1 ⲙⲛⲛⲥⲁϣⲟⲙⲛⲧ ⲛⲛⲉⲃⲟⲧ ⲁϥⲉⲓ ⲛϭⲓⲡⲙⲁⲅⲓⲥⲧⲣⲓⲁⲛⲟⲥ ⲙⲛⲡⲇⲟⲅⲙⲁ ⲉⲧⲙⲙⲁⲩ ⲛⲁⲧⲛⲟⲩⲧⲉ ,
…
2 ⲉⲁⲡⲣⲣⲟ ⲥϩⲁⲓ ⲛⲛⲁⲕⲁⲕⲓⲟⲥ ⲡⲁⲩⲅⲟⲩⲥⲧⲁⲗⲓⲟⲥ ⲉⲧⲁⲣⲭⲉⲓ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲉⲧⲣⲉϥⲁⲛⲁⲅⲕⲁⲍⲉ ⲛⲙⲙⲟⲛⲁⲭⲟⲥ ⲉⲧϩⲛⲧⲗⲁⲩⲣⲁ ⲉⲧⲣⲉⲩϩⲩⲡⲟⲅⲣⲁⲫⲉ ⲉⲡⲧⲟⲙⲟⲥ ⲉⲧϫⲁϩⲙ ⲛⲗⲉⲱⲛ ⲇⲉ ⲡⲇⲟⲩⲝ , ⲛⲧⲉⲣⲉϥⲱϣ ⲛⲛⲉⲥϩⲁⲓ ⲙⲡⲣⲣⲟ ,
…
3 ⲁϥⲥϩⲁⲓⲥⲟⲩ ⲉⲩⲧⲓⲡⲧⲓⲭⲟⲛ ⲁϥⲧⲛⲛⲟⲟⲩⲥⲟⲩ ⲛⲙⲙⲟⲛⲁⲭⲟⲥ ⲙⲡϩⲉⲛⲁⲧⲟⲛ ⲉϥⲥⲏϩ ⲛⲧⲉⲓϩⲉ ·
…
4 ⲁⲕⲁⲕⲓⲟⲥ ⲡⲁⲩⲅⲟⲩⲥⲧⲁⲗⲓⲟⲥ ⲉϥⲥϩⲁⲓ ⲛⲛⲉⲓⲟⲧⲉ ⲉⲧⲟⲩⲁⲁⲃ ⲙⲙⲁⲓⲛⲟⲩⲧⲉ ⲙⲙⲟⲛⲁⲭⲟⲥ ⲛⲧⲗⲁⲩⲣⲁ ⲙⲡϩⲉⲛⲁⲧⲟⲛ ⲭⲁⲓⲣⲉⲧⲉ · ⲉⲡⲉⲓⲇⲏ ⲡⲉⲛϫⲟⲉⲓⲥ ⲡⲣⲣⲟ ⲡⲡⲁⲩⲧⲱⲕⲣⲁⲧⲱⲣ ⲡⲉⲛⲧⲁϥⲁⲁⲛ ⲛⲙⲡϣⲁ ⲛⲛⲉϥⲥϩⲁⲓ ⲉⲧⲟⲩⲁⲁⲃ ·
…
5 ⲉⲁϥⲧⲣⲉⲟⲩⲟⲛ ⲛⲓⲙ ϩⲩⲡⲟⲅⲣⲁⲫⲉ ⲉⲡⲧⲟⲙⲟⲥ ⲛⲗⲉⲱⲛ ⲉⲡⲓⲥⲕⲟⲡⲟⲥ ⲛϩⲣⲱⲙⲏ ,
…
6 ⲛϩⲟⲩⲟ ⲇⲉ ⲉⲧⲉⲧⲛϩⲁⲅⲓⲟⲥⲩⲛⲏ ⲛⲧⲱⲧⲛ , ⲱ ⲙⲙⲟⲛⲁⲭⲟⲥ ⲙⲡϩⲉⲛⲁⲧⲟⲛ ,
…
7 ⲧⲉⲛⲟⲩ ⲇⲉ ⲉⲧⲉⲧⲛϣⲁⲛϫⲓ ⲛⲛⲉⲥϩⲁⲓ ⲛⲧⲟⲟⲧϥ ⲙⲡⲙⲁⲅⲓⲥⲧⲣⲓⲁⲛⲟⲥ ⲉⲧⲉⲧⲛⲛⲉϫⲱⲕ ⲉⲃⲟⲗ ·
…
8 ⲙⲡⲟⲩⲉϩⲥⲁϩⲛⲉ ⲙⲡⲉⲛϫⲟⲉⲓⲥ ⲡⲣⲣⲟ ϫⲉⲕⲁⲥ ⲉⲧⲉⲧⲛⲛⲁⲙⲁⲧⲉ ⲛϩⲉⲛⲇⲱⲣⲉⲁ ⲙⲛϩⲉⲛⲧⲁⲉⲓⲟ ⲛⲧⲟⲟⲧϥ ⲙⲡⲛⲟϭ ⲛⲉⲩⲉⲣⲅⲉⲧⲏⲥ ⲁⲩⲱ ⲛⲛⲁⲩⲧⲱⲕⲣⲁⲧⲱⲣ ⲛⲣⲉϥⲙⲓϣⲉ ⲉϫⲛⲧⲉⲛⲙⲛⲧⲥⲁⲃⲉ ·
…
9 ⲛⲧⲉⲣⲉϥϫⲓ ⲇⲉ ⲛⲛⲉⲥϩⲁⲓ ⲛϭⲓⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲁϥⲥⲱⲟⲩϩ ⲉϩⲟⲩⲛ ⲛⲛⲉⲥⲛⲏⲩ ⲧⲏⲣⲟⲩ ⲁϥⲱϣ ⲉⲣⲟⲟⲩ ⲙⲡⲧⲓⲡⲧⲓⲭⲟⲛ ·
…
10 ⲛⲧⲟⲟⲩ ⲇⲉ ⲛⲧⲉⲣⲟⲩⲥⲱⲧⲙ ⲁⲩⲱϣ ⲉⲃⲟⲗ ϩⲓⲟⲩⲥⲟⲡ ⲉⲩⲁⲛⲁⲑⲉⲙⲁⲧⲓⲍⲉ ⲙⲡⲧⲟⲅⲙⲁ ⲉⲧⲙⲙⲁⲩ ⲉⲧⲥⲟⲟϥ ⲙⲛⲛⲉⲧⲛϩⲏⲧϥ ⲙⲛⲗⲉⲱⲛ ⲡⲁⲥⲉⲃⲏⲥ ⲙⲛⲟⲩⲟⲛ ⲛⲓⲙ ⲉⲧⲕⲟⲓⲛⲱⲛⲉⲓ ⲉⲣⲟϥ · ⲧⲟⲧⲉ ⲁⲩⲥϩⲁⲓ ⲛⲛⲟⲩⲉⲡⲓⲥⲧⲟⲗⲏ ⲙⲡⲁⲩⲅⲟⲩⲥⲧⲁⲗⲓⲟⲥ ⲉⲥⲥⲏϩ ⲙⲡⲉⲓⲧⲩⲡⲟⲥ ϫⲉ ·
…
11 ⲛⲧⲟⲕ ⲙⲉⲛ ⲕϩⲩⲡⲟⲕⲓⲥⲑⲁⲓ ⲙⲡⲇⲟⲅⲙⲁ ⲉⲧⲥⲟⲟϥ ⲙⲡⲁⲩⲧⲟⲕⲣⲁⲧⲱⲣ ·
