1 ⲧⲙⲁⲣⲧⲩⲣⲓⲁ ⲛⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲥⲧⲣⲁⲧⲏⲗⲁⲧⲏⲥ ⲁⲩⲱ ⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲡⲉⲭⲣⲓⲥⲧⲟⲥ ⲛⲧⲁϥϫⲟⲕⲥ ⲉⲃⲟⲗ ϩⲣⲁⲓ ϩⲙⲡϩⲟⲟⲩ ⲛϩⲟⲟⲩ ⲉⲧⲉⲡⲉⲓ ⲡⲉⲥⲟⲩϫⲟⲧⲉ ⲙⲡⲉⲃⲟⲧ ⲁⲧϩⲱⲣ ϩⲛⲟⲩⲉⲓⲣⲏⲛⲏ ϥⲑ ·
…
2 ϩⲙⲡⲉⲟⲩⲟⲉⲓϣ ⲛⲇⲉⲕⲓⲟⲥ ⲙⲛⲟⲩⲁⲗⲉⲣⲓⲁⲛⲟⲥ ⲉⲩⲟ ⲛⲣⲣⲟ ϩⲛⲧⲛⲟϭ ⲙⲡⲟⲗⲓⲥ ϩⲣⲱⲙⲏ · ⲁⲩⲕⲱ ⲉϩⲣⲁⲓ ⲛⲟⲩⲇⲓⲁⲧⲁⲅⲙⲁ ⲙⲛⲟⲩϣⲟϫⲛⲉ ⲛⲟⲩⲱⲧ ϩⲱⲥⲧⲉ ⲉⲧⲣⲉⲟⲩⲟⲛ ⲛⲓⲙ ϩⲙⲙⲁ ⲛⲓⲙ · ⲑⲩⲥⲓⲁⲍⲉ ⲛⲛⲛⲟⲩⲧⲉ ⲛⲥⲉ‐ⲟⲩⲱⲧⲛ ⲛⲁⲩ ⲉⲃⲟⲗ ·
…
3 ⲁⲩⲱ ⲁⲩⲙⲟⲩⲧⲉ ⲉⲛⲥⲩⲅⲕⲗⲏϯⲕⲟⲥⲧⲏⲣⲟⲩ · ⲁⲩⲕⲱ ⲛⲁⲩ ⲉϩⲣⲁⲓ ⲛⲛⲉⲛⲧⲁⲩⲙⲉⲉⲩⲉ ⲉⲣⲟⲟⲩ ϩⲙⲡⲉⲓϣⲟϫⲛⲉ ⲛⲟⲩⲱⲧ · ⲁⲩⲱ ⲁⲩϩⲉ ⲉⲣⲟⲟⲩ ⲉⲩⲟ ⲛⲟⲩϩⲏⲧ ⲛⲟⲩⲱⲧ ⲛⲙⲙⲁⲩ ⲁⲩⲣⲁϣⲉ ⲉⲙⲁⲧⲉ ⲉⲩϫⲱ ⲙⲙⲟⲥ ϫⲉⲧⲛϣⲡϩⲙⲟⲧ ⲛⲧⲛⲛⲛⲟⲩⲧⲉ ⲛⲁⲧⲙⲟⲩ ⲛⲁⲓⲛⲧⲁⲩϭⲱⲗⲡ ⲉⲃⲟⲗ · ⲛⲧⲉⲓⲅⲛⲱⲙⲏ ⲛⲟⲩⲱⲧ · ⲁⲩⲱ ϩⲛⲧⲉⲓⲟⲩⲛⲟⲩ ⲉⲧⲙⲙⲁⲩ ·
…
4 ⲁⲩⲟⲩⲉϩⲥⲁϩⲛⲉ ⲉⲕⲱ ⲉϩⲣⲁⲓ ⲛⲟⲩⲇⲟⲅⲙⲁ ⲉϥⲥⲏϩ ⲛⲧⲉⲓϩⲉ ϩⲛⲟⲩⲥϩⲁⲓ ⲛⲧⲉⲡⲣⲣⲟ ⲉϥⲥⲏϩ ⲙⲡⲉⲓⲧⲩⲡⲟⲥ .
…
5 ⲇⲉⲕⲓⲟⲥ ⲙⲛⲟⲩⲁⲗⲉⲣⲓⲁⲛⲟⲥ ⲛⲣⲣⲣⲱⲟⲩ ⲛⲁⲩⲧⲱⲕⲣⲁⲧⲱⲣ ⲁⲩⲱ ⲛⲉⲩⲥⲉⲃⲏⲥ · ⲙⲛⲛⲥⲩⲅⲕⲗⲏϯⲅⲟⲥ ⲧⲏⲣⲟⲩ ⲛϩⲣⲱⲙⲏ · ⲉⲩⲥϩⲁⲓ ⲛⲛⲉⲧⲟⲩⲏϩ ϩⲙⲙⲁ ⲛⲓⲙ · ⲁⲛⲟⲡϥ ϫⲉⲟⲩⲁⲛⲁⲅⲕⲁⲓⲟⲛ ⲡⲉ ⲉⲧⲣ ⲛⲧⲁⲙⲱⲧⲛ · ⲉⲛⲉⲧⲉⲣⲁⲛⲁⲛ ⲙⲡⲉⲛⲙⲧⲟ ⲉⲃⲟⲗ ·
…
6 ⲉⲡⲉⲓⲇⲏ ϩⲁⲧϩⲏ ⲛⲟⲩⲛⲟϭ ⲛⲟⲩⲟⲉⲓⲉⲓϣ ⲁⲛϩⲉ ⲉⲣⲟⲥ · ϫⲉⲛⲛⲟⲩⲧⲉ ⲛⲛⲉⲛⲉⲓⲟⲧⲉ ⲉⲧⲧⲁϩⲟ ⲉⲣⲁⲧⲥ · ⲛⲧⲉⲛⲙⲛⲧⲣⲣⲟ · ⲁⲩⲱ ⲉⲧⲭⲁⲣⲓⲍⲉ ⲙⲡⲉⲧⲛⲁⲛⲟⲩϥ ⲛⲟⲩⲟⲛ ⲛⲓⲙ · ⲉⲧϩⲁⲡⲉⲛⲁⲙⲁϩⲧⲉ · ⲉⲛⲥⲟⲟⲩⲛ ⲛⲛⲉⲩⲙⲛⲧⲣⲉϥⲣⲡⲉⲛⲛⲁⲛⲟⲩϥ · ⲙⲛⲛⲉⲩⲇⲱⲣⲉⲁ · ⲕⲁⲧⲁⲧϩⲉ ⲛⲧⲁⲩϫⲟⲟⲥ ⲙⲁⲗⲗⲟⲛ ⲇⲉ ⲁⲛⲁⲡⲟⲗⲁⲩⲉ ⲙⲡⲉϫⲣⲟ ⲉⲃⲟⲗ ϩⲓⲧⲟⲟⲧⲟⲩ ⲉϫⲛⲛϩⲉⲑⲛⲟⲥ ⲧⲏⲣⲟⲩ . ⲟⲩⲙⲟⲛⲟⲛ ⲇⲉ ⲁⲗⲗⲁ ⲁⲩⲭⲱⲣⲏⲅⲉⲓ ⲛⲁⲛ ⲛϩⲉⲛⲕⲁⲣⲡⲟⲥ ⲉⲩⲟϣ ϩⲓⲧⲛⲧⲉⲕⲣⲁⲥⲓⲥ ⲙⲡⲁⲏⲣ · ⲉⲧⲃⲉⲡⲁⲓ ⲁⲛⲕⲱ ⲉϩⲣⲁⲓ ⲙⲡⲓⲇⲟⲅⲙⲁ ⲛⲟⲩϣⲟϫⲛⲉ ⲛⲟⲩⲱⲧ ⲁⲛⲟⲛ ⲙⲛⲛⲥⲩⲅⲕⲗⲏϯⲕⲟⲥ ⲧⲏⲣⲟⲩ ϩⲛⲟⲩⲛⲟϭ ⲛⲥⲡⲟⲩⲇⲏ ϩⲱⲥⲧⲉ ⲉⲧⲣⲉⲟⲩⲟⲛ ⲛⲓⲙ ϩⲙⲙⲁ ⲛⲓⲙ · ⲛⲣⲙϩⲉ ⲙⲛⲛϩⲙϩⲁⲗ · ⲙⲙⲁⲧⲟⲓ ⲙⲛⲙⲡⲁⲅⲁⲛⲟⲥ ⲉⲧⲣⲉⲩⲉⲓⲛⲉ ⲉϩⲟⲩⲛ · ⲛϩⲉⲛⲑⲩⲥⲓⲁ · ⲛⲛⲛⲟⲩⲧⲉ ⲛⲥⲉⲟⲩⲱⲧⲛ ⲛⲁⲩ ⲉⲃⲟⲗ · ϩⲉⲛⲧⲱⲃϩ · ⲙⲛϩⲉⲛⲥⲟⲡⲥⲡ ·
…
7 ⲉⲣϣⲁⲛⲟⲩⲁ ⲇⲉ ϩⲓⲧⲟⲟⲧϥ ⲉⲧⲥⲧⲟ ⲉⲃⲟⲗ ⲙⲡⲛⲧⲟⲅⲙⲁ ⲉⲧⲟⲩⲁⲁⲃ ⲛⲧⲁⲛⲕⲉⲗⲉⲩⲉ ⲙⲙⲟϥ ϩⲛⲟⲩϣⲟϫⲛⲉ ⲛⲟⲩⲱⲧ · ⲡⲉⲛⲕⲣⲁⲧⲟⲥ ⲕⲉⲗⲉⲩⲉ ⲉⲉⲧⲡⲡⲁⲓ ⲛⲧⲉⲓⲙⲓⲛⲉ ⲉϩⲟⲩⲛ · ⲉⲩⲉϣⲧⲉⲕⲟ ⲛⲕⲁⲕⲉ ⲛⲥⲉⲡⲁⲣⲁⲇⲓⲇⲟⲩ ⲙⲙⲟϥ ⲛϩⲉⲛⲃⲁⲥⲁⲛⲟⲥ ⲉⲩⲛⲁϣⲧ ·
…
8 ⲡⲉⲧⲛⲁⲥⲱⲧⲙ ⲇⲉ ⲛⲥⲁⲡⲉⲛⲡⲣⲟⲥⲧⲁⲅⲙⲁ ϥⲛⲁϫⲓ ⲉⲃⲟⲗ ϩⲓⲧⲟⲟⲧⲛ ⲛⲟⲩⲛⲟϭ ⲛⲧⲁⲉⲓⲟ ·
…
9 ⲉϥϣⲁⲛⲣⲁⲧⲥⲱⲧⲙ ⲇⲉ ⲛⲥⲱⲛ ⲙⲛⲡⲉⲛⲧⲟⲅⲙⲁ ⲉⲩⲉⲡⲁⲣⲁⲇⲓⲇⲟⲩ ⲙⲙⲟϥ ⲛϯϯⲙⲟⲣⲓⲁ ⲛⲧⲥⲏϥⲉ · ⲏ ⲙⲙⲟⲩ ⲛⲉⲓⲟⲟⲩⲉ · ⲏ ⲛⲥⲉⲧⲁⲁϥ ⲛϩⲣⲉ ⲛⲛⲉⲑⲏⲣⲓⲟⲛ ⲙⲛⲛϩⲁⲗⲁⲧⲉ ·
…
10 ⲛϩⲟⲩⲟ ⲇⲉ ⲛⲉⲭⲣⲓⲥⲧⲓⲁⲛⲟⲥ ⲉⲩⲉϣⲱⲡⲉ ϩⲁϯⲁⲡⲟⲫⲁⲥⲓⲥ ⲛⲧⲉⲓⲙⲓⲛⲉ ·
…
11 ⲛⲉⲧⲛⲁⲥⲱⲧⲙ ⲇⲉ ϩⲱⲟⲩ ⲛⲥⲁⲡⲉⲛⲇⲟⲅⲙⲁ ⲉϥⲉϣⲱⲡⲉ ⲉϥⲟⲛϩ ϩⲛⲟⲩⲙⲛⲧⲙⲁⲕⲁⲣⲓⲟⲥ ·
…
12 ⲛⲧⲉⲣⲟⲩⲧⲱϭⲉ ⲇⲉ ⲉⲃⲟⲗ ⲙⲡⲉⲡⲣⲟⲥⲧⲁⲅⲙⲁ ⲙⲡⲣⲣⲟ · ⲁⲧⲡⲟⲗⲓⲥ ⲧⲏⲣⲥ ϩⲣⲱⲙⲏ ⲙⲟⲩϩ ⲛϣⲧⲟⲣⲧⲣⲟⲓϩⲟⲧⲉ ⲟⲩⲙⲟⲛⲟⲛ ⲇⲉ ⲁⲗⲗⲁ ⲛⲕⲉⲡⲟⲗⲓⲥ ⲧⲏⲣⲟⲩ ⲁⲩϣⲧⲟⲣⲧⲣ · ⲉⲃⲟⲗ ϫⲉⲁⲩⲧⲛⲛⲟⲟⲩ ϣⲁⲣⲟⲟⲩ ⲙⲡⲉⲓⲇⲓⲁⲧⲁⲅⲙⲁ ⲛⲟⲩⲱⲧ · ⲛⲁⲣⲭⲱⲛ ⲇⲉ ⲕⲁⲧⲁⲡⲟⲗⲓⲥ ⲁⲩⲟⲩⲉϩⲥⲁϩⲛⲉ ⲛⲙⲙⲏⲏϣⲉ · ⲉⲧⲣⲉⲩϫⲱⲕ ⲉⲃⲟⲗ ⲛⲛⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟⲟⲩ ⲛⲁⲩ ϩⲛⲟⲩϭⲉⲡⲏ .
…
13 ⲁⲥϣⲱⲡⲉ ⲇⲉ ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲁⲩⲡⲟⲗⲉⲙⲟⲥ ⲧⲱⲟⲩⲛ ⲉϫⲛⲛⲉϩⲣⲱⲙⲁⲓⲟⲥ · ⲉⲃⲟⲗ ϩⲓⲧⲛⲛⲃⲁⲣⲃⲁⲣⲟⲥ ·
…
14 ⲉⲩⲧⲣⲉⲡⲉⲩⲁⲩⲉⲓⲛ ϣⲟⲃⲉ · ⲁⲩⲥⲟⲃⲧⲉ ϩⲱⲟⲩ ⲙⲡⲉⲩⲥⲧⲣⲁⲧⲓⲩⲙⲁ · ⲉⲧⲣⲉⲩⲡⲟⲗⲉⲙⲉⲓ ⲛⲙⲙⲁⲩ · ⲁⲩⲱ ⲁⲩⲟⲩⲉϩ‐ⲥⲁϩⲛⲉ ⲉⲧⲣⲉⲛⲁⲣⲩⲑⲙⲟⲥ ⲕⲁⲧⲁⲙⲁ ⲁⲩⲱ ⲕⲁⲧⲁⲡⲟⲗⲓⲥ · ⲉⲓ ⲛⲥⲉϯⲧⲟⲟⲧⲟⲩ ⲛⲙⲙⲁⲩ ·
…
15 ⲛⲧⲉⲣⲟⲩⲉⲓ ⲇⲉ ϩⲛⲧⲟⲩⲉⲓ ⲧⲟⲩⲉⲓ ⲛⲙⲡⲟⲗⲓⲥ · ⲉⲩⲥⲃⲧⲱⲧ ϩⲛⲟⲩⲥⲡⲟⲩⲇⲏ · ⲁϥⲉⲓ ϩⲱⲱϥ ⲛϭⲓⲡⲁⲣⲩⲑⲙⲟⲥ ⲛⲛⲉⲧⲟⲩⲙⲟⲩⲧⲉ ⲉⲣⲟⲟⲩ ϫⲉⲙⲁⲣⲧⲩⲥⲓⲟⲛ · ⲛⲉⲧϣⲟⲟⲡ ϩⲛⲧϣⲟⲣⲡ ⲛϩⲁⲣⲙⲉⲛⲓⲁ · ⲉⲩϩⲁⲣⲁⲧϥ ⲛⲟⲩⲧⲣⲓⲃⲟⲩⲛⲟⲥ · ⲉⲡⲉϥⲣⲁⲛ ⲡⲉ ⲥⲁⲣⲇⲟⲛⲓⲕⲟⲥ .
…
16 ⲇⲉⲕⲓⲟⲥ ⲇⲉ ⲁϥⲉⲓ ⲉⲃⲟⲗ ⲉⲡⲡⲟⲗⲉⲙⲟⲥ · ⲟⲩⲁⲗⲉⲣⲓⲁⲛⲟⲥ ⲇⲉ ⲁϥϭⲱ ϩⲛϩⲣⲱⲙⲏ · ⲉϥⲇⲓⲟⲓⲕⲉⲓ ⲛⲛⲉϩⲃⲏⲩⲉ ⲛⲧⲙⲛⲧⲣⲣⲟ ·
…
17 ⲡⲡⲟⲗⲉⲙⲟⲥ ⲇⲉ ⲁϥⲧⲁϫⲣⲟ ϩⲛⲧⲙⲏⲏⲧⲉ ⲛⲛⲃⲁⲣⲃⲁⲣⲟⲥ · ⲙⲛⲛⲉϩⲣⲱⲙⲁⲓⲟⲥ · ⲁⲩⲁϩⲉⲣⲁⲧⲟⲩ ⲟⲩⲃⲉⲛⲉⲩⲉⲣⲏⲩ ·
…
18 ⲛⲧⲉⲣⲟⲩⲙⲟⲩⲛ ⲇⲉ ⲉⲃⲟⲗ ⲛⲧⲉⲓϩⲉ · ⲛⲟⲩⲙⲏⲏϣⲉ ⲛϩⲟⲟⲩ . ⲟⲩⲁ ⲇⲉ ϩⲙⲡⲁⲣⲩⲑⲙⲟⲥ ⲛⲛⲉⲉⲧⲟⲩⲙⲟⲩⲧⲉ ⲉⲣⲟⲟⲩ ⲙⲁⲣⲧⲩⲥⲓⲟⲛⲉ ⲡⲉϥⲣⲁⲛ ⲡⲉ ⲙⲉⲣⲕⲟⲩⲣⲓⲟⲥ ⲁϥⲛⲁⲩ ⲉⲩⲣⲱⲙⲉ ⲛⲟⲩⲟⲉⲓⲛ ⲉϥϫⲟⲥⲉ · ⲉⲩⲛϩⲉⲛϩⲃⲥⲱ ⲉⲩⲡⲣⲉⲓⲱⲟⲩ ϩⲓϫⲱϥ · ⲁϥⲁⲙⲁϩⲧⲉ ⲛⲟⲩⲥⲏϥⲉ ⲉⲥⲧⲟⲕⲙ ϩⲛⲧⲉϥϭⲓϫ ⲛⲟⲩⲛⲁⲙ · ⲁⲩⲱ ⲛⲉϥϫⲱ ⲙⲙⲟⲥ ⲛⲁϥ · ϫⲉⲙⲉⲣⲕⲟⲩⲣⲓⲉ · ⲙⲡⲣⲣϩⲟⲧⲉ · ⲟⲩⲇⲉ ⲙⲡⲣϣⲗⲁϩ ·
…
19 ⲛⲧⲁⲩⲧⲛⲛⲟⲟⲩ ⲅⲁⲣ ⲉⲃⲟⲏⲑⲉⲓ ⲉⲣⲟⲕ ⲁⲩⲱ ⲉⲟⲩⲟⲛϩⲕ ⲉⲃⲟⲗ ⲛⲣⲉϥϫⲣⲟ ·
…
20 ϫⲓⲛⲁⲕ ⲛⲧⲉⲓⲥⲏϥⲉ ⲉⲃⲟⲗ ϩⲓⲧⲟⲟⲧ ⲛⲅⲃⲱⲕ ⲉⲃⲟⲗ · ⲉⲛⲃⲁⲣⲃⲁⲣⲟⲥ · ⲁⲩⲱ ⲉⲕϣⲁⲛϫⲣⲟ ⲉⲣⲟⲟⲩ · · ⲙⲡⲣⲣⲡⲱⲃϣ ⲙⲡϫⲟⲉⲓⲥ ⲡⲉⲕⲛⲟⲩⲧⲉ .
