1 ⲡⲃⲓⲟⲥ ⲁⲩⲱ ⲧⲡⲟⲗⲏⲧⲓⲁ ⲛⲛⲉⲓⲟⲧⲉ ⲉⲧⲟⲩⲁⲁⲃ ⲉⲧⲧⲁⲓⲏⲩ ⲛⲁⲥⲕⲏⲧⲏⲥ ⲁⲡⲁ ⲗⲟⲅⲅⲓⲛⲟⲥ ⲙⲛⲁⲡⲁ ⲗⲟⲩⲅⲓⲟⲥ ⲡⲉϥⲉⲓⲱⲧ ⲙⲡⲛⲉⲩⲙⲁⲧⲓⲕⲟⲥ ·
…
2 ⲛⲧⲁⲩϫⲱⲕ ⲇⲉ ⲉⲃⲟⲗ ⲙⲡⲉⲩⲃⲓⲟⲥ ⲉⲧⲧⲁⲓⲏⲩ ⲛⲥⲟⲩⲥⲛⲁⲩ ⲙⲡⲉⲃⲟⲧ ⲙϣⲓⲣ · ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ · ϩⲁⲙⲏⲛ ·
…
3 ⲛⲉⲛⲧⲁⲩϫⲱⲕ ⲙⲉⲛ ⲉⲃⲟⲗ ⲛϩⲉⲛⲡⲟⲗⲏϯⲁ ⲉⲩⲧⲟⲟⲙⲉ ⲉϩⲉⲛⲣⲱⲙⲉ ⲉⲩⲫⲟⲣⲉⲓ ⲛⲧⲥⲁⲣⲝ ,
…
4 ⲉⲥⲧⲱ ⲇⲉ ϩⲉⲛⲗⲁⲥ ⲛⲥⲁⲣⲝ ϫⲱ ⲉⲣⲟⲟⲩ ⲛϩⲉⲛⲁⲓⲡⲁⲓⲛⲟⲥ · ⲛⲉⲛⲧⲁⲩⲣⲡⲉⲧⲡⲉ ⲙⲡϣⲓ ⲛⲛⲣⲱⲙⲉ ϩⲛⲧⲉⲩⲡⲟⲗⲏϯⲁ ⲁⲩⲱ ⲁⲛⲉⲩⲕⲁⲧⲟⲣⲑⲟⲙⲁ ⲣⲡⲉⲧⲡⲉ ⲙⲡⲉϩⲣⲟϣ ⲛⲛⲉⲧⲫⲟⲣⲉⲓ ⲛⲧⲥⲁⲣⲝ , ⲥⲭⲉⲇⲱⲛ ⲉⲙⲛⲥⲁⲣⲝ ⲧⲟ ϩⲓⲱⲟⲩ , ⲁϣ ⲛⲗⲁⲥ ⲛⲥⲁⲣⲝ ⲡⲉⲧⲛⲁϣϫⲱ ⲙⲡⲧⲁⲉⲓⲟ ⲛⲛⲉⲧⲙⲙⲁⲩ · ⲛⲁⲓ ⲛⲧⲉⲓⲙⲓⲛⲉ ⲥⲉⲣⲭⲣⲉⲓⲁ ⲙⲡⲗⲁⲥ ⲛϩⲉⲛⲁⲥⲱⲙⲁⲧⲟⲥ ⲉⲧⲣⲉⲩϫⲱ ⲛϩⲉⲛⲁⲓⲡⲁⲓⲛⲟⲥ ⲉⲣⲟⲟⲩ ,
…
5 ⲛⲧϩⲉ ⲟⲛ ⲛⲛⲧⲁⲩϫⲱⲕ ⲉⲃⲟⲗ ⲛⲛⲉⲩⲡⲟⲗⲏϯⲁ ⲛⲁⲅⲅⲉⲗⲓⲕⲟⲛ · ⲛⲁⲓ ⲉⲧⲉⲙⲡⲉⲡⲉϩⲣⲟϣ ⲛⲧⲥⲁⲣⲝ ⲕⲱⲗⲩ ⲙⲙⲟⲟⲩ ⲛⲗⲁⲁⲩ ⲉⲧⲣⲉⲩϣⲱⲡⲉ ⲛϩⲓⲥⲁⲅⲅⲉⲗⲟⲥ ⲁⲩⲱ ⲛⲥⲉϫⲱⲕ ⲉⲃⲟⲗ ⲛⲛⲙⲡⲟⲗⲏϯⲁ ⲛⲛⲉⲧϩⲛⲙⲡⲏⲩⲉ ⲉⲩϣⲟⲟⲡ ϩⲓϫⲙⲡⲕⲁϩ , ⲕⲁⲧⲁⲡⲉⲛⲧⲁⲡϩⲓⲉⲣⲟⲥ ⲛⲁⲡⲟⲥⲧⲟⲗⲟⲥ ϫⲟⲟϥ ϫⲉ ·
…
6 ⲁⲛⲟⲛ ⲇⲉ ⲉⲣⲉⲡⲉⲛⲡⲟⲗⲓⲧⲉⲩⲙⲁ ϩⲛⲙⲡⲏⲩⲉ , ⲡⲙⲁ ⲉⲧⲛϭⲱϣⲧ ⲉⲃⲟⲗ ⲛϩⲏⲧϥ ⲙⲡⲉⲛⲥⲱⲧⲏⲣ ⲡⲉⲛϫⲟⲉⲓⲥ ,
…
7 ⲡⲁⲓ ⲉⲧⲛⲁϣⲃⲃⲉ ⲙⲡⲉⲛⲑⲃⲃⲓⲟ ⲉⲡⲉⲓⲛⲉ ⲙⲡⲥⲱⲙⲁ ⲙⲡⲉϥⲉⲟⲟⲩ ·
…
