1 ⲡⲃⲓⲟⲥ ⲙⲡⲉⲛⲙⲉⲣⲓⲧ ⲛⲥⲟⲛ ⲁⲡⲁ ⲡⲁⲩⲗⲟⲥ ⲡⲣⲙⲧⲁⲙⲙⲁ ⲛⲧⲁϥⲙⲧⲟⲛ ⲇⲉ ⲙⲙⲟϥ ⲛⲥⲟⲩⲥⲁϣϥ ⲙⲡⲉⲃⲟⲧ ⲡⲁⲟⲡⲉ ⲉⲣⲉⲡⲉϥⲥⲙⲟⲩ ϣⲱⲡⲉ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ ϩⲁⲙⲏⲛ
…
2 ⲥⲱⲧⲙ ⲙⲙⲁⲓⲥⲱⲧⲙ ⲉⲧⲉⲥⲙⲏ ⲡⲉ … ⲁⲝⲓ … ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲛⲉϥⲙⲁⲑⲏⲧⲏⲥ ϫⲉⲉⲧⲉⲧⲛϣⲁⲛϩⲁⲣⲉϩ ⲉⲛⲁⲉⲛⲧⲟⲗⲏ … ⲧⲉⲧⲛⲁϭⲱ ϩⲛⲥⲟⲟⲩ
…
3 … ⲉϩⲁⲡⲛⲟⲩⲧⲉ ⲧⲛⲛⲟⲟⲩ ϣⲁⲣⲟⲓ ⲙⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲙⲡⲛⲁⲩ ⲙⲙⲉⲉⲣⲉ ⲛⲥⲟⲩⲙⲛⲧⲁⲥⲥⲉ ⲛⲉⲡⲏⲡ
…
4 ⲡⲉϫⲁϥ ⲛⲁⲓ ϫⲉⲙⲓⲟⲕⲡⲁϣⲏⲣⲉ ⲉⲧⲧⲁⲉⲓⲏⲩ
…
5 ⲁⲛⲟⲕ ⲇⲉ ⲁⲓⲟⲩⲱϣⲃ ⲛⲁϥ ϫⲉⲙⲓⲟⲕ ⲧⲱⲛⲟⲩ … ⲧⲟⲩ
…
6 … ⲡⲉ ⲡⲣⲙⲧⲁⲙⲙⲁ ⲛⲧⲟⲕ ⲅⲁⲣ ⲡⲉⲧⲛⲁⲣⲁⲣⲭⲏⲅⲟⲥ ⲉⲡⲉϥⲥⲱⲙⲁ ⲙⲡⲛⲁⲩ ⲉⲧϥⲛⲁⲕⲁⲥⲱⲙⲁ ⲉϩⲣⲁⲓ
…
7 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲁϥⲃⲱⲕ ⲉⲙⲡⲏⲩⲉ ϩⲛⲟⲩⲉⲟⲟⲩ ⲁⲓⲧⲱⲟⲩⲛ ⲛⲧⲉⲩⲛⲟⲩ ⲁⲓⲗⲟ ϩⲁⲛ …
…
8 …
…
9 … ϣⲱϣ ⲡⲉ
…
10 ⲡⲉϫⲉⲓⲱϩⲁⲛⲛⲏⲥ ϫⲉⲙⲁⲣⲉϥϣⲱⲡⲉ ϩⲓⲛⲁⲓ ⲡⲉⲛⲉⲓⲱⲧ ⲁⲩⲱ ⲡⲉⲛⲉⲡⲓⲥⲕⲟⲡⲟⲥ
…
11 ⲡⲉϫⲉⲡⲉⲧⲣⲟⲥ ϫⲉⲡⲁⲉⲓⲱⲧ ⲡⲁⲩⲗⲉ ⲧⲱⲟⲩⲛ ⲛⲅⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲛϥⲧⲛⲛⲟⲟⲩ ⲛⲁⲛ ⲛⲟⲩⲟⲉⲓⲕ ⲉⲃⲟⲗ ϩⲛⲧⲡⲉ ⲛⲧⲛⲟⲩⲱⲙ ⲙⲛⲛⲉⲛⲉⲣⲏⲩ
