1 ⲡⲃⲓⲟⲥ ⲁⲩⲱ ⲧⲡⲟⲗⲓⲧⲉⲓⲁ ⲙⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲉⲧⲧⲁⲓⲏⲩ ⲕⲁⲧⲁⲥⲙⲟⲧ ⲛⲓⲙ ⲡϩⲁⲅⲓⲟⲥ ⲁⲡⲁ ⲕⲩⲣⲟⲥ · ⲡⲧⲉⲗⲓⲟⲥ ⲛⲁⲙⲉ ⲛⲧⲁϥϩⲓⲥⲧⲟⲣⲓⲍⲉ ⲙⲙⲟϥ · ⲛϭⲓⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ ⲛⲧⲁϥⲙⲧⲟⲛ ⲙⲙⲟϥ ⲛϭⲓⲡⲉⲧⲟⲩⲁⲁⲃ · ⲁⲡⲁ ⲕⲩⲣⲟⲥ ϩⲛⲥⲟⲩϣⲙⲟⲩⲛ ⲙⲡⲉⲃⲟⲧ ⲉⲡⲏⲡ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ ·
…
2 ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ ⲛⲁⲉⲓ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ϩⲁⲙⲏⲛ ⁛ —
…
3 ⲁⲥϣⲱⲡⲉ ⲇⲉ ⲙⲡⲉⲟⲩⲟⲉⲓϣ ⲛⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ · ⲙⲛⲛⲥⲁⲧⲣⲉϥⲥⲕⲉⲡⲁⲍⲉ ⲙⲡⲥⲱⲙⲁ ⲛⲧⲙⲁⲕⲁⲣⲓⲁ ϩⲓⲗⲗⲁⲣⲓⲁ ⲧϣⲉⲉⲣⲉ ⲙⲡⲣⲣⲟ ⲍⲏⲛⲱⲛ ·
…
4 ⲁⲩϩⲟⲣⲟⲙⲁ ϭⲱⲗⲡ ⲛⲁϥ ⲉⲃⲟⲗ · ϫⲉⲧⲱⲟⲩⲛ ⲛⲅⲙⲟⲟϣⲉ ⲉϩⲟⲩⲛ ϩⲙⲡⲥⲁ ⲙⲡⲱⲕⲉⲁⲛⲟⲥ ·
…
5 ⲕⲛⲁϭⲓⲛⲉ ⲛⲟⲩⲛⲟϭ ⲛⲁⲛⲁⲭⲱⲣⲏⲧⲏⲥ ⲡⲁⲓ ⲉⲧⲉⲙⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲁⲛ ⲛⲟⲩⲥϣ ⲛⲧⲁϭⲥⲉ ⲛⲟⲩⲱⲧ ⲛⲧⲉⲛⲉϥⲟⲩⲉⲣⲏⲧⲉ ·
…