8 ⲉⲧⲃⲉⲡⲁⲓ ⲛⲧⲉⲣⲓⲟⲩⲱϣ ⲉⲕⲱ ⲉϩⲣⲁⲓ ⲛⲧϩⲓⲥⲧⲱⲣⲓⲁ ⲙⲡⲡⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ ⲙⲛⲡⲉϥⲉⲓⲱⲧ ⲙⲡⲛⲉⲩⲙⲁⲧⲓⲕⲟⲥ ⲁⲡⲁ ⲗⲟⲩⲅⲓⲟⲥ , ⲛⲁⲓ ⲛⲧⲁⲩϫⲱⲕ ⲉⲃⲟⲗ ⲛⲛⲉⲩⲡⲟⲗⲏⲧⲓⲁ ˽ ϫⲉⲛⲛⲁϫⲟⲟⲥ ϫⲉⲛⲉⲩⲁⲑⲗⲱⲛ ⲙⲛⲛⲉⲩⲁⲅⲱⲛ ˽ ⲁⲓⲁⲡⲟⲣⲉⲓ ϩⲣⲁⲓ ⲛϩⲏⲧ ϩⲱⲥ ⲉⲓⲥⲟⲟⲩⲛ ⲛⲧⲁⲁⲥⲑⲉⲛⲉⲓⲁ ⲙⲙⲓⲛⲙⲙⲟⲓ ⲙⲛⲡϫⲓⲥⲉ ⲛⲛⲁⲣⲉⲧⲏ ⲙⲡⲡⲉⲧⲟⲩⲁⲁⲃ ⲉⲧⲙⲙⲁⲩ , ⲛⲧϩⲉ ⲛⲛⲟⲩⲁ ⲉϥⲁϩⲉⲣⲁⲧϥ ϩⲁⲟⲩⲡⲉⲧⲣⲁ ⲉⲥϫⲟⲥⲉ ⲉⲙⲁⲧⲉ ⲉϥⲉⲡⲉⲓⲭⲉⲣⲉⲓ ⲉϫⲓ ⲧⲡⲉⲧⲣⲁ ⲉⲧⲙⲙⲁⲩ ⲏ ⲉⲃⲱⲕ ⲉϩⲣⲁⲓ ⲛϩⲏⲧⲥ , ⲉⲓⲁⲡⲟⲣⲉⲓ ⲛⲥⲁⲥⲁ ⲛⲓⲙ ϫⲉⲉⲓⲛⲁϣϭⲙϭⲟⲙ ⲛⲁϣ ⲛϩⲉ ⲉⲃⲱⲕ ⲉϩⲣⲁⲓ ⲉϫⲛⲧⲡⲉⲧⲣⲁ ⲉⲧⲙⲙⲁⲩ · ⲙⲁϯ ⲛⲁⲓ ⲛⲟⲩⲥⲩⲅⲛⲱⲙⲏ ⲉⲧⲣⲁϫⲟⲟⲥ ϫⲉⲧⲡⲉⲧⲣⲁ ⲉⲛⲉ ⲡⲉⲭⲣⲓⲥⲧⲟⲥ ⲡⲉ ·
…
9 ⲡⲙⲁ ⲅⲁⲣ ⲉⲧⲉⲣⲉⲛⲉⲧⲟⲩⲁⲁⲃ ⲛϩⲏⲧϥ ϥⲙⲙⲁⲩ ⲛϭⲓⲡϫⲟⲉⲓⲥ ⲛⲛⲉⲧⲟⲩⲁⲁⲃ ·
…
10 ⲡⲉⲧⲉⲙⲡⲉϥϯⲥⲟ ⲅⲁⲣ ⲉⲃⲱⲕ ⲉϩⲣⲁⲓ ⲉⲛⲧⲟⲟⲩ ⲙⲛⲡⲉⲧⲣⲟⲥ ⲙⲛⲓⲱϩⲁⲛⲛⲏⲥ ,
…
11 ⲙⲡⲉϥϯⲥⲟ ⲟⲛ ⲉⲟⲩⲱϩ ⲙⲛⲁⲡⲁ ⲗⲟⲅⲅⲓⲛⲟⲥ ⲙⲛⲁⲡⲁ ⲗⲟⲩⲅⲓⲟⲥ ⲡⲉϥⲉⲓⲱⲧ ϩⲙⲡⲙⲁ ⲉⲛⲉⲩⲛϩⲏⲧϥ · ⲁⲩⲱ ⲁⲣⲏⲩ ⲛⲧϩⲉ ⲛⲧⲁⲧⲟⲡⲧⲁⲥⲓⲁ ⲉⲧⲙⲙⲁⲩ ⲧⲥⲁⲃⲟ ⲙⲡⲉⲧⲣⲟⲥ ⲙⲛⲓⲱϩⲁⲛⲛⲏⲥ ϫⲉⲛⲓⲙ ⲡⲉⲛⲧⲁϥⲃⲱⲕ ⲉϩⲣⲁⲓ ⲉⲧⲡⲉⲧⲣⲁ ⲉⲧⲙⲙⲁⲩ ,
…
12 ⲧⲁⲓ ⲟⲛ ⲧⲉ ⲧϩⲉ ⲛⲧⲁϥⲧⲥⲁⲃⲉ ⲁⲡⲁ ⲗⲟⲩⲅⲓⲟⲥ ⲙⲛⲁⲡⲁ ⲗⲟⲅⲅⲓⲛⲟⲥ ⲉⲧⲡⲓⲥⲧⲓⲥ ⲉⲧⲥⲟⲩⲧⲱⲛ , ⲧⲁⲓ ⲛⲧⲁϩⲁϩ ⲙⲁⲧⲉ ⲙⲙⲟⲥ ⲉⲃⲟⲗ ϩⲓⲧⲟⲟⲧⲟⲩ , ⲕⲁⲧⲁⲧϩⲉ ⲉⲧⲛⲛⲁⲟⲩⲉⲛϩ ⲡⲁⲓ ⲉⲃⲟⲗ ϩⲙⲡⲧⲣⲉⲛⲙⲟⲟϣⲉ ⲉⲧϩⲏ ·