…
21 ⲡⲁⲓ ⲇⲉ ⲛⲧⲉⲣϥϣⲱⲡⲉ ϩⲛⲟⲩⲉⲕⲥⲧⲁⲥⲓⲥ ⲁϥⲙⲉⲉⲩⲉ ϫⲉⲟⲩⲁ ⲡⲉ ϩⲛⲛⲛⲟϭ ⲛⲁⲣⲭⲱⲛⲛⲧⲉ ⲡⲣⲣⲟ ⲡⲉⲧϣⲁϫⲉ ⲛⲙⲙⲁϥ :
…
22 ⲛⲧⲉⲣⲉϥϫⲓ ⲇⲉ ⲛⲧⲥⲏϥⲉ · ⲁⲩⲱ ⲁϥⲙⲟⲩϩ ⲉⲃⲟⲗ · ϩⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲁϥⲃⲱⲕ ⲉϩⲟⲩⲛ ϩⲛⲧⲉⲩⲙⲏⲏⲧⲉ · ⲁϥⲙⲟⲩⲟⲩⲧ ⲙⲡⲛⲟϭ ⲉⲧϩⲓϫⲱⲟⲩ ⲁⲩⲱ ϩⲉⲛⲕⲉⲙⲏⲏϣⲉ ⲛⲙⲙⲁϥ · ϩⲱⲥⲧⲉ ⲛⲧⲉⲡⲉϥϭⲃⲟⲓ ϩⲓⲥⲉ ⲉϥϩⲓⲟⲩⲉ ⲁⲩⲱ ϩⲓⲧⲙⲡⲉⲥⲛⲟϥ ⲉⲧⲛⲁϣⲱϥ · ⲛⲧⲉⲧⲉϥϭⲓϫ ⲧⲱⲣϭ ⲉϩⲟⲩⲛ ⲉⲧⲧⲱⲣⲉ ⲛⲧⲥⲏϥⲉ ·
…
23 ⲧⲁⲓ ⲧⲉ ⲧϩⲉ ⲛⲧⲁⲩⲡⲱⲧ ⲛϭⲓⲛⲃⲁⲣⲃⲁⲣⲟⲥ · ⲁⲩⲱ ⲁⲩϭⲱⲧⲡ ϩⲓϩⲏ ⲛⲛⲉϩⲣⲱⲙⲁⲓⲟⲥ ·
…
24 ⲧⲟⲧⲉ ⲡⲣⲣⲟ ⲇⲉⲕⲓⲟⲥ · ⲛⲧⲉⲣϥⲉⲓⲙⲉ ⲉⲧⲙⲛⲧϫⲁⲣϩⲏⲧ ⲙⲡⲉⲓⲣⲱⲙⲉ ⲛϫⲱⲱⲣⲉ · ⲁϥⲙⲟⲩⲧⲉ ⲉⲣⲟϥ ⲁϥϯ ⲛⲁϥ ⲛⲟⲩⲁⲝⲓⲱⲙⲁ · ⲁϥⲁⲁϥ ⲛⲥⲧⲣⲁϯⲗⲁⲧⲏⲥ ⲁⲩⲱ ⲛⲁⲣⲭⲱⲛ ⲉϫⲙⲡⲉϥⲥⲧⲣⲁⲧⲉⲩⲙⲁ ⲧⲏⲣϥ ·
…
25 ⲇⲉⲕⲓⲟⲥ ⲇⲉ ⲉϥⲙⲉⲉⲩⲉ ϫⲉⲛⲧⲁϥϫⲣⲟ ⲉⲡⲡⲟⲗⲉⲙⲟⲥ ϩⲓⲧⲛⲧⲉⲡⲣⲟⲛⲓⲁ ⲛⲛⲛⲟⲩⲧⲉ · ⲁϥⲣⲁϣⲉ ⲉⲙⲁⲧⲉ · ⲁⲩⲱ ϩⲉⲛⲭⲣⲏⲙⲁ ⲉⲛⲁϣⲱⲟⲩ ⲁϥⲥⲁⲣⲟⲩ ⲉϫⲛⲙⲙⲁⲧⲟⲓ · ⲙⲡⲉϩⲟⲟⲩ ⲉⲧⲙⲙⲁⲩ · ⲁⲩϫⲟⲟⲩ ⲛⲛⲁⲣⲓⲑⲙⲟⲥ ⲉⲛⲉⲩⲧⲟⲡⲟⲥ ⲙⲙⲓⲛⲙⲙⲟⲟⲩ .
…
26 ⲛⲧⲟϥ ϩⲱⲱϥ ⲛⲉϥⲣϣⲁ ⲕⲁⲧⲁⲡⲟⲗⲓⲥ ⲛⲓⲙ · ⲛⲧⲁϥⲡⲁⲣⲁⲅⲉ ⲙⲙⲟⲟⲩ ⲉϥⲃⲏⲕ ⲉϩⲣⲱⲙⲏ .
…
27 ϩⲣⲁⲓ ⲇⲉ ϩⲛⲟⲩⲟⲩϣⲏ ⲉⲣⲉⲡⲉⲥⲧⲣⲁⲧⲉⲩⲙⲁ ⲟⲃϣ ⲁϥⲁϩⲉⲣⲁⲧϥ ϩⲓϫⲛⲙⲉⲣⲕⲟⲩⲣⲓⲟⲥ ⲛϭⲓⲟⲩⲁⲅⲅⲉⲗⲟⲥ ϩⲙⲡⲉⲥⲭⲏⲙⲁ ⲙⲡⲣⲱⲙⲉ ⲛⲧⲁϥⲛⲁⲩ ⲉⲣⲟϥ ϩⲙⲡⲡⲟⲗⲉⲙⲟⲥ · ⲁⲩⲱ ⲁϥⲧⲉⲃⲥⲡⲉϥⲥⲡⲓⲣ · ⲁϥⲧⲟⲩⲛⲟⲥϥ ·
…
28 ⲛⲧⲉⲣⲉϥⲛⲁⲩ ⲇⲉ ⲉⲣⲟϥ · ⲁϥϣⲱⲡⲉ ϩⲛⲟⲩϩⲟⲧⲉ ⲡⲉϫⲉⲡⲁⲅⲅⲉⲗⲟⲥ ⲇⲉ ⲛⲁϥ · ϫⲉⲉⲛⲉⲕⲉⲓⲣⲉ ⲙⲡⲙⲉⲉⲩⲉ ⲙⲡϣⲁϫⲉ ⲛⲧⲁⲓϫⲟⲟϥ ⲛⲁⲕ ϩⲙⲡⲡⲟⲗⲉⲙⲟⲥ ⲱ ⲙⲉⲣⲕⲟⲩⲣⲓⲟⲥ · ϭⲱϣⲧ ⲙⲡⲣⲣⲡⲱⲃϣ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ϩⲁⲡⲥ ⲅⲁⲣ ⲉⲣⲟⲕ ⲡⲉ ⲉⲧⲣⲉⲕⲁⲅⲱⲛⲓⲍⲉ ⲉϫⲙⲡⲉϥⲣⲁⲛ ⲕⲁⲗⲱⲥ · ⲁⲩⲱ ⲛⲅϫⲓ ⲙⲡⲉⲕⲗⲟⲙ ⲙⲡⲉϫⲣⲟ ⲛⲧⲙⲛⲧⲣⲣⲟ ⲛⲙⲡⲏⲩⲉ · ⲡⲁⲓ ⲛⲧⲁϥⲥⲃⲧⲱⲧϥ ⲛⲛⲉⲧⲙⲉ ⲙⲙⲟϥ ⲧⲏⲣⲟⲩ . ⲁⲩⲱ ⲛⲧⲉⲣⲉϥϫⲉⲛⲁⲓ ⲁϥⲥⲁϩⲱϥ ⲉⲃⲟⲗ ⲙⲙⲟϥ ϩⲛⲧⲉⲩⲛⲟⲩ ⲉⲧⲙⲙⲁⲩ .
…
29 ⲛⲧⲉⲣⲉⲡϩⲏⲧ ⲙⲡⲙⲁⲕⲁⲣⲓⲟⲥ ϣⲱⲡⲉ ⲙⲙⲟϥ · ⲁϥⲣⲡⲙⲉⲉⲩⲉ ⲙⲡϣⲁϫⲉ · ⲁⲩⲱ ⲛϥⲣϣⲡⲏⲣⲉ ⲛⲧϭⲟⲙ ⲛⲧⲙⲛⲧⲙⲁⲓⲣⲱⲙⲉ ⲙⲡⲛⲟⲩⲧⲉ · ⲛⲉⲁϥⲥⲱⲧⲙ ⲅⲁⲣ ⲉⲧⲃⲉⲧⲡⲓⲥⲧⲓⲥ ⲛⲛⲉⲭⲣⲓⲥⲧⲓⲁⲛⲟⲥ · ϩⲓⲧⲛⲛⲉϥⲉⲓⲟⲧⲉ ·
…
30 ⲡⲉϥⲉⲓⲱⲧ ⲇⲉ ⲡⲉⲕⲟⲣⲇⲓⲁⲛⲟⲥ · ⲁⲩⲱ ⲛⲉϥⲟ ⲙⲡⲣⲓⲙⲏⲕⲩⲣⲓⲟⲥ ⲉⲡⲉⲓⲁⲣⲓⲑⲙⲟⲥ ⲛⲟⲩⲱⲧ · ⲡϣⲏⲣⲉ ⲇⲉ ϣⲏⲙ · ⲛⲉϥⲛⲁⲣϫⲟⲩⲧⲏ ⲛⲣⲟⲙⲡⲉ · ⲛⲉⲁϥⲥⲱⲧⲙ ⲅⲁⲣ ⲉⲃⲟⲗ ϩⲓⲧⲙⲡⲉϥⲉⲓⲱⲧ ⲛϩⲁϩ ⲛⲥⲟⲡ ⲉϥϫⲱ ⲙⲙⲟⲥ ϫⲉⲛⲁⲓⲁⲧϥ ⲙⲡⲉⲧⲛⲁⲣⲙⲁⲧⲟⲓ ϩⲁⲣⲁⲧϥ ⲙⲡⲣⲣⲟ ⲛⲧⲡⲉ · ϥⲛⲁⲭⲁⲣⲓⲍⲉ ⲛⲁϥ ⲛϩⲉⲛⲛⲟϭ ⲛⲧⲁⲉⲓⲟ ⲛⲁⲧⲟⲩⲉⲓⲛⲉ · ⲁⲩⲱ ϥⲛⲁⲙⲓϣⲉ ⲉϩⲣⲁⲓ ⲉϫⲱϥ ⲛⲛⲁϩⲣⲛⲛⲉϥϫⲁϫⲉ .
…
31 ⲡⲣⲣⲟ ⲅⲁⲣ ⲉⲧⲙⲙⲁⲩ ⲛⲧⲟϥ ⲡⲉ ⲛⲧⲁϥⲧⲁⲙⲓⲉ ⲡⲧⲏⲣϥ ϩⲙⲡⲉϥϣⲁϫⲉ ·
…
32 ⲧⲡⲉ ⲙⲉⲛ ⲁϥⲧⲁϩⲟⲥ ⲉⲣⲁⲧⲥ ⲛⲧϩⲉ ⲛⲟⲩϭⲉⲡⲏ · ⲉⲁϥⲕⲟⲥⲙⲉⲓ ⲙⲙⲟⲥⲟⲛ ϩⲉⲛⲥⲓⲟⲩ ⲉⲩⲣⲟⲩⲟⲉⲓⲛ · ⲡⲕⲁϩ ⲇⲉ ϩⲛϩⲉⲛϩⲣⲏⲣⲉ ⲉⲛⲉⲥⲱⲟⲩ · ⲉⲩⲟ ⲛⲥϯⲛⲟⲩϥⲉ ⲉⲧⲣⲉⲩϣⲱⲡⲉ ⲛⲥⲟⲗⲥⲗ ⲙⲛⲟⲩⲧⲁⲗϭⲟ ⲛⲛⲣⲱⲙⲉ · ⲑⲁⲗⲁⲥⲥⲁ ϩⲱⲱⲥ ⲉⲧⲣⲉⲛⲉϫⲏⲩⲥϭⲏⲣ ⲛϩⲏⲧⲥ ⲁⲩⲱ ⲁϥⲕⲁⲁⲥ ⲙⲙⲁ ⲛⲥⲁⲛϣⲛ ⲛⲧⲃⲧ ·
…
33 ⲁⲩⲱ ϫⲉⲛⲧⲟϥ ⲡⲉⲧⲛⲏⲩ ⲉⲕⲣⲓⲛⲉ ⲛⲛⲉⲧⲟⲛϩ ⲙⲛⲛⲉⲧⲙⲟⲟⲩⲧ ⲛϥϯ ⲙⲡⲟⲩⲁ · ⲡⲟⲩⲁ ⲕⲁⲧⲁⲛⲉϥϩⲃⲏⲩⲉ . ⲛⲧⲉⲣⲉϥⲣⲡⲙⲉⲉⲩⲉ ⲇⲉ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲛϣⲁϫⲉ ⲙⲡⲉϥⲉⲓⲱⲧ ϩⲣⲁⲓ ⲛϩⲏⲧϥ ⲁⲩⲱ ⲡϭⲱⲗⲡ ⲉⲃⲟⲗ ⲛⲧⲁϥⲛⲁⲩ ⲉⲣⲟϥ · ⲁϥϣⲱⲡⲉ ϩⲛⲟⲩⲛⲟϭ ⲛⲧⲱⲃⲥ ⲁϥⲁⲣⲭⲉⲓ ⲛⲣⲓⲙⲉ ⲁⲩⲱ ⲛⲁϣⲁϩⲟⲙ · ϫⲉⲟⲩⲟⲉⲓ ⲛⲁϥ ⲁⲛⲟⲕ ⲡⲓⲣⲉϥⲣ ⲛⲟⲃⲉ · ⲉⲓⲟ ⲛⲧϩⲉ ⲛⲟⲩⲕⲗⲁⲇⲟⲥ ⲛⲁⲧⲕⲁⲣⲡⲟⲥ ⲉⲁϥϯⲟⲩⲱ ⲉⲙⲛⲧⲁϥ ⲛⲟⲩⲛⲉ ⲙⲙⲁⲩ ⲛⲧⲉⲡⲥⲟⲟⲩⲛ ⲙⲡⲉⲟⲟⲩ ⲙⲡⲛⲟⲩⲧⲉ ·
…
34 ⲉϯ ⲇⲉ ⲉϥϣⲁϫⲉ ⲛⲧⲉⲩⲛⲟⲩ ⲁⲡⲣⲣⲟ ϫⲟⲟⲩ ⲛⲥⲛⲁⲩ ⲛⲛⲉⲧⲟⲩⲙⲟⲩⲧⲉ ⲉ ⲣⲟⲟⲩ ϫⲉⲥⲉⲗⲉⲛϯⲁⲣⲓⲟⲥ · ⲙⲛϩⲉⲛⲕⲟⲟⲩⲉ ⲛⲙⲙⲁⲩⲉⲧⲣⲉⲩⲙⲟⲩⲧⲉ ⲉⲣⲟϥ ⲛⲁϥ · ⲉⲃⲟⲗ ϫⲉⲛⲧⲟϥ ⲡⲉⲧⲟ ⲛⲣⲉϥϫⲓϣⲟϫⲛⲉ ⲛⲁϥ
…
35 ⲁϥⲡⲁⲣⲁⲓⲧⲉ ⲉⲧⲙⲃⲱⲕ ⲉϥϫⲱ ⲙⲙⲟⲥ · ϫⲉⲡⲁⲥⲱⲙⲁ ⲟ ⲛⲁⲧϭⲟⲙ ⲁⲡⲣⲣⲟ ⲕⲁⲣⲱϥ · ⲙⲡⲉϩⲟⲟⲩ ⲉⲧⲙⲙⲁⲩ · ⲙⲡⲉϥⲣⲁⲥⲧⲉ ⲇⲉ ⲟⲛ ⲁϥϫⲟⲟⲩ ⲛⲥⲱϥ ϩⲟⲙⲟⲓⲟⲥ ⲛϭⲓⲇⲉⲕⲓⲟⲥ ·
…
36 ⲛⲧⲉⲣⲉϥⲉⲓ ⲇⲉ ϣⲁⲣⲟϥ ⲁⲩϫⲓ ϣⲟϫⲛⲉ ⲙⲛⲛⲉⲩⲉⲣⲏⲩ ⲉⲡϩⲱⲃ ⲧⲉⲧⲛⲧⲙⲏⲏⲧⲉ ·
…
37 ⲡⲉϫⲉⲡⲣⲣⲟ ⲛⲁϥ ϫⲉⲙⲁⲣⲟⲛⲃⲱⲕ ⲱ ⲙⲉⲣⲕⲟⲩⲣⲓⲟⲥ ⲉⲡⲛⲟϭ ⲛⲉⲣⲡⲉ ⲛⲧⲁⲣⲧⲉⲙⲏⲥ · ⲛⲧⲛⲧⲁⲗⲟ ⲛⲁⲥ · ⲉϩⲣⲁⲓ ⲛϩⲉⲛⲑⲩⲥⲓⲁ ·
…
38 ⲛⲧⲉⲣⲉϥⲙⲟⲟϣⲉ ⲇⲉ ⲛϭⲓⲡⲣⲣⲟ · ⲁⲩⲛⲟϭ ⲙⲙⲏⲏϣⲉ ⲟⲩⲁϩⲟⲩ ⲛⲥⲱϥ .