…
12 ⲁⲛⲟⲛ ⲇⲉ ϩⲱⲱⲛ ⲉⲛϩⲩⲡⲟⲧⲁⲥⲥⲉ ⲙⲡⲡⲁⲛⲧⲟⲕⲣⲁⲧⲱⲣ ⲁⲩⲱⲡ ⲉⲧⲉⲩⲉⲣⲅⲉⲧⲉⲓ ⲙⲡⲧⲏⲣϥ ϩⲓⲧⲛⲧⲉϥⲡⲣⲟⲛⲟⲓⲁ ·
…
13 ⲙⲁⲣⲉⲡⲁⲓ ⲟⲩⲛ ϣⲱⲡⲉ ⲉϥⲟⲩⲟⲛϩ ⲉⲃⲟⲗ ⲛⲧⲉⲕⲉⲝⲟⲩⲥⲓⲁ ϫⲉⲙⲛⲟⲩⲟⲛ ⲛϩⲏⲧⲛ ϫⲓⲛⲟⲩⲕⲟⲩⲓ ϣⲁⲟⲩⲛⲟϭ ⲛⲁⲁⲛⲉⲭⲉ ⲛⲕⲟⲓⲛⲱⲛⲉⲓ ⲏ ⲉⲥⲱⲧⲙ ϩⲟⲗⲱⲥ ⲉⲡⲇⲟⲅⲙⲁ ⲉⲧϫⲁϩⲙ ⲉⲧⲙⲙⲁⲩ ⲁⲩⲱ ⲙⲡⲁⲣⲁⲛⲟⲙⲟⲥ ⲛⲗⲉⲱⲛ ⲡⲁⲥⲉⲃⲏⲥ · ⲁⲗⲗⲁ ⲧⲛⲥⲃⲧⲱⲧ ⲧⲏⲣⲛ ⲉⲧⲣⲉⲛⲁⲅⲱⲛⲓⲍⲉ ϣⲁⲉϩⲣⲁⲓ ⲉⲡⲙⲟⲩ ⲉϫⲛ ⲛⲇⲟⲅⲙⲁ ⲉⲧⲧⲁϫⲣⲏⲩ ⲁⲩⲱ ⲙⲡⲁⲣⲁⲇⲟⲥⲓⲥ ⲛⲧⲡⲓⲥⲧⲓⲥ ⲉⲧⲟⲩⲟϫ ⲛⲛⲉⲛⲉⲓⲟⲧⲉ ⲉⲧⲟⲩⲁⲁⲃ ⲁⲩⲱ ⲛⲟⲣⲑⲟⲇⲟⲝⲟⲥ ⲧⲁⲓ ⲛⲧⲁⲩⲧⲁⲁⲥ ⲉⲧⲟⲟⲧⲛ · ϫⲉⲛⲛⲉⲛⲥⲉϩϩⲁϩ ⲛϣⲁϫⲉ ⲛⲁⲕ ·
…
14 ϥⲥⲟⲧⲡ ⲅⲁⲣ ⲛⲁⲛ ⲁⲩⲱ ϥⲣⲛⲟϥⲣⲉ ⲛⲛⲉⲛⲯⲩⲭⲏ ⲉⲧⲣⲉⲛⲥⲱⲧⲙ ⲛⲥⲁⲡⲇⲟⲅⲙⲁ ⲙⲡⲡⲁⲛⲧⲟⲕⲣⲁⲧⲱⲣ ⲛϩⲟⲩⲉ ⲡⲉⲧⲛⲁⲩⲧⲟⲕⲣⲁⲧⲱⲣ ·
…
15 ⲛⲧⲉⲣⲉϥϫⲓ ⲛⲧⲉⲡⲓⲥⲧⲟⲗⲏ ⲛϭⲓⲡⲇⲟⲩⲝ ⲁϥⲉⲓⲙⲉ ⲉⲧⲉⲥϭⲟⲙ , ⲛⲧⲟϥ ⲙⲛⲙⲙⲁⲅⲓⲥⲧⲣⲓⲁⲛⲟⲥ ⲙⲡⲣⲣⲟ ⲁⲩϭⲱⲛⲧ ⲙⲙⲁⲧⲉ ϩⲛⲟⲩⲑⲩⲙⲟⲥ ⲉϫⲛⲛⲁⲡⲟⲗⲟⲅⲓⲁ ⲛⲛⲉⲧⲟⲩⲁⲁⲃ ⲙⲡϩⲉⲛⲁⲧⲟⲛ , ⲁⲩϫⲓϣⲟϫⲛⲉ ⲙⲛⲛⲉⲩⲉⲣⲏⲩ ⲉⲧⲣⲉⲡⲙⲁⲅⲓⲥⲧⲣⲓⲁⲛⲟⲥ ϫⲓ ⲙⲡⲉⲥⲧⲣⲁⲧⲉⲩⲙⲁ ⲙⲙⲁⲧⲟⲓ ⲛⲥⲉϩⲱⲧⲃ ⲛⲙⲙⲟⲛⲁⲭⲟⲥ ⲙⲡϩⲉⲛⲁⲧⲟⲛ ·
…
16 ⲡϫⲟⲉⲓⲥ ⲇⲉ ⲡⲉⲧⲁⲑⲉϯ ⲙⲡϣⲟϫⲛⲉ ⲛⲛⲁⲣⲭⲱⲛ ⲁϥⲟⲩⲉⲛϩⲡⲁⲓ ⲉⲃⲟⲗ ⲛⲛϩⲗⲗⲟ ⲉⲧⲟⲩⲁⲁⲃ ⲁⲡⲁ ⲗⲟⲩⲅⲓⲟⲥ ⲙⲛⲁⲡⲁ ⲗⲟⲅⲅⲓⲛⲟⲥ · ⲁⲩⲥⲱⲟⲩϩ ⲉϩⲟⲩⲛ ⲛⲛⲉⲥⲛⲏⲩ ⲧⲏⲣⲟⲩ ⲡⲉϫⲉⲁⲡⲁ ⲗⲟⲅⲅⲓⲛⲟⲥ ⲛⲁⲩ ϫⲉ · ϯⲥⲟⲡⲥ ⲙⲙⲱⲧⲛ ⲱ ⲛⲉⲥⲛⲏⲩ ⲉⲧⲙⲧⲣⲉⲟⲩⲁ ⲛϩⲏⲧⲧⲏⲩⲧⲛ ϣⲧⲟⲣⲧⲣ ,
…
17 ⲁⲗⲗⲁ ⲥⲱⲧⲙ ⲛⲥⲱⲓ ⲛⲧⲉⲡⲟⲩⲁ ⲡⲟⲩⲁ ϫⲓ ⲛⲁϥ ⲛϩⲉⲛⲃⲁ ⲉⲃⲟⲗ ϩⲛⲛⲃⲛⲛⲉ ⲛⲧⲛⲃⲱⲕ ⲧⲏⲣⲛ ϩⲓⲟⲩⲥⲟⲡ ⲉⲧⲁⲡⲁⲧⲏ ⲙⲡⲁⲣⲭⲱⲛ ⲙⲡⲁⲧϥⲉⲓ ϣⲁⲣⲟⲛ ·
…
18 ⲁⲡⲉⲓϣⲁϫⲉ ⲣⲁⲛⲁϥ ⲛⲛⲉⲥⲛⲏⲩ ⲁⲩⲱ ⲁⲩϫⲓ ⲛϩⲉⲛⲃⲁϩ ⲛⲛⲃⲛⲛⲉ ⲁⲩⲃⲱⲕ ⲉⲡⲙⲁ ⲛϣⲁⲩⲙⲟⲩⲧⲉ ⲉⲣⲟϥ ϫⲉⲡⲗⲓⲑⲁⲍⲟⲙⲉⲛⲟⲛ , ⲡⲃⲟⲗ ⲛⲧⲡⲟⲗⲓⲥ ·
…
