1 ⲡⲃⲓⲟⲥ ⲛⲁⲡⲁⲁⲫⲟⲩ ⲡⲁⲛⲁⲭⲱⲣⲏⲧⲏⲥ ⲁⲩⲱ ⲡⲉⲡⲓⲥⲕⲟⲡⲟⲥ ⲙⲡⲙϫⲏ ⲛⲥⲟⲩϫⲟⲩⲧⲟⲩⲉ ⲛⲧϩⲟⲟⲩⲧ
…
2 ⲙⲛⲛⲥⲁⲛⲁⲓ ⲟⲩⲁⲛⲁⲅⲕⲁⲓⲟⲛ ⲡⲉ ⲉⲧⲣⲉⲛⲣⲡⲙⲉⲉⲩⲉ ⲙⲡⲉⲡⲓⲥⲕⲟⲡⲟⲥ ⲉⲧⲟⲩⲁⲁⲃ
…
3 ⲡⲁⲓ ⲉⲣⲉⲡⲉϥⲣⲁⲛ ⲙⲉⲛ ϩⲛⲛⲣⲱⲙⲉ ⲡⲉ ⲁⲫⲟⲩ
…
4 ⲉⲩⲙⲟⲩⲧⲉ ⲟⲛ ⲉⲣⲟϥ ϩⲛⲛⲣⲱⲙⲉ ϫⲉⲡⲉⲧϭⲙϭⲟⲙ ϣⲟⲣⲡ ⲙⲉⲛ ⲛⲉⲁϥϣⲱⲡⲉ ϩⲁⲧϩⲩⲡⲟⲧⲁⲅⲏ ⲛϩⲉⲛⲣⲱⲙⲉ ⲛⲥⲱⲧⲡ ⲁⲩⲱ ⲙⲡⲓⲥⲧⲟⲥ ⲛⲁⲓ ϩⲱⲟⲩ ⲟⲛ ⲛⲧⲁⲩⲧⲁϩⲉ ϩⲟⲓⲛⲉ ϩⲛⲙⲙⲁⲑⲏⲧⲏⲥ ⲛⲛⲁⲡⲟⲥⲧⲟⲗⲟⲥ ⲁϥⲁⲛⲁⲥⲧⲣⲉⲫⲉ ⲇⲉ ⲕⲁⲧⲁⲡⲉⲩⲃⲓⲟⲥ ⲛⲥⲉⲙⲛⲟⲛ
…
5 ⲙⲛⲛⲥⲁⲧⲣⲉⲩⲛⲕⲟⲧⲕ ⲇⲉ ⲁϥϣⲱϫⲡ ⲙⲁⲩⲁⲁϥ ⲉϥⲥⲟⲟⲩⲛ ⲙⲙⲁⲧⲉ ⲛⲟⲩⲥⲟⲛ ⲡⲁⲓ ϩⲱⲱϥ ⲟⲛ ⲛⲧⲁϥϫⲓⲥⲃⲱ ⲉⲧϭⲓⲛⲃⲱⲕ ⲉϩⲣⲁⲓ ⲉⲧⲡⲉ ⲛⲙⲙⲁϥ ⲉⲃⲟⲗ ϩⲓⲧⲟⲟⲧⲟⲩ
…
6 ⲁϥⲣⲁⲛⲁϥ ⲇⲉ ⲛⲁⲫⲟⲩ ⲉⲱⲛϩ ϩⲛⲟⲩⲃⲓⲟⲥ ⲛⲧⲉⲓⲙⲓⲛⲉ ⲁϥⲕⲁⲁϥ ⲕⲁϩⲏⲩ ⲛⲛⲉϥϩⲟⲓⲧⲉ ⲁϥⲙⲟⲣϥ ⲛⲟⲩϣⲁⲁⲣ ⲉϫⲛⲧⲉϥϯⲡⲉ ⲁϥϭⲱ ⲉϥϣⲟⲟⲡ ⲙⲛⲛϣⲟϣ ϩⲛⲧⲉⲣⲏⲙⲟⲥ ⲉⲣⲉⲡⲉϩⲟⲟⲩ ⲙⲛⲧⲉⲩϣⲏ ϣⲟⲟⲡ ⲛⲁϥ ⲛⲥⲩⲛⲁⲝⲓⲥ
…
7 ⲧⲉϥⲧⲣⲟⲫⲏ ⲇⲉ ⲛⲉⲥϣⲟⲟⲡ ⲛⲁϥ ⲡⲣⲟⲥⲧϭⲓⲛⲱⲛϩ ⲛⲛⲉⲧⲙⲙⲁⲩ
…
8 ⲁⲩⲱ ⲛⲉϥⲧⲟⲛⲧⲛ ⲙⲙⲟϥ ⲉⲣⲟⲟⲩ ⲛϭⲓⲡⲉⲧⲫⲟⲣⲉⲓ ⲙⲡⲥⲱⲙⲁ ⲛⲧⲙⲛⲧϭⲱⲃ ⲛⲛⲣⲱⲙⲉ ϫⲓⲛⲧⲁⲩⲥⲟⲧϥ ⲅⲁⲣ ⲛϭⲓⲛⲁⲗⲁϭ ⲛⲧⲙⲛⲧϣⲏⲣⲉ ϣⲏⲙ ⲛⲧⲁϥⲁⲣⲭⲉⲓ ⲉⲡⲉⲓⲃⲓⲟⲥ ⲛⲧⲉⲓⲙⲓⲛⲉ
…
9 ⲛⲉϣⲁϥⲁⲡⲁⲛⲧⲁ ⲇⲉ ⲙⲡⲥⲟⲛ ⲛⲧⲁⲛϣⲣⲡϣⲁϫⲉ ⲉⲣⲟϥ ⲛⲟⲩⲁ ⲧⲉⲣⲟⲙⲡⲉ ⲛϥⲧⲁⲙⲟϥ ⲉⲡⲉϩⲟⲟⲩ ⲙⲡⲧⲁϣⲉⲟⲉⲓϣ ⲉⲧⲟⲩⲁⲁⲃ
…
10 ⲁⲩⲱ ⲛⲉϣⲁϥⲉⲓ ⲉⲃⲟⲗ ⲉⲣⲉⲟⲩϣⲧⲏⲛ ⲙⲡⲁⲅⲁⲛⲟⲥ ⲧⲟ ϩⲓⲱⲱϥ ⲛϥⲥⲱⲧⲙ ⲉⲡⲧⲁϣⲉⲟⲉⲓϣ ⲙⲡⲡⲁⲥⲭⲁ ϩⲛⲧⲉⲕⲕⲗⲏⲥⲓⲁ ⲙⲡⲙϫⲏ ⲁⲩⲱ ⲛⲉⲙⲉⲣⲉ ⲗⲁⲁⲩ ⲥⲟⲩⲱⲛϥ ⲡⲉ ϣⲁⲛⲧϥⲉⲓ ⲉϩⲣⲁⲓ ⲉⲡⲉϥⲙⲁ
…
11 ⲛⲉϥϣⲟⲟⲡ ⲇⲉ ⲡⲉ ⲛⲧⲉⲓϩⲉ ϣⲁⲛⲧϥⲁⲣⲭⲉⲓ ⲉⲧⲙⲛⲧϩⲗⲗⲟ
…
12 ⲁⲩⲱ ⲛⲉϥϭⲙϭⲟⲙ ⲡⲉ ⲡⲁⲣⲁ ⲛⲧⲃⲛⲟⲟⲩⲉ ⲉⲧϥⲙⲟⲟϣⲉ ⲛⲙⲙⲁⲩ ⲛⲁⲓ ⲙⲉⲛ ⲁⲩⲥⲟⲩⲱⲛϥ ⲛⲧϩⲉ ⲛⲟⲩϣⲃⲏⲣ ⲁⲩⲱ ⲟⲛ ⲛⲉⲩⲙⲉ ⲙⲙⲟϥ ⲛⲧϩⲉ ⲛⲟⲩϣⲱⲥ ⲉⲩϯⲙⲧⲟⲛ ⲛⲁϥ ⲉⲙⲁⲧⲉ ⲛⲧϩⲉ ⲛϩⲉⲛⲣⲱⲙⲉ ⲛⲗⲟⲅⲓⲕⲟⲥ ϩⲱⲥ ⲛⲧⲁⲩⲧⲟϣⲟⲩ ⲛⲁϥ ⲉⲃⲟⲗ ϩⲓⲧⲛⲧⲉⲡⲣⲟⲛⲟⲓⲁ ⲉⲧⲟⲩⲁⲁⲃ ⲉⲃⲟⲗ ϫⲉⲁⲩⲛⲁⲩ ⲉⲡⲙⲁⲉⲓⲛ ⲙⲡⲉⲩϫⲟⲉⲓⲥ ⲉϥⲧⲟ ϩⲓⲱⲱϥ
…
13 ϩⲛⲧⲉⲡⲣⲱ ⲙⲉⲛ ⲛⲉϣⲁⲩⲕⲧⲟ ⲡⲉ ⲉϩⲟⲩⲛ ⲉⲣⲟϥ ϩⲱⲥⲧⲉ ⲛⲉϥϩⲙⲟⲙ ϩⲛⲧⲉⲩⲙⲏⲧⲉ ⲛⲧϩⲉ ⲙⲡⲉⲧϣⲟⲟⲡ ϩⲛⲟⲩⲥⲕⲏⲡⲏ ⲉⲧⲃⲉⲧⲁϣⲏ ⲛⲛⲛⲓϥⲉ ⲉⲧⲧⲁϩⲟ ⲙⲙⲟϥ
…
14 ⲁⲩⲱ ⲡϣⲱⲙ ⲟⲛ ϩⲟⲙⲟⲓⲱⲥ ⲛⲉϣⲁⲩⲣϩⲁⲓⲃⲉⲥ ⲉⲣⲟϥ
…
15 ⲉϥϣⲁⲛϣⲱⲛⲉ ⲇⲉ ⲟⲛ ⲛⲟⲩϩⲟⲟⲩ ⲛϥⲧⲙⲉϣϭⲙϭⲟⲙ ⲉⲙⲟⲟϣⲉ ⲛⲥⲱⲟⲩ ⲉⲩⲛⲁⲃⲱⲕ ⲉⲟⲩⲱⲙ ⲛⲉϣⲁⲣⲉ ϩⲟⲓⲛⲉ ϣⲱϫⲡ ϩⲁϩⲧⲏϥ ⲉⲙⲉⲩⲕⲁⲁϥ ⲙⲁⲩⲁⲁϥ ⲛⲧⲉⲡⲕⲉⲥⲉⲉⲡⲉ ⲟⲛ ⲃⲱⲕ ⲛⲥⲉⲙⲟⲟⲛⲉ ⲁⲩⲱ ⲛⲥⲉⲉⲓⲛⲉ ⲛⲁϥ ϩⲛⲧⲉⲩⲧⲁⲡⲣⲟ ⲛⲛⲉⲧϥⲛⲁⲟⲩⲟⲙⲟⲩ ⲛⲁⲓ ⲇⲉ ⲛⲧⲁϥϩⲟⲙⲟⲗⲟⲅⲉⲓ ⲙⲙⲟⲟⲩ ϫⲓⲛⲧⲁϥⲣ ⲉⲡⲓⲥⲕⲟⲡⲟⲥ ⲉⲃⲟⲗϫⲉ ⲁⲟⲩⲙⲏⲏϣⲉ ϩⲛⲛⲉⲥⲛⲏⲩ ϩⲉⲧϩⲱⲧϥ ⲉⲧⲃⲉⲧⲉⲓⲁⲛⲁⲥⲧⲣⲟⲫⲏ ϫⲉⲉⲧⲃⲉ ⲁϣ ⲛⲁⲓⲧⲓⲁ ⲁⲕⲡⲟⲗⲓⲧⲉⲩⲉ ⲛⲧⲉⲓϩⲉ
…
16 ⲛⲧⲟϥ ⲇⲉ ⲁϥϫⲱ ⲉⲣⲟⲟⲩ ⲛⲛⲁⲓ ϫⲉⲁⲛⲟⲕ ⲙⲉⲛ ϯϣⲁⲁⲧ ⲉⲙⲁⲧⲉ
…
17 ⲡⲗⲏⲛ ⲁⲓⲥⲱⲧⲙⲉⲡⲙⲁⲕⲁⲣⲓⲟⲥ ⲇⲁⲩⲉⲓⲇ ⲉϥϫⲱ ⲙⲙⲟⲥ ⲛⲛⲁϩⲣⲙⲡⲛⲟⲩⲧⲉ ϫⲉⲁⲛⲟⲕ ⲇⲉ ⲁⲓⲣⲧϩⲉ ⲛⲛⲓⲧⲃⲛⲏ ⲛⲛⲁϩⲣⲁⲕ ⲁⲓⲥⲱⲧⲙ ⲟⲛ ⲉⲧⲃⲉⲏⲥⲁⲓⲁⲥ ϫⲉⲁϥⲙⲟⲟϣⲉ ⲉϥⲕⲏⲕⲁϩⲏⲩ ⲁⲩⲱ ⲧⲕⲉϭⲟⲟⲩⲛⲉ ⲉⲧⲙⲏⲣ ⲙⲙⲟϥ ⲉϫⲛⲧⲉϥϯⲡⲉ ⲁϥⲧⲣⲉϥⲃⲟⲗⲥ ⲉⲃⲟⲗ ⲡⲉⲛⲥⲱⲧⲏⲣ ⲇⲉ ⲟⲛ ⲡϫⲟⲉⲓⲥ ⲙⲡⲧⲏⲣϥ ⲁⲓⲟϣϥ ϩⲙⲡⲕⲁⲧⲁⲙⲁⲣⲕⲟⲥ ⲉϥϫⲱ ⲙⲙⲟⲥ ϫⲉⲛⲉϥϣⲟⲟⲡ ⲡⲉ ⲙⲛⲛⲉⲑⲏⲣⲓⲟⲛ
…
18 ⲉϣϫⲉ ⲁⲡⲛⲟⲩⲧⲉ ϭⲉ ⲙⲛⲛⲉϥⲡⲉⲧⲟⲩⲁⲁⲃ ⲃⲱⲕ ϩⲛⲛⲓϩⲓⲥⲉ ⲧⲏⲣⲟⲩ ⲉⲧⲃⲏⲏⲧ ⲡⲟⲥⲟⲙⲁⲗⲗⲟⲛ ⲁⲛⲟⲕ ⲡⲉⲓⲉⲃⲓⲏⲛ
…
19 ⲁⲥϣⲱⲡⲉ ⲇⲉ ⲉⲧⲓ ⲉϥϣⲟⲟⲡ ⲙⲛⲛⲉⲑⲏⲣⲓⲟⲛ ⲉⲧⲣⲉϥⲉⲓ ⲉⲃⲟⲗ ⲉⲡⲧⲁϣⲉⲟⲉⲓϣ ⲙⲡⲡⲁⲥⲭⲁ ⲉⲧⲟⲩⲁⲁⲃ
…
20 ⲁϥⲥⲱⲧⲙ ⲇⲉ ⲉⲩⲗⲉⲝⲓⲥ ⲛⲥⲥⲩⲙⲫⲱⲛⲉⲓ ⲁⲛ ⲙⲛⲡⲥⲟⲟⲩⲛ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϩⲱⲥⲧⲉ ⲛϥϣⲧⲟⲣⲧⲣ ⲉⲙⲁⲧⲉ ⲉϫⲙⲡϣⲁϫⲉ ⲕⲁⲓ ⲅⲁⲣ ⲟⲩⲟⲛ ⲛⲓⲙ ⲛⲧⲁⲩⲥⲟⲧⲙⲉϥ ⲁⲩⲗⲩⲡⲏ ⲁⲩⲱ ⲁⲩϣⲧⲟⲣⲧⲣ ϩⲱⲟⲩ ⲡⲗⲏⲛ ⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲙⲡⲙⲁⲕⲁⲣⲓⲟⲥ ⲁⲫⲟⲩ ⲉⲧⲙⲧⲣⲉϥⲁⲙⲉⲗⲉⲓ ⲉⲡϣⲁϫⲉ ⲉϥϫⲱ ⲙⲙⲟⲥ ⲛⲁϥ ϫⲉⲁⲩⲧⲟϣⲕ ⲉⲃⲟⲗ ϩⲓⲧⲙⲡϫⲟⲉⲓⲥ ⲉⲧⲣⲉⲕⲃⲱⲕ ϣⲁⲣⲁⲕⲟⲧⲉ ⲛⲅⲧⲁϩⲉⲡⲉⲓϣⲁϫⲉ ⲉⲣⲁⲧϥ ⲡϣⲁϫⲉ ⲇⲉ ⲉⲧⲙⲙⲁⲩ ⲛⲉ ⲟⲩⲧⲓⲙⲓⲛⲉ ⲡⲉ ϩⲱⲥ ϫⲉⲉϥϫⲓⲥⲉ ⲙⲡⲉⲟⲟⲩ ⲙⲡⲛⲟⲩⲧⲉ ϩⲙⲡϣⲁϫⲉ
…
21 ⲁϥⲣⲡⲙⲉⲉⲩⲉ ⲛⲧⲙⲛⲧϭⲱⲃ ⲛⲛⲣⲱⲙⲉ
…
22 ⲁⲩⲱ ⲡⲉϫⲁϥ ⲛϭⲓⲡⲉⲧϩⲩⲡⲟⲅⲟⲣⲉⲩⲉ ϫⲉⲛⲧⲁⲓ ⲁⲛ ⲧⲉ ⲧϩⲓⲕⲱⲛ ⲙⲡⲛⲟⲩⲧⲉ ⲧⲁⲓ ⲁⲛⲟⲛ ⲉⲧⲛⲫⲟⲣⲉⲓ ⲙⲙⲟⲥ ⲁⲛⲟⲛ ⲛⲣⲱⲙⲉ ⲛⲧⲉⲣⲉϥⲥⲱⲧⲙ ⲇⲉ ⲉⲛⲁⲓ ⲛϭⲓⲡⲙⲁⲕⲁⲣⲓⲟⲥ ⲁⲫⲟⲩ ⲁϥⲙⲟⲩϩ ⲉⲃⲟⲗ ϩⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲁⲩⲱ ⲁϥⲁⲡⲟⲇⲏⲙⲉⲓ ⲉⲧⲡⲟⲗⲓⲥ ⲣⲁⲕⲟⲧⲉ ⲉϥⲫⲟⲣⲉⲓ ⲛⲟⲩϣⲧⲏⲛ ⲙⲡⲗϭⲉ
…
23 ⲁϥⲁϩⲉ ⲇⲉ ⲉⲣⲁⲧϥ ⲛϭⲓⲡⲙⲁⲕⲁⲣⲓⲟⲥ ⲁⲡⲁ ⲁⲫⲟⲩ ϩⲓⲣⲙⲡⲣⲟ ⲙⲡⲉⲡⲓⲥⲕⲟⲡⲓⲟⲛ ⲛϣⲟⲙⲧ ⲛϩⲟⲟⲩ ⲁⲩⲱ ⲙⲡⲉⲗⲁⲁⲩ ϫⲓⲧϥ ⲛⲁϥ ⲉϩⲟⲩⲛ ⲉⲩⲛⲁⲩ ⲉⲡⲣⲱⲙⲉ ⲉϣϫⲉ ⲟⲩϩⲓⲇⲓⲱⲧⲏⲥ ⲡⲉ
…
24 ⲙⲛⲛⲥⲁⲛⲁⲓ ⲁϥϯϩⲧⲏϥ ⲉⲣⲟϥ ⲛϭⲓⲟⲩⲁ ⲛⲛⲉⲕⲗⲏⲣⲓⲕⲟⲥ ⲁϥⲛⲁⲩ ⲉⲧⲉϥϩⲩⲡⲟⲙⲟⲛⲏ ⲁϥⲁⲓⲥⲑⲁⲛⲉ ϫⲉⲟⲩⲣⲱⲙⲉ ⲛⲧⲉⲡⲛⲟⲩⲧⲉ ⲡⲉ
…
25 ⲁⲩⲱ ⲁϥⲃⲱⲕ ⲉϩⲟⲩⲛ ⲁϥⲧⲁⲙⲉ ⲡⲁⲣⲭⲓⲉⲡⲓⲥⲕⲟⲡⲟⲥ ϫⲉⲉⲓⲥ ⲟⲩⲣⲱⲙⲉ ⲛϩⲏⲕⲉ ϩⲓⲣⲙⲡⲣⲟ ⲉϥϫⲱ ⲙⲙⲟⲥ ϫⲉⲉⲓⲟⲩⲱϣ ⲉⲁⲡⲁⲛⲧⲁ ⲉⲣⲟⲕ
…
26 ⲁⲛⲟⲛ ⲇⲉ ⲙⲡⲉⲛⲉϣⲧⲟⲗⲙⲁ ⲉⲛⲧϥ ⲛⲁⲕ ⲉϩⲟⲩⲛ ⲉⲡⲉⲓⲇⲏ ⲙⲛϩⲃⲥⲱ ϩⲓⲱⲱϥ ⲉϥⲧⲁⲉⲓⲏⲩ ⲛⲧⲉⲩⲛⲟⲩ ⲇⲉ ⲉϣϫⲉ ⲛⲧⲁⲩⲕⲓⲙ ⲉⲣⲟϥ ϩⲓⲧⲙⲡⲛⲟⲩⲧⲉ ⲁϥⲟⲩⲉϩⲥⲁϩⲛⲉ ⲉⲧⲣⲉⲩϫⲓⲧϥ ⲛⲁϥ ⲉϩⲟⲩⲛ
…
27 ⲛⲧⲉⲣⲉϥⲁϩⲉ ⲇⲉ ⲉⲣⲁⲧϥ ⲙⲡⲉϥⲙⲧⲟ ⲉⲃⲟⲗ ⲁϥϫⲛⲟⲩϥ ⲉⲧⲁⲓⲧⲓⲁ
…
28 ⲁϥⲟⲩⲱϣⲃ ϫⲉⲙⲁⲣⲉⲡⲁϫⲟⲉⲓⲥ ⲡⲉⲡⲓⲥⲕⲟⲡⲟⲥ ⲥⲱⲧⲙ ⲉⲡϣⲁϫⲉ ⲙⲡⲉϥϩⲙϩⲁⲗ ϩⲛⲟⲩⲁⲅⲁⲡⲏ ⲙⲛⲟⲩⲁⲛⲟⲭⲏ ⲡⲉϫⲁϥ ⲛⲁϥ ϫⲉⲁϫⲓϥ
…
29 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲁⲡⲁ ⲁⲫⲟⲩ ϫⲉϯⲥⲟⲟⲩⲛ ⲛⲧⲙⲛⲧⲭⲣⲓⲥⲧⲟⲥ ⲛⲧⲉⲕⲯⲩⲭⲏ ϫⲉⲛⲧⲕⲟⲩⲣⲱⲙⲉ ⲛⲣⲉϥϫⲓϣⲟϫⲛⲉ ⲉⲧⲃⲉⲡⲁⲓ ⲁⲓϯⲡⲁⲟⲩⲟⲓ ⲉϩⲟⲩⲛ ⲉⲧⲉⲕⲙⲛⲧⲛⲟϭ ⲉⲓⲑⲁⲣⲣⲉⲓ ϫⲉⲛⲅⲛⲁϣⲉⲥⲡϣⲁϫⲉ ⲁⲛ ⲛⲧⲙⲛⲧⲉⲩⲥⲉⲃⲏⲥ
…
30 ⲕⲁⲛ ⲉⲁϥϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲛⲟⲩⲣⲱⲙⲉ ⲛϩⲏⲕⲉ ⲉⲧⲉⲁⲛⲟⲕ ⲡⲉ
…
31 ⲑⲉⲟⲫⲓⲗⲟⲥ ⲇⲉ ⲡⲁⲣⲭⲓⲉⲡⲓⲥⲕⲟⲡⲟⲥ ⲡⲉϫⲁϥ ⲛⲁϥ ϫⲉⲛⲓⲙ ⲛⲁⲧⲛⲟⲩⲧⲉ ⲡⲉⲧⲛⲁⲣ ⲁⲧϩⲏⲧ ⲛⲧⲉⲓϩⲉ ϩⲱⲥⲧⲉ ⲉⲧⲥⲧⲉ ⲟⲩϣⲁϫⲉ ⲉⲃⲟⲗ ⲛⲧⲉⲡⲛⲟⲩⲧⲉ ⲉⲧⲃⲉⲗⲁⲁⲩ ⲛϩⲱⲃ
…
32 ⲁϥⲟⲩⲱϣⲃ ⲛϭⲓⲁⲫⲟⲩ ϫⲉⲙⲁⲣⲉⲡⲁϫⲟⲉⲓⲥ ⲡⲉⲡⲓⲥⲕⲟⲡⲟⲥ ⲕⲉⲗⲉⲩⲉ ⲛⲥⲉⲱϣ ⲉⲣⲟⲓ ⲙⲡⲉⲓⲙⲁ ⲙⲡϩⲓⲥⲟⲛ ⲙⲡⲧⲁϣⲉⲟⲉⲓϣ ⲉⲡⲉⲓⲇⲏ ⲁⲓⲥⲱⲧⲙ ⲉⲩⲗⲉⲝⲓⲥ ⲛϩⲏⲧϥ ⲛⲥⲥⲩⲙⲫⲱⲛⲉⲓ ⲁⲛ ⲙⲛⲛⲉⲅⲣⲁⲫⲏ ⲛⲛⲓϥⲉ ⲛⲧⲉⲡⲛⲟⲩⲧⲉ ⲁⲛⲟⲕ ⲇⲉ ⲙⲡⲓⲡⲓⲥⲧⲉⲩⲉ ϫⲉⲛⲧⲁⲥⲉⲓ ⲉⲃⲟⲗ ϩⲓⲧⲟⲟⲧⲕ ⲁⲗⲗⲁ ⲛⲧⲁⲓϫⲟⲟⲥ ϫⲉⲙⲏⲡⲟⲧⲉ ⲛⲧⲁⲛⲥⲩⲛⲅⲣⲁⲫⲉⲩⲥ ϣⲱϥⲧ ⲉⲩⲥϩⲁⲓ ⲧⲁⲓ ⲛⲧⲁϩⲁϩ ϩⲛⲛⲉⲩⲥⲉⲃⲏⲥ ϫⲓϫⲣⲟⲡ ⲉⲧⲃⲏⲏⲧⲥ ϩⲱⲥⲧⲉ ⲛⲥⲉⲙⲕⲁϩ ⲛϩⲏⲧ ⲉⲙⲁⲧⲉ
…
33 ⲁϥⲕⲉⲗⲉⲩⲉ ⲛⲧⲉⲩⲛⲟⲩ ⲛϭⲓⲁⲡⲁ ⲑⲉⲟⲫⲓⲗⲟⲥ ⲡⲁⲣⲭⲓⲉⲡⲓⲥⲕⲟⲡⲟⲥ ⲁⲩⲉⲓⲛⲉ ⲙⲡϩⲓⲥⲟⲛ ⲙⲡⲧⲁϣⲉⲟⲉⲓϣ
…
34 ⲛⲧⲉⲣⲟⲩⲁⲣⲭⲉⲓ ⲇⲉ ⲛⲱϣ ⲁⲩⲡⲱϩ ⲉⲧⲗⲉⲝⲓⲥ ⲉⲧⲙⲙⲁⲩ ⲛⲧⲉⲩⲛⲟⲩ ⲁϥⲛⲁϩⲧϥ ⲛϭⲓⲁⲡⲁ ⲁⲫⲟⲩ ⲉϥϫⲱ ⲙⲙⲟⲥ ϫⲉϯⲗⲉⲝⲓⲥ ⲛⲧⲉⲓⲙⲓⲛⲉ ⲥⲙⲟⲛⲧ ⲁⲛ ⲁⲗⲗⲁ ⲁⲛⲟⲕ ϯⲛⲁϩⲟⲙⲟⲗⲟⲅⲉⲓ ϫⲉⲛⲧⲁⲩⲧⲁⲙⲓⲉ ⲛⲣⲱⲙⲉ ⲧⲏⲣⲟⲩ ϩⲛⲧϩⲓⲕⲱⲛ ⲙⲡⲛⲟⲩⲧⲉ
…
35 ⲁϥⲟⲩⲱϣⲃ ⲛϭⲓⲡⲁⲣⲭⲓⲉⲡⲓⲥⲕⲟⲡⲟⲥ ϫⲉⲡⲱⲥ ⲛⲧⲟⲕ ⲙⲁⲩⲁⲁⲕ ⲁⲕϣⲁϫⲉ ⲉⲧⲃⲉⲧⲉⲓⲗⲉⲝⲓⲥ ⲁⲩⲱ ⲙⲡⲉⲕⲉⲗⲁⲁⲩ ϣⲁϫⲉ ⲉϥϯ ⲛⲧⲟⲟⲧϥ ⲛⲙⲙⲁⲕ
…
36 ⲡⲉϫⲉⲁⲡⲁ ⲁⲫⲟⲩ ϫⲉⲁⲛⲟⲕ ⲇⲉ ϯⲑⲁⲣⲉⲓ ϫⲉⲕⲛⲁϯⲧⲟⲟⲧⲕ ⲛⲧⲟⲕ ⲛⲙⲙⲁⲓ ⲁⲩⲱ ⲛⲅⲛⲁϯ ⲁⲛ ⲉϩⲟⲩⲛ ⲉϩⲣⲁⲓ
…
37 ⲡⲉϫⲉⲡⲁⲣⲭⲓⲉⲡⲓⲥⲕⲟⲡⲟⲥ ϫⲉⲛⲁϣⲛϩⲉ ⲉⲕⲛⲁϣ ϫⲟⲟⲥ ⲉⲧⲃⲉⲟⲩⲉϭⲱϣ ϫⲉⲑⲓⲕⲱⲛ ⲧⲉ ⲙⲡⲛⲟⲩⲧⲉ
…
38 ⲏ ⲟⲩⲁ ⲉϥⲥⲟⲃϩ ⲏ ⲟⲩϭⲁⲗⲉ ⲏ ⲟⲩⲃⲗⲗⲉ
…
39 ⲁϥⲟⲩⲱϣⲃ ⲛϭⲓⲡⲙⲁⲕⲁⲣⲓⲟⲥ ⲁⲡⲁ ⲁⲫⲟⲩ ϫⲉⲉⲕϣⲁⲛⲧⲁⲩⲉ ⲛⲁⲓ ⲛⲧⲉⲓⲙⲓⲛⲉ ⲉⲕⲛⲁϣⲱⲡⲉ ⲉⲕϯⲧⲱⲛ ⲙⲛⲡⲉⲛⲧⲁϥϫⲟⲟⲥ ϫⲉⲙⲁⲣⲛⲧⲁⲙⲓⲟ ⲛⲟⲩⲣⲱⲙⲉ ⲕⲁⲧⲁⲡⲉⲛⲉⲓⲛⲉ ⲙⲛⲧⲉⲛϩⲓⲕⲱⲛ
…
40 ⲁϥⲟⲩⲱϣⲃ ⲛϭⲓⲡⲁⲣⲭⲓⲉⲡⲓⲥⲕⲟⲡⲟⲥ ϫⲉⲙⲉⲅⲉⲛⲟⲓⲧⲟ
…
41 ⲁⲗⲗⲁ ⲉⲓⲙⲉⲉⲩⲉ ⲉⲡⲁⲓ ϫⲉⲁⲇⲁⲙ ⲙⲁⲩⲁⲁϥ ⲡⲉⲛⲧⲁⲩⲧⲁⲙⲓⲟϥ ⲕⲁⲧⲁⲡⲉϥⲉⲓⲛⲉ ⲙⲛⲧⲉϥϩⲓⲕⲱⲛ ⲛϣⲏⲣⲉ ⲇⲉ ⲛⲧⲁϥϫⲡⲟⲟⲩ ⲙⲛⲛⲥⲱϥ ⲛⲥⲉⲉⲓⲛⲉ ⲙⲙⲟϥ ⲁⲛ
…
42 ⲁϥⲟⲩⲱϣⲃ ⲛϭⲓⲁⲡⲁ ⲁⲫⲟⲩ ⲉϥϫⲱ ⲙⲙⲟⲥ ϫⲉⲕⲁⲓⲙⲏⲛ ⲙⲛⲛⲥⲁⲧⲣⲉⲡⲛⲟⲩⲧⲉ ⲥⲙⲛⲇⲓⲁⲑⲏⲕⲏ ⲙⲛⲛⲱϩⲉ ⲙⲛⲛⲥⲁⲡⲕⲁⲧⲁⲕⲗⲩⲥⲙⲟⲥ ϣⲁϥϫⲟⲟⲥ ⲛⲁϥ ϫⲉⲡⲉⲧⲛⲁⲡⲱϩⲧ ⲉⲃⲟⲗ ⲛⲟⲩⲥⲛⲟϥ ⲛⲣⲱⲙⲉ ⲥⲉⲛⲁⲡⲉϩⲧⲡⲱϥ ⲉⲃⲟⲗ ⲉⲡⲉϥⲙⲁ ϫⲉⲛⲧⲁⲩⲧⲁⲙⲓⲉ ⲡⲣⲱⲙⲉ ϩⲛⲧϩⲓⲕⲱⲛ ⲙⲡⲛⲟⲩⲧⲉ
…
43 ⲡⲉϫⲉⲡⲁⲣⲭⲓⲉⲡⲓⲥⲕⲟⲡⲟⲥ ϫⲉϯⲣϩⲟⲧⲉ ⲉϫⲟⲟⲥ ⲉⲩⲣⲱⲙⲉ ⲛⲣⲉϥϣⲱⲛⲉ ⲛⲣⲉϥϣⲡϩⲓⲥⲉ ϫⲉⲉϥⲫⲟⲣⲉⲓ ⲛⲧϩⲓⲕⲱⲛ ⲙⲡⲛⲟⲩⲧⲉ ⲛⲁⲡⲁⲑⲏⲥ ⲛⲉⲩⲧⲏⲗⲉⲥ ⲉϣⲁϥϩⲙⲟⲟⲥ ϩⲓⲃⲟⲗ ⲛϥⲡⲁⲣⲁⲥⲕⲉⲩⲁⲍⲉ ⲛⲁϣⲛϩⲉ ⲕⲛⲁⲙⲉⲉⲩⲉ ⲉⲣⲟϥ ⲙⲛⲡⲟⲩⲟⲉⲓⲛ ⲙⲙⲉ ⲉⲧⲉⲙⲉⲣⲉⲗⲁⲁⲩ ϫⲟⲟⲃⲉϥ
…
44 ⲡⲉϫⲉⲁⲫⲟⲩ ⲛⲁϥ ϫⲉⲉⲕϣⲁⲛϫⲉ ⲛⲁⲓ ⲟⲛ ⲥⲉⲛⲁϫⲟⲟⲥ ⲉⲡⲥⲱⲙⲁ ⲙⲡⲉⲭⲣⲓⲥⲧⲟⲥ ⲉⲧⲛϫⲓ ⲙⲙⲟϥ ϫⲉⲛⲧⲟϥ ⲁⲛ ⲡⲉ
…
45 ⲛⲓⲟⲩⲇⲁⲓ ⲅⲁⲣ ⲛⲁϫⲟⲟⲥ ϫⲉⲛⲁϣ ⲛϩⲉ ⲕϫⲓ ⲛⲟⲩⲟⲉⲓⲕ ⲉⲁⲡⲕⲁϩ ⲧⲁⲩⲟϥ ⲉⲃⲟⲗ ⲁⲩⲱ ⲉⲩⲧⲱϭ ⲙⲙⲟϥ ϩⲛⲟⲩϩⲁⲥⲉ ⲙⲛⲛⲥⲱⲥ ⲛⲅⲡⲓⲥⲧⲉⲩⲉ ⲉⲣⲟϥ ⲉⲕϫⲓ ⲙⲙⲟϥ ϫⲉⲡⲁⲓ ⲡⲉ ⲡⲥⲱⲙⲁ ⲙⲡϫⲟⲉⲓⲥ
…
46 ⲡⲉϫⲉⲡⲁⲣⲭⲓⲉⲡⲓⲥⲕⲟⲡⲟⲥ ⲛⲁϥ ϫⲉⲛⲧⲉⲓϩⲉ ⲁⲛ ⲧⲉ ⲟⲩⲟⲉⲓⲕ ⲅⲁⲣ ⲡⲉ ⲁⲗⲏⲑⲱⲥ ⲙⲡⲁⲧⲛⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ
…
47 ϩⲙⲡⲧⲣⲉⲛⲧⲁⲗⲟϥ ⲉϫⲙⲡⲉⲑⲩⲥⲓⲁⲥⲧⲩⲣⲓⲟⲛ ⲛⲧⲛⲉⲡⲓⲕⲁⲗⲉⲓ ⲙⲡⲛⲟⲩⲧⲉ ⲉϩⲣⲁⲓ ⲉϫⲱⲟⲩ ⲡⲟⲉⲓⲕ ⲙⲉⲛ ϣⲁϥϣⲱⲡⲉ ⲛⲥⲱⲙⲁ ⲙⲡⲉⲭⲣⲓⲥⲧⲟⲥ ⲁⲩⲱ ⲛⲧⲉⲡⲁⲡⲟⲧ ϣⲱⲡⲉ ⲛⲥⲛⲟϥ ⲕⲁⲧⲁⲧϩⲉ ⲛⲧⲁϥϫⲟⲟⲥ ⲛⲛⲉϥⲙⲁⲑⲏⲧⲏⲥ ϫⲉϫⲓ ⲛⲧⲉⲧⲛⲟⲩⲱⲙ ⲡⲁⲓ ⲡⲉ ⲡⲁⲥⲱⲙⲁ ⲙⲛⲡⲁⲥⲛⲟϥ ⲁⲩⲱ ⲟⲛ ⲧⲙⲡⲓⲥⲧⲉⲩⲉ
…
48 ⲡⲉϫⲉⲁⲡⲁ ⲁⲫⲟⲩ ⲛⲁϥ ϫⲉⲛⲧϩⲉ ⲉⲧⲉⲟⲩⲁⲛⲁⲅⲕⲁⲓⲟⲛ ⲡⲉ ⲉⲡⲓⲥⲧⲉⲩⲉ ⲉⲡⲁⲓ ⲟⲩⲁⲛⲁⲅⲕⲁⲓⲟⲛ ⲡⲉ ⲉⲡⲓⲥⲧⲉⲩⲉ ⲉⲧⲉϥⲉⲝⲟⲩⲥⲓⲁ ϫⲉⲛⲧⲁⲩⲧⲁⲙⲓⲉ ⲡⲣⲱⲙⲉ ⲕⲁⲧⲁⲡⲓⲛⲉ ⲙⲛⲧϩⲓⲕⲱⲛ ⲙⲡⲛⲟⲩⲧⲉ
…
49 ⲡⲉⲛⲧⲁϥϫⲟⲟⲥ ⲅⲁⲣ ϫⲉⲁⲛⲟⲕ ⲡⲉ ⲡⲟⲉⲓⲕ ⲛⲧⲁϥⲉⲓ ⲉⲃⲟⲗ ϩⲛⲧⲡⲉ
…
50 ⲛⲧⲟϥ ⲟⲛ ⲡⲉⲛⲧⲁϥϫⲟⲟⲥ ϫⲉⲡⲉⲧⲛⲁⲡⲱϩⲧ ⲉⲃⲟⲗ ⲛⲟⲩⲥⲛⲟϥ ⲛⲣⲱⲙⲉ ⲥⲉⲛⲁⲡⲉϩⲧⲡⲱϥ ⲉⲃⲟⲗ ⲉⲡⲉϥⲙⲁ ϫⲉⲛⲧⲁⲩⲧⲁⲩⲧⲁⲙⲓⲉ ⲡⲣⲱⲙⲉ ϩⲛⲧϩⲓⲕⲱⲛ ⲙⲡⲛⲟⲩⲧⲉ
…
51 ⲉⲧⲃⲉⲡⲉⲟⲟⲩ ⲇⲉ ⲙⲡⲙⲉⲅⲉⲑⲟⲥ ⲛⲛⲟⲩⲧⲉ ⲡⲁⲓ ⲉⲙⲙⲛϣϭⲟⲙ ⲉⲧⲣⲉⲗⲁⲁⲩ ⲛⲁⲩ ⲉⲣⲟϥ ⲉⲧⲃⲉⲡⲉϥⲟⲩⲟⲉⲓⲛ ⲛⲁⲧⲧⲁϩⲟ ⲁⲩⲱ ⲉⲧⲃⲉⲧⲙⲛⲧϭⲱⲃ ⲛⲧⲙⲛⲧⲉⲩⲧⲉⲗⲏⲥ ⲙⲡⲣⲱⲙⲉ ⲕⲁⲧⲁⲛϭⲱϫⲃ ⲛⲧⲉⲫⲩⲥⲓⲥ ⲉⲧⲛⲥⲟⲟⲩⲛ ⲙⲙⲟⲟⲩ
…
52 ⲉⲛⲙⲉⲉⲩⲉ ⲛⲧⲉⲓϩⲉ ϫⲉⲛⲧϩⲉ ⲛⲟⲩⲣⲣⲟ ⲉϥⲛⲁⲕⲉⲗⲉⲩⲉ ⲛⲥⲉⲍⲱⲅⲣⲁⲫⲓ ⲛⲟⲩϩⲓⲕⲱⲛ ⲁⲩⲱ ⲟⲛ ϣⲁⲣⲉⲟⲩⲟⲛ ⲛⲓⲙ ϩⲟⲙⲟⲗⲟⲅⲉⲓ ⲙⲙⲟⲥ ϫⲉⲑⲓⲕⲱⲛ ⲙⲡⲣⲣⲟ ⲧⲉ
…
53 ϩⲁⲙⲁ ⲇⲉ ⲟⲛ ⲥⲉⲥⲟⲟⲩⲛ ⲧⲏⲣⲟⲩ ϫⲉⲟⲩϣⲉ ⲧⲉ ⲙⲛϩⲉⲛⲡⲁϩⲣⲉ
…
54 ⲟⲩⲇⲉ ⲅⲁⲣ ⲛϣⲁⲁⲛⲧⲥ ϫⲟⲥⲉ ⲁⲛ ⲛⲧϩⲉ ⲙⲡⲁⲡⲣⲱⲙⲉ
…
55 ⲟⲩⲇⲉ ⲛⲉⲥⲙⲁⲁϫⲉ ⲛⲧϩⲉ ⲛⲛⲁⲡϩⲟ ⲙⲡⲣⲣⲟ
…
56 ⲟⲩⲇⲉ ⲟⲛ ⲛⲥϣⲁϫⲉ ⲁⲛ ⲛⲧⲉϥϩⲉ
…
57 ⲁⲩⲱ ⲛⲉⲓϭⲱϫⲃ ⲧⲏⲣⲟⲩ ⲉⲧⲙⲙⲟⲥ ⲙⲉⲣⲉⲗⲁⲁⲩ ⲣⲡⲉⲩⲙⲉⲉⲩⲉ ⲉⲩⲣϩⲟⲧⲉ ϩⲏⲧⲥ ⲛⲧⲁⲡⲟⲫⲁⲥⲓⲥ ⲙⲡⲣⲣⲟ ϫⲉⲁϥϫⲟⲟⲥ ϫⲉⲧⲁⲓ ⲧⲉ ⲧⲁϩⲓⲕⲱⲛ
…
58 ⲙⲁⲗⲗⲟⲛ ⲇⲉ ⲉⲣϣⲁⲛⲟⲩⲁ ⲧⲟⲗⲙⲁ ⲉⲁⲣⲛⲁ ⲙⲙⲟⲥ ϫⲉⲛⲑⲓⲕⲱⲛ ⲁⲛ ⲧⲉ ⲙⲡⲣⲣⲟ ϣⲁⲩⲙⲟⲟⲩⲧϥ ϫⲉⲁϥϫⲓⲟⲩⲁ ⲉⲣⲟϥ ⲙⲁⲗⲓⲥⲧⲁ ϫⲉϣⲁⲣⲉⲛⲉⲝⲟⲩⲥⲓⲁ ⲥⲱⲟⲩϩ ⲉⲣⲟⲥ ⲉⲩϯⲉⲟⲟⲩ ⲛϩⲉⲛⲡⲁϭⲉ ⲛϣⲉ ⲙⲛϩⲉⲛⲡⲁϩⲣⲉ ⲉⲧⲃⲉⲧϩⲟⲧⲉ ⲙⲡⲣⲣⲟ
…
59 ⲉϣϫⲉ ϣⲁⲣⲉⲛⲁⲓ ϭⲉ ϣⲱⲡⲉ ⲛⲟⲩϩⲓⲕⲱⲛ ⲉⲙⲛⲡⲛⲉⲩⲙⲁ ⲙⲙⲟⲥ ⲟⲩⲇⲉ ⲙⲉⲥⲕⲓⲙ ⲉⲥⲟⲛⲁⲥⲩⲛⲑⲉⲧⲟⲥ ⲡⲟⲥⲟ ⲙⲁⲗⲗⲟⲛ ⲡⲣⲱⲙⲉ ⲉⲣⲉⲡⲉⲡⲛⲉⲩⲙⲁ ⲙⲡⲛⲟⲩⲧⲉ ⲛϩⲏⲧϥ ⲉϥⲉⲛⲉⲣⲅⲉⲓ ⲁⲩⲱ ⲉϥⲧⲁⲓⲏⲩ ⲡⲁⲣⲁ ⲛⲍⲱⲟⲛ ⲧⲏⲣⲟⲩ ⲉⲧϩⲓϫⲙⲡⲕⲁϩ
…
60 ⲉⲧⲃⲉⲧⲇⲓⲁⲫⲟⲣⲁ ⲇⲉ ⲛⲛϣⲱⲛⲉ ⲙⲛⲛⲁⲩⲁⲛ ⲙⲛⲛϭⲱϫⲃ ⲉⲧⲛϩⲏⲧⲛ ⲉⲩⲡⲉⲧⲉⲩⲥⲓⲥ ⲛⲁⲛ ⲉⲧⲃⲉⲡⲉⲛⲟⲩϫⲁⲓ ⲙⲛϣϭⲟⲙ ⲅⲁⲣ ⲛⲗⲁⲁⲩ ⲛⲛⲁⲓ ⲉⲥⲉϣϥ ⲡⲉⲟⲟⲩ ⲛⲧⲁⲡⲛⲟⲩⲧⲉ ⲧⲁⲁϥ ⲛⲁⲛ ⲕⲁⲧⲁⲧϩⲉ ⲉⲧⲉⲣⲉⲡⲁⲩⲗⲟⲥ ϫⲱ ⲙⲙⲟⲥ ϫⲉⲡϩⲟⲟⲩⲧ ⲅⲁⲣ ⲛⲥϣϣⲉ ⲁⲛ ⲉⲣⲟϥ ⲉϩⲱⲃⲥ ⲛⲧⲉϥⲁⲡⲉ
…
61 ⲛⲧⲉⲣⲉϥⲥⲱⲧⲙ ⲇⲉ ⲉⲛⲉⲓϣⲁϫⲉ ⲛϭⲓⲡⲙⲁⲕⲁⲣⲓⲟⲥ ⲛⲁⲣⲭⲓⲉⲡⲓⲥⲕⲟⲡⲟⲥ ⲁϥⲧⲱⲟⲩⲛ ⲁϥⲡⲁϩⲧϥ ⲉϩⲣⲁⲓ ⲉϫⲙⲡⲉϥⲙⲁⲕϩ ⲉϥϫⲱ ⲙⲙⲟⲥ ϫⲉⲟⲛⲧⲱⲥ ⲥⲡⲣⲉⲡⲉⲓ ⲉⲧⲣⲉⲧⲙⲛⲧⲣⲉϥϯⲥⲃⲱ ϣⲱⲡⲉ ⲛⲧⲟⲟⲧⲟⲩ ⲛⲛⲉⲧⲏⲥⲩⲭⲁⲍⲉ ⲙⲁⲩⲁⲁⲩ
…
62 ⲁⲛⲟⲛ ⲅⲁⲣ ⲛⲗⲟⲅⲓⲥⲙⲟⲥ ⲙⲡⲉⲛϩⲏⲧ ⲧⲏϩ ⲉⲣⲟⲛ ϩⲱⲥⲧⲉ ⲉⲧⲣⲉⲛϣⲱϥⲧ ⲛⲧⲉⲓϩⲉ ⲧⲏⲣⲥ ϩⲛⲟⲩⲙⲛⲧⲁⲧⲥⲟⲟⲩⲛ
…