…
12 ⲡⲉϫⲉⲡⲁⲉⲓⲱⲧ ϫⲉⲕⲱ ⲛⲁⲓ ⲉⲃⲟⲗ ⲥⲙⲟⲩ ⲉⲣⲟⲓ ⲧⲱⲟⲩⲛ ⲛⲧⲉⲛϣⲗⲏⲗ ⲉϩⲣⲁⲓ ⲉⲣⲟϥ ⲁⲩⲱ ϥⲛⲁⲡⲉⲓⲑⲉ ⲙⲙⲟⲛ
…
13 ⲁⲩⲧⲱⲟⲩⲛ ⲁⲩⲡⲱⲣϣ ⲛⲛⲉⲩϭⲓϫ ⲉⲃⲟⲗ ϩⲓⲟⲩⲥⲟⲡ ⲁⲡⲁⲉⲓⲱⲧ ⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲉϥϫⲱ ⲙⲙⲟⲥ ϫⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛⲧⲁϥⲥⲙⲟⲩ ⲉϯⲟⲩ ⲛⲟⲉⲓⲕ ⲁϯⲟⲩ ⲛϣⲉ ⲛⲣⲱⲙⲉ ⲟⲩⲱⲙ ⲁⲩⲉⲓ ⲉⲃⲟⲗ ϩⲙⲡϯⲟⲩ ⲛⲟⲉⲓⲕ ⲛⲉⲓⲱⲧ ⲙⲛⲡⲧⲃⲧ ⲥⲛⲁⲩ
…
14 ⲡⲉⲛⲧⲁϥⲥⲱⲧⲙ ⲉⲉⲗⲓⲥⲥⲁⲓⲟⲥ ⲁϥⲧⲥⲉⲓⲁ ⲙⲏⲧⲛϣⲏ ⲛⲣⲱⲙⲉ ϩⲙⲡⲙⲏⲧ ⲛⲟⲉⲓⲕ ⲛⲉⲓⲱⲧ ⲉⲕⲉⲥⲱⲧⲙ ⲉⲣⲟⲓ ⲙⲡϩⲟⲟⲩ
…
15 ⲡⲉⲛⲧⲁϥⲥⲱⲧⲙ ⲉⲇⲁⲛⲓⲏⲗ ⲉϥϩⲙⲡϣⲏⲓ ⲛⲛⲉⲙⲟⲩⲓ ⲁϥⲧⲛⲛⲟⲟⲩ ⲛⲁⲃⲁⲅⲟⲩⲙ ϣⲁⲣⲟϥ ⲉⲣⲉⲡⲁⲣⲓⲥⲧⲟⲛ ϩⲛⲛⲉϥϭⲓϫ
…
16 ⲉⲕⲉⲥⲱⲧⲙ ⲉⲣⲟⲓ ⲙⲡϩⲟⲟⲩ ⲛⲅⲧⲛⲛⲟⲟⲩ ⲛⲁⲓ ⲛⲟⲩⲟⲉⲓⲕ ⲉⲃⲟⲗ ϩⲉⲛⲧⲡⲉ ⲧⲁⲟⲩⲱⲙ ⲙⲛⲛⲁⲥⲛⲏⲩ ⲁⲩⲱ ⲛⲁⲉⲓⲟⲧⲉ
…
17 ⲛⲧⲉⲩⲛⲟⲩ ⲉⲓⲥ ⲟⲩⲧⲣⲁⲡⲉⲍⲁ ⲁⲥⲉⲓ ⲉⲃⲟⲗ ⲉⲣⲉⲟⲩⲡⲓⲛⲁⲝ ϩⲓϫⲱⲥ ⲉⲣⲉϣⲟⲙⲛⲧ ⲛⲟⲉⲓⲕ ϩⲓⲱⲱϥ ⲉⲩϩⲏⲙ ⲁⲩⲟⲩⲱⲙ ϩⲛⲧⲉⲛⲙⲏⲧⲉ
…
18 ⲡⲉϫⲉⲡⲁⲉⲓⲱⲧ ⲛⲁⲩ ϫⲉⲧⲱⲟⲩⲛ ⲛⲧⲛⲟⲩⲱⲙ ⲉⲃⲟⲗ ϩⲙⲡⲟⲉⲓⲕ ⲛⲧⲡⲉ
…
19 ⲁϥϫⲓ ⲇⲉ ⲟⲛ ⲛⲟⲩⲕⲟⲩⲓ ⲛϩⲙⲟⲩ ⲁϥⲕⲁⲁϥ ϩⲓϫⲛⲧⲉⲧⲣⲁⲡⲉⲍⲁ ⲁⲛϣⲗⲏⲗ ϩⲓⲟⲩⲥⲟⲡ ⲁⲛⲟⲩⲱⲙ ⲙⲡⲕⲟⲩⲓ ⲛⲟⲉⲓⲕ ϩⲙⲡⲉⲥⲙⲟⲩ ⲙⲡϫⲟⲉⲓⲥ
…