19 ⲁⲩⲁϩⲉⲣⲁⲧⲟⲩ ⲛϭⲓⲡⲉⲭⲟⲣⲟⲥ ⲛⲙⲙⲟⲛⲁⲭⲟⲥ ⲧⲏⲣⲟⲩ ,
…
20 ⲙⲡⲉⲟⲩⲁ ⲧⲟⲗⲙⲁ ⲉⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲉⲡⲉⲓⲇⲏ ⲟⲩⲉⲛⲧⲟⲗⲏ ⲛⲧⲉⲡⲉⲩⲉⲓⲱⲧ ⲧⲉ ·
…
21 ⲧⲟⲧⲉ ⲁϥⲉⲓ ⲛϭⲓⲡⲙⲁⲅⲓⲥⲧⲣⲓⲁⲛⲟⲥ ⲉⲣⲡⲟⲗⲉⲙⲉⲓ ⲙⲛⲙⲙⲟⲛⲁⲭⲟⲥ ·
…
22 ⲛⲧⲉⲣⲟⲩⲡⲱϩ ⲇⲉ ⲉⲣⲟⲟⲩ ⲁϥⲟⲩⲉϩⲥⲁϩⲛⲉ ⲙⲡⲉⲥⲧⲣⲁⲧⲉⲩⲙⲁ ⲉⲧⲣⲉⲩⲛⲉϫⲥⲟⲧⲉ ⲉⲡⲉⲭⲟⲣⲟⲥ ⲛⲙⲙⲟⲛⲁⲭⲟⲥ ·
…
23 ⲙⲙⲁⲧⲟⲓ ⲇⲉ ⲁⲩⲛⲉϫⲥⲟⲧⲉ ⲉⲣⲟⲟⲩ · ⲱ ⲧⲉⲓⲛⲟϭ ⲛϣⲡⲏⲣⲉ , ⲛⲉⲣⲉ ⲙⲙⲁⲧⲟⲓ ⲁϩⲉⲣⲁⲧⲟⲩ ⲉⲩⲇⲟⲝⲉⲧⲉ ⲉⲡⲉⲭⲟⲡⲟⲥ ⲛⲙⲙⲟⲛⲁⲭⲟⲥ ⲁⲩⲱ · ⲙⲡⲉⲗⲁⲁⲩ ⲙⲙⲟⲟⲩ ⲃⲗⲁⲡϯ. ⲁⲩⲱ ⲁⲩϫⲱ ⲙⲡⲉⲓϩⲩⲙⲛⲟⲥ ⲧⲏⲣⲟⲩ ϩⲛⲟⲩⲧⲁⲡⲣⲟ ⲛⲛⲟⲧⲱⲧ ⲉⲩϫⲱ ⲙⲙⲟⲥ ϫⲉ · ⲁⲛⲕⲁϩⲧⲏⲛ ⲉⲡϫⲟⲉⲓⲥ · ⲛⲁϣ ⲛϩⲉ ⲧⲉⲧⲛⲛⲁϫⲟⲟⲥ ⲛⲧⲉⲛⲯⲩⲭⲏ ϫⲉ · ⲡⲱⲱⲛⲉ ⲉⲃⲟⲗ ⲉϫⲛⲛⲧⲟⲟⲩ ⲛⲧϩⲉ ⲛⲟⲩϫⲁϫ ;
…
24 ϫⲉⲉⲓⲥ ⲛⲣⲉϥⲣⲛⲟⲃⲉ ⲁⲩϫⲱⲗⲕ ⲛⲛⲉⲩⲡⲓⲧⲉ ⲁⲩⲥⲟⲃⲧⲉ ⲛⲛⲉⲩⲥⲟⲧⲉ ⲉⲡⲉϩⲛⲁⲁⲩ ⲛϯⲥⲟⲧⲉ ⲉⲛⲟⲩⲥⲟⲧⲉ ϩⲛⲟⲩϩⲱⲡ ⲛⲛⲉⲧⲥⲟⲩⲧⲱⲛ ϩⲙⲡⲉⲩϩⲏⲧ · ⲁⲩⲱ ϫⲉ · ⲁⲛⲣⲉϥⲣⲛⲟⲃⲉ ⲧⲱⲕⲙ ⲛⲛⲉⲩⲥⲏⲃⲉ ⲁⲩⲥⲱⲙⲛⲧ ⲛⲛⲉⲩⲡⲓⲧⲉ ⲉⲧⲁⲩⲟ ⲉϩⲣⲁⲓ ⲛⲛⲟⲩϩⲏⲕⲉ ⲙⲛⲟⲩⲉⲃⲓⲏⲛ , ⲉⲕⲟⲛⲥ ⲛⲛⲉⲧⲥⲟⲩⲧⲱⲛ ϩⲙⲡⲉⲩϩⲏⲧ · ⲁⲗⲏⲑⲱⲥ ⲁⲛⲉⲩⲥⲏϥⲉ ⲃⲱⲕ ⲉϩⲟⲩⲛ ⲉⲡⲉⲩϩⲏⲧ ⲁⲛⲉⲩⲥⲟⲧⲉ ⲟⲩⲟϣϥ ·
…
25 ⲡⲙⲁⲧⲟⲓ ⲇⲉ ⲛϫⲱⲱⲣⲉ ⲁⲡⲁ ⲗⲟⲅⲅⲓⲛⲟⲥ ⲡⲉⲛⲧⲁϥⲙⲓϣⲉ ⲉϫⲛⲧⲙⲉ ϣⲁⲉϩⲣⲁⲓ ⲉⲡⲙⲟⲩ , ⲡⲉⲛⲧⲁϥⲟⲩⲟⲛϩϥ ⲉⲃⲟⲗ ⲙⲙⲓⲛⲙⲙⲟϥ ϫⲉϥⲟⲩⲏϩ ϩⲁⲧϩⲁⲓⲃⲉⲥ ⲙⲡⲉⲧϫⲟⲥⲉ ,
…
26 ⲙⲡⲉϥϩⲟⲧⲉ ϩⲁⲧϩⲏ ⲛⲛⲥⲟⲧⲉ ⲉⲧϩⲏⲗ ⲉⲃⲟⲗ ⲙⲡⲁⲏⲣ ⲁⲗⲗⲁ ⲁϥϫⲓ ⲛⲁϥ ⲛⲧϩⲟⲙⲟⲗⲟⲅⲓⲁ ⲛⲧϩⲉ ⲛⲟⲩⲑⲩⲣⲱⲛ , ⲡⲁⲓ ⲉⲧϫⲱ ⲙⲙⲟⲥ ϫⲉ · ⲧⲉϥⲙⲉ ⲛⲁⲕⲱⲧⲉ ⲉⲣⲟⲕ ⲛⲧϩⲉ ⲛⲛⲉⲓϩⲟⲡⲗⲟⲛ · ⲛⲛⲉⲕⲣϩⲟⲧⲉ ϩⲁⲧϩⲏ ⲛⲛⲟⲩⲥⲟⲧⲉ ⲉϥϩⲏⲗ ϩⲙⲡⲉϩⲟⲟⲩ ·
…
27 ⲛⲁⲓ ⲇⲉ ⲉϥⲙⲉⲗⲉⲧⲁ ⲙⲙⲟⲟⲩ ⲛϭⲓⲡϩⲗⲗⲟ ⲛϫⲱⲱⲣⲉ ⲁϥϯ ⲙⲡⲉϥⲟⲩⲟⲓ ⲉⲡⲉⲥⲧⲣⲁⲧⲉⲩⲙⲁ ϩⲛⲟⲩⲛⲟϭ ⲙⲙⲛⲧϫⲁⲣϩⲏⲧ , ⲁⲓⲧⲉⲓ ⲉⲩⲛⲉϫⲥⲟⲧⲉ ·