…
39 ⲡⲙⲁⲕⲁⲣⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲁϥⲕⲟⲧϥ ⲉⲡⲁϩⲟⲩ ⲁϥϩⲟⲡϥ ϩⲙⲡⲉⲡⲣⲁⲓⲧⲟⲣⲓⲟⲛ ·
…
40 ⲟⲩⲁ ⲇⲉ ⲁϥⲇⲓⲁⲃⲁⲗⲗⲉ ⲙⲙⲟϥ ⲛⲛⲁϩⲣⲛⲡⲣⲣⲟ · ⲉϥϫⲱ ⲙⲙⲟⲥ · ϫⲉⲡⲛⲟϭ ⲛⲣⲣⲟ ⲉⲧⲁⲙⲁϩⲧⲉ ⲁⲩⲱ ⲛⲣⲉϥϫⲣⲟ ⲛⲉⲩⲥⲉⲃⲏⲥ · ⲡⲉⲛⲧⲁⲩⲥⲟⲧⲡϥ ⲉⲃⲟⲗ ϩⲓⲧⲛⲛⲛⲟⲩⲧⲉ ⲛⲣⲉϥⲇⲓⲟⲉⲓⲕⲉⲓ ⲛⲧⲙⲛⲧⲣⲣⲟ ⲧⲏⲣⲥ ⲛⲛⲉϩⲣⲱⲙⲁⲓⲟⲥ · ⲙⲁϯⲧϩⲉ ⲛⲁⲓ ⲛⲧⲁϣⲁϫⲉ ⲛⲅⲥⲱⲧⲙ ⲉⲣⲟⲓ ϩⲛⲟⲩⲙⲛⲧⲣⲙⲣⲁϣ .
…
41 ⲙⲉⲣⲕⲟⲩⲣⲓⲟⲥ ⲡⲉⲛⲧⲁⲧⲉⲕⲟⲩⲛⲁⲙ ⲉⲧⲁⲙⲁϩⲧⲉ ϫⲁⲥⲧϥ ⲁⲩⲱ ⲁⲕϯⲉⲟⲟⲩ ⲛⲁϥ · ϩⲛⲧⲙⲛⲧⲣⲣⲟ ⲛⲛⲉϩⲣⲱⲙⲁⲓⲟⲥ ⲙⲡⲉϥⲓ ⲛⲙⲙⲁⲛ ⲕⲁⲧⲁⲡⲉⲕⲟⲩⲉϩⲥⲁϩⲛⲉ ⲛϥⲣⲑⲩⲥⲓⲁ ϩⲙⲡⲉⲣⲡⲉ ⲛⲧⲛⲟϭ ⲛⲁⲣⲧⲉⲙⲏⲥ ⲛϥⲧⲁⲗⲟ ⲛⲁⲥ ⲉϩⲣⲁⲓ ⲕⲁⲧⲁⲡⲟⲩⲉϩⲥⲁϩⲛⲉ ⲉⲧⲁⲙⲁϩⲧⲉ .
…
42 ⲁϥⲟⲩⲱϣⲃ ⲛϫⲓⲡⲣⲣⲟ ϫⲉⲛⲓⲙ ⲡⲉ ⲡⲁⲓ ⲡⲉϫⲁϥ ϫⲉⲙⲉⲣⲕⲟⲩⲣⲓⲟⲥ ⲡⲁⲓ ⲛⲧⲁⲕϯ ⲛⲁϥ ⲙⲡⲉϫⲣⲟ ⲙⲛⲧⲙⲛⲧⲛⲟϭ ⲛⲥⲁϥ ⲙⲛϣⲟⲙⲛⲧ ⲉⲡϩⲟⲟⲩ ⲛϩⲟⲟⲩ · ⲁⲩⲱ ⲁⲕϫⲓⲥⲧϥ ϩⲙⲡⲁⲝⲓⲱⲙⲁ ⲛϩⲟⲩⲟ ⲛⲧⲙⲛⲧⲛⲟϭ
…
43 ⲡⲁⲓ ⲇⲉ ⲟⲩⲙⲟⲛⲟⲛ · ϫⲉⲁϥⲣⲁⲧⲥⲱⲧⲙ ⲛⲥⲁⲧⲉⲕⲙⲛⲧⲛⲟϭ ⲁⲗⲗⲁ ⲁϥⲣ..ⲡⲕ ⲉⲡⲉⲓⲑⲉ ⲛϩⲁϩ ⲉⲩϣⲙϣⲉ ⲛⲛⲛⲟⲩⲧⲉ ·
…
44 ⲉⲕϣⲁⲛⲛϫⲛⲟⲟⲩ ⲇⲉ ⲉⲕⲛⲁⲉⲓⲙⲉ ⲉⲡϫⲱⲕ ⲛⲛⲉⲛⲧⲁⲓϫⲟⲟⲩ ⲛⲁⲕ .
…
45 ⲇⲉⲕⲓⲟⲥ ⲇⲉ ⲡⲉϫⲁϥ ⲇⲉ ϩⲁⲣⲏⲩ ⲛⲧⲁⲟⲩⲫⲑⲟⲛⲟⲥ ϣⲱⲡⲉ ϩⲛⲡⲉⲕϩⲏⲧ ⲉϩⲟⲩⲛ ⲉⲡⲣⲱⲙⲉ ⲁⲕϣⲁϫⲉ ϩⲓⲛⲁⲓ ⲁⲗⲗⲁ ⲛϯⲛⲁⲡⲓⲥⲧⲉⲩⲉ ⲛⲁⲕ ⲁⲛ ⲉⲓⲙⲏⲧⲓ ⲛⲧⲁⲉⲓⲙⲉ ϩⲛⲟⲩⲟⲩⲱⲣϫ ⲉⲧⲙⲉ ⲁⲩⲱ ⲛⲧⲁⲛⲁⲩ ⲉⲡϩⲱⲃ ϩⲛⲟⲩⲱⲣϫ ⲛϩⲟ ϩⲓϩⲟ ·
…
46 ⲡⲛⲁⲩ ⲅⲁⲣ ϩⲛⲛⲃⲁⲗ ϣⲁⲩⲧⲁⲛϩⲟⲩⲧϥ ⲉϩⲟⲩⲉ ⲡⲥⲱⲧⲙ ϩⲛⲙⲙⲁϫⲉ .
…
47 ⲕⲁⲣⲱⲕ ϭⲉ ⲧⲉⲛⲟⲩ ⲛⲅⲧⲙⲧⲁⲩⲉⲕⲉⲗⲁⲁⲩ ⲛϣⲁϫⲉ ⲉⲡⲣⲱⲙⲉ · ⲁⲩⲱ ⲉϣⲱⲡⲉ ⲛⲧⲁⲕⲕⲁⲧⲏⲅⲟⲣⲉⲓ ⲙⲙⲟϥ ϩⲛⲟⲩⲫⲑⲟⲛⲟⲥ ⲕⲁⲧⲁⲧϩⲉ ⲛⲧⲁⲓϫⲟⲟⲥ ⲛⲁⲕ ⲉⲓⲙⲉ ⲛⲁⲕ ϫⲉⲉⲕⲛⲁϣⲱⲡⲉ ⲉⲕϭⲏⲡ ⲉⲩⲛⲟϭ ⲛϯⲙⲟⲣⲓⲁ .
…
48 ⲉⲣϣⲁⲛ ⲛⲉⲛⲧⲁⲕϫⲟⲟⲩ ⲇⲉ ϣⲱⲡⲉ ⲉⲩⲟ ⲙⲙⲉ ⲕⲛⲁϫⲓ ⲛϩⲉⲛⲛⲟϭ ⲛⲇⲱⲣⲉⲁ ⲉⲃⲟⲗ ϩⲓⲧⲟⲟⲧⲛ · ϩⲱⲥ ⲉⲕⲟ ⲛⲟⲩϩⲏⲧ ⲛⲟⲩⲱⲧ ⲛⲙⲙⲁⲛ ⲉϩⲟⲩⲛ ⲉⲛⲛⲟⲩⲧⲉ · ⲁⲩⲱ ⲉϩⲟⲩⲛ ⲉⲛⲣⲣⲱⲟⲩ .
…
49 ⲁϥⲕⲉⲗⲉⲩⲉ ⲉⲧⲣⲉⲩⲉⲓⲛⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛⲧϯⲙⲏ ⲉⲧⲉϣϣⲉ ⲛϣⲟⲣⲡ . ⲡⲁⲓ ⲇⲉ ⲛⲧⲉⲣϥⲉⲓ ϣⲁⲣⲟϥ ⲡⲉϫⲁϥ ⲛⲁϥ ⲛϭⲓⲡⲣⲣⲟ · ϫⲉⲙⲉⲣⲕⲟⲩⲣⲓⲟⲥ ⲙⲏ ⲁⲛⲟⲕ ⲁⲛ ⲡⲉⲛⲧⲁⲓϯ ⲛⲁⲕ ⲙⲡⲉⲓⲛⲟϭ ⲛⲧⲁⲉⲓⲟ · ⲙⲛⲡⲓⲁⲝⲓⲱⲙⲁ · ⲉⲁⲓⲁⲁⲕ ⲛⲥⲧⲣⲁⲧⲏⲗⲁⲧⲏⲥ ϩⲛⲧⲙⲏⲏⲧⲉ ⲛⲛⲁⲣⲭⲱⲛ ⲧⲏⲣⲟⲩ · ⲉⲧⲃⲉⲧⲉⲕⲙⲛⲧⲣⲙϩⲏⲧ ⲙⲛⲡⲉϫⲣⲟ ⲛⲧⲁⲛⲛⲟⲩⲧⲉ ⲭⲁⲣⲓⲍⲉ ⲙⲙⲟϥ ⲛⲁⲛ ϩⲙⲡⲡⲟⲗⲉⲙⲟⲥ · ⲁⲩⲱ ⲛⲁϣ ⲛϩⲉ ⲡⲛⲟϭ ⲛⲟⲩⲱϣ ⲉⲧⲟⲩⲛⲧⲁⲓϥ ⲉϩⲟⲩⲛ ⲉⲣⲟⲕ ⲁⲕⲡⲟⲟⲛⲉ ⲉϩⲉⲛⲙⲟⲥⲧⲉ ⲉⲩϩⲟⲟⲩ . ⲁⲩⲱ ⲛⲓⲛⲟϭ ⲛⲧⲁⲓⲟ ⲁⲕⲡⲟⲟⲛⲟⲩ ⲉⲩⲗⲁⲁⲩ · ⲉⲁⲕⲕⲁⲧⲁⲫⲣⲟⲛⲉⲓ ⲛⲛⲛⲟⲩⲧⲉ ⲛⲧⲉⲓϩⲉ ⲧⲏⲣⲥ · ⲕⲁⲧⲁⲧϩⲉ ⲛⲧⲁⲩⲧⲥⲁⲃⲉⲉⲓⲁⲧⲛ ⲉⲃⲟⲗ ϩⲛⲧⲙⲛⲧⲉⲩⲥⲉⲃⲏⲥ . ⲧⲟⲧⲉ ⲡⲙⲁⲧⲟⲓ ⲛⲅⲉⲛⲛⲁⲓⲟⲥ ⲛⲧⲉⲡⲉⲭⲣⲓⲥⲧⲟⲥ ϩⲛⲟⲩⲙⲉ · ⲁϥⲕⲁⲁϥ ⲕⲁϩⲏⲩ ⲙⲡⲣⲙ ⲛⲁⲥ ⲙⲛⲛⲉϥϩⲃⲏⲩⲉ ⲕⲁⲧⲁⲡϣⲁϫⲉ ⲙⲡⲁⲩⲗⲟⲥ ⲡⲁⲡⲟⲥⲧⲟⲗⲟⲥ ⲉⲁϥϯϩⲓⲱⲱϥ ⲙⲡⲣⲙ ⲛⲃⲣⲣⲉ ⲡⲁⲓ ⲛⲧⲁⲩⲥⲟⲛⲧϥ ⲛϩⲏⲧϥ ⲕⲁⲧⲁⲡⲛⲟⲩⲧⲉ ϩⲓⲧⲙⲡⲃⲁⲡⲧⲓⲥⲙⲁ · ⲁϥⲟⲩⲱϣⲃ ⲛϭⲓⲡϩⲁⲅⲓⲟⲥ ϩⲛⲟⲩⲥⲙⲏ ⲙⲙⲛⲧⲣⲙⲣⲁϣ ⲙⲛⲟⲩⲙⲛⲧϫⲁⲣϩⲏⲧ · ϫⲉⲡⲉⲓⲧⲁⲉⲓⲟ ⲛⲧⲉⲓⲙⲓⲛⲉ ⲙⲁⲣⲉϥϣⲱⲡⲉ ⲛⲁⲕ · ⲁⲛⲟⲕ ⲅⲁⲣ ⲉϣϫⲉ ⲁⲓⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲁⲓⲙⲓϣⲉ ⲁⲛⲟⲕ ⲇⲉ ⲁⲛ ⲡⲉⲛⲧⲁⲓϫⲣⲟ ⲁⲗⲗⲁ ⲡϫⲟⲉⲓⲥ · ⲡⲉⲛⲧⲁϥⲭⲁⲣⲓⲍⲉ ⲛⲁⲓ ⲙⲡϫⲟⲉⲓⲥ ·
…
50 ⲡⲗⲏⲛ ϫⲓ ⲛⲁⲕ ⲛⲛⲉⲕⲧⲁⲉⲓⲟ ⲛⲧϩⲉ ⲛⲧⲁⲕϫⲟⲟⲥ · ⲁⲛⲟⲕ ⲅⲁⲣ ⲛⲧⲁⲓⲉⲓ ⲉⲃⲟⲗ ϩⲛϩⲏⲧⲥ ⲛⲧⲁⲙⲁⲁⲩ ⲉⲓⲕⲏⲕⲁϩⲏⲩ ⲉⲓⲛⲁⲃⲱⲕ ⲟⲛ ⲉⲓⲕⲏⲕⲁϩⲏⲩ ·
…
51 ⲛⲧⲉⲣⲉϥϫⲉⲛⲁⲓ ⲇⲉ ⲁϥⲕⲁⲁϥ ⲕⲁϩⲏⲩ ⲛⲧϥⲭⲗⲁⲙⲩⲥ · ⲁϥⲃⲟⲗϥ ⲉⲃⲟⲗ · ⲛⲧⲉϥⲍⲱⲛⲏ ⲁϥⲛⲟϫⲟⲩ ⲉⲃⲟⲗ ϩⲁⲣⲁⲧϥ ⲙⲡⲣⲣⲟ ⲁϥϫⲓϣⲕⲁⲕ ⲉⲃⲟⲗ ⲉϥϫⲱ ⲙⲙⲟⲥ · ϫⲉⲁⲛⲅⲟⲩⲭⲣⲓⲥⲧⲓⲁⲛⲟⲥ · ⲁⲩⲱ ⲥⲱⲧⲙ ⲧⲏⲣⲧⲛ ϫⲉⲁⲛⲅⲟⲩⲭⲣⲓⲥⲧⲓⲁⲛⲟⲥ .
…
52 ⲧⲟⲧⲉ ⲇⲉⲕⲓⲟⲥ ⲁϥⲣⲧϩⲉ ⲛⲛⲉⲛⲧⲁⲩⲡⲱⲥϣ ⲁϥⲉⲓⲱⲣⲙ ⲉϩⲟⲩⲛ ⲉϩⲣⲁϥ · ⲛⲟⲩⲛⲟϭ ⲛⲛⲁⲩ · ⲁϥⲣϣⲡⲏⲣⲉ ⲙⲡⲉⲓⲛⲉ ⲙⲡⲥⲁ ⲛⲧϥⲙⲛⲧⲃⲣⲣⲉ .
…
53 ⲡⲙⲁⲕⲁⲣⲓⲟⲥ ⲇⲉ ⲛⲉⲛⲉⲥⲱϥ ⲉⲙⲁⲧⲉ ϩⲙⲡⲉϥⲉⲓⲛⲉ ⲉϥⲧⲣⲉϣⲣⲱϣ ⲉⲙⲁⲧⲉ ϩⲙⲡⲉϥⲁⲩⲉⲓⲛ · ⲉϥⲟ ⲙⲙⲉⲣϣ ϩⲙⲡⲉϥϥⲱ ⲉϥⲕⲟⲥⲙⲉⲓ ϩⲙⲙⲛⲧⲥⲁⲉⲓ ⲛⲓⲙ ·
…
54 ϩⲓⲙⲛⲧϫⲱⲱⲣⲉ ⲉⲣⲉϩⲁϩ ϭⲱϣⲧ ⲛⲥⲱϥ ⲉⲩⲣϣⲡⲏⲣⲉ ⲙⲙⲟϥ .
…
55 ⲙⲛⲛⲥⲁⲛⲁⲓ ⲇⲉ ⲇⲉⲕⲓⲟⲥ ⲡⲣⲣⲟ ⲁϥⲕⲓⲙ ⲛⲧⲉϥⲁⲡⲉ ⲟⲩⲉϩⲥⲁϩⲛⲉ ⲉⲛⲟϫϥ ⲉⲡⲉϣⲧⲉⲕⲟ ⲉϥϫⲱ ⲙⲙⲟⲥ · ϫⲉⲡⲣⲱⲙⲉ ⲉⲧⲉⲙⲡⲉϥⲥⲟⲩⲛ ⲡⲧⲁⲉⲓⲟ ⲙⲁⲣϥϫⲓⲡⲏⲣⲁ ⲧⲉⲛⲟⲩ ⲙⲡⲉⲧϭⲁⲓⲟ ·
…
56 ⲛⲧⲁϥϫⲉⲡⲁⲓ ⲇⲉ ⲉϥⲙⲉⲉⲩⲉ ϫⲉⲉϥⲛⲁⲉϣⲡⲉⲛⲉⲡⲉϥⲗⲟⲅⲓⲥⲙⲟⲥ ⲛⲉⲩⲥⲉⲃⲏⲥ · ⲡⲙⲁⲣⲧⲩⲣⲟⲥ ⲇⲉ ⲙⲡⲉⲭⲣⲓⲥⲧⲟⲥ ⲉⲩϫⲓ ⲙⲙⲟϥ ⲉⲡⲉϣⲧⲉⲕⲟ · ⲛϥⲣⲁϣⲉ ⲁⲩⲱ ⲛϥⲧⲉⲗⲏⲗ ϩⲙⲡⲉⲡⲛⲉⲩⲙⲁ · ⲉϥϯⲉⲟⲟⲩ ⲙⲡⲛⲟⲩⲧⲉ .