20 ⲁϥⲟⲩⲱϣⲃ ⲛϭⲓⲡⲁⲉⲓⲱⲧ ⲡⲉϫⲁϥ ⲛⲛⲉⲥⲛⲏⲩ ϫⲉϯϫⲱ ⲙⲙⲟⲥ ⲛⲏⲧⲛ ϫⲉⲉⲓⲥ ⲧⲁⲓⲟⲩ ⲙⲛϥⲧⲟ ⲛⲣⲟⲙⲡⲉ ϫⲓⲛⲉⲡⲉϩⲟⲟⲩ ⲛⲧⲁⲩϣⲉϥϫⲱⲓ ϩⲓⲡⲧⲟⲟⲩ ϩⲓⲧⲛⲡⲁⲙⲉⲣⲓⲧ ⲛⲉⲓⲱⲧ ⲁⲡⲁ ϩⲩⲡⲉⲣⲓⲭⲟⲥ ϣⲁⲉϩⲟⲩⲛ ⲉⲧⲉⲛⲟⲩ ⲟⲩⲟⲉⲓⲕ ⲛⲟⲩⲱⲧ ⲡⲉⲧⲧⲏϣ ⲛⲁⲓ ⲉⲃⲟⲗ ϩⲓⲧⲙⲡⲛⲟⲩⲧⲉ ⲕⲁⲧⲁϩⲙⲏ ⲛϩⲟⲟⲩ ⲁⲩⲱ ⲟⲩⲝⲉⲥⲧⲏⲥ ⲙⲙⲟⲟⲩ ⲉⲛϯⲥⲟⲟⲩⲛ ⲁⲛ ϫⲉⲉϣⲁⲩⲉⲓ ⲛⲧⲱⲛ
…
21 ϣⲁⲓⲟⲩⲱⲙ ⲉⲃⲟⲗ ⲛϩⲏⲧⲟⲩ ⲛⲣⲟⲩϩⲉ ⲙⲡⲁϩⲙⲏ
…
22 ⲙⲉⲓⲟⲩⲱⲙ ⲇⲉ ⲟⲛ ϣⲁⲡϫⲱⲕ ⲙⲡⲁϩⲙⲏ ⲕⲁⲧⲁⲧⲉⲛⲧⲟⲗⲏ ⲙⲡⲥⲱⲧⲏⲣ ⲛⲧⲁϥⲧⲁⲁⲥ ⲉⲧⲟⲟⲧⲛ ϩⲙⲡⲉⲩⲁⲅⲅⲉⲗⲓⲟⲛ ⲉⲧⲟⲩⲁⲁⲃ ⲙⲡϥⲟⲩⲱⲙ ϩⲱⲱϥ ⲟⲩⲇⲉ ⲙⲡⲉϥⲥⲱ ⲛϩⲙⲉ ⲛϩⲟⲟⲩ ⲙⲛϩⲙⲏ ⲛⲟⲩϣⲏ
…
23 ⲡⲉϫⲁⲩ ⲛⲁϥ ⲛϭⲓⲛⲉⲥⲛⲏⲩ ϫⲉⲕⲁⲗⲟⲥ ⲕⲉⲓⲣⲉ ⲙⲙⲟⲥ
…
24 ⲙⲉⲣⲉϣⲟⲉⲓϫ ϫⲓⲕⲗⲟⲙ ⲉⲓⲙⲏⲧⲓ ⲛϥⲙⲓϣⲉ ⲕⲁⲗⲟⲥ
…
25 ⲁϥϥⲓ ⲛⲛⲉϥϭⲓϫ ⲉϩⲣⲁⲓ ⲉⲧⲡⲉ ⲁϥϣⲗⲏⲗ ⲙⲛⲛⲉⲥⲛⲏⲩ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲣⲣⲟ ⲛⲛⲉⲣⲣⲱⲟⲩ ⲥⲱⲧⲙ ⲉⲣⲟⲛ ⲙⲡϩⲟⲟⲩ ⲛⲅⲧⲛⲛⲟⲟⲩ ⲛⲁⲛ ⲛⲟⲩⲟⲉⲓⲕ ⲉϥϩⲏⲙ ⲁⲩⲱ ⲉϥⲣⲟⲟⲩⲧ
…
26 ⲛⲧⲉⲩⲛⲟⲩ ⲉⲓⲥ ⲛ… ⲉⲃⲟⲗ ϩⲛⲧⲡⲉ ⲁⲩⲟⲩⲱⲙ ϩⲛⲧⲉⲛⲙⲏⲧⲉ ⲉⲩⲥⲟⲩⲗⲱⲗ ⲉϩⲉⲛⲙⲁⲡⲡⲁ ⲛϣⲉⲉⲛⲥ
…
27 ⲡⲉϫⲉⲡⲉⲧⲣⲟⲥ ⲛⲓⲱϩⲁⲛⲛⲏⲥ ϫⲉⲉⲓⲥ ⲡⲟⲉⲓⲕ ⲙⲛⲛⲉⲙⲁⲡⲡⲁ ⲧⲛⲣⲭⲣⲉⲓⲁ ⲟⲛ ⲙⲡⲥⲟⲃⲧⲉ ⲛⲧⲉⲡⲣⲟⲥⲫⲱⲣⲁ
…
28 ⲁϥⲟⲩⲱϣⲃ ⲛϭⲓⲓⲱϩⲁⲛⲛⲏⲥ ⲡⲉϫⲁϥ ⲛⲛⲉⲥⲛⲏⲩ ϫⲉϣⲗⲏⲗ ⲉϫⲱⲓ ⲧⲁⲉⲓⲣⲉ ⲙⲡⲉⲛⲧⲁϥ …
…
