1 ⲉⲧⲃⲉⲙⲡⲉⲧⲛⲁⲛⲟⲩϥ ⲉⲧϥⲉⲓⲣⲉ ⲙⲙⲟⲟⲩ ⲛⲙⲙⲁⲛ · ⲉⲧⲉⲧⲉϥⲛⲟϭ ⲛⲁⲛⲟⲭⲏ ⲧⲉ ⲉⲙⲡϥϥⲟⲧⲛ ⲉⲃⲟⲗ · ⲁⲛ ⲟⲛ ⲛⲉⲧⲉⲓⲣⲉ ⲛⲙⲡⲉⲧϩⲟⲟⲩ ϩⲓϫⲙⲡⲕⲁϩ · ϩⲛⲧⲙⲏⲧⲉ ⲛⲛⲉⲧⲉⲓⲣⲉ ⲙⲡⲡⲉⲧⲛⲁⲛⲟⲩϥ ⲙⲡⲉϥⲙⲧⲟ ⲉⲃⲟⲗ ·
…
2 ⲁⲗⲗⲁ ϥⲛⲏⲩ ⲛϭⲓⲡⲟⲩⲟⲉⲓϣ ⲙⲡⲱϩⲥ ⲉⲧϥⲛⲁⲥⲱⲟⲩϩ ⲉϩⲟⲩⲛ ⲛϩⲏⲧϥ ⲛⲛⲉⲧⲛⲁⲛⲟⲩⲟⲩ ⲉⲡⲉⲩⲙⲁ ⲛⲙⲧⲟⲛ ·
…
3 ⲁⲩⲱ ⲛϥⲥⲱⲟⲩϩ ⲟⲛ ⲉϩⲟⲩⲛ ⲛⲛⲉⲧϩⲟⲟⲩ ⲉⲃⲟⲗ ϩⲓⲧⲛⲛⲁⲅⲅⲉⲗⲟⲥ ⲉⲧⲟⲩⲁⲁⲃ ⲉⲧⲣⲉϥⲛⲟϫⲟⲩ ⲉϩⲣⲁⲓ ⲉⲁⲙⲛⲧⲉ ⲉⲡⲕⲱϩⲧ ⲛⲧⲅⲉϩⲉⲛⲛⲁ ⲏ ⲛⲧⲟϥ ⲉⲃⲟⲗ ⲉⲡⲕⲁⲕⲉ ⲉⲧϩⲓⲃⲟⲗ · ⲡⲙⲁ ⲉⲧⲉⲣⲉⲡⲣⲓⲙⲉ ⲛⲁϣⲱⲡⲉ ⲙⲙⲁⲩ · ⲙⲛⲡϫⲁϩϫϩ ⲛⲛⲟⲃϩⲉ ·
…
4 ⲛⲉⲛⲏⲡ ⲡⲉ ⲉϣⲱⲡⲉ ⲛⲥⲁⲃⲉ ⲛⲧϩⲉ ⲛⲛⲉⲛⲧⲁⲩⲣⲥⲁⲃⲉ ⲧⲏⲣⲟⲩ ϩⲓⲧⲛⲧⲁϣⲏ ⲛⲛϣⲁϫⲉ ⲛⲛⲉⲅⲣⲁⲫⲏ ⲛⲧϩⲉ ⲉⲧⲥⲙⲟⲩⲧⲉ ⲉⲣⲟⲛ ⲉⲩⲙⲉⲧⲁⲛⲟⲓⲁ ϫⲓⲛⲛϣⲟⲣⲡ ·
…
5 ⲡⲧⲃⲛⲏ ⲉⲩϣⲁⲛⲧⲥⲁⲃⲟϥ ⲉⲙⲟⲟϣⲉ ϫⲓⲛⲛⲧⲉϥⲙⲛⲧⲕⲟⲩⲓ ⲙⲉϥϣⲓⲃⲉ ϩⲛⲧⲉϥϭⲓⲛⲙⲟⲟϣⲉ · ⲉⲓⲙⲏⲧⲓ ϩⲛⲟⲩⲙⲛⲧⲁⲧϭⲟⲙ ϣⲁⲧⲉϥⲙⲛⲧϩⲗⲗⲟ ·
…
6 ⲁⲛⲟⲛ ⲇⲉ ⲁⲩⲧⲥⲁⲃⲟⲛ ⲉⲛⲉϩⲃⲏⲩⲉ ⲙⲡⲉⲛⲟⲩϫⲁⲓ · ⲏ ⲛⲉϩⲃⲏⲩⲉ ⲉⲧⲛⲁⲟⲩϫⲁⲓ ⲛϩⲏⲧⲟⲩ ·
…
7 ⲧⲛⲱⲃϣ ϩⲱⲱϥ ⲙⲙⲟⲛ ⲉⲣⲟⲟⲩ ·
…
8 ⲏ ⲉϣⲱⲡⲉ ⲣⲱ ⲁⲛⲧⲥⲁⲃⲟ ⲉⲣⲟⲟⲩ ⲛⲟⲩⲥⲏⲩ ⲡⲕⲉⲥⲏⲩ ⲇⲉ ⲛⲧⲛϭⲱϣⲧ ⲛⲥⲱⲟⲩ ⲁⲛ
…
9 ⲉϣϫⲉⲡϭⲉⲣⲱⲃ ϩⲛⲧϭⲓϫ ⲙⲡⲉⲧⲧⲱⲃⲥ ⲉⲡⲧⲃⲛⲏ ⲁⲩⲱ ϥⲣϩⲟⲧⲉ ϥⲙⲟⲟϣⲉ ⲉⲧⲉϥϩⲓⲏ ⲕⲁⲗⲱⲥ
…
10 ⲟⲩϩⲟⲩⲟ ⲉϭⲉⲣⲱⲃ ⲟⲛ ⲙⲡⲣⲱⲙⲉ ⲡⲉ ⲛϣⲁϫⲉ ⲛⲧⲉⲅⲣⲁⲫⲏ ⲉⲧⲣⲉⲛⲥⲱⲧⲙ ⲉⲣⲟⲟⲩ · ⲁⲩⲱ ⲛⲧⲛⲟⲩⲱϩ ⲉϫⲛⲧⲉⲛϭⲓⲛⲙⲟⲟϣⲉ ϩⲛϩⲱⲃ ⲛⲓⲙ ⲕⲁⲧⲁⲡⲉⲧⲣⲁⲛⲁϥ ⲙⲡⲛⲟⲩⲧⲉ ·
…
11 ⲏ ⲛⲥϫⲱ ⲙⲙⲟⲥ ⲁⲛ ⲛϭⲓⲧⲉⲅⲣⲁⲫⲏ ϫⲉⲟⲩⲙⲁⲥⲧⲓⲅⲝ ⲛⲟⲩϩⲧⲟ · ⲁⲩⲱ ⲟⲩϫⲟⲟⲕ ⲉϥⲛⲟⲩⲉⲓⲱ ⲟⲩϭⲉⲣⲱⲃ ⲇⲉ ⲛⲟⲩϩⲉⲑⲛⲟⲥ ⲛⲁⲧϩⲏⲧ ⲟⲩ ⲡⲉ ⲡϭⲉⲣⲱⲃ ⲙⲡϩⲉⲑⲛⲟⲥ ⲛⲁⲧϩⲏⲧ · ⲉⲓⲙⲏⲧⲓ ⲉⲛϣⲁϫⲉ ⲛⲛⲉⲅⲣⲁⲫⲏ ⲕⲁⲧⲁⲡⲉⲧⲥⲏϩ
…
12 ϫⲉⲡⲉⲧⲉⲓⲛⲉ ⲛⲟⲩⲥⲟⲫⲓⲁ ⲉⲃⲟⲗ ϩⲛⲣⲱϥ ⲉϥⲣⲱϩⲧ ⲛⲟⲩⲣⲱⲙⲉ ⲛⲁⲧϩⲏⲧ ϩⲛⲟⲩϭⲉⲣⲱⲃ
…
13 ⲱ ⲡⲉⲓⲛⲟϭ ⲛⲙⲕⲁϩ ⲛϩⲏⲧ ⲉϯⲛⲁϫⲟⲟϥ · ⲉⲟⲩϣⲓⲡⲉ ⲛⲁⲛ ⲁⲛⲟⲛ ⲛⲉⲧⲁⲙⲉⲗⲉⲓ ⲉⲥⲱⲧⲙ ⲛⲥⲁⲡⲛⲟⲩⲧⲉ ⲉϥⲙⲟⲩⲧⲉ ⲉⲣⲟⲛ
…
14 ϫⲉⲁⲙⲏⲓⲧⲛ ⲉⲃⲟⲗ ϩⲛⲛⲉⲧⲛⲛⲟⲃⲉ ⲛⲧⲉⲧⲛⲉⲓ ϣⲁⲣⲟⲓ ϩⲛϩⲉⲛⲕⲟⲩⲓ ϣⲏⲙ ⲙⲡⲉⲧⲛⲁⲛⲟⲩϥ ⲉⲁⲁⲩ · ⲛⲧⲁϣⲉⲡⲧⲏⲩⲧⲛ ⲉⲣⲟⲓ · ⲛⲧⲁϣⲱⲡⲉ ⲛⲏⲧⲛ ⲉⲩⲉⲓⲱⲧ · ⲛⲧⲉⲧⲛϣⲱⲡⲉ ⲛⲁⲓ ⲉϩⲉⲛϣⲏⲣⲉ ⲙⲛϩⲉⲛϣⲉⲉⲣⲉ ⲡⲉϫⲉⲡϫⲟⲉⲓⲥ· ⲡⲡⲁⲛⲧⲟⲕⲣⲁⲧⲱⲣ ·
…
15 ⲡϩⲟϥ ⲙⲏ ⲟⲩⲑⲏⲣⲓⲟⲛ ⲉϥϩⲟⲟⲩ ⲁⲛ ⲡⲉ ⲁⲩⲱ ϩⲛⲟⲩⲕⲟⲩⲓ ⲛⲁⲡⲣⲏⲧⲉ · ⲉⲣⲉⲡⲉⲧⲙⲟⲩⲧⲉ ⲙⲟⲩⲧⲉ ⲉⲣⲟϥ ·
…
16 ϣⲁⲣⲉⲛⲓϫⲁⲧϥ ⲉⲛⲁⲅⲣⲓⲟⲛ ⲛⲧⲉⲓⲙⲓⲛⲉ ⲕⲱ ⲛⲥⲱϥ ⲛⲧⲙⲛⲧⲁⲅⲣⲓⲟⲥ ⲛⲧⲉϥⲫⲩⲥⲓⲥ ⲛϥϫⲓ ⲛⲁϥ ⲛⲟⲩⲙⲛⲧϩⲏⲙⲉⲣⲟⲥ · ⲡⲁⲣⲁⲧⲉϥⲫⲩⲥⲓⲥ · ⲛϥⲉⲓ ⲉⲃⲟⲗ ⲉⲛϭⲓϫ ⲙⲡⲉⲧⲙⲟⲩⲧⲉ ⲉⲣⲟϥ ϩⲛⲟⲩⲛⲟϭ ⲙⲙⲛⲧϩⲏⲙⲉⲣⲟⲥ ⲉⲧⲃⲉⲛⲕⲟⲩⲓ ⲛϣⲁϫⲉ ⲛⲧⲁϥⲥⲱⲧⲙ ⲉⲣⲟⲟⲩ ⲉⲃⲟⲗ ϩⲛⲣⲱϥ ⲙⲡⲣⲉϥⲙⲟⲩⲧⲉ ·
…
17 ⲁⲛⲟⲛ ϩⲱⲱⲛ ⲛⲉⲛⲧⲁⲡⲉⲩϩⲏⲧ ⲧⲱⲙ ⲉⲣⲟⲟⲩ ⲙⲡⲛⲥⲱⲧⲙ ⲛⲥⲁⲛϣⲁϫⲉ ⲧⲏⲣⲟⲩ ⲛⲛⲉⲅⲣⲁⲫⲏ · ⲛⲁⲧⲡⲁⲗⲁⲓⲁ ⲙⲛⲛⲁⲧⲕⲁⲓⲛⲏ ⲙⲛⲛⲁⲛⲉⲧⲟⲩⲁⲁⲃ ⲧⲏⲣⲟⲩ · ⲙⲁⲗⲓⲥⲧⲁ ⲛⲁⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ · ⲉⲩⲙⲟⲩⲧⲉ ⲉⲣⲟⲛ ⲧⲏⲣⲟⲩ ⲉⲧⲣⲉⲛⲕⲱ ⲛⲥⲱⲛ ⲛⲛⲛⲟⲃⲉ ⲉⲧⲉⲙⲡⲁⲣⲁⲧⲉⲛⲫⲩⲥⲓⲥ ⲛⲉ · ⲛⲁⲓ ⲉⲧⲛⲛⲁⲙⲟⲩ ⲉⲧⲃⲏⲏⲧⲟⲩ · ⲛⲧⲛⲉⲓⲣⲉ ⲛϩⲉⲛⲡⲉⲧⲛⲁⲛⲟⲩϥ ⲕⲁⲧⲁⲧⲉⲛⲫⲩⲥⲓⲥ · ⲛⲁⲓ ⲉⲧⲛⲛⲁⲟⲩϫⲁⲓ ⲉⲧⲃⲏⲏⲧⲟⲩ ·
…
18 ⲁⲩⲱ ⲙⲡⲛⲥⲱⲧⲙ ϣⲁϩⲟⲩⲛ ⲉⲧⲉⲛⲟⲩ ⲁⲗⲗⲁ ⲁⲛⲣⲧϩⲉ ⲛⲟⲩϩⲟϥ ⲛⲁⲗ ⲉϥϣⲧⲁ ⲙⲛⲛⲉϥⲙⲁⲁϫⲉ ⲉⲙⲉϥⲥⲱⲧⲙ ⲉⲡⲉϩⲣⲟⲟⲩ ⲛⲛⲉⲧⲙⲟⲩⲧⲉ ⲉⲣⲟϥ · ⲁⲩⲱ ⲟⲩⲡⲁϩⲣⲉ ⲉⲩⲉⲓⲣⲉ ⲙⲙⲟϥ ϩⲓⲧⲛⲟⲩⲥⲟⲫⲟⲥ ⲕⲁⲧⲁⲛⲉⲅⲣⲁⲫⲏ ·
…
19 ϣⲁⲛⲧⲉⲟⲩϭⲉ ϣⲱⲡⲉ ⲛⲧⲛⲛⲁⲉⲓ ⲁⲛ ⲉⲃⲟⲗ ϩⲛⲛⲉⲛⲡⲉⲧϩⲟⲟⲩ
…
20 ⲁⲛⲟⲛ ⲛⲉⲧⲉⲓⲣⲉ ⲛϩⲉⲛⲁⲛⲟⲙⲓⲁ ⲉⲙⲛϭⲟⲙ ⲙⲙⲟⲛ ⲉϥⲓ ϩⲁⲡϭⲱⲛⲧ ⲛⲧⲟⲣⲅⲏ ⲙⲡⲛⲟⲩⲧⲉ · ⲡⲁⲓ ⲉⲧⲛϯⲛⲟⲩϭⲥ ⲛⲁϥ ⲛⲛⲁⲩ ⲛⲓⲙ ϩⲛⲛⲉⲛⲡⲉⲧϩⲟⲟⲩ · ⲙⲁⲗⲓⲥⲧⲁ ⲁⲛⲟⲛ ⲛⲉⲧⲟⲩⲏϩ ϩⲛⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ ⲛⲟⲩⲏⲏⲃ ⲙⲛⲙⲙⲟⲛⲁⲭⲟⲥ ·
…
21 ⲱ ⲟⲩⲏⲣ ⲡⲉ ⲡⲉⲛϫⲡⲓⲟ ⲉⲧⲛⲁϣⲱⲡⲉ ⲙⲙⲟⲛ ϩⲙⲡⲉϩⲟⲟⲩ ⲙⲡⲉⲛϭⲙⲡϣⲓⲛⲉ · ⲉϣⲱⲡⲉ ⲉⲛϣⲁⲛⲧⲙⲥⲁϩⲱⲛ ⲉⲃⲟⲗ ⲙⲙⲟⲟⲩ ϩⲛⲟⲩϭⲉⲡⲏ ·
…
22 ⲕⲁⲧⲁⲡⲉⲧⲥⲏϩ ϫⲉⲡⲉⲧⲉⲛϥⲧⲁⲗϭⲟ ⲙⲙⲟϥ ⲁⲛ ϩⲛⲛⲉϥϩⲃⲏⲩⲉ ⲡⲥⲟⲛ ⲡⲉ ⲙⲡⲉⲧⲧⲁⲕⲟ ⲙⲙⲟϥ ⲟⲩⲁⲁϥ ·
…
23 ⲟⲩⲁⲧϩⲏⲧ ⲉϥϣⲁⲛϣⲓⲛⲉ ⲡⲉϫⲁϥ ⲥⲛⲁⲱⲡ ⲉⲣⲟϥ ⲉⲟⲩⲥⲟⲫⲓⲁ · ⲉϥⲟⲩⲱϣ ⲟⲛ ⲉⲧⲁⲓ ⲟⲛ ⲉⲧⲛⲁⲕⲱ ⲛⲥⲱⲟⲩ ⲛⲛⲉⲩⲛⲟⲃⲉ ⲛⲥⲉⲙⲉⲧⲁⲛⲟⲉⲓ ϩⲛⲟⲩϭⲉⲡⲏ ϣⲁϥϫⲟⲟⲥ ϫⲉⲡⲉⲧⲧⲁⲗϭⲟ ⲙⲙⲟϥ ϩⲛⲛⲉϥϩⲃⲏⲩⲉ ⲙⲙⲓⲛ ⲙⲙⲟϥ ⲡⲣⲁⲛ ⲙⲡϫⲟⲉⲓⲥ ⲟⲩⲟⲛϩ ⲉⲃⲟⲗ ϩⲛⲧⲙⲛⲧⲛⲟϭ ⲛⲧⲉϥϭⲟⲙ ·
…
24 ⲛⲇⲓⲕⲁⲓⲟⲥ ⲇⲉ ⲛⲁϫⲓⲥⲉ ϩⲙⲡⲡⲱⲧ ⲉⲣⲁⲧϥ ⲉⲡⲟⲩⲱⲛϩ ⲉⲃⲟⲗ ⲛⲧⲉϥⲙⲛⲧⲙⲁⲓⲣⲱⲙⲉ ⲉϩⲟⲩⲛ ⲉⲟⲩⲟⲛ ⲛⲓⲙ ⲉⲧⲛⲁⲕⲱ ⲛⲥⲱⲟⲩ ⲛⲛⲉⲩⲛⲟⲃⲉ ⲛⲥⲉⲧⲙⲕⲧⲟⲟⲩ ⲉⲣⲟⲟⲩ ϫⲓⲛⲙⲡⲉⲓⲛⲁⲩ
…
25 ⲏ ⲛⲧⲉⲧⲛⲥⲟⲟⲩⲛ ⲁⲛ ϫⲉⲟⲩⲛⲟϭ ⲛⲙⲕⲁϩ ⲛϩⲏⲧ ⲡⲉ ⲛⲛⲁϩⲣⲙⲡⲛⲟⲩⲧⲉ ⲡⲉ ϩⲉⲛⲣⲱⲙⲉ ⲉⲩⲛⲁⲣⲛⲟⲃⲉ ϩⲛⲛⲉϥⲧⲟⲡⲟⲥ ⲉⲧⲟⲩⲁⲁⲃ · ⲙⲁⲗⲓⲥⲧⲁ ⲉⲩϣⲁⲛⲧⲙⲕⲁⲁⲩ ⲛⲥⲱⲟⲩ ϩⲛⲟⲩϭⲉⲡⲏ ·
…
26 ⲉϣϫⲉⲁⲡⲛⲟⲩⲧⲉ ϫⲟⲟⲥ ⲙⲙⲱⲩⲥⲏⲥ ⲙⲡⲉⲓⲟⲩⲟⲉⲓϣ ϩⲙⲡⲧⲣⲉϥϣⲁϫⲉ ⲛⲙⲙⲁϥ ϩⲓⲡⲃⲁⲧⲟⲥ ϫⲉⲃⲱⲗ ⲉⲃⲟⲗ ⲙⲡⲧⲟⲟⲩⲉ ⲉⲧϩⲛⲛⲉⲕⲟⲩⲉⲣⲏⲧⲉ ⲡⲙⲁ ⲅⲁⲣ ⲉⲧⲕⲁϩⲉⲣⲁⲧⲕ ⲛϩⲏⲧϥ ⲟⲩⲕⲁϩ ⲉϥⲟⲩⲁⲁⲃ ⲡⲉ · ⲉⲟⲩⲧⲟⲟⲩⲉ ⲣⲱ ⲡⲉ · ⲉⲓⲉ ⲉϥⲛⲁϫⲟⲟⲥ ⲛⲁⲛ ⲛⲟⲩⲏⲣ · ⲁⲛⲟⲛ ⲛⲉⲧⲟⲩⲏϩ ϩⲛⲛⲉϥⲧⲟⲡⲟⲥ ⲉⲧⲟⲩⲁⲁⲃ · ϫⲉⲃⲱⲗ ⲉⲃⲟⲗ ⲛⲛⲓⲁⲛⲟⲙⲓⲁ ⲧⲏⲣⲟⲩ ϩⲓⲱⲧⲧⲏⲩⲧⲛ ⲛⲁⲛϫⲱϩⲙ ⲙⲛⲛⲥⲱⲱϥ ⲛⲁⲛϫⲓⲟⲩⲉ ⲙⲛⲛϭⲟⲗ ⲛⲁⲛⲕⲱϩ ⲙⲛⲙⲙⲟⲥⲧⲉ ⲛⲁⲙⲙⲓϣⲉ ⲙⲛⲛϯⲧⲱⲛ ⲙⲛⲛⲕⲉⲛⲟⲃⲉ ⲧⲏⲣⲟⲩ ⲉⲧⲟ ⲛⲃⲟⲧⲉ ⲛⲛⲁϩⲣⲁⲓ ϫⲉⲡⲙⲁ ⲉⲧⲉⲧⲛⲟⲩⲏϩ ⲛϩⲏⲧϥ ⲟⲩⲕⲁϩ ⲉϥⲟⲩⲁⲁⲃ ⲡⲉ ·
…
27 ⲁⲩⲱ ϯϣⲟⲟⲡ ⲛϩⲏⲧϥ · ⲡⲁⲣⲁⲛⲉⲧⲟⲩⲁⲁⲃ ⲁⲩⲧⲁⲩⲟϥ ⲉϫⲱϥ · ⲛⲧϩⲉ ⲛⲧⲁϥϫⲟⲟⲥ ϩⲙⲡⲉⲡⲣⲟⲫⲏⲧⲏⲥ
…
28 ϫⲉⲃⲗⲕⲟⲧⲥ ⲛⲓⲙ ⲛϫⲓⲛϭⲟⲛⲥ ⲛϫⲓⲟⲩⲱ ϫⲉⲕⲁⲥⲉⲛⲛⲁϣⲱⲡⲉ ⲉⲙⲛⲧⲁⲛϣⲁϫⲉ ⲙⲙⲁⲩ ⲉϫⲱ ·
…
29 ⲕⲁⲓ ⲅⲁⲣ ⲡⲁⲣⲭⲏⲥⲧⲣⲁⲧⲩⲅⲟⲥ ⲛⲧϭⲟⲙ ⲙⲡϫⲟⲉⲓⲥ ⲛⲧⲉⲣⲉϥⲟⲩⲱⲛϩ ⲉⲓⲏⲥⲟⲩⲥ ⲉϥϩⲓⲣⲱⲥ ⲛϩⲓⲉⲣⲓⲭⲱ ⲙⲡϥϯⲥⲟ ⲉϫⲟⲟⲥ ⲛⲁϥ
…
30 ϫⲉⲃⲱⲗ ⲉⲃⲟⲗ · ⲙⲡⲧⲟⲟⲩⲉ ⲉⲧϩⲛⲛⲉⲕⲟⲩⲉⲣⲏⲧⲉ ⲡⲙⲁ ⲅⲁⲣ ⲉⲧⲕⲁϩⲉⲣⲁⲧⲕ ϩⲓϫⲱϥ ⲟⲩⲕⲁϩ ⲉϥⲟⲩⲁⲁⲃ ⲡⲉ ·
…
31 ⲉⲡⲟⲩⲱⲛϩ ⲟⲛ ⲉⲃⲟⲗ ⲛⲛⲉⲛⲧⲁⲛϫⲟⲟⲩ ϫⲉⲟⲩ ⲡⲉⲧⲉϣϣⲉ ⲉⲣⲟⲛ ⲁⲛ ⲡⲉ ⲉϭⲱ ⲉⲛⲟⲩⲏϩ ϩⲛⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ ⲉⲛⲟ ⲛⲁⲧⲥⲱⲧⲙ ⲛⲥⲁⲡⲉϥⲛⲟⲙⲟⲥ ⲉⲧⲟⲩⲁⲁⲃ ⲉⲧⲣⲉⲛⲥⲱⲗⲡ ⲙⲙⲣⲣⲉ ⲛⲁⲛⲟⲙⲓⲁ ⲛⲓⲙ ϩⲛⲟⲩϭⲉⲡⲏ ⲛⲧⲛⲛⲟϫⲟⲩ ⲉⲃⲟⲗ ϩⲓϫⲱⲛ ·
…
32 ϫⲉⲕⲁⲥ ⲉⲣⲉⲡⲉⲧϩⲛⲙⲡⲏⲩⲉ ⲛⲁⲥⲱⲃⲉ ⲛⲥⲱⲟⲩ ·
…
33 ⲁⲩⲱ ⲛⲧⲉⲡϫⲟⲉⲓⲥ ⲕⲟⲙϣⲟⲩ · ⲛϥϣⲁϫⲉ ⲛⲙⲙⲁⲩ ϩⲛⲧⲉϥⲟⲣⲅⲏ ⲛϥϣⲧⲣⲧⲱⲣⲟⲩ ϩⲙⲡⲉϥϭⲱⲛⲧ · ϫⲉⲕⲁⲥ ⲛⲛⲉⲡϫⲁϫⲉ · ⲙⲛⲛⲉϥⲇⲁⲓⲙⲱⲛ ⲉⲧⲥϩⲟⲩⲟⲣⲧ ⲟⲩⲱϩ ⲉⲧⲟⲟⲧϥ ⲉⲁⲙⲁϩⲧⲉ · ⲏ ⲉⲕⲱⲗⲩⲉ · ⲛⲛⲉⲧⲟⲩⲱϣ ⲉⲉⲓ ⲉⲃⲟⲗ ϩⲛⲛⲉⲩⲛⲟⲃⲉ ⲉⲙⲉⲧⲁⲛⲟⲉⲓ ⲧⲁⲭⲩ ·
…
34 ϫⲉⲕⲁⲥ ⲉⲩⲉϫⲓ ⲛⲟⲩⲥⲙⲟⲩ ⲉⲃⲟⲗ ϩⲓⲧⲙⲡϫⲟⲉⲓⲥ · ⲁⲩⲱ ⲟⲩⲛⲁ ⲉⲃⲟⲗ ϩⲓⲧⲙⲡⲛⲟⲩⲧⲉ ⲡⲉⲛⲥⲱⲧⲏⲣ
…
35 ⲁⲩⲱ ⲛⲥⲉϫⲟⲟⲥ ϫⲉⲧⲁⲓ ⲧⲉ ⲧⲅⲉⲛⲉⲁ ⲛⲛⲉⲧϣⲓⲛⲉ ⲛⲥⲁⲡϫⲟⲉⲓⲥ ⲁⲩⲱ ⲉⲧϣⲓⲛⲉ ⲛⲥⲁⲡϩⲟ ⲙⲡⲛⲟⲩⲧⲉ ⲛⲓⲁⲕⲱⲃ ·
…
36 ⲱ ⲟⲩⲏⲣ ⲡⲉ ⲡⲉⲛϫⲡⲓⲟ
…
37 ⲁⲛⲟⲛ ⲛⲉⲧⲉⲛⲥⲉⲥⲱⲧⲙ ⲁⲛ ⲛⲥⲁⲛⲉⲓϣⲁϫⲉ ⲧⲏⲣⲟⲩ ϣⲁⲛⲧⲉⲡⲓϯⲟⲩ ⲛϩⲟⲟⲩ ⲉⲧⲛⲛϩⲏⲧⲟⲩ ⲱϫⲛ ⲛⲧⲟⲟⲧⲛ ·
…
38 ⲛⲧⲉⲧⲉⲛⲙⲉⲣⲓⲥ ϣⲱⲡⲉ ⲙⲛⲛⲉⲛⲧⲁⲩⲣⲁⲧⲥⲱⲧⲙ ⲧⲏⲣⲟⲩ ϫⲓⲛⲛϣⲟⲣⲡ · ⲉⲁⲩⲕⲱ ⲛⲥⲱⲟⲩ ⲛⲛϣⲁϫⲉ ⲛⲛⲉⲧⲟⲩⲉϣⲡⲉⲩⲟⲩϫⲁⲓ · ⲉⲁⲩⲥⲩⲙⲃⲟⲩⲗⲉⲩⲉ ⲛⲁⲩ ⲉⲡⲡⲉⲧⲛⲁⲛⲟⲩϥ
…
39 ⲙⲡⲟⲩϭⲱϣⲧ ⲉⲣⲟϥ ⲉⲁⲁϥ ϣⲁⲛⲧⲟⲩⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ
…
40 ⲉϣϫⲉⲛⲧⲉⲧⲛⲥⲟⲟⲩⲛ ⲁⲛ ⲛⲧⲉⲧⲛⲙⲉⲣⲓⲥ · ⲱ ⲛⲉⲧⲛⲁⲙⲟⲩ ϩⲛⲛⲉⲩⲛⲟⲃⲉ ⲙⲁⲗⲓⲥⲧⲁ ϩⲛⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ ⲧⲛⲛⲁⲧⲁⲙⲱⲧⲛ ⲉⲣⲟⲥ ⲕⲁⲧⲁⲛϣⲁϫⲉ ⲧⲏⲣⲟⲩ ⲛⲛⲉⲅⲣⲁⲫⲏ ·
…
41 ⲧⲉⲧⲛⲙⲉⲣⲓⲥ ⲧⲉ ⲧⲙⲉⲣⲓⲥ ⲛⲕⲁⲉⲓⲛ ⲡⲁⲓ ⲛⲧⲁϥⲣϣⲟⲣⲡ ⲛϫⲓ ⲙⲡⲥⲁϩⲟⲩ ⲉⲃⲟⲗ ϩⲓⲧⲛⲧⲧⲁⲡⲣⲟ ⲙⲡⲛⲟⲩⲧⲉ ϩⲓϫⲙⲡⲕⲁϩ ⲉⲃⲟⲗ ϫⲉⲙⲡϥⲥⲱⲧⲙ ⲛⲥⲁⲧⲉⲥⲃⲱ ⲛⲛⲉϥⲉⲓⲟⲧⲉ ·
…
42 ⲟⲩⲧⲉ ⲙⲡϥⲕⲱϩ ⲉⲛⲉⲡⲣⲁⲝⲓⲥ ⲙⲛⲛⲉϩⲃⲏⲩⲉ ⲛⲁⲅⲁⲑⲟⲛ ⲙⲡⲉϥⲥⲟⲛ ⲁⲃⲉⲗ ⲡⲇⲓⲕⲁⲓⲟⲥ ⲁⲗⲗⲁ ⲉⲁϥⲥⲟⲃⲧⲉ ⲛⲁϥ ⲛⲟⲩϫⲓⲕⲃⲁ ⲉⲃⲟⲗ ϩⲓⲧⲙⲡⲛⲟⲩⲧⲉ ϣⲁⲉⲛⲉϩ ·
…
43 ⲛⲧⲉⲛϩⲉ ϩⲱⲱⲛ ⲟⲛ ⲙⲡⲛⲥⲱⲧⲙ ⲛⲥⲁⲛϣⲁϫⲉ ⲛⲛⲉⲅⲣⲁⲫⲏ ·
…
44 ⲛⲧⲛⲥⲁϩⲱⲛ ⲉⲃⲟⲗ ⲛⲛⲉⲛⲡⲉⲧϩⲟⲟⲩ ⲛⲧⲛⲉⲓⲣⲉ ⲛϩⲉⲛⲡⲉⲧⲛⲁⲛⲟⲩϥ ϫⲉⲕⲁⲥ ⲉⲣⲉⲡⲛⲟⲩⲧⲉ ⲛⲁϣ ⲛϩⲧⲏϥ ⲉϫⲱⲛ ·
…
45 ⲟⲩⲧⲉ ⲟⲛ ⲙⲡⲛⲕⲱϩ ⲉⲛⲉⲡⲣⲁⲝⲓⲥ ⲙⲛⲛⲉϩⲃⲏⲩⲉ ⲉⲧⲛⲁⲛⲟⲩⲟⲩ ⲛⲛⲉⲛⲥⲛⲏⲩ ⲛⲇⲓⲕⲁⲓⲟⲥ ⲉⲧⲛⲟⲩⲏϩ ⲛⲙⲙⲁⲩ ϣⲁⲛⲧⲛⲥⲟⲃⲧⲉ ⲛⲁⲛ ⲛⲟⲩϫⲓⲕⲃⲁ · ⲙⲛⲟⲩⲧⲱⲱⲃⲉ ⲉϥⲙⲏⲛ ⲉⲃⲟⲗ ϣⲁⲉⲛⲉϩ ⲛϩⲣⲁⲓ ϩⲛⲁⲙⲛⲧⲉ ·
…
46 ⲧⲉⲧⲛⲏⲡ ⲉⲛⲉⲛⲧⲁⲡϫⲟⲉⲓⲥ ϥⲟⲧⲟⲩ ⲉⲃⲟⲗ ϩⲛⲟⲩⲕⲁⲧⲁⲕⲗⲩⲥⲙⲟⲥ ⲙⲙⲟⲟⲩ ϫⲓⲛⲛϣⲟⲣⲡ ⲉⲃⲟⲗ ϫⲉⲁⲩⲁⲣⲭⲉⲓ ⲉϫⲙⲡⲡⲉⲧϩⲟⲟⲩ ϫⲓⲛⲛⲧⲉⲩⲙⲛⲧⲕⲟⲩⲓ ·
…
47 ⲁⲩⲱ ⲉⲁⲡⲕⲁϩ ⲙⲟⲩϩ ⲛϫⲓⲛϭⲟⲛⲥ ⲉⲃⲟⲗ ⲙⲙⲟⲟⲩ ⲕⲁⲧⲁⲛϣⲁϫⲉ ⲛⲧⲉⲅⲣⲁⲫⲏ · ⲉⲙⲡⲟⲩⲥⲱⲧⲙ ⲛⲥⲁⲡⲇⲓⲕⲁⲓⲟⲥ ⲛⲱϩⲉ · ⲉϥⲥⲩⲙⲃⲟⲩⲗⲉⲩⲉ ⲛⲁⲩ · ⲡⲁⲓ ⲛⲧⲁϥⲧⲁⲙⲓⲟ ⲛⲁϥ ⲛⲟⲩⲕⲓⲃⲱⲧⲟⲥ · ⲉⲡⲟⲩϫⲁⲓ ⲙⲡⲉϥⲏⲓ · ⲉⲃⲟⲗ ϩⲓⲧⲟⲟⲧⲥ ⲁϥⲧϭⲁⲉⲓⲉⲡⲕⲟⲥⲙⲟⲥ ⲁⲩⲱ ⲁϥϣⲱⲡⲉ ⲛⲕⲗⲏⲣⲟⲛⲟⲙⲟⲥ ⲛⲧⲇⲓⲕⲁⲓⲟⲥⲩⲛⲏ ⲕⲁⲧⲁⲧⲡⲓⲥⲧⲓⲥ ·
…
48 ⲟⲩⲧⲉ ⲧϩⲉ ⲉⲧⲉⲣⲉⲡϣⲁϫⲉ ϫⲱ ⲙⲙⲟⲥ ϫⲉⲉⲃⲟⲗ ϩⲓⲧⲟⲟⲧⲥ ⲁϥⲧϭⲁⲉⲓⲉⲡⲕⲟⲥⲙⲟⲥ ⲛⲧⲁϥⲧϭⲁⲉⲓⲉⲡⲕⲟⲥⲙⲟⲥ ⲁⲛ ϫⲉⲁⲩⲛⲁⲩ ⲉⲣⲟϥ ⲉϥⲧⲁⲙⲓⲟ ⲛⲧⲕⲓⲃⲱⲧⲟⲥ ⲉⲥⲉⲓⲣⲉ ⲛϣⲙⲧϣⲉ ⲙⲙⲁϩⲉ ⲛϣⲓⲏ ⲁⲩⲱ ⲧⲁⲉⲓⲟⲩ ⲙⲙⲁϩⲉ ⲛⲟⲩⲱϣⲥ ⲁⲩⲱ ⲙⲁⲁⲃ ⲙⲙⲁϩⲉ ⲛϫⲓⲥⲉ · ⲉϥⲧⲁⲙⲓⲟ ⲙⲙⲟⲥ ⲟⲩⲛⲧ ⲟⲩⲛⲧ · ⲟⲩⲁϩⲙⲉ ⲥⲛⲧⲉ ϩⲓϣⲟⲙⲧⲉ ⲉϥⲱϭⲥ ⲙⲙⲟⲥ ϩⲓϩⲟⲩⲛ ·
…
49 ⲁⲩⲱ ϩⲓⲃⲟⲗ ⲛⲁⲙⲣⲏϩⲉ ⲉϥⲥⲏⲙⲁⲛⲉ ⲛⲁⲩ ϫⲉⲟⲩⲛⲟⲩⲕⲁⲧⲁⲕⲗⲩⲥⲙⲟⲥ ⲛⲁϣⲱⲡⲉ ϩⲓϫⲙⲡⲕⲁϩ · ⲉⲁϥϣⲱⲡⲉ ⲛⲕⲩⲣⲏⲉ ⲛⲧⲇⲓⲕⲁⲓⲟⲥⲩⲛⲏ ⲛⲧϩⲉ ⲉⲧⲥⲏϩ ·
…
50 ⲁⲩⲱ ⲙⲡⲟⲩⲥⲱⲧⲙ ⲛⲁϥ ϣⲁⲛⲧⲟⲩϣⲱⲡⲉ ϩⲛⲟⲩⲙⲟⲩ ⲛϩⲃⲁ ϩⲓⲟⲣⲅⲏ ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲧⲁⲩϯϭⲱⲛⲧ ⲛⲁϥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ·
…
51 ⲁⲩⲱ ϣⲁⲛⲧⲉⲡⲉⲓⲛⲟϭ ⲛⲧⲁⲕ ⲟⲛ ϥⲱⲧⲉ ⲉⲃⲟⲗ ϣⲱⲡⲉ ϩⲓϫⲙⲡⲕⲁϩ ·
…
52 ⲉⲙⲛⲟⲩϣⲏⲣⲉ ⲥⲕⲉⲡⲁⲍⲉ ⲙⲡⲥⲱⲙⲁ ⲛⲟⲩⲉⲓⲱⲧ ⲉⲧⲣⲉϥⲧⲟⲙⲥϥ ⲟⲩⲧⲉ ⲉⲙⲛⲟⲩⲉⲓⲱⲧ ⲥⲕⲉⲡⲁⲍⲉ ⲛⲛⲉϥϣⲏⲣⲉ ⲉⲧⲣⲉϥϩⲟⲃⲥⲟⲩ ϩⲛⲧⲙⲏⲧⲉ ⲛⲙⲙⲟⲩ ⲛⲉⲓⲟⲟⲩⲉ · ϩⲙⲡⲧⲣⲉⲡⲛⲟⲩⲛ ⲡⲱϩ · ⲁⲩⲱ ⲛⲧⲉⲛⲕⲁⲧⲁϩⲣⲁⲕⲧⲏⲥ ⲛⲧⲡⲉ ⲟⲩⲱⲛ ⲟⲩⲧⲉ ⲙⲙⲛϩⲉ ⲛϩⲓⲟⲙⲉ ⲥⲕⲉⲡⲁⲍⲉ ⲛⲛⲉⲩϩⲁⲓ ·
…
53 ⲟⲩⲧⲉ ⲙⲙⲛϩⲉⲛϩⲁⲓ ⲥⲕⲉⲡⲁⲍⲉ ⲛⲛⲉⲩϩⲓⲟⲙⲉ · ⲟⲩⲧⲉ ⲙⲙⲛϩⲉⲛⲥⲛⲏⲩ ⲥⲕⲉⲡⲁⲍⲉ ⲛϩⲉⲛⲥⲛⲏⲩ ·
…
54 ⲁⲗⲗⲁ ⲡⲉⲓⲧⲁⲕⲟ ⲛⲟⲩⲱⲧ ⲡⲉⲧϣⲟⲟⲡ ⲛⲁⲩ ϩⲓⲟⲩⲥⲟⲡ · ⲟⲩⲧⲉ ⲙⲙⲛⲣⲡⲙⲉⲉⲩⲉ ⲙⲡⲣⲟⲥⲫⲟⲣⲁ ⲃⲏⲕ ⲉϩⲣⲁⲓ ϩⲁⲣⲟⲟⲩ ⲉⲩⲣⲡⲙⲉⲉⲩⲉ ⲛⲁⲩ ·
…
55 ⲏ ϩⲉⲛⲣⲉⲙⲏⲧ ⲙⲛϩⲉⲛϭⲗⲓⲗ ⲉⲩⲑⲩⲥⲓⲁ ⲛⲣⲡⲙⲉⲉⲩⲉ ⲛⲛⲉⲛⲧⲁⲩⲙⲟⲩ ⲁⲗⲗⲁ ⲁⲩϥⲱⲧⲉ ⲉⲃⲟⲗ ⲧⲏⲣⲟⲩ ϩⲛⲟⲩⲧⲁⲕⲟ ⲉⲓⲙⲏⲧⲓ ⲉⲛⲱϩⲉ ⲙⲁⲩⲁⲁϥ ⲉⲛⲧⲁϥϣⲱϫⲡ ⲙⲛⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ϩⲛⲧⲕⲓⲃⲱⲧⲟⲥ · ⲉⲁϥⲧⲁⲗⲟ ⲉϩⲣⲁⲓ ⲛϩⲉⲛⲧⲁⲗⲟ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲙⲛⲛⲥⲁⲧⲣⲉϥⲉⲓ ⲉⲃⲟⲗ ϩⲛⲧⲕⲓⲃⲱⲧⲟⲥ ⲉⲁⲡϫⲟⲉⲓⲥ ϣⲉⲗⲙⲟⲩⲥϯⲛⲟⲩϥⲉ ·
…
56 ⲁϥⲣϩⲧⲏϥ ⲁϥⲥⲙⲓⲛⲉ ⲛⲙⲙⲁϥ ⲛⲟⲩⲇⲓⲁⲑⲏⲕⲏ ϣⲁⲉⲛⲉϩ ·
…
57 ⲛⲧⲉⲛϩⲉ ϩⲱⲱⲛ ⲙⲡⲛⲣϩⲧⲏⲛ ⲉⲛⲱⲱ ⲛⲛⲉⲛⲧⲁϥⲧⲁⲕⲟⲟⲩ ϩⲁⲧⲉⲛϩⲏ ϩⲛⲛⲣⲱⲙⲉ ⲛⲁⲣⲭⲁⲓⲟⲥ ·
…
58 ⲟⲩⲧⲉ ⲙⲡⲛⲕⲱϩ ⲉⲛⲉⲛⲥⲛⲏⲩ ⲉⲧⲉⲓⲣⲉ ⲙⲡⲡⲉⲧⲛⲁⲛⲟⲩϥ ϩⲛⲟⲩϩⲕⲟ ⲙⲛⲟⲩⲉⲓⲃⲉ ϩⲛϩⲉⲛⲛⲏⲥⲧⲉⲓⲁ ⲉⲛⲁϣⲱⲟⲩ ϩⲛϩⲉⲛⲟⲩϣⲏ ⲛⲣⲟⲉⲓⲥ ⲛϩⲁϩ ⲛⲥⲟⲡ · ϩⲛⲟⲩⲧⲃⲃⲟ ⲡⲛⲟϭ ⲛⲕⲉⲫⲁⲗⲁⲓⲟⲛ ⲉⲧⲛϣⲁϫⲉ ⲉⲧⲃⲏⲏⲧϥ ϩⲛⲟⲩⲙⲛⲧⲁⲡⲟⲧⲁⲕⲧⲓⲕⲟⲥ ⲙⲛⲛⲉϩⲃⲏⲩⲉ ⲧⲏⲣⲟⲩ ⲉⲧⲛⲁⲛⲟⲩⲟⲩ ⲉⲧⲟⲩⲉⲓⲣⲉ ⲙⲙⲟⲟⲩ ⲉⲧⲟ ⲙⲙⲛⲧⲣⲉ ⲙⲡⲉⲩⲙⲉ ⲉϩⲟⲩⲛ ⲉⲡⲛⲟⲩⲧⲉ ⲉⲃⲟⲗ ϫⲉⲛⲧⲟϥ ϩⲱⲱϥ ⲡϫⲟⲉⲓⲥ ⲡⲥⲱⲧⲏⲣ ⲛⲁⲅⲁⲑⲟⲥ ⲉⲁϥⲙⲉⲣⲓⲧⲟⲩ ⲛϩⲟⲩⲟ ϣⲁϩⲣⲁⲓ ⲉⲡⲙⲟⲩ
…
59 ⲟⲩⲙⲟⲩ ⲇⲉ ⲛⲥⲧⲁⲩⲣⲟⲥ ⲉⲩⲉⲓⲣⲉ ⲛⲛⲁⲓ ⲙⲛⲛⲉⲓⲕⲟⲟⲩⲉ · ⲉⲛϭⲱϣⲧ ⲛⲥⲱⲟⲩ ⲉⲛⲟⲩⲏϩ ⲛⲙⲙⲁⲩ ·
…
60 ⲙⲡⲛⲣϩⲧⲏⲛ ·
…
61 ⲟⲩⲧⲉ ⲙⲡⲛⲥⲱⲧⲙ ϫⲉⲟⲩⲛⲟⲩϫⲱⲕ ⲉⲃⲟⲗ ⲛⲁϣⲱⲡⲉ ⲉⲛϥϣⲟⲃⲉ ⲁⲛ ⲉⲡⲙⲟⲟⲩ ⲙⲡⲕⲁⲧⲁⲕⲗⲩⲥⲙⲟⲥ ⲉⲓϣⲁϫⲉ ⲉⲡⲙⲟⲩ ·
…
62 ⲛⲧϩⲉ ⲉⲧⲉⲙⲡⲉⲛⲅⲓⲅⲁⲥ ⲛⲁⲣⲭⲁⲓⲟⲥ · ⲙⲛⲡⲗⲁⲟⲥ ⲧⲏⲣϥ ⲛⲧⲁϥⲧⲁⲕⲟ ⲥⲟⲧⲟⲩ ⲉⲛⲁⲩ ⲉⲛⲱϩⲉ · ⲙⲛⲡⲉϥⲏⲓ ⲧⲏⲣϥ ⲉⲛⲧⲁϥⲟⲩϫⲁⲓ ⲧⲁⲓ ⲧⲉ ⲧϩⲉ ⲉⲧⲉⲙⲙⲛϩⲉⲛⲣⲱⲙⲉ ⲛⲣⲉϥⲣⲛⲟⲃⲉ ⲏ ϩⲉⲛⲥⲛⲏⲩ ⲙⲡⲁⲣⲁⲛⲟⲙⲟⲥ ⲛⲁⲥⲟⲧⲟⲩ ⲉⲛⲁⲩ ⲉϩⲉⲛⲥⲛⲏⲩ ⲛⲇⲓⲕⲁⲓⲟⲥ ϩⲙⲡⲉⲩⲙⲧⲟⲛ · ⲙⲛⲡⲉⲩⲣⲁϣⲉ ϩⲙⲡⲧⲣⲉⲩⲙⲟⲩ ⲛϩⲣⲁⲓ ϩⲛⲛⲉⲩⲡⲉⲧϩⲟⲟⲩ ·
…
63 ⲡⲁⲗⲓⲛ ⲟⲛ ⲧⲉⲧⲛⲏⲡ ⲉⲫⲁⲣⲁⲱ ⲙⲛⲡⲉϥⲙⲏⲏϣⲉ ⲧⲏⲣϥ · ⲛⲧⲁϥⲱⲙⲥ ϩⲛⲧⲉⲣⲩⲑⲣⲁ ⲧⲑⲁⲗⲁⲥⲥⲁ ·
…
64 ϫⲉⲁⲩⲣⲁⲧⲥⲱⲧⲙ ⲛⲥⲁⲡⲛⲟⲩⲧⲉ ·
…
65 ⲉϥϣⲁϫⲉ ⲛⲙⲙⲁⲩ ϩⲓⲧⲙⲡⲉⲡⲣⲟⲫⲏⲧⲏⲥ ⲉⲧⲟⲩⲁⲁⲃ ⲙⲱⲩⲥⲏⲥ ⲙⲛⲁⲁⲣⲱⲛ
…
66 ⲧⲉⲧⲛⲏⲡ ⲉⲛⲉⲛⲧⲁⲡϫⲟⲉⲓⲥ ⲡⲁⲧⲁⲥⲥⲉⲓ ⲙⲙⲟⲟⲩ ⲧⲏⲣⲟⲩ ϩⲛⲧⲉⲣⲏⲙⲟⲥ · ϩⲛϩⲉⲛⲙⲟⲩ ⲉⲩϣⲟⲃⲉ ϫⲉⲁⲩⲣⲁⲧⲥⲱⲧⲙ ⲛⲥⲱϥ · ⲉⲧⲣⲉⲩⲉⲓⲣⲉ ⲕⲁⲧⲁⲛⲉⲛⲧⲁϥϩⲱⲛ ⲙⲙⲟⲟⲩ ⲧⲏⲣⲟⲩ ⲉⲧⲟⲟⲧⲟⲩ ⲉⲩⲙⲟⲟϣⲉ ⲙⲛⲡⲗⲁⲟⲥ ⲙⲡⲛⲟⲩⲧⲉ ⲙⲡⲉⲓⲟⲩⲟⲉⲓϣ ⲛⲁⲓ ⲛⲧⲁⲡⲛⲟⲩⲧⲉ ⲥⲕⲉⲡⲁⲍⲉ ⲙⲙⲟⲟⲩ ϣⲁⲛⲧⲉϥϫⲓⲧⲟⲩ ⲉⲡⲕⲁϩ ⲛⲧⲉⲩⲕⲗⲏⲣⲟⲛⲟⲙⲓⲁ
…
67 ⲧⲉⲧⲛⲏⲡ ⲉⲧⲥⲩⲛⲁⲅⲱⲅⲏ ⲛⲕⲟⲣⲉ ⲙⲛⲇⲁⲑⲁⲛ ⲙⲛⲁⲃⲓⲣⲱⲛ ⲛⲁⲓ ⲛⲧⲁⲡⲕⲁϩ ⲡⲱϩ
…
68 ⲁⲩⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲉⲩⲟⲛϩ ⲙⲛⲧⲉⲩⲥⲩⲛⲁⲅⲱⲅⲏ ⲧⲏⲣⲥ
…
69 ⲙⲁⲗⲓⲥⲧⲁ ⲉϣⲱⲡⲉ ⲧⲉⲧⲛⲉⲓⲣⲉ ⲛϩⲉⲛⲡⲁⲣⲁⲛⲟⲙⲓⲁ ϩⲉⲛϫⲱϩⲙ ⲙⲛϩⲉⲛⲥⲱⲱϥ ⲙⲛϩⲉⲛⲡⲁⲣⲁⲫⲩⲥⲓⲥ ·
…
70 ⲧⲉⲧⲛⲕⲗⲏⲣⲟⲛⲟⲙⲓⲁ ⲁⲩⲱ ⲡⲉⲧⲛⲕⲗⲏⲣⲟⲥ ⲛⲁϣⲱⲡⲉ ⲙⲛⲛⲣⲱⲙⲉ ⲛⲥⲟⲇⲟⲙⲁ ⲙⲛⲅⲟⲙⲟⲣⲣⲁ ·
…
71 ⲧⲉⲧⲛⲏⲡ ⲉⲛⲉⲛⲧⲁⲩϫⲓϣⲟϫⲛⲉ ⲧⲏⲣⲟⲩ ⲉϩⲟⲩⲛ ⲉⲡϫⲟⲉⲓⲥ ⲓⲏⲥⲟⲩⲥ ϣⲁⲛⲧⲟⲩⲙⲟⲟⲩⲧϥ ·
…
72 ⲧⲉⲧⲛⲏⲡ ⲉⲛⲉⲛⲧⲁⲩⲧⲥⲧⲟ ⲉⲃⲟⲗ ⲛⲛϣⲁϫⲉ ⲧⲏⲣⲟⲩ ⲛⲛⲉⲡⲣⲟⲫⲏⲧⲏⲥ ϫⲓⲛⲛϣⲟⲣⲡ
…
73 ⲧⲉⲧⲛⲏⲡ ⲉⲛⲉⲛⲧⲁⲩⲧⲥⲧⲟ ⲉⲃⲟⲗ ⲛⲧⲉⲥⲃⲱ ⲛⲛⲁⲡⲟⲥⲧⲟⲗⲟⲥ ·
…
74 ⲁⲩⲱ ⲁⲩⲥⲟϣϥⲟⲩ
…
75 ⲧⲉⲧⲛⲏⲡ ⲉⲛⲉⲛⲧⲁⲩⲁⲣⲛⲁ ⲧⲏⲣⲟⲩ ⲛⲧⲡⲓⲥⲧⲓⲥ ⲉⲧⲟⲩⲟϫ ϫⲓⲛⲛϣⲟⲣⲡ · ⲉⲙⲡⲉⲗⲁⲁⲩ ⲛⲣⲡⲙⲉⲉⲩⲉ ⲙⲙⲁⲕⲁⲣⲓⲥⲙⲟⲥ ϣⲱⲡⲉ ⲛⲁⲩ
…
76 ⲧⲉⲧⲛⲏⲡ ⲉⲛϩⲉⲗⲗⲏⲛ ⲙⲛⲛϩⲁⲓⲣⲉⲧⲓⲕⲟⲥ
…
77 ⲧⲉⲧⲛⲏⲡ ⲉⲛⲃⲁⲣⲃⲁⲣⲟⲥ ⲛⲣⲉϥⲡⲉϩⲧⲥⲛⲟϥ ⲉⲃⲟⲗ ⲛⲧⲁⲛϫⲉⲟⲩϣⲁϫⲉ ⲅⲁⲣ ⲁⲛ ⲉϥⲛⲁϣⲱⲡⲉ ⲁⲛ ·
…
78 ⲁⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲡⲁⲓ ⲛⲧⲁⲡⲛⲟⲩⲧⲉ ϣⲁϫⲉ ⲛϩⲏⲧϥ ϫⲟⲟⲥ ϩⲛⲛⲉϥⲉⲡⲓⲥⲧⲟⲗⲏ ⲉⲧⲟⲩⲁⲁⲃ ·
…
79 ϫⲉⲟⲩϩⲉⲗⲗⲏⲛ · ⲏ ⲟⲩϩⲁⲓⲣⲉⲧⲓⲕⲟⲥ ⲏ ⲟⲩϩⲉⲑⲛⲟⲥ ⲛⲣⲉϥⲡⲉϩⲧⲥⲛⲟϥ ⲉⲃⲟⲗ ⲉϥϣⲁⲛⲕⲧⲟϥ ⲉⲡⲛⲟⲩⲧⲉ · ⲥⲙⲟⲧ ⲛⲉⲧⲣⲉⲡⲛⲟⲩⲧⲉ ϣⲟⲡϥ ⲉⲣⲟϥ ⲛϩⲟⲩⲟ ⲉⲧⲉⲓⲙⲓⲛⲉ ⲛⲥⲟⲛ ⲉⲧⲉⲓⲣⲉ ⲛⲛⲉⲓⲃⲟⲧⲉ ⲛϩⲣⲁⲓ ϩⲛⲛⲉϥⲧⲟⲡⲟⲥ ⲉⲧⲟⲩⲁⲁⲃ ⲉⲣⲉⲡⲣⲁⲛ ⲉⲧⲟⲩⲁⲁⲃ ⲙⲡⲛⲟⲩⲧⲉ ⲙⲛⲡⲉⲥⲭⲏⲙⲁ ⲧⲟ ϩⲓⲱⲟⲩ ·
…
80 ⲏ ⲙⲙⲟⲛ ⲉⲧⲃⲉⲟⲩ ⲛⲧⲉⲧⲛⲉⲓⲙⲉ ⲁⲛ ⲛⲧⲱⲧⲛ ⲛⲥⲟϭ ⲉⲧⲉⲛϩⲉⲛⲥⲁⲃⲉⲉⲩ ⲁⲛ ⲛⲉ
…
81 ϫⲉⲡⲉⲧⲛⲁⲙⲟⲩ ⲛϩⲣⲁⲓ ϩⲛⲛⲉϥⲛⲟⲃⲉ ·
…
82 ⲛⲥⲉϫⲓⲧϥ ⲉⲡⲉⲥⲏⲧ ⲉⲁⲙⲛⲧⲉ · ⲉϥϣⲟⲃⲉ ⲛⲟⲩⲉ ⲛⲉⲛⲧⲁⲛϫⲟⲟⲩ ⲧⲏⲣⲟⲩ ·
…
83 ϫⲉⲥⲉⲛϩⲣⲁⲓ ϩⲛⲁⲙⲛⲧⲉ ·
…
84 ⲁⲩⲱ ⲟⲛ ⲁϥⲧⲁⲙⲟⲛ ⲉⲡⲉⲓⲕⲉⲟⲩⲁ ϩⲛⲛⲉϥⲥϩⲁⲓ ⲉⲧⲟⲩⲁⲁⲃ ·
…
85 ϫⲉⲛⲣⲉϥⲣⲛⲟⲃⲉ ⲧⲏⲣⲟⲩ ⲛⲧⲁⲩⲙⲟⲩ ϫⲓⲛⲛⲕⲁⲉⲓⲛ ϣⲁϩⲣⲁⲓ ⲉⲧⲉⲛⲟⲩ ⲙⲛⲛⲉⲧⲛⲁⲙⲟⲩ ϣⲁⲧⲥⲩⲛⲧⲉⲗⲉⲓⲁ ⲙⲡⲁⲓⲱⲛ · ⲉϣⲁⲩϫⲓⲧⲟⲩ ⲉⲡⲉⲥⲏⲧ ⲉⲁⲙⲛⲧⲉ ⲛⲧϩⲉ ⲉⲧⲉⲣⲉⲡⲉⲩⲁⲅⲅⲉⲗⲓⲟⲛ ϫⲱ ⲙⲙⲟⲥ · ⸓
…
86 ⲏ ⲧⲉⲅⲣⲁⲫⲏ ϫⲱ ⲙⲙⲟⲥ ⲛⲁⲛ ⲁⲛ
…
87 ϫⲉⲉϣϫⲉⲙⲡⲉⲡⲛⲟⲩⲧⲉ ϯⲥⲟ ⲉⲡⲕⲟⲥⲙⲟⲥ ⲛⲁⲣⲭⲁⲓⲟⲥ · ⲉϣϫⲉⲙⲡⲉⲡⲛⲟⲩⲧⲉ ϯⲥⲟ ⲉⲛⲁⲅⲅⲉⲗⲟⲥ ⲛⲧⲉⲣⲟⲩⲣⲛⲟⲃⲉ · ⸓
…
88 ⲙⲡϥϯⲥⲟ ⲉⲛⲉⲧⲙⲟⲟϣⲉ ⲙⲛⲙⲱⲩⲥⲏⲥ ϩⲓⲧⲉⲣⲏⲙⲟⲥ ⲙⲡⲉⲓⲟⲩⲟⲉⲓϣ ⲁⲧⲙⲧⲱⲱⲃⲉ ⲛⲁⲩ
…
89 ⲙⲡϥϯⲥⲟ ⲉⲙⲡⲟⲗⲓⲥ ⲛⲥⲟⲇⲟⲙⲁ · ⲙⲛⲅⲟⲙⲟⲣⲣⲁ · ⲁⲧⲙⲣⲟⲕϩⲟⲩ
…
90 ⲙⲡϥϯⲥⲟ ⲉϩⲉⲛⲡⲣⲟⲫⲏⲧⲏⲥ ⲛⲛⲟⲩϫ · ⲙⲛϩⲉⲛⲁⲡⲟⲥⲧⲟⲗⲟⲥ ⲛⲛⲟⲩϫ ·
…
91 ⲙⲡϥϯⲥⲟ ⲉⲟⲩⲟⲛ ⲛⲓⲙ ⲉⲧⲣⲛⲟⲃⲉ · ⲕⲁⲧⲁⲥⲙⲟⲧ ⲛⲓⲙ ϫⲓⲛⲛⲧⲁⲣⲭⲏ ⲙⲡⲥⲱⲛⲧ ϣⲁϩⲣⲁⲓ ⲉⲧⲉⲛⲟⲩ ⲁⲧⲙⲛⲟϫⲟⲩ ⲉϩⲣⲁⲓ ⲉⲁⲙⲛⲧⲉ ·
…
92 ⲕⲁⲧⲁⲧϩⲉ ⲉⲧⲉⲣⲉⲛⲉⲅⲣⲁⲫⲏ ⲣⲙⲛⲧⲣⲉ ⲛⲛⲉⲧⲛϫⲱ ⲙⲙⲟⲟⲩ ·
…
93 ⲉⲓⲉ ⲉϥⲛⲁϯⲥⲟ ⲉⲣⲟⲛ ⲁⲛⲟⲛ ϫⲉⲉⲛϭⲟⲟⲗⲉ ⲛⲟⲩⲥⲭⲏⲙⲁ ·
…
94 ⲁⲩⲱ ϫⲉⲟⲩⲛⲧⲁⲛ ⲙⲙⲁⲩ ⲙⲡϩⲣⲃ ⲛⲧⲙⲛⲧⲉⲩⲥⲉⲃⲏⲥ · ⲉⲛⲁⲣⲛⲁ ⲇⲉ ⲛⲧⲉⲥϭⲟⲙ ·
…
95 ⲉⲛⲛⲁϫⲟⲟⲥ
…
96 ϫⲉⲟⲩ ⲧⲛⲙⲉ ϩⲛϣⲓⲡⲉ ⲛⲛⲁϩⲣⲛⲛⲉⲛⲉⲓⲟⲧⲉ ⲉⲧⲟⲩⲁⲁⲃ ⲙⲛⲛⲉⲛⲥⲛⲏⲩ ⲉⲧⲟⲩⲁⲁⲃ ⲛⲧⲁⲩⲃⲱⲕ ⲉⲣⲁⲧϥ ⲙⲡⲛⲟⲩⲧⲉ ⲙⲛⲛⲉⲧⲛⲁⲃⲱⲕ ⲉⲣⲁⲧϥ ⲧⲏⲣⲟⲩ ⲉⲩⲟⲩⲁⲁⲃ ϣⲁⲧⲥⲩⲛⲧⲉⲗⲉⲓⲁ ⲙⲡⲁⲓⲱⲛ
…
97 ⲧⲱⲟⲩⲛ ⲛⲧⲛⲙⲉⲧⲁⲛⲟⲉⲓ ⲱ ⲛⲉⲥⲛⲏⲩ ·
…
98 ⲉⲛϩⲟⲥⲟⲛ ⲉⲡⲕⲁⲓⲣⲟⲥ ⲡⲉ ·
…
99 ϫⲉⲕⲁⲥ ⲉⲛⲛⲁⲙⲁⲧⲉ ⲙⲡⲉⲛⲧⲁⲡϫⲟⲉⲓⲥ ϫⲟⲟϥ ·
…
100 ϫⲉⲟⲩⲛⲟⲩⲟⲩⲛⲟⲩ ⲛⲏⲩ ⲉⲧⲉⲧⲉⲩⲛⲟⲩⲧⲉ · ⲉⲣⲉⲛⲉⲧⲙⲟⲟⲩⲧ ⲛⲁⲥⲱⲧⲙ ⲉⲧⲉⲥⲙⲏ ⲙⲡϣⲏⲣⲉ ⲙⲡⲛⲟⲩⲧⲉ ⲁⲩⲱ ⲛⲉⲧⲛⲁⲥⲱ
…