1 ⲁⲥϣⲱⲡⲉ ⲇⲉ ⲛⲟⲩϩⲟⲟⲩ ⲁⲩⲥϩⲓⲙⲉ ⲉⲓⲛⲉ ϣⲁⲣⲟϥ ⲙⲡⲉⲥϣⲏⲣⲉ ⲉⲣⲉⲟⲩⲇⲁⲓⲙⲟⲛⲓⲟⲛ ⲛⲙⲙⲁϥ , ⲉⲁⲡⲉϥϩⲟ ϭⲱⲟⲩϭ ⲛⲥⲁⲡⲁϩⲟⲩⲟ ϩⲓⲧⲛⲧⲉⲛⲉⲣⲅⲉⲓⲁ ⲙⲡⲇⲁⲓⲙⲱⲛ ⲁⲩⲱ ⲛⲉϥϩⲓⲧⲉ ⲙⲙⲟϥ ⲙⲙⲏⲛⲉ ⲉϥⲑⲗⲓⲃⲉ ⲙⲙⲟϥ ·
…
2 ⲧⲉϥⲙⲁⲁⲩ ⲇⲉ ⲁⲥⲡⲁⲣⲁⲕⲁⲗⲉⲓ ⲙⲡⲡⲉⲧⲟⲩⲁⲁⲃ ⲉⲧⲣⲉϥϣⲗⲏⲗ ⲉϫⲱϥ ·
…
3 ⲛⲧⲟϥ ⲇⲉ ⲁϥⲡⲱⲣϣⲛⲉϥϭⲓϫ ⲉⲃⲟⲗ ⲁϥϣⲗⲏⲗ ⲉϥϫⲱ ⲙⲙⲟⲥ ϫⲉ · ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲧⲣϩⲱⲃ ⲉⲡⲉⲛⲟⲩϫⲁⲓ , ⲉϣⲱⲡⲉ ⲡⲉⲕⲟⲩⲱϣ ⲡⲉ , ⲉⲕⲉⲭⲁⲣⲓⲍⲉ ⲙⲡⲧⲁⲗϭⲟ ⲙⲡⲉⲓϣⲏⲣⲉ ϣⲏⲙ ·
…
4 ⲁⲩⲱ ⲛⲧⲉⲓϩⲉ ⲉϥⲛⲓϥⲉ ⲉϩⲟⲩⲛ ϩⲙⲡϩⲟ ⲙⲡϣⲏⲣⲉ ϣⲏⲙ ·
…
5 ⲛⲧⲉⲩⲛⲟⲩ ⲁⲡⲇⲁⲓⲙⲱⲛⲓⲟⲛ ⲉⲓ ⲉⲃⲟⲗ ⲛϩⲏⲧϥ ⲁⲡⲉϥϩⲟ ϣⲱⲡⲉ ⲛⲧϩⲉ ⲉⲛⲉϥⲟ ⲙⲙⲟⲥ ⲛϣⲟⲣⲡ · ⲁⲩⲡⲱⲧ ⲉⲡⲉⲩⲏⲓ ⲉⲩϯⲉⲟⲟⲩ ⲙⲡⲛⲟⲩⲧⲉ ·
…
6 ⲁⲩⲱ ⲛⲧⲉⲣⲟⲩⲛⲁⲩ ⲉϩⲁϩ ⲉⲩⲛⲏⲩ ϣⲁⲣⲟⲟⲩ ⲁⲧⲉⲭⲣⲉⲓⲁ ϣⲱⲡⲉ ⲉⲧⲣⲉⲩⲧⲱϭ ⲛϩⲉⲛⲕⲟⲩⲓ ⲛⲛⲟⲉⲓⲕ ⲉⲧⲃⲉⲧⲉⲩⲭⲣⲉⲓⲁ ⲙⲛⲛϣⲙⲙⲟ ⲙⲛⲛⲉⲧⲛⲏⲩ ϣⲁⲣⲟⲟⲩ ·
…
7 ⲁⲓⲧⲉⲓ ⲉⲣⲉⲛⲟⲉⲓⲕ ⲡⲟⲣϣ ϩⲙⲡⲣⲏ ⲁⲩⲛⲟϭ ⲙⲙⲟⲩ ⲛϩⲱⲟⲩ ϣⲟⲩⲟ ⲉⲡⲉⲥⲏⲧ ϩⲛⲟⲩϣⲡⲛϣⲱⲡ ·
…
8 ⲁⲩⲱ ⲛⲧⲉⲩⲛⲟⲩ ⲁⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲁϩⲉⲣⲁⲧϥ ⲁϥϣⲗⲏⲗ ⲉϥϫⲱ ⲙⲙⲟⲥ ϫⲉ · ⲡⲛⲟⲩⲧⲉ ⲙⲡⲧⲏⲣϥ ⲁⲩⲱ ⲡⲇⲩⲙⲓⲟⲩⲣⲅⲟⲥ ⲛⲧⲉⲕϯⲥⲓⲥ , ⲉⲕⲉⲟⲩⲉϩⲥⲁϩⲛⲉ ⲙⲡⲓⲙⲟⲩ ⲛϩⲱⲟⲩ ⲛϥⲡⲁⲣⲁⲅⲉ ⲙⲙⲟⲛ ·
…
