1 ⲙⲛⲧϫⲱⲱⲣⲉ .
…
2 ⲙⲛⲛⲥⲱⲥ ⲁϥⲧⲣⲉⲩϩⲓⲧⲉ ⲙⲡϣⲁⲁⲣ ⲛⲧⲉϥⲁⲡⲉ ⲛⲥⲉϯⲕⲁⲥⲓⲥ ⲛⲁϥ
…
3 ⲁⲩⲱ ⲁϥⲧⲱⲟⲩⲛ ϩⲁⲧⲉⲓ ⲕⲉⲃⲁⲥⲁⲛⲟⲥ ⲛϭⲓ ⲡⲡⲉⲧⲟⲩⲁⲁⲃ ⲙⲛⲛⲥⲱⲥ ⲁϥⲕⲉⲗⲉⲩⲉ ⲛⲥⲉϣⲓⲕⲉ ⲛⲟⲩϣⲱⲧⲉ ⲉⲡⲉⲥⲏⲧ ϩⲙⲡⲕⲁϩ ⲙⲡϣⲓ ⲛⲧⲉϥϣⲓⲏ ⲙⲉⲛⲧⲉϥⲟⲩⲁϣⲥⲉ ⲁϥⲧⲣⲉⲩⲭⲁⲗⲁ ⲙⲡⲡⲉⲧⲟⲩⲁⲁⲃ ⲉⲡⲉⲥⲏⲧ ⲉⲣⲟⲥ ⲙⲛⲛⲥⲱⲥ ⲁϥⲧⲣⲉⲩⲥⲁϩⲧⲉ ϩⲁⲟⲩⲭⲁⲗⲕⲓⲟⲛ ⲉϥⲙⲉϩ ⲛⲧⲁϩⲧ ϣⲁⲛⲧⲧⲉϥ ⲣⲧϩⲉ ⲛⲟⲩⲙⲟⲟⲩ ⲛⲥⲉⲕⲱⲧⲉ ⲙⲡⲙⲁⲛⲅⲁⲛⲟⲛ ⲛⲥⲉⲡⲁϩⲧϥ ⲉⲡⲉⲥⲏⲧ ⲉϫⲉⲙⲡⲉϥⲥⲱⲙⲁ ϣⲁⲛⲧⲉϥⲡⲱϩ ⲉϩⲣⲁⲓ ⲉⲡⲉϥⲙⲁⲕϩ ϩⲛⲧⲉⲩⲛⲟⲩ ⲁⲙⲓⲭⲁⲏⲗ ⲡⲁⲣⲭⲁⲅⲅⲉⲗⲟⲥ ⲁϩⲉⲣⲁⲧϥ ϩⲓϫⲱϥ ⲙⲡⲉϥⲕⲁ ⲡⲕⲱϩⲧ ⲟⲩⲇⲉ ⲡⲧⲁϩⲧⲉⲧⲃⲣⲃⲣ ϫⲱϩ ⲉⲣⲟϥ ⲉⲡⲧⲏⲣϥ ⲁⲗⲗⲁ ⲛⲉϥⲟ ⲛⲧϩⲉ ⲛⲟⲩⲙⲟⲟⲩ ⲉϥⲕⲏⲃⲡⲁϩⲣⲁϥ .
…
4 ⲛⲧⲉⲣⲉϥⲛⲁⲩ ⲛϭⲓⲡⲣⲣⲟ ϫⲉⲛⲥⲥⲙⲉⲗⲉⲓ ⲛⲁϥ ⲁⲛ ⲁϥϭⲱⲛⲧ ⲉⲙⲁⲧⲉ : ⲻ
…
5 ⲁϥⲧⲱⲟⲩⲛ ⲛϭⲓⲡⲣⲣⲟ ⲁϥϥⲓ ⲛⲧⲉϥⲥⲏⲃⲉ ⲙⲙⲓⲛ ⲙⲙⲟϥ ⲁϥⲡⲉϩ ϩⲏⲧϥ ⲙⲡⲇⲓⲕⲁⲓⲟⲥ ϩⲛⲧⲉϥϭⲓϫ ⲁⲛⲉϥⲙⲁϩⲧ ϩⲉ ⲉⲡⲉⲥⲏⲧ ⲉϫⲙⲡⲕⲁϩ ·
…
6 ⲛⲧⲉⲩⲛⲟⲩ ⲉⲓⲥⲟⲩⲕⲗⲟⲟⲗⲉ ⲛⲟⲩⲟⲉⲓⲛ ⲁⲥⲣϩⲁⲓⲃⲥ ⲉϩⲣⲁⲓ ⲉϫⲱϥ ⲁⲡⲁⲅⲅⲉⲗⲟⲥ ⲙⲡϫⲟⲉⲓⲥ ϥⲓ ⲛⲛⲉϥⲙⲁϩⲧ ⲁϥⲧⲁⲁⲩ ⲉϩⲟⲩⲛ ⲉϩⲏⲧϥ ⲛⲧⲉϥϩⲏ
…
7 ⲁⲩⲱ ⲁϥⲥⲗⲉϭⲗⲱϭⲡⲉϥⲥⲱⲙⲁ ⲧⲏⲣϥ ⲁϥⲣⲧϩⲉ ⲉϣϫⲉ ⲙⲡⲟⲩϫⲱϩ ⲉⲣⲟϥ ⲻ ⲉⲡⲧⲏⲣϥ .
…
8 ⲛⲧⲉⲣⲉϥⲛⲁⲩ ⲇⲉ ⲛϭⲓ ⲡⲣⲣⲟ ϫⲉⲙⲡⲉϥⲉϣϭⲙϭⲟⲙ ⲉⲣⲟϥ .
…
9 ⲡⲉϫⲁϥ ϫⲉⲁⲓⲉⲓⲙⲉ ϫⲉⲟⲩⲡⲉ ϯⲛⲁⲁⲁϥ ϯⲛⲁϫⲟⲟⲩϥ ⲉⲣⲁⲧϥ ⲛ ⲉⲩⲧⲩⲭⲱⲇⲟⲣⲟⲥ ⲧⲁⲭⲁ ⲟⲩⲛⲙⲁⲅⲟⲥ ϩⲁⲧⲏϥ ⲉϥϭⲙϭⲟⲙ ⲉⲙⲁⲧⲉ ⲁϥⲧⲱⲟⲩⲛ ⲙⲙⲁⲩ ϩⲙⲡⲃⲏⲙⲁ ⲁϥⲕⲉⲗⲉⲩⲉ ⲉⲧⲣⲉⲩⲟⲧⲡϥ ⲉϩⲟⲩⲛ ϣⲁⲛⲧⲉϥⲥϩⲁⲓ ⲛⲧⲉϥⲁⲛⲁⲫⲟⲣⲁ .
…
10 ⲁⲩⲱ ⲁϥϫⲓ ⲛⲁϥ ⲛⲟⲩⲭⲁⲣⲧⲏⲥ ⲁϥⲥϩⲁⲓ ⲉⲣⲟϥ ⲛⲧⲉⲓϩⲉ ⲉϥϫⲱ ⲙⲙⲟⲥ . ϫⲉⲁⲛⲟⲕ ⲡⲉ ⲗⲓⲃⲉⲣⲓⲁⲛⲟⲥ ⲡⲣⲣⲟ ⲛⲧⲕⲟⲩⲛⲑⲓⲁ ⲉϥⲥϩⲁⲓ ⲛⲉⲩⲧⲩⲭⲟⲇⲟⲣⲟⲥ ⲡⲣⲣⲟ ⲛⲛⲙⲏⲧⲟⲥ ⲭⲉⲣⲉⲧⲉ .
…
11 ⲉⲡⲉⲓⲇⲏ ⲁⲩⲥⲧⲁⲥⲓⲁⲍⲉ ⲛϭⲓⲡⲅⲉⲛⲟⲥ ⲛⲛⲉⲭⲣⲏⲥϯⲁⲛⲟⲥ ϩⲛϩⲛϩⲃⲏⲩⲉ ⲙⲙⲁⲅⲓⲁ ⲉⲩⲙⲡϣⲁ ⲙⲡⲙⲟⲩ .
…
12 ⲉⲓⲥϩⲏⲏⲧⲉ ⲁⲓⲧⲛⲛⲟⲟⲩ ⲛⲁⲕ ⲛⲟⲩⲁ ⲉⲃⲟⲗ ⲛϩⲏⲧⲟⲩ ⲉⲡⲉϥⲣⲁⲛ ⲡⲉ ϩⲏⲗⲓⲁⲥ ϫⲉⲕⲁⲥ ⲉⲕⲉⲙⲟⲟⲩⲧϥ .
…
13 ⲗⲟⲓⲡⲟⲛ ⲁϥⲕⲉⲗⲉⲩⲉ ⲉⲧⲣⲉⲩⲉⲓⲛⲉ ⲉⲃⲟⲗ ⲙⲡⲡⲉⲧⲟⲩⲁⲁⲃ ϩⲏⲗⲓⲁⲥ ⲛϥⲧⲁⲁϥ ⲉⲧⲟⲟⲧⲟⲩ ⲙⲡⲣⲟⲧⲉⲕⲧⲱⲣ ⲥⲛⲁⲩ ⲁⲩⲁⲗⲉ ⲉⲩϭⲓⲛⲟⲩⲏⲗ ϩⲛⲧϩⲁⲗⲁⲥⲥⲁ ⲡϩⲁⲅⲓⲟⲥ ⲇⲉ ϩⲏⲗⲓⲁⲥ ⲁⲩⲥⲟⲛϩϥ ⲁⲩⲛⲟϫϥ ⲉⲡⲟⲩ ⲉⲛⲧⲙⲡϫⲟⲉⲓ
…
14 ⲁⲥϣⲱⲡⲉ ⲇⲉ ⲛⲧⲉⲣⲟⲩϭⲱⲟⲩ ⲉⲃⲟⲗ ⲙⲡϫⲟⲓⲉⲓⲥ ⲙⲓⲭⲁⲏⲗ ⲁϥⲉⲓ ⲉⲡⲉⲥⲏⲧ ⲉⲃⲟⲗ ϩⲛⲧⲡⲉ ⲙⲛⲟⲩⲕⲗⲟⲟⲗⲉ ⲛⲟⲩⲟⲉⲓⲛ ⲁϥⲃⲱⲕ ⲉⲡⲉⲥⲏⲧ ⲉⲡⲟⲩⲉ ⲛⲧⲙⲡϫⲟⲉⲓ ⲁϥⲃⲱⲗ ⲉⲃⲟⲗ ⲙⲡϩⲁⲅⲓⲟⲥ ϩⲏⲗⲓⲁⲥ ⲁϥⲧⲁⲗⲟϥ ϩⲓϫⲉⲛⲧⲉⲕⲗⲟⲟⲗⲉ ⲛⲟⲩⲟⲉⲓⲛ ·
…
15 ⲁϥϫⲓⲧϥ ⲉϩⲣⲁⲓ ⲙⲡⲏⲩⲉ .
…
16 ⲁϥⲛⲁⲩ ⲉⲛⲉⲧⲟⲩⲁⲁⲃ ⲧⲏⲣⲟⲩ ⲁϥⲁⲥⲡⲁⲍⲉ ⲙⲙⲟⲟⲩ ⲉⲩϯⲟⲩⲣⲟⲧ ⲛϩⲏⲧ ⲛⲁϥ ⲁϥϫⲓⲧϥ ⲉϩⲣⲁⲓ ⲉⲧⲙⲉϩ ϣⲟⲙⲧⲉ ⲙⲡⲉ
…
17 ⲁⲩⲱ ⲟⲛ ⲉⲡⲡⲁⲣⲁⲇⲓⲥⲟⲥ ⲉⲣⲉⲉⲡϣⲏⲛ ⲙⲡⲱⲛϩ ϩⲉⲛⲧⲉϥⲙⲏⲧⲉ .
…
18 ⲡⲁⲗⲓⲛⲟⲛ ⲁϥϫⲓⲧϥ ⲉϩⲟⲩⲛ ⲉⲡⲕⲁϩ ⲛⲧⲉⲕⲗⲏⲣⲟⲛⲟⲙⲓⲁ ·
…
19 ⲁϥⲛⲁⲩ ⲉⲣⲟϥ ⲉⲣⲉⲡⲉϥⲕⲁϩ ⲟⲩⲟⲃϣ ⲛⲧϩⲉ ⲛⲟⲩϩⲁⲧ ⲉϥⲥⲟⲧⲡ ⲉϥⲟϣ ⲛϣⲏⲛⲉⲩⲟⲡⲧ ⲛⲕⲁⲣⲡⲟⲥ ⲉⲛⲁⲛⲟⲩϥ ⲉⲙⲁⲧⲉ .
…
20 ⲡⲁⲗⲓⲛ ⲟⲛ ⲁⲩϫⲓⲧϥ ⲉⲧⲡⲟⲗⲓⲥ ⲙⲡⲉⲭⲣⲓⲥⲧⲟⲥ
…
21 ⲁⲩⲱ ⲛⲉⲣⲉⲙⲛⲧⲥⲛⲟⲟⲩⲥ ⲛⲥⲟⲃⲧ ⲕⲱⲧⲉ ⲉⲧⲡⲟⲗⲓⲥ ⲉⲧⲙⲙⲁⲩ
…
22 ⲡⲁⲗⲓⲛ ⲟⲛ ⲁⲩⲧⲥⲁⲃⲟϥ ⲉⲩⲛⲟϭ ⲛⲏⲓ ⲛⲧϩⲉ ⲛⲟⲩⲡⲁⲗⲗⲁϯⲟⲛ ⲛⲣⲣⲟ ⲉϥⲕⲏⲧ ⲙⲡϩⲟⲩⲛ ⲙⲡⲥⲟⲃⲧ ⲉϥⲛⲁⲉⲣⲡⲟⲩⲱϣⲥ ⲙⲙⲛⲧⲁⲥⲉ ⲛⲥⲓⲧⲓⲱϩⲉ ⲉϥⲕⲏⲧ ⲛⲛⲟⲩⲃ ⲧⲏⲣϥ ϩⲓⲱⲛⲉ ⲙⲙⲁⲣⲕⲁⲣⲏⲧⲏⲥ ⲉϥⲛⲁⲉⲣⲁϣⲉ ⲙⲙⲁϩⲉ ⲛϫⲓⲥⲉ ·
…
23 ⲉⲣⲉⲡⲉϥⲗⲱⲃϣⲕⲏⲧ ⲛⲱⲛⲉ ⲙⲙⲉ ⲉϥⲣⲟⲩⲟⲉⲓⲛ ⲉϩⲟⲩⲉ ⲉⲡⲣⲏ
…
24 ⲡⲉϫⲉⲙⲓⲭⲁⲏⲗ ⲛⲁϥ ϫⲉⲡϩⲁⲅⲓⲟⲥ ϩⲏⲗⲓⲁⲥ ⲡⲱⲕ ⲡⲉⲛⲓⲏⲓ ⲉⲧⲕⲏⲧ ⲛⲛⲟⲩⲃϩⲓⲱⲛⲉ ⲙⲙⲁⲣⲕⲁⲣⲓⲧⲏⲥ ⲛⲧⲉⲣⲉⲡⲡⲉⲧⲟⲩⲁⲁⲃ ϩⲏⲗⲓⲁⲥ ⲥⲱⲧⲙ ⲉⲛⲉⲓϣⲁϫⲉ ⲁϥⲣⲁϣⲉ ⲉⲙⲁⲧⲉ ⲛϩⲟⲥⲟⲛ ⲇⲉ ⲉϥⲙⲟⲟϣⲉ ϩⲛⲧⲡⲟⲗⲓⲥ ⲉⲓⲥ ⲡϫⲟⲉⲓⲥ ⲓⲏⲥⲟⲩⲥ ⲁϥⲉⲓ ⲉⲃⲟⲗ ϩⲛⲧⲡⲉ ϩⲁⲧⲉϥϩⲏ
…
25 ⲡⲉϫⲁϥ ⲛⲁϥ ϫⲉϫⲣⲟ ⲙⲙⲟⲕ ⲱ ϩⲏⲗⲓⲁⲥ ⲡⲁⲙⲉⲣⲓⲧ ⲁϥϩⲱⲛ ⲉϩⲟⲩⲛ ⲉⲣⲟⲕ ⲛϭⲓⲡⲉⲕⲁⲅⲱⲛ ⲉⲓⲥϩⲏⲏⲧⲉ ⲁⲕⲛⲁⲩ ϫⲉⲟⲩ ⲛⲟⲩⲏⲣ ⲛⲁⲅⲁⲑⲟⲛ ⲥⲃⲧⲱⲧ ⲛⲛⲉⲧⲛⲁⲡⲓⲥⲧⲉⲩⲉ ⲉⲣⲟⲓ ϩⲙⲡⲉⲩϩⲏⲧ ⲧⲏⲣϥ .
…
26 ⲁⲛⲟⲕ ⲡⲉ ⲓⲏⲥⲟⲩⲥ ⲡϣⲉⲛⲟⲩϥⲉ ⲛⲛⲁⲓⲱⲛ ⲧⲏⲣⲟⲩ ⲉⲓⲥϩⲏⲏⲧⲉ ϯϩⲓϣⲉⲛⲟⲩϥⲉ ⲛⲁⲕ ϩⲱⲱⲕ ⲙⲡϩⲟⲟⲩ ⲛⲧⲟⲕ ⲇⲉ ⲛⲁⲙⲉⲣⲓⲧ ⲉⲩϣⲁⲛϫⲓⲧⲕ ⲉⲧⲙⲏⲧⲓⲁ ϥⲛⲁⲙⲟⲟⲩⲧⲕ ⲛϭⲓⲉⲩⲧⲩⲭⲟⲇⲟⲣⲟⲥ ⲡⲣⲣⲟ ⲛⲧⲙⲏⲧⲓⲁ ⲉⲡⲉⲓⲇⲏ ⲉⲕⲛⲁϫⲱⲕ ⲉⲃⲟⲗ ⲙⲡⲉⲕⲁⲅⲱⲛ ⲉⲃⲟⲗ ϩⲓⲧⲟⲟⲧϥ
…
27 ⲁϥⲟⲩⲱϣⲃ ⲛϭⲓⲡϩⲁⲅⲓⲟⲥ ϩⲏⲗⲓⲁⲥ ⲡⲉϫⲁϥ ⲙⲡⲥⲱⲧⲏⲣ ϫⲉⲡⲁϫⲟⲉⲓⲥ ⲛϯⲟⲩⲱϣ ⲁⲛ ⲉϭⲱϩⲛⲧⲙⲏⲧⲉ ⲛⲛϩⲉⲑⲛⲟⲥ ⲛⲁⲧⲛⲟⲩⲧⲉ ⲙⲏⲡⲱⲥ ⲛⲥⲉϫⲱⲱⲣⲉ ⲉⲃⲟⲗ ⲛⲛⲁⲕⲉⲉⲥ ⲛⲥⲉⲱϫⲛ ⲙⲡⲁⲉⲣⲡⲙⲉⲉⲩⲉ ⲉⲃⲟⲗ ϩⲓϫⲙⲡⲕⲁϩ .
…
28 ⲡⲉϫⲉⲡⲥⲱⲧⲏⲣ ⲛⲁϥ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲁⲕ ⲱ ⲡⲁⲥⲱⲧⲡ ϩⲏⲗⲓⲁⲥ ϫⲉⲛⲧϩⲉ ⲛϯⲱⲧⲉ ⲛⲧⲡⲉ ⲛϣⲁⲥⲡⲱⲣϣ ⲉⲃⲟⲗ ϩⲓϫⲙⲡⲕⲁϩ ⲧⲏⲣϥ ⲧⲁⲓ ⲧⲉ ⲧϩⲉ ⲉⲧⲟⲩⲡⲁϯⲉⲟⲟⲩ ⲙⲡⲁⲣⲁⲛ ⲉⲃⲟⲗ ϩⲓⲧⲟⲟⲧⲕ ⲉⲧⲃⲉⲛⲉϭⲟⲙ ⲉⲧⲟⲩⲛⲁϣⲱⲡⲉ ϩⲙⲡⲉⲕⲥⲱⲙⲁ .
…
29 ⲁⲩⲱ ⲉⲧⲃⲉϫⲉⲁⲕⲉⲧⲉⲓ ⲙⲙⲟⲓ ⲉⲧⲣⲉⲩϥⲓ ⲙⲡⲉⲕⲥⲱⲙⲁ ⲉⲃⲟⲗ ϩⲛⲛϩⲉⲑⲛⲟⲥ ϯⲛⲁϯⲙⲧⲟⲛ ⲙⲡⲉ ⲕϩⲏⲧ ⲧⲁϫⲱⲕ ⲉⲃⲟⲗ ⲙⲡⲉⲕⲁⲓⲇⲏⲙⲁ .
…
30 ⲙⲛⲛⲥⲁ ϩⲛϩⲟⲟⲩ ⲇⲉ ϯⲛⲁϭⲱⲗⲡ ⲉⲃⲟⲗ ⲙⲡⲉⲕⲉⲣⲡⲙⲉⲉⲩⲉ ⲉϩⲛⲇⲓⲕⲁⲓⲟⲥ ⲉⲩⲟⲩⲛϩ ϩⲛⲕⲏⲙⲉ ϩⲛⲟⲩϩⲟⲣⲟⲙⲗ ⲛⲧⲁⲧⲣⲉⲩⲉⲓ ⲛⲥⲁⲡⲉⲕⲥⲱⲙⲗ ⲛⲥⲉϫⲓⲧϥ ⲉϩⲣⲁⲓ ⲉⲕⲏⲙⲉ ⲛⲥⲉⲕⲁⲁϥ ⲙⲙⲁⲩ
…
31 ⲁⲩⲱ ⲡⲙⲁ ⲉⲧⲟⲩⲛⲁⲕⲱ ⲙⲡⲉⲕⲥⲱⲙⲁ ⲛϩⲏⲧϥ ϯⲛⲁⲧⲣⲉⲩⲕⲱ ⲙⲡⲥⲱⲙⲁ ⲛⲕⲉⲇⲓⲕⲁⲓⲟⲥ ·
…
32 ⲥⲛⲁⲩ ⲛϩⲏⲧϥ .
…
33 ⲁⲩⲱ ⲡⲧⲟⲡⲟⲥ ⲉⲧⲟⲩⲛⲁⲕⲱ ⲙⲡⲉⲕⲥⲱⲙⲁ ⲛϩⲏⲧϥ ϥⲛⲁϣⲱⲡⲉ ⲛⲁⲓ ⲛⲟⲩⲉⲣⲡⲉ ϣⲁⲉⲛⲉϩ .
…
34 ⲁⲩⲱ ⲟⲩⲟⲛ ⲛⲓⲙ ⲉⲧⲛⲁⲉⲓ ⲉϩⲟⲩⲛ ⲉⲡⲉⲕⲧⲟⲡⲟⲥ ⲛϥⲉⲧⲓ ⲙⲙⲟⲓ ϩⲛⲁⲓⲧⲏⲙⲁ ⲛⲓⲙ ϩⲛⲟⲩⲡⲓⲥⲧⲓⲥ ϩⲙⲡⲉⲕⲣⲁⲛ ϯⲛⲁⲁⲁⲩ ⲛⲙⲙⲁϥ
…
35 ⲁⲩⲱ ⲣⲱⲙⲉ ⲛⲓⲙ ⲉⲧϣⲱⲛⲉ ϩⲛϣⲱⲛⲉ ⲛⲓⲙ ⲉⲩϣⲁⲛⲉⲓ ⲉϩⲟⲩⲛ ⲉⲡⲉⲕⲧⲟⲡⲟⲥ ⲛⲥⲉⲥⲉⲡⲥⲱⲡⲕ ϩⲙⲡⲉⲕⲣⲁⲛ ϯⲛⲁⲭⲁⲣⲓⲍⲉ ⲛⲁⲩ ⲙⲡϯⲛⲁⲧⲣⲉⲡⲉⲕⲧⲁⲗϭⲟ .
…
36 ⲣⲁⲛ ⲉⲣⲥⲟⲉⲓⲧ ϩⲙⲙⲁ ⲛⲓⲙ ⲛⲧⲁⲧⲣⲉϩⲉⲛⲛⲟϭ ⲛϭⲟⲙ ϩⲓϣⲏⲏⲣⲉ ϣⲱⲡⲉ ϩⲙⲡⲉⲕⲕⲏⲙⲏⲧⲏⲣⲓⲟⲛ
…
37 ⲛⲁⲓ ⲇⲉ ⲛⲧⲉⲣⲉⲡϫⲟⲉⲓⲥ ⲓⲏⲥⲟⲩⲥ ϫⲟⲟⲩ ⲉϩⲣⲁⲓ ⲙⲡⲏⲩⲉ ϩⲛⲟⲩⲉⲟⲟⲩ .
…
38 ⲁⲩⲱ ⲛⲧⲉⲩⲛⲟⲩ ⲁⲡϫⲟⲉⲓ ⲙⲟⲟⲛⲉ ⲉⲧⲙⲣⲱ ⲛⲧⲙⲏⲧⲓⲁⲧⲙⲛⲧⲣⲟⲡⲟⲗⲓⲥ ⲛⲛⲉⲙⲏⲧⲟⲥ
…
39 ⲁⲩⲱ ⲁⲛⲉⲡⲣⲟⲧⲉⲕⲧⲱⲣ ϯ ⲛⲛⲉⲥϩⲁⲓ ⲛⲉⲩⲧⲏⲭⲱⲇⲟⲣⲟⲥ ⲡⲣⲣⲟ .
…
40 ⲧⲙⲉϩⲥⲛⲧⲉ ⲙⲙⲁⲣⲧⲩⲣⲓⲁ ⲙⲡϩⲁⲅⲓⲟⲥ ϩⲏⲗⲓⲁⲥ · ⲛⲧⲁϥⲁⲁⲥ ϩⲓⲗⲓⲃⲉⲣⲓⲁⲛⲟⲥ ⲡⲣⲣⲟ ⲛⲧⲕⲟⲩⲛⲑⲓⲁ ϩⲛⲟⲩⲉⲓⲣⲏⲛⲏ ϩⲁⲙⲏⲛ .
…
41 ⲁⲥϣⲱⲡⲉ ⲇⲉ ⲛⲧⲉⲣⲟⲩϯ ⲛⲧⲁⲛⲁⲫⲟⲣⲁ ⲙⲡϩⲁⲅⲓⲟⲥ ϩⲏⲗⲓⲁⲥ ⲛⲉⲩⲧⲩⲭⲟⲇⲟⲣⲟⲥ ⲡⲣⲣⲟ ⲛⲧⲙⲏⲧⲓⲁ ⲁϥⲱϣ ⲛϩⲱⲃ ⲛⲓⲙ ⲛⲧⲁⲩⲥϩⲁⲓⲥⲟⲩ ϩⲁⲣⲟϥ ⲁϥⲧⲣⲉⲩⲟⲧⲏϥ ⲉϩⲟⲩⲛ ϣⲁⲡⲉϥⲣⲁⲥⲧⲉ ⲛϥⲥⲱⲧⲙ ⲉⲣⲟϥ ⲁϥⲥϩⲁⲓ ⲛⲧϣⲃⲃⲓⲱ ⲛⲛⲉⲥϩⲁⲓ ⲁϥϫⲟⲟⲩⲥⲟⲩ ·
…
42 ⲉⲧⲣⲉⲩⲃⲱⲕ ϣⲁⲡⲉⲩⲣⲣⲟ ⲉⲧⲉⲩⲭⲱⲣⲁ ⲙⲡⲉϥⲣⲁⲥⲧⲉ ⲇⲉ ⲁϥϩⲙⲟⲟⲥ ϩⲓⲡⲃⲏⲙⲁ ⲛϭⲓⲡⲣⲣⲟ ⲁϥⲧⲣⲉⲩⲉⲓⲛⲉ ⲛⲁϥ ⲙⲡⲡⲉⲧⲟⲩⲁⲁⲃ ϩⲏⲗⲓⲁⲥ .
…
43 ⲡⲉϫⲉⲡⲣⲣⲟ ⲛⲁϥ ϫⲉϩⲏⲗⲓⲁⲥ ⲟⲩⲛⲉⲛⲉⲓϩⲃⲏⲩⲉ ⲉⲧϩⲟⲟⲩ ⲛⲧⲁⲩⲥϩⲁⲓⲥⲟⲩ ⲛⲁⲓ ϫⲉⲕⲉⲓⲣⲉ ⲙⲙⲟⲟⲩ ⲧⲉⲛⲟⲩ ϭⲉ ⲑⲩⲥⲓⲁⲍⲉ ⲁϥⲟⲩⲱϣⲃ ⲛϭⲓⲛⲇⲓⲕⲁⲓⲟⲥ ϫⲉϥⲥⲏϩ ϩⲛⲛⲉⲅⲣⲗⲫⲏ ⲉⲧⲟⲩⲁⲁⲃ ϫⲉⲛⲛⲉⲧⲉⲛϣⲙϣⲉ ⲛϩⲛⲙⲟⲩⲛⲅ ⲛϭⲓϫ ϫⲉⲁⲛⲟⲕ ⲡⲉ ⲛⲛⲟⲩⲧⲉ ⲙⲛⲕⲉⲟⲩⲁ
…
44 ⲛⲃⲗⲗⲁⲓⲛⲁⲓ ⲇⲉ ⲛⲧⲉⲣⲉϥⲥⲟⲧⲙⲟⲩ ⲛϭⲓⲡⲣⲣⲟ ⲁϥⲧⲣⲉⲩⲁϣⲧϥ ⲉⲩϣⲧⲏⲛϫⲟⲉⲓ ⲛⲥⲉⲛⲉϫⲥⲟⲧⲉ ⲉⲣⲟϥ ⲛⲁϣⲟⲙⲧⲉ ⲛⲟⲩⲛⲟⲩ .
…
45 ⲡⲡⲉⲧⲟⲩⲁⲁⲃ ⲇⲉ ϩⲏⲗⲓⲁⲥ ⲁϥⲥⲫⲣⲁⲅⲓⲍⲉ ⲙⲙⲟϥ ⲙⲡⲧⲩⲡⲟⲥ ⲙⲡⲉⲥⲧⲁⲩⲣⲟⲥ .
…
46 ⲛⲧⲉⲩⲛⲟⲩ ⲉⲓⲥ ⲟⲩⲕⲗⲟⲟⲗⲉ ⲛⲟⲩⲟⲉⲓⲛ ⲁⲥⲥⲕⲉⲡⲁⲍⲉ ⲙⲙⲟϥ ⲙⲡⲉⲥⲕⲁⲗⲁⲁⲩ ⲛⲥⲟⲧⲉ ⲉϫⲱϩ ⲉⲣⲟϥ ⲉⲡⲧⲏⲣϥ .
…
47 ⲛⲧⲉⲣⲉϥⲛⲁⲩ ⲛϭⲓⲡⲣⲣⲟ ⲁϥⲣϣⲡⲏⲣⲉ ⲉⲙⲁⲧⲉ ⲁϥⲕⲉⲗⲉⲩⲉ ⲉⲧⲣⲉⲩⲕⲁⲁϥ ⲉⲡⲉⲥⲏⲧ ϩⲓⲡϣⲏ .
…
48 ⲡⲉϫⲉⲡⲣⲣⲟ ⲛⲁϥ ϫⲉϩⲏⲗⲓⲁⲥ ⲉⲓⲟⲩⲱϣ ⲉⲧⲣⲉⲕⲧⲁⲙⲟⲓ ⲉⲡⲉⲓⲙⲁⲉⲓⲛ ⲛⲧⲁⲕⲁⲁϥ ⲉⲧⲉⲕⲧⲉϩⲛⲉ ϣⲁⲕⲧⲉⲕⲛⲟⲩϩⲙ ⲉⲛⲉⲓⲥⲟ ⲧⲉ ⲉⲧⲛⲁϣⲧ ⲉⲓϫⲱ ⲙⲙⲟⲥ ⲁⲛⲟⲕ ϩⲙⲡⲁϩⲏⲧ ϫⲉⲟⲩϩⲱⲃ ⲙⲙⲁⲅⲓⲁ ⲡⲉ ⲡⲁⲓ ⲛⲧⲁⲕ ⲁⲁϥ ⲙⲙⲟⲛ ⲛⲉⲕⲛⲁⲟⲩϫⲁⲓ ⲁⲛ ⲡⲉ ⲡⲉϫⲉⲡϩⲁⲅⲓⲟⲥ ϩⲏⲗⲓⲁⲥ ⲛⲁϥ ϫⲉⲱ ⲡⲣⲣⲟ ⲙⲡⲉⲣⲙⲉⲉⲩⲉ ϫⲉⲟⲩϩⲱⲃ ⲙⲙⲁⲅⲓⲁ ⲡⲉ ⲡⲁⲓ ⲛⲧⲁⲓⲁⲁϥ ⲛⲛⲉⲥϣⲱⲡⲉ ⲁⲗⲗⲁ ⲡⲁⲓ ⲡⲉ ⲡⲧⲩⲡⲟⲥ ⲙⲡⲉⲥⲧⲁⲩⲣⲟⲥ ⲙⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲉϫⲉⲡⲣⲣⲟ ⲛⲁϥ ϫⲉⲛⲧⲁⲩⲉⲓϣⲉ ⲙⲡⲉⲕϫⲟⲉⲓⲥ ⲁⲩⲣⲣⲟⲩ ⲛⲁϥ .
…
49 ⲡⲉϫⲉⲡⲇⲓⲕⲁⲓⲟⲥ ⲛⲁϥ ϫⲉⲁϥⲁⲗⲉ ⲉⲡⲉⲥⲧⲁⲩⲣⲟⲥ ⲁϥⲙⲟⲩ ϩⲁⲛⲉⲛⲛⲟⲃⲉ ⲡⲉϫⲉ ⲡⲣⲣⲟ ⲛⲁϥ ϫⲉⲟⲩⲕⲟⲩⲛ ⲁⲡⲉⲕⲛⲟⲩⲧⲉ ⲙⲟⲩϩⲱⲱϥ ⲛⲧϩⲉ ⲛⲣⲱⲙⲉ ⲛⲓⲙ ⲡⲉϫⲉⲡⲇⲓⲕⲁⲓⲟⲥ ϫⲉⲙⲉⲛⲧⲟⲓⲅⲉ ⲟⲩⲁⲧⲙⲟⲩ ⲡⲉ ⲁⲗⲗⲁ ⲁϥⲙⲟⲩⲗϥ ⲧⲱⲟⲩⲛ ϣⲁⲛⲧⲉϥϯ ⲙⲡⲱⲛϩ ⲛⲁⲛ ⲡⲉϫⲉⲡⲣⲣⲟ ⲛⲁϥ ϫⲉⲁⲁⲗⲏⲑⲱⲥ ⲡⲙⲟⲩ ⲛⲧⲁⲡⲉⲕⲛⲟⲩⲧⲉ ⲓⲏⲥⲟⲩⲥ ⲙⲟⲩ ⲛϩⲏⲧϥ ϯⲛⲁⲙⲟⲟⲩⲧⲕ ϩⲱⲱⲕ ⲛϩⲏⲧϥ .
…
50 ⲗⲟⲓⲡⲟⲛ ⲁϥⲕⲉⲗⲉⲩⲉ ⲉⲧⲣⲉⲩⲧⲁⲙⲓⲟ ⲛⲟⲩⲥⲧⲁⲩⲣⲟⲥ ⲛⲥⲉⲉⲓϣⲉ ⲙⲏ ⲡⲉⲧⲟⲩⲁⲁⲃ ⲉⲣⲟϥ ⲛⲧⲉⲣⲟⲩⲧⲁⲗⲟ ⲙⲡⲡⲉⲧⲟⲩⲁⲁⲃ ⲉⲣⲟϥ ⲁϥⲣⲁϣⲉ ϫⲉⲁϥⲉⲙⲡϣⲁ ⲙⲡⲧⲩⲡⲟⲥ ⲙⲡϫⲟⲉⲓⲥ .
…
51 ⲁⲩⲱ ⲛⲧⲉⲩⲛⲟⲩ ⲉⲓⲥ ⲟⲩϭⲣⲟⲟⲙⲡⲉ ⲛⲟⲩⲟⲉⲓⲛ ⲁⲥⲟⲩⲱϩ ϩⲓϫⲙⲛⲧⲛ ϩⲛⲟⲩⲛⲁⲙ ⲙⲡⲉⲥⲧⲁⲩⲣⲟⲥ ·
…
52 ⲁⲩⲱ ⲕⲉⲟⲩⲉⲓ ϩⲓϫⲙⲡⲧⲛϩ ⲛϩⲃⲟⲩⲣ ⲁⲩⲡⲱⲣϣ ϩⲓϫⲱϥ ⲛⲛⲉⲩⲧⲛϩ ⲁⲩⲥⲕⲉⲡⲁⲍⲉ ⲙⲙⲟϥ ϫⲉⲛⲉϥⲕⲏⲕⲁϩⲏⲩ ⲡⲉ .
…
53 ⲁⲩⲱ ⲉⲓⲥ ⲟⲩⲥⲙⲏ ⲁⲥⲡⲱϩ ϣⲁⲣⲟϥ ϫⲉⲱ ϩⲏⲗⲓⲁⲥ ⲉⲓⲥ ⲛⲧⲩⲡⲟⲥ ⲛⲧⲁⲓⲫⲟⲣⲉⲓ ⲙⲙⲟϥ ⲁⲛⲟⲕ ⲡϣⲏⲣⲉ ⲙⲡⲛⲟⲩⲧⲉ ⲉⲓⲥϩⲏⲏⲧⲉ ⲁⲕⲫⲟⲣⲉⲓ ⲙⲙⲟϥ ϩⲱⲱⲕ .
…
54 ⲉⲡⲉⲓⲇⲏ ⲁⲩⲁϣⲧ ⲉⲡⲉⲥⲧⲁⲩⲣⲟⲥ ⲁⲩⲕⲁⲁⲧ ϩⲛⲧⲙⲏⲧⲉ ⲛⲥⲟⲟⲛⲉ ⲥⲛⲁⲩ ϩⲁⲙⲏⲛ ϯϫⲱ ⲙⲙⲟⲥ ⲛⲁⲕ ⲡⲁⲥⲱⲧⲡ ϩⲏⲗⲓⲁⲥ ϫⲉⲙⲉⲛ ⲡⲉⲧϫⲟⲥⲉ ⲉⲡⲧⲩⲡⲟⲥ ⲛⲧⲁⲕⲫⲟⲣⲉⲓ ⲙⲙⲟϥ
…
55 ⲁⲩⲱ ⲛⲧⲉⲣⲉⲓⲏⲥⲟⲩⲥ ⲟⲩⲱ ⲉϥϣⲁϫⲉ ⲛⲙⲙⲁϥ ⲁⲩϣⲱⲡⲉ ⲛϭⲓϩⲛϩⲣⲟⲩⲃⲁⲓⲙⲛ ϩⲛⲉⲃⲣⲏϭⲉ ⲟⲩⲛⲟϭ ⲛϩⲟⲧⲉ
…
56 ⲁⲥϩⲉ ⲉϫⲉⲛⲟⲩⲟⲛ ⲛⲓⲙ ⲉⲧϩⲙⲡⲉϥⲕⲱⲧⲉ .
…
57 ⲁⲩⲱ ⲉⲓⲥ ⲛⲁⲅⲅⲉⲗⲟⲥ ⲁⲩⲉⲓ ⲁⲩⲃⲱⲗ ⲉⲃⲟⲗ ⲙⲡⲡⲉⲧⲟⲩⲁⲁⲃ ⲁⲩⲕⲁⲁϥ ⲉⲡⲉⲥⲏⲧ ϩⲓⲡⲉⲥⲧⲁⲩⲣⲟⲥ ⲁⲩϥⲓ ⲙⲡⲉⲥⲧⲁⲩⲣⲟⲥ ⲁⲩⲡⲱⲧ ⲁⲩⲕⲁⲡϩⲁⲅⲓⲟⲥ ϩⲏⲗⲓⲁⲥ ⲉϥⲁϩⲉⲣⲁⲧϥ .
…
58 ⲡⲣⲣⲟ ⲇⲉ ⲛⲧⲉⲣⲉϥⲛⲁⲩ ⲉⲛⲁⲓ ⲁϥⲣϣⲡⲏⲣⲉ ⲁϥⲧⲱⲟⲩⲛ ϩⲓⲡⲃⲏⲙⲁ ⲙⲡⲉϩⲟⲟⲩ ⲉⲧⲙⲙⲁⲩ ⲁϥⲧⲣⲉⲩⲟⲧⲡϥ ⲉϩⲟⲩⲛ ϣⲁⲡⲉϥⲣⲁⲥⲧⲉ ⲙⲡⲉϥⲣⲁⲥⲧⲉ ⲇⲉ ⲛⲧⲉⲣⲉⲡⲣⲣⲟ ϭⲱⲛⲧ ⲉⲙⲁⲧⲉ ⲉⲧⲃⲉϫⲉⲁⲡⲇⲓⲁⲃⲟⲗⲟⲥ ⲙⲉϩⲡⲉϥϩⲏⲧ ⲙⲡⲉⲟⲟⲟⲩ ⲛⲓⲙ ⲉϩⲟⲩⲛ ⲉⲣⲟϥ ⲛⲧⲉⲩⲛⲟⲩ ⲁϥϩⲙⲟⲟⲥ ϩⲓⲡⲃⲏⲙⲁ ⲁϥⲕⲉⲗⲉⲩⲉ ⲉⲧⲣⲉⲩⲉⲓⲛⲉ ⲛⲁϥ ⲙⲡⲡⲉⲧⲟⲩⲁⲁⲃ ⲡⲉϫⲉⲡⲣⲣⲟ ⲛⲁϥ ϫⲉϩⲏⲗⲓⲁⲥ ⲉⲕⲙⲉⲉⲩⲉ ϫⲉⲛⲧⲗⲕⲉⲓⲣⲉ ⲛϩⲉⲛⲧⲉⲭⲛⲏ ⲙⲙⲁⲅⲓⲁ ϣⲁⲛⲧⲉⲕⲟⲩϫⲁⲓ ϩⲓⲡⲉⲥⲧⲁⲩⲣⲟⲥ ϫⲉⲙⲛⲃⲁⲥⲁⲛⲟⲥ ϭⲉ ⲉⲧⲉⲣⲟⲕ ⲁϥⲕⲉⲗⲉⲩⲉ ⲛϭⲓⲡⲣⲣⲟ ⲉⲧⲣⲉⲩⲟⲩⲱϭⲡ ⲛⲛⲉϩⲁⲣⲙⲟⲥ ⲛⲛⲉϥϭⲓϫ ⲙⲛ ⲛⲁⲛⲉϥⲟⲩⲉⲣⲏⲧⲉ
…
59 ⲁⲩⲱ ⲛⲉϥϥⲓ ⲉⲣⲟϥ ⲡⲉ
…
60 ⲁⲩⲱ ⲁϥⲧⲣⲉⲩϩⲓⲟⲩⲉ ⲉϫⲉⲛⲧⲉϥ ⲁⲡⲉ ⲛⲟⲩϩⲁⲧⲏⲣ ⲙⲡⲉⲛⲓⲡⲉ ϣⲁⲛⲧⲉⲡⲉϥⲁⲛⲕⲉⲫⲁⲗⲟⲥ ⲉⲓ ⲉⲃⲟⲗ ϩⲉⲛⲣⲱϥ ⲙⲛϣⲁⲻⲁⲛⲧϥ .
…
61 ⲛⲧⲉⲣⲉϥⲛⲁⲩ ⲛϭⲓⲡⲣⲣⲟ ϫⲉⲙⲡⲉϥⲙⲟⲩϩ ⲉⲛⲛⲁⲓ ⲧⲏⲣⲟⲩ ⲛⲧⲁϥⲁⲁⲩ ⲛⲁϥ .
…
62 ⲁϥⲧⲣⲉⲩⲉⲓⲛⲉ ⲛⲁϥ ⲛϩⲉⲛⲟⲩⲣⲓⲟⲛ ⲛⲁⲅⲣⲓⲟⲛ ⲉⲩϩⲟⲟⲩ ⲉⲙⲁⲧⲉ ⲟⲩⲡⲁⲣⲇⲁⲗⲓⲥ ⲙⲛⲟⲩⲣⲓⲣ ⲛϩⲟⲟⲩⲧ
…
63 ⲛⲧⲟⲟⲩ ⲁϥⲧⲣⲉⲩⲛⲟⲩϫⲉ ⲙⲡϩⲁⲅⲓⲟⲥ ϩⲏⲗⲓⲁⲥ ⲛⲁⲩ ⲉϥⲙⲉⲉⲩⲉ ϫⲉⲥⲉⲛⲁⲡⲉϩ ϩⲏⲧϥ ⲛⲧⲉⲩⲛⲟⲩ
…
64 ⲛⲧⲉⲣⲉⲡⲉⲟⲩⲣⲓⲟⲛ ⲛⲁⲩ ⲉⲡϩⲁⲅⲓⲟⲥ ϩⲏⲗⲓⲁⲥ ⲉϥϣⲗⲏⲗ ⲉϩⲣⲁⲓ ⲉⲡⲛⲟⲩⲧⲉ ⲁⲩⲡⲱⲧ ⲉϩⲟⲩⲛ ⲉⲣⲟϥ ⲉⲩⲕⲓⲙ ⲛⲛⲉⲩⲥⲁⲧⲉ ⲉⲣⲟϥ ⲁⲩⲱ ⲁⲩⲡⲁϩⲧⲟⲩ ⲻⲁⲩⲟⲩⲱϣⲧ ⲛⲁϥ ⲡⲣⲣⲟ ⲇⲉ ⲁϥⲣϣⲡⲏⲣⲉ ⲉⲙⲁⲧⲉ ⲁⲩⲱ ⲁϥⲉⲓⲙⲉ ϫⲉⲛϥⲛⲁϣϭⲙϭⲟⲙ ⲉⲣⲟϥ ⲁⲛ ⲁϥϯⲁⲡⲟⲫⲁⲥⲓⲥ ⲉⲣⲟϥ ⲉⲧⲣⲉⲩϥⲓ ⲛⲧⲉϥⲁⲡⲉ ⲛⲥⲉϫⲓⲧϥ ⲉⲩⲛⲏⲥⲟⲥ ϩⲛⲧϩⲁⲗⲁⲥⲥⲁ ⲛⲥⲉⲕⲁⲁϥ ⲛϩⲏⲧⲥ ⲡϩⲁⲅⲓⲟⲥ ⲇⲉ ϩⲏⲗⲓⲁⲥ ⲉⲩⲛⲁⲉⲛⲧϥ ⲉⲃⲟⲗ ⲉϥⲓ ⲛⲧⲉϥⲁⲡⲉ ⲁϥⲕⲧⲉⲡⲉϥϩⲟ ⲉⲡⲓⲏⲃⲧ ⲁϥϣⲗⲏⲗ ⲛⲧⲉⲓϩⲉ ⲉϥϫⲱ ⲙⲙⲟⲥ ϫⲉϯⲥⲙⲟⲩ ⲉⲣⲟⲕ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ . ϫⲉⲁⲓⲉⲙⲡϣⲁ ⲛⲉⲓ ⲉϩⲣⲁⲓ ⲉⲧⲉⲓⲟⲩⲛⲟⲩ ⲧⲁⲓ ⲉⲧⲣⲁⲙⲟⲩ ⲉϫⲉⲙⲡⲉⲕⲣⲁⲛ ⲉⲧⲟⲩⲁⲁⲃ ϯⲥⲟⲡⲥ ⲙⲙⲟⲕ ⲡⲁϫⲟⲉⲓⲥ ⲙⲡⲉⲣϯϣⲓⲡⲉ ⲛⲁⲓ ⲉⲓⲛⲏⲩ ⲉⲣⲁⲧⲕ .
…
65 ⲛⲧⲉⲩⲡⲟⲩ ⲁⲧⲉⲥⲙⲏ ⲉⲧⲛⲟⲧⲙ ⲙⲡϫⲟⲉⲓⲥ ⲧⲁϩⲟϥ ϫⲉϩⲁⲙⲏⲛ ϯϫⲱ ⲙⲙⲟⲥ ⲛⲁⲕ ⲱ ⲡⲁⲥⲱⲧⲡ ϩⲏⲗⲓⲁⲥ ϫⲉⲁⲡϩⲏⲧ ⲙⲡⲁⲉⲓⲱⲧ ϫⲱⲕ ⲉⲃⲟⲗ ⲉϫⲉⲙⲡⲉⲅⲁⲕⲱⲟⲛ .
…
66 ⲉⲓⲥ ⲡⲁⲙⲡⲏⲩⲉ ⲁⲩⲥⲧⲉⲫⲁⲛⲟⲩ ϩⲁⲧⲉⲕϩⲏ ϫⲣⲟ ⲡⲉⲛⲧⲁϥϫⲣⲟ ϭⲙϭⲟⲙ ⲡⲉⲛⲧⲁϥϭⲙϭⲟⲙ
…
67 ⲡⲡⲉⲧⲟⲩⲁⲁⲃ ⲇⲉ ϩⲏⲗⲓⲁⲥ ⲛⲧⲉⲣⲉϥⲥⲱⲧⲙ ⲉⲛⲁⲓ ⲁϥⲥⲫⲣⲁⲅⲓⲍⲉ ⲙⲙⲟϥ ⲉⲡⲣⲁⲛ ⲙⲡⲉⲓⲱⲧ ⲙⲛⲡϣⲏⲣⲉ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ
…
68 ⲁⲩⲱ ⲁϥⲥⲟⲟⲩⲧⲛ ⲉⲃⲟⲗ ⲙⲡⲉϥⲙⲁⲕϩ ⲁⲩϥⲓ ⲛⲧⲉϥϩⲗⲡⲉ ⲙⲡⲛⲁⲩ ⲛϫⲏⲡⲥⲟ ⲛⲥⲟⲩⲙⲛⲧⲁⲥⲉ ⲙⲡⲁⲣⲉⲙϩⲁⲧⲡ .
…
69 ⲁⲛⲁⲅⲅⲉⲗⲟⲥ ⲙⲛⲛⲉⲧⲟⲩⲁⲁⲃ ⲧⲏⲣⲟⲩ ⲉⲓ ⲉⲃⲟⲗ ϩⲁⲧⲉϥϩⲏ ⲁⲩⲁⲥⲡⲁⲍⲉ ⲙⲙⲟϥ
…
70 ⲁⲩⲱ ⲁⲩϫⲱ ⲛⲧⲱⲇⲏ ⲙⲡⲁⲗⲗⲏⲗⲟⲩⲡⲁ ϣⲁⲛⲧⲟⲩϫⲓⲧϥ ⲉⲧⲡⲟⲗⲓⲥ ⲙⲡⲉⲭⲣⲓⲥⲧⲟⲥ
…
71 ⲛⲧⲉⲣⲟⲩϥⲓ ⲇⲉ ⲛⲧⲉϥⲁⲡⲉ ⲁⲩϥⲓ ⲙⲡⲉϥⲥⲱⲙⲁ ⲁⲩⲕⲁⲁϥ ϩⲏⲟⲩⲛⲏⲥⲟⲥ ϩⲏⲧⲙⲏⲧⲉ ⲛⲧⲑⲁⲗⲁⲥⲥⲁ .
…
72 ϣⲁⲡⲉϩⲟⲟⲩ ⲛⲧⲁⲡⲛⲟⲩⲧⲉ ⲟⲩⲟⲛϩϥ ⲉⲃⲟⲗ ⲉⲇⲓⲕⲁⲓⲟⲥ ⲥⲛⲁⲩ ⲙⲙⲟⲡⲁⲭⲟⲥ ϩⲙⲡⲕⲁϩ ⲛⲕⲏⲙⲉ ϩⲛⲟⲩϩⲟⲣⲟⲙⲁ ⲛⲥⲉⲃⲱⲕ ⲛⲥⲁⲡⲉϥⲥⲱⲙⲁ ⲛⲥⲉⲉⲛⲧϥ ⲉⲕⲏⲙⲉ ⲛⲥⲉⲕⲁⲁϥ ϩⲙⲡⲙⲁ ⲛⲧⲁⲡϫⲟⲉⲓⲥ ⲥⲉⲃⲧⲱⲧϥ ⲛⲁϥ . ⲧⲁⲓ ⲧⲉ ⲧϩⲉ ⲛⲧⲁϥϫⲱⲕ ⲉⲃⲟⲗ ⲛⲧⲉϥⲙⲁⲣⲧⲩⲣⲓⲁ ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ ϩⲛⲟⲩⲉⲟⲟⲩ ⲁϥϫⲓ ⲙⲡⲉⲕⲗⲟⲙ ⲛⲁⲧⲧⲁⲕⲟ ϩⲛⲟⲩⲉⲓⲣⲏⲛⲏ ϩⲁⲙⲏⲛ .
…
73 ⲟⲩⲟⲛ ⲛⲓⲙ ⲛⲧⲁⲩⲉⲣⲙⲁⲣⲧⲩⲣⲟⲥ ⲙⲛⲡϩⲁⲅⲓⲟⲥ ϩⲏⲗⲓⲁⲥ ⲁⲩϫⲓ ⲙⲡⲉⲕⲗⲟⲙ ⲙⲡⲱⲛϩ ϣⲁⲉⲛⲉϩ ⲥⲉⲉⲓⲣⲉ ⲛⲥⲟⲟⲩ ⲛϣⲟϥⲧⲟⲟⲩ ⲛϣⲉⲙⲁⲁⲃⲉ ⲙⲯⲩⲭⲏ ⲙⲛⲡϩⲁⲅⲓⲟⲥ ϩⲏⲗⲓⲁⲥ ⲁⲩⲃⲱⲕ ⲉϩⲟⲩⲛ ⲉⲡⲱⲛϩ ⲉⲣⲉⲡⲉⲩⲥⲙⲟⲩ ⲉⲧⲟⲩⲁⲁⲃ ϣⲱⲡⲉ ⲛⲉⲙⲁⲛ ϩⲁⲙⲏⲛ : ⲻ
…
74 ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁⲡⲡⲉⲧⲟⲩⲁⲁⲃ ϩⲏⲗⲓⲁⲥ ϫⲱⲕ ⲉⲃⲟⲗ ⲙⲡⲉϥⲁⲅⲱⲛ ⲛⲉⲧⲧⲁⲓⲏⲩ ⲛⲥⲟⲩⲙⲛⲧⲁⲥⲉ ⲙⲡⲁⲣⲙϩⲟⲧⲡ ⲉⲁϥ ⲉⲓ ⲉⲧⲟⲟⲧⲟⲩ ⲛϣⲟⲙⲛⲧ ⲛⲣⲣⲟ ⲉⲧⲉⲛⲁⲓ ⲛⲉ .
…
75 ⲏⲣⲱⲇⲓⲁⲛⲟⲥ ⲡⲣⲣⲟ ⲛⲉⲛϩⲛⲧⲟⲩ ⲁⲩⲱ ⲛⲉⲩⲣⲙⲧⲉⲭⲱⲣⲁ ⲉⲧⲙⲙⲁⲩ ⲡⲉ ⲡϩⲁⲅⲓⲟⲥ ϩⲏⲗⲓⲁⲥ .
…
76 ⲡⲙⲉϩⲥⲛⲁⲩ ⲡⲉ ⲗⲓⲃⲉⲣⲓⲁⲛⲟⲥ ⲡⲣⲣⲟ ⲛⲧⲕⲟⲩⲛⲑⲓⲁ ⲡⲙⲉϩϣⲟⲙⲛⲧ ⲡⲉ ⲉⲩⲧⲩⲭⲱⲇⲟⲣⲟⲥ ⲡⲣⲣⲟ ⲛⲛⲉⲙⲏⲧⲟⲥ ⲉⲁϥϫⲱⲕ ⲉⲃⲟⲗ ϩⲓⲧⲟⲟⲧϥ ⲁϥⲃⲱⲕ ⲉϩⲣⲁⲓ ⲙⲡⲏⲩⲉ ϩⲛⲟⲩⲉⲟⲟⲩ ⲙⲛⲟⲩⲧⲁⲉⲓⲟ .
…
77 ⲉⲥⲉϣⲱⲡⲉ ⲇⲉ ⲙⲙⲟⲛ ϩⲱⲱⲛ ⲛⲧⲉⲛⲙⲁⲧⲉ ⲛⲛⲁⲅⲁⲑⲟⲛ ⲛⲧⲙⲛⲧⲣⲣⲟ ⲛⲙⲡⲏⲩⲉ ϩⲓⲧⲛⲧⲉⲭⲁⲣⲓⲥ ·
…
78 ⲙⲛⲧⲙⲛⲧⲙⲁⲓⲣⲱⲙⲉ ⲙⲡⲉⲛϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲻ: ⲡⲁⲓ ⲡⲉⲟⲟⲩ ⲛⲁϥ ⲙⲛⲡⲉϥⲉⲓⲱⲧ ⲛⲁⲅⲁⲑⲟⲥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲛⲣⲉⲧⲁⲛϩⲟ ⲁⲩⲱ ⲛϩⲟⲙⲟⲑⲩⲥⲓⲟⲛ · ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ . ϣⲁⲉⲛⲉϩ ⲛⲉⲛⲉϩ ϩⲁⲙⲏⲏ .
…