1 ⲙⲛⲛⲥⲱⲥ · ⲁⲛⲙⲟⲟϣⲉ ⲉⲃⲟⲗ ϩⲙⲡⲙⲁ · ⲉⲧⲙⲙⲁⲩ · ⲁⲛⲉⲓ ⲉⲡⲧⲟⲟⲩ ⲛⲁⲡⲁ ⲡⲁⲙⲓⲛ · ⲁⲛϣⲱⲡⲉ ⲛϩⲏⲧϥ ⲛϩⲉⲛⲕⲟⲩⲓ ⲛϩⲟⲟⲩ ·
…
2 ⲛⲉⲥⲛⲏⲩ ⲇⲉ · ⲁⲩⲥⲱⲟⲩϩ ⲉⲣⲟⲛ · ⲁⲩⲁϣⲁⲓ ⲉⲙⲁⲧⲉ ·
…
3 ⲙⲛⲛⲥⲱⲥ ⲁⲡⲥⲱⲧⲏⲣ · ⲟⲩⲱⲛϩ ⲉⲃⲟⲗ · ⲙⲡⲉⲛⲉⲓⲱⲧ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉⲧⲉⲓⲣⲏⲛⲏ ⲛⲁⲕ · ⲱ ⲡⲁϣⲃⲏⲣ ⲙⲉⲗⲟⲥ · ⲉⲧⲧⲁⲓⲏⲩ · ⲡⲙⲉⲣⲓⲧ ⲙⲡⲁⲉⲓⲱⲧ ⲉⲓⲥϩⲏⲏⲧⲉ ⲁⲡⲉⲟⲩⲟⲉⲓϣ · ϣⲱⲡⲉ · ⲉⲧⲣⲉⲕⲟⲩⲱⲛϩ ⲉⲃⲟⲗ ⲙⲡⲁⲉⲟⲟⲩ ⲛⲧⲉⲡⲁⲣⲁⲛ · ϫⲓⲉⲟⲟⲩ ⲉⲃⲟⲗ · ϩⲓⲧⲟⲟⲧⲕ ϩⲓϫⲙⲡⲕⲁϩ ·
…
4 ⲧⲱⲟⲩⲛ ϭⲉ ⲛⲅⲃⲱⲕ ⲉⲡⲧⲟⲟⲩ ⲛϯⲧⲕⲟⲟϩ · ⲛⲅϣⲱⲡⲉ · ϩⲙⲡⲙⲁ ⲉⲧⲙⲙⲁⲩ
…
5 ⲛⲧⲟϥ ⲅⲁⲣ ⲡⲉⲛⲧⲁⲡⲁⲉⲓⲱⲧ ⲧⲁⲁϥ ⲛⲁⲕ · ⲛⲕⲗⲏⲣⲟⲛⲟⲙⲓⲁ ⲉⲧⲃⲉⲡⲁⲓ ⲁⲓⲕⲱ ⲛϩⲏⲧϥ ⲛⲛⲕⲉⲉⲥ ⲙⲡⲉⲕϣⲃⲏⲣ ⲙⲉⲗⲟⲥ · ⲁⲡⲁ ⲫⲓϥ ϫⲉⲕⲁⲥ ⲉⲕⲉϣⲱⲡⲉ ϩⲱⲱⲕ ϩⲙⲡⲙⲁ ⲉⲧⲙⲙⲁⲩ ·
…
6 ⲁϥⲟⲩⲱϣⲃ ⲡⲉϫⲁϥ ⲙⲡⲥⲱⲧⲏⲣ ϫⲉ · ⲁⲛⲁⲩ ⲉⲩⲣⲱⲙⲉ ⲉⲟⲩⲛϭⲟⲙ ⲙⲙⲟϥ ⲉϥⲓ ⲡⲣⲟⲟⲩϣ ⲛϯⲟⲓⲕⲟⲛⲟⲙⲓⲁ ⲛϯⲙⲓⲛⲉ ·
…
7 ⲁⲛⲟⲕ ⲅⲁⲣ ⲁⲛⲅⲟⲩⲣⲱⲙⲉ ⲉϥⲧⲥⲧⲏⲩ ⲉⲃⲟⲗ ϩⲛⲛⲁϩⲃⲏⲩⲉ ⲧⲏⲣⲟⲩ ·
…
8 ϯⲥⲟⲡⲥⲡ ⲙⲙⲟⲕ ⲡⲁϫⲟⲉⲓⲥ ⲉϣⲱⲡⲉ ⲁⲓϭⲛⲭⲁⲣⲓⲥ ⲛⲛⲁϩⲣⲁⲕ ⲙⲡⲣϫⲟⲟⲩⲧ ⲉⲡⲉⲓϩⲱⲃ ·
…
9 ⲁϥⲟⲩⲱϣⲃ ⲛϭⲓⲡⲥⲱⲧⲏⲣ ⲡⲉϫⲁϥ ⲛⲁϥ ϫⲉ · ⲱ ⲡⲁⲥⲱⲧⲡ ⲁⲡⲟⲗⲗⲱ , ⲡⲉⲓϩⲱⲃ ⲡⲁⲓ ⲁⲡⲁⲉⲓⲱⲧ ⲧⲟϣϥ ⲛⲁⲕ ϫⲓⲛⲛϣⲟⲣⲡ ⲉⲧⲣⲉϥⲕⲱ ⲙⲡⲉⲕⲣⲁⲛ ϩⲙⲡⲙⲁ ⲉⲧⲙⲙⲁⲩ ·
…
10 ⲛⲧⲉⲣⲓⲉⲓ ⲇⲉ ⲉⲡⲉⲥⲏⲧ ⲉⲡⲉⲓⲕⲟⲥⲙⲟⲛ ⲉⲃⲟⲗ ϩⲓⲧⲙⲡⲁⲉⲓⲱⲧ ⲁϥϣⲁϫⲉ ⲛⲙⲙⲁⲓ ϩⲛⲟⲩⲙⲛⲧϣⲁⲛϩⲧⲏϥ ϫⲉ · ⲡⲁϣⲏⲣⲉ ,
…
11 ⲙⲡⲣⲗⲩⲡⲏ ϫⲉⲉⲕⲛⲁⲃⲱⲕ ⲉⲡⲉⲥⲏⲧ ⲉⲡⲕⲟⲥⲙⲟⲥ ⲉⲧⲙⲏϩ ⲛϩⲓⲥⲉ ϩⲓⲁϣⲁϩⲟⲙ · ⲉⲧⲃⲉⲡϩⲓⲥⲉ ⲙⲡⲉⲕⲥⲕⲩⲗⲙⲟⲥ ⲱ ⲡⲁϣⲏⲣⲉ ⲡⲉϩⲟⲟⲩ ⲉⲧⲟⲩⲛⲁϫⲡⲟⲕ ⲛϩⲏⲧϥ ⲉⲃⲟⲗ ϩⲛⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ ⲙⲁⲣⲓⲁ ϯⲛⲁⲕⲁⲁϥ ⲛⲉⲗⲉⲩⲑⲉⲣⲓⲁ ⲛⲕⲁⲛⲟⲃⲉ ⲉⲃⲟⲗ ⲙⲡⲕⲟⲥⲙⲟⲥ · ⲟⲩⲟⲛ ⲛⲓⲙ ⲉⲧⲛⲁⲡⲓⲥⲧⲉⲩⲉ ⲉⲡⲉⲕⲥⲧⲁⲩⲣⲟⲥ ⲙⲛⲧⲁⲛⲁⲥⲧⲁⲥⲓⲥ ⲛⲧⲉⲕⲥⲁⲣⲝ ϯⲛⲁⲡⲱϩ ⲛⲧⲁⲭⲁⲣⲓⲍⲉ ⲙⲙⲟⲟⲩ ⲛⲁⲕ ⲱ ⲡⲁⲙⲉⲣⲓⲧ ⲛϣⲏⲣⲉ · ⲁⲩⲱ ⲡⲉϩⲟⲟⲩ ⲛⲧⲉⲕⲁⲛⲁⲥⲧⲁⲥⲓⲥ ⲉⲧϩⲁⲉⲟⲟⲩ ϯⲛⲁⲕⲁⲁϥ ⲉϥⲟ ⲛⲉⲗⲉⲩⲑⲉⲣⲓⲁ · ⲛⲟⲩϫⲁⲓ ⲁⲩⲱ ⲛⲕⲁⲛⲟⲃⲉ ⲉⲃⲟⲗ ⲙⲡⲕⲟⲥⲙⲟⲥ ⲧⲏⲣϥⲁⲩⲱ ϯⲛⲁⲟⲩⲱⲛϩ ⲉⲃⲟⲗ ⲛⲟⲩⲧⲟⲡⲟⲥ ⲉϥⲟⲩⲁⲁⲃ ϩⲓϫⲙⲡⲕⲁϩ ϩⲛⲧϩⲁⲏ ⲛⲛⲉⲟⲩⲟⲉⲓϣ ⲛⲧⲁⲕⲱ ⲛϩⲏⲧϥ ⲛⲟⲩⲙⲉⲧⲁⲛⲟⲓⲁ ⲛⲟⲩϫⲁⲓ ⲙⲛⲟⲩϣⲁ ⲛⲛⲁⲡⲉⲧⲟⲩⲁⲁⲃ ϩⲙⲡⲕⲟⲥⲙⲟⲥ ⲧⲏⲣϥ ⲙⲛⲟⲩⲕⲁⲛⲟⲃⲉ ⲉⲃⲟⲗ ⲛⲟⲩⲟⲛ ⲛⲓⲙ ⲉⲧⲛⲁⲡⲓⲥⲧⲉⲩⲉ ⲉⲡⲉⲕⲣⲁⲛ ·
…
12 ⲧⲇⲱⲣⲉⲁ ϭⲉ ⲛⲧⲁⲡⲁⲉⲓⲱⲧ ⲧⲁⲁⲥ ⲛⲁⲓ ⲁⲛⲟⲕ ϩⲱ ϯϯ ⲙⲙⲟⲥ ⲛⲁⲕ ⲁⲩⲱ ⲟⲛ ϯⲛⲁⲕⲁⲁⲥ ϩⲙⲡⲙⲁ ⲉⲧⲙⲙⲁⲩ ⲛⲥⲉⲧⲁⲟⲩⲉ ⲡⲣⲁⲛ ⲙⲡⲉⲕϣⲃⲏⲣ ⲙⲉⲗⲟⲥ ⲉⲧⲟⲩⲁⲁⲃ ⲁⲡⲁ ⲫⲓϥ ⲉϩⲣⲁⲓ ⲉϫⲱϥ · ⲙⲡⲣⲣϩⲟⲧⲉ , ϯϣⲟⲟⲡ ⲛⲙⲙⲁⲕ ϩⲙⲙⲁ ⲛⲓⲙ ϯⲛⲁϯ ⲛⲁⲕ ⲛⲟⲩⲛⲟϭ ⲛⲣⲁⲛ ⲛⲥⲟⲉⲓⲧ ⲛⲥⲉⲥⲱⲧⲙ ⲛϭⲓⲛⲗⲁⲟⲥ ⲧⲏⲣⲟⲩ ⲛⲥⲉⲉⲓ ⲛⲇⲱⲣⲟⲛ ⲉⲣⲁⲧϥ ⲙⲡⲉⲕⲧⲟⲡⲟⲥ ⲛⲥⲉⲟⲩⲱϣⲧ ⲙⲡⲉⲕⲙⲁ ⲉⲧⲟⲩⲁⲁⲃ · ⲛⲗⲁⲟⲥ ⲧⲏⲣⲟⲩ ⲛⲁⲙⲟⲟϣⲉⲛⲥⲉϫⲟⲟⲥ ϫⲉ · ⲁⲙⲏⲓⲧⲛ ⲙⲁⲣⲟⲛ ⲉϩⲣⲁⲓ ⲉϫⲙⲡⲧⲟⲟⲩ ⲙⲡϫⲟⲉⲓⲥ ⲁⲩⲱ ⲉϩⲣⲁⲓ ⲉⲡⲏⲓ ⲙⲡⲛⲟⲩⲧⲉ ⲛⲓⲁⲕⲱⲃ ⲛϥϫⲱ ⲛⲁⲛ ⲛⲧⲉϥϩⲓⲏ ⲛⲧⲛⲙⲟⲟϣⲉ ⲛϩⲏⲧⲥ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛϭⲓⲏⲥⲁⲓⲁⲥ ⲡⲉⲡⲣⲟⲫⲏⲧⲏⲥ · ϥⲥⲏϩ ⲇⲉ ⲟⲛ ϫⲉ · ⲟⲩⲛⲟⲩⲑⲩⲥⲓⲁⲥⲧⲏⲣⲓⲟⲛ ⲛⲁϣⲱⲡⲉ ⲙⲡϫⲟⲉⲓⲥ ϩⲛⲧⲉⲭⲱⲣⲁ ⲛⲕⲏⲙⲉ ⲁⲩⲱ ⲟⲩⲥⲧⲩⲗⲏ ϩⲁϩⲧⲛⲛⲉⲥⲧⲟϣ ⲙⲡϫⲟⲉⲓⲥ ·
…
13 ⲡⲧⲟⲡⲟⲥ ϭⲉ ⲛⲧⲁⲓⲭⲁⲣⲓⲍⲉ ⲙⲙⲟϥ ⲛⲁⲕ ⲡⲉ ⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲧⲉⲥⲧⲩⲗⲏ ⲡⲉ ⲡⲥⲱⲙⲁ ⲙⲡⲁϩⲙϩⲁⲗ ⲁⲛⲟⲩⲡ · ⲉⲓⲥ ϩⲏⲏⲧⲉ ⲁⲓⲧⲁⲙⲟⲕ ⲉⲛⲉⲧⲛⲁϣⲱⲡⲉ ⲧⲏⲣⲟⲩ ⲙⲙⲟⲕ ϩⲙⲡϣⲟϫⲛⲉ ⲧⲏⲣϥ ⲙⲡⲁⲉⲓⲱⲧ · ϣⲱⲡⲉ ⲉⲕⲧⲁϫⲣⲏⲩ ⲛⲧⲟⲕ ⲉϫⲛⲛⲉⲛⲧⲁⲓϫⲟⲟⲩ ⲛⲁⲕ ⲛⲅⲧⲙⲣϩⲏⲧ ⲥⲛⲁⲩ ·
…
14 ϯⲛⲁⲧⲣⲉ ϩⲉⲛⲛⲟϭ ⲛⲥⲙⲟⲩ ϣⲱⲡⲉ ϩⲙⲡⲉⲕⲧⲟⲡⲟⲥ ⲕⲁⲧⲁⲥⲙⲟⲧ ⲛⲓⲙ ⲁⲩⲱ ϯⲛⲁⲧⲣⲉⲩⲙⲟⲩⲧⲉ ⲉⲛⲉⲕϣⲏⲣⲉ ϫⲉⲛϥⲁⲓⲗⲁⲙⲡⲁⲥ ⲙⲡⲉⲭⲣⲓⲥⲧⲟⲥ · ⲟⲩⲟⲛ ⲛⲓⲙ ⲉⲧⲛⲁϩⲁⲣⲉϩ ⲉⲛⲉⲕⲉⲛⲧⲟⲗⲏ ϯⲛⲁⲭⲁⲣⲓⲍⲉ ⲙⲙⲟⲟⲩ ⲛⲁⲕ ⲛϣⲏⲣⲉ ϩⲛⲧⲁⲙⲛⲧⲣⲣⲟ · ⲟⲩⲟⲛ ⲛⲓⲙ ⲉⲧⲛⲁϭⲱ ⲉⲩⲙⲏⲛ ⲉⲃⲟⲗ ϩⲛⲧϭⲓⲛⲣϩⲱⲃ ⲙⲛⲧⲉⲕϭⲓⲛϣⲙϣⲉ ⲥⲉⲛⲁϣⲱⲡⲉ ⲛⲁⲕ ⲛϣⲏⲣⲉ ϩⲙⲡⲏⲓ ⲙⲡⲁⲉⲓⲱⲧ ·
…
15 ⲛⲧⲉⲩⲛⲟⲩ ⲇⲉ ⲁⲡⲁⲉⲓⲱⲧ ⲙⲟⲩⲧⲉ ⲉⲣⲟⲓ ⲁϥϫⲱ ⲉⲣⲟⲓ ⲛϣⲁϫⲉ ⲛⲓⲙ ⲛⲧⲁⲡⲥⲱⲧⲏⲣ ϫⲟⲟⲩ ⲛⲁϥ ·
…
16 ⲛⲧⲉⲣⲓⲥⲱⲧⲙ ⲇⲉ ⲉⲣⲟⲟⲩ ⲁⲓⲣϣⲡⲏⲣⲉ ⲉⲙⲁⲧⲉ ⲁⲩⲱ ⲡⲉϫⲁⲓ ⲛⲁϥ ϫⲉ · ⲡⲁⲉⲓⲱⲧ ⲉϣϫⲉ ⲧⲁⲓ ⲧⲉ ⲧϩⲉ ⲉⲧⲣⲁⲛⲁϥ ⲙⲡϫⲟⲉⲓⲥ ⲙⲁⲣⲛⲉⲓⲣⲉ ϩⲓⲛⲁⲓ · ⲙⲁⲣⲛⲟⲩⲁϩⲛ ⲛⲥⲁⲡϫⲟⲉⲓⲥ ⲛⲧⲛϩⲁⲣⲉϩ ⲉⲛϥⲉⲛⲧⲟⲗⲏ · ⲛⲁⲛⲟⲩⲛϭⲓⲛⲣϩⲱⲃ ⲧⲏⲣⲟⲩ ⲙⲡϫⲟⲉⲓⲥ ⲁⲩⲱ ⲥⲉⲧⲁⲓⲏⲩ ⲉⲩⲥⲟⲧⲡ ⲉⲙⲁⲧⲉ ⲁⲩⲱ ⲥⲉⲃⲏⲕ ⲉϩⲟⲩⲛ ⲉⲡⲏⲓ ⲙⲡϫⲟⲉⲓⲥ ϩⲓⲟⲩⲥⲟⲡ ·
…
17 ⲧϩⲉ ⲅⲁⲣ ⲛⲧⲁϥⲧⲟϣⲥ ⲉⲣⲟⲛ ⲧⲛⲛⲁⲉⲓⲣⲉ ⲕⲁⲧⲁⲡⲉϥⲟⲩⲱϣ ·
…
18 ⲙⲛⲛⲥⲁⲛⲁⲓ ⲇⲉ ⲧⲏⲣⲟⲩ ⲁⲛⲧⲱⲟⲩⲛ ⲁⲛⲙⲟⲟϣⲉ ⲉⲃⲟⲗ ⲉⲧⲣⲉⲛⲉⲓ ⲉⲡⲧⲟⲟⲩ ⲛⲧⲉⲧⲕⲟⲟϩ , ⲡⲧⲟⲟⲩ ⲛⲧⲁⲡⲛⲟⲩⲧⲉ ϩⲱⲛ ⲙⲙⲟϥ ⲛⲁⲛ , ⲡⲉⲛⲧⲁϥⲥⲃⲧⲱⲧϥ ⲙⲡⲁⲉⲓⲱⲧ ⲁⲡⲟⲗⲗⲱ , ⲁⲩⲱ ⲁⲛⲉⲓ ⲉϩⲣⲁⲓ ⲉⲩⲧⲟⲟⲩ ⲉϥⲙⲡϩⲱⲧ ⲉⲃⲟⲗ ⲛⲟⲩϯⲙⲉ ϫⲉⲧⲁⲡⲁⲣⲟⲟⲩⲉ · ⲁⲛϭⲟⲓⲗⲉ ⲉϩⲉⲛⲥⲛⲏⲩ ⲛⲣⲉϥϣⲙϣⲉⲛⲟⲩⲧⲉ ⲁⲩⲉⲓⲣⲉ ⲛⲙⲙⲁⲛ ⲛϩⲉⲛⲛⲟϭⲙⲡⲉⲧⲛⲁⲛⲟⲩϥ ⲁⲛⲛⲕⲟⲧⲕ ϩⲙⲡⲙⲁ ⲉⲧⲙⲙⲁⲩ ϣⲁϩⲧⲟⲟⲩⲉ ·
…
19 ⲛⲧⲉⲣⲉϩⲧⲟⲟⲩⲉ ⲇⲉ ϣⲱⲡⲉ ⲁⲛⲉⲓ ⲉϩⲏⲧ ⲉⲧⲉⲧⲕⲟⲟϩ ·
…
20 ⲛⲉⲥⲛⲏⲩ ⲇⲉ ⲉⲧⲛϩⲏⲧϥ ⲛⲧⲉⲣⲟⲩⲥⲱⲧⲙ ϫⲉⲁⲛⲉⲓ ⲁⲩⲉⲓ ⲉⲃⲟⲗ ϩⲁⲧⲉⲛϩⲉ ϩⲛⲟⲩⲛⲟϭ ⲛⲣⲁϣⲉ ⲁⲩϣⲟⲡⲛ ⲉⲡϩⲟⲟⲩ ·
…
21 ⲁⲛⲟⲛ ⲇⲉ ϩⲱⲱⲛ ⲁⲛϫⲱ ⲉⲣⲟⲟⲩ ⲙⲡⲙⲩⲥⲧⲏⲣⲓⲟⲛ ⲛⲧⲁⲛⲛⲁⲩ ⲉⲣⲟϥ ·
…
22 ⲛⲧⲟⲟⲩ ⲇⲉ ⲁⲩϣⲱⲡⲉ ⲉⲩⲣϣⲡⲏⲣⲉ ⲡⲉϫⲁⲩ ⲛⲁⲛ ϫⲉ · ⲁⲥϣⲱⲡⲉ ⲙⲙⲟⲛ ϩⲱⲱⲛ ⲉⲛⲛⲕⲟⲧⲕ ⲛⲧⲉⲩϣⲏ ⲁⲛⲥⲱⲧⲙ ⲉⲡⲉϩⲣⲟⲟⲩ ⲛⲟⲩⲥⲁⲗⲡⲓⲅⲝ ⲉⲥⲱϣ ⲉⲃⲟⲗ ⲉⲥϫⲱ ⲙⲙⲟⲥ ⲛⲧⲉⲓϩⲉ ϩⲛⲟⲩⲛⲟϭ ⲛⲥⲙⲏ ϣⲁϣⲟⲙⲛⲧ ⲛⲥⲟⲡ ϫⲉ ·
…
23 ⲉⲓⲥϩⲏⲏⲧⲉ ⲁϥⲉⲓ ⲛϭⲓⲡϣⲱⲥ ⲉⲧⲛⲁⲛⲟⲩϥ ⲡⲉⲛⲧⲁϥⲙⲟⲟⲛⲉ ⲛⲛⲉϥⲉⲥⲟⲟⲩ ϩⲛⲙⲙⲁ ⲙⲙⲟⲟⲛⲉ ⲙⲡⲱⲛϩ ·
…
24 ⲙⲛⲛⲥⲱⲥ ⲁϥⲉⲓ ⲛϭⲓⲟⲩⲭⲟⲣⲟⲥ ⲛⲁⲅⲅⲉⲗⲟⲥ ⲁⲩⲣⲧⲉⲩϣⲏ ⲧⲏⲣⲥ ⲉⲩϩⲩⲙⲛⲉⲩⲉ ⲁⲩⲱ ⲉⲩⲭⲟⲣⲉⲩⲉ ϩⲓϫⲙⲡⲥⲱⲙⲁ ⲙⲡⲙⲁⲕⲁⲣⲓⲟⲥ ⲁⲡⲁ ⲫⲓϥ ⲉⲩϫⲱ ⲙⲡϩⲩⲙⲛⲟⲥ ⲉⲣⲉⲛⲁⲅⲅⲉⲗⲟⲥ ⲟⲩⲱϩⲙ ⲛⲥⲱⲟⲩ ϫⲉ · ⲉⲣⲉⲡⲉⲓⲧⲟⲟⲩ ⲛⲏⲩ ⲛⲣⲁϣⲉ ⲁⲩⲱ ⲛϥϫⲓⲉⲟⲟⲩ · ⲡⲁⲓ ⲡⲉ ⲡⲧⲟⲟⲩ ⲙⲡϫⲟⲉⲓⲥ ⲡⲧⲟⲟⲩ ⲉⲧϫⲟⲥⲉ ⲡⲧⲟⲟⲩ ⲉⲧⲧⲏⲕ ⲡⲧⲟⲟⲩ ⲉⲧⲕⲓⲱⲟⲩ · ⲡⲧⲟⲟⲩ ⲡⲉ ⲡⲁⲓ ⲛⲧⲁⲡⲛⲟⲩⲧⲉ ⲟⲩⲉϣ ⲟⲩⲱϩ ⲛϩⲏⲧϥ ϣⲁⲃⲟⲗ · ⲡⲁⲓ ⲡⲉ ⲡⲏⲓ ⲙⲡⲛⲟⲩⲧⲉ ⲡⲙⲁ ⲛϣⲱⲡⲉ ⲛⲛⲇⲓⲕⲁⲓⲟⲥ ·
…
25 ⲛⲧⲉⲣⲛⲥⲱⲧⲙ ⲇⲉ ⲉⲛⲁⲓ ⲁⲛⲣϩⲟⲧⲉ ϩⲛⲟⲩⲛⲟϭ ⲛϩⲟⲧⲉ ⲁⲩⲱ ⲁⲛⲣⲧⲉⲩϣⲏ ⲧⲏⲣⲥ ⲉⲛⲥⲟⲟⲩϩ ⲉⲛⲉⲛⲉⲣⲏⲩ ϣⲁϩⲧⲟⲟⲩⲉ ⲉⲛⲥⲙⲟⲩ ⲉⲡⲛⲟⲩⲧⲉ ⲡⲉⲓⲱⲧ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲁⲩⲱ ⲉⲛⲣϣⲡⲏⲣⲉ ⲉϫⲛⲛⲉⲛⲧⲁⲛⲥⲟⲧⲙⲟⲩ ·
…
26 ⲧⲉⲛⲟⲩ ϭⲉ ⲡⲛⲟⲩⲧⲉ ⲡⲉⲛⲥⲱⲧⲏⲣ ⲡⲉⲛⲧⲁϥⲧⲛⲛⲟⲟⲩⲕ ϣⲁⲣⲟⲛ ·
…
27 ⲛⲧⲟⲕ ⲡⲉ ⲡϣⲱⲥ ⲉⲧⲙⲟⲟⲛⲉ ⲙⲙⲟⲛ ⲧⲏⲣⲛ ⲛⲕⲟⲩⲓ ⲙⲛⲛⲛⲟϭ ϩⲛⲟⲩⲙⲛⲧⲁⲅⲁⲑⲟⲥ · ⲉⲓⲥ ⲛⲉⲛⲥⲱⲙⲁ ⲙⲛⲛⲉⲛⲯⲩⲭⲏ ϩⲛⲛⲉⲕϭⲓϫ · ϣⲱⲡⲉ ⲛⲁⲛ ⲛⲉⲓⲱⲧ ⲁⲛⲟⲛ ϩⲱⲱⲛ ⲛⲧⲛϣⲱⲡⲉ ⲛⲁⲕ ⲛϣⲏⲣⲉ ·
…
28 ⲁϥⲟⲩⲱϣⲃ ⲛϭⲓⲡⲁⲉⲓⲱⲧ ⲉϥϫⲱ ⲙⲙⲟⲥ ϫⲉ · ⲉϣϫⲉ ⲡⲉⲕⲟⲩⲱϣ ⲡⲛⲟⲩⲧⲉ ⲡⲉ ⲡⲁⲓ ⲧⲛⲛⲁⲉⲓⲣⲉ ⲕⲁⲧⲁⲡⲉⲕϣⲁϫⲉ ·
…
29 ⲁⲩⲱ ⲁⲛⲥⲱⲟⲩϩ ⲉⲛⲉⲛⲉⲣⲏⲩ ϩⲓⲟⲩⲥⲟⲡ ⲉⲛⲉⲓⲣⲉ ⲛⲁϫⲟⲩⲱⲧ ⲛⲣⲱⲙⲉ ⲉⲛⲟⲩⲏϩ ϩⲁϩⲧⲛ ⲡⲁⲉⲓⲱⲧ ·
…
30 ⲡⲁⲉⲓⲱⲧ ⲇⲉ ⲛⲉϥⲥⲣⲟϥⲧ ⲉⲡϣⲁϫⲉ ⲙⲡⲛⲟⲩⲧⲉ ⲙⲛⲧⲉⲥⲃⲱ ⲙⲛⲛⲕⲁⲛⲱⲛ ⲛⲛⲉⲛⲉⲓⲟⲟⲧⲉ ⲉⲧⲟⲩⲁⲁⲃ ⲛⲁⲡⲟⲥⲧⲟⲗⲟⲥ ·
…
31 ⲁⲛⲟⲕ ⲇⲉ ϩⲱ ⲛⲉⲓⲣⲱϣⲉ ⲡⲉ ⲉⲧⲉⲭⲣⲉⲓⲁ ⲛⲛⲉⲥⲛⲏⲩ ·
…
32 ϩⲉⲛⲛⲟϭ ⲇⲉ ⲛϭⲟⲙ ⲙⲛϩⲉⲛϣⲡⲏⲣⲉ ⲛⲉⲩϣⲟⲟⲡ ⲉⲃⲟⲗ ϩⲓⲧⲟⲟⲧϥ ⲙⲡⲁⲉⲓⲱⲧ ·
…
33 ⲛⲉⲁⲡⲉϥⲣⲁⲛ ⲅⲁⲣ ⲣⲥⲟⲉⲓⲧ ϩⲙⲙⲁ ⲛⲓⲙ ⲉⲧⲕⲱⲧⲉ ⲉⲣⲟϥ ⲉⲩⲉⲓⲛⲉ ⲛⲁϥ ⲛⲟⲩⲟⲛ ⲛⲓⲙ ⲉⲧϣⲱⲛⲉ ⲉϥⲣⲡⲁϩⲣⲉ ⲉⲣⲟⲟⲩ ⲧⲏⲣⲟⲩ ·
…
34 ⲁⲛⲟⲩⲱⲥϣ ⲇⲉ ⲉⲃⲟⲗ ⲕⲟⲩⲓ ⲕⲟⲩⲓ ⲁⲛⲁⲁⲓ ϩⲙⲡⲛⲟⲩⲧⲉ ·
…
35 ϩⲉⲛⲛⲟϭ ⲇⲉ ⲙⲡⲉⲧⲛⲁⲛⲱⲟⲩ ⲉⲣⲉⲡⲛⲟⲩⲧⲉ ⲉⲓⲣⲉ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲁⲉⲓⲱⲧ ·
…
36 ⲛⲧⲉⲣⲛⲱⲥⲕ ⲇⲉ ⲁⲛⲧⲁⲙⲓⲟ ⲛⲟⲩⲕⲟⲩⲓ ⲛⲉⲕⲕⲗⲏⲥⲓⲁ ϩⲓϫⲙⲡⲥⲱⲙⲁ ⲙⲡⲉⲛⲙⲁⲕⲁⲣⲓⲟⲥ ⲛⲥⲟⲛ ⲁⲡⲁ ⲫⲓϥ ·
…
37 ⲁⲛⲉⲥⲛⲏⲩ ϭⲱ ⲉⲩⲥⲩⲛⲁⲅⲉ ⲛϩⲏⲧⲥ ⲙⲙⲏⲏⲛⲉ ⲙⲡⲁⲧⲟⲩⲟⲩⲱⲙ ⲙⲡⲉⲩⲟⲉⲓⲕ · ⲙⲛⲛⲥⲱⲥ ⲁⲡⲥⲱⲧⲏⲣ ⲟⲩⲱⲛϩ ⲉⲡⲁⲉⲓⲱⲧ ⲁϥϣⲁϫⲉ ⲛⲙⲙⲁϥ ⲉϥϫⲱ ⲙⲙⲟⲥ ϫⲉ · ⲧⲉⲓⲣⲏⲛⲏ ⲛⲁⲕ ⲡⲁϣⲃⲏⲣ ⲙⲉⲗⲟⲥ ⲉⲧⲧⲁⲓⲏⲩ · ϯϣⲟⲟⲡ ⲛⲙⲙⲁⲕ ·
…
38 ⲉⲓⲥϩⲏⲏⲧⲉ ⲅⲁⲣ ϯⲛⲁⲥⲱⲟⲩϩ ⲉⲣⲟⲕ ⲛϩⲉⲛⲛⲟϭ ⲙⲙⲏⲏϣⲉ ⲁⲩⲱ ⲥⲉⲛⲁⲁϣⲁⲓ ⲉⲙⲁⲧⲉ ϩⲛⲧⲉⲩⲏⲡⲉ ·
…
39 ⲧⲱⲟⲩⲛ ϭⲉ ⲛⲅⲧⲁⲙⲓⲟ ⲛⲟⲩⲛⲟϭ ⲛⲉⲕⲕⲗⲏⲥⲓⲁ ⲕⲁⲧⲁⲧϩⲉ ⲉϯⲛⲁⲧⲥⲁⲃⲟⲕ ⲉⲣⲟⲥ ϫⲉⲕⲁⲥ ⲉⲣⲉⲛⲗⲁⲟⲥ ϭⲛⲙⲁ ⲛⲟⲩⲱϩ ⲛϩⲏⲧⲥ ·
…
40 ⲁϥ ⲙⲟⲟϣⲉ ⲇⲉ ⲛⲙⲙⲁϥ ⲁϥⲧⲥⲁⲃⲟϥ ⲉⲡⲧⲱϣ ⲧⲏⲣϥ ⲛⲧⲉⲕⲕⲗⲏⲥⲓⲁ ⲁϥⲧⲁⲙⲟϥ ⲉⲡⲉϥϣⲓⲏ ⲙⲛⲡⲉϥⲟⲩⲱⲥϣ ·
…
41 ⲡⲉϫⲉⲡⲥⲱⲧⲏⲣ ⲛⲁϥ ϫⲉ · ⲉⲓⲥϩⲏⲏⲧⲉ ⲁⲓⲧⲱϣ ⲛⲁⲕ ⲙⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ·
…
42 ⲛⲧⲟϥ ⲅⲁⲣ ⲡⲉⲧⲛⲁⲇⲓⲁⲕⲟⲛⲉⲓ ⲉⲡⲉⲕⲧⲟⲡⲟⲥ ·
…
43 ⲡⲱⲕ ⲙⲙⲁⲧⲉ ⲡⲉϣⲁϫⲉ ⲡⲁⲙⲓⲭⲁⲏⲗ ϩⲱⲱϥ ⲡⲉ ⲥⲱⲟⲩϩ ⲉϩⲟⲩⲛ ⲡⲁⲡⲁⲡⲟϩⲉ ϩⲱⲱϥ ⲡⲉ ⲇⲓⲁⲕⲟⲛⲉⲓ ·
…
44 ⲛⲧⲉⲣⲉϥϫⲉ ⲛⲁⲓ ⲇⲉ ⲛϭⲓⲡⲥⲱⲧⲏⲣ ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ ·
…
45 ⲙⲛⲛⲥⲱⲥ ⲇⲉ ⲁⲡⲁⲉⲓⲱⲧ ⲙⲟⲩⲧⲉ ⲉⲣⲟⲓ ⲁϥϫⲱ ⲉⲣⲟⲓ ⲛⲛⲉⲓϣⲁϫⲉ ⲧⲏⲣⲟⲩ ⲁⲛⲧⲁⲙⲓⲟ ⲇⲉ ⲛⲧⲉⲕⲕⲗⲏⲥⲓⲁ ⲕⲁⲧⲁⲡⲧⲱϣ ⲛⲧⲁϥⲧⲥⲁⲃⲟⲛ ⲉⲣⲟϥ ·
…
46 ⲛⲧⲉⲣⲛⲟⲩⲱⲥϣ ⲇⲉ ⲉⲃⲟⲗ ⲁⲩⲱ ⲁⲛⲁⲓⲁⲓ ⲡⲉϫⲉⲡⲁⲉⲓⲱⲧ ⲛⲁⲓ ϫⲉ · ⲉⲓⲥϩⲏⲏⲧⲉ ⲁϥϩⲱⲛ ⲉϩⲟⲩⲛ ⲛϭⲓⲡⲉϩⲟⲟⲩ ⲡⲉⲛⲙⲁⲕⲁⲣⲓⲟⲥ ⲛⲥⲟⲛ ⲁⲡⲁ ⲫⲓϥ ·
…
47 ⲙⲁⲣⲛϫⲟⲟⲩ ⲛⲥⲁⲛⲉⲥⲛⲏⲩ ⲉⲧϩⲙⲡⲧⲟⲟⲩ ⲧⲏⲣⲟⲩ ⲛⲧⲛⲉⲓⲣⲉ ⲛⲙⲙⲁⲩ ⲛⲟⲩⲁⲅⲁⲡⲏ ϩⲛⲟⲩⲣⲁϣⲉ ⲙⲛⲟⲩⲧⲉⲗⲏⲗ ϫⲉⲛⲧⲟϥ ⲡⲉⲛⲧⲁⲡϫⲟⲉⲓⲥ ϫⲟⲟϥ ⲛⲁⲓ ⲉⲧⲃⲏⲏⲧϥ ϫⲉ ·
…
48 ϯⲛⲁⲟⲩⲱⲛϩ ⲉⲃⲟⲗ ⲙⲡⲁⲉⲟⲟⲩ ϩⲙⲡⲉϥϩⲟⲟⲩ ⲧⲉⲣⲟⲙⲡⲉ ⲛⲧⲉⲡⲁⲣⲁⲛ ϫⲓⲉⲟⲟⲩ ϩⲙⲡⲕⲁϩ ⲧⲏⲣϥ ·
…
49 ⲁⲛⲟⲕ ⲇⲉ ⲁⲓⲉⲓⲣⲉ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲁⲓ ⲛϭⲓⲡⲁⲉⲓⲱⲧ ⲁⲓϫⲟⲟⲩ ⲉⲃⲟⲗ ϩⲛⲛⲧⲟⲟⲩ ⲧⲏⲣⲟⲩ ⲁⲓⲥⲱⲟⲩϩ ⲉϩⲟⲩⲛ ⲛⲛⲉⲥⲛⲏⲩ ⲧⲏⲣⲟⲩ ⲉⲡⲉϩⲟⲟⲩ ⲉⲧⲟⲩⲁⲁⲃ ⲛⲧⲁⲡϫⲟⲉⲓⲥ ⲧⲁⲙⲓⲟϥ ⲙⲡⲉⲛⲥⲟⲛ ⲁⲡⲁ ⲫⲓϥ ·
…
50 ⲛⲧⲉⲣⲛⲥⲱⲟⲩϩ ⲇⲉ ⲉⲛⲉⲛⲉⲣⲏⲩ ϩⲛⲥⲟⲩϫⲟⲩⲧⲁϥⲧⲉ ⲙⲡⲁⲟⲡⲉ ⲁⲛⲣⲧⲉⲩϣⲏ ⲧⲏⲣⲥ ⲛⲥⲟⲩϫⲟⲩⲧⲏ ⲙⲡⲁⲟⲡⲉ ⲉⲛϣⲟⲟⲡ ϩⲛⲟⲩⲣⲁϣⲉ ⲙⲛⲟⲩⲟⲩⲣⲟⲧ ⲉⲛⲉⲓⲣⲉ ⲛϩⲉⲛⲛⲟϭ ⲛⲥⲩⲛⲁⲝⲓⲥ ⲙⲛϩⲉⲛⲯⲁⲗⲙⲟⲥ ϩⲛⲟⲩⲟⲩⲣⲟⲧ ⲁⲩⲱ ⲉⲛⲧⲉⲗⲏⲗ ϩⲙⲡⲉⲛⲡⲛⲉⲩⲙⲁ
…
51 ⲛⲧⲉⲣⲉϩⲧⲟⲟⲩⲉ ⲇⲉ ϣⲱⲡⲉ ⲁϥⲙⲧⲟⲛ ⲙⲙⲟϥ ⲛϭⲓⲟⲩⲕⲟⲩⲓ ⲛⲥⲟⲛ ϫⲉⲍⲁⲭⲁⲣⲓⲁⲥ · ⲁⲩⲱ ⲡⲁⲓ ⲛⲉⲟⲩϣⲏⲣⲉ ⲡⲉ ⲉϥϩⲟⲗϭ ⲛⲛⲁϩⲣⲛⲟⲩⲟⲛ ⲛⲓⲙ ⲁⲩⲱ ⲛⲉⲣⲉⲡⲁⲉⲓⲱⲧ ⲙⲉ ⲙⲙⲟϥ ⲉⲙⲁⲧⲉ ⲉⲧⲃⲉⲛⲉϩⲃⲏⲩⲉ ⲉⲧⲛⲁⲛⲱⲟⲩ ⲉⲧⲉϥⲉⲓⲣⲉ ⲙⲙⲟⲟⲩ · ⲁⲛϫⲓⲧϥ ⲉϩⲟⲩⲛ ⲉⲧⲉⲕⲕⲗⲏⲥⲓⲁ ⲁⲛⲉⲥⲛⲏⲩ ϭⲱ ⲉⲩⲙⲉⲗⲏⲧⲁ ⲉⲣⲟϥ ϣⲁⲛⲧⲟⲩⲕⲟⲥϥ ·
…
52 ⲉⲛⲉⲡⲛⲁⲩ ⲅⲁⲣ ⲛⲧϫⲡⲥⲟ ⲡⲉ ·
…
53 ⲛⲧⲉⲣⲟⲩⲕⲟⲥϥ ⲇⲉ ⲛⲧⲉⲩⲛⲟⲩ ⲁⲛ ⲧⲱⲟⲩⲛ ⲁⲛϣⲗⲏⲗ ϩⲓⲟⲩⲥⲟⲡ ⲁⲩⲱ ⲁⲡⲁⲉⲓⲱⲧ ⲧⲣⲛⲡⲁϩⲧⲛ ⲛⲟⲩⲛⲟϭ ⲛⲛⲁⲩ ⲉϫⲙⲡⲉⲛϩⲟ ·
…
54 ⲙⲛⲛⲥⲱⲥ ⲁϥⲧⲱⲟⲩⲛ ⲛϭⲓⲡⲁⲉⲓⲱⲧ ⲁϥⲁϩⲉⲣⲁⲧϥ ⲁⲩⲱ ⲡⲉϫⲁϥ ⲛⲛⲉⲥⲛⲏⲩ ϫⲉ · ⲁⲗⲏⲑⲱⲥ ⲣⲱⲙⲉ ⲛⲓⲙ ⲛⲧⲁϥⲡⲁϩⲧϥ ⲙⲡⲉⲓⲙⲁ ⲙⲡϩⲟⲟⲩ ⲁⲡⲛⲟⲩⲧⲉ ⲕⲁⲛⲉⲩⲛⲟⲃⲉ ⲛⲁⲩ ⲉⲃⲟⲗ ⲛⲧϩⲉ ⲙⲡⲉϩⲟⲟⲩ ⲛⲧⲁⲩϫⲡⲟⲟⲩ ⲛϩⲏⲧϥ ·
…
55 ϩⲟⲓⲛⲉ ⲇⲉ ⲛⲛⲉⲥⲛⲏⲩ ⲁⲩⲇⲓⲥⲧⲁⲍⲉ ϩⲉⲛⲕⲟⲟⲩⲉ ⲇⲉ ⲁⲩⲡⲓⲥⲧⲉⲩⲉ ⲛⲁϥ ·
…
56 ⲁϥϥⲟϭϥ ⲇⲉ ⲉϩⲣⲁⲓ ⲉⲃⲟⲗ ⲙⲙⲟϥ · ⲁϥⲧⲱⲟⲩⲛ ⲁϥⲁϩⲉⲣⲁⲧϥ ⲁϥⲙⲟⲟϣⲉ ⲉⲡⲉⲓⲥⲁ ⲙⲛⲡⲁⲓ ·
…
57 ⲙⲙⲟⲛ ⲁϥⲱϣ ⲉⲃⲟⲗ ϫⲉ ·
…
58 ⲟⲩⲁ ⲡⲉⲡⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲁⲩⲣϣⲡⲏⲣⲉ ⲛϭⲓⲟⲩⲟⲛ ⲛⲓⲙ ⲉⲧⲁϩⲉⲣⲁⲧⲟⲩ ⲁⲩⲱ ⲡⲉϫⲁϥ ϫⲉ · ⲡⲓⲥⲧⲉⲩⲉ ⲛⲁⲓ ⲱ ⲡⲗⲁⲟⲥ ⲙⲙⲁⲓⲛⲟⲩⲧⲉ ϫⲉⲟⲩⲟⲛ ⲛⲓⲙ ⲉⲧⲁϩⲉⲣⲁⲧⲟⲩ ⲙⲡⲉⲓⲙⲁ ⲙⲡϩⲟⲟⲩ ⲁⲡⲛⲟⲩⲧⲉ ⲕⲁⲛⲉⲩⲛⲟⲃⲉ ⲛⲁⲩ ⲉⲃⲟⲗ ⲛⲧϩⲉ ⲙⲡⲉϩⲟⲟⲩ ⲛⲧⲁⲩϫⲡⲟⲟⲩ ⲛϩⲏⲧϥ · ⲁⲩⲱ ⲡⲉⲧⲛⲁⲡⲁϩⲧϥ ⲙⲡⲉⲓⲙⲁ ⲙⲡϩⲟⲟⲩ ⲥⲉⲛⲁⲕⲁ ⲛⲉⲩⲛⲟⲃⲉ ⲛⲁⲩ ⲉⲃⲟⲗ ϩⲙⲡⲣⲁⲛ ⲙⲡⲉⲛⲥⲟⲛ ⲁⲡⲁ ⲫⲓϥ · ⲡⲉⲓⲙⲩⲥⲧⲏⲣⲓⲟⲛ ⲟⲩⲛⲟϭ ⲡⲉ ⲱ ⲛⲁⲥⲛⲏⲩ ⲁⲩⲱ ⲛⲁⲉⲓⲟⲟⲧⲉ ⲙⲙⲁⲓⲛⲟⲩⲧⲉ ·
…
59 ⲛⲧⲉⲣϥϫⲉⲛⲁⲓ ⲇⲉ ⲁϥⲛⲕⲟⲧⲕ ⲁⲩⲱ ⲛⲧⲉⲩⲛⲟⲩ ⲛⲉϩⲃⲟⲟⲥ ϭⲗⲟⲙⲗⲙ ⲉϩⲟⲩⲛ ⲉⲣⲟϥ ⲛⲕⲉⲥⲟⲡ ·
…
60 ⲁⲩⲣϣⲡⲏⲣⲉ ⲇⲉ ⲛϭⲓⲙⲙⲏⲏϣⲉ ⲉⲧⲛⲁⲩ ⲉⲣⲟϥ ⲁⲩⲱ ⲁⲡⲉⲩϩⲏⲧ ⲧⲁϫⲣⲟ ⲉⲣⲟⲟⲩ ⲁⲩⲉⲓⲙⲉ ⲉⲧⲃⲉⲧⲙⲉⲧⲁⲛⲟⲓⲁ ϫⲉⲟⲩⲉⲃⲟⲗ ϩⲓⲧⲙⲡⲛⲟⲩⲧⲉ ⲧⲉ ⲁⲩⲱ ϫⲉⲧⲇⲱⲣⲉⲁ ⲙⲡⲕⲁⲛⲟⲃⲉ ⲉⲃⲟⲗ ⲁⲡⲛⲟⲩⲧⲉ ⲭⲁⲣⲓⲍⲉ ⲙⲙⲟⲥ ⲙⲡⲉⲛⲥⲟⲛ ⲁⲡⲁ ⲫⲓϥ ⲉⲩⲉⲟⲟⲩ ⲛⲧⲉⲧⲣⲓⲁⲥ ⲉⲧⲟⲩⲁⲁⲃ ⲡⲉⲓⲱⲧ ⲙⲛⲡϣⲏⲣⲉ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϣⲁⲉⲛⲉϩ ⲛⲉⲛⲉϩ ϥⲑ ·
…