6 ⲛⲧⲟϥ ⲇⲉ ⲡⲙⲁⲕⲁⲣⲓⲟⲥ ⲁⲡⲁ ⲡⲁⲙⲃⲱ · ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ϩⲙⲡⲧⲟⲟⲩ ϩⲓⲧⲛⲧϭⲟⲙ ⲙⲡⲛⲟⲩⲧⲉ ⲉⲧϣⲟⲟⲡ ⲛⲙⲙⲁϥ ⲛⲧϩⲉ ⲙⲡⲙⲁⲕⲁⲣⲓⲟⲥ ⲁⲛⲧⲱⲛⲓⲟⲥ · ϩⲙⲡⲉⲟⲩⲟⲉⲓϣ ⲛⲧⲁϥⲙⲟⲟϣⲉ ⲁϥⲃⲱⲕ ϣⲁⲡⲙⲁⲕⲁⲣⲓⲟⲥ ⲁⲡⲁ ⲡⲁⲩⲗⲟⲥ ⲡⲙⲉϩⲥⲛⲁⲩ ·
…
7 ⲛⲧⲟϥ ⲇⲉ ⲡⲙⲁⲕⲁⲣⲓⲟⲥ ⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ϩⲙⲡϫⲁⲓⲉ ·
…
8 ⲁϥⲉⲓ ⲉϩⲣⲁⲓ ⲉϫⲛⲟⲩⲕⲁⲧⲁⲅⲁⲓⲟⲛ ·
…
9 ⲁϥⲁϩⲉⲣⲁⲧϥ ⲁϥⲕⲱⲗϩ ⲉϩⲟⲩⲛ ⲉⲡⲣⲟ ⲛⲁⲧϣⲁⲩ ⲛⲟⲩⲟⲩⲛⲟⲩ
…
10 ⲁϥⲙⲟⲩⲧⲉ ⲛϣⲟⲙⲛⲧ ⲛⲥⲟⲡ · ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ · ⲉϥϫⲱ ⲙⲙⲟⲥ ϫⲉⲥⲙⲟⲩ ⲉⲣⲟⲓ ·
…
11 ⲁⲩⲱ ⲉⲧⲓ ⲉⲓⲁϩⲉⲣⲁⲧ ϩⲓⲡⲣⲟ ⲁⲛⲟⲕ ⲡⲁⲙⲃⲱ · ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ ϫⲉⲭⲁⲓⲣⲉ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ ·
…
12 ⲉⲓⲥⲛⲟϭ ⲅⲁⲣ ⲛⲟⲩⲟⲉⲓϣ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ ·
…
13 ⲉⲓⲥ ⲡⲁⲟⲩⲱϣ ⲁⲡⲛⲟⲩⲧⲉ ϫⲟⲕϥ ⲛⲁⲓ ⲉⲃⲟⲗ · ⲙⲡⲟⲟⲩ ·
…
14 ⲁⲙⲟⲩ ⲉϩⲟⲩⲛ ⲡⲣⲱⲙⲉ ⲉⲧⲥⲙⲁⲙⲁⲁⲧ ⁛ —
…
15 ⲁϥⲟⲩⲱϣⲃ ⲛϭⲓⲁⲡⲁ ⲡⲁⲙⲃⲱ · ⲉϥϫⲱ ⲙⲙⲟⲥ ϫⲉⲭⲁⲓⲣⲉ · ⲁⲡⲁ ϩⲓⲉⲣⲁⲝ · ⲡⲉⲛⲧⲁϥⲣϣⲃⲏⲣ ⲉⲛⲁⲅⲅⲉⲗⲟⲥ ⲙⲡⲛⲟⲩⲧⲉ ⲉⲧⲃⲉⲡⲉϥⲧⲃⲃⲟ ·
…
16 ⲛⲧⲟϥ ⲇⲉ ⲟⲛ ⲁⲡⲁ ϩⲓⲉⲣⲁⲝ ⲁϥⲟⲩⲱⲛ ⲙⲡⲣⲟ · ⲁϥϫⲓⲧϥ · ⲉϩⲟⲩⲛ ⲁⲩϩⲙⲟⲟⲥ ⲙⲛⲛⲉⲩⲉⲣⲏⲩ ·
