1 ⲁⲩⲱ ⲛⲧⲉⲩⲛⲟⲩ ⲁϥⲥϩⲁⲓ ⲉⲃⲟⲗ ϩⲛⲧⲉⲭⲱⲣⲁ ⲧⲏⲣⲥ ⲉϥⲁⲡⲟⲕⲩⲣⲏⲥⲥⲉ ⲛⲧⲗⲉⲝⲓⲥ ⲉⲧⲙⲙⲁⲩ ϫⲉⲉⲥϣⲟϥⲧ ⲁⲩⲱ ϩⲛⲟⲩⲙⲛⲧⲁⲛⲟⲏⲧⲟⲥ ⲛⲧⲁⲛⲙⲉⲉⲩⲉ ⲉⲣⲟⲥ
…
2 ⲙⲛⲛⲥⲁⲛⲁⲓ ⲇⲉ ⲁϥⲧⲁⲣⲕⲉⲡⲙⲁⲕⲁⲣⲓⲟⲥ ⲉϥϫⲱ ⲙⲙⲟⲥ ϫⲉⲙⲁⲧⲁⲙⲟⲓ ϫⲉⲟⲩ ⲡⲉ ⲡⲉⲕⲃⲓⲟⲥ ⲁⲩⲱ ⲛⲧⲕⲟⲩⲣⲙⲧⲱⲛ ϩⲙⲡⲉⲕⲅⲉⲛⲟⲥ ϯⲛⲁⲩ ⲅⲁⲣ ⲉⲡⲉⲕⲥⲙⲟⲧ ⲛⲧϩⲉ ⲛⲛⲓϩⲓⲇⲓⲱⲧⲏⲥ
…
3 ϯⲥⲱⲧⲙ ⲇⲉ ϩⲱⲱϥ ⲉⲛⲉⲕϣⲁϫⲉ ⲉⲩϫⲟⲥⲉ ⲉⲙⲁⲧⲉ ⲡⲁⲣⲁ ⲛⲁⲛⲥⲟⲫⲟⲥ
…
4 ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉⲁⲓⲟⲩⲱϣ ⲙⲉⲛ ⲉⲱⲛϩ ϩⲱⲥ ⲙⲟⲛⲁⲭⲟⲥ ⲡⲗⲏⲛ ϯⲟⲩⲏⲩ ⲉⲃⲟⲗ ⲙⲡⲧⲁⲉⲓⲟ ⲉⲧⲙⲙⲁⲩ
…
5 ⲁⲩⲱ ⲟⲛ ⲁⲛⲅⲟⲩⲣⲙⲡⲉⲙϫⲉ
…
6 ⲁⲗⲗⲁ ⲉⲡⲉⲓⲇⲏ ⲛⲧⲟⲕ ⲡⲉⲧⲛⲧⲁϫⲣⲏⲩ ⲉϫⲛⲧⲉⲕⲥⲟⲫⲓⲁ ⲉⲧⲃⲉⲡⲁⲓ ⲁⲡϫⲁϫⲉ ϩⲓⲧⲟⲟⲧϥ ⲉⲣⲡⲁⲓ ϩⲓⲧⲟⲟⲧⲕ ⲉϥⲥⲟⲟⲩⲛ ϫⲉⲟⲩⲛⲟⲩⲙⲏⲏϣⲉ ⲛⲁϫⲓϫⲣⲟⲡ
…
7 ⲉⲧⲃⲉⲡⲁⲓ ⲛⲥⲉϯⲟⲥⲉ ⲛⲥⲉⲧⲙⲥⲱⲧⲙ ⲉⲡϣⲁϫⲉ ⲛⲧⲉⲥⲃⲱ ⲉⲧⲟⲩⲁⲁⲃ ⲉⲧⲛⲏⲩ ⲉⲃⲟⲗ ϩⲛⲣⲱⲕ
…
8 ⲡⲗⲏⲛ ⲉⲧⲃⲉⲡⲙⲉ ⲉⲧϣⲟⲟⲡ ⲛϩⲏⲧⲕ ⲉϩⲟⲩⲛ ⲉⲡⲛⲟⲩⲧⲉ ⲉⲓⲥϩⲏⲏⲧⲉ ⲁⲕϫⲣⲟ ⲉⲥⲙⲟⲧ ⲛⲓⲙ ⲛⲕⲟⲧⲥ ⲛⲧⲉⲡⲇⲓⲁⲃⲟⲗⲟⲥ ϩⲙⲡⲧⲣⲉⲕⲥⲱⲧⲙ ⲉⲡϣⲁϫⲉ ⲛⲧⲁⲙⲛⲧⲉⲗⲁⲭⲓⲥⲧⲟⲥ ⲙⲡϥϭⲙϭⲟⲙ ⲅⲁⲣ ⲉϫⲁⲥⲧⲕ ⲉⲩⲉⲛⲟⲛⲟⲓⲁ ⲛϭⲓⲡⲙⲉⲅⲉⲑⲟⲥ ⲉⲧⲛϩⲏⲧⲕ ϩⲱⲥⲧⲉ ⲉⲧⲣⲉⲕⲁⲙⲁϩⲧⲉ ⲉϫⲙⲡⲉⲕⲟⲩⲱϣ ⲙⲙⲓⲛ ⲙⲙⲟⲕ
…
9 ⲁⲗⲗⲁ ⲁⲕⲟⲩⲱⲛϩ ⲉⲃⲟⲗ ⲛⲧⲙⲛⲧⲕⲟⲩⲓ ⲉⲧϩⲙⲡⲉⲭⲣⲓⲥⲧⲟⲥ ⲛⲧϩⲉ ϩⲱⲱϥ ⲙⲡⲛⲟϭ ⲙⲱⲩⲥⲏⲥ ⲉⲁϥⲥⲱⲧⲙ ⲛⲥⲁⲓⲱⲑⲟⲣ ⲡⲟⲩⲏⲏⲃ ⲙⲙⲁⲇⲓϩⲁⲙ ⲉⲡⲁⲓ ⲛⲁⲙⲉ ⲡⲉⲛⲧⲁⲡⲥⲱⲧⲏⲣ ϫⲟⲟϥ ⲛⲛⲉⲛⲉⲓⲟⲧⲉ ⲛⲁⲡⲟⲥⲧⲟⲗⲟⲥ ϫⲉⲉⲧⲉⲧⲛⲕⲉⲧ ⲧⲏⲩⲧⲛ ⲛⲧⲉⲧⲛⲣ ⲧϩⲉ ⲛⲛⲓϣⲏⲣⲉ ϣⲏⲙ
…
10 ⲛⲧⲟⲕ ⲇⲉ ⲁⲕⲟⲩⲟⲛϩⲕ ⲉⲃⲟⲗ ⲛⲁⲙⲉ ϫⲉⲁⲕⲕⲧⲟⲕ ⲧⲏⲣⲕ ⲉⲃⲟⲗ ϩⲙⲡϫⲟⲥⲉⲛϩⲏⲧ ⲉϩⲟⲩⲛ ⲉⲡⲧⲃⲃⲟ ⲙⲛⲧⲙⲛⲧϩⲁⲡⲗⲟⲩⲥ ⲛⲧⲙⲛⲧⲕⲟⲩⲓ ⲙⲛⲛⲥⲁⲛⲁⲓ ⲁϥⲥⲉⲡⲥⲱⲡϥ ⲉⲧⲣⲉϥϭⲱ ⲛⲙⲙⲁϥ ⲛϩⲉⲛϩⲟⲟⲩ
…
11 ⲛⲧⲟϥ ⲇⲉ ⲁϥⲡⲁⲣⲁⲕⲁⲗⲉⲓ ⲉϥϫⲱ ⲙⲙⲟⲥ ϫⲉⲟⲩⲁⲧϭⲟⲙ ⲛⲁⲓ ⲡⲉ ⲡⲁⲓ ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁϥⲉⲓ ⲉⲃⲟⲗ ϩⲓⲧⲟⲟⲧϥ ϩⲛⲟⲩⲉⲓⲣⲏⲛⲏ ⲙⲛⲟⲩⲧⲓⲙⲏ
…
12 ⲛⲉϥⲙⲟⲕϩ ⲇⲉ ⲛϩⲏⲧ ⲉϥⲛⲏⲩ ⲉⲃⲟⲗ ϩⲓⲧⲟⲟⲧϥ ⲛⲧϩⲉ ⲛⲟⲩϣⲏⲣⲉ ⲉⲣⲉⲡⲉϥⲉⲓⲱⲧ ⲙⲟⲟϣⲉ ⲉⲃⲟⲗ ϩⲓⲧⲟⲟⲧϥ ⲙⲛⲛⲥⲁϣⲟⲙⲧⲉ ⲇⲉ ⲛⲣⲟⲙⲡⲉ ϫⲓⲛⲛⲧⲁⲛⲁⲓ ϣⲱⲡⲉ ⲁϥⲛⲕⲟⲧⲕ ⲛϭⲓⲡⲉⲡⲓⲥⲕⲟⲡⲟⲥ ⲙⲡⲙϫⲏ
…
13 ⲁⲩⲱ ⲕⲁⲧⲁⲡϩⲉⲑⲟⲥ ⲁⲧⲡⲟⲗⲓⲥ ⲧⲏⲣⲥ ⲥⲱⲟⲩϩ ⲉⲛⲉⲥⲉⲣⲏⲩ ϩⲛⲟⲩⲥⲩⲙⲫⲱⲛⲓⲁ ⲛⲟⲩⲱⲧ
…
14 ⲁⲩⲱ ⲁⲩϯⲯⲩⲫⲓⲥⲙⲁ ϩⲁⲟⲩⲁ ⲛⲛⲉⲡⲣⲉⲥⲃⲩⲧⲉⲣⲟⲥ ⲉⲩⲉⲩⲗⲁⲃⲏⲥ ϩⲱⲱϥ ⲡⲉ ⲁⲩϫⲟⲟⲩϥ ⲉⲣⲁⲕⲟⲧⲉ ⲙⲛⲛⲉⲯⲩⲫⲓⲥⲙⲁ ϫⲉⲉⲩⲉⲁⲁϥ ⲛⲉⲡⲓⲥⲕⲟⲡⲟⲥ
…
15 ⲛⲧⲉⲣⲉϥϫⲓ ⲇⲉ ⲛⲛⲉⲥϩⲁⲓ ⲛϭⲓⲡⲁⲣⲭⲓⲉⲡⲓⲥⲕⲟⲡⲟⲥ ⲁⲡⲁ ⲑⲉⲟⲫⲓⲗⲟⲥ
…
16 ⲁϥⲟⲩⲱϣⲃ ⲉϥϫⲱ ⲙⲙⲟⲥ ϫⲉⲁⲫⲟⲩ ⲟⲩⲙⲟⲛⲁⲭⲟⲥ ⲡⲉ ⲉⲡⲁⲧⲉⲧⲛⲡⲟⲗⲓⲥ ⲡⲉ ⲁⲛⲓϥ ⲛⲁⲓ ⲧⲁⲁϥ ⲛⲏⲧⲛ ⲛⲉⲡⲓⲥⲕⲟⲡⲟⲥ ⲁⲩⲟⲩⲱϣⲃ ⲇⲉ ⲛϭⲓⲛⲉⲡⲣⲉⲥⲃⲩⲧⲉⲣⲟⲥ ⲉⲩϫⲱ ⲙⲙⲟⲥ ϫⲉⲁⲛⲟⲛ ⲣⲱ ⲛⲧⲛⲥⲟⲟⲩⲛ ⲁⲛ ⲙⲙⲟⲛⲁⲭⲟⲥ ϩⲛⲛⲉⲛⲧⲟϣ ϫⲉⲁⲫⲟⲩ ⲁⲩⲱ ⲧⲛⲙⲉⲉⲩⲉ ⲟⲛ ϫⲉⲙⲛⲟⲩⲟⲛ ⲛϩⲏⲧⲛ ⲥⲟⲟⲩⲛ ⲙⲙⲟϥ
…
17 ⲁϥⲟⲩⲱϣⲃ ⲇⲉ ⲟⲛ ⲛϭⲓⲡⲁⲣⲭⲓⲉⲡⲓⲥⲕⲟⲡⲟⲥ ⲉϥϫⲱ ⲙⲙⲟⲥ ⲛⲁⲩ ϫⲉⲉϣⲱⲡⲉ ⲛⲧⲉⲧⲛⲛⲁⲛⲧϥ ⲛⲁⲓ ⲁⲛ ⲛϯⲛⲁⲡⲉϣⲛⲣⲱⲙⲉ ⲛⲏⲧⲛ ⲁⲛ ⲧⲉⲛⲟⲩ
…
18 ⲛⲧⲟⲟⲩ ⲇⲉ ⲁⲩⲉⲓ ⲉⲃⲟⲗ ϩⲓⲧⲟⲟⲧϥ ⲁⲩⲃⲱⲕ ⲉⲧⲉⲩⲡⲟⲗⲓⲥ
…
19 ⲁⲩϣⲓⲛⲉ ⲛⲥⲁⲡⲣⲱⲙⲉ ⲁⲩⲱ ⲙⲡⲟⲩⲥⲟⲩⲱⲛϥ ϩⲙⲡⲧⲟϣ ⲧⲏⲣϥ
…
20 ⲉⲛⲉϥϣⲟⲟⲡ ⲅⲁⲣ ⲁⲛ ⲡⲉ ⲙⲛⲛⲣⲱⲙⲉ ⲁⲗⲗⲁ ⲙⲛⲛⲉⲑⲏⲣⲓⲟⲛ
…
21 ⲛⲧⲉⲣⲟⲩⲑⲗⲓⲃⲉ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲛⲙⲙⲟⲛⲁⲭⲟⲥ ⲁⲩⲱ ⲁⲩϫⲛⲟⲩⲟⲩ ⲉⲡⲣⲱⲙⲉ
…
22 ⲁϥⲟⲩⲱϣⲃ ⲇⲉ ⲛϭⲓⲡⲉⲧⲥⲟⲟⲩⲛ ⲙⲙⲟϥ ⲛϩⲏⲧⲟⲩ ϫⲉⲥⲉ ϯⲥⲟⲟⲩⲛ ⲙⲙⲟϥ ϩⲁⲧϩⲏ ⲙⲡϩⲟⲟⲩ ⲛⲉϣⲁⲓϭⲛⲧϥ ⲇⲉ ⲡⲉ ϩⲛⲧⲉⲣⲏⲙⲟⲥ ⲉϥϭⲉⲉⲧ ⲙⲛⲛϣⲟϣ
…
23 ⲛⲧⲉⲩⲛⲟⲩ ⲇⲉ ⲁⲩⲕⲉⲗⲉⲩⲉ ⲉⲧⲣⲉⲛϭⲉⲣⲁϭⲉ ϭⲱⲣϭ ⲉⲣⲟϥ ⲛⲥⲉϭⲟⲡϥ ⲉⲃⲟⲗ ϫⲉⲁⲡⲥⲟⲛ ⲧⲁⲙⲟⲟⲩ ϫⲉⲉϥϣⲁⲛⲉⲓⲙⲉ ⲉⲡⲁⲓ ϫⲉⲉⲧⲉⲧⲛϣⲓⲛⲉ ⲛⲥⲱϥ ⲉⲁⲁϥ ⲛⲉⲡⲓⲥⲕⲟⲡⲟⲥ ϥⲛⲁⲡⲱⲧ
…
24 ⲛϭⲉⲣⲁϭⲉ ϭⲉ ⲁⲩϭⲱⲣϭ ⲉⲣⲟϥ ϩⲛⲛⲉⲩϭⲟⲣϭⲥ ⲁⲩⲱ ⲁϥⲉⲓ ⲉⲃⲟⲗ ⲛⲧⲉⲩϣⲏ ϫⲉⲉϥⲛⲁⲥⲱ ⲙⲙⲟⲟⲩ ⲙⲛⲛϣⲟϣ
…
25 ⲛⲧⲉⲩⲛⲟⲩ ⲇⲉ ⲁⲛϭⲉⲣⲁϭⲉ ϥⲱϭⲉ ⲉϫⲱϥ ⲁⲩϭⲟⲡϥ ⲁⲩⲁⲙⲁϩⲧⲉ ⲙⲙⲟϥ
…
26 ⲁϥϣⲁϫⲉ ⲇⲉ ⲛⲙⲙⲁⲩ ϫⲉⲟⲩ ⲡⲉ ⲡⲉⲧⲛϩⲱⲃ ⲛⲙⲙⲁⲓ ⲉⲧⲉⲧⲛⲁⲙⲁϩⲧⲉ ⲙⲙⲟⲓ ⲁⲛⲅⲟⲩⲣⲱⲙⲉ ϩⲱⲱⲧ ⲛⲧⲉⲧⲛϩⲉ
…
27 ⲉϣϫⲉ ⲉⲧⲉⲧⲛϭⲉⲡⲧⲃⲛⲏ ⲉⲓⲥ ⲡϣⲟϣ ⲁⲧⲉⲧⲛϭⲉⲡϥ
…
28 ⲡⲉϫⲁⲩ ⲛⲁϥ ϫⲉⲧⲛⲥⲟⲟⲩⲛ ϫⲉⲛⲧⲕⲟⲩⲣⲱⲙⲉ ⲁⲩⲱ ⲉⲛⲕⲱⲧⲉ ⲛⲥⲱⲕ ⲉⲧⲃⲉⲡⲁⲓ ⲁⲛϭⲟⲡⲕ
…
29 ⲡⲉϫⲁϥ ⲛⲁⲩ ϫⲉⲁⲛⲟⲕ ⲟⲩⲛ ⲡⲉⲧⲉⲧⲛϣⲓⲛⲉ ⲛⲥⲱϥ ⲁⲗⲱⲧⲛ ϩⲁⲡⲁⲓ ⲙⲁⲣⲉϥⲃⲱⲕ
…
30 ⲛⲧⲉⲩⲛⲟⲩ ⲁⲩⲕⲱ ⲉⲃⲟⲗ ⲙⲡϣⲟϣ ⲁⲩⲧⲁⲗⲟϥ ⲛⲧⲉⲩⲛⲟⲩ ⲁⲩⲛⲧϥ ⲉⲣⲁⲕⲟⲧⲉ ⲉⲣⲁⲧϥ ⲙⲡⲁⲣⲭⲓⲉⲡⲓⲥⲕⲟⲡⲟⲥ
…
31 ⲛⲧⲉⲣⲉϥⲛⲁⲩ ⲇⲉ ⲉⲣⲟϥ ⲁϥⲣⲁϣⲉ ⲉⲙⲁⲧⲉ ⲁⲩⲱ ⲛⲧⲉⲣⲟⲩⲧⲁⲙⲟϥ ⲉⲧϩⲉ ⲛⲧⲁⲩϭⲟⲡϥ ⲙⲙⲟⲥ ⲁϥⲣϣⲡⲏⲣⲉ ⲉⲙⲁⲧⲉ ⲁⲩⲱ ⲡⲉϫⲁϥ ϫⲉⲁⲕⲉⲓⲁⲫⲟⲩ ⲁⲙⲟⲩ ϩⲱⲱⲕ ⲛⲅϣⲡϩⲓⲥⲉ ⲙⲛⲛⲉⲕϣⲃⲣ ⲙⲉⲗⲟⲥ ϣⲁⲡϩⲟⲟⲩ ⲉⲕⲙⲓϣⲉ ⲉⲣⲟⲕ ⲙⲁⲩⲁⲁⲕ ⲉⲕⲧⲟⲩϫⲟ ⲙⲙⲟⲕ ⲧⲉⲛⲟⲩ ϩⲱⲱϥ ⲕⲧⲟⲕ ⲛⲅⲧⲁϫⲣⲉ ⲛⲉⲕⲥⲛⲏⲩ ⲛⲅⲙⲓϣⲉ ⲉϫⲱⲟⲩ ⲛⲙⲙⲁⲕ
…
32 ⲁϥⲟⲩⲱϣⲃ ⲛϭⲓⲁⲡⲁ ⲁⲫⲟⲩ ϫⲉⲁⲛⲅ ⲛⲓⲙ ⲁⲛⲟⲕ ⲡϫⲟⲉⲓⲥ ⲡⲁϫⲟⲉⲓⲥ ϫⲉⲉⲕⲉϫⲉⲛⲉⲓϣⲁϫⲉ ⲛⲁⲓ ⲛⲧⲉⲓϩⲉ ⲁⲛⲟⲕ ⲅⲁⲣ ⲁⲛⲅⲟⲩⲣⲱⲙⲉ ⲛⲁⲥⲑⲉⲛⲏⲥ ⲁⲩⲱ ⲉⲧⲃⲉⲧⲁⲙⲛⲧϭⲱⲃ ⲛⲧⲁⲓⲡⲱⲧ ⲉⲃⲟⲗ ⲛⲥⲩⲛⲧⲉⲭⲓⲁ ⲛⲛⲣⲱⲙⲉ ϫⲉⲛⲛⲉⲓⲃⲱⲕ ϩⲙⲡⲧⲱϩ ⲛⲛϩⲟⲉⲓⲙ ⲙⲙⲡⲓⲃⲓⲟⲥ ⲧⲉⲛⲟⲩ ϯⲧⲁⲣⲕⲟ ⲙⲙⲟⲕ ⲙⲡϫⲟⲉⲓⲥ ⲉⲧⲙⲧⲣⲉⲕϫⲓⲧ ⲛϭⲟⲛⲥ ⲡⲉⲓϩⲱⲃ ⲅⲁⲣ ⲟ ⲛⲁⲓ ⲛⲁⲧϭⲟⲙ
…
33 ⲡⲁⲣⲭⲓⲉⲡⲓⲥⲕⲟⲡⲟⲥ ⲇⲉ ⲁϥⲗⲩⲡⲉⲓ ⲉⲙⲁⲧⲉ ⲉⲧⲃⲉⲡⲁⲛⲁϣ ⲙⲡϫⲟⲉⲓⲥ
…
34 ⲁⲩⲱ ⲡⲉϫⲁϥ ⲛⲁϥ ϫⲉϥⲟⲛϩ ⲛϭⲓⲡϫⲟⲉⲓⲥ ϫⲉⲉⲕⲧⲙⲃⲟⲗⲧ ⲉⲃⲟⲗ ⲙⲡⲁⲛⲁϣ ⲛⲧⲁⲕⲙⲟⲣⲧ ⲛϩⲏⲧϥ ϯⲉⲓⲣⲉ ⲙⲙⲟⲕ ⲛϣⲙϣⲟ ⲉⲡⲧⲱϩⲙ ⲧⲏⲣϥ ⲛⲛⲉⲭⲣⲓⲥⲧⲓⲁ ⲛϫⲟⲉⲓⲥ ϩⲙⲡⲓⲁⲓⲱⲛ ⲙⲛⲡⲉⲧⲛⲏⲩ
…
35 ⲛⲧⲉⲩⲛⲟⲩ ⲇⲉ ⲁϥⲡⲁϩⲧϥ ⲛϭⲓⲁⲡⲁ ⲁⲫⲟⲩ ⲉϥϫⲱ ⲙⲙⲟⲥ ϫⲉⲁⲓϭⲱⲧⲡ ⲡⲁⲓ ⲅⲁⲣ ⲟⲩϣⲗⲟϥ ⲛⲁⲓ ⲡⲉ ⲁⲩⲱ ⲟⲩⲑⲗⲓⲯⲓⲥ ⲧⲉ ϣⲁⲉⲛⲉϩ
…
36 ⲉⲓⲥϩⲏⲏⲧⲉ ϯϩⲁϩⲧⲏⲕ ⲉϣϫⲉ ϯⲛⲁϣⲣⲡϩⲱⲃ ⲁⲣⲓⲣⲉ ⲛⲁⲓ ⲛⲧϩⲉ ⲉⲧⲣⲁⲛⲁⲕ
…
37 ⲛⲧⲉⲩⲛⲟⲩ ⲇⲉ ⲁϥⲡⲁϩⲧϥ ϫⲉⲕⲱ ⲛⲁⲓ ⲉⲃⲟⲗ ⲡⲁϫⲟⲉⲓⲥ ⲛⲉⲓⲱⲧ
…
38 ⲁⲩⲱ ⲁϥⲛⲟϭⲛⲉϥ ⲁϥϫⲟⲟⲩϥ ⲉⲧⲉϥⲡⲟⲗⲓⲥ ⲛⲧⲉⲣⲉϥⲁⲣⲭⲉⲓ ⲇⲉ ⲉⲧⲙⲛⲧⲉⲡⲓⲥⲕⲟⲡⲟⲥ ⲁϥⲁⲣⲭⲉⲓ ⲟⲛ ⲉⲕⲉⲡⲣⲁⲕⲧⲓⲕⲟⲛ ⲛⲧⲓⲙⲓⲛⲉ
…
39 ⲧⲙⲛⲧⲉⲡⲓⲥⲕⲟⲡⲟⲥ ⲅⲁⲣ ⲧⲏⲣⲥ ⲛⲧⲁϥⲁⲁⲥ ⲙⲡϥⲣⲟⲩⲟⲩϣⲏ ⲛⲟⲩⲱⲧ ⲛⲛⲕⲟⲧⲕ ϩⲛⲧⲡⲟⲗⲓⲥ ⲟⲩⲇⲉ ⲙⲡϥⲟⲩⲉⲙⲟⲩⲟⲉⲓⲕ ⲛⲟⲩⲱⲧ ⲛϩⲏⲧⲥ ⲉⲡⲧⲏⲣϥ ⲛⲟⲩϩⲟⲟⲩ ⲛⲟⲩⲱⲧ
…
40 ⲁⲗⲗⲁ ⲛⲉϥϭⲉⲉⲧ ⲙⲁⲩⲁⲁϥ ⲡⲉ ϩⲛⲟⲩⲙⲟⲛⲁⲥⲧⲏⲣⲓⲟⲛ ⲙⲡⲃⲟⲗ ⲛⲧⲡⲟⲗⲓⲥ ⲡⲥⲁⲃⲃⲁⲧⲟⲛ ⲇⲉ ⲛⲉϣⲁϥⲉⲓ ⲉⲧⲉⲕⲕⲗⲏⲥⲓⲁ ⲁⲩⲱ ⲛϥⲥⲉⲩϩⲡⲗⲁⲟⲥ ⲛϥϣⲁϫⲉ ⲛⲙⲙⲁⲩ ϩⲙⲡϣⲁϫⲉ ⲙⲡⲛⲟⲩⲧⲉ ϣⲁⲡⲣⲟⲩϩⲉ ⲁⲩⲱ ⲛⲉϣⲁⲩⲣⲧⲉⲩϣⲏ ⲙⲡⲥⲁⲃⲃⲁⲧⲟⲛ ⲉⲩⲉⲓⲣⲉ ⲛⲛⲉⲩⲥⲩⲛⲁⲝⲓⲥ ⲙⲛⲛⲉⲩϣⲗⲏⲗ ⲙⲛⲛⲉⲩⲯⲁⲗⲙⲟⲥ ⲉϥⲁϩⲉⲣⲁⲧϥ ϩⲓϫⲱⲟⲩ ϩⲛⲛⲗⲓⲧⲟⲩⲣⲅⲓⲁ ⲉⲧⲟⲩⲁⲁⲃ
…
41 ⲁⲩⲱ ⲟⲛ ⲛϣⲁϥⲕⲁⲑⲏⲕⲉⲓ ⲙⲙⲟⲟⲩ ⲡⲉ ϣⲁϫⲡⲥⲟ ⲛⲧⲕⲩⲣⲓⲁⲕⲏ ⲛϥⲁⲛⲁⲭⲟⲣⲉⲓ ⲟⲛ ⲉⲡⲉϥⲙⲟⲛⲁⲥⲧⲏⲣⲓⲟⲛ ϣⲁⲡⲥⲁⲃⲃⲁⲧⲟⲛ
…
42 ⲁϥⲕⲁⲑⲓⲥⲧⲁ ⲇⲉ ⲙⲡⲉⲡⲣⲉⲥⲃⲩⲧⲉⲣⲟⲥ ⲛⲧⲁⲩϫⲓⲧϥ ⲉⲁⲁϥ ⲛⲉⲡⲓⲥⲕⲟⲡⲟⲥ ⲉϩⲣⲁⲓ ⲉϫⲛⲧⲉⲕⲗⲟⲅⲓⲥⲧⲓⲁ ⲧⲏⲣⲥ ⲛⲧⲉⲕⲕⲗⲏⲥⲓⲁ
…
43 ⲁⲩⲱ ⲛⲉϣⲁϥϯ ⲛⲛⲱⲡ ⲛⲧⲉⲕⲕⲗⲏⲥⲓⲁ ⲛⲟⲩⲥⲟⲡ ⲧⲉⲣⲟⲙⲡⲉ ⲁⲩⲱ ⲡⲉϣⲁϥⲥⲉⲉⲡⲉ ⲧⲏⲣϥ ⲉⲡⲁⲛϩⲟⲗⲟⲙⲁ ⲛⲧⲉⲕⲕⲗⲏⲥⲓⲁ ⲛⲉϣⲁϥϫⲟⲟϥ ⲉⲃⲟⲗ ⲉⲛϩⲏⲕⲉ ⲛⲧⲡⲟⲗⲓⲥ ⲙⲛⲛⲉⲧϩⲏⲛ ⲉⲣⲟϥ ϩⲱⲥⲧⲉ ⲛⲥⲉⲣⲡⲱⲃϣ ⲙⲡϩⲓⲥⲉ ⲛⲧⲉⲩⲙⲛⲧϩⲏⲕⲉ ⲉⲧⲃⲏⲏⲧϥ
…
44 ⲕⲁⲓ ⲅⲁⲣ ⲛⲉⲣⲉⲛⲕⲉⲁⲣⲭⲱⲛ ϯ ⲛⲧⲟⲟⲧϥ ⲡⲉ ⲙⲡⲃⲟⲗ ⲛⲛⲕⲁ ⲛⲧⲉⲕⲕⲗⲏⲥⲓⲁ
…
45 ⲁⲩⲱ ⲛⲉⲩϯ ⲛⲁϥ ⲛϩⲉⲛⲉⲣⲏⲧ ⲙⲛϩⲉⲛⲇⲱⲣⲟⲛ
…
46 ⲁⲩⲱ ⲛⲉϥⲡⲱϣ ⲙⲙⲟⲟⲩ ⲡⲉ ⲉϫⲛⲟⲩⲟⲛ ⲛⲓⲙ ⲕⲁⲧⲁⲧϩⲉ ⲉⲧⲉⲣⲉⲡⲟⲩⲁⲡⲟⲩⲁ ⲣⲭⲣⲉⲓⲁ ⲙⲙⲟⲟⲩ
…
47 ⲡⲥⲁⲃⲃⲁⲧⲟⲛ ⲇⲉ ⲛⲉϣⲁϥⲁⲁϥ ⲡⲉ ϩⲛ… ⲛⲉⲧϣⲁⲁⲧ ⲇⲉ ⲙⲛⲛⲉⲧϫⲏⲩ ⲛϭⲟⲛⲥ ⲛⲉϣⲁϥⲣⲱϣⲉ ⲉⲛⲉⲩⲭⲣⲉⲓⲁ
…
48 ⲁⲩⲱ ⲛⲉϥⲙⲏⲛ ⲉⲃⲟⲗ ⲡⲉ ⲉϥⲧⲱⲟⲩⲛ ϩⲁⲧⲉⲩⲙⲛⲧϩⲣⲟⲩⲱ ϣⲁϫⲡⲯⲓⲧⲉ ϫⲓⲛⲛϫⲡⲯⲓⲧⲉ ⲉϩⲣⲁⲓ ϣⲁϥⲥⲣϥⲉ ⲉⲡⲉϣⲗⲏⲗ ⲉⲧⲟⲩⲁⲁⲃ ϣⲁⲡⲛⲁⲩ ⲛⲣⲟⲩϩⲉ ⲛϥⲥⲩⲛⲁⲅⲉ ⲙⲙⲟⲟⲩ ⲛϥⲉⲓ ⲉⲃⲟⲗ …ⲟⲛ ⲛϥϩⲩⲡⲟⲙⲓⲛⲉ ⲉⲡⲟⲩϣⲏⲛⲣⲟⲉⲓⲥ ϣⲁⲡⲛⲁⲩ ⲛϣⲱⲣⲡ ⲛⲉⲙⲉⲣⲉ ⲗⲁⲁⲩ ⲇⲉ ⲛⲥϩⲓⲙⲉ ⲧⲟⲗⲙⲁ ⲉϩⲱⲛ ⲉϩⲟⲩⲛ ⲉⲣⲟϥ ⲉϫⲓ ⲉⲣⲉⲗⲁⲁⲩ ⲛⲛⲟⲩⲃ ⲙⲙⲟⲥ
…
49 ⲧⲁⲓ ⲧⲉ ⲧϩⲉ ⲛⲧⲁϥⲡⲁⲣⲁⲅⲅⲉⲓⲗⲉ ⲉⲧⲙⲧⲣⲉⲗⲁⲁⲩ ⲛⲥϩⲓⲙⲉ ϩⲱⲛ ⲉϩⲟⲩⲛ ⲉⲣⲟϥ ⲉϫⲓ ⲉⲃⲟⲗ ϩⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡⲉⲭⲣⲓⲥⲧⲟⲥ ⲉⲣⲉⲗⲁⲁⲩ ⲛⲛⲟⲩⲃ ⲙⲙⲟⲥ ⲉϥⲟⲩⲟⲛϩ ⲉⲃⲟⲗ ⲏ ⲗⲁⲁⲩ ⲛϩⲟⲉⲓⲧⲉ ⲉϥⲟ ⲛⲁⲩⲁⲛ ⲉⲃⲟⲗϫⲉ ⲛⲉⲣⲉⲛⲇⲓⲁⲕⲱⲛ ⲡⲉ ⲣϩⲟⲧⲉ ϩⲏⲧϥ
…
50 ⲁⲩⲱ ⲛⲉⲩⲁϩⲉⲣⲁⲧⲟⲩ ⲕⲁⲧⲁⲟⲣⲇⲓⲛⲟⲛ ⲕⲁⲧⲁⲣⲟ ⲉⲙⲉⲩⲕⲁ ⲗⲁⲁⲩ ⲉⲃⲱⲕ ⲉϩⲟⲩⲛ ⲉⲓⲙⲏⲧⲓ ⲉⲛⲉⲧⲉⲣⲉⲧⲙⲛⲧⲥⲉⲙⲛⲟⲥ ⲧⲟ ϩⲓⲱⲟⲩ
…
51 ⲉⲧⲉⲡⲁⲓ ⲡⲉ ϩⲱⲃⲥ ⲙⲡⲉⲩϩⲟ ⲙⲛⲛⲉⲩϭⲓϫ ⲁⲩⲱ ⲛⲕⲉϩⲟⲓⲧⲉ ⲉⲧⲧⲟ ϩⲓⲱⲟⲩ ⲛⲉ ϩⲉⲛⲉⲃⲟⲗ ⲁⲛ ⲛⲉ ϩⲛⲟⲩϫⲱϭⲉ ⲛⲣⲉϥϫⲉϭⲥⲟⲣⲧ
…
52 ⲁⲩⲱ ⲟⲛ ⲉⲣⲉⲡⲉⲩⲭⲣⲱⲙⲁ ⲡⲣⲉⲓⲱⲟⲩ ⲉⲩⲟ ⲛⲗⲁⲙⲡⲣⲟⲛ
…
53 ⲛⲇⲓⲁⲕⲟⲛⲟⲥ ⲟⲛ ϩⲟⲙⲟⲓⲱⲥ ⲛⲉⲁⲩⲟⲩⲁϩⲟⲩ ⲡⲉ ⲛⲥⲁⲧⲉϥⲧϩⲉ ⲉⲙⲛⲗⲁⲁⲩ ⲛϩⲏⲧⲟⲩ ⲣϩⲱⲃ ⲛⲁⲇⲓⲕⲟⲛ ⲟⲩⲇⲉ ⲟⲛ ⲙⲉⲩϫⲓ ⲙⲏⲥⲉ ⲛⲁⲓ ⲇⲉ ⲙⲁⲩⲁⲁϥ ⲁⲛ ⲁⲗⲗⲁ ⲟⲩⲙⲏⲏϣⲉ ⲟⲛ ⲁⲩⲕⲁⲧⲟⲟⲧⲟⲩ ⲉⲃⲟⲗ ⲛⲧⲙⲛⲧⲣⲉϥϫⲓⲙⲏⲥⲉ ⲉⲩⲕⲱϩ ⲁⲩⲱ ⲉⲩⲉⲓⲣⲉ ⲛⲧⲡⲟⲗⲓⲧⲓⲁ ⲙⲡⲱⲛϩ
…
54 ⲛⲉϩⲓⲟⲙⲉ ⲟⲛ ⲛⲉⲁⲩⲕⲱϩ ⲡⲉ ⲉⲧⲙⲛⲧϩⲁⲕ ⲉⲙⲛⲗⲁⲁⲩ ⲛϩⲏⲧⲟⲩ ϯⲛⲟⲩϭⲥ ⲙⲡϣⲙϣⲉ ⲛⲙⲙⲁ ⲉⲧⲟⲩⲁⲁⲃ
…
55 ϩⲱⲥⲧⲉ ⲛⲥⲉϫⲟⲟⲥ ⲉⲧⲡⲟⲗⲓⲥ ⲧⲏⲣⲥ ϩⲛⲛⲉϩⲟⲟⲩ ⲉⲧⲙⲙⲁⲩ ϫⲉⲛⲁⲓ ⲛⲁⲙⲉ ⲛⲉ ⲡⲗⲁⲟⲥ ⲙⲡϫⲟⲉⲓⲥ
…
56 ⲕⲁⲓ ⲅⲁⲣ ⲛⲉϣⲁϥϫⲟⲟⲥ ⲉⲣⲟⲟⲩ ⲡⲉ ⲛϩⲁϩ ⲛⲥⲟⲡ ⲛⲧⲕⲁⲧⲏⲭⲉⲥⲓⲥ ⲉϥϫⲱ ⲙⲙⲟⲥ ϫⲉⲙⲉⲣⲉⲡⲁϩⲏⲧ ⲙⲕⲁϩ ϩⲁⲛⲉⲛⲧⲁⲩ ϫⲓⲧⲟⲩ ⲛϭⲟⲛⲥ ⲛⲧϩⲉ ⲛⲛⲉⲧϫⲓ ⲛϭⲟⲛⲥ
…
57 ⲛⲉⲛⲧⲁⲩϫⲓⲧⲟⲩ ⲅⲁⲣ ⲛϭⲟⲛⲥ ⲉⲩⲟⲩⲱϣⲥ ⲛⲁⲩ ⲉⲃⲟⲗ ⲛⲧⲙⲛⲧⲣⲣⲟ ⲛⲙⲡⲏⲩⲉ
…
58 ⲛⲣⲉϥϫⲓⲛϭⲟⲛⲥ ⲇⲉ ⲉⲩϥⲱϭⲉ ⲙⲙⲟⲟⲩ ⲙⲁⲩⲁⲁⲩ ⲙⲙⲟⲥ ⲁⲩⲱ ⲉⲩⲟⲩⲱϣⲥ ⲛⲁⲩ ⲉⲃⲟⲗ ⲙⲡⲧⲁⲕⲟ
…
59 ϣⲁⲥϣⲱⲡⲉ ⲇⲉ ⲟⲛ ⲛϩⲁϩ ⲛⲥⲟⲡ ⲛϥⲱⲛϣ ⲉⲃⲟⲗ ⲁⲩⲱ ⲛⲉϣⲁⲩϫⲱ ⲉⲣⲟϥ ⲡⲉ ⲛⲛⲉⲧϣⲟⲟⲡ ϩⲛⲧⲡⲟⲗⲓⲥ
…
60 ⲁⲩⲱ ⲛⲉϣⲁϥⲧⲁⲙⲉⲡⲗⲁⲟⲥ ⲡⲉ ⲉⲧⲣⲉⲩⲙⲉⲧⲁⲛⲟⲉⲓ ⲁⲩⲱ ⲛϥⲕⲱⲗⲩⲉ ⲛⲧⲟⲣⲅⲏ ⲉⲧⲙⲧⲁϩⲟⲟⲩ
…
61 ⲕⲁⲛ ⲉⲣϣⲁⲛⲡⲉⲧⲯⲁⲗⲗⲉⲓ ϣⲱϥⲧⲛⲟⲩⲗⲉⲝⲓⲥ ⲏ ⲛϥⲡⲟⲟⲛⲉⲥ ⲛⲉϣⲁϥⲕⲱⲗⲩⲉ ⲡⲉ ⲉⲧⲙϯ ⲛⲗⲁⲁⲩ ϣⲁⲛⲧϥϫⲟⲟⲩ ⲉⲃⲟⲗ ⲛϥⲇⲓⲟⲣⲑⲟⲩ ⲙⲡⲉⲯⲁⲗⲙⲟⲥ
…
62 ⲁⲩⲱ ⲛⲉϣⲁϥϫⲟⲟⲥ ⲉϥⲣⲓⲙⲉ ⲉϥϫⲱ ⲙⲙⲟⲥ ϫⲉⲛⲉⲓϣⲁϫⲉ ⲛⲁⲟⲩⲣⲱⲙⲉ ⲛⲣⲣⲟ ⲛⲉ ⲁϥϫⲟⲟⲩ ϩⲛϩⲉⲛⲛⲏⲥⲧⲉⲓⲁ ⲙⲛⲟⲩϭⲟⲟⲩⲛⲉ
…
63 ⲁⲛⲟⲛ ⲇⲉ ϩⲛⲟⲩⲙⲛⲧⲁⲧⲃⲟⲧⲉ ⲛⲧⲛϯⲛϩⲧⲏⲛ ⲁⲛ ⲉⲣⲟⲟⲩ
…
64 ⲁⲩⲱ ⲁⲥϣⲱⲡⲉ ⲛⲧⲉⲣⲉϥϫⲱⲕ ⲉⲃⲟⲗ ⲙⲡⲉϥⲃⲓⲟⲥ ⲁⲛⲉⲥⲛⲏⲩ ϯ ⲙⲡⲉⲩⲟⲩⲟⲓ ⲉⲣⲟϥ ⲉϥⲛⲁⲙⲟⲩ ϩⲱⲥ ⲉⲩⲑⲁⲣⲣⲉⲓ ⲛⲧⲕⲁⲧⲟⲣⲑⲱⲉⲓ ⲙⲡⲉϥⲗⲁⲟⲥ ⲙⲛⲧⲙⲛⲧⲕⲁⲑⲁⲣⲟⲥ ⲛⲧⲉϥⲉⲡⲓⲥⲕⲟⲡⲏ ⲛⲧⲁⲩⲣⲙⲛⲧⲣⲉ ⲙⲙⲟⲥ ⲁⲩⲱ ⲡⲉϫⲁⲩ ⲛⲁϥ ϫⲉⲡⲉⲛⲉⲓⲱⲧ ⲧⲁⲩⲉⲟⲩϣⲁϫⲉ ⲉⲣⲟⲛ ⲙⲡⲁⲧⲕⲃⲱⲕ ⲉⲃⲟⲗ ϩⲓⲧⲟⲟⲧⲛ
…
65 ⲛⲧⲟϥ ⲇⲉ ⲁϥϣⲁϫⲉ ⲛⲙⲙⲁⲩ ⲉϥϫⲱ ⲙⲙⲟⲥ ϫⲉⲁⲛⲟⲕ ⲟⲩϩⲱⲃ ⲛⲟⲩⲱⲧ ⲡⲉⲧⲓϩⲱⲛ ⲙⲙⲟϥ ⲉⲧⲟⲧⲧⲏⲩⲧⲛ ⲉⲧⲙⲧⲣⲉⲗⲁⲁⲩ ⲙⲙⲱⲧⲛ ⲉⲡⲓⲑⲩⲙⲉⲓ ⲉⲗⲁⲁⲩ ⲙⲙⲛⲧⲛⲟϭ
…
66 ⲕⲁⲓⲅⲁⲣ ⲁⲛⲟⲕ ⲙⲛⲛⲥⲁⲧⲉ ⲛⲧⲁⲓⲡⲱⲧ ⲙⲙⲟⲥ ⲙⲟⲅⲓⲥ ⲉⲁⲓⲉϣϭⲙϭⲟⲙ ⲉϩⲁⲣⲉϩ ⲉⲛⲉⲛⲧⲁⲓϫⲡⲟⲟⲩ ϩⲛⲧⲙⲛⲧⲙⲟⲛⲁⲭⲟⲥ
…
67 ⲧⲙⲛⲧⲉⲡⲓⲥⲕⲟⲡⲟⲥ ⲇⲉ ⲛϯⲙⲉⲉⲩⲉ ⲁⲛ ϫⲉⲁⲓϯϩⲏⲩ ⲙⲙⲟⲥ ϩⲛⲗⲁⲁⲩ ⲛϩⲱⲃ ⲁⲩⲱ ⲟⲛ ⲙⲟⲅⲓⲥ ⲁⲓϭⲙϭⲟⲙ ⲉϩⲁⲣⲉϩ ⲉⲣⲟⲓ ⲉⲧϩⲉ ⲉϯⲟ ⲙⲙⲟⲥ ⲛϣⲟⲣⲡ
…
68 ⲁⲩⲱ ⲛⲧⲟϥ ⲉϥϣⲁⲛⲛⲟⲩⲉ ⲉⲡⲱϣⲛ ⲛⲟⲩⲇⲓⲁⲕⲟⲛⲟⲥ ⲙⲉϥⲭⲉⲓⲣⲟⲇⲟⲛⲉⲓ ⲙⲙⲟϥ ⲛϣⲟⲣⲡ ⲉⲓⲙⲏⲧⲓ ⲛϥⲁⲡⲟⲥⲧⲏⲑⲓⲍⲉ ⲛϫⲟⲩⲧⲏ ⲙⲯⲁⲗⲙⲟⲥ ⲁⲩⲱ ⲉⲡⲓⲥⲧⲟⲗⲏ ⲥⲛⲧⲉ ⲛⲁⲡⲟⲥⲧⲟⲗⲟⲥ ⲁⲩⲱ ⲟⲩⲙⲉⲣⲟⲥ ⲛⲉⲩⲁⲅⲅⲉⲗⲓⲟⲛ
…
69 ⲉϣⲱⲡⲉ ⲇⲉ ⲟⲩⲡⲣⲉⲥⲃⲩⲧⲉⲣⲟⲥ ⲡⲉ ⲟⲩⲙⲉⲣⲟⲥ ϩⲙⲡⲇⲉⲩⲧⲉⲣⲟⲛⲟⲙⲓⲟⲛ ⲙⲛⲟⲩⲙⲉⲣⲟⲥ ϩⲛⲙⲡⲁⲣϩⲟⲓⲙⲓⲁ ⲁⲩⲱ ⲕⲉⲙⲉⲣⲟⲥ ϩⲛⲏⲥⲁⲓⲁⲥ
…
70 ⲁⲩⲱ ⲉⲧⲃⲉⲡⲛⲟⲙⲟⲥ ⲛⲧⲁϥⲁⲙⲁϩⲧⲉ ⲛϩⲏⲧϥ ⲛⲉ ⲙⲛϩⲁϩ ⲛⲣⲱⲙⲉ ⲡⲉ ϯ ⲙⲡⲉϥⲟⲩⲟⲓ ⲉϩⲟⲩⲛ ⲉϩⲱⲃ ⲛⲧⲉⲓⲙⲓⲛⲉ ⲉⲓⲙⲏⲧⲓ ⲛⲥⲉⲥⲃⲧⲱⲧⲟⲩ ⲛϣⲟⲣⲡ ϩⲛⲱⲣϫ ⲛⲓⲙ ⲟⲩⲇⲉ ⲟⲛ ⲙⲡⲉϩⲱⲃ ϣⲱⲡⲉ ⲉⲡⲧⲏⲣϥ ⲛⲧⲉⲗⲁⲁⲩ ϫⲓϩⲟⲙⲛⲧ ⲉⲧⲃⲉϩⲱⲃ ⲛⲭⲓⲣⲟⲇⲟⲛⲓⲁ ϩⲛⲛⲉϥϩⲟⲟⲩ
…
71 ⲁⲗⲗⲁ ϩⲟⲧⲁⲛ ⲉⲩϣⲁⲛⲥⲉⲧⲡⲟⲩⲁ ⲉⲃⲟⲗ ϩⲙⲡⲗⲁⲟⲥ ⲉⲡⲙⲁ ⲉⲧⲟⲩⲣⲭⲣⲉⲓⲁ ⲙⲙⲟϥ ⲉⲙⲁⲩⲛⲉϣⲁϥⲧⲣⲉⲩϩⲙⲟⲟⲥ ⲛϣⲟⲣⲡ ϩⲛⲟⲩϩⲩⲡⲟⲙⲟⲛⲏ ⲛⲥⲉⲟⲩⲱⲛϩ ⲉⲃⲟⲗ ϫⲉⲥⲉⲙⲉ ⲙⲡϣⲁϫⲉ ⲙⲡⲛⲟⲩⲧⲉ ϫⲉⲕⲁⲥ ϩⲱⲟⲩ ⲟⲛ ⲉⲩⲛⲁⲕⲱⲧ ⲙⲡⲗⲁⲟⲥ ϩⲛⲧⲉⲓϩⲩⲡⲟⲙⲟⲛⲏ ⲛⲧⲉⲓⲙⲓⲛⲉ ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁϥϫⲱⲕ ⲉⲃⲟⲗ ⲙⲡⲉϥⲃⲓⲟⲥ ⲕⲁⲗⲱⲥ ⲉⲁϥⲃⲱⲕ ⲉⲣⲁⲧϥ ⲙⲡⲛⲟⲩⲧⲉ ϩⲛⲟⲩⲉⲓⲣⲏⲛⲏ ϩⲛⲥⲟⲩϫⲟⲩⲧⲟⲩⲉ ⲛⲧϩⲟⲟⲩⲧ ϩⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ ⲡⲁⲓ ⲉⲃⲟⲗ ϩⲓⲧⲟⲟⲧϥ ⲡⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ ⲛⲙⲙⲁϥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϣⲁⲉⲛⲉϩ ⲛⲉⲛⲉϩ ϩⲁⲙⲏⲛ
…