…
28 ⲁⲩⲱ ⲛⲉⲣⲉⲛⲥⲟⲧⲉ ϩⲏⲩ ⲉⲡⲉⲓⲥⲁ ⲙⲛⲡⲁⲓ ⲙⲙⲟϥ ⲁⲩⲱ ⲙⲡⲉⲗⲁⲁⲩ ⲛϩⲏⲧⲟⲩ ϫⲱϩ ⲉⲡⲅⲉⲛⲛⲁⲓⲟⲥ ·
…
29 ⲡⲙⲁⲅⲓⲥⲧⲣⲓⲁⲛⲟⲥ ⲇⲉ ⲛⲧⲉⲣⲉϥⲛⲁⲩ ⲉⲣⲟϥ ϩⲛⲧⲉⲓⲛⲟϭ ⲙⲙⲛⲧϫⲁⲣϩⲏⲧ ⲁϥⲣϣⲡⲏⲣⲉ ϫⲉⲙⲡⲉⲗⲁⲁⲩ ϩⲛⲛⲥⲟⲧⲉ ϫⲱϩ ⲉⲣⲟϥ ⲟⲩⲇⲉ ⲙⲡⲉⲗⲁⲁⲩ ϩⲛⲛⲉⲥⲛⲏⲩ ⲃⲗⲁⲡⲧⲉⲓ ⲉⲡⲧⲏⲣϥ · ⲁⲩⲃⲟϭⲟⲩ ⲉⲃⲟⲗ ϩⲛⲛⲉⲩϩⲧⲱⲱⲣ ⲛⲧⲉⲩⲛⲟⲩ ⲁⲩⲡⲁϩⲧⲟⲩ ϩⲁⲛⲉⲟⲩⲉⲣⲏⲧⲉ ⲛⲁⲡⲁ ⲗⲟⲅⲅⲓⲛⲟⲥ ⲁⲩⲟⲩⲱϣⲧ ⲛⲁϥ ⲙⲛⲛⲉⲥⲛⲏⲩ ⲉⲧⲛⲙⲙⲁϥ ⲉⲩⲁⲓϯ ⲛⲟⲩⲥⲩⲅⲛⲱⲙⲏ ϩⲁⲧⲧⲟⲗⲙⲏⲣⲓⲁ ⲛⲧⲁⲩⲁⲁⲥ ·
…
30 ⲁⲡⲁ ⲗⲟⲅⲅⲓⲛⲟⲥ ⲇⲉ ⲛⲧⲉⲣⲉϥⲛⲁⲩ ⲉⲧⲉⲩⲙⲉⲧⲁⲛⲟⲓⲁ ⲙⲛⲧⲉⲩⲡⲓⲥⲧⲓⲥ ⲁϥϣⲁϫⲉ ⲙⲛⲡⲙⲁⲅⲓⲥⲧⲣⲓⲁⲛⲟⲥ ⲁⲩⲱ ⲙⲙⲁⲧⲟⲓ ⲉϥϫⲱ ⲙⲙⲟⲥ ϫⲉ ·
…
31 ⲉⲓⲥϩⲏⲏⲧⲉ ⲁⲧⲉⲧⲛⲛⲁⲩ ϫⲉⲁⲛⲁⲅⲱⲛⲓⲍⲉⲁⲩⲱ ⲁⲛⲥⲃⲧⲱⲧⲛ ⲙⲙⲓϣⲉ ⲉϫⲛⲧⲡⲓⲥⲧⲓⲥ ⲛⲛⲉⲓⲟⲧⲉ ϣⲁⲉϩⲣⲁⲓ ⲉⲡⲙⲟⲩ ·
…
32 ⲧⲛⲡⲁⲣⲁⲕⲁⲗⲉⲓ ⲙⲙⲱⲧⲛ ⲉⲧⲣⲉⲧⲉⲧⲛⲉⲓ ϣⲁⲧⲗⲁⲩⲣⲁ ⲙⲡϩⲉⲛⲁⲧⲟⲛ , ⲡⲙⲁ ⲉⲧⲉⲣⲉ ⲛⲉⲛⲉⲓⲟⲧⲉ ⲛϩⲏⲧϥ , ⲛⲧⲛϫⲛⲟⲩⲟⲩ ϩⲓⲧϩⲏ ⲛⲧⲉⲧⲛⲉⲝⲟⲩⲥⲓⲁ ⲉⲩⲡⲗⲏⲣⲟⲫⲟⲣⲓⲁ ⲛⲏⲧⲛ ·
…
33 ⲁⲩⲱ ⲛⲧϩⲉ ⲉⲧⲟⲩⲛⲁⲕⲉⲗⲉⲩⲉ ⲙⲙⲟⲥ ⲛⲁⲛ ⲙⲡⲉⲧⲛⲙⲧⲟ ⲉⲃⲟⲗ ⲧⲛⲥⲃⲧⲱⲧ ⲉⲟⲩⲁϩⲛ ⲛⲥⲁⲡⲉⲩϣⲁϫⲉ ·
…
34 ⲛⲉⲥⲛⲏⲩ ⲇⲉ ⲛⲉⲩⲣⲙⲟⲓϩⲉ ⲉϫⲛⲛϣⲁϫⲉ ⲉⲧⲉⲣⲉⲁⲡⲁ ⲗⲟⲅⲅⲓⲛⲟⲥ ϫⲱ ⲙⲙⲟⲟⲩ ⲛⲛⲁϩⲣⲙⲡⲁⲣⲭⲱⲛ ⲙⲛⲡⲉⲥⲧⲣⲁⲧⲉⲩⲙⲁ ⲁⲩⲱ ⲛⲉⲩϫⲱ ⲙⲙⲟⲥ ⲛⲛⲉⲩⲉⲣⲏⲩϫⲉ · ⲙⲏ ⲁⲗⲁⲁⲩ ⲛϩⲏⲧⲛ ϣⲱϫⲡ ϩⲛⲧⲗⲁⲩⲣⲁ ⲙⲡⲉⲛⲉⲓ ⲉⲡⲉⲓⲙⲁ ⲧⲟⲧⲉⲁⲩϯⲡⲉⲩⲟⲩⲟⲓ ⲉⲡⲉⲩⲉⲓⲱⲧ ⲁⲡⲁ ⲗⲟⲅⲅⲓⲛⲟⲥ ⲉⲩϫⲱ ⲙⲙⲟⲥ ϫⲉ · ⲱ ⲡⲉⲛⲉⲓⲱⲧ , ⲛⲅⲥⲟⲟⲩⲛ ⲁⲛ ϫⲉⲧⲛⲙⲡⲉⲓⲙⲁ ⲧⲏⲣⲛ ⲁⲩⲱ ⲙⲛⲟⲩⲁ ⲛϩⲏⲧⲛ ⲙⲡⲉⲛⲃⲟⲗ ; ⲛⲁϣ ⲛϩⲉ ⲧⲛⲛⲁⲟⲩⲉϩϩⲓⲥⲉ ⲉⲛⲉⲓⲣⲱⲙⲉ ⲛⲧⲛⲥⲕⲩⲗⲗⲉⲓ ⲙⲙⲟⲟⲩ ⲛⲥⲉⲉⲓ ⲉⲧⲗⲁⲩⲣⲁ ;
…
35 ⲛⲧⲟϥ ⲇⲉ ⲙⲡⲉϥⲟⲩⲱϣⲃ ⲛⲁⲩ ⲛⲗⲁⲁⲩ ϩⲱⲥ ⲉϥⲥⲟⲟⲩⲛ ⲙⲡⲉⲧϥⲛⲁⲁⲁϥ ·
…
