1 ⲧⲛⲇⲟⲅⲙⲁⲧⲓⲍⲉ ϩⲙⲡⲕⲟⲥⲙⲟⲥ ⲛⲧϩⲉ ⲛⲛⲉⲧⲟⲛϩ ·
…
2 ⲙⲡⲣϫⲱϩ ⲟⲩⲧⲉ ⲙⲡⲣϫⲓϯⲡⲉ . ⲟⲩⲧⲉ ⲙⲡⲣϩⲱⲛ ⲉϩⲟⲩⲛ · ⲉⲧⲉⲡⲁⲓ ⲡⲉ ϫⲉⲁⲛⲉⲓ ⲉⲃⲟⲗ ϩⲛⲛⲛⲟⲃⲉ ⲙⲡⲕⲟⲥⲙⲟⲥ ⲉⲁⲛⲕⲁⲁⲩ ⲛⲥⲱⲛ ·
…
3 ⲁϩⲣⲟⲛ ⲟⲛ ⲉⲛⲕⲧⲟ ⲙⲙⲟⲛ ⲉⲛϭⲗⲟⲙⲗⲙ ϩⲣⲁⲓ ⲛϩⲏⲧⲟⲩ ·
…
4 ϩⲙⲡⲁⲓ ⲟⲛ ⲉⲛⲧⲁϥϫⲟⲟⲥ ϫⲉⲙⲡⲓⲟⲩⲟⲉⲓϣ ⲅⲁⲣ ⲛⲉⲧⲉⲧⲛⲟ ⲛⲕⲁⲕⲉ ⲡⲉ · ⲧⲉⲛⲟⲩ ⲇⲉ ⲛⲟⲩⲟⲉⲓⲛ ϩⲙⲡϫⲟⲉⲓⲥ ·
…
5 ⲙⲟⲟϣⲉ ϩⲱⲥ ϣⲏⲣⲉ ⲙⲡⲟⲩⲟⲉⲓⲛ ·
…
6 ⲉⲣⲉⲡⲕⲁⲣⲡⲟⲥ ⲅⲁⲣ ⲙⲡⲟⲩⲟⲉⲓⲛ ϩⲙⲡⲉⲧⲛⲁⲛⲟⲩϥ ⲛⲓⲙ ⲙⲛⲧⲇⲓⲕⲁⲓⲟⲥⲩⲛⲏ ⲙⲛⲧⲙⲉ ·
…
7 ⲉⲧⲉⲧⲛⲇⲟⲕⲓⲙⲁⲍⲉ ϫⲉⲟⲩ ⲡⲉⲉⲧⲣⲁⲛⲁϥ ⲙⲡϫⲟⲉⲓⲥ · ⲁⲩⲱ ⲙⲡⲣⲕⲟⲓⲛⲱⲛⲉⲓ ⲉⲛⲉϩⲃⲏⲩⲉ ⲙⲡⲕⲁⲕⲉ ⲉⲧⲉⲙⲙⲛⲧⲟⲩ ⲕⲁⲣⲡⲟⲥ · ⲛⲧⲉⲧⲛϫⲡⲓⲟⲟⲩ ⲇⲉ ⲛⲧⲟϥ ⲛϩⲟⲩⲟ ·
…
8 ⲛⲉⲧⲟⲩⲉⲓⲣⲉ ⲅⲁⲣ ⲙⲙⲟⲟⲩ ⲛϫⲓⲟⲩⲉ , ϩⲉⲛϣⲗⲟϥ ⲛⲉ ⲉⲣⲡⲕⲉ ⲉϫⲟⲟⲩ ·
…
9 ϣⲁⲣⲉϩⲱⲃ ⲇⲉ ⲛⲓⲙ ⲟⲩⲱⲛϩ ⲉⲃⲟⲗ ⲉⲧⲟⲩϫⲡⲓⲟ ⲙⲙⲟⲟⲩ ϩⲓⲧⲙⲡⲟⲩⲟⲉⲓⲛ ·
…
10 ϩⲱⲃ ⲅⲁⲣ ⲛⲓⲙ ⲉⲧⲟⲩⲟⲛϩ ⲉⲃⲟⲗ ϩⲉⲛⲟⲩⲟⲉⲓⲛ ⲛⲉ ·
…
11 ⲉⲧⲃⲉⲡⲁⲓ ϩⲱⲱⲛ ⲙⲁⲣⲛϫⲡⲓⲟ ⲛⲛⲉⲛⲙⲛⲧⲥⲟϭ ϩⲣⲁⲓ ⲛϩⲏⲧⲛ ⲙⲛⲙⲙⲉⲉⲩⲉ ⲧⲏⲣⲟⲩ ⲙⲡⲇⲓⲁⲃⲟⲗⲟⲥ ⲉⲧϥⲛⲟⲩϫⲉ ⲙⲙⲟⲟⲩ ⲉϩⲟⲩⲛ ⲉⲣⲟⲛ · ⲙⲛⲙⲙⲛⲧⲁⲧⲛⲁϩⲧⲉ · ⲙⲛⲙⲙⲟⲥⲧⲉ · ⲛⲧϩⲉ ⲉϣⲁⲩⲧⲣⲉⲛⲙⲉⲉⲩⲉ ⲉⲡⲡⲉⲧϩⲟⲟⲩ ⲉϩⲟⲩⲛ ⲉⲛⲉⲛⲉⲣⲏⲩ ⲉⲛⲧⲛϩⲁⲧⲛⲛⲉⲛⲉⲣⲏⲩ ⲁⲛ ⲉⲡⲧⲏⲣϥ ·
…
12 ⲁⲩⲱ ⲉⲛϭⲛⲁⲣⲓⲕⲉ ⲉⲛⲉⲛⲉⲣⲏⲩ . ⲁⲩⲱ ⲉⲣⲟⲛ ⲁⲛ ⲙⲙⲓⲛⲙⲙⲟⲛ · ϩⲱⲥ ⲉⲣⲉⲡⲉⲛⲙⲓϣⲉ ϣⲟⲟⲡ ⲉϩⲟⲩⲛ ⲉⲛⲉⲛⲉⲣⲏⲩ · ⲁⲩⲱ ⲉϥϣⲟⲟⲡ ⲁⲛ ⲟⲩⲃⲉⲛⲁⲣⲭⲏ ⲙⲛⲛⲉⲝⲟⲩⲥⲓⲁ · ⲟⲩⲃⲉⲛⲕⲟⲥⲙⲟⲕⲣⲁⲧⲱⲣ ⲙⲡⲕⲁⲕⲉ · ⲟⲩⲃⲉⲛⲉⲡⲛⲉⲩⲙⲁⲧⲓⲕⲟⲛ ⲛⲧⲡⲟⲛⲏⲣⲓⲁ ⲉⲧϩⲁⲙⲡⲏⲩⲉ · ⲁⲩⲱ ⲟⲩⲃⲉⲥⲛⲟϥ ⲁⲛ ϩⲓⲥⲁⲣⲝ ·
…
13 ⲛⲧϩⲉ ⲉⲛⲧⲁⲡⲁⲡⲟⲥⲧⲟⲗⲟⲥ ϫⲟⲟⲥ ϫⲉϫⲓ ⲛⲏⲧⲛ ⲛⲧⲡⲁⲛϩⲟⲡⲗⲓⲁ ⲙⲡⲛⲟⲩⲧⲉ ϫⲉⲉⲧⲉⲧⲛⲛⲁϣϭⲙϭⲟⲙ ⲉⲁϩⲉⲣⲁⲧⲧⲏⲩⲧⲛ ⲛⲛⲁϩⲣⲛⲛⲕⲟⲧⲥ ⲙⲡⲇⲓⲁⲃⲟⲗⲟⲥ · ϫⲉⲉⲣⲉⲡⲉⲛⲙⲓϣⲉ ϣⲟⲟⲡ ⲛⲁⲛ ⲁⲛ ⲟⲩⲃⲉⲥⲛⲟϥ ϩⲓⲥⲁⲣⲝ ·
…
14 ⲉⲧⲃⲉⲡⲁⲓ ϭⲉ ⲣⲟⲉⲓⲥ ⲁⲩⲱ ⲛⲧⲛⲁⲙⲁϩⲧⲉ ⲙⲡⲡⲉⲧⲛⲁⲛⲟⲩϥ · ⲉⲃⲟⲗ ϫⲉⲟⲩⲛϩⲁϩ ⲉⲩϩⲁⲧⲛⲛⲉⲩⲉⲣⲏⲩ ϩⲙⲡⲥⲱⲙⲁ · ⲉⲩⲟⲩⲏⲩ ⲇⲉ ⲉⲃⲟⲗ ⲛⲛⲉⲩⲉⲣⲏⲩ ϩⲙⲡϩⲏⲧ ⲁⲩⲱ ⲧⲁⲅⲁⲡⲏ ·
…
15 ⲟⲩⲛϩⲁϩ ⲇⲉ ⲟⲛ ⲉⲩϩⲁⲧⲛⲛⲉⲩⲉⲣⲏⲩ ⲁⲛ ϩⲙⲡⲥⲱⲙⲁ · ⲉⲩϩⲁⲧⲛⲛⲉⲩⲉⲣⲏⲩ ⲛⲛⲁⲩ ⲛⲓⲙ ϩⲛⲧⲁⲅⲁⲡⲏ ⲙⲡⲉⲭⲣⲓⲥⲧⲟⲥ ⲙⲛⲧⲁⲅⲁⲡⲏ ⲙⲡⲉⲡⲛⲉⲩⲙⲁ ⲁⲩⲱ ⲡⲟⲩⲱϣ ⲛⲓⲏⲥⲟⲩⲥ :
…
16 ⲛⲧⲱⲧⲛ ⲇⲉ ⲛⲉⲥⲛⲏⲩ ϩⲁⲣⲉϩ ⲁⲩⲱ ⲙⲟⲩⲛ ⲉⲃⲟⲗ ϩⲛⲛⲉⲛⲧⲁⲛⲧⲥⲁⲃⲟ ⲉⲣⲟⲟⲩ ·
…
17 ⲁⲩⲱ ⲟⲩⲛϩⲁϩ ⲛⲁϫⲓⲥⲃⲱ ⲁⲩⲱ ⲛⲥⲉϯϩⲏⲩ ⲉⲃⲟⲗ ⲙⲙⲱⲧⲛ · ⲛⲧϩⲉ ⲉⲛⲧⲁϥϫⲟⲟⲥ ϫⲉⲙⲁⲣⲟⲩⲛⲁⲩ ⲉⲛⲉⲧⲛϩⲃⲏⲩⲉ ⲉⲧⲛⲁⲛⲟⲩⲟⲩ ⲛⲥⲉϯⲉⲟⲟⲩ ⲙⲡⲉⲧⲛⲉⲓⲱⲧ ⲉⲧϩⲛⲙⲡⲏⲩⲉ ·
…
18 ⲛⲧϩⲉ ⲅⲁⲣ ⲉⲛⲧⲁⲧⲉⲧⲛⲟⲩⲉϩⲧⲏⲩⲧⲛ ⲛⲥⲁⲛⲉⲧⲟⲩⲁⲁⲃ ⲧⲏⲣⲟⲩ ϩⲛⲛⲉⲧⲛⲡⲣⲁⲝⲓⲥ · ⲛⲧϩⲉ ⲉⲛⲧⲁϥϫⲟⲟⲥ ϫⲉⲛⲧⲟⲕ ⲇⲉ ⲁⲕⲟⲩⲁϩⲕ ⲛⲥⲁⲧⲁⲥⲃⲱ . ⲡⲁⲥⲙⲟⲧ ⲡⲁⲧⲱϣ ⲧⲁⲡⲓⲥⲧⲓⲥ · ⲧⲁⲙⲛⲧϩⲁⲣϣϩⲏⲧ · ⲧⲁⲁⲅⲁⲡⲏ · ⲧⲁϩⲩⲡⲟⲙⲟⲛⲏ · ⲛⲁⲇⲓⲱⲅⲙⲟⲥ · ⲛⲁϩⲓⲥⲉ · ⲟⲩⲉϩ ⲧⲏⲩⲧⲛ ⲟⲛ ⲛⲥⲱⲟⲩ ϩⲙⲡϩⲁⲣⲉϩ ⲉⲛⲉⲧⲛϩⲓⲥⲉ ⲛⲏⲧⲛ ·
…
19 ⲛⲉⲧⲉⲟⲩⲛⲧⲁⲩ ⲅⲁⲣ ⲙⲙⲁⲩ ⲛⲧⲙⲛⲧⲣⲙⲙⲁⲟ ⲛⲁⲧⲧⲁⲕⲟ ϩⲙⲡⲉⲭⲣⲓⲥⲧⲟⲥ . ⲛⲧⲟⲟⲩ ⲟⲛ ⲛⲉⲧⲏⲡ ⲉⲣⲟⲉⲓⲥ ⲉⲣⲟⲥ ⲛⲁⲩ ·
…
20 ⲉϣϫⲉ ⲛⲉⲧⲉⲟⲩⲛⲧⲁⲩ ⲙⲙⲁⲩ ⲛⲟⲩⲭⲣⲏⲙⲁ · ⲟⲩⲛⲟⲩⲃ ⲙⲛⲟⲩϩⲁⲧ ⲙⲛϩⲉⲛϩⲩⲡⲁⲣⲭⲟⲛⲧⲁ · ϣⲁⲩⲣⲟⲉⲓⲥ ϫⲉⲛⲛⲉⲛⲗⲏⲥⲧⲏⲥ ϥⲓⲧⲟⲩ ⲛϫⲓⲟⲩⲉ ⲉⲓⲉ ϣϣⲉ ⲉⲣⲟⲛ ⲛⲟⲩⲏⲣ ⲉⲣⲟⲉⲓⲥ ϫⲉⲛⲛⲉⲡϫⲁϫⲉ ϥⲓ ⲛϫⲓⲟⲩⲉ ⲙⲡⲉⲛⲡⲉⲧⲛⲁⲛⲟⲩϥ ⲉⲧⲛⲉⲓⲣⲉ ⲙⲙⲟϥ · : ⲛⲉⲛϣⲗⲏⲗ · ⲙⲛⲛⲉⲛⲛⲏⲥⲧⲉⲓⲁ · ⲙⲛⲡⲉⲛⲧⲃⲃⲟ · ⲁⲩⲱ ⲧⲉⲛϩⲩⲡⲟⲙⲟⲛⲏ ·
…
21 ⲙⲡⲓϣⲱϣ ⲅⲁⲣ ⲁⲛ ⲛⲟⲩⲱⲧ ⲡⲉ ⲡϫⲓⲟⲩⲉ ⲛⲟⲩϩⲁⲧ ⲙⲛⲟⲩⲛⲟⲩⲃ · ⲁⲗⲗⲁ ⲛⲧϩⲉ ⲉⲧⲉⲣⲉⲧⲙⲛⲧⲡⲁⲣⲑⲉⲛⲟⲥ ⲁⲩⲱ ⲧⲙⲛⲧⲙⲟⲛⲁⲭⲟⲥ ⲧⲁⲓⲏⲩ ⲙⲙⲟⲥ · ⲛⲧⲉⲓϩⲉ ⲟⲛ ϥⲥⲡⲟⲩⲇⲁⲍⲉ ⲉϥⲓⲧⲟⲩ ⲛϫⲓⲟⲩⲉ ⲛϭⲓⲡϫⲁϫⲉ ·
…
22 ⲡⲉⲛⲧⲁϥϫⲡⲟ ⲇⲉ ⲛⲁϥ ⲛϩⲉⲛⲙⲁⲣⲅⲁⲣⲓⲧⲏⲥ . ⲏ ⲟⲩⲛⲟⲩⲃ . ϣⲁϥⲣⲟⲩϣⲏ ⲛⲣⲟⲉⲓⲥ ·
…
23 ⲉϣϫⲉ ϣⲁⲣⲉⲡϫⲁϫⲉ ⲣⲟⲩϣⲏ ⲛⲣⲟ ⲉⲧⲃⲉⲟⲩⲡⲟⲛⲏⲣⲓⲁ · ⲉⲓⲉ ϥⲛⲁⲣⲟⲉⲓⲥ ⲛⲟⲩⲏⲣ ⲛϭⲓⲡⲉⲧⲉⲟⲩⲛⲧϥ ⲛⲉⲭⲣⲏⲙⲁ · ϫⲉⲛⲛⲉⲩⲉⲡⲓⲃⲟⲩⲗⲉⲩⲉ ⲉⲣⲟⲟⲩ ·
…
24 ⲙⲁⲣⲛⲣⲡⲙⲉⲉⲩⲉ ⲛⲛⲉⲛⲧⲁⲡⲉⲛⲉⲓⲱⲧ ϫⲟⲟⲩ ϫⲉϩⲉⲛⲥⲛⲏⲩ ⲕⲁⲧⲁⲡⲉⲛⲃⲓⲟⲥ , ⲉⲩⲛⲏⲥⲧⲉⲩⲉ ⲉⲩϣⲗⲏⲗ ⲇⲉ ⲟⲛ · ⲉⲩⲟ ⲛⲟⲩϣⲏ ⲛⲣⲟⲉⲓⲥ · ⲉⲩϫⲓϭⲟⲗ ⲇⲉ ⲟⲛ · ⲉⲩⲙⲓϣⲉ · ⲉⲩϯⲧⲱⲛ · ⲉⲩⲕⲣⲙⲣⲙ ⲁⲩⲱ ⲉⲩⲕⲁⲧⲁⲗⲁⲗⲉⲓ · ⲉⲩⲙⲟⲥⲧⲉ · ⲉⲩⲙⲟⲟϣⲉ ϩⲛⲟⲩϩⲏⲧ ⲙⲙⲛⲧϣⲙⲙⲟ · ⲉⲩϫⲱϩⲙ ⲙⲙⲟⲟⲩ · ⲁⲩⲱ ⲉⲩⲟ ⲛⲕⲣⲟϥ . ⲉⲩⲉⲓⲣⲉ ⲛϩⲱⲃ ⲛⲓⲙ ⲉϥϩⲟⲟⲩ ·
…
25 ⲛⲁⲓ ⲛⲧⲉⲓⲙⲓⲛⲉ ⲉⲩϣⲡϩⲓⲥⲉ ⲉⲡϫⲓⲛϫⲏ · ⲁⲩⲱ ⲙⲙⲛⲗⲁⲁⲩ ⲛⲛⲟϥⲣⲉ ⲛⲁϣⲱⲡⲉ ⲛⲁⲩ ·
…
26 ⲉⲡϫⲓⲛϫⲏ ⲛⲁⲩ ⲟⲛ ⲧⲉ ⲧⲉⲩϩⲩⲡⲟⲙⲟⲛⲏ ·
…
27 ⲕⲁⲧⲁⲡⲉⲛⲧⲁⲩϫⲟⲟϥ ϫⲉⲟⲩⲕⲛⲁⲁⲩ ⲉϥⲙⲉϩ ⲁⲛ ⲡⲉ , ⲉⲧⲣⲉϥⲣⲛⲟⲉⲓⲧ .
…
28 ϩⲙⲡⲁⲓ ⲟⲛ ⲉⲛⲧⲁⲩϫⲟⲟⲥ ϫⲉϫⲟ ⲛϩⲉⲛⲥⲟⲩⲟ · ⲛⲧⲉⲧⲛⲱϩⲥ ⲛϩⲉⲛϣⲟⲛⲧⲉ ·
…
29 ⲛⲉⲩⲕⲗⲏⲣⲟⲥ ⲛⲥⲉⲛⲁϯϩⲏⲩ ⲛⲁⲩ ⲁⲛ ·
…
30 ⲉⲧⲃⲉⲡⲁⲓ ϭⲉ ⲣⲟⲉⲓⲥ ⲙⲡⲣⲕⲁ ⲡϫⲁϫⲉ ⲉⲧⲁⲕⲟ ⲙⲡⲉⲛⲡⲉⲧⲛⲁⲛⲟⲩϥ ⲉⲧⲛⲉⲓⲣⲉ ⲙⲙⲟϥ .
…
31 ⲁⲗⲗⲁ ϩⲛϩⲁⲣⲉϩ ⲛⲓⲙ ϩⲁⲣⲉϩ ⲉⲡⲉⲛϩⲏⲧ ⲉⲃⲟⲗ ϩⲛⲙⲉⲉⲩⲉ ⲛⲓⲙ ⲉϥϫⲁϩⲙ ⲛⲧⲉⲡⲇⲓⲁⲃⲟⲗⲟⲥ · ϫⲉⲕⲁⲥ ⲉⲛⲛⲁⲣⲙⲡϣⲁ ⲛⲥⲱⲧⲙ ⲉⲡⲁⲓ ϩⲛⲟⲩⲧⲱⲧ ⲛϩⲏⲧ ϫⲉⲛⲥⲉⲛⲁⲣϩⲱⲃ ⲁⲛ ⲛϣⲙⲙⲟ ϫⲓⲛⲙⲡⲓⲛⲁⲩ ·
…
32 ⲁⲗⲗⲁ ⲉⲩⲛⲁⲣϩⲱⲃ ⲙⲡϫⲟⲉⲓⲥ ⲡⲉⲩⲛⲟⲩⲧⲉ ·
…
33 ⲕⲁⲓ ⲅⲁⲣ ⲉϣⲁⲣⲉⲛⲗⲏⲥⲧⲏⲥ ϭⲱⲧϩ ⲁⲛ ⲉⲟⲩⲏⲓ , ⲏ ⲟⲩⲙⲁ ⲉⲙⲛⲭⲣⲏⲙⲁ ⲛϩⲏⲧϥ · ⲁⲗⲗⲁ ⲉϣⲁⲩϭⲱⲧϩ ⲉⲡⲙⲁ ⲉⲧⲟⲩⲛⲁϭⲛⲭⲣⲏⲙⲁ ⲙⲙⲁⲩ ·
…
34 ⲟⲩⲧⲉ ⲉϣⲁⲩϭⲱⲧϩ ⲁⲛ ⲉⲡⲙⲁ ⲉⲧⲟⲩⲣⲟⲉⲓⲥ ⲛϩⲏⲧϥ ⲉⲧⲣⲉⲩϣⲱⲗ · ⲁⲗⲗⲁ ⲡⲙⲁ ⲉⲧⲟⲩⲥⲟⲟⲩⲛ ϫⲉ ⲛⲥⲉⲣⲟⲉⲓⲥ ⲁⲛ ⲛϩⲏⲧϥ ⲁⲩⲱ ⲥⲉⲟⲃϣ .
…
35 ⲛⲧⲟⲟⲩ ⲛⲉⲧⲉϣⲁⲩϭⲱⲧϩ ⲉⲣⲟⲟⲩ ⲛⲥⲉⲧⲱⲣⲡ ⲙⲡⲉⲧⲟⲩⲛⲁϭⲛⲧϥ ·
…
36 ⲛⲧⲉⲓ ϩⲉ ⲟⲛ ⲉϣⲁⲣⲉⲡⲇⲓⲁⲃⲟⲗⲟⲥ ⲧⲱⲣⲡ ⲁⲛ ⲙⲡⲉⲧⲣⲟⲉⲓⲥ ⲁⲩⲱ ⲉⲧϩⲁⲣⲉϩ ⲉⲡⲉϥϩⲓⲥⲉ ⲛⲁϥ . ⲁⲗⲗⲁ ⲡⲉⲧϥⲛⲁϭⲛⲧϥ ⲉϥⲣⲟⲉⲓⲥ ⲁⲛ · ⲟⲩⲧⲉ ⲛϥⲣϩⲟⲧⲉ ⲁⲛ ϩⲏⲧϥ ⲙⲡⲛⲟⲩⲧⲉ · ⲟⲩⲧⲉ ⲛϥⲉⲓⲣⲉ ⲁⲛ ⲙⲡⲙⲉⲉⲩⲉ ϫⲉⲉϥⲛⲏⲩ ⲉϩⲣⲁⲓ ⲉⲛϭⲓϫ ⲙⲡⲛⲟⲩⲧⲉ ⲛⲁϣ ⲛϩⲉ · ⲁⲗⲗⲁ ⲉϥϣⲉⲉⲓ ⲙⲛⲧⲏⲩ ⲛⲓⲙ ·
…
37 ⲛⲧⲟϥ ⲡⲉⲧⲉϣⲁϥⲧⲱⲣⲡ ⲙⲡⲉϥⲡⲉⲧⲛⲁⲛⲟⲩϥ ⲉⲧϥⲉⲓⲣⲉ ⲙⲙⲟϥ ⲁϫⲛϯⲥⲟ ·
…
38 ⲉⲧⲃⲉⲡⲁⲓ ϭⲉ ⲛⲉⲥⲛⲏⲩ ⲟⲩⲟⲛ ⲛⲓⲙ ⲉⲧⲟ ⲛⲟⲩϩⲏⲧ ⲛⲟⲩⲱⲧ ⲙⲛⲡⲛⲟⲩⲧⲉ ⲁⲩⲱ ⲙⲛⲛⲉⲛⲉⲓⲟⲧⲉ , ⲁⲩⲱ ⲛⲙⲙⲁⲛ ϩⲱⲱⲛ ⲟⲛ, ⲉⲓⲧⲉ ϩⲟⲟⲩⲧ ⲉⲓⲧⲉ ⲥϩⲓⲙⲉ . ⲉⲓⲧⲉ ⲛⲟϭ ⲉⲓⲧⲉ ⲕⲟⲩⲓ · ϩⲁⲧⲏⲛ , ⲁⲩⲱ ϩⲁⲧⲉⲧⲏⲩⲧⲛ ⲧⲱⲕ ⲛϩⲏⲧ ⲁⲩⲱ ⲣⲟⲉⲓⲥ ⲙⲡⲣϯϩⲓⲛⲏⲃ ⲛⲛⲉⲛⲃⲁⲗ · ⲟⲩⲧⲉ ⲣⲉⲕⲣⲓⲕⲉ ⲛⲛⲉⲛⲃⲟⲩϩⲉ · ϣⲁⲛⲧⲉⲡϫⲟⲉⲓⲥ ⲛⲁϩⲙⲛ ⲉⲡⲉⲓⲣⲁⲥⲙⲟⲥ ⲛⲓⲙ ⲛⲧⲉⲡϫⲁϫⲉ ·
…
39 ⲛⲁϣⲉⲛⲉⲧⲫⲑⲟⲛⲉⲓ ⲅⲁⲣ ⲉⲣⲟⲛ ·
…
40 ⲁⲩⲱ ⲙⲡⲣⲛⲁⲩ ⲉϩⲉⲛⲥⲛⲏⲩ ⲉⲩϣⲧⲣⲧⲱⲣ ⲛϩⲁϩ ⲛⲥⲟⲡ ϩⲙⲡⲙⲓϣⲉ ⲙⲛⲡϯⲧⲱⲛ ⲁⲩⲱ ⲉⲩⲁⲣⲛⲁ ⲛⲧⲉⲩϩⲩⲡⲟⲙⲟⲛⲏ · ⲛⲥⲉⲥⲕⲁⲛⲇⲁⲗⲓⲍⲉ ⲙⲙⲱⲧⲛ ·
…
41 ⲁⲗⲗⲁ ⲛⲛⲉⲡⲛⲟⲩⲧⲉ ϫⲟⲟϥ ⲉⲧⲣⲉⲩⲥⲕⲁⲛⲇⲁⲗⲓⲍⲉ ⲛⲙⲙⲁⲓⲛⲟⲩⲧⲉ ⲉⲛⲉϩ . ⲛⲁⲓ ⲉⲧⲉⲟⲩⲛⲧⲁⲩ ⲙⲙⲁⲩ ⲛⲧⲉⲩⲡⲓⲥⲧⲓⲥ ⲉⲥϫⲏⲕ ⲉⲃⲟⲗ ⲉϩⲟⲩⲛ ⲉⲡⲉⲭⲣⲓⲥⲧⲟⲥ · ⲁⲩⲱ ⲉⲧⲁϩⲉ ⲉⲡⲉⲡⲛⲉⲩⲙⲁ ⲙⲡⲛⲟⲩⲧⲉ ·
…
42 ⲛⲧⲱⲧⲛ ⲇⲉ ⲛⲉⲧⲣⲛⲟⲃⲉ ⲁⲩⲱ ⲉⲧⲁⲣⲛⲁ ⲛⲧⲉⲩϩⲩⲡⲟⲙⲟⲛⲏ ⲁⲩⲱ ⲉⲧϣⲧⲟⲣⲧⲣ ⲛⲛⲥⲩⲛⲁⲅⲱⲅⲏ ϩⲛⲧⲙⲛⲧϩⲏⲧ ϣⲏⲙ · ⲙⲛⲡⲕⲱϩ · ⲙⲛⲡⲙⲟⲥⲧⲉ · ⲙⲛⲡⲙⲓϣⲉ · ⲙⲛⲡϯⲧⲱⲛ · ⲙⲛⲡⲉⲕⲣⲟϥ · ⲟⲩⲟⲉⲓ ⲛⲏⲧⲛ .
…
43 ⲉⲧⲉⲧⲛⲁⲣⲟⲩ ϩⲙⲡⲉϩⲟⲟⲩ ⲙⲡⲉⲧⲛϭⲙⲡϣⲓⲛⲉ ·
…
44 ⲧⲉⲧⲛⲑⲗⲓⲯⲓⲥ ⲅⲁⲣ ⲛⲏⲩ ⲙⲡⲟⲩⲉ ·
…
45 ⲏ ⲟⲩⲕⲣⲓⲙⲁ ⲛⲁⲛ ⲁⲛ ⲡⲉ ⲙⲛⲛⲥⲁⲧⲣⲉⲛⲁⲡⲟⲧⲁⲥⲥⲉ ⲙⲡⲉⲛⲧⲁⲛⲁⲡⲟⲧⲁⲥⲥⲉ ⲙⲙⲟϥ . ⲁⲩⲱ ⲛⲧⲛⲥⲙⲛⲧⲟⲟⲧⲛ ⲙⲛⲡⲉⲛⲧⲁⲛⲥⲙⲛⲧⲟⲟⲧⲛ ⲛⲙⲙⲁϥ ϩⲛⲟⲩⲇⲓⲁⲑⲏⲕⲏ ⲉⲛϩⲟⲙⲟⲗⲟⲅⲉⲓ ϫⲉⲛⲛⲉⲛϫⲓⲟⲩⲉ · ⲛⲛⲉⲛϫⲓϭⲟⲗ · ⲛⲛⲉⲛϫⲉϩⲙⲡⲉⲛⲥⲱⲙⲁ ⲕⲁⲧⲁⲗⲁⲁⲩ ⲛⲥⲙⲟⲧ · ⲛⲛⲉⲛⲣⲙⲛⲧⲣⲉ ⲛⲛⲟⲩϫ · ⲛⲛⲉⲛⲣⲗⲁⲁⲩ ⲛⲕⲣⲟϥ ϩⲛⲟⲩϩⲱⲡ · ⲙⲛⲛⲕⲉϣⲁϫⲉ ⲉⲧⲛⲏⲩ ⲙⲛⲛⲥⲁⲛⲁⲓ · ⲡⲁⲗⲓⲛ ⲛⲧⲛⲕⲧⲟⲛ ⲛⲧⲛⲁⲁⲩ ⲛⲕⲉⲥⲟⲡ ·
…