…
13 ⲡⲗⲏⲛ ϩⲱⲥ ⲉⲓⲥⲟⲟⲩ ⲛⲛⲁϭⲱϫⲃ ⲙⲙⲓⲛⲙⲙⲟⲓ , ⲉⲓⲟⲩⲱϣ ⲉⲕⲁⲣⲱⲓ ⲉⲧϩⲓⲥⲧⲱⲣⲓⲁ ⲛⲛⲉⲧⲟⲩⲁⲁⲃ ⲉⲧⲙⲙⲁⲩ ⲉⲧⲃⲉⲡⲉⲩϫⲓⲥⲉ ⲙⲛⲧⲁⲉⲩⲧⲉⲗⲉⲓⲁ ϩⲱ ,
…
14 ⲉϣϫⲉ ⲉⲓⲛⲁⲩ ⲉⲡⲉⲕⲣⲓⲙⲙⲁ ϩⲱⲱϥ ⲙⲡⲙⲧⲟ ⲛⲛⲁⲃⲁⲗ ⲉϥⲁⲡⲉⲓⲗⲉ ⲛⲁⲓ ⲛⲧⲉⲓϩⲉ ϫⲉ · ⲁⲣⲁ ⲧⲉⲓⲙⲛⲧⲣⲉϥⲣϩⲟⲧⲉ ⲛⲧⲉⲓⲙⲓⲛⲉ ⲣⲁⲛⲁϥ ⲙⲡⲛⲟⲩⲧⲉ · ⲉϣϫⲉ ϩⲟⲗⲱⲥ ⲕϩⲟⲙⲟⲗⲟⲅⲉⲓ ϫⲉϩⲉⲛⲡⲉⲧⲟⲩⲁⲁⲃ ⲛⲉ ⲁⲩⲱ ϩⲉⲛⲡⲁⲣⲁⲛⲏⲧⲟⲥ ⲛⲉ , ⲁⲩⲱ ϫⲉⲁⲛⲉⲩⲡⲟⲗⲏϯⲁ ϫⲓⲥⲉ ⲛⲧⲉⲓϩⲉ ⲧⲏⲣⲥ ⲕⲁⲧⲁⲧϩⲉ ⲉⲧⲉⲕϫⲱ ⲙⲙⲟⲥ ,
…
15 ⲁⲩⲱ ϫⲉⲟⲩⲛϭⲟⲙ ⲉⲧⲣⲉⲡⲉⲩⲃⲓⲟⲥ ϣⲏⲣⲉ ⲛⲕⲱⲧ ⲛⲛⲧⲉⲛⲁⲥⲟⲧⲙⲉϥ , ⲉⲧⲃⲉⲟⲩ ⲕⲥⲱⲧ ⲡⲙⲡⲕⲁⲣⲱⲧ ⲉⲧⲙϫⲱ ⲛⲁⲛ ⲙⲡⲃⲓⲟⲥ ⲛⲛⲉⲧⲟⲩⲁⲁⲃ ⲉⲧⲙⲙⲁⲩ ;
…
16 ⲕⲁⲛ ⲉϣϫⲉ ⲙⲉⲕⲉϣϭⲙϭⲟⲙ ⲉϫⲱ ⲛⲁⲛ ⲛⲧⲡⲟⲗⲏϯⲁ ⲛⲛⲉⲧⲟⲩⲁⲁⲃ ⲉⲧⲙⲙⲁⲩ ⲉⲧⲙⲉϩ ⲛⲁⲣⲉⲧⲏ ⲛⲓⲙ ⲁⲗⲗⲁ ⲟⲩⲛ ϫⲱ ⲙⲡⲉⲧⲕⲛⲁⲉϣⲧⲁϩⲟϥ ϩⲛⲟⲩⲑⲃⲃⲓⲟ ϫⲉⲛⲛⲉⲕϣⲱⲡⲉ ⲉϣϫⲉ ⲉⲕⲫⲑⲟⲛⲓ ⲉⲡϩⲡⲩ ⲛⲛⲉⲯⲩⲭⲏ ⲛⲛⲉⲧⲛⲁⲥⲱⲧⲙ ⲉⲡⲃⲓⲟⲥ ⲙⲡⲁⲣⲁⲛⲉⲧⲟⲥ ⲉⲧⲟⲩⲁⲁⲃ ⲉⲧⲙⲙⲁⲩ ⲛⲥⲉⲟⲩⲁϩⲟⲩ ⲛⲥⲁⲟⲩⲙⲉⲣⲟⲥ ϣⲏⲙ ⲛϩⲏⲧⲟⲩ ·
…
17 ⲙⲁⲗⲓⲥⲧⲁ ⲉⲣⲉⲡⲕⲩⲣⲝ ⲛⲧⲙⲉ ⲡⲥⲁϩ ⲡⲁⲩⲗⲟⲥ ⲡⲁⲣⲁⲅⲅⲉⲓⲗⲉ ϫⲉ ·
…
18 ⲁⲣⲓⲡⲙⲉⲉⲩⲉ ⲛⲛⲉⲧⲛⲛⲟϭ ⲛⲁⲓ ⲛⲧⲁⲩϫⲱ ⲛⲏⲧⲛ ⲙⲡϣⲁϫⲉ ⲙⲡⲛⲟⲩⲧⲉ , ⲛⲁⲓ ⲉⲧⲉⲧⲛϭⲱϣⲧ ⲉⲡϫⲓⲥⲉ ⲛⲧⲉⲩⲁⲛⲁⲥⲧⲣⲟⲫⲏ ⲧⲛⲧⲛⲧⲏⲩⲧⲛ ⲉⲧⲉⲩⲡⲓⲥⲧⲓⲥ · ⲁⲩⲱ ϩⲱⲥ ⲉⲣⲉⲡⲛⲟⲩⲧⲉ ⲥⲟⲟⲩⲛ ϫⲉⲥⲉⲛⲁϣⲱⲡⲉ ⲛⲱⲫⲉⲗⲓⲁ ⲛⲛⲉⲧⲛⲁⲥⲱⲧⲙ ⲉⲡⲃⲓⲟⲥ ⲛⲛⲉⲛⲧⲁⲩⲡⲟⲗⲓⲧⲉⲩⲉ ⲕⲁⲧⲁⲡⲉϥⲟⲩⲱϣ ⲁϥⲥϩⲁⲓ ⲛⲁⲛ ϩⲓⲧⲙⲡⲉϥⲡⲛⲉⲩⲙⲁ ⲉⲧⲟⲩⲁⲁⲃ ⲙⲡⲃⲓⲟⲥ ⲛⲙⲡⲁⲧⲣⲓⲁⲣⲭⲏⲥ ⲙⲛⲡⲕⲉⲥⲉⲉⲡⲉ ⲛⲛⲉⲧⲟⲩⲁⲁⲃ ˽