36 ⲉⲓⲧⲁ ⲁⲩⲙⲟⲟϣⲉ ⲛⲥⲱϥ ⲧⲏⲣⲟⲩ ⲛϭⲓⲡⲙⲁⲅⲓⲥⲧⲣⲓⲁⲛⲟⲥ ⲙⲛⲛⲉⲥⲛⲏⲩ ⲧⲏⲣⲟⲩ ·
…
37 ⲛⲧⲟϥ ⲇⲉ ⲁϥⲙⲟⲟϣⲉ ϩⲓϩⲓⲏ ⲙⲙⲟⲟⲩ ϣⲁⲛⲧⲉϥⲛⲧⲟⲩ ⲉϫⲛⲛⲙϩⲁⲁⲩ ⲉⲧⲉⲣⲉⲛⲕⲉ ⲉⲥⲛⲛⲉⲩⲉⲓⲟⲧⲉ ⲛϩⲏⲧⲟⲩ , ⲉⲧⲉⲛϩⲗⲗⲟ ⲛⲉ ⲛⲧⲁⲩϣⲱⲡⲉ ϩⲁⲧⲉϥϩⲏ ,
…
38 ⲛⲁⲓ ⲛⲧⲁⲩϩⲁⲣⲉϩ ⲉⲧⲡⲓⲥⲧⲓⲥ ⲉⲧⲟⲩⲟϫ ϩⲛⲟⲩⲱⲣϫ ϣⲁⲡϫⲱⲕ ⲉⲃⲟⲗ ⲙⲡⲉⲩⲃⲓⲟⲥ ⲕⲁⲧⲁⲡⲉⲧⲉⲣⲁⲛⲁϥ ⲙⲡⲛⲟⲩⲧⲉ · ⲧⲟⲧⲉ ⲁϥⲁϩⲉⲣⲁⲧϥ ⲛⲧⲙⲏⲧⲉ ⲛⲛⲧⲁⲫⲟⲥ ⲁϥⲡⲱⲣϣ ⲛⲛⲉϥϭⲓϫ ⲉⲃⲟⲗ ⲁϥϣⲗⲏⲗ ⲁⲩⲱ ⲁϥⲟⲩⲉϩⲥⲁϩⲛⲉ ⲉⲧⲣⲉⲩϣⲗⲏⲗ ⲛⲙⲙⲁϥ · ⲛⲧⲉⲣⲉϥϫⲱⲕ ⲉⲃⲟⲗ ⲙⲡⲉϣⲗⲏⲗ ⲁⲩϫⲱ ⲙⲡϩⲁⲙⲏⲛ ⲧⲏⲣⲟⲩ ϩⲓⲟⲩⲥⲟⲡ ·
…
39 ⲁϥⲟⲩⲱⲛ ⲛⲣⲱϥ ⲛϭⲓⲁⲡⲁ ⲗⲟⲅⲅⲓⲛⲟⲥ ⲁϥϫⲓⲥⲉ ⲛⲧⲉϥⲥⲙⲏ ⲙⲡⲉⲩⲙⲧⲟ ⲉⲃⲟⲗ ⲉϥϫⲱ ⲙⲙⲟⲥ ϫⲉ · ⲛⲁⲉⲓⲟⲧⲉ ⲉⲧⲟⲩⲁⲁⲃ ,
…
40 ⲉϩⲉ ⲡⲟⲩⲱϣ ⲙⲡⲛⲟⲩⲧⲉ ⲡⲉ ⲛⲧⲛϫⲓ ⲙⲡⲇⲟⲅⲙⲁ ⲛⲗⲉⲱⲛ ⲛⲧⲛϩⲩⲡⲟⲅⲣⲁⲫⲉ ⲉⲣⲟϥ ;
…
41 ⲛⲧⲉⲩⲛⲟⲩ ⲁⲩⲥⲙⲏ ϣⲱⲡⲉ ϩⲛⲛⲧⲁⲫⲟⲥ ⲉⲧⲉⲣⲉⲛⲉⲥⲱⲙⲁ ⲛⲛⲉⲧⲟⲩⲁⲁⲃ ⲛϩⲏⲧⲟⲩ ⲛϣⲟⲙⲛⲧ ⲛⲥⲟⲡ ⲉⲥϫⲱ ⲙⲙⲟⲥ ϫⲉ · ⲁⲛⲁⲑⲉⲙⲁ ⲉⲡⲇⲟⲅⲙⲁ ⲛⲗⲉⲱⲛ ⲡⲁⲥⲉⲃⲏⲥ · ⲙⲡⲣⲧⲁⲩⲉⲡⲉϥⲣⲁⲛ ⲉⲃⲟⲗ ϩⲛⲣⲱⲧⲛ ⲟⲩⲇⲉ ⲙⲡⲣⲕⲟⲓⲛⲱⲛⲉⲓ ⲙⲛⲗⲁⲁⲩ ⲛⲣⲱⲙⲉ ⲉϥϫⲓ ⲙⲡⲇⲟⲅⲙⲁ ⲉⲧⲙⲙⲁⲩ · ⲁⲛⲁⲑⲉⲙⲁ ⲉⲛⲉⲧⲛⲁϩⲩⲡⲟⲅⲣⲁⲫⲉ ⲉⲡⲧⲟⲙⲟⲥ ⲛⲗⲉⲱⲛ ⲉⲙⲙⲛⲧⲣⲉϥϫⲓⲟⲩⲁ ⲛⲗⲉⲱⲛ ,
…
42 ⲡⲁⲓ ⲅⲁⲣ ⲉϥⲙⲉϩ ⲙⲙⲛⲧⲣⲉϥϫⲓⲟⲩⲁ ⲉϩⲟⲩⲛ ⲉⲧⲙⲛⲧⲛⲟⲩⲧⲉ ⲙⲡⲉⲭⲣⲓⲥⲧⲟⲥ ⲉϥⲡⲱϣ ⲙⲙⲟⲥ ⲙⲫⲩⲥⲓⲥ ⲥⲛⲧⲉ ⲙⲛⲛⲥⲁ ⲧⲙⲛⲧⲟⲩⲁ ⲙⲡⲉⲭⲣⲓⲥⲧⲟⲥ ·
…
43 ⲛⲧⲉⲣⲟⲩⲥⲱⲧⲙ ⲇⲉ ⲉⲧⲉⲥⲙⲏ ⲉⲧⲙⲙⲁⲩ ⲛⲧⲁⲥϣⲱⲡⲉ ⲉⲃⲟⲗ ϩⲛⲧⲙⲏⲧⲉ ⲛⲛⲥⲱⲙⲁ ⲛⲛⲉⲧⲟⲩⲁⲁⲃ ⲛϭⲓⲡⲙⲁⲅⲓⲥⲧⲣⲓⲁⲛⲟⲥ ⲙⲛⲡⲉⲥⲧⲣⲁⲧⲉⲩⲙⲁ ⲧⲏⲣϥ ⲉⲧⲟⲩⲏϩ ⲛⲥⲱⲟⲩ ⲁⲩⲣϣⲡⲏⲣⲉ ⲉⲙⲁⲧⲉ ⲁⲩⲱ ⲁⲩⲡⲁϩⲧⲟⲩ ϩⲁⲛⲟⲩⲉⲣⲏⲧⲉ ⲛⲁⲡⲁ ⲗⲟⲅⲅⲓⲛⲟⲥ ⲙⲛⲛⲕⲉⲙⲟⲛⲁⲭⲟⲥ ⲉⲧⲛⲙⲙⲁϥ ⲉⲧⲣⲉⲩϯ ⲛⲁⲩ ⲛⲛⲟⲩⲥⲩⲅⲛⲱⲙⲏ ⲛⲥⲉϣⲗⲏⲗ ⲉϫⲱⲟⲩ ⲉⲧⲣⲉⲩⲉⲓ ⲉⲡⲟⲟⲟⲩⲛ ⲛⲧⲙⲉ ·
…
