1 ⲧⲁⲛⲁⲡⲁⲩⲥⲓⲥ ⲙⲡϩⲁⲅⲓⲟⲥ · ⲓⲱϩⲁⲛⲛⲏⲥ · ⲡⲉⲩⲁⲅⲅⲉⲗⲓⲥⲧⲏⲥ · ⲁⲩⲱ ⲡⲁⲡⲟⲥⲧⲟⲗⲟⲥ ⲙⲡⲉⲭⲣⲓⲥⲧⲟⲥ · ϩⲛⲟⲩⲉⲓⲣⲏⲛⲏ · ⲛⲧⲉⲡⲛⲟⲩⲧⲉ ϩⲁⲙⲏⲛ . ═════ : ═════ : ═════ : ═════
…
2 ⲛⲉⲣⲉⲡⲙⲁⲕⲁⲣⲓⲟⲥ ⲓⲱϩⲁⲛⲛⲏⲥ ϩⲛⲉⲫⲉⲥⲟⲥ ⲙⲛⲛⲉⲥⲛⲏⲩ · ⲉϥⲧⲉⲗⲏⲗ ϩⲙⲡϫⲟⲉⲓⲥ ·
…
3 ⲙⲡⲉϩⲟⲟⲩ ⲇⲉ ⲛⲧⲕⲩⲣⲓⲁⲕⲏ · ⲛⲉⲣⲉⲛⲉⲥⲛⲏⲩ ⲧⲏⲣⲟⲩ ⲥⲟⲟⲩϩ ⲉⲛⲉⲩⲉⲣⲏⲩ ·
…
4 ⲁⲓⲱϩⲁⲛⲛⲏⲥ ⲁⲣⲭⲉⲓ ⲛϣⲁϫⲉ ⲛⲙⲙⲁⲩ ⲉϥϫⲱ ⲙⲙⲟⲥ · ϫⲉⲛⲁⲥⲛⲏⲩ · ⲁⲩⲱ ⲛⲁϣⲃⲣⲕⲗⲏⲣⲟⲛⲟⲙⲟⲥ · ⲁⲩⲱ ⲛⲥⲩⲙⲙⲉⲧⲟⲭⲟⲥ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲉⲓⲙⲉ ϭⲉ ⲛⲏⲧⲛ ϫⲉⲁⲡϫⲟⲉⲓⲥ ϯ ⲛⲏⲧⲛ ⲛⲟⲩϭⲟⲙ ⲉⲃⲟⲗ ϩⲓⲧⲟⲟⲧϥ
…
5 ⲟⲩⲏⲣ ⲛϭⲟⲙ ϩⲓϣⲡⲏⲣⲉ · ϩⲓⲭⲁⲣⲓⲥⲙⲁ ·
…
6 ⲁϥⲁⲁⲩ ⲛⲏⲧⲛ · ⲁⲩⲱ ⲧⲉⲧⲛⲥⲟⲟⲩⲛ ϫⲉⲁϣ ⲛⲉ ⲛⲉⲥⲃⲟⲟⲩⲉ ⲙⲛⲛⲉⲣϩⲙⲙⲉ · ⲁⲩⲱ ⲛⲙⲧⲟⲛ ⲙⲛⲧⲇⲓⲁⲕⲟⲛⲓⲁ · ⲙⲛⲛⲉϩⲙⲟⲧ ⲙⲛⲛⲇⲱⲣⲉⲁ · ⲙⲛⲛⲕⲟⲟⲩⲉ ⲧⲏⲣⲟⲩ ·
…
7 ⲛⲧⲁⲧⲉⲧⲛⲛⲁⲩ ⲉⲣⲟⲟⲩ ϩⲛⲛⲉⲧⲛⲃⲁⲗ ·
…
8 ⲉⲩϯ ⲙⲙⲟⲟⲩ ⲛⲏⲧⲛ ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲥⲁϩ ·
…
9 ⲛⲉϥⲟⲩⲱⲛϩ ⲉⲣⲱⲧⲛ ⲁⲛ ϩⲛⲛⲃⲁⲗ ⲙⲡⲥⲱⲙⲁ · ⲟⲩⲇⲉ ⲛⲉⲧⲉⲧⲛⲥⲱⲧⲙ ⲉⲣⲟϥ ⲁⲛ ϩⲛⲙⲙⲁⲁϫⲉ ⲙⲡⲥⲱⲙⲁ · ⲁⲗⲗⲁ ⲉϥⲟⲩⲱⲛϩ ⲙⲙⲟϥ ⲉⲣⲱⲧⲛ ϩⲙⲡⲥⲟⲟⲩⲧⲛ ⲙⲡⲉⲧⲛϩⲏⲧ · ϩⲛⲟⲩϩⲟⲣⲟⲙⲁ ϩⲛϩⲃⲏⲩⲉ ⲉⲩⲟⲩⲁⲁⲃ ·
…
10 ⲧⲁϫⲣⲉⲧⲏⲩⲧⲛ ϭⲉ ϩⲣⲁⲓ ⲛϩⲏⲧϥ · ⲉⲧⲉⲧⲛⲉⲓⲣⲉ ⲙⲡⲉϥⲙⲉⲉⲩⲉ ⲛⲟⲩⲟⲉⲓϣ ⲛⲓⲙ · ⲉⲧⲉⲧⲛⲉⲓⲣⲉ ⲟⲛ ⲙⲡⲙⲉⲉⲩⲉ ⲙⲡⲙⲩⲥⲧⲏⲣⲓⲟⲛ · ⲙⲛⲧⲕⲟⲓⲛⲱⲛⲓⲁ ⲛⲧⲁⲥϣⲱⲡⲉ ⲉϩⲟⲩⲛ ⲉⲣⲱⲧⲛ ·
…
11 ⲁⲡⲉⲛϫⲟⲉⲓⲥ ϫⲟⲕⲟⲩ ⲉⲃⲟⲗ ·
…
12 ⲧⲉⲛⲟⲩ ϭⲉ ⲱ ⲛⲉⲥⲛⲏⲩ · ϥⲥⲟⲡⲥ ⲙⲙⲱⲧⲛ ⲉⲃⲟⲗ ϩⲓⲧⲟⲟⲧϥ · ⲁⲩⲱ ϥⲡⲁⲣⲁⲕⲁⲗⲉⲓ ⲙⲙⲱⲧⲛ · ⲉϥⲟⲩⲱϣ · ⲉⲧⲣⲉⲧⲉⲧⲛϭⲱ ⲛⲟⲩⲉϣ ⲛⲗⲩⲡⲉⲓ ⲙⲙⲟϥ · ⲏ ⲉⲥⲟϣϥ · ⲏ ⲉⲉⲡⲓⲃⲟⲩⲗⲉⲩⲉ ⲉⲣⲟϥ ·
…
13 ϥⲥⲟⲟⲩⲛ ⲅⲁⲣ ⲙⲡⲥⲱϣ ⲉⲧϣⲟⲟⲡ ⲉⲃⲟⲗ ϩⲓⲧⲛⲧⲏⲩⲧⲛ ·
…
14 ϥⲉⲓⲙⲉ ⲇⲉ ⲟⲛ ⲉⲡⲧϭⲁⲉⲓⲟ ⲁⲩⲱ ϥⲥⲟⲟⲩⲛ ⲉⲧⲉⲡⲓⲃⲟⲩⲗⲏ ⲙⲛⲧⲕⲟⲗⲁⲥⲓⲥ ⲉⲧⲉⲧⲛⲕⲟⲗⲁⲍⲉ ⲙⲙⲟϥ ⲛϩⲏⲧⲥ ·
…
15 ϩⲟⲧⲁⲛ ⲉⲧⲉⲧⲛϣⲁⲛⲥⲱⲧⲙ ⲛⲥⲁⲛⲉϥⲉⲛⲧⲟⲗⲏ · ⲉⲧⲟⲩⲁⲁⲃ ϥⲛⲁⲛⲁ ⲛⲏⲧⲛ ϩⲱⲧⲧⲏⲩⲧⲛ ·
…
16 ⲙⲡⲣⲧⲣⲉⲡⲁⲅⲁⲑⲟⲥ ⲛⲛⲟⲩⲧⲉ ⲗⲩⲡⲉⲓ ⲉⲧⲃⲉⲧⲏⲩⲧⲛ · ⲡⲛⲁⲏⲧ ⲛϣⲁⲛϩⲧⲏϥ · ⲡⲁⲧⲧⲱⲗⲙ · ⲡⲁⲧϫⲃⲓⲛ · ⲡⲁⲧⲧⲁϩⲟϥ · ⲡⲟⲩⲁ ⲙⲁⲩⲁⲁϥ · ⲡⲁⲧⲡⲱⲱⲛⲉ · ⲡⲁⲧⲕⲣⲟϥ · ⲡⲁⲧϭⲱⲛⲧ · ⲡⲣⲁⲛ ⲉⲧϩⲓϫⲛⲣⲁⲛ ⲛⲓⲙ · ⲉϣⲁⲩⲛⲟⲉⲓ ⲙⲙⲟϥ ·
…
17 ⲙⲁⲣⲉϥⲉⲩⲫⲣⲁⲛⲉ ⲛⲙⲙⲏⲧⲛ ⲉⲧⲉⲧⲛⲡⲟⲗⲓⲧⲉⲩⲉ ⲛⲁϥ ⲕⲁⲗⲱⲥ ·
…
18 ⲙⲁⲣⲉϥⲣⲁϣⲉ ⲛⲙⲙⲏⲧⲛ · ⲉⲧⲉⲧⲛⲟⲛϩ · ϩⲛⲟⲩⲟⲩⲣⲟⲧ · ⲙⲛⲟⲩⲟⲡ ·
…
19 ⲙⲁⲣⲉϥⲙⲧⲟⲛ ⲙⲙⲟϥ ⲛϩⲏⲧⲧⲏⲩⲧⲛ ⲉⲧⲉⲧⲛⲁⲛⲁⲥⲧⲣⲉⲫⲉ ϩⲛⲟⲩⲙⲛⲧⲥⲉⲙⲛⲟⲥ ·
…
20 ⲙⲁⲣⲉϥⲣⲁⲧⲣⲟⲟⲩϣ · ⲉⲧⲉⲧⲛⲟⲛϩ · ϩⲛⲟⲩⲉⲅⲕⲣⲁⲧⲓⲁ ·
…
21 ⲙⲁⲣⲉϥⲟⲩⲛⲟϥ ⲉⲧⲉⲧⲛⲕⲟⲓⲛⲱⲛⲉⲓ · ⲉⲛⲁⲅⲁⲑⲟⲛ ⲙⲛⲛⲉⲣⲏⲧ ·
…
22 ⲙⲁⲣⲉϥⲧⲣⲩⲫⲁ ⲉⲧⲉⲧⲛⲙⲉ ⲙⲙⲟϥ ·
…
23 ⲙⲁⲣⲉϥⲥⲱⲃⲉ ⲉⲧⲉⲧⲛⲟ ⲛϩⲁⲕ ·
…
24 ⲛⲁⲓ ϭⲉ ⲛⲁⲥⲛⲏⲩ ⲉⲓϫⲱ ⲙⲙⲟⲟⲩ ⲛⲏⲧⲛ · ⲉⲃⲟⲗ ϫⲉ · ⲉⲓϭⲉⲡⲏ ⲉϯ ⲙⲡⲁⲟⲩⲟⲓ ⲉϩⲟⲩⲛ ⲉⲡϩⲱⲃ ⲉⲧⲉϥⲕⲏ ⲛⲁⲓ ⲉϩⲣⲁⲓ ⲡⲁⲓ ⲉⲧⲉⲣⲉⲡⲉϥϫⲱⲕ ⲉⲃⲟⲗ ⲛⲁϣⲱⲡⲉ ⲛⲁⲓ ⲉⲃⲟⲗ ϩⲓⲧⲙⲡϫⲟⲉⲓⲥ ·
…
25 ⲁϣ ⲅⲁⲣ ⲡⲉ ⲡⲕⲉϣⲁϫⲉ · ⲉⲧⲓⲛⲁϫⲟⲟϥ ⲉⲣⲱⲧⲛ ⲉⲟⲩⲛⲧⲏⲧⲛ ⲙⲙⲁⲩ ⲙⲡⲉⲛⲉⲭⲉⲣⲟⲛ ⲙⲡⲉⲧⲛⲛⲟⲩⲧⲉ ·
…
26 ⲟⲩⲛⲧⲏⲧⲛ ⲙⲙⲁⲩ ⲙⲡⲁⲣⲏⲃ ⲛⲧⲉϥⲙⲛⲧⲣⲣⲟ ·
…
27 ⲟⲩⲛⲧⲏⲧⲛ ⲙⲙⲁⲩ ⲛⲧⲉϥⲡⲁⲣⲟⲩⲥⲓⲁ ⲛⲁⲧⲡⲁⲣⲁⲓⲧⲉⲓ ⲙⲙⲟⲥ ·
…
28 ⲉϣⲱⲡⲉ ⲉⲧⲉⲧⲛϣⲁⲛⲧⲙⲣⲛⲟⲃⲉ · ϫⲓⲛⲧⲉⲛⲟⲩ · ⲉⲓⲉ ⲛⲉⲛⲧⲁⲧⲉⲧⲛⲁⲁⲩ ϩⲛⲟⲩⲙⲛⲧⲁⲧⲥⲟⲟⲩⲛ · ϥⲛⲁⲕⲁⲁⲩ ⲛⲏⲧⲛ ⲉⲃⲟⲗ ·
…
29 ⲉϣⲱⲡⲉ ⲇⲉ ⲟⲛ ⲙⲛⲛⲥⲁⲧⲣⲉⲧⲉⲧⲛⲥⲟⲩⲱⲛϥ ⲛⲧⲉⲧⲛϭⲱ ⲉⲧⲉⲧⲛⲙⲏⲛ ⲉⲃⲟⲗ ϩⲛⲛⲉⲓϩⲃⲏⲩⲉ ⲛⲟⲩⲱⲧ · ⲥⲉⲛⲁⲉⲡ ⲛϣⲟⲣⲡ ⲉⲣⲱⲧⲛ · ⲛⲥⲉⲡⲁⲣⲁⲇⲓⲇⲟⲩ ⲙⲙⲱⲧⲛ ⲉⲡⲕⲱϩⲧ ·
…
30 ⲁⲩⲱ ⲛⲧⲉⲣⲉϥϫⲉⲛⲁⲓ · ⲁϥϣⲗⲏⲗ ⲉϥϫⲱ ⲙⲙⲟⲥ · ϫⲉ · ⲓⲏⲥⲟⲩⲥ ⲡⲉⲛⲧⲁϥϣⲱⲛⲧ ⲙⲡⲉⲕⲗⲟⲙ ⲡⲁⲓ ⲉⲧϩⲙⲡⲉⲕϣⲱⲛⲧ ⲡⲱⲕ ·
…
31 ⲱ ⲡⲉⲛⲧⲁϥⲥⲱⲛⲧ ⲙⲡⲉⲕⲗⲟⲙ ⲛⲛⲉⲧⲟⲩⲁⲁⲃ ⲧⲏⲣⲟⲩ · ⲙⲛⲛⲉⲓⲟⲩⲟⲧⲟⲩⲉⲧ ⲉⲧⲟϣ · ⲉⲁϥϣⲟⲃⲟⲩ ϩⲛⲛⲉⲣⲱⲙⲉ · ⲡⲉⲕϩⲣⲏⲣⲉ · ⲉⲧⲉⲙⲉϥϩⲱϭⲃ ϣⲁⲃⲟⲗ ·
…
32 ⲱ ⲡⲉⲛⲧⲁϥϫⲟ ϩⲣⲁⲓ ⲛϩⲏⲧⲛ ⲛⲛⲉϥϣⲁϫⲉ ·
…
33 ⲱ ⲡϥⲁⲓⲣⲟⲟⲩϣ ⲙⲁⲩⲁⲁϥ ϩⲁⲛⲉϥϩⲙϩⲁⲗ ·
…
34 ⲱ ⲡⲥⲁⲉⲓⲛ ⲛⲡⲉⲛⲥⲱⲙⲁ · ⲉϥⲧⲁⲗϭⲟ ⲙⲙⲟⲟⲩ ⲧⲏⲣⲟⲩ ⲛϫⲓⲛϫⲏ ·
…
35 ⲱ ⲡⲉⲛⲣⲉϥⲣⲡⲉⲧⲛⲁⲛⲟⲩϥ ⲛⲁⲛ ⲙⲁⲩⲁⲁϥ ·
…
36 ⲱ ⲡⲉⲧⲉⲙⲛⲗⲁⲁⲩ ⲙⲙⲛⲧϫⲁⲥⲓϩⲏⲧ ϩⲏⲡ ⲛϩⲏⲧϥ ·
…
37 ⲱ ⲡⲛⲁⲏⲧ ⲙⲁⲩⲁⲁϥ · ⲁⲩⲱ ⲡⲙⲁⲓⲣⲱⲙⲉ ⲛⲓⲙ ·
…
38 ⲱ ⲡⲥⲱⲧⲏⲣ ⲙⲁⲩⲁⲁϥ · ⲁⲩⲱ ⲡⲇⲓⲕⲁⲓⲟⲥ · ⲡⲉⲧϣⲟⲟⲡ ϩⲙⲙⲁ ⲛⲓⲙ · ⲡⲉⲧϣⲱⲱⲡ ϫⲓⲛⲉⲛⲉϩ · ⲡⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ·
…
39 ⲛⲧⲟⲕ ⲡⲉⲧⲥⲕⲩⲡⲁⲍⲉ ⲛⲟⲩⲟⲛ ⲛⲓⲙ ⲉⲧϩⲉⲗⲡⲓⲍⲉ ⲉⲣⲟⲕ · ϩⲛⲛⲉⲕⲇⲱⲣⲉⲁ ⲙⲛⲛⲉⲕⲙⲛⲧⲛⲁ · ⲉⲕⲥⲟⲟⲩⲛ ⲛⲧⲉⲭⲛⲏ ⲛⲓⲙ ⲙⲛⲉⲡⲏⲣⲉⲓⲁ ⲛⲓⲙ ⲛⲧⲉⲡϫⲁϫⲉ ⲉⲧϯⲟⲩⲃⲏⲛ ⲛⲟⲩⲟⲉⲓϣ ⲛⲓⲙ ·
…
40 ⲁⲩⲱ ⲙⲛⲛⲥⲁⲧⲣⲉϥϫⲉⲛⲁⲓ ⲛϭⲓⲡⲡⲉⲧⲟⲩⲁⲁⲃ ⲓⲱϩⲁⲛⲛⲏⲥ ⲡⲉⲩⲁⲅⲅⲉⲗⲓⲥⲧⲏⲥ · ⲁϥϫⲓ ⲛⲟⲩⲟⲉⲓⲕ · ⲁϥϣⲡϩⲙⲟⲧ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲁϣ ⲡⲉ ⲡⲕⲉⲥⲙⲟⲩ · ⲏ ⲁϣ ⲡⲉ ⲡⲕⲉⲉⲓ ⲉⲃⲟⲗ ⲙⲡϣⲁϫⲉ · ⲏ ⲁϣ ⲧⲉ ⲧⲕⲉⲉⲩⲭⲁⲣⲓⲥⲧⲓⲁ ⲉⲛⲛⲁⲟⲛⲟⲙⲁⲍⲉ ⲙⲙⲟⲟⲩ ⲉϫⲙⲡⲉⲓⲟⲉⲓⲕ ⲉⲛⲡⲱϣ ⲙⲙⲟϥ · ⲉⲓⲙⲏⲧⲓ ⲛⲧⲟⲕ ⲙⲁⲩⲁⲁⲕ · ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
41 ⲧⲛϯⲉⲟⲟⲩ ⲛⲁⲕ ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲁⲓ ⲛⲧⲁⲩⲟⲩⲉⲛϩⲡⲉϥⲣⲁⲛ ⲉⲃⲟⲗ ϩⲓⲧⲙⲡⲉⲓⲱⲧ ·
…
42 ⲧⲛϯⲉⲟⲟⲩ ⲛⲧⲉⲕϭⲓⲛⲉⲓ ⲉϩⲟⲩⲛ ϩⲓⲧⲙⲡⲣⲟ ·
…
43 ⲧⲛϯⲉⲟⲟⲩ ⲛⲧⲉⲕⲁⲛⲁⲥⲧⲁⲥⲓⲥ ⲉⲧⲟⲩⲁⲁⲃ · ⲉⲃⲟⲗ ϩⲛⲛⲉⲧⲙⲟⲟⲩⲧ · ⲧⲁⲓ ⲛⲧⲁⲩⲧⲥⲁⲃⲟⲛ ⲉⲣⲟⲥ · ⲉⲃⲟⲗ ϩⲓⲧⲟⲟⲧⲕ ·
…
44 ⲧⲛϯⲉⲟⲟⲩ ⲛⲁⲕ ⲧⲉϩⲓⲏ ·
…
45 ⲧⲛϯⲉⲟⲟⲩ ⲛⲁⲕ ⲡⲉϭⲣⲟⲟϭ · ⲡⲗⲟⲅⲟⲥ · ⲡⲉϩⲙⲟⲩ · ⲡⲱⲛⲉ ⲙⲙⲉ · ⲡⲁϩⲟ ⲉⲧⲟⲩⲁⲁⲃ · ⲡϩⲃⲃⲉ · ⲧⲁⲃⲱ · ⲧⲙⲛⲧⲛⲟϭ · ⲡⲉⲛⲧⲁⲩϫⲟⲟⲥ ⲉⲣⲟϥ · ϫⲉϣⲏⲣⲉ ⲛⲣⲱⲙⲉ ⲉⲧⲃⲏⲏⲧⲛ · ϫⲉⲕⲁⲥ ⲉϥⲉⲧⲟⲩϫⲟ ⲙⲡⲅⲉⲛⲟⲥ ⲛⲛⲣⲱⲙⲉ ·
…
46 ⲧⲛϯⲉⲟⲟⲩ ⲛⲁⲕ ⲧⲙⲉ · ⲡⲙⲧⲟⲛ · ⲡⲉⲟⲟⲩ · ⲧϭⲟⲙ ⲧⲉⲛⲧⲟⲗⲏ · ⲧⲡⲁⲣⲣⲏⲥⲓⲁ · ⲧⲙⲛⲧⲣⲙϩⲉ · ⲡⲉⲛⲙⲁ ⲙⲡⲱⲧ ·
…
47 ⲛⲧⲟⲕ ⲅⲁⲣ ⲡⲉ ⲡϫⲟⲉⲓⲥ · ⲧⲛⲟⲩⲛⲉ ⲛⲧⲙⲛⲧⲁⲧⲙⲟⲩ · ⲁⲩⲱ ⲧⲡⲏⲅⲏ ⲛⲧⲙⲛⲧⲁⲧⲧⲁⲕⲟ · ⲁⲩⲱ ⲡⲧⲁϫⲣⲟ ⲛⲛⲁⲓⲱⲛ ·
…
48 ⲉⲁⲩⲧⲁⲩⲉⲡⲉⲕⲣⲁⲛ ⲉϫⲛⲛⲁⲓ ⲧⲏⲣⲟⲩ · ϫⲉⲕⲁⲥ ⲁⲛⲟⲛ ϩⲱⲱⲛ ⲉⲛⲛⲁⲉⲡⲓⲕⲁⲗⲉⲓ ⲙⲙⲟⲕ ϩⲓⲧⲛⲛⲁⲓ ·
…
49 ⲧⲛⲥⲟⲟⲩⲛ ⲅⲁⲣ ⲛⲧⲉⲕⲙⲛⲧⲛⲟϭ ⲛⲁⲧⲛⲁⲩ ⲉⲣⲟⲥ · ⲧⲁⲓ ⲉⲧⲉⲛⲥⲟⲩⲟⲛϩ ⲉⲣⲟⲛ ⲁⲛ ⲧⲉⲛⲟⲩ ·
…
50 ϩⲟⲧⲁⲛ ⲉⲕϣⲁⲛⲧⲃⲃⲟⲛ · ⲧⲟⲧⲉ ⲧⲛⲛⲁⲛⲁⲩ ⲉⲣⲟⲕ ϩⲙⲡⲥⲱⲙⲁ ⲙⲁⲩⲁⲁϥ · ⲡⲁⲓ ⲛⲧⲁⲕⲁⲁϥ ⲛⲃⲣⲣⲉ ϩⲛⲟⲩⲙⲛⲧⲁⲥ ·
…
51 ⲁⲩⲱ ⲛⲧⲉⲣⲉϥⲡⲉϣ ⲡⲟⲉⲓⲕ · ⲁϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲛⲛⲉⲥⲛⲏⲩ · ϫⲉⲕⲁⲥ ⲉⲩⲉⲙⲡϣⲁ ⲛⲧⲉⲭⲁⲣⲓⲥ ⲙⲡϫⲟⲉⲓⲥ ·
…
52 ϩⲟⲙⲟⲓⲱⲥ ⲛⲧⲟϥ ϩⲱⲱϥ · ⲡⲡⲉⲧⲟⲩⲁⲁⲃ · ⲓⲱϩⲁⲛⲛⲏⲥ · ⲛⲧⲉⲣⲉϥϫⲓϯⲡⲉ ⲙⲡⲟⲉⲓⲕ ·
…
53 ⲉⲁϥϫⲟⲟⲥ ⲛⲧⲉⲓϩⲉ ⲛϭⲓⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲉϥϫⲱ ⲙⲙⲟⲥ · ϫⲉⲙⲁⲣⲉⲟⲩⲙⲉⲣⲓⲥ ϣⲱⲡⲉ ⲛⲁⲓ ϩⲱ ⲛⲙⲙⲏⲧⲛ ϩⲛⲟⲩⲉⲓⲣⲏⲛⲏ · ⲱ ⲛⲁⲙⲉⲣⲁⲧⲉ ·
…
54 ⲧⲟⲧⲉ ⲡⲉϫⲁϥ ⲛⲃⲓⲃⲣⲟⲥ ϫⲉϫⲓ ⲛⲙⲙⲁⲕ ⲛⲥⲟⲛ ⲥⲛⲁⲩ · ⲉⲩⲛϩⲉⲛⲃⲓⲣ ⲛⲧⲟⲟⲧⲟⲩ · ⲙⲛϩⲉⲛⲧⲱⲣⲉ · ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲓ ·
…
55 ⲃⲓⲃⲣⲟⲥ ⲇⲉ ⲙⲡⲉϥⲁⲙⲉⲗⲉⲓ ⲉⲡⲧⲏⲣϥ · ⲁⲗⲗⲁ ⲁϥⲉⲓⲣⲉ ⲙⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲁϥ ⲉⲃⲟⲗ ϩⲓⲧⲟⲟⲧϥ ⲙⲡⲡⲉⲧⲟⲩⲁⲁⲃ ⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲡϩⲙϩⲁⲗ ⲙⲡⲛⲟⲩⲧⲉ ·
…
56 ⲛⲧⲉⲣⲉⲡⲙⲁⲕⲁⲣⲓⲟⲥ ⲇⲉ ⲓⲱϩⲁⲛⲛⲏⲥ ⲉⲓ ⲉⲃⲟⲗ ϩⲙⲡⲉϥⲏⲓ · ⲁϥⲙⲟⲟϣⲉ ⲡⲃⲟⲗ ⲛⲧⲡⲩⲗⲏ ⲛⲧⲡⲟⲗⲓⲥ · ⲉⲁϥϫⲟⲟⲥ ⲉⲧⲣⲉⲡⲉϩⲟⲩⲟ ⲙⲡⲙⲏⲏϣⲉ ⲉⲧⲟⲩⲏϩ ⲛⲥⲱϥ · ⲃⲱⲕ ⲛⲥⲉⲗⲟ ϩⲁⲣⲟϥ ·
…
57 ⲛⲧⲉⲣⲉϥⲡⲱϩ ⲇⲉ ⲉⲩⲙⲁ ⲛⲙϩⲁⲁⲩ · ⲉⲡⲁⲟⲩⲁ ⲡⲉ ϩⲛⲛⲉⲥⲛⲏⲩ ⲁϥϫⲟⲟⲥ ⲛⲛⲉϩⲣϣⲓⲣⲉ · ϫⲉϣⲓⲕⲉ ϩⲙⲡⲉⲓⲙⲁ ⲛⲁϣⲏⲣⲉ ·
…
58 ⲛⲉⲧⲙⲙⲁⲩ ⲇⲉ ⲁⲩϣⲓⲕⲉ ⲉⲡⲉⲥⲏⲧ ·
…
59 ⲛⲧⲟϥ ⲇⲉ ⲓⲱϩⲁⲛⲛⲏⲥ ⲡⲑⲉⲟⲗⲟⲅⲟⲥ · ⲛⲉϥⲟⲩⲉϩⲥⲁϩⲛⲉ ⲛⲁⲩ · ϫⲉϣⲓⲕⲉ ⲉⲡⲉⲥⲏⲧ ⲕⲁⲗⲱⲥ ·
…
60 ⲁⲩⲱ ⲛⲉϥϫⲱ ⲙⲙⲟⲥ · ϫⲉϭⲱϫⲉ ⲉⲡⲉⲥⲏⲧ ⲉⲡⲉϩⲟⲩⲟ ·
…
61 ⲉⲩϭⲱϫⲉ ⲇⲉ ⲉⲡⲉⲥⲏⲧ ⲛϭⲓⲛⲉⲧⲙⲙⲁⲩ ·
…
62 ⲛⲉϥϣⲁϫⲉ ⲛⲙⲙⲁⲩ ϩⲙⲡϣⲁϫⲉ · ⲁⲩⲱ ⲛⲉϥⲡⲣⲟⲧⲣⲉⲡⲉ ⲙⲙⲟⲟⲩ · ⲉϥⲕⲱⲧ ⲙⲙⲟⲟⲩ · ⲉϥⲥⲟⲃⲧⲉ ⲙⲙⲟⲟⲩ ⲁⲩⲱ ⲉϥⲡⲉⲓⲑⲉ ⲙⲙⲟⲟⲩ ⲉϩⲟⲩⲛ ⲉⲧⲙⲛⲧⲣⲣⲟ ⲙⲡⲛⲟⲩⲧⲉ ·
…
63 ⲁⲩⲱ ⲛⲉϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲙⲙⲟⲟⲩ ·
…
64 ⲛⲧⲉⲣⲉⲛϩⲣϣⲓⲣⲉ ⲇⲉ ⲟⲩⲱ ⲉⲩϭⲱϫⲉ · ⲙⲡⲧⲟⲡⲟⲥ ⲉⲧⲟⲩϣⲓⲕⲉ ⲛϩⲏⲧϥ · ⲉⲁⲩⲥⲙⲛⲧϥ ⲕⲁⲗⲱⲥ · ⲕⲁⲧⲁⲧϩⲉ ⲛⲧⲁϥⲟⲩⲁϣⲥ ·
…
65 ⲁⲩⲱ ⲁⲛⲟⲛ ⲙⲡⲉⲛⲉⲓⲙⲉ ⲉⲗⲁⲁⲩ ·
…
66 ⲧⲟⲧⲉ ⲁϥⲕⲁⲁϥ ⲕⲁϩⲏⲩ ⲛⲛⲉϩⲟⲓⲧⲉ ⲉⲧⲧⲟ ϩⲓⲱⲱϥ ·
…
67 ⲁϥⲛⲟⲩϫⲉ ⲙⲙⲟⲟⲩ ⲉⲡⲉⲥⲏⲧ ⲉⲡⲧⲟⲡⲟⲥ ⲛⲧⲁⲩϭⲱϫⲉ ⲙⲙⲟϥ ⲉⲡⲉⲥⲏⲧ ⲙⲡⲉⲥⲙⲟⲧ · ⲛⲟⲩⲙⲁ ⲉϥⲡⲟⲣϣ ·
…
68 ⲛⲧⲟϥ ⲇⲉ ⲉⲛⲉϥⲁϩⲉⲣⲁⲧϥ · ⲉⲣⲉⲟⲩϣⲧⲏⲛ ⲛϩⲃⲟⲟⲥ ϩⲓⲱⲱϥ · ⲙⲁⲩⲁⲁⲥ · ⲉⲥϫⲓ ⲧⲟⲧⲉ ⲉⲡⲥⲁ ⲥⲛⲁⲩ ·
…
69 ⲁⲩⲱ ⲁϥⲡⲱⲣϣ ⲛⲛⲉϥϭⲓϫ ⲉⲃⲟⲗ ⲁϥϣⲗⲏⲗ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲡⲛⲟⲩⲧⲉ ⲡⲉⲛⲧⲁϥⲥⲱⲧⲡ ⲙⲙⲟⲓ ⲛⲁϥ · ⲉⲩⲙⲛⲧⲁⲡⲟⲥⲧⲟⲗⲟⲥ ⲛⲛϩⲉⲑⲛⲟⲥ · ⲉⲁⲕⲧⲛⲛⲟⲟⲩⲧ ⲉⲃⲟⲗ ⲉⲧⲟⲓⲕⲟⲩⲙⲉⲛⲏ ·
…
70 ⲡⲉⲛⲧⲁϥⲟⲩⲱⲛϩ ⲉⲃⲟⲗ ⲛⲛⲉⲡⲣⲟⲫⲏⲧⲏⲥ · ⲙⲛⲛⲉϥⲁⲡⲟⲥⲧⲟⲗⲟⲥ ·
…
71 ⲡⲉⲧⲉⲙⲡⲉϥϭⲱ ⲉⲛⲉϩ · ⲉϥⲣⲡⲉⲧⲛⲁⲛⲟⲩϥ · ϫⲓⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ · ⲉϥⲧⲟⲩϫⲟ ⲛⲟⲩⲟⲛ ⲛⲓⲙ · ⲉⲧⲉⲙⲛϭⲟⲙ ⲙⲙⲟⲟⲩ ·
…
72 ⲡⲉⲛⲧⲁϥⲧⲣⲉⲩⲥⲟⲩⲱⲛϥ · ⲉⲃⲟⲗ ϩⲓⲧⲛⲣⲱⲙⲉ ⲛⲓⲙ ⲛⲗⲟⲅⲓⲕⲟⲛ ⲙⲛⲍⲱⲟⲛ ⲛⲓⲙ · ⲉⲩⲇⲓⲁⲕⲟⲛⲉⲓ ⲙⲙⲟⲟⲩ ⲉⲃⲟⲗ ϩⲓⲧⲛⲧⲉϥⲡⲣⲟⲛⲟⲓⲁ ·
…
73 ⲡⲉⲛⲧⲁϥⲧⲣⲉⲧⲉⲛⲯⲩⲭⲏ ⲣϩⲩⲙⲉⲣⲟⲥ · ⲉⲁϥⲧⲣⲉⲥϩⲣⲟⲕ · ⲉⲥⲟ ⲛϫⲁⲉⲓⲉ · ⲁⲩⲱ ⲛⲁⲅⲣⲓⲟⲥ ·
…
74 ⲡⲉⲛⲧⲁϥⲧⲁⲁⲥ ⲛⲁϥ ⲙⲙⲓⲛⲙⲙⲟϥ ⲉⲥⲱⲃⲉ ⲛⲛⲉϥϫⲁϫⲉ ·
…
75 ⲡⲉⲛⲧⲁϥϭⲟⲗⲡⲥ ⲛⲁϥ ⲉⲥⲙⲟⲟⲩⲧ · ⲉⲁϥⲣⲛⲟⲙⲟⲥ ⲛⲁⲥ ⲉⲥⲟⲙⲥ ϩⲙⲡϣⲓⲕ ⲛⲧⲁⲛⲟⲙⲓⲁ ·
…
76 ⲡⲉⲛⲧⲁϥⲧⲣⲉⲥϫⲣⲟ ⲉⲛⲉⲥϫⲁϫⲉ ϩⲙⲡⲧⲣⲉⲥⲡⲱⲧ ⲉⲣⲁⲧϥ ·
…
77 ⲡⲉⲛⲧⲁϥϯ ⲛⲁⲥ ⲛⲧⲉϥϭⲓϫ · ⲁⲩⲱ ⲁϥⲧⲟⲩϫⲟⲥ ⲉⲃⲟⲗ ϩⲛⲁⲙⲛⲧⲉ ·
…
78 ⲡⲉⲧⲙⲡⲉϥⲕⲁⲁⲥ ⲉⲡⲟⲗⲓⲧⲉⲩⲉ ϩⲙⲡⲕⲟⲥⲙⲟⲥ ·
…
79 ⲡⲉⲛⲧⲁϥⲧⲥⲁⲃⲉ ⲉⲓⲁⲁⲧⲥ ⲉⲃⲟⲗ ⲉⲛⲉⲥϫⲁϫⲉ ·
…
80 ⲡⲉⲛⲧⲁϥⲧⲣⲉⲡⲉϥⲥⲟⲟⲩⲛ ⲣⲟⲩⲟⲉⲓⲛ ϩⲙⲙⲁ ⲛⲓⲙ ·
…
81 ⲡϣⲏⲣⲉ ⲙⲡⲛⲟⲩⲧⲉ · ⲡⲥⲱⲧⲏⲣ · ⲡϫⲟⲉⲓⲥ · ⲧⲧⲁⲝⲓⲥ ⲛⲛⲉⲧϩⲙⲡⲁⲏⲣ ·
…
82 ⲡⲣⲉϥϩⲁⲣⲉϩ ⲉⲛⲉⲧϩⲓϫⲙⲡⲕⲁϩ · ⲧⲉⲭⲁⲣⲓⲥ · ⲁⲩⲱ ⲡⲣⲁϣⲉ ⲛⲛⲉⲧⲉⲛⲟⲩⲃ ⲛⲉ ·
…
83 ϣⲱⲡ ⲉⲣⲟⲕ ⲛⲧⲉⲯⲩⲭⲏ ⲛⲓⲱϩⲁⲛⲛⲏⲥ · ⲡⲉⲧⲉⲡⲱⲕ ⲡⲉ · ⲧⲁⲓ ⲛⲧⲁⲕⲁⲁⲥ ⲛⲙⲡϣⲁ ⲉⲧⲣⲉⲕⲥⲟⲩⲱⲛⲥ ·
…
84 ⲛⲧⲟⲕ ⲅⲁⲣ ⲡⲉ ⲛⲧⲁⲕϩⲁⲣⲉϩ ⲉⲣⲟⲓ ϣⲁⲧⲉⲛⲟⲩ ⲙⲡⲉⲓⲧⲱⲗⲙ ϩⲟⲗⲱⲥ ⲙⲛⲥϩⲓⲙⲉ ·
…
85 ⲁⲕⲟⲩⲟⲛϩⲕ ⲛⲁⲓ ⲉⲃⲟⲗ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ ϩⲛⲧⲁⲙⲛⲧⲃⲣⲣⲉ ·
…
86 ⲁⲩⲱ ⲁⲕϫⲟⲟⲥ ⲛⲁⲓ · ϫⲉⲓⲱϩⲁⲛⲛⲏⲥ · ϯⲣⲭⲣⲉⲓⲁ ⲙⲙⲟⲕ ·
…
87 ⲁⲕⲣϣⲟⲣⲡ ·
…
88 ⲁⲕⲟⲓⲕⲟⲛⲟⲙⲉⲓ ⲙⲡⲁⲥⲱⲙⲁ ⲛⲟⲩⲉϣ ⲛϣⲱⲛⲉ ⲛⲥⲱⲙⲁⲧⲓⲕⲟⲛ ·
…
89 ⲛⲧⲟⲕ ⲡⲉⲛⲧⲁⲕϯϫⲣⲟⲡ ⲛⲁⲓ ⲛϩⲁϩ ⲛⲥⲟⲡ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ ·
…
90 ⲙⲛⲛⲥⲱⲥ ⲁⲕϣⲁϫⲉ ⲛⲙⲙⲁⲓ ⲛϫⲡϣⲟⲙⲧⲉ ⲙⲡⲉϩⲟⲟⲩ ϩⲓϫⲛⲧϩⲁⲗⲁⲥⲥⲁ · ϫⲉⲓⲱϩⲁⲛⲛⲏⲥ ⲉⲛⲉ ⲛⲧⲟⲕ ⲡⲉⲧⲉⲡⲱⲓ ⲁⲛ ⲡⲉ · ⲛⲉⲓⲛⲁⲗⲟ ϩⲁⲣⲟⲕ ⲡⲉ · ⲛⲅϫⲓⲥϩⲓⲙⲉ · ⲁⲩⲱ ⲛⲅⲣⲃⲗⲗⲉ ⲉⲡⲉⲕⲃⲁⲗ ⲥⲛⲁⲩ · ⲛⲅϭⲱ ⲉⲕⲣϩⲏⲃⲉ · ⲉⲕⲧⲱⲃϩ ⲙⲙⲟⲓ ·
…
91 ⲡⲉⲛⲧⲁϥⲟⲩⲱⲛ ⲙⲡⲁϩⲏⲧ ϩⲛⲧⲁⲙⲉϩϣⲟⲙⲧⲉ ⲛⲣⲟⲙⲡⲉ ·
…
92 ⲁⲕⲭⲁⲣⲓⲍⲉ ⲛⲁⲓ ⲛϩⲉⲛ ⲕⲉⲃⲁⲗ · ⲛⲥⲉⲟⲩⲟⲛϩ ⲉⲃⲟⲗ ⲁⲛ ·
…
93 ⲡⲉⲛⲧⲁϥⲧⲣⲉⲡϭⲱⲛⲧ · ⲏ ⲡⲉⲓⲱⲣϩ ⲛⲛⲉϩⲓⲟⲙⲉ ϣⲱⲡⲉ ⲛⲁⲓ ⲛⲃⲟⲧⲉ ·
…
94 ⲡⲉⲛⲧⲁϥⲛⲁϩⲙⲧ ⲉⲃⲟⲗ ϩⲛⲛⲉⲫⲁⲛⲧⲁⲥⲓⲁ ⲙⲡⲣⲟⲥⲟⲩⲟⲉⲓϣ · ⲉⲁϥϩⲁⲣⲉϩ ⲉⲣⲟⲓ ⲉⲡⲱⲛϩ ⲉⲧⲙⲏⲛ ⲉⲃⲟⲗ ·
…
95 ⲡⲉⲛⲧⲁϥⲁⲁⲧ ⲛϣⲙⲙⲟ ⲉⲧⲙⲁⲛⲓⲁ ⲉⲧϩⲟⲟⲩ · ⲧⲁⲓ ⲉⲧϣⲟⲟⲡ ϩⲛⲧⲥⲁⲣⲝ ⲉⲁϥⲧⲣⲁⲟⲩⲉ ⲉⲃⲟⲗ ⲙⲡⲙⲟⲩ ⲉⲧⲥⲁϣⲉ ·
…
96 ⲡⲉⲛⲧⲁϥⲛⲁϩⲙⲉⲧ ⲉⲡⲙⲟⲩ ⲙⲙⲉϩⲥⲛⲁⲩ · ⲉⲧⲉⲧⲅⲉϩⲉⲛⲛⲁ ⲛⲥⲁⲧⲉ ⲧⲉ · ⲉⲁⲕⲧⲁϩⲟⲓ ⲉⲣⲁⲧ ⲉⲓⲟⲩⲁⲁⲃ ·
…
97 ⲡⲉⲛⲧⲁϥⲧⲱⲙ ⲉⲣⲱϥ ⲙⲡϣⲱⲛⲉ ⲉⲧϩⲏⲡ ⲛⲧⲁⲯⲩⲭⲏ ·
…
98 ⲁⲩⲱ ⲁⲕϣⲱϣⲧ ⲉⲃⲟⲗ ⲛⲧⲉⲡⲣⲁⲝⲓⲥ ⲉⲧϩⲏⲡ · ⲏ ⲡϩⲱⲃ ⲉⲧⲟⲩⲟⲛϩ ⲉⲃⲟⲗ · ⲡⲁⲓ ⲉϣⲁⲩⲧⲁⲁϥ ϩⲙⲡⲥⲱⲙⲁ ·
…
99 ⲡⲉⲛⲧⲁϥⲛⲁϩⲙⲉⲧ · ⲁⲩⲱ ⲁϥⲛⲟⲩϫⲉ ⲉⲃⲟⲗ ⲛϩⲏⲧ · ⲙⲡⲉⲧϣⲧⲟⲣⲧⲣ ⲙⲙⲟⲓ ·
…
100 ⲡⲉⲛⲧⲁϥⲥⲟⲃⲧⲉ ⲛⲧⲁϭⲓⲛⲃⲱⲕ ϣⲁⲣⲟϥ ⲉⲥⲟⲩⲁⲁⲃ ·
…
101 ⲡⲉⲛⲧⲁϥⲕⲁⲛⲁⲙⲉⲉⲩⲉ ⲉⲩϣⲟⲟⲡ ⲉϩⲟⲩⲛ ⲉⲣⲟϥ ⲛⲁⲧⲧⲱⲗⲙ ·
…
102 ⲡⲉⲛⲧⲁϥⲭⲁⲣⲓⲍⲉ ⲛⲁⲓ ⲛⲧⲉϥⲡⲓⲥⲧⲓⲥ ⲉⲛⲥⲡⲏϣ ⲁⲛ ·
…
103 ⲡⲉⲛⲧⲁϥⲧⲣⲉⲛⲁⲙⲉⲉⲩⲉ · ⲙⲛⲛⲁϣⲟϫⲛⲉ ϣⲱⲡⲉ ⲉⲩⲣϩⲟⲩⲟ ⲉϩⲟⲩⲛ ⲉⲣⲟϥ ·
…
104 ⲡⲉⲧϯ ⲙⲡⲟⲩⲁ ⲡⲟⲩⲁ · ⲕⲁⲧⲁⲛⲉϥϩⲃⲏⲩⲉ ·
…
105 ⲡⲉⲛⲧⲁϥⲕⲱ ϩⲣⲁⲓ ϩⲛⲧⲁⲯⲩⲭⲏ · ⲉⲧⲙⲕⲁⲗⲁⲁⲩ ⲛⲁⲓ · ⲛⲥⲁⲃⲗⲗⲁⲕ ⲙⲁⲩⲁⲁⲕ ⲡϫⲟⲉⲓⲥ ·
…
106 ⲟⲩ ⲅⲁⲣ ⲡⲉⲧⲓⲛⲁϩⲉ ⲉⲣⲟϥ ⲉϥⲥⲱⲧⲡ · ⲉϥⲧⲃⲃⲏⲩ ⲉϩⲟⲩⲟ ⲉⲣⲟⲕ ·
…
107 ⲧⲉⲛⲟⲩ ⲇⲉ ⲁⲓϩⲉ ⲉⲣⲟⲕ · ⲁⲩⲱ ⲁⲓϫⲱⲕ ⲉⲃⲟⲗ ⲛⲧⲟⲓⲕⲟⲛⲟⲙⲓⲁ ⲛⲧⲁⲕⲧⲁⲛϩⲟⲩⲧ ⲉⲣⲟⲥ ·
…
108 ⲁⲁⲧ ⲟⲩⲛ ⲛⲙⲡϣⲁ ⲉⲧⲣⲉⲕϯⲙⲧⲟⲛ ⲛⲁⲓ ϩⲛⲧⲉⲕⲁⲛⲁⲡⲁⲩⲥⲓⲥ ⲉⲧⲟⲩⲁⲁⲃ · ⲛⲅⲭⲁⲣⲓⲍⲉ ⲛⲁⲓ ⲛⲧⲙⲛⲧⲧⲉⲗⲓⲟⲥ ⲉⲧⲛϩⲏⲧⲕ · ⲉⲧⲉⲧⲙⲛⲧⲁⲧⲛⲟⲃⲉ ⲧⲉ · ⲙⲛⲡⲟⲩϫⲁⲓ ⲛⲁⲧϣⲁϫⲉ ⲉⲣⲟϥ · ⲁⲩⲱ ⲛⲁⲧϩⲉⲧϩⲱⲧϥ · ⲁⲩⲱ ⲛⲁⲧⲧⲁϩⲟϥ · ⲉⲓⲛⲏⲩ ϣⲁⲣⲟⲕ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
109 ⲙⲁⲣⲉϥϩⲣⲟⲕ ⲛϭⲓⲡⲕⲱϩⲧ · ⲛⲧⲉⲡⲕⲁⲕⲉ ⲁⲛⲁⲭⲱⲣⲉⲓ ⲛⲁϥ · ⲛⲧⲉⲡⲉⲭⲁⲟⲥ ⲣϭⲱⲃ · ⲛⲧⲉⲧⲉϩⲣⲱ ⲛⲥⲁⲧⲉ ϣⲱⲡⲉ ⲛⲁⲧϭⲟⲙ · ⲛⲧⲉⲧⲅⲉϩⲉⲛⲛⲁ ⲱϣⲙ · ⲁⲩⲱ ⲛⲥⲉⲟⲩⲁϩⲟⲩ ⲛⲥⲱⲓ ⲛϭⲓⲛⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲉⲛⲇⲁⲓⲙⲟⲛⲓⲟⲛ ⲣϩⲟⲧⲉ · ⲛⲥⲉⲟⲩⲱϣϥ ⲛϭⲓⲛⲁⲣⲭⲱⲛ · ⲛⲧⲉⲛⲇⲩⲛⲁⲙⲓⲥ ⲙⲡⲕⲁⲕⲉ ⲁⲛⲁⲭⲱⲣⲉⲓ ⲛⲁⲩ ⲛⲥⲉϩⲉ ⲉⲡⲉⲥⲏⲧ ⲛⲧⲉⲛⲧⲟⲡⲟⲥ ⲉⲧϩⲓⲟⲩⲛⲁⲙ ⲁϩⲉⲣⲁⲧⲟⲩ ·
…
110 ⲙⲁⲣⲉⲡⲇⲓⲁⲃⲟⲗⲟⲥ ϫⲓϣⲓⲡⲉ · ⲛⲥⲉⲥⲱⲃⲉ ⲛⲥⲁⲡⲥⲁⲧⲁⲛⲁⲥ ·
…
111 ⲙⲁⲣⲉⲡⲉϥϭⲱⲛⲧ ⲱϣⲙ · ⲛⲧⲉⲧⲉϥⲙⲁⲛⲓⲁ ϩⲣⲟⲕ ⲙⲙⲟⲥ ·
…
112 ⲙⲁⲣⲉⲡⲉϥⲧⲁⲓⲟ ϫⲓϣⲓⲡⲉ · ⲛⲧⲉⲧⲉϥⲟⲣⲅⲏ ⲟⲩⲱϣϥ · ⲙⲁⲣⲟⲩⲥⲉⲕⲛⲉϥϣⲏⲣⲉ ⲉⲡⲉⲥⲏⲧ ⲛⲥⲉⲡⲉⲣⲕⲧⲉⲩⲛⲟⲩⲛⲉ ⲧⲏⲣⲥ ·
…
113 ⲙⲁ ⲛⲁⲓ ⲛⲧⲉⲝⲟⲩⲥⲓⲁ ⲉⲧⲣⲁⲙⲟⲟϣⲉ · ⲁⲩⲱ ⲛⲧⲁϫⲉⲕⲧⲁϩⲓⲏ ⲉⲃⲟⲗ ⲁϫⲛϩⲓⲥⲉ ϩⲓϣⲧⲟⲣⲧⲣ · ⲉⲓⲛⲏⲩ ϣⲁⲣⲟⲕ ⲡⲁϫⲟⲉⲓⲥ ϫⲉⲕⲁⲥ ⲉⲓⲉϫⲓ ⲛⲛⲁⲅⲁⲑⲟⲛ ⲛⲛⲉⲛⲧⲁⲩⲱⲛϩ · ϩⲛⲟⲩⲟⲡ ·
…
114 ⲛⲁⲓ ⲇⲉ ⲛⲧⲉⲣⲉϥϫⲟⲟⲩ · ⲛϭⲓⲓⲱϩⲁⲛⲛⲏⲥ ⲡⲑⲉⲟⲗⲟⲅⲟⲥ · ⲉϥϭⲱϣⲧ ⲉⲙⲙⲁ ⲛϣⲁ ⲉϥϯⲉⲟⲟⲩ ⲙⲡⲛⲟⲩⲧⲉ ·
…
115 ⲉⲁϥⲡⲉⲣϣⲛⲉϥϭⲓϫ ⲟⲛ ⲉⲃⲟⲗ ⲁϥϣⲗⲏⲗ · ⲉϥϫⲱ ⲙⲙⲟⲥ · ϫⲉⲛⲧⲟⲕ ⲕϣⲟⲟⲡ ⲛⲙⲙⲁⲓ · ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
…
116 ⲁⲩⲱ ⲛⲧⲉⲩⲛⲟⲩ ⲁϥϥⲟϭϥ ⲉⲡⲉⲥⲏⲧ ⲉⲡϣⲓⲕ ⲛⲧⲁⲩϣⲁⲕⲧϥ · ⲡⲙⲁ ⲉⲧⲉⲛⲉϥϩⲟⲓⲧⲉ ⲡⲟⲣϣ ⲛϩⲏⲧϥ ·
…
117 ⲁⲩⲱ ⲛⲧⲉⲣⲉϥϫⲟⲟⲥ ⲛⲁⲩ ϫⲉⲧⲉⲓⲣⲏⲛⲏ ⲁⲩⲱ ⲧⲉⲭⲁⲣⲓⲥ · ⲁϥⲕⲁⲛⲉⲥⲛⲏⲩ ⲉⲃⲟⲗ · ⲁⲩⲃⲱⲕ ⲁⲩⲉⲓ ⲉⲃⲟⲗ ⲙⲡⲉϥⲣⲁⲥⲧⲉ ·
…
118 ⲛⲧⲟϥ ⲙⲉⲛ ⲙⲡⲟⲩϩⲉ ⲉⲣⲟϥ · ⲁⲗⲗⲁ ⲁⲩϩⲉ ⲉⲡⲉϥⲥⲁⲛⲇⲁⲗⲓⲟⲛ · ⲙⲛⲟⲩⲕⲁϩ ⲛⲃⲣⲣⲉ ϩⲣⲁⲓ ϩⲙⲡⲙⲁ ⲛⲧⲁϥⲃⲱⲕ ⲉⲡⲉⲥⲏⲧ ⲉⲣⲟϥ ·
…
119 ⲁⲩⲣⲡⲙⲉⲉⲩⲉ ⲗⲟⲓⲡⲟⲛ ⲙⲡϣⲁϫⲉ · ⲛⲧⲁⲡϫⲟⲉⲓⲥ ϫⲟⲟϥ ⲙⲡⲉⲧⲣⲟⲥ ϫⲉⲉⲓϣⲁⲛⲟⲩⲱϣ ⲉⲧⲣⲉϥϭⲱ ϣⲁⲛⲧⲓⲉⲓ · ⲛⲧⲕ ⲛⲓⲙ ⲛⲧⲟⲕ ⲟⲩⲁϩⲕ ⲛⲥⲱⲓ ·
…
120 ⲁⲩⲱ ⲁⲩϯⲉⲟⲟⲩ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲉϫⲛⲧⲉϣⲡⲏⲣⲉ ⲛⲧⲁⲥϣⲱⲡⲉ ⲙⲡⲙⲁⲕⲁⲣⲓⲟⲥ ⲛⲁⲡⲟⲥⲧⲟⲗⲟⲥ · ⲁⲩⲱ ⲛⲉⲩⲁⲅⲅⲉⲗⲓⲥⲧⲏⲥ · ⲁⲩⲱ ⲡⲑⲉⲟⲗⲟⲅⲟⲥ · ⲁⲩⲱ ⲡⲡⲁⲣⲑⲉⲛⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲓⲱϩⲁⲛⲛⲏⲥ · ⲡⲙⲉⲣⲓⲧ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲁⲩⲱ ⲡⲉⲛⲛⲟⲩⲧⲉ · ⲁⲩⲱ ⲡⲉⲛⲥⲱⲧⲏⲣ ·
…
121 ⲡⲁⲓ ⲉⲣⲉⲉⲟⲟⲩ ⲛⲓⲙ ⲡⲣⲉⲡⲉⲓ ⲙⲡⲉⲓⲱⲧ ⲛⲙⲙⲁϥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲛⲣⲉϥⲧⲁⲛϩⲟ ⲙⲡⲧⲏⲣϥ · ⲁⲩⲱ ⲛϩⲟⲙⲟⲟⲩⲥⲓⲟⲛ · ⲧⲉⲛⲟⲩ · ⲁⲩⲱ ⲛⲟⲩⲟⲉⲓϣ ⲛⲓⲙ · ϣⲁⲛⲁⲓⲱⲛ ⲧⲏⲣⲟⲩ ⲛⲛⲁⲓⲱⲛ ϩⲁⲙⲏⲛ :—
…