1 ϩⲛⲧⲉⲩⲛⲟⲩ ⲉⲧⲙⲙⲁⲩ ⲁⲩⲥⲙⲏ ϣⲱⲡⲉ ϣⲁⲣⲟⲛ ϫⲉⲡⲁⲓ ⲡⲉ ⲡⲉϥⲣⲁⲛ ϣⲁⲛⲅⲉⲛⲉⲁ ⲧⲏⲣⲟⲩ ⲙⲡⲕⲁϩ
…
2 ⲁⲛⲟⲛ ⲇⲉ ⲁⲛⲣϣⲡⲏⲣⲉ ⲙⲡⲉⲛⲧⲁϥϣⲱⲡⲉ ϩⲛⲟⲩϭⲉⲡⲏ ⲁⲩⲱ ⲁⲛⲁⲥⲡⲁⲍⲉ ⲙⲙⲟϥ ⲁⲛⲉⲓ ⲉⲃⲟⲗ ϩⲓⲧⲟⲟⲧϥ ⲁⲛⲙⲟⲟϣⲉ ⲉⲣⲏⲥ ϣⲁⲡⲧⲟⲟⲩ ⲙⲡϣϭⲉⲡⲟϩⲉ ⲁⲛϭⲓⲛⲉ ⲛⲟⲩⲕⲁⲧⲁⲅⲓⲟⲛ ⲥⲁⲡⲉⲙⲛⲧ ⲙⲙⲟⲛ
…
3 ⲁⲡⲁⲉⲓⲱⲧ ⲕⲱⲗϩ ⲉⲡⲱⲛⲉ ⲛϣⲟⲙⲛⲧ ⲛⲥⲟⲡ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ
…
4 ⲁⲩⲱ ⲛⲧⲉⲩⲛⲟⲩ ⲁⲛⲥⲱⲧⲙ ⲉⲩⲕⲟⲩⲓ ⲛⲥⲙⲏ ⲉⲥϫⲱ ⲙⲙⲟⲥ ϫⲉⲥⲙⲟⲩ ⲉⲣⲟⲓ ⲛⲁⲉⲓⲟⲧⲉ ⲉⲧⲟⲩⲁⲁⲃ
…
5 ⲁⲩⲱ ⲛⲧⲉⲓϩⲉ ⲁϥⲉⲓ ⲉⲃⲟⲗ ⲁϥⲟⲩⲱⲛ ⲉⲡⲣⲟ ⲛⲁⲛ ⲁⲛⲡⲁϩⲧⲛ ⲛⲁϥ ⲁⲩⲱ ⲁⲛⲁⲥⲡⲁⲍⲉ ⲙⲙⲟϥ
…
6 ⲡⲉϥⲥⲱⲙⲁ ⲇⲉ ⲛⲉⲁϥϭⲉⲃⲃⲉ ⲉⲙⲁⲧⲉ ⲉⲧⲃⲉⲡⲉϩⲕⲟ ⲙⲛⲡⲉⲓⲃ ⲁⲩⲱ ⲁϥϫⲓⲧⲛ ⲉϩⲟⲩⲛ ⲉⲡⲕⲁⲧⲁⲅⲓⲟⲛ ⲁⲛϣⲗⲏⲗ ⲁⲛϩⲙⲟⲟⲥ ⲁⲛϣⲁϫⲉ ⲉⲛⲉⲙⲛⲧⲛⲟϭ ⲙⲡⲛⲟⲩⲧⲉ
…
7 ⲡⲉϫⲉⲡⲁⲉⲓⲱⲧ ⲛⲁϥ ϫⲉⲛⲓⲙ ⲡⲉ ⲡⲉⲕⲣⲁⲛ
…
8 ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉⲫⲓⲃ ⲡⲉ ⲡⲁⲣⲁⲛ ⲁⲩⲱ ⲁⲛⲟⲕ ⲟⲩⲣⲙⲡⲣϭⲟⲩϣ ϩⲙⲡⲧⲟϣⲧⲟⲩϩⲱ
…
9 ⲡⲉϫⲉⲡⲁⲉⲓⲱⲧ ⲛⲁϥ ϫⲉⲉⲓⲥⲟⲩⲏⲣ ⲛⲣⲟⲙⲡⲉ ϫⲓⲛⲧⲁⲕⲓ ⲉⲡⲉⲓⲙⲁ
…
10 ⲡⲉϫⲁϥ ϫⲉⲉⲓⲥⲙⲏⲧϣⲙⲏ ⲛⲉ ⲛⲣⲟⲙⲡⲉ …
…
11 …
…
12 ⲡⲉϫⲉⲡⲁⲉⲓⲱⲧ ⲛⲁϥ ϫⲉϣⲁⲕϭⲱ ⲙⲡⲉⲓⲙⲁ ϣⲁⲁϣ ⲛⲟⲩⲟⲉⲓϣ