44 ⲁⲩⲱ ⲛⲧⲉⲩⲛⲟⲩ ⲁϩⲁϩ ⲉⲃⲟⲗ ϩⲙⲡⲉⲥⲧⲣⲁⲧⲉⲩⲙⲁ ⲁⲡⲟⲧⲁⲥⲥⲉ ⲛⲧⲉⲩⲙⲛⲧⲙⲁⲧⲟⲓ ⲙⲛⲛⲉϩⲃⲏⲩⲉ ⲙⲡⲉⲓⲃⲓⲟⲥ ⲉⲧϣⲟⲩⲉⲓⲧ ⲁⲩⲣⲙⲟⲛⲁⲭⲟⲥ ⲁⲩϣⲱⲡⲉ ϩⲁⲧϩⲩⲡⲟⲧⲁⲅⲏ ⲙⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ϩⲓⲧⲛⲧϩⲟⲧⲉ ⲛⲧⲁⲥⲉⲓ ⲉϫⲱⲟⲩ ·
…
45 ⲡⲙⲁⲅⲓⲥⲧⲣⲓⲁⲛⲟⲥ ⲇⲉ ⲙⲛⲡⲕⲉⲥⲉⲉⲡⲉ ⲛⲙⲙⲁⲧⲟⲓ ⲁⲩⲕⲟⲧⲟⲩ ⲉϩⲟⲩⲛⲉⲧⲡⲟⲗⲓⲥ ⲉⲩⲧⲁⲩⲟ ⲛⲛⲉϣⲡⲏⲣⲉ ⲛⲧⲁⲩⲛⲁⲩ ⲉⲣⲟⲟⲩ ·
…
46 ⲁⲩⲱ ⲛⲧⲉⲣⲉⲛⲁⲧⲡⲟⲗⲓⲥ ⲥⲱⲧⲙ ⲉⲛⲉϭⲟⲙ ⲙⲛⲛⲉϣⲡⲏⲣⲉ ⲛⲧⲁⲩϣⲱⲡⲉ ϩⲓⲧⲉⲛⲁⲡⲁ ⲗⲟⲅⲅⲓⲛⲟⲥ ⲉⲩⲧⲁϫⲣⲟ ⲉⲡⲉϩⲟⲩⲟ ϩⲛⲧⲡⲓⲥⲧⲓⲥ ⲁⲩⲱ ⲁⲩϯⲡⲉⲩⲟⲩⲟⲓ ϩⲓⲟⲩⲥⲟⲡ ⲉⲡⲉⲡⲣⲁⲓⲧⲱⲣⲓⲟⲛ , ⲁⲩⲉⲓⲛⲉ ⲉⲃⲟⲗ ⲛⲛⲁⲕⲁⲕⲓⲟⲥ ⲡⲁⲩⲅⲟⲩⲥⲧⲁⲗⲓⲟⲥ ⲡⲁⲓ ⲉⲧⲁⲛⲁⲅⲕⲁⲍⲉ ⲙⲙⲟⲟⲩ ⲉⲕⲟⲓⲛⲱⲛⲉⲓ ⲉⲡⲧⲟⲙⲟⲥ ⲛⲗⲉⲱⲛ , ⲁⲩⲣⲟⲕϩϥ ϩⲛⲧⲙⲏⲧⲉ ⲛⲧⲡⲟⲗⲓⲥ ·
…
47 ϯϫⲱ ⲇⲉ ⲙⲙⲟⲥ ϫⲉⲛⲧⲁⲩⲧϭⲁⲉⲓⲟϥ ⲁⲛ ⲉⲡⲙⲟⲩ ⲛⲧⲉⲓϩⲉ ϩⲁⲡⲗⲱⲥ ,
…
48 ⲁⲗⲗⲁ ⲟⲩⲁⲡⲟⲫⲁⲥⲓⲥ ⲛⲧⲉⲡϩⲁⲡ ⲙⲡⲛⲟⲩⲧⲉ ⲧⲉ ϩⲓⲧⲛⲧⲧⲁⲡⲣⲟ ⲙⲡⲛⲟϭ ⲁⲡⲁ ⲗⲟⲅⲅⲓⲛⲟⲥ ⲙⲛⲛⲉⲥⲛⲏⲩ ⲉⲧⲛⲙⲙⲁϥ ⲛⲧϩⲉ ⲛⲟⲩⲡⲣⲟⲫⲏⲧⲓⲁ ⲧⲁⲓ ⲛⲧⲁϥϫⲟⲟⲥ ⲛϭⲓⲡⲉⲛⲉⲡⲱⲣ ⲇⲁⲩⲉⲓⲇ ϩⲙⲡⲙⲉϩⲙⲏⲧ ⲙⲯⲁⲗⲙⲟⲥ ⲉϥϩⲩⲙⲛⲉⲩⲉ ⲛⲧⲉⲓϩⲉ ϫⲉ · ⲟⲩⲕⲱϩⲧ ⲙⲛⲟⲩⲑⲏⲛ ⲧⲉ ⲧⲙⲉⲣⲓⲥ ⲙⲡⲉⲩϫⲱ ·
…
49 ⲡⲉⲡⲓⲥⲕⲟⲡⲟⲥ ⲇⲉ ⲛⲧϩⲁⲓⲣⲉⲥⲓⲥ ⲉⲧⲙⲙⲁⲩ ⲛⲧⲉⲣⲉϥⲛⲁⲩ ⲉⲡⲉⲑⲉⲣⲃⲟⲥ ⲛⲧⲁϥϣⲱⲡⲉ ,
…
50 ⲁϥϣⲓⲃⲉ ⲙⲡⲉϥⲥⲭⲏⲙⲁ ⲁϥϯ ϩⲓⲱⲱϥ ⲛϩⲉⲛϩⲟⲓⲧⲉ ⲛⲕⲟⲥⲙⲓⲕⲟⲛ ⲁϥⲉⲓ ⲉⲃⲟⲗ ϩⲛⲧⲡⲟⲗⲓⲥ ⲁϥⲡⲱⲧ ϩⲓⲧⲛⲧϩⲟⲧⲉ ⲛⲧⲁⲥⲉⲓ ⲉϫⲱϥ ⲁⲩⲱ ⲙⲡⲟⲩϭⲛⲧϥ ϣⲁⲉϩⲟⲩⲛ ⲉⲡϩⲟⲟⲩ ⲛϩⲟⲟⲩ ·
…
51 ⲁⲧⲉⲕⲕⲗⲏⲥⲓⲁ ⲡⲁⲣϩⲏⲥⲓⲁⲍⲉ ⲙⲙⲟⲥ ϩⲓⲧⲛⲛⲇⲟⲅⲙⲁ ⲛⲧⲡⲓⲥⲧⲓⲥ ⲛⲛⲟⲣⲑⲟⲇⲟⲝⲟⲥ ⲁⲩⲱ ⲛⲉⲥϯ ⲉⲧϩⲏ ⲙⲙⲏⲛⲉ ϩⲓⲧⲙⲡⲥⲟⲡⲥ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ ·
…