9 ⲁⲩⲱ ⲛⲧⲉⲩⲛⲟⲩ ⲁⲛⲉⲕⲗⲟⲟⲗⲉ ⲥⲓⲛⲉ ⲉⲃⲟⲗ ϩⲙⲡⲙⲁ ⲉⲧⲙⲙⲁⲩ ⲉⲧⲉⲣⲉⲛⲟⲉⲓⲕ ⲛϩⲏⲧϥ ⲙⲡⲉⲟⲩⲧⲗϯⲗⲉ ⲛⲟⲩⲱⲧ ϩⲉ ⲉϫⲛ ⲛⲟⲉⲓⲕ , ⲉⲁⲡⲉϥϣⲗⲏⲗ ⲣⲧϩⲉ ⲛⲟⲩⲥⲕⲏⲡⲉ ϩⲙⲡⲙⲁ ⲉⲧⲉⲣⲉⲛⲟⲉⲓⲕ ⲛϩⲏⲧϥ ⲙⲡⲉⲟⲩⲧⲗϯⲗⲉ ⲛⲟⲩⲱⲧ ϩⲉ ⲉϫⲛ ⲛⲟⲉⲓⲕ ·
…
10 ⲁⲥϣⲱⲡⲉ ⲇⲉ ⲟⲛ ⲛⲟⲩⲥⲟⲡ ⲉϥϩⲙⲟⲟⲥ ϩⲛⲧⲉϥⲣⲓ ⲉϥⲣϩⲱⲃ ⲉⲛⲉⲥⲭⲟⲗⲁⲕⲓⲛ ⲁⲩⲱ ⲉϥⲙⲉⲗⲉⲧⲁ ⲙⲡϣⲁϫⲉ ⲙⲡⲛⲟⲩⲧⲉ , ⲁⲥⲉⲓ ϣⲁⲣⲟϥ ⲛϭⲓⲟⲩⲥϩⲓⲙⲉ ⲉⲥϣⲱⲛⲉ ⲉⲧⲉⲥϭⲓϫ ⲉϣⲁⲩⲙⲟⲩⲧⲉ ⲉⲣⲟϥ ϩⲓⲧⲛⲛⲥⲁⲉⲓⲛ ϫⲉⲁⲙⲓⲁⲛⲧⲱⲛ ⲉⲧⲉⲡⲁⲓ ⲡⲉ ⲁⲧⲧⲁⲗϭⲟ · ⲁⲥⲉⲓ ⲛⲥⲁⲡⲁϩⲟⲩⲟ ⲛⲧⲣⲓ ⲁⲥⲡⲁⲣⲁⲕⲁⲗⲉⲓ ⲙⲙⲟϥ ⲉⲥϫⲱ ⲙⲙⲟⲥ ϫⲉ · ⲁⲣⲓⲧⲁⲅⲁⲡⲏ ⲛⲅϣⲗⲏⲗ ⲉϫⲱⲓ ·
…
11 ⲛⲧⲟϥ ⲇⲉ ⲁϥⲁⲡⲉⲓⲗⲏ ⲉⲣⲟⲥ ⲉⲧⲣⲉⲥⲁⲛⲁⲭⲱⲣⲉⲓ ⲛⲁⲥ · ⲁⲥϭⲱ ⲉⲥⲕⲱ ⲛⲣⲱⲥ ⲉⲥⲣϩⲟⲧⲉ ⲉϣⲁϫⲉ ·
…
12 ⲛⲧⲟϥ ⲇⲉ ⲛⲧⲉⲣⲉϥⲉⲓⲙⲉ ϩⲙⲡⲉⲡⲛⲉⲩⲙⲁ ⲉⲡⲛⲟϭ ⲛϩⲓⲥⲉ ⲉⲧϩⲓϫⲱⲥ ⲁϥⲧⲱⲟⲩⲛ ⲁϥϣⲧⲁⲙ ⲙⲡⲣⲟ ⲙⲡϣⲟⲩϣⲧ ⲉⲧⲥϭⲱϣⲧ ⲉϩⲟⲩⲛ ⲛϩⲏⲧϥ ⲡⲉϫⲁϥ ⲛⲁⲥ ϫⲉ · ⲃⲱⲕ ϩⲛⲟⲩⲉⲓⲣⲏⲛⲏ , ⲉⲣⲉⲡϫⲟⲉⲓⲥ ⲭⲁⲣⲓⲍⲉ ⲛⲏ ⲙⲡⲧⲗϭⲟ · ⲁⲩⲱ ⲁⲥⲟⲩϫⲁⲓ ⲛϭⲓⲧⲉⲥϩⲓⲙⲉ ϫⲓⲛⲛ ⲉⲧⲉⲩⲛⲟⲩ ⲉⲧⲙⲙⲁⲩ ·
…
13 ⲁⲥϣⲱⲡⲉ ⲇⲉ ⲛⲛⲟⲩϩⲟⲟⲩ ⲁⲩⲣⲱⲙⲉ ⲉⲓ ϣⲁⲣⲟϥ ⲉⲧⲉϥϫⲓ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁϥⲥⲡⲥⲱⲡϥ ⲉⲧⲣⲉϥϯ ⲛⲁϥ ⲛⲛⲟⲩⲕⲗⲁϥⲧ ⲉⲧⲱϥ ⲧⲉ ϫⲉⲕⲁⲥ ⲉⲥⲉϣⲱⲡⲉ ⲛⲁϥ ⲛⲛⲁϣⲧⲉ ·
…
14 ⲛⲧⲉⲣⲉϥϫⲓⲧⲥ ⲇⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ·
…