…
19 ⲛⲁⲓ ⲛⲧⲁⲩϣⲱⲡⲉ ϩⲛⲧⲡⲁⲗⲁⲓⲁ ⲇⲓⲁⲑⲏⲕⲏ ⲙⲛⲧⲕⲩⲛⲏ ˽ ϫⲉⲕⲁⲥ ⲛⲛⲁⲥⲱⲧⲙ ⲉⲣⲟⲟⲩ ⲙⲙⲁⲧⲉ ⲁⲛ ⲁⲗⲗⲁ ϫⲉⲕⲁⲥ ⲉⲛⲛⲁⲧⲛⲧⲱⲛⲛ ⲉⲡⲉⲩⲥⲙⲟⲧ ⲧⲛⲕⲗⲏⲣⲟⲛⲟⲙⲉⲓ ϩⲱⲱⲛ ⲛⲛⲉⲣⲏⲧ ⲛⲧⲁⲡⲛⲟⲩⲧⲉ ⲉⲣⲏⲧ ⲙⲙⲟⲟⲩ ⲛⲛⲉⲧⲙⲉ ⲙⲙⲟϥ ·
…
20 ⲛⲁⲓ ⲟⲩⲛ ⲉⲓⲙⲉⲉⲩⲉ ⲉⲣⲟⲟⲩ ϩⲣⲁⲓ ⲛϩⲏⲧ ⲁⲓⲟⲡϥ ϫⲉⲟⲩⲁⲛⲁⲅⲕⲁⲓⲟⲛ ⲡⲉ ⲉⲧⲣⲁⲁⲣⲭⲓⲥⲑⲁⲓ ⲉⲧϩⲓⲥⲧⲱⲣⲓⲁ ⲛⲛⲉⲧⲟⲩⲁⲁⲃ ⲁⲩⲱ ⲉⲧⲣⲁϯⲡⲣⲡⲙⲉⲉⲩⲉ ⲛⲛⲉⲩⲡⲟⲗⲏϯⲁ ⲛⲏⲧⲛ , ⲉⲓⲥⲟⲟⲩⲛ ϩⲛⲟⲩⲱⲣϫ ϫⲉ · ⲟⲩⲣⲡⲙⲉⲉⲩⲉ ⲉⲛⲁⲛⲟⲩϥ ⲡⲉ ⲡⲣⲡⲙⲉⲉⲩⲉ ⲙⲡⲇⲓⲕⲁⲓⲟⲥ , ⲁⲩⲱ ϫⲉ · ϣⲁⲣⲉⲡⲥⲟⲉⲓⲧ ⲉⲧⲛⲁⲛⲟⲩϥ ⲉⲩⲫⲣⲁⲛⲉ ⲙⲡϩⲏⲧ · ⲙⲁⲗⲓⲥⲧⲁ ϫⲉϣⲁⲣⲉⲛⲗⲁⲟⲥ ⲉⲩⲫⲣⲁⲛⲉ ⲉⲩϣⲁϫⲉ ⲉⲛⲇⲓⲕⲁⲓⲟⲥ , ⲕⲁⲧⲁⲛⲉⲛⲧⲁⲡⲥⲟⲫⲟⲥ ⲥⲟⲗⲟⲙⲱⲛ ϫⲟⲟⲩ ·
…
21 ⲧⲡⲟⲗⲏϯⲁ ⲙⲛⲡⲃⲓⲟⲥ ⲙⲡⲉⲛⲉⲓⲱⲧ ⲉⲧⲟⲩⲁⲁⲃ ⲁⲡⲁ ⲗⲟⲅⲅⲓⲛⲟⲥ , ⲉⲛⲉⲩⲉⲃⲟⲗ ⲡⲉ ϩⲛⲧⲗⲁⲩⲣⲁ ⲙⲡϩⲉⲛⲁⲧⲟⲛ ⲛⲣⲁⲕⲟⲧⲉ ·
…
22 ⲛⲉⲟⲩ ⲉⲧⲉⲓⲙⲓⲛⲉ ⲇⲉ ⲡⲉ · ⲉⲛⲉⲟⲩⲉⲃⲟⲗ ⲡⲉ ϩⲛⲟⲩⲡⲟⲗⲓⲥ ⲛⲧⲉⲧⲗⲩⲕⲓⲁ ⲡⲉ ⲕⲁⲧⲁⲡⲉϥⲅⲉⲛⲟⲥ ⲉⲧⲏⲡ ⲉⲡⲕⲁϩ , ⲉⲩⲡⲟⲗⲓⲧⲏⲥ ⲡⲉ ⲛⲧⲉⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ ⲉⲣⲉⲡⲉϥⲡⲟⲗⲓⲧⲉⲩⲙⲁ ϩⲛⲙⲡⲏⲩⲉ , ⲕⲁⲧⲁⲡϣⲁϫⲉ ⲙⲡⲥⲟⲫⲟⲥ ⲡⲁⲩⲗⲟⲥ ·
…