52 ⲙⲛⲛⲥⲁⲡⲉⲓⲁⲅⲱⲛ ⲛⲧⲁϥϩⲩⲡⲟⲙⲓⲛⲉ ⲉⲣⲟϥ ⲛϭⲓⲡⲙⲁⲕⲁⲣⲓⲟⲥ ⲁⲡⲁ ⲗⲟⲅⲅⲓⲛⲟⲥ ⲁϥⲣⲕⲉϫⲟⲩⲱⲧⲉ ⲛⲣⲟⲙⲡⲉ ⲉϥⲁⲣⲭⲉⲓ ⲉϫⲛⲙⲙⲟⲛⲁⲥⲧⲏⲣⲓⲟⲛ ⲛⲧⲗⲁⲩⲣⲁ ⲁϥⲙⲡϣⲁ ⲉⲧⲣⲉϥⲕⲁⲛⲉϥϭⲓϫ ⲉϫⲛⲛⲃⲁⲗ ⲙⲡⲉϥⲉⲓⲱⲧ ⲁⲡⲁ ⲗⲟⲩⲅⲓⲟⲥ ⲛⲧϩⲉ ⲛⲓⲱⲥⲏⲫ ⲛⲧⲁϥⲕⲱ ⲛⲛⲉϥϭⲓϫ ⲉϫⲛ ⲛⲃⲁⲗ ⲙⲡⲉϥⲉⲓⲱⲧ ⲓⲁⲕⲱⲃ ·
…
53 ⲁⲡⲁ ⲗⲟⲅⲅⲓⲛⲟⲥ ⲇⲉ ⲛⲉϥⲙⲟⲟⲛⲉ ⲛⲛⲉⲥⲛⲏⲩ ϩⲛⲉⲡⲓⲥⲧⲏⲙⲉⲓ ⲛⲓⲙ ⲁⲩⲱ ⲛⲉϥϩⲱⲛ ⲉⲧⲟⲟⲧⲟⲩ ⲉⲧⲣⲉⲩⲡⲱⲧ ⲉⲃⲟⲗ ⲙⲡⲉⲟⲟⲩ ⲉⲧϣⲟⲩⲉⲓⲧ ⲉⲧⲉⲡⲁⲓ ⲡⲉ ⲧⲁⲣⲭⲏ ⲛⲙⲡⲁⲑⲟⲥ ⲧⲏⲣⲟⲩ ·
…
54 ϩⲓⲧⲙⲡⲉⲟⲟⲩ ⲅⲁⲣ ⲉⲧϣⲟⲩⲉⲓⲧ ϣⲁⲣⲉⲧⲙⲛⲧⲙⲁⲓϩⲟⲙⲛⲧ ϣⲱⲡⲉ , ⲉⲧⲉⲧⲁⲓ ⲧⲉ ⲧⲛⲟⲩⲛⲉ ⲛⲙⲡⲉⲧϩⲟⲟⲩ , ϣⲁⲣⲉⲧⲙⲛⲧⲙⲁⲓϩⲟⲙⲛⲧ ϫⲡⲉⲡϭⲱⲛⲧ , ϣⲁⲣⲉⲡϭⲱⲛⲧϫⲡⲉⲧⲙⲛⲧϫⲁⲥⲓϩⲏⲧ , ϣⲁⲣⲉⲡϭⲱⲛⲧ ϫⲡⲉⲡⲉⲫⲑⲟⲛⲟⲥ ⲡⲉⲑⲏⲣⲓⲟⲛ ⲉⲧϩⲟⲟⲩ ·
…
55 ⲛⲉϣⲁϥϯⲥⲃⲱ ⲛⲁⲩ ⲟⲛ ⲡⲉ ⲉⲧⲣⲉⲩⲡⲣⲟⲥⲉⲭⲉ ⲉⲡϩⲱⲃ ⲛϭⲓϫ ϩⲛⲟⲩⲥⲡⲟⲩⲇⲏ ⲙⲡⲕⲁⲓⲣⲟⲥ ⲉⲧⲡⲣⲉⲡⲉⲓ ⲁⲩⲱ ⲉⲧⲣⲉⲩⲉⲓⲣⲉ ⲛⲛⲉⲩⲥⲩⲛⲁⲝⲓⲥ ϩⲛⲟⲩϩⲟⲧⲉ ⲛⲧⲉⲡⲛⲟⲩⲧⲉ ·
…
56 ⲛⲉϥⲉⲓⲣⲉ ⲇⲉ ⲙⲙⲟϥ ⲛⲁⲩ ⲛⲥⲙⲟⲧ ϩⲛϩⲱⲃ ⲛⲓⲙ ⲉϥⲑⲁⲗⲡⲉⲓ ⲙⲙⲟⲟⲩ ⲧⲏⲣⲟⲩ ⲉⲓⲧⲉ ϩⲛⲧⲉⲧⲣⲟⲫⲏ ⲛⲥⲱⲙⲁⲧⲓⲕⲟⲛ ⲉⲓⲧⲉ ϩⲛⲧⲉⲥⲃⲱ ⲙⲡϫⲟⲉⲓⲥ ·
…
57 ⲛⲉϥϣⲟⲟⲡ ⲅⲁⲣ ϩⲛⲧⲉⲩⲙⲏⲧⲉ ⲛⲧϩⲉ ⲛⲛⲟⲩⲉⲡⲓⲥⲕⲟⲡⲟⲥ ⲉⲣⲉⲟⲩⲟⲛ ⲛⲓⲙ ⲉⲧⲟⲩⲱϣ ⲉⲱⲛϩ ⲕⲁⲧⲁⲡⲛⲟⲙⲟⲥ ⲙⲡⲛⲟⲩⲧⲉ ϭⲱϣⲧ ⲉⲣⲟϥ ⲛⲥⲉⲥⲟⲟⲩⲧⲛ ⲙⲡⲉⲩⲃⲓⲟⲥ ⲕⲁⲧⲁⲛⲉϥⲁⲣⲉⲧⲏ ·
…
58 ⲛⲓⲙ ⲅⲁⲣ ⲡⲉⲛⲧⲁϥⲙⲉⲥⲧⲉ ⲡⲉⲟⲟⲩ ⲉⲧϣⲟⲩⲉⲓⲧ ⲛⲧϩⲉ ⲙⲡⲉⲧⲙⲙⲁⲩ ;
…
59 ⲏ ⲛⲓⲙ ⲡⲉⲛⲧⲁϥϣⲱⲡⲉ ⲉϥϫⲟⲥⲉ ϩⲛⲛⲉϥⲡⲣⲁⲝⲓⲥ ⲉϥⲑⲃⲃⲓⲏⲩ ϩⲛⲛⲉϥⲙⲉⲉⲩⲉ ⲛⲧϩⲉ ⲙⲡⲁⲓ ; ⲛⲉϥⲑⲃⲃⲓⲏⲩ ϩⲛⲥⲙⲟⲧ ⲛⲓⲙ ⲉⲣⲉⲡⲉϥϩⲟ ⲡⲁϩⲧ ⲉⲡⲉⲥⲏⲧ ⲉϥⲙⲟⲟϣⲉ ϩⲛⲟⲩϭⲓⲛⲙⲟⲟϣⲉ ⲙⲙⲛⲧⲥⲁⲃⲉ ·
…
60 ⲛⲉϥⲫⲟⲣⲉⲓ ⲅⲁⲣ ⲁⲛ ⲛⲧϩⲉ ⲛⲛⲁⲡⲉⲓⲟⲩⲟⲉⲓϣ ϩⲛⲟⲩⲥⲭⲏⲙⲁ ⲛⲛⲟⲩϫ ⲉⲩϫⲓ ⲙⲉⲛ ⲙⲡⲉⲥⲙⲟⲧ ⲛⲧⲙⲛⲧⲉⲩⲥⲉⲃⲏⲥ ϩⲓⲃⲟⲗ ⲉⲣⲉⲡⲉⲩⲥⲁ ⲛϩⲟⲩⲛ ⲙⲉϩ ⲛϩⲩⲡⲟⲕⲣⲓⲥⲓⲥ ϩⲓⲁⲛⲟⲙⲓⲁ ·
…
