1 ⲟⲩⲡⲣⲁⲅⲙⲁⲧⲉⲩⲧⲏⲥ ⲉⲡⲁⲧⲗⲩⲕⲓⲁ ⲡⲉ , ⲧⲉⲭⲱⲣⲁ ⲛⲁⲡⲁ ⲗⲟⲅⲅⲓⲛⲟⲥ , ⲉϥⲥⲟⲟⲩⲛ ⲙⲙⲟϥ ⲕⲁⲗⲱⲥ ⲁⲓⲧⲉⲓ ⲉϥϩⲙⲡⲉϥⲙⲟⲛⲁⲥⲧⲏⲣⲓⲟⲛ ,
…
2 ⲁⲥϣⲱⲡⲉ ⲇⲉ ⲉⲧⲣⲉϥⲉⲓ ⲉⲣⲁⲕⲟⲧⲉ ⲉⲧⲃⲉⲧⲉⲭⲣⲉⲓⲁ ⲛⲧⲉϥⲡⲣⲁⲅⲙⲁⲧⲓⲁ · ⲛⲧⲉⲣⲉϥⲃⲱⲕ ⲉⲡⲧⲟⲡⲟⲥ ⲙⲡϩⲁⲅⲓⲟⲥ ⲙⲏⲛⲁ ⲛϥϣⲗⲏⲗ ⲁϥⲉⲡⲉⲑⲩⲙⲉⲓ ⲟⲛ ⲉⲧⲣⲉϥⲃⲱⲕ ⲉⲡⲙⲟⲛⲁⲥⲧⲉⲣⲓⲟⲛ ⲙⲡⲙⲁⲕⲁⲣⲓⲟⲥ ⲅⲁⲓⲟⲥ ⲡⲉⲡⲣⲉⲥⲃⲩⲧⲉⲣⲟⲥ ⲕⲁⲧⲁⲧⲉϥⲥⲩⲛⲏⲑⲓⲁ ,
…
3 ϩⲱⲥ ⲉⲟⲩⲛⲧⲁϥ ⲟⲩⲛⲟϭ ⲙⲡⲓⲥⲧⲓⲥ ⲉϩⲟⲩⲛ ⲉⲡⲧⲟⲡⲟⲥ ·
…
4 ⲛⲧⲉⲣⲉϥⲉⲓ ϣⲁⲣⲟϥ ⲛϥϫⲓ ⲥⲙⲟⲩ ⲛⲧⲟⲟⲧϥ ⲁϥⲁⲓⲧⲉⲓ ⲙⲙⲟϥ ⲉⲧⲣⲉϥϣⲗⲏⲗ ⲉϫⲱϥ ·
…
5 ⲁⲓⲧⲉⲓ ⲉϥϩⲙⲟⲟⲥ ϩⲓⲣⲙⲡⲣⲟ ⲛⲧⲉⲕⲕⲗⲏⲥⲓⲁ ⲁⲡⲡⲉⲧⲟⲩⲁⲁⲃ ⲅⲁⲓⲟⲥ ϫⲱ ⲉⲣⲟϥ ⲛϩⲁϩ ⲛϣⲁϫⲉ ⲛⲥⲃⲱ ⲉⲃⲟⲗ ϩⲛⲛⲉⲅⲣⲁⲫⲏ ⲉⲧⲟⲩⲁⲁⲃ ⲉⲡⲟⲩϫⲁⲓ ⲛⲧⲉϥⲯⲩⲭⲏ ·
…
6 ⲁϥϭⲱϣⲧ ⲛϭⲓⲡⲉⲡⲣⲁⲅⲙⲁⲧⲉⲩⲧⲏⲥ ⲁϥⲛⲁⲩ ⲉⲁⲡⲁ ⲗⲟⲅⲅⲓⲛⲟⲥ ⲡⲉⲛⲧⲁϥⲧⲟⲩⲛⲉⲥ ⲡⲉⲧⲙⲟⲟⲩⲧ ⲁⲩⲱ ⲁϥⲉⲓⲣⲉ ⲛϩⲁϩ ⲛϣⲡⲏⲣⲉ ϩⲛⲧⲉⲭⲱⲣⲁ ⲛⲧⲗⲩⲕⲓⲁ ⲟⲛ ⲁϥⲇⲓⲥⲧⲁⲍⲉ ϫⲉⲛⲧⲟϥ ⲁⲛ ⲡⲉ ⲁⲗⲗⲁ ⲟⲩⲁ ⲡⲉ ⲉϥⲉⲓⲛⲉ ⲙⲙⲟϥ ·
…
7 ⲛⲉⲁⲡⲉϥⲱ ⲅⲁⲣ ϣⲓⲁⲓ ϩⲓϫⲱϥ ϩⲓⲧⲙⲡⲉⲭⲣⲟⲛⲟⲥ ⲁⲩⲱ ⲛⲉϥϩⲛⲟⲩⲛⲟϭ ⲛϩⲟϫϩϫ , ⲉⲧⲃⲉⲡⲁⲓ ⲙⲡⲉϥⲥⲟⲩⲱⲛϥ ϩⲛⲟⲩⲱⲣϫ · ⲛⲉⲣⲉⲟⲩⲙⲁⲉⲓⲛ ⲇⲉϩⲓϫⲙⲡⲉϥϩⲟ ϫⲓⲛⲧⲉϥⲙⲛⲧⲕⲟⲩⲓ ⲁⲩⲱ ⲛⲧⲉⲣⲉⲡⲉⲡⲣⲁⲅⲙⲁⲧⲉⲩⲧⲏⲥ ϯϩⲧⲏϥ ϩⲛⲟⲩⲱⲣϫ ⲉⲡⲙⲁⲉⲓⲛ ⲉⲧϩⲙⲡⲉϥϩⲟ ⲡⲉϫⲁϥ ⲙⲡⲡⲉⲧⲟⲩⲁⲁⲃ ⲅⲁⲓⲟⲥ ϫⲉ · ⲟⲩⲛⲧⲁⲕ ⲙⲙⲁⲩ ⲛⲛⲟⲩⲛⲟϭ ⲛⲣⲱⲙⲉ ϩⲙⲡⲉⲓⲙⲟⲛⲁⲥⲧⲏⲣⲓⲟⲛ ⲉⲁϥⲣϩⲁϩ ⲛϭⲟⲙ ·