…
57 ϩⲛⲧⲉⲟⲩϣⲏ ⲇⲉ ⲉⲧⲙⲙⲁⲩ ⲁⲩⲁⲅⲅⲉⲗⲟⲥ ⲁϩⲉⲣⲁⲧϥ ϩⲓϫⲱϥ ⲡⲉϫⲁϥ ⲛⲁϥ · ϫⲉⲙⲉⲣⲕⲟⲩⲣⲓⲉ · ⲧⲱⲕ ⲛϩⲏⲧ ⲁⲩⲱ ⲙⲡⲣⲣϩⲟⲧⲉ ϩⲏⲧⲟⲩ · ⲛⲛⲁⲡⲩⲗⲏ ⲙⲡⲧⲩⲣⲁⲛⲛⲟⲥ ·
…
58 ⲡⲓⲥⲧⲉⲩⲉ ⲉⲡⲉⲭⲣⲓⲥⲧⲟⲥ ⲡⲛⲟⲩⲧⲉ ⲛⲅϩⲟⲙⲟⲗⲟⲅⲉⲓ ⲙⲙⲟϥ ϫⲉⲛⲧⲟϥ ⲡⲉ ⲡⲉⲭⲣⲓⲥⲧⲟⲥ ⲡⲛⲟⲩⲧⲉ ϫⲉⲟⲩⲛϭⲟⲙ ⲙⲙⲟϥ ⲉⲧⲟⲩϫⲟⲕ ⲉⲃⲟⲗ ϩⲛⲑⲗⲓⲯⲓⲥ ⲛⲓⲙ · ⲡⲙⲁⲣⲧⲩⲣⲟⲥ ⲇⲉ ϩⲱⲱϥ ⲛⲉ ⲁϥϭⲙϭⲟⲙ · ⲛϩⲟⲩⲟ · ⲛⲁⲓ ⲛⲉ ⲛⲧⲁⲡⲁⲅⲅⲉⲗⲟⲥ ϫⲟⲟⲩ ⲉⲣⲟϥ ϩⲙⲡⲧⲣⲉϥⲟⲩⲱⲛϩ ⲉⲣⲟϥ .
…
59 ⲙⲡⲉϥⲣⲁⲥⲧⲉ ⲇⲉ ⲁϥϩⲙⲟⲥ ⲉⲡⲃⲏⲙⲁ ⲛϭⲓⲇⲉⲕⲓⲟⲥ · ⲁϥⲟⲩⲉϩⲥⲁϩⲛⲉ ⲉⲧⲣⲉⲩⲡⲁⲣϩⲓⲥⲧⲁ ⲛⲁϥ ⲙⲡⲙⲁⲕⲁⲣⲓⲟⲥ · ⲁⲩⲱ ⲡⲉϫⲁϥ ⲛⲁϥ · ϫⲉⲁⲣⲁⲡⲉⲓⲧⲁⲉⲓⲟ ⲛⲧⲉⲓⲙⲓⲛⲉ ⲡⲣⲉⲡⲉⲓ ⲛⲁⲕ ⲛⲧⲁⲕϫⲓⲧϥ ⲉⲃⲟⲗ ϩⲓⲧⲟⲟⲧ ⲉⲧⲉⲡⲉⲧϭⲁⲓⲟ ⲡⲉⲛⲧⲁⲕⲥⲟⲧⲡϥ ⲛⲁⲕ ⲙⲁⲩⲁⲁⲕ .
…
60 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲡⲉϫⲁϥ ϫⲉϥⲡⲣⲉⲡⲉⲓ ⲛⲁⲓ ⲛϩⲟⲩⲟ ·
…
61 ⲁⲓϫⲓ ⲅⲁⲣ ⲛⲟⲩⲁⲝⲓⲱⲙⲁ · ⲛⲁⲧⲧⲁⲕⲟ · ⲡⲉϫⲉⲡⲣⲣⲟ ⲛⲁϥ ϫⲉϫⲱ ⲉⲣⲟⲓ ⲙⲡⲉⲕⲅⲉⲛⲟⲥ ⲙⲛⲧⲉⲕⲡⲟⲗⲓⲥ
…
62 ⲛⲧⲟⲕ ⲅⲁⲣ ϯⲥⲟⲟⲩⲛ ⲙⲙⲟⲕ ϫⲉⲉⲕⲏⲡ ⲉⲁϣ ⲛⲧⲁⲝⲓⲥ ·
…
63 ⲡⲉϫⲁϥ ⲛⲁϥ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲉϣϫⲉ ⲕⲟⲩⲱϣ ⲉⲥⲟⲩⲛ ⲡⲁⲅⲉⲛⲟⲥ ⲙⲛⲧⲁⲡⲟⲗⲓⲥ · ⲁⲛⲟⲕ ⲅⲁⲣ ϯⲛⲁⲧⲁⲙⲟⲕ ⲉⲣⲟⲟⲩ ·
…
64 ⲡⲁⲉⲓⲱⲧ ⲙⲉⲛ ⲕⲁⲧⲁⲥⲁⲣⲝ ⲟⲩⲉⲃⲟⲗ ⲡⲉ ϩⲛⲧⲉⲥⲕⲓⲑⲓⲁ · ⲉⲡⲉϥⲣⲁⲛ ⲡⲉ ⲕⲟⲣⲇⲓⲁⲛⲟⲥ · ⲉⲁϥⲣⲙⲁⲧⲟⲓ ϩⲙⲡⲁⲣⲓⲑⲙⲟⲥ · ⲛⲙⲙⲁⲣⲧⲩⲥⲓⲟⲛ ·
…
65 ϩⲙⲡⲉⲟⲩⲟⲉⲓϣ ⲇⲉ ⲡⲁⲓ ⲁϥⲣⲡⲣⲱⲧⲟⲥ ⲉⲡⲓⲁⲣⲓⲑⲙⲟⲥ ⲛⲟⲩⲱⲧ ·
…
66 ⲡⲁⲉⲓⲱⲧ ⲇⲉ ϩⲱⲱϥ ⲛⲁⲗⲩⲑⲉⲓⲛⲟⲥ ⲡⲉ ⲡⲛⲟⲩⲧⲉ ⲁⲩⲱ ⲧⲁⲡⲟⲗⲓⲥ ⲧⲉ ⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ · ⲧⲡⲟⲗⲓⲥ ⲙⲡⲛⲟϭ ⲛⲣⲣⲟ .
…
67 ⲡⲉϫⲉⲡⲣⲣⲟ ⲛⲁϥ ⲟⲛ ϫⲉⲛⲧⲁⲩⲙⲟⲩⲧⲉ ⲉⲣⲟⲕ ⲙⲡⲉⲓⲣⲁⲛ ϫⲉⲙⲉⲣⲕⲟⲩⲣⲓⲟⲥ ϩⲓⲧⲛⲛⲉⲕⲉⲓⲟⲧⲉ ϫⲓⲛⲙⲙⲟⲛ ⲙⲙⲁⲧⲟⲓ ⲛⲉⲛⲧⲁⲩⲧⲁⲁϥ ⲉⲣⲟⲕ . ⲡⲉϫⲁϥ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲡⲁⲉⲓⲱⲧ ⲛⲧⲁϥⲙⲟⲩⲧⲉ ⲉⲣⲟⲓ ϫⲉⲫⲓⲗⲟⲡⲁⲧⲱⲣ · ⲉⲧⲉⲡⲉϥⲟⲩⲱϩⲙ ⲡⲉ ⲡⲙⲁⲓⲛⲉϥⲉⲓⲟⲧⲉ
…
68 ⲛⲧⲉⲣⲓⲣⲙⲁⲧⲟⲓ ⲇⲉ ⲁⲩⲙⲟⲩⲧⲉ ⲉⲣⲟⲓ ϩⲓⲧⲛⲡⲧⲣⲓⲃⲟⲩⲛⲟⲥ ϫⲉⲙⲉⲣⲕⲟⲩⲣⲓⲟⲥ ·
…
69 ⲡⲣⲣⲟ ⲇⲉ ⲡⲉϫⲁϥ ⲛⲁϥ ϫⲉⲙⲉⲣⲕⲟⲩⲣⲓⲟⲥ ⲱⲡ ⲉⲧⲕϫⲱ ⲙⲙⲟϥ ⲕⲛⲁⲉⲓⲣⲉ ⲕⲁⲧⲁⲡⲉⲛⲡⲣⲟⲥⲧⲁⲅⲙⲁ ⲛⲧⲁⲛⲧⲟϭϥ ⲉⲃⲟⲗ ⲛⲟⲩⲟⲛ ⲛⲓⲙ ⲛⲅⲡⲣⲟⲥⲕⲩⲛⲏ ⲛⲛⲛⲟⲩⲧⲉ ⲛⲅϫⲓ ⲙⲡⲉⲕⲧⲁⲉⲓⲟ · ⲛϣⲟⲣⲡ ⲙⲛⲡⲕⲉⲟⲟⲩ ϫⲓⲛⲙⲙⲟⲛ · ⲱⲡ ⲉⲧⲉⲕϫⲱ ⲙⲙⲟϥ · ⲁϫⲓⲥ ⲛⲁⲛ ϩⲛⲟⲩϭⲉⲡⲏ ϩⲱⲥ ⲉⲕⲥⲟⲟⲩⲛ ϫⲉⲛⲧⲁⲩⲛⲧⲕ ⲉⲡⲉⲓⲙⲁ · ⲉⲧⲃⲉⲡⲓϩⲱⲃ .
…
70 ⲁϥⲟⲩⲱϣⲃ ⲛϭⲓⲡⲙⲁⲣⲧⲩⲣⲟⲥ ⲡⲉϫⲁϥ ϫⲉⲁⲛⲟⲕ ⲕⲁⲧⲁⲧϩⲉ ⲛⲧⲁⲓⲉⲓ ⲉⲡⲉⲓⲙⲁ ϩⲱⲥ ϫⲉⲉⲓⲉϫⲣⲟ ⲉⲣⲟⲕ ⲙⲛⲡⲉⲕⲉⲓⲱⲧ ⲡⲥⲁⲧⲁⲛⲁⲥ · ⲡⲉⲛⲧⲁⲡⲉⲧϩⲟⲟⲩ ⲛⲓⲙ · ϣⲱⲡⲉ ⲉⲃⲟⲗ ϩⲓⲧⲟⲟⲧϥ ·
…
71 ⲉⲓϣⲁⲛϫⲣⲟ ⲇⲉ ϣⲁⲩϯⲕⲗⲟⲙ · ⲉϫⲱⲓ ϩⲓⲧⲙⲡⲁⲅⲱⲛⲟⲑⲉⲧⲏⲥ · ⲙⲙⲉ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲉⲧⲉϩⲛⲁⲕ ϭⲉ ⲟⲩⲛⲁⲣⲓϥ ϩⲛⲟⲩϭⲉⲡⲏ ⲛⲅⲧⲙⲱⲥⲕ ·
…
72 ⲟⲩⲛⲧⲁⲓ ⲅⲁⲣ ⲙⲙⲁⲩ ⲛⲧⲡⲁⲛϩⲟⲡⲗⲓⲁ ⲙⲡⲛⲟⲩⲧⲉ ⲙⲛⲡⲉⲧϩⲩⲣⲱⲛ ⲛⲧⲡⲓⲥⲧⲓⲥ · ⲛⲁⲓ ⲉⲃⲟⲗ ϩⲓⲧⲟⲟⲧⲟⲩ · ϯⲛⲁϫⲣⲟ ⲉⲛⲉⲕⲙⲉⲉⲩⲉ ⲙⲛⲛⲉⲕⲧⲉⲭⲛⲏ ⲧⲏⲣⲟⲩ · ⲛⲕⲣⲟϥ ⲉϩⲟⲩⲛ ⲉⲣⲟⲓ ·
…
73 ⲧⲟⲧⲉ ⲡⲣⲣⲟ ⲁϥⲙⲟⲩϩ ⲛϫⲱⲛⲧ ⲡⲉϫⲁϥ ϫⲉⲉⲡⲉⲓⲇⲏ ⲡⲁⲓ ϫⲱ ⲙⲙⲟⲥ · ϫⲉⲟⲩⲛⲧⲁⲓ ⲙⲙⲁⲩ ⲛⲟⲩⲡⲁⲛϩⲟⲡⲗⲓⲁ · ⲛϩⲱⲃ ⲕⲁⲓⲡⲉⲣ ⲉϥⲕⲏⲕⲁϩⲏⲩ ⲉϥⲁϩⲉⲣⲁⲧϥ · ϯⲕⲉⲗⲉⲩⲉ ⲉⲧⲣⲉⲩⲧⲟⲥϥ ⲉⲃⲟⲗ · ⲉϥⲧⲟ ⲉⲛϣⲙⲟⲩⲓ · ⲛⲥⲉϫⲟⲗⲕϥ · ⲉⲃⲟⲗ ⲟⲩⲧⲉ ⲧⲡⲉ ⲙⲛⲡⲕⲁϩ ⲛⲁⲟⲩⲙⲁϩⲉ ·
…
74 ⲛⲧⲉⲣⲟⲩⲣⲡⲁⲓ ⲇⲉ ⲛⲁϥ · ⲡⲉϫⲁϥ ⲛϭⲓⲡⲣⲣⲟ ϫⲉⲉⲩⲧⲱⲛ ⲧⲉⲛⲟⲩ ⲛⲉⲕϩⲟⲡⲗⲟⲛ ⲉⲧⲉⲕⲑⲁⲣⲉⲓ ⲉⲣⲟⲟⲩ · ϣⲉⲡⲛⲟϭ ⲛⲛⲟⲩⲧⲉ ⲡⲍⲉⲩⲥ · ⲁⲩⲧⲟⲥⲕ ⲉⲃⲟⲗⲉⲙⲁⲧⲉ ·
…
75 ⲁϥϭⲱϣⲧ ⲇⲉ ⲉϩⲣⲁⲓ ⲉⲧⲡⲉ ⲛϭⲓⲡⲡⲉⲧⲟⲩⲁⲁⲃ ⲡⲉϫⲁϥ ϫⲉⲡⲁϫⲟⲉⲓⲥ ⲃⲟⲏⲑⲉⲓ ⲉⲣⲟⲓ ⲁⲛⲟⲕ ⲡⲉⲕϩⲙϩⲁⲗ ·
…
76 ⲡⲁⲗⲓⲛ ⲟⲛ ⲁϥⲕⲉⲗⲉⲉⲩⲉ ⲛϭⲓⲡⲣⲣⲟ ⲉⲧⲣⲉⲩϣⲱⲗϭ ⲙⲡⲉϥⲥⲱⲙⲁ ϩⲛϩⲉⲛϭⲟⲣⲧⲉ ⲉⲩϫⲏⲣ ⲉⲡⲙⲁ · ⲛϩⲉⲛⲙⲁⲥϯⲅⲝ · ⲁⲩⲱ ⲙⲛⲛⲥⲱⲥ ⲛⲥⲉⲡⲉⲣϣϩⲉⲛϫⲃⲃⲥⲛⲕⲱϩⲧ ϩⲁⲣⲟϥ ϫⲉⲕⲁⲥ ⲉϥⲉⲣⲱⲕϩ · ⲕⲁⲧⲁⲕⲟⲩⲓ ⲕⲟⲩⲓ ⲁϥⲱϣⲙ ⲛϭⲓⲡϣⲁϩ ⲙⲡⲕⲱϩⲧ ϩⲙⲡⲉⲥⲛⲟϥ ⲙⲡⲇⲓⲕⲁⲓⲟⲥ ⲉⲧϩⲁⲧⲉ ⲉⲡⲉⲥⲏⲧ ·
…
77 ⲡϩⲁⲅⲓⲟⲥ ⲇⲉ ⲁϥϥⲓ ⲉⲣⲟϥ ϩⲛⲟⲩⲛⲟϭ ⲙⲙⲛⲧϫⲱⲱⲣⲉ ϩⲛⲧⲉⲓⲛⲟϭ ⲛⲃⲁⲥⲁⲛⲟⲥ .
…
78 ⲇⲉⲕⲓⲟⲥ ⲇⲉ ⲁϥⲕⲉⲗⲉⲩⲉ ⲉⲧⲣⲉⲩⲃⲟⲗϥ ⲉⲃⲟⲗ ϫⲉⲕⲁⲥ ⲛⲛⲉϥⲙⲟⲩ ϩⲛⲟⲩϭⲉⲡⲏ ⲛⲥⲉⲟⲧⲡϥ ⲉϩⲟⲩⲛ ⲉⲩⲙⲁ ⲛⲕⲁⲕⲉ ⲛⲥⲉⲱⲣϫ ⲉⲣⲱϥ ϩⲛⲟⲩϭⲉⲡⲏ . ⲙⲙⲁⲧⲟⲓ
…
79 ⲇⲉ ⲁⲩϥⲓ ⲉϩⲣⲁⲓ ϩⲁⲣⲟϥ · ⲉϥⲟ ⲙⲡⲁϣ ⲙⲟⲩ ⲉⲩⲛⲟⲩⲕⲟⲩⲓⲛⲛⲓϥⲉ · ϣⲟϫⲡ ⲛϩⲏⲧϥ ⲉⲩⲙⲉⲉⲩⲉ ϫⲉⲉϥⲛⲁⲙⲟⲩ .
…
80 ⲙⲛⲛⲥⲁⲟⲩⲕⲟⲩⲓ ⲇⲉ ϩⲛⲧⲉⲩⲛⲟⲩ ⲉⲧⲙⲙⲁⲩ ⲁⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲟⲩⲱⲛϩ ⲛⲁϥ ⲉⲃⲟⲗ ⲡⲉϫⲁϥ ⲛⲁϥ ϫⲉⲧⲉⲓⲣⲏⲛⲏ ⲛⲁⲕ ⲡϣⲟⲉⲓϫ ⲛⲣⲉϥϫⲣⲟ ·
…
81 ⲛⲧⲉⲣϥϫⲉⲡⲁⲓ ⲇⲉ ⲁϥⲧⲁⲗϭⲉ ⲛϥⲥⲁϣ ⲉⲧϩⲙⲡⲉϥⲥⲱⲙⲁ · ⲁⲩⲱ ⲁϥⲧⲁϩⲟϥ ⲉⲣⲁⲧϥ ⲉϥⲟⲩⲟϫ ϩⲱⲥⲧⲉ ⲛϥⲧⲱⲟⲩⲛ · ⲛϥⲁϩⲉⲣⲁⲧϥ ⲛϥϯⲉⲟⲟⲩ ⲙⲡⲛⲟⲩⲧⲉ ⲛⲧⲁϥⲃⲟⲏⲑⲉⲓ ⲉⲣⲟϥ .