…
13 ⲡⲉϫⲁϥ ⲛⲁϥ ⲟⲛ ϫⲉⲡⲁⲓ ⲡⲉ ⲡⲁⲙⲁ ⲛϣⲱⲡⲉ ϩⲙⲡⲁⲱⲛϩ ⲙⲛⲡⲁⲙⲟⲩ
…
14 ⲡⲉϫⲉⲡⲁⲉⲓⲱⲧ ⲛⲁϥ ϫⲉϣⲁⲕⲟⲩⲉⲙⲟⲩ ⲏ ϣⲁⲕⲥⲉⲟⲩ ⲏ ⲛⲓⲙ ⲡⲉⲧⲇⲓⲁⲕⲱⲛⲉⲓ ⲛⲁⲕ
…
15 ⲁϥⲟⲩⲱϣⲃ ⲛϭⲓⲡⲡⲉⲧⲟⲩⲁⲁⲃ ⲁⲡⲁ ⲫⲓⲃ ϫⲉϫⲓⲛⲉⲡⲉⲟⲩⲟⲉⲓϣ ⲛⲧⲁⲙⲛⲧⲕⲟⲩⲓ ⲛⲧⲁⲓⲉⲓ ⲉⲃⲟⲗ ϩⲙⲡⲁⲏⲓ ϣⲁⲉϩⲣⲁⲓ ⲉⲡϩⲟⲟⲩ
…
16 ⲙⲁ ⲛⲓⲙ ⲛϣⲁⲓⲟⲩⲱϩ ⲛϩⲏⲧϥ ⲉⲓϣⲁⲛϫⲱⲕ ⲉⲃⲟⲗ ⲙⲡⲁϩⲙⲉ ⲛⲛⲉⲥϯⲁ ⲕⲁⲧⲁⲥⲟⲡ ϣⲁⲓϭⲉⲛⲟⲩⲟⲉⲓⲕ ⲙⲛⲟⲩⲝⲉⲥⲧⲏⲥ ⲙⲙⲟⲟⲩ ⲉⲩⲕⲏ ⲉϩⲣⲁⲓ ⲙⲡⲁⲙⲧⲟ ⲉⲃⲟⲗ
…
17 ⲁⲩⲱ ⲡⲁⲙⲛⲧⲣⲉ ⲡⲉ ⲡⲛⲟⲩⲧⲉ ϫⲉϫⲓⲛⲉⲡⲉⲟⲩⲟⲉⲓϣ ⲉⲧⲙⲙⲁⲩ ⲟⲩⲟⲉⲓⲕ ⲛⲟⲩⲱⲧ ⲡⲉⲧⲧⲏϣ ⲛⲁⲓ ⲉⲡⲥⲟⲡ
…
18 ⲛⲧⲉⲣⲉⲕⲉⲓ ⲇⲉ ϣⲁⲣⲟⲓ ⲙⲡϩⲟⲟⲩ ⲙⲛⲡⲉⲕⲙⲁⲑⲏⲧⲏⲥ ⲉⲓⲥ ⲡⲛⲟⲩⲧⲉ ⲁϥϫⲟⲟⲩ ⲛⲁⲛ ⲛⲧⲉⲛⲧⲣⲱⲫⲏ ⲙⲡϣⲟⲙⲉⲧ
…
19 ⲧⲉⲛⲟⲩ ⲇⲉ ⲧⲱⲟⲩⲛ ⲛⲧⲉⲛϫⲓϯⲡⲉ ⲛⲟⲩⲕⲟⲩⲓ ⲛⲟⲉⲓⲕ ⲕⲁⲧⲁⲡⲟⲩⲉϩⲥⲁϩⲛⲉ ⲙⲡⲛⲟⲩⲧⲉ
…
20 ⲁⲛⲧⲱⲟⲩⲛ ⲇⲉ ⲁⲛⲡⲱⲣϣ ⲛⲛⲉⲛϭⲓϫ ⲉⲃⲟⲗ ⲁⲛϣⲗⲏⲗ ⲁⲛⲥⲟⲟⲩⲧⲛ ⲉⲃⲟⲗ ⲁⲛⲟⲩⲱⲙ ⲙⲛⲛⲉⲛⲉⲣⲏⲟⲩ ϩⲛⲟⲩⲟⲉⲓⲕ ⲛⲟⲩⲱⲧ ⲁⲩⲱ ⲁⲛⲥⲱ ⲙⲡⲕⲟⲩⲓ ⲙⲙⲟⲟⲩ ⲁⲛⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲉⲓⲱⲧ ⲁⲡⲁ ⲫⲓⲃ ⲁϥⲑⲡⲟⲛ ⲉⲃⲟⲗ ϩⲛⲟⲩϩⲓⲣⲏⲛⲏ
…
