1 ⲉⲣϣⲁⲛⲧⲃⲁϣⲟⲣ ⲁϣϣⲕⲁⲕ ⲉⲃⲟⲗ ⲁⲛ ⲉⲧⲉⲛⲧⲟⲕ ⲡⲉ ⲡϩⲙϩⲁⲗ ⲙⲡⲙⲁⲙⲙⲱⲛⲁⲥ ϩⲛϩⲉⲛϩⲣⲟⲟⲩ ⲉⲩⲟϣ , ⲉⲣⲉⲡⲙⲟⲩⲓⲧⲣⲣⲉ ⲉⲧⲉⲁⲛⲟⲕ ⲡⲉ ⲡϩⲙϩⲁⲗ ⲙⲡⲉⲭⲣⲓⲥⲧⲟⲥ ,
…
2 ϯⲥⲟⲟⲩⲛ ϫⲉⲉⲕϯⲟⲩⲃⲏⲓ ⲁⲛ ,
…
3 ⲁⲗⲗⲁ ⲉⲕϯⲟⲩⲃⲉⲓⲏⲥⲟⲩⲥ ⲉⲧⲟⲩⲏϩ ϩⲛⲛⲉⲭⲣⲉⲓⲥⲧⲓⲁⲛⲟⲥ .
…
4 ⲓⲏⲥⲟⲩⲥ ⲟⲛ ⲣⲱϣⲉ ⲉⲣⲟⲕ ⲛⲧⲟⲕ ⲙⲛⲡⲉⲕⲉⲓⲱⲧ ⲡⲇⲓⲁⲃⲟⲗⲟⲥ ⲉⲧⲟⲩⲏϩ ⲛϩⲏⲧⲕ ⲉⲧⲕϩⲉⲗⲡⲓⲍⲉ ⲉⲣⲟϥ ·
…
5 ⲛⲧⲟⲟⲩ ϩⲱⲟⲩ ⲙⲛⲡⲉⲩⲉⲓⲱⲧ ⲉⲧⲟⲩⲏϩ ⲛϩⲏⲧⲟⲩ ⲓⲏⲥⲟⲩⲥ ⲉⲧⲟⲩⲕⲱ ⲛϩⲧⲏⲩ ⲉⲣⲟϥ ·
…
6 ⲙⲙⲛⲧⲉⲣⲱⲙⲉ ⲉⲟⲩⲛⲧϥⲓⲏⲥⲟⲩⲥ ⲙⲙⲁⲩ ϣⲓⲡⲉ ⲉⲛⲉϩ ⲛⲧϩⲉ ⲛⲧⲁⲕϫⲟⲟⲥ , ⲡϣⲓⲡⲉ ⲙⲡⲉⲓⲙⲁ , ⲡⲉⲟⲟⲩ ⲙⲡⲉⲓⲙⲁ ⲁⲓⲡⲁⲣⲁⲓⲧⲉⲓ ⲙⲙⲟⲩ ,
…
7 ϯⲥⲟⲟⲩⲛ ⲅⲁⲣ ⲉⲡⲉⲧⲓϭⲱϣⲧ ⲉⲃⲟⲗ ϩⲏⲧϥ .
…
8 ⲛⲉⲧⲉⲟⲩⲛⲧⲁⲩⲡⲉⲟⲟⲩ ⲙⲛⲡⲧⲁⲉⲓⲟ ⲉⲃⲟⲗ ϩⲓⲧⲛⲓⲏⲥⲟⲩⲥ .
…
9 ⲉⲩⲣⲟⲩ ⲛⲉⲟⲟⲩ ϩⲓⲧⲁⲉⲓⲟ ⲛⲣⲱⲙⲉ .
…
10 ⲛⲧϩⲉ ⲅⲁⲣ ⲉⲧⲉⲙⲛⲙⲛⲧⲗⲏⲥⲧⲏⲥ ϣⲟⲟⲡ ⲛⲛⲉⲧⲉⲟⲩⲛⲧⲁⲩ ⲓⲏⲥⲟⲩⲥ ϩⲛⲟⲩⲙⲉ ⲕⲁⲧⲁⲡⲉⲛⲧⲁⲕϫⲟⲟϥ ⲉⲣⲟⲓ ⲉⲃⲟⲗ ϫⲉⲁⲓϥⲓ ⲛⲛⲉⲕⲛⲟⲩⲧⲉ ϩⲛⲟⲩⲥⲣⲁϩⲧ ⲁⲩⲱ ϫⲉⲁⲓⲧⲣⲉⲩⲙⲟⲩⲣ ⲙⲡⲉⲕⲥⲱϣ ⲙⲛⲡⲉⲕϣⲓⲡⲉ ⲉϩⲟⲩⲛ ⲉⲛⲟⲩⲉϭⲣⲟ ⲙⲡⲉⲕⲏⲓ ⲉⲩⲥⲏϩ ⲉϩⲉⲛⲭⲁⲣⲧⲏⲥ ·
…
11 ⲉⲁⲩⲟⲩⲱϭⲡ ⲛⲛⲉⲕⲙⲏⲙⲟⲟⲩ ⲉⲧϩⲛϩⲉⲛϣⲟϣⲟⲩ ϩⲱⲥ ⲏⲣⲡ ϩⲓϫⲛⲙⲡⲛⲏ ⲙⲡⲉⲕⲏⲓ . ⲁⲩⲱ ⲉϩⲟⲩⲛ ϩⲙⲡⲉⲕⲣⲟ , ⲙⲛⲡⲣⲟ ⲛⲛⲉⲧⲉⲓⲛⲉ ⲙⲙⲟⲕ ,
…
12 ⲉⲙⲙⲛⲙⲛⲧⲣⲙϩⲉ ϣⲟⲟⲡ ⲛⲛⲉⲧⲕⲱ ⲛϩⲧⲏⲩ ⲉⲕⲣⲟⲛⲟⲥ , ⲉⲧⲉⲛⲧⲟⲕ ⲡⲉ ⲙⲛⲛⲉⲧⲧⲛⲧⲱⲛ ⲉⲣⲟⲕ ϩⲛⲙⲙⲛⲧⲁⲡⲓⲥⲧⲟⲥ , ⲙⲛⲙⲛⲧⲁⲕⲁⲑⲁⲣⲧⲟⲥ ⲛⲓⲙ .
…
13 ⲟⲩ ⲛϩⲱⲃ ⲏ ⲁϣ ⲛϣⲁϫⲉ ϩⲛⲛⲉⲛⲧⲁⲕϫⲟⲟⲩ ⲛⲉⲧⲟ ⲙⲙⲛⲧⲣⲉ ⲉⲣⲟⲕ ⲁⲛ ϫⲉⲉⲕⲏⲡ ⲉⲡⲥⲁⲧⲁⲛⲁⲥ .
…
14 ⲛⲉⲡⲓⲥⲧⲟⲗⲏ ⲛⲉ ⲉⲛⲧⲁⲕⲡⲁϩⲟⲩ , ⲏ ϯⲥⲟⲟⲩⲛ ⲁⲛ ⲙⲡⲁⲧⲓϫⲟⲟⲩⲥⲟⲩ ϫⲉⲕⲛⲁⲡⲁϩⲟⲩ ,
…
15 ⲡⲉϣⲃⲣⲣϩⲱⲃ ⲛⲛⲉⲛⲧⲁⲩϣⲱⲱⲧ ϩⲙⲡⲧⲟⲕ ⲙⲡⲉⲅⲣⲁⲙⲙⲁⲧⲉⲩⲥ ⲛⲛⲥⲉⲗⲓⲥ ⲙⲡϫⲱⲱⲙⲉ ⲛⲛϣⲁϫⲉ ⲛⲧⲁⲛⲉⲡⲣⲟⲫⲏⲧⲏⲥ ϫⲟⲟⲩⲥⲉ ⲛⲁⲩ ϩⲙⲡⲣⲁⲛ ⲙⲡⲛⲟⲩⲧⲉ ⲁⲩⲛⲟϫⲟⲩ ⲉϩⲣⲁⲓ ⲉⲛϫⲃⲃⲉⲥ ⲉⲧϫⲉⲣⲟ .
…
16 ⲛⲧϩⲉ ⲟⲛ ⲛⲧⲁⲕϫⲟⲟⲥ ϫⲉⲛⲣⲱⲙⲉ ⲁⲩⲱ ⲛⲁⲟⲓⲕⲟⲛⲟⲙⲟⲥ ϫⲓϩⲛⲁⲩ ⲛⲁϥ .
…
17 ⲉⲕⲧⲁⲙⲟ ⲙⲙⲟⲛ ⲁⲩⲱ ⲉⲕϭⲱⲗⲡ ⲉⲃⲟⲗ ⲛⲧⲉⲕⲕⲁⲕⲓⲁ ϫⲉⲙⲡⲉⲕⲟⲩⲱϣ ⲁⲛ ⲡⲉ ⲉⲧⲣⲉⲛϣⲏⲣⲉ ⲙⲡⲛⲟⲩⲧⲉ ϫⲓ ⲟⲩⲡⲣⲟⲥⲫⲟⲣⲁ ⲉⲧⲉϥⲉⲕⲕⲗⲏⲥⲓⲁ . ⲏⲉⲣⲟⲩⲡⲉⲧⲛⲁⲛⲟⲩϥ ⲛⲟⲩⲱⲧ ϩⲙⲡⲣⲁⲛ ⲛⲓⲏⲥⲟⲩⲥ .
…
18 ⲕⲛⲁⲣⲁϣⲉ ⲉⲕϣⲁⲛⲥⲱⲧⲙ ϫⲉⲁⲩⲃⲱⲕ ⲉⲙⲙⲁ ⲛϣⲓⲛⲉ ⲛⲛⲇⲁⲓⲙⲱⲛ . ⲉⲃⲟⲗ ϫⲉⲛⲧⲟⲕ ϩⲱⲱⲕ ⲕⲟⲩⲱϣⲧ ⲁⲩⲱ ⲕϣⲙϣⲉ ⲙⲡⲥⲱⲛⲧ ⲡⲁⲣⲁⲡⲉⲛⲧⲁϥⲥⲱⲛⲧ ⲛⲛⲕⲁ ⲛⲓⲙ ⲓⲏⲥⲟⲩⲥ ⲡⲉⲧⲥⲙⲁⲙⲁⲁⲧ ϣⲁⲉⲛⲉϩ ⲛⲉⲛⲉϩ ·
…
19 ⲉϩⲟⲩⲉ ⲥⲱⲧⲙ ⲏ ⲉⲛⲁⲩ ⲉⲣⲟⲟⲩ ⲉⲩⲛⲁ ⲉⲣⲁⲧϥ ⲙⲡⲛⲟⲩⲧⲉ ϩⲙⲙⲁ ⲛⲓⲙ ⲉⲧⲟⲩⲉⲡⲓⲕⲁⲗⲉⲓ ⲙⲙⲟϥ ⲛϩⲏⲧⲟⲩ , ⲁⲩⲱ ⲉⲩⲥⲙⲟⲩ ⲉⲣⲟϥ ⲉⲩϯⲉⲟⲟⲩ ⲛⲁϥ ·
…
20 ⲏ ⲉⲣϣⲁⲛ ϩⲟⲩⲟ ⲉⲛⲙⲏⲏϣⲉ ⲛⲧⲁⲕϫⲟⲟⲥ ϫⲉⲥⲉϫⲓϩⲛⲁⲩ ⲛⲁϥ . ⲉⲩϣⲁⲛⲡⲱⲛⲅ ⲛⲁⲓ ⲁϫⲛϯⲥⲟ ϫⲉϯⲟ ϩⲱⲱⲧ ⲛϩⲙϩⲁⲗ ⲛⲁⲩ ⲕⲁⲗⲱⲥ ϫⲉⲛⲁⲥⲛⲏⲩ ⲛⲉ ⲉⲓⲥⲱⲟⲩϩⲛⲁⲩ ⲉϩⲟⲩⲛ ⲉϩⲉⲛⲁϩⲟ ϩⲛⲧⲡⲉ ⲛⲛⲉⲧⲟⲩϯ ⲙⲙⲟⲟⲩ ⲛⲧⲁⲉⲓⲟ ⲙⲡⲛⲟⲩⲧⲉ . ⲙⲏ ⲛⲧⲁⲩⲛⲧⲟⲩ ⲉⲃⲟⲗ ϩⲙⲡⲉⲕⲏⲓ ⲙⲛⲡⲏⲓ ⲛⲛⲉⲕⲉⲓⲟⲧⲉ .
…
21 ⲕⲧⲱⲣⲡ ⲛⲛⲉⲧⲉⲛⲟⲩⲕ ⲁⲛ ⲛⲉ ⲡⲣⲱⲙⲉ ⲙⲡⲟⲛⲏⲣⲟⲥ .
…
22 ⲕⲡⲟⲛⲏⲣⲉⲩⲉ ⲇⲉ ϩⲱⲱϥ ⲁⲩⲱ ⲕⲕⲁϫⲣⲟⲡ ⲉϩⲣⲁⲓ ⲛⲛⲣⲉϥϯ ⲛⲛϩⲏⲕⲉ . ⲉⲩⲥⲟⲟⲩⲛ ϫⲉⲛⲉⲧⲟⲩϯ ⲙⲙⲟⲟⲩ ⲏ ⲛⲉⲧⲟⲩⲛⲁ ⲛϩⲏⲧⲟⲩ ⲛⲛⲉⲧⲣϭⲣⲱϩ ⲛⲁⲡⲉⲭⲣⲓⲥⲧⲟⲥ ⲛⲉ ⲛⲧⲁϥⲧⲁⲁⲩ ⲛⲁⲩ ⲉⲩⲁⲡⲟⲗⲁⲩⲥⲓⲥ . ⲁⲩⲱ ⲣⲣⲙⲙⲁⲟ ϩⲛϩⲉⲛϩⲃⲏⲩⲉ ⲉⲛⲁⲛⲟⲩⲟⲩ .
…
23 ⲙⲏ ⲁⲣⲁ ⲉⲓⲟⲩⲏϩ ⲟⲛ ϩⲓϫⲛⲧⲙⲏⲧⲉ ⲛϫⲱⲕ ,
…
24 ϫⲉⲕϫⲱ ⲙⲙⲟⲥ ϫⲉϣⲁⲛⲧⲉⲟⲩϣⲱⲡⲉ ⲙⲡϥⲥϭⲏⲣ , ⲉϥϫⲱ ⲙⲙⲟⲥ ϫⲉϯⲛⲁⲃⲱⲕ . ⲉϥⲛⲉϫ ϩⲟⲟⲩ ⲛⲥⲁϩⲟⲟⲩ .
…
25 ⲉⲧⲃⲉⲟⲩ ⲉⲓⲟ ⲙⲡⲓⲛⲟϭ ⲛⲃⲁⲣⲟⲥ ⲉϩⲣⲁⲓ ⲉϫⲱⲕ ⲛⲧⲉⲓϩⲉ ⲧⲏⲣⲥ ϫⲉⲁⲓⲃⲱⲕ ϣⲁⲛⲉⲣⲣⲱⲟⲩ ⲏ ⲙⲡⲓⲃⲱⲕ .
…
26 ⲙⲏ ⲙⲡⲏⲩⲉ ⲙⲛⲡⲕⲁϩ ⲛⲁⲡⲉⲭⲣⲓⲥⲧⲟⲥ ⲁⲛ ⲛⲉ ⲙⲛⲛⲉⲧⲛϩⲏⲧⲟⲩ ⲧⲏⲣⲟⲩ .
…
27 ⲙⲏ ⲟⲩⲛⲧⲉ ⲡⲉⲕⲉⲓⲱⲧ ⲕⲣⲟⲛⲟⲥ ⲗⲁⲁⲩ ⲣⲱ ⲛⲧⲟϥ ⲛⲥⲁϩⲉⲛⲛⲟⲃⲉ ⲛⲁⲓ ⲉⲧⲕⲟ ⲛⲟⲩⲟⲉⲓⲉ ⲉⲣⲟⲟⲩ ⲛⲁϥ ⲛⲧⲟⲕ ⲙⲛⲛⲉⲧⲉⲓⲛⲉ ⲙⲙⲟⲕ . ⲉⲧⲉⲧⲛϫⲟ ⲁⲩⲱ ⲉⲧⲉⲧⲛⲱⲗ ⲛⲁϥ ⲉϩⲟⲩⲛ ⲛⲙⲙⲛⲧⲁⲡⲓⲥⲧⲟⲥ ⲙⲛⲛϭⲟⲗ , ⲙⲛⲛϫⲓⲛϭⲟⲛⲥ , ⲙⲛⲛⲟⲩⲁ ⲙⲛϩⲱⲃ ⲛⲓⲙ ⲙⲡⲟⲛⲏⲣⲟⲛ .
…
28 ⲉⲛⲉ ⲛⲧⲕⲟⲩⲉⲛⲧⲏϭ ⲛⲧⲉⲓϩⲉ ⲉⲕⲣⲏⲧ ϩⲁⲣⲓϩⲁⲣⲟⲕ ⲛⲉⲡⲉⲧϣϣⲉ ⲡⲉ ⲉⲁⲛⲉⲭⲉ ⲙⲙⲟⲕ ϣⲁⲡⲉⲟⲩⲟⲉⲓϣ ⲙⲡⲱϩⲥ ⲕⲁⲧⲁⲡϣⲁϫⲉ ⲙⲡϫⲟⲉⲓⲥ ⲉⲛⲧⲁⲕϫⲓⲟⲩⲁ ⲉⲣⲟϥ .
…
29 ⲁⲗⲗⲁ ⲛⲧⲕⲟⲩϣⲟⲛⲧⲉ ⲙⲛⲟⲩⲁⲣⲟⲟⲩⲉ ⲉⲕϩⲓⲛⲉϩⲓⲟⲟⲩⲉ ⲉⲕⲟ ⲛϫⲣⲟⲡ ⲛⲛⲉⲧⲙⲟⲟϣⲉ ,
…
30 ⲉⲧⲃⲉⲡⲁⲓ ⲡⲉⲧϣϣⲉ ⲡⲉ ⲉϣⲁⲁⲧⲕ ⲁⲩⲱ ⲉⲃⲟⲗⲃⲗ ⲛⲧⲉⲕⲛⲟⲩⲛⲉ .
…
31 ⲉⲡⲉⲓⲇⲏ ⲁⲕϫⲟⲟⲥ ⲇⲉ ⲟⲛ ϩⲛⲛⲉⲕϣⲁϫⲉ ⲛⲉⲡⲣⲁ ϫⲉⲉⲛⲉ ⲟⲩⲙⲟⲛⲁⲭⲟⲥ ⲛⲁⲙⲉⲡⲉ ⲛⲉϥⲛⲁⲣϣⲟⲙⲧ ⲙⲫⲟⲛⲟⲥ ϩⲙⲡⲉϩⲙⲉ ⲛϩⲟⲟⲩ . ⲉⲕϫⲱ ⲙⲙⲟⲥ ⲉⲛⲣⲓⲣ ⲙⲛⲧⲉϩⲉ ⲛⲧⲁⲓⲕⲟⲛⲥⲟⲩ ϩⲛⲛⲏⲓ ⲛⲛϩⲉⲗⲗⲏⲛ ϫⲉⲙⲫⲟⲛⲟⲥ
…
32 ϯⲛⲁϫⲟⲟⲥ ϩⲱⲱⲧ ⲛⲧⲉⲓϩⲉ ⲛⲛⲁϩⲣⲛⲛⲉⲕϣⲁϫⲉ ⲛⲕⲁⲃⲟⲗ ϫⲉⲉϣϫⲉ ⲟⲩⲡⲉⲧⲉϣϣⲉ ⲁⲛ ⲡⲉⲛⲧⲁⲓⲁⲁϥ ϫⲉⲁⲓⲡⲁⲣⲁⲇⲓⲅⲙⲁⲧⲓⲍⲉ ⲛϩⲉⲛⲣⲉϥϣⲙϣⲉⲉⲓⲇⲱⲗⲟⲛ . ⲉⲓⲉ ⲟⲩⲕⲁⲧⲁⲕⲣⲓⲙⲁ ⲛⲁⲕ ⲛⲟⲩⲏⲣ ⲡⲉ ϫⲉⲕⲡⲁⲣⲁⲃⲁ ϩⲙⲡⲉϩⲙⲉ ⲛϩⲟⲟⲩ ,
…
33 ⲁⲩⲱ ϩⲙⲡⲛⲟϭ ⲙⲡⲁⲥⲭⲁ ⲉⲧⲟⲩⲁⲁⲃ ⲉⲧⲉⲣⲉⲟⲩⲟⲛ ⲛⲓⲙ ⲉⲓⲣⲉ ⲙⲙⲟϥ ϣⲁϩⲣⲁⲓ ⲉⲛⲕⲉⲣⲣⲱⲟⲩ ⲙⲙⲁⲓⲛⲟⲩⲧⲉ .
…
34 ⲛⲧⲟⲕ ⲇⲉ ⲕⲧⲣⲉⲛⲉⲕⲙⲁⲅⲉⲓⲣⲟⲥ ⲣϩⲱⲃ ⲛⲁⲕ ⲛϩⲏⲧϥ , ⲉⲕⲧⲣⲩⲫⲁ ⲁⲩⲱ ⲉⲕⲁⲡⲁⲧⲁ ⲁϫⲛϩⲟⲧⲉ , ⲁⲩⲱ ⲉⲕⲧⲣⲉϩⲉⲛⲕⲟⲟⲩⲉ ⲁⲡⲁⲧⲁ ⲛⲙⲙⲁⲕ .
…
35 ⲉⲃⲟⲗ ⲇⲉ ⲟⲛ ϫⲉⲁⲕⲧⲛⲛⲟⲟⲩ ϣⲁⲣⲟⲓ ϫⲉⲁⲙⲟⲩ ⲛⲅⲙⲉϣⲧⲛⲁⲏⲓ ⲉϣⲱⲡⲉ ⲉⲕϣⲁⲛϭⲛⲉⲓⲇⲱⲗⲟⲛ ⲛϩⲏⲧⲟⲩ ,
…
36 ⲛⲧⲉⲣⲉⲓⲙⲟϣⲧϥ ⲛⲕⲉⲥⲟⲡ ⲡⲉⲕⲏⲓ ⲙⲡⲓϭⲛ ⲗⲁⲁⲩ ⲛⲉⲓⲇⲱⲗⲟⲛ ⲛϩⲏⲧϥ .
…
37 ⲏ ⲙⲛϭⲉ ϣⲟⲟⲡ ⲛⲁⲕ ⲛⲥⲁⲛⲉⲛⲧⲁⲓϥⲓⲧⲟⲩ ,
…
38 ⲏ ⲉⲓϣⲁⲛϥⲓ ⲛⲉⲓⲇⲱⲗⲟⲛ ⲉⲧϩⲙⲡⲉⲕⲏⲓ ⲙⲏ ⲉⲓⲛⲁϣϩⲱⲡ ⲟⲛ ⲙⲡⲣⲏ ϩⲛⲧⲡⲉ ⲙⲛⲡⲟⲟϩ ⲙⲛⲛⲥⲓⲟⲩ ⲛⲁⲓ ⲉⲧⲕϣⲙϣⲉ ⲛⲁⲩ ,
…
39 ⲏ ⲉⲓⲛⲁⲕⲱⲧ ⲛϩⲉⲛⲥⲟⲃⲧ ⲉⲛⲙⲁ ⲛϩⲱⲧⲡ ⲉⲧⲙⲧⲣⲉⲕϣⲗⲏⲗ ⲉⲛⲥⲁⲙⲡⲉⲙⲛⲧ ,
…
40 ⲏ ⲉⲓⲛⲁⲣⲟⲉⲓⲥ ϩⲓϫⲙⲡⲓⲉⲣⲟ , ⲁⲩⲱ ϩⲓϫⲛⲛⲉⲕⲉⲩⲣⲓⲡⲟⲥ ⲉⲧⲙⲧⲣⲉⲕⲟⲩⲱⲧⲛ ⲉⲃⲟⲗ ⲛⲕⲣⲟⲛⲟⲥ ⲉϩⲣⲁⲓ ⲉⲛⲙⲟⲩ ⲛⲉⲓⲟⲟⲩⲉ ,
…
41 ϩⲱ ϭⲉ ⲉⲣⲟⲕ ⲉⲕϫⲱ ⲛⲛⲓϣⲁϫⲉ ⲛϭⲟⲗ ϩⲓⲕⲟⲧⲥ ,
…
42 ⲡⲣⲱⲙⲉ ⲉⲧϩⲏⲩ ⲉϩⲣⲁⲓ ⲉϩⲉⲛⲛⲟϭ ⲙⲡⲉⲧϩⲟⲟⲩ .
…
43 ⲛⲧϩⲉ ⲅⲁⲣ ⲉⲧⲕⲟ ⲛⲁⲧⲛⲟⲩⲧⲉ .
…
44 ⲧⲁⲓ ⲧⲉ ⲧϩⲉ ⲉⲧⲕⲑⲗⲓⲃⲉ ⲛⲛϩⲏⲕⲉ ϩⲛⲛⲉⲕⲙⲛⲧⲣⲉϥϫⲓⲛϭⲟⲛⲥ ,
…
45 ⲏ ⲕⲉⲙⲓⲛⲉ ⲛⲇⲓⲱⲅⲙⲟⲥ ⲁⲛ ⲧⲉ ⲧⲁⲓ ⲉⲧⲉⲧⲛⲡⲏⲧ ⲛⲥⲁⲛⲣⲱⲙⲉ ,
…
46 ⲙⲁⲗⲓⲥⲧⲁ ⲛⲉⲡⲣⲉⲥⲃⲩⲧⲉⲣⲟⲥ ⲛⲧⲉⲕⲕⲗⲏⲥⲓⲁ ϣⲁⲛⲧⲉⲧⲛϭⲟⲧⲡⲟⲩ ⲉⲃⲟⲗ ϩⲛⲛⲉⲩⲏⲓ ϩⲙⲡⲓⲕⲁⲓⲣⲟⲥ ⲟⲛ ⲡⲁⲓ ϩⲣⲁⲓ ϩⲛⲛⲓⲛⲟϭ ⲛϩⲓⲥⲉ ⲉⲧϩⲓϫⲙⲡⲕⲁϩ ,
…
47 ⲉⲧⲉⲧⲛⲛⲁ ⲉϩⲟⲩⲛ ⲉⲛⲉⲩⲧⲟⲡⲟⲥ ,
…
48 ⲉⲙⲛϣⲏⲣⲉ ⲉⲙⲛⲉⲓⲱⲧ ⲉⲙⲛⲗⲁⲁⲩ ⲛϩⲏⲧⲟⲩ ϩⲟⲗⲱⲥ ⲙⲙⲁⲩ ⲉⲧⲃⲉϫⲉⲁⲩⲡⲱⲧ .
…
49 ⲉⲧⲉⲧⲛϥⲓ ⲛⲛⲉⲩⲧⲃⲛⲟⲟⲩⲉ ⲙⲛⲧⲉⲩⲁϭⲟⲗⲧⲉ , ⲁⲩⲱ ⲡⲉⲩⲧⲱϩ ⲉⲧⲉⲧⲛϫⲓ ⲙⲙⲟⲟⲩ ⲉⲛⲉⲧⲛϭⲟⲟⲙ ⲉⲧⲉⲧⲛⲁⲛⲁⲅⲕⲁⲍⲉ ⲙⲙⲟⲟⲩ ⲉⲧⲣⲉⲩⲕⲱⲧⲉ ⲙⲙⲟⲟⲩ ⲡⲁⲣⲁⲧⲉⲩϭⲟⲙ ·
…
50 ⲟⲩ ⲟⲛ ⲡⲉ ⲡⲕⲉⲛⲟϭ ⲙⲡⲁⲥⲭⲁ ⲧⲉⲧⲛⲕⲱ ⲙⲙⲟⲟⲩ ⲁⲛ ⲉⲥⲣϥⲉ ⲉⲁⲁϥ ·
…
51 ϣⲁϩⲣⲁⲓ ⲉⲛϫⲟⲓ ⲛⲃⲣⲣⲉ ⲛⲧⲁⲧⲉⲧⲛⲙⲟⲛⲕⲟⲩ ⲉⲧⲉⲧⲛⲧⲣⲉⲩⲛⲟⲩϫⲉ ⲙⲙⲟⲟⲩ ⲉⲡⲙⲟⲟⲩ ⲛϩⲏⲧϥ , ⲉⲡⲙⲁ ⲛⲧⲣⲉⲩⲣϩⲏⲃⲉ ⲛϩⲏⲧϥ .
…
52 ⲁⲧⲉⲧⲛⲧⲣⲉⲩⲉϣⲗⲟⲩⲗⲁⲓ ⲉⲡⲉⲩⲟⲩⲱϣ ⲁⲛ ⲡⲉ ,
…
53 ⲛⲓⲙ ⲡⲉⲧⲛⲁϣⲧⲁⲩⲉ ⲛⲉⲧⲛⲡⲉⲧϩⲟⲟⲩ ⲧⲏⲣⲟⲩ .
…
54 ⲛⲧϩⲉ ⲟⲛ ⲉϣⲁⲧⲉⲧⲛϣⲱⲱⲧ ⲙⲡⲉⲧⲛⲙⲁⲥⲉ ⲉϥⲛⲁⲙⲟⲩ , ⲏ ⲉϥϣⲁⲛⲣⲥⲧ ⲉⲃⲟⲗ ⲛϥⲧⲙⲣϣⲁⲩ ⲙⲡⲉⲧⲛϩⲱⲃ , ⲛⲧⲉⲧⲛⲥⲟⲣϥ ⲉⲃⲟⲗ ⲙⲉⲣⲟⲥ ⲙⲉⲣⲟⲥ ⲛⲧϩⲉ ⲉⲧⲉϩⲛⲏⲧⲛ ,
…
55 ⲛⲧⲉⲧⲛⲛⲟϫϥ ⲉϫⲱⲟⲩ ϣⲁϩⲣⲁⲓ ⲉⲛⲉⲭⲏⲣⲁ , ⲁⲩⲱ ⲛϩⲗⲗⲟ ⲙⲛⲛϩⲗⲗⲱ ⲙⲛⲛⲟⲣⲫⲁⲛⲟⲥ ⲙⲛⲛϣⲙⲙⲟ .
…
56 ⲉⲧⲉⲧⲛϣⲓⲧⲉ ⲙⲙⲟⲟⲩ ⲛϩⲉⲛϩⲟⲙⲛⲧ ⲡⲁⲣⲁⲧⲉⲩⲁⲥⲟⲩ ϣⲁⲛⲧⲉⲧⲛⲥⲉⲩϩ ⲧⲉⲧⲓⲙⲏ ⲙⲡⲙⲁⲥⲉ ⲉϩⲟⲩⲛ ⲉⲥⲕⲏⲃ ϩⲁϩⲉⲛⲉⲗⲁⲭⲓⲥⲧⲟⲛ ⲛⲁϥ , ⲉϩⲉⲛⲕⲉⲉⲥⲛⲉ ϩⲓϩⲛⲁⲩ ⲛⲁⲧϣⲁⲩ .
…
57 ⲛⲧϩⲉ ⲟⲛ ⲉϣⲁⲧⲉⲧⲛϯ ϩⲉⲛⲙⲁⲥⲉ ⲛⲁⲩ ⲙⲛϩⲉⲛⲉϩⲟⲟⲩ ⲕⲁⲧⲁϩⲟⲓ ⲉⲧⲣⲉⲩⲥⲁⲛⲟⲩϣⲟⲩ ϣⲁⲛⲧⲟⲩⲣⲛⲟϭ ⲛⲧⲉⲧⲛϥⲓⲧⲟⲩ .
…
58 ϩⲟⲓⲛⲉ ⲙⲉⲛ ⲉⲧⲣⲉⲩⲧⲁⲁⲩ ⲛⲏⲧⲛⲛⲧⲁⲉⲓⲟ ,
…
59 ⲛⲧⲉⲧⲛⲣⲗⲁⲁⲩ ⲁⲛ ⲙⲡⲉⲧⲛⲁⲛⲟⲩϥ ⲛⲁⲩ ⲛⲧⲉⲩϣⲃⲉⲓⲱ .
…
60 ϩⲉⲛⲕⲟⲟⲩⲉ ⲟⲛ ⲉⲧⲣⲉⲩⲥⲁⲛⲟⲩϣⲟⲩ ⲛⲏⲧⲛⲛⲧⲉⲓϩⲉ ⲟⲛ ϩⲉⲛϩⲧⲟ , ⲁⲩⲱ ϩⲉⲛⲉⲓⲱ , ⲙⲛϩⲉⲛⲉⲥⲟⲟⲩ , ⲙⲛϩⲉⲛⲙⲁⲥⲉ , ⲙⲛϩⲉⲛⲣⲓⲣ ,
…
61 ϩⲁⲙⲟⲓ ⲟⲛ ⲛⲉ ϣⲁⲧⲉⲧⲛϭⲱ ⲛⲧⲉⲓϩⲉ ⲡⲉ ,
…
62 ⲛⲉⲧⲉⲧⲛⲛⲁⲉⲡⲓⲑⲩⲙⲉⲓ ⲅⲁⲣ ⲉⲣⲟⲟⲩ ϩⲛⲛⲉⲩⲧⲃⲛⲟⲟⲩⲉ ⲏ ⲛⲧⲟϥ ϩⲉⲛⲕⲉϩⲛⲁⲁⲩ ,
…
63 ⲧⲉⲧⲛⲧⲱⲣⲡ ⲙⲙⲟⲟⲩ ⲛⲧⲟⲟⲧⲟⲩ , ϩⲟⲓⲛⲉ ⲛϫⲓⲛϫⲏ . ϩⲉⲛⲕⲟⲟⲩⲉ ϩⲁϩⲉⲛⲕⲟⲩⲓ ⲛⲧⲓⲙⲏ , ⲭⲱⲣⲓⲥⲟⲉⲓⲕ ϩⲓⲏⲣⲡ , ϩⲓϭⲓⲛⲟⲩⲱⲙ , ϩⲓⲧⲱϩ . ϩⲓⲉⲓⲱⲧ ⲛⲛⲉⲧⲛⲧⲃⲛⲟⲟⲩⲉ , ⲙⲛⲛⲕⲟⲟⲩⲉ ⲧⲏⲣⲟⲩ .
…
64 ⲛⲧϩⲉ ⲟⲛ ⲉϣⲁⲧⲉⲧⲛⲥⲟⲟⲩϩⲟⲩ ⲉⲧⲣⲉⲩⲣⲟⲉⲓⲥ ⲉⲣⲱⲧⲛ ϩⲓⲛⲉϫⲏⲩ ϩⲙⲡⲕⲁⲓⲣⲟⲥ ⲉϣⲁⲧⲉⲧⲛⲡⲱⲧ ϩⲁⲡϩⲟ ⲛⲛⲃⲁⲣⲃⲁⲣⲟⲥ .
…
65 ⲏ ⲡⲃⲁⲣⲃⲁⲣⲟⲥ ⲡⲏⲧ ⲛⲥⲱⲟⲩ ⲛⲧⲟⲟⲩ ⲁⲛ .
…
66 ⲉⲣⲉⲛⲉⲩϩⲓⲟⲙⲉ ⲙⲛⲛⲉⲩϣⲏⲣⲉ ⲙⲛⲡⲥⲟⲃⲧⲉ ⲛⲧⲉⲩⲙⲛⲧϩⲏⲕⲉ ϩⲓϫⲛⲛⲉⲩⲧⲃⲛⲟⲟⲩⲉ .
…
67 ⲁⲩⲱ ϩⲛⲛⲉⲩⲁϭⲟⲗⲧⲉ ⲉⲩⲡⲏⲧ ϩⲱⲟⲩ ⲉⲃⲟⲗ ϩⲛⲛⲉⲩⲧⲟⲡⲟⲥ ⲉϩⲉⲛⲕⲉⲧⲟⲡⲟⲥ ⲉⲧⲣⲉⲩⲛⲁϩⲙⲟⲩ ·
…
68 ⲧⲁⲓ ⲧⲉ ⲧϩⲉ ⲉϣⲁⲣⲉϩⲁϩ ⲛϩⲏⲧⲟⲩ ⲧϩⲛⲉⲣⲱⲙⲉ ϩⲁⲡⲉⲩⲃⲉⲕⲉ ⲛⲥⲉϫⲟⲟⲩⲥⲉ ⲛⲏⲧⲛ ⲉⲣⲟⲉⲓⲥ ⲉⲣⲱⲧⲛ .
…
69 ⲁⲩⲱ ⲛⲧⲉⲧⲛ ϩⲱ ⲁⲛ ⲉⲛⲁⲓ ·
…
70 ⲁⲗⲗⲁ ⲧⲉⲧⲛ ⲟⲩⲱϩ ⲟⲛ ⲉϫⲛⲛⲉⲧⲛϫⲓⲛϭⲟⲛⲥ ·
…
71 ⲛⲧϩⲉ ⲟⲛ ⲉϣⲁⲧⲉⲧⲛϣⲁⲧⲟⲩ ϩⲟⲓⲛⲉ ⲛⲟⲩϩⲛⲟ ⲛⲥⲟⲩⲟ ⲉⲡⲏⲓ ϫⲉⲥⲉⲟϣ ⲛⲣⲱⲙⲉ ϩⲉⲛⲕⲟⲟⲩⲉ ⲛϫⲟⲩⲧⲏ ⲙⲙⲁⲁϫⲉ , ϩⲉⲛⲕⲟⲟⲩⲉ ⲛⲟⲩⲣⲧⲁⲃ ·
…
72 ϩⲓⲧⲛⲧⲁⲫⲟⲣⲙⲏ ⲛϫⲱⲕⲙ ϩⲛϩⲉⲛⲥⲓⲟⲟⲩⲛⲉ ·
…
73 ⲉⲩⲣⲓⲙⲉ ϫⲉⲛⲧⲛⲟⲩⲉϣϫⲱⲕⲙ ⲁⲛ ,
…
74 ⲙⲛⲧⲁⲛ ⲟⲉⲓⲕ ⲉⲟⲩⲱⲙ ⲡⲉⲛⲣⲟⲟⲩϣ ⲁⲛ ⲡⲉ ϩⲱⲃ ⲛⲧⲉⲓϩⲉ · ⲉⲣⲉⲛⲉⲛϣⲏⲣⲉ ϩⲕⲁⲉⲓⲧ , ⲉⲩⲕⲏⲕⲁϩⲏⲩ · ⲉⲣⲉⲡⲉⲩϩⲟⲩⲟ ⲣⲙⲛⲧⲣⲉ ϫⲉⲙⲉ ⲛϫⲱⲕⲙ ϩⲛⲥⲓⲟⲟⲩⲛⲉ ·
…
75 ⲏ ⲛⲧⲟⲟⲩ ⲁⲛ ⲡⲉⲧⲣⲕⲃⲁ ⲉⲣⲟⲟⲩ ϣⲁⲛⲧⲟⲩⲕⲟⲧⲟⲩ , ⲙⲛⲛⲕⲉⲏⲓ ⲉⲧⲉⲧⲛⲧⲣⲉⲩⲣⲕⲃⲁ ⲉⲧⲃⲏⲏⲧⲟⲩ ·
…
76 ⲏ ϩⲉⲛⲉⲡⲟⲓⲕⲓⲟⲛ ⲟⲛ ⲛⲉ ⲛϯⲙⲉ ·
…
77 ⲙⲏ ⲛⲧⲱⲧⲛ ⲟⲛ ⲁⲧⲉⲧⲛⲕⲉⲧ ⲛⲉⲩⲏⲓ ⲛϩⲏⲧⲟⲩ ·
…
78 ⲁⲩⲱ ⲛⲉⲓⲑⲗⲓⲯⲓⲥ ⲛⲟⲩⲱⲧ ⲛⲉⲧⲉⲧⲛⲑⲗⲓⲃⲉ ⲙⲙⲟⲟⲩ ⲛϩⲏⲧⲟⲩ ϩⲛⲛⲉⲧⲛⲕⲃⲁ ⲙⲛⲛⲉⲧⲛⲏⲣⲡ ⲉⲧⲗⲟⲙⲥ , ⲙⲛⲛⲉⲧⲛϩⲓⲥⲉ ⲧⲏⲣⲟⲩ ⲙⲛⲛⲉⲧⲛϫⲓⲛϭⲟⲛⲥ .
…
79 ⲱ ⲛⲣⲱⲙⲉ ⲉⲧⲉⲣⲉϯⲥⲙⲏ ⲁⲡⲉⲓⲗⲉⲓ ⲉⲣⲱⲧⲛ ϫⲉⲛⲉⲃⲟⲗ ϩⲛⲟⲩϯⲧⲱⲛ ⲉⲧⲟ ⲛⲁⲧⲥⲱⲧⲙ ⲛⲥⲁⲧⲙⲉ ⲉⲧⲡⲉⲓⲑⲉ ⲇⲉ ⲉⲡϫⲓⲛϭⲟⲛⲥ , ⲛⲟⲩⲟⲣⲅⲏ ⲙⲛⲟⲩϭⲱⲛⲧ ⲙⲛⲟⲩⲑⲗⲓⲯⲓⲥ , ⲙⲛⲟⲩⲗⲱϫϩ ⲉϫⲙⲯⲩⲭⲏ ⲛⲓⲙ ⲛⲣⲱⲙⲉ ⲉⲧⲣϩⲱⲃ ⲉⲡⲡⲉⲧϩⲟⲟⲩ .
…
80 ⲡⲗⲏⲛ ϯⲛⲁϣⲁϫⲉ ⲙⲡⲉⲕⲙⲧⲟ ⲉⲃⲟⲗ ⲡⲛⲟⲩⲧⲉⲛⲛϭⲟⲙ ⲡⲡⲁⲛⲧⲟⲕⲣⲁⲧⲱⲣ ⲙⲡⲣϭⲱⲛⲧ ⲉⲧⲁⲙⲛⲧⲁⲑⲏⲧ ·
…
81 ϯⲥⲟⲟⲩⲛ ϫⲉⲛⲅⲟⲃϣ ⲁⲛ ⲉⲗⲁⲁⲩ ·
…
82 ⲛⲧⲟⲕ ⲡⲉⲛⲧⲁⲕϣⲁϫⲉ ϩⲛⲛⲉⲕⲡⲉⲧⲟⲩⲁⲁⲃ ⲙⲡⲣⲟⲫⲏⲧⲏⲥ ⲛⲛⲁϩⲣⲛⲡⲓⲃⲁⲃⲉⲣⲱⲙⲉ ⲉⲧ ⲙⲙⲁⲩ ⲫⲁⲣⲁⲱ ϫⲉⲕⲱ ⲉⲃⲟⲗ ⲙⲡⲁⲗⲁⲟⲥ ϫⲉⲕⲁⲥ ⲉⲩⲉϣⲙϣⲉ ⲛⲁⲓ ⲏ ⲛⲥⲉⲣϣⲁ ⲛⲁⲓ .
…
83 ⲛⲧⲟⲕ ⲟⲛ ⲡⲉⲛⲧⲁⲕϫⲟⲟⲥ ⲛϩⲏⲧⲟⲩ ϫⲉⲥⲣϥⲉ ⲛⲧⲉⲧⲛⲉⲓⲙⲉ ϫⲉⲁⲛⲟⲕ ⲡⲉ ⲡⲛⲟⲩⲧⲉ ,
…
84 ϣⲛϩⲧⲏⲕ ϭⲉ ϩⲁⲡⲉⲕⲗⲁⲟⲥ ⲡϩⲁⲣϣϩⲏⲧ ⲉⲧⲉⲛⲁϣⲉⲡⲉϥⲛⲁ ·
…
85 ⲛⲅⲥⲟⲧⲟⲩ ⲉⲃⲟⲗ ϩⲛⲧϭⲓϫ ⲛⲛⲉⲧⲑⲗⲓⲃⲉ ⲙⲙⲟⲟⲩ ·
…
86 ⲛⲧϩⲉ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ , ⲧⲁⲣⲟⲩⲥⲣϥⲉ ⲉⲉⲓⲙⲉ ϫⲉⲙⲛϭⲉⲛⲟⲩⲧⲉ ⲛⲃⲗⲁⲕ ·
…
87 ⲏ ⲛⲅⲛⲁⲩ ⲁⲛ ϫⲉⲙⲡⲉⲛϩⲉⲗⲗⲏⲛ ⲙⲛⲛϩⲉⲑⲛⲟⲥ ⲙⲛⲛⲁⲧⲛⲟⲩⲧⲉ ϭⲙϭⲟⲙ ⲉⲥⲟⲩⲱⲛⲅ ϫⲉⲙⲡⲟⲩⲥⲣϥⲉ ϩⲛⲛⲉⲩⲙⲛⲧⲁⲡⲟⲥⲧⲟⲥ ·
…
88 ⲙⲛⲛⲉⲩⲙⲛⲧⲁⲕⲁⲑⲁⲣⲧⲟⲥ ⲧⲏⲣⲟⲩ .
…
89 ⲧⲱⲙ ϭⲉ ⲉⲣⲛⲁⲛⲟⲙⲓⲁ ⲛⲓⲙ · ⲙⲛϫⲓⲛϭⲟⲛⲥ ⲛⲓⲙ ϩⲙⲙⲁ ⲛⲓⲙ ·
…
90 ⲉⲃⲟⲗ ⲛⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ϫⲓⲛϫⲱϥ ⲙⲡⲕⲁϩ ϣⲁⲁⲣⲏϫⲥ ⲛⲧⲟⲓⲕⲟⲩⲙⲉⲛⲏ , ⲧⲁⲣⲉⲛⲉⲧⲥⲟⲟⲩⲛ ⲙⲙⲟⲕ ⲥⲣϥⲉ ⲉⲣϩⲙϩⲁⲗ ⲛⲁⲕ ·
…
91 ⲛⲥⲉⲛⲁϭⲙϭⲟⲙ ⲅⲁⲣ ⲁⲛ ⲉⲣϩⲙϩⲁⲗ ⲛⲁⲕ , ⲛⲥⲉⲣϩⲙϩⲁⲗ ⲛⲛⲣⲉϥϫⲓⲛϭⲟⲛⲥ ,
…
92 ⲉⲛⲉⲙⲡⲕⲥⲱⲧⲉ ⲙⲡⲉⲕⲗⲁⲟⲥ ⲡⲓⲥⲣⲁⲏⲗ ⲙⲡⲓⲟⲩⲟⲉⲓϣ ⲉⲃⲟⲗ ϩⲛⲛϭⲓϫ ⲙⲡⲓⲁⲛⲟⲙⲟⲥ ⲛⲁⲃⲟⲩⲭⲟⲇⲟⲛⲟⲥⲟⲣ , ⲙⲛⲛⲓⲕⲟⲟⲩⲉ ⲧⲏⲣⲟⲩ ⲉⲧⲉⲓⲛⲉ ⲙⲙⲟϥ ⲛⲧⲁⲩⲑⲙⲕⲟⲟⲩ ϩⲙⲡⲧⲣⲉⲕⲧⲁⲁⲩ ⲉϩⲣⲁⲓ ⲉⲧⲟⲟⲧⲟⲩ ϫⲉⲁⲕⲛⲟⲩϭⲥ ⲉⲣⲟⲟⲩ ,
…
93 ⲕⲁⲛ ⲥⲉϣⲓⲛⲉ ⲛⲥⲱⲕ ϩⲙⲡⲙⲁ ⲉⲧⲙⲙⲁⲩ ,
…
94 ⲁⲗⲗⲁ ⲛⲉⲩⲛⲁϣϫⲱ ⲁⲛ ⲡⲉ ⲛⲛⲉⲕⲥⲙⲟⲩ ⲛⲧϩⲉ ⲉⲧⲟⲩⲁϣⲥ · ϫⲉⲙⲛⲡⲁⲣⲣⲏⲥⲓⲁ ϣⲟⲟⲡ ⲛⲁⲩ ϩⲛⲧⲙⲛⲧϩⲙϩⲁⲗ ⲛⲛⲉϩⲃⲏⲩⲉ ⲉⲧⲟϣ ·
…
95 ⲛⲧϩⲉ ⲛⲧⲁⲩϫⲟⲟⲥ ϫⲉⲛⲁϣ ⲛϩⲉ ⲉⲛⲛⲁϣϫⲱ ⲛⲧⲱⲇⲏ ⲙⲡⲏⲓ ⲙⲡϫⲟⲉⲓⲥ ϩⲛⲛⲟⲩⲕⲁϩ ⲛϣⲙⲙⲟ .
…
96 ⲛⲧⲉⲓϩⲉ ⲟⲛ ⲉⲕϣⲁⲛⲧⲙⲥⲱⲧⲉ ⲛⲛⲉⲧⲟⲩϫⲓ ⲙⲙⲟⲟⲩ ⲛϭⲟⲛⲥ ⲉⲃⲟⲗ ϩⲛⲛϭⲓϫ ⲛⲛⲓⲁⲧⲛⲁ , ⲕⲁⲛ ⲥⲉⲧⲁⲩⲟ ⲙⲡⲉⲕⲣⲁⲛ , ⲥⲉⲉⲡⲓⲑⲩⲙⲉⲓ ⲇⲉ ⲟⲛ ⲉⲣⲛⲉⲕⲟⲩⲱϣ ϫⲉⲛⲧⲟⲕ ⲡⲉ ⲧⲉⲩϩⲉⲗⲡⲓⲥ · ⲛⲥⲉⲛⲁϣϭⲙϭⲟⲙ ⲁⲛ ⲉϯⲛⲁⲕ ⲛⲛⲉⲩⲉⲣⲏⲧ ·
…
97 ϩⲛϩⲉⲛⲥⲙⲟⲩ ⲙⲛϩⲉⲛϣⲗⲏⲗ ⲙⲛϩⲉⲛⲛⲏⲥⲧⲉⲓⲁ ϫⲉⲙⲙⲛⲙⲛⲧⲣⲙϩⲉ ϣⲟⲟⲡ ⲛⲁⲩ ϩⲛⲟⲩⲥⲟⲟⲩⲧⲛ ⲉⲃⲟⲗ ϩⲛⲧⲙⲛⲧϩⲙϩⲁⲗ ⲛⲛⲉϩⲃⲏⲩⲉ ⲛⲛⲓⲣⲱⲙⲉ ⲉⲧⲙⲉⲉⲩⲉ ⲉϩⲉⲛⲡⲟⲛⲏⲣⲟⲛ ⲛⲛⲁⲩ ⲛⲓⲙ ⲉϩⲟⲩⲛ ⲉⲣⲟⲟⲩ .
…