23 ⲁⲓⲧⲉⲓ ⲇⲉ ⲉϥⲟ ⲛϣⲏⲣⲉ ϣⲏⲙ ⲁϥⲙⲉⲣⲉⲧⲉⲫⲓⲗⲟⲥⲟⲫⲓⲁ ⲙⲡⲃⲓⲟⲥ ⲛⲧⲙⲛⲧⲙⲟⲛⲁⲭⲟⲥ ⲁϥϯ ⲙⲡⲉϥⲟⲩⲟⲓ ⲉⲩⲙⲟⲛⲁⲥⲧⲏⲣⲓⲟⲛ ⲉⲡⲁⲧⲉϥⲭⲱⲣⲁ ⲡⲉ ⲛⲧⲉⲧⲗⲩⲕⲓⲁ ⲉϣⲁⲩⲙⲟⲩⲧⲉ ⲉⲣⲟϥ ϫⲉⲡⲙⲁ ⲛⲁⲡⲁ ϩⲓⲉⲣⲟⲛⲓⲕⲟⲥ ·
…
24 ⲁⲩⲱ ⲛⲧⲉⲣⲉϥⲙⲡϣⲁ ⲙⲡⲉⲥⲭⲏⲙⲁ ⲉⲧⲟⲩⲁⲁⲃ ⲛⲧⲙⲛⲧⲙⲟⲛⲁⲭⲟⲥ ϩⲙⲡⲙⲟⲛⲁⲥⲧⲏⲣⲓⲟⲛ ⲉⲧⲙⲙⲁⲩ ⲁⲩⲧⲁⲁϥ ⲉⲧⲟⲟⲧϥ ⲛⲟⲩⲛⲟϭ ⲛⲁⲥⲕⲏⲧⲏⲥ ⲉⲡⲉϥⲣⲁⲛ ⲡⲉ ⲁⲡⲁ ⲗⲟⲩⲅⲓⲟⲥ , ⲉϥⲕⲟⲥⲙⲉⲓ ϩⲙⲡϣⲁϫⲉ ⲛⲛⲉⲅⲣⲁⲫⲏ ⲉⲧⲟⲩⲁⲁⲃ ⲙⲛⲧⲇⲓⲁⲕⲣⲏⲥⲓⲥ ⲧⲙⲁⲁⲩ ⲛⲛⲁⲣⲉⲧⲏ ⲧⲏⲣⲟⲩ ·
…
25 ⲁϥⲡⲁⲓⲇⲁⲅⲱⲅⲉⲓ ⲟⲛ ⲙⲙⲟϥ ϩⲛⲧⲡⲓⲥⲧⲓⲥ ⲙⲛⲛⲁⲕⲟⲗⲟⲑⲓⲁ ⲛⲓⲙ ⲉⲧⲡⲣⲉⲡⲉⲓ ⲉⲡⲃⲓⲟⲥ ⲛⲧⲙⲛⲧⲙⲟⲛⲁⲭⲟⲥ ·
…
26 ⲛⲧⲉⲣⲉϥⲟⲩⲟⲉⲓϣ ⲉϥⲡⲟⲗⲓⲧⲉⲩⲉ ϩⲙⲡⲙⲟⲛⲁⲥⲧⲏⲣⲓⲟⲛ ϩⲛⲛⲁⲣⲉⲧⲏ ⲙⲡⲉⲭⲣⲓⲥⲧⲟⲥ ˽ ⲉⲧⲉⲡⲉⲑⲃⲃⲓⲟ ⲡⲉ ⲙⲛⲧⲙⲛⲧⲣⲙⲣϣ ⲙⲛⲧⲙⲛⲧⲁⲡⲟⲧⲁⲕⲧⲓⲕⲟⲥ ⲙⲛⲡⲕⲉⲥⲉⲉⲡⲉ ⲛⲛⲁⲣⲉⲧⲏ – ⲉⲧⲉⲓⲛⲉ ⲛⲛⲁⲓ – ⲁϥⲙⲧⲟⲛ ⲙⲙⲟϥ ⲛϭⲓⲡⲉⲡⲣⲟⲉⲥⲧⲟⲥ ⲙⲡⲙⲟⲛⲁⲥⲧⲏⲣⲓⲟⲛ ⲉⲧⲙⲙⲁⲩ , ⲉⲩⲣⲱⲙⲉ ⲡⲉ ⲛⲛⲉⲥⲩⲭⲟⲥ ⲁⲩⲱ ⲛⲉⲓⲣⲏⲛⲓⲕⲟⲥ , ⲉⲁⲩⲕⲁⲑⲓⲥⲧⲁ ⲛⲕⲉⲟⲩⲁ ⲉⲡⲉϥⲙⲁ · ⲧⲟⲧⲉ ⲁⲩⲧⲁⲣⲁⲭⲏ ϣⲱⲡⲉ ϩⲛⲧⲉⲕⲕⲗⲏⲥⲓⲁ ⲙⲡⲙⲟⲛⲁⲥⲧⲏⲣⲓⲟⲛ ⲧⲁⲓ ⲧⲁⲓⲧⲓⲁ ·
…
27 ⲉⲩⲥⲟⲟⲩⲛ ⲧⲏⲣⲟⲩ ⲛⲁⲡⲁ ⲗⲟⲩⲕⲓⲟⲥ ⲁⲩⲱ ⲉⲩϭⲱϣⲧ ⲛⲥⲱϥ ⲧⲏⲣⲟⲩ ϩⲱⲥ ⲛⲧⲟϥ ⲡⲉⲧⲛⲁⲡⲣⲟϩⲓⲥⲧⲁ ⲙⲙⲟⲟⲩ ⲙⲛⲛⲥⲁⲡⲉⲛⲧⲁϥⲛⲕⲟⲧⲕ · ⲗⲟⲓⲡⲟⲛ ⲛⲧⲉⲣⲉⲡⲡⲉⲧⲟⲩⲁⲁⲃ ⲕⲁⲧⲁⲗⲁⲙⲃⲁⲛⲉ ⲙⲙⲟϥ ⲙⲡⲉϣⲧⲟⲣⲧⲣ ⲉⲧⲧⲏϣ ⲉϣⲱⲡⲉ ⲛⲧⲉϥⲁⲫⲟⲣⲙⲏ ,
…
28 ⲁϥⲥⲟⲧⲡⲥ ⲛⲁϥ ⲉⲗⲟ ⲙⲙⲟⲟⲩ ϩⲁⲡⲉⲩϩⲟ ⲉⲧⲉⲡⲁⲓ ⲡⲉ ⲛϥⲉⲓ ⲉⲃⲟⲗ ϩⲙⲡⲙⲟⲛⲁⲥⲧⲏⲣⲓⲟⲛ ⲉⲧⲙⲙⲁⲩ ⲛⲧⲉⲡⲙⲁ ⲉⲍⲩⲭⲁⲍⲉ ·