21 ⲁⲛⲟⲛ ⲇⲉ ⲁⲛⲉⲓ ⲉⲣⲏⲥ ϩⲙⲡⲧⲟⲟⲩ ⲧⲏⲣϥ ϣⲁⲛⲧⲛⲉⲓ ⲉⲡⲧⲟⲟⲩ ⲙⲙⲉⲣⲟⲉⲓⲧ ⲁⲛϫⲓ ⲛⲁⲛ ⲛⲟⲩⲙⲁ ⲛϣⲱⲡⲉ ⲛϩⲏⲧϥ
…
22 ⲁⲛⲟⲕ ⲇⲉ ⲛⲉⲓϩⲙⲟⲟⲥ ϩⲙⲡⲙⲁ ⲛϣⲱⲡⲉ ⲟⲩⲁⲁⲧ ⲉⲓⲥ ⲟⲩⲣⲱⲙⲉ ⲁϥⲉⲓ ⲉⲡⲣⲟ ⲁϥⲙⲟⲩⲧⲉ ⲉⲣⲟⲓ
…
23 ⲁⲛⲟⲕ ⲇⲉ ⲁⲓⲉⲓ ⲉⲃⲟⲗ ⲉⲛⲁⲩ ϫⲉⲟⲩⲡⲉⲧϣⲟⲟⲡ
…
24 ⲡⲉϫⲉⲡⲉⲧⲙⲙⲁⲩ ⲛⲁⲓ ϫⲉⲛⲧⲟⲕ ⲡⲉⲉⲍⲉⲕⲓⲏⲗ
…
25 ⲡⲉϫⲁⲓ ⲛⲁϥ ϫⲉⲉϩⲉⲟⲩ ⲁⲛⲟⲕ ⲡⲉ
…
26 ⲡⲉϫⲁϥ ⲛⲁⲓ ϫⲉⲕⲁⲁⲧ ⲉⲡϩⲟⲩⲛ ⲙⲡⲣⲟ ⲙⲡⲉⲕⲙⲁ ⲛϣⲱⲡⲉ ⲧⲁϫⲱ ⲉⲣⲟⲕ ⲙⲡⲉⲓϣⲁϫⲉ
…
27 ⲙⲙⲟⲛ ⲛϯⲟⲩⲱϣ ⲁⲛ ⲉϫⲟⲟϥ ⲛⲧⲉⲛⲉⲥⲛⲏⲩ ⲥⲱⲧⲙ ⲛⲥⲉⲣϩⲟⲧⲉ
…
28 ⲁⲛⲟⲕ ⲇⲉ ⲁⲓϫⲓⲧϥ ⲉϩⲟⲩⲛ ϩⲓⲧⲛⲧⲉϥϭⲓⲛϣⲁϫⲉ ⲉⲧⲛⲁⲛⲟⲩⲥ
…
29 ⲡⲉϫⲁϥ ⲛⲁⲓ ϫⲉⲡⲁⲥⲟⲛ ⲉⲍⲉⲕⲓⲏⲗ ⲕⲥⲟⲟⲩⲛ ϫⲉⲟⲩ ⲡⲉⲧϣⲟⲟⲡ
…
30 ⲡⲉϫⲁⲓ ϫⲉⲙⲙⲟⲛ
…
31 ⲡⲉϫⲁϥ ⲛⲁⲓ ϫⲉⲁⲓⲉⲓ ⲉⲓⲙⲟⲟϣⲉ ϩⲙⲡϫⲁⲓⲉ ⲙⲡⲛⲁⲩ ⲛⲧϫⲡⲥⲁϣϥⲉ ⲛⲥⲁϥ ⲁⲛⲟⲕ ⲙⲛϩⲉⲛⲕⲉⲣⲱⲙⲉ ⲉⲛϣⲓⲛⲉ ⲛⲥⲁϩⲉⲛⲱⲛⲉ ⲛⲧⲛⲁⲁⲩ ⲛⲕⲱⲛⲓⲁ ⲉⲩⲥⲓⲟⲟⲩⲛ ⲁⲛϭⲓⲛⲉ ⲛϩⲉⲛⲗⲏⲥⲧⲏⲥ ϩⲙⲡⲧⲟⲟⲩ ⲁⲩϥⲓ ⲛⲛⲉⲥⲕⲉⲩⲉ ⲛⲧⲟⲟⲧⲛ ⲙⲱⲅⲓⲥ ⲛⲧⲁⲛⲉϣⲛⲟⲩϩⲙ ⲛⲧⲟⲟⲧⲟⲩ ⲉⲛⲟⲛϩ
…
32 ⲁⲩⲱ ⲛⲧⲉⲣⲛⲣⲡⲃⲟⲗ ⲉⲛⲉⲩϭⲓϫ ⲁⲛⲉⲓ ⲉϫⲛⲟⲩⲛⲟϭ ⲛⲣⲱⲙⲉ ⲉϥⲥⲟⲛϩ ⲉϥⲛⲏϫ ⲉⲃⲟⲗ ϩⲛⲟⲩⲉⲓⲁ
…
33 ⲁⲛⲟⲛ ⲇⲉ ⲁⲛⲃⲟⲗϥ ⲉⲃⲟⲗ
…