15 ⲛⲧⲉⲣⲉϥⲃⲱⲕ ⲇⲉ ⲉⲡⲉϥⲏⲓ ⲛⲉⲣⲉⲟⲩⲣⲱⲙⲉ ϩⲙⲡⲙⲁ ⲉⲧⲙⲙⲁⲩ ⲉⲣⲉⲟⲩⲇⲁⲓⲙⲱⲛⲓⲟⲛ ϩⲓⲱⲱϥ ·
…
16 ⲁⲩⲱ ⲛⲧⲉⲣⲉϥⲛⲁⲩ ⲉⲡⲣⲱⲙⲉ ⲉⲧⲉⲣⲉⲧⲉⲕⲗⲁϥⲧ ⲛⲁⲡⲁ ⲗⲟⲅⲅⲓⲛⲟⲥ ⲛⲧⲟⲟⲧϥ ⲁⲡⲇⲁⲓⲙⲱⲛ ⲣⲁϩⲧϥ ⲉⲡⲕⲁϩ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ·
…
17 ⲉⲧⲃⲉⲟⲩ ⲁⲧⲉⲧⲛⲉⲓⲛⲉ ⲛⲁⲡⲁ ⲗⲟⲅⲅⲓⲛⲟⲥ ⲉⲡⲉⲓⲙⲁ ⲉⲧⲣⲉϥⲇⲓⲱⲕⲉⲓ ⲛⲛⲣⲱⲙⲉ ;
…
18 ⲛⲉⲧϩⲙⲡⲏⲓ ⲇⲉ ⲛⲉⲩⲣϣⲡⲏⲣⲉ ⲛⲛⲉⲧⲉⲣⲉⲡⲇⲁⲓⲙⲱⲛ ϫⲱ ⲙⲙⲟⲟⲩ ·
…
19 ⲡⲣⲱⲙⲉ ⲇⲉ ⲁϥⲣϣⲡⲏⲣⲉ ⲁⲩⲱ ⲁϥⲁⲓⲥⲑⲁⲛⲉ ϫⲉⲛⲧⲁⲛⲁⲓ ϣⲱⲡⲉ ⲉⲧⲃⲉ ⲧⲉⲕⲗⲁϥⲧ ⲛⲁⲡⲁ ⲗⲟⲅⲅⲓⲛⲟⲥ ·
…
20 ⲁⲩⲱ ⲛⲧⲉⲩⲛⲟⲩ ⲁϥϫⲓⲧⲥ ⲁϥⲟⲩⲁϩⲥ ⲉϫⲙⲡⲉⲧⲟ ⲛⲇⲁⲓⲙⲱⲛⲓⲟⲛ ⲉϥϫⲱ ⲙⲙⲟⲥ ϫⲉ · ϩⲙⲡⲣⲁⲛ ⲙⲡⲛⲟⲩⲧⲉ ⲛⲛⲉ ⲙⲡⲁⲉⲓⲱⲧ ⲁⲡⲁ ⲗⲟⲅⲅⲓⲛⲟⲥ , ⲉⲕⲉⲉⲓ ⲉⲃⲟⲗ ⲛϩⲏⲧϥ ·
…
21 ⲁⲩⲱ ⲛⲧⲉⲩⲛⲟⲩ ⲁⲡⲇⲁⲓⲙⲱⲛ ⲉⲓ ⲉⲃⲟⲗ ⲛϩⲏⲧϥ ·
…
22 ⲛⲣⲱⲙⲉ ⲇⲉ ⲛⲧⲉⲣⲟⲩⲛⲁⲩ ⲉⲡⲉⲛⲧⲁϥϣⲱⲡⲉ ⲁⲩϯⲉⲟⲟⲩ ⲙⲡⲛⲟⲩⲧⲉ ⲡⲉⲧⲉⲓⲣⲉ ⲛⲛⲉⲓϣⲡⲏⲣⲉ ϩⲓⲧⲛⲛⲉϥⲡⲉⲧⲟⲩⲁⲁⲃ ·
…
23 ⲉϥϩⲙⲟⲟⲥ ⲇⲉ ⲟⲛ ⲛⲟⲩϩⲟⲟⲩ ⲉⲣⲉⲛϩⲗⲗⲟ ⲉⲛⲁⲧⲗⲁⲩⲣⲁ ⲛⲉ ϩⲙⲟⲟⲥ ϩⲁϩⲧⲏϥ ⲉⲁⲩⲉⲓ ϣⲁⲣⲟϥ ⲉϭⲙⲡⲉϥϣⲓⲛⲉ ,
…
24 ⲁⲓⲧⲉⲓ ⲇⲉ ⲉⲩϣⲁϫⲉ ⲉⲧⲃⲉ ⲡϩⲏⲧ ⲛⲛⲉⲩⲯⲩⲭⲏ , ⲁϥⲧⲱⲟⲩⲛ ⲛⲧⲉⲩⲛⲟⲩ ϩⲱⲥ ⲉϣϫⲉ ⲛⲧⲁⲩⲙⲟⲩⲧⲉ ⲉⲣⲟϥ , ⲁϥⲉⲓ ⲉⲃⲟⲗ ϩⲛⲧⲣⲓ ⲁϥⲃⲱⲕ ⲉϫⲛⲧⲗⲓⲙⲏ · ⲁϥϭⲛⲟⲩϫⲟⲉⲓ ⲉⲁϥⲉⲓ ϩⲙⲡⲙⲁⲣⲏⲥ ⲉⲣⲉⲟⲩϩⲗⲗⲟ ⲙⲡⲡⲉⲧⲟⲩⲁⲁⲃ ⲧⲁⲗⲏⲩ ⲉⲣⲟϥ ·
…
25 ⲁⲩⲱ ⲛⲧⲉⲣⲉϥⲛⲁⲩ ⲉⲣⲟϥ ⲛϭⲓⲡϩⲗⲗⲟ ⲁϥⲁⲥⲡⲁⲍⲉ ⲙⲙⲟϥ ϩⲛⲟⲩⲡⲉⲓ ⲉⲥⲟⲩⲁⲁⲃ ·