…
17 ⲡⲉϫⲁϥ ⲛⲁϥ ⲛϭⲓⲁⲡⲁ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲥⲟⲛ ⲁⲡⲁ ϩⲓⲉⲣⲁⲝ · ⲉⲓⲥ ⲁⲟⲩⲏⲣ ⲛⲣⲟⲙⲡⲉ · ϫⲓⲛⲛⲧⲁⲕⲉⲓ ⲉϩⲟⲩⲛ ⲉⲡⲉⲓⲙⲁ ·
…
18 ⲡⲉϫⲁϥ ϫⲉⲉⲓⲥⲙⲛⲧϣⲙⲏⲛ ⲛⲣⲟⲙⲡⲉ ϯ ⲙⲡⲉⲓⲙⲁ · ⲁⲩⲱ ⲙⲡⲓⲟⲩⲉⲙⲗⲁⲁⲩ ⲛⲧⲣⲟⲫⲏ ⲉⲡⲁⲡⲉⲓⲕⲟⲥⲙⲟⲥ ⲡⲉ ⲁⲗⲗⲁ ⲉⲓⲟⲛϩ ⲛⲕⲁⲣⲡⲟⲥ ⲛⲛϣⲏⲛ ·
…
19 ⲛⲉⲩⲛⲟⲩⲃⲛⲛⲉ · ⲇⲉ ⲣⲏⲧ · ⲛⲥⲁⲃⲟⲗ ⲙⲡⲉϥⲙⲁ ⲛϣⲱⲡⲉ · ⲉⲥⲧⲁⲩⲟ ⲉⲃⲟⲗ ⲙⲙⲛⲧⲥⲛⲟⲟⲩⲥ ⲛⲗⲟⲟⲩ ⲟⲩⲗⲟⲟⲩ ⲕⲁⲧⲁⲉⲃⲟⲧ ·
…
20 ⲉϥⲟⲛϩ ⲉⲡⲉⲥⲕⲁⲣⲡⲟⲥ ·
…
21 ⲁⲛⲟⲕ ⲇⲉ ⲡⲁⲙⲃⲱ ⲡⲉϫⲁⲓ ⲛⲁϥ ϫⲉⲡⲁⲙⲉⲣⲓⲧ ⲛⲉⲓⲱⲧ ⲁⲣⲁ ⲟⲩⲛⲥⲟⲛ ⲙⲡⲉⲕϩⲟⲩⲛ ·
…
22 ⲡⲉϫⲁϥ ⲛⲁⲓ ϫⲉⲟⲩⲛⲟⲩⲟⲛ
…
23 ⲥⲙⲟⲩ ⲉⲣⲟⲓ ⲛⲅⲃⲱⲕ ϣⲁⲣⲟⲟⲩ · ⲛⲅϫⲓⲥⲙⲟⲩ ⲉⲃⲟⲗ ϩⲓⲧⲟⲟⲧⲟⲩ ·
…
24 ⲛⲧⲉⲣⲓⲙⲟⲟϣⲉ ⲉⲃⲟⲗ ϩⲓⲧⲟⲟⲧϥ ⲉϩⲟⲩⲛ ϩⲙⲡⲧⲟⲟⲩ ⲁⲓⲉⲓ ⲉϩⲣⲁⲓ ⲉϫⲛⲟⲩⲕⲟⲩⲓ ⲛⲕⲁⲧⲁⲅⲉⲓⲟⲛ ·
…
25 ⲁⲓⲙⲟⲩⲧⲉ ⲉϩⲟⲩⲛ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ ·
…
26 ⲉⲧⲓ ⲉⲓⲁϩⲉⲣⲁⲧ ϩⲓⲡⲥⲁ ⲛⲃⲟⲗ ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ · ϫⲉⲭⲁⲓⲣⲉ ⲁⲡⲁ ⲡⲁⲙⲃⲱ · ⲡⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ · ⲁⲩⲱ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ ·