…
29 ⲙⲁⲗⲓⲥⲧⲁ ⲙⲡⲉϥⲗⲟ ⲉϥⲡⲏⲧ ⲛⲥⲁⲡⲉⲑⲃⲃⲓⲟ ⲉⲛⲉϩ ⲛⲧϩⲉ ⲙⲡⲉϥϫⲟⲉⲓⲥ ·
…
30 ⲛⲁⲓ ⲇⲉ ⲉϥⲙⲉⲉⲩⲉ ⲉⲣⲟⲟⲩ ⲁϥⲙⲟⲩⲧⲉ ⲉⲡⲉϥⲙⲁⲑⲏⲧⲏⲥ ⲁⲡⲁ ⲗⲟⲅⲅⲓⲛⲟⲥ ⲡⲉϫⲁϥ ⲛⲁϥ ϫⲉ · ⲡⲁϣⲏⲣⲉ , ⲧⲛⲥⲟⲟⲩⲛ ϫⲉⲟⲩϩⲟⲩⲟ ⲡⲉ ⲉⲧⲣⲉⲛⲥⲉ ⲛⲡⲉⲛⲙⲟⲛⲁⲥⲧⲏⲣⲓⲟⲛ ⲉⲃⲟⲗ ϩⲙⲡⲉⲛⲱⲛϩ · ⲁⲗⲗⲁ ϫⲉⲕⲁⲥ ⲛⲛϣⲱⲡⲉ ⲛⲁⲓϯⲟⲥ ⲛⲟⲩϣⲧⲟⲣⲧⲣ ⲛⲧⲉⲓⲙⲓⲛⲉ ⲛⲧⲉⲟⲩⲕⲣⲓⲙⲁ ϣⲱⲡⲉ ⲛⲁⲛ ϯⲙⲉⲉⲩⲉ ϫⲉⲛⲁⲛⲟⲩⲥ ⲉⲧⲣⲉⲛⲛⲁⲛⲁⲭⲱⲣⲉⲓ ⲛⲁⲛ ⲉⲩⲙⲁ ⲙⲁⲩⲁⲁⲛ , ⲕⲁⲧⲁⲡⲉⲧⲥⲏϩ ϩⲛⲙⲡⲁⲣⲣⲟⲓⲙⲓⲁ ϫⲉ ·
…
31 ⲛⲁⲛⲟⲩⲥ ⲉⲟⲩⲱϩϩⲛⲟⲩⲕⲗϫⲉ ϩⲛⲟⲩϫⲉⲛⲉⲡⲱⲣ ⲉϩⲟⲩⲉ ⲉⲟⲩⲱϩ ϩⲛⲟⲩⲏⲓ ⲛⲃⲣⲣⲉ ⲙⲛϩⲉⲛⲙⲁ ⲉⲩϫⲏϩ ϩⲛⲟⲩⲙⲓϣⲉ ·
…
32 ⲥⲣⲛⲟϥⲣⲉ ⲛⲁⲛ ⲟⲩⲛ ⲉⲧⲣⲉⲛⲁⲛⲁⲭⲱⲣⲉⲓ ⲛⲁⲛ ϩⲛⲟⲩⲙⲁ ⲙⲁⲩⲁⲁⲛ ⲛⲧⲛⲥϥⲉ ⲉⲡⲟⲩϫⲁⲓ ⲛⲛⲉⲛⲯⲩⲭⲏ ,
…
33 ⲡⲁⲓ ⲛⲧⲁⲛⲁⲡⲟⲧⲁⲥⲥⲉ ⲙⲡⲕⲟⲥⲙⲟⲥ ⲙⲛⲛⲉⲧⲛϩⲏⲧϥ ⲉⲧⲃⲏⲏⲧϥ , ⲛϩⲟⲩⲟ ⲉⲣⲟⲥ ⲛⲧⲛϩⲙⲟⲟⲥ ϩⲙⲡⲉⲓⲙⲁ ⲉⲧⲣⲉⲛⲛⲁⲩ ⲉⲧⲇⲓⲁⲥⲧⲣⲟⲫⲏ ⲙⲡⲉⲛⲙⲟⲛⲁⲥⲧⲏⲣⲓⲟⲛ ⲧⲁⲓ ⲧⲉ ⲧⲁⲓⲧⲓⲁ ⲛⲧⲁⲩⲉⲓ ⲉⲃⲟⲗ ϩⲙⲡⲉⲩⲙⲟⲛⲁⲥⲧⲏⲣⲓⲟⲛ ⲉⲧⲃⲏⲏⲧⲥ ·
…
34 ⲙⲁⲗⲗⲟⲛ ⲇⲉ ⲟⲩⲟⲓⲕⲟⲛⲟⲙⲓⲁ ⲛⲧⲉⲡⲛⲟⲩⲧⲉ ⲧⲛⲧⲁⲥϣⲱⲡⲉ ϫⲉⲕⲁⲥ ⲉϥⲉⲟⲩⲱⲛϩ ⲉⲃⲟⲗ ⲛⲛⲉⲭⲁⲣⲓⲥ ⲛⲧⲉϥⲙⲛⲧⲁⲅⲁⲑⲟⲥ ⲉⲧⲟⲓⲕⲟⲛⲟⲙⲉⲓ ⲛⲛⲥⲱⲙⲁ ⲙⲛⲛⲉⲛⲯⲩⲭⲏ ϩⲓⲧⲛⲛⲉϥⲥⲱⲧⲡ ⲁⲩⲱ ⲛⲧⲉⲟⲩⲙⲏⲏϣⲉ ⲟⲩϫⲁⲓ ⲉⲃⲟⲗ ϩⲓⲧⲟⲟⲧⲟⲩ ·
…
