1 ϯⲛⲁϫⲱ ⲇⲉ ⲟⲛ ⲛⲕⲉϣⲡⲏⲣⲉ ⲉⲁⲡⲛⲟⲩⲧⲉ ⲁⲁⲥ ⲉⲃⲟⲗ ϩⲓⲧⲟⲟⲧⲟⲩ ⲛⲛⲉϥϩⲙϩⲁⲗ · ⲛⲉⲩⲛⲟⲩⲣⲱⲙⲉ ϩⲛⲧⲡⲉⲣⲓⲭⲱⲣⲟⲥ ⲉⲧⲙⲙⲁⲩ ⲉⲟⲩⲛⲧⲁϥ ⲙⲙⲁⲩ ⲛⲟⲩϣⲏⲣⲉ ⲛⲉⲩⲅⲉⲛⲏⲥ ⲉⲁϥⲉⲓ ⲉⲧϩⲏⲗⲏⲕⲓⲁ ⲛⲧⲙⲛⲧϣⲏⲣⲉ ϣⲏⲙ ·
…
2 ⲛⲉⲩⲛⲟⲩⲥϩⲓⲙⲉ ⲇⲉ ϫⲉⲫⲗⲁⲃⲓⲁ , ⲁⲥϭⲟⲓⲗⲉ ⲛⲟⲩⲅⲣⲁⲙⲙⲁⲧⲓⲟⲛ ⲉⲛⲉⲓⲟⲧⲉ ⲙⲡϣⲏⲣⲉ ϣⲏⲙ ⲉⲧⲙⲙⲁⲩ ,
…
3 ⲁⲛⲁⲓ ⲇⲉ ⲧⲁⲁϥ ⲙⲡⲉⲩϣⲏⲣⲉ ⲉⲧⲣⲉϥⲥⲕⲉⲡⲁⲍⲉ ⲙⲙⲟϥ ·
…
4 ⲁⲥϣⲱⲡⲉ ⲇⲉ ⲛⲧⲉⲣⲉⲡϣⲏⲣⲉ ϣⲏⲙ ⲙⲟⲩ ϩⲛⲟⲩϣⲡⲛϣⲱⲡ ⲉⲛⲉⲣⲉⲛⲉϥⲉⲓⲟⲧⲉ ⲡⲉ ⲟ ⲛⲁⲧⲥⲟⲟⲩⲛ ⲉⲡⲙⲁ ⲉⲧⲉⲣⲉⲡⲉⲕⲣⲁⲙⲁⲇⲓⲟⲛ ⲛϩⲏⲧϥ ·
…
5 ⲁⲧⲉⲥϩⲓⲙⲉ ⲉⲧⲙⲙⲁⲩ ⲫⲗⲁⲃⲓⲁⲛⲏ ⲉⲓ ⲉⲥϣⲓⲛⲉ ⲛⲥⲁⲧⲉⲥⲡⲁⲣⲁⲑⲏⲕⲏ ⲉⲧⲉⲡⲉⲅⲣⲁⲙⲙⲁⲧⲓⲟⲛ ⲡⲉ ⲛⲧⲁⲥϭⲁⲱϥ ⲉⲣⲟⲟⲩ ⲁⲩⲱ ⲛⲧⲉⲣⲟⲩⲁⲡⲟⲣⲉⲓ ⲙⲡⲟⲩϭⲛⲧϥ ,
…
6 ⲉⲃⲟⲗ ϫⲉ ⲙⲡⲟⲩⲉⲓⲙⲉ ⲉⲡⲙⲁ ⲛⲧⲁⲡϣⲏⲣⲉ ϣⲏⲙ ⲕⲁⲁϥ ⲛϩⲏⲧϥ ,
…
7 ⲁⲥⲁⲡⲉⲓⲗⲉ ⲇⲉ ⲛⲁⲩ ϩⲛⲟⲩⲛⲟϭ ⲛϭⲱⲛⲧ ϩⲱⲥⲧⲉ ⲛⲥⲁⲁⲩ ⲛⲁⲥ ⲛϩⲙϩⲁⲗ , ⲛⲧⲉⲣⲟⲩⲥⲱⲧⲙ ⲉⲛⲁⲓ ⲛϭⲓⲛⲉⲓⲙⲁⲕⲁⲣⲓⲟⲥ ⲉⲩϣⲁⲛⲧⲙⲁⲡⲟⲕⲁⲑⲓⲥⲧⲁ ⲛⲁⲥ ⲙⲡⲉⲥⲅⲣⲁⲙⲙⲁⲧⲓⲟⲛ · ⲧⲟⲧⲉ ⲛⲉⲓⲟⲧⲉ ⲙⲡϣⲏⲣⲉ ϣⲏⲙ ⲛⲧⲉⲣⲟⲩϭⲱ ⲉⲩⲉⲛⲱⲭⲗⲉⲓ ⲛⲁⲩ ϩⲓⲧⲛⲧⲉⲥϩⲓⲙⲉ ⲉⲧⲙⲙⲁⲩ ⲁⲩⲕⲱ ⲙⲡⲉⲩϣⲏⲣⲉ ⲛⲟⲩⲉϣ ⲛⲧⲟⲙⲥ ⲁⲩϯ ⲙⲡⲉⲩⲟⲩⲟⲓ ϩⲛⲟⲩϭⲉⲡⲏ ⲉⲡⲧⲟⲡⲟⲥ ⲉⲧⲉⲣⲉⲛⲉⲧⲟⲩⲁⲁⲃ ⲛϩⲏⲧϥ ⲙⲛϩⲉⲛⲕⲉⲛⲟϭ ⲙⲙⲏⲏϣⲉ ⲉⲩⲟⲩⲏϩ ⲛⲥⲱⲟⲩ , ⲉⲧⲉⲛⲉⲩⲥⲩⲅⲅⲉⲛⲏⲥ ⲛⲉ ⲙⲛⲛⲉⲩⲣⲙⲣⲁⲩⲏ · ⲁⲩⲡⲁϩⲧⲟⲩ ϩⲁⲣⲁⲧⲟⲩ ⲛⲛⲉⲟⲩⲉⲣⲏⲧⲉ ⲛⲁⲡⲁ ⲗⲟⲩⲕⲓⲟⲥ ⲙⲛⲁⲡⲁ ⲗⲟⲅⲅⲓⲛⲟⲥ ⲉⲩⲡⲁⲣⲁⲕⲁⲗⲉⲓ ⲙⲙⲟⲟⲩ ⲉⲩϫⲱ ⲙⲙⲟⲥ ϫⲉ ·