…
27 ⲉⲓⲥⲟⲩⲙⲏⲏϣⲉ ⲛϩⲟⲟⲩ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ ·
…
28 ⲗⲟⲓⲡⲟⲛ ⲁⲡϫⲟⲉⲓⲥ ϫⲱⲕ ⲉⲃⲟⲗ ⲙⲡⲁⲟⲩⲱϣ ⲛⲁⲓ ⲙⲡⲟⲟⲩ ·
…
29 ⲁⲙⲟⲩ ⲉϩⲟⲩⲛ ⲙⲡⲣⲁϩⲉⲣⲁⲧⲕ ϩⲓⲡⲥⲁ ⲛⲃⲟⲗ ·
…
30 ⲁⲓⲟⲩⲱϣⲃ ⲛⲁϥ · ⲁⲛⲟⲕ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲉⲓⲱⲧ ⲁⲡⲁ ⲡⲁⲙⲟⲩⲛ · ⲡⲁⲙⲡⲟⲣⲕ ⲕⲩⲣⲓⲟⲥ ⲭⲁⲓⲣⲉ ⲡⲁⲙⲉⲣⲓⲧ ⲛⲥⲟⲛ ⲡⲁⲧⲉϣⲧⲏⲛ ⲛⲁⲩⲁⲛ ⲁⲩⲁⲛ ⲛⲧϩⲉ ⲛⲧⲉϣⲧⲏⲛ · ⲛⲓⲱⲥⲏⲫ ⲡⲇⲓⲕⲁⲓⲟⲥ ·
…
31 ⲛⲛⲁϩⲣⲙⲡⲛⲟⲩⲧⲉ ⲇⲉ ⲥⲧⲁⲓⲏⲩ ⲛϩⲟⲩⲟ ⲉⲡⲟⲣⲫⲩⲣⲁ ⲛⲓⲙ ⲛⲣⲣⲟ ⲛⲧⲉⲡⲉⲓⲕⲟⲥⲙⲟⲥ ·
…
32 ⲡⲓⲥⲧⲉⲩⲉ ⲛⲁⲓ ⲛⲁⲥⲛⲏⲩ ⲁⲩⲱ ⲛⲁⲉⲓⲟⲧⲉ · ⲁⲛⲟⲕ ⲡⲁⲙⲃⲱ ⲡⲉⲓⲉⲗⲁⲭⲓⲥⲧⲟⲥ ⲁⲓϣⲱⲗⲙ ⲙⲡⲉⲥϯⲛⲟⲩϥⲉ ⲙⲡⲥⲟⲛ ⲉⲧⲙⲙⲁⲩ ⲛⲁⲟⲩⲙⲓⲗⲓⲟⲛ ⲙⲡⲁⲧⲓⲡⲱϩ ⲉⲣⲟϥ ·
…
33 ⲛⲧⲉⲣⲛⲁⲥⲡⲁⲍⲉ ⲇⲉ ⲛⲛⲉⲛⲉⲣⲏⲩ ⲁⲛϣⲗⲏⲗ ⲁⲛϩⲙⲟⲟⲥ
…
34 ⲡⲉϫⲁⲓ ⲛⲁϥ ϫⲉⲡⲁⲉⲓⲱⲧ ⲉⲓⲉ ⲙⲉⲕⲱϭⲃ ⲛⲧⲉⲡⲣⲱ · ⲟⲩⲇⲉ ⲙⲉⲕⲥⲱϣⲙ ϩⲙⲡϣⲱⲙ ⲉⲕⲫⲟⲣⲉⲓ · ⲛⲧⲉϣⲧⲏⲛ ⲛⲧⲉⲓⲙⲓⲛⲉ ·
…
35 ⲡⲉϫⲁϥ ⲛⲁⲓ ⲛϭⲓⲁⲡⲁ ⲡⲁⲙⲟⲩⲛ · ⲡⲁⲙⲡⲟⲣⲕ ⲉⲃⲟⲗ ϫⲉⲡⲁⲓ ⲙⲙⲁⲧⲉ · ⲡⲉ ⲡⲉϥⲣⲁⲛ · ϫⲉⲡⲁⲙⲉⲣⲓⲧ ⲛⲥⲟⲛ ⲁⲡⲁ ⲡⲁⲙⲃⲱ · ⲡⲓⲥⲧⲉⲩⲉ ⲛⲁⲓ ⲱ ⲡⲁⲙⲉⲣⲓⲧ ⲛⲉⲓⲱⲧ ϫⲉⲉⲓⲥϫⲟⲩⲱⲧⲉ ⲛⲣⲟⲙⲡⲉ · ϫⲓⲛⲛⲧⲁⲓⲉⲓ ⲉⲡⲉⲓⲙⲁ ⲧⲉⲓϩⲃⲥⲱ ⲛⲟⲩⲱⲧ ⲧⲉⲧⲓϭⲓⲛⲉ ⲛⲧⲁϩⲙⲙⲉ ⲛϩⲏⲧⲥ · ⲛⲧⲉⲡⲣⲱ · ⲁⲩⲱ ⲧⲕⲉⲕⲣⲁⲥⲓⲥ ⲙⲡⲁⲏⲣ ⲙⲡϣⲱⲙ ·