…
8 ⲡⲉϫⲉⲡⲉⲡⲣⲟⲉⲥⲧⲟⲥ ⲛⲁϥ ϫⲉ · ⲛⲓⲙ ϩⲛⲛⲉⲥⲛⲏⲩ ⲡⲉⲧⲕϫⲱ ⲙⲡⲁⲓ ⲉⲧⲃⲏⲏⲧϥ ;
…
9 ⲡⲉϫⲉⲡⲉⲡⲣⲁⲅⲙⲁⲧⲉⲩⲧⲏⲥ ⲛⲁϥ ϫⲉ · ⲉⲓϣⲁϫⲉ ⲉⲡⲁⲓ ⲉⲧⲥⲱϩⲣ ϩⲁⲧⲛⲧⲡⲩⲗⲏ ·
…
10 ⲡⲁⲓ ⲅⲁⲣ ⲡⲉ ⲁⲡⲁ ⲗⲟⲅⲅⲓⲛⲟⲥ ⲡⲉⲛⲧⲁϥⲣⲥⲟⲉⲓⲧ ϩⲛⲧⲉⲭⲱⲣⲁ ⲛⲧⲗⲩⲕⲓⲁ , ⲛⲧⲟϥ ⲙⲛⲡⲉϥⲉⲓⲱⲧ ⲙⲡⲛⲉⲩⲙⲁⲧⲓⲕⲟⲥ ⲁⲡⲁ ⲗⲟⲩⲅⲓⲟⲥ , ⲉⲁϥⲧⲟⲩⲛⲉⲥ ⲛⲉⲧⲙⲟⲟⲩⲧ ⲁⲩⲱ ϩⲁϩ ⲛⲇⲁⲓⲙⲱⲛ ⲁϥⲛⲟϫⲟⲩ ⲉⲃⲟⲗ ϩⲛⲛⲉⲣⲱⲙⲉ ⲙⲛϩⲉⲛⲕⲉⲙⲏⲏϣⲉ ⲛⲧⲁⲗϭⲟ ⲉⲁⲡⲛⲟⲩⲧⲉ ⲉⲛⲉⲣⲅⲉⲓ ⲙⲙⲟⲟⲩ ⲉⲃⲟⲗ ϩⲓⲧⲟⲟⲧϥ ϩⲛⲧⲉⲭⲱⲣⲁ ⲉⲧⲙⲙⲁⲩ ·
…
11 ⲛⲧⲉⲣⲉⲡⲉϥⲥⲟⲉⲓⲧ ⲟⲩⲛ ⲙⲟⲟϣⲉ ⲉⲃⲟⲗ ϩⲛⲧⲉⲭⲱⲣⲁ ⲉⲧⲙⲙⲁⲩ ⲁⲩⲱ ⲛⲥⲉϯⲉⲟⲟⲩ ⲛⲁϥ ϩⲓⲧⲛⲟⲩⲟⲛ ⲛⲓⲙ ,
…
12 ⲁϥⲕⲱ ⲛⲥⲱϥ ⲙⲡⲉϥⲉⲓⲱⲧ ⲙⲡⲛⲉⲩⲙⲁⲧⲓⲕⲟⲥ ⲁϥⲡⲱⲧ ⲁϥⲉⲓ ⲉⲡⲉⲓⲙⲁ ϩⲛⲟⲩϩⲱⲡ ⲉϥⲡⲏⲧ ⲉⲃⲟⲗ ⲙⲡⲉⲟⲟⲩ ⲉⲧϣⲟⲩⲉⲓⲧ ⲛⲛⲣⲱⲙⲉ ·
…
13 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲉⲧⲃⲉ ⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲛⲉϥϩⲙⲡⲙⲁ ⲛⲧⲡⲩⲗⲏ ⲉϥⲥⲱϩⲣ · ⲧⲟⲧⲉ ⲁϥⲙⲟⲩⲧⲉ ⲉⲣⲟϥ ⲛϭⲓⲡϩⲩⲅⲟⲩⲙⲉⲛⲟⲥ ⲡⲉϫⲁϥ ⲛⲁϥ ϫⲉ ·