…
8 ⲥⲟⲡⲥ ⲙⲡϫⲟⲉⲓⲥ ⲡⲉⲭⲣⲓⲥⲧⲟⲥ ⲡⲉⲧⲉⲧⲛⲟ ⲛⲁϥ ⲛϩⲙϩⲁⲗ ϫⲉⲕⲁⲥ ⲉϥⲉⲟⲩⲱⲛϩ ⲉⲃⲟⲗ ⲛⲧⲉⲯⲩⲭⲏ ⲙⲡⲉⲛϣⲏⲣⲉ ⲛⲧⲁϥⲙⲟⲩ ⲛⲧⲛⲉⲓⲙⲉ ⲉⲃⲟⲗ ϩⲓⲧⲟⲟⲧϥ ϫⲉⲛⲧⲁϥⲟⲩⲁϩⲡⲉⲅⲣⲁⲙⲙⲁⲧⲓⲟⲛ ⲧⲱⲛ ,
…
9 ⲡⲁⲓ ⲛⲧⲁⲟⲩⲥϩⲓⲙⲉ ⲛⲣⲙⲙⲁⲟ ϭⲁⲗⲱⲱϥ ⲉⲣⲟⲛ ⲉⲥⲁⲡⲉⲓⲗⲏ ⲉⲣⲟⲛ ⲧⲉⲛⲟⲩ ⲉⲧⲣⲉⲥⲁⲁⲛ ⲛϩⲙϩⲁⲗ ⲉϣⲱⲡⲉ ⲙⲡⲉⲛϭⲛⲡⲉⲅⲣⲁⲙⲙⲁⲧⲓⲟⲛ ⲛⲧⲛⲧⲁⲁϥ ⲛⲁⲥ ·
…
10 ⲁⲩⲱ ⲛⲧⲉⲣⲟⲩⲥⲱⲧⲙ ⲉⲛⲁⲓ ⲛϭⲓⲙⲙⲁⲕⲁⲣⲓⲟⲥ ϩⲓⲧⲛⲛⲉⲓⲟⲧⲉ ⲙⲡϣⲏⲣⲉ ϣⲏⲙ ⲁⲩϣⲛϩⲧⲏⲩ ϩⲁⲣⲟⲟⲩ ϩⲓⲧⲛⲧⲁⲅⲁⲡⲏ ⲙⲛⲧⲙⲛⲧϣⲁⲛϩⲧⲏϥ ⲙⲡⲉⲭⲣⲓⲥⲧⲟⲥ ⲉⲧⲛϩⲏⲧⲟⲩ , ⲁⲩⲧⲱⲟⲩⲛ ϩⲛⲟⲩϭⲉⲡⲏ ⲁⲩⲟⲩⲁϩⲟⲩ ⲛⲥⲱⲟⲩ ⲁϫⲛⲗⲁⲁⲩ ⲛϣⲧⲟⲣⲧⲣ ϩⲓⲙⲛⲧⲣⲉϥϫⲛⲁⲁⲩ · ⲁⲩⲱ ⲛⲧⲉⲣⲟⲩⲡⲱϩ ⲉⲡⲏⲓ ⲉⲧⲉⲣⲉ ⲡϣⲏⲣⲉ ϣⲏⲙ ⲉϥⲙⲟⲟⲩⲧ ⲛϩⲏⲧϥ ⲁⲩⲱⲕ ⲉϩⲟⲩⲛ ⲉⲡⲙⲁ ⲉⲧⲉⲣⲉⲡⲉⲧⲙⲟⲟⲩⲧ ⲛⲕⲟⲧⲕ ⲛϩⲏⲧϥ ⲁⲩⲕⲱⲗϫ ⲛⲛⲉⲩⲡⲁⲧ ⲁⲩϣⲗⲏⲗ ϩⲱⲥ ⲉⲣⲉⲡⲛⲟⲩⲧⲉ ⲟⲩⲱϣ ⲉⲟⲩⲱⲛϩ ⲉⲃⲟⲗ ⲛⲧⲉϣⲡⲡⲣⲉ ⲉⲡⲙⲁⲕⲁⲣⲓⲟⲥ ⲁⲡⲁ ⲗⲟⲅⲅⲓⲛⲟⲥ ⲡⲉⲧⲙⲉϩ ⲛⲁⲣⲉⲧⲏ · ⲛⲧⲉⲩⲛⲟⲩ ⲁϥⲙⲟⲩϩ ⲉⲃⲟⲗ ϩⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲁϥⲁⲙⲁϩⲧⲉ ⲛⲧϭⲓϫ ⲙⲡϣⲏⲣⲉ ϣⲏⲙ ⲙⲡⲙⲧⲟ ⲉⲃⲟⲗ ⲙⲡⲙⲏⲏϣⲉ ⲁⲩⲱ ⲡⲉϫⲁϥ ⲛⲧⲉⲓϩⲉ ϫⲉ · ⲡⲛⲟⲩⲧⲉ ⲛⲧⲁϥⲧⲟⲩⲛⲉⲥ ⲗⲁⲍⲁⲣⲟⲥ ⲙⲡⲉⲓⲟⲩⲟⲉⲓϣ ⲛⲧⲟϥ ⲟⲛ ⲧⲉⲛⲟⲩ ⲡⲉⲧⲛⲁⲕⲧⲟ ⲉⲣⲟⲕ ⲙⲡⲉⲕⲡⲛⲉⲩⲙⲁ ϫⲉⲕⲁⲥ ⲉⲕⲛⲁⲧⲁⲙⲟⲛ ϫⲉⲛⲧⲁⲕⲕⲁ ⲡⲉⲅⲣⲁⲙⲙⲁⲧⲓⲟⲛ ⲛⲧⲉⲥϩⲓⲙⲉ ⲛⲣⲙⲙⲁⲟ ⲉⲧⲱⲛ , ϫⲉⲛⲛⲉⲥϥⲓ ⲛⲛⲉⲕⲉⲓⲟⲧⲉ ⲛϩⲙϩⲁⲗ ·
…
11 ⲁⲩⲱ ⲛⲧⲉⲩⲛⲟⲩ ⲁⲡⲉⲡⲛⲉⲩⲙⲁ ⲙⲡϣⲏⲣⲉ ϣⲏⲙ ⲕⲧⲟϥ ⲉⲣⲟϥ ⲁϥⲧⲱⲟⲩⲛ ⲁϥϩⲙⲟⲟⲥ ⲁϥⲟⲩⲱⲛ ⲛⲣⲱϥ , ⲉⲣⲉⲛⲉⲧⲁϩⲉⲣⲁⲧⲟⲩ ⲧⲏⲣⲟⲩ ⲥⲱⲧⲙ , ⲁϥⲧⲁⲙⲟⲟⲩ ϫⲉⲉⲣⲉⲡⲉⲅⲣⲁⲙⲙⲁⲧⲓⲟⲛ ⲟⲩⲏϩ ⲧⲱⲛ ϩⲙⲡⲏⲓ ·
…
12 ⲁⲩⲱ ⲁⲩϫⲛⲟⲩϥ ⲛϭⲓⲛⲉϥⲉⲓⲟⲧⲉ ⲉϩⲉⲛⲕⲉϩⲃⲏⲩⲉ ⲉⲩⲟ ⲛⲁⲧⲥⲟⲟⲩⲛ ⲉⲣⲟⲟⲩ ⲁϥⲁⲡⲟⲗⲟⲅⲓⲍⲉ ⲛⲁⲩ ⲉⲧⲃⲉϩⲱⲃ ⲛⲓⲙ ⲛⲧⲁⲩϫⲛⲟⲩϥ ⲉⲣⲟⲟⲩ ⲁⲩⲱ ⲛⲧⲉⲓϩⲉ ⲁϥⲛⲕⲟⲧⲕ ⲛⲧⲉⲩⲛⲟⲩ ·
…
13 ⲛⲧⲉⲣⲟⲩⲛⲁⲩ ⲇⲉ ⲛϭⲓⲛⲣⲱⲙⲉ ⲛⲧⲗⲩⲕⲓⲁ ⲉⲡⲉⲓϩⲱⲃ ⲛϣⲡⲏⲣⲉ ⲛⲧⲁϥϣⲱⲡⲉ ϩⲓⲧⲛⲛⲉⲧⲟⲩⲁⲁⲃ ⲁⲩϯⲉⲟⲟⲩ ⲙⲡⲛⲟⲩⲧⲉ ⲡⲉⲧⲉⲓⲣⲉ ⲛⲛⲉⲓϣⲡⲏⲣⲉ ⲙⲁⲩⲁⲁϥ ·
…
14 ⲛⲧⲉⲣⲉⲡⲥⲟⲉⲓⲧ ⲇⲉ ⲙⲟⲟϣⲉ ⲉⲧⲃⲏⲏⲧⲟⲩ ϩⲛⲧⲉⲭⲱⲣⲁ ⲉⲧⲙⲙⲁⲩ ⲛⲉⲣⲉⲡⲙⲏⲏϣⲉ ⲧⲏⲣϥ ⲉⲓⲛⲉ ϣⲁⲣⲟⲟⲩ ⲛⲛⲉⲩⲣⲱⲙⲉ ⲉⲧϣⲱⲛⲉ ϩⲛϣⲱⲛⲉ ⲛⲓⲙ ⲉⲧⲣⲉⲩϣⲗⲏⲗ ⲉϫⲱⲟⲩ ⲛⲥⲉⲧⲁⲗϭⲟⲟⲩ ⲁⲩⲱ ⲛⲉⲩϯ ⲛⲁⲩ ⲛϩⲉⲛⲛⲟϭ ⲛⲧⲁⲉⲓⲟ · ⲛⲧⲉⲣⲟⲩϩⲟϫϩϫ ϩⲓⲧⲙⲡⲉϩⲟⲩⲟ ⲙⲡⲙⲏⲏϣⲉ ⲉⲧⲉⲛⲱⲭⲗⲉⲓ ⲛⲁⲩ ⲙⲛⲡⲉⲟⲟⲩ ⲉⲧⲟⲩϯ ⲙⲙⲟϥ ⲛⲁⲩ , ⲡⲁⲓ ⲉⲛϥⲏⲡ ⲁⲛ ⲛⲁϩⲣⲁⲩ ⲉⲧⲃⲉⲡⲉⲩⲛⲟϭ ⲛⲑⲃⲃⲓⲟ , ⲁⲩϫⲓϣⲟϫⲛⲉ ⲗⲟⲓⲡⲟⲛ ⲉⲧⲣⲉⲩⲡⲱⲧ ⲛϫⲓⲟⲩⲉ ⲛⲥⲉⲗⲟ ϩⲛⲛⲉⲧⲟϣ ⲉⲧⲙⲙⲁⲩ ·