…
36 ⲁⲩⲱ ϯϩⲟⲙⲟⲗⲟⲅⲉⲓ ⲛⲁⲕ · ϫⲉⲧⲁⲓ ⲣⲱϣⲉ ⲉⲣⲟⲓ ϣⲁⲡⲉϩⲟⲟⲩ ⲙⲡⲁⲙⲟⲩ ·
…
37 ⲁⲩⲱ ϩⲙⲡⲁⲕⲉⲙⲟⲩ ⲟⲛ ⲥⲣⲱϣⲉ ⲉⲣⲟⲓ ⲛⲥⲉⲥⲟⲩⲗⲟⲩⲱⲗⲧ ⲙⲙⲟⲥ ϣⲁⲡⲉϩⲟⲟⲩ ⲙⲡϩⲁⲡ ⲙⲙⲉ ·
…
38 ⲡⲉϫⲁⲓ ⲛⲁϥ ϫⲉⲡⲁⲙⲉⲣⲓⲧ ⲛⲉⲓⲱⲧ ϫⲉⲁⲣⲁ ⲟⲩⲛⲥⲟⲛ ⲙⲡⲉⲕⲥⲁ ⲛϩⲟⲩⲛ ·
…
39 ⲡⲉϫⲁϥ ⲛⲁⲓ ϫⲉⲥⲉ ⲟⲩⲛⲟⲩⲁ ⲙⲙⲁⲩ · ⲉⲣⲉⲡⲕⲟⲥⲙⲟⲥ ⲧⲏⲣϥ ⲙⲡϣⲁ ⲁⲛ ⲛⲟⲩⲥϣⲛⲧⲁϭⲥⲉ ⲛⲟⲩⲱⲧ · ⲛⲧⲉⲛⲉϥⲟⲩⲣⲏⲏⲧⲉ ·
…
40 ⲁⲓⲃⲱⲕ ϣⲁⲣⲟϥ ⲛϩⲁϩ ⲛⲥⲟⲡ ⲉⲓⲟⲩⲱϣ ⲉϭⲙⲡϣⲓⲛⲉ ·
…
41 ⲁⲩⲱ ⲛⲉϣⲁϥⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ ⲉϥϫⲱ ⲙⲙⲟⲥ · ϫⲉⲁⲗⲟⲕ ⲉⲕϯϩⲓⲥⲉ ⲛⲁⲕ ⲉⲕⲛⲏⲩ · ⲉⲡⲉⲓⲙⲁ
…
42 ⲉⲡⲉⲓ ⲙⲛϭⲟⲙ ⲛⲣⲙⲛⲥⲁⲣⲝ ⲉⲛⲁⲩ ⲉⲡⲁϩⲟ · ⲉⲓⲙⲏⲧⲓ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ ·
…
43 ⲧⲉⲛⲟⲩ ⲇⲉ ⲙⲉϣⲁⲕ ⲱ ⲡⲁⲉⲓⲱⲧ ⲡⲧⲱϣ ⲡⲉ ⲡⲁⲓ ⲉⲧⲣⲁⲉⲓ ⲛⲙⲙⲁⲕ ⲛⲧⲁⲛⲁⲩ ⲉⲣⲟϥ ⲁⲩⲱ ⲛⲧⲁϫⲓⲥⲙⲟⲩ ⲉⲃⲟⲗ ϩⲓⲧⲟⲟⲧϥ ⲙⲡⲁⲧⲓⲙⲟⲩ ⁛ —
…
44 ⲡⲉϫⲁⲓ ⲛⲁϥ · ϫⲉⲙⲙⲟⲛ · ⲡⲧⲱϣ ⲁⲛ ⲡⲉ ⲡⲁⲓ · ⲉⲧⲃⲉⲡⲁⲓ ⲣⲱ · ⲛⲧⲁⲓⲉⲓ ϣⲁⲣⲟⲕ ⲉⲡⲉⲓⲙⲁ ·
…
45 ⲁⲗⲗⲁ ϯⲛⲁⲣⲡⲉⲕⲙⲉⲉⲩⲉ ⲉⲣϣⲁⲛⲡϫⲟⲉⲓⲥ ⲥⲟⲟⲩⲧⲛ ⲛⲧⲁϩⲓⲏ ⲛⲧⲁⲁⲡⲁⲛⲧⲁ · ⲉⲡⲥⲟⲛ ⲉⲧⲙⲙⲁⲩ ·
…