34 ⲡⲉϫⲁϥ ⲛⲁⲛ ϫⲉⲕⲁⲁⲧ ⲉⲃⲟⲗ ϩⲙⲡⲉⲓⲙⲁ ⲁⲗⲗⲁ ⲉⲧⲉⲧⲛϣⲁⲛⲃⲱⲕ ⲉⲡⲧⲟⲟⲩ ⲧⲉⲧⲛⲛⲁϭⲓⲛⲉ ⲙⲡⲉⲓⲙⲁ ⲛϣⲱⲡⲉ ⲙⲟⲩⲧⲉ ⲉϩⲟⲩⲛ ϫⲉⲉⲍⲉⲕⲓⲏⲗ ⲡⲉϫⲉⲡⲉⲕⲉⲓⲱⲧ ϫⲉⲁⲙⲟⲩ ⲛⲁⲓ ⲉⲡϫⲁⲓⲉ ⲙⲙⲟⲛ ⲁⲛⲉⲥⲟⲟⲛⲉ ⲃⲟϣⲧ ⲁⲩⲥⲟⲛϩⲧ ⲉⲩⲟⲩⲱϣ ⲉϩⲱⲧⲃ ⲙⲙⲟⲓ ⲁⲗⲗⲁ ⲁⲡⲛⲟⲩⲧⲉ ⲛⲉϩⲉⲙⲧⲁⲯⲩⲭⲏ ⲉⲛⲉⲩϭⲓϫ
…
35 ⲁⲛϫⲛⲟⲩϥ ϫⲉⲛⲓⲙ ⲡⲉ ⲡⲉⲕⲣⲁⲛ
…
36 ⲡⲉϫⲁϥ ⲛⲁⲛ ϫⲉⲡⲁⲩⲗⲉ ⲡⲉ ⲡⲁⲣⲁⲛ ⲁⲩⲱ ⲁⲛⲟⲕ ⲟⲩⲣⲙⲧⲁⲙⲙⲁ ϩⲙⲡⲧⲟϣ ⲕⲟⲓⲥ
…
37 ⲁⲛⲟⲕ ⲇⲉ ⲉⲍⲉⲕⲓⲏⲗ ⲛⲧⲉⲣⲓⲥⲱⲧⲙ ⲉⲛⲁⲓ ⲁⲓϣⲧⲟⲣⲧⲉⲣ ⲉⲧⲃⲉ ϫⲉⲁϥⲧⲁⲟⲩⲉ ⲡⲣⲁⲛ ⲙⲡⲁⲉⲓⲱⲧ ⲙⲛⲡⲉϥϯⲙⲉ
…
38 ⲡⲉϫⲉⲡⲉⲧⲙⲙⲁⲩ ⲛⲁⲓ ⲟⲛ ϫⲉⲧⲱⲟⲩⲛ ⲟⲩⲟϩⲕ ⲛⲥⲱⲓ ⲧⲁϫⲓⲧⲕ ϣⲁⲣⲟϥ ⲙⲙⲟⲛ ϯⲛⲁⲩ ⲉⲣⲟⲕ ⲉⲕⲣϩⲟⲧⲉ
…
39 ⲁⲛⲟⲕ ⲇⲉ ⲁⲓⲙⲟⲟϣⲉ ⲛⲙⲙⲁϥ ϩⲙⲡϫⲁⲓⲉ ⲧⲏⲣϥ ⲁⲓⲣⲡϣⲟⲣⲡ ⲛϩⲟⲟⲩ ⲙⲛⲡⲙⲉϩⲥⲛⲁⲩ ⲉⲛⲙⲟⲟϣⲉ
…
40 ⲡⲉϫⲁⲓ ⲛⲁϥ ϫⲉⲙⲡⲁⲧⲛⲡⲱϩ ⲉⲡⲙⲁ ⲉⲧⲙⲙⲁⲩ
…
41 ⲡⲉϫⲁϥ ϫⲉⲙⲡⲉ ⲁⲛⲡⲱϩ ⲉⲡⲙⲉϩϣⲟⲙⲛⲧ ⲛϩⲟⲟⲩ ⲉⲛⲙⲟⲟϣⲉ ϩⲙⲡϫⲁⲓⲉ
…
42 ⲡⲉϫⲁⲓ ⲛⲁϥ ⲟⲛ ϫⲉⲙⲡⲁⲧⲛⲡⲱϩ ⲉⲣⲟϥ ⲟⲛ
…
43 ⲡⲉϫⲁϥ ϫⲉⲉⲓⲥϩⲏⲏⲧⲉ ⲁⲛϩⲱⲛ ⲉϩⲟⲩⲛ ⲉⲣⲟϥ
…
44 ⲛϩⲱⲥⲟⲛ ⲇⲉ ⲉϥϣⲁϫⲉ ⲛⲙⲙⲁⲓ ⲁϥⲡⲱⲱⲛⲉ ⲁϥϣⲱⲡⲉ ⲛⲟⲩⲛⲟϭ ⲛⲉϭⲱϣ ⲉⲣⲉⲛⲉϥⲃⲁⲗ ⲙⲏϩ ⲛⲥⲛⲟϥ ⲉⲣⲉⲡⲉϥⲥⲱⲙⲁ ⲧⲏⲣϥ ⲙⲏϩ ⲛⲥⲟⲩⲣⲉ ⲉϥⲟ ⲛⲥϯⲃⲱⲱⲛ ⲛⲧϩⲉ ⲛⲛⲉⲓϭⲓⲏⲛⲃⲁⲁⲙⲡⲉ
…
45 ⲡⲉϫⲁϥ ⲛⲁⲓ ϫⲉⲙⲡⲉⲕⲥⲟⲩⲱⲛⲧ ⲱ ⲉⲍⲉⲕⲓⲏⲗ
