1 ⳾ ⲥⲉⲛⲟⲩⲑⲓⲟⲩ ⲉⲡⲓⲥⲧⲟⲗⲏ : ⳾
…
2 ⲁⲃⲣⲁϩⲁⲙ ⲡⲉⲛⲉⲓⲱⲧ ⲛⲉϥⲟⲩⲱϣ ⲡⲉ ⲉⲧⲣⲉϩⲉⲛϣⲏⲣⲉϣⲱⲡⲉ ⲛⲁϥ ⲉⲃⲟⲗ ϩⲛⲥⲁⲣⲣⲁ ·
…
3 ⲁⲩⲱ ⲥⲁⲣⲣⲁ ⲛⲉⲥⲟⲩⲱϣ ⲡⲉ · ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁⲥ ⲉⲃⲟⲗ ϩⲛⲁⲃⲣⲁϩⲁⲙ ·
…
4 ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ⲡⲛⲟⲩⲧⲉ ϯ ⲛⲟⲩϣⲏⲣⲉ ⲛⲁⲃⲣⲁϩⲁⲙ ϩⲛⲧⲉϥⲙⲛⲧϩⲗⲗⲟ ·
…
5 ⲉⲁϥϫⲡⲟ ⲛⲓⲥⲁⲁⲕ ⲉⲃⲟⲗ ϩⲛⲥⲁⲣⲣⲁ ϩⲛⲧⲉⲥⲙⲛⲧϩⲗⲗⲱ ·
…
6 ⲁϥϣⲱⲡⲉ ⲛⲁⲩ ⲛⲟⲩϣⲏⲣⲉ ⲙⲙⲉⲣⲓⲧ ⲛⲧϩⲉ ⲛⲟⲩⲧⲃⲁ ⲛϣⲏⲣⲉ ⲉⲟⲩⲁ ⲡⲉ ·
…
7 ⲉⲃ[……..]ⲟⲩⲇ[…….]ⲡⲉ · ⲉ[…..]ⲛⲥⲁⲡⲉϥ[…..]
…
8 ⲛⲧⲁϥⲉⲓ ⲉⲃⲟⲗ ϩⲛⲛⲉϥⲙⲉⲣⲟⲥ ·
…
9 ⲉϥϯⲙⲧⲟⲛ ⲇⲉ ⲟⲛ ⲛⲧⲙⲁⲁⲩ ⲛⲧⲁⲥϫⲡⲟϥ ·
…
10 ⲁⲩⲱ ⲛⲧⲉⲓϩⲉ ⲁϥⲕⲗⲏⲣⲟⲛⲟⲙⲉⲓ ⲛⲧⲉⲕⲗⲏⲣⲟⲛⲟⲙⲓⲁ ⲛⲛⲉϥⲉⲓⲟⲧⲉ ,
…
11 ⲕⲁⲧⲁⲡⲉⲛⲧⲁⲩϫⲟⲟϥ ⲛⲁⲃⲣⲁϩⲁⲙ ⲉⲃⲟⲗ ϩⲓⲧⲙⲡⲛⲟⲩⲧⲉ ϫⲉⲡⲁⲓ ⲉⲧⲙⲙⲁⲩ ⲉⲧⲉⲓⲥⲙⲁⲏⲗ ⲡⲉ ⲛϥⲛⲁⲕⲗⲏⲣⲟⲛⲟⲙⲉⲓ ⲙⲙⲟⲕ ⲁⲛ ·
…
12 ⲡⲗⲏⲛ ϯⲛⲁⲥⲙⲟⲩ ⲇⲉ ⲟⲛ ⲉⲣⲟϥ ⲉⲧⲃⲏⲏⲧⲕ ⲧⲁⲁⲩⲝⲁⲛⲉ ⲙⲙⲟϥ ⲉⲙⲁⲧⲉ ⲛⲧⲁⲁⲁϥ ⲛⲟⲩⲛⲟϭ ⲛϩⲉⲑⲛⲟⲥ ⲉⲛⲁϣⲱϥ ·
…
13 ⲁⲩⲱ ⲡⲉⲧⲛⲏⲩ ⲉⲃⲟⲗ ϩⲛⲛⲉⲕ · [….]ⲥ ·
…
14 ⲓⲥⲁⲁⲕ […]ϥ ⲡⲉⲧⲛⲁⲕⲗⲏⲣⲟⲛⲟⲙⲉⲓ ⲙⲙⲟⲕ ·
…
15 ⲉⲧⲃⲉⲡⲁⲓ ⲣⲱ ⲁⲥϫⲟⲟⲥ ϩⲛⲟⲩⲡⲁⲣⲣⲏⲥⲓⲁ ϩⲙⲡⲥⲟⲟⲩⲛ ⲙⲡⲛⲟⲩⲧⲉ ⲛϭⲓⲧⲙⲁⲁⲩ ⲙⲡϣⲏⲣⲉ ⲉⲧⲟⲓ ⲛⲧⲟⲟⲧⲥ · ϫⲉⲛⲟⲩϫⲉ ⲉⲃⲟⲗ ⲛⲧⲉⲓϩⲙϩⲁⲗ ⲙⲛⲡⲉⲥϣⲏⲣⲉ · ⲛⲛⲉϥⲕⲗⲏⲣⲟⲛⲟⲙⲉⲓ ⲅⲁⲣ ⲛϭⲓⲡϣⲏⲣⲉ ⲛⲧⲉⲓϩⲙϩⲁⲗ ⲙⲛⲡⲁϣⲏⲣⲉ ⲓⲥⲁⲁⲕ ·
…
16 ⲓⲥⲁⲁⲕ ⲛⲉϥⲧⲱⲃϩ ⲙⲡϫⲟⲉⲓⲥ ⲡⲉ · ⲉϥⲟⲩⲱϣ ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁϥ ⲉⲃⲟⲗ ϩⲛϩⲣⲉⲃⲉⲕⲕⲁ ·
…
17 ⲁⲩⲱ ϩⲣⲉⲃⲉⲕⲕⲁ ⲛⲉⲥⲟⲩⲱϣ ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁⲥ ⲉⲃⲟⲗ ϩⲛⲓⲥⲁⲁⲕ ·
…
18 ⲁⲩⲱ ⲧⲁⲓ ⲧⲉ ⲧϩⲉ ⲛⲧⲁⲡϫⲟⲉⲓⲥ ⲡⲛⲟⲩⲧⲉ ϯ ⲛⲁⲩ ⲕⲁⲧⲁⲡⲉⲩϩⲏⲧ ·
…
19 ⲉⲁϥϫⲱⲕ ⲉⲃⲟⲗ ⲛⲛⲉⲩⲁⲓⲧⲏⲙⲁ ⲧⲏⲣⲟⲩ ·
…
20 ⲉⲁⲩϫⲡⲟ ⲛⲏⲥⲁⲩ ⲙⲛⲓⲁⲕⲱⲃ ·
…
21 ⲉⲁⲓⲥⲁⲁⲕ ⲇⲉ ⲥⲙⲟⲩ ⲉⲓⲁⲕⲱⲃ · ⲉⲃⲟⲗ ϩⲓⲧⲙⲡⲛⲟⲩⲧⲉ · ϩⲙⲡϣⲟϫⲛⲉ ⲛϩⲣⲉⲃⲉⲕⲕⲁ ⲧⲙⲁⲁⲩ ⲛⲓⲁⲕⲱⲃ
…
22 ⲉⲁⲏⲥⲁⲩ ϣⲱⲡⲉ ⲛϩⲙϩⲁⲗ ⲛⲓⲁⲕⲱⲃ ⲕⲁⲧⲁⲛⲉⲅⲣⲁⲫⲏ ϫⲉⲡⲛⲟϭ ⲛⲁⲣϩⲙϩⲁⲗ ⲙⲡⲕⲟⲩⲓ ⲁⲩⲱ ⲟⲛ ϫⲉⲓⲁⲕⲱⲃ ⲁⲓⲙⲉⲣⲓⲧϥ ⲏⲥⲁⲩ ⲇⲉ ⲁⲓⲙⲉⲥⲧⲱϥ ·
…
23 ⲓⲁⲕⲱⲃ ⲇⲉ ⲛⲉϥⲟⲩⲱϣ ⲡⲉ ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁϥ ⲉⲃⲟⲗ ϩⲛϩⲣⲁⲭⲏⲗ ·
…
24 ⲛⲧϩⲉ ⲛⲛⲉⲛⲧⲁⲩϣⲱⲡⲉ ⲛⲁϥ ⲉⲃⲟⲗ ϩⲛⲗⲓⲁ · ⲙⲛⲛⲉⲛⲧⲁⲩϣⲱⲡⲉ ⲛⲁϥ ⲉⲃⲟⲗ ϩⲛⲍⲉⲗⲫⲁ ⲙⲛⲃⲁⲗⲗⲁ ·
…
25 ϩⲣⲁⲭⲏⲗ ⲇⲉ ⲛⲉⲥⲟⲩⲱϣ ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁⲥ ⲉⲃⲟⲗ ϩⲛⲓⲁⲕⲱⲃ ·
…
26 ⲁⲩⲱ ⲛⲉⲥⲙⲟⲕϩ ⲛϩⲏⲧ ⲡⲉ ⲉⲥϭⲛⲁⲣⲓⲕⲉ ⲉⲓⲁⲕⲱⲃ ϩⲛⲧⲉⲥⲙⲛⲧⲁⲧⲥⲟⲟⲩⲛ ϩⲙⲡⲁϣⲁⲓ ⲙⲡⲉⲙⲕⲁϩ ⲛϩⲏⲧ ϫⲉⲙⲁ ⲛⲁⲓ ⲛϩⲉⲛϣⲏⲣⲉ ⲉϣⲱⲡⲉ ⲙⲙⲟⲛ ϯⲛⲁⲙⲟⲩ ·
…
27 ⲁⲩⲱ ⲓⲁⲕⲱⲃ ⲛⲉϥϫⲱ ⲙⲙⲟⲥ ⲛⲁⲥ ⲡⲉ ⲉϥⲟⲩⲟⲗⲥ ⲛϩⲏⲧ · ϫⲉⲙⲏ ⲁⲛⲅⲡϫⲟⲉⲓⲥ ⲁⲛⲟⲕ ⲡⲁ[…]ϥⲟϭⲉ ⲙⲡ[…]ⲡⲟⲥ ⲛϩⲏ[..]ⲉ ·
…
28 ⲁⲩⲱ ⲛⲧⲁϥϫⲉ ⲡⲁⲓ ϩⲛⲟⲩⲛⲟⲩϭⲥ ⲛϭⲓⲓⲁⲕⲱⲃ ⲉⲃⲟⲗ ϫⲉⲛⲉϥⲟⲩⲱϣ ϩⲱⲱϥ ⲡⲉ · ⲉⲧⲣⲉϩⲉⲛϣⲏⲣⲉ ϣⲱⲡⲉ ⲛⲁϥ ⲉⲃⲟⲗ ϩⲛϩⲣⲁⲭⲏⲗ
…
29 ⲁⲩⲱ ⲛⲧⲉⲓϩⲉ ⲁⲡⲛⲟⲩⲧⲉ ⲛⲁⲩ ⲉⲡⲉⲩⲙⲕⲁϩ · ⲉⲁϥϯ ⲛϩⲉⲛϣⲏⲣⲉ ⲛⲓⲁⲕⲱⲃ ⲉⲃⲟⲗ ϩⲛϩⲣⲁⲭⲏⲗ · ⲓⲱⲥⲏⲫ ⲙⲛⲃⲉⲛⲓⲁⲙⲓⲛ ·
…
30 ⲁⲩⲱ ⲓⲁⲕⲱⲃ ⲁϥⲥⲙⲟⲩ ⲉⲛⲉϥϣⲏⲣⲉ ⲧⲏⲣⲟⲩ ⲉⲃⲟⲗ ϩⲓⲧⲙⲡϫⲟⲉⲓⲥ ⲡⲛⲟⲩⲧⲉ ·
…
31 ⲡⲁⲓ ⲛⲧⲁϥⲥⲙⲟⲩ ⲉⲁⲃⲣⲁϩⲁⲙ ⲙⲛⲓⲥⲁⲁⲕ ⲙⲛⲓⲁⲕⲱⲃ · ⲙⲛⲛϣⲏⲣⲉ
…