯⲛⲁⲧⲁϣⲉⲟⲉⲓϣ · ⲛⲧⲉϥϭⲟⲙ ϩⲙⲙⲁ ⲛⲓⲙ · ⲉϯ ⲃⲱⲕ ⲉⲣⲟϥ ·
…
124 ⲁⲩⲱ ⲛⲧⲉⲩⲛⲟⲩ · ⲁⲡⲉϥϩⲏⲧ ϣⲱⲡⲉ ⲙⲙⲟϥ · ⲁϥⲃⲱⲕ ⲉⲡⲉϥⲏⲓ · ⲉϥϯⲉⲟⲟⲩ ⲙⲡⲛⲟⲩⲧⲉ · ⲙⲛⲡⲉϥⲙⲁⲣⲧⲩⲣⲟⲥ ⲉⲧⲟⲩⲁⲁⲃ · ⲁϥⲛⲕⲟⲧⲕ ϣⲁϩⲧⲟⲟⲩⲉ ·
…
125 ⲁⲩⲱ ⲛⲧⲉⲣⲉⲡⲟⲩⲟⲉⲓⲛ ⲉⲓ ⲉⲃⲟⲗ · ⲁϥⲧⲁϣⲉⲟⲉⲓϣ ⲛⲧⲡⲟⲗⲓⲥ ⲧⲏⲣⲥ · ⲙⲡⲉⲛⲧⲟϥϣⲱⲡⲉ ·
…
126 ⲁⲩⲱ ⲁϥⲃⲱⲕ ⲉⲡⲙⲁ · ⲉⲧⲉⲣⲉⲡϣⲉ ⲛⲏⲩ ⲉⲃⲟⲗ ⲛϩⲏⲧϥ · ⲁϥⲁⲗⲟϥ ⲉϫⲙⲧⲉϥⲛⲁϩⲃ · ⲉⲣⲉⲟⲩⲟⲛ ⲛⲓⲙ ⲑⲉⲱⲣⲉⲓ ⲙⲙⲟϥ · ⲁϥϥⲓⲧϥ ⲉⲡⲧⲟⲡⲟⲥ · ⲙⲡⲉⲧⲟⲩⲁⲁⲃ · ⲁϥⲕⲁⲁϥ ϩⲙⲡⲙⲁ · ⲛⲧⲁϥϥⲓⲧϥ ⲛϩⲏⲧϥ ·
…
127 ⲁⲩⲱ ⲁⲩⲛⲟϭ ⲛϩⲟⲧⲉ · ϩⲉ ⲉϩⲣⲁⲓ ⲉϫⲛⲟⲩⲟⲛ ⲛⲓⲙ · ⲉⲧⲛⲁⲩ ⲉⲣⲟϥ · ⲁⲩⲱ ⲙⲡⲟⲩϫⲱϩ ⲉⲉⲕⲉⲉⲓⲇⲟⲥ · ⲙⲡⲧⲟⲡⲟⲥ ⲛⲕⲉⲥⲟⲡ · ϣⲁⲛⲧⲟⲩϫⲟⲕϥ ⲉⲃⲟⲗ ·
…
128 ⲁⲩⲱ ⲙⲡⲉⲡⲣⲱⲙⲉ · ⲗⲟ ⲉϥⲣϩⲱⲃ · ⲉϥⲡⲟⲅⲟⲙⲉ ϩⲓⲧⲱⲃⲉ · ⲉⲡⲧⲟⲡⲟⲥ ⲙⲡⲉⲧⲟⲩⲁⲁⲃ · ϣⲁⲛⲧⲟⲩϫⲟⲕϥ ⲉⲃⲟⲗ ·
…
129 ⲁⲩⲱ ⲉϥϯⲉⲟⲟⲩ ⲙⲡⲛⲟⲩⲧⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…