46 ⲡⲗⲏⲛ ⲱ ⲡⲁⲉⲓⲱⲧ ⲁⲣⲓⲡⲁⲙⲉⲉⲩⲉ ϣⲁⲛⲧⲓⲁⲡⲟⲗⲁⲩⲉ ⲙⲡⲉⲥⲙⲟⲩ ⲙⲡⲥⲟⲛ ⲉⲧⲙⲙⲁⲩ ·
…
47 ⲛⲧⲉⲣⲓⲙⲟⲟϣⲉ ⲉϩⲟⲩⲛ ϩⲙⲡⲧⲟⲟⲩ ⲡⲁⲣⲁⲟⲩⲙⲓⲗⲓⲟⲛ · ϯⲱⲣⲕ ⲛⲏⲧⲛ ⲙⲡⲃⲏⲙⲁ · ⲉⲧϩⲁϩⲟⲧⲉ · ⲙⲡⲛⲟⲩⲧⲉ · ⲁⲛⲟⲕ ⲡⲁⲙⲃⲱ ⲡⲉⲓⲉⲗⲁⲭⲓⲥⲧⲟⲥ · ϫⲉⲛϯϫⲓϭⲟⲗ ⲁⲛ ϩⲙⲡⲉⲧⲓⲛⲁϫⲟⲟϥ · ⲧⲉⲛⲟⲩ ϫⲉⲡⲉⲛⲧⲁϥⲁⲙⲁϩⲧⲉ ⲛⲁⲃⲃⲁⲕⲟⲩⲙ ⲡⲉⲡⲣⲟⲫⲏⲧⲏⲥ ⲙⲡⲉⲟⲩⲟⲉⲓϣ ⲁϥⲉⲓⲛⲉ ⲙⲙⲟϥ ⲙⲛⲡⲁⲣⲓⲥⲧⲟⲛ ⲉⲧⲛⲧⲟⲟⲧϥ · ⲁϥⲛⲧϥ ⲉϫⲙⲡϣⲏⲓ ⲛⲙⲙⲟⲩⲓ · ⲁϥⲧⲁⲁϥ ⲛⲇⲁⲛⲓⲏⲗ · ϩⲙⲡϣⲏⲓ ⲛⲙⲙⲟⲩⲓ · ⲛⲧⲟϥ ⲟⲛ ⲡⲉⲛⲧⲁϥⲁⲙⲁϩⲧⲉ ⲙⲙⲟⲓ ϩⲛⲧϩⲟⲣⲙⲏ ⲙⲡⲉⲡⲛⲉⲩⲙⲁ ⲁϥⲉⲓⲛⲉ ⲙⲙⲟⲓ ⲉϫⲙⲡⲕⲁⲧⲁⲅⲉⲓⲟⲛ ⲙⲡⲥⲟⲛ ⲉⲧⲙⲙⲁⲩ ·
…
48 ⲁⲩⲱ ⲁⲓⲕⲱⲗϩ ⲉⲡⲣⲟ ⲕⲁⲧⲁⲡⲕⲁⲛⲱⲛ ⲛⲛⲉⲥⲛⲏⲩ ⲙⲙⲟⲛⲁⲭⲟⲥ · ⲁⲩⲱ ⲛⲉⲓⲁϩⲉⲣⲁⲧ ϩⲓⲣⲙⲡⲣⲟ · ⲛⲟⲩⲛⲟϭ ⲛⲛⲁⲩ
…
49 ⲙⲛⲛⲥⲁⲛⲁⲓ ⲁⲡⲥⲟⲛ ⲣⲟⲩⲱ ⲛⲁⲓ ϩⲙⲡⲥⲁ ⲛϩⲟⲩⲛ · ⲉϥϫⲱ ⲙⲙⲟⲥ · ϫⲉⲭⲁⲓⲣⲉ ⲁⲡⲁ ⲡⲁⲙⲃⲱ ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ · ⲛϣⲓⲏⲧ ⲁⲩⲱ ⲡⲛⲟϭ ⲛϫⲟⲓ ⲉⲧⲣϩⲱⲧ ϩⲙⲡϫⲁⲓⲉ ⲛⲁⲧⲙⲟⲟⲩ ·
…
50 ⲉⲓⲥⲟⲩⲙⲏⲏϣⲉ ⲛϩⲟⲟⲩ ϯⲉⲡⲓⲑⲩⲙⲉⲓ ⲉⲛⲁⲩ ⲉⲣⲟⲕ ·
…
51 ⲉⲓⲥ ⲡⲁⲟⲩⲱϣ ⲁⲡⲛⲟⲩⲧⲉ ϫⲟⲕϥ ⲛⲁⲓ ⲉⲃⲟⲗ ⲙⲡϩⲟⲟⲩ ·
…
52 ⲁⲙⲟⲩ ⲉϩⲟⲩⲛ ⲙⲡⲣⲁϩⲉⲣⲁⲧⲕ ϩⲓⲡⲥⲁ ⲛⲃⲟⲗ ·
…
53 ⲛⲧⲉⲣⲓⲣⲡϩⲟⲩⲛ ⲙⲡⲣⲟ ⲙⲡⲕⲁⲧⲁⲅⲉⲓⲟⲛ ⲁⲓϭⲱϣⲧ ⲁⲓⲛⲁⲩ ⲉⲩⲛⲟϭ ⲛⲱⲛⲉ ⲙⲟⲅⲓⲥ · ⲛⲧⲉⲙⲛⲧⲥⲛⲟⲟⲩⲥ ⲛⲣⲱⲙⲉ ⲉϣⲧⲱⲟⲩⲛ ⲙⲙⲟϥ ⲉⲡⲟⲛϥ ·