…
15 ⲛⲧⲉⲣⲟⲩⲉⲓⲙⲉ ⲇⲉ ⲛϭⲓⲛⲉⲧⲟⲩⲏϩ ϩⲙⲡⲉⲩⲕⲱⲧⲉ ⲁⲩϭⲱ ⲉⲩⲣⲟⲉⲓⲥ ⲉⲣⲟⲟⲩ ϩⲱⲥ ⲉⲛⲥⲉⲟⲩⲱϣ ⲁⲛ ⲛϩⲟⲩⲣⲱⲟⲩ ⲙⲡⲉⲩⲥⲙⲟⲩ ⲙⲛⲧⲉⲩϭⲓⲛⲟⲩⲱϩ ϩⲁⲧⲏⲩ ·
…
16 ⲛⲉⲩϣⲟⲟⲡ ⲅⲁⲣ ⲛϣⲟⲩϣⲟⲩ ⲛⲧⲉⲭⲱⲣⲁ ⲧⲏⲣⲥ ⲉⲧⲙⲙⲁⲩ ⲉⲧⲃⲉⲧⲁϣⲏ ⲛⲛⲉϣⲡⲏⲣⲉ ⲉⲧϣⲟⲟⲡ ⲉⲃⲟⲗ ϩⲓⲧⲟⲟⲧⲟⲩ ·
…
17 ⲧⲟⲧⲉ ⲡⲙⲁⲕⲁⲣⲓⲟⲥ ⲗⲟⲩⲅⲓⲟⲥ ⲁϥϫⲓ ⲙⲡⲉϥⲙⲁⲑⲏⲧⲏⲥ ⲛⲥⲁⲟⲩⲥⲁ ⲡⲉϫⲁϥ ⲛⲁϥ ϫⲉ · ⲛⲧⲛⲛⲁϣϭⲱ ⲁⲛ ⲛⲧⲉⲓϩⲉ ⲉⲛϥⲓ ϩⲁⲡⲉⲟⲟⲩ ⲉⲧϣⲟⲩⲉⲓⲧ ⲛⲛⲡⲣⲱⲙⲉ ⲟⲩⲇⲉ ⲛⲟⲩⲛⲟϥⲣⲉ ⲁⲛ ⲧⲉ ⲛⲛⲉⲛⲯⲩⲭⲏ · ⲗⲟⲓⲡⲟⲛ ⲡⲁϣⲏⲣⲉ ⲥⲱⲧⲙ ⲛⲥⲱⲓ ⲛⲅⲧⲱⲟⲩⲛ ϩⲛⲟⲩϩⲱⲡ ⲛⲅⲃⲱⲕ ⲉⲣⲁⲕⲟⲧⲉ ˽
…
18 ϯⲥⲱⲧⲙ ⲉⲧⲃⲉ ⲟⲩⲙⲟⲛⲁⲥⲧⲏⲣⲓⲟⲛ ⲉϥⲥⲁ ⲡⲉⲙⲛⲧ ⲛⲧⲡⲟⲗⲓⲥ ⲉⲧⲙⲙⲁⲩ ⲉϣⲁⲩⲙⲟⲩⲧⲉ ⲉⲣⲟϥ ϫⲉⲡϩⲉⲛⲁⲧⲟⲛ ⲉⲣⲉⲟⲩⲛⲟϭ ⲛϩⲏⲥⲩⲭⲓⲁ ⲛϩⲏⲧϥ ⲕⲁⲧⲁⲡⲛⲟⲩⲧⲉ ˽ⲛⲅϣⲓⲛⲉ ⲛⲥⲁⲟⲩⲣⲙⲕⲟⲣⲓⲛⲑⲟⲥ ⲉⲡⲉϥⲣⲁⲛ ⲡⲉ ⲅⲁⲓⲟⲥ ⲉϥⲟ ⲛⲕⲟⲛⲟⲃⲓⲁⲣⲭⲏⲥ ⲉⲡⲉϥⲕⲟⲓⲛⲟⲃⲓⲟⲛ ⲙⲙⲓⲛⲙⲙⲟϥ ⲡⲁⲓ ⲛⲧⲁϥⲕⲟⲧϥ ϩⲙⲡⲙⲁ ⲉⲧⲙⲙⲁⲩ , ⲛⲅϭⲱ ⲛϩⲟⲩⲛ ϩⲁⲧⲏϥ ·
…
19 ⲁⲩⲱ ϯϩⲉⲗⲡⲓⲍⲉ ⲉⲡϫⲟⲉⲓⲥ ⲡⲛⲟⲩⲧⲉ ⲡⲉⲛⲥⲱⲧⲏⲣ ϫⲉⲕⲁⲛ ⲉⲕϩⲙⲙⲙⲁ ⲛⲓⲙ ⲛϥⲛⲁϩⲟⲩⲣⲱⲱⲧ ⲁⲛ ⲛⲧϭⲓⲛⲟⲩⲱϩ ⲛⲙⲙⲁⲕ ϩⲙⲡⲥⲱⲙⲁ ·
…