29 … ⲁϥⲟⲩⲱⲛ ⲛⲣⲱϥ ⲛϭⲓⲓⲱϩⲁⲛⲛⲏⲥ ⲉϥϫⲱ ⲙⲙⲟⲥ ϫⲉⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲉⲕⲉⲧⲛⲛⲟⲟⲩ ⲉⲃⲟⲗ ϩⲛⲧⲡⲉ ⲛⲟⲩⲧⲣⲁⲡⲉⲍⲁ ϫⲉⲕⲁⲥ ⲉⲛⲛⲁⲕⲱ ϩⲓϫⲱⲥ ⲙⲡⲉⲕⲥⲱⲙⲁ ⲙⲛⲡⲉⲕⲥⲛⲟϥ
…
30 ⲁⲩⲱ ⲛⲧⲉⲩⲛⲟⲩ ⲉⲓⲥ ⲟⲩⲧⲣⲁⲡⲉⲍⲁ ⲛⲛⲟⲩⲃ ⲁⲥⲉⲓ ⲉⲃⲟⲗ ϩⲛⲧⲡⲉ ⲁⲥⲟⲩⲱϩ ϩⲛⲧⲉⲛⲙⲏⲧⲉ
…
31 ⲁϥⲧⲱⲟⲩⲛ ϩⲱⲱϥ ⲛϭⲓⲡⲁⲩⲗⲟⲥ ⲁϥϣⲗⲏⲗ ⲛⲧⲉⲓϩⲉ ⲉϥϫⲱ ⲙⲙⲟⲥ ϫⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲛⲧⲁϥⲧⲁϩⲙⲉⲧ ⲉⲡⲉⲕⲗⲏⲣⲟⲥ ⲛⲛⲉϩⲁⲅⲓⲟⲥ ⲛⲁⲡⲟⲥⲧⲟⲗⲟⲥ ⲉⲓⲟ ⲛⲇⲓⲱⲕⲧⲏⲥ ⲛϣⲟⲣⲡ ⲉⲓⲇⲓⲱⲕⲉⲓ ⲛⲥⲁⲧⲉϥⲛⲉⲙⲫⲏ ⲉⲧⲟⲩⲁⲁⲃ ⲧⲉⲕⲕⲗⲏⲥⲓⲁ
…
32 ⲧⲉⲛⲟⲩ ϭⲉ ⲡϫⲟⲉⲓⲥ ⲥⲱⲧⲙ ⲉⲣⲟⲓ ϩⲛⲧⲙⲏⲧⲉ ⲛⲛⲁⲥⲛⲏⲩ ⲛⲅⲧⲛⲛⲟⲟⲩ ⲛⲁⲓ ⲉⲃⲟⲗ ϩⲛⲧⲡⲉ ⲛⲟⲩⲡⲱⲧⲏⲣⲓⲟⲛ ⲉϥⲙⲏϩ ⲛⲏⲣⲡ ϩⲛⲧⲃⲱ ⲛⲉⲗⲟⲟⲗⲉ ⲙⲙⲉ
…
33 ϩⲛⲧⲉⲩⲛⲟⲩ ⲉⲧⲙⲙⲁⲩ ⲉⲓⲥ ⲟⲩⲡⲱⲧⲏⲣⲓⲟⲛ ⲉϥⲙⲏϩ ⲛⲏⲣⲡ ⲉⲃⲟⲗ ϩⲛⲧⲃⲱ ⲛⲉⲗⲟⲟⲗⲉ ⲙⲙⲉ ⲁϥⲟⲩⲱϩ ϩⲓϫⲛⲧⲉⲧⲣⲁⲡⲉⲍⲁ
…
34 ⲁϥⲧⲱⲟⲩⲛ ϩⲱⲱϥ ⲛϭⲓⲡϩⲗⲗⲟ ⲁⲡⲁ ⲉⲥⲓⲇⲟⲣⲟⲥ ⲡⲉⲡⲣⲉⲥⲃⲩⲧⲉⲣⲟⲥ ⲁϥϥⲓ ⲛⲧⲉϥϭⲓϫ ⲥⲛⲧⲉ ⲉϩⲣⲁⲓ ⲉⲧⲡⲉ ⲁϥϣⲗⲏⲗ ⲉϥϫⲱ ⲙⲙⲟⲥ
…
35 ϫⲉⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲡⲣⲣⲟ ⲛⲛⲉⲣⲣⲱⲟⲩ ⲛϯⲙⲡϣⲁ ⲁⲛ ⲉϣⲁϫⲉ ϩⲛⲧⲙⲏⲧⲉ ⲛⲛⲁⲥⲛⲏⲩ ⲁⲩⲱ ⲛⲉⲕⲥⲱⲧⲡ ⲛⲁⲓ ⲛⲧⲁⲕⲥⲟⲧⲡⲟⲩ ⲛⲁⲕ ⲛⲁⲡⲟⲥⲧⲟⲗⲟⲥ
…