…
46 ⲡⲉϫⲁⲓ ⲛⲁϥ ϫⲉⲙⲡⲉ ⲡⲉϫⲁϥ ⲛⲁⲓ ϫⲉⲁⲛⲟⲕ ⲉⲓⲉⲣⲧⲡⲩⲅⲏ ⲛⲁⲧⲙⲟⲟⲩ ⲙⲡⲉⲓⲟⲩⲟⲉⲓϣ ⲁⲡⲉⲕⲉⲓⲱⲧ ϩⲓⲟⲩⲉ ⲉⲣⲟⲓ ϣⲁⲛⲧⲁⲙⲁϩⲥ ⲛⲧⲉⲥϩⲉ ⲛⲕⲉⲥⲟⲡ
…
47 ⲁⲓϩⲓⲥⲉ ⲉⲓⲧⲱⲟⲩⲛ ϩⲁⲣⲟⲕ ⲙⲛⲡⲉⲕⲉⲓⲱⲧ ⲙⲡⲉⲧⲛⲣⲥⲁⲃⲉ
…
48 ⲡⲉϫⲁⲓ ⲛⲁϥ ϫⲉⲟⲩⲕⲟⲩⲛ ⲛⲧⲟⲕ ⲡⲉ ⲡⲇⲓⲁⲃⲟⲗⲟⲥ ⲉⲣⲉⲡϫⲟⲉⲓⲥ ⲉⲡⲓⲧⲓⲙⲁ ⲛⲁⲕ ϩⲁⲛⲉⲡⲉⲧϩⲟⲟⲩ ⲧⲏⲣⲟⲩ ⲛⲧⲁⲕⲁⲁⲩ ⲛⲛⲉϩⲙϩⲁⲗ ⲙⲡⲉⲭⲣⲓⲥⲧⲟⲥ
…
49 ⲛⲧⲟϥ ⲇⲉ ⲁϥϥⲟϭϥ ⲛⲥⲱⲓ ⲛⲧϩⲉ ⲛⲟⲩⲙⲟⲩⲓ ⲛⲁⲅⲣⲓⲟⲛ ⲉϥⲟⲩⲱϣ ⲉⲙⲟⲟⲩⲧ
…
50 ⲁⲛⲟⲕ ⲇⲉ ⲁⲓⲱϣ ⲉⲃⲟⲗ ϫⲉⲡⲁⲉⲓⲱⲧ ⲃⲱⲓⲑⲓⲁ ⲉⲣⲟⲓ
…
51 ⲛⲧⲉⲩⲛⲟⲩ ⲁⲡⲁⲉⲓⲱⲧ ⲥⲱⲧⲙ ⲉⲡⲁϩⲣⲟⲟⲩ ϩⲱⲥ ⲉϣϫⲉ ⲉϥϩⲱⲛⲧ ⲉⲣⲟⲓ ⲁϥⲧⲱⲟⲩⲛ ⲛⲧⲉⲩⲛⲟⲩ ⲁϥⲉⲓ ϣⲁⲣⲟⲓ ⲉⲃⲟⲗ ϩⲓⲧⲙⲡⲛⲟⲩⲧⲉ
…
52 ⲛⲧⲉⲣⲉⲡⲁⲉⲓⲱⲧ ϩⲱⲛ ⲉϩⲟⲩⲛ ⲉⲣⲟϥ ⲁⲡⲇⲓⲁⲃⲟⲗⲟⲥ ⲡⲱⲱⲛⲉ ⲛⲧⲉⲩⲛⲟⲩ ⲁϥⲣⲡⲉⲥⲙⲟⲧ ⲛⲟⲩⲙⲟⲛⲁⲭⲟⲥ ⲉⲣⲉⲟⲩϣⲁⲁⲣ ⲧⲁⲗⲏⲩ ⲉⲣⲟϥ ⲙⲛϩⲉⲛⲕⲟⲩⲓ ⲛϣⲁⲗ ⲛⲃⲏⲧ ⲁϥⲣϩⲁϫⲱϥ ⲉⲡⲁⲉⲓⲱⲧ ⲁϥⲡⲁϩⲧϥ ϩⲁⲛⲉϥⲟⲩⲉⲣⲏⲧⲉ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ
…
53 ⲛⲧⲉⲩⲛⲟⲩ ⲁⲡⲁⲉⲓⲱⲧ ϯ ⲛⲟⲩϣⲱⲗϩ ⲉⲣⲟϥ ⲉⲡⲕⲱⲧⲉ ⲙⲡⲉϥⲉϣⲕⲓⲙ ⲉⲡⲓⲥⲁ ⲟⲩⲇⲉ ⲡⲁⲓ ⲉⲃⲟⲗϫⲉ ⲁϥⲉⲓⲙⲉ ϫⲉⲡⲇⲓⲁⲃⲟⲗⲟⲥ ⲡⲉ
…