20 ⲁⲩⲱ ⲕⲁⲛ ⲉⲣϣⲁⲛⲟⲩⲭⲣⲟⲛⲟⲥ ⲟⲩⲱ ⲉⲓⲙⲡⲉⲕⲃⲟⲗ ϯⲡⲓⲥⲧⲉⲩⲉ ⲉⲡϫⲟⲉⲓⲥ ϫⲉϯⲛⲏⲩ ϣⲁⲣⲟⲕ ⲡⲁⲛⲧⲱⲥ ⲉⲧⲣⲉⲛϫⲱⲕ ⲉⲃⲟⲗ ⲙⲡⲉⲛⲇⲣⲟⲙⲟⲥ ϩⲓⲟⲩⲥⲟⲡ ϩⲙⲡⲙⲁ ⲉⲧⲉⲣⲉⲡϫⲟⲉⲓⲥ ⲛⲁⲧⲟϣϥ ⲛⲁⲛ ⲕⲁⲧⲁⲡⲉϥⲟⲩⲱϣ ·
…
21 ⲉⲕϣⲟⲟⲡ ⲙⲉⲛ ϩⲙⲙⲁ ⲛⲓⲙ ⲡⲁϣⲏⲣⲉ ⲡⲱⲧ ⲉⲃⲟⲗ ⲙⲡⲉⲟⲟⲩ ⲉⲧϣⲟⲩⲉⲓⲧ ⲛⲛⲣⲱⲙⲉ ⲁⲩⲱ ⲃⲱⲕ ⲉⲡⲙⲁⲣⲧⲏⲣⲓⲟⲛ ⲙⲡϩⲁⲅⲓⲟⲥ ⲙⲏⲛⲁⲛⲅϣⲗⲏⲗ ⲛϣⲟⲣⲡ ⲧⲟⲧⲉ ⲛⲅⲃⲱⲕ ⲉⲡϩⲉⲛⲁⲧⲟⲛ ⲛⲅϣⲱⲡⲉ ϩⲙⲡⲙⲟⲛⲁⲥⲧⲏⲣⲓⲟⲛ ⲛⲁⲡⲁ ⲅⲁⲓⲟⲥ ·
…
22 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲁⲩϣⲗⲏⲗ ⲁⲩⲁⲥⲡⲁⲍⲉ ⲛⲛⲉⲩⲉⲣⲏⲩ ⲁⲩⲱ ⲛⲧⲉⲓϩⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ·
…
23 ⲛⲧⲉⲣⲉϥⲉⲓ ⲇⲉ ⲉⲣⲁⲕⲟⲧⲉ ⲛϭⲓⲡⲙⲁⲕⲁⲣⲓⲟⲥ ⲁⲡⲁ ⲗⲟⲅⲅⲓⲛⲟⲥ ⲁϥϣⲓⲛⲉ ϩⲙⲡϩⲉⲛⲁⲧⲟⲛ ⲛⲥⲁⲡⲙⲟⲛⲁⲥⲧⲏⲣⲓⲟⲛ ⲛⲁⲡⲁ ⲅⲁⲓⲟⲥ ⲁⲩⲱ ⲁⲩⲧⲥⲁⲃⲟϥ ⲉⲣⲟϥ ⲛϭⲓϩⲉⲛⲣⲱⲙⲉ ⲛⲉⲩⲗⲁⲃⲏⲥ ·
…
24 ⲛⲧⲉⲣⲉϥⲉⲓ ⲇⲉ ⲉⲡⲙⲟⲛⲁⲥⲧⲏⲣⲓⲟⲛ ⲁϥⲕⲱⲗϩ ⲉⲡⲣⲟ ϩⲛⲟⲩⲥϭⲣⲉϩⲧ · ⲛⲧⲉⲣⲉⲡⲉⲙⲛⲟⲩⲧ ⲟⲩⲱⲛ ⲙⲡⲣⲟ ⲁϥϫⲛⲟⲩϥ ϫⲉ · ⲛⲧⲕ ⲟⲩⲉⲃⲟⲗ ⲧⲱⲛ ⲁⲩⲱ ⲛⲧⲁⲕⲉⲓ ⲉⲡⲉⲓⲙⲁ ⲉⲧⲃⲉ ⲁϣ ⲛⲁⲓϯⲁ ;
…
25 ⲁϥⲟⲩⲱϣⲃ ⲛϭⲓⲡⲉⲧⲑⲃⲃⲓⲏⲩ ϩⲛⲟⲩⲙⲉ ⲁⲡⲁ ⲗⲟⲅⲅⲓⲛⲟⲥ ⲡⲉϫⲁϥ ϫⲉ ·
…
26 ⲁⲛⲅ ⲟⲩⲉⲃⲟⲗ ϩⲛⲧⲉⲭⲱⲣⲁ ⲛⲧⲗⲩⲕⲓⲁ ⲁⲩⲱ ⲛⲧⲁⲓⲉⲓ ⲉⲡⲉⲓⲙⲁ ⲉⲣⲙⲟⲛⲁⲭⲟⲥ ·
…