…
82 ⲙⲛⲛⲥⲁⲛⲁⲓ ⲁϥⲕⲉⲗⲉⲩⲉ ⲉⲧⲣⲉⲩⲧⲁϩⲟϥ ⲉⲣⲁⲧϥ ⲉⲡⲃⲏⲙⲁ · ⲁⲩⲱ ⲛⲧⲉⲣⲉϥⲛⲁⲩ ⲉⲣⲟϥ ⲛϭⲓⲡⲣⲣⲟ ⲡⲉϫⲁϥ ⲛⲁϥ ϫⲉⲁⲩϥⲓⲧⲕ ⲉⲃⲟⲗ ϩⲓⲧⲟⲟⲧ ⲉⲕⲟ ⲙⲡⲁϣ ⲙⲟⲩ
…
83 ⲛⲁϣ ⲛϩⲉ ⲧⲉⲛⲟⲩ ⲉⲕⲙⲟⲟϣⲉ ⲙⲉϣⲁⲕ ⲣⲱ ⲙⲛⲗⲁⲁⲩ ⲙⲡⲱⲗϩ ϩⲓⲡⲉⲕⲥⲱⲙⲁ · ⲧⲟⲧⲉ ⲁϥⲕⲉⲗⲉⲩⲉ ⲛⲛⲃⲁⲓⲙⲉⲣⲉϩ ⲉⲧⲁϩⲉⲣⲁⲧⲟⲩ ⲉⲧⲣⲉⲩⲙⲟⲩϣⲧ ⲙⲡⲉϥⲥⲱⲙⲁ ·
…
84 ⲛⲁⲓ ⲇⲉ ⲡⲉϫⲁⲩ ⲙⲡⲣⲣⲟ ϫⲉϣⲉⲡⲉⲕⲣⲁⲧⲟⲥ · ⲱ ⲡⲣⲣⲟ ⲛⲉⲩⲥⲉⲃⲏⲥ · ⲡⲉϥⲥⲱⲙⲁ ⲧⲏⲣϥ · ⲟⲩⲟϫ ⲉⲙⲛⲗⲁⲁⲩ ⲛⲧⲁⲕⲟ ϩⲓⲱⲱϥ ⲛⲧϩⲉ ⲛⲟⲩⲁ ⲙⲡⲟⲩϫⲱϩ ⲉⲣⲟϥ ⲉⲡⲧⲏⲣϥ ⲙⲡⲉⲩⲧⲏⲃⲉ .
…
85 ⲇⲉⲕⲓⲟⲥ ⲇⲉ ϩⲱⲱϥ ⲡⲉϫⲁϥ ϫⲉⲡⲁⲛⲧⲱⲥ ϥⲛⲁϫⲟⲟⲥ ϫⲉⲡⲉⲭⲣⲓⲥⲧⲟⲥ ⲡⲉⲛⲧⲁϥⲧⲟⲩϫⲟⲓ ⲁϥⲧⲁⲗϭⲟⲓ ·
…
86 ⲙⲏ ⲁⲧⲉⲧⲛϫⲓⲥⲁⲉⲓⲛ ⲉϩⲟⲩⲛ ⲉⲡⲉϣⲧⲉⲕⲟ ⲉⲧⲣⲉϥⲑⲉⲣⲁⲡⲉⲩⲉ ⲙⲙⲟϥ ·
…
87 ⲛⲧⲟⲟⲩ ⲇⲉ ⲡⲉϫⲁⲩ ϫⲉϣⲉⲧⲉⲕⲙⲛⲧⲛⲟϭ ⲉⲧⲧⲁⲓⲏⲩ ⲉⲧⲁⲙⲁϩⲧⲉ ⲉϫⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ⲙⲡⲉⲗⲁⲁⲩ ⲑⲉⲣⲁⲡⲉⲩⲉ ⲙⲙⲟϥ ·
…
88 ⲁⲗⲗⲁ ⲛⲛⲙⲉⲉⲩⲉ ϫⲉϥⲛⲁⲙⲟⲩ ⲡⲉ · ⲛⲁϣ ⲛϩⲉ ⲧⲉⲛⲟⲩ ϥⲟⲛϩ ⲏ ⲛⲧⲁϥⲗⲟⲛⲁϣ ⲛϩⲉ · ⲛⲧⲛⲥⲟⲟⲩⲛ ⲁⲛ ·
…
89 ⲡⲉϫⲁϥ ⲇⲉ ⲛⲁⲩ ϫⲉⲧⲉⲧⲛⲥⲟⲟⲩⲛ ϫⲉⲟⲩⲁϣ ⲛϭⲟⲧ · ⲧⲉ ⲧⲙⲁⲅⲓⲁ · ⲛⲛⲉⲭⲣⲓⲥⲧⲓⲁⲛⲟⲥ ·
…
90 ⲁⲩⲱ ⲛⲁϣ ⲛϩⲉ ⲥⲁϥ ⲙⲉⲛ ⲁϥⲣⲕⲱⲱⲥ · ⲙⲡϩⲟⲟⲩ ϩⲱⲱϥ ϥⲁϩⲉⲣⲁⲧϥ ⲁϥⲟⲩⲟϫ ·
…
91 ⲁϥⲙⲟⲩϩ ⲇⲉ ⲛϭⲱⲛⲧ ⲡⲉϫⲁϥ ⲛⲁϥ ϫⲉⲁϫⲓⲥ ⲉⲣⲟⲓ ϩⲛⲟⲩⲙⲉ · ϫⲉⲛⲓⲙ ⲡⲉⲛⲧⲁϥⲧⲁⲗϭⲟⲕ ⲭⲱⲣⲓⲥⲙⲁⲅⲓⲁ ·
…
92 ⲁϥⲟⲩⲱϣⲃ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϫⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲥⲁⲉⲓⲛ ⲙⲙⲉ ⲛⲛⲉⲛⲯⲩⲭⲏ ⲙⲛⲛⲉⲛⲥⲱⲙⲁ · ⲛⲧⲟϥ ⲡⲉⲧⲟⲩⲱϣ ⲉⲭⲁⲣⲓⲍⲉ ⲛⲁⲓ ⲙⲡⲧⲁⲗϭⲟ · ⲕⲁⲧⲁⲧϩⲉ ⲛⲧⲁⲓϫⲟⲟⲥ ·
…
93 ⲙⲫⲁⲣⲙⲁⲅⲟⲥ ⲇⲉ ⲙⲛⲛⲣⲉϥ‐ⲙⲟⲩⲧⲉ ⲙⲛⲛⲣⲉϥϣⲙϣⲉ ⲉⲓⲇⲟⲗⲟⲛ ⲥⲉⲟ ⲛϣⲉⲙⲙⲟ ⲉⲣⲟϥ · ⲁⲩⲱ ϥⲛⲁⲙⲁⲣⲟⲩ ⲛϩⲉⲛⲙⲣⲣⲉ ⲛⲁⲧⲃⲱⲗ ⲉⲃⲟⲗ · ⲛϥⲡⲁⲣⲁⲇⲓⲇⲟⲩ ⲙⲙⲟⲟⲩ ⲉⲡⲕⲱϩⲧ ⲛⲧⲅⲉϩⲉⲛⲛⲁ · ⲉⲧⲃⲉϫⲉ ⲙⲡⲟⲩⲥⲟⲩⲛ ⲡⲛⲟⲩⲧⲉ ⲙⲙⲉ ⲛⲧⲁϥⲧⲁⲙⲓⲟⲟⲩ ·
…
94 ⲡⲉϫⲉⲡⲣⲣⲟ ϫⲉϯⲛⲁⲁⲛϩⲁⲗⲓⲥϭⲉ ⲙⲡⲉⲕⲥⲱⲙⲁ ϩⲛϩⲉⲛⲃⲁⲥⲁⲛⲟⲥ ⲉⲩⲛⲁϣⲧ
…
95 ⲙⲁⲣⲉⲓⲛⲁⲩ ϫⲉⲡⲉⲭⲣⲓⲥⲧⲟⲥ ⲉⲧⲉⲕⲛⲁϩⲧⲉ ⲉⲣⲟϥ · ⲛⲁⲧⲁⲗϭⲟⲕ .
…
96 ⲡⲉϫⲁϥ ⲛϭⲓⲡϩⲁⲅⲓⲟⲥ ϫⲉϯⲡⲓⲥⲧⲉⲩⲉ ⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ϫⲉⲉⲕϣⲁⲛⲛⲟⲩⲙⲏⲏϣⲉ ⲛϯⲙⲱⲣⲓⲁ · ⲉϫⲱⲓ · ⲛⲅⲛⲁϣϣⲧⲣⲧⲱⲣⲧ ⲁⲛ ·
…
97 ⲁϥϫⲟⲟⲥ ⲅⲁⲣ ϫⲉⲙⲡⲣⲣϩⲟⲧⲉ ϩⲏⲧⲟⲩ · ⲛⲛⲉⲧⲛⲁⲙⲟⲩⲟⲩⲧ ⲙⲡⲉⲧⲛⲥⲱⲙⲁ · ⲉⲙⲛϭⲟⲙ ⲇⲉ ⲙⲙⲟⲟⲩ ⲉⲙⲟⲩⲟⲩⲧ ⲛⲛⲉⲧⲙⲯⲩⲭⲏ ·
…
98 ⲁⲗⲗⲁ ⲁⲣⲓϩⲟⲧⲉ ϩⲏⲧϥ ⲛϩⲟⲩⲟ ⲙⲡⲉⲧⲉⲟⲩⲛϭⲟⲙ ⲙⲙⲟϥ ⲉⲧⲁⲕⲟ ⲛⲛⲉⲧⲙⲯⲩⲭⲏ ⲙⲛⲡⲉⲧⲛⲥⲱⲙⲁ ϩⲣⲁⲓ ϩⲛⲧⲅⲉϩⲉⲛⲛⲁ ⲛⲥⲁⲧⲉ ⁘ ⁘
…
99 ⲧⲟⲧⲉ ⲁϥⲕⲉⲗⲉⲩⲉ ⲛϭⲓⲡⲣⲣⲟ ⲉⲧⲣⲉⲩⲉⲓⲛⲉ ⲛⲟⲩⲡⲉⲛⲓⲡⲉ ⲉϥⲗⲟⲃϣ ⲛⲥⲉⲕⲁⲁϥ ϩⲁⲛⲉϥⲁⲛⲁⲅⲕⲁⲓⲟⲛ ·
…
100 ⲁⲩⲱ ⲙⲛⲛⲥⲁⲛⲁⲓ ϩⲉⲛⲗⲁⲙⲡⲁⲥ ⲛⲕⲱϩⲧ ϩⲁⲛⲉϥⲥⲡⲓⲣⲟⲟⲩⲉ .
…
101 ⲛⲧⲉⲣⲟⲩⲣⲡⲁⲓ ⲇⲉ · ⲉⲡⲙⲁ ⲛⲟⲩⲕⲁⲡⲛⲟⲥ ⲁⲩⲛⲟϭ ⲛⲥϯⲛⲟⲩϥⲉ ϣⲱϣ ⲉⲃⲟⲗ · ⲉⲟⲩⲟⲛ ⲛⲓⲙ ⲉⲧϩⲙⲡⲙⲁ ⲉⲧⲙⲙⲁⲩ ·
…
102 ⲉⲩⲃⲁⲥⲁⲛⲓⲍⲉ ⲇⲉ ⲙⲙⲟϥ ⲉⲡⲉϩⲟⲩⲟ ⲙⲡϥⲁϣⲁϩⲟⲙ ⲟⲩⲇⲉ ⲙⲡⲉϥⲣⲓⲙⲉ ·
…
103 ⲡⲉϫⲁϥ ⲇⲉ ⲛⲁϥ ⲛϭⲓⲇⲉⲕⲓⲟⲥ · ϫⲉⲉϥⲧⲱⲛ ⲡⲉⲕⲥⲁⲉⲓⲛ ⲧⲉⲛⲟⲩ · ⲙⲁⲣⲉϥⲉⲓ ⲛϥⲑⲉⲣⲁⲡⲉⲩⲉ ⲙⲙⲟⲕ ·
…
104 ⲕⲁⲓ ⲅⲁⲣ ⲁⲕϫⲟⲟⲥ ⲛⲉ ⲟⲩⲛϣϭⲟⲙ ⲙⲙⲟϥ ⲉⲧⲟⲩⲛⲟⲥⲧ ⲉⲓϣⲁⲛⲙⲟⲩ ·
…
105 ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ · ⲡⲉϫⲁϥ ⲛⲁϥ ϫⲉⲁⲣⲓⲡⲉⲧⲉϩⲛⲁⲕ
…
106 ⲟⲩⲛⲧⲁⲕ ⲉⲝⲟⲩⲥⲓⲁ ⲉϩⲟⲩⲛ ⲉⲡⲁⲥⲱⲙⲁ · ⲧⲁⲯⲩⲭⲏ ⲇⲉ ⲡⲛⲟⲩⲧⲉ ⲡⲉⲧⲟ ⲙⲡⲉⲥϫⲟⲉⲓⲥ ·
…
107 ⲡⲁⲥⲱⲙⲁ ⲙⲉⲛ ⲕⲁⲛ ⲉⲕϣⲁⲛⲧⲁⲕⲟϥ · ⲧⲁⲯⲩⲭⲏ ⲛⲁⲙⲁⲟⲩⲛ ⲉⲃⲟⲗ ⲉⲥⲟ ⲛⲁⲧⲧⲁⲕⲟ ⁘
…
108 ⲡⲁⲗⲓⲛ ⲟⲛ ⲁϥⲕⲉⲗⲉⲩⲉ ⲛϭⲓⲡⲣⲣⲟ ⲉⲧⲣⲉⲩⲁϣⲧϥ ⲛⲥⲁϫⲱϥ · ⲁⲩⲱ ⲛⲥⲉⲉⲓϣⲉ ⲛⲟⲩⲛⲟϭ ⲛⲱⲛⲉ ⲉⲡⲉϥⲙⲁⲕϩ ϫⲉⲕⲁⲥ ϩⲙⲡⲧⲣⲉϥⲱⲧϭ ⲉϥⲉⲙⲟⲩ ϩⲛⲟⲩϭⲉⲡⲉ ·
…
109 ⲡⲙⲁⲣⲧⲩⲣⲟⲥ ⲇⲉ ⲁⲧϭⲟⲙ ⲙⲡⲛⲟⲩⲧⲉ ⲟⲩⲱϩ ⲛϩⲏⲧϥ ⲙⲛⲧⲉϥⲭⲁⲣⲓⲥ · ⲁϥⲙⲟⲩⲛ ⲉⲃⲟⲗ ⲛⲟⲩⲛⲟϭ ⲛⲛⲁⲩ ϩⲛϯⲃⲁⲥⲁⲛⲟⲥ ⲧⲁⲓ ·
…
110 ⲇⲉⲕⲓⲟⲥ ⲇⲉ ⲛⲧⲉⲣⲉϥⲛⲁⲩ ⲉⲡⲙⲁⲣⲧⲩⲣⲟⲥ · ϫⲉϥϥⲓϩⲁ ⲛϯⲙⲱⲣⲓⲁ · ϩⲛⲟⲩⲙⲛⲧϫⲱⲱⲣⲉ · ⲁⲩⲱ ⲙⲡⲉⲗⲁⲁⲩ ⲛⲃⲁⲥⲁⲛⲟⲥ ϫⲱϩ ⲉⲣⲟϥ ⲁϥⲕⲉⲗⲉⲩⲉ ⲉⲧⲣⲉⲩϥⲓⲡⲱⲛⲉ ⲙⲙⲁⲩ ⲉⲃⲟⲗ ϩⲓⲡⲉϥⲙⲁⲕϥ ⲛⲥⲉⲉⲓⲛⲉ ⲛⲟⲩⲙⲁⲥϯⲅⲝ ⲛⲕⲱⲃϩ ⲉⲥⲟ ⲛϥⲧⲟⲟⲩ ⲛϣⲗⲟⲡ · ⲛⲥⲉϩⲓⲟⲩⲉ ⲉⲣⲟϥ ϣⲁⲧⲉⲡⲕⲁϩ · ϩⲱⲣⲡ ϩⲙⲡⲉϥⲥⲛⲟϥ ·
…
111 ⲡⲓⲅⲉⲛⲛⲁⲓⲟⲥ ⲇⲉ ⲛⲉϥⲟ ⲛⲧϩⲉ ⲛⲟⲩⲱⲛⲉ ⲛⲁⲇⲁⲙⲁⲥ · ⲁϥⲧⲱⲟⲩⲛ ϩⲛⲟⲩⲙⲛⲧϫⲱⲱⲣⲉ ϩⲁⲧⲉⲓⲃⲁⲥⲁⲛⲟⲥ · ⲁⲩⲱ ⲡⲉϫⲁϥ ϫⲉⲧⲉⲩⲭⲁⲣⲓⲥⲧⲟⲩ ⲛⲁⲕ ⲡⲁϫⲟⲉⲓⲥ ϫⲉⲁⲕⲁⲁⲧ ⲛⲙⲡϣⲁ · ⲛϣⲡϩⲓⲥⲉ ⲉϫⲙⲡⲉⲕⲣⲁⲛ ⲉⲧⲟⲩⲁⲁⲃ ·
…