35 ⲛⲧⲉⲣⲟⲩⲉⲓ ⲇⲉ ⲉⲃⲟⲗ ϩⲙⲡⲉⲩⲙⲟⲛⲁⲥⲧⲏⲣⲓⲟⲛ ⲁⲩⲕⲁⲧⲁⲛⲧⲁ ⲉⲩϯⲙⲉ ϩⲛⲧⲉⲭⲱⲣⲁ ⲉⲧⲙⲙⲁⲩ ⲛⲧⲉⲧⲗⲩⲕⲓⲁ ⲉϥⲥϭⲣⲉϩⲧ ⲁⲩⲱ ⲁⲩⲟⲱϩ ϩⲛⲟⲩⲉⲕⲕⲗⲏⲥⲓⲁϩⲙ ⲡϯⲙⲉ ⲉⲧⲙⲙⲁⲩ ⲉⲩⲙⲟⲩⲧⲉ ⲉⲣⲟⲥ ϩⲙⲡⲣⲁⲛ ⲙⲡϩⲁⲅⲓⲟⲥ ⲉⲧⲧⲁⲓⲏⲩ ⲙⲙⲁⲣⲧⲩⲡⲟⲥ ⲑⲉⲟⲕⲧⲓⲥⲧⲟⲥ ·
…
36 ⲡⲉⲓⲕⲉⲟⲩⲁ ⲇⲉ ⲟⲛ ⲛⲧⲁϥϣⲱⲡⲉ ⲛⲧⲉⲓϩⲉ ϩⲁⲡⲗⲱⲥ ⲁⲗⲗⲁ ϫⲉⲕⲁⲥ ⲉⲣⲉⲛⲉϣⲡⲏⲣⲉ ⲙⲡⲛⲟⲩⲧⲉ ⲟⲩⲱⲛϩ ⲉⲃⲟⲗ ,
…
37 ⲕⲁⲧⲁⲧϩⲉ ⲛⲧⲁⲡⲁⲓ ⲟⲩⲱⲛϩ ⲉⲃⲟⲗ ϩⲓⲧⲛⲧϩⲉⲣⲙⲏⲛⲉⲓⲁ ⲙⲡⲣⲁⲛ ⲉⲧⲧⲁⲓⲏⲩ ⲙⲡⲙⲁⲣⲧⲩⲣⲟⲥ ⲑⲉⲟⲕⲧⲓⲥⲧⲟⲥ , ⲉϥϣⲣⲡⲥⲩⲙⲁⲛⲉ ⲛⲛⲉⲧⲛⲁϣⲱⲡⲉ ϩⲙⲡⲉϥⲉⲩⲕⲧⲏⲣⲓⲟⲛ ϩⲓⲧⲛⲛⲉⲓⲡⲉⲧⲟⲩⲁⲁⲃ ·
…
38 ⲑⲉⲟⲕⲧⲓⲥⲧⲟⲥ ⲅⲁⲣ ⲉϣⲁⲩϩⲉⲣⲙⲏⲛⲉⲩⲉ ⲙⲙⲟϥ ϫⲉ · ⲡⲉⲛⲧⲁⲩⲕⲟⲧϥ ϩⲓⲧⲙⲡⲛⲟⲩⲧⲉ , ϩⲙⲡⲧⲣⲉⲛⲉⲓⲡⲉⲧⲟⲩⲁⲁⲃ ⲉⲧⲙⲙⲁⲩ ϫⲓⲕⲱⲧ ϩⲙⲡⲣⲁⲛ ⲙⲡⲙⲁⲣⲧⲩⲣⲟⲥ ϩⲓⲧⲛⲛⲉⲩⲁⲥⲕⲏⲥⲓⲥ ⲙⲛⲛⲉⲩⲁⲅⲱⲛ ⲉⲧⲟϣ ·
…
39 ⲁⲩⲕⲱⲧ ϩⲱⲟⲩ ⲛϩⲉⲛⲁϣⲏ ⲙⲯⲩⲭⲏ ϩⲓⲧⲛⲛⲉϣⲡⲏⲣⲉ ⲙⲛⲛⲧⲁⲗϭⲟ ⲛⲧⲁⲡⲛⲟⲩⲧⲉ ⲉⲛⲉⲣⲅⲉⲓ ⲙⲙⲟⲩ ⲟⲃⲟⲗ ϩⲓⲧⲟⲟⲧⲟⲩ ϩⲙⲡⲧⲟⲡⲟⲥ ⲉⲧⲙⲙⲁⲩ ·
…
40 ⲛⲧⲉⲣⲟⲩⲟⲩⲱϩ ϩⲙⲡⲙⲁ ⲉⲧⲙⲙⲁⲩ ⲛⲉⲣⲉϩⲁϩ ⲛⲏⲩ ϩⲛⲧⲡⲉⲣⲓⲭⲱⲣⲟⲥ ⲉⲩⲉⲓⲛⲉ ⲛⲛⲉⲧϣⲱⲛⲉ ,
…
41 ⲛϩⲟⲩⲟ ⲇⲉ ⲛⲉⲧⲉⲣⲉⲛⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ϩⲓⲱⲟⲩ , ⲉⲩϫⲧⲟ ⲙⲙⲟⲟⲩ ϩⲙⲕⲟⲓⲙⲏⲧⲏⲣⲓⲟⲛ ⲉⲧⲙⲙⲁⲩ ·
…
42 ⲁⲩⲱ ⲛⲉⲩⲙⲁⲧⲉ ⲙⲡⲧⲁⲗϭⲟ ϩⲓⲧⲛⲛⲉϣⲗⲏⲗ ⲙⲡⲡⲉⲧⲟⲩⲁⲁⲃ ⲉⲧⲙⲙⲁⲩ ·
…
43 ⲟⲩⲥϩⲓⲙⲉ ⲅⲁⲣ ⲉⲣⲉⲟⲩⲡⲛⲉⲩⲙⲁ ⲛⲛⲁⲕⲁⲑⲁⲣⲧⲟⲛ ϩⲓⲱⲱⲥ ⲉϥⲛⲁϣⲧ ⲉⲙⲁⲧⲉ ,
…