27 ⲟⲩⲇⲉ ⲅⲁⲣ ⲙⲡⲉϥⲁⲛⲉⲭⲉ ϩⲓⲧⲙⲛⲉϥⲛⲟϭ ⲛⲑⲃⲃⲓⲟ ⲉⲧⲣⲉϥⲙⲟⲩⲧⲉ ⲉⲣⲟϥ ⲙⲁⲩⲁⲁϥ ϫⲉⲟⲩⲙⲟⲛⲁⲭⲟⲥ ⲡⲉ · ⲙⲛⲕⲗⲁⲃⲧ ϩⲓϫⲱϥ ⲟⲩⲇⲉ ⲁⲛⲁⲃⲟⲗⲟⲥ ⲟⲩⲇⲉ ⲙⲡϩⲉⲑⲟⲥ ⲁⲛ ⲡⲉ ⲛⲙⲙⲟⲛⲁⲭⲟⲥ ⲛⲝⲉⲛⲓⲕⲟⲥ ⲉⲫⲟⲣⲉⲓ ⲛⲛⲁⲓ ⲛⲧⲉⲓϩⲉ , ⲁⲗⲗⲁ ⲕⲟⲗⲟⲃⲓⲟⲛ ϩⲓⲡⲁⲗⲗⲓⲛ ϩⲓⲙⲟϫ ⲙⲙⲁⲧⲉ , ⲛⲁⲓ ϩⲱⲱϥ ⲛⲉⲧϥⲫⲟⲣⲉⲓ ⲙⲙⲟⲟⲩ ⲙⲡⲛⲁⲩ ⲛⲧⲁϥⲉⲓ ⲉⲡⲙⲟⲛⲁⲥⲧⲏⲣⲓⲟⲛ ·
…
28 ⲛⲉⲁⲡⲉϥⲃⲱ ⲅⲁⲣ ⲣⲱⲧ ⲛⲟⲩⲕⲟⲩⲓ ϩⲓⲧⲛⲧⲁϣⲏ ⲛⲛⲉϩⲟⲟⲩ ⲛⲧⲁϥⲁⲁⲩ ϩⲙⲡⲇⲓⲁⲥⲧⲏⲙⲁ ⲛⲧⲉϩⲓⲏ ⲛⲧⲁϥⲉⲓ ⲛϩⲏⲧⲥ ·
…
29 ⲉⲧⲃⲉⲡⲁⲓ ⲙⲡⲟⲩⲥⲟⲩⲱⲛϥ ⲛⲧⲉⲩⲛⲟⲩ ϫⲉⲟⲩⲙⲟⲛⲁⲭⲟⲥ ⲡⲉ ·
…
30 ⲡⲉⲙⲛⲟⲩⲧ ⲇⲉ ⲡⲉϫⲁϥ ⲛⲁϥ ϫⲉ · ⲛⲅⲛⲁϣⲣⲙⲟⲛⲁⲭⲟⲥ ⲁⲛ ⲙⲡⲉⲓⲙⲁ ·
…
31 ⲕⲁⲓ ⲅⲁⲣ ⲡⲕⲁⲛⲱⲛ ⲛⲧⲉⲛⲯⲁⲗⲙⲱⲇⲓⲁ ⲟⲩⲛⲟϭ ⲡⲉ ⲁⲩⲱ ⲧⲉⲛϭⲓⲛⲟⲩⲱⲙ ⲙⲛⲧⲉⲛϭⲓⲛⲛⲕⲟⲧⲕ ⲙⲛⲡⲥⲉⲉⲡⲉ ⲛⲛⲉϩⲃⲏⲩⲉ ⲥⲉϩⲛⲟⲩⲛⲟϭ ⲙⲙⲟⲕϩⲥ ⲙⲛⲟⲩϩⲓⲥⲉ , ⲙⲛⲗⲁⲁⲩ ⲛⲥⲟⲗⲥⲗ ⲛϩⲏⲧⲟⲩ ·
…
32 ϫⲓ ϭⲉ ⲛⲁⲕ ⲛϩⲉⲛⲟⲉⲓⲕ ⲛⲛⲉⲩⲗⲟⲅⲓⲁ · ⲡϫⲟⲉⲓⲥ ⲛⲙⲙⲁⲕ ·
…
33 ⲛⲧⲟϥ ⲇⲉ ⲡⲅⲉⲛⲛⲁⲓⲟⲥ ⲁⲡⲁ ⲗⲟⲅⲅⲓⲛⲟⲥ ⲙⲡⲉϥⲁⲛϯⲗⲓⲅⲉ ⲉⲧⲣⲉϥϫⲱ ⲛⲁϥ ⲛⲟⲩϣⲁϫⲉ ⲁⲗⲗⲁ ⲛⲧⲉⲣⲉϥⲥⲱⲧⲙ ⲉⲡⲣⲁⲛ ⲛⲧⲉⲩⲗⲟⲅⲓⲁ ,
…
34 ⲛⲟⲉⲓⲕ ⲙⲉⲛ ⲁϥϫⲓⲧⲟⲩ ϩⲙⲡⲉⲥⲙⲟⲩ ,
…
35 ⲁϥϩⲩⲡⲟⲙⲓⲛⲉ ϩⲓⲡⲙⲡⲣⲟ ⲛⲟⲩⲙⲏⲏϣⲉ ⲛϩⲟⲟⲩ ⲉϥⲧⲛⲧⲱⲛϥ ϩⲙⲡⲉⲓⲕⲉⲟⲩⲁ ⲉⲡⲛⲟϭ ⲁⲛⲧⲱⲛⲓⲟⲥ ⲡⲁⲓ ⲛⲧⲉⲣⲉϥⲃⲱⲕ ϣⲁⲡⲛⲟϭ ⲡⲁⲩⲗⲟⲥ ⲡⲁⲛⲁⲭⲱⲣⲏⲧⲏⲥ ⲙⲛⲛⲥⲁⲡⲛⲟϭ ⲛϩⲓⲥⲉ ⲛⲧⲉϩⲓⲏ ⲛⲛⲏⲣⲏⲙⲟⲥ ⲛⲧⲁϥϩⲩⲡⲟⲙⲓⲛⲉ ⲉⲣⲟⲥ ,