61 ⲛⲓⲙ ⲡⲉⲛⲧⲁϥϣⲱⲡⲉ ⲛϩⲁⲣⲉϣϩⲏⲧ ⲛⲧϩⲉ ⲙⲡⲁⲓ , ⲉϥϩⲟⲣϣ ⲛϩⲏⲧ ⲉϫⲛⲛⲉⲛⲧⲁⲩϣⲟϥⲧ ϩⲛⲛⲉⲩⲡⲁⲣⲁⲡⲧⲱⲙⲁ ϣⲁⲛⲧⲉϥⲕⲁⲑⲟⲣⲑⲟⲩ ⲙⲙⲟⲟⲩ ⲉⲧⲉⲩⲁⲣⲭⲏ ⲛⲕⲉⲥⲟⲡ
…
62 _warn:empty_norm_ⲉϥ ⲛⲧⲉⲓϩⲉ ⲁϥⲁⲡⲟⲇⲏⲙⲉⲓ ϣⲁⲡϫⲟⲉⲓⲥ ⲡⲉⲧϥⲙⲉ ⲙⲙⲟϥ ⲛⲥⲟⲩⲥⲛⲁⲩ ⲛⲙϣⲓⲣ , ⲉⲁϥⲙⲧⲟⲛ ⲙⲙⲟϥ ⲙⲛⲛⲉϥⲉⲓⲟⲧⲉ ⲧⲏⲣⲟⲩ ⲛⲁⲓ ⲛⲧⲁϥⲧⲛⲧⲱⲛϥ ⲉⲣⲟⲟⲩ ϩⲛⲛⲉϥⲕⲁⲧⲟⲣⲑⲱⲙⲁ ⲙⲛⲡⲉϥⲃⲓⲟⲥ , ⲉⲧⲉⲙⲡⲁⲧⲣⲓⲁⲣⲭⲏⲥ ⲛⲉ ⲙⲛⲛⲉⲡⲣⲟⲫⲏⲧⲏⲥ ⲙⲛⲛⲁⲡⲟⲥⲧⲟⲗⲟⲥ ⲙⲛⲛⲉⲧⲟⲩⲁⲁⲃ ⲧⲏⲣⲟⲩ ⲛⲧⲁⲩⲣⲡⲟⲩⲱϣ ⲙⲡⲛⲟⲩⲧⲉ · ⲱ ϫⲉⲟⲩⲏⲣ ⲡⲉ ⲡϩⲏⲃ ⲉⲛⲧⲁϥϣⲱⲡⲉ ⲙⲡⲉϩⲟⲟⲩ ⲛⲧⲁϥⲙⲧⲟⲛ ⲙⲙⲟϥ ⲛϩⲏⲧϥ ·
…
63 ⲛⲉⲥⲛⲏⲧ ⲙⲙⲟⲛⲁⲭⲟⲥ ⲙⲙⲁⲧⲉ ⲁⲛ ⲁⲗⲗⲁ ⲧⲕⲉⲡⲟⲗⲓⲥ ⲣⲁⲕⲟⲧⲉ ⲙⲛⲛⲉⲥⲧⲟϣ , ⲙⲁⲗⲓⲥⲧⲁ ⲛⲉⲧϩⲙⲡⲉⲩⲕⲱⲧⲉ , ⲁⲩⲱϣ ⲉⲃⲟⲗ ϩⲛϩⲉⲛⲛⲟϭ ⲛⲥⲙⲏ ⲙⲛϩⲉⲛⲣⲉⲙⲓⲟⲟⲩⲉ ϫⲉⲁⲩϥⲓ ⲛⲧⲟⲟⲧⲟⲩ ⲛⲛⲟⲩⲉⲓⲱⲧ ⲛⲧⲉⲓⲙⲓⲛⲉ ·
…
64 ⲁⲣⲱ ⲛⲉⲣⲉⲡⲁϣⲕⲁⲕ ⲙⲡⲉⲩⲣⲓⲙⲉ ⲧⲏϩ ⲙⲛⲡϩⲩⲙⲛⲟⲥ ⲉⲧⲟⲩϫⲱ ⲙⲙⲟϥ ,
…
65 ⲛϩⲗⲗⲟ ⲙⲉⲛ ⲉⲩϣⲓⲛⲉ ⲛⲥⲁⲡϭⲉⲣⲱⲃ ⲛⲧⲉⲩⲙⲛⲧϩⲗⲗⲟ , ⲛϣⲏⲣⲉ ϣⲏⲙ ⲛⲥⲁⲡⲉⲭⲁⲗⲓⲛⲟⲩⲥ ⲛⲧⲉⲩⲥⲟⲫⲣⲟⲥⲩⲛⲏ , ⲛⲉⲛⲧⲁⲩⲉⲓ ⲉϩⲟⲩⲛ ⲛⲃⲣⲣⲉ ϩⲁⲧϩⲩⲡⲟⲧⲁⲅⲏ ⲉⲩϣⲓⲛⲉ ⲛⲥⲁⲡⲉⲧⲛⲁϫⲓ ⲙⲟⲉⲓⲧ ϩⲏⲧⲟⲩ ⲉϩⲟⲩⲛ ⲉⲧⲙⲛⲧⲣⲣⲟ ⲛⲙⲡⲏⲩⲉ , ⲛⲉⲧϩⲙⲡⲅⲁⲙⲟⲥ ⲛⲥⲁⲡⲉⲩⲣⲉϥⲥⲙⲛⲛⲟⲙⲟⲥ , ⲛϩⲏⲕⲉ ⲛⲥⲁⲡⲉⲩϥⲁⲓⲣⲟⲟⲩϣ , ⲛⲉⲧϣⲱⲛⲉ ⲛⲥⲁⲡⲉⲧⲧⲁⲗϭⲟ ⲛⲛⲉⲩϣⲱⲛⲉ ⲉⲓⲧⲉ ⲛⲁⲧⲉⲯⲩⲭⲏ ⲉⲓⲧⲉ ⲛⲁⲡⲥⲱⲙⲁ ·
…
66 ϩⲁⲡⲁⲝ ϩⲁⲡⲗⲱⲥ ⲉⲓⲧⲉ ⲙⲙⲟⲛⲁⲭⲟⲥ ⲉⲓⲧⲉ ⲛⲕⲟⲥⲙⲓⲕⲟⲛ ⲛⲉϥϥⲓⲣⲟⲟⲩϣ ϩⲁⲣⲟⲟⲩ ⲧⲏⲣⲟⲩ ⲉⲧⲣⲉⲩⲟⲩϫⲁⲓ , ⲉϥⲡⲁⲣϩⲓⲥⲧⲁ ⲙⲙⲟⲟⲩ ⲧⲏⲣⲟⲩ ⲉⲩⲟⲩⲁⲁⲃ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
67 ⲡⲁⲓ ⲡⲉⲟⲟⲩ ⲙⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲛϩⲟⲙⲟⲟⲩⲥⲓⲟⲛ ⲁⲧⲱ ⲛⲣⲉϥⲧⲁⲛϩⲟ ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ ϣⲁⲉⲛⲉϩ ⲛⲉⲛⲉϩ · ϩⲁⲙⲏⲛ ·
…