1 ⲛⲉⲡⲣⲟⲫⲏⲧⲏⲥ ϫⲉⲕⲧⲉⲧⲏⲩⲧⲛ ⲉⲣⲟⲓ ⲧⲁⲣⲉⲧⲉⲧⲛⲱⲛϩ · ⲛⲁ ϫⲓⲛⲁⲣⲏϫϥ ⲙⲡⲕⲁϩ · ⲏ ϫⲉⲕⲧⲉⲧⲏⲩⲧⲛ ⲉⲣⲟⲓ ⲛⲧⲁⲧⲁⲗϭⲟ ⲛⲛⲉⲧⲛⲟⲩⲱϣϥ · ⲏ ϫⲉⲁⲙⲏⲓⲧⲛ ⲉⲃⲟⲗ ϩⲛⲧⲉⲩⲙⲏⲧⲉ · ⲛⲧⲉⲧⲛⲡⲣϫⲧⲏⲩⲧⲛ ⲉⲣⲟⲟⲩ ·
…
2 ⲁⲩⲱ ⲁⲛⲟⲕ ϯⲛⲁϣⲉⲡⲧⲏⲩⲧⲛ ⲉⲣⲟⲓ ϫⲉⲁⲛⲅ ⲟⲩⲛⲁⲏⲧ ⲁⲛⲟⲕ · ⲏ ϫⲉϯⲛⲁϣⲱⲡⲉ ⲛⲏⲧⲛ ⲉⲩⲛⲟⲩⲧⲉ · ⲛⲧⲉⲧⲛϣⲱⲡⲉ ⲛⲁⲓ ⲉⲟⲩⲗⲁⲟⲥ ·
…
3 ⲁⲩⲱ ϫⲉϯⲛⲁϣⲱⲡⲉ ⲛⲏⲧⲛ ⲉⲩⲉⲓⲱⲧ ⲛⲧⲉⲧⲛϣⲱⲡⲉ ⲛⲁⲓ ⲉϩⲉⲛϣⲏⲣⲉ ⲙⲛϩⲉⲛϣⲉⲉⲣⲉ
…
4 ⲉϣϫⲉ ⲡⲉⲧⲧⲃⲃⲏⲩ ⲅⲁⲣ ⲙⲛⲛⲉⲧⲟⲩⲧⲃⲃⲟ ⲙⲙⲟⲟⲩ · ϩⲉⲛⲉⲃⲟⲗ ϩⲛⲟⲩⲁ ⲧⲏⲣⲟⲩ ⲛⲉⲕⲁⲧⲁⲛⲉⲅⲣⲁⲫⲏ ⲉⲧⲉⲡⲛⲟⲩⲧⲉ ⲡⲉ
…
5 ⲟⲩⲕ ⲟⲩⲛ ⲡⲉⲧϫⲁϩⲙ ⲟⲛ ⲡⲇⲓⲁⲃⲟⲗⲟⲥ ⲙⲛⲛⲉⲧϫⲱϩⲙ ⲙⲙⲟⲟⲩ · ϩⲉⲛⲉⲃⲟⲗ ϩⲛⲟⲩⲁ ⲧⲏⲣⲟⲩ ⲛⲉ ⲉⲧⲉⲛⲧⲟϥ ⲡⲉ · ⲉⲓⲧⲉ ⲇⲁⲓⲙⲱⲛ · ⲉⲓⲧⲉ ⲛⲉⲡⲛⲉⲩⲙⲁ ⲛⲁⲕⲁⲑⲁⲣⲧⲟⲛ ⲧⲏⲣⲟⲩ ⲙⲡⲗⲁⲛⲟⲥ ⲉⲧⲛⲙⲙⲁϥ · ⲉⲓⲧⲉ ⲛⲉϩⲓⲟⲙⲉ ⲙⲡⲟⲣⲛⲏ ⲁⲩⲱ ⲛϩⲟⲟⲩⲧ ⲉⲧⲟ ⲛⲁⲧϣⲁⲩ ⲕⲁⲧⲁⲥⲙⲟⲧ ⲛⲓⲙ ϩⲉⲛⲉⲃⲟⲗ ⲛϩⲏⲧϥ ⲧⲏⲣⲟⲩ ⲛⲉⲡⲇⲓⲁⲃⲟⲗⲟⲥ · ⲟⲩⲟⲛ ⲛⲓⲙ ⲉⲧⲣⲛⲟⲃⲉ ⲕⲁⲧⲁⲗⲁⲁⲩ ⲛⲥⲙⲟⲧ ·
…
6 ⲟⲩ ϭⲉ ⲡⲉⲧⲛⲁϣⲱⲡⲉ · ⲙⲛⲛⲥⲁⲧⲣⲉϥⲟⲩⲱ ⲛϭⲓⲡϫⲱⲕ ⲙⲡϩⲁⲡ ⲙⲡⲡⲁⲛⲧⲟⲕⲣⲁⲧⲱⲣ ⲓⲏⲥⲟⲩⲥ ⲁⲩⲱ ⲡϣⲏⲣⲉ ⲙⲡⲡⲁⲛⲧⲟⲕⲣⲁⲧⲱⲣ ⲥⲁⲃⲁⲱⲑ ⲉϥϩⲙⲟⲟⲥ ⲉϩⲣⲁⲓ ⲉϫⲛⲛⲉⲭⲁⲓⲣⲟⲩⲃⲓⲛ · ⲉⲣⲉⲛⲥⲉⲣⲁⲫⲓⲛ ⲛⲟⲩⲟⲉⲓⲛ ⲁϩⲉⲣⲁⲧⲟⲩ ⲉⲣⲟϥ ⲙⲛⲛⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲛⲟⲩⲛⲟϭ ⲛⲉⲟⲟⲩ ⲙⲛⲛⲉϥⲡⲉⲧⲟⲩⲁⲁⲃ ⲧⲏⲣⲟⲩ · ⲕⲁⲧⲁⲡⲉⲧⲥⲏϩ ϫⲉⲛⲉⲧⲟⲩⲁⲁⲃ ⲛⲉⲧⲛⲁⲕⲣⲓⲛⲉ ⲙⲡⲕⲟⲥⲙⲟⲥ ·
…
7 ⲛⲥⲉⲥⲉϩ ⲉⲛⲉⲧϩⲓϩⲃⲟⲩⲣ ⲧⲏⲣⲟⲩ ⲉϩⲣⲁⲓ ⲉⲁⲙⲛⲧⲉ ⲙⲛⲡⲇⲓⲁⲃⲟⲗⲟⲥ ⲛⲥⲉⲧⲱⲱⲃⲉ ⲉⲣⲱϥ ⲛⲙⲙⲁⲩ ⲁⲩⲱ ⲛⲥⲉⲧⲱⲱⲃⲉ ⲉⲣⲱⲟⲩ ⲛⲙⲙⲁϥ ·
…
8 ⲁϣ ϭⲉ ⲡⲉ ⲡⲣⲡⲙⲉⲉⲩⲉ ⲛⲛⲁⲓ ϫⲓⲛⲙⲡⲉⲓⲛⲁⲩ ⲛⲛⲁϩⲣⲙⲡⲛⲟⲩⲧⲉ ·
…
9 ⲱ ⲡⲉⲓⲛⲟϭ ⲛⲙⲕⲁϩ ⲛϩⲏⲧ · ⲁⲩⲱ ⲧⲉⲓⲛⲟϭ ⲛⲗⲩⲡⲏ ⲙⲡⲉⲧⲛⲟⲉⲓ ⲛⲛⲁⲓ ⲉⲧⲛⲁϣⲱⲡⲉ · ϩⲙⲡⲉϩⲟⲟⲩ ⲉⲧⲙⲙⲁⲩ · ⲉⲧⲃⲉϫⲉ ⲙⲡⲛⲥⲱⲧⲙ ⲛⲥⲁⲛⲉⲅⲣⲁⲫⲏ ⲁⲗⲗⲁ ⲉⲁⲛⲟⲃϣⲛ ⲁⲛⲛⲉϫⲛⲉⲩϣⲁϫⲉ ϩⲓⲡⲁϩⲟⲩ ⲙⲙⲟⲛ ·
…
10 ⲉⲁⲛϫⲓ ⲛⲁⲛ ⲛⲟⲩⲧⲱⲙ ⲛϩⲏⲧ · ⲁⲩⲱ ⲟⲩⲙⲛⲧⲁⲙⲉⲗⲏⲥ ϣⲁⲛⲧⲉⲛⲁⲓ ⲧⲱⲙⲧ ⲉⲣⲟⲛ ⲉⲙⲡⲛⲟⲩⲱϣ ⲁⲛ ⲡⲉ ⲉⲧⲣⲉⲩⲧⲱⲙⲧ ⲉⲣⲟⲛ ·
…
11 ⲁⲩⲱ ϣⲁⲛⲧⲛϣⲱⲡⲉ ϩⲛⲛⲁⲓ · ⲉⲙⲡⲉⲛⲟⲩⲱϣ ⲁⲛ ⲡⲉϣⲱⲡⲉ ⲛϩⲏⲧⲟⲩ · ⲙⲏ ⲙⲡϫⲟⲉⲓⲥ ϫⲱ ⲙⲙⲟⲥ ⲁⲛ ·
…
12 ϫⲉϩⲱⲃ ⲛⲓⲙ ⲉⲧⲉⲧⲛⲟⲩⲁϣⲟⲩ ϫⲉⲕⲁⲥ ⲉⲣⲉⲛⲣⲱⲙⲉ ⲛⲁⲁⲁⲩ ⲛⲏⲧⲛ ⲛⲧⲱⲧⲛ ϩⲱⲧⲧⲏⲩⲧⲛ ·
…
13 ⲁⲣⲓⲥⲟⲩ ⲛⲁⲩ ⲛⲧⲉⲓϩⲉ ·
…
14 ⲡⲁⲓ ⲅⲁⲣ ⲡⲉ ⲡⲛⲟⲙⲟⲥ ⲁⲩⲱ ⲛⲉⲡⲣⲟⲫⲏⲧⲏⲥ
…
15 ⲕⲁⲓ ⲅⲁⲣ ⲙⲡϥϩⲱⲡ ⲡϩⲱⲃ ⲉⲣⲟⲛ ⲉⲧⲙⲧⲁⲙⲟⲛ ⲛϭⲓⲡⲥⲱⲧⲏⲣ ⲛⲁⲅⲁⲑⲟⲥ ϫⲉⲥⲟⲩⲁϣⲥ ⲛϭⲓⲧⲡⲩⲗⲏ ·
…
16 ⲁⲩⲱ ⲥⲟⲩ ⲉⲥⲧⲱⲛ ⲛϭⲓⲧⲉϩⲓⲏ ⲉⲧϫⲓⲙⲟⲉⲓⲧ ⲉϩⲟⲩⲛ ⲉⲡⲧⲁⲕⲟ ·
…
17 ⲙⲡϥⲟⲃϣϥ ⲇⲉ ⲟⲛ ⲉⲧⲙⲧⲁⲙⲟⲛ ⲉⲧⲃⲉ ⲧⲉⲓⲕⲉⲧ ϫⲉⲥϭⲏⲩ ⲁⲩⲱ ⲥϩⲉϫϩⲱϫ
…
18 ⲉϥⲟⲩⲱϩ ⲇⲉ ⲟⲛ ⲉⲧⲟⲟⲧϥ ⲉⲱⲣϫ ⲙⲡϩⲱⲃ · ⲛⲧⲙⲛⲧⲙⲁⲓⲣⲱⲙⲉ · ⲉϥϯϣⲓⲡⲉ ⲙⲡⲕⲱϩ ⲁⲩⲱ ⲡⲙⲟⲥⲧⲉ ·
…
19 ϣⲁϥϫⲟⲟⲥ · ϫⲉⲁⲛⲟⲕ ⲇⲉ ϯϫⲱ ⲙⲙⲟⲥ ⲛⲏⲧⲛ ϫⲉⲙⲉⲣⲉⲛⲉⲧⲛϫⲓϫⲉⲉⲩⲉ · ⲛⲧⲉⲧⲛϣⲗⲏⲗ ⲉϫⲛⲛⲉⲧⲡⲏⲧ ⲛⲥⲁⲧⲏⲩⲧⲛ · ϫⲉⲕⲁⲥ ⲉⲧⲉⲧⲛⲁϣⲱⲡⲉ ⲛϣⲏⲣⲉ ⲙⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ ϫⲉϥⲧⲣⲉⲡⲉϥⲣⲏϣⲁ ⲉϫⲛⲛⲁⲅⲁⲑⲟⲥ ⲙⲛⲙⲡⲟⲛⲏⲣⲟⲥ ⲁⲩⲱ ϥϩⲱⲟⲩ ⲉϫⲛⲛⲇⲓⲕⲁⲓⲟⲥ ⲙⲛⲛⲣⲉϥϫⲓⲛϭⲟⲛⲥ ·
…
20 ⲉⲧⲉⲧⲛϣⲁⲛⲙⲉⲣⲉⲛⲉⲧⲙⲉ ⲅⲁⲣ ⲙⲙⲱⲧⲛ · ⲡⲉϫⲁϥ ⲁϣ ⲡⲉ ⲡⲉⲧⲛϩⲙⲟⲧ · ⲛⲧⲉⲗⲱⲛⲏⲥ ⲛⲧⲟⲟⲩ ⲉⲓⲣⲉ ⲁⲛ ⲛⲧⲉⲓϩⲉ ⲁⲩⲱ ⲉⲧⲉⲧⲛϣⲁⲛⲁⲥⲡⲁⲍⲉ ⲛⲛⲉⲧⲛⲥⲛⲏⲩ ⲙⲙⲁⲧⲉ · ⲟⲩ ⲡⲉ ⲡⲉϩⲟⲩⲟ ⲉⲧⲉⲧⲛⲉⲓⲣⲉ ⲙⲙⲟϥ ⲛⲕⲉϩⲉⲑⲛⲟⲥ
…
21 ⲛⲧⲟⲟⲩ ⲉⲓⲣⲉ ⲁⲛ ⲙⲡⲁⲓ ·
…
22 ϣⲱⲡⲉ ϭⲉ ⲛⲧⲱⲧⲛ ⲛⲧⲉⲗⲉⲓⲟⲥ · ⲛⲧϩⲉ ⲙⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ ⲉⲩⲧⲉⲗⲉⲓⲟⲥ ⲡⲉ ·
…
23 ⲡⲃⲁⲡⲧⲓⲥⲧⲏⲥ ⲉⲧⲟⲩⲁⲁⲃ ⲓⲱϩⲁⲛⲛⲏⲥ · ⲱϣ ⲉⲃⲟⲗ ϫⲓⲛⲛϣⲟⲣⲡ ⲉⲡⲉⲓⲇⲏ ⲛⲧⲁϥϫⲟⲟⲩ
…
24 ϥϩⲁⲧⲉϥϩⲏ · ⲉⲥⲏⲙⲁⲛⲉ ⲙⲡⲗⲁⲟⲥ ⲉϩⲟⲩⲛ ⲉⲧⲙⲛⲧⲙⲁⲓⲣⲱⲙⲉ · ⲙⲛⲧⲁⲅⲁⲡⲏ ·
…
25 ⲉⲡⲉⲓⲇⲏ ⲙⲙⲛⲡⲉⲧⲟ ⲛⲛⲟϭ ⲉⲛⲁⲓ ϩⲛⲛⲁⲣⲉⲧⲏ ⲧⲏⲣⲟⲩ · ϩⲙⲡⲧⲣⲉⲡⲙⲏⲏϣⲉ ⲉⲓ ⲉⲃⲟⲗ ⲉϫⲓⲃⲁⲡⲧⲓⲥⲙⲁ ⲉⲃⲟⲗ ϩⲓⲧⲟⲟⲧϥ · ⲉⲁⲩϫⲛⲟⲩϥ ϫⲉ ⲟⲩ ⲡⲉⲧⲛⲛⲁⲁⲁϥ · ⲉⲁϥⲧⲁⲙⲟⲟⲩ ϫⲉⲡⲉⲧⲉⲟⲩⲛⲧϥ ϩⲟⲉⲓⲧⲉ ⲥⲛⲧⲉ · ⲙⲁⲣⲉϥϯⲟⲩⲉⲓ ⲙⲡⲉⲧⲉⲙⲙⲛⲧⲁϥ · ⲁⲩⲱ ⲡⲉⲧⲉⲟⲩⲛⲧϥ ⲟⲉⲓⲕ ⲙⲁⲣⲉϥⲉⲓⲣⲉ ⲟⲛ ϩⲓⲛⲁⲓ ·
…
26 ⲡⲁⲡⲟⲥⲧⲟⲗⲟⲥ ⲇⲉ ⲟⲛ ⲉⲧⲟⲩⲁⲁⲃ ⲡⲁⲓ ⲛⲧⲁⲡϫⲟⲉⲓⲥ ϫⲟⲟⲩϥ ⲉⲧⲁϣⲉⲟⲉⲓϣ ⲙⲡⲉⲩⲁⲅⲅⲉⲗⲓⲟⲛ ·
…
27 ϥⲱϣ ⲉⲃⲟⲗ ϫⲉⲧⲙⲛⲧⲙⲁⲓⲥⲟⲛ
…
28 ⲙⲁⲣⲉⲥϭⲱ ·
…
29 ⲧⲙⲛⲧⲙⲁⲓϣⲙⲙⲟ ⲙⲡⲣⲣⲡⲉⲥⲱⲃϣ ϩⲓⲧⲛⲧⲁⲓ ⲅⲁⲣ ⲁϩⲟⲓⲛⲉ ϣⲉⲡϩⲉⲛⲁⲅⲅⲉⲗⲟⲥ ⲉⲣⲟⲟⲩ ⲉⲛⲥⲉⲥⲟⲟⲩⲛ ⲁⲛ ·
…
30 ⲟⲩ ϭⲉ ⲡⲉⲧⲟ ⲛⲛⲟϭ ⲉⲧⲙⲛⲧⲙⲁⲓⲣⲱⲙⲉ · ⲕⲁⲧⲁⲧϩⲉ ⲛⲧⲁⲛϫⲉⲡⲁⲓ ⲛϩⲁϩ ⲛⲥⲟⲡ · ⲁⲩⲱ ⲧⲁⲅⲁⲡⲏ ϫⲉⲛⲉⲥⲱⲥ ⲉⲙⲁⲧⲉ
…
31 ⲡⲛⲁ ⲅⲁⲣ ⲡⲉⲧϣⲟⲟⲡ ⲛⲁⲥ ⲛϩⲃⲥⲱ ⲁⲩⲱ ⲡϫⲱⲕ ⲛⲛⲉⲛⲧⲟⲗⲏ ⲙⲡⲱⲛϩ ·
…
32 ⲡⲉⲧⲟ ⲛⲟⲩⲕⲗⲟⲙ ⲉϫⲛⲧⲉⲥⲁⲡⲉ · ⲉⲥϯϩⲟⲧⲉ ⲉⲙⲁⲧⲉ ⲛⲛϫⲁϫⲉ ϩⲛⲧⲉⲥϭⲓⲛⲃⲱⲕ ⲉⲣⲁⲧϥ ⲙⲡⲛⲟⲩⲧⲉ
…
33 ⲁⲩⲱ ϥϣⲧⲣⲧⲱⲣ ϩⲁⲧⲉⲥϩⲏ ⲛϭⲓⲡⲇⲓⲁⲃⲟⲗⲟⲥ ⲛⲟⲩⲟⲉⲓϣ ⲛⲓⲙ · ⲉϥⲙⲉϩ ⲛϣⲓⲡⲉ ⲙⲡⲉⲥⲙⲧⲟ ⲉⲃⲟⲗ · ⲉϥⲛⲁⲩ ⲉⲡⲉⲓⲛⲉ ⲙⲡⲉⲭⲣⲓⲥⲧⲟⲥ ⲉϥⲧⲟ ϩⲓⲱⲱⲥ ⲁⲩⲱ ⲡⲙⲁⲉⲓⲛ ⲙⲡⲉϥⲥⲧⲁⲩⲣⲟⲥ ⲉⲧⲟⲩⲁⲁⲃ · ϫⲉ ⲉⲧⲃⲉⲧⲉϥⲙⲛⲧⲙⲁⲓⲣⲱⲙⲉ ⲅⲁⲣ ⲁⲩⲱ ⲧⲉϥⲙⲛⲧⲛⲁⲏⲧ ⲉϩⲟⲩⲛ ⲉⲡⲣⲱⲙⲉ · ⲛⲧⲁϥϩⲩⲡⲟⲙⲉⲓⲛⲉ ⲉⲡⲉⲥⲧⲁⲩⲣⲟⲥ ·
…
34 ⲉϥϭⲛⲁⲣⲓⲕⲉ ⲅⲁⲣ ϩⲙⲡⲉⲡⲣⲟⲫⲏⲧⲏⲥ ·
…
35 ϣⲁϥϫⲟⲟⲥ ϩⲛⲟⲩⲁⲡⲉⲓⲗⲏ ⲉⲧⲃⲉⲧⲉⲓⲙⲓⲛⲉ ⲛⲣⲱⲙⲉ ⲉⲧⲙⲉϩ ⲛⲕⲣⲟϥ ϩⲙⲡⲉⲩϩⲏⲧ ⲉⲩϣⲁϫⲉ ⲙⲛⲡⲉⲧϩⲓⲧⲟⲩⲱⲟⲩ ⲕⲁⲗⲱⲥ ·
…
36 ⲉⲓⲥ ⲟⲩⲟⲣⲅⲏ ⲛⲁⲙⲉ ⲛⲛⲁϩⲣⲙⲡⲛⲟⲩⲧⲉ · ⲛⲛⲉⲧⲙⲟⲟϣⲉ ϩⲛⲧⲉⲓϭⲓⲛⲣϩⲱⲃ · ⲉⲣⲉⲡϩⲁⲡ ϭⲉ ⲛⲛⲁⲓ ⲡⲏϩ ϣⲁⲧⲱⲛ ⲉϥⲡⲏϩ ϣⲁⲡϣⲓⲕ ⲛⲁⲙⲛⲧⲉ ·
…
37 ⲉⲡⲉⲓⲇⲏ ⲁⲛϫⲟⲟⲥ ⲉⲧⲃⲉⲡⲉⲡⲣⲟⲫⲏⲧⲏⲥ ·
…
38 ϥϫⲱ ⲙⲙⲟⲥ ϩⲙⲡϭⲱⲛⲧ ⲛⲧⲉϥⲟⲣⲅⲏ · ⲕⲁⲧⲁⲧϩⲉ ⲛⲧⲁⲛϣⲣⲡϫⲟⲟⲥ ϫⲉⲉⲓⲥϩⲏⲏⲧⲉ ⲁⲛⲟⲕ ϯⲛⲁⲡⲁⲥⲧⲟⲩ · ⲉϥⲛⲁⲡⲁⲥⲧⲟⲩ ϭⲉ ⲧⲱⲛ ⲁⲩⲱ ⲛⲧⲁⲇⲟⲕⲓⲙⲁⲍⲉ ⲙⲙⲟⲟⲩ ϫⲉϯⲛⲁⲉⲓⲣⲉ ⲙⲡⲉⲙⲧⲟ ⲉⲃⲟⲗ ⲛⲧⲡⲟⲛⲏⲣⲓⲁ ⲛⲧϣⲉⲉⲣⲉ ⲙⲡⲁⲗⲁⲟⲥ ·
…
39 ⲟⲩⲥⲟⲧⲉ ⲉϥϫⲓⲉⲓ · ⲡⲉ ⲡⲉⲩⲗⲁⲥ ·
…
40 ϩⲉⲛⲕⲣⲟϥ ⲛⲉ ⲛϣⲁϫⲉ ⲛⲧⲉⲩⲧⲁⲡⲣⲟ ⲉⲩϣⲁϫⲉ ⲙⲛⲛⲉⲧϩⲓⲧⲟⲩⲱⲟⲩ ⲛϩⲉⲛϣⲁϫⲉ ⲛⲉⲓⲣⲏⲛⲓⲕⲟⲛ ⲉⲣⲉⲧⲙⲛⲧϫⲁϫⲉ ⲇⲉ ⲁⲩⲱ ⲡⲙⲟⲥⲧⲉ ϩⲛⲛⲉⲩϩⲏⲧ ⲙⲏ ⲉϩⲣⲁⲓ ⲉϫⲛⲛⲁⲓ ·
…
41 ϯⲛⲁϭⲙⲡϣⲓⲛⲉ ⲁⲛ ⲡⲉϫⲉⲡϫⲟⲉⲓⲥ · ⲏ ⲉϫⲛⲟⲩⲗⲁⲟⲥ ⲛⲧⲉⲓⲙⲓⲛⲉ ⲧⲁⲯⲩⲭⲏ ⲛⲁⲉⲓⲣⲉ ⲁⲛ ⲛⲟⲩⲕⲃⲁ ·
…
42 ϫⲉⲕⲁⲥ ⲉⲛⲛⲁⲉⲓⲙⲉ ϫⲉⲛϣⲁϫⲉ ⲧⲏⲣⲟⲩ ⲛⲧⲉⲅⲣⲁⲫⲏ ϯ ⲟⲩⲃⲉⲧⲉⲓϭⲓⲛⲣϩⲱⲃ ϫⲓⲛⲛϣⲟⲣⲡ ·
…
43 ⲧⲡⲁⲗⲁⲓⲁ · ⲁⲩⲱ ⲧⲕⲁⲓⲛⲏ ⲧⲉⲛⲟⲩ ϩⲱⲥ ⲉⲁⲛⲥⲟⲩⲛ ϩⲱⲃ ⲛⲓⲙ · ⲡⲉⲛⲙⲟⲩ ⲁⲩⲱ ⲡⲉⲛⲱⲛϩ · ⲡⲉⲛⲙⲟⲩϩ ⲁⲩⲱ ⲡⲉⲛϣⲱⲱⲧ · ⲧⲉⲛϭⲓⲛⲃⲱⲕ ⲉⲣⲁⲧϥ ⲙⲡⲛⲟⲩⲧⲉ ⲕⲁⲗⲱⲥ · ϩⲙⲡⲧⲣⲉⲛϩⲁⲣⲉϩ ⲉⲛⲉⲛⲧⲁϥϫⲟⲟⲩ ϩⲛⲟⲩⲙⲛⲧⲥⲁⲃⲉ · ⲁⲩⲱ ⲧⲉⲛϭⲓⲛⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ϩⲙⲡⲧⲣⲉⲛⲡⲁⲣⲁⲃⲁ ⲛⲛⲉⲛⲧⲁϥϫⲟⲟⲩ ϩⲛⲟⲩⲙⲛⲧⲁⲧϩⲏⲧ ·
…
44 ⲙⲁⲣⲛⲛⲟⲉⲓ ⲟⲩⲛ ⲧⲉⲛⲟⲩ · ⲛⲧⲙⲏⲧⲉ ⲛⲛⲁⲓ ⲙⲛⲛⲉⲓⲕⲟⲟⲩⲉ · ⲙⲡⲁⲧϥⲉⲓ ⲛϭⲓⲡⲉϩⲟⲟⲩ ⲉⲧⲛⲥⲟⲟⲩⲛ ⲙⲙⲟϥ ⲁⲛ · ⲁⲩⲱ ⲧⲉⲩⲛⲟⲩ ⲉⲧⲛⲉⲓⲙⲉ ⲉⲣⲟⲥ ⲁⲛ · ⲛⲧⲛϫⲓ ⲕⲁⲧⲁⲛⲉⲛϩⲃⲏⲩⲉ ⲡⲟⲩⲁ ⲡⲟⲩⲁ ⲕⲁⲧⲁⲡⲉϥⲙⲡϣⲁ ⲁⲩⲱ ⲕⲁⲧⲁⲡⲕⲁⲣⲡⲟⲥ ⲛⲛⲉϥϩⲃⲏⲩⲉ
…
45 ⲱ ⲛⲁⲓⲁⲧⲟⲩ ⲛϩⲉⲛⲣⲱⲙⲉ ⲉⲩⲛⲁϯⲉⲟⲟⲩ ⲙⲡⲛⲟⲩⲧⲉ ⲉⲧⲃⲏⲏⲧⲟⲩ ϩⲓⲧⲛⲛⲉⲩⲡⲣⲁⲝⲓⲥ · ⲉⲧⲛⲁⲛⲟⲩⲟⲩ ⲛⲁⲓ ⲉⲧⲟ ⲛⲥϯⲛⲟⲩϥⲉ ⲙⲡⲉⲭⲣⲓⲥⲧⲟⲥ ·
…
46 ⲱ ⲟⲩⲟⲉⲓ ⲛϩⲉⲛⲣⲱⲙⲉ ⲉⲩⲛⲁⲥⲉϣϥⲡⲣⲁⲛ ⲛⲛⲉⲩⲉⲓⲟⲧⲉ ⲉⲧⲃⲏⲏⲧⲟⲩ ϩⲛⲧⲉⲩⲙⲛⲧⲁⲧⲥⲃⲱ ·
…
47 ⲡⲥⲱⲧⲏⲣ ⲙⲙⲉ ⲛⲁⲅⲁⲑⲟⲥ ϩⲱⲛ ϫⲉⲙⲡⲣⲕⲁⲧⲉⲕϩⲃⲟⲩⲣ ⲉⲉⲓⲙⲉ ϫⲉⲟⲩ ⲡⲉⲧⲉⲣⲉⲧⲉⲕⲟⲩⲛⲁⲙ ⲉⲓⲣⲉ ⲙⲙⲟϥ ·
…
48 ϩⲟⲧⲁⲛ ⲉⲕϣⲁⲛⲉⲓⲣⲉ ⲛⲟⲩⲙⲛⲧⲛⲁ · ⲁⲩⲱ ⲛⲁⲛⲟⲩ ⲡⲉⲛⲧⲁϥϫⲟⲟϥ · ⲉϥⲟⲩⲱⲛϩ ⲟⲛ ⲉⲃⲟⲗ ⲛⲙⲡⲣⲁⲝⲓⲥ ⲙⲡⲣⲱⲙⲉ ⲉⲧⲛⲁⲛⲟⲩϥ ϩⲛⲕⲉⲙⲁ ϣⲁϥϫⲟⲟⲥ ϫⲉⲙⲁⲣⲟⲩⲛⲁⲩ ⲉⲛⲉⲧⲛϩⲃⲏⲩⲉ ⲉⲧⲛⲁⲛⲟⲩⲟⲩ ⲛⲥⲉϯⲉⲟⲟⲩ ⲙⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ · ⲉⲓⲉ ⲟⲩⲕ ⲟⲩⲛ ⲙⲙⲛⲧϩⲉ · ⲉⲧⲣⲉⲙⲡⲣⲁⲝⲓⲥ ⲙⲡⲣⲱⲙⲉ ⲉⲧⲛⲁⲛⲟⲩⲟⲩ ϩⲱⲡ ⸓
…
49 ⲛⲧϩⲉ ⲅⲁⲣ ⲛⲟⲩⲣⲱⲙⲉ ⲉⲟⲩⲛⲟⲩⲥϯⲛⲟⲩϥⲉ ⲛϣⲟⲩϩⲏⲛⲉ ⲙⲡϩⲟⲩⲛ ⲛⲧⲉϥϩⲟⲉⲓⲧⲉ · ⲉϥϣⲉϣⲥϯⲉⲓⲁ ⲁⲛ ⲉⲃⲟⲗ ⲉⲙⲁⲧⲉ · ⲉⲛϥⲛⲁϣⲕⲱⲗⲩⲉ ⲁⲛ ⲙⲡⲉⲥϯⲛⲟⲩϥⲉ ⲁⲧⲙⲧⲣⲉⲛⲣⲱⲙⲉ ϣⲱⲗⲙ ⲉⲡⲉⲥϯⲛⲟⲩϥⲉ ⲉⲧⲙⲡⲉϥϩⲟⲩⲛ ϩⲟⲧⲁⲛ ⲉϥϣⲁⲛⲡⲁⲣⲁⲅⲉ ⲙⲙⲟⲟⲩ ·
…
50 ⲧⲁⲓ ⲟⲛ ⲧⲉ ⲧϩⲉ ⲉⲧⲉⲙⲙⲛⲣⲱⲙⲉ ⲉϥⲉⲓⲣⲉ ⲛϩⲉⲛⲡⲣⲁⲝⲓⲥ ⲉⲛⲁⲛⲟⲩⲟⲩ ⲁⲩⲱ ϩⲉⲛϩⲃⲏⲩⲉ ⲛⲁⲅⲁⲑⲟⲛ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲛⲁϣϩⲟⲡⲟⲩ ⲁⲧⲙⲧⲣⲉⲣⲱⲙⲉ ⲉⲓⲙⲉ ⲉⲣⲟⲟⲩ ·
…
51 ⲕⲁⲛ ⲉⲧⲉⲩϣⲏ ⲧⲉ · ⲕⲁⲛ ⲉⲡⲉϩⲟⲟⲩ ⲡⲉ · ⲛϥⲛⲁϣϩⲟⲡⲟⲩ ⲁⲛ · ⲕⲁⲧⲁⲡⲉⲛⲧⲁⲡϫⲟⲉⲓⲥ ϫⲟⲟϥ ϫⲉⲙⲙⲛⲗⲁⲁⲩ ⲉϥϩⲏⲡ ⲛϥⲛⲁⲟⲩⲱⲛϩ ⲉⲃⲟⲗ ⲁⲛ
…
52 ⲡⲁⲗⲓⲛ ⲟⲛ ⲛⲧϩⲉ ⲛⲟⲩⲣⲱⲙⲉ · ⲉⲟⲩⲛⲟⲩⲛⲟϭ ⲛⲥϯⲃⲱⲱⲛ ⲙⲡⲉϥϩⲟⲩⲛ · ⲉϥϣⲉϣⲥϯⲃⲱⲱⲛ ⲉⲃⲟⲗ ⲉⲙⲁⲧⲉ ⲉⲛϩⲛⲁϥ ⲁⲛ · ⲟⲩⲧⲉ ⲙⲡⲉϥⲟⲩⲱϣ ⲁⲛ ⲡⲉ ⲉⲧⲣⲉⲣⲱⲙⲉ ϣⲱⲗⲙ ⲉⲣⲟϥ ⲉϥϣⲁⲛⲡⲁⲣⲁⲅⲉ ⲙⲙⲟⲟⲩ ·
…
53 ⲁⲗⲗⲁ ⲧⲁⲛⲁⲅⲕⲏ ⲧⲉ ⲉⲧⲃⲉ ⲡⲉϩⲟⲩⲉⲥϯⲃⲱⲱⲛ · ⲧⲁⲓ ⲧⲉ ⲧϩⲉ ⲙⲡⲣⲱⲙⲉ ⲉⲧⲉⲓⲣⲉ ⲛϩⲉⲛⲡⲣⲁⲝⲓⲥ · ⲉⲩⲣⲁⲛⲁϥ ⲁⲛ ⲙⲡⲛⲟⲩⲧⲉ · ⲁⲩⲱ ⲉϩⲉⲛⲃⲟⲧⲉ ⲛⲉ ⲛⲛⲁϩⲣⲛⲛⲣⲱⲙⲉ · ⲕⲁⲛ ⲉϥⲉⲓⲣⲉ ⲙⲙⲟⲟⲩ ϩⲛⲧⲉⲩϣⲏ ϩⲙⲡⲕⲁⲕⲉ ·
…
54 ⲁⲛⲁⲅⲕⲏ ⲡⲉ ⲉⲧⲣⲉⲩⲟⲩⲱⲛϩ ⲉⲃⲟⲗ ⲕⲁⲧⲁⲡⲉⲛⲧⲁⲡⲁⲡⲟⲥⲧⲟⲗⲟⲥ ϫⲟⲟϥ · ϫⲉⲛⲉⲧⲟ ⲛⲕⲉⲥⲙⲟⲧ ⲛⲁϣ ϩⲱⲡ ⲁⲛ
…
55 ⲁⲅⲱⲛⲓⲍⲉ ⲟⲩⲛ ⲱ ⲙⲙⲉⲣⲁⲧⲉ ⲛⲥⲛⲏⲩ ⲛⲧⲛϫⲱⲕ ⲉⲃⲟⲗ ⲙⲡϩⲱⲃ ⲛⲧⲁⲛⲥⲱⲟⲩϩ ⲉⲛⲉⲛⲉⲣⲏⲩ ⲉⲧⲃⲏⲏⲧϥ ⲉⲧⲉⲡⲧⲃⲃⲟ ⲡⲉ · ⲙⲛⲛⲕⲉⲉⲛⲧⲟⲗⲏ ⲛⲧⲁⲩⲧⲁⲁⲩ ⲉⲧⲟⲟⲧⲛ ϩⲓⲧⲙⲡⲛⲟⲩⲧⲉ · ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ · ϫⲉⲕⲁⲥ ⲉⲛⲛⲁϫⲓⲉⲟⲟⲩ ϩⲓϫⲙⲡⲕⲁϩ · ⲙⲡⲉⲙⲧⲟ ⲉⲃⲟⲗ ⲛⲛⲉⲧⲛⲁⲛⲟⲩⲟⲩ ⲙⲛⲛⲉⲧϩⲟⲟⲩ ·
…
56 ⲁⲩⲱ ⲟⲛ ⲛⲥⲉⲣϩⲟⲩⲉϯⲉⲟⲟⲩ ⲛⲁⲛ ϩⲛⲙⲡⲏⲩⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲙⲛⲛⲉⲧⲟⲩⲁⲁⲃ ⲧⲏⲣⲟⲩ ·
…
57 ⲁⲩⲱ ⲛⲧⲛϫⲓ ⲙⲡⲃⲉⲕⲉ ⲛⲛⲉⲛϩⲃⲏⲩⲉ ⲉⲧⲛⲁⲛⲟⲩⲟⲩ ⲛⲧⲁⲛⲁⲁⲩ ϩⲓϫⲙⲡⲕⲁϩ · ϩⲛⲧⲙⲏⲧⲣⲟⲡⲟⲗⲓⲥ ⲛⲙⲡⲏⲩⲉ ⲧϩⲓⲉⲣⲟⲩⲥⲁⲗⲏⲙ ⲛⲧⲡⲉϩ ⲛⲁⲅⲁⲑⲟⲛ ⲛⲓⲙ
…
58 ϣⲁϥϫⲟⲟⲥ ⲅⲁⲣ ⲛϭⲓⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲁⲡⲁ ⲁⲑⲁⲛⲁⲥⲓⲟⲥ · ϫⲉϩⲁⲣⲉϩ ⲉⲡⲉⲓⲛⲉ ⲉⲧⲧⲁⲉⲓⲏⲩ ⲛⲧⲉⲡⲣⲱⲙⲉ ⲛⲥⲉⲛⲁⲙⲟⲩⲧⲉ ⲅⲁⲣ ⲁⲛ ⲉⲣⲟⲕ ϫⲉⲣⲱⲙⲉ ⲡⲉϫⲁϥ ⲉⲕⲉⲓⲣⲉ ⲛⲛⲉϩⲃⲏⲩⲉ ⲛⲧⲙⲛⲧⲁⲗⲟⲅⲟⲛ
…
59 ⲧⲉⲛⲟⲩ ϭⲉ ⲙⲙⲉⲣⲁⲧⲉ ⲛⲥⲛⲏⲩ · ⲁⲩⲱ ⲛϣⲟⲩⲟⲩⲁϣⲟⲩ ϩⲙⲡϫⲟⲉⲓⲥ · ⲟⲩⲛⲧⲁⲛ ⲙⲙⲁⲩ ⲛⲟⲩⲛⲟϭ ⲛϣⲟⲩϣⲟⲩ ϩⲁⲣⲱⲧⲛ ϩⲙⲙⲁ ⲛⲓⲙ ⲉⲛⲛⲁⲃⲱⲕ ⲉⲣⲟϥ ⲉⲛϣⲟⲩϣⲟⲩ ⲙⲙⲟⲛ ⲉϫⲛⲧⲏⲩⲧⲛ · ⲉⲩⲧⲁⲩⲟ ⲛⲛⲉⲧⲛⲡⲣⲁⲝⲓⲥ ⲛϣⲟⲣⲡ ⲉⲣⲟⲛ · ϫⲉⲉⲓⲥ ⲟⲩⲗⲁⲟⲥ ⲉϥⲥⲟⲧⲡ ⲁⲩⲱ ⲉϥⲕⲟⲥⲙⲉⲓ
…