…
36 ⲙⲡⲉⲡⲛⲟϭ ⲉⲧⲙⲙⲁⲩ ϣⲟⲡϥ ⲉⲣⲟϥ ⲛⲧⲉⲩⲛⲟⲩ ·
…
37 ⲡⲙⲁⲕⲁⲣⲓⲟⲥ ⲇⲉ ϩⲱⲱϥ ⲁⲛⲧⲱⲛⲓⲟⲥ ⲁϥϩⲩⲡⲟⲙⲓⲛⲉ ϩⲓⲣⲙⲡⲣⲟ ⲉϥϫⲱ ⲙⲙⲟⲥ ϫⲉ · ⲁⲓϣⲓⲛⲉ ⲁⲓϭⲓⲛⲉ ⲁⲩⲱ ϯⲡⲓⲥⲧⲉⲩⲉ ϫⲉⲥⲉⲛⲁⲟⲩⲱⲛ ⲛⲁⲓ ·
…
38 ⲡⲁⲓ ϩⲱⲱϥ ⲟⲛ ϩⲱⲥ ⲉⲡⲉⲓⲡⲛⲉⲩⲙⲁ ⲛⲟⲩⲱⲧ ⲡⲉⲧⲟⲩⲏϩ ⲛϩⲏⲧϥ ⲁⲩⲱ ⲉϥⲙⲉⲉⲩⲉ ⲉⲛⲁⲓ ϩⲙⲡⲉϥϩⲏⲧ ⲁϥϩⲩⲡⲟⲙⲓⲛⲉ ϩⲱⲱϥ ϩⲓⲣⲙⲡⲣⲟ ϣⲁⲛⲧⲉϥⲙⲁⲧⲉ ⲙⲡⲉⲧϥⲙⲉⲉⲩⲉ ⲉⲣⲟϥ ϩⲙⲡⲉϥϩⲏⲧ ⲉⲧⲃⲉⲧⲉϥⲛⲟϭ ⲛϩⲩⲡⲟⲙⲟⲛⲏ ·
…
39 ⲛⲧⲉⲣⲉⲡⲉⲑⲩⲣⲟⲩⲣⲟⲥ ϭⲱ ⲉϥⲛⲏⲩ ⲉⲃⲟⲗ ⲙⲙⲏⲛⲉ ⲉⲧⲣⲉϥⲉⲓⲣⲉ ⲛⲛⲉϩⲃⲏⲩⲉ ⲉⲧⲧⲏϣ ⲛⲁϥ ,
…
40 ⲛⲉϣⲁϥϭⲛⲧϥ ⲉϥϩⲙⲟⲟⲥ ϩⲓⲣⲙⲡⲣⲟ ϩⲛⲟⲩⲛⲟϭ ⲛϩⲩⲡⲟⲙⲟⲛⲏ ,
…
41 ⲁϥϫⲓ ⲡⲟⲩⲱ ⲉϩⲟⲩⲛ ⲙⲡϩⲩⲅⲟⲩⲙⲉⲛⲟⲥ ⲙⲡⲙⲟⲛⲁⲥⲧⲏⲣⲓⲟⲛ ⲉϥϫⲱ ⲙⲙⲟⲥ ϫⲉ · ⲉⲓⲥⲟⲩϣⲏⲣⲉ ϣⲏⲙ ⲛⲝⲉⲛⲓⲕⲟⲥ ϩⲓⲣⲙⲡⲣⲟ ⲙⲡⲙⲟⲛⲁⲥⲧⲏⲣⲓⲟⲛ ⲉⲓⲥⲟⲩⲏⲣ ⲛϩⲟⲟⲩ ⲉϥϫⲱ ⲙⲙⲟⲥ ϫⲉ · ⲉⲓⲟⲩⲱϥ ⲉⲣⲙⲟⲛⲁⲭⲟⲥ ·
…
42 ⲁⲛⲟⲕ ⲇⲉ ⲁⲓⲕⲱⲗⲩ ⲙⲙⲟϥ ⲛϩⲁϩ ⲛⲥⲟⲡ ,
…
43 ⲛⲧⲟϥ ⲇⲉ ⲁϥϩⲩⲡⲟⲙⲓⲛⲉ ϣⲁⲉϩⲟⲩⲛ ⲉⲧⲉⲛⲟⲩ ·
…
44 ⲁϥⲟⲩⲱϣⲃ ⲛϭⲓⲡⲉⲡⲣⲟⲉⲥⲧⲟⲥ ⲉϥϫⲱ ⲙⲙⲟⲥ ϫⲉ ·
…
45 ⲉⲡϩⲟⲥⲟⲛ ⲁⲕⲛⲁⲩ ⲉⲧⲉϥϩⲩⲡⲟⲙⲟⲛⲏ ⲁⲛⲓϥ ⲉϩⲟⲩⲛ ϩⲁⲧⲏⲕ ⲛⲥⲁϩⲟⲩⲛ ⲛⲧⲡⲩⲗⲏ ⲛϥϭⲱ ⲉϥϯ ⲛⲧⲟⲟⲧϥ ⲛⲙⲙⲁⲕ ϩⲛⲛⲉⲕϩⲃⲏⲩⲉ ϩⲛϩⲱⲃ ⲛⲓⲙ ⲉⲧⲕⲛⲁⲧⲟϣϥ ⲉⲣⲟϥ ·
…