36 ⲁⲗⲗⲁ ⲉⲧⲃⲉⲡⲣⲁϣⲉ ⲛⲧⲁⲕⲧⲁⲁϥ ⲛⲁⲓ ⲁⲓⲧⲱⲟⲩⲛ ⲁⲓⲉⲡⲓⲕⲁⲗⲉⲓ ⲙⲙⲟⲕ ϫⲉⲉⲕⲉⲡⲉⲓⲑⲉ ⲙⲙⲟⲓ ⲛⲅⲧⲛⲛⲟⲟⲩ ⲛⲁⲓ ⲛⲟⲩⲥϯⲛⲟⲩϥⲉ ⲉⲃⲟⲗ ϩⲙⲡⲉⲥϯⲛⲟⲩϥⲉ ⲙⲡⲡⲁⲣⲁⲇⲓⲥⲱⲥ ϫⲉⲛⲉⲧⲁⲁϥ ⲉϩⲣⲁⲓ ϣⲁⲛⲧⲉⲛⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲉϫⲙⲡⲉⲕⲥⲱⲙⲁ ⲙⲛⲡⲉⲕⲥⲛⲟϥ ⲉⲧⲟⲩⲁⲁⲃ
…
37 ϩⲛⲧⲉⲩⲛⲟⲩ ⲇⲉ ⲉⲓⲥ ⲟⲩⲫⲓⲁⲗⲏ ⲉⲥⲙⲏϩ ⲛⲥϯⲛⲟⲩϥⲉ ⲁⲥⲟⲩⲱϩ ϩⲛⲧⲙⲏⲧⲉ ⲁⲛϩⲓⲛⲏⲃ ϩⲓⲧⲙⲡⲉⲥϯⲛⲟⲩϥⲉ
…
38 ⲁϥⲧⲱⲟⲩⲛ ϩⲱⲱϥ ⲛϭⲓⲁⲡⲁ ⲁⲅⲁⲑⲱⲛⲓⲕⲟⲥ ⲡⲁⲡⲧⲟⲟⲩ ⲛ… ϫⲓ ⲡⲉϫⲁϥ ……
…
39 …
…
40 ⲗⲁⲕⲙ ⲉⲛⲧⲁⲩⲥⲏⲏⲡⲉ ⲛ… ⲛⲁⲩⲧⲁⲁⲩ ⲉⲡⲃⲓⲣ ⲙⲡⲁⲉⲓⲱⲧ
…
41 ⲁⲓⲥⲱ ⲙⲡⲙⲟⲟⲩ ⲉⲧϩⲙⲡⲉⲝⲉⲥⲧⲏⲥ ⲁⲛϣⲗⲏⲗ ⲁⲛⲙⲟⲟϣⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ
…
42 ⲁⲛⲓ ⲉⲣⲏⲥ ϩⲙⲡⲧⲟⲟⲩ ⲧⲏⲣϥ … ⲡⲛ… ⲟⲩ … ⲩⲁⲛ …
…
43 …
…
44 ⲛⲱⲛⲉⲛⲉⲥⲛⲏⲩ ⲙⲙⲟⲛⲁⲭⲟⲥ
…
45 ⲁⲛⲥⲱⲧⲙ ⲉⲩⲥⲙⲏ ϫⲉϣ … ⲉⲥⲙⲟⲩ ⲉⲣⲟⲛ ⲱ ⲁⲡⲁ ⲡⲁⲩⲗⲉ ⲡⲣⲙⲧⲁⲙⲙⲁ ⲙⲛⲉⲍⲉⲕⲓⲏⲗ ⲡⲁⲧⲕⲟⲩⲓ ⲛⲉⲣⲱⲧ ⲁⲙⲏⲓⲧⲛ ⲉϩⲟⲩⲛ ⲛⲉⲧⲟⲩⲁⲁⲃ ⲙⲡϫⲟⲉⲓⲥ
…
46 ⲕⲁⲗⲱⲥ ⲁⲕⲓ ϣⲁⲣⲟⲛ ⲁⲡⲁ ⲡⲁⲩⲗⲉ ⲡⲣⲙⲧⲁⲙⲙⲁ ⲡⲉⲛⲧⲁⲡϫⲟⲉⲓⲥ ⲧⲟⲩⲛⲟⲥϥ …
…
47 …
…
48 … ⲧⲉⲓ ⲛⲧⲱⲧⲛ ϩⲙⲡⲉⲓⲙⲁ ⲙⲡϩⲟⲟⲩ
…
49 ⲡⲁⲉⲓⲱⲧ ⲇⲉ ⲡⲉϫⲁϥ ϫⲉⲕⲁⲗⲱⲥ ⲉⲣⲟⲕ ⲁⲡⲁ ⲡⲁⲙⲟⲩⲛ ⲡⲁⲧϩⲃⲥⲱ ⲙⲙⲓⲛⲉ ⲙⲓⲛⲉ ⲛⲧϩⲉ ⲛⲧⲁⲓⲱⲥⲏⲫ ⲡⲣⲣⲟ ⲛⲇⲓⲕⲁⲓⲟⲥ
…
50 ⲁϥϫⲛⲟⲩϥ ⲟⲛ ϫⲉⲛⲓⲙ ⲡⲉⲛⲧⲁϥϣⲉϥ ϫⲱⲕ
…