…
26 ⲡϩⲗⲗⲟ ⲇⲉ ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ⲉⲧⲡⲉ ⲉϥϫⲱ ⲙⲙⲟⲥ ϫⲉ · ⲡϫⲟⲉⲓⲥ ⲙⲏ ⲙⲡⲓⲡⲁⲣⲁⲕⲁⲗⲉⲓ ⲙⲙⲟⲕ ϫⲉⲙⲡⲣⲕⲁⲡⲉⲓⲡⲉⲧⲟⲩⲁⲁⲃ ⲉⲓⲙⲉ ϫⲉϯⲛⲏⲩ ϣⲁⲣⲟϥ ,
…
27 ϫⲉⲛⲛⲉϥϯϩⲓⲥⲉ ⲛⲁϥ ⲛϥⲉⲓ ⲉⲃⲟⲗ ⲛϩⲏⲧ ; ⲁϥⲕⲟⲧϥ ⲉⲁⲡⲁ ⲗⲟⲅⲅⲓⲛⲟⲥ ⲡⲉϫⲁϥ ⲛⲁϥ ϫⲉ · ⲁⲡⲁⲟⲩⲟⲉⲓϣ ϩⲱⲛ ⲉϩⲟⲩⲛ ⲉⲧⲣⲁⲉⲓ ⲉⲃⲟⲗ ϩⲙⲡⲉⲓⲃⲓⲟⲥ ·
…
28 ⲉⲧⲃⲉⲡⲁⲓ ⲛⲧⲁⲡϫⲟⲉⲓⲥ ⲧⲛⲛⲟⲟⲩⲧ ϣⲁⲣⲟⲕ ⲉⲧⲣⲉⲕⲕⲱ ⲛⲛⲉⲕϭⲓϫ ⲉϫⲛ ⲛⲁⲃⲁⲗ ·
…
29 ⲁⲩⲱ ⲛⲧⲉⲓϩⲉ ⲁⲩⲙⲟⲟϣⲉ ⲙⲡⲉⲥⲛⲁⲩ ⲁⲩⲃⲱⲕ ⲉϩⲟⲩⲛ ⲉⲧⲣⲓ ⲛⲁⲡⲁ ⲗⲟⲅⲅⲓⲛⲟⲥ ⲁⲩⲱ ⲙⲛⲛⲥⲁϣⲟⲙⲛⲧ ⲛϩⲟⲟⲩ ⲁϥⲙⲧⲟⲛ ⲙⲙⲟϥ ⲛϭⲓⲡϩⲗⲗⲟ ϩⲛⲟⲩⲙⲛⲧϩⲗⲗⲟ ⲉⲛⲁⲛⲟⲩⲥ , ⲉⲁⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲕⲁⲧⲟⲟⲧϥ ⲉϫⲛ ⲛⲉϥⲃⲁⲗ , ⲁϥϫⲱⲕ ⲉⲃⲟⲗ ⲙⲡⲉϥⲃⲓⲟⲥ ϩⲛⲟⲩⲙⲛⲧϩⲗⲗⲟ ⲉⲛⲁⲛⲟⲩⲥ ·
…
30 ⲁⲥϣⲱⲡⲉ ⲇⲉ ⲟⲛ ⲛⲟⲩⲥⲟⲡ ⲉϥⲛⲁⲃⲱⲕ ⲉϩⲟⲩⲛ ⲉⲧⲣⲓ ⲛⲛⲟⲩⲙⲁⲑⲏⲧⲏⲥ ⲉⲡⲱϥ ⲡⲉ ⲉⲡⲉϥⲣⲁⲛ ⲡⲉ ⲁⲣⲕⲁⲇⲓⲟⲥ –
…
31 ⲛⲧⲟϥ ⲇⲉ ⲁⲣⲕⲁⲇⲓⲟⲥ ⲛⲉϥⲣϩⲱⲃ ⲉⲩⲥⲭⲟⲗⲁⲕⲓⲛ ⲉⲁϥϩⲱⲛ ⲉϩⲟⲩⲛ ⲉⲟⲩⲟⲟϫϥ –
…
32 ⲡⲉϫⲉⲁⲡⲁ ⲗⲟⲅⲅⲓⲛⲟⲥ ⲛⲁϥ ϫⲉ · ⲡⲁϣⲏⲣⲉ ⲁⲣⲕⲁⲇⲓⲟⲥ ϭⲉⲡⲏ ⲙⲙⲟⲕ ⲛⲅϫⲟⲕϥ ⲉⲃⲟⲗ , ϫⲉⲡⲛⲟⲩⲧⲉ ⲛⲁⲧⲛⲛⲟⲟⲩ ⲛⲥⲱⲕ ⲧⲉⲛⲟⲩ ·
…
33 ⲛⲧⲉⲣⲉϥϫⲱⲕ ⲇⲉ ⲉⲃⲟⲗ ⲙⲡⲉⲥⲭⲟⲗⲁⲕⲓⲛ ⲁϥⲁⲙⲁϩⲧⲉ ⲛⲧⲉϥϭⲓϫ ⲁϥϣⲧⲁϥ ⲉϫⲛⲧⲉⲧⲙⲏ ⲁϥⲕⲧⲉⲡⲉϥϩⲟ ⲉⲡⲥⲁ ⲛⲧⲁⲛⲁⲧⲟⲗⲏ ⲁⲩⲱ ⲛⲧⲉⲩⲛⲟⲩ ⲁⲡⲙⲁⲑⲏⲧⲏⲥ ϯ ⲙⲡⲉϥⲡⲛⲉⲩⲙⲁ ⲉⲛⲉϭⲓϫ ⲙⲡⲛⲟⲩⲧⲉ ϩⲛⲟⲩⲉⲓⲣⲏⲛⲏ ·