46 ⲗⲟⲓⲡⲟⲛ ⲁⲡⲉⲙⲛⲟⲩⲧ ⲛⲧϥ ⲉϩⲟⲩⲛ ⲉⲧⲡⲩⲇⲏ ⲕⲁⲧⲁⲡⲟⲩⲉϩⲥⲁϩⲛⲉ ⲙⲡⲉⲓⲱⲧ ⲙⲡⲙⲟⲛⲁⲥⲧⲏⲣⲓⲟⲛ. ⲟⲩ ⲙⲟⲛⲟⲛ ϫⲉⲛⲉϥⲉⲓⲣⲉ ⲛϩⲱⲃ ⲛⲓⲙ ⲉⲧϥⲟⲩⲉϩⲥⲁϩⲛⲉ ⲙⲙⲟⲟⲩ ⲛⲁϥ ⲛϭⲓⲡⲉⲑⲩⲣⲟⲩⲣⲟⲥ , ⲁⲗⲗⲁ ⲟⲩⲟⲛ ⲛⲓⲙ ⲉⲧⲛⲁⲟⲩⲉϩⲥⲁϩⲛⲉ ⲛⲁϥ ϩⲛⲛⲉⲥⲛⲏⲩ ϣⲁϥⲁⲁⲩ ϩⲛⲟⲩⲛⲟϭ ⲛⲥⲡⲟⲩⲇⲏ ⲙⲛⲟⲧⲙⲛⲧⲥⲧⲙⲏⲧ ⲉⲥϫⲏⲕ ⲉⲃⲟⲗ ·
…
47 ⲁⲩⲱ ⲛⲉϥϩⲩⲡⲟⲙⲓⲛⲉ ⲛⲧⲉⲓϩⲉ ϩⲛⲛⲉⲓϩⲃⲏⲩⲉ ⲛⲧⲉⲓⲙⲓⲛⲉ ⲛⲣⲟⲙⲡⲉ ⲥⲛⲧⲉ ⲏ ⲡⲉϩⲟⲩⲟ ⲉⲣⲟⲟⲩ ⲁⲩⲱ ⲙⲡⲉϥϫⲟⲟⲥ ⲛⲛⲥⲛⲏⲩ ϩⲟⲗⲱⲥ ϫⲉ ⲟⲩⲙⲟⲛⲁⲭⲟⲥ ⲡⲉ ·
…
48 ⲡⲛⲟⲩⲧⲉ ⲇⲉ ⲡⲁⲓ ⲉⲧϯⲉⲟⲟⲩ ⲛⲛⲉⲧϯⲉⲟⲟⲩ ⲛⲁϥ ⲛⲟⲩⲟⲉⲓϣ ⲛⲓⲙ ⲁⲩⲱ ⲉϥϭⲱⲗⲡ ⲉⲃⲟⲗ ⲛⲛⲉⲧϩⲏⲡ ⲁⲩⲱ ⲉϥϫⲓⲥⲉ ⲛⲛⲉⲧⲑⲃⲃⲓⲏⲩ , ⲡⲁⲓ ⲛⲧⲁϥϫⲟⲟⲥ ϩⲛⲧⲉϥⲧⲁⲡⲣⲟ ⲙⲙⲉ ϫⲉ ·
…
49 ⲙⲉⲩϫⲉⲣⲉ ⲟⲩϩⲏⲃⲥ ⲛⲥⲉⲕⲁⲁϥ ϩⲁⲟⲩϣⲓ ⲁⲗⲗⲁ ⲛϣⲁⲩⲕⲁⲁϥ ⲉϫⲛⲧⲗⲩⲭⲛⲓⲁ ⲛϥⲣⲟⲩⲟⲉⲓⲛ ⲉⲛⲉⲧϣⲟⲟⲡ ⲧⲏⲣⲟⲩ ϩⲙⲡⲏⲓ –
…
50 ⲙⲡⲉϥⲟⲩⲱϣ ⲉⲧⲣⲉⲡⲉϥⲥⲱⲧⲡ ϭⲱ ⲉϥϩⲏⲡ ⲁⲗⲗⲁ ⲁϥⲟⲩⲟⲛϩϥ ⲉⲃⲟⲗ ϩⲱⲥ ⲣⲉϥⲣⲟⲩⲟⲉⲓⲛⲉ ϩⲛⲟⲩⲙⲉ ⲁϥⲕⲁⲁϥ ⲉϫⲛⲧⲗⲩⲭⲛⲓⲁ ⲛⲛⲟⲏⲧⲟⲛ ⲉⲧⲣⲉϥⲣⲟⲩⲟⲉⲓⲛ ⲉⲛⲉⲧϩⲙⲡⲉϥⲕⲱⲧⲉ ⲙⲙⲁⲧⲉ ⲁⲛ ⲁⲗⲗⲁ ⲉⲛⲕⲟⲟⲩⲉ ⲉⲧⲟⲩⲏⲩ ⲙⲙⲟϥ ·
…
51 ⲉⲁϥⲣⲟⲩⲟⲉⲓⲛ ⲉⲣⲟⲟⲩ ϩⲓⲧⲛⲧⲁϣⲏⲛ ⲛⲉϥⲕⲁⲣⲡⲟⲥ ⲙⲛⲛⲉϥⲕⲁⲧⲟⲣⲑⲱⲙⲁ ⲕⲁⲧⲁⲧϩⲉ ⲉⲧⲉⲣⲉⲡϣⲁϫⲉ ⲛⲁⲟⲩⲉⲛϩⲡⲁⲓ ⲉⲃⲟⲗ ⲛⲁⲛ ⲉⲣϣⲁⲛⲡⲗⲟⲅⲟⲥ ⲙⲟⲟϣⲉ ⲉⲧϩⲏ ·
…