51 ⲡⲉϫⲁϥ ϫⲉⲡⲁⲉⲓⲱⲧ ⲁⲡⲁ ϩⲏⲗⲗⲏⲛ ⲡⲉ
…
52 ⲁⲣⲓⲡⲁⲙⲉⲉⲩⲉ ⲱ ⲡⲁⲉⲓⲱⲧ ⲉⲧⲟⲩⲁⲁⲃ ϩⲁⲡ ……… ⲡⲁⲉⲓⲱⲧ … ϣⲁⲕⲥⲩⲛⲁⲅⲉ ⲧⲱⲛ ⲙⲡⲥⲁⲃⲃⲁⲧⲱⲛ ⲙⲛⲧⲕⲩⲣⲓⲁⲕⲏ
…
53 ⲁϥⲟⲩⲱϣⲃ ⲛϭⲓⲁⲡⲁ ⲡⲁⲙⲟⲩⲛ ϫⲉⲓⲱϩⲁⲛⲛⲏⲥ ⲡⲡⲁⲣⲑⲉⲛⲟⲥ ⲡⲉϣⲁϥⲥⲩⲛⲁⲅⲉ ⲙⲡⲥⲁⲃⲃⲁⲧⲱⲛ ⲙⲛⲧⲕⲩⲣⲓⲁⲕⲏ
…
54 ⲛⲥⲁⲃⲃⲁⲧⲟⲛ ⲅⲁⲣ …
…
55 … …
…
56 ⲁⲡⲁ ⲁⲡⲱⲗⲗⲱ ⲁⲛϭⲉⲛⲧϥ ⲉϥϩⲙⲟⲟⲥ ϩⲓϫⲛⲟⲩⲑⲣⲟⲛⲟⲥ ⲉϥϯⲥⲃⲱ ⲛⲛⲉϥϣⲏⲣⲉ ϩⲛⲛⲉⲉⲛⲧⲟⲗⲏ ⲙⲡⲱⲛϩ
…
57 ⲛⲧⲉⲣⲉϥⲛⲁⲩ ⲉⲡⲁⲉⲓⲱⲧ ⲁⲡⲁ ⲡⲁⲩⲗⲉ ⲁϥⲃⲟϭϥ ⲉϩⲣⲁⲓ ϩⲓϫⲙⲡⲉϥⲑⲣⲟⲛⲟⲥ ⲁϥⲱⲗⲉⲙ ⲉϩⲟⲩⲛ ⲉⲣⲟϥ ⲁϥϯⲡⲓ ⲉⲣⲱϥ
…
58 ⲡⲉϫⲁϥ ϫⲉⲕⲁⲗⲟⲥ ⲁⲕⲓ ϣⲁⲣⲟⲛ ⲙⲡϩⲟⲟⲩ ⲡϣⲟⲉⲓϫ ⲙⲡⲉⲭⲣⲓⲥⲧⲟⲥ ⲁⲡⲁ ⲡⲁⲩⲗⲉ ⲡⲉⲛⲧⲁⲡϫⲟⲉⲓⲥ ⲧⲟⲩⲛⲟⲥϥ ⲉⲃⲟⲗ ϩⲛⲛⲉⲧⲙⲟⲟⲩⲧ ⲛϯⲟⲩ ⲛⲥⲟⲡ ⲁⲩⲱ ⲟⲛ ϥⲛⲁⲧⲟⲩⲛⲟⲥⲕ ⲛⲕⲉⲥⲟⲡ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲁⲕ
…
59 ⲁⲩⲱ ⲡⲙⲉϩⲥⲁϣϥ ⲛⲥⲟⲡ ⲉⲧϥⲛⲁⲧⲟⲩⲛⲟⲥⲕ ⲛϩⲏⲧϥ ⲡⲉ ⲡⲉϩⲟⲟⲩ ⲛⲧⲁⲛⲁⲥⲧⲁⲥⲓⲥ ⲛⲛⲉⲧⲟⲩⲁⲁⲃ ⲧⲏⲣⲟⲩ
…
60 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓⲁⲡⲁ ⲁⲡⲟⲗⲗⲱ ⲁϥⲧⲣⲉⲩⲥⲱⲟⲩϩ ⲙⲡⲗⲁⲟⲥ ⲧⲏⲣϥ ⲁϥⲃⲱⲕ ⲉⲧⲉⲕⲕⲗⲩⲥⲓⲁ ⲁⲛⲥⲩⲛⲁⲅⲉ ϩⲛⲧⲉⲡⲣⲟⲥⲫⲱⲣⲁ ⲉⲧⲟⲩⲁⲁⲃ ⲁϥⲕⲁ ⲛⲉⲥⲛⲏⲩ ⲉⲡⲙⲁⲛⲟⲩⲱⲙ
…
61 ⲁⲛⲟⲛ ⲇⲉ ⲁϥϫⲓⲧⲛ ⲉⲧⲇⲓⲁⲕⲟⲛⲓⲁ ⲁϥⲧⲣⲉⲩⲥⲟⲃⲧⲉ ⲛⲁⲛ ϫⲉⲉⲛⲛⲁⲟⲩⲱⲙ
…