44 ⲇⲁⲓ ⲇⲉ ⲛⲉⲥⲉⲓⲣⲉ ⲛϩⲉⲛⲛⲟϭ ⲛϣⲧⲟⲣⲧⲣ ⲙⲛϩⲉⲛⲧⲁⲣⲁⲭⲏ ϩⲓⲧⲙⲡⲇⲁⲓⲙⲱⲛ ⲉⲧⲛϩⲏⲧⲥ ϩⲱⲥⲧⲉ ⲟⲩⲟⲛ ⲛⲓⲙ ⲉⲧⲛⲁϩⲱⲛ ⲉϩⲟⲩⲛ ⲉⲣⲟⲥ ⲛⲥⲡⲁϩⲛⲉⲩϩⲟⲓⲧⲉ ⲁⲩⲱ ⲟⲛ ⲡⲉⲩⲕⲉⲥⲱⲙⲁ ·
…
45 ⲛⲧⲉⲣⲟⲩⲛⲧⲥ ⲉⲣⲁⲧⲟⲩ ⲛⲛϩⲙϩⲁⲗ ⲙⲡⲛⲟⲩⲧⲉ ⲁⲩⲱ ⲛⲥⲉⲥⲡⲥⲱⲡⲟⲩ ϫⲉⲉⲩⲉϣⲗⲏⲗ ⲉϫⲱⲥ ⲛⲥⲙⲁⲧⲉ ⲙⲡⲧⲁⲗϭⲟ ϩⲓⲧⲛⲛⲉⲩⲡⲣⲉⲥⲃⲉⲓⲁ ,
…
46 ⲁⲥⲁⲣⲭⲉⲓ ⲇⲉ ⲟⲛ ⲛϯⲁⲥⲡⲁⲣⲁⲥⲥⲉ ⲁⲩⲱ ⲛⲉⲡⲉⲓⲭⲉⲣⲉⲓ ⲉⲛⲉⲧⲙⲡⲉⲥⲕⲱⲧⲉ · ⲧⲟⲧⲟ ⲁⲥϩⲉ ϩⲁⲛⲉⲩⲟⲩⲉⲣⲏⲧⲉ ⲁⲥϭⲱ ⲉⲥϩⲓⲧⲉ ϩⲓⲧⲙⲡⲉⲡⲛⲉⲩⲙⲁ ⲙⲡⲟⲛⲏⲣⲟⲛ ⲉⲧⲛⲙⲙⲁⲥ ⲁⲩⲱ ⲛⲉⲥⲛⲉϫⲥⲃⲏⲏⲧⲉ ⲉⲃⲟⲗ ϩⲛⲣⲱⲥ ·
…
47 ⲛⲧⲉⲣⲉⲥⲱϣ ⲉⲃⲟⲗ ϩⲛⲟⲩⲛⲟϭ ⲛϩⲣⲟⲟⲩ ⲛⲉⲁⲥⲣⲧϩⲉ ⲛⲛⲉⲧⲙⲟⲟⲩⲧ ⲡⲉ · ⲧⲟⲧⲉ ⲡⲙⲁⲕⲁⲣⲓⲟⲥ ⲗⲟⲩⲕⲓⲟⲥ ⲛⲧⲉⲣⲉϥϣⲛϩⲧⲏϥ ϩⲁⲣⲟⲥ ⲁϥⲁⲣⲭⲉⲓ ⲛϣⲗⲏⲗ ⲁⲩⲱ ⲉⲧⲁⲗⲉⲛⲉϥϭⲓϫ ⲉϫⲱⲥ ⲁϥⲟⲩⲉϩⲥⲁϩⲛⲉ ⲙⲡⲉϥⲙⲁⲑⲏⲧⲏⲥ ⲗⲟⲅⲅⲓⲛⲟⲥ ⲉⲧⲣⲉϥϣⲗⲏⲗ ϩⲱⲱϥ ⲁⲩⲱ ⲛϥⲕⲱ ⲛⲛⲉϥϭⲓϫ ϩⲣⲁⲓ ⲉϫⲱⲥ ⲛϥⲥⲫⲣⲁⲅⲓⲍⲉ ⲙⲙⲟⲥ ·
…
48 ⲡⲁⲓ ⲇⲉ ⲛⲧⲉⲣⲟⲩⲁⲁϥ ⲁⲡⲇⲁⲓⲙⲱⲛⲓⲟⲛ ⲉⲓ ⲉⲃⲟⲗ ⲛϩⲏⲧⲥ ⲛⲧⲉⲩⲛⲟⲩ ⲁⲩⲱ ⲁⲥⲧⲱⲟⲩⲛ ⲛⲧϩⲉ ⲙⲡⲉⲛⲧⲁϥⲧⲱⲟⲩⲛ ϩⲁⲡϩⲓⲛⲏⲃ ⲉⲁⲥⲧⲃⲃⲟ ⲉⲃⲟⲗ ϩⲛⲧⲙⲁⲥⲧⲓⲅⲝ ⲉⲧⲛⲙⲙⲁⲥ ·
…
49 ⲁⲩⲱ ⲛⲧⲉⲓϩⲉ ⲁⲥϣⲱⲡⲉ ⲉⲥⲇⲓⲁⲕⲟⲛⲉⲓ ⲉⲛⲉⲧϣⲱⲛⲉ ϩⲙⲡⲙⲁⲣⲧⲏⲣⲓⲟⲛ ϫⲓⲛⲉⲡⲉϩⲟⲟⲩ ⲉⲧⲙⲙⲁⲩ ϣⲁⲡⲉⲥⲙⲟⲩ ·
…
50 ⲡⲁⲓ ⲟⲩⲛ ⲡⲉ ⲡϣⲟⲣⲡ ⲙⲙⲁⲉⲓⲛ ⲛⲧⲁⲡⲛⲟⲩⲧⲉ ⲉⲛⲉⲣⲅⲉⲓ ⲙⲙⲟϥ ⲉⲃⲟⲗ ϩⲓⲧⲟⲟⲧⲟⲩ ⲙⲛⲛⲥⲁⲧⲣⲉⲩⲉⲓ ⲉⲃⲟⲗ ϩⲙⲙⲟⲛⲁⲥⲧⲏⲣⲓⲟⲛ ⲛⲥⲉⲟⲩⲱϩ ϩⲛⲧⲉⲕⲕⲗⲏⲥⲓⲁ ⲉⲧⲙⲙⲁⲩ ·
…