54 ⲁⲩⲱ ⲁϥⲁⲙⲁϩⲧⲉ ⲙⲙⲟϥ ⲁϥⲥⲟⲛϩϥ ⲉⲧⲟⲟⲧϥ ⲙⲛⲣⲁⲧϥ ⲁϥⲥⲕⲉⲣⲕⲱⲣϥ ⲉⲡⲉⲥⲏⲧ ⲉⲩⲉⲓⲁ ⲁⲛⲕⲁⲁϥ ⲉⲃⲟⲗ ⲁⲛⲙⲟⲟϣⲉ
…
55 ⲡⲉϫⲁⲓ ⲙⲡⲁⲉⲓⲱⲧ ϫⲉⲟⲩ ⲡⲉ ⲡⲉⲓϩⲱⲃ ⲛⲧⲁⲕⲁⲁϥ ⲉⲡⲉⲓⲁⲧϣⲓⲡⲉ
…
56 ⲡⲉϫⲉⲡⲁⲉⲓⲱⲧ ⲛⲁⲓ ϫⲉⲁⲡⲛⲟⲩⲧⲉ ⲧⲁⲁϥ ⲉⲧⲟⲟⲧ ⲧⲁⲡⲉⲧⲉⲩⲉ ⲙⲙⲟϥ ⲕⲁⲧⲁⲡⲉⲧⲉϩⲛⲁⲓ ⲉⲃⲟⲗ ϫⲉⲁϥⲧⲱⲗⲱⲙⲁ ⲁϥⲡⲉⲓⲣⲁⲍⲉ ⲙⲙⲟⲛ
…
57 ⲡⲁⲉⲓⲱⲧ ⲇⲉ ⲛⲧⲉⲣϥϫⲉ ⲛⲁⲓ ⲁⲛⲧⲱⲟⲩⲛ ⲁⲛⲉⲓ ⲉⲡⲉⲛⲙⲁ ⲛϣⲱⲡⲉ ⲉⲛϯⲉⲟⲟⲩ ⲙⲡⲛⲟⲩⲧⲉ
…
58 ⲡⲁⲉⲓⲱⲧ ⲇⲉ ⲁϥⲣϩⲙⲏ ⲛϩⲟⲟⲩ ⲙⲛϩⲙⲏ ⲛⲟⲩϣⲏ ⲙⲡϥⲟⲩⲱⲙ ⲟⲩⲇⲉ ⲙⲡϥⲥⲱ ⲉϥϩⲙⲟⲟⲥ ϩⲓϫⲛⲟⲩⲧⲱⲃⲉ ⲛϩⲟⲩⲛ ⲉⲡⲙⲁ ⲛϣⲱⲡⲉ ⲉϥϭⲱϣⲧ ⲉⲩⲉⲓⲁⲗ ϩⲛⲟⲩϣⲟⲩϣⲧ ⲙⲡⲉϥϣⲧⲁⲙ ⲉⲛⲉϥⲃⲁⲗ ⲙⲡⲉⲓϩⲙⲏ ⲛϩⲟⲟⲩ ϣⲁⲛⲧⲟⲩⲡⲱϭⲉ ⲛⲥⲉⲧⲁⲟⲩⲟⲥ ⲛⲁϥ ⲉⲃⲟⲗ ⲉϫⲙⲡⲕⲁϩ
…
59 ⲡⲁⲣⲭⲁⲅⲅⲉⲗⲟⲥ ⲇⲉ ⲉⲧⲟⲩⲁⲁⲃ ⲁϥⲉⲓ ⲉⲃⲟⲗ ϩⲛⲧⲡⲉ ⲉⲧⲉⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲡⲉ ⲙⲡⲛⲁⲩ ⲙⲡⲟⲩⲟⲉⲓⲛ ⲛⲧⲕⲩⲣⲓⲁⲕⲏ ⲙⲡϫⲱⲕ ⲉⲃⲟⲗ ⲙⲡⲉϩⲙⲉ ⲛϩⲟⲟⲩ ⲁϥⲥⲫⲣⲁⲅⲓⲍⲉ ⲙⲙⲟϥ ⲁϥϯⲟⲩⲱ ⲙⲙⲟϥ ϩⲛⲛⲉϥϩⲓⲥⲉ ⲧⲏⲣⲟⲩ ⲁⲛⲉϥⲃⲁⲗ ⲥⲙⲓⲛⲉ ⲛⲧⲉⲩϩⲉ ⲁⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲃⲱⲕ ⲉϩⲣⲁⲓ ⲉⲙⲡⲏⲩⲉ ϩⲛⲟⲩⲉⲟⲟⲩ
…
60 ⲁⲛⲟⲛ ⲇⲉ ⲁⲛⲥⲩⲛⲁⲅⲉ ⲙⲛⲛⲉⲥⲛⲏⲩ ⲉⲧⲛⲙⲙⲁⲛ ⲉⲧϩⲙⲡⲙⲁ ⲉⲧⲙⲙⲁⲩ ⲁⲛⲟⲩⲱⲙ ⲛⲙⲙⲁⲩ ⲙⲡⲉϩⲟⲟⲩ ⲛⲧⲕⲩⲣⲓⲁⲕⲏ ⲁⲛⲉⲓ ⲉⲃⲟⲗ ϩⲓⲧⲟⲟⲧⲟⲩ ϩⲛⲟⲩⲉⲓⲣⲏⲛⲏ