…
54 ⲁϥϯⲡⲉϥⲟⲩⲟⲓ ⲛϭⲓⲡⲥⲟⲛ ⲉⲧⲙⲙⲁⲩ ⲁϥⲥⲕⲟⲣⲕⲣ ⲙⲡⲱⲛⲉ · ⲁϥⲧⲟϭϥ ⲉⲡⲣⲟ ⲙⲡⲕⲁⲧⲁⲅⲉⲓⲟⲛ ·
…
55 ⲛⲧⲉⲣⲓⲛⲁⲩ ⲉⲣⲟϥ ⲁⲓⲣϣⲡⲏⲏⲣⲉ ⲉⲙⲁⲧⲉ ·
…
56 ⲡⲗⲏⲛ ⲁⲓⲣⲡⲙⲉⲉⲩⲉ ⲙⲡⲡⲁⲧⲣⲓⲁⲣⲭⲏⲥ · ⲓⲁⲕⲱⲃ ϫⲉⲛⲧⲟϥ ϩⲱⲱϥ ⲟⲛ ⲙⲡⲉⲟⲩⲟⲉⲓϣ ⲛⲧⲁϥⲡⲱⲧ · ϩⲁⲡϩⲟ ⲛⲏⲥⲁⲩ · ⲡⲉϥⲥⲟⲛ ⲁϥⲃⲱⲕ ⲉⲧⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲁϥⲉⲓ ⲉϫⲙⲡⲙⲁ ⲉⲧⲉⲣⲉⲛⲉⲥⲟⲟⲩ ⲛⲗⲁⲃⲁⲛ ⲛϩⲏⲧϥ ·
…
57 ⲁϥϯⲡⲉϥⲟⲩⲟⲓ ⲉⲧϣⲱⲧⲉ ⲁϥⲥⲕⲟⲣⲕⲣ ⲡⲱⲛⲉ ⲉⲧϩⲓϫⲛⲣⲱⲥ ⲭⲱⲣⲓⲥⲧⲣⲉⲣⲱⲙⲉ ϯⲧⲟⲟⲧϥ · ⲁϥⲧⲥⲟ ⲛⲛⲉⲥⲟⲟⲩ ⲛⲗⲁⲃⲁⲛ ⲁϥⲕⲁⲁⲩ ⲉⲃⲟⲗ ⲁⲩⲙⲟⲟⲛⲉ ·
…
58 ⲧⲟⲧⲉ ⲗⲟⲓⲡⲟⲛ ⲁⲓⲉⲓⲙⲉ ⲉⲡⲁⲓ ϫⲉϩⲱⲃ ⲛⲓⲙ ⲉⲧⲉⲣⲉⲛⲉⲧⲟⲩⲁⲁⲃ ⲉⲓⲣⲉ ⲙⲙⲟⲟⲩ ⲡⲛⲟⲩⲧⲉ ϯ ⲛⲧⲟⲟⲧⲟⲩ ·
…
59 ⲡⲉϫⲁⲓ ⲛⲁϥ ϫⲉⲡⲁⲉⲓⲱⲧ ⲉⲧⲟⲩⲁⲁⲃ ⲙⲁⲧⲁⲙⲟⲓ ⲉⲡⲉⲕⲣⲁⲛ ⲉⲧⲟⲩⲁⲁⲃ · ϫⲉⲁⲡϫⲟⲉⲓⲥ ϩⲉⲡⲡⲁⲓ ⲉⲣⲟⲓ ·
…
60 ⲛⲧⲟϥ ⲇⲉ ⲡⲉϫⲁϥ ϫⲉⲕⲩⲣⲟⲥ · ⲡⲉ ⲡⲁⲣⲁⲛ ·
…
61 ⲁⲛⲟⲕ ⲡⲉ ⲡⲥⲟⲛ ⲛⲑⲉⲟⲇⲱⲥⲓⲟⲥ ⲡⲣⲣⲟ · ⲁⲩⲱ ⲛⲧⲁⲩⲥⲁⲛⲟⲩϣⲧ ⲙⲛⲁⲣⲕⲁⲇⲓⲟⲥ · ⲙⲛⲟⲛⲟⲣⲓⲟⲥ ϩⲓϫⲛⲟⲩⲧⲣⲁⲡⲉⲍⲁ ⲛⲟⲩⲱⲧ ⲛⲙⲙⲁⲩ ⲁⲩⲱ ⲛⲁⲙⲉ · ⲁⲟⲛⲟⲣⲓⲟⲥ ϫⲟⲟⲥ ⲉⲣⲟⲓ ⲛϩⲁϩ ⲛⲥⲟⲡ ϫⲉϫⲓⲧ ⲉⲧⲉⲣⲏⲙⲟⲥ · ⲛⲙⲙⲁⲕ ⲧⲁⲣⲙⲟⲛⲁⲭⲟⲥ ·
…
62 ⲁⲛⲟⲕ ⲇⲉ ⲙⲡⲓⲉϣϫⲓⲧϥ ⲇⲉ ϫⲉⲡϣⲏⲣⲉ ⲡⲉ ⲙⲡⲣⲣⲟ ⲡⲉ ·
…
63 ⲛⲧⲉⲣⲛⲛⲁⲩ ⲇⲉ ϫⲉⲁⲡϫⲓⲛϭⲟⲛⲥ · ⲁϣⲁⲓ ⲁⲛⲣⲣⲱⲟⲩ ⲡⲁⲣⲁⲛⲟⲙⲉⲓ ⲁⲛⲁⲣⲭⲱⲛ ϫⲓ ⲛⲛϩⲏⲕⲉ ⲛϭⲟⲛⲥ ⲁⲟⲩⲟⲛ ⲛⲓⲙ ⲣⲓⲕⲉ ⲉⲃⲟⲗ ⲁⲩⲧⲁⲕⲟ ⲛⲧⲉⲩϩⲓⲏ ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲁⲓⲧⲱⲟⲩⲛ ⲁⲓⲕⲁⲣⲁⲧ ⲉⲃⲟⲗ ⲁⲓⲉⲓ ⲉⲡⲉⲓϫⲁⲓⲉ ⲁⲓⲟⲩⲱⲛϩ · ⲛϩⲏⲧϥ ⲉⲧⲃⲉⲡⲁϣⲁⲓ ⲛⲛⲁⲛⲟⲃⲉ
…
64 ⲧⲁⲣⲉⲡⲛⲟⲩⲧⲉ ⲕⲁⲁⲩ ⲛⲁⲓ ⲉⲃⲟⲗ
…
65 ⲡⲉϫⲁⲓ ⲛⲁϥ ⲁⲛⲟⲕ ⲡⲁⲙⲃⲱ ϫⲉⲡⲁⲙⲉⲣⲓⲧ ⲛⲉⲓⲱⲧ ⲉϣⲁⲕϭⲛⲣⲱⲙⲉ ⲧⲱⲛ ϩⲛⲧⲉⲓⲉⲣⲏⲙⲁ · ⲛϥⲥⲗⲥⲱⲗⲕ ϩⲛⲛⲉⲕϩⲓⲥⲉ ·
…
66 ⲡⲉϫⲁϥ ⲛⲁⲓ ⲁⲡⲁ ⲕⲩⲣⲟⲥ ϫⲉⲡⲓⲥⲧⲉⲩⲉ ⲛⲁⲓ ⲡⲁⲙⲉⲣⲓⲧ ⲛⲥⲟⲛ ⲁⲡⲁ ⲡⲁⲙⲃⲱ · ⲡⲁⲛⲟⲩⲧⲉ ⲁⲩⲱ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉⲧϭⲓⲛⲉ ⲙⲡⲁϣⲓⲛⲉ ϩⲙⲡⲉⲓϫⲁⲓⲉ ⲉⲧⲓϣⲟⲟⲡ ⲛϩⲏⲧϥ
…
67 ⲙⲡⲓⲛⲁⲩ ⲅⲁⲣ ⲉⲣⲱⲙⲉ ⲉϥⲛⲏⲩ ϣⲁⲣⲟⲓ ⲉⲓⲙⲏⲧⲓ ⲉⲩⲥⲟⲛ ⲙⲙⲟⲛⲁⲭⲟⲥ ⲉϥⲛⲏⲩ ϣⲁⲣⲟⲓ ⲉϥⲱϣ ⲉⲛⲁⲩ ⲉⲡⲁϩⲟ ⲁⲩⲱ ⲙⲡⲉⲡⲉⲓⲕⲉⲧ ⲛⲁⲩ ⲉⲣⲟⲓ ·
…
68 ⲁⲗⲗⲁ ϩⲓⲧⲛⲧϩⲉ ⲉⲧϥⲙⲏⲛ ⲉⲃⲟⲗ ⲉϥⲛⲏⲩ ϣⲁⲣⲟⲓ ⲁⲓϩⲱⲛ ⲉⲧⲟⲟⲧϥ ϩⲙⲡⲥⲁ ⲛϩⲟⲩⲛ ⲉⲓϫⲱ ⲙⲙⲟⲥ ϫⲉⲁⲗⲟⲕ ⲉⲕϯϩⲓⲥⲉ ⲛⲁⲕ · ⲉⲕⲛⲏⲩ ϣⲁⲣⲟⲓ
…
69 ⲙⲙⲟⲛ ⲙⲛϣϭⲟⲙ ⲛⲣⲙⲛⲥⲁⲣⲝ ⲉⲛⲁⲩ ⲉⲡⲁϩⲟ ⲉⲓⲙⲏⲧⲓ ⲁⲡⲁ ⲡⲁⲙⲃⲱ · ⲡⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ⲛϣⲓⲏⲧ ⁛—
…