…
34 ⲁⲥϣⲱⲡⲉ ⲇⲉ ⲟⲛ ⲛⲟⲩϩⲟⲟⲩ ⲁⲩⲉⲓⲛⲉ ϣⲁⲣⲟϥ ⲛⲟⲩⲁ ⲉϥⲟ ⲛⲇⲁⲓⲙⲱⲛⲓⲟⲛ , ⲁⲩⲡⲁⲣⲁⲕⲁⲗⲉⲓ ⲙⲙⲟϥ ⲉⲧⲣⲉϥⲛⲟϫϥ ⲉⲃⲟⲗ ⲛϩⲏⲧϥ ·
…
35 ⲁⲡⲁ ⲗⲟⲅⲅⲓⲛⲟⲥ ⲇⲉ ⲡⲉϫⲁϥ ⲛⲁϥ ϩⲛⲟⲩⲑⲃⲃⲓⲟ ⲛϩⲏⲧ ϫⲉ · ⲛϯⲥⲟⲟⲩⲛ ⲁⲛ ϫⲉⲟⲩ warn:empty_norm ⲛⲁϥ ,
…
36 ⲁⲗⲗⲁ ⲃⲱⲕ ⲛⲧⲟϥ ϣⲁⲁⲡⲁ ⲍⲏⲛⲱⲛ ⲁⲩⲱ ϯⲡⲓⲥⲧⲉⲩⲉ ⲉⲡⲛⲟⲩⲧⲉ ϫⲉϥⲛⲁⲭⲁⲣⲓⲍⲉ ⲛⲁϥ ⲙⲡⲧⲁⲗϭⲟ ·
…
37 ⲛⲧⲉⲣⲟⲩⲃⲱⲕ ⲇⲉ ϣⲁⲁⲡⲁ ⲍⲏⲛⲱⲛ ⲁⲩⲡⲁⲣⲁⲕⲁⲗⲉⲓ ⲙⲙⲟϥ ⲉⲧⲣⲉϥϣⲗⲏⲗ ⲉϫⲱϥ ,
…
38 ⲁⲧⲱ ⲛⲧⲉⲣⲉϥⲁⲣⲭⲉⲓ ⲛϣⲗⲏⲗ ⲛϭⲓⲁⲡⲁ ⲍⲏⲛⲱⲛ , ⲁⲡⲇⲁⲓⲙⲱⲛ ⲱϣ ⲉⲃⲟⲗ ϫⲉ · ⲉⲕⲙⲉⲉⲩⲉ ϫⲉⲉⲓⲛⲏⲩ ⲉⲃⲟⲗ ⲉⲧⲃⲏⲏⲧⲕ ; ⲁⲗⲗⲁ ⲉⲓⲥ ⲁⲡⲁ ⲗⲟⲅⲅⲓⲛⲟⲥ ϩⲓⲡⲉⲓⲥⲁ ⲉϥϣⲗⲏⲗ , ⲁⲩⲱ ⲉⲓⲣϩⲟⲧⲉ ϩⲏⲧⲟⲩ ⲛⲛⲉϥϣⲗⲏⲗ ⲉⲓⲛⲏⲩ ⲉⲃⲟⲗ · ⲙⲙⲟⲛ ⲛϯⲛⲁⲟⲩⲱϣⲃ ⲛⲁⲕ ⲁⲛ ⲡⲉ · ⲛⲧⲉⲣⲉϥϫⲉⲛⲁⲓ ⲛϭⲓⲡⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲁϥⲉⲓ ⲉⲃⲟⲗ ϩⲙⲡⲣⲱⲙⲉ ·
…
39 ⲛⲉⲩⲛⲟⲩⲙⲁⲑⲏⲧⲏⲥ ⲇⲉ ⲟⲛ ⲉⲡⲱϥ ⲡⲉ ⲉⲁϥⲉⲓⲣⲉ ⲛϩⲉⲛϩⲃⲏⲩⲉ ⲉⲛϣϣⲉ ⲁⲛ ·
…
40 ⲛⲧⲉⲣⲉϥⲉⲓⲙⲉ ⲛϭⲓⲁⲡⲁ ⲑⲉⲟⲇⲱⲣⲟⲥ ⲡⲁⲡϩⲉⲛⲁⲧⲟⲛ ⲁϥⲉⲓ ϣⲁⲣⲟϥ ⲙⲛϩⲉⲛⲕⲉϩⲗⲗⲟ ⲁⲩⲡⲁⲣⲁⲕⲁⲗⲉⲓ ⲙⲙⲟϥ ⲉⲧⲣⲉϥⲛⲟϫϥ ⲉⲃⲟⲗ ϩⲁⲧⲏϥ ·
…
41 ⲛⲧⲟϥ ⲇⲉⲙⲡⲉϥⲥⲱⲧⲙ ⲛⲥⲱⲟⲩ ϫⲉⲙⲉϣⲁⲕ ϥⲛⲁⲙⲉⲧⲁⲛⲟⲉⲓ ⲛⲧⲉⲡⲛⲟⲩⲧⲉ ⲕⲱ ⲛⲁϥ ⲉⲃⲟⲗ , ⲡⲁⲓ ⲉⲧⲉⲛϥⲟⲩⲉϣⲡⲙⲟⲩ ⲁⲛ ⲙⲡⲣⲉϥⲣⲛⲟⲃⲉ ⲛⲧϩⲉ ⲉⲧⲣⲉϥⲙⲉⲧⲁⲛⲟⲉⲓ ⲛϥⲱⲛϩ ·