…
61 ⲁⲛⲉⲓ ⲉⲣⲏⲥ ⲉⲧⲡⲉⲧⲣⲁ ⲛⲥⲓⲟⲟⲩⲧ ⲁⲛϫⲓ ⲛⲁⲛ ⲛⲟⲩⲕⲟⲩⲓ ⲙⲙⲁ ⲛϣⲱⲡⲉ ϩⲙⲡⲙⲁ ⲉⲧⲙⲙⲁⲩ
…
62 ⲡⲁⲉⲓⲱⲧ ⲇⲉ ⲛⲉϥⲉⲓⲣⲉ ⲛϩⲉⲛⲛⲟϭ ⲙⲡⲱⲗⲩϯⲁ
…
63 ⲁⲥϣⲱⲡⲉ ⲇⲉ ⲛⲟⲩϩⲟⲟⲩ ⲁϥⲉⲓ ϣⲁⲣⲟⲛ ⲛϭⲓⲟⲩⲛⲟϭ ⲛϩⲁⲅⲓⲟⲥ ⲛⲧⲉⲡⲛⲟⲩⲧⲉ ⲉⲡⲉϥⲣⲁⲛ ⲡⲉ ⲁⲡⲁ ⲡϣⲟⲓ ⲛⲧⲉⲓⲉⲣⲏⲙⲓⲁⲥ ⲉϥϣⲟⲟⲡ ϩⲙⲡⲧⲟⲟⲩ ⲙⲡⲕⲱⲟⲩ ⲛⲥⲁⲡⲓⲉⲃⲉⲧ ⲙⲡⲓⲉⲣⲟ
…
64 ⲁⲛⲁⲥⲡⲁⲍⲉ ⲛⲛⲉⲛⲉⲣⲏⲟⲩ ⲁⲛϣⲗⲏⲗ ⲁⲛϩⲙⲟⲟⲥ ⲁⲛϣⲁϫⲉ ⲉⲛⲉⲙⲛⲧⲛⲟϭ ⲙⲡⲉⲭⲣⲓⲥⲧⲟⲥ ⲙⲛⲛⲉⲡⲟⲗⲓⲧⲉⲓⲁ ⲛⲛⲉⲧⲟⲩⲁⲁⲃ
…
65 ⲛⲧⲉⲣⲟⲩⲟⲩⲱ ⲇⲉ ⲉⲩⲇⲓⲁⲕⲣⲓⲛⲉ ⲛⲛⲉⲩⲉⲣⲏⲩ ⲁⲛⲧⲱⲟⲩⲛ ⲁⲛⲙⲟⲟϣⲉ ϩⲙⲡⲧⲟⲟⲩ ⲁⲛϭⲓⲛⲉ ⲛⲟⲩⲡⲉⲧⲣⲁ ⲉⲥⲙⲏϩ ⲛⲕⲟⲟⲛⲥ ⲉϩⲉⲛⲣⲉϥϣⲉⲙϣⲉⲉⲓⲇⲟⲗⲟⲛ ⲛⲉ ⲧⲏⲣⲟⲩ ⲛⲉ
…
66 ⲛⲧⲉⲣⲉⲛⲉⲧⲟⲩⲁⲁⲃ ⲇⲉ ⲡⲱϩ ⲉⲣⲟⲟⲩ ⲁⲩⲁϩⲉⲣⲁⲧⲟⲩ ⲁⲩϣⲗⲏⲗ ⲉϩⲣⲁⲓ ⲉϫⲱⲟⲩ ⲁⲩⲧⲱⲟⲩⲛ ⲉⲩⲟⲛϩ ⲧⲏⲣⲟⲩ ⲉⲩⲉⲓⲣⲉ ⲛⲥⲟⲟⲩ ⲛϣⲉ ⲛϩⲟⲟⲩⲧ ⲙⲛⲧⲁⲉⲓⲟⲩ ⲙⲛϥⲧⲟ ⲛⲥϩⲓⲙⲉ
…
67 ⲡⲉϫⲉⲛⲉⲧⲟⲩⲁⲁⲃ ⲛⲁⲩ ϫⲉⲟⲩ ⲡⲉ ⲡⲉⲧⲛϩⲱⲃ
…
68 ⲁϥⲟⲩⲱϣⲃ ⲛϭⲓⲟⲩⲁ ⲉⲃⲟⲗ ⲛϩⲏⲧⲟⲩ ⲡⲉϫⲁϥ ϫⲉⲥⲱⲧⲙ ⲉⲣⲟⲓ ⲱ ⲛⲉⲧⲟⲩⲁⲁⲃ ⲧⲁⲧⲁⲙⲉⲧⲏⲩⲧⲛ ⲉⲧⲉⲛⲡⲟⲛⲏⲣⲓⲁ ⲙⲛⲧⲉⲛⲡⲁⲣⲁⲛⲟⲙⲓⲁ
…
