1 ϫⲉⲉⲓⲛⲁϣⲱⲡⲉ ⲛⲧⲉⲕϩⲉ ·
…
2 ϯⲛⲁϫⲡⲓⲟⲕ ⲧⲁⲧⲁϩⲟⲟⲩ ⲉⲣⲁⲧⲟⲩ ⲙⲡⲉⲕⲙⲧⲟ ⲉⲃⲟⲗ · ⲉⲓⲙⲉ ϭⲉ ⲉⲛⲁⲓ ⲛⲉⲧⲣⲡⲱⲃϣ ⲙⲡⲛⲟⲩⲧⲉ ⲡⲉϫⲁϥ ·
…
3 ⲥⲟⲩⲛⲡⲧⲉⲧⲛⲥⲱϣ ⲧⲉⲛⲟⲩ ⲉⲃⲟⲗ ϩⲛⲛⲁⲓ ⲙⲏⲡⲟⲧⲉ ⲛϥⲧⲱⲣⲡ ⲛϥⲧⲙϣⲱⲡⲉ ⲛϭⲓⲡⲉⲧⲛⲟⲩϩⲙ ·
…
4 ⲟⲩⲑⲩⲥⲓⲁ ⲛⲥⲙⲟⲩⲧⲉ ϯⲛⲁϯⲉⲟⲟⲩ ⲛⲁⲓ ⲡⲉϫⲁϥ ⲛⲕⲁⲧⲁⲗⲁⲗⲓⲁ ⲁⲛ ⲙⲏ ⲅⲉⲛⲟⲓⲧⲟ ⲧⲉϩⲓⲏ ⲧⲉ ⲧⲁⲓ ⲉϯⲛⲁⲧⲥⲁⲃⲟⲕ ⲉⲣⲟⲥ ⲉⲧⲣⲁⲛⲁⲓ ⲡⲟⲩϫⲁⲓ ⲙⲡⲛⲟⲩⲧⲉ ·
…
5 ⲱ ϭⲉ ⲡⲉⲧⲛⲁϣⲱⲡⲉ ⲉⲣϣⲁⲛⲛϣⲁϫⲉ ⲛⲧⲉⲅⲣⲁⲫⲏ ⲁϩⲉⲣⲁⲧⲟⲩ ⲉⲣⲟⲛ ϩⲓⲡⲃⲏⲙⲁ ⲙⲡⲉⲭⲣⲓⲥⲧⲟⲥ ⲉⲃⲟⲗ ϫⲉⲧⲁⲓ ⲣⲱ ⲧⲉ ⲧϩⲉ ⲉⲧⲛⲁϣⲱⲡⲉ ·
…
6 ⲛⲅⲥⲟⲟⲩⲛ ⲁⲛ ⲡⲉⲃⲓⲏⲛ ⲛⲧⲁⲗⲁⲓⲡⲱⲣⲟⲥ ⲱ ⲡⲣⲱⲙⲉ · ϫⲉⲡⲉⲧⲕⲛⲁϫⲟϥ · ϥⲛⲁⲣⲱⲧ ⲁⲩⲱ ⲡⲉⲧⲕⲛⲁⲛⲟϫϥ ⲉϩⲣⲁⲓ ⲉⲡⲕⲁϩ ϥⲛⲁⲉⲓ ⲉϩⲣⲁⲓ ·
…
7 ⲉϣϫⲉ ⲁⲡⲥⲱⲧⲏⲣ ⲛⲁⲅⲁⲑⲟⲥ ϫⲟⲟⲥ ϫⲉⲉⲥⲧⲛⲧⲱⲛ ⲛϭⲓⲧⲙⲛⲧⲣⲣⲟ ⲛⲙⲡⲏⲩⲉ ·
…
8 ⲉⲩⲃⲗⲃⲓⲗⲉ ⲛϣⲗⲧⲙ ⲧⲁⲓ ⲛⲧⲁⲟⲩⲣⲱⲙⲉ ϫⲓⲧⲥ ⲁϥϫⲟ ⲙⲙⲟⲥ ϩⲣⲁⲓ ϩⲛⲧⲉϥⲥⲱϣⲉ ⲧⲁⲓ ⲙⲉⲛ ⲟⲩⲕⲟⲩⲓ ⲧⲉ ⲉⲛⲉϭⲣⲱⲱⲣ ⲧⲏⲣⲟⲩ ·
…
9 ϩⲟⲧⲁⲛ ϭⲉ ⲉⲥϣⲁⲛⲁⲩⲝⲁⲛⲉ ϣⲁⲥⲣⲛⲟϭ ⲛⲟⲩⲟⲟⲧⲉ ⲛⲥϣⲱⲡⲉ ⲉⲩⲛⲟϭ ⲛϣⲏⲛ · ϩⲱⲥⲧⲉ ⲛⲥⲉⲉⲓ ⲛϭⲓⲛϩⲁⲗⲁⲧⲉ ⲛⲧⲡⲉ · ⲛⲥⲉⲟⲩⲱϩ ϩⲁⲛⲉⲥⲕⲗⲁⲇⲟⲥ ·
…
10 ⲧⲁⲓ ⲧⲉ ⲧϩⲉ ⲉⲕϣⲁⲛϫⲟ ⲡⲕⲁⲣⲡⲟⲥ ⲉⲧⲛⲁⲛⲟⲩϥ ⲉϩⲣⲁⲓ ⲉⲡⲕⲁϩ ⲉϣⲁϥϯⲟⲩⲱ ⲉϩⲣⲁⲓ ⲛϩⲉⲛⲁϣⲏ ⲛⲕⲁⲣⲡⲟⲥ ⲉⲛⲁⲛⲟⲩⲟⲩ ⲉⲩϩⲟⲗϭ ⲁⲩⲱ ⲉⲩⲱⲫⲉⲗⲉⲓ ⲛⲛⲣⲱⲙⲉ
…
11 ⲧⲁⲓ ⲟⲛ ⲧⲉ ⲧϩⲉ ⲉⲕϣⲁⲛϫⲟ ⲡⲕⲁⲣⲡⲟⲥ ⲉⲧϩⲟⲟⲩ ⲉϩⲣⲁⲓ ⲉⲡⲕⲁϩ ·
…
12 ϣⲁϥⲁⲩⲝⲁⲛⲉ ⲉϥϫⲁϫⲱ ⲁⲩⲱ ⲉϥⲃⲗⲁⲡⲧⲉⲓ ⲛⲛⲉⲧⲙⲟⲟϣⲉ ⲉⲕϣⲁⲛϫⲟⲡ ϫⲉⲃⲉⲗ ⲛⲧⲛⲛⲃⲉ ⲉϩⲁⲓ ⲉⲡⲕⲁϩ ⲁⲛ ⲁⲩϫⲉ ϣⲁⲥϯⲟⲩⲱ ⲉϩⲣⲁⲓ ⲛⲁϣⲛϩⲉ ·