…
42 ⲡⲗⲏⲛ ⲁϥϫⲱ ⲛⲁⲩ ⲙⲡⲉⲓϣⲁϫⲉ ⲛⲟⲩⲱⲧ ϫⲉ · ⲟⲩⲟⲓ ⲛⲁⲛ ϫⲉϣⲁⲛⲁⲡⲟⲧⲁⲥⲥⲉ ⲙⲡⲕⲟⲥⲙⲟⲥ ⲛⲧⲛⲉⲓ ⲉⲡⲉⲓⲃⲓⲟⲥ ⲛⲧⲉⲧⲙⲛⲧⲙⲟⲛⲁⲭⲟⲥ ⲉⲛϫⲱ ⲙⲙⲟⲥ ϫⲉϣⲁⲛϣⲱⲡⲉ ⲛⲧϩⲉ ⲛⲛⲁⲅⲅⲉⲗⲟⲥ , ⲛⲧⲛϣⲱⲡⲉ ϩⲱⲱϥ ⲉⲛϩⲟⲟⲩ ⲡⲁⲣⲁ ⲛⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ·
…
43 ⲁϥⲉⲓ ⲇⲉ ⲟⲛ ϣⲁⲣⲟϥ ⲛⲟⲩϩⲟⲟⲩ ⲛϭⲓⲟⲩⲛⲟϭ ⲛⲛⲁⲩⲕⲗⲏⲣⲟⲥ ⲁϥⲉⲓⲛⲉ ⲛⲁϥ ⲛϩⲉⲛⲛⲟϭ ⲛⲭⲣⲏⲙⲁ ⲉⲩⲟϣ , ⲉⲧⲣⲉϥⲧⲁⲁϥ ⲛⲁϥ ·
…
44 ⲛⲧⲟϥ ⲇⲉ ⲙⲡⲉϥϫⲓⲗⲁⲁⲩ ⲛⲧⲟⲟⲧϥ ⲉϥϫⲱ ⲙⲙⲟⲥ ϫⲉ · ⲛⲧⲛⲣⲭⲣⲉⲓⲁ ⲁⲛ ⲛϩⲱⲃ ⲛⲧⲉⲓⲙⲓⲛⲉ · ⲡⲉⲛϩⲱⲃ ⲛϭⲓϫ ⲛⲣⲱⲙⲉ ⲣⲱϣⲉ ⲉⲣⲟⲛ ·
…
45 ⲁⲗⲗⲁ ⲁⲣⲓⲧⲁⲅⲁⲡⲏ ⲛⲅⲧⲁⲗⲉ ⲉⲡⲉⲕⲉⲓⲱ ⲛⲅⲃⲱⲕ ϩⲛⲟⲩϭⲉⲡⲏ ⲉⲧⲇⲓⲁⲃⲁⲑⲣⲁ ⲙⲡϩⲁⲅⲓⲟⲥ ⲡⲉⲧⲣⲟⲥ ⲁⲩⲱ ⲕⲛⲁϭⲛⲟⲩⲣⲱⲙⲉ ⲙⲙⲁⲩ ⲉⲣⲉϩⲉⲛϩⲟⲓⲧⲉ ⲛⲁϣ ⲙⲙⲓⲛⲉ ⲧⲟ ϩⲓⲱⲱϥ ⲁⲩⲱ ⲉⲩⲛⲕⲉⲙⲁⲉⲓⲛ ϩⲙⲡⲉϥϩⲟ –
…
46 ⲛⲁⲓ ϭⲉ ⲛⲧⲁⲡⲛⲟⲩⲧⲉ ϭⲟⲗⲡⲟⲩ ⲛⲁⲓ ⲉⲃⲟⲗ ⲧⲉⲛⲟⲩ – ⲁⲩⲱ ϫⲛⲟⲩϥ ϫⲉ · ⲉⲕⲛⲁ ⲉⲧⲱⲛ , ⲁⲩⲱ ⲟⲩ ⲡⲉ ⲡⲁⲓ ⲉⲧⲛⲧⲟⲟⲧⲕ ;
…
47 ⲡⲛⲁⲩⲕⲗⲏⲣⲟⲥ ⲇⲉ ⲁϥⲃⲱⲕ ϩⲛⲟⲩϭⲉⲡⲏ ⲕⲁⲧⲁⲧⲕⲉⲗⲉⲩⲥⲓⲥ ⲙⲡϩⲗⲗⲟ · ⲛⲧⲉⲣⲉϥⲃⲱⲕ ⲉϫⲛⲇⲓⲁⲃⲁⲑⲣⲁ ⲁϥϭⲛⲡⲣⲱⲙⲉ ⲛⲧⲁⲁⲡⲁ ⲗⲟⲅⲅⲓⲛⲟⲥ ϫⲟⲟⲥ ⲛⲁϥ ⲉⲧⲃⲏⲏⲧϥ , ⲁϥϯⲡⲉϥⲟⲩⲟⲓ ⲉⲣⲟϥ ⲁϥϣⲉϫⲉ ⲛⲙⲙⲁϥ ·
…
48 ⲡⲏ ⲇⲉ ⲙⲡⲉϥⲟⲩⲟϣⲃ ⲉϥϩⲟⲗⲱⲥ ⲉⲧⲃⲉⲧⲉⲑⲗⲓⲯⲓⲥ ⲉⲧϥⲛϩⲏⲧⲥ , ⲁⲗⲗⲁ ⲛⲉϥϭⲉⲡⲏ ⲉⲉⲓ ⲉⲃⲟⲗ ϩⲛⲧⲡⲟⲗⲓⲥ ⲛϥⲣⲛⲉⲧϩⲙⲡⲉϥϩⲏⲧ ·
…
49 ⲛⲧⲉⲣⲉⲡⲛⲁⲩⲕⲗⲏⲣⲟⲥ ⲛⲁⲩ ⲉⲡⲉϥϩⲟⲩϫϩϫ ⲙⲛⲧϩⲉ ⲉⲧϥϣⲧⲣⲧⲱⲣ ⲙⲙⲟⲥ ⲡⲉϫⲁϥ ⲛⲁϥ ϫⲉ · ⲛⲧⲁⲓⲉⲓ ϩⲙⲡϩⲉⲛⲁⲧⲟⲛ ⲧⲉⲛⲟⲩ ϩⲁⲧⲙⲡⲁⲉⲓⲱⲧ ⲁⲡⲁ ⲗⲟⲅⲅⲓⲛⲟⲥ · ⲛⲧⲟϥ ⲡⲉⲛⲧⲁϥⲧⲛⲛⲟⲟⲩⲧ ϣⲁⲣⲟⲕ ·
…
50 ⲛⲧⲉⲣⲉ ⲡⲣⲱⲙⲉ ⲥⲱⲧⲙ ⲉⲡⲣⲁⲛ ⲛⲁⲡⲁ ⲗⲟⲅⲅⲓⲛⲟⲥ ⲁϥⲁϩⲉⲣⲁⲧϥ ·
…
51 ⲡⲛⲁⲩⲕⲗⲏⲣⲟⲥ ⲇⲉ ⲁϥϯ ⲛⲁϥ ⲛⲛⲉⲭⲣⲏⲙⲁ ·
…
52 ⲡⲣⲱⲙⲉ ⲇⲉ ⲁϥϫⲱ ⲉⲣⲟϥ ⲛⲧⲉϥⲑⲗⲓⲯⲓⲥ ⲉϥϫⲱ ⲙⲙⲟⲥ ϫⲉ · ⲉⲣⲉϩⲁϩ ⲛⲭⲣⲉⲟⲥ ⲉⲣⲟⲓ ⲁⲩⲱ ⲉⲣⲉⲛⲇⲁⲛⲓⲥⲧⲏⲥ ϯⲁⲛⲁⲅⲕⲏ ⲉⲣⲟⲓ ⲉⲧⲃⲏⲏⲧⲟⲩ warn:empty_norm ⲛⲧⲁⲁⲩ , ⲁⲓⲕⲁⲁⲥ ϩⲙⲡⲁϩⲏⲧ ⲉⲧⲣⲁⲣⲡⲃⲟⲗ ⲛⲧⲡⲟⲗⲓⲥ ⲧⲁⲟϭⲧ ⲙⲁⲩⲁⲁⲧ ⲉⲧⲃⲉⲡⲁϣⲁⲓ ⲛⲛⲉⲑⲗⲓⲯⲓⲥ ⲉⲧϩⲓϫⲱⲓ ·
…
53 ⲁⲩⲱ ϫⲉⲕⲁⲥ ⲉⲕⲉⲉⲓⲙⲉ ⲉⲧⲙⲉ , ⲉⲓⲥ ⲡⲛⲟⲩϩ ⲛⲧⲟⲟⲧ ⲉⲓⲛⲁⲟϭⲧ ⲛϩⲏⲧϥ · ⲁⲩⲱ ⲁϥⲧⲁⲙⲟϥ ⲉⲡⲛⲟⲩϩ ⲉϥⲛⲧⲟⲟⲧϥ ·
…
54 ⲡⲛⲁⲩⲕⲗⲏⲣⲟⲥ ⲇⲉ ⲁϥⲣϣⲡⲏⲣⲉ ⲙⲡϣⲁϫⲉ ⲛⲁⲡⲁ ⲗⲟⲅⲅⲓⲛⲟⲥ ⲁϥϯ ⲛⲛⲉⲛⲟⲩⲃ ⲙⲡⲣⲱⲙⲉ ⲁϥⲃⲱⲕ ⲉⲡⲉϥⲏⲓ ·
…
55 ⲁϥⲕⲟⲧϥ ⲛϭⲓⲡⲛⲁⲩⲕⲗⲏⲣⲟⲥ ϣⲁⲁⲡⲁ ⲗⲟⲅⲅⲓⲛⲟⲥ ⲁϥϫⲱ ⲉⲣⲟϥ ⲛϩⲱⲃ ⲛⲓⲙ ⲛⲧⲁⲩϣⲱⲡⲉ ·
…
56 ⲡⲉϫⲉⲡϩⲗⲗⲟ ⲛⲁϥ ϫⲉ · ⲡⲓⲥⲧⲉⲩⲉ ⲛⲁⲓ ⲡⲁϣⲏⲣⲉ ϫⲉⲉⲛⲉⲛⲧⲁⲛⲁⲙⲉⲗⲉⲓ ⲛⲕⲉⲕⲟⲩⲓ ϣⲁⲣⲉⲡⲛⲟⲩⲧⲉ ⲕⲣⲓⲛⲉ ⲙⲙⲟⲛ ⲙⲡⲉⲥⲛⲁⲩ ⲉⲧⲃⲉⲧⲉⲯⲩⲭⲏ ⲙⲡⲉⲧⲙⲙⲁⲩ ·
…
57 ⲁⲥϣⲱⲡⲉ ⲇⲉ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛⲧⲉⲣⲉⲡⲣⲣⲟ ⲙⲁⲣⲕⲓⲁⲛⲟⲥ ⲟⲩⲱϣ ⲉⲧⲛⲛⲟⲟⲩ ⲛⲛⲟⲩⲙⲁⲅⲓⲥⲧⲣⲓⲁⲛⲟⲥ ⲉⲣⲁⲕⲟⲧⲉ ⲙⲛⲡⲧⲟⲙⲟⲥ ⲛⲗⲉⲱⲛ ⲡⲁⲥⲉⲃⲏⲥ , ⲁϥⲕⲉⲗⲉⲩⲉ ⲉⲧⲣⲉⲧⲡⲟⲗⲓⲥ ⲣⲁⲕⲟⲧⲉ ϩⲩⲡⲟⲅⲣⲁⲫⲏ ⲉⲣⲟϥ ,
…
58 ⲛϩⲟⲩⲟ ⲇⲉ ⲙⲙⲟⲛⲁⲭⲟⲥ ⲙⲡϩⲉⲛⲁⲧⲟⲛ ⲇⲉ ⲁϥϭⲉⲗⲡ ⲡⲉⲓϩⲱⲃ ⲉⲃⲟⲗ ⲉⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ϩⲁⲧϩⲏ ⲛϣⲟⲙⲛⲧ ⲛⲉⲃⲟⲧ , ⲁϥⲟⲩⲉϩⲥⲁϩⲛⲉ ϩⲙⲡϭⲱⲗⲡ ⲉⲃⲟⲗ ⲛⲧⲁⲩⲧⲥⲁⲃⲟϥ ⲉⲣⲟϥ ⲉⲧⲣⲉϥⲥⲱⲟⲩϩ ⲉϩⲟⲩⲛ ⲛⲙⲙⲟⲛⲁⲭⲟⲥ ⲙⲡϩⲉⲛⲁⲧⲟⲛ ⲧⲏⲣⲟⲩ ⲛϥⲧⲁⲙⲟⲟⲩ ⲉⲡⲉⲛⲧⲁϥϣⲱⲡⲉ ·
…
59 ⲁⲩⲱ ⲁϥⲟⲩⲉϩⲥⲁϩⲛⲉ ⲉⲧⲙϫⲓ ⲙⲡⲇⲟⲅⲙⲁ ⲉⲧⲙⲙⲁⲩ ⲉⲡⲧⲏⲣϥ ⲟⲩⲇⲉ ⲉⲧⲙϩⲩⲡⲟⲅⲣⲁⲫⲉ ⲉⲣⲟϥ ·
…
60 ⲛⲧⲟϥ ⲇⲉ ⲁⲡⲁ ⲗⲟⲅⲅⲓⲛⲟⲥ ⲁϥⲥⲱⲟⲩϩ ⲉϩⲟⲩⲛ ⲛⲟⲩⲟⲛ ⲛⲓⲙ ⲉⲧϩⲛⲧⲗⲁⲩⲣⲁ ⲁϥϫⲱ ⲉⲣⲟⲟⲩ ⲛⲛⲧⲁⲡϫⲟⲉⲓⲥ ϭⲟⲗⲡⲟⲩ ⲛⲁϥ ⲉⲃⲟⲗ ϩⲙⲡϩⲟⲣⲟⲙⲁ ⲁⲩⲱ ⲁϥⲟⲩⲉϩⲥⲁϩⲛⲉ ⲛⲁⲩ ⲉϩⲁⲣⲉϩ ⲛⲇⲓⲕⲁⲓⲟⲱⲙⲁ ⲙⲡϫⲟⲉⲓⲥ ϩⲛⲟⲩⲱⲣϫ ⲁⲩⲱ ⲉⲧⲣⲉⲩⲁⲅⲱⲛⲓⲍⲉ ⲉϫⲛⲧⲡⲓⲥⲧⲓⲥ ⲛⲛⲟⲣⲑⲟⲇⲟⲝⲟⲥ ϣⲁϩⲣⲁⲓ ⲉⲡⲙⲟⲩ ·
…
61 ⲛⲧⲟⲟⲩ ⲇⲉ ⲛⲧⲉⲣⲟⲩⲥⲱⲧⲙ ⲉⲛⲁⲓ ⲛⲧⲟⲟⲧϥ ⲛⲁⲡⲁ ⲗⲟⲅⲅⲓⲛⲟⲥ ·
…
62 ⲁⲩⲣⲁϣⲉ ⲉⲡⲉϩⲟⲩⲟ ⲁⲩϫⲓϣⲟϫⲛⲉ ⲙⲛⲛⲉⲩⲉⲣⲏⲩ ⲉⲩϫⲱ ⲙⲙⲟⲥ ϫⲉ ·
…
63 ⲙⲛⲣⲱⲙⲉ ⲛⲁϣⲕⲁⲧⲁⲣⲅⲉⲓ ⲙⲡⲉⲓⲇⲟⲅⲙⲁ ⲉⲧϫⲁϩⲙ ⲉⲓⲙⲏⲧⲓ ⲡⲉⲛⲧⲁⲡϫⲟⲉⲓⲥ ϭⲉⲗⲡⲡⲉⲓⲙⲩⲥⲧⲏⲣⲓⲟⲛ ⲛⲁϥ ⲉⲃⲟⲗ ⲉⲁϥⲧⲁⲙⲟϥ ⲉⲧⲉⲑⲗⲓⲯⲓⲥ ⲉⲧⲧⲏϣ ⲉϣⲱⲡⲉ · ⲧⲟⲧⲉ ⲁⲩⲡⲁⲣⲁⲕⲁⲗⲉⲓ ⲙⲡⲙⲁⲕⲁⲣⲓⲟⲥ ⲁⲡⲁ ⲗⲟⲅⲅⲓⲛⲟⲥ ⲉⲧⲣⲉϥϣⲱⲡⲉ ⲛⲁⲩ ⲛⲉⲓⲱⲧ ⲁⲩⲱ ⲛϫⲁⲩⲙⲁⲉⲓⲧ ⲁⲩⲱ ⲛϩⲩⲅⲟⲩⲙⲉⲛⲟⲥ ⲉϫⲛⲛⲙⲙⲟⲛⲁⲥⲧⲏⲣⲓⲟⲛ ⲙⲡϩⲉⲛⲁⲧⲟⲛ ·
…