69 ⲁⲛⲟⲛ ⲅⲁⲣ ⲁⲛⲟⲛ ⲟⲩϩⲉⲑⲛⲟⲥ ⲛⲟⲩⲱⲧ ⲉⲛϣⲉⲙϣⲉ ⲛⲟⲩⲑⲏⲣⲓⲟⲛ ⲉⲡⲉϥⲣⲁⲛ ⲡⲉ ⲡⲟⲩⲱⲛϣ ⲉⲛϥⲓⲣⲟⲟⲩϣ ϩⲁⲣⲟϥ ⲛⲟⲩⲟⲉⲓϣ ⲛⲓⲙ ⲉⲛⲧⲁⲗⲟ ⲛⲁϥ ⲉϩⲣⲁⲓ ⲛϩⲉⲛϣⲏⲣⲉ ϣⲏⲙ ⲛⲑⲩⲥⲓⲁ ⲉⲩϩⲛϣⲟⲙⲧⲉ ⲛⲣⲟⲙⲡⲉ
…
70 ⲛⲧⲟϥ ⲇⲉ ⲛⲉϥϯⲙⲛⲧϫⲁⲣϩⲏⲧ ⲛⲁⲛ ϫⲉⲁⲣⲓϩⲱⲃ ⲛⲁⲓ ⲛⲧⲉⲓϩⲉ ⲙⲛϩⲉⲛⲕⲉϩⲃⲏⲩⲉ ⲉⲩϩⲟⲟⲩ ⲡⲁⲣⲁⲛⲁⲓ ⲉⲛϯⲟⲩⲱϣ ⲁⲛ ⲉϫⲟⲟⲩ
…
71 ⲧⲉⲛⲟⲩ ϭⲉ ⲛⲁⲉⲓⲟⲧⲉ ⲉⲧⲟⲩⲁⲁⲃ ⲙⲁⲣⲉⲡⲉⲧⲛⲛⲁ ⲧⲁϩⲟⲛ ⲛⲧⲉⲧⲛⲃⲁⲡⲧⲓⲍⲉ ⲙⲙⲟⲛ ⲛⲧϩⲉ ⲛⲛⲉⲭⲣⲏⲥϯⲁⲛⲟⲥ ϫⲉⲟⲩⲛⲟϭ ⲡⲉ ⲡϩⲱϣ ⲉⲧϩⲓϫⲱⲛ
…
72 ⲁϥⲟⲩⲱϣⲃ ⲛϭⲓⲡϣⲟⲉⲓϫ ⲙⲡⲉⲭⲣⲓⲥⲧⲟⲥ ⲁⲡⲁ ⲡϣⲟⲓ ⲛⲧⲉⲓⲉⲣⲏⲙⲓⲁ ϫⲉⲧⲱⲟⲩⲛ ⲛⲧⲛϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲛϥⲡⲉⲓⲑⲉ ⲙⲙⲟⲛ ϩⲁⲡⲉⲓϩⲱⲃ
…
73 ⲡⲁⲉⲓⲱⲧ ⲇⲉ ⲡⲉϫⲁϥ ϫⲉⲙⲁⲣⲉⲛϣⲗⲏⲗ
…
74 ⲁⲩⲧⲱⲟⲩⲛ ⲇⲉ ⲁⲩⲉⲡⲓⲕⲁⲗⲉⲓ ⲙⲡⲛⲟⲩⲧⲉ ϩⲓⲟⲩⲥⲟⲡ ⲉⲩϫⲱ ⲙⲙⲟⲥ ⲛⲧⲉⲓϩⲉ ϫⲉⲡⲛⲟⲩⲧⲉ ⲡⲛⲁϩⲏⲧ ⲁⲩⲱ ⲡϣⲁⲛϩⲧⲏϥ ⲡⲉⲛⲧⲁϥϫⲟⲟⲩ ⲙⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ ⲁϥⲙⲟⲩ ϩⲁⲡⲉϥⲡⲗⲁⲥⲙⲁ ⲉⲁϥⲣⲡⲕⲟⲥⲙⲟⲥ ⲛⲣⲙϩⲉ ϩⲓⲧⲙⲡⲉⲥⲙⲟⲩ ⲙⲡⲃⲁⲡⲧⲓⲥⲙⲁ ⲉⲧⲟⲩⲁⲁⲃ ⲉⲕⲉϣⲉⲛϩⲧⲏⲕ ϩⲁⲛⲉⲕϩⲙϩⲁⲗ ⲛⲁⲓ ⲉⲧⲱϩⲉ ⲉⲣⲁⲧⲟⲩ ϩⲙⲡⲉⲓⲙⲁ ⲙⲡϩⲟⲟⲩ ⲉⲩϭⲱϣⲧ ⲉⲃⲟⲗ ϩⲁⲧϩⲏ ⲙⲡⲉⲕⲛⲁ ⲙⲛⲡⲉⲕⲙⲛⲧϣⲁⲛϩⲧⲏϥ ⲉⲧⲣⲉⲩϫⲓ ⲙⲡⲕⲱ ……
…