62 ⲡⲁⲉⲓⲱⲧ ⲇⲉ ⲙⲡⲉϥⲟⲩⲱϣ ⲉⲟⲩⲱⲙ ⲉⲃⲟⲗ ϫⲉϣⲟⲙⲛⲧ ⲛϩⲟⲟⲩ ⲛⲉⲛⲧⲁϥⲁⲁⲩ ⲉϥⲛⲏⲥⲧⲉⲩⲉ ϩⲙⲡⲉϩⲙⲏ
…
63 ⲡⲉⲛⲉⲓⲱⲧ ⲇⲉ ⲁⲡⲁ ⲁⲡⲟⲗⲗⲱ ⲁϥⲧⲱⲟⲩⲛ ⲁϥⲕⲱⲣⲉϣ ⲉⲣⲟϥ ⲉϥϫⲱ ⲙⲙⲟⲥ ϫⲉⲡⲉⲓⲑⲉ ⲙⲙⲟⲓ ⲡⲁⲉⲓⲱⲧ ⲛⲅⲟⲩⲱⲙ ⲛⲙⲙⲁⲓ ⲛⲧⲉⲟⲩϩⲙⲟⲧ ϩⲙⲡⲁⲙⲁⲛ ϣⲱⲡⲉ ⲙⲛⲡⲁⲧⲱⲡⲟⲥ ⲙⲡϩⲟⲟⲩ ⲉⲧⲃⲏⲏⲧⲕ
…
64 ⲕⲥⲟⲟⲩⲛ ⲡⲁⲙⲉⲣⲓⲧ ⲛⲉⲓⲱⲧ ϫⲉⲙⲡⲉⲧⲃⲏⲕ ⲉϩⲟⲩⲛ ⲉⲣⲱϥ ⲙⲡⲣⲱⲙⲉ ⲁⲛ ⲡⲉⲧⲥⲱⲱϥ ⲙⲡⲣⲱⲙⲉ
…
65 ⲧⲉⲛⲟⲩ ϭⲉ ⲡⲁⲉⲓⲱⲧ ⲡⲉⲓⲑⲉ ⲙⲙⲟⲓ ⲛⲅⲟⲩⲱⲙ ⲛⲙⲙⲁⲓ
…
66 ⲡⲁⲉⲓⲱⲧ ⲇⲉ ⲁϥⲥⲟⲟⲩⲧⲛ ⲉⲃⲟⲗ ⲉⲟⲩⲱⲙ ⲙⲛⲁⲡⲁ ⲁⲡⲱⲗⲗⲱ
…
67 ⲁⲛⲟⲕ ⲇⲉ ϩⲱⲱⲧ ⲙⲛⲡⲁⲡⲟϩⲉ ⲁⲛⲟⲩⲱⲙ ⲙⲛⲛⲉⲛⲉⲣⲏⲩ ⲙⲛⲡⲕⲉⲥⲏⲏⲡⲉ ⲛⲛⲉⲥⲛⲏⲩ ⲛⲙⲙⲁⲛ ⲉⲧⲉⲛⲁⲓ ⲛⲉ ⲛⲉⲩⲣⲁⲛ ⲁⲡⲁ ⲡⲁⲏⲥⲉ ⲙⲛⲁⲡⲁ ⲛⲓϣϭⲣⲱⲟⲩ ⲙⲛⲁⲡⲁ ⲥⲟⲩⲣⲉⲥ ⲙⲛⲁⲡⲁ ⲡⲓⲧⲁ
…
68 ⲛⲧⲉⲣⲛⲟⲩⲱ ⲇⲉ ⲉⲛⲟⲩⲱⲙ ⲙⲡⲛⲁⲩ ⲛⲣⲟⲩϩⲉ ⲁⲡⲉⲛⲉⲓⲱⲧ ⲁⲡⲁ ⲁⲡⲱⲗⲗⲱ ⲉⲓ ⲉⲧⲉⲛⲙⲏⲧⲉ ⲁϥⲕⲱⲗⲥϩⲉ ⲛⲉϥϭⲓϫ ⲉϫⲛⲛⲉⲩⲉⲣⲏⲩ ⲉϥϫⲱ ⲙⲙⲟⲥ ϫⲉⲡⲉⲛⲧⲁϥϫⲓ ⲧⲏⲛϩ ⲙⲁⲣⲉϥϩⲱⲗ ⲉⲃⲟⲗ
…
69 ϩⲛⲧⲉⲩⲛⲟⲩ ⲉⲧⲙⲙⲁⲩ ⲁⲁⲡⲁ ⲡⲁⲏⲥⲉ ϩⲱⲗ ⲉⲃⲟⲗ ⲁϥⲡⲱⲧ ⲉⲡⲧⲟⲟⲩ ⲛϩⲁϭⲉ
…
70 ⲁⲡⲁ ⲛⲓϣϭⲣⲱⲟⲩ ϩⲱⲱϥ ⲁϥϩⲱⲗ ⲉⲃⲟⲗ ⲁϥⲃⲱⲕ ⲉⲡⲧⲟⲟⲩ ⲙⲡⲉⲙϩⲓⲧ ⲛⲁⲛϯⲛⲱⲟⲩ
…
71 ⲁⲡⲁ ⲡⲓⲧⲧⲁ ϩⲱⲱϥ ⲁϥϩⲱⲗ ⲉⲃⲟⲗ ⲁϥⲃⲱⲕ ⲉⲡⲧⲟⲟⲩ ⲛⲥⲓⲟⲟⲩⲧ
…
72 ϩⲉ ⲇⲉ ⲛⲧⲉⲣⲉϥϣⲱⲡⲉ ⲁⲡⲉⲛⲉⲓⲱⲧ ⲁⲡⲁ ⲁⲡⲱⲗⲗⲱ ⲧϩⲡⲟⲛ ⲉⲃⲟⲗ ϩⲱⲱⲛ ϣⲁⲡⲣⲏⲥ ⲉⲡⲧⲟⲡⲟⲥ ⲁϥⲁⲥⲡⲁⲍⲉ ⲙⲙⲟⲛ ⲁϥⲕⲁⲁⲛ ⲉⲃⲟⲗ ⲟⲩϩⲓⲣⲏⲛⲉ
