1 ⲱ ⲧⲉⲧⲛⲣⲱϣⲉ ⲛⲧⲱⲧⲛ ⲛⲉⲧⲕⲁⲙⲁ ⲙⲡⲥⲁⲧⲁⲛⲁⲥ ⲉⲧⲣⲉϥⲉⲓ ⲉϩⲟⲩⲛ ⲛϥϫⲱϩⲙ ⲛⲙⲙⲁ ⲉⲧⲟⲩⲁⲁⲃ ⲙⲡⲛⲟⲩⲧⲉ ·
…
2 ⲁⲩⲱ ⲛⲧⲉⲧⲛⲥⲱⲱϥ ⲙⲡⲉϥⲣⲡⲉ ⲉⲧⲉⲛⲧⲱⲧⲛ ⲡⲉ ⲙⲙⲓⲛⲙⲙⲱⲧⲛ ·
…
3 ⲙⲡⲉⲧⲛⲣⲡⲙⲉⲉⲩⲉ ⲛⲧⲁⲡⲟⲫⲁⲥⲓⲥ ⲙⲡⲁⲡⲟⲥⲧⲟⲗⲟⲥ , ϫⲉⲡⲉⲧⲛⲁⲥⲱⲱϥ ⲙⲡⲉⲣⲡⲉ ⲙⲡⲛⲟⲩⲧⲉ . ⲡⲁⲓ ⲡⲛⲟⲩⲧⲉ ⲛⲁⲧⲁⲕⲟϥ :
…
4 ⲟⲩⲧⲉ ⲟⲛ ⲙⲡⲉⲧⲛⲣⲡⲙⲉⲉⲩⲉ ⲛⲛⲥⲁϩⲟⲩ ⲧⲏⲣⲟⲩ ⲉⲛⲧⲁⲡⲉⲛⲉⲓⲱⲧ ϫⲟⲟⲩ ⲉϥϯ ⲙⲙⲟⲛ ⲧⲏⲣⲛ ⲉⲧⲟⲟⲧϥ ⲙⲡⲛⲟⲩⲧⲉ ⲉϥϫⲱ ⲙⲙⲟⲥ , ϫⲉϥⲥϩⲟⲩⲟⲣⲧ ⲛϭⲓⲡⲉⲧⲛⲁϫⲱϩⲙ ⲙⲡⲉϥⲥⲱⲙⲁ ⲕⲁⲧⲁⲗⲁⲁⲩ ⲛⲥⲙⲟⲧ · ⲏ ⲛϥϫⲓⲟⲩⲉ ϩⲛⲗⲁⲁⲩ ⲛϩⲛⲟ · ϫⲓⲛⲟⲩϩⲱⲥ ⲙⲛⲟⲩⲙⲟⲩⲥ ·
…
5 ⲙⲁⲗⲓⲥⲧⲁ ϩⲟⲉⲓⲧⲉ ϩⲓⲡⲣⲏϣ ϩⲓⲕⲗⲁϥⲧ ·
…
6 ⲁⲩⲱ ϣⲁϩⲣⲁⲓ ⲉⲟⲩⲉⲗⲁⲭⲓⲥⲧⲟⲛ ⲛϩⲛⲟ ⲛⲟⲩⲱⲙ ·
…
7 ⲉⲓⲧⲉ ⲉⲃⲟⲗ ϩⲛⲛⲉϩⲛⲁⲁⲩ ⲛⲧⲇⲓⲁⲕⲟⲛⲓⲁ ⲙⲡⲛⲟⲩⲧⲉ ·
…
8 ⲉⲓⲧⲉ ⲉⲃⲟⲗ ϩⲛⲛⲧⲟ ⲛⲛⲉⲧϩⲓⲧⲟⲩⲱⲟⲩ ·
…
9 ⲛⲉⲓⲙⲉⲉⲩⲉ ⲙⲉⲛ ⲡⲉ ⲉⲉⲓ ϣⲁⲣⲱⲧⲛ ϩⲛⲟⲩⲧⲱⲧ ⲛϩⲏⲧ ·
…
10 ⲁⲗⲗⲁ ⲡⲉⲙⲕⲁϩ ⲛϩⲏⲧ ⲛⲛⲉⲛⲧⲁⲩϯϭⲱⲛⲧ ⲙⲡⲛⲟⲩⲧⲉ ⲁⲩⲱ ⲁⲩⲗⲩⲡⲉⲓ ⲙⲡⲉϥⲡⲛⲉⲩⲙⲁ ⲉⲧⲟⲩⲁⲁⲃ · ⲡⲉⲛⲧⲁϥⲕⲱⲗⲩⲉ ⲙⲡⲉⲛⲟⲩⲣⲟⲧ ·
…
11 ϯⲥⲟⲟⲩⲛ ⲙⲉⲛ ϫⲉⲡⲁⲙⲡϣⲁ ⲡⲉ ⲙⲕⲁϩ ⲛϩⲏⲧ ⲛⲓⲙ ·
…
12 ⲁⲗⲗⲁ ⲉⲣϣⲁⲛⲡⲛⲟⲩⲧⲉ ⲙⲛⲡⲉⲛϫⲟⲉⲓⲥ ⲓⲏⲥⲟⲩⲥ ⲣϩⲛⲁϥ · ϯⲛⲏⲩ ϣⲁⲣⲱⲧⲛ ϩⲛⲟⲩϭⲱⲛⲧ ·
…
13 ⲛⲧⲁⲉⲓⲣⲉ ⲛⲛⲓⲁⲧⲥⲃⲱ ⲁⲩⲱ ⲛⲓⲡⲁⲣⲑⲉⲛⲟⲥ ⲛⲥⲟϭ , ⲉⲧⲉⲙⲛⲛⲉϩ ϩⲛⲛⲉⲩⲁⲅⲅⲓⲟⲛ ⲛⲛⲉⲧϩⲙⲡⲁϩⲏⲧ ⲧⲏⲣⲟⲩ ·
…
14 ϫⲉⲡⲁⲗⲓⲛ ⲟⲛ ⲛⲧⲉⲧⲛⲕⲉⲧⲧⲏⲩⲧⲛ ⲉⲡⲁϩⲟⲩ ϩⲓⲛⲓⲙⲛⲧⲣⲉϥϯϭⲱⲛⲧ ⲙⲡⲛⲟⲩⲧⲉ ⲛⲧⲉⲧⲛϩⲉ ⲉϩⲣⲁⲓ ⲉⲧⲟⲟⲧⲥ ⲛⲧⲥⲏϥⲉ ⲙⲡⲡⲟⲛⲏⲣⲟⲥ ⲡⲉⲛⲧⲁϥⲧⲁⲕⲟ ⲛⲧⲟⲓⲕⲟⲩⲙⲉⲛⲏ ⲧⲏⲣⲥ ϩⲛⲛⲉϥⲛⲟⲃⲉ ⲙⲛⲛⲉϥⲁⲛⲟⲙⲓⲁ ·
…
15 ⲉⲃⲟⲗ ϫⲉⲁⲧⲉⲧⲛⲙⲉⲣⲉⲡϫⲱϩⲙ · ⲉϩⲟⲩⲉⲡⲧⲃⲃⲟ ·
…
16 ⲁⲩⲱ ⲁⲧⲉⲧⲛⲥⲱⲧⲡ ⲛⲏⲧⲛ ⲙⲡⲙⲟⲩ · ⲉϩⲟⲩⲉⲡⲱⲛϩ ·
…
17 ⲁⲧⲉⲧⲛϯⲛⲟⲩϭⲥ ⲅⲁⲣ ⲙⲡⲉⲛⲧⲁϥⲧⲁⲙⲓⲉⲧⲏⲩⲧⲛ · ⲁⲩⲱ ⲁϥⲥⲁⲛϣⲧⲏⲩⲧⲛ ⲡⲛⲟⲩⲧⲉ ⲡϣⲁⲉⲛⲉϩ ·
…
18 ⲁⲧⲉⲧⲛϯⲙⲕⲁϩ ⲛϩⲏⲧ ⲇⲉ ⲟⲛ ⲛⲧⲉⲛⲧⲁⲥϣⲉⲡϣⲡⲧⲏⲩⲧⲛ ⲧϩⲓⲉⲣⲟⲩⲥⲁⲗⲏⲙ ⲉⲧⲉⲧⲥⲩⲛⲁⲅⲱⲅⲏ ⲧⲉ ·
…
19 ⲁⲩⲱ ⲁⲧⲉⲧⲛϩⲉ ⲙⲙⲉⲉⲣⲉ ⲛⲧϩⲉ ⲛⲛⲉⲧϩⲛⲧⲡⲁϣⲉ ⲛⲧⲉⲩϣⲏ ·
…
20 ⲛⲧϩⲉ ⲉⲧⲥⲏϩ ϫⲉⲁⲥⲥⲗⲁⲁⲧⲉ ⲁⲥϩⲉ ⲛϭⲓⲧⲡⲁⲣⲑⲉⲛⲟⲥ ⲙⲡⲓⲥⲣⲁⲏⲗ ⲛⲥⲛⲁⲟⲩⲱϩ ϭⲉ ⲁⲛ ⲉⲧⲟⲟⲧⲥ ⲉⲧⲱⲟⲩⲛ ·
…
21 ⲛⲉⲧⲛⲕⲟⲧⲕ ⲅⲁⲣ ⲡⲉϫⲁϥ · ⲉⲩⲛⲕⲟⲧⲕ ⲛⲧⲉⲩϣⲏ ·
…
22 ⲁⲩⲱ ⲛⲉⲧⲧⲁϩⲉ . ⲉⲩⲧⲁϩⲉ ⲛⲧⲉⲩϣⲏ ·
…
23 ⲛⲧⲱⲧⲛ ⲇⲉ ⲁⲧⲉⲧⲛϯϩⲉ ⲙⲙⲉⲉⲣⲉ ⲛⲧϩⲉ ⲛⲛⲉⲛⲧⲁⲩϫⲟⲟⲥ ⲉⲧⲃⲏⲏⲧⲟⲩ · ϫⲉⲛⲉⲧⲧⲁϩⲉ ⲁϫⲛⲏⲣⲡ ·
…
24 ⲁⲩⲱ ⲁⲧⲉⲧⲛϩⲱⲣⲡ ⲙⲙⲉⲉⲣⲉ ⲛⲧϩⲉ ⲛⲛⲉⲧⲛⲕⲟⲧⲕ ⲛⲧⲉⲩϣⲏ ·
…
25 ⲉⲃⲟⲗ ϫⲉⲁⲧⲉⲧⲛⲕⲱ ⲛⲥⲱⲧⲛ ⲛⲧϩⲟⲧⲉ ⲙⲡⲛⲟⲩⲧⲉ ·
…
26 ⲉⲁⲧⲉⲧⲛⲙⲉⲣⲉⲡⲕⲁⲕⲉ ⲉϩⲟⲩⲉ ⲉⲡⲟⲩⲟⲉⲓⲛ ·
…
27 ⲉⲁⲧⲉⲧⲛⲉⲡⲡⲉⲧⲥⲁϣⲉ ⲇⲉ ⲟⲛ ϫⲉϥϩⲟⲗϭ · ⲁⲩⲱ ⲡⲉⲧϩⲟⲗϭ ϫⲉϥⲥⲁϣⲉ ·
…
28 ⲉⲧⲃⲉⲡⲁⲓ ⲟⲩⲟⲓ ⲛⲏⲧⲛ ⲙⲡⲟⲛⲏⲣⲟⲥ ϫⲉⲙⲡⲉⲧⲛⲣⲡⲙⲉⲉⲩⲉ ⲙⲡϩⲓⲥⲉ ⲧⲏⲣϥ ⲉⲛⲧⲁⲡⲉⲛⲉⲓⲱⲧ ϣⲟⲡϥ ⲛⲙⲙⲏⲧⲛ ⲧⲏⲣⲧⲛ ·
…
29 ⲉⲁⲧⲉⲧⲛⲕⲱ ⲛⲥⲱⲧⲛ ⲛⲛⲉϥⲥⲃⲟⲟⲩⲉ ⲛⲱⲛϩ ⲙⲛⲛⲁⲛⲥⲙⲙⲉ ⲛⲛⲉⲧⲛⲉⲓⲟⲧⲉ :
…
30 ⲡⲗⲏⲛ ⲉⲓⲥⲛϩⲗⲗⲟ ⲉⲓ ⲙⲛⲛⲉⲛⲥⲛⲏⲩ ⲁⲩⲉⲓ ϣⲁⲣⲱⲧⲛ ⲛⲕⲉⲥⲟⲡ ·
…
31 ⲉⲛⲟⲛϩ ϩⲛⲟⲩⲛⲟϭ ⲛⲗⲩⲡⲏ ⲙⲛⲟⲩⲙⲕⲁϩ ⲛϩⲏⲧ ⲉⲛⲁϣⲱϥ ·
…
32 ⲉⲧⲣⲉⲩⲉⲓⲣⲉ ⲛⲧⲟⲩⲉⲓ ⲧⲟⲩⲉⲓ ⲙⲙⲱⲧⲛ ⲕⲁⲧⲁⲡⲉⲥⲙⲡϣⲁ ·
…
33 ⲉⲃⲟⲗ ϫⲉⲁⲧⲉⲧⲛⲕⲱ ⲛⲥⲱⲧⲛ ⲛⲧⲡⲏⲅⲏ ⲙⲙⲟⲟⲩ ⲛⲱⲛϩ ·
…
34 ⲉⲁⲧⲉⲧⲛϣⲓⲕⲉ ⲛⲏⲧⲛ ⲛϩⲉⲛϣⲏⲓ ⲉⲩⲟⲩⲟϭⲡ ϩⲙⲡⲧⲣⲉⲡⲉⲧⲛϩⲏⲧ ⲛⲁⲧⲥⲃⲱ ⲣⲕⲁⲕⲉ ⲉⲣⲱⲧⲛ ·
…
35 ⲉⲧⲉⲧⲛϫⲱ ⲙⲙⲟⲥ ϫⲉⲁⲛⲟⲛ ϩⲉⲛⲥⲁⲃⲉ · ⲁⲧⲉⲧⲛⲣⲥⲟϭ ·
…
36 ⲉⲁⲧⲉⲧⲛϣⲓⲃⲉ ⲙⲡⲉⲟⲟⲩ ⲙⲡⲛⲟⲩⲧⲉ ϩⲛϩⲉⲛϩⲃⲏⲩⲉ ⲉⲙⲉϣϣⲉ .
…
37 ⲉⲧⲃⲉⲡⲁⲓ ⲁⲡⲛⲟⲩⲧⲉ ϯⲧⲏⲩⲧⲛ ⲉϩⲣⲁⲓ ⲉϩⲉⲛⲡⲁⲑⲟⲥ ⲉⲩⲥⲏϣ ⲉⲧⲉⲡϫⲓⲟⲩⲉ ⲡⲉ ⲙⲛⲡϫⲱϩⲙ ⲙⲛⲡⲟⲛⲏⲣⲟⲛ ⲛⲓⲙ ·
…
38 ⲛⲁⲓ ⲉⲧⲉⲣⲉⲧⲓⲙⲱⲣⲓⲁ ⲛⲓⲙ ϣⲟⲟⲡ ⲛⲛⲉⲧⲉⲓⲣⲉ ⲙⲙⲟⲟⲩ · ⲟⲩ ⲙⲟⲛⲟⲛ ϩⲙⲡⲉⲓⲁⲓⲱⲛ · ⲁⲗⲗⲁ ϩⲙⲡⲕⲉⲟⲩⲁ :
…