…
14 ⲉⲧⲃⲉⲟⲩ ⲁⲕϩⲟⲡⲕ ⲉⲣⲟⲛ ⲙⲡⲉⲕⲧⲁⲙⲟⲛ ϫⲉⲛⲧⲕ ⲟⲩⲙⲟⲛⲁⲭⲟⲥ ;
…
15 ⲛⲧⲉⲩⲛⲟⲩ ⲁⲡⲉⲧⲑⲃⲃⲓⲏⲩ ϩⲛⲟⲩⲙⲉ ϩⲙⲡⲉϥϩⲏⲧ ⲁⲡⲁ ⲗⲟⲅⲅⲓⲛⲟⲥ ⲡⲁϩⲧϥ ϩⲁⲛⲉⲟⲩⲉⲣⲏⲧⲉ ⲛⲅⲁⲓⲟⲥ ⲡⲉⲡⲣⲉⲥⲃⲩⲧⲉⲣⲟⲥ ⲁϥϯⲙⲉⲧⲁⲛⲟⲓⲁ ⲛⲁϥ ϫⲉ · ⲕⲱ ⲛⲁⲓ ⲉⲃⲟⲗ ⲡⲁⲉⲓⲱⲧ ·
…
16 ⲁⲩⲱ ⲛⲧⲉⲩⲛⲟⲩ ⲁϥⲟⲩⲉϩⲥⲁϩⲛⲉ ⲛϭⲓⲡⲉⲡⲣⲟⲉⲥⲧⲟⲥ ⲉⲧⲣⲉⲩϣⲱϥ ⲙϩⲃⲱ ⲛⲧⲉϥⲁⲡⲉ ⲛⲧⲁϥⲣⲱⲧ ⲁϥϣⲗⲏⲗ ⲉϫⲱϥ ⲁϥϯ ⲉϫⲱϥ ⲛⲧⲉⲕⲗⲁϥⲧ ⲙⲛⲡⲁⲛⲁⲃⲟⲗⲟⲥ ⲕⲁⲧⲁⲡⲉⲥⲭⲏⲙⲁ ⲛⲣⲁⲕⲟⲧⲉ · ⲛⲧⲉⲣⲟⲩⲥⲱⲧⲙ ⲉⲛⲉⲓϣⲁϫⲉ ⲧⲏⲣⲟⲩ ⲛϭⲓⲛⲉⲥⲛⲏⲩ ⲉⲧϩⲙⲡⲙⲟⲛⲁⲥⲧⲏⲣⲓⲟⲛ ⲉⲧⲃⲉⲁⲡⲁ ⲗⲟⲅⲅⲓⲛⲟⲥ ⲁⲩⲕⲁⲁϥ ⲛⲛⲁϩⲣⲁⲩ ϩⲱⲥ ⲛⲟϭ ⲛⲧⲉⲗⲓⲟⲥ ⲁⲩⲱ ⲁⲩⲁⲣⲭⲉⲓ ⲛϯⲉⲟⲟⲩ ⲛⲁϥ ⲉⲡⲉϩⲟⲩⲟ ·
…
17 ⲡⲡⲉⲧⲟⲩⲁⲁⲃ ⲇⲉ ⲁⲡⲁ ⲗⲟⲅⲅⲓⲛⲟⲥ ⲛⲧⲉⲣⲉϥⲛⲁⲩ ϫⲉⲥⲉϯⲉⲟⲟⲩ ⲛⲁϥ ϩⲓⲧⲛⲛⲉⲣⲱⲙⲉ ⲁϥⲙⲕⲁϩ ⲛϩⲏⲧ ,
…
18 ⲛϩⲟⲩⲟ ⲇⲉ ⲛⲉϥⲉⲓⲣⲉ ⲙⲏ ⲙⲉⲉⲩⲉ ⲙⲡϣⲁϫⲉ ⲙⲡⲉϥⲉⲓⲱⲧ ⲙⲡⲛⲉⲩⲙⲁⲧⲓⲕⲟⲥ ⲛⲧⲁϥⲧⲁⲁϥ ⲉⲧⲟⲟⲧϥ ϫⲉ · ⲡⲱⲧ ⲉⲃⲟⲗ ⲙⲡⲉⲟⲟⲩ ⲛⲛⲣⲱⲙⲉ ⲉⲧϣⲟⲩⲉⲓⲧ ·
…
19 ⲧⲟⲧⲉ ⲁϥϣⲟϫⲛⲉ ϩⲣⲁⲓⲛϩⲏⲧϥ ⲉϥϫⲱ ⲙⲙⲟⲥ ϫⲉ · ⲛⲧⲁⲓⲕⲱ ⲛⲥⲱⲓ ⲛⲧⲁⲭⲱⲣⲁ ⲉⲧⲃⲉ ⲡⲉⲟⲟⲩ ⲛⲛⲣⲱⲙⲉ ⲁⲩⲱ ⲁⲓⲡⲱⲣϫ ⲉⲡⲁⲉⲓⲱⲧ · ⲁⲩⲱ ⲛⲁϣ ⲛϩⲉ ⲉⲓⲛⲁϣϭⲱ ⲙⲡⲉⲓⲙⲁ ⲉⲣⲉⲡⲉⲓⲙⲏⲏϣⲉ ⲛⲧⲉⲓϭⲟⲧ ϯⲉⲟⲟⲩ ⲛⲁⲓ ;