112 ⲡⲣⲣⲟ ⲇⲉ ⲛⲧⲉⲣⲉϥⲛⲁⲩ ϫⲉⲟⲩⲁⲧⲡⲱⲱⲛⲉ ⲡⲉ ⲡⲉϥⲗⲟⲅⲓⲥⲙⲟⲥ ⲁⲩⲱ ϫⲉⲉϥⲛⲁⲉϣⲡⲉⲓⲑⲉ ⲁⲛ ⲙⲙⲟϥ ⲉⲧⲣⲉϥⲑⲩⲥⲓⲁⲍⲉ · ⲁϥϫⲓ‐ϣⲟϫⲛⲉ ⲛⲉϥϭⲉⲡⲏ ⲅⲁⲣ ⲉⲃⲱⲕ ⲡⲉ ⲉϩⲟⲩⲛ ⲉϩⲣⲱⲙⲏ : ⲁϥϯⲁⲡⲟⲫⲁⲥⲓⲥ ⲉⲣⲟϥ ⲉⲧⲣⲉⲩϯⲙⲱⲣⲉⲓ ⲙⲙⲟϥ ϩⲛⲧⲥⲏϥⲉ ⲉϥϫⲱ ⲙⲙⲟⲥ · ϫⲉⲙⲉⲣⲕⲟⲩⲣⲓⲟⲥ ⲡⲁⲓ ⲛⲧⲁϥⲥⲱϣ ⲛⲛⲛⲟⲩⲧⲉ ⲁⲩⲱ ⲁϥⲕⲁⲧⲁⲫⲣⲟⲛⲉⲓ ⲙⲡⲇⲟⲅⲙⲁ ⲉⲧⲟⲩⲁⲁⲃ · ⲛⲧⲉⲧⲙⲛⲧⲣⲙⲣⲁϣ · ⲉⲁϥⲟⲡϥ ⲉⲩⲗⲁⲁⲩ ⲡⲉⲛⲕⲣⲁⲧⲟⲥ ⲕⲉⲗⲉⲩⲉ ⲉⲧⲣⲉⲩϥⲓ ⲛⲧⲉϥⲁⲡⲉ ϩⲛⲧⲉⲭⲱⲣⲁ · ⲛⲧⲕⲁⲡⲡⲁⲇⲟⲕⲓⲁ · ϩⲙⲡⲓⲙⲁ ⲉⲧⲙⲙⲁⲩ · ⲉⲣⲉⲟⲩⲟⲛ ⲛⲓⲙ ⲛⲁⲩ ⲉⲣⲟϥ ·
…
113 ⲟⲩⲟⲛ ⲅⲁⲣ ⲛⲓⲙ ⲛⲧⲁⲩϫⲓⲉⲟⲟⲩ ⲉⲃⲟⲗ ϩⲓⲧⲙⲡⲣⲣⲟ ⲉⲩϣⲁⲛⲁⲛⲧⲓⲗⲉⲅⲉ ⲉⲧⲃⲉⲡⲉϥⲟⲩⲉϩⲥⲁϩⲛⲉ · ⲥⲉⲛⲁϯ ⲛⲁϥ ⲛϩⲉⲛⲥⲏϣⲉ · ⲉⲡϩⲁⲏ ⲛⲥⲉⲡⲁⲣⲁⲇⲓⲇⲟⲩ ⲙⲙⲟϥ · ⲉⲧⲟⲟⲧⲥ ⲛⲧⲥⲏϥⲉ . ⲛⲉ ⲛⲧⲁⲩⲧⲟϣⲟⲩ ⲇⲉ ⲉⲧⲣⲉⲩϥⲓⲧϥ · ⲁⲩϥⲓ ϩⲁⲣⲟϥ · ⲁⲩⲱ ⲁⲩⲧⲁⲗⲟϥ ⲉⲩⲧⲃⲛⲏ ⲁⲩⲙⲟⲣϥ ⲉϩⲣⲁⲓ ⲉϫⲱϥ · ⲉⲃⲟⲗ ϫⲉⲁⲡⲥⲱⲙⲁ ⲙⲡⲙⲁⲣⲧⲩⲣⲟⲥ ⲃⲱⲗ ⲉⲃⲟⲗ ⲛⲥⲁⲥⲁ ⲛⲓⲙ · ⲁϥⲣⲧϩⲉ ⲛⲛⲉⲓⲕⲱⲱⲥ ·
…
114 ⲁⲩⲙⲟⲟϣⲉ ⲇⲉ ϩⲛⲟⲩϩⲓⲏ ⲉⲥⲟⲩⲏⲩ · ⲁⲩⲱ ϩⲓⲧⲛϩⲉⲛⲕⲟⲩⲓ ⲛϩⲟⲟⲩ ⲁⲩⲧⲁϩⲉⲧⲡⲟⲗⲓⲥ ⲧⲕⲁⲓⲥⲁⲣⲓⲁ · ⲁⲩⲱ ⲛⲧⲉⲓϩⲉ ⲁⲩⲟⲩⲁϩϥ ⲉⲡⲉⲥⲏⲧ ⲕⲟⲩⲓ ⲕⲟⲩⲓ ·
…
115 ⲡϫⲟⲉⲓⲥ ⲇⲉ ⲁϥⲁϩⲉⲣⲁⲧϥ ϩⲓϫⲱϥ ⲡⲉϫⲁϥ ⲛⲁϥ · ϫⲉⲙⲉⲣⲕⲟⲩⲣⲓⲉ · ⲁⲙⲟⲩ ⲛⲅⲙⲧⲟⲛ ⲙⲙⲟⲕ ϩⲁϩ ⲧⲏⲓ · ⲉⲡⲉⲓⲇⲏ ⲁⲕϫⲉⲕⲡⲉⲕⲇⲣⲟⲙⲟⲥ ⲉⲃⲟⲗ · ⲁⲕϩⲁⲣⲉϩ ⲉⲧⲡⲓⲥⲧⲓⲥ ·
…
116 ϫⲓ ⲛⲁⲕ ⲙⲡⲉⲕⲗⲟⲙ · ⲛⲧⲙⲛⲧ‐ϣⲟⲉⲓϫ ⲡⲉⲛⲧⲁⲩⲧⲟϣϥ ⲛⲁⲕ ⲉⲕⲗⲏⲣⲟⲛⲟⲙⲉⲓ ⲙⲙⲟϥ ·
…
117 ⲡⲙⲁⲣⲧⲩⲣⲟⲥ ⲇⲉ ϩⲙⲡⲧⲣⲉ ⲡϫⲟⲉⲓⲥ ⲟⲩⲱⲛϩ ⲉⲣⲟϥ ⲁϥϭⲙϭⲟⲙ · ⲡⲉϫⲁϥ ⲛⲛⲉⲧϩⲁϩⲧⲏϥ · ϫⲉⲁⲣⲓⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ · ⲛⲏⲧⲛ ϩⲛⲟⲩϭⲉⲡⲏ · ⲉⲣⲉⲡϫⲟⲉⲓⲥ ⲇⲉ ⲡⲁⲓ ⲉⲧⲧⲱϩⲙ ⲛⲟⲩⲟⲛ ⲛⲓⲙ ⲉϩⲟⲩⲛ ⲉⲧⲙⲉⲧⲁⲛⲟⲓⲁ · ⲉϥⲉⲧⲣⲉⲧⲉⲧⲛⲙⲡϣⲁ ⲛⲧⲉϥⲭⲁⲣⲓⲥ ·
…
118 ⲟⲩⲣⲙⲙⲁⲟ ⲅⲁⲣ ⲡⲉ ⲁⲩⲱ ϣⲁϥⲭⲁⲣⲓⲍⲉ ⲛⲛⲉⲧⲛⲁϯⲡⲉⲩⲟⲩⲟⲓ ⲉⲣⲟϥ ϩⲛⲟⲩⲇⲱⲣⲉⲁ ⲁϫⲛⲫⲑⲟⲛⲟⲥ .
…
119 ⲁⲩⲱ ⲛⲧⲉⲣⲉϥϫⲉⲛⲁⲓ ⲁⲩϥⲓ ⲛⲧⲉϥⲁⲡⲉ ⲁϥϫⲱⲕ ⲉⲃⲟⲗ · ⲛⲧϩⲟⲙⲟⲗⲟⲅⲓⲁ ⲉⲧⲛⲁⲛⲟⲩⲥ ⲙⲡⲉⲛⲥⲱⲧⲏⲣ ⲛⲥⲟⲩ · ϫⲟⲩⲧⲏ ⲙⲡⲉⲃⲟⲧ ⲛⲟⲉⲃⲣⲓⲟⲥ ⲉⲧⲉϩⲁⲑⲱⲣ ⲡⲉ ·
…
120 ⲁⲩⲛⲟϭ ⲇⲉ ⲛϣⲡⲏⲣⲉ ϣⲱⲡⲉ ⲉⲥⲙⲡϣⲁ ⲛⲣⲡⲉⲥⲙⲉⲉⲩⲉ ·
…
121 ⲙⲛⲛⲥⲁⲧⲣⲉⲡⲙⲁⲣⲧⲩⲣⲟⲥ ϫⲱⲕ ⲉⲃⲟⲗ ⲁⲡⲉϥⲥⲱⲙⲁ ⲟⲩⲃⲁϣ ⲛⲧϩⲉ ⲛⲟⲩⲭⲓⲱⲛ ⲉϥϣⲉϣ ⲥϯⲛⲟⲩϥⲉ ⲉⲃⲟⲗ ⲛⲧϩⲉ ⲛϩⲉⲛϣⲟⲩϩⲏⲛⲉ · ⲉⲩⲥⲟⲧⲡ ⲙⲛⲟⲩϭⲛⲛⲉ
…
122 ⲉⲧⲃⲉⲡⲓⲙⲁⲉⲓⲛ ϭⲉ ⲡⲁⲓ · ⲁϩⲁϩ ⲛⲣⲱⲙⲉ ⲣⲭⲣⲓⲥⲧⲓⲁⲛⲟⲥ
…
123 ⲡⲡⲉⲧⲟⲩⲁⲁⲃ ⲇⲉ ⲁⲩⲟⲩⲁϩϥ ϩⲛⲟⲩⲧⲟⲡⲟⲥ ⲉϥⲟⲩⲟⲛϩ ⲉⲃⲟⲗ ⲡⲙⲁ ⲉⲧⲉⲣⲉⲟⲩⲙⲏⲏϣⲉ ⲛϭⲟⲙ · ϩⲓⲧⲁⲗϭⲟ ϣⲱⲡⲉ ⲙⲙⲁⲩ
…
124 ⲉⲩⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ ⲙⲛⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϣⲁⲉⲛⲉϩ · ϩⲁⲙⲏⲛ ·
…
125 ⲧⲉϣⲡⲏⲣⲉ ⲛⲧⲁⲥⲟⲩⲱⲛϩ ⲉⲃⲟⲗ ϩⲓⲧⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲧϩⲉ ⲛⲧⲁϥⲡⲁⲧⲁⲥⲥⲉⲓ ⲛⲓⲟⲩⲗⲓⲁⲛⲟⲥ · ⲡⲁⲛⲟⲙⲟⲥ · ⲛⲣⲣⲟ ϩⲓϫⲙⲡⲉϥⲙⲉⲣⲉϩ ⲁⲩⲱ ⲧⲉϣⲡⲏⲣⲉ ⲛⲉⲥⲥⲏϩ ϩⲛⲧⲙⲉϩⲯⲓⲧⲉ ⲛϩⲓⲥⲧⲟⲣⲓⲁ · ⲛⲧⲉⲕⲕⲗⲏⲥⲓⲁ ϩⲁⲙⲏⲛ ·
…
126 ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲉⲣⲉⲕⲩⲣⲓⲗⲗⲟⲥ ⲟⲛ ⲉⲡⲓⲥⲕⲟⲡⲟⲥ ⲉϩⲓⲉⲣⲟⲩⲥⲁⲗⲏⲙ · ⲁⲩⲛⲟϭ ⲙⲙⲁⲉⲓⲛ ⲟⲩⲱⲛϩ ⲉⲃⲟⲗ ⲛⲧⲉⲡⲉⲭⲣⲓⲥⲧⲟⲥ ·
…
127 ϫⲓⲛϫⲡϣⲟⲙⲧⲉ ⲙⲡⲉϩⲟⲟⲩ ϣⲁϫⲡⲯⲓⲧⲉ · ⲁⲩⲛⲟϭ ⲛⲥⲧⲁⲩⲣⲟⲥ · ⲛⲟⲩⲟⲉⲓⲛ · ⲟⲩⲱⲛϩ ⲉⲃⲟⲗ · ⲉϥⲁϩⲉⲣⲁⲧϥ ϩⲓϫⲙⲡⲙϩⲁⲁⲩ ⲙⲡⲥⲱⲧⲏⲣ ⲙⲡϩⲱⲧ ⲉⲃⲟⲗ ⲛⲥⲁⲣⲝ ⲛⲓⲙ · ⲙⲡⲓⲥⲧⲟⲥ ⲙⲛⲛⲁⲡⲓⲥⲧⲟⲥ · ⲃⲁⲣⲃⲁⲣⲟⲥ ϩⲣⲱⲙⲁⲓⲟⲥ ·
…
128 ϩⲱⲥⲧⲉ ⲛⲧⲉⲙⲙⲏⲏϣⲉ ⲏⲣⲟⲩ ⲉⲧϣⲟⲟⲡ ϩⲛⲙⲡⲟⲗⲓⲥ · ⲥⲱⲟⲩϩ ⲙⲛⲛⲉⲩϭⲓⲛⲟⲩⲱⲙ ⲙⲛⲛⲉⲩϭⲓⲛⲥⲱ ⲙⲛⲛⲉⲩⲏⲣⲡ ⲛⲥⲉⲱⲙ……… ⲙⲡⲉⲥⲧⲁⲩⲣⲟⲥ ϣⲁⲛⲧⲉϥⲃⲱⲕ ⲉϩⲣⲁⲓ ⲉⲧⲡⲉ … ⲛϫⲡⲯⲓⲧⲉ ·
…
129 ⲉⲣⲉⲛⲃⲁⲗ ⲛⲟⲩⲟⲛ ⲛⲓⲙ ϭⲱϣⲧ ⲛⲥⲱϥ ·
…
130 ⲕⲩⲣⲓⲗⲗⲟⲥ ⲇⲉ ⲡⲉⲡⲓⲥⲕⲟⲡⲟⲥ ⲛⲧϩⲓⲉⲣⲟⲩⲥⲁⲗⲏⲙ ⲁϥⲥϩⲁⲓ ⲛⲧⲉϣⲡⲏⲣⲉ ⲛⲧⲁⲥϣⲱⲡⲉ · ⲁϥⲥϩⲁⲓ ⲛⲟⲩⲉⲡⲓⲥⲧⲟⲗⲏ · ⲁϥϫⲟⲟⲩⲥ ⲛⲕⲱⲥⲧⲟⲥ ⲡⲣⲣⲟ ⲉⲡⲕⲱⲙⲏⲧⲁⲧⲟⲛ · ⲡⲁⲓ ⲉⲧⲙⲉ ⲛⲁⲑⲁⲛⲁⲥⲓⲟⲥ ·
…
131 ⲁⲑⲁⲛⲁⲥⲓⲟⲥ ⲇⲉ ⲁϥⲁⲙⲁϩⲧⲉ ⲉϫⲛⲧⲉⲕⲕⲗⲏⲥⲓⲁ ⲛⲣⲁⲕⲟⲧⲉ ⲛⲕⲉϫⲟⲩⲧⲏ ⲛⲣⲟⲙⲡⲉ · ⲛⲥⲁⲛⲉⲩⲉⲣⲏⲩ ⲙⲡⲉⲗⲁⲁⲩ ⲙⲡⲟⲗⲉⲙⲟⲥ ⲧⲱⲟⲩⲛ ⲉϫⲱϥ · ⲁϥⲣϫⲟⲩⲥⲛⲟⲟⲩⲥ ⲅⲁⲣ ⲛⲣⲟⲙⲡⲉ ϩⲛⲧⲉⲡⲓⲥⲕⲟⲡⲏ ⲙⲛⲧⲉⲝⲟⲣⲓⲥϯⲁ ·
…
132 ⲛⲧⲉⲣϥⲙⲟⲩ ⲇⲉ ⲛϭⲓⲕⲱⲥⲧⲟⲥ ⲁϥⲣⲣⲣⲟ ⲉⲡⲉϥⲙⲁ ⲛϭⲓⲓⲟⲩⲗⲓⲁⲛⲟⲥ ·
…
133 ⲉⲩⲁⲛⲟⲙⲟⲥ ⲡⲉ ⲛϩⲉⲗⲏⲛ ⲉⲟⲩⲉⲃⲟⲗ ⲡⲉ ϩⲛⲧⲥⲱⲛⲉ ⲛⲕⲱⲥⲧⲁⲛϯⲛⲟⲥ ⲡⲛⲟϭ ⲧⲉⲥϩⲁⲓ ⲅⲁⲣ ⲛⲉ ⲟⲩϩⲉⲗⲏⲛ ⲡⲉ
…
134 ⲛϣⲏⲣⲉ ⲇⲉ ⲛⲕⲱⲛⲥⲧⲁⲛϯⲛⲟⲥ ⲁⲩⲛⲁⲩ ⲉⲡϣⲏⲣⲉ ϣⲏⲙ ϫⲉⲟⲩⲛⲁϣⲧϩⲣⲁϥ ⲡⲉ ⲁⲩⲣ‐ϩⲟⲧⲉ ϫⲉⲛⲛϥϥⲓ ⲛⲧ..ⲧⲙⲛⲧⲣⲣⲟ ⲙⲡⲉⲩ…. ⲛⲕⲟⲩⲓ ⲁⲩⲧⲁⲁϥ ⲉⲧⲉⲕⲕⲗⲏⲥⲓⲁ · ⲁⲩⲁⲁϥ ⲛⲁⲛⲁⲅⲛⲱⲥⲧⲏⲥ ·
…
135 ⲛⲣⲱⲙⲉ ⲇⲉ ⲙⲡⲉϥⲉⲓⲱⲧ ⲁⲩⲉⲓⲛⲉ ⲙⲙⲟϥ ⲉϩⲣⲁⲓ ϩⲛⲧⲙⲛⲧϩⲉⲗⲗⲏⲛ · ⲛⲧⲉⲣⲉϥⲙⲟⲩ ⲇⲉ ⲛϭⲓⲕⲱⲥⲧⲟⲥ ⲁϥⲣⲣⲣⲟ ⲉⲡⲉϥⲙⲁ ⲛϭⲓⲓⲟⲩⲗⲓⲁⲛⲟⲥ ·
…
136 ⲁⲩⲱ ⲁϥⲧⲁⲁϥ ⲉⲧⲙⲛⲧϩⲗⲗⲏⲛ ⲛⲧⲉⲩⲛⲟⲩ · ⲁϥϣⲓⲛⲉ ⲛⲥⲁⲟⲩⲱⲛ ⲛⲛⲣⲡⲏⲩⲉ ⲇⲏⲙⲟⲥⲓⲁ ·
…
137 ⲡⲁⲓ ϭⲉ ⲁϥϭⲱ ϩⲙⲡⲡⲁⲗⲗⲁϯⲟⲛ ⲛⲧⲁⲛⲇⲓⲟⲭⲓⲁ ⲛϥⲙⲡϣⲁ ⲅⲁⲣ ⲁⲛ ⲛⲙⲙⲁ ⲛⲕⲱⲥⲧⲁⲛϯⲛⲟⲥ ⲉⲧⲣⲉϥⲟⲩⲱϩ ⲛϩⲏⲧⲟⲩ ·
…
138 ⲁϥⲃⲱⲕ ⲉⲡⲙⲁ ⲛⲛϩⲉⲗⲗⲏⲛ ⲙⲛⲛⲉⲩⲉⲓⲇⲱⲗⲟⲛ · ⲁϥϫⲓ ⲛⲟⲩⲃⲏϭ ⲁϥⲧⲁⲁϥ ⲙⲡϩⲩⲉⲣⲉⲩⲥ ⲁϥⲧⲁⲗⲟϥ ⲉϩⲣⲁⲓ ⲛⲑⲩⲥⲓⲁ ⲙⲡⲇⲁⲓⲙⲱⲛ · ⲁϥϥⲓ ⲙⲡϩⲩⲡⲁⲣ ⲁϥⲧⲁⲁϥ ⲛⲁϥ ⲁϥⲟⲩⲟⲙϥ ·
…
139 ⲓⲟⲩⲗⲓⲁⲛⲟⲥ ⲇⲉ ⲡϣⲏⲣⲉ ⲛⲧϥⲥⲱⲛⲉⲡⲉ ⲁϥⲧⲁⲛϩⲟⲩⲧϥ ⲉⲧⲙⲛⲧⲣⲣⲟ ·
…
140 ⲛⲧⲉⲣⲉϥⲛⲁⲩ ⲇⲉ ⲉⲧⲉⲡⲣⲟⲑⲉⲥⲙⲓⲁ ⲙⲡⲥⲟⲛ ⲛⲧⲉϥⲙⲁⲁⲩ · ⲁϥϭⲱⲡⲉ ⲙⲡϩⲁⲅⲓⲟⲥ ⲑⲉⲟⲇⲟⲣⲓⲭⲟⲥ ⲡⲉⲡⲣⲉⲥⲃⲩⲧⲉⲣⲟⲥ · ⲁⲩⲱ ⲡⲟⲓⲕⲟⲛⲟⲙⲟⲥ ⲛⲧⲉⲕⲕⲗⲏⲥⲓⲁ ⲁϥⲙⲟⲟⲩⲧϥ · ⲁϥⲉⲓ ⲇⲉ ⲁϥϫⲓⲡⲟⲩⲱ ⲛⲓⲟⲩⲗⲓⲁⲛⲟⲥ ·
…
141 ⲛⲧⲟϥ ⲇⲉ ⲁϥⲛⲟⲩϭⲥ ⲉϥϫⲱ ⲙⲙⲟⲥ ϫⲉⲁⲕϣⲧⲣⲧⲱⲣⲧ ⲛϯⲟⲩⲱϣ ⲁⲛ ⲉⲙⲟⲟⲩⲧⲟⲩ · ϫⲉⲛⲛⲉⲩϣⲟⲩϣⲟⲩ ⲙⲙⲟⲟⲩ ϫⲉⲁⲛⲣⲙⲁⲣⲧⲩⲣⲟⲥ ϩⲓⲱⲱⲕ
…
142 ⲁⲗⲗⲁ ⲉⲓϣⲁⲛⲉⲓ ϩⲛⲧⲡⲉⲣⲥⲓⲥ ϯⲛⲁⲕⲁ ⲟⲩⲛⲟⲙⲟⲥ ⲉϩⲣⲁⲓ ⲛⲁⲩ · ϫⲉϣⲟⲙⲛⲧ ⲛϩⲟⲗⲟⲕⲟⲧⲧⲓⲛⲟⲥ ⲉⲧⲁⲡⲉ ⲙⲡⲡⲁⲅⲁⲛⲟⲥ ⲧⲉⲣⲟⲙⲡⲉ ⲛⲛⲉⲭⲣⲓⲥⲧⲓⲁⲛⲟⲥ · ⲡⲃⲟⲩⲗⲉⲩⲧⲏⲥ ⲇⲉ ϣⲟⲙⲛⲧ ⲛⲟⲩⲕⲅⲓⲁ ·
…
143 ⲛⲁⲓ ⲇⲉ ⲉϥⲉⲓⲣⲉ ⲙⲙⲟⲟⲩ ⲛⲉϥϩⲟϫϩϫ ⲛⲛⲉⲭⲣⲓⲥⲧⲓⲁⲛⲟⲥ ϩⲛⲥⲙⲟⲧ ⲛⲓⲙ ·
…
144 ϩⲙⲡⲉⲟⲩⲟⲉⲓϣ ⲇⲉ ⲉⲧⲙⲙⲁⲩ ⲛⲉⲣⲉⲧⲉⲕⲕⲗⲏⲥⲓⲁ ⲟ ⲛⲣⲙⲙⲁⲟ ϩⲛⲧⲙⲛⲧϫⲱⲱⲣⲉ ⲛⲛⲉⲡⲛⲁⲧⲟⲫⲟⲣⲟⲥ · ⲉⲣⲉϥⲧⲟⲟⲩ ⲛⲥⲧⲩⲗⲟⲥ ⲧⲱⲟⲩⲛ ϩⲁⲣⲟⲥ · ⲉⲧⲉⲛⲁⲓ ⲛⲉ · ⲁⲑⲁⲛⲁⲥⲓⲟⲥ ⲛⲣⲁⲕⲟⲧⲉ · ⲁⲩⲱ ⲁⲛⲧⲱⲛⲓⲟⲥ ⲙⲛⲡⲁϩⲱⲙⲱ ϩⲙⲡⲙⲁⲣⲓⲥ · ⲁⲩⲱ ⲃⲁⲥⲓⲗⲉⲓⲟⲥ ϩⲛⲧⲕⲁⲡⲡⲁⲇⲟⲕⲓⲁ ·
…
145 ⲃⲁⲥⲓⲗⲉⲓⲟⲥ ⲇⲉ ⲛⲉϥⲟ ⲛϣⲃⲏⲣ ⲉⲓⲟⲩⲗⲓⲁⲛⲟⲥ ⲉⲧⲃⲉⲧⲙⲛⲧⲕⲟⲩⲓ ⲛⲧⲁⲩⲁⲁⲥ ⲙⲛⲛⲉⲩⲉⲣⲏⲩ ϩⲛⲧⲁⲛⲍⲏⲃⲉ ·
…
146 ⲛⲧⲉⲣⲉϥⲥⲱⲧⲙ ⲇⲉ ⲉⲧⲃⲉⲛⲉϥⲡⲣⲁⲝⲓⲥ ⲉⲧϩⲟⲟⲩ · ⲁϥⲉⲓ ϣⲁⲣⲟϥ ⲙⲛϩⲉⲛⲕⲉⲣⲉϥ‐ϣⲙϣⲉⲛⲟⲩⲧⲉ ⲛϣⲃⲏⲣ ⲉⲡⲉⲡⲓⲥⲕⲟⲡⲟⲥ ⲛⲧⲁϥ ·
…
147 ⲛⲧⲉⲣⲟⲩⲃⲱⲕ ⲇⲉ ⲉϩⲟⲩⲛ ϣⲁⲣⲟϥ ⲁϥⲛⲁⲩ ⲉⲛⲉⲩⲥⲭⲏⲙⲁ ⲉⲩⲑⲃⲃⲓⲏⲩ · ⲁⲩⲱ ⲛⲉⲣⲉⲛⲉⲩⲙⲟⲣⲧ ⲣⲏⲧ ⲡⲉ · ⲡⲉϫⲁϥ ⲛⲁⲩ ϫⲉⲉⲣⲉⲛⲁⲓ ϣⲓⲛⲉ ⲛⲥⲁⲟⲩ ·
…
148 ⲁϥⲟⲩⲱϣⲃ ⲛϭⲓⲃⲁⲥⲓⲗⲉⲓⲟⲥ ϫⲉⲉⲛϣⲓⲛⲉ ⲛⲥⲁⲟⲩϣⲱⲥ ⲉⲛⲁⲛⲟⲩϥ ⲛⲣⲉϥⲙⲟⲟⲛⲉ ·
…
149 ⲡⲉϫⲁϥ ⲛⲃⲁⲥⲓⲗⲉⲓⲟⲥ ϫⲉⲛⲧⲁⲕⲕⲁⲡϣⲏⲣⲉ ⲙⲡϩⲁⲙϣⲉ ⲧⲱⲛ ⲁⲕⲉⲓ ⲉⲡⲉⲓⲙⲁ ·
…
150 ⲡⲉϫⲁϥ ⲛⲁϥϫⲉⲛⲧⲁⲓⲕⲁⲁϥ ⲉⲧⲁⲙⲓⲟⲁⲓⲃⲉ ⲉⲧⲟⲩⲛⲁⲛⲟⲩϫⲕ ⲉⲣⲟⲥ ·
…
151 ⲡⲉϫⲉⲡⲣⲣⲟ ⲛⲁϥ ϫⲉⲉⲛⲉⲓⲫⲓⲗⲟⲥⲟⲫⲉⲓ ⲁⲛ ϫⲉⲛⲧⲕⲡⲁϣⲃⲏⲣ · ⲛⲉⲓⲛⲁⲧⲣⲉⲩϥⲓ ⲡⲉ ⲛⲧⲉⲕⲁⲡⲉ ·
…
152 ⲡⲉϫⲉⲃⲁⲥⲓⲗⲉⲓⲟⲥ ⲛⲁϥ ⲙⲡⲉⲕⲫⲓⲗⲟⲥⲟⲫⲉⲓ · ⲉⲛⲉⲛⲧⲁⲕⲫⲓⲗⲟⲥⲟⲫⲉⲓ ⲅⲁⲣ ⲛⲉⲕⲛⲁⲕⲁ ⲛⲥⲱⲕ ⲁⲛ ⲡⲉ ⲛⲧⲥⲟⲫⲓⲁ · ⲛⲧⲁⲩⲧⲥⲁⲃⲟⲕ ⲉⲣⲟⲥ · ⲉⲕⲱ ⲛⲣⲉϥⲱϣ ϩⲛⲛϫⲱⲱⲙⲉ ⲛⲧⲥⲟⲫⲓⲁ ⲙⲙⲉ ·
…
153 ⲡⲉϫⲉⲡⲣⲣⲟ ⲛⲁϥ ϫⲉⲁⲓⲟϣⲟⲩ ⲁⲩⲱ ⲁⲓⲛⲟⲉⲓ ⲙⲙⲟⲟⲩ ·
…
154 ⲡⲉϫⲉⲃⲁⲥⲓⲗⲉⲓⲟⲥ ϫⲉⲙⲡⲉⲕⲟϣⲟⲩ ⲕⲁⲗⲱⲥ · ⲟⲩⲇⲉ ⲙⲡⲉⲕⲛⲟⲉⲓ ⲙⲙⲟⲟⲩ · ⲉⲛⲉϩ ⲉⲛⲉⲛⲧⲁⲕⲛⲟⲉⲓ ⲅⲁⲣ ⲙⲙⲟⲟⲩ · ⲛⲅⲛⲁⲧϭⲁⲓⲟⲟⲩ ⲁⲛ ⲡⲉ ·
…
155 ⲡⲉϫⲉⲡⲣⲣⲟ ⲛⲁⲩ ϫⲉϯⲛⲁⲉⲧⲡⲧⲏⲩⲧⲛ ⲉϩⲟⲩⲛ ϣⲁⲛⲧⲉⲓ ϩⲛⲧⲡⲉⲣⲥⲓⲥ · ⲧⲁⲣⲉⲧⲉⲧⲛⲉⲓⲙⲉ ϫⲉⲟⲩ ⲡⲉⲧϯⲟⲩⲃⲉ ⲡⲣⲣⲟ ⲛⲧⲉⲧⲛⲙⲟⲩϩ ⲙⲡϩⲟϫϩϫ ⲙⲡⲙⲁ ⲛⲱⲧⲡ ⲉϩⲟⲩⲛ .
…
156 ⲡⲉϫⲉⲃⲁⲥⲓⲗⲉⲓⲟⲥ ϫⲉⲉⲕϣⲁⲛⲃⲱⲕ ⲉⲧⲡⲉⲣⲥⲓⲥ ⲛⲛⲉⲕⲟⲧⲕ ⲉⲓⲉ ⲙⲡⲉⲡⲛⲟⲩⲧⲉ ϣⲁϫⲉ ϩⲛⲃⲁⲥⲓⲗⲉⲓⲟⲥ ·
…
157 ⲡⲣⲣⲟ ⲇⲉ ⲓⲟⲩⲗⲓⲁⲛⲟⲥ ⲡⲉϫⲁϥ ϫⲉⲟⲩ ⲡⲉ ϯⲛⲁⲁϥ ⲙⲡⲓⲅⲁⲗⲓⲗⲁⲓⲟⲥ ⲡⲓⲣⲉϥϫⲓϭⲟⲗ ⲁϥϫⲟⲟⲥ ⲅⲁⲣ ϩⲙⲡⲉϥϩⲏⲧ ϫⲉⲛⲥⲉⲛⲁⲕⲁⲟⲩⲱⲛⲉ ⲁⲛ ϩⲓϫⲛⲟⲩⲱⲛⲉ ϩⲙⲡⲣⲡⲉ ⲛⲛⲓⲟⲩⲇⲁⲓ ·
…
158 ⲁⲛⲟⲕ ϩⲱ ϯⲛⲁⲕⲟⲧϥ ⲛϩⲱⲃ ⲛⲣⲣⲟ · ⲛⲧⲁⲣⲛⲉϥϣⲁϫⲉ ⲛϭⲟⲗ ⲧⲁⲣⲟⲩⲉⲓⲙⲉ ϫⲉⲟⲩⲣⲉϥϫⲓϭⲟⲗ ⲡⲉ ·
…
159 ⲁⲩⲱ ⲁϥⲟⲩⲉϩⲥⲁϩⲛⲉ ⲉⲧⲣⲉⲩⲱⲧⲡ ⲉϩⲟⲩⲛ ⲛⲃⲁⲥⲓⲗⲉⲓⲟⲥ ⲉⲡⲉϣⲧⲉⲕⲟ ⲙⲛⲡⲕⲉⲥⲛⲁⲩ ⲉⲧⲛⲙⲙⲁϥ · ⲁⲩⲱ ⲁϥⲧⲁⲁϥ ⲉⲃⲱⲕ ⲉⲧⲡⲉⲣⲥⲓⲥ ·
…
160 ⲁϥⲉⲓ ⲇⲉ ⲉϫⲛⲧϩⲓⲉⲣⲟⲩⲥⲁⲗⲏⲙ · ⲁϥⲛⲁⲩ ⲉⲛϣⲟⲣϣⲣ ⲙⲡⲣⲡⲉ · ⲉⲙⲛⲟⲩϫⲟⲉ ⲛⲟⲩⲱⲧ ⲕⲱⲧⲉ ⲉⲣⲟϥ · ⲕⲁⲧⲁⲧϩⲉ ⲛⲧⲁⲟⲩⲁⲥⲡⲁⲥⲓⲁⲛⲟⲥ ⲧⲁⲕⲟϥ ϩⲙⲡⲧⲁⲕⲟ ⲛⲧⲁϥⲁⲁϥ · ⲛⲛⲓⲟⲩⲇⲁⲓ · ⲁϥⲕⲉⲗⲉⲩⲉ ⲉⲧⲣⲉⲩⲕⲁⲑⲁⲣⲓⲍⲉ ⲙⲙⲟϥ ϫⲉⲕⲁⲥ ⲉⲩⲉⲕⲟⲧϥ ⲉϥⲧⲁⲓⲏⲩ ⲉⲡⲉϩⲟⲩⲟ ·
…
161 ⲓⲟⲩⲗⲓⲁⲛⲟⲥ ⲇⲉ ⲁϥⲕⲁⲑⲓⲥⲧⲁ ⲛⲟⲩⲕⲟⲙⲉⲥ ⲉϫⲙⲡⲣⲡⲉ · ϫⲉⲉϥⲉⲕⲁⲑⲁⲣⲓⲍⲉ ⲙⲙⲟϥ ϣⲁⲛⲧⲉϥⲥⲙⲛⲥⲉⲛⲧⲉ ⲙⲙⲟϥ · ⲛϥⲕⲟⲧϥ ·
…
162 ⲛⲧⲟϥ ⲇⲉ ⲁϥⲧⲁⲁϥ ⲉⲧⲡⲉⲣⲥⲓⲥ · ⲁϥⲡⲟⲗⲉⲙⲉⲓ ⲁϥⲕⲁⲛⲉⲧⲟⲩⲁⲁⲃ ⲉⲩⲟⲧⲡ ⲉϩⲟⲩⲛ ⲉⲡⲉϣⲧⲉⲕⲟ ·
…
163 ⲛⲉⲧϣⲟⲣϣⲣ ⲇⲉ ⲉⲡⲉⲣⲡⲉ ⲁⲩⲕⲁⲑⲁⲣⲓⲍⲉ ⲙⲙⲟϥ ⲙⲡⲟⲩⲕⲁⲟⲩⲱⲛⲉ ϩⲓϫⲛⲟⲩⲱⲛⲉ · ⲙⲡⲟⲩⲃⲟⲗϥ ⲉⲃⲟⲗ ⲕⲁⲧⲁⲡϣⲁϫⲉ ⲙⲡⲉⲛⲥⲱⲧⲏⲣ ·
…
164 ⲁⲩⲁⲣⲭⲉⲓ ⲇⲉ ⲛⲕⲱⲧ ϣⲁⲩⲕⲱⲧ ϫⲓⲛϩⲧⲟⲟⲩⲉ ϣⲁⲣⲟⲩϩⲉ ⲛⲥⲉⲡⲱϩ ⲉϩⲧⲟⲟⲩⲉ · ⲛⲥⲉϭⲛ ⲛⲕⲱⲧ ⲛⲧⲁⲩⲕⲟⲩ ⲉⲩϣⲣϣⲱⲣ ϩⲛⲟⲩϭⲓϫ ⲁⲛ ⲛⲣⲱⲙⲉ ·
…
165 ⲁⲩⲣⲉⲃⲟⲧ ⲇⲉ ⲥⲛⲁⲩ ⲛϩⲟⲟⲩ ⲉⲩⲙⲏⲛ ⲉⲃⲟⲗ ⲛⲧⲉⲓϩⲉ ⲉⲩⲧⲁⲗⲁⲓⲡⲟⲣⲉⲓ ⲉⲙⲛⲟⲩϩⲱⲃ ⲟⲩⲏϩ ⲛⲥⲱⲟⲩ ⲕⲁⲧⲁⲧϩⲉ ϫⲉⲧⲉⲡⲣⲟⲛⲟⲓⲁ ⲧⲉⲧⲕⲱⲗⲉⲓ ⲙⲙⲟⲟⲩ ·
…
166 ⲁⲩⲧⲁⲙⲟⲟⲩ ⲇⲉ ⲛϭⲓⲛⲓⲟⲩⲇⲁⲓ ⲉⲧⲙⲙⲁⲩ ϫⲉⲣⲱⲕϩ ⲛⲛⲉⲙϩⲁⲁⲩ ⲉⲧⲉⲣⲉⲛⲉⲭⲣⲓⲥⲧⲓⲁⲛⲟⲥ · ⲧⲟⲙⲥ ⲛϩⲏⲧⲟⲩ · ⲁⲩⲱ ⲧⲉⲧⲛϭⲙϭⲟⲙ ⲉⲕⲱⲧ ⲁⲩⲥⲱⲧⲙ ⲇⲉ ⲛⲥⲱⲟⲩ ⲁⲩⲱ ⲁⲩⲣⲱⲕϩ ⲛⲛⲉⲙϩⲁⲁⲩ .
…
167 ⲛⲧⲉⲣⲟⲩⲡⲱϩ ⲇⲉ ⲉϫⲙⲡⲙϩⲁⲁⲩ · ⲉⲧⲉⲣⲉⲓⲱϩⲁⲛⲛⲏⲥ ⲡⲃⲁⲡϯⲥⲧⲏⲥ ⲛϩⲏⲧϥ ⲙⲛⲉⲗⲉⲥⲁⲓⲟⲥ · ⲡⲉⲡⲣⲟⲫⲏⲧⲏⲥ · ⲙⲡⲉⲡⲕⲱϩⲧ ϫⲱϩ ⲉⲣⲟⲟⲩ ·
…
168 ⲉⲁⲩⲣⲟⲩⲙⲏⲏϣⲉ ⲛϩⲟⲟⲩ · ⲉⲣⲉⲡⲕⲱϩⲧ ⲙⲟⲩϩ · ⲙⲡⲉⲩⲕⲱⲧⲉ · ⲛⲧⲟⲟⲩ ⲇⲉ ⲙⲡⲉⲡⲕⲱϩⲧ ϫⲱϩ ⲙⲙⲟⲟⲩ ⁘
…
169 ϩⲟⲓⲛⲉ ⲇⲉ ⲛⲛⲉⲥⲛⲏⲩ ⲁⲩϯ ⲛⲁϥ ⲛϩⲉⲛⲭⲣⲏⲙⲁ ⲁⲩⲥⲡⲥⲱⲡϥ ⲉⲧⲣϥϯⲧϩⲉ ⲛⲁⲩ ⲉⲧⲣⲉⲩϥⲓ ⲛⲛⲕⲉⲉⲥ ⲛⲛⲉⲧⲟⲩⲁⲁⲃ · ⲛⲧⲟϥ ⲇⲉ ⲁϥϫⲓ ⲛⲛϩⲟⲙⲛⲧ · ⲁϥⲉⲓⲣⲉ ⲕⲁⲧⲁⲧϩⲉ ⲛⲧⲁⲩϫⲟⲟⲥ ⲛⲁϥ · ⲁϥⲕⲁⲟⲩⲱϣ ⲛⲁⲩ ⲉϩⲣⲁⲓ ⲉⲧⲣⲉⲩⲉⲓ ⲛⲧⲉⲩϣⲏ ⲛⲥⲉϥⲓ ⲛⲛⲕⲉⲉⲥ ⲛⲛⲉⲧⲟⲩⲁⲁⲃ · ⲓⲱϩⲁⲛⲛⲏⲥ ⲡⲃⲁⲡⲧⲓⲥⲧⲏⲥ ⲙⲛⲉⲗⲩⲥⲁⲓⲟⲥ ⲡⲉⲡⲣⲟⲫⲏⲧⲏⲥ ·
…
170 ⲛⲧⲟⲟⲩ ⲇⲉ ⲉⲣⲉⲧϭⲓϫ ⲙⲡϫⲟⲉⲓⲥ ϣⲟⲟⲡ ⲛⲙⲙⲁⲩ · ⲁⲩⲧⲟⲃⲥⲟⲩ ⲇⲉ ⲉϫⲓⲧⲟⲩ ⲉⲕⲏⲙⲉ ⲛⲁⲑⲁⲛⲁⲥⲓⲟⲥ · ⲉⲃⲟⲗ ϫⲉⲛⲉϥⲉⲡⲓⲑⲩⲙⲉⲓ ⲣⲱ ⲉⲛⲁⲩ ⲉⲣⲟⲟⲩ ·
…
171 ⲁⲩⲉⲓ ⲇⲉ ⲉⲃⲟⲗ ⲉϫⲛⲧϩⲁⲗⲗⲁⲥⲁ ⲁⲩϩⲉ ⲉⲡϫⲟⲉⲓ ϩⲛⲟⲩϣⲡⲛϣⲱⲡ · ⲁⲩⲁⲗⲉ ⲁⲩⲉⲓ ⲉⲣⲁⲕⲟⲧⲉ ϩⲛⲟⲩⲁⲥⲁⲓ ⲁⲩⲧⲁⲁⲩ ⲛⲁⲑⲁⲛⲁⲥⲓⲟⲥ · ⲁϥⲣⲁϣⲉ ⲉϩⲣⲁⲓ ⲉϫⲱⲟⲩ · ⲛⲧϩⲉ ⲛⲧⲁϥⲛⲁⲩ ⲉⲣⲟⲟⲩ ϩⲱⲥ ϫⲉⲛⲧⲁϥⲛⲁⲩ ⲉⲣⲟⲟⲩ ϩⲙⲡⲥⲱⲙⲁ
…
172 ⲁϥϩⲟⲡⲟⲩ ϩⲙⲡⲃⲁⲡϯⲥⲧⲏⲣⲓⲟⲛ · ⲉϥϣⲓⲛⲉ ⲛⲥⲁⲟⲩⲟⲉⲓϣ · ⲛⲕⲱⲧ ⲉⲣⲟⲟⲩ ⲛⲟⲩⲙⲁⲣⲧⲩⲣⲓⲟⲛ .
…
173 ⲉϥⲟⲩⲱⲙ ⲇⲉ ⲛⲟⲩϩⲟⲟⲩ ϩⲙⲡⲕⲏⲡⲟⲥ ⲛⲛⲉⲛⲉⲓⲟⲧⲉ ⲙⲛⲛⲉⲥⲛⲏⲩ · ⲛϥⲙⲟⲩⲧⲉ ⲅⲁⲣ ⲙⲙⲏⲛⲉ ⲉⲛⲛⲟϭ ⲙⲡⲉⲕⲗⲏⲣⲟⲥ · ⲉϥⲟⲩⲱⲙ ⲛⲙⲙⲁⲩ · ⲛⲁⲓ ⲉⲛⲉⲩⲛⲏⲩ ϣⲁⲣⲟϥ ⲉϩⲛⲁⲩ ·
…
174 ⲟⲩⲙⲟⲛⲟⲛ ⲇⲉ ϫⲉⲉⲩⲟⲩⲱⲙ · ⲁⲗⲗⲁ ⲉⲩⲥⲱⲧⲙ ⲟⲛ ⲉⲛϣⲁϫⲉ ⲛⲧⲥⲟⲫⲓⲁ · ⲛⲧⲁⲡⲛⲟⲩⲧⲉ ⲧⲁⲁⲥ ⲛⲁϥ · ⲕⲁⲧⲁⲧϩⲉ ⲉⲧⲥⲏϩ · ϩⲱⲃ ⲛⲓⲙ ⲉⲡⲉⲟⲟⲩ ⲙⲡⲛⲟⲩⲧⲉ ·
…
175 ⲉⲓⲧⲉ ⲙⲡⲛⲁⲩ ⲛⲛⲏⲥⲧⲉⲩⲉ · ⲉⲓⲧⲉ ⲙⲡⲛⲁⲩ ⲛⲟⲩⲱⲙ · ⲁⲩⲱ ⲛⲥⲱ · ⲉϥⲟⲩⲱⲙ ⲉϥⲥⲱ ϩⲙⲡϣⲁϫⲉ ⲙⲡⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ·
…
176 ⲉϥⲟⲩⲱⲙ ϭⲉ ⲙⲛⲛⲉⲥⲛⲏⲩ ⲙⲛⲛⲉⲕⲗⲏⲣⲓⲕⲟⲥ ⲙⲛⲛⲛⲟϭ ⲙⲫⲓⲗⲟⲡⲟⲛⲟⲥ ⲛⲧⲉⲕⲕⲗⲏⲥⲓⲁ · ϩⲙⲡⲕⲏⲡⲟⲥ ⲉⲧϣⲟⲟⲡ ⲛⲁϥ ϩⲙⲡϩⲓⲣ · ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡϩⲉⲣⲙⲏⲥ ⲙⲡⲣⲏⲥ ⲛⲧⲡⲟⲗⲓⲥ · ⲉϥⲟⲩⲏⲛ ⲉϫⲛϩⲉⲛⲕⲟⲡⲣⲓⲁ · ⲙⲛϩⲉⲛⲡⲗⲁϯⲁ ⲛϫⲁⲓⲉ ·
…
177 ⲡⲉϫⲁϥ ϫⲉⲉⲓϣⲁⲛϭⲛⲡⲉⲟⲩⲟⲉⲓϣ ϯⲛⲁⲕⲁⲑⲁⲣⲓⲍⲉ ⲛⲛⲉⲕⲟⲡⲣⲓⲁ · ⲛⲧⲁⲕⲱⲧ ⲛϩⲏⲧⲟⲩ · ⲙⲡⲙⲁⲣⲧⲩⲣⲓⲟⲛ ⲛⲓⲱϩⲁⲛⲛⲏⲥ ⲡⲃⲁⲡϯⲥⲧⲏⲥ ·
…
178 ⲑⲉⲟⲫⲩⲗⲟⲥ ⲇⲉ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛϥⲁϩⲉⲣⲁⲧϥ ⲉⲧⲉⲧⲣⲁⲡⲉⲍⲁ ⲉϥⲟⲩⲱⲙ · ⲉⲃⲟⲗ ϫⲉⲛⲉϥⲟ ⲛⲛⲟⲧⲁⲣⲓⲟⲥ ⲛⲁϥ · ⲁϥⲥⲱⲧⲙ ⲉⲡϣⲁϫⲉ ⲛⲧⲁϥϫⲟⲟϥ ⲛϭⲓⲁⲑⲁⲛⲁⲥⲓⲟⲥ · ⲁϥⲕⲁⲁϥ ϩⲙⲡⲉϥϩⲏⲧ ·
…
179 ⲓⲟⲩⲗⲓⲁⲛⲟⲥ ⲇⲉ ⲕⲁⲧⲁⲡⲉⲧⲥⲱⲕ ⲙⲙⲟϥ · ⲉⲧⲣⲉϥⲃⲱⲕ ϩⲛⲟⲩϭⲱⲛⲧ ⲉⲧⲡⲉⲣⲥⲓⲥ · ⲁⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲛⲟⲩⲧⲉ ⲧⲁⲁϥ ⲉϩⲣⲁⲓ ⲉⲧⲟⲟⲧⲟⲩ ⲛⲙⲡⲉⲣⲥⲟⲥ · ⲉⲃⲟⲗ ϫⲉⲁϥⲕⲁⲛⲉⲧⲟⲩⲁⲁⲃ · ⲉⲩⲟⲧⲡ ⲉϩⲟⲩⲛ ⲁϥⲃⲱⲕ ⲉⲧⲡⲉⲣⲥⲓⲥ ·
…
180 ⲡⲙⲟⲩ ⲇⲉ ⲛⲧⲁϥⲙⲟⲩ ⲙⲙⲟϥ ⲛⲉⲟⲩϯϩⲉ ⲡⲉ · ⲁϥⲛⲁⲩ ϩⲛⲧⲉⲟⲩϣⲏ ⲉⲩⲙⲏⲏϣⲉ ⲙⲙⲁⲧⲟⲓ ⲉⲩⲛⲏⲩ ⲉϫⲱϥ ⲉⲃⲟⲗ ϩⲙⲡⲁⲏⲣ · ⲉⲓⲥⲟⲩⲗⲟⲅⲭⲏ ⲇⲉ ⲁⲥⲣⲁϩⲧϥ ⲉϫⲛⲛⲉϥϭⲗⲟⲟⲧⲉ ⲁϥⲥⲟⲩⲱⲛⲟⲩ ϫⲉⲛⲉⲧⲟⲩⲁⲁⲃ ⲛⲉ ·
…
181 ⲁϥϫⲓ ϭⲉ ⲙⲡⲉϥⲥⲛⲟϥ ⲁϥⲛⲟϫϥ ⲉϩⲣⲁⲓ ⲉⲧⲡⲉ ⲉϥϫⲱ ⲙⲙⲟⲥ ϫⲉϫⲓⲧϥ ⲛⲁⲕ ⲓⲏⲥⲟⲩⲥ ⲁⲕϥⲓ ⲡⲙⲁ ⲧⲏⲣϥ ·
…
182 ⲛⲧⲉⲣϥϫⲓⲟⲩⲁ · ⲅⲁⲣ ⲛⲧⲉⲩⲛⲟⲩ ⲁϥϩⲉ ⲁⲩⲱ ⲁⲡⲛⲟⲩⲧⲉ ⲣϩⲙⲙⲉ ⲙⲡⲉϥⲗⲁⲟⲥ · ⲁⲩⲱ ⲁϥⲧⲟⲩϫⲟⲛ · ⲓⲉϩⲣⲱⲙⲁⲓⲟⲥ ⲉϩⲣⲁⲓ ⲉⲡⲉⲩⲙⲁ ·
…
183 ⲃⲁⲥⲓⲗⲉⲓⲟⲥ ϭⲉ ϩⲁⲧϩⲏ ⲛϣⲟⲙⲛⲧ ⲛϩⲟⲟⲩ ⲉⲡⲙⲟⲩ ⲛⲓⲟⲩⲗⲓⲁⲛⲟⲥ · ⲁϥⲛⲁⲩ ⲉⲩⲣⲁⲥⲟⲩ ϩⲙⲡⲉϣⲧⲉⲕⲟ ·
…
184 ⲁϥⲛⲉϩⲥⲉ ⲇⲉ ⲁϥϫⲟⲥ ⲉⲡⲉϥⲥⲟⲛ ⲥⲛⲁⲩ ⲉϥϫⲱ ⲙⲙⲟⲥ · ϫⲉⲁⲓⲛⲁⲩ ϩⲛⲧⲉⲓⲟⲩϣⲏ ⲉⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
…
185 ⲉⲁϥⲃⲱⲕ ⲉϩⲟⲩⲛ ⲉⲡⲉϥⲙⲁⲣⲧⲩⲣⲓⲟⲛ · ⲁϥⲧⲱⲕⲙ ⲙⲡⲉϥⲙⲉⲣⲉϩ ⲉϥϫⲱ ⲙⲙⲟⲥ ϫⲉⲉⲓⲛⲁⲕⲁⲡⲉⲓⲁⲛⲟⲙⲟⲥ ⲛⲧⲉⲓϩⲉ · ⲉϥϫⲓⲟⲩⲁ · ⲉⲡⲛⲟⲩⲧⲉ ⲛⲧⲡⲉ ·
…
186 ⲁⲩⲱ ⲛⲧⲉⲣⲉϥϫⲉⲛⲁⲓ ⲁϥⲃⲱⲕ ⲁⲓⲗⲟ ⲉⲛⲁⲩ ⲉⲣⲟϥ ·
…
187 ⲁⲩⲟⲩⲱϣⲃ ⲇⲉ ⲛϭⲓⲡⲕⲉⲥⲛⲁⲩ ϫⲉⲛⲁⲙⲉ ⲁⲛⲟⲛ ϩⲱⲱⲛ · ⲁⲛⲛⲁⲩ ⲉⲡⲉⲓϩⲟⲣⲟⲙⲁ ⲛϯⲙⲓⲛⲉ .
…
188 ⲛⲧⲉⲣⲟⲩⲛⲁⲩ ⲇⲉ ⲛⲧⲉⲓⲅⲛⲱⲙⲏ ⲛⲧⲁⲡⲛⲟⲩⲧⲉ ⲧⲥⲁⲃⲟⲟⲩ · ⲉⲣⲟⲥ · ⲁⲩⲡⲓⲥⲧⲉⲩⲉ · ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲙⲁⲣⲉⲛϫⲟⲟⲩ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲧⲛⲛⲁⲩ ϫⲉⲉⲣⲉⲡⲉϥⲙⲉⲣⲉϩ ⲧⲟⲕⲥ ⲉⲡⲉϥⲙⲁ ϫⲉⲛⲙⲙⲟⲛ ·
…
189 ⲁⲩⲧⲛⲛⲟⲟⲩ ϭⲉ ⲁⲩⲱ ⲙⲡⲟⲩϭⲛⲧϥ ⲁⲩⲡⲓⲥⲧⲉⲩⲉ ⲉⲡϩⲟⲣⲟⲙⲁ ·
…
190 ⲙⲛⲛⲥⲁϣⲟⲙⲛⲧ ⲇⲉ ⲛϩⲟⲟⲩ ⲁⲩⲧⲛⲛⲟⲟⲩ ⲛⲛⲉⲥϩⲁⲓ ⲉⲧⲁⲛⲧⲓⲟⲭⲓⲁ ϫⲉⲁⲡⲣⲣⲟ ⲙⲟⲩ ϩⲙⲡⲡⲟⲗⲉⲙⲟⲥ ·
…
191 ⲧⲥⲩⲅⲕⲗⲏⲧⲟⲥ ⲇⲉ ⲧⲏⲣⲥ ϩⲛⲟⲩⲯⲏⲫⲟⲥ ⲛⲧⲉⲡⲛⲟⲩⲧⲉ ⲁⲩⲁⲙⲁϩⲧⲉ ⲛⲓⲟⲩⲃⲓⲁⲛⲟⲥ · ⲁⲩⲁⲁϥ ⲛⲣⲣⲟ · ⲉⲡⲙⲁ ⲛⲓⲟⲩⲗⲓⲁⲛⲟⲥ ·
…
192 ⲉⲩⲣⲱⲙⲉ ⲡⲉ ⲙⲡⲓⲥⲧⲟⲥ · ⲛⲣⲙⲛⲛⲟⲩⲧⲉ ϫⲓⲛⲧⲉϥⲙⲛⲧⲕⲟⲩⲓ · ⲛⲧⲟϥ ⲇⲉ ⲛⲧⲉⲩⲛⲟⲩ ⲁϥⲕⲱ ⲉⲃⲟⲗ ⲛⲛⲉⲧⲟⲩⲁⲁⲃ ⲃⲁⲥⲩⲗⲉⲓⲟⲥ · ⲡⲉⲥⲧⲩⲗⲗⲟⲥ ⲛⲧⲙⲉ · ⲡⲕⲁⲡⲡⲁⲇⲟⲝ · ⲙⲛⲛⲉⲥⲛⲏⲩ ·
…
193 ⲁⲩⲱ ϭⲉ ⲙⲡⲉϥⲕⲟⲧϥ ⲛϭⲓⲓⲟⲩⲗⲓⲁⲛⲟⲥ ⲕⲁⲧⲁⲡϣⲁϫⲉ ⲛⲃⲁⲥⲓⲗⲉⲓⲟⲥ ·
…
194 ϩⲛⲟⲩⲉⲓⲣⲏⲛⲉ ⲛⲧⲉⲡⲛⲟⲩⲧⲉ · ⲉⲣⲉⲛⲉϣⲗⲏⲗ ⲙⲛⲛⲧⲱⲃϩ ⲙⲡⲓⲛⲟϭ ⲛⲥⲧⲣⲁⲧⲏⲗⲁⲧⲏⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁⲉⲓ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ϩⲓⲟⲩⲥⲟⲡ · ϥⲑ ·
…