…
73 ⲁⲛⲟⲛ ⲇⲉ ⲁⲛⲙⲟⲟϣⲉ ⲉⲣⲏⲥ ϩⲙⲡⲧⲟⲟⲩ ⲧⲏⲣⲏⲃ ϣⲁⲛⲧⲉⲛⲉⲓ ⲉⲡⲧⲟⲟⲩ ⲛⲧⲉⲣⲱⲧⲁϣⲁⲛⲥ ϩⲙⲡⲣⲏⲥ ⲛⲕⲱⲥ ⲁⲛϭⲓⲛⲉ ⲛϩⲉⲛϣⲁϣ ⲙⲡⲉⲥⲏⲧ ⲉⲩⲉⲓⲁ ⲉⲣⲉⲟⲩⲙⲟⲛⲁⲭⲟⲥ ϩⲛⲧⲉⲩⲙⲏⲧⲉ
…
74 ⲡⲁⲉⲓⲱⲧ ⲇⲉ ⲁϥϯ ⲙⲡⲉϥⲟⲩⲟⲓ ⲁϥⲁⲥⲡⲁⲍⲉ ⲙⲙⲟϥ ⲡⲉϫⲁϥ ⲛⲁϥ ϫⲉⲛⲓⲙ ⲡⲉ ⲡⲉⲕⲣⲁⲛ
…
75 ⲡⲉϫⲁϥ ϫⲉⲁⲫⲟⲩ ⲡⲉ ⲡⲁⲣⲁⲛ ⲁⲣⲓⲡⲁⲙⲉⲉⲩⲉ ⲡⲁⲉⲓⲱⲧ ⲁⲡⲁ ⲡⲁⲩⲗⲉ ⲛⲧⲉⲡϫⲟⲉⲓⲥ ϫⲱⲕⲧ ⲉⲃⲟⲗ ⲕⲁⲗⲱⲥ
…
76 ⲡⲉϫⲉⲡⲁⲉⲓⲱⲧ ⲛⲁϥ ϫⲉⲉⲓⲥⲟⲩⲏⲣ ⲛⲣⲟⲙⲡⲉ ⲕϩⲙⲡⲉⲓⲙⲁ
…
77 ⲡⲉϫⲁϥ ϫⲉⲉⲓⲥ ⲧⲁⲉⲓⲟⲩ ⲙⲛϥⲧⲟ ⲛⲣⲟⲙⲡⲉ
…
78 ⲡⲉϫⲉⲡⲁⲉⲓⲱⲧ ⲛⲁϥ ⲟⲛ ϫⲉⲛⲓⲙ ⲡⲉⲛⲧⲁϥϯⲥⲭⲏⲙⲁ ⲉϫⲱⲕ
…
79 ⲡⲉϫⲁϥ ϫⲉⲁⲡⲁ ⲁⲛⲧⲱⲛⲓⲟⲥ ⲡⲁϣⲓⲏⲧ ⲡⲉ
…
80 ⲡⲉϫⲉⲡⲁⲉⲓⲱⲧ ⲛⲁϥ ϫⲉⲉⲓⲉ ⲉⲕⲟⲛϩ ⲛⲟⲩⲉⲕⲙⲟⲟϣⲉ ⲙⲛⲛⲉⲓϣⲁϣ
…
81 ⲡⲉϫⲁϥ ϫⲉⲧⲁⲧⲣⲱⲫⲏ ⲙⲛⲧⲁⲛⲉⲓϣⲁϣ ⲟⲩⲧⲣⲱⲫⲏ ⲛⲟⲩⲱⲧ ⲧⲉ ⲉⲧⲉⲛⲁⲓ ⲛⲉ ⲛⲓⲉⲛⲧⲏϭ ⲛⲧⲉⲧⲥⲱϣⲉ ⲙⲛⲛⲉⲓⲟⲩⲟⲧⲟⲩⲉⲧ
…
82 ⲡⲉϫⲉⲡⲁⲉⲓⲱⲧ ⲛⲁϥ ϫⲉⲙⲉⲕⲱϭⲉⲃ ⲛⲧⲉⲡⲣⲱ ⲟⲩⲇⲉ ⲙⲉⲕⲥⲱϣⲉⲙ ⲙⲡϣⲱⲙ
…
83 ⲡⲉϫⲁϥ ⲛⲁϥ ϫⲉⲉϣⲱⲡⲉ ⲧⲉⲡⲣⲱ ⲧⲉ ϣⲁⲓⲉⲛⲕⲟⲧⲕ ϩⲛⲧⲙⲏⲧⲉ ⲛⲛⲉⲓϣⲁϣ ⲛⲥⲉϯϩⲙⲙⲉ ⲛⲁⲓ ϩⲙⲡⲉⲗϩⲱⲃ ⲉⲧϩⲛⲧⲉⲩⲧⲁⲡⲣⲟ
…
84 ⲉϣⲱⲡⲉ ⲡϣⲱⲙ ⲡⲉ ϣⲁⲩⲥⲱⲟⲩϩ ⲉⲛⲉⲩⲉⲣⲏⲩ ⲛⲥⲉⲁϩⲉⲣⲁⲧⲟⲩ ⲛⲥⲉⲣϩⲁⲓⲃⲉⲥ ⲉⲣⲟⲓ ϫⲉⲛⲛⲉⲡⲕⲁⲩⲥⲟⲛ ⲉⲛⲱⲭⲗⲉⲓ ⲛⲁⲓ
…
85 ⲡⲉϫⲉⲡⲁⲉⲓⲱⲧ ⲛⲁϥ ϫⲉϩⲛⲟⲩⲙⲉ ⲛⲧⲟⲕ ⲟⲩϣⲟⲩⲙⲟⲩⲧⲉ ⲉⲣⲟⲕ ϫⲉⲁⲡⲁ ⲁⲫⲟⲩ ⲡϣⲁϣ
…