1 ⲉⲥⲁⲡⲁⲧⲁⲙⲙⲟⲥ ⲙⲁⲩⲁⲁⲥ ⲙⲛϩⲉⲛⲙⲏⲏϣⲉ ⲛⲁⲧϩⲏⲧ ⲛⲧϩⲉ ⲛϩⲉⲛⲧⲃⲛⲟⲟⲩⲉϩ ⲙⲡⲥⲟⲟⲩⲛ ⲛⲛⲉⲅⲣⲁⲫⲏ ·
…
2 ⲙⲟⲛⲟⲛ ⲉⲧⲃⲉⲧⲙⲛⲧϫⲁⲥⲓϩⲏⲧ · ⲕⲁⲧⲁⲧϩⲉ ⲛⲧⲁⲓⲣϣⲣⲡ ⲛϫⲟⲟⲥ · ⲁⲩⲱ ⲧⲙⲛⲧⲁⲧⲥⲱⲧⲙ ⲉⲣⲉⲛⲉⲓⲙⲏⲏϣⲉ ⲧⲏⲣⲟⲩ ⲃⲏⲕ ⲉⲡⲉⲥⲏⲧ ⲉⲁⲙⲛⲧⲉ ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ ⲕⲁⲓ ⲅⲁⲣ ⲉⲧⲃⲉⲧⲙⲛⲧϫⲁⲥⲓϩⲏⲧ ⲁⲩⲱ ⲧⲙⲛⲧⲁⲧⲥⲱⲧⲙ ⲕⲁⲧⲁⲧϩⲉ ⲛⲧⲁⲛϣⲣⲡϫⲟⲟⲥ · ⲛⲧⲁⲩⲛⲉϫⲡⲇⲓⲁⲃⲟⲗⲟⲥ ⲉⲃⲟⲗ ϩⲛⲙⲡⲏⲩⲉ ϫⲓⲛⲛϣⲟⲣⲡ ·
…
3 ⲛⲓⲙ ϭⲉ ⲡⲉⲧⲛⲁϣϫⲓ ⲏ ⲡⲉϫⲓⲛⲛϣⲟⲣⲡ ⲛⲛⲉⲛⲧⲁⲩⲧⲁⲕⲟ ⲉⲁⲩⲃⲱⲕ ⲉⲡⲉⲥⲏⲧ ⲉⲡϣⲓⲕ ·
…
4 ϫⲉⲁⲩⲙⲟⲟϣⲉ ϩⲛⲧⲉϩⲓⲏ ⲛⲧⲙⲛⲧϫⲁⲥⲓϩⲏⲧ · ⲁⲩⲱ ⲉⲁⲩϣⲱⲡⲉ ϩⲛ ⲟⲩⲙⲛⲧⲁⲧⲥⲱⲧⲙ
…
5 ⲕⲁⲓ ⲅⲁⲣ ⲙⲛⲛⲥⲁⲛⲉⲛⲧⲁⲡϫⲟⲉⲓⲥ ϫⲟⲟⲩ ⲧⲏⲣⲟⲩ ϫⲓⲛⲛϣⲟⲣⲡ ⲉⲓⲧⲉ ϩⲛϩⲉⲛⲡⲁⲣⲁⲃⲟⲗⲏ · ⲉⲓⲧⲉ ϩⲛⲛⲉⲧⲟⲩⲟⲛϩ ⲉⲃⲟⲗ · ⲧϩⲁⲏ ⲛⲛⲉϥϣⲁϫⲉ ⲧⲏⲣⲟⲩ ⲛⲧⲁϥϫⲟⲟⲥ ·
…
6 ϫⲉⲡⲉⲧⲉⲟⲩⲛⲙⲁⲁϫⲉ ⲙⲙⲟϥ ⲉⲥⲱⲧⲙ ⲙⲁⲣⲉϥⲥⲱⲧⲙ ⲙⲏ ⲙⲙⲛⲙⲁⲁϫⲉ ⲛⲣⲱⲙⲉ ⲛⲓⲙ ⲏ ⲁⲣⲱⲙⲉ ϣⲱⲡⲉ ⲉⲛⲉϩ ⲁϫⲛⲙⲁⲁϫⲉ ·
…
7 ⲛⲛϥⲥⲟⲟⲩⲛ ⲁⲛ ⲛϭⲓⲡⲇⲏⲙⲓⲟⲩⲣⲅⲟⲥ ⲙⲡⲧⲏⲣϥ ⲡⲣⲣⲟ ⲡⲉⲭⲣⲓⲥⲧⲟⲥ ϫⲉⲙⲡϥⲧⲁⲙⲓⲉⲣⲱⲙⲉ ⲉⲛⲉϩ ⲁϫⲛⲙⲙⲛⲙⲁⲁϫⲉ ⲙⲙⲟϥ ·
…
8 ⲁⲩⲱ ⲟⲩ ⲡⲉ ⲡⲉⲓϣⲁϫⲉ ⲛⲧⲁϥϫⲟⲟϥ · ϫⲉⲡⲉⲧⲉⲟⲩⲛⲙⲁⲁϫⲉ ⲙⲙⲟϥ · ⲙⲁⲣⲉϥⲥⲱⲧⲙ ·
…
9 ⲁⲗⲗⲁ ⲉⲡⲉⲓⲇⲏ ϥⲥⲟⲟⲩⲛ ϫⲉⲧⲙⲛⲧϫⲁⲥⲓϩⲏⲧ ⲉⲧϩⲛⲛⲣⲱⲙⲉ ⲟⲩⲃⲟⲧⲉ ⲧⲉ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ · ⲕⲁⲧⲁⲧϩⲉ ⲛⲧⲁϥϫⲟⲟⲥ ·
…
10 ⲉⲧⲃⲉⲡⲁⲓ ⲁϥϫⲟⲟⲥ ϫⲉⲡⲉⲧⲉⲟⲩⲛⲙⲁⲁϫⲉ ⲙⲙⲟϥ ⲉⲥⲱⲧⲙ ⲙⲁⲣⲉϥⲥⲱⲧⲙ · ⲉⲧⲃⲉⲧⲙⲛⲧⲁⲧⲥⲱⲧⲙ ·
…
11 ⲁⲩⲱ ⲧⲙⲛⲧϫⲁⲥⲓϩⲏⲧ ⲛⲧⲁⲥϫⲟⲟⲥ ⲛϭⲓⲧⲉⲅⲣⲁⲫⲏ ϫⲉⲙⲡⲉⲡⲁⲗⲁⲟⲥ ⲥⲱⲧⲙ ⲉⲧⲁⲥⲙⲏ ·
…
12 ⲁⲩⲱ ⲡⲓⲥⲣⲁⲏⲗ ⲙⲡϥϯϩⲧⲏϥ ⲉⲣⲟⲓ
…
13 · ⲁⲓϫⲟⲟⲥⲟⲩ ⲕⲁⲧⲁⲛⲉⲡⲓⲑⲩⲙⲓⲁ ⲛⲛⲉⲩϩⲏⲧ ·
…
14 ⲥⲉⲛⲁ ⲙⲟⲟϣⲉ ϩⲛⲛⲉⲩϩⲃⲏⲩⲉ · ⲁⲩⲱ ⲟⲛ ⲉⲧⲃⲉⲧⲙⲛⲧ ϫⲁⲥⲓϩⲏⲧ ⲙⲛ ⲧⲙⲛⲧⲁⲧⲥⲱⲧⲙ · ⲛⲧⲁⲡϫⲟⲉⲓⲥ ϫⲟⲟⲥ ϩⲛⲟⲩϭⲱⲛⲧ
…
15 ϫⲉϩⲉⲛϣⲡⲏⲣⲉ ⲁⲓϫⲡⲟⲟⲩ · ⲁⲓϫⲁⲥⲧⲟⲩ ·
…
16 ⲛⲧⲟⲟⲩ ⲇⲉ ⲁⲩⲁⲑⲉⲧⲉⲓ ⲙⲙⲟⲓ ⲁⲩⲉϩⲉⲥⲟⲩ ⲛⲡⲉⲥϫⲟⲉⲓⲥ · ⲁⲩⲱ ⲁⲩⲉⲓⲱⲥⲟⲩ ⲛⲡⲟⲩⲟⲙϥ ⲙⲡⲉϥϫⲟⲉⲓⲥ ·
…
17 ⲡⲓⲥⲣⲁⲏⲗ ⲇⲉ ⲙⲡⲉϥⲥⲟⲩⲱⲛⲧ ⲁⲩⲱ ⲡⲁⲗⲁⲟⲥ ⲙⲡϥϭⲛ ⲁⲛⲅ ⲛⲓⲙ · ⲁⲩⲱ ⲟⲛ ⲉⲧⲃⲉⲧⲙⲛⲧϫⲁⲥⲓϩⲏⲧ ⲙⲛⲧⲙⲛⲧⲁⲧⲥⲱⲧⲙ ⲛⲧⲁⲡϫⲟⲉⲓⲥ ⲁⲡⲉⲓⲗⲉⲓ ⲉⲛⲁⲓ ⲙⲡⲉⲓⲟⲩⲟⲉⲓϣ
…
18 ϫⲉⲁⲓⲧⲛⲛⲟⲟⲩ ϣⲁⲣⲱⲧⲛ ⲛⲛⲁϩⲙϩⲁⲗ ⲧⲏⲣⲟⲩ ⲛⲉⲡⲣⲟⲫⲏⲧⲏⲥ ⲙⲡⲉϩⲟⲟⲩ ⲙⲛⲡⲛⲁⲩ ⲛϣⲱⲣⲡ
…
19 ⲁⲓϫⲟⲟⲩⲥⲟⲩ ⲁⲩⲱ ⲙⲡⲟⲩⲥⲱⲧⲙ ⲉⲣⲟⲟⲩ · ⲟⲩⲧⲉ ⲙⲡⲉⲡⲉⲩⲙⲁⲁϫⲉ ϯϩⲧⲏϥ ·
…
20 ⲁⲗⲗⲁ ⲁⲩⲙⲟⲟϣⲉ ϩⲛⲙⲙⲟⲕⲙⲉⲕ ⲙⲡⲉⲩϩⲏⲧ ⲉⲧϩⲟⲟⲩ
…
21 ⲡⲁⲗⲓⲛ ⲟⲛ ⲉⲧⲃⲉⲧⲙⲛⲧϫⲁⲥⲓϩⲏⲧ ⲉⲣⲉⲧⲉⲅⲣⲁⲫⲏ ⲁⲅⲁⲛⲁⲕⲧⲉⲓ ⲉⲛⲁⲓ ϫⲓⲛⲛϣⲟⲣⲡ ·
…
22 ϫⲉⲡⲛⲟⲃⲉ ⲛⲧⲉⲩⲧⲁⲡⲣⲟ ·
…
23 ⲡϣⲁϫⲉ ⲛⲛⲉⲩⲥⲡⲟⲧⲟⲩ ⲙⲁⲣⲟⲩϭⲟⲡⲟⲩ ϩⲛⲛⲉⲩⲙⲛⲧϫⲁⲥⲓϩⲏⲧ
…
24 ⲥⲉⲛⲁϫⲱ ⲛⲧⲉⲩϩⲁⲏ ⲉⲃⲟⲗ ϩⲙⲡⲉⲩⲥⲁϩⲟⲩ · ⲛⲧⲁⲛϫⲉ ⲛⲁⲓ ⲉⲛⲥⲟⲟⲩⲛ ϫⲉⲛⲧϩⲉ ⲉⲧⲧⲛⲟⲩⲛⲉ ⲙⲡⲉⲧϩⲟⲟⲩ ⲛⲓⲙ ⲧⲉ ⲧⲙⲛⲧⲙⲁⲓϩⲟⲙⲛⲧ ⲕⲁⲧⲁⲛϣⲁϫⲉ ⲛⲛⲉⲅⲣⲁⲫⲏ ·
…
25 ⲧⲁⲓ ⲟⲛ ⲧⲉ ⲧϩⲉ ⲉⲧⲉⲧⲛⲟⲩⲛⲉ ⲙⲡⲉⲧϩⲟⲟⲩ ⲛⲓⲙ ⲧⲉⲧⲙⲛⲧⲁⲧⲥⲱⲧⲙ · ⲕⲁⲧⲁⲛϣⲁϫⲉ ⲟⲛ ⲛⲛⲉⲅⲣⲁⲫⲏ ⲙⲁⲗⲓⲥⲧⲁ ⲛⲉⲧϣⲱⲡ ⲉⲣⲟⲟⲩ ⲙⲡⲙⲟⲥⲧⲉ ⲉϩⲟⲩⲛ ⲉⲛⲉⲧϩⲓⲧⲟⲩⲱⲟⲩ ⲉⲡϫⲓⲛϫⲏ · ⲉⲧϫⲱⲕ ⲉⲃⲟⲗ ⲛⲛⲉⲩⲙⲛⲧⲣⲉϥϩⲱⲧⲃ ϩⲙⲡⲉⲩϩⲏⲧ ⲉⲡⲙⲁ ⲛⲛⲉⲩϭⲓϫ ·
…
26 ⲁⲡϫⲟⲉⲓⲥ ϣⲁϫⲉ ϫⲓⲛⲛϣⲟⲣⲡ · ⲙⲛⲁⲇⲁⲙ ⲉϥⲥⲙⲛⲇⲓⲁⲑⲏⲕⲏ ⲛⲙⲙⲁϥ ϩⲙⲡⲧⲣⲉϥⲧⲁⲙⲓⲟϥ ⲉϥϯ ⲙⲡⲥⲱⲛⲧ ⲧⲏⲣϥ ⲉⲧϩⲓϫⲙⲡⲕⲁϩ ⲉϩⲣⲁⲓ ⲉⲛⲉϥϭⲓϫ ⲙⲛⲡⲉϥⲥⲡⲉⲣⲙⲁ ·
…
27 ⲁⲩⲱ ⲉϥⲥⲙⲓⲛⲉ ⲛⲙⲙⲁϥ ⲙⲛⲡⲉϥⲥⲡⲉⲣⲙⲁ · ⲛⲟⲩⲇⲓⲁⲑⲏⲕⲏ ϣⲁⲉⲛⲉϩ ⲉϥϫⲱ ⲙⲙⲟⲥ ϫⲉ ⲁϣⲁⲓ ⲛⲧⲉⲧⲛⲛⲁⲁⲓⲁⲓ ⲛⲧⲉⲧⲛⲙⲉϩⲡⲕⲁϩ · ⲛⲧⲉⲧⲛⲣϫⲟⲉⲓⲥ ⲉϫⲱϥ ·
…
28 ⲧⲉⲧⲛϩⲟⲧⲉ ⲙⲛⲡⲉⲧⲛⲥⲧⲱⲧ ⲉⲥⲉϣⲱⲡⲉ ⲉϩⲣⲁⲓ ⲉϫⲛⲛⲉⲑⲏⲣⲓⲟⲛ ⲧⲏⲣⲟⲩ · ⲁⲩⲱ ⲉϫⲛⲛⲧⲃⲛⲟⲟⲩⲉ ⲧⲏⲣⲟⲩ ⲛⲧⲥⲱϣⲉ ⲙⲛⲛϩⲁⲗⲁⲧⲉ ⲧⲏⲣⲟⲩ ⲛⲧⲡⲉ ⲁⲩⲱ ⲉϫⲛⲛⲧⲃⲧ ⲧⲏⲣⲟⲩ ⲛⲧⲑⲁⲗⲁⲥⲥⲁ ·
…
29 ⲁⲓϯ ⲙⲙⲟⲟⲩ ϩⲁⲛⲉⲧⲛϭⲓϫ ⲉⲩⲉϣⲱⲡⲉ ⲛⲏⲧⲛ ⲉⲩⲟⲩⲱⲙ ⲛⲧϩⲉ ⲛⲛⲓⲟⲩⲟⲧⲉ ⲛⲭⲟⲣⲧⲟⲥ ⲁⲓⲧⲁⲁⲩ ⲛⲏⲧⲛ ·
…
30 ⲡⲗⲏⲛ ϣⲁⲧⲛⲁϥⲉϥ ϩⲛⲟⲩⲥⲛⲟϥ ⲙⲯⲩⲭⲏ ⲛⲛⲉⲧⲛoⲩⲟⲙϥ
…
31 ⲕⲁⲓ ⲅⲁⲣ ⲡⲉⲥⲛⲟϥ ⲛⲛⲉⲧⲛⲯⲩⲭⲏ ϯⲛⲁϣⲓⲛⲉ ⲛⲥⲱϥ ·
…
32 ϯⲛⲁϣⲓⲛⲉ ⲛⲥⲱϥ ⲉⲃⲟⲗ ϩⲛⲧϭⲓϫ ⲛⲛⲉⲑⲏⲣⲓⲟⲛ ⲧⲏⲣⲟⲩ ⲙⲏ ⲁⲣⲁ ⲉⲣⲉⲡⲛⲟⲩⲧⲉ ⲛⲁⲕⲣⲓⲛⲉ ⲛⲛⲉⲑⲏⲣⲓⲟⲛ ·
…
33 ⲏ ⲟⲩⲛϭⲓϫ ⲣⲱ ⲛⲛⲉⲑⲏⲣⲓⲟⲛ ⲕⲁⲧⲁⲧϩⲉ ⲛⲧⲁϥϫⲟⲟⲥ
…
34 ϫⲉϯⲛⲁϣⲓⲛⲉ ⲛⲥⲱϥ ⲉⲃⲟⲗ ϩⲛⲧϭⲓϫ ⲛⲛⲉⲑⲏⲣⲓⲟⲛ ·
…
35 ⲁⲗⲗⲁ ⲉϥⲥⲟⲟⲩⲛ ϫⲓⲛⲛϣⲟⲣⲡ ⲛϭⲓⲡⲛⲟⲩⲧⲉ ϫⲉ ⲟⲩⲛϩⲁϩ ⲛⲁⲡⲱⲱⲛⲉ ϩⲛⲛⲣⲱⲙⲉ ⲉⲩⲫⲩⲥⲓⲥ ⲛⲑⲏⲣⲓⲟⲛ ϩⲙⲡⲧⲣⲉⲩⲕⲁⲙⲁ ⲙⲡⲇⲓⲁⲃⲟⲗⲟⲥ ⲉⲟⲩⲱϩ ⲛϩⲏⲧⲟⲩ ⲉⲧⲣⲉϥϫⲱⲕ ⲉⲃⲟⲗ ⲛⲛⲉϥⲙⲛⲧⲣⲉϥϩⲱⲧⲃ ϩⲣⲁⲓ ⲛϩⲏⲧⲟⲩ ·
…
36 ⲛⲧϩⲉ ⲛⲧⲁⲕⲁⲓⲛⲣⲡⲁⲓ ⲙⲡⲁⲧⲉⲱⲥⲕ ϣⲱⲡⲉ · ⲕⲁⲧⲁⲧϩⲉ ⲛⲧⲁϥⲟⲩⲉϩ ⲙⲡϣⲁϫⲉ ϫⲉⲡⲉⲧⲛⲁⲡⲱϩⲧ ⲉⲃⲟⲗ ⲛⲟⲩⲥⲛⲟϥ ⲛⲣⲱⲙⲉ
…
37 ⲥⲉⲛⲁⲡⲉϩⲧⲡⲱϥ ⲉⲃⲟⲗ ⲉⲡⲉϥⲙⲁ ⲁⲗⲏⲑⲱⲥ ⲕⲁⲧⲁⲛϣⲁϫⲉ ⲛⲛⲉⲅⲣⲁⲫⲏ
…
38 ⲟⲩⲛϩⲁϩ ⲛⲣⲱⲙⲉ ⲉⲛⲁⲛⲟⲩ ⲛⲉⲑⲏⲣⲓⲟⲛ ⲛϩⲟⲩⲟ ⲉⲣⲟⲟⲩ ⲛⲉⲑⲏⲣⲓⲟⲛ ⲙⲉⲛ ⲧⲉⲩⲫⲩⲥⲓⲥ ⲧⲉ
…
39 ⲁⲗⲗⲁ ⲛⲣⲱⲙⲉ ⲛⲧⲁⲩⲡⲱⲱⲛⲉ ⲁⲩϫⲓ ⲛⲁⲩ ⲛⲟⲩϩⲏⲧ ⲛⲑⲏⲣⲓⲟⲛ ⲛⲧⲉⲩⲫⲩⲥⲓⲥ ⲁⲛ ⲧⲉ ·
…
40 ⲱ ⲧⲙ ⲟⲛ ⲉⲧⲉⲅⲣⲁⲫⲏ ⲥⲛⲁⲧⲁⲙⲟⲛ ϫⲉⲟⲩⲛϩⲁϩ ⲛⲣⲱⲙⲉ ⲉⲩϫⲓ ⲉⲓⲛⲉ ϩⲓⲃⲟⲗ ϩⲱⲥ ⲣⲱⲙⲉ ⲉϩⲉⲛⲑⲏⲣⲓⲟⲛ ⲙⲡⲉⲩϩⲟⲩⲛ ⲛⲉ ·
…
41 ⲛⲧϩⲉ ⲙⲡⲇⲓⲁⲃⲟⲗⲟⲥ ⲉϣⲁϥϫⲓ ⲉⲓⲛⲉ ϩⲱⲥ ⲁⲅⲅⲉⲗⲟⲥ ⲛⲧⲉⲡⲟⲩⲟⲉⲓⲛ ⲉⲟⲩⲕⲁⲕⲉ ⲡⲉ ·
…
42 ⲁⲩⲱ ⲉⲟⲩⲣⲉϥϩⲉⲧⲃⲣⲱⲙⲉ ⲡⲉ ·
…
43 ⲕⲁⲓ ⲅⲁⲣ ⲁⲡⲁⲩⲗⲟⲥ ⲥϩⲁⲓ ⲉⲧⲃⲉⲛⲣⲱⲙⲉ ⲛⲕⲣⲏⲧⲏ ϫⲉϩⲉⲛⲣⲉϥϫⲓϭⲟⲗ ⲛⲉ ⲛⲟⲩⲟⲉⲓϣ ⲛⲓⲙ ϩⲉⲛⲑⲏⲣⲓⲟⲛ ⲉⲩϩⲟⲟⲩ ⲛⲉ ·
…
44 ϩⲉⲛϩⲏ ⲉⲩⲟⲩⲟⲥϥ ⲛⲉ · ⲉϥⲧⲁⲩⲟ ⲟⲛ ⲙⲡϫⲱⲕ ⲉⲃⲟⲗ ⲙⲡϩⲱⲃ ⲛⲛⲣⲱⲙⲉ ⲉⲛⲧⲁⲩⲡⲱⲱⲛⲉ ϩⲛⲧⲉⲩⲫⲩⲥⲓⲥ ⲉⲩⲫⲩⲥⲓⲥ ⲛⲑⲏⲣⲓⲟⲛ ·
…
45 ϣⲁϥϫⲟⲟⲥ ϫⲉⲉϣϫⲉ ⲕⲁⲧⲁⲣⲱⲙⲉ ⲛⲧⲁⲓⲙⲓϣⲉ ⲙⲛⲛⲉⲑⲏⲣⲓⲟⲛ ϩⲛⲉⲫⲉⲥⲟⲥ ·
…
46 ⲙⲏ ⲁⲣⲁ ⲛⲧⲁⲡⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ⲙⲓϣⲉ ⲙⲛϩⲉⲛⲑⲏⲣⲓⲟⲛ ⲛⲁⲙⲉ ϩⲛⲉⲫⲉⲥⲟⲥ ·
…
47 ⲁⲗⲗⲁ ϩⲉⲛⲣⲱⲙⲉ ⲛⲉ ⲉⲩⲟ ⲛⲥⲙⲟⲧ ⲛⲑⲏⲣⲓⲟⲛ ⲁⲛⲧⲓⲣⲱⲙⲉ ·
…
48 ⲡϫⲟⲉⲓⲥ ⲙⲡⲉⲟⲟⲩ ⲓⲏⲥⲟⲩⲥ ⲉϥϣⲁϫⲉ ⲙⲛⲛⲉϥⲁⲡⲟⲥⲧⲟⲗⲟⲥ ⲉⲧⲟⲩⲁⲁⲃ ϣⲁϥϫⲟⲟⲥ ⲉⲧⲃⲉⲛⲉⲧⲟ ⲛⲥⲙⲟⲧ ⲛⲑⲏⲣⲓⲟⲛ ⲁⲛⲧⲓⲣⲱⲙⲉ ·
…
49 ϫⲉⲉⲓⲥϩⲏⲏⲧⲉ · ϯϫⲟⲟⲩ ⲙⲙⲱⲧⲛ ⲛⲧϩⲉ ⲛϩⲉⲛⲉⲥⲟⲟⲩ ⲛⲧⲙⲏⲧⲉ ⲛϩⲉⲛⲟⲩⲱⲛϣ
…
50 ϣⲱⲡⲉ ϭⲉ ⲛⲥⲁⲃⲉ ⲛⲧϩⲉ ⲛⲛⲉⲓϩⲟϥ ·
…
51 ⲁⲩⲱ ⲛⲁⲕⲉⲣⲁⲓⲟⲥ ⲛⲧϩⲉ ⲛⲉⲓϭⲣⲟⲟⲙⲡⲉ ϯ ϩⲧⲏⲧⲛ ⲉⲣⲱⲧⲛ ⲉⲃⲟⲗ ϩⲓⲧⲛⲛⲣⲱⲙⲉ ⲉⲧⲟ ⲛⲥⲙⲟⲧ ⲛⲑⲏⲣⲓⲟⲛ ⲁⲛⲧⲓⲣⲱⲙⲉ ·
…
52 ⲥⲉⲛⲁⲡⲁⲣⲁⲇⲓⲇⲟⲩ ⲅⲁⲣ ⲙⲙⲱⲧⲛ ⲉⲛⲥⲩⲛϩⲉⲇⲣⲓⲟⲛ · ⲁⲩⲱ ϩⲣⲁⲓ ϩⲛⲛⲉⲩⲥⲩⲛⲁⲅⲱⲅⲏ ⲥⲉⲛⲁⲙⲁⲥⲧⲓⲅⲟⲩ ⲙⲙⲱⲧⲛ ·
…
53 ⲛⲥⲉⲛⲁⲱϫⲛ ⲅⲁⲣ ⲁⲛ ⲛϭⲓⲡⲅⲉⲛⲟⲥ ⲛⲛⲉⲑⲏⲣⲓⲟⲛ ⲉⲧⲙⲙⲁⲩ ϣⲁϩⲣⲁⲓ ⲉⲧⲥⲩⲛⲧⲉⲗⲉⲓⲁ ⲙⲡⲁⲓⲱⲛ ·
…
54 ⲁⲩⲱ ⲛⲥⲉⲛⲁⲱϫⲛ ⲁⲛ ⲟⲛ ⲛϭⲓⲡⲅⲉⲛⲟⲥ ⲛⲛⲉⲥⲟⲟⲩ ⲉⲧⲥⲙⲁⲙⲁⲁⲧ ⲙⲡⲟϩⲉ ⲙⲡϣⲱⲥ ⲉⲧⲛⲁⲛⲟⲩϥ ⲡⲉⲭⲣⲓⲥⲧⲟⲥ ϣⲁϩⲣⲁⲓ ⲉⲧⲥⲩⲛⲧⲉⲗⲉⲓⲁ · ⲙⲡⲁⲓⲱⲛ ·
…
55 ⲙⲁⲗⲓⲥⲧⲁ ⲧⲉⲓⲙⲓⲛⲉ ⲛⲣⲱⲙⲉ ⲉⲧⲙⲙⲁⲩ ⲉⲧϣⲟⲟⲡ ϩⲛⲟⲩⲙⲛⲧⲁⲣⲅⲟⲥ · ⲕⲁⲧⲁⲡⲉⲧⲥⲏϩ ϫⲉⲁⲣⲅⲟⲥ ⲛⲓⲙ ϩⲛϩⲉⲛⲉⲡⲓⲑⲩⲙⲉⲓⲁ
…
56 ⲉϣϫⲉ ⲁⲧⲉⲅⲣⲁⲫⲏ ϫⲟⲟⲥ ϫⲉⲥⲣϥⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ · ⲉⲥϯⲙⲁ ⲁⲛ ⲁⲧⲙⲧⲣⲉⲡⲟⲩⲁ ⲡⲟⲩⲁ ⲣϩⲱⲃ ⲉⲡⲱⲛϩ ⲛⲧⲉⲩⲯⲩⲭⲏ ⲁⲩⲱ ⲧⲉϩⲣⲉ · ⲙⲛⲧϩⲃⲥⲱ ·
…
57 ⲁⲗⲗⲁ ⲉⲥϫⲱ ⲙⲙⲟⲥ ϫⲉⲥⲣϥⲉ ⲉⲃⲟⲗ ϩⲛⲛⲉϩⲃⲏⲩⲉ ⲛⲧⲥⲁⲣⲝ · ⲉⲧⲉⲛⲁⲓ ⲛⲉ ⲧⲡⲟⲣⲛⲉⲓⲁ ⲧⲙⲛⲧⲣⲉϥϣⲙϣⲉⲉⲓⲇⲱⲗⲟⲛ ⲧⲙⲛⲧⲣⲉϥⲣⲡⲁϩⲣⲉ ⲙⲙⲛⲧϫⲁϫⲉ ⲛϯⲧⲱⲛ ⲛⲕⲱϩ ⲙⲙⲛⲧⲣⲉϥϯⲧⲱⲛ ⲙⲡⲱⲣϫ · ⲛϩⲁⲓⲣⲉⲥⲓⲥ · ⲛⲗⲁ ·
…
58 ⲛϯϩⲉ ⲛϫⲏⲣ ⲙⲛⲛⲉⲧⲉⲓⲛⲉ ⲛⲛⲁⲓ
…
59 ⲉϣϫⲉⲛⲉⲧⲣϩⲱⲃ ϩⲛⲛⲁⲓ · ⲛⲥⲉⲛⲁⲃⲱⲕ ⲁⲛ ⲉϩⲟⲩⲛ ⲉⲧⲙⲛⲧⲉⲣⲟ ⲛⲙⲡⲏⲩⲉ ·
…
60 ⲟⲩⲧⲉ ⲛⲥⲉⲛⲁⲉⲓⲙⲉ ⲁⲛ ϫⲉⲡⲛⲟⲩⲧⲉ ⲡⲉ ⲡⲛⲟⲩⲧⲉ ⲕⲁⲧⲁⲧϩⲉ ⲛⲧⲁⲥϫⲟⲟⲥ ⲛϭⲓⲧⲉⲅⲣⲁⲫⲏ
…
61 ϫⲉⲥⲣϥⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ ⲕⲁⲓ ⲅⲁⲣ ⲉⲣϣⲁⲛⲧⲙⲧⲣⲉⲡⲣⲱⲙⲉ ⲕⲁⲧⲟⲟⲧϥ ⲉⲃⲟⲗ ·
…
62 ⲏ ⲛϥⲥⲣϥⲉ ⲉⲃⲟⲗ ϩⲛⲛⲉϩⲃⲏⲩⲉ ⲛⲧⲁⲛⲟⲙⲓⲁ ·
…
63 ⲙⲙⲛϣϭⲟⲙ ⲙⲙⲟϥ ⲉⲣϩⲱⲃ ⲉⲛⲉϩⲃⲏⲩⲉ ⲛⲧⲇⲓⲕⲁⲓⲟⲥⲩⲛⲏ ·
…
64 ⲕⲁⲧⲁⲡⲉⲛⲧⲁⲡϫⲟⲉⲓⲥ ϫⲟⲟϥ ϫⲉⲙⲙⲛϣϭⲟⲙ ⲛⲗⲁⲁⲩ ⲉⲣϩⲙϩⲁⲗ ⲛϫⲟⲉⲓⲥ ⲥⲛⲁⲩ ·
…
65 ⲏ ⲅⲁⲣ ϥⲛⲁⲙⲉⲣⲉⲟⲩⲁ ⲛϥⲙⲉⲥⲧⲉⲟⲩⲁ ⲏ ⲛϥϭⲟⲗϫϥ ⲛⲟⲩⲁ · ⲛϥⲕⲁⲧⲁⲫⲣⲟⲛⲉⲓ ⲙⲡⲕⲉⲟⲩⲁ ⲙⲙⲛϭⲟⲙ ⲙⲙⲱⲧⲛ ⲉⲣϩⲙϩⲁⲗ ⲙⲡⲛⲟⲩⲧⲉ ⲙⲛⲡⲙⲁⲙⲙⲱⲛⲁⲥ
…
66 ⲉϣϫⲉⲁⲡϫⲟⲉⲓⲥ ϫⲟⲟⲥ ⲟⲛ ϫⲉⲙⲡⲣⲣϩⲱⲃ ⲉⲧⲉϩⲣⲉ ⲉⲧⲛⲁⲧⲁⲕⲟ · ⲉϥϣⲁϫⲉ ⲙⲛⲛⲓⲟⲩⲇⲁⲓ ⲙⲡⲉⲓⲟⲩⲟⲉⲓϣ ⲁⲗⲗⲁ ⲉⲧⲉϩⲣⲉ ⲉⲧⲛⲁⲙⲟⲩⲛ ⲉⲃⲟⲗ ϣⲁⲉⲛⲉϩ ·
…
67 ⲉϥϣⲁϫⲉ ⲁⲛ ⲛϭⲓⲡⲣⲣⲟ ⲁⲩⲱ ⲡϣⲏⲣⲉ ⲙⲡⲣⲣⲟ ·
…
68 ⲡⲛⲟⲩⲧⲉ ⲁⲩⲱ ⲡϣⲏⲣⲉ ⲙⲡⲛⲟⲩⲧⲉ · ⲉⲧⲉϩⲣⲉ ⲙⲛⲧϩⲃⲥⲱ ⲁⲧⲙⲧⲣⲉ ⲡⲣⲱⲙⲉ ⲣϩⲱⲃ ⲉⲛⲉⲧϥⲣⲭⲣⲉⲓⲁ ⲙⲙⲟⲟⲩ ϫⲉⲕⲁⲥ ⲉⲛⲛⲉⲛⲟⲩ ⲉϩⲃⲁⲣⲟⲥ ·
…
69 ⲏ ϩⲓⲥⲉ ⲉⲟⲩⲁ ⲙⲙⲱⲧⲛ ⲉⲇⲓⲁⲕⲟⲛⲉⲓ ⲛⲁⲛ ϩⲛⲛⲉⲧⲉⲛⲟⲩⲟⲩ ⲛⲉ ⲉⲓⲉ ⲛⲁϣ ⲛϩⲉ ⲧⲉⲛⲟⲩ ·
…
70 ⲉⲣⲉⲟⲩⲁⲛⲁϣ ϫⲟⲟⲥ ϫⲉϥⲛⲁϣ ⲧⲁϩⲉⲡⲉϥⲃⲓⲟⲥ ⲉⲣⲁⲧϥ ⲉϥⲟⲩⲟϫ · ⲁϫⲛⲣϩⲱⲃ · ⲉⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲛⲁⲇⲁⲙ ϫⲓⲛⲛϣⲟⲣⲡ ϩⲙⲡⲧⲣⲉϥⲕⲁⲁϥ ϩⲙⲡⲡⲁⲣⲁⲇⲉⲓⲥⲟⲥ ⲉⲣϩⲱⲃ ⲉⲣⲟϥ ⲁⲩⲱ ⲉϩⲁⲣⲉϩ
…
71 ⲕⲁⲓ ⲅⲁⲣ ⲙⲡϥⲕⲁⲁϥ ⲁϫⲛϩⲱⲃ ⲁⲩⲱ ⲁϫⲛϩⲁⲣⲉϩ ⲉⲛⲉϥϩⲓⲥⲉ ⲛⲁϥ ⲉⲩⲟⲩⲟϫ ⲕⲁⲧⲁⲧϩⲉ ⲉⲧⲥⲏϩ ·
…
72 ϫⲉϩⲛϩⲁⲣⲉϩ ⲛⲓⲙ · ϩⲁⲣⲉϩ ⲉⲡⲉⲕϩⲏⲧ ·
…
73 ϩⲉⲛϩⲓⲟⲟⲩⲉ ⲅⲁⲣ ⲛⲱⲛϩ ⲛⲉ ⲉⲃⲟⲗ ϩⲛⲛⲁⲓ ·
…
74 ⲁⲩⲱ ⲙⲛⲛⲥⲁⲧⲣⲉϥⲛⲟϫϥ ⲉⲃⲟⲗ ϩⲙⲡⲡⲁⲣⲁⲇⲓⲥⲟⲥ ⲙⲡϥⲕⲁⲁϥ ⲉϥⲟⲩⲟⲥϥ ⲁϫⲛⲣϩⲱⲃ ·
…
75 ⲁⲗⲗⲁ ⲛⲧⲁϥϫⲟⲟⲥ ⲛⲁϥ ϫⲉ ⲉⲕⲉⲟⲩⲱⲙ ⲙⲡⲉⲭⲟⲣⲧⲟⲥ ⲛⲧⲥⲱϣⲉ ϩⲛⲧϥⲱⲧⲉ ⲙⲡⲉⲕϩⲟ ·
…
76 ⲁⲩⲱ ϫⲉⲉⲕⲉⲟⲩⲱⲙ ⲙⲡⲉⲕⲟⲉⲓⲕ ϣⲁⲛⲧⲉⲕⲕⲟⲧⲕ · ⲉϩⲣⲁⲓ ⲉⲡⲕⲁϩ · ⲛⲧⲁⲡⲛⲟⲩⲧⲉ ϭⲛⲁⲣⲓⲕⲉ ⲉⲛⲓⲙ ⲛⲣⲱⲙⲉ ⲉⲛϩ ϫⲓⲛⲛϣⲟⲣⲡ
…
77 ϫⲉⲥⲉⲣϩⲱⲃ ⲉⲧⲉⲩϩⲣⲉ ⲙⲛⲧⲉⲩϩⲃⲥⲱ ⲉⲥϭⲛⲁⲣⲓⲕⲉ ⲛⲧⲟϥ ϫⲓⲛⲛϣⲟⲣⲡ ⲛϭⲓⲧⲉⲅⲣⲁⲫⲏ ϣⲁⲥϫⲟⲟⲥ ·
…
78 ϫⲉⲧⲛⲥⲱⲧⲙ ⲣⲱ ⲉⲧⲃⲉϩⲟⲓⲛⲉ ⲛϩⲏⲧⲧⲏⲩⲧⲛ ϫⲉⲥⲉⲙⲟⲟϣⲉ ⲉⲧⲁⲕⲧⲱⲥ · ⲉⲛⲥⲉⲣⲗⲁⲁⲩ ⲛϩⲱⲃ ⲁⲛ · ⲁⲗⲗⲁ ⲉⲩⲟ ⲛⲣⲉϥⲧⲱϩ ·
…
79 ⲛⲁⲓ ϭⲉ ⲛⲧⲉⲓⲙⲓⲛⲉ ⲧⲛⲡⲁⲣⲁⲅⲅⲉ ⲛⲁⲩ ϩⲙⲡⲣⲁⲛ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ϫⲉⲕⲁⲥ ⲉⲩⲉⲣϩⲱⲃ ϩⲛⲟⲩⲥϭⲣⲁϩⲧ ⲛⲥⲉⲟⲩⲱⲙ ⲙⲡⲉⲩⲟⲉⲓⲕ ⲏ ϫⲉⲡⲉⲧⲣϩⲱⲃ ⲁⲛ ⲙⲡⲣⲧⲣⲉϥⲟⲩⲱⲙ ·
…
80 ⲏ ⲛⲓⲙ ϩⲛⲛⲉⲧⲟⲩⲁⲁⲃ ⲧⲏⲣⲟⲩ ⲡⲉⲧⲉⲣⲉⲧⲉⲅⲣⲁⲫⲏ ϯⲙⲁⲉⲓⲛ ⲉⲣⲟϥ ⲁⲛ ·
…
81 ⲁⲩⲱ ⲉⲥⲧⲁⲩⲟ ⲛⲧϭⲓⲛⲣϩⲱⲃ ⲙⲡⲟⲩⲁ ⲡⲟⲩⲁ ⲉⲥⲕⲱ ⲙⲙⲟⲟⲩ ⲛⲁⲛ ⲉϩⲣⲁⲓ ⲛⲥⲙⲟⲧ ϩⲛⲧⲉⲩϭⲓⲛⲣϩⲱⲃ ⲕⲁⲓⲛ ⲙⲛⲁⲃⲉⲗ ⲛϣⲣⲡ ⲛϫⲡⲟ ⲙⲏ ⲛⲧⲁⲡⲟⲩⲁ ⲡⲟⲩⲁ ϣⲱⲡⲉ ⲁⲛ ⲛϣⲱⲥ · ⲉⲁⲡⲟⲩⲁ ⲡⲟⲩⲁ ⲣϩⲱⲃ ⲉⲡⲕⲁϩ ·
…
82 ⲟⲩⲧⲉ ⲙⲡⲉⲡⲛⲟⲩⲧⲉ ϭⲛⲁⲣⲓⲕⲉ ⲉⲁⲃⲉⲗ ϫⲉϥⲙⲟⲟⲛⲉ ⲛⲛⲉⲥⲟⲟⲩ ·
…
83 ⲟⲩⲧⲉ ⲙⲡϥϭⲱⲛⲧ ⲉⲕⲁⲓⲛ ϫⲉϥⲣϩⲱⲃ ⲉⲡⲕⲁϩ ·
…
84 ⲁⲗⲗⲁ ⲧⲁⲛⲟⲙⲓⲁ ⲛⲕⲁⲓⲛ ⲧⲉⲛⲧⲁⲥⲧϭⲁⲉⲓⲟϥ ·
…
85 ⲁⲩⲱ ⲧⲇⲓⲕⲁⲓⲟⲥⲩⲛⲏ ⲛⲁⲃⲉⲗ ⲧⲉⲛⲧⲁⲥⲧⲙⲁⲉⲓⲟϥ · ⲁⲩⲱ ⲟⲛ ⲛⲱϩⲉ ⲛⲧⲁⲡϫⲟⲉⲓⲥ ϣⲁϫⲉ ⲛⲙⲙⲁϥ ·
…
86 ϫⲉⲛⲧⲟⲕ ⲡⲉⲛⲧⲁⲓⲛⲁⲩ ⲉⲣⲟⲕ ⲛⲇⲓⲕⲁⲓⲟⲥ ⲙⲡⲁⲙⲧⲟ ⲉⲃⲟⲗ ϩⲛⲧⲉⲓⲅⲉⲛⲉⲁ
…
87 ⲧⲉⲅⲣⲁⲫⲏ ⲣⲙⲛⲧⲣⲉ ϩⲁⲣⲟϥ · ϫⲉⲛⲱϩⲉ ⲇⲉ ⲛⲉⲟⲩⲣⲱⲙⲉ ⲡⲉ ⲛⲟⲩⲟⲉⲓⲉ ·
…
88 ⲁϥⲁⲣⲭⲉⲓ ⲛⲧⲱϭⲉ ⲛⲟⲩⲙⲁ ⲛⲉⲗⲟⲟⲗⲉ
…
89 ⲉⲓⲧⲁ ⲟⲛ ⲡⲛⲟϭ ⲁⲃⲣⲁϩⲁⲙ · ⲡⲁⲓ ⲛⲧⲁⲡⲛⲟⲩⲧⲉ ⲥⲙⲛⲇⲓⲁⲑⲏⲕⲏ ⲛⲙⲙⲁϥ · ⲉⲧⲁϣⲟ ⲙⲡⲉϥⲥⲡⲉⲣⲙⲁ ⲛⲧϩⲉ ⲛⲛⲥⲓⲟⲩⲛ ⲧⲡⲉ ·
…
90 ⲁⲩⲱ ⲛⲧϩⲉ ⲙⲡϣⲱ ⲉⲧϩⲓϫⲙⲡⲉⲥⲡⲟⲧⲟⲩ ⲛⲧⲑⲁⲗⲁⲥⲥⲁ ⲉⲧⲉⲙⲙⲛⲧϥ ⲏⲡⲉ · ⲁⲩⲱ ⲉⲧⲣⲉⲡⲉϥⲥⲡⲉⲣⲙⲁ ⲕⲗⲏⲣⲟⲛⲟⲙⲉⲓ ⲛⲙⲡⲟⲗⲓⲥ ⲛⲛϫⲁϫⲉ · ⲁⲩⲱ ⲉⲧⲣⲉⲛϩⲉⲑⲛⲟⲥ ⲧⲏⲣⲟⲩ ϫⲓⲥⲙⲟⲩ ϩⲣⲁⲓ ⲛϩⲏⲧϥ ⲕⲁⲧⲁⲧϩⲉ ⲉⲧⲛⲥⲟⲟⲩⲛ · ϫⲉⲧⲡⲁⲗⲁⲓⲁ · ⲁⲩⲱ ⲧⲕⲁⲓⲛⲏ ⲛⲧⲁⲥϣⲱⲡⲉ ϩⲣⲁⲓ ⲛϩⲏⲧϥ ⲙⲛⲡⲉϥⲥⲡⲉⲣⲙⲁ
…
91 ⲁⲩⲱ ⲁⲛϩⲉ ⲉⲣⲟϥ ⲉⲩⲥϩⲁⲓ ⲉⲧⲃⲏⲏⲧϥ ϫⲉⲁⲁⲃⲣⲁϩⲁⲙ ⲧⲱϭⲉ ⲛⲟⲩⲥⲉ ⲧⲉⲓ ⲱϩⲉ ϩⲣⲁⲓ ϩⲓϫⲛⲧϣⲱⲧⲉ ⲙⲡⲁⲛⲁϣ ·
…
92 ⲁϥⲉⲡⲓⲕⲁⲗⲉⲓ ⲙⲡⲙⲁ ⲉⲧⲙⲙⲁⲩ · ⲙⲡⲣⲁⲛ ⲙⲡϫⲟⲉⲓⲥ ϫⲉⲡⲛⲟⲩⲧⲉ ⲡϣⲁ ⲉⲛⲉϩ · ⲏ ⲉⲛⲉⲟⲩⲣⲉϥϫⲟ ⲁⲛ ⲡⲉ ⲁⲃⲣⲁϩⲁⲙ ·
…
93 ⲁⲩⲱ ⲟⲩⲣⲉϥⲱⲗ ⲡⲉ ⲛⲉϥⲛⲁⲧⲱϭⲉ ⲛⲧⲟϥ ⲡⲉ ϩⲣⲁⲓ ϩⲓϫⲛⲧϣⲱⲧⲉ ⲙⲡⲁⲛⲁϣ ⲙⲛⲛⲥⲁⲧⲣⲉϥⲟⲩⲱ ⲉϥⲥⲙⲛⲇⲓⲁⲑⲏⲕⲏ ⲙⲛⲁⲃⲓⲙⲉⲗⲉⲭ ⲕⲁⲧⲁⲧϩⲉ ⲛⲧⲁⲩⲥϩⲁⲓ ⲉⲧⲃⲏⲏⲧϥ
…
94 ϫⲉⲁⲃⲣⲁϩⲁⲙ ⲇⲉ ⲛⲉⲟⲩⲣⲙⲙⲁⲟ ⲉⲙⲁⲧⲉ ⲡⲉ · ϩⲛⲛⲧⲃⲛⲟⲟⲩⲉ ⲙⲛⲡϩⲁⲧ ⲙⲛⲡⲛⲟⲩⲃ
…
95 ⲉⲓⲧⲁ ⲗⲱⲧ ⲛⲧⲁϥϥⲓⲧϥ ⲁⲛ ⲉϩⲣⲁⲓ ⲁϥⲛⲁⲩ ⲉⲧⲡⲉⲣⲓⲭⲱⲣⲟⲥ ⲧⲏⲣⲥ ⲙⲡⲉⲓⲟⲣⲇⲁⲛⲏⲥ ϫⲉⲛⲉⲥⲧⲥⲏⲩ ⲧⲏⲣⲥ · ⲉⲁϥⲟⲩⲱϩ ⲙⲙⲁⲩ ⲙⲛⲛⲉϥⲧⲃⲛⲟⲟⲩⲉ ·
…
96 ϫⲉⲛⲉⲩⲟϣ ⲅⲁⲣ ⲡⲉ ·
…
97 ⲡⲁⲓ ⲛⲧⲁⲡⲛⲟⲩⲧⲉ ⲛⲁϩⲙⲉϥ ⲉⲃⲟⲗ ϩⲙⲡⲧⲁⲕⲟ ⲛⲥⲟⲇⲟⲙⲁ ⲙⲛⲅⲟⲙⲟⲣⲣⲁ · ⲙⲛⲧⲉϥⲥϩⲓⲙⲉ ⲙⲛⲛⲉϥϣⲏⲣⲉ ·
…
98 ⲏ ⲛϥⲥⲏϩ ⲁⲛ ⲛⲧⲟϥ ⲉⲧⲃⲉⲓⲥⲁⲁⲕ ϫⲉ ⲁϥϫⲟ ϩⲛⲧⲉⲣⲟⲙⲡⲉ ⲉⲧⲙⲙⲁⲩ
…
99 ⲁϥϭⲓⲛⲉ ⲛϣⲉ ⲉⲥⲟⲧⲉ ⲛⲉⲓⲱⲧ ·
…
100 ⲉⲓⲧⲁ ⲟⲛ ⲓⲁⲕⲱⲃ ⲡⲉⲛⲧⲁⲡⲛⲟⲩⲧⲉ ⲥⲙⲟⲩ ⲉⲣⲟϥ · ⲉⲧⲃⲉⲁⲃⲣⲁϩⲁⲙ ⲡⲉϥⲉⲓⲱⲧ ⲁⲩⲱ ⲓⲥⲁⲁⲕ ⲙⲏ ⲛϥϫⲱ ⲙⲙⲟⲥ ⲁⲛ ⲛⲧⲟϥ ·
…
101 ϫⲉϯⲣⲟⲕϩ ϩⲙⲡⲕⲁⲩⲙⲁ ⲙⲡⲉϩⲟⲟⲩ · ⲁⲩⲱ ϩⲙⲡϫⲁϥ ⲛⲧⲉⲩϣⲏ ·
…
102 ⲡϩⲓⲛⲏⲃ ⲁϥⲥⲁϩⲱϥ ⲉⲃⲟⲗ ⲛⲛⲁⲃⲁⲗ ·
…
103 ⲏ ϫⲉ ⲉⲓⲥ ϫⲟⲩⲱⲧⲉ ⲛⲣⲟⲙⲡⲉ ⲉⲡϩⲟⲟⲩ ⲁⲛⲟⲕ ϯⲙⲟⲟⲛⲉ ⲛⲛⲉⲕⲉⲥⲟⲟⲩ ·
…
104 ⲙⲏ ⲛⲧⲁⲡϫⲟⲉⲓⲥ ⲁⲙⲁϩⲧⲉ ⲙⲡⲉϥⲥⲙⲟⲩ ⲉⲙⲡⲉϥⲥⲙⲟⲩ ⲉⲣⲟϥ ⲏ ⲙⲡϥⲧⲁϣⲟ ⲙⲡⲉϥⲥⲡⲉⲣⲙⲁ ϫⲉⲉϥϩⲛⲧⲥⲱϣⲉ ⲛⲛⲁⲩ ⲛⲓⲙ ·
…
105 ⲟⲩ ⲙⲟⲛⲟⲛ ⲡⲁⲓ ϫⲉⲁϥⲥⲙⲟⲩ ⲉⲣⲟϥ ⲛϭⲓⲡⲛⲟⲩⲧⲉ · ⲁⲗⲗⲁ ⲛⲉϥⲕⲉⲁⲅⲅⲉⲗⲟⲥ ⲟⲛ ϩⲛⲛⲉⲥⲟⲟⲩ ⲛⲙⲙⲁϥ ·
…
106 ⲛⲧϩⲉ ⲛⲧⲁⲩⲟⲩⲱⲛϩ ⲉⲣⲟϥ ϩⲛⲧⲣⲁⲥⲟⲩ ϫⲉ ϥⲓⲉⲓⲁⲧⲕ ⲉϩⲣⲁⲓ ⲛⲅⲛⲁⲩ ⲉⲛⲟⲉⲓⲗⲉ ⲛϩⲁ ⲛⲟⲩⲱⲃϣ ⲙⲛⲛϭⲓⲉⲓⲉ · ⲙⲛⲛⲉⲧⲟ ⲛⲧⲟⲧⲟ ·
…
107 ⲙⲛⲛⲁⲩ ⲁⲛ ⲛⲕⲣⲙⲉⲥ · ⲛⲥⲓⲟⲩⲥⲓⲟⲩ · ⲉⲩϥⲱϭⲉ ⲉϩⲣⲁⲓ ⲉϫⲛⲛⲉⲥⲟⲟⲩ ⲙⲛⲛⲃⲁⲁⲙⲡⲉ ·
…
108 ⲁⲛⲟⲕ ⲅⲁⲣ ⲁⲓⲛⲁⲩ ⲉⲛⲉⲧⲉⲣⲉⲗⲁⲃⲁⲛ ⲉⲓⲣⲉ ⲙⲙⲟⲟⲩ ⲛⲁⲕ ·
…
109 ⲕⲁⲓ ⲅⲁⲣ ⲟⲩ ⲙⲟⲛⲟⲛ ϫⲉⲛⲁⲅⲅⲉⲗⲟⲥ ϣⲟⲟⲡ ϩⲛⲛⲉⲥⲟⲟⲩ ⲛⲙⲙⲁϥ · ⲁⲗⲗⲁ ⲥⲉⲙⲟⲟϣⲉ ⲛⲙⲙⲁϥ ⲟⲛ ϩⲛⲧⲉϩⲓⲏ ⲉⲩⲣϩⲙⲙⲉ ⲙⲙⲟϥ ⲉϥⲃⲏⲕ ⲉϩⲣⲁⲓ ⲉⲭⲁⲛⲁⲁⲛ ⲡⲕⲁϩ ⲛⲧⲁⲩϫⲡⲟϥ ϩⲣⲁⲓ ⲛϩⲏⲧϥ ·
…
110 ⲕⲁⲧⲁⲧϩⲉ ⲛⲧⲁϥϥⲓⲧϥ ⲉϩⲣⲁⲓ ⲛϭⲓⲓⲁⲕⲱⲃ ⲉⲁϥⲛⲁⲩ ⲉⲧⲡⲁⲣⲉⲙⲃⲟⲗⲏ ⲙⲡⲛⲟⲩⲧⲉ ⲉⲁⲥⲉⲓ ⲉϩⲣⲁⲓ ⲉϫⲱϥ ·
…
111 ⲁⲩⲱ ⲁⲩⲧⲱⲙⲧ ⲉⲣⲟϥ ⲛϭⲓⲛⲁⲅⲅⲉⲗⲟⲥ ⲙⲡⲛⲟⲩⲧⲉ ·
…
112 ⲡⲉϫⲁϥ ⲛⲧⲉⲣⲉϥⲛⲁⲩ ⲉⲣⲟⲟⲩ ϫⲉⲧⲡⲁⲣⲉⲙⲃⲟⲗⲏ ⲙⲡⲛⲟⲩⲧⲉ ⲧⲉ ⲧⲁⲓ
…
113 ⲁⲩⲱ ⲁϥⲙⲟⲩⲧⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉⲧⲡⲁⲣⲉⲙⲃⲟⲗⲏ ·
…
114 ⲏ ⲛⲓⲙ ⲡⲉⲛⲧⲁϥⲉⲡⲓⲧⲓⲙⲁ ⲛⲗⲁⲃⲁⲛ ⲉϥⲡⲏⲧ ⲛⲥⲱϥⲉ ⲛⲧⲟⲟⲧϥ ⲉϫⲱϥ ·
…
115 ⲛⲧⲟϥ ⲁⲩⲱ ⲛⲉϥⲥⲛⲏⲩ ϫⲉϩⲁⲣⲉϩ ⲉⲣⲟⲕ ⲙⲏⲡⲟⲧⲉ ⲛⲅϣⲁϫⲉ ⲙⲛⲓⲁⲕⲱⲃ ⲛϩⲉⲛⲡⲉⲑⲟⲟⲩ ·
…
116 ⲕⲁⲧⲁⲧϩⲉ ⲛⲧⲁϥϣⲁϫⲉ ⲙⲛⲓⲁⲕⲱⲃ ⲛϭⲓⲗⲁⲃⲁⲛ ϩⲙⲡⲧⲣⲉϥⲧⲱⲙⲧ ⲉⲣⲟϥ · ϫⲉⲁⲕϥⲓ ⲛⲁϣⲏⲣⲉ ⲛⲧϩⲉ ⲛⲟⲩⲁⲓⲭⲙⲁⲗⲱⲧⲟⲥ ϩⲛⲧⲥⲏϥⲉ ·
…
117 ⲙⲡⲕⲁⲁⲧⲛ ⲙⲡϣⲁ ⲛⲛϯ ⲡⲉⲓ ⲉⲣⲛⲛⲁϣⲏⲣⲉ ⲙⲛⲛⲁϣⲉⲉⲣⲉ ⲧⲉⲛⲟⲩ ϩⲛⲟⲩⲙⲛⲧⲁⲧϩⲏⲧ ⲁⲕⲁⲁⲥ ·
…
118 ⲁⲩⲱ ⲧⲉⲛⲟⲩ ⲟⲩⲛϭⲟⲙ ⲛⲧⲁϭⲓϫ ⲉⲣⲡⲉⲑⲟⲟⲩ ⲛⲁⲕ ⲡⲛⲟⲩⲧⲉ ⲇⲉ ⲙⲡⲉⲕⲉⲓⲱⲧ ⲛⲥⲁϥ ⲡⲉⲛⲧⲁϥϫⲟⲟⲥ ⲛⲁⲓ ϫⲉϩⲁⲣⲉϩ ⲉⲣⲟⲕ ⲙⲏⲡⲟⲧⲉ ⲛⲅϣⲁϫⲉ ⲙⲛⲓⲁⲕⲱⲃ ⲛϩⲉⲛⲡⲉⲑⲟⲟⲩ ⲕⲁⲧⲁⲧϩⲉ ϩⲱⲱϥ ⲟⲛ ⲛⲧⲁⲓⲁⲕⲱⲃ ϣⲁϫⲉ ⲙⲛⲗⲁⲃⲁⲛ ϩⲙⲡⲧⲣⲉϥⲙⲓϣⲉ ⲛⲙⲙⲁϥ ϫⲉⲥⲁⲃⲏⲗ ϫⲉ ϥϣⲟⲟⲡ ⲛⲁⲓ ⲛϭⲓⲡⲛⲟⲩⲧⲉ ⲙⲡⲁⲉⲓⲱⲧ ⲁⲃⲣⲁϩⲁⲙ ·
…
119 ⲁⲩⲱ ⲧϩⲟⲧⲉ ⲛⲓⲥⲁⲁⲕ ⲛⲉⲕⲛⲁϫⲟⲟⲩⲧ ⲧⲉⲛⲟⲩ ⲡⲉ ⲉⲓϣⲟⲩⲉⲓⲧ
…
120 ⲁⲡⲛⲟⲩⲧⲉ ⲇⲉ ⲛⲁⲩ ⲉⲡⲁⲑⲃⲃⲓⲟ ⲙⲛⲡϩⲓⲥⲉ ⲛⲛⲁϭⲓϫ ·
…
121 ⲁϥϫⲡⲓⲟⲕ ⲛⲥⲁϥ ·
…
122 ⲛⲧⲁⲛϫⲉ ⲛⲁⲓ ϫⲉⲕⲁⲥ ⲉⲛⲛⲁⲉⲓⲙⲉ · ϫⲉⲟⲩⲙⲟⲛⲟⲛ ϫⲉⲛⲁⲅⲅⲉⲗⲟⲥ ⲙⲟⲟϣⲉ ⲛⲙⲙⲁϥ · ⲁⲗⲗⲁ ⲡϫⲟⲉⲓⲥ ⲟⲛ ⲟⲩⲏⲩ ⲙⲙⲟϥ ⲁⲛ ⲉϥϣⲟⲟⲡ ⲛⲙⲙⲁϥ ϩⲙⲙⲁ ⲛⲓⲙ ⲉϥⲛⲁⲃⲱⲕ ⲉⲣⲟϥ · ⲕⲁⲧⲁⲧϩⲉ ⲟⲛ ⲛⲧⲁϥϣⲁϫⲉ ⲛⲙⲙⲁϥ ϩⲛⲕⲉⲙⲁ ⲛⲧϩⲉ ⲛⲧⲁϥⲟⲩⲱⲛϩ ⲉⲣⲟϥ ⲉϥⲛⲏⲩ ⲉϩⲣⲁⲓ ⲉⲕⲏⲙⲉ ⲛⲙⲙⲁϥ ·
…
123 ⲁⲩⲱ ⲁⲛⲟⲕ ϯⲛⲁⲛⲧⲕ ⲉϩⲣⲁⲓ ϣⲁⲃⲟⲗ ⲛⲧⲉⲓⲱⲥⲏⲫ ⲧⲁⲗⲉⲧⲟⲟⲧϥ ⲉϩⲣⲁⲓ ⲉϫⲛⲛⲉⲕⲃⲁⲗ · ⲉⲓⲧⲁ ⲟⲛ ⲛϣⲏⲣⲉ ⲛⲓⲁⲕⲱⲃ · ⲛⲁⲓ ⲛⲧⲁⲡⲛⲟⲩⲧⲉ ⲧⲁϣⲟ ⲙⲡⲉⲩⲥⲡⲉⲣⲙⲁ ⲛⲧϩⲉ ⲛⲥⲓⲟⲩ ⲛⲧⲡⲉ ⲁⲩⲱ ⲛⲧϩⲉ ⲙⲡϣⲱ ⲉⲧϩⲓⲣⲙⲡⲉⲥⲡⲟⲧⲟⲩ ⲛⲧⲑⲁⲗⲁⲥⲥⲁ ⲉⲧⲉⲙⲙⲛⲧϥ ⲏⲡⲉ ·
…
124 ⲛⲉⲩϩⲛ ⲧⲥⲱϣⲉ ⲁⲛ ⲡⲉ ⲉⲩⲙⲟⲟⲛⲉ ⲛⲛⲉⲥⲟⲟⲩ ⲙⲡⲉⲩⲉⲓⲱⲧ ⲛⲧϩⲉ ⲛⲧⲁⲓⲁⲕⲱⲃ ⲙⲟⲩⲧⲉ ⲉⲓⲱⲥⲏⲫ
…
125 ⲁϥϫⲟⲟⲩϥ ϫⲉⲃⲱⲕ ⲛⲅⲛⲁⲩ ϫⲉⲛⲉⲕⲥⲛⲏⲩ ⲟⲩⲟϫ ⲙⲛⲛⲉⲥⲟⲟⲩ · ⲛⲅⲛⲡⲉⲩⲟⲩⲱ ⲛⲁⲓ ⲉⲁϥϫⲟⲟⲩϥ ⲉⲃⲟⲗ ϩⲙⲡⲉⲓⲁ ⲛⲭⲉⲃⲣⲱⲛ
…
126 ⲣⲱ ⲛⲉⲁϥⲉⲓ ⲉϩⲣⲁⲓ ⲉⲥⲩⲭⲉⲙ · ⲉⲁⲩⲣⲱⲙⲉ ϩⲉ ⲉⲣⲟϥ ⲉϥⲥⲟⲣⲙ ϩⲛⲧⲥⲱϣⲉ ⲉⲁϥϫⲛⲟⲩϥ ϫⲉⲉⲕϣⲓⲛⲉ ⲛⲥⲁⲛⲓⲙ
…
127 ⲡⲉϫⲁϥ ϫⲉⲉⲓϣⲓⲛⲉ ⲛⲥⲁⲛⲁⲥⲛⲏⲩ ⲙⲁⲧⲁⲙⲟⲓ ϫⲉⲉⲩⲙⲟⲟⲛⲉ ⲧⲱⲛ
…
128 ⲡⲉϫⲁϥ ⲛⲁϥ ϫⲉ ⲁⲓⲥⲱⲧⲙ ⲅⲁⲣ ⲉⲣⲟⲟⲩ · ϫⲉⲙⲁⲣⲛⲃⲱⲕ ⲉϩⲣⲁⲓ ⲉϫⲱⲑⲁⲉⲓⲙ ·
…
129 ⲛⲧⲁⲛϫⲉ ⲛⲁⲓ ϫⲉⲡⲛⲟⲩⲧⲉ ⲛⲁⲧϭⲁⲉⲓⲟ ⲙ ⲡⲣⲱⲙⲉ ⲁⲛ ϫⲉ ϥϩⲛⲧⲥⲱϣⲉ ⲉϥⲉⲓⲣⲉ ⲛⲛⲉϥ ϩⲃⲏⲩⲉ · ⲉⲧⲃⲉ ⲧⲉϥϩⲣⲉ ⲙⲛⲧⲉϥϩⲃⲥⲱ · ⲉϥⲣⲁⲛⲁϥ ⲙⲡⲛⲟⲩⲧⲉ
…
130 ⲟⲩⲧⲉ ⲛϥⲛⲁ ⲧⲁⲓ ⲉ ⲡⲣⲱⲙⲉ ⲁⲛ ϫⲉ ϥⲟⲣⲃ ⲉϩⲟⲩⲛ ϩⲱⲥ ⲁⲥⲕⲏⲧⲏⲥ ⲉϥⲟ ⲛⲁⲣⲅⲟⲥ ⲁⲧⲙⲣϩⲱⲃ ϩⲛⲛⲉϥϭⲓϫ ⲙⲁⲗⲓⲥⲧⲁ ⲉϥⲣⲁⲛⲁϥ ⲁⲛ ⲙⲡⲛⲟⲩⲧⲉ ϩⲛϩⲉⲛϩⲃⲏⲩⲉ ⲉⲛⲁⲛⲟⲩⲟⲩ ·
…
131 ⲙⲛϩⲉⲛⲡⲣⲁⲝⲓⲥ ⲛⲁⲅⲁⲑⲟⲛ · ⲁⲗⲗⲁ ⲥⲉⲣⲟϥ ⲙⲡⲉⲧϩⲛⲧⲥⲱϣⲉ ⲉⲧⲣⲉϥⲣⲁⲛⲁϥ ⲙⲡⲛⲟⲩⲧⲉ · ϫⲉⲕⲁⲥ ⲉⲣⲉⲡⲛⲟⲩⲧⲉ ⲛⲁⲥⲙⲟⲩ ⲉⲣⲟϥ ·
…
132 ⲁⲩⲱ ⲛϥⲥⲙⲟⲩ ⲟⲛ ⲉⲛⲅⲉⲛⲏⲙⲁ ⲙⲡⲉϥⲕⲁϩ ·
…
133 ⲁⲩⲱ ϣϣⲉ ⲟⲛ ⲉⲡⲉⲧⲟⲣϥ ⲉϩⲟⲩⲛ ϩⲱⲥ ⲙⲟⲛⲁⲭⲟⲥ · ⲁⲩⲱ ϩⲱⲥ ⲁⲥⲕⲏⲧⲏⲥ ⲉⲣϩⲱⲃ ϩⲛⲛⲉϥϭⲓϫ · ⲉⲧⲃⲉⲧⲉϥϩⲣⲉ ⲙⲛⲧⲉϥϩⲃⲥⲱ ⲁⲩⲱ ⲉⲣⲡⲟⲩⲱϣ ⲙⲡⲛⲟⲩⲧⲉ ϩⲛϩⲉⲛϩⲃⲏⲩⲉ ⲙⲙⲛⲧⲉⲩⲥⲉⲃⲏⲥ ϫⲉⲕⲁⲥ ⲉϥⲉϫⲓ ⲛⲟⲩⲥⲙⲟⲩ ⲉⲃⲟⲗ ϩⲓⲧⲙⲡϫⲟⲉⲓⲥ ϩⲓϫⲙⲡⲕⲁϩ
…
134 ⲁⲩⲱ ⲛϥϩⲉ ⲉⲩⲛⲁ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ · ϩⲙⲡⲉϩⲟⲟⲩ ⲙⲡⲉϥϭⲙⲡϣⲓⲛⲉ ·
…
135 ⲛⲁⲓ ⲅⲁⲣ ⲉⲛϫⲱ ⲙⲙⲟⲟⲩ · ϫⲉⲕⲁⲥ ⲉⲛⲛⲁⲉⲓⲙⲉ ϫⲉⲡⲛⲟⲩⲧⲉ ⲙⲉ ⲛⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲁⲩⲱ ⲉⲧϩⲉⲗⲡⲓⲍⲉ ⲉⲡⲉϥⲣⲁⲛ ⲙⲛⲟⲩⲟⲛ ⲛⲓⲙ ⲉⲧⲣϩⲱⲃ ϩⲛⲛⲉϥϭⲓϫ · ϫⲉⲕⲁⲥ ⲉϥⲉϣⲱⲡⲉ ⲉⲟⲩⲛⲧⲁϥ ⲙⲙⲁⲩ
…