…
20 ⲉⲧⲃⲉⲡⲁⲓ ⲁϥⲉⲓ ⲉⲃⲟⲗ ϩⲙⲡⲙⲟⲛⲁⲥⲧⲏⲣⲓⲟⲛ ⲉⲧⲙⲙⲁⲩ ⲉⲁⲩⲕⲱⲧ ⲛⲁϥ ⲛⲟⲩⲕⲟⲩⲓ ⲛⲣⲓ ⲛϭⲓϩⲉⲛⲣⲱⲙⲉ ⲙⲙⲁⲓⲛⲟⲩⲧⲉ ϩⲓⲧⲟⲩⲱϥ ⲙⲏ ⲙⲟⲛⲁⲥⲧⲏⲣⲓⲟⲛ ϩⲁⲧⲛⲧϩⲁⲗⲗⲁⲥⲥⲁ ·
…
21 ⲁϥⲉⲍⲩⲭⲁⲍⲉ ⲛϩⲏⲧⲥ ⲉϥⲣϩⲱⲃ ⲉⲛⲉⲥⲭⲟⲗⲁⲕⲓⲛ ⲁⲩⲱ ⲛⲉϥϯϩⲓⲥⲉ ⲛⲁϥ ϩⲙⲡⲉϥϩⲱⲃ ⲛϭⲓϫ ϫⲉⲕⲁⲥ ⲉϥⲉϭⲛⲧϩⲉ ⲛϯ ⲛⲛⲉⲧϣⲁⲁⲧ ϩⲙⲡⲉϥϩⲱⲃ ⲛϭⲓϫ , ⲉϥⲧⲛⲧⲱⲛϥ ϩⲙⲡⲁⲓ ⲉⲡϩⲓⲉⲣⲟⲥ ⲛⲁⲡⲟⲥⲧⲟⲗⲟⲥ ⲡⲁⲩⲗⲟⲥ ⲉⲧϫⲱ ⲙⲙⲟⲥ ϫⲉ · ⲁⲛⲉⲓϭⲓϫ ϣⲙϣⲉ ⲛⲛⲁⲭⲣⲉⲓⲁ ⲙⲛⲛⲉⲧⲛⲙⲙⲁⲓ · ⲁⲩⲱ ϫⲉ · ⲟⲩⲙⲛⲧⲙⲁⲕⲁⲣⲓⲟⲥ ⲡⲉ ϯ ⲉϩⲟⲩⲉ ϫⲓ ·
…
22 ⲛⲉⲣⲉϩⲁϩ ⲛⲏⲩ ⲇⲉ ϣⲁⲣⲟϥ ⲉⲃⲟⲗ ϩⲛⲛⲛⲟϭ ⲛⲛⲁⲩⲕⲗⲏⲣⲟⲥ ⲉⲩϫⲓ ⲛⲛⲉϥⲥⲭⲟⲗⲁⲕⲓⲛ ⲉϥⲧⲁⲙⲓⲟ ⲙⲙⲟⲟⲩ ϩⲛⲛⲉϥϭⲓϫ ⲉⲧⲟⲩⲁⲁⲃ ⲉⲩⲉⲓⲣⲉ ⲙⲙⲟⲟⲩ ⲛⲥⲧⲁⲩⲣⲟⲥ ϩⲛⲧⲙⲏⲧⲉ ⲛⲛⲉⲩⲗⲁⲩⲟ ϩⲱⲥ ⲥⲙⲟⲩ ⲉⲩⲡⲓⲥⲧⲉⲩⲉ ϩⲙⲡⲁⲓ ϫⲉⲛⲉϥϣⲗⲏⲗ ⲛⲁϣⲱⲡⲉ ⲛⲁⲩ ⲛⲛⲁϣⲧⲉ ⲛⲧⲉⲡϫⲟⲉⲓⲥ ⲧⲟⲩϫⲟ ⲛⲛⲉⲩⲉϫⲏⲩ ϩⲙⲙⲁ ⲉⲧⲟⲩⲛⲁⲃⲱⲕ ⲉⲣⲟⲟⲩ ·
…
23 ⲙⲛⲛⲥⲁϩⲉⲛⲕⲟⲩⲓ ⲛϩⲟⲟⲩ ⲁⲩⲉⲓ ϩⲁⲧⲏϥ ⲛϭⲓϣⲟⲙⲛⲧ ⲙⲙⲟⲛⲁⲭⲟⲥ ⲁⲩⲣⲙⲁⲑⲏⲧⲏⲥ ⲛⲁϥ ·
…
24 ⲁⲥϣⲱⲡⲉ ⲇⲉ ⲛⲟⲩⲟⲩϣⲏ ⲉϥϩⲙⲟⲟⲥ ⲙⲛⲛⲉϥⲙⲁⲑⲏⲧⲏⲥ ⲉⲩⲙⲉⲗⲉⲧⲁ ⲙⲡϣⲁϫⲉ ⲙⲡⲛⲟⲩⲧⲉ ⲁⲩⲱ ⲉⲩⲣϩⲱⲃ ⲛϭⲓϫ , ⲁϥϩⲓⲛⲏⲃ ⲉϥϩⲙⲟⲟⲥ ϩⲓϫⲙⲡⲉϥⲧⲟϭⲥ ϩⲙⲡⲙⲁ ⲉⲛⲉϥⲣϩⲱⲃ ⲛϩⲏⲧϥ , ⲉϥⲉⲓⲣⲉ ⲙⲡⲙⲉⲉⲩⲉ ⲙⲡϩⲓⲉⲣⲟⲯⲁⲗⲧⲏⲥ ⲇⲁⲩⲉⲓⲇ ϫⲉ · ⲛⲛⲁϯϩⲓⲛⲏⲃ ⲛⲛⲁⲃⲁⲗ , ⲣⲉⲕⲣⲓⲕⲉ ⲛⲛⲁⲃⲟⲩϩⲉ , ⲙⲧⲟⲛ ⲛⲛⲁⲥⲙⲁⲩ , warn:empty_norm ⲛⲛⲟⲩⲙⲁ ⲙⲡϫⲟⲉⲓⲥ , ⲟⲩⲙⲁ ⲛϣⲱⲡⲉ ⲙⲡⲛⲟⲩⲧⲉ ⲛⲛⲓⲁⲕⲱⲃ ·
…
25 ⲁⲓⲧⲉⲓ ⲉϥϩⲙⲟⲟⲥ ⲛⲧⲉⲩϣⲏ ⲁⲡϩⲓⲛⲏⲃ ϩⲣⲟϣ ⲉϫⲱϥ ⲁϥϣⲱⲡⲉ ϩⲛⲟⲩⲉⲕⲥⲧⲁⲥⲓⲥ , ⲉϣϫⲉ ⲉⲣⲉⲟⲩⲣⲱⲙⲉ ⲁϩⲉⲣⲁⲧϥ ⲙⲡⲉϥⲙⲧⲟ ⲉⲃⲟⲗ ⲉϥϫⲱ ⲙⲙⲟⲥ ⲛⲁϥ ϫⲉ ·
…
26 ⲧⲱⲟⲩⲛⲅ ϩⲛⲟⲩϭⲉⲡⲏ ⲛⲅⲃⲱⲕ ⲉⲡⲉⲕⲣⲟ ⲛⲧϩⲁⲗⲗⲁⲥⲥⲁ · ⲕⲛⲁϭⲓⲛⲉ ⲙⲙⲁⲩ ⲙⲡⲉⲕⲉⲓⲱⲧ ⲁⲡⲁ ⲗⲟⲩⲅⲓⲟⲥ ⲁϥⲉⲓ ϣⲁⲣⲟⲕ ⲉⲃⲟⲗ ϩⲛⲧⲉⲭⲱⲣⲁ ·
…
27 ⲁⲩⲱ ⲁϥⲧⲱⲟⲩⲛ ⲛⲧⲉⲩⲛⲟⲩ ⲙⲡⲉϥⲧⲁⲙⲉⲟⲩⲟⲛ ϩⲛⲛⲉϥⲙⲁⲑⲏⲧⲏⲥ , ⲁϥⲉⲓ ⲉϫⲛⲧⲙⲣⲱ ⲛⲧϩⲁⲗⲗⲁⲥⲥⲁ , ⲡⲙⲁ ⲛⲧⲁⲩϫⲟⲟⲥ ⲛⲁϥ ⲉⲧⲃⲏⲏⲧⲥ ϩⲙⲡϭⲱⲗⲡ ⲉⲃⲟⲗ · ⲁϥϭⲛⲡⲡⲉⲧⲟⲩⲁⲁⲃ ⲁⲡⲁ ⲗⲟⲩⲅⲓⲟⲥ ⲉⲁϥⲉⲓ ⲉϩⲣⲁⲓ ϩⲙⲡϫⲟⲉⲓ ⲛⲧⲉⲩⲛⲟⲩ · ⲛⲧⲉⲣⲟⲩⲁⲥⲡⲁⲍⲉ ⲛⲛⲉⲩⲉⲣⲏⲩ ⲡⲉϫⲉⲡϩⲗⲗⲟ ⲛⲁϥ ϫⲉ · ⲙⲡⲓϫⲟⲟⲥ ⲛⲁⲕ ⲡⲁϣⲏⲣⲉ ϫⲉϯϩⲉⲗⲡⲓⲍⲉ ⲉⲡⲉⲭⲣⲓⲥⲧⲟⲥ ϫⲉⲙⲁ ⲛⲓⲙ ⲉⲕⲛⲁⲃⲱⲕ ⲉⲣⲟϥ ϯⲛⲏⲩ ⲉⲣⲁⲧⲕ ; ⲧⲟⲧⲉ ⲁⲧϯⲉⲟⲟⲩ ⲙⲡⲛⲟⲩⲧⲉ ϫⲉⲁϥⲁⲁⲩ ⲛⲙⲡϣⲁ ⲛⲛⲁⲩ ⲉⲛⲉⲩⲉⲣⲏⲩ ⲁⲩⲱ ϫⲉⲁⲡⲉⲧⲥⲏϩ ϫⲱⲕ ⲉⲃⲟⲗ ϫⲉ · ⲁⲛⲓⲓⲟⲩⲗ ⲧⲱⲙⲛⲧ ⲙⲙⲁⲩ ⲁⲩⲛⲁⲩ ⲉⲡϩⲟ ⲛⲛⲉⲩⲉⲣⲏⲩ ⲁⲩⲉⲓ ⲉⲃⲟⲗ ϩⲛⲟⲩⲏⲡⲉ ⲙⲡⲉⲟⲩⲁ ⲙⲙⲟⲟⲩ ϩⲉ ⲉⲃⲟⲗ , ϫⲉⲡϫⲟⲉⲓⲥ ⲡⲉⲛⲧⲁϥϩⲱⲛ ⲉⲧⲟⲟⲧⲟⲩ ⲁⲩⲱ ⲡⲉϥⲡⲛⲉⲩⲙⲁ ⲡⲉⲛⲧⲁϥⲥⲟⲟⲩϩⲟⲩ ⲉϩⲟⲩⲛ ·
…
28 ⲇⲓⲕⲁⲓⲱⲥ ⲅⲁⲣ ⲁⲧⲛⲟϭ ⲛⲥⲁⲗⲡⲓⲅⲝ ⲛⲛⲉⲡⲣⲟⲫⲏⲧⲏⲥ ⲙⲟⲩⲧⲉ ⲉⲛⲉⲓⲣⲱⲙⲉ ⲛⲧⲉⲓⲙⲓⲛⲉ ϫⲉⲓⲟⲩⲗ , ⲉⲡⲉⲓⲇⲏ ⲛⲉⲓⲟⲩⲗ ϩⲉⲛⲙⲁⲓϫⲁⲓⲉ ⲛⲉ ⲁⲩⲱ ⲥⲉⲇⲓⲱⲕⲉⲓ · ⲛⲥⲁⲡⲅⲉⲛⲟⲥ ⲛⲛϩⲟϥ ⲛⲧϩⲉ ⲛϩⲉⲛϫⲁϫⲉ · ⲧⲁⲓ ϩⲱⲱϥ ⲧⲉ ⲧϩⲉ ⲛⲛⲉⲓⲡⲉⲧⲟⲩⲁⲁⲃ ⲉⲩⲡⲏⲧ ⲉⲃⲟⲗ ⲙⲡⲉϣⲧⲟⲣⲧⲣ ⲛⲙⲡⲟⲗⲓⲥ ⲉⲩⲟⲩⲏϩ ϩⲛⲙⲙⲁ ⲛϫⲁⲓⲉ ⲁⲩⲱ ⲟⲛ ⲉⲩⲇⲓⲱⲕⲉⲓ ⲛⲥⲁⲡⲅⲉⲛⲟⲥ ⲛⲛϩⲟⲃ ⲛⲛⲟⲏⲧⲟⲛ ⲛⲟⲩⲟⲉⲓϣ ⲛⲓⲙ ⲉⲧⲉⲛⲉⲡⲛⲉⲩⲙⲁ ⲛⲉ ⲛⲧⲡⲟⲛⲏⲣⲓⲁ ·
…
29 ⲁⲩⲙⲟⲟϣⲉ ⲇⲉ ⲙⲡⲉⲥⲛⲁⲩ ⲁⲩⲃⲱⲕ ⲉϩⲟⲩⲛ ⲙⲛⲛⲉⲩⲉⲣⲏⲩ ·
…
30 ⲛⲉϥⲙⲁⲑⲏⲧⲏⲥ ⲇⲉ ⲛⲉⲩϩⲙⲟⲟⲥ ⲉⲩⲙⲉⲗⲉⲧⲁ ⲉⲩⲣϩⲱⲃ · ⲛⲧⲉⲣⲟⲩⲛⲁⲩ ⲉⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲉϥⲙⲟⲟϣⲉ ⲙⲛⲡⲉϥⲉⲓⲱⲧ ⲁⲩⲣϣⲡⲏⲣⲉ ⲁⲩⲧⲱⲟⲩⲛ ϩⲛⲟⲩⲛⲟϭ ⲛⲣⲁϣⲉ ⲁⲩⲁⲥⲡⲁⲍⲉ ⲛⲛⲉⲩⲉⲣⲏⲩ ⲁⲩⲱ ⲛⲧⲉⲣⲟⲩϣⲗⲏⲗ ⲁⲩϩⲙⲟⲟⲥ ·
…
31 ⲡⲉϫⲉⲁⲡⲁ ⲗⲟⲅⲅⲓⲛⲟⲥ ⲛⲁⲩ ϫⲉ · ⲡⲁⲓ ⲡⲉ ⲡⲉⲧⲛⲉⲓⲱⲧ ϫⲓⲛⲡϩⲟⲟⲩ ⲉⲧϩⲏ · ⲧⲟⲧⲉ ⲁϥⲧⲁⲙⲟⲟⲩ ⲉⲛⲉⲛⲧⲁϥⲁⲁⲩ ⲉⲣⲟⲟⲩ ϩⲙⲡϩⲟⲣⲟⲙⲁ ⲉⲧⲃⲏⲏⲧϥ ·
…
32 ⲡⲡⲉⲧⲟⲩⲁⲁⲃ ⲇⲉ ⲁⲡⲁ ⲗⲟⲩⲅⲓⲟⲥ ⲁϥⲧⲣⲉ ⲁⲡⲁ · ⲗⲟⲅⲅⲓⲛⲟⲥ ⲧⲥⲁⲃⲟϥ ϩⲱⲱϥ ⲉⲣϩⲱⲃ ⲉⲛⲉⲥⲭⲟⲗⲁⲕⲓⲛ , ⲁⲩϭⲱ ⲗⲟⲓⲡⲟⲛ ⲉⲩϣⲙϣⲉ ⲙⲡⲛⲟⲩⲧⲉ ϩⲛⲟⲩⲛⲟϭ ⲛⲥⲡⲟⲩⲇⲏ ⲉⲩⲟⲩⲏϩ ⲙⲛⲛⲉⲩⲉⲣⲏⲩ ϩⲛⲟⲩⲛⲟϭ ⲛⲉⲓⲣⲏⲛⲏ ⲉⲣⲉⲡⲟⲩⲁ ⲡⲟⲩⲁ ϩⲁⲣⲉϩ ⲉⲧⲉϥⲧⲁⲝⲓⲥ ϩⲛⲁⲕⲟⲗⲟⲑⲓⲁ ⲛⲓⲙ , ϩⲱⲥⲧⲉ ⲛⲧⲉⲡⲥⲟⲉⲓⲧ ⲛⲧⲉⲩⲡⲟⲗⲏϯⲁ ⲙⲛⲡⲉⲩⲃⲓⲟⲥ ⲛϩⲁⲕ ⲙⲉϩⲧⲛⲟϭ ⲙⲡⲟⲗⲓⲥ ⲣⲁⲕⲟⲧⲉ ⲙⲛⲕⲏⲙⲉ ⲧⲏⲣϥ ·
…
33 ⲟⲩⲥϩⲓⲙⲉ ⲅⲁⲣ ⲉⲣⲉⲟⲩϣⲱⲛⲉ ϩⲛⲧⲉⲥⲉⲕⲓⲃⲉ ⲉϣⲁⲩⲙⲟⲩⲧⲉ ⲉⲣⲟϥ ϩⲓⲧⲛⲛⲥⲁⲉⲓⲛ ϫⲉⲕⲁⲣⲕⲓⲛⲟⲥ , ⲉⲛⲉⲁⲥⲥⲱⲧⲙ ⲉⲧⲃⲉⲡⲛⲟϭ ⲁⲡⲁ ⲗⲟⲅⲅⲓⲛⲟⲥ ϫⲉⲡϫⲟⲉⲓⲥ ⲉⲓⲣⲉ ⲛϩⲉⲛⲧⲁⲗϭⲟ ⲉⲃⲟⲗ ϩⲓⲧⲟⲟⲧϥ , ⲁⲥⲧⲱⲟⲩⲛ ϩⲛⲟⲩⲡⲓⲥⲧⲓⲥ ⲁⲥⲉⲓϭⲟⲥ ·
…
34 ⲛⲧⲉⲣⲉⲥⲉⲓ ⲉϫⲙⲡⲉⲕⲣⲟ ⲛⲧⲑⲁⲗⲁⲥⲥⲁ ⲁⲥⲁⲡⲁⲛⲧⲁ ⲉⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲉϥⲕⲉϥⲧ ϣⲉ ϩⲁⲧⲙⲡⲉⲥⲡⲟⲧⲟⲩ ⲛⲧⲑⲁⲗⲁⲥⲥⲁ ⲕⲁⲧⲁⲧⲉϥⲥⲩⲛⲏⲑⲓⲁ , ⲁⲥϫⲛⲟⲩϥ ⲉⲥϫⲱ ⲙⲙⲟⲥ ϫⲉ · ⲉⲣⲉⲡϩⲙϩⲁⲗ ⲙⲡⲛⲟⲩⲧⲉ ⲁⲡⲁ ⲗⲟⲅⲅⲓⲛⲟⲥ ϩⲛⲁϣ ⲙⲙⲁ ;
…
35 ⲛⲧⲟϥ ⲇⲉ ⲡⲉϫⲁϥ ϫⲉ · ⲉⲣⲟⲩⲉϣ ⲟⲩ ⲛⲙⲙⲁϥ ;
…
36 ⲛⲧⲟⲥ ⲇⲉ ⲁⲥⲧⲁⲙⲟϥ ⲉⲡϣⲱⲛⲉ ⲉⲧⲛϩⲏⲧⲥ ·
…
37 ⲛⲧⲟϥ ⲇⲉ ⲡⲉϫⲁϥ ⲛⲁⲥ ϫⲉ · ⲉⲣⲟⲩⲉϣ ⲟⲩ ⲙⲛⲡⲉⲧⲙⲙⲁⲩ ;
…
38 ⲟⲩⲗⲁⲁⲩ ⲅⲁⲣ ⲡⲉ · ⲧⲟⲧⲉ ⲁϥⲥⲫⲣⲁⲅⲓⲍⲉ ⲙⲡⲙⲁ ⲉⲧϣⲱⲛⲉ ⲛϩⲏⲧⲥ ⲉϥϫⲱ ⲙⲙⲟⲥ ϫⲉ · ⲉⲣⲉⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲉⲓⲣⲉ ⲛⲙⲙⲉ ⲕⲁⲧⲁⲧⲟⲩⲡⲓⲥⲧⲓⲥ · ⲁⲥⲡⲓⲥⲧⲉⲩⲉ ⲛϭⲓⲧⲉⲥϩⲓⲙⲉ ⲁⲥⲕⲟⲧⲥ ⲉⲡⲉⲥⲏⲓ ·
…
39 ⲛⲧⲉⲣⲉⲥⲟⲩⲉ ⲇⲉ ⲙⲙⲟϥ ⲛⲛⲟⲩⲕⲟⲩⲓ ⲁⲥⲗⲟ ⲉⲃⲟⲗ ϩⲙⲡϣⲱⲛⲉ ·
…
40 ⲁⲩⲱ ⲛⲧⲉⲣⲉⲥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲁⲥⲧⲁⲙⲉⲟⲩⲟⲛ ⲛⲓⲙ ⲉⲡⲧⲁⲗϭⲟ ⲛⲧⲁϥϣⲱⲡⲉ ⲛⲁⲥ ϩⲓⲧⲙⲡⲡⲉⲧⲟⲩⲁⲁⲃ · ⲛⲧⲉⲣⲟⲩϫⲛⲟⲩⲥ ϫⲉ · ⲟⲩⲁϣ ⲙⲙⲓⲛⲉ ⲡⲉ ⲡⲣⲱⲙⲉ ⲉⲧⲙⲙⲁⲩ ;
…
41 ⲁⲩⲱ ⲁⲥⲧⲁⲙⲟⲟⲩ ⲉⲡⲙⲁⲉⲓⲛ ⲙⲡⲉϥϩⲟ ⲉⲧⲥⲙⲁⲙⲁⲁⲧ ⲁⲩⲱ ⲁⲩⲧⲁⲙⲟⲥ ϫⲉⲁⲡⲁ ⲗⲟⲅⲅⲓⲛⲟⲥ ⲡⲉⲛⲧⲁϥⲧⲁⲗϭⲟⲥ ,
…
42 ⲧⲉⲥϩⲓⲙⲉ ⲇⲉ ⲛⲉⲥϯⲉⲟⲟⲩ ⲙⲡⲛⲟⲩⲧⲉ ·
…
43 ⲱ ⲛⲓⲙ ⲡⲉⲧⲛⲁⲉϣϣⲁϫⲉ ⲉⲛⲉⲧⲁⲗϭⲟ ⲙⲛⲛⲉϣⲡⲏⲣⲉ ⲛⲧⲁⲡⲛⲟⲩⲧⲉ ⲁⲁⲩ ⲉⲃⲟⲗ ϩⲓⲧⲟⲟⲧϥ ; ⲉⲓϣⲁⲛⲟⲩⲱϣ ⲉϣⲁϫⲉ ⲉⲡⲟⲩⲁ ⲡⲟⲩⲁ ⲛⲛⲉϥⲧⲁⲗϭⲟ ⲡⲉⲟⲩⲟⲉⲓϣ ⲅⲁⲣ ⲛⲁⲕⲁⲁⲧ ⲉⲓϣⲁϫⲉ · ⲁⲗⲗⲁ ϯⲛⲁϫⲱ ⲛϩⲉⲛⲕⲟⲩⲓ ⲉⲃⲟⲗ ⲛϩⲏⲧⲟⲩ ⲧⲁϯ ⲛⲛⲟⲩϫⲱⲕ ⲙⲡϣⲁϫⲉ ϣⲁⲡⲉⲓⲙⲁ , ⲉⲓϯⲥⲟ ϫⲉⲛⲛⲉϩⲟⲓⲛⲉ ⲣⲁⲡⲓⲥⲧⲟⲥ ⲉⲧⲃⲉⲧⲁϣⲏ ⲛⲛⲉϣⲡⲏⲣⲉ ·
…
44 ⲛⲉⲣⲉϩⲁϩ ⲅⲁⲣ ⲛⲏⲩ ϣⲁⲣⲟϥ ⲉⲃⲟⲗ ϩⲛⲧⲡⲟⲗⲓⲥ ⲣⲁⲕⲟⲧⲉ ⲙⲛⲛⲉⲥⲧⲟϣ ⲉⲩⲟⲩⲱϣ ⲉⲥⲟⲩⲛⲡⲧⲟⲡⲟⲥ ⲉⲧϥⲛϩⲏⲧϥ ⲁⲩⲱ ⲛⲉⲩⲉⲓⲛⲉ ⲛⲁϥ ⲛⲟⲩⲟⲛ ⲛⲓⲙ ⲉⲧϣⲱⲛⲉ ϩⲛϣⲱⲛⲉ ⲛⲓⲙ ⲁⲩⲱ ⲛⲉϥⲧⲁⲗϭⲟ ⲙⲙⲟⲟⲩ ⲧⲏⲣⲟⲩ ·
…