…
13 ⲛⲧⲟⲥ ⲁⲩⲱ ⲛⲕⲉϣⲏⲛ ⲧⲏⲣⲟⲩ ⲉⲧⲛⲁⲛⲟⲩⲟⲩ ⲁⲩⲱ ⲉⲧⲥⲟⲧⲡ ϩⲙⲡⲕⲩⲡⲟⲥ ϣⲁⲣⲉⲡⲉⲧⲉⲛⲱϥ ⲛⲉⲱⲣⲃ ⲉⲣⲱⲟⲩ ⲛⲁϣ ⲛϩⲉ ⲛϩⲉⲛϫⲟ · ⲁⲩⲱ ϣⲁϥϫⲗϫⲱⲗⲟⲩ · ⲛϥϣⲱⲡⲉ ⲉϥⲣⲟⲉⲓⲥ ⲉⲡⲉⲩⲕⲁⲣⲡⲟⲥ · ϫⲉⲛⲁⲛⲟⲩⲟⲩ ⲉⲟⲩⲟⲙⲟⲩ ⲁⲩⲱ ϫⲉⲥⲉⲱⲫⲉⲗⲉⲓ ⲛⲛⲣⲱⲙⲉ ·
…
14 ⲛⲧϩⲉ ⲟⲛ ⲙⲡϭⲱⲙ ⲉⲧⲟⲩϩⲁⲣⲉϩ ⲉⲣⲟϥ ϫⲉⲡⲉϥⲏⲣⲡ ⲱⲫⲉⲗⲉⲓ ·
…
15 ⲁⲩⲱ ϫⲉ ⲟⲩⲟⲩⲣⲟⲧ ⲡⲉ ⲛⲛⲉⲧⲛⲁⲥⲟⲟϥ ⲙⲁⲗⲓⲥⲧⲁ ⲛⲛⲉⲧϣⲱⲛⲉ ·
…
16 ⲁⲛⲁⲩ ⲇⲉ ϩⲱⲱϥ ⲉⲛϫⲉⲃⲉⲗ ⲛⲧϣⲟⲛⲧⲉ ⲉⲕϣⲁⲛϫⲟⲟⲩ ⲉϩⲣⲁⲓ ⲉⲡⲕⲁϩ · ⲙⲛ ϩⲉⲛⲣⲟⲟⲩⲉ · ⲁⲩⲱ ϣⲏⲛ ⲛⲓⲙ ⲉϥϫⲁϫⲱ ⲛⲁⲅⲣⲓⲟⲛ ϫⲉϣⲁⲩϯⲟⲩⲱ ⲉϩⲣⲁⲓ ⲛⲁϣ ⲛϩⲉ ⲉⲙⲁⲩ ⲱⲣⲃ ⲛϩⲉⲛϫⲟ ⲉⲣⲟⲟⲩ · ⲛϭⲓⲛⲉⲧϥⲓⲣⲟⲟⲩϣ ·
…
17 ⲟⲩⲧⲉ ⲙⲁⲩ ϭⲱϣⲧ ⲛⲥⲁⲡⲉⲩⲕⲁⲣⲡⲟⲥ ⲁⲛⲥⲁⲃⲉⲉⲩⲉ ⲟⲩⲱ ⲉⲩⲛⲟⲉⲓⲛ ⲛⲉⲧⲛϫⲱ ⲙⲙⲟⲟⲩ ⲁⲩⲱ ⲛⲥⲉⲣⲭⲣⲉⲓⲁ ⲁⲛ ⲛⲃⲟⲗⲟⲩ ⲉⲣⲟⲟⲩ ·
…
18 ⲥⲟⲩⲛⲡⲕⲁⲣⲡⲟⲥ ⲛⲛⲉⲧⲣϩⲱⲃ ⲉⲧⲇⲓⲕⲁⲓⲟⲥⲩⲛⲏ ϩⲓϫⲙⲡⲕⲁϩ ϩⲛⲛⲉⲛⲧⲁⲛϫⲟⲟⲩ · ⲁⲩⲱ ⲥⲟⲩⲛⲡⲕⲁⲣⲡⲟⲥ ⲟⲛ ⲛⲛⲉⲧⲣϩⲱⲃ ⲉⲧⲁⲛⲟⲙⲓⲁ ϩⲓϫⲙⲡⲕⲁϩ ϩⲛⲛⲉⲛⲧⲁⲛϫⲟⲟⲩ ·
…
19 ⲉⲡⲉⲓⲇⲏ ϭⲉ ⲡⲇⲓⲁⲃⲟⲗⲟⲥ ⲥⲟⲩⲛ · ⲁⲩⲱ ⲟⲩⲡⲁⲛⲟⲩⲣⲅⲟⲥ ⲡⲉ ·
…
20 ϫⲉⲟⲩⲡⲉⲧⲟ ⲛϫⲣⲟ ⲡⲉ ⲡⲣⲱⲙⲉ ϩⲓⲧⲉϩⲓⲏ ⲉⲧϥⲛⲁⲃⲱⲕ ϩⲓⲱⲱⲥ ϣⲁⲡⲉⲛⲧⲁϥⲧⲁⲙⲓⲟϥ ⲉⲧⲃⲉⲡⲁⲓ ϥⲉⲓⲣⲉ ⲛⲁⲡⲁⲧⲟⲟⲧϥ ⲉϫⲱⲗϫ ϩⲁϩⲓ ϩⲛⲛⲉⲧⲛⲁⲡⲉⲓⲑⲉ ⲛⲁϥ
…
21 ⲱ ⲕⲥϩⲟⲩⲟⲣⲧ ⲛⲧⲟⲕ ⲡⲇⲓⲁⲃⲟⲗⲟⲥ · ⲉⲧⲃⲉⲧⲉⲓⲁϣⲏ ⲛⲕⲁⲃⲟⲗ ⲉⲧϣⲟⲃⲉ ⲉⲛⲉⲩⲉⲣⲏⲩ ⲛⲧⲁⲕⲛⲟϫⲟⲩ ⲉϩⲣⲁⲓ ϩⲙⲡⲉⲕϩⲏⲧ ⲙⲡⲟⲛⲏⲣⲟⲛ ·
…
22 ⲉⲁⲕⲉⲛⲉⲣⲅⲉⲓ ⲙⲡⲉⲩⲥⲧⲟⲓ ⲉⲩⲗⲟⲙⲥ ϩⲙⲡϩⲏⲧ ⲛⲛⲁⲧϩⲏⲧ · ⲉⲧⲙⲟⲥⲧⲉ ⲛⲧⲉⲩⲯⲩⲭⲏ ⲛⲥⲁⲃⲉⲉⲩ ⲁⲛ ⲉⲧⲙⲉ ⲛⲧⲉⲩⲯⲩⲭⲏ ⲛⲛⲉⲥϣⲱⲡⲉ ϣⲁⲛⲧⲕⲁⲁⲩ ⲛϣⲙⲙⲟ ⲉⲡⲱⲛϩ ⲉⲕⲛⲁϣⲧⲁⲟⲩⲉⲟⲩⲏⲣ · ⲛⲅⲕⲁⲟⲩⲏⲣ ·
…
23 ⲁⲗⲗⲁ ⲧⲉⲓⲟⲉⲓⲙⲉ ⲧⲁⲓ ⲧⲁⲓ ⲛⲧⲁⲕⲥⲃⲧⲱⲧⲥ ⲉⲛⲉⲧⲫⲟⲣⲉⲓ ⲙⲡⲣⲁⲛ · ⲙⲛⲡⲉⲥⲭⲏⲙⲁ · ⲁⲩⲱ ⲉⲧϩⲛⲛⲧⲟⲡⲟⲥ ⲙⲡⲉⲭⲣⲓⲥⲧⲟⲥ · ⲙⲁⲗⲓⲥⲧⲁ ϩⲙⲡⲕⲁϩ ⲧⲏⲣϥ ⲛⲛⲉⲧⲟⲩⲱϣ ⲉϯⲡⲉⲩⲟⲩⲟⲉⲓ ⲉⲡⲛⲟⲩⲧⲉ ·
…
24 ⲥϩⲏⲡ ⲁⲩⲱ ⲥϩⲟⲥⲉ ⲉⲛⲉⲕⲟⲉⲓⲙⲉ ⲧⲏⲣⲟⲩ ⲛⲧϩⲉ ϩⲱⲱⲥ ⲟⲛ ⲛⲧⲙⲛⲧⲣⲉϥϣⲙϣⲉⲉⲓⲇⲱⲗⲟⲛ · ⲙⲛⲛϩⲁⲓⲣⲉⲧⲓⲕⲟⲥ · ϫⲉⲁⲕⲣⲕⲁⲕⲉ ⲉⲡⲉⲩϩⲏⲧ ϣⲁⲛⲧⲉⲕⲥⲟⲣⲙⲟⲩ · ⲁⲩⲱ ⲛⲅⲁⲁⲩ ⲛⲃⲗⲗⲉ ⲁⲧⲙⲧⲣⲉⲩⲥⲟⲩⲛⲡⲛⲟⲩⲧⲉ ⲛⲧⲁϥⲧⲁⲙⲓⲟⲟⲩ ·
…
25 ⲉⲓϣⲁϫⲉ ⲉⲡⲙⲟⲥⲧⲉ ⲁⲩⲱ ⲧⲕⲁⲧⲁⲗⲁⲗⲉⲓⲁ · ⲙⲛⲡⲕⲱϩ ⲉⲁⲕⲥⲣⲙⲗⲁϩ ⲉⲃⲟⲗ ϩⲛⲛⲁⲓ ⲛⲙⲙⲁⲩ ϩⲛⲟⲩϩⲱⲡ
…
26 ⲧⲉⲅⲣⲁⲫⲏ ⲱϣ ⲉⲃⲟⲗ ϫⲉⲡⲉⲧⲕⲁⲧⲁⲗⲁⲗⲉⲓ ⲙⲡⲉϥⲥⲟⲛ · ⲏ ⲡⲉⲧⲕⲣⲓⲛⲉ ⲙⲡⲉϥⲥⲟⲛ ⲉϥⲕⲁⲧⲁⲗⲁⲗⲉⲓ ⲙⲡⲛⲟⲙⲟⲥ ·
…
27 ⲁⲩⲱ ⲉϥⲕⲣⲓⲛⲉ ⲙⲡⲛⲟⲙⲟⲥ · ⲉϣϫⲉ ⲕⲣⲓⲛⲉ ⲇⲉ ⲙⲡⲛⲟⲙⲟⲥ ⲉⲓⲉ ⲛⲧⲕⲟⲩⲣⲉϥⲉⲓⲣⲉ ⲁⲛ ⲡⲛⲟⲙⲟⲥ ·
…
28 ⲁⲗⲏⲑⲱⲥ ⲡⲉⲧⲕⲁⲧⲁⲗⲁⲗⲉⲓ ⲙⲡⲉⲧϩⲓⲧⲟⲩⲱϥ · ϥⲧⲛⲧⲱⲛ ⲉϩⲁϩ ⲛϩⲱⲃ ⲛⲁⲛⲟⲙⲓⲁ · ϥⲧⲛⲧⲱⲛ ⲉⲙⲡⲟⲣⲛⲟⲥ ⲕⲁⲧⲁⲧϩⲉ ⲛⲧⲁⲛϣⲣⲡϫⲟⲟⲥ
…
29 ⲁⲩⲱ ϥⲧⲛⲧⲱⲛ ⲉⲡⲣⲉϥϫⲓⲟⲩⲉ ϩⲙⲡⲉⲧϥⲉⲓⲣⲉ ⲙⲙⲟϥ · ⲛⲧϩⲉ ⲙⲡϣⲓⲡⲉ ⲛⲟⲩⲣⲉϥϫⲓⲟⲩⲉ ·
…
30 ⲉⲩϣⲁⲛⲧⲁϩⲟϥ ⲕⲁⲧⲁⲛϣⲁϫⲉ ⲛⲧⲉⲅⲣⲁⲫⲏ · ⲉⲣⲉⲡϫⲓⲟⲩⲉ ϩⲛⲧⲉϥϭⲓϫ
…
31 ⲧⲁⲓ ⲟⲛ ⲧⲉ ⲧϩⲉ ⲙⲡϣⲓⲡⲉ ⲛⲟⲩⲣⲉϥⲕⲁⲧⲁⲗⲁⲗⲉⲓ ·
…
32 ⲁⲩⲱ ⲡⲉⲧⲥⲱⲧⲙ ⲉⲣϣⲁⲛⲡⲉⲧⲉⲧⲱϥ ⲧⲉ ⲧⲕⲁⲧⲁⲗⲁⲗⲉⲓⲁ · ⲉⲓ ⲉϩⲣⲁⲓ ⲉϫⲱⲟⲩ · ⲏ ⲛϥⲥⲱⲧⲙ ⲉⲣⲟⲟⲩ ⲉⲩⲥⲟⲟⲩⲛ ⲁⲛ · ⲙⲛⲛⲥⲁⲧⲣⲉⲩϫⲱⲕ ⲉⲃⲟⲗ ⲛⲧⲉⲩⲕⲁⲕⲓⲁ ⲧⲏⲣⲥ ·
…
33 ⲁⲩⲱ ⲛϣⲁϫⲉ ⲛⲕⲱϩ ϩⲓⲙⲟⲥⲧⲉ ⲉⲧϩⲛⲣⲱⲟⲩ · ⲛⲥⲉϭⲱϣⲧ ⲉⲡⲉⲓⲥⲁ ⲙⲙⲟⲟⲩ · ⲛⲥⲉⲛⲁⲩ ⲉⲣⲟϥ ⲉϥⲁϩⲉⲣⲁⲧϥ ⲉϥⲥⲱⲧⲙ ⲉⲣⲟⲟⲩ ⲉⲩⲥⲟⲟⲩⲛ ⲁⲛ ⲁⲩⲱ ⲛⲥⲉϭⲱϣⲧ ϩⲓⲡⲁϩⲟⲩ ⲙⲙⲟⲟⲩ ⲛⲥⲉⲛⲁⲩ ⲉⲣⲟϥ ϩⲛⲛⲉⲛⲧⲁⲩϫⲟⲟⲩ ⲧⲏⲣⲟⲩ
…
34 ⲙⲡⲟⲩⲉⲓⲙⲉ ϫⲉϣⲁϥϣⲓⲃⲉ ⲛⲁϣ ⲛϩⲉ ·
…
35 ⲛϭⲓⲡⲉⲩϩⲟ ⲛⲧⲉⲡⲉⲩϩⲏⲧ ⲃⲱⲗ ⲉⲃⲟⲗ · ϫⲉⲕⲁⲥ ⲉⲛⲛⲁⲉⲓⲙⲉ ϫⲉⲡⲧⲱϣ ⲙⲡⲉⲧϫⲓⲟⲩⲉ ·
…
36 ⲡⲉ ⲡⲧⲱϣ ⲙⲡⲉⲧⲕⲁⲧⲁⲗⲁⲗⲉⲓ ⲁⲩⲱ ⲡⲉⲧⲥⲱⲧⲙ ·
…
37 ⲉϣϫⲉ ⲁϥϣⲓⲃⲉ ⲛϭⲓⲡⲉⲕϩⲟ · ⲁⲩⲱ ⲁϥⲃⲱⲗ ⲉⲃⲟⲗ ⲛϭⲓⲡⲉⲕϩⲏⲧ · ϫⲉⲁⲡⲉⲧⲉⲧⲱϥ ⲧⲉ ⲧⲕⲁⲧⲁⲗⲁⲗⲉⲓⲁ · ⲉⲧⲕϣⲁϫⲉ ⲛⲥⲱϥ ⲥⲱⲧⲙ ⲉⲣⲟⲕ · ⲉⲓⲉ ⲉⲕⲛⲁϣⲧⲟⲣⲧⲣ ⲛⲟⲩⲏⲣ ⲏ ⲡⲉⲕϩⲟ ⲛⲁⲙⲟⲩϩ ⲛϣⲓⲡⲉ ⲛⲟⲩⲏⲣ ϩⲙⲡⲥⲟⲡ ⲉⲧⲟⲩⲛⲏⲩ ⲛⲥⲱⲕ ⲛϭⲓⲛⲉⲧⲕⲥⲟⲟⲩⲛ ⲙⲙⲟⲟⲩ ⲁⲛ
…
38 ⲁⲩⲱ ⲟⲛ ⲛⲥⲉϥⲓⲧⲕ ⲉⲣⲁⲧϥ ⲙⲡⲉⲧⲉⲙⲡⲕⲛⲁⲩ ⲉⲣⲟϥ ⲉⲛⲉϩ ⲡⲉⲭⲣⲓⲥⲧⲟⲥ ⲉⲧⲣⲉϥϫⲓⲕⲃⲁ ⲙⲙⲟⲕ ⲕⲁⲧⲁⲛⲉⲕϩⲃⲏⲩⲉ ⲡⲁⲓ ⲛⲧⲁϥⲙⲉⲣⲉⲡⲣⲱⲙⲉ ⲡⲁⲓ ⲉⲧⲟⲩⲥⲁϩⲟⲩ ⲙⲙⲟϥ ⲙⲡϥⲥⲁϩⲟⲩ ·
…
39 ⲡⲁⲓ ⲛⲧⲁϥⲧⲁⲗⲟϥ ⲉϩⲣⲁⲓ ⲛⲟⲩⲑⲩⲥⲓⲁ ⲉⲥⲟⲩⲁⲁⲃ ⲙⲡⲉϥⲉⲓⲱⲧ ϩⲁⲟⲩⲁⲁⲛ ⲏ ⲥⲛⲁⲩ · ⲟⲩⲧⲉ ϩⲁⲟⲩϩⲉⲑⲛⲟⲥ ⲁⲛ ⲛⲟⲩⲱⲧ · ⲁⲗⲗⲁ ϩⲁⲡⲕⲟⲥⲙⲟⲥ ⲧⲏⲣϥ · ⲛⲛⲉⲧⲟⲩⲱϣ ⲉⲟⲩϫⲁⲓ · ⲡⲁⲓ ⲛⲧⲁϥϯ ⲛⲁⲛ ⲛⲧⲡⲁⲣⲣⲏⲥⲓⲁ ⲁⲩⲱ ⲉⲁϥϯ ⲧϩⲉ ⲛⲁⲛ ⲉⲧⲣⲉⲛⲱϣ ⲉϩⲣⲁⲓ ⲉⲣⲟϥ ⲛⲛⲁⲩ ⲛⲓⲙ ·
…
40 ⲥⲟⲩⲛⲧⲉϥϣⲁϫⲉ ⲛⲙⲙⲁⲕ ⲱ ⲡⲣⲱⲙⲉ · ⲁⲩⲱ ⲧⲉϥⲙⲛⲧⲙⲁⲓⲣⲱⲙⲉ ⲉϩⲟⲩⲛ ⲉⲟⲩⲟⲛ ⲛⲓⲙ ϩⲓⲟⲩⲥⲟⲡ · ⲛⲧϩⲉ ⲛⲧⲁϥⲧⲥⲁⲃⲟⲛ ⲉⲱϣ ⲉϩⲣⲁⲓ ⲉⲣⲟϥ ⲙⲛⲡⲉϥⲉⲓⲱⲧ ϩⲙⲡⲧⲣⲉϥⲧⲥⲁⲃⲟⲛ ⲉϣⲗⲏⲗ ϫⲉⲡⲉⲛⲉⲓⲱⲧ ⲉⲧϩⲛⲙⲡⲏⲩⲉ ·
…
41 ⲙⲡϥϫⲟⲟⲥ ⲛⲁⲕ ϫⲉϫⲟⲟⲥ ϫⲉⲡⲁⲉⲓⲱⲧ ⲙⲁⲩⲁⲁⲧ · ⲁⲗⲗⲁ ⲡⲉⲛⲉⲓⲱⲧ ⲉⲧϩⲛⲙⲡⲏⲩⲉ ⲡⲉⲕⲣⲁⲛ ⲙⲁⲣⲉϥⲟⲩⲟⲡ ·
…
42 ⲧⲉⲕⲙⲛⲧⲣⲣⲟ ⲙⲁⲣⲉⲥⲉⲓ ·
…
43 ⲡⲉⲕⲟⲩⲱϣ ⲙⲁⲣⲉϥϣⲱⲡⲉ · ⲛⲧϩⲉ ⲉⲧϥϩⲛⲧⲡⲉ · ⲙⲁⲣⲉϥϣⲱⲡⲉ ⲟⲛ ϩⲓϫⲙⲡⲕⲁϩ ·
…
44 ⲡⲉⲛⲟⲉⲓⲕ ⲉⲧⲛⲏⲩ ⲡⲉϫⲁϥ ·
…
45 ⲙⲡϥϯⲧϩⲉ ⲛⲁⲕ ⲟⲛ ⲉϫⲟⲟⲥ ϫⲉⲡⲁⲟⲉⲓⲕ ⲉⲧⲛⲏⲩ · ⲧⲁⲁϥ ⲛⲁⲓ ⲙⲡϩⲟⲟⲩ · ⲁⲗⲗⲁ ⲡⲉⲛⲟⲉⲓⲕ ⲉⲧⲛⲏⲩ ⲧⲁⲁϥ ⲛⲁⲛ ⲙⲡϩⲟⲟⲩ
…
46 ⲕⲱ ⲛⲁⲛ ⲉⲃⲟⲗ ⲛⲛⲉⲧⲉⲣⲟⲛ ⲡⲉϫⲁϥ
…
47 ⲙⲡϥϫⲟⲟⲥ ⲛⲁⲕ ϫⲉⲕⲱ ⲛⲁⲓ ⲉⲃⲟⲗ ⲛⲛⲉⲧⲉⲣⲟⲓ ⲡⲉϫⲁϥ · ⲛⲧϩⲉ ϩⲱⲱⲛ ⲟⲛ ⲉⲧⲛⲕⲱ ⲉⲃⲟⲗ ⲛⲛⲉⲧⲉⲟⲩⲛⲧⲁⲛ ⲉⲣⲟⲟⲩ ·
…
48 ⲛⲧⲕⲟⲩ ⲟⲩⲁ ϩⲙⲡⲉⲕϣⲗⲏⲗ ⲁⲗⲗⲁ ⲕⲟⲙⲙⲛⲧⲣⲉ ⲛⲟⲩⲙⲏⲏϣⲉ ϩⲛⲧⲉⲕⲧⲁⲡⲣⲟ ϫⲉⲥⲉⲕⲱ ⲉⲃⲟⲗ ⲛⲛⲉⲧⲉⲟⲩⲛⲧⲁⲩ ⲉⲣⲟⲟⲩ ·
…
49 ⲛⲅⲧⲙϫⲓⲧⲛ ⲉϩⲟⲩⲛ ⲉⲡⲉⲓⲣⲁⲥⲙⲟⲥ ·
…
50 ⲕⲟ ⲛⲟⲩⲁ ⲁⲩⲱ ⲕⲗⲏⲗ ϩⲁϩⲁϩ ϩⲙⲡⲉⲛⲧⲁⲡⲥⲱⲧⲏⲣ ⲙⲙⲁⲓⲣⲱⲙⲉ ⲧⲁⲁϥ ⲉⲧⲉⲕⲧⲁⲡⲣⲟ ·
…
51 ⲁⲗⲗⲁ ⲛⲅⲛⲁϩⲙⲛ ⲉⲃⲟⲗ ϩⲓⲧⲟⲟⲧϥ ⲙⲡⲡⲟⲛⲏⲣⲟⲥ ϫⲉⲧⲱⲕ ⲧⲉ ⲧϭⲟⲙ ⲙⲛⲡⲉⲟⲟⲩ · ϣⲁⲉⲛⲉϩ ⲛⲉⲛⲉϩ ϩⲁⲙⲏⲛ
…
52 ⲉⲓⲧⲁⲥⲟⲩⲛⲧⲁⲅⲁⲡⲏ ⲙⲡⲉⲭⲣⲓⲥⲧⲟⲥ · ⲕⲁⲧⲁⲧϩⲉ ⲛⲧⲁⲛϣⲣⲡϫⲟⲟⲥ ⲉϥⲉⲓⲣⲉ ⲙⲡⲉϥⲧⲁⲙⲓⲟ ⲧⲏⲣϥ ⲛⲟⲩⲁ ϩⲙⲡⲉⲩϣⲗⲏⲗ ⲉϥⲟⲩⲱϣ ⲉⲧⲣⲉⲛⲙⲉⲣⲉⲛⲉⲛⲉⲣⲏⲩ ⲉⲓⲧⲉ ϩⲛⲧⲉⲛϭⲓⲛⲟⲩⲱϩ ϩⲓⲟⲩⲥⲟⲡ ⲉⲓⲧⲉ ⲧⲉⲛϭⲓⲛⲙⲟⲟϣⲉ ·
…
53 ⲉⲓⲧⲉ ⲧⲉⲛϭⲓⲛⲃⲱⲕ ⲉⲧⲉⲕⲕⲗⲏⲥⲓⲁ ⲉⲓⲧⲉ ⲧⲉⲛϭⲓⲛϫⲓ ⲉⲃⲟⲗ ϩⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡϫⲟⲉⲓⲥ · ⲉⲛⲟ ⲛⲟⲩⲙⲛⲧⲟⲩⲁ ⲛⲟⲩⲱⲧ ⲙⲛⲧⲁⲅⲁⲡⲏ ⲙⲛⲟⲩⲙⲛⲧϩⲏⲧ ⲛⲟⲩⲱⲧ ϩⲙⲡⲉⲭⲣⲓⲥⲧⲟⲥ ⲉⲛϣⲗⲏⲗ ϩⲁⲛⲉⲛⲉⲣⲏⲩ ϩⲛⲟⲩⲁⲅⲁⲡⲏ ·
…
54 ⲕⲁⲧⲁⲧϩⲉ ⲛⲧⲁϥⲧⲥⲁⲃⲟⲛ ⲉϣⲗⲏⲗ · ϫⲉⲕⲁⲥ ⲉϥⲉϫⲓⲧϥ ⲛⲧⲟⲟⲧⲛ · ⲛϥⲛⲁϩⲙⲛ ⲉⲃⲟⲗ ϩⲓⲧⲟⲟⲧϥ ⲙⲡⲡⲟⲛⲏⲣⲟⲥ ⲛϥⲭⲁⲣⲓⲍⲉ ⲛⲁⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ ·
…
55 ⲛⲧⲛⲕⲱ ⲉⲃⲟⲗ ⲛⲁⲣⲓⲕⲉ ⲛⲓⲙ ⲉϥϩⲙⲡⲉⲛϩⲏⲧ ⲉϩⲟⲩⲛ ⲉⲡⲉⲧϩⲓⲧⲟⲩⲱⲛ ϫⲉⲕⲁⲥ ⲉϥⲉⲕⲱ ϩⲱⲱⲛ ⲛⲁⲛ ⲉⲃⲟⲗ ·
…
56 ϫⲉⲛⲛⲉⲛϣⲱⲡⲉ ⲛⲣⲉϥϫⲓϭⲟⲗ ϩⲙⲡⲉⲛϣⲗⲏⲗ · ϫⲉⲕⲱ ⲛⲁⲛ ⲉⲃⲟⲗ · ⲛⲧϩⲉ ϩⲱⲱⲛ ⲉⲧⲛⲕⲱ ⲉⲃⲟⲗ ⲛⲛⲉⲧⲉⲟⲩⲛⲧⲁⲛ ⲉⲣⲟⲟⲩ ·
…
57 ⲁⲩⲱ ⲟⲛ ϫⲉ ⲉϣⲱⲡⲉ ⲟⲩⲁ ⲉⲟⲩⲛⲧϥ ⲟⲩⲁⲣⲓⲕⲉ ⲙⲛⲟⲩⲁ ⲕⲁⲧⲁⲧϩⲉ ⲛⲧⲁⲡⲉⲭⲣⲓⲥⲧⲟⲥ ⲕⲱ ⲛⲏⲧⲛ ⲉⲃⲟⲗ ·
…
58 ⲁⲣⲓⲧⲉⲓϩⲉ ϩⲱⲧ ⲧⲏⲩⲧⲛ ⲁⲩⲱ ⲟⲛ ϫⲉⲉⲧⲉⲧⲛϣⲁⲛⲕⲱ ⲉⲃⲟⲗ ⲛⲛⲣⲱⲙⲉ · ⲛⲛⲉⲩⲛⲟⲃⲉ · ϥⲛⲁⲕⲱ ϩⲱⲱϥ ⲛⲏⲧⲛ ⲉⲃⲟⲗ ⲛⲛⲉⲧⲛⲛⲟⲃⲉ ⲛϭⲓⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ ·
…
59 ⲉⲧⲉⲧⲛⲧⲙⲕⲱ ⲅⲁⲣ ⲉⲃⲟⲗ ⲛⲛⲣⲱⲙⲉ ⲛⲛⲉⲩⲛⲟⲃⲉ · ⲡⲉϫⲁϥ ⲛϥⲛⲁⲕⲱ ⲛⲏ ⲁⲛ ⲉⲃⲟⲗ ⲛⲛⲉⲧⲛⲛⲟⲃⲉ ⲛϭⲓⲡⲉⲧⲛⲉⲓⲱⲧ
…
60 ⲟⲩ ⲉⲣⲟⲛ · ⲧⲉⲛⲟⲩ ⲡⲉ ϩⲉⲛⲕⲱϩ ⲙⲛ ϩⲉⲛⲙⲟⲥⲧⲉ ⲁⲩⲱ ϩⲉⲛⲕⲁⲧⲁⲗⲁⲗⲉⲓⲁ ·
…
61 ⲙⲁⲗⲓⲥⲧⲁ ϩⲉⲛϫⲱϩⲙ ⲙⲛϩⲉⲛⲥⲱⲱϥ ⲁⲩⲱ ϩⲉⲛϫⲓⲛϭⲟⲛⲥ · ⲙⲛϩⲉⲛⲙⲛⲧⲙⲁⲓⲧⲟ ⲛϩⲟⲩⲟ · ⲙⲛⲡⲕⲉ ⲥⲉⲉⲡⲉ ⲛϩⲱⲃ ⲛⲃⲟⲧⲉ · ⲛⲧⲉⲡⲇⲓⲁⲃⲟⲗⲟⲥ · ⲙⲛⲛⲉϥⲇⲁⲓⲙⲱⲛ ⲉⲣⲉⲡⲛⲟⲩⲧⲉ ⲙⲛⲡⲉϥⲭⲣⲓⲥⲧⲟⲥ ·
…
62 ϩⲱⲧⲡ ⲙⲙⲟⲛ ⲉⲩⲙⲛⲧϣⲏⲣⲉ ⲛⲁϥ ϩⲛⲧⲙⲛⲧⲣⲣⲟ ⲛⲙⲡⲏⲩⲉ · ⲉⲧⲣⲉⲛⲕⲗⲏⲣⲟⲛⲟⲙⲉⲓ ⲙⲛⲡⲉⲭⲣⲓⲥⲧⲟⲥ · ϣⲁⲛⲁⲓⲱⲛ ⲛⲛⲁⲓⲱⲛ ϩⲛⲉⲟⲟⲩ ⲛⲓⲙ · ⲙⲛⲥⲙⲟⲩ ⲛⲓⲙ ϣⲁⲉⲛⲉϩ ·
…
63 ⲉⲛⲟ ⲛⲟⲩ ⲧⲉⲛⲟⲩ ⲙⲛⲡⲇⲓⲁⲃⲟⲗⲟⲥ ⲙⲛⲛⲉϥⲇⲁⲓⲙⲱⲛ ϫⲉⲉⲩⲛⲁϫⲓⲕⲃⲁ ⲙⲙⲟⲛ ⲛⲙⲙⲁϥ ⲛϩⲣⲁⲓ ϩⲛⲁⲙⲛⲧⲉ ϩⲙⲡⲕⲱϩⲧ ⲛⲧⲅⲉϩⲉⲛⲛⲁ ⲙⲛⲡⲃⲛⲧ ⲉⲧⲉⲙⲉϥⲛⲕⲟⲧⲕ ⲉⲁⲛⲟⲛ ϩⲉⲛⲉⲃⲟⲗ ⲙⲙⲟϥ ⲁⲛ ·
…
64 ⲟⲩ ⲧⲉⲛⲟⲩ ⲉⲃⲟⲗ ⲙⲙⲟⲛ ⲁⲛ ⲡⲉ · ⲁⲗⲗⲁ ⲁⲛⲟⲛ ϩⲉⲛⲉⲃⲟⲗ ϩⲙⲡⲛⲟⲩⲧⲉ ·
…
65 ⲛⲧⲟϥ ⲅⲁⲣ ⲡⲉⲛⲧⲁϥⲛⲓϥⲉ ⲉϩⲟⲩⲛ ϩⲙⲡⲉⲛϩⲟ · ⲛⲟⲩⲡⲛⲟⲏ ⲛⲱⲛϩ ⲁⲩⲱ ⲉⲁⲛⲣⲟⲩⲁ ⲛⲟⲩⲱⲧ ⲛⲙⲙⲁϥ ϩⲓⲧⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡⲉϥϣⲏⲣⲉ ⲉⲧⲟⲩⲁⲁⲃ ·
…
66 ⲡⲁⲓ ⲛⲧⲁϥⲭⲁⲣⲓⲍⲉ ⲙⲙⲟϥ ⲛⲁⲛ · ⲉⲁⲛϣⲱⲡⲉ ⲛⲟⲩⲙⲛⲧϣⲏⲣⲉ ⲛⲟⲩⲱⲧ ⲙⲛⲧⲉⲧⲣⲓⲁⲥ ⲉⲧⲟⲩⲁⲁⲃ ⲉⲓⲧⲉ ⲕⲟⲩⲓ ⲉⲓⲧⲉ ⲛⲟϭ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲟⲩⲟⲛ ⲛⲓⲙ ⲉⲧϫⲓ ⲉⲃⲟⲗ ϩⲙⲡⲥⲱⲙⲁ ⲙⲛⲡⲉⲥⲛⲟϥ ⲙⲡϫⲟⲉⲓⲥ ·
…
67 ⲁⲛⲣⲟⲩⲁ ⲛⲟⲩⲱⲧ ⲙⲛⲡⲛⲟⲩⲧⲉ ·
…
68 ϩⲱⲥ ⲛⲟⲩⲧⲉ ⲁⲛ ⲙⲏ ⲅⲉⲛⲟⲓⲧⲟ ·
…
69 ⲁⲗⲗⲁ ϩⲱⲥ ϣⲏⲣⲉ ⲙⲡⲉⲩⲉⲓⲱⲧ ⲉⲧⲟⲩⲁⲁⲃ · ⲁⲩⲱ ϩⲱⲥ ⲥⲟⲛ · ⲙⲡⲉⲭⲣⲓⲥⲧⲟⲥ ⲉⲧⲥⲙⲁⲙⲁⲁⲧ ⲡⲣⲣⲟ ⲛⲧⲡⲉ ⲙⲛⲡⲕⲁϩ ·
…
70 ⲕⲁⲧⲁⲡⲉⲛⲧⲁϥϫⲟⲟϥ ϩⲛⲧⲉϥⲧⲁⲡⲣⲟ ⲙⲙⲉ · ϫⲉⲡⲉⲧⲉⲓⲣⲉ ⲙⲡⲟⲩⲱϣ ⲙⲡⲁⲉⲓⲱⲧ ⲉⲧϩⲛⲙⲡⲏⲩⲉ · ϩⲙⲡⲧⲣⲉⲩϫⲛⲟⲩϥ ϫⲉⲉⲓⲥ ⲧⲉⲕⲙⲁⲁⲩ ⲙⲛⲛⲉⲕⲥⲛⲏⲩ ⲁϩⲉⲣⲁⲧⲟⲩ ϩⲓⲡⲥⲁ ⲛⲃⲟⲗ · ⲉⲩⲟⲩⲱϣ ⲉϣⲁϫⲉ ⲛⲙⲙⲁⲕ ⲉⲁϥⲟⲩⲱϣⲃ ⲛϭⲓⲡⲉⲧϫⲱ ⲙⲙⲟⲥ ⲛⲁϥ · ϫⲉⲛⲓⲙ ⲧⲉ ⲧⲁⲙⲁⲁⲩ ·
…
71 ⲁⲩⲱ ⲛⲓⲙ ⲛⲉ ⲛⲁⲥⲛⲏⲩ ⲡⲉⲧⲉⲓⲣⲉ ⲅⲁⲣ ⲙⲡⲟⲩⲱϣ ⲙⲡⲁⲉⲓⲱⲧ ⲉⲧϩⲛⲙⲡⲏⲩⲉ ⲡⲁⲓ ⲡⲉ ⲡⲁⲥⲟⲛ ⲁⲩⲱ ⲧⲁⲥⲱⲛⲉ ⲁⲩⲱ ⲧⲁⲙⲁⲁⲩ
…
72 ⲉⲟⲩⲛⲧⲁⲛ ϭⲉ ⲙⲙⲁⲩ ⲛⲛⲉⲓⲉⲣⲏⲧ ⲛⲁⲙⲉⲣⲁⲧⲉ ·
…
73 ⲙⲁⲣⲉⲛⲧⲃⲃⲟⲛ ⲉⲃⲟⲗ ϩⲛⲧⲱⲗⲙ ⲛⲓⲙ ⲛⲧⲉⲧⲥⲁⲣⲝ · ⲙⲛⲡⲉⲡⲛⲉⲩⲙⲁ · ⲉⲛϫⲱⲕ ⲉⲃⲟⲗ ⲛⲟⲩⲧⲃⲃⲟ ϩⲛⲧϩⲟⲧⲉ ⲙⲡⲛⲟⲩⲧⲉ ⲙⲡϫⲟⲉⲓⲥ ·
…
74 ⲕⲁⲧⲁⲡⲉⲛⲧⲁⲡⲁⲡⲟⲥⲧⲟⲗⲟⲥ ϫⲟⲟϥ · ⲉⲛⲧⲛϯ ⲁⲛ ⲛⲟⲩϫⲣⲟⲡ ⲛⲟⲩⲱⲧ ϩⲛⲗⲁⲁⲩ ⲛϩⲱⲃ · ϫⲉⲛⲛⲉⲟⲩⲁ ⲥⲉ ϣϥⲧⲉ ⲛⲇⲓⲁⲕⲟⲛⲓⲁ ·
…
75 ⲕⲁⲧⲁⲧϩⲉ ⲟⲛ ⲛⲧⲁϥϫⲉⲡⲁⲓ ·
…
76 ⲕⲥⲙⲁⲙⲁⲁⲧ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ·
…
77 ⲡⲉⲓⲱⲧ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲡⲉⲛⲧⲁϥⲧⲁⲙⲓⲉⲡⲧⲏⲣϥ ϩⲓⲧⲙⲡⲉϥϣⲏⲣⲉ ⲙⲙⲉⲣⲓⲧ ⲉⲧⲟⲩⲁⲁⲃ ·
…
78 ⲕⲥⲙⲁⲙⲁⲁⲧ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
79 ⲁⲩⲱ ϥⲥⲙⲁⲙⲁⲁⲧ ⲛϭⲓⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲡⲣⲉϥϫⲓϣⲟϫⲛⲉ ⲙⲛⲡⲉϥⲉⲓⲱⲧ ⲉⲧⲟⲩⲁⲁⲃ · ⲉⲥⲙⲟⲩ ⲛⲓⲙ ⲉϩⲣⲁⲓ ⲉϫⲙⲡⲕⲁϩ ·
…
80 ⲁⲩⲱ ⲉⲙⲛⲧⲛⲁⲏⲧ ⲛⲓⲙ ϩⲓⲙⲛⲧϣⲁⲛϩⲧⲏϥ ⲉϩⲣⲁⲓ ⲉϫⲙⲡⲕⲁϩ · ⲁⲩⲱ ⲉⲙⲛⲧϩⲁⲣϣϩⲏⲧ ϩⲓⲁⲛⲟⲭⲏ ·
…
81 ⲉⲕⲧⲙⲕⲱ ⲅⲁⲣ ⲛⲁⲛ ⲉⲃⲟⲗ · ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ · ⲁⲩⲱ ⲉⲕⲧⲙϩⲱⲃⲥ ⲉⲃⲟⲗ ⲉϫⲛⲛⲉⲛⲛⲟⲃⲉ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲙⲙⲛⲧⲁⲛϣⲁⲩ ⲙⲙⲁⲩ ⲛⲛⲁϩⲣⲁⲕ ·
…
82 ⲟⲩⲧⲉ ⲛⲧⲛⲛⲁⲟⲩⲱⲛϩ ⲉⲃⲟⲗ ⲁⲛ ϩⲟⲗⲱⲥ ⲙⲡⲉⲕⲙⲧⲟ ⲉⲃⲟⲗ ·
…
83 ⲁⲗⲗⲁ ⲧⲛⲥⲟⲡⲥ ⲙⲙⲟⲕ ⲡⲛⲟⲩⲧⲉ ⲛⲛϭⲟⲙ ⲡⲉⲛⲧⲁϥⲣⲛⲉⲓϣⲡⲏⲣⲉ ⲧⲏⲣⲟⲩ ϩⲙⲡⲓⲥⲣⲁⲏⲗ ϫⲓⲛⲛϣⲟⲣⲡ ⲉⲧⲃⲉⲁⲃⲣⲁϩⲁⲙ ⲙⲛⲓⲥⲁⲁⲕ · ⲙⲛⲓⲁⲕⲱⲃ · ⲉⲧⲣⲉⲕⲁⲁⲩ ⲟⲛ ⲛⲙⲙⲁⲛ ⲧⲉⲛⲟⲩ · ⲉⲧⲃⲉⲡⲉⲕⲣⲁⲛ ⲉⲧⲟⲩⲁⲁⲃ ⲁⲩⲱ ⲉⲧⲃⲉⲡⲉⲕⲙⲉⲣⲓⲧ ⲛϣⲏⲣⲉ ⲉⲧⲟⲩⲁⲁⲃ ⲓⲏⲥⲟⲩⲥ ⲡⲉⲛⲥⲱⲧⲏⲣ · ⲁⲩⲱ ⲡⲉⲛⲱⲛϩ ·
…
84 ⲛⲅⲧⲙϥⲓⲱⲡ ⲛⲙⲙⲁⲛ ϫⲉⲁⲛⲟⲛ ϩⲉⲛⲥⲁⲣⲝ · ⲁⲩⲱ
…