1 ⲟⲩⲉⲛⲕⲱⲙⲓⲟⲛ ⲉⲁϥⲧⲁⲩⲟϥ · ⲛϭⲓⲡϩⲁⲅⲓⲟⲥ ⲁⲡⲁ ⲁⲕⲁⲕⲓⲟⲥ · ⲡⲉⲡⲓⲥⲕⲟⲡⲟⲥ ⲛⲧⲕⲁⲓⲥⲁⲣⲓⲁ · ϩⲙⲡⲙⲁⲣⲧⲏⲣⲓⲟⲛ · ⲛⲧⲁⲩⲕⲟⲧϥ ⲉⲡⲣⲁⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϩⲙⲡⲉϩⲟⲟⲩ ⲙⲡⲉϥⲣⲡⲙⲉⲉⲩⲉ ⲉⲧⲟⲩⲁⲁⲃ · ⲉⲧⲉⲥⲟⲩϫⲟⲩⲧⲉ ⲡⲉ ⲙⲡⲉⲃⲟⲧ ⲁⲑⲱⲣ · ⲉⲁϥⲉⲅⲱⲙⲓⲁⲍⲉ ⲛϩⲁϩ ⲛϭⲟⲙ · ϩⲓϣⲡⲏⲣⲉ · ⲁⲩϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡⲙⲁⲣⲧⲏⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ · ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ ⲉⲩⲉϣⲱⲡⲉ ⲛⲙⲙⲁⲛ ⲧⲏⲣⲛ ϩⲓⲟⲩⲥⲟⲡ · ϩⲁⲙⲏⲛ ·
…
2 ⲁⲗⲏⲑⲱⲥ ⲁⲡⲟⲩⲟⲉⲓⲛ ϣⲁⲛⲉⲛⲇⲓⲕⲁⲓⲟⲥ · ⲙⲡⲉⲓϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲕⲁⲧⲁ…. ⲁϥϫⲱⲡⲉϩⲓⲉⲣⲟⲩⲯⲁⲗⲧⲏⲥ · ⲁⲩⲱ ⲡⲉⲓⲱⲧ ⲙⲡⲉⲭⲣⲓⲥⲧⲟⲥ · ⲕⲁⲧⲁⲥⲁⲣⲝ · ⲡⲣⲣⲟ ⲛⲇⲓⲕⲁⲓⲟⲥ · ⲡϩⲩⲙⲛⲟⲇⲟⲥ ⲇⲁⲩⲉⲓⲇ ·
…
3 ⲉϥⲱϣ ⲉⲃⲟⲗ · ⲉϥⲱϣ ⲉⲃⲟⲗ · ϩⲛⲧⲉϥⲥⲙⲏ ⲉⲧⲛⲟⲧⲙ · ⲉϥϫⲱ ϩⲛⲧⲉϥⲕⲓⲑⲁⲣⲁ ϩⲙⲡⲗⲁⲕⲧⲣⲟⲛ · ⲉⲧⲛⲧⲟⲟⲧϥ · ⲉϥϫⲱ ⲙⲙⲟⲥ · ϫⲉⲁⲡⲟⲩⲟⲉⲓⲛ ϣⲁⲛⲧⲛⲇⲓⲕⲁⲓⲟⲥ ·
…
4 ⲁⲩⲱ ⲟⲛ · ϫⲉⲁⲡⲟⲩⲟⲉⲓⲛ ϣⲁϩⲙⲡⲕⲁⲕⲉ · ⲉⲛⲛⲉⲧⲥⲟⲩⲧⲱⲛ ϩⲙⲡⲉⲩϩⲏⲧ ·
…
5 ⲡⲉϫⲉⲡⲉⲭⲣⲓⲥⲧⲟⲥ ϩⲱϥ ϩⲙⲡⲉⲩⲁⲅⲅⲉⲗⲓⲟⲛ · ϫⲉⲧⲟⲧⲉ ⲛⲇⲓⲕⲁⲓⲟⲥ ⲛⲁⲣⲟⲩⲟⲉⲓⲛ · ⲛⲧϩⲉ ⲙⲡⲣⲏ ϩⲛⲧⲙⲛⲧⲣⲣⲟ ⲙⲡⲉⲩⲉⲓⲱⲧ ·
…
6 ⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ … ⲕⲛⲁⲩ ⲉ… ⲛⲁⲡⲉⲣⲁⲛⲧⲟⲛ ϫⲉⲛⲉⲕⲱ : ⲛϩⲗⲗⲏⲛ ⲙⲡⲁⲧⲕⲥⲟⲩⲛ ⲡⲉⲭⲣⲓⲥⲧⲟⲥ ⲕⲁⲗⲟⲥ ·
…
7 ⲁⲩⲱ ⲛⲧⲉⲣⲉϥϩⲟⲕϥ · ⲛⲉϥⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲛⲃⲁⲣⲃⲁⲣⲟⲥ ·
…
8 ⲉϥϩⲓⲧϩⲏ ⲇⲉ ⲛⲇⲓⲕⲁⲓⲟⲥ ⲡⲣⲣⲟ ⲛⲁⲛⲟⲙⲟⲥ ϩⲱⲥ ⲡⲟⲗⲩⲙⲁⲣⲭⲏⲥ ·
…
9 ⲉϥⲁⲙⲁϩⲧⲉ ⲛⲉⲛⲥⲟⲧⲉ ⲛⲕⲗⲟⲉϥⲛⲁϣⲱϭⲉⲛ ⲛⲃⲁⲣⲃⲁⲣⲟⲥ ⲛϩⲏⲧⲟⲩ ·
…
10 ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ · ⲁϥⲉⲓ ⲉⲡⲉⲥⲏⲧ ⲉⲃⲟⲗ ϩⲛⲧⲡⲉ · ⲁϥⲧⲁⲁⲧ ⲉⲛⲧⲥⲏϥⲉ ⲛⲁϥ · ϫⲉⲟϫⲛ ⲛⲛⲃⲁⲣⲃⲁⲣⲟⲥ ……ⲧⲁ…ⲧ ⲉϣϣⲉ ⲡⲉ ⲉⲧⲣⲉⲛⲟⲩⲟⲛϩ ⲉⲃⲟⲗ · ⲛⲟⲩⲛⲟϭ ⲛⲇⲓⲁⲑⲉⲥⲓⲥ ⲉϩⲟⲩⲛ ⲉⲣⲟⲟⲩ · ⲛⲧⲛϯ ⲛⲟⲩⲧⲁⲉⲓⲟ ⲛⲁⲩ · ⲙⲛⲟⲩⲉⲟⲟⲩ ⲕⲁⲧⲁⲡⲉⲩⲙⲡϣⲁ · ϩⲛϩⲉⲛⲥⲡⲟⲇⲏ ⲙⲛϩⲉⲛⲑⲩⲥⲓⲁ · ⲕⲁⲧⲁ ⲙⲡⲉⲧⲛⲁⲛⲟⲩϥ · ⲛⲧⲁⲩⲁⲁⲩ ⲛⲁⲛ ⲛϣⲟⲣⲡ ·
…
11 ⲧⲛⲟⲩⲉϩⲥⲁϩⲛⲉ ⲉⲧⲣⲉⲩⲟⲩⲱⲛ ⲛⲛⲣⲟ ⲛⲛⲣⲡⲏⲩⲉ ⲧⲏⲣⲟⲩ · ⲕⲁⲧⲁⲡⲟⲗⲓⲥ · ⲁⲩⲱ ⲕⲁⲧⲁϯⲙⲉ · ϫⲓϯϩⲣⲱⲙⲁⲛⲓⲁ ϣⲁⲣⲏⲥ ⲉⲡⲓⲗⲁⲕ · ⲙⲛⲛⲓϭⲟⲟϣ · ⲛⲥⲉⲧⲁⲗⲉⲗⲓⲃⲁⲛⲟⲥ ⲉϩⲣⲁⲓ ⲛⲛⲛⲟⲩⲧⲉ ⲉⲧⲁⲓⲏⲩ · ⲛⲥⲉⲉⲓⲣⲉⲛⲉⲩϣⲙϣⲉ ϩⲛⲟⲩⲛⲟϭ ⲛⲥⲡⲟⲩⲇⲏ ·
…
12 ⲉⲧⲙⲧⲣⲉⲗⲁⲁⲩ ⲛⲭⲣⲓⲥⲧⲓⲁⲛⲟⲥ · ⲁⲩⲱⲛϩ ⲉⲃⲟⲗ ϩⲛⲗⲁⲁⲩ ⲙⲙⲁ · ⲁⲩⲱ ⲛⲧⲉⲛⲁⲣⲭⲱⲛ ⲛⲧⲉⲡⲁⲣⲭⲓⲁ · ⲇⲓⲱⲕⲉⲓ ⲛⲥⲁⲛⲉⲓⲭⲣⲓⲥⲧⲓⲁⲛⲟⲥ ⲕⲁⲧⲁⲙⲁ · ⲉⲓⲧⲉ ⲉⲡⲓⲥⲕⲟⲡⲟⲥ · ⲉⲓⲧⲉ ⲡⲣⲉⲥⲃⲩⲧⲉⲣⲟⲥ · ⲉⲓⲧⲉ ⲁⲛⲁⲅⲛⲱⲥⲧⲏⲥ · ⲉⲓⲧⲉ ⲙⲟⲛⲁⲭⲟⲥ · ⲉⲓⲧⲉ ⲕⲟⲥⲙⲓⲕⲟⲛ · ⲉⲓⲧⲉ ϩⲟⲟⲩⲧ · ⲉⲓⲧⲉ ⲥϩⲓⲙⲉ · ⲉⲓⲧⲉ ⲙⲁⲧⲟⲓ · ⲉⲓⲧⲉ ⲡⲁⲅⲁⲛⲟⲥ · ⲉⲓⲧⲉ ⲧⲁⲝⲓⲱⲧⲏⲥ · ϩⲁⲡⲗⲟⲥ ⲅⲉⲛⲟⲥ ⲛⲓⲙ ⲛⲣⲱⲙⲉ · ⲉⲧⲃⲉⲡⲁⲙⲁϩⲧⲉ ⲛⲧⲁⲙⲛⲧⲣⲣⲟ · ⲉⲧⲣⲉⲩⲑⲩⲥⲓⲁⲍⲉ ⲛⲛⲛⲟⲩⲧⲉ ⲉⲧⲁⲓⲏⲩ ·
…
13 ⲁⲩⲱ ⲡⲉⲧⲛⲁⲁⲛ ϯⲗⲉⲅⲉⲓ ⲙⲡⲁⲟⲩⲉϩⲥⲁϩⲛⲉ · ⲉⲩⲉⲡⲁⲣⲁⲇⲓⲇⲟⲩ ⲙⲙⲟϥ · ⲉϩⲉⲛⲛⲟϭ ⲛⲃⲁⲥⲁⲛⲟⲥ ⲉⲩϣⲟⲃⲉ · ϣⲁⲛⲧⲟⲩⲙⲟⲩ ·
…
14 ⲧⲟⲧⲉ ⲁϥⲟⲩⲉϩⲥⲁϩⲛⲉ ⲛϭⲓⲇⲉⲕⲓⲟⲥ ⲡⲣⲣⲟ ⲛⲁⲛⲟⲙⲟⲥ · ⲉⲧⲣⲉⲡⲕⲩⲣⲓⲝ ⲱϣ ⲉⲃⲟⲗ · ϩⲛⲧⲡⲟⲗⲓⲥ ⲧⲏⲣⲥ · ϫⲉⲉⲩϫⲓ ⲉⲣⲱⲧⲛ ⲧⲏⲣⲧⲛ ⲙⲡⲗⲁⲟⲥ · ϫⲉⲉⲓⲧⲉ ⲙⲁⲧⲟⲓ · ⲉⲓⲧⲉ ⲡⲁⲅⲁⲛⲟⲥ · ⲉⲓⲧⲉ ⲅⲉⲛⲟⲥ ⲛⲓⲙ ⲛⲣⲱⲙⲉ · ⲙⲛϩⲩⲗⲓⲕⲓⲁ ⲛⲓⲙ · ϫⲉⲁⲙⲏⲓⲧⲛ ⲧⲏⲣⲧⲛ …ⲣⲡⲉ ⲛⲛⲛⲟⲩⲧⲉ · ⲛⲧⲉⲧⲛⲧⲁⲗⲉⲑⲩⲥⲓⲁ ⲛⲁⲩ ⲉϩⲣⲁⲓ · ⲁⲩϫⲣⲟ ⲛⲧϣⲏⲩⲉ ϩⲓⲣⲙⲡⲣⲟ ⲙⲡⲣⲡⲉ · ⲁⲩⲧⲁⲗⲉ ⲑⲩⲥⲓⲁ ⲛⲁⲩ ⲉϩⲣⲁⲓ ϩⲓⲗⲓⲃⲁⲛⲟⲥ · ⲙⲛϩⲉⲛⲙⲁⲥⲉ · ⲙⲛϩⲉⲛϭⲓⲉⲓ · ⲙⲛϩⲉⲛϩⲁⲗⲁⲁⲧⲉ · ⲁⲡⲉⲥⲧⲉⲣⲉⲩⲱⲙⲁ ⲙⲟⲩϩ · ϩⲙⲡⲕⲁⲡⲛⲟⲥ ⲙⲡⲉⲥϯⲃⲱⲱⲛ · ⲛⲛⲉⲩⲑⲩⲥⲓⲁ ·
…
15 ⲁⲩⲱ ⲛⲉⲣⲉⲟⲩⲛⲟϭ ϣⲟⲟⲡ ϩⲛⲛⲉⲭⲣⲓⲥⲧⲓⲁⲛⲟⲥ · ⲛϣⲧⲟⲣⲧⲣ ⲉⲩⲇⲓⲱⲕⲉⲓ ⲛⲥⲱⲟⲩ · ⲉⲩϩⲓⲟⲩⲉ ⲉⲣⲟⲟⲩ · ⲉⲩⲥⲱⲕ ⲙⲙⲟⲟⲩ ⲉⲛⲉⲥⲡⲩⲗⲱⲛ · ⲙⲛⲙⲙⲁⲉⲧϩⲉⲡ · ⲉⲩⲁⲛⲁⲅⲁⲍⲉ ⲙⲙⲟⲟⲩ ⲉⲣⲑⲩⲥⲓⲁ ·
…
16 ⲉⲣⲉϩⲉⲛⲛⲟϭ ⲛⲧⲁⲣⲁⲭⲏ ϣⲟⲟⲡ ⲕⲁⲧⲁⲙⲁ · ⲁϥⲟⲩⲉϩⲥⲁϩⲛⲉ ⲅⲁⲣ ⲛⲡⲧⲩⲣⲁⲛⲛⲟⲥ · ⲉⲕⲱ ⲉϩⲣⲁⲓ ϩⲓⲧϩⲏ ⲙⲙⲟϥ · ⲉⲛⲉⲓⲇⲟⲥ ⲛⲓⲙ ⲛⲕⲟⲗⲁⲥⲧⲓⲣⲓⲟⲛ ⲉⲩϯϩⲟⲧⲉ · ϫⲉⲕⲁⲥ ⲉⲩⲉⲛⲁⲩ ⲉⲣⲟⲟⲩ ⲛϭⲓⲛⲉⲭⲣⲓⲥⲧⲓⲁⲛⲟⲥ · ⲛⲥⲉⲣϩⲟⲧⲉϩⲉⲛⲥⲏϥⲉ ⲉⲩⲧⲁⲁⲧⲉ · ⲙⲛϩⲉⲛⲙⲙⲁ ⲛⲙⲕⲟⲧⲕ ⲙⲡⲉⲛⲓⲡⲉ · ⲙⲛⲛⲉϣⲁⲩⲥⲉⲕⲛⲉⲩⲣⲟⲛ ⲛϩⲏⲧⲟⲩ · ⲙⲛϩⲉⲛⲧⲟⲕ ⲛϣⲉⲧⲗⲁⲥ · ⲙⲛϩⲉⲛⲕⲟⲩⲡⲓⲥ ⲙⲛϩⲉⲛϭⲟⲣⲧⲉ ⲉⲩϫⲏⲣ · ⲙⲛϩⲉⲛⲭⲁⲗⲕⲓⲟⲛ ⲉⲩⲙⲉϩ ⲛⲗⲁⲙϫⲁⲧⲡ ⲉⲩⲃⲏⲣⲃⲣ · ⲁⲩⲱ ⲟⲛ ϩⲉⲛⲭⲁⲗⲕⲓⲟⲛ ⲉⲩⲙⲉϩ ϩⲛⲥⲏⲙⲁ · ⲁⲩⲱ ϩⲉⲛⲧⲣⲟⲭⲟⲥ ⲛⲃⲁϣⲟⲩⲣ · ⲙⲛⲡⲕⲉⲥⲉⲉⲡⲉ ⲛⲕⲟⲗⲁⲥϯⲏⲣⲓⲟⲛ ⲉⲩϯϩⲟⲧⲉ ·
…
17 ⲛⲉϥϫⲱ ⲅⲁⲣ ⲙⲙⲟⲥ · ⲛϭⲓⲡⲣⲣⲟ ⲛⲁⲥⲉⲃⲏⲥ ⲉⲧⲙⲙⲁⲩ · ϫⲉⲡⲉⲧⲛⲁϯⲁⲛⲧⲓⲗⲉⲅⲉⲓ ⲙⲡⲁⲧ ⲟⲩⲉϩⲥⲁϩⲛⲉ · ϯⲛⲁⲡⲱⲣⲕ ⲛⲛⲉϥⲃⲁⲗ · ⲛⲧⲁϣⲱⲧ ⲙⲡⲉϥⲗⲁⲥ · ⲛⲧⲁⲉⲓⲛⲉ ⲉⲃⲟⲗ ⲙⲡϥⲛϩⲱⲛ : ⲛⲧⲁⲓⲟⲩⲉⲓⲥⲉⲥⲏⲃⲉ ⲛⲣⲁⲧϥ · ⲛⲧⲁⲓⲉⲓⲛⲉ ⲉⲃⲟⲗ ⲙⲡⲉϥⲁⲛⲕⲉⲫⲁⲗⲟⲥ · ⲡⲕⲉⲥⲉⲉⲡⲉ ⲇⲉ ⲙⲡⲉϥⲥⲱⲙⲁ · ϯⲛⲁⲧⲁϥ ⲉⲡⲕⲱϩⲧ ⲛϥⲁⲛϩⲁⲗⲓⲥⲕⲉⲓ ⲙⲙⲟϥ ·
…
18 ⲛⲧⲉⲣⲟⲩⲛⲁⲩ ⲇⲉ ⲉⲛⲁⲓ ⲛϭⲓⲛⲣⲱⲙⲉ ⲛⲉⲩⲥⲉⲃⲏⲥ · ⲁⲩⲟⲩⲛⲟϭ ⲙⲛⲧϭⲁⲃ ϩⲏⲧ ⲧⲁϩⲟⲟⲩ · ⲁⲩⲣϩⲟⲧⲉ · ⲁⲩⲕⲁⲧⲟⲟⲧⲟⲩ ⲉⲃⲟⲗ ·
…
19 ⲉⲣⲉⲡⲟⲩⲁ ⲡⲟⲩⲁ ⲡⲁⲣⲁⲇⲓⲇⲟⲩ · ⲙⲡⲉⲧϩⲓⲧⲟⲩⲱϥ ⲉⲡⲙⲟⲩ · ϩⲉⲛⲉⲓⲟⲧⲉ ⲉⲩⲡⲁⲣⲁⲇⲓⲇⲟⲩ ⲛⲛⲉⲩϣⲏⲣⲉ ⲉⲡⲙⲟⲩ · ⲁⲩⲣⲡⲱⲃϣ ⲛⲧⲙⲉ ⲛⲧⲉⲫⲩⲥⲓⲥ ⲁⲩⲱ ϩⲉⲛⲥⲛⲏⲩ ⲉⲩⲥⲱⲕ ⲙⲙⲟⲟⲩ · ⲉⲩϩⲱⲣⲃⲣ ⲙⲙⲟⲟⲩ · ⲉⲩⲡⲁⲣⲁⲇⲓⲇⲟⲩ ⲙⲙⲟⲟⲩ · ⲉⲣⲉⲟⲩⲛⲟϭ ⲛϣⲧⲱⲣⲧⲣ ϣⲟⲟⲡ :
…
20 ⲛⲟⲩⲟⲛ ⲛⲓⲙ ⲉⲧϩⲟⲙⲟⲗⲟⲅⲉ ⲙⲡⲣⲁⲛ ⲙⲡⲣⲁⲛ ⲛⲓⲏⲥⲟⲩⲥ ·
…
21 ⲛⲉⲩⲛⲟⲩϣⲏⲣⲉ ⲇⲉ ϣⲏⲙ ⲛϫⲱⲱⲣⲉ · ϩⲙⲡⲉⲥⲧⲣⲁⲧⲉⲩⲙⲁ · ⲉⲡⲉϥⲣⲁⲛ ⲡⲉ ⲙⲉⲣⲕⲟⲩⲣⲓⲟⲥ · ⲉϥϩⲏⲕ ϩⲙⲡⲁⲣⲓⲑⲙⲟⲥ ⲛⲛⲙⲙⲁⲣⲧⲩⲥⲓⲟⲥ · ⲉϥⲣϩⲟⲧⲉ ϩⲏⲧϥ ⲙⲡⲛⲟⲩⲧⲉ
…
22 ⲉⲛⲉⲓⲥⲱϥ ⲉⲙⲁⲧⲉ · ϩⲙⲡⲉϥⲉⲓⲛⲉ · ⲉⲣⲉⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲙⲉ ⲙⲙⲟϥ · ⲉⲧⲃⲉⲧⲉϥⲉⲡⲓⲥⲧⲏⲙⲓ
…
23 ⲛⲉϥⲉⲑⲟⲥ ⲟⲩ ⲉⲃⲟⲗ ⲡⲉ ϩⲛⲧⲉⲭⲱⲣⲁ ⲛⲧⲕⲁⲡⲡⲁⲇⲟⲕⲓⲁ ϩⲙⲡⲉϥⲅⲉⲛⲟⲥ · ⲉⲩⲭⲣⲓⲥⲧⲓⲁⲛⲟⲥ ⲡⲉ ϫⲓⲛⲧⲉϥⲙⲛⲧⲕⲟⲩⲓ · ⲙⲛⲛⲉϥⲉⲓⲟⲧⲉ
…
24 ⲛⲟⲩϫⲱⲱⲣⲉ ⲡⲉ ϩⲙⲡⲡⲟⲗⲉⲙⲟⲥ · ⲉⲣⲉⲡⲛⲟⲩⲧⲉ ϣⲟⲟⲡ ⲛⲙⲙⲁϥ ϩⲛⲛⲉϥϩⲃⲏⲩⲉ ⲧⲏⲣⲟⲩ ·
…
25 ⲛⲧⲉⲣϥⲛⲁⲩ ⲉⲣⲟϥ ⲛϭⲓⲡⲉⲧⲣⲓⲃⲟⲩⲛⲟⲥ · ϫⲉⲉϥⲡⲣⲟⲕⲟⲡⲧⲉⲓ ϩⲛⲧⲉϥⲧⲁⲝⲓⲥ · ⲙⲛⲧϩⲉⲝⲓⲥ ⲛⲧⲙⲛⲧⲙⲁⲧⲟⲓ · ⲁϥⲁⲁϥ ⲛⲧⲣⲓⲙⲏⲕⲓⲣⲓⲟⲥ ⲉϫⲙⲡⲉϥⲁⲣⲓⲑⲙⲟⲥ ·
…
26 ⲡⲣⲣⲟ ⲇⲉ ⲛⲧⲉⲣⲉϥⲛⲁⲩ ⲉⲧⲙⲛⲧϫⲱⲱⲣⲉ ⲙⲡϣⲏⲣⲉ ϣⲏⲙ · ⲁϥⲙⲉⲣⲓⲧϥ · ⲁϥⲕⲁⲁϥ ⲉϥⲧⲏϭ ⲉⲣⲟϥ · ⲉϥϣⲟϫⲛⲉ ⲛⲙⲙⲁϥ ⲉⲛⲉϩⲃⲏⲩⲉ ⲙⲡⲁⲗⲗⲁϯⲟⲛ ·
…
27 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ · ⲇⲉ ⲉⲣⲉⲡⲇⲓⲱⲕⲙⲟⲥⲥⲏⲣ ⲉⲃⲟⲗ · ⲁⲡϩⲉⲑⲛⲟⲥ ⲛⲃⲁⲣⲃⲁⲣⲟⲥ · ⲧⲱⲟⲩⲛ ⲉϩⲣⲁⲓ ⲉϫⲛϩⲣⲱⲙⲁⲓⲟⲥ ·
…
28 ⲡⲣⲣⲟ ⲇⲉ ⲇⲉⲕⲓⲟⲥ · ⲙⲛⲧⲥⲩⲛⲕⲗⲏⲧⲟⲥ ⲧⲏⲣⲥ · ⲁⲩⲁⲡⲟⲣⲉⲓ ⲉⲧⲃⲉⲧⲛⲟϭ ⲛⲁⲡⲟⲣⲓⲁ · ⲙⲛⲧⲙⲛⲧⲁⲃⲟⲗⲏ ⲛⲧⲁⲥϣⲱⲡⲉ · ϩⲛⲟⲩϣⲡ ⲛϣⲱⲡ ·
…
29 ⲁⲩⲡⲟⲗⲉⲙⲉⲓ ⲛⲙⲙⲁⲩ ⲛϭⲓⲛⲃⲁⲣⲃⲁⲣⲟⲥ · ϩⲱⲥ ⲧⲉ ⲛⲥⲉϥⲓ ⲛⲧⲟⲟⲧⲟⲩ · ⲛⲧⲛⲟϭ ⲛϩⲁⲣⲙⲉⲛⲓⲁ · ⲉⲧϣⲟⲟⲡ ϩⲛⲛⲉⲩⲧⲟϣ · ⲛⲧⲉⲩⲙⲏⲏⲧⲉ · ⲙⲛⲛⲉϩⲣⲱⲙⲁⲓⲟⲥ ·
…
30 ⲡⲣⲣⲟ ⲇⲉ ⲇⲉⲕⲓⲟⲥ · ⲁϥⲟⲩⲉϩⲥⲁϩⲛⲉ ⲥⲟⲟⲩϩ ⲉϩⲟⲩⲛ · ⲛⲛⲟⲩⲙⲉⲣⲟⲛ · ⲙⲛⲛⲁⲣⲓⲑⲙⲟⲥ ⲧⲏⲣⲟⲩ ⲛⲛⲉϩⲣⲱⲙⲁⲓⲟⲥ · ϫⲉⲕⲁⲥ ⲉⲩⲉⲃⲱⲕ ⲉⲃⲟⲗ · ⲉⲡⲡⲟⲗⲉⲙⲟⲥ ⲉⲙⲓϣⲉ ⲙⲛⲛⲃⲁⲣⲃⲁⲣⲟⲥ ·
…
31 ⲧⲟⲧⲉ ⲡⲣⲣⲟ ⲁϥⲧⲱϣ ⲛⲛⲟⲩⲙⲉ‐ⲣⲟⲛ · ⲙⲛⲛⲛⲁⲣⲓⲑⲙⲟⲥ ⲁϥⲙⲟⲟϣⲉ ⲉⲃⲟⲗ · ⲉⲡⲡⲟⲗⲉⲙⲟⲥⲛⲃⲁⲣⲃⲁⲣⲟⲥ ·
…
32 ⲁϥϫⲓⲟⲣ ⲙⲡⲉⲩⲫⲣⲁⲧⲏⲥ ⲡⲛⲟϭ ⲛⲓⲉⲣⲟ · ⲡⲁⲓ ⲉⲧϣⲟⲟⲡ ϩⲛⲛⲛⲧⲟϣ ⲛⲑⲉⲣⲙⲉⲛⲓⲁ · ⲁϥⲧⲁϫⲣⲟⲙⲡϩⲟⲧ ⲛⲃⲁⲗ ⲛⲛⲃⲁⲣⲃⲁⲣⲟⲥ · ⲁϥϭⲱ ϩⲓⲣⲛⲣⲣⲱⲟⲩ · ⲙⲛⲡⲉϥⲥⲧⲣⲁⲧⲉⲩⲙⲁ ·
…
33 ϩⲙⲡⲉⲟⲩⲟⲉⲓϣ ⲉⲧⲙⲙⲁⲩ · ⲛⲧⲁⲥⲟⲩⲱⲛϩ ⲉⲃⲟⲗ ⲛϭⲓⲧⲙⲛⲧϫⲱⲱⲣⲉ · ⲙⲡⲉⲓⲅⲉⲛⲛⲁⲓⲟⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲡⲉⲡⲓⲥⲧⲟⲥ ⲛⲁⲙⲉ : ⲁⲩⲱ ⲡⲉⲓⲡⲣⲩⲙⲏⲕⲓⲣⲓⲟⲥ ⲙⲡⲁⲣⲓⲑⲙⲟⲥ ⲛⲙⲙⲁⲣⲧⲩⲣⲟⲥ ·
…
34 ⲉⲛⲉⲩⲟⲩⲣⲱⲙⲉ ⲅⲁⲣ ⲡⲉ · ⲉϥϫⲏⲕ ⲉⲃⲟⲗ ⲙⲙⲛⲧⲣⲉϥϣⲙϣⲉⲛⲟⲩⲧⲉ · ⲁⲩⲱ ⲉϥⲡⲟⲗⲓⲧⲉⲩⲉ ϩⲛⲙⲛⲧⲉⲩⲥⲉⲃⲏⲥ ⲛⲓⲙ ·
…
35 ⲉⲣⲉⲡϣⲁϫⲉ ⲙⲡⲛⲟⲩⲧⲉ ϩⲟⲗϭ ϩⲛⲧⲉϥⲧⲁⲡⲣⲟ ⲛⲁⲩ ⲛⲓⲙ · ⲛϩⲟⲩⲟ ⲟⲩⲉⲃⲃⲓⲱ ·
…
36 ⲁⲥϣⲱⲡⲉ ⲇⲉ ⲛⲛⲟⲩϣⲏ · ⲉϥⲛⲕⲟⲧⲕ ⲛⲧⲙⲏⲧⲉ ⲙⲡⲉⲥⲧⲣⲁⲧⲉⲩⲙⲁ · ⲙⲛⲛⲥⲁⲧⲣⲉϥⲟⲩⲱ ⲉⲛϥⲉⲓⲣⲉ ⲛϥϣⲗⲏⲗ · ⲁϥⲱⲃϣ ⲛⲟⲩⲕⲟⲩⲓ ·
…
37 ⲁⲩⲱ ⲉⲓⲥ ⲟⲩⲁⲅⲅⲉⲗⲟⲥ ⲛⲧⲉⲡϫⲟⲉⲓⲥ ⲁϥⲁϩⲉⲣⲁⲧϥ ϩⲓϫⲱϥ · ⲁϥⲧⲃⲥ ⲡⲉϥⲥⲡⲓⲣ · ⲁϥⲧⲟⲩⲛⲟⲥϥ ⲉⲣⲉⲟⲩⲥⲏϥⲉ ϩⲛⲧⲉϥϭⲓϫ · ⲛⲟⲩⲛⲁⲙ · ⲉϥϯϩⲟⲧⲉ ϩⲙⲡⲉϥⲉⲓⲛⲉ · ⲉⲣⲉⲟⲩϩⲱⲛ ϩⲓⲱⲱϥ · ⲉϥⲟ ⲛⲛϣⲡⲏⲣⲉ · ⲛⲧⲉⲣⲉϥⲛⲁⲩ ⲇⲉ ⲉⲣⲟϥ · ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥⲣϩⲟⲧⲉ ⲉⲙⲁⲧⲉ ·
…
38 ⲁϥⲟⲩⲱϣⲃ ⲛⲁϥ ⲛϭⲓⲡⲁⲛⲅⲉⲗⲟⲥ · ⲡⲉϫⲁϥ ⲛⲁϥ · ϫⲉⲙⲉⲣⲕⲟⲩⲣⲓⲟⲥ · ⲛⲧⲟϥ ⲇⲉ ⲡⲉϫⲁϥ · ϫⲉⲉⲓⲥϩⲏⲏⲧⲉ ⲁⲛⲟⲕ ⲡϫⲟⲉⲓⲥ ·
…
39 ⲁϥⲟⲩⲱⲛ ⲇⲉ ⲛⲉϥⲃⲁⲗ ⲛϭⲓⲙⲉⲣⲕⲟⲩⲣⲓⲟⲥ · ⲁⲩⲱ ⲛⲧⲉⲣϥⲛⲁⲩ ⲉⲡⲁⲅⲅⲉⲗⲟⲥ ⲁϥⲣ‐ϩⲟⲧⲉ · ⲉϥⲙⲉⲉⲩⲉ ϫⲉⲟⲩⲁ ⲡⲉ ϩⲛⲙⲙⲁⲅⲓⲥⲧⲣⲓⲁⲛⲟⲥ ⲙⲡⲣⲣⲟ · ⲏ ⲟⲩⲥⲧⲣⲁⲧⲩⲗⲁⲧⲏⲥ ⲡⲉ ·
…
40 ⲛⲧⲟϥ ⲇⲉ ⲁϥⲥⲟⲟⲩⲧⲛ ⲉⲣⲟϥ · ⲛⲧⲥⲏϥⲉ ⲉⲧⲛⲧⲟⲟⲧϥ · ⲉⲥⲧⲟⲕⲙ ϩⲛⲧⲉϥϭⲓϫ ⲉϥϫⲱ ⲙⲙⲟⲥ ⲛⲁϥ · ϫⲉϫⲓ ⲛⲁⲕ ⲛⲧⲉⲓⲥⲏϥⲉ ⲉⲧⲧⲱⲕⲙ · ⲉⲧϩⲛⲧⲁϭⲓϫ · ϩⲓⲧⲛⲧⲁⲓ ⲅⲁⲣ ⲉⲕⲛⲁⲡⲁⲧⲁⲥⲥⲉⲓ ⲛⲧϭⲟⲙ ⲧⲏⲣⲥ ⲛⲛⲃⲁⲣⲃⲁⲣⲟⲥ ·
…
41 ⲁⲛⲟⲕ ⲅⲁⲣ ⲡⲉ ⲡⲁⲣⲭⲏⲥⲧⲣⲁⲧⲏⲅⲟⲥ ⲛⲧϭⲟⲙ ⲙⲡϫⲟⲉⲓⲥ ·
…
42 ⲛⲧⲁⲓⲉⲓ ⲅⲁⲣ ⲉⲃⲟⲏⲑⲉⲓ ⲉⲣⲟⲕ · ⲙⲛⲛⲉⲕϣⲃⲏⲣ ⲙⲙⲁⲧⲟⲓ · ⲛⲁⲓ ⲉⲧⲡⲓⲥⲧⲉⲩⲉ ⲉⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
43 ⲧⲉⲛⲟⲩ ϭⲉ ϫⲣⲟ ⲛⲅϭⲙϭⲟⲙ · ⲁⲛⲟⲕ ⲅⲁⲣ ϯϣⲟⲟⲡ ⲛⲙⲙⲁⲕ ϣⲁⲡϫⲱⲕ ⲉⲃⲟⲗ ⲙⲡⲉⲕⲁⲅⲱⲛ ϩⲛⲟⲩⲉⲣⲏⲛⲏ ·
…
44 ⲉⲥϩⲏⲏⲧⲉ ⲉⲓ ⲡⲉⲟⲩⲟⲉⲓϣ ⲁϥⲉⲓ · ⲁⲩⲱ ⲉⲓⲥⲡⲁⲅⲱⲛ ⲡⲟⲣϣ ⲉⲃⲟⲗ ·
…
45 ⲙⲓϣⲉ ⲛⲧⲁⲣⲉⲕϫⲓ ⲙⲡⲉⲕϭⲟⲙ · ⲙⲉⲣⲉϣⲟⲉⲓϫ ϫⲓⲕⲗⲟⲙ · ⲉⲓⲙⲏⲧⲓ ⲛϥⲙⲓϣⲉ ⲕⲁⲗⲱⲥ · ⲁⲩⲱ ⲡⲟⲩⲟⲉⲓⲉ ⲉⲧϩⲟⲥⲉ · ⲛⲧⲟϥ ⲡⲉ ϣⲁϥϫⲓ ⲉⲃⲟⲗ ϩⲛⲛⲕⲁⲣⲡⲟⲥ ⲛϣⲟⲣⲡ ·
…
46 ⲧⲉⲛⲟⲩ ϭⲉ ⲥⲱⲧⲙ ⲛϣⲁϫⲉ ϯϫⲱ ⲙⲙⲟⲟⲩ ⲛⲁⲕ · ⲁⲩⲱ ⲙⲡⲣⲱⲥⲕⲉⲕⲧⲟⲕ ⲉⲡϫⲟⲉⲓⲥ ⲉⲡⲉⲕⲛⲟⲩⲧⲉ · ⲟⲩⲛⲟϭ ⲅⲁⲣ ⲛⲁⲅⲱⲛ ϭⲉⲉⲧ ⲉⲣⲟⲕ · ⲁⲩⲱ ⲕⲛⲁϣⲱⲡⲉ ⲛⲟⲩⲙⲁⲣⲧⲩⲣⲟⲥ ⲛϫⲱⲱⲣⲉ ·
…
47 ⲧⲉⲕⲙⲁⲣⲧⲩⲣⲓⲁ ⲅⲁⲣ · ⲛⲁⲣⲥⲟⲉⲓⲧ ϩⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ⲁⲩⲱ ⲟⲩⲟⲛ ⲛⲓⲙ ⲉⲧⲥⲱⲧⲙ ⲉⲣⲟⲥ · ⲛⲁⲣϣⲡⲏⲣⲉ ⲛⲧⲉⲕⲙⲛⲧϫⲱⲱⲣⲉ · ⲛⲥⲉϯⲉⲟⲟⲩ ⲙⲡⲛⲟⲩⲧⲉ · ⲉⲧⲃⲉⲛϭⲟⲙⲙⲛⲛⲉϣⲡⲏⲣⲉ · ⲙⲛⲙⲛⲧϫⲱⲱⲣⲉ ⲛⲧⲟϥⲁⲁⲩ ⲛⲁⲕ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ·
…
48 ⲟⲩⲛϩⲉⲛⲛⲟϭ ⲛⲃⲁⲥⲁⲛⲟⲥ ⲛⲁϣⲱⲡⲉ ⲉⲩϭⲉⲧ ⲉⲣⲟⲕ · ϩⲓⲧⲙⲡⲣⲣⲟ ⲛⲁⲛⲟⲙⲟⲥ · ⲙⲛⲛϩⲉⲛⲛⲟϭ ⲛⲑⲗⲓⲯⲓⲥ · ⲁⲗⲗⲁ ϩⲩⲡⲟⲙⲟⲛⲏ · ⲁⲩⲱ ⲕⲛⲁϫⲓ ⲙⲡⲕⲗⲟⲙ ⲛⲁⲧⲁⲕⲟ ·
…
49 ⲁⲩⲣⲱⲙⲉ ⲛⲓⲙ ⲉⲧⲣⲡⲙϣⲁ ⲛϫⲱϩ ⲉⲡⲉⲕⲥⲱⲙⲁ · ⲉⲛⲁⲧⲟⲩϫⲟϥ ·
…
50 ⲕⲁⲛ ϣⲱⲡⲉ ⲉⲩϩⲛⲛⲁⲛⲁⲅⲕⲏ ⲛⲓⲙ ⲛⲉⲩϩⲛⲟⲩⲇⲓⲕⲁⲥⲧⲏⲣⲓⲟⲛ · ⲛⲉⲩϩⲛⲟⲩⲙⲁ ⲛϫⲁⲉ · ⲏ ⲟⲩⲕⲓⲛⲇⲏⲛⲟⲥ ⲛⲧϩⲁⲗⲗⲁⲥⲥⲁ · ⲏ ϩⲙⲡⲉⲓⲉⲣⲟ · ⲏ ϩⲛⲟⲩϩⲱϫϩϫ · ⲛⲉϣⲧⲉⲕⲱⲟⲩ · ⲛϥⲣⲡⲙⲉⲉⲩⲉ ⲙⲡⲉⲕⲣⲁⲛ · ϩⲛⲟⲩⲡⲓⲥⲧⲓⲥ · ⲛϥⲉⲡⲓⲕⲁⲗⲉⲓ ⲙⲙⲟⲕ · ϥⲛⲁⲟⲩϫⲁⲓ ·
…
51 ⲡⲉⲧⲛⲁⲕⲱⲧ ⲛⲟⲩⲧⲟⲡϫⲟⲉⲓⲥ ϩⲙⲡⲉⲕⲣⲁⲛ · ⲛϥϯ ⲛⲟⲩⲡⲣⲟⲥⲫⲟⲣⲁ ϩⲙⲡⲉⲕⲣⲁⲛ · ϩⲙⲡⲉϩⲟⲟⲩ ⲙⲡⲕⲣⲡⲙⲉⲉⲩⲉ · ϯⲛⲁ ⲕⲱ ⲙⲡⲁⲥⲙⲟⲩ · ⲙⲛⲟⲩϩⲩⲛⲟⲩϥⲉ ⲉϥⲙⲏⲛ ⲉϩⲙⲡⲉⲩⲙⲁ ⲛϣⲱⲡⲉ · ⲁⲩⲱ ϯⲛⲁⲕⲁⲁⲩ ⲁⲛ ⲉϣⲱⲧ ⲛⲗⲁⲁⲩ ϣⲁⲉⲛⲉϩ ·
…
52 ⲡⲉⲧⲛⲁⲥϩⲁⲓ ⲙⲡϫⲱⲱⲙⲉ ⲛⲧⲉⲕⲙⲁⲣⲧⲏⲣⲓⲁ · ϯⲛⲁⲡⲱϩ ⲙⲡⲉⲭⲉⲓⲣⲟⲅⲣⲁⲫⲟⲛ ⲛⲛⲉϥⲛⲟⲃⲉ · ⲁⲩⲱ ⲛⲛⲧⲁϥⲁⲁⲩ ⲧⲏⲣⲟⲩ · ϯⲛⲁⲣⲡⲉⲩⲙⲉⲉⲩⲉ ⲁⲛ ϣⲁⲉⲛⲉϩ · ⲁⲩⲱ ϯⲛⲁⲭⲁⲣⲓⲍⲉ ⲙⲙⲟϥ ⲛⲁⲕ ⲛϣⲏⲣⲉ · ϩⲛⲧⲁⲙⲛⲧⲣⲣⲟ ·
…
53 ⲉⲥϩⲏⲏⲧⲉ ⲁⲓⲭⲁⲣⲓⲍⲉ ⲛⲁⲕ ⲛϣⲟⲙⲛⲧ ⲛⲕⲗⲟⲙ · ⲟⲩⲁ ϩⲁⲧⲙⲛⲧⲣⲙⲙⲁⲟ · ⲟⲩⲁ ϩⲁⲛϩⲓⲥⲉ ⲉⲧⲉⲕⲛⲁϣⲟⲡⲟⲩ ϩⲁⲡⲁⲣⲁⲛ · ⲁⲩⲱ ⲕⲉⲟⲩⲁ ϩⲁⲧⲉⲕⲙⲛⲧⲡⲁⲣⲑⲉⲛⲟⲥ ·
…
54 ϫⲣⲟ ⲁⲩⲱ ⲛⲅϭⲙϭⲟⲙ · ϫⲉⲁⲛⲟⲕ ϯϣⲟⲟⲡ ⲛⲙⲙⲁⲕ ·
…
55 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛⲁϥ · ⲛϭⲓⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ : ϩⲛⲟⲩⲉⲟⲟⲩ ·
…
56 ⲛⲉⲧⲙⲡⲉϥⲕⲱⲧⲉ ⲇⲉ ⲛⲧⲉⲣⲟⲩⲛⲁⲩ ⲉⲧⲛⲟϭ ⲉⲛⲟⲡⲧⲁⲥⲓⲁ ⲛⲧⲁⲥϣⲱⲡⲉ · ⲁⲩⲣⲧϩⲉ ⲛⲛⲉⲧⲙⲟⲟⲩⲧ ·
…
57 ⲙⲡⲉϥⲣⲁⲥⲧⲉ ⲇⲉ ⲁϥⲟⲩⲉϩⲥⲁϩⲛⲉ · ⲛϭⲓⲇⲉⲕⲓⲟⲥ ⲡⲣⲣⲟ ⲙⲡⲉϥⲥⲧⲣⲁⲧⲉⲩⲙⲁ · ⲉⲧⲣⲉⲩⲧⲟϣ ⲛⲛⲟⲩⲙⲉⲣⲟⲛ ⲙⲛⲛⲁⲣⲓⲑⲙⲟⲥ · ⲛⲧⲉⲣⲟⲩϩⲟⲕⲟⲩ ϩⲛⲛⲉⲩⲡⲁⲛϩⲟⲡⲗⲓⲁ ⲙⲡⲟⲗⲉⲙⲓⲕⲟⲛ · ⲛⲥⲉⲁϩⲉⲣⲁⲧⲟⲩ ⲉⲡⲡⲟⲗⲉⲙⲟⲥ ⲛⲛⲃⲁⲣⲃⲁⲣⲟⲥ ·
…
58 ⲧⲟⲧⲉ ⲡⲉϫⲱⲱⲣⲉ ⲛⲁⲙⲉ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲁϥϯⲡⲉϥⲟⲩⲟⲓ ⲉϩⲙⲡⲙⲏⲏϣⲉ ⲛⲛⲃⲁⲣⲃⲁⲣⲟⲥ · ⲁϥⲃⲱⲕ ⲉϩⲟⲩⲛ ⲉⲧⲉⲩⲙⲏⲧⲉ · ϩⲓⲧϭⲟⲙ ⲙⲡⲛⲟⲩⲧⲉ ⲉⲧϣⲟⲟⲡ ⲛⲙⲙⲁϥ ·
…
59 ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ⲉⲧⲡⲉ · ⲁϥⲛⲁⲩ ⲉⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲉϥⲟ ⲙⲡⲉⲥⲙⲟⲧ ⲛⲟⲩⲥⲧⲣⲁⲧⲱⲡⲉⲧⲁⲣⲭⲟⲥ ·
…
60 ⲉⲣⲉⲟⲩⲥⲏϥⲉ ⲧⲱⲕⲙ : ϩⲛⲧⲉϥϭⲓϫ ⲛⲟⲩⲛⲁⲙ · ⲉϥⲥⲟⲟⲩⲧⲛ ⲙⲙⲟⲥ ⲉϩⲟⲩⲛ ⲉⲣⲟϥ · ⲉϥϫⲱ ⲙⲙⲟⲥ ⲛⲁϥ · ϫⲉⲧⲱⲕ ⲛϩⲏⲧ · ⲛⲅⲁⲙⲁϩⲧⲉ ⲛϯⲥⲏϥⲉ · ⲛⲅϯⲡⲉⲕⲟⲩⲟⲓ ⲉϩⲟⲩⲛ : ⲛⲃⲁⲣⲃⲁⲣⲟⲥ ⲛⲅϭⲉϫϭⲱϫⲟⲩ ϩⲙⲡⲣⲁⲛ ⲙⲡⲉⲭⲣⲓⲥⲧⲟⲥ ⲡⲁⲓ ⲉⲧϯϭⲟⲙ ⲛⲁⲕ ·
…
61 ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ · ⲁϥⲥⲟⲟⲩⲧⲛ ⲉⲟⲗ ⲛⲧⲉϥϭⲓϫ · ⲁϥϫⲓ ⲧⲥⲏϥⲉ ⲛⲧⲟⲟⲧϥ ⲙⲡⲁⲅⲅⲉⲗⲟⲥ ⲙⲓⲭⲁⲏⲗ · ⲁϥϯⲡⲉϥⲟⲩⲟⲓ ⲉϫⲛⲛⲙⲙⲏⲏϣⲉ · ⲛⲛⲃⲁⲣⲃⲁⲣⲟⲥ ·
…
62 ⲁϥϭⲉϫϭⲟϫⲟⲩ ϩⲙⲡⲣⲁⲛ ⲙⲡⲉⲭⲣⲓⲥⲧⲟⲥ · ϩⲛⲟⲩⲙⲛⲧⲁⲧϯⲥⲟ · ϣⲁⲛϯⲧⲉϥϭⲓϫ ⲧⲱϭⲉ ⲉϩⲟⲩⲛ ⲉⲧⲥⲏϥⲉ · ϩⲓⲧⲛⲧⲁϣⲏ ⲙⲡⲉⲓⲥⲛⲟϥ ⲉϥⲡⲁⲧⲁⲥⲥⲉⲓ ⲛⲛⲃⲁⲣⲃⲁⲣⲟⲥ · ϩⲛⲟⲩⲛⲟϭ ⲙⲡⲗⲩⲡⲉⲓ ⲉⲙⲁⲧⲉ · ⲉⲥⲛⲁϣⲧ ⲙⲡⲉϩⲟⲟⲩ ⲉⲧⲙⲙⲁⲩ ·
…
63 ⲁⲩⲱ ⲁⲡⲥⲉⲉⲡⲉ ⲡⲱⲧ ⲁⲩⲣⲁⲧⲟⲩ ⲱⲛϩ ⲉⲃⲟⲗ · ϩⲱⲥⲧⲉⲛⲧⲁⲟⲩⲕⲱϩⲧ ⲉⲃⲟⲗ ϩⲛⲧⲡⲉ · ⲁⲥⲟⲩⲁⲙⲟⲩ ·
…
64 ⲡⲣⲣⲟ ⲛⲧⲉⲣⲉϥⲛⲁⲩ ⲉⲧⲙⲛⲧϫⲱⲱⲣⲉ · ⲉⲛⲧⲁⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲁⲁⲥ · ϩⲓⲧⲛⲧϭⲟⲙ ⲙⲡⲛⲟⲩⲧⲉ · ⲉⲧϣⲟⲟⲡ ⲛⲙⲙⲁϥ · ⲁϥⲣⲁϣⲉ ⲉⲙⲁⲧⲉ ⲉⲧⲃⲉⲧⲃⲓⲕⲧⲱⲣⲓⲁ · ⲙⲛⲡⲉⲓϫⲣⲟ ⲛⲧⲟϥϣⲱⲡⲉ ⲛⲛⲉϩⲣⲱⲙⲁⲓⲟⲥ ·
…
65 ⲡⲣⲣⲟ ⲇⲉ ⲁϥⲭⲁⲣⲓⲍⲉ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛϩⲉⲛⲛⲟϭ ⲛⲧⲁⲉⲓⲟ ⲙⲛϩⲉⲛⲭⲣⲏⲙⲁ ⲛⲁϣⲱⲟⲩ · ⲁϥⲁⲛⲓⲛⲟⲩ : ⲁϥⲁⲁϥ ⲛⲛⲟϭ ⲉϫⲛⲡⲁⲣⲓⲑⲙⲟⲥ ⲛⲙⲙⲁⲣⲧⲩⲥⲓⲟⲛ ·
…
66 ⲁⲥϣⲱⲡⲉ ⲇⲉ ⲙⲛⲛⲥⲁⲛⲁⲓ · ⲁϥⲟⲩⲉϩ‐ⲥⲁϩⲛⲉ ⲛϭⲓⲡⲣⲣⲟ ⲇⲉⲕⲓⲟⲥ · ⲛⲛⲉⲥⲧⲣⲁⲧⲉⲩⲙⲁ ⲧⲏⲣⲟⲩ · ⲙⲛⲛⲛⲟⲩⲙⲉⲣⲟⲛ ⲙⲛⲛⲁⲣⲓⲑⲙⲟⲥ · ⲙⲛⲛⲉⲝⲁⲣⲭⲟⲥ · ⲙⲛⲛⲉⲥⲧⲣⲁⲧⲩⲗⲁⲧⲏⲥ · ⲙⲛⲙⲡⲁⲧⲣⲓⲕⲓⲟⲥ ⲙⲛⲧⲥⲩⲛⲕⲗⲏⲧⲟⲥ ⲧⲏⲣⲥ ⲛⲛⲉϩⲣⲱⲙⲁⲓⲟⲥ · ⲉⲧⲣⲉⲩⲥⲱⲟⲩϩ ⲧⲏⲣⲟⲩ · ⲉⲡⲣⲡⲉ ⲙⲡⲁⲡⲱⲗⲗⲱⲛ · ⲛⲥⲉⲑⲩⲥⲓⲁⲍⲉ ·
…
67 ⲧⲟⲧⲉ ⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ ⲛⲧⲉⲣⲉϥⲛⲁⲩ · ⲉⲧⲛⲟϭ ⲙⲡⲗⲁⲛⲏ ⲛⲧⲁⲥ ⲁⲙⲁϩⲧⲉ · ⲉϫⲙⲡⲣⲣⲟ · ⲙⲛⲡⲉⲥⲧⲣⲁⲧⲉⲩⲙⲁ ⲉⲃⲟⲗ ϩⲓⲧⲙⲡⲇⲓⲁⲃⲟⲗⲟⲥ · ⲁϥⲥⲁϩⲱⲱϥ ⲉⲃⲟⲗ ⲙⲙⲟⲟⲩ · ⲁϥⲃⲱⲕ ⲉϩⲟⲩⲛ : ⲉⲡⲉϥⲏⲓ · ⲁϥⲥⲟⲡⲥ ⲙⲡϫⲟⲉⲓⲥ ⲉϥϫⲱ ⲙⲙⲟⲥ · ϫⲉⲡϫⲟⲉⲓⲥ ⲡⲁⲛⲧⲟⲕⲣⲁⲧⲱⲣ · ⲡⲉⲓⲱⲧ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ϣⲛϩⲧⲏⲕ ⲉϫⲙⲡⲉⲕⲡⲗⲁⲥⲙⲁ ⲛⲧⲟⲕ ⲧⲁⲙⲓⲟϥ · ⲛⲅϫⲱⲱⲣⲉ ⲉⲃⲟⲗ ⲙⲡⲉⲥⲕⲁⲛⲧⲁⲗⲟⲛ · ⲛⲧⲁⲡⲇⲓⲁⲃⲟⲗⲟⲥ ⲛⲟϫϥ ⲉⲡϩⲏⲧ ⲛⲧⲉⲙⲛⲧⲣⲱⲙⲉ ⲧⲏⲣⲥ ·
…
68 ⲛⲅϯ ⲛⲟⲩⲥⲙⲓⲛⲉ ⲉⲡϩⲏⲧ ⲙⲡⲗⲁⲟⲥ · ⲙⲛⲟⲩⲟⲛ ⲉⲧⲣϩⲟⲧⲉ ϩⲏⲧϥ · ⲙⲡⲉⲕⲣⲁⲛ ⲉⲧⲟⲩⲁⲁⲃ ·
…
69 ⲡϫⲟⲉⲓⲥ ⲛⲅϯ ⲛⲟⲩⲧⲁϫⲣⲟ ⲛⲛⲉⲕⲉⲕⲕⲗⲏⲥⲓⲁ · ϫⲉⲕⲁⲥ ⲉⲣⲉⲟⲩⲟⲛ ⲛⲓⲙ ⲉⲡⲓⲥⲧⲉⲩⲉ ⲉⲡⲉⲕⲣⲁⲛ ⲉⲧⲟⲩⲁⲁⲃ · ⲡⲉⲟⲟⲩ ⲛⲁⲕ ⲙⲛⲡⲉⲕⲉⲓⲱⲧ ⲛⲁⲅⲁⲑⲟⲥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ϣⲁⲉⲛⲉϩ ⲉⲛⲉϩ ϩⲁⲙⲏⲛ ·
…
70 ⲁⲥϣⲱⲡⲉ ⲛⲧⲉⲣⲉⲡⲣⲣⲟ ⲉⲓ ⲉⲣⲙⲡⲣⲟ ⲙⲡⲣⲡⲉ · ⲁⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲥⲱⲟⲩϩ ⲉϩⲟⲩⲛ · ⲉⲧⲣⲉⲩⲑⲩⲥⲓⲁⲍⲉ ⲧⲏⲣⲟⲩ · ⲡⲟⲩⲁ ⲡⲟⲩⲁ ⲕⲁⲧⲁⲡⲉϥⲧⲁⲅⲙⲁ ·
…
71 ⲁⲡⲟⲣⲇⲓⲛⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲧⲁϩⲟϥ ϩⲱⲱϥ · ⲉⲧⲣⲉϥⲑⲩⲥⲓⲁⲍⲉ · ⲁⲩⲱ ⲙⲡⲟⲩϩⲉ ⲉⲣⲟϥ ϩⲛⲧⲙⲏⲏⲧⲉ ⲙⲡⲉⲥⲧⲣⲁⲧⲉⲩⲙⲁ ·
…
72 ⲁⲩⲱ ⲛⲧⲉⲣⲉⲡⲣⲣⲟ ϣⲓⲛⲉ ⲛⲥⲱϥ · ⲁϥϩⲉ ⲉⲣⲟϥ ⲉϥϩⲙⲟⲟⲥ ϩⲙⲡⲉϥⲏⲓ · ϩⲛⲟⲩϭⲟⲟⲩⲛⲉ ⲙⲛⲟⲩⲕⲣⲙⲥ · ⲉϥⲣϩⲏⲃⲉ ⲉⲙⲁⲧⲉ · ⲉϫⲙⲡⲛⲟϭ ⲛⲥⲭⲓⲥⲙⲁ ⲛⲧⲁϥϣⲱⲡⲉ ⲉϩⲣⲁⲓ · ⲉϫⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ϩⲓⲧⲙⲡⲇⲓⲁⲃⲟⲗⲟⲥ ·
…
73 ⲧⲟⲧⲉ ⲁⲩϯⲡⲉⲩⲟⲩⲟⲓ ⲉⲡⲣⲣⲟ · ⲛϭⲓϩⲟⲓⲛⲉ ϩⲙⲡⲉϥⲁⲣⲓⲑⲙⲟⲥ · ⲁⲩⲧⲉϣⲧⲟⲩⲏⲧ ⲙⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ · ⲉⲩϫⲱ ⲙⲙⲟⲥ ϫⲉⲡⲉⲛϫⲟⲉⲓⲥ ⲡⲣⲣⲟ · ⲱⲛϩ ϣⲁⲉⲛⲉϩ · ⲉⲡⲉⲕⲁⲙⲁϩⲧⲉ ⲉⲧⲧⲁⲓⲏⲩ · ⲟⲩⲉϩⲥⲁϩⲛⲉ ⲛⲅⲉⲛⲟⲥ ⲛⲓⲙ ⲛⲣⲱⲙⲉ · ⲉⲑⲩⲥⲓⲁⲍⲉ ⲛⲛⲛⲟⲩⲧⲉ ⲉⲧⲧⲁⲉⲓⲏⲩ ·
…
74 ⲧⲉⲛⲟⲩ ϭⲉ ⲉⲥϩⲏⲏⲧⲉ · ⲉⲥⲛⲉⲧϩⲏⲛ ⲉⲣⲟⲕ · ⲁⲩⲱ ⲛⲉⲧⲧⲏϭ ⲉⲣⲟⲕ · ⲥⲉⲕⲁⲧⲁⲫⲣⲟⲛⲏ ⲙⲡⲉⲧⲉⲛⲡⲣⲟⲥⲧⲁⲅⲙⲁ ⲉⲧⲁⲓⲏⲩ · ⲙⲉⲣⲕⲟⲩⲣⲓⲟⲥ ϭⲉ ⲧⲉⲛⲟⲩ · ⲡⲉⲧⲁⲙⲁϩⲧⲉ ⲛⲧⲉⲕⲙⲛⲧⲣⲣⲟ · ⲁⲕϫⲁⲥⲧϥ ⲁⲕⲭⲁⲣⲓⲍⲉ ⲛⲁϥ · ⲙⲡⲁⲝⲓⲱⲙⲁ ⲛⲧⲙⲛⲧⲕⲟⲙⲉⲥ · ⲉϫⲙⲡⲁⲣⲓⲑⲙⲟⲥ ·
…
75 ϩⲱⲥ ⲇⲉ ⲛⲧⲉⲣⲉⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲛⲛⲉϩⲣⲱⲙⲁⲓⲟⲥ · ⲥⲱⲧⲙ ⲛⲥⲱϥ · ⲁⲩⲱ ⲛⲥⲉϯⲉⲟⲟⲩ ⲛⲁϥ · ⲁⲩⲱ ⲛⲥⲉϩⲩⲡⲟⲧⲁⲥⲉ ⲛⲁϥ · ⲉⲧⲃⲉⲧⲛⲟϭ ⲛϯⲙⲏ ⲛⲧⲟⲕ ⲧⲁⲁⲥ ⲛⲁϥ ·
…
76 ⲉⲥϩⲏⲏⲧⲉ ⲉϥⲕⲁⲧⲁⲫⲣⲟⲛⲉⲓ ⲙⲡⲉⲕⲁⲙⲁϩⲧⲉ · ⲁⲩⲱ ⲙⲡⲉϥⲥⲱⲟⲩϩ ⲛⲙⲙⲁⲛ ⲉⲡⲣⲡⲉ · ⲉⲧⲁⲗⲉⲑⲩⲥⲓⲁ ⲉϩⲣⲁⲓ · ⲛⲛⲛⲟⲩⲧⲉ · ⲁⲗⲗⲁ ⲁϥⲃⲱⲕ ⲉⲡⲉϥⲓⲏ ⲁϥⲕⲁϥ ⲕⲁϩⲏⲩ ⲙⲡⲉϥⲁⲝⲓⲱⲙⲁ · ⲁϥϯ ϣⲓⲡⲉ ⲙⲡⲉⲟⲟⲩ ⲛⲛⲉϩⲣⲱⲙⲁⲓⲟⲥ · ⲁⲩⲱ ⲁϥϯ ⲛⲟⲩⲧⲱⲗⲙ ⲛⲛⲟⲙⲟⲥ ⲉⲧⲟⲩⲁⲁⲃ ·
…
77 ⲁⲛϩⲉ ⲉⲣⲟϥ ⲛϩⲟⲩⲛ ⲙⲡⲉϥⲏⲓ · ⲉϥϩⲙⲟⲟⲥ ϩⲛⲟⲩϭⲟⲟⲛⲉ ⲙⲛⲟⲩⲕⲣⲙⲥ · ⲉϥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲡⲉϥⲛⲟⲩⲧⲉ · ϩⲛϩⲉⲛⲣⲙⲉⲓⲟⲟⲩⲉ ·
…
78 ⲁⲩⲱ ⲉϥⲡⲉⲓⲑⲉ ⲛⲟⲩⲟⲛ ⲛⲓⲙ · ⲉⲕⲧⲟⲟⲩ ⲉⲃⲟⲗ ⲛⲡϣⲙϣⲉ ⲛⲛⲛⲟⲩⲧⲉ · ⲁϥⲧⲣⲉⲩⲟⲩⲁϩⲟⲩ ⲛⲥⲁⲓⲏⲥⲟⲩⲥ ⲡⲛⲁⲍⲱⲣⲁⲓⲟⲥ · ⲡⲉⲛⲧⲁⲩⲥⲧⲁⲩⲣⲟⲩ ⲙⲙⲟϥ · ⲉϥϫⲱ ⲙⲱⲩⲥⲏⲥ · ϫⲉⲡⲁⲓ ⲡⲉ ⲡⲛⲟⲩⲧⲉ ⲛⲧⲟϥ ⲧⲁⲙⲓⲟ ⲛⲧⲡⲉ · ⲙⲛⲡⲕⲁϩ · ⲁⲩⲱ ⲛⲧⲉⲓϩⲉ · ⲁϥⲧⲣⲉⲟⲩⲟⲛ ⲛⲓⲙ ⲥⲁϩⲱⲟⲩ ⲉⲃⲟⲗ ⲛⲛⲛⲟⲩⲧⲉ ·
…
79 ⲡⲣⲣⲟ ⲇⲉ ⲡⲉϫⲁϥ ⲛⲛⲉⲧⲧⲁⲩⲟ ⲛⲓϣⲁϫⲉ · ⲉϥϫⲱ ⲙⲙⲟⲥ ⲛⲁⲩ · ϫⲉϩⲉⲛⲙⲉ ⲛⲉ ⲛⲓϣⲁϫⲉ ⲉⲧⲉⲧⲛϫⲱ ⲙⲟⲟⲩ ⲛⲁⲓ · ⲉⲧⲃⲉⲙⲉⲣⲕⲟⲩⲣⲓⲟⲥ ⲡⲉⲧⲏϭ ⲉⲣⲟⲓ · ϫⲉⲉϥⲕⲁⲧⲁⲫⲣⲟⲛⲉⲓ ⲛⲛⲁⲛⲟⲩⲧⲉ ⲡⲗⲏⲛ ⲙⲁⲣⲉⲥⲛⲁⲩ ⲛⲛⲟϭ ⲉⲧⲙⲡⲉⲓⲙⲁ · ⲃⲱⲕ ⲛⲥⲉⲙⲟⲩⲧⲉ ⲉⲣⲟϥ · ⲛⲧⲁⲓⲉⲓⲙⲉ ϫⲉϩⲉⲛⲙⲉ ⲛⲉ ⲛⲓϣⲁϫⲉ · ⲉⲧⲉⲧⲛϫⲱ ⲙⲙⲟⲟⲩ ⲛⲁⲓ · ⲉⲧⲃⲏⲏⲧϥ ϫⲓⲛⲙⲙⲟⲛ ·
…
80 ⲧⲟⲧⲉ ⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ ⲁⲩⲉⲓⲛⲉ ⲙⲙⲟϥ ⲉⲣⲁⲧϥ ⲙⲡⲣⲣⲟ ⲇⲉⲕⲓⲟⲥ ·
…
81 ⲉⲣⲉⲛⲉϥⲃⲁⲗ ⲙⲉϩⲙⲉⲣⲉⲓⲏ : ⲉⲣⲉⲟⲩϩⲃ ⲥⲱ ⲛⲑⲃⲃⲓⲟ ⲧⲱ ϩⲓⲱⲱϥ · ⲁⲩⲧⲁϩⲟϥ ⲉⲣⲁⲧϥ · ϩⲓⲧϩⲏ ⲙⲡⲣⲣⲟ ·
…
82 ⲛⲧⲉⲣⲉϥⲛⲁⲩ ⲇⲉ ⲉⲣⲟϥ ϩⲙⲡⲉⲥⲭⲏⲙⲁ · ⲉⲧⲑⲃⲃⲓⲏⲩ · ⲁϥⲕⲓⲙ ⲛⲧⲉϥⲁⲡⲉ · ⲉϥⲁⲡⲟⲣⲉⲓ ⲉϫⲙⲡⲉⲛⲧⲟϥϣⲱⲡⲉ ·
…
83 ⲉⲓⲧⲁ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ · ϫⲉⲙⲉⲣⲕⲟⲩⲣⲓⲟⲥ ⲁϫⲓⲥ ⲉⲣⲟⲓ · ϫⲉⲟⲩ ⲡⲉⲛⲧⲟϥϣⲱⲡⲉ ⲙⲙⲟⲕ · ⲁⲩⲱ ⲉⲧⲃⲉⲛⲗⲟⲓϭⲉ · ⲁⲕⲕⲁⲧⲁⲫⲣⲟⲛⲉⲓ ⲙⲡⲓϩⲉ ⲛⲟϭ ⲛⲧⲁⲉⲓⲟ · ⲙⲛⲡⲁⲝⲓⲱⲙⲁ ·
…
84 ⲛⲧⲁⲓⲧⲁⲁϥ ⲛⲁⲕ · ⲁⲓⲁⲁⲕ ⲛⲙⲡϣⲁ · ⲉϯⲡⲣⲟⲛⲓⲁ ⲛⲛⲛⲟⲩⲧⲉ · ⲁⲩⲱ ⲡⲁⲝⲓⲱⲙⲁ ⲛⲧⲁⲓⲧⲁⲁϥ ⲛⲁⲕ · ⲡⲁⲣⲁⲡⲕⲉⲥⲉⲉⲡⲉ ⲙⲡⲉⲥⲧⲣⲁⲧⲉⲩⲙⲁ ⲧⲏⲣϥ · ⲁⲕⲟⲡϥ ⲉⲩⲗⲁⲁⲩ ·
…
85 ⲗⲟⲓⲡⲟⲛ · ⲙⲁⲧⲁⲙⲟⲓ ⲧⲉⲛⲟⲩ ϫⲉⲧⲁⲧⲉⲓⲡⲗⲁⲛⲏ ϣⲱⲡⲉ ⲙⲙⲟⲕ · ⲉⲃⲟⲗ ϩⲓⲧⲱⲛ ·
…
86 ⲁⲡⲉⲥⲧⲣⲁⲧⲉⲩⲙⲁ ⲛⲛⲉϩⲣⲱⲙⲁⲓⲟⲥ · ⲥⲱⲟⲩϩ ⲉϩⲟⲩⲛ ⲉⲡⲣⲡⲉ · ⲉⲧⲣⲉⲩⲑⲩⲥⲓⲁ ⲛⲛⲛⲟⲩⲧⲉ ⲛⲇⲓⲕⲁⲓⲟⲛ · ⲛⲧⲟⲕ ⲇⲉ ⲙⲁⲩⲁⲁⲕ · ⲡⲉⲛⲧⲁⲕⲡⲟⲣϫⲕ ⲉⲃⲟⲗ ⲙⲡⲁⲣⲓⲑⲙⲟⲥ ·
…
87 ⲡⲗⲏⲛ ⲁϫⲓⲥ ⲉⲣⲟⲓ · ϫⲉⲛⲧⲕⲟⲩ ⲉⲃⲟⲗ ϩⲛⲛⲁϣ ⲛⲭⲱⲣⲁ · ⲏ ϫⲉⲛⲧⲁⲛⲉⲕⲉⲓⲟⲧⲉ ⲙⲟⲩⲧⲉ ⲉⲣⲟⲕ · ⲙⲡⲉⲓⲣⲁⲛ ·
…
88 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ · ⲡⲉϫⲁϥ ⲙⲡⲣⲣⲟ · ϫⲉⲉⲕⲟⲩⲱϣ ⲉⲉⲓⲙⲉ ϫⲉⲁⲛⲅⲟⲩ ⲉⲃⲟⲗ ϩⲛ · ⲛⲁϣ ⲛⲑⲣⲏⲥⲕⲓⲁ · ⲥⲱⲧⲙ ϩⲙⲡⲁⲅⲉⲛⲟⲥ · ⲁⲛⲅⲟⲩ ⲉⲃⲟⲗ ϩⲛⲧⲕⲁⲡⲡⲁⲇⲟⲕⲓⲁ · ϩⲙⲡⲉⲓⲕⲟⲥⲙⲟⲥ ·
…
89 ⲕⲁⲧⲁⲧⲙⲉ ⲇⲉ ⲁⲛⲅⲟⲩⲉⲃⲟⲗ ϩⲛⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ · ⲧⲙⲏⲧⲣⲟⲡⲟⲗⲓⲥ ⲛⲛⲉⲧⲟⲩⲁⲁⲃ · ⲁⲩⲱ ⲡⲁⲣⲁⲛ ⲛⲧⲁⲛⲉⲓⲟⲧⲉ ⲧⲁϥ ⲉⲣⲟⲓ ⲛⲓϣⲟⲣⲡ ⲡⲉ · ⲫⲓⲗⲟⲡⲁⲧⲱⲣ · ⲉⲧⲉⲡϥⲟⲩⲱϩⲙ ⲡⲉ ⲡⲙⲁⲓⲡϥⲉⲓⲱⲧ · ⲛⲧⲉⲣⲉⲣⲙⲁⲧⲟⲓ ⲇⲉ · ⲁⲩⲙⲟⲩⲧⲉ ⲉⲣⲟⲓ ⲙⲉⲣⲕⲟⲩⲣⲓⲟⲥ · ϩⲓⲧⲙⲡⲉⲡⲣⲏⲙⲓⲕⲓⲣⲓⲟⲥ ⲙⲡⲁⲣⲓⲑⲙⲟⲥ ·
…
90 ⲁⲛⲅⲟⲩ ⲡϩⲙϩⲁⲗ ⲛⲛⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲁϫⲟⲉⲓⲥ · ⲡϣⲏⲣⲉ ⲙⲡⲛⲟⲩⲧⲉ ⲉⲧⲟⲛϩ ·
…
91 ⲡⲣⲣⲟ ⲇⲉ ⲛⲧⲉⲣⲉϥⲥⲱⲧⲙ ⲉⲛⲁⲓ · ⲁϥⲱⲛϣ ⲉⲃⲟⲗ ⲛⲟⲩⲛⲟϭ ⲛⲁⲡⲣⲏⲧⲉ ·
…
92 ⲁϥⲕⲓⲙ ⲛⲧⲉϥⲁⲡⲉ · ⲉϥϫⲱ ⲙⲙⲟⲥ ϫⲉⲙⲉⲣⲕⲟⲩⲣⲓⲟⲥ · ⲕⲱ ⲛⲥⲱⲕ ⲛⲧⲉⲓⲁⲡⲉⲓⲗⲏ · ⲙⲛⲧⲉⲓⲙⲁⲛⲓⲁ · ⲛⲅϯⲡⲉⲕⲟⲩⲟⲓ ⲉϩⲟⲩⲛ ⲉⲡⲣⲡⲉ · ⲛⲅⲑⲩⲥⲓⲁⲍⲉ ⲙⲡⲛⲟϭ ⲛⲛⲟⲩⲧⲉ ⲡⲁⲡⲱⲗⲗⲱⲛ ·
…
93 ⲛⲅⲃⲱⲕ ⲉⲡⲉⲕⲁⲣⲓⲑⲙⲟⲥ · ⲉⲡⲙⲁ ⲛⲛⲉϣⲃⲏⲣ ⲉⲙⲙⲁⲧⲟⲓ · ⲛⲅϫⲓ ⲙⲡⲉⲕⲁⲝⲓⲱⲙⲁ ⲛⲧϩⲉ ⲛϣⲟⲣⲡ ·
…
94 ⲡⲉϫⲁϥ ⲛϭⲓⲡⲡⲉⲧⲟⲩⲁⲁⲃ ⲙⲉⲣⲕⲟⲩⲣⲓⲟⲥ · ⲛⲁϩⲣⲙ ⲙⲡⲣⲣⲟ ⲛⲁⲛⲟⲙⲟⲥ · ϫⲉⲙⲁⲣⲉⲡⲁⲓ ϣⲱⲡⲉ ⲉϥⲟⲩⲱⲛϩ ⲛⲁⲕ ⲉⲃⲟⲗ · ⲱ ⲡⲣⲣⲟ ⲛⲁⲛⲟⲙⲟⲥ · ϫⲉⲛϯⲛⲁⲑⲩⲥⲓⲁⲍⲉ ⲁⲛ ⲙⲡⲉⲕⲁⲡⲱⲗⲗⲱⲛ · ⲉⲓⲧϣⲟⲩⲉⲓⲧ ⲛⲧⲁⲕⲱ ⲛⲥⲱⲓ · ⲙⲡⲁⲛⲟⲩⲧⲉ · ⲛⲧⲟϥ ⲧⲁⲧⲁⲙⲓⲟ ⲛⲧⲡⲉ · ⲙⲛⲡⲕⲁϩ · ⲙⲛⲕⲁ ⲛⲓⲙ ·
…
95 ⲁⲛⲟⲕ ⲅⲁⲣ ⲁⲛⲅⲟⲩⲭⲣⲓⲥⲧⲓⲁⲛⲟⲥ ·
…
96 ⲡⲁⲣⲣⲏⲥⲓⲁ ⲁⲩⲱ ⲧⲙⲛⲧⲙⲁⲧⲟⲓ ⲙⲡⲉⲓⲕⲟⲥⲙⲟⲥ · ϯⲛⲁⲡⲟⲧⲁⲥⲥⲉ ⲙⲙⲟⲥ · ⲁⲩⲱ ⲡⲉⲕⲁⲝⲓⲱⲙⲁ · ϯⲣⲭⲣⲉⲓⲁ ⲙⲙⲟϥ ⲁⲛ · ⲁⲛⲅⲡϩⲙⲡϩⲁⲗ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ · ⲡϣⲏⲣⲉ ⲉⲡⲛⲟⲩⲧⲉ ⲉⲧⲟⲛϩ ·
…
97 ⲁϥⲟⲩⲱϣⲃ ⲛϭⲓⲡⲣⲣⲟ ⲇⲉⲕⲓⲟⲥ ⲡⲉϫⲁϥ ⲛⲁϥ · ϫⲉⲙⲉⲣⲕⲟⲩⲣⲓⲟⲥ · ϣⲁⲧⲉⲛⲟⲩ ⲙⲡⲓⲡⲓⲥⲧⲉⲩⲉ ⲉⲛⲉⲛⲧⲁⲩϫⲟⲟⲩ · ⲛⲁⲓ ⲉⲧⲃⲏⲏⲧⲕ · ⲛϭⲓⲛⲉⲕⲕⲁⲧⲏⲅⲟⲣⲟⲥ · ϯⲥⲟⲟⲩⲛ ⲅⲁⲣ · ϫⲉⲉⲓⲧⲉⲃⲉ ⲟⲩⲫⲑⲟⲛⲟⲥ ⲛⲧⲁⲩⲕⲁⲧⲏⲅⲟⲣⲓⲁ ⲙⲙⲟⲕ · ⲛⲁⲓ ⲛⲧⲉⲣⲟⲩⲛⲁⲩ ⲉⲧⲛⲟϭ ⲛϯⲙⲏ ⲛⲧⲁⲓⲧⲁⲁⲥ ⲛⲁⲕ · ϩⲛⲧⲙⲏⲏⲧⲉ ⲙⲡⲁⲣⲓⲑⲙⲟⲥ ⲧⲏⲣϥ · ⲙⲛⲡⲉⲥⲧⲣⲁⲧⲉⲩⲙⲁ ·
…
98 ⲧⲉⲛⲟⲩ ϭⲉ ⲥⲱⲧⲙ ⲛⲥⲱⲓ : ⲛⲅⲑⲩⲥⲓⲁⲍⲉ ⲛⲛⲛⲟⲩⲧⲉ ·
…
99 ⲙⲡⲣⲧⲣⲉⲡϩⲟⲃ ⲁⲛⲁⲅⲁⲍⲉ ⲙⲙⲟⲓ · ⲛⲧⲁⲓⲣⲡⲱⲃϣ ⲛⲧⲇⲓⲁⲑⲉⲥⲓⲥ ⲉⲛⲉⲟⲩⲛⲧⲁⲓⲥ ⲉϩⲟⲩⲛ ⲉⲣⲟⲕ · ⲛⲧⲁⲓϥⲓ ⲛⲧⲟⲟⲧⲕ ⲙⲡⲉⲕⲁⲝⲓⲱⲙⲁ · ⲁⲩⲱ ⲛⲧⲁϯ ⲛⲁⲕ ⲛϩⲉⲛⲛⲟϭ ⲛⲇⲓⲙⲟⲣⲓⲁ ·
…
100 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ · ⲡⲉϫⲁϥ ⲙⲡⲣⲣⲟ · ϫⲉⲧⲙⲛⲧϣⲃⲏⲣ ⲙⲡⲉⲓⲕⲟⲥⲙⲟⲥ · ⲟⲩⲗⲁⲁⲩ ⲁⲛ ⲧⲉ · ⲟⲩⲙⲛⲧϫⲁϫⲉ ⲧⲉ ⲛⲁϩⲣⲙⲡⲛⲟⲩⲧⲉ ·
…
101 ⲁⲩⲱ ⲛⲓⲧⲁⲉⲓⲟ ⲛⲧⲉⲓⲙⲓⲛⲉ · ϩⲉⲛⲡⲣⲟⲥⲟⲩⲟⲉⲓϣ ⲛⲉ ·
…
102 ⲡⲉⲟⲟⲩ ⲇⲉ ⲛⲧⲟϥ ⲙⲡⲛⲟⲩⲧⲉ · ⲙⲏⲛⲉ ⲉⲃⲟⲗ ϣⲁⲉⲛⲉϩ · ⲧⲉⲛⲟⲩ ϭⲉ ⲙⲡⲣϯϩⲓⲥⲉ ⲛⲁⲕ ⲉⲡϫⲓⲛϫⲏ · ⲁⲛⲟⲕ ⲅⲁⲣ ⲁⲛⲅⲟⲩⲭⲣⲓⲥⲧⲓⲁⲛⲟⲥ · ϯⲛⲁⲑⲩⲥⲓⲁⲍⲉ ⲁⲛ ⲛⲛⲉⲕⲛⲟⲩⲧⲉ ⲛⲃⲟⲧⲉ · ⲗⲓⲟⲡⲟⲛ ⲡⲉⲧⲉϩⲛⲁⲕ ⲁⲣⲓϥ ⲛⲁⲓ ·
…
103 ⲇⲉⲕⲓⲟⲥ ⲇⲉ ⲡⲉϫⲁϥ ⲛⲁϥ · ϫⲉⲱ ⲙⲉⲣⲕⲟⲩⲣⲓⲟⲥ · ⲑⲩⲥⲓⲁⲍⲉ · ⲙⲡⲣⲙⲟⲩ ϩⲛⲟⲩⲙⲟⲩ ⲉϥϩⲟⲟⲩ · ⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ ⲡⲉϫⲁϥ ⲛⲁϥ · ϫⲉⲙⲁⲣⲉⲟⲩϣⲁϫⲉ ⲛⲟⲩⲱⲧ ⲣⲁϣⲕ · ⲱ ⲡⲣⲣⲟ · ϯⲛⲁⲥⲱⲧⲙ ⲛⲥⲱⲧⲙ ⲅⲁⲣ ⲁⲛ ⲛⲥⲱⲕ · ⲛⲧⲁϣⲙϣⲉ ⲛϩⲉⲛⲛⲟⲩⲧⲉ ⲛϣⲙⲙⲟ · ⲛⲧⲁⲕⲱ ⲛⲥⲱⲛ ⲡⲁⲛⲟⲩⲧⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
104 ⲇⲉⲕⲓⲟⲥ ⲇⲉ ⲛⲧⲉⲣⲉϥⲥⲱⲧⲙ ⲇⲉ ⲉⲛⲁⲓ · ⲁϥϭⲱⲛⲧ ⲉⲙⲁⲧⲉ · ⲁϥⲕⲉⲗⲉⲩⲉ ⲉⲧⲣⲉⲩⲕⲁⲁϥ ⲕⲁϩⲏⲩ ⲛⲛⲉϥϩⲟⲓⲧⲉ · ⲉⲛⲥⲉϫⲟⲗⲕϥ ⲉⲃⲟⲗ · ⲛϭⲓⲙⲏⲧ ⲙⲙⲁⲧⲟⲓ · ⲛⲥⲉϩⲓⲟⲩⲉ ⲉⲣⲟϥ ⲛϩⲉⲛⲃⲟⲩⲛⲉⲩⲣⲟⲛ ⲉⲩⲟⲩⲱⲧ · ϣⲁⲛⲧⲉⲡⲕⲁϩ ⲉⲧϩⲁⲣⲁⲧϥ ϩⲙⲡⲉϥⲥⲛⲟϥ ·
…
105 ⲡⲉϫⲁϥ ⲛⲁϥ ⲛϭⲓⲇⲉⲕⲓⲟⲥ ⲡⲣⲣⲟ · ϫⲉⲙⲉⲣⲕⲟⲩⲣⲓⲟⲥ ⲁⲕϫⲉⲛⲧⲧⲁⲣⲭⲏ · ⲛⲛⲃⲁⲥⲁⲛⲟⲥ · ϫⲉⲥⲉϩⲟⲟⲩⲉ ⲉⲕⲑⲩⲥⲓⲁⲍⲉ ϫⲉⲛⲙⲙⲟⲛ ·
…
106 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲛϩⲟⲥⲟⲛ ⲟⲩⲛⲧⲁⲓ ⲙⲙⲁⲩ · ⲙⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲉϥⲃⲟⲓⲏⲑⲉⲓ ⲉⲣⲟϥ · ϯϩⲏϣ ϭⲉ ⲁⲛ ϩⲁⲛⲉⲕⲃⲁⲥⲁⲛⲟⲥ ·
…
107 ⲁⲛⲟⲕ ⲅⲁⲣ ⲁⲛⲅⲡϩⲙϩⲁⲗ · ⲙⲡⲁϫⲟⲉⲓⲥ ⲉⲓⲥ ⲡⲉⲭⲣⲓⲥⲧⲟⲥ · ⲉϥⲃⲟⲏⲑⲉⲓ ⲉⲣⲟⲓ · ⲡⲁⲓ ⲡⲉ ⲡⲣⲣⲟ ⲛⲁⲧⲡⲉ · ⲙⲛⲛⲁⲡⲕⲁϩ ·
…
108 ⲛⲁⲓ ⲇⲉ ⲛⲧⲉⲣⲉϥⲥⲟⲧⲙⲟⲩ ⲛϭⲓⲡⲣⲣⲟ ⲇⲉⲕⲓⲟⲥ · ⲡⲉϫⲁϥ ϫⲉⲙⲉⲣⲕⲟⲩⲣⲓⲟⲥ · ⲥⲱⲧⲙ ⲛⲥⲱⲓ · ⲛⲅⲑⲩⲥⲓⲁⲍⲉ ⲛⲛⲛⲟⲩⲧⲉ · ⲛⲅϯϩⲏⲩ ⲛϩⲉⲛⲟϭ ⲛⲃⲁⲥⲁⲛⲟⲥ · ϫⲉⲕⲁⲥ ⲛⲅⲙⲟⲩ ⲁⲛ ⲕⲁⲕⲟⲥ ·
…
109 ϣⲁⲧⲉⲧⲓⲛⲟⲩ ϯⲥⲟ ⲉⲣⲟⲕ · ⲁⲩⲱ ϯⲟ ⲛϩⲁⲣϣ ⲛϩⲏⲧ ⲉϩⲣⲁⲓ ⲉϫⲱⲕ ·
…
110 ϯⲟⲩⲱϣ ⲅⲁⲣ ⲁⲛ ⲉⲣⲡⲉⲧϩⲟⲟⲩ ⲛⲁⲕ · ⲙⲁⲗⲓⲥⲧⲁ ϫⲉⲁⲕϣⲱⲡⲉ ⲛⲁⲓ · ⲛϣⲃⲏⲣ ⲉⲧⲃⲉⲧϭⲓⲛⲙⲓϣⲉ ⲉϫⲱⲓ · ϩⲙⲡⲡⲟⲗⲉⲙⲟⲥ ·
…
111 ⲥⲱⲧⲙ ⲛⲥⲱⲓ ⲛⲅⲑⲩⲥⲓⲁⲍⲉ ⲛⲛⲛⲟⲩⲧⲉ ·
…
112 ⲙⲡⲣⲧⲁⲟ ⲛⲧⲉⲕⲙⲛⲧϣⲏⲣⲉ ϣⲏⲙ · ϩⲛϩⲉⲛⲃⲁⲥⲁⲛⲟⲥ ⲉⲩϣⲟⲃⲉ ·
…
113 ⲁⲛⲟⲕ ϯϣⲛϩⲧⲏⲓ ϩⲁⲧⲉⲕⲙⲛⲧϣⲏⲣⲉ ϣⲏⲙ · ⲙⲛⲧⲉⲕⲙⲛⲧϣⲃⲏⲣ ·
…
114 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ · ϫⲉϩⲓⲥⲉ ⲛⲓⲙ ⲉⲧⲛⲁϣⲱⲡⲉ ⲙⲙⲟⲓ · ⲉⲧⲃⲉⲑⲟⲙⲟⲗⲟⲅⲉⲓ ⲉϩⲟⲩⲛ ⲉⲡⲛⲟⲩⲧⲉ · ⲉⲥⲱ ⲛⲁⲓ ⲛϩⲟⲩⲟ ⲉⲩⲃⲓⲕⲉ ⲉⲩⲟⲩⲁⲁⲃ · ⲛϩⲓⲥⲉ ⲅⲁⲣ ⲧⲉⲛⲟⲩ ⲛⲥⲉⲙⲡϣⲁ ⲁⲛ ⲙⲡⲉⲟⲟⲩ ⲉⲧⲛⲁϭⲱⲗⲡ ⲉⲣⲟⲛ ·
…
115 ⲛⲁⲓ ⲛⲧⲉⲣⲉϥⲥⲱⲧⲙ ⲉⲣⲟⲟⲩ · ⲛϭⲓⲡⲣⲣⲟ ⲇⲉⲕⲓⲟⲥ · ⲡⲉϫⲁϥ ⲉϣϫⲉ ⲁⲕⲥⲙⲛⲧⲡⲉⲕϩⲏⲧ ⲉϩⲟⲩⲛ ⲉϩⲉⲛϣⲁϫⲉ ⲙⲙⲛⲧⲁⲧϩⲏⲧ · ⲁⲩⲱ ⲛⲧⲁⲉⲓⲟ ⲛⲛϩⲣⲱⲙⲁⲓⲟⲥ · ⲁⲕⲟⲡⲟⲩ ϫⲉϩⲉⲛⲗⲁⲁⲩ ⲛⲉ · ⲙⲡⲉⲕⲁⲛⲉⲭⲉ ⲉⲑⲩⲥⲓⲁⲍⲉ ⲛϩⲉⲛⲛⲟⲩⲧⲉ ⲛⲇⲓⲕⲁⲓⲟⲛ · ⲕⲁⲧⲁⲛⲇⲟⲅⲙⲁ ⲛⲧⲥⲩⲛⲕⲗⲏⲧⲟⲥ · ⲟⲩⲇⲉ ⲙⲡⲉⲕⲥⲱⲧⲙ ⲛⲥⲁⲛⲟⲙⲟⲥ ⲛⲣⲣⲱⲟⲩ · ⲁⲛⲟⲕ ϩⲱ ϯⲛⲁⲕⲟⲗⲁⲍⲉ ⲙⲙⲟⲕ · ⲕⲁⲧⲁⲧⲉⲕⲙⲛⲧⲁⲧϩⲏⲧ · ⲛⲧⲁⲛⲁⲩ ϫⲉⲡⲛⲟⲩⲧⲉ ⲛⲧⲁⲕⲛⲁϩⲧⲉ ⲉⲣⲟϥ · ⲛⲁϣⲛⲁϩⲙⲉⲕ ⲉⲃⲟⲗ ϩⲛⲛⲁϭⲓϫ ·
…
116 ⲁϥⲟⲩⲱϣⲃ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲡⲉϫⲁϥ ⲙⲡⲣⲣⲟ · ϫⲉⲉϥⲥⲏϩ ϩⲙⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ · ϫⲉⲛⲓⲙ ⲡⲉⲧⲛⲁϣⲡⲟⲣϫⲛ · ⲉⲧⲁⲅⲁⲡⲏ ⲙⲡⲛⲟⲩⲧⲉ ·
…
117 ⲟⲩⲑⲗⲓⲯⲓⲥ ⲧⲉ ⲏ ⲟⲩⲗⲱϫϩ · ⲏ ⲟⲩⲇⲓⲟⲅⲙⲟⲥ · ⲏ ⲟⲩϩⲕⲟ · ⲏ ⲟⲩⲕⲱ ⲕⲁϩⲏⲩ · ⲏ ⲟⲩⲕⲩⲛⲇⲓⲛⲟⲥ · ⲏ ⲟⲩⲥⲏϥⲉ · ⲕⲁⲧⲁⲧϩⲉ ⲉⲧⲥⲏϩ ϫⲉⲉⲧⲃⲏⲏⲧⲕ · ⲥⲉⲙⲟⲩⲟⲩⲧ ⲙⲙⲟⲛ ⲙⲡⲉϩⲟⲟⲩ ⲧⲏⲣϥ ·
…
118 ⲧⲛⲡⲉⲓⲑⲉ ⲅⲁⲣ ϫⲉⲟⲩⲇⲉ ⲙⲛⲙⲟⲩ · ⲟⲩⲇⲉ ⲙⲛⲱⲛϩ · ⲟⲩⲇⲉ ⲁⲅⲅⲉⲗⲟⲥ · ⲟⲩⲇⲉ ⲁⲣⲭⲏ · ⲟⲩⲇⲉ ⲉⲝⲟⲩⲥⲓⲁ · ⲟⲩⲇⲉ ⲛⲉⲧϣⲟⲟⲡⲉ · ⲟⲩⲇⲉ ⲛⲉⲧⲛⲁϣⲱⲡⲉ · ⲛⲁⲉϣϭⲙϭⲟⲙ ⲉⲡⲱⲣϫⲛ · ⲉⲃⲟⲗ ϩⲛⲧⲁⲅⲁⲡⲏ ⲙⲡⲉⲭⲣⲓⲥⲧⲟⲥ ·
…
119 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓⲡⲙⲁⲕⲁⲣⲓⲟⲥ ⲙⲉⲣⲕⲟⲩⲣⲓⲟⲥ · ⲁϥϭⲱⲛⲧ ⲛϭⲓⲡⲣⲣⲟ ⲇⲉⲕⲓⲟⲥ · ⲁϥⲕⲉⲗⲉⲩⲉ ⲧⲣⲉⲩⲧⲁⲗⲟϥ ⲉⲡϩⲉⲣⲙⲉⲧⲁⲣⲓⲟⲛ · ⲛⲥⲉϩⲱⲕ ⲙⲙⲟϥ ·
…
120 ⲛϭⲓⲕⲉⲥⲧⲱⲛⲁⲣⲓⲟⲥ ⲇⲉ ⲛⲉⲩϩⲱⲕ ⲙⲙⲟϥ ⲡⲉ · ϣⲁⲛⲧⲉⲧⲕⲁⲥ ⲛⲧⲉϥϫⲓⲥⲉ ⲕⲱⲗⲡ ⲉⲃⲟⲗ ·
…
121 ⲡⲙⲁⲕⲁⲣⲓⲟⲥⲇⲉ ⲙⲡⲉϥⲕⲁⲧⲟⲟⲧϥ ⲉⲃⲟⲗ · ⲉϥⲥⲙⲟⲩ ⲉⲡⲛⲟⲩⲧⲉ · ⲉϥϫⲱ ⲙⲙⲟⲥ · ϫⲉⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲙⲟⲛⲟⲅⲉⲛⲏⲥ ⲙⲡⲉⲓⲱⲧ · ⲡⲉϫⲡⲟ ⲉⲃⲟⲗ ϩⲛⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ ⲙⲁⲣⲓⲁ · ⲡⲉⲛⲧⲁϥϫⲓ ⲥⲁⲣⲝ ⲉⲃⲟⲗ ϩⲛⲧⲉϩⲓⲉⲓⲃ ⲙⲙⲉ · ϣⲁⲛⲧⲉϥⲥⲱⲧⲉ ⲙⲡⲅⲉⲛⲟⲥ ⲧⲏⲣϥ ⲛⲁⲇⲁⲙ · ⲛϥⲉⲗⲉⲩⲑⲩⲣⲟⲩ ⲙⲙⲟⲛ · ⲉⲃⲟⲗ ϩⲛⲧⲙⲛⲧϩⲙϩⲁⲗ ⲙⲡⲛⲟⲃⲉ · ϯϣⲡϩⲙⲟⲧ ⲛⲧⲟⲟⲧⲕ · ϫⲉⲁⲕⲁⲁⲛ ⲛⲙⲡϣⲁ ⲛⲧⲉⲕⲙⲛⲧⲁⲅⲁⲑⲟⲥ · ⲉⲧⲛⲁϣⲱⲥ
…
122 ⲥⲱⲧⲙ ⲉⲣⲟⲓ ⲙⲡϩⲟⲟⲩ ·
…
123 ⲁⲛⲟⲕ ⲡⲉⲕϩⲙϩⲁⲗ ⲙⲉⲣⲕⲟⲩⲣⲓⲟⲥ ·
…
124 ⲛⲅⲁⲁⲧ ⲛⲙⲡϣⲁ ⲙⲡⲉⲕⲧⲱϩⲙ ⲉⲧⲟⲩⲁⲁⲃ · ⲁⲩⲱ ⲛⲕⲟⲓⲛⲟⲛⲟⲥ ⲉⲛⲉⲕϩⲓⲥⲉ ⲉⲧⲟⲩⲁⲁⲃ · ⲁⲩⲱ ⲙⲙⲛⲧⲣⲉ ⲙⲡⲓⲥⲧⲟⲥ · ⲛⲧⲉⲕⲙⲛⲧⲛⲟⲩⲧⲉ ·
…
125 ⲧⲉⲛⲟⲩ ϭⲉ ⲡⲁϫⲟⲉⲓⲥ · ⲙⲡⲣⲕⲁⲁⲧ ⲛⲥⲱⲕ · ⲁⲩⲱ ⲙⲡⲣⲟⲩⲉ ⲙⲙⲟⲓ ϫⲉⲟⲩⲛϩⲉⲛⲑⲗⲓⲯⲓⲥ ϭⲉⲧⲣⲣⲟⲓ · ⲁⲩⲱ ⲁϩⲉⲛⲥⲛⲁⲩ ϩⲓϩⲉ ⲉϩⲣⲁⲓ ⲉϫⲱⲓ ·
…
126 ⲁⲗⲗⲁ ϯϭⲟⲙ ⲛⲁⲓ ⲡⲁϫⲟⲉⲓⲥ · ϣⲁⲛⲧⲓϫⲱⲕ ⲉⲃⲟⲗ · ⲙⲡⲁⲁⲅⲱⲛ ϩⲛⲟⲩⲉⲣⲏⲛⲏ · ⲙⲡⲣⲧⲣⲉⲛⲁϫⲁϫⲉ ⲣⲁϣⲉ ⲙⲙⲟⲓ · ⲁⲩⲱ ⲙⲡⲣⲧⲣⲉⲩϫⲟⲟⲥ · ϩⲛⲛⲛϩⲉⲑⲛⲟⲥ · ϫⲉⲉϥⲧⲱⲛ ⲡⲉⲩⲛⲟⲩⲧⲉ ·
…
127 ⲛⲁⲓ ⲇⲉ ⲉϥϫⲱ ⲙⲙⲟⲟⲩ · ⲉⲥⲟⲩⲥⲙⲏ ⲁⲥϣⲱⲡⲉ ϣⲁⲣⲟϥ · ⲉⲥϫⲱ ⲙⲙⲟⲥ ϫⲉⲧⲱⲕ ⲛϩⲏⲧ · ⲡⲁϣⲟⲉⲓϫ ⲙⲉⲣⲕⲟⲩⲣⲓⲟⲥ · ϩⲩⲡⲟⲙⲓⲛⲏ ⲱ ⲡⲁⲥⲟⲧⲡ ⲛϫⲱⲱⲣⲉ ·
…
128 ⲁⲛⲟⲕ ⲅⲁⲣ ϯϣⲟⲟⲡ ⲛⲙⲙⲁⲕ · ⲉⲓϯϭⲟⲙ ⲛⲁⲕ · ⲁⲩⲱ ϯⲛⲁϣⲱⲡⲉ ⲛⲙⲙⲁⲕ ⲛⲥⲕⲉⲡⲁⲥⲧⲏⲥ · ⲉⲓⲃⲟⲏⲑⲉⲓ ⲉⲣⲟⲕ ϩⲛϩⲓⲥⲉ ⲛⲓⲙ · ⲉⲧⲉⲕⲛⲁϣⲟⲡⲟⲩ ϩⲙⲡⲁⲣⲁⲛ · ⲙⲡⲉⲣϭⲱⲃ · ⲟⲩⲇⲉ ⲙⲡⲣⲣϭⲱⲧⲡ ϩⲏⲧⲟⲩ ⲛⲛⲃⲁⲥⲁⲛⲟⲥ ·
…
129 ⲁⲛⲟⲕ ϯϣⲟⲟⲡ ⲛⲙⲙⲁⲕ · ⲉⲓϯϭⲟⲙ ⲛⲁⲕ · ϣⲁⲛⲧⲉⲕϫⲱⲕ ⲉⲃⲟⲗ ⲙⲡⲉⲕⲁⲅⲱⲛ · ⲟⲩⲙⲛⲧϫⲱⲱⲣⲉ ·
…
130 ⲁⲩⲱ ⲛⲧⲉⲩⲛⲟⲩ ⲁϥⲁⲥⲡⲁⲍⲉ ⲙⲙⲟϥ ⲛϭⲓⲡⲁⲣⲭⲁⲅⲅⲉⲗⲟⲥ ⲙⲓⲭⲁⲏⲗ · ⲁⲩⲱ ⲁϥⲥⲫⲣⲁⲅⲓⲍⲉ ⲙⲡⲉϥⲥⲱⲙⲁ ⲧⲏⲣϥ ·
…
131 ⲁⲩⲱ ⲛⲧⲉⲩⲛⲟⲩ ⲁⲡⲉⲣⲙⲏⲧⲁⲣⲓⲟⲛ ⲟⲩⲱϭⲡ · ⲁϥⲣⲥⲛⲁⲩ · ⲁⲩⲱ ⲁⲙⲙⲉⲣⲉ ⲉⲧϥⲙⲉⲣ ⲙⲙⲟⲟⲩ · ⲁⲩⲃⲱⲗ ⲉⲃⲟⲗ · ⲁϥϥⲟϭϥ ⲁϥⲁϩⲉⲣⲁⲧϥ · ⲙⲛⲗⲁⲁⲩ ⲛⲧⲁⲕⲟ ϣⲟⲟⲡ ⲛϩⲏⲧϥ · ⲁⲗⲗⲁ ⲛⲉϥϯⲉⲟⲟⲩ ⲙⲡⲛⲟⲩⲧⲉ ·
…
132 ⲡⲣⲣⲟ ⲇⲉ ⲛⲧⲉⲣϥⲛⲁⲩ · ⲉⲡⲉⲛⲧⲟϥϣⲱⲡⲉ · ⲁϥⲙⲟⲩϩ ⲛϭⲱⲛⲧ · ⲡⲉϫⲁϥ ϫⲉⲉⲡⲉⲓⲇⲏ ⲁⲡⲁⲓ ϫⲱ ⲙⲙⲟⲥ · ϫⲉⲟⲩⲛⲧⲁⲛ ⲙⲙⲁⲩ ⲛⲟⲩⲡⲁⲛϩⲟⲡⲗⲓⲁ ⲛϩⲱⲃ · ϯⲕⲉⲗⲉⲩⲉ ⲉⲧⲣⲉⲩⲧⲟⲥϥ ⲉⲃⲟⲗ ⲉϥⲧⲟ ⲛϣⲙⲟⲩⲓ · ⲛⲥⲉϫⲟⲗⲕϥ ⲉⲃⲟⲗ · ⲟⲩⲇⲉ ⲧⲡⲉ ⲟⲩⲇⲉ ⲡⲕⲁϩ · ⲛⲟⲩⲙⲁϩⲉ ·
…
133 ⲛⲧⲉⲣⲟⲩⲣⲡⲁⲓ ⲇⲉ ⲛⲁϥ · ⲡⲉϫⲁϥ ⲛϭⲓⲡⲣⲣⲟ · ϫⲉⲉⲩⲧⲱⲛ ⲧⲉⲛⲟⲩ ⲛⲉⲕϩⲟⲡⲗⲟⲛ · ⲉⲧⲉⲕⲑⲁⲣⲉⲓ ⲉⲣⲟⲟⲩ · ϣⲁⲡⲛⲟϭ ⲛⲛⲟϭ ⲛⲟⲩⲧⲉ ⲡⲍⲉⲩⲥ ⲁⲩⲧⲟⲥⲕ ⲉⲃⲟⲗ ⲉⲙⲁⲧⲉ ·
…
134 ⲡⲡⲉⲧⲟⲩⲁⲁⲃ ⲁϥϭⲱϣⲧ ⲉϩⲣⲁⲓ ⲉⲧⲡⲉ ⲡⲉϫⲁϥ · ϫⲉⲡϫⲟⲉⲓⲥ ⲃⲟⲑⲉⲓ ⲉⲣⲟⲓ · ⲁⲛⲟⲕ ⲡⲉⲕϩⲙϩⲁⲗ · ⲡⲁⲗⲓⲛ ⲟⲛ ⲁϥⲕⲉⲗⲉⲩⲉ ⲛϭⲓⲡⲣⲣⲟ · ⲉⲧⲣⲉⲩϣⲱⲗϭ ⲙⲡⲉϥⲥⲱⲙⲁ · ⲛϩⲉⲛϭⲟⲣⲧⲉ ⲉⲩϫⲏⲣ · ⲙⲛϩⲉⲛⲙⲁⲥⲧⲓⲅⲝ · ⲙⲛⲛⲥϫⲟⲉⲓⲥ ⲛⲥⲉⲡⲱⲣϣ ⲛϩⲉⲛϫⲃⲃⲥ ⲛⲕⲱϩⲧ ϩⲁⲣⲟϥ · ϫⲉⲕⲁⲥ ⲉϥⲉⲣⲱⲕϩ ⲕⲟⲩⲓ ⲕⲟⲩⲓ · ⲁⲩⲱ ⲁϥⲱϣⲙ ⲛϭⲓⲡⲕⲱϩⲧ ϩⲙⲡⲉⲥⲛⲟϥ · ⲙⲡⲇⲓⲕⲁⲓⲟⲥ ⲉⲧϩⲁⲁⲧⲉ ⲉⲡⲉⲥⲏⲧ ·
…
135 ⲡⲡⲉⲧⲟⲩⲁⲁⲃ ⲇⲉ ⲁϥⲓ ⲉⲣⲟϥ · ϩⲛⲟⲩⲛⲟϭ ⲙⲙⲛⲧϫⲱⲱⲣⲉ · ϩⲛϯⲕⲉⲃⲁⲥⲁⲛⲟⲥ ·
…
136 ⲡⲣⲣⲟ ⲇⲉ ⲇⲉⲕⲓⲟⲥ ⲁϥⲧⲣⲉⲩⲟⲗϥ ⲉⲃⲟⲗ ϫⲉⲛⲉϥⲙⲟⲩ ϩⲛⲟⲩϭⲉⲡⲏ · ⲁⲩⲱ ⲁⲩⲟⲧⲡϥ ⲉϩⲟⲩⲛ ⲉⲩⲙⲁⲛⲕⲁⲕⲉ · ϩⲛⲟⲩϭⲉⲡⲏ ·
…
137 ⲙⲙⲁⲧⲟⲓ ⲇⲉ ⲁⲩϥⲓ ⲉϩⲁⲣⲟϥ · ⲉϥⲟ ⲙⲡⲁϣ ⲙⲟⲩ · ⲟⲩⲛⲟⲩⲕⲟⲩⲓ ⲛⲛⲓϥⲉ ϣⲟϫⲡ ⲛϩⲏⲧϥ · ⲉⲩⲙⲉⲉⲩⲉ ϫⲉⲁϥⲙⲟⲩ ·
…
138 ⲙⲛⲛⲥⲁⲟⲩⲕⲟⲩⲓ ⲇⲉ ϩⲛⲧⲉⲩⲛⲟⲩ ⲉⲧⲙⲙⲁⲩ · ⲉⲥⲁⲅⲅⲉⲗⲟⲥ ⲙⲡϫⲟⲉⲓⲥ ⲁϥⲟⲩⲱⲛϩ ⲛⲁϥ ⲉⲃⲟⲗ · ⲡⲉϫⲁϥ ⲛⲁϥ · ϫⲉϯⲣⲏⲛⲏ ⲛⲁⲕ · ⲡϣⲟⲉⲓϫ ⲛⲣⲉϥϫⲣⲟ ·
…
139 ⲛⲧⲉⲣⲉϥϫⲓⲡⲁⲓ ⲇⲉ ⲁϥⲧⲁⲗϭⲉⲛⲉϥⲥⲁϣ · ⲉⲧϩⲙⲡⲉϥⲥⲱⲙⲁ · ⲁⲩⲱ ⲁϥⲧⲁϩⲟϥ ⲉⲣⲁⲧϥ · ⲉϥⲟϫ ϩⲱⲥ ⲇⲉ ⲛⲉϥⲧⲱⲟⲩⲛ · ⲛⲉϥⲁϩⲉⲣⲁⲧϥ ⲉϥϯⲉⲟⲟⲩ · ⲙⲡⲛⲟⲩⲧⲉ · ⲛⲧⲟϥⲃⲟⲏⲑⲉⲓ ⲉⲣⲟϥ ·
…
140 ⲙⲛⲛⲥⲁⲛⲁⲓ ⲁϥⲕⲉⲗⲉⲩⲉ ⲛϭⲓⲡⲣⲣⲟ · ⲉⲧⲣⲉⲩⲧⲁϩⲟϥ ⲉⲣⲁⲧϥ ⲉⲡⲃⲏⲙⲁ ·
…
141 ⲛⲧⲉⲣⲉϥ ⲇⲉ ⲉⲣⲟϥ ⲛϭⲓⲡⲣⲣⲟ · ⲡⲉϫⲁϥ ⲛⲁϥ ϫⲉⲁⲩϥⲓⲧⲕ ⲛⲧⲟⲟⲧ · ⲉⲕⲟ ⲙⲡⲁϣ ⲙⲟⲩ · ⲛⲁϣ ⲛϩⲉ ⲧⲉⲛⲟⲩ ⲕⲙⲟⲟϣⲉ · ⲙⲉϣⲁⲕ ⲣⲱ ⲙⲛⲗⲁⲁⲩ ⲙⲡⲱⲗϩ ϩⲓⲡⲉⲕⲥⲱⲙⲁ ·
…
142 ⲧⲟⲧⲉ ⲁϥⲕⲉⲗⲉⲩⲉ ⲛⲛϥⲁⲓⲙⲉⲣⲉϩ · ⲉⲧⲁϩⲉⲣⲁⲧⲟⲩ ⲉⲧⲣⲉⲩⲙⲟⲩϣⲧ ⲙⲡⲉϥⲥⲱⲙⲁ ·
…
143 ⲛⲧⲟⲟⲩ ⲇⲉ ⲡⲉϫⲁⲩ ⲙⲡⲣⲣⲟ · ϫⲉϣⲉ ⲡⲕⲣⲁⲧⲟⲥ · ⲱ ⲡⲣⲣⲟ · ⲛⲉⲩⲥⲉⲃⲏⲥ · ⲡⲉϥⲥⲱⲙⲁ ⲧⲏⲣϥ ⲟⲩⲟϫ · ⲙⲛⲗⲁⲩ ⲛⲧⲁⲕⲟ ϣⲟⲟⲡ ⲛϩⲏⲧϥ · ⲛⲧϩⲉ ⲙⲡⲟⲩϫⲱϩⲉ ⲉⲣⲟϥ ⲉⲡⲧⲏⲣϥ ·
…
144 ⲇⲉⲕⲓⲟⲥ ⲇⲉ ϩⲱⲱϥ ⲡⲉϫⲁϥ · ϫⲉⲡⲁⲛⲧⲱⲥ ϥⲛⲁϫⲟⲟⲥ · ϫⲉⲡⲉⲭⲣⲓⲥⲧⲟⲥ ⲡⲉⲛⲧⲟϥⲧⲁⲗϭⲟⲓ · ⲙⲏ ⲁⲧⲉⲧⲛϫⲓ ⲥⲁⲉⲓⲛ ⲉϩⲟⲩⲛ ⲉⲡⲉϣⲧⲉⲕⲟ · ⲉⲧⲣⲉϥⲑⲉⲣⲁⲡⲉⲩⲉ ⲙⲙⲟϥ ·
…
145 ⲛⲧⲟⲟⲩ ⲇⲉ ⲡⲉϫⲁⲩ · ϫⲉϣⲁⲧⲉⲕⲙⲛⲧⲛⲟϭ ⲉⲧⲁⲓⲏⲩ · ⲉⲧⲁⲙⲁϩⲧⲉ ⲉϫⲛⲧⲟⲓⲕⲟⲩⲙⲉⲛⲉ ⲧⲏⲣⲥ · ⲙⲛⲡⲉ ⲗⲁⲁⲩ ⲛⲑⲉⲣⲁⲡⲉⲩⲉ ⲛⲣⲱⲙⲉ ⲧⲁⲗϭⲟϥ ·
…
146 ⲁⲗⲗⲁ ⲙⲙⲉⲉⲩⲉⲩⲉ ϫⲉϥⲛⲁⲙⲟⲩ ⲛⲁϣ ⲛϩⲉ ⲉϥⲟⲛϩ · ⲏ ⲛⲧⲟϥⲗⲟ ⲛⲁϣ ⲛϩⲉ · ⲛⲧⲛⲥⲟⲟⲩⲛ ⲁⲛ · ϫⲉⲟⲩⲁϣⲉ ⲛϭⲟⲧ ⲧⲉ ⲧⲙⲁⲕⲓⲁ ⲛⲭⲣⲓⲥⲧⲓⲁⲛⲟⲥ ⲛⲥⲁϥ : ⲙⲛⲁϥⲣⲕⲱⲥ ·
…
147 ⲙⲡϩⲟⲟⲩ ⲇⲉ ϩⲱϥ ⲉϥⲁϩⲉⲣⲁⲧϥ ⲉϥⲟⲩⲟϫ ·
…
148 ⲡⲣⲣⲟ ⲇⲉ ⲁϥⲙⲟⲩϩ ⲛϭⲱⲛⲧ · ⲡⲉϫⲁϥ ⲛⲁϥ · ϫⲉⲁϫⲓⲥ ⲉⲣⲟⲓ · ϩⲛⲟⲩⲙⲉ ϫⲉⲛⲓⲙ ⲡⲉⲛⲧⲟϥⲧⲁⲗϭⲟⲕ ⲭⲟⲣⲓⲥ ⲙⲁⲅⲓⲁ ·
…
149 ⲁϥⲟⲩⲱϣⲃ ⲛϭⲓⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲥⲁⲉⲓⲛ ⲛⲛⲯⲩⲭⲏ ⲙⲛⲛⲥⲱⲙⲁ · ⲛⲧⲟϥ ⲡⲉ ⲛⲧⲟϥ ⲭⲁⲣⲓⲍⲉ ⲛⲁⲓ ⲙⲡⲧⲁⲗϭⲟ · ⲛⲧϩⲉ ⲛⲧⲟϥϫⲟⲟⲥ ⲫⲁⲣⲙⲁⲅⲟⲥ · ⲙⲛⲛⲣⲉϥⲙⲟⲩⲧⲉ : ⲙⲛⲣⲉϥϣⲙϣⲉ ⲉⲇⲱⲗⲟⲛ · ⲛⲥⲉⲟ ⲛϣⲙⲙⲟ ⲉⲣⲟϥ · ⲁⲩⲱ ϥⲛⲁⲙⲟⲣⲟⲩ · ⲛϩⲉⲛⲙⲣⲣⲉ ⲛⲁⲧⲃⲱⲗ ⲉⲃⲟⲗ · ⲛϥⲡⲁⲣⲁⲇⲓⲇⲟⲩ ⲙⲙⲟⲟⲩ · ⲉⲡⲕⲱϩⲧ ⲛⲧⲉⲅⲉϩⲉⲛⲛⲁ · ⲉⲧⲃⲉϫⲉⲙⲡⲟⲩⲥⲟⲩⲛ ⲛⲡⲛⲟⲩⲧⲉ ⲛⲧⲁϥⲧⲁⲙⲓⲟⲟⲩ ·
…
150 ⲡⲉϫⲉϯⲛⲁⲁⲛϩⲁⲗⲓⲥⲕⲉ ⲙⲡⲉⲕⲥⲱⲙⲁ ϩⲛϩⲉⲛⲃⲁⲥⲁⲛⲟⲥ ⲉⲩⲛⲁϣⲧ · ⲙⲁⲣⲉⲓⲛⲁⲩ ϫⲉⲡⲉⲭⲣⲓⲥⲧⲟⲥ ⲉⲧⲉⲕⲛⲁϩⲧⲉ ⲉⲣⲟϥ ⲛⲁⲧⲁⲗϭⲟⲕ ·
…
151 ⲡⲉϫⲉⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ϫⲉϯⲡⲓⲥⲧⲉⲩⲉ ϫⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ϫⲉⲉⲕϣⲁⲛⲉⲓⲛⲉ ⲛⲟⲩⲙⲏⲏϣⲉ ⲛϯⲙⲱⲣⲓⲁ ⲉϫⲱⲓ · ⲛⲅⲛⲁϣⲧⲣⲧⲱⲣⲧ ⲁⲛ ·
…
152 ⲁϥϫⲟⲟⲥ ⲅⲁⲣ ϫⲉⲙⲡⲣⲣϩⲟⲧⲟⲩ · ⲛⲛⲉⲧⲛⲁⲙⲟⲩⲟⲩⲧ ⲙⲡⲉⲧⲛⲥⲱⲙⲁ · ⲉⲙⲛϭⲟⲙ ⲙⲟⲟⲩ · ⲉⲙⲟⲩⲟⲩⲧ ⲛⲛⲉⲧⲛⲯⲩⲭⲏ ·
…
153 ⲁⲣⲓϩⲟⲧⲉ ⲇⲉ ϩⲏⲧϥ · ⲛⲧⲟϥ ⲙⲡⲧⲉⲧⲛⲟⲩⲛϭⲟⲙ ⲙⲙⲟϥ · ⲉⲧⲁⲕⲟ ⲛⲧⲉⲧⲛⲯⲩⲭⲏ · ⲙⲛⲡⲉⲧⲛⲥⲱⲙⲁ · ϩⲣⲁⲓ ⲧⲅⲉϩⲉⲛⲁ ·
…
154 ⲧⲟⲧⲉ ⲁϥⲕⲉⲗⲉⲩⲉ ⲛϭⲓⲡⲣⲣⲟ · ⲉⲧⲣⲉⲩⲉⲓⲛⲉ ⲛⲟⲩⲡⲉⲛⲓⲡⲉ ⲉϥⲗⲟⲃϣ · ⲛⲥⲉⲕⲁⲁϥ ϩⲁⲛⲉϥⲁⲅⲕⲁⲓⲟⲛ · ⲁⲩⲱ ϩⲉⲛⲗⲁⲙⲡⲁⲥ ⲛⲕⲱϩⲧ ϩⲁⲛⲉϥⲥⲡⲓⲣⲟⲟⲩⲉ · ⲛⲧⲉⲣⲟⲩⲣⲡⲁⲓ ⲇⲉ · ⲉⲡⲙⲁ ⲛⲟⲩⲕⲁⲡⲛⲟⲥ · ⲁⲩⲥϯⲛⲟⲩϥⲉ ϣⲱⲡⲉ · ⲉϥϣⲱϣ ⲉⲃⲟⲗ · ⲉⲟⲩⲟⲛ ⲛⲓⲙ ⲉⲧϩⲙⲡⲙⲁ ⲉⲧⲙⲙⲁⲩ · ⲉⲩⲃⲁⲥⲁⲛⲓⲍⲉ ⲙⲙⲟϥ ⲉⲡⲉⲓϩⲟⲩⲟ · ⲙⲡⲉϥⲁϣⲁϩⲟⲙ · ⲟⲩⲇⲉ ⲙⲡⲉϥⲣⲓⲙⲉ · ⲡⲉϫⲉⲡⲣⲣⲟ ⲛⲁϥ · ϫⲉⲉϥⲧⲱⲛ ⲙⲡⲉⲕⲥⲁⲉⲓⲛ ⲧⲉⲛⲟⲩ · ⲙⲁⲣⲉϥⲉⲓ ⲛϥⲑⲉⲣⲁⲡⲉⲩⲉ ⲙⲙⲟⲕ · ⲕⲁⲓⲅⲁⲣ ⲁⲕϫⲟⲟⲥ · ϫⲉⲟⲩⲛϭⲟⲙ ⲙⲙⲟϥ ⲉⲧⲟⲩⲛⲟⲥⲧⲉⲓ ϣⲁⲛⲙⲟⲩ ·
…
155 ⲡϩⲁⲅⲓⲟⲥ ⲇⲉ ⲙⲉⲣⲕⲟⲩⲣⲓⲟⲥ ⲡⲉϫⲁϥ ⲛⲁϥ · ϫⲉⲁⲣⲓⲡⲉⲧⲉϩⲛⲁⲕ · ⲟⲩⲛⲧⲁⲕ ⲉⲝⲟⲩⲥⲓⲁ ⲅⲁⲣ ⲉϩⲟⲩⲛ ⲉⲡⲁⲥⲱⲙⲁ · ⲧⲁⲯⲩⲭⲏ ⲇⲉ ⲡⲛⲟⲩⲧⲉ ⲡⲉⲧⲟ ⲛϫⲟⲉⲓⲥ ⲉⲣⲟⲥ · ⲡⲁⲥⲱⲙⲁ ⲙⲛⲉⲕϣⲁⲛⲧⲧⲁⲕⲟϥ · ⲧⲁⲯⲩⲭⲏ ⲛⲁⲙⲟⲩⲛⲉ ⲉⲃⲟⲗ ⲉⲥⲟ ⲛⲉⲓⲁⲧⲁⲕⲟ ·
…
156 ⲡⲁⲗⲓⲛ ⲟⲛ ⲁϥⲕⲉⲗⲉⲩⲉ ⲛϭⲓⲡⲣⲣⲟ ⲉⲧⲣⲉⲩⲥⲁϣⲧϥ ⲛⲥⲁϫⲱϥ · ⲁⲩⲱ ⲛⲥⲉⲉⲓⲛⲉ ⲛⲟⲩⲛⲟϭ ⲉⲛⲱⲛⲉ · ⲛⲥⲉⲁϣⲧϥ ⲉⲡⲉϥⲙⲁⲕϩ · ϫⲉⲕⲁⲥ ϩⲙⲡⲧⲣⲉ ϥⲱϭⲧ : ⲛϥⲙⲟⲩ ϩⲛⲟⲩϭⲉⲡⲏ ·
…
157 ⲡⲙⲁⲣⲧⲩⲣⲟⲥ ⲇⲉ · ⲁⲧϭⲟⲙ ⲙⲡⲛⲟⲩⲧⲉ ⲱϩ ⲛϩⲏⲧϥ · ⲙⲛⲧⲭⲁⲣⲓⲥ ⲁϥⲙⲟⲩⲛⲉ ⲉⲃⲟⲗ ⲛⲛⲟⲩⲛⲟϭ ⲛⲁⲩ · ϩⲛϯⲃⲁⲥⲁⲛⲟⲥ ⲧⲁⲓ ·
…
158 ⲇⲉⲕⲓⲟⲥ ⲇⲉ ⲡⲣⲣⲟ · ⲛⲧⲉⲣⲉϥⲛⲁⲩ ⲉⲡⲙⲁⲣⲧⲩⲣⲟⲥ · ϫⲉⲉϥϥⲓ ϩⲁⲛϯⲙⲱⲣⲓⲁ · ϩⲛⲟⲩⲙⲛⲧϫⲱⲱⲣⲉ · ⲁⲩⲱ ⲙⲡⲉⲗⲁⲁⲩ ⲛⲃⲁⲥⲁⲛⲟⲥ ⲧⲁϩⲟϥ · ⲁϥⲕⲉⲗⲉⲩⲉ ⲉⲧⲣⲉⲩϥⲓⲡⲱⲛⲉ ⲙⲙⲁⲩ · ϩⲓⲡⲉϥⲙⲁⲕϩ · ⲛⲥⲉⲉⲓⲛⲉ ⲛⲟⲩⲙⲁⲥⲧⲓⲅⲝ ⲛⲕⲱⲃϩ · ⲉⲥⲟ ⲛϥⲧⲟⲟⲩ ⲛϣⲗⲟⲡ · ⲛⲥⲉϩⲓⲟⲩⲉ ⲉⲣⲟϥ · ϣⲁⲛⲧⲉⲡⲕⲁϩ ϩⲱⲣⲡϩⲁⲡⲉϥⲥⲛⲟϥ ·
…
159 ⲡⲉⲅⲉⲛⲛⲁⲓⲟⲥ ⲇⲉ ⲁϥⲧⲱⲟⲩⲛ ϩⲁϯⲕⲉⲃⲁⲥⲁⲛⲟⲥ · ⲛⲧϩⲉ ⲛⲟⲩⲱⲛⲉ ⲛⲁⲇⲁⲙⲁⲥ · ϩⲛⲧⲉϥⲙⲛⲧϫⲱⲱⲣⲉ ·
…
160 ⲁⲩⲱ ⲡⲉϫⲁϥ · ϫⲉϯⲉⲩⲭⲁⲣⲓⲥⲧⲟⲩ ⲛⲁⲕ · ⲡⲁϫⲟⲉⲓⲥ · ϫⲉⲁⲕⲁⲁⲧ ⲛⲙⲡϣⲁ ⲛϣⲡϩⲓⲥⲉ ⲉϫⲙⲡⲉⲕⲣⲁⲛ ⲉⲧⲟⲩⲁⲁⲃ ·
…
161 ⲡⲣⲣⲟ ⲇⲉ ⲛⲧⲉⲣⲉϥⲛⲁⲩ ⲇⲉ · ϫⲉⲟⲩⲁⲧ ⲡⲱⲛⲉ ⲡⲉ ⲡⲉϥⲗⲟⲅⲓⲥⲙⲟⲥ · ⲁⲩⲱ ϫⲉⲛⲉϥϥⲁϣⲡⲉⲓⲑⲉ ⲙⲙⲟϥ ⲁⲛ · ⲉⲧⲣⲉϥⲑⲩⲥⲓⲁⲍⲉ · ⲁϥϫⲓϣⲟϫⲛⲉ · ⲛⲉϥϭⲉⲡⲏ ⲅⲁⲣ ⲉⲃⲱⲕ ⲉϩⲣⲱⲙⲏ · ⲁϥϯⲁⲡⲟⲫⲁⲥⲓⲥ ⲉⲣⲟϥ · ⲉⲧⲣⲉⲩϯⲙⲱⲣⲓⲁ ⲙⲙⲟϥ · ϩⲛⲧⲥⲏϥⲉ ⲉϥϫⲱ ⲙⲙⲟⲥ · ϫⲉⲙⲉⲣⲕⲟⲩⲣⲓⲟⲥ ⲡⲉⲛⲧⲟϥϣⲱⲡⲉ ⲉϥⲥⲱϣ ⲛⲛⲛⲟⲩⲧⲉ · ⲁⲩⲱ ⲁϥⲕⲁⲧⲁⲫⲣⲟⲛⲉⲓ ⲛⲛⲇⲟⲅⲙⲁ ⲉⲧⲟⲩⲁⲁⲃ · ⲛⲧⲉⲧⲛⲙⲛⲧⲣⲙⲣⲁϣ · ⲁϥⲟⲡϥ ⲉⲩⲗⲁⲁⲩ ⲡⲉⲛⲅⲣⲁⲧⲟⲥ · ϯⲕⲉⲗⲉⲩⲉ ⲉⲧⲣⲉⲩϫⲓⲧϥ ⲉⲧⲡⲟⲗⲓⲥ ⲛⲧⲕⲁⲡⲡⲁⲇⲟⲕⲓⲁ · ⲛⲥⲉϥⲓ ⲛⲧⲉϥⲁⲡⲉ ϩⲙⲡⲙⲁ ⲉⲧⲙⲙⲁⲩ · ⲉⲣⲉⲟⲩⲟⲛ ⲛⲓⲙ ⲛⲁⲩ ⲉⲣⲟϥ ·
…
162 ⲟⲩⲟⲛ ⲅⲁⲣ ⲛⲓⲙ · ⲛⲧⲁⲩϫⲓⲉⲟⲟⲩ ⲉⲃⲟⲗ ϩⲓⲧⲙⲡⲣⲣⲟ · ⲉⲩϣⲁⲛⲁⲛⲧⲓⲗⲉⲅⲉ ⲙⲡⲉϥⲟⲩⲉϩⲥⲁϩⲛⲉ ⲥⲉⲛⲁϯ ⲛⲁϥ · ⲛϩⲉⲛⲥⲏϣⲉ · ⲡϩⲁⲉ ⲇⲉ ⲛⲥⲉⲛⲁⲡⲁⲣⲁⲇⲓⲇⲟⲩ ⲙⲙⲟϥ · ⲉⲧⲟⲟⲧϥ ⲛⲧⲥⲏϥⲉ ·
…
163 ⲛⲛⲧⲁⲩⲧⲁϣⲟⲩ ⲇⲉ ⲉⲧⲣⲉⲩϥⲓⲧϥ · ⲁⲩϥⲓ ϩⲁⲣⲟϥ ⲁⲩⲧⲁⲗⲟϥ ⲉⲩⲧⲃⲛⲏ · ⲁⲩⲙⲟⲣϥ ⲉϩⲣⲁⲓ ⲉϫⲱϥ · ϫⲉⲛⲉⲓ ⲁⲡⲥⲱⲙⲁ ⲙⲡⲙⲁⲣⲧⲩⲣⲟⲥ · ⲃⲱⲗ ⲉⲃⲟⲗ ⲛⲥⲁⲥⲁ ⲛⲓⲙ · ⲁϥⲣⲕⲱⲱⲥ ·
…
164 ⲁⲩⲙⲟⲟϣⲉ ⲇⲉ ϩⲛⲧⲉϩⲓⲏ ⲉⲥⲟⲩⲏⲩ · ⲁⲩⲱ ϩⲓⲧⲛⲕⲟⲩⲓ ⲛϩⲟⲟⲩ · ⲁⲩⲡⲱϩ ⲉⲧⲡⲟⲗⲓⲥ ⲕⲁⲓⲥⲁⲣⲓⲁ · ⲁⲩⲱ ⲛⲧⲉⲓϩⲉ ⲁⲩⲟⲩⲁϩϥ ⲉⲡⲉⲥⲏⲧ ⲕⲟⲩⲓ ⲕⲟⲩⲓ ·
…
165 ⲡϫⲟⲉⲓⲥ ⲇⲉ ⲁϥⲁϩⲉⲣⲁⲧϥ ϩⲓϫⲱϥ · ⲡⲉϫⲁϥ ⲛⲁϥ · ϫⲉⲙⲉⲣⲕⲟⲩⲣⲓⲟⲥ · ⲁⲙⲟⲩ ⲛⲅⲙⲧⲟⲛ ⲙⲙⲟⲕ ϩⲁϩⲧⲏⲓ · ⲉⲡⲉⲓⲇⲏ ⲁⲕϫⲉⲕⲡⲉⲕⲇⲣⲟⲙⲟⲥ ⲉⲃⲟⲗ · ⲁⲕϩⲁⲣⲉϩ ⲉⲧⲡⲓⲥⲧⲓⲥ · ϫⲓ ⲛⲁⲕ ⲙⲡⲉⲕⲗⲟⲙ ⲛⲧⲙⲛⲧϣⲟⲉⲓϫ · ⲡⲉⲛⲧⲁⲩⲧⲟϣϥ ⲛⲁⲕ · ⲉⲕⲗⲏⲣⲟⲛⲟⲙⲉⲓ ⲙⲙⲟϥ ·
…
166 ⲡⲙⲁⲣⲧⲩⲣⲟⲥ ⲇⲉ ⲛⲧⲉⲣⲉⲡϫⲟⲉⲓⲥ ⲟⲩⲱⲛϩ ⲉⲣⲟϥ ⲁϥϭⲙϭⲟⲙ · ⲡⲉϫⲁϥ ⲛⲉⲧⲧⲟ ⲉⲣⲟϥ · ϫⲉⲁⲣⲓⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲏⲧⲛ · ϩⲛⲟⲩϭⲉⲡⲏ · ⲉⲣⲉⲡϫⲟⲉⲓⲥ ⲇⲉ ⲧⲱϩⲙ ⲛⲟⲩⲟⲛ ⲛⲓⲙ ⲉϩⲟⲩⲛ · ⲉⲧⲙⲉⲧⲁⲛⲟⲓⲁ · ⲉϥⲉⲣⲧⲏⲩⲧⲛ ⲛⲙⲡϣⲁ ⲛⲧⲉϥⲭⲁⲣⲓⲥ ·
…
167 ⲟⲩⲣⲙⲙⲁⲟ ⲅⲁⲣ ⲡⲉ ϣⲁϥⲭⲁⲣⲓⲍⲉ · ⲛⲛⲉⲧⲛⲁϯⲡⲉⲩⲟⲩⲟⲓ ⲉⲣⲟϥ ϩⲛⲟⲩⲇⲱⲣⲓⲁ · ⲁϫⲛⲫⲑⲟⲛⲟⲥ ·
…
168 ⲛⲧⲉⲣⲉϥϫⲓ ⲛⲁⲓ · ⲇⲉ ⲁⲩϥⲓ ⲛⲧⲉϥⲁⲡⲉ · ⲁϥϫⲱⲕ ⲉⲃⲟⲗ ⲛⲧϩⲟⲙⲟⲗⲟⲅⲓⲁ ⲉⲧⲛⲁⲛⲟⲩⲥ · ⲙⲡⲉⲛⲥⲱⲧⲏⲣ ⲛⲥⲟⲩ ϫⲟⲩⲧⲏ ⲛⲛⲟⲉⲃⲣⲓⲟⲥ · ⲉⲧⲉⲁⲑⲱⲣ ⲡⲉ ·
…
169 ⲁⲩⲛⲟϭ ⲛϣⲡⲏⲣⲉ ϣⲱⲡⲉ · ⲉⲥⲙⲡϣⲁ ⲛⲣⲡⲉⲥⲙⲉⲉⲩⲉ · ⲙⲛⲛⲥⲁⲧⲣⲉⲡⲙⲁⲣⲧⲩⲣⲟⲥ ϫⲱⲕ ⲉⲃⲟⲗ · ⲁⲡⲉϥⲥⲱⲙⲁ ⲟⲩⲃⲁϣ ⲛⲧϩⲉ ⲛⲟⲩⲭⲓⲱⲛ · ⲉϥϣⲉϣⲥϯⲛⲟⲩϥⲉ ⲉⲃⲟⲗ · ⲛⲧϩⲉ ⲛⲟⲩϣⲟⲩϩⲏⲛⲉ ⲉϥⲥⲟⲧⲡ · ⲉⲧⲃⲉⲡⲉⲓⲙⲁⲉⲓⲛ ϭⲉ · ⲁϩⲁϩ ⲛⲣⲱⲙⲉ ϣⲱⲡⲉ ⲛⲭⲣⲓⲥⲧⲓⲁⲛⲟⲥ ·
…
170 ⲡⲡⲉⲧⲟⲩⲁⲁⲃ ⲇⲉ · ⲁⲩⲟⲩⲁϩϥ ϩⲛⲧⲟⲡⲟⲥ · ⲉϥⲟⲩⲱⲛϩ ⲉⲃⲟⲗ ⲡⲙⲁ ⲉⲧⲉⲣⲉⲟⲩⲙⲏⲏϣⲉ ⲛϭⲟⲙ ϩⲓⲧⲁⲗϭⲟ ϣⲱⲡⲉ ⲙⲙⲁⲩ ·
…
171 ⲟⲩⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ · ⲙⲛⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ · ⲉⲓⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ · ϣⲁⲛⲁⲓⲱⲛ ⲧⲏⲣⲟⲩ ⲛⲁⲓⲱⲛ ϩⲁⲙⲏⲛ